1Chiah-ê tāi-chì以後，耶穌tī Thê-pí-lī-a ê海邊，koh顯明家己hō͘學生看；伊ê出現記tī下底。Chiah ê tāi-chì í-āu, Iâ-so͘ tī Thê-pí-lī-a ê hái-piⁿ, koh hián-bêng ka-kī hō͘ ha̍k-seng khòaⁿ; I ê chhut-hiān kì tī ē-tóe.

2有西門彼得、多馬，稱Té-thó͘-má，加利利ê Ka-ná人那但業，Se-pí-thài ê kiáⁿ，iáu有學生兩個lóng saⁿ-kap tī-teh。Ū Se-bûn Pí-tek, To-má, chheng Té-thó͘-má, Ka-lī-lī ê Ka-ná lâng Ná-tàn-gia̍p, Se-pí-thài ê kiáⁿ, iáu ū ha̍k-seng nn̄g ê lóng saⁿ-kap tī-teh.

3西門彼得kā in講，我beh去討魚。In kā伊講，阮亦beh kap你去。就出去，上船；hit暝無掠tio̍h甚麼。Se-bûn Pí-tek kā in kóng, Góa beh khì thó-hî. In kā i kóng, Goán ia̍h beh kap lí khì. Chiū chhut-khì, chiūⁿ chûn; hit mî bô lia̍h-tio̍h sím-mi̍h.

4天phú光，耶穌khiā tī海坪，但是學生m̄知伊是耶穌。Thiⁿ phú-kng, Iâ-so͘ khiā tī hái-phiâⁿ, nā-sī ha̍k-seng m̄ chai I sī Iâ-so͘.

5耶穌就kā in講，細kiáⁿ ah，lín有物配無？In講，無。Iâ-so͘ chiū kā in kóng, Sòe-kiáⁿ ah, lín ū mi̍h-phè bô? In kóng, Bô.

6伊就kā in講，拋網tī船ê chiàⁿ-pêng，就會得tio̍h。In拋落去，就網拖bōe起來，是因為魚chōe ê緣故。I chiū kā in kóng, Pha bāng tī chûn ê chiàⁿ pêng, chiū ōe tit-tio̍h. In pha-lo̍h-khì, chiū bāng thoa bōe khí-lâi, sī in-ūi hî chōe ê iân-kò͘.

7Tùi án-ni，耶穌所疼hit-ê學生kā彼得講，是主lah。西門彼得一下聽見是主，因為thǹg-pak-theh就用外衫來hâ，跳落海。Tùi án-ni, Iâ-so͘ só͘ thiàⁿ hit ê ha̍k-seng kā Pí-tek kóng, Sī Chú lah. Se-bûn Pí-tek chi̍t-ē thiaⁿ-kìⁿ sī Chú, in-ūi thǹg-pak-theh chiū ēng gōa-saⁿ lâi hâ, thiàu-lo̍h hái.

8其餘ê學生，(因為離坪無遠，約略三十丈) ，用細隻船來拖hit網ê魚。Kî-û ê ha̍k-seng, (in-ūi lī phiâⁿ bô hn̄g, iok-lio̍k saⁿ-cha̍p tn̄g), ēng sòe chiah chûn lâi thoa hit bāng ê hî.

9到上坪，看見有teh to̍h ê炭，頂面有魚，koh有餅。Kàu chiūⁿ phiâⁿ, khòaⁿ-kìⁿ ū teh to̍h ê thòaⁿ, téng-bīn ū hî, koh ū piáⁿ.

10耶穌kā in講，Tú-á拋tio̍h ê魚，掠幾尾來。Iâ-so͘ kā in kóng, Tú-á pha-tio̍h ê hî, lia̍h kúi bé lâi.

11西門彼得就起去，拖網上坪，有大尾魚滿滿，共一百五十三尾；魚雖然hiah chōe，網亦無裂。Se-bûn Pí-tek chiū khí-khì, thoa bāng chiūⁿ phiâⁿ, ū tōa bé hî móa-móa, kiōng chi̍t-pah gō͘-cha̍p-saⁿ bé; hî sui-jiân hiah chōe, bāng ia̍h bô li̍h.

12耶穌kā in講，來食早頓。學生無人敢問伊，你是是誰？因為知伊是主。Iâ-so͘ kā in kóng, Lâi chia̍h chá tǹg. Ha̍k-seng bô lâng káⁿ mn̄g I, Lí sī chī-chūi? in-ūi chai I sī Chú.

13耶穌到，the̍h餅hō͘ in，魚亦是án-ni。Iâ-so͘ kàu, the̍h piáⁿ hō͘ in, hî ia̍h sī án-ni.

14耶穌tùi死人中koh活了後，出現hō͘伊ê學生看見，這是第三pái。Iâ-so͘ tùi sí-lâng tiong koh-oa̍h liáu-āu, chhut-hiān hō͘ I ê ha̍k-seng khòaⁿ-kìⁿ, che sī tē saⁿ pái.

15已經食早頓，耶穌kā西門彼得講，約翰ê kiáⁿ西門，你疼我khah贏chiah-ê mah？應講，主ah，是；你知我疼你。耶穌kā伊講，飼我ê羊á-kiáⁿ。Í-keng chia̍h chá tǹg, Iâ-so͘ kā Se-bûn Pí-tek kóng, Iok-hān ê kiáⁿ Se-bûn, lí thiàⁿ góa khah-iâⁿ chiah-ê mah? Ìn kóng, Chú ah, Sī; lí chai góa thiàⁿ lí. Iâ-so͘ kā i kóng, Chhī góa ê iûⁿ-á-kiáⁿ.

16第二pái，koh kā伊講，約翰ê kiáⁿ西門，你疼我mah？講，主ah，是；你知我疼你。耶穌kā伊講，照顧我ê羊。Tē jī pái, koh kā i kóng, Iok-hān ê kiáⁿ Se-bûn, lí thiàⁿ góa mah? Kóng, Chú ah, sī; lí chai góa thiàⁿ lí. Iâ-so͘ kā i kóng, Chiàu-kò͘ góa ê iûⁿ.

17第三pái，kā伊講，約翰ê kiáⁿ，西門，你疼我mah？彼得因為伊第三pái kā伊講，你疼我mah？就憂悶，kā伊講，主，你無所m̄知；你知我疼你。耶穌kā伊講，飼我ê羊á。Tē saⁿ pái, kā i kóng, Iok-hān ê kiáⁿ, Se-bûn, lí thiàⁿ góa mah? Pí-tek in-ūi I tē saⁿ pái kā i kóng, Lí thiàⁿ góa mah? chiū iu-būn, kā i kóng, Chú, lí bô só͘ m̄ chai; lí chai góa thiàⁿ lí. Iâ-so͘ kā i kóng, Chhī góa ê iûⁿ-á.

18我實實kā你講，你少年ê時用帶家己縛，照所ài來行遊；獨獨到老，你beh伸手，別人就縛你，拖你到m̄-ài去ê所在。Góa si̍t-si̍t kā lí kóng, Lí siàu-liân ê sî ēng tòa ka-kī pa̍k, chiàu só͘ ài lâi kiâⁿ-iû; to̍k-to̍k kàu lāu, lí beh chhun chhiú, pa̍t lâng chiū pa̍k lí, thoa lí kàu m̄ ài khì ê só͘-chāi.

19耶穌講這話，是指彼得beh怎樣死，來榮光上帝。已經講án-ni，就kā伊講，Tè我。Iâ-so͘ kóng che ōe, sī chí Pí-tek beh cháiⁿ-iūⁿ sí, lâi êng-kng Siōng-tè. Í-keng kóng án-ni, chiū kā i kóng, Tè góa.

20彼得oa̍t-tńg身，看見耶穌所疼ê學生tè in，就是前tī晚餐ê時，hiàⁿ óa耶穌ê胸坎講，主ah，賣你ê人是是誰？Pí-tek oa̍t-tńg-sin, khòaⁿ-kìⁿ Iâ-so͘ só͘ thiàⁿ ê ha̍k-seng tè in, chiū-sī chêng tī boán-chhan ê sî, hiàⁿ óa Iâ-so͘ ê heng-khám kóng, Chú ah, bōe lí ê lâng sī chī-chūi?

21彼得看見，就kā耶穌講，主ah，chit人怎樣？Pí-tek khòaⁿ-kìⁿ, chiū kā Iâ-so͘ kóng, Chú ah, chit lâng cháiⁿ-iūⁿ?

22耶穌kā伊講，我若ài伊tī-teh到我來，kap你甚麼干涉？你tio̍h tè我。Iâ-so͘ kā i kóng, Góa nā ài i tī-teh kàu góa lâi, kap lí sím-mi̍h kan-sia̍p? lí tio̍h tè góa.

23Tùi án-ni，chit-ê話遍傳tī兄弟ê中間，講，Chit-ê學生bōe死；但是耶穌m̄是kā伊講伊bōe死，獨獨講，我若ài伊長長tī-teh到我來，kap你甚麼干涉？Tùi án-ni, chit ê ōe piàn thoân tī hiaⁿ-tī ê tiong-kan, kóng, Chit ê ha̍k-seng bōe sí; nā-sī Iâ-so͘ m̄ sī kā i kóng i bōe sí, to̍k-to̍k kóng, Góa nā ài i tn̂g-tn̂g tī-teh kàu góa lâi, kap lí sím-mi̍h kan-sia̍p?

24為tio̍h chiah-ê事做干證來寫伊ê人，就是chit-ê學生；koh咱知伊ê干證是真。Ūi-tio̍h chiah ê sū chòe kan-chèng lâi siá i ê lâng, chiū-sī chit ê ha̍k-seng; koh lán chai i ê kan-chèng sī chin.

25耶穌所行iáu有chōe-chōe項，若隨一項來寫，我phah算所記ê冊，世間tóe bōe了。Iâ-so͘ só͘ kiâⁿ iáu ū chōe-chōe hāng, nā sûi chi̍t hāng lâi siá, góa phah-sǹg só͘ kì ê chheh, sè-kan tóe bōe liáu.

1Thê-o-hui-lô ah，我已經將耶穌tùi起頭所行所教示ê，Thê-o-hui-lô ah, góa í-keng chiong Iâ-so͘ tùi khí-thâu só͘ kiâⁿ só͘ kà-sī ê,

2直到伊託重聖神命令所揀ê使徒了後受chih接上天ê日，ta̍k項記載tī前ê冊。ti̍t-kàu I thok-tiōng Sèng Sîn bēng-lēng só͘ kéng ê sù-tô͘ liáu-āu siū chih-chiap chiūⁿ thiⁿ ê ji̍t, ta̍k hāng kì-chài tī chêng ê chheh.

3伊受害了後，bat用chōe-chōe憑據，tī四十日ê中間，出現hō͘使徒看見，來顯明伊家己是活，續講論上帝國ê事。I siū hāi liáu-āu, bat ēng chōe-chōe pîn-kù, tī sì-cha̍p ji̍t ê tiong-kan, chhut-hiān hō͘ sù-tô͘ khòaⁿ-kìⁿ, lâi hián-bêng I ka-kī sī oa̍h, sòa káng-lūn Siōng-tè kok ê sū.

4伊kap in聚集ê時，命令in，講，M̄-thang離開耶路撒冷，tio̍h thèng候父所應允ê，就是lín bat tùi我聽見ê；I kap in chū-chi̍p ê sî, bēng-lēng in, kóng, M̄-thang lī-khui Iâ-lō͘-sat-léng, tio̍h thèng-hāu Pē só͘ èng-ún ê, chiū-sī lín bat tùi góa thiaⁿ-kìⁿ ê;

5因為約翰用水行洗禮；獨獨lín，koh無幾日，beh tī聖神受洗。in-ūi Iok-hān ēng chúi kiâⁿ sóe-lé; to̍k-to̍k lín, koh bô kúi ji̍t, beh tī Sèng Sîn siū sóe.

6Án-ni in聚集ê時，問伊，講，主ah，你tī chit時beh將國復到hō͘以色列mah？Án-ni in chū-chi̍p ê sî, mn̄g I, kóng, Chú ah, lí tī chit sî beh chiong kok ho̍k-tò hō͘ Í-sek-lia̍t mah?

7伊就kā in講，父所hē tī伊家己權內ê時kap期m̄是lín所thang知。I chiū kā in kóng, Pē só͘ hē tī I ka-kī koân-lāi ê sî kap kî m̄ sī lín só͘ thang chai.

8獨獨聖神臨到lín ê時，lín beh得tio̍h才能；koh tī耶路撒冷，遍猶太，kap撒馬利亞，直到地極，beh做我ê干證。To̍k-to̍k Sèng Sîn lîm-kàu lín ê sî, lín beh tit-tio̍h châi-lêng; koh tī Iâ-lō͘-sat-léng, piàn Iû-thài, kap Sat-má-lī-a, ti̍t-kàu tōe ke̍k, beh chòe góa ê kan-chèng.

9Chiah-ê話講了，in teh看ê時，耶穌受舉起上天；有雲chih接伊，in就看bōe見。Chiah ê ōe kóng liáu, in teh khòaⁿ ê sî, Iâ-so͘ siū kú-khí chiūⁿ thiⁿ; ū hûn chih-chiap I, in chiū khòaⁿ bōe kìⁿ.

10伊去ê時，in ǹg天注目看，忽然有兩人穿白衫，khiā tī身邊；I khì ê sî, in ǹg thiⁿ chù-ba̍k khòaⁿ, hut-jiân ū nn̄g lâng chhēng pe̍h saⁿ, khiā tī sin-piⁿ;

11講，加利利人ah，啥事khiā-teh看天？Chit-ê耶穌離別lín受chih接上天，lín看伊án-ni上天，伊亦beh照án-ni來。kóng, Ka-lī-lī lâng ah, siáⁿ-sū khiā-teh khòaⁿ thiⁿ? Chit ê Iâ-so͘ lī-pia̍t lín siū chih-chiap chiūⁿ thiⁿ, lín khòaⁿ I án-ni chiūⁿ thiⁿ, I ia̍h beh chiàu án-ni lâi.

12Hit時in tùi hit-ê名叫橄欖ê山tò去耶路撒冷，chit-ê山近耶路撒冷，相離開有安歇日ê路站。Hit sî in tùi hit ê miâ kiò Kaⁿ-ná ê soaⁿ tò-khì Iâ-lō͘-sat-léng, chit ê soaⁿ kūn Iâ-lō͘-sat-léng, saⁿ lī-khui ū an-hioh-ji̍t ê lō͘-chām.

13已經入，就上in所tòa ê樓頂；有彼得、約翰、雅各、安得烈、腓力kap多馬，Pa-to-lô-mái kap馬太，A-le̍k-hui ê kiáⁿ雅各kap Se-lô-tí ê西門，kap雅各ê kiáⁿ猶大。Í-keng ji̍p, chiū chiūⁿ in só͘ tòa ê lâu-téng; ū Pí-tek, Iok-hān, Ngá-kok, An-tek-lia̍t, Hui-le̍k kap To-má, Pa-to-lô-mái kap Má-thài, A-le̍k-hui ê kiáⁿ Ngá-kok kap Se-lô-tí ê Se-bûn, kap Ngá-kok ê kiáⁿ Iû-tāi.

14Chiah-ê人，kap kúi-nā個婦人人，以及耶穌ê老母馬利亞，chham伊ê兄弟，lóng同心專務祈禱。Chiah ê lâng, kap kúi-nā ê hū-jîn-lâng, í-ki̍p Iâ-so͘ ê lāu-bú Má-lī-a, chham I ê hiaⁿ-tī, lóng tâng-sim choan-bū kî-tó.

15當時同聚集ê眾人約略一百二十名，彼得tī兄弟中khiā起來講，Tong-sî tâng chū-chi̍p ê chèng lâng iok-lio̍k chi̍t-pah jī-cha̍p miâ, Pí-tek tī hiaⁿ-tī tiong khiā-khí lâi kóng,

16兄弟ah，聖神借大衛ê嘴所讖語chhōa人掠耶穌ê猶大ê，chit-ê聖經應驗是應該。Hiaⁿ-tī ah, Sèng Sîn chioh Tāi-pi̍t ê chhùi só͘ chhàm-gú chhōa lâng lia̍h Iâ-so͘ ê Iû-tāi ê, chit ê sèng-keng èng-giām sī eng-kai.

17因為伊bat kap阮同列，koh tī chit-ê工亦有份。In-ūi i bat kap goán tâng-lia̍t, koh tī chit ê kang ia̍h ū hūn.

18(Taⁿ chit人用伊行不義所得tio̍h ê工錢來買園；身軀仆落來，腹肚爆裂，腸á lóng流出。(Taⁿ chit lâng ēng i kiâⁿ put-gī só͘ tit-tio̍h ê kang-chîⁿ lâi bóe hn̂g; seng-khu phak-lo̍h-lâi, pak-tó͘ piak-li̍h, tn̂g-á lóng lâu-chhut.

19Tiàm-tī耶路撒冷ê人lóng知；所以照in ê腔口叫hit坵園做A-kek-tāi-má，就是血園。)Tiàm-tī Iâ-lō͘-sat-léng ê lâng lóng chai; só͘-í chiàu in ê khiuⁿ-kháu kiò hit khu hn̂g chòe A-kek-tāi-má, chiū-sī Huih-hn̂g. )

20因為詩篇記載，講， hō͘伊ê厝拋荒， 無人tī hia khiā, koh講， 伊監督ê職hō͘別人擔當。In-ūi Si-phian kì-chài, kóng, Hō͘ i ê chhù pha-hng, Bô lâng tī hia khiā: koh kóng, I kàm-tok ê chit hō͘ pa̍t lâng tam-tng.

21所以主耶穌tī咱中間出入ê時，Só͘-í Chú Iâ-so͘ tī lán tiong-kan chhut-ji̍p ê sî,

22tùi約翰行洗禮起，到耶穌離別咱受chih接ê日，所有常常kap阮做伴ê人，tī in中間tio̍h有一個kap阮saⁿ-kap做伊koh活ê干證。tùi Iok-hān kiâⁿ sóe-lé khí, kàu Iâ-so͘ lī-pia̍t lán siū chih-chiap ê ji̍t, só͘ ū siông-siông kap goán chòe-phōaⁿ ê lâng, tī in tiong-kan tio̍h ū chi̍t-ê kap goán saⁿ-kap chòe I koh-oa̍h ê kan-chèng.

23Tùi án-ni，舉兩人，就是約瑟，叫做Pa-sat-pa，亦名Iû-sū-to͘，koh一個是Má-thê-a。Tùi án-ni kú nn̄g lâng, chiū-sī Iok-sek, kiò chòe Pa-sat-pa, ia̍h miâ Iû-sū-to͘, koh chi̍t-ê sī Má-thê-a.

24就祈禱，講，主ah，你是bat眾人ê心ê，tī chit兩人中指明tá-lo̍h一人是你所揀ê，Chiū kî-tó, kóng, Chú ah, lí sī bat chèng lâng ê sim ê, tī chit nn̄g lâng tiong chí-bêng tá-lo̍h chi̍t lâng sī lí só͘ kéng ê,

25來有份tī chit-ê工，kap使徒ê職，就是猶大所離開beh去伊家己ê所在ê。lâi ū hūn tī chit ê kang, kap sù-tô͘ ê chit, chiū-sī Iû-tāi só͘ lī-khui beh khì i ka-kī ê só͘-chāi ê.

26Tùi án-ni， kā in liam-khau；liam-tio̍h Má-th ê-a；伊就kap十一個使徒同列。Tùi án-ni kā in liam-khau; liam-tio̍h Má-thê-a; i chiū kap cha̍p-it ê sù-tô͘ tâng lia̍t.

1五旬節ê期已經到，in lóng聚集tī一所在。Gō͘-sûn-choeh ê kî í-keng kàu, in lóng chū-chi̍p tī chi̍t só͘-chāi.

2忽然tùi天有聲，親像大風teh吹，充滿in所坐kui間ê厝。Hut-jiân tùi thiⁿ ū siaⁿ, chhin-chhiūⁿ tōa hong teh chhe, chhiong-móa in só͘ chē kui-keng ê chhù.

3就有teh分開ê舌，出現hō͘ in看見，親像火ê舌，歇tī ta̍k人ê頂面。Chiū ū teh hun-khui ê chi̍h, chhut-hiān hō͘ in khòaⁿ-kìⁿ, chhin-chhiūⁿ hé ê chi̍h, hioh tī ta̍k lâng ê téng-bīn.

4In lóng受聖神充滿，chiah開嘴講別樣ê腔口，是照聖神所賞賜in講ê。In lóng siū Sèng Sîn chhiong-móa, chiah khui chhùi kóng pa̍t iūⁿ ê khiuⁿ-kháu, sī chiàu Sèng Sîn só͘ siúⁿ-sù in kóng ê.

5Hit時有虔誠ê猶太人，tùi天下ta̍k國來ê，tòa tī耶路撒冷。Hit sî ū khiân-sêng ê Iû-thài lâng, tùi thiⁿ-ē ta̍k kok lâi ê, tòa tī Iâ-lō͘-sat-léng.

6Chit-ê聲一下起，眾人聚集紛紛亂亂，因為ta̍k人聽見in照伊家己ê土腔來講。Chit ê siaⁿ chi̍t ē khí, chèng lâng chū-chi̍p hun-hun loān-loān, in-ūi ta̍k lâng thiaⁿ-kìⁿ in chiàu i ka-kī ê thó͘-khiuⁿ lâi kóng.

7就lóng gông-ngia̍h奇怪，講，你看，chiah-ê teh講ê kiám無一概是加利利人mah？Chiū lóng gông-ngia̍h kî-koài, kóng, Lí khòaⁿ, chiah ê teh kóng ê kiám bô it-khài sī Ka-lī-lī lâng mah?

8怎樣咱聽in講照咱ta̍k人所出世ê土腔ah？Cháiⁿ-iūⁿ lán thiaⁿ in kóng chiàu lán ta̍k lâng só͘ chhut-sì ê thó͘-khiuⁿ ah?

9咱chiah-ê Phàⁿ-th ê-a人、Bí-thài人、Í-lân人，kap tiàm-tī Bí-só͘-pho-tāi-bí，猶太kap Ka-phàⁿ-to-ka，Pún-to͘ kap亞西亞，Lán chiah ê Phàⁿ-thê-a lâng, Bí-thài lâng, Í-lân lâng, kap tiàm-tī Bí-só͘-pho-tāi-bí, Iû-thài kap Ka-phàⁿ-to-ka, Pún-to͘ kap A-se-a,

10Hut-lū-ka kap Pông-hui-lī-a，埃及近óa 古利奈 ê Lū-pí-a，chiah-ê地方ê人，以及tùi羅馬來ê出外人，Hut-lū-ka kap Pông-hui-lī-a, Ai-ki̍p kūn-óa Kó͘-lī-nāi ê Lū-pí-a, chiah ê tōe-hng ê lâng, í-ki̍p tùi Lô-má lâi ê chhut-gōa lâng,

11有ê是猶太人，有ê是入猶太教ê人、Kek-lí-tí人、A-lat-pek人，lóng聽in用咱ê腔口來講上帝ê大事。ū-ê sī Iû-thài lâng, ū-ê sī ji̍p Iû-thài kàu ê lâng, Kek-lí-tí lâng, A-lat-pek lâng, lóng thiaⁿ in ēng lán ê khiuⁿ-kháu lâi kóng Siōng-tè ê tōa sū.

12就lóng gông-ngia̍h躊躇，saⁿ-kap講，這甚麼意思？Chiū lóng gông-ngia̍h tiû-tû, saⁿ-kap kóng, Che sím-mi̍h ì-sù?

13亦有別人恥笑in講，in是lim新酒teh醉。Ia̍h ū pa̍t lâng thí-chhiò in kóng, In sī lim sin chiú teh chùi.

14總是彼得kap十一個使徒khiā-teh，大聲kā in講，猶太人，kap lóng總khiā起tī耶路撒冷ê百姓ah，lín tio̍h知chit-ê，亦tio̍h致意聽我ê話。Chóng-sī Pí-tek kap cha̍p-it ê sù-tô͘ khiā-teh, tōa siaⁿ kā in kóng, Iû-thài lâng, kap lóng-chóng khiā-khí tī Iâ-lō͘-sat-léng ê peh-sìⁿ ah, lín tio̍h chai chit-ê, ia̍h tio̍h tì-ì thiaⁿ góa ê ōe.

15Chiah-ê人m̄是酒醉，親像lín所phah算；因為chit-tia̍p tú-chiah頂晡九點鐘：Chiah ê lâng m̄ sī chiú-chùi, chhin-chhiūⁿ lín só͘ phah-sǹg; in-ūi chit tia̍p tú-chiah téng-po͘ káu tiám cheng:

16這就是託先知約珥所講ê，講，che chiū-sī thok sian-ti Iok-jíⁿ só͘ kóng ê, kóng,

17上帝講，Tī路尾ê時日， 我beh用我ê神降落tī凡有肉體ê； Lín ê後生lín ê cha-bó͘-kiáⁿ beh做先知講話， Lín ê少年人beh看見異象， Lín ê老人beh得tio̍h眠夢；Siōng-tè kóng, Tī lō͘-bé ê sî-ji̍t, Góa beh ēng góa ê Sîn kàng-lo̍h tī hoān ū jio̍k-thé ê; Lín ê hāu-siⁿ lín ê cha-bó͘-kiáⁿ beh chòe sian-ti kóng ōe, Lín ê siàu-liân lâng beh khòaⁿ-kìⁿ īⁿ-siōng, Lín ê lāu-lâng beh tit-tio̍h bîn-bāng;

18Tī hiah-ê日我也beh用我ê神 降落tī我ê奴僕女婢；in亦beh做先知來講。Tī hiah ê ji̍t góa iā beh ēng góa ê Sîn Kàng-lo̍h tī góa ê lô͘-po̍k lú-pī; in ia̍h beh chòe sian-ti lâi kóng.

19頂面tī天裡我beh顯出奇事， 下面tī地裡我beh顯出神蹟， 就是血，kap火，kap煙霧；Téng-bīn tī thiⁿ-ni̍h góa beh hián-chhut kî-sū, Ē-bīn tī tōe-ni̍h góa beh hián-chhut sîn-jiah, Chiū-sī huih, kap hé, kap ian-bū;

20日beh變做暗， 月beh變做血， Tī主大koh榮顯ê日，bē到ê事先；Ji̍t beh pìⁿ chòe àm, Ge̍h beh pìⁿ chòe huih, Tī Chú tōa koh êng-hián ê ji̍t, Bē kàu ê tāi-seng;

21Koh凡若求叫主ê名ê，會得tio̍h救。Koh hoān-nā kiû-kiò Chú ê miâ ê, ōe tit-tio̍h kiù.

22以色列人ah，tio̍h聽我ê話：拿撒勒人耶穌，上帝bat用伊tī lín中間行各樣ê權能、奇事，kap神蹟，來tùi lín證明伊，這就是lín所知ê；Í-sek-lia̍t lâng ah, tio̍h thiaⁿ góa ê ōe: Ná-sat-le̍k lâng Iâ-so͘, Siōng-tè bat ēng I tī lín tiong-kan kiâⁿ koh-iūⁿ ê koân-lêng, kî-sū, kap sîn-jiah, lâi tùi lín chèng-bêng I, che chiū-sī lín só͘ chai ê;

23伊照上帝定tio̍h ê旨意kap事先知ê，已經受解送，lín chiah-ê借不法ê人ê手釘十字架害死伊；I chiàu Siōng-tè tiāⁿ-tio̍h ê chí-ì kap tāi-seng chai ê, í-keng siū ké-sàng, lín chiah-ê chioh put-hoat ê lâng ê chhiú tèng si̍p-jī-kè hāi-sí I;

24總是上帝tháu放hiah-ê死ê苦痛，hō͘伊koh活；是伊bōe會hō͘死所把縛。chóng-sī Siōng-tè tháu-pàng hiah ê sí ê khó͘-thàng, hō͘ I koh-oa̍h; sī I bōe-ōe hō͘ sí só͘ pé-pa̍k.

25因為大衛有指伊講， 我看主常常tī我ê面前； 伊tiàm-tī我ê chiàⁿ-pêng，hō͘我免搖動；In-ūi Tāi-pi̍t ū chí I kóng, Góa khòaⁿ Chú siông-siông tī góa ê bīn-chêng; I tiàm tī góa ê chiàⁿ pêng, hō͘ góa bián iô-tāng;

26所以我ê心歡喜，我ê舌快樂； Koh我ê肉體也beh tiàm-tī ǹg望中；Só͘-í góa ê sim hoaⁿ-hí, góa ê chi̍h khoài-lo̍k; Koh góa ê jio̍k-thé iā beh tiàm tī ǹg-bāng tiong;

27因為你無beh將我ê靈魂放下tī陰間， 也無beh hō͘你ê聖ê tú-tio̍h朽爛。In-ūi lí bô beh chiong góa ê lêng-hûn pàng-hē tī im-kan, Iā bô beh hō͘ lí ê Sèng-ê tú-tio̍h hiú-nōa.

28你bat用活命ê路指示我； Beh hō͘我tī你ê面前滿心快樂。Lí bat ēng oa̍h-miā ê lō͘ chí-sī góa; Beh hō͘ góa tī lí ê bīn-chêng móa-sim khoài-lo̍k.

29兄弟ah，先祖大衛ê事我thang好膽對lín講，伊已經死koh埋葬，伊ê墓到今á日iáu tī咱中間。Hiaⁿ-tī ah, sian-chó͘ Tāi-pi̍t ê sū góa thang hó-táⁿ tùi lín kóng, i í-keng sí koh bâi-chòng, i ê bōng kàu kin-á-ji̍t iáu tī lán tiong-kan.

30伊既然是先知，koh知上帝bat kap伊chiù-chōa，beh tī伊後裔中設立一人坐伊ê座位。I kì-jiân sī sian-ti, koh chai Siōng-tè bat kap i chiù-chōa, beh tī i hō͘-è tiong siat-li̍p chi̍t lâng chē i ê chō-ūi.

31伊事先看出án-ni，就論基督ê koh活講，伊無放下tī陰間，亦伊ê肉體無tú-tio̍h朽爛。I tāi-seng khòaⁿ-chhut án-ni, chiū lūn Ki-tok ê koh-oa̍h kóng, I bô pàng-hē tī im-kan, ia̍h I ê jio̍k-thé bô tú-tio̍h hiú-nōa.

32Chit-ê耶穌，上帝已經hō͘伊koh活，阮chiah-ê lóng做伊ê干證。Chit ê Iâ-so͘, Siōng-tè í-keng hō͘ I koh-oa̍h, goán chiah-ê lóng chòe I ê kan-chèng.

33伊既然hō͘上帝ê chiàⁿ手舉伊高高，koh tùi父受所應允ê聖神，就將chit-ê降落，就是lín所看見，所聽見ê。I kì-jiân hō͘ Siōng-tè ê chiàⁿ chhiú kú I koâiⁿ-koâiⁿ, koh tùi Pē siū só͘ èng-ún ê Sèng Sîn, chiū chiong chit ê kàng-lo̍h, chiū-sī lín só͘ khòaⁿ-kìⁿ, só͘ thiaⁿ-kìⁿ ê.

34因為大衛未bat上天；獨獨家己講， 主kā我ê主講， 你坐我ê大pêng，In-ūi Tāi-pi̍t bē bat chiūⁿ thiⁿ; to̍k-to̍k ka-kī kóng, Chú kā góa ê Chú kóng, Lí chē góa ê tōa pêng,

35thèng候我hō͘你ê對敵做你ê腳踏椅。Thèng-hāu góa hō͘ lí ê tùi-te̍k chòe lí ê kha-ta̍h-í.

36Án-ni以色列全家tio̍h確實知，chit-ê耶穌，上帝已經設立伊做主，做基督，就是lín所釘tī十字架ê。Án-ni Í-sek-lia̍t choân-ke tio̍h khak-si̍t chai, chit ê Iâ-so͘, Siōng-tè í-keng siat-li̍p I chòe Chú, chòe Ki-tok, chiū-sī lín só͘ tèng tī si̍p-jī-kè ê.

37眾人聽了，心內刺鑿，對彼得kap其餘ê使徒講，兄弟ah，阮tio̍h怎樣做？Chèng lâng thiaⁿ-liáu, sim-lāi chhì-chha̍k, tùi Pí-tek kap kî-û ê sù-tô͘ kóng, Hiaⁿ-tī ah, goán tio̍h cháiⁿ-iūⁿ chòe?

38彼得kā in講，Lín tio̍h反悔，ta̍k人tī耶穌基督ê名受洗禮，到hō͘ lín ê罪赦免；koh beh受聖神ê賞賜。Pí-tek kā in kóng, Lín tio̍h hoán-hóe, ta̍k lâng tī Iâ-so͘ Ki-tok ê miâ siū sóe-lé, kàu hō͘ lín ê chōe sià-bián; koh beh siū Sèng Sîn ê siúⁿ-sù.

39因為所應允ê歸tī lín，kap lín ê kiaⁿ孫，以及lóng總遠遠ê人，就是見若主，咱ê上帝，所beh召ê。In-ūi só͘ èng-ún ê kui tī lín, kap lín ê kiáⁿ-sun, í-ki̍p lóng-chóng hn̄g-hn̄g ê lâng, chiū-sī kìⁿ-nā Chú, lán ê Siōng-tè, só͘ beh tiàu ê.

40Koh另外用chōe-chōe話干證，來苦勸in，講，Lín tio̍h救家己脫離chit-ê邪ê世代。Koh lēng-gōa ēng chōe-chōe ōe kan-chèng, lâi khó͘-khǹg in, kóng, Lín tio̍h kiù ka-kī thoat-lī chit ê siâ ê sè-tāi.

41Tùi án-ni，接納in ê話ê人lóng受洗禮；hit日約略加添三千人。Tùi án-ni chiap-la̍p in ê ōe ê lâng lóng siū sóe-lé; hit ji̍t iok-lio̍k ke-thiⁿ saⁿ chheng lâng.

42常常專務使徒ê教示，saⁿ-kap交陪、peh餅、祈禱。Siông-siông choan-bū sù-tô͘ ê kà-sī, saⁿ-kap kau-pôe, peh-piáⁿ, kî-tó.

43眾人lóng驚惶；使徒koh行chōe-chōe奇事神蹟。Chèng lâng lóng kiaⁿ-hiâⁿ; sù-tô͘ koh kiâⁿ chōe-chōe kî-sū sîn-jiah.

44信ê人lóng聚集tī一所在，所有ê物公家用；Sìn ê lâng lóng chū-chi̍p tī chi̍t só͘-chāi, só͘ ū ê mi̍h kong-ke ēng;

45koh賣物產家業，照ta̍k人所欠用分hō͘ in。koh bōe bu̍t-sán ke-gia̍p, chiàu ta̍k lâng só͘ khiàm-ēng pun hō͘ in.

46日日同心專務tī殿內，也tī人家peh餅，用歡喜誠實ê心來食，o-ló上帝，Ji̍t-ji̍t tâng-sim choan-bū tī tiān-lāi, iā tī jîn-ke peh piáⁿ, ēng hoaⁿ-hí sêng-si̍t ê sim lâi chia̍h, o-ló Siōng-tè,

47亦得tio̍h眾百姓歡喜in。主將得救ê人日日加添hō͘ in。ia̍h tit-tio̍h chèng peh-sìⁿ hoaⁿ-hí in. Chú chiong tit kiù ê lâng ji̍t-ji̍t ke-thiⁿ hō͘ in.