1Tī安提阿，tī教會中有先知kap教師kùi-nā人，就是巴拿巴，kap稱做Nî-kiat ê西門，古利奈人Lō͘-kiû，kap分封ê人君希律同培養ê Má-liām，以及掃羅。Tī An-thê-o, tī kàu-hōe tiong ū sian-ti kap kàu-su kùi-nā lâng, chiū-sī Pa-ná-pa, kap chheng chòe Nî-kiat ê Se-biān, Kó͘-lī-nāi lâng Lō͘-kiû, kap hun-hong ê jîn-kun Hi-lu̍t tâng pôe-iúⁿ ê Má-liām, í-ki̍p Sò-lô.

2In服事主禁食ê時，聖神講，Tio̍h kā我分派巴拿巴、掃羅，來成我召in 去擔當ê工。In ho̍k-sāi Chú kìm-chia̍h ê sî, Sèng Sîn kóng, Tio̍h kā góa hun-phài Pa-ná-pa, Sò-lô, lâi chiâⁿ góa tiàu in khì tam-tng ê kang.

3Tùi án-ni，禁食祈禱，用手hōaⁿ in，就差in 去。Tùi án-ni kìm-chia̍h kî-tó, ēng chhiú hōaⁿ in, chiū chhe in khì.

4In已經奉聖神所差，落去Se-liû-ki；tùi hia搭船去居比路。In í-keng hōng Sèng Sîn só͘ chhe, lo̍h-khì Se-liû-ki; tùi hia tah chûn khì Ku-pí-lō͘.

5Tī Sat-lia̍p-bí傳上帝ê道理tī猶太人chiah-ê會堂；亦有約翰做in ê幫手。Tī Sat-lia̍p-bí thoân Siōng-tè ê tō-lí tī Iû-thài lâng chiah ê hōe-tn̂g; ia̍h ū Iok-hān chòe in ê pang-chhiú.

6行過thong海嶼到Phàⁿ-hut，tú-tio̍h一個行邪術，做假先知ê猶太人，名巴耶穌；Kiâⁿ kè thong hái-sū kàu Phàⁿ-hut, tú-tio̍h chi̍t ê kiâⁿ siâ-su̍t, chòe ké sian-ti ê Iû-thài lâng, miâ Pa-Iâ-so͘;

7hit人常常kap總督Sū-kiû Pó-lô saⁿ-kap tiàm；總督是聰明ê人。伊tiàu巴拿巴掃羅來，ài聽上帝ê道理。hit lâng siông-siông kap chóng-tok Sū-kiû Pó-lô saⁿ-kap tiàm; chóng-tok sī chhang-miâ ê lâng. I tiàu Pa-ná-pa Sò-lô lâi, ài thiaⁿ Siōng-tè ê tō-lí.

8獨獨hit-ê行邪術ê Í-lū-má，(伊ê名翻譯就是行邪術ê) ，抵敵in兩人，ài引誘總督，hō͘伊無信。To̍k-to̍k hit ê kiâⁿ siâ-su̍t ê Í-lū-má, (i ê miâ hoan-e̍k chiū-sī kiâⁿ siâ-su̍t ê), tí-te̍k in nn̄g lâng, ài ín-iú chóng-tok, hō͘ i bô sìn.

9但是掃羅，亦名保羅，hō͘聖神充滿，注目看伊，講，Nā-sī Sò-lô, ia̍h miâ Pó-lô, hō͘ Sèng Sîn chhiong-móa, chù-ba̍k khòaⁿ i, kóng,

10Hàiⁿ ah！ 你充滿眾項詭譎kap奸惡ê，魔鬼ê kiáⁿ，眾項義ê對敵，你混亂主chiah-ê正路，iáu m̄ soah mah？Hàiⁿ ah! lí chhiong-móa chèng hāng khúi-khiat kap kan-ok ê, Mô͘-kúi ê kiáⁿ, chèng hāng gī ê tùi-te̍k, lí hūn-loān Chú chiah ê chiàⁿ-lō͘, iáu m̄ soah mah?

11Taⁿ你看，主ê手tī你ê身上，你beh chhiⁿ-mî，暫時bōe看見日。伊ê目睭liâm-piⁿ ian-n̄g烏暗；四界求人牽伊。Taⁿ lí khòaⁿ, Chú ê chhiú tī lí ê sin-chiūⁿ, lí beh chhiⁿ-mî, chiām-sî bōe khòaⁿ-kìⁿ ji̍t. I ê ba̍k-chiu liâm-piⁿ ian-n̄g o͘-àm; sì-kè kiû lâng khan i.

12總督看見所做ê事，就信，大奇怪主ê教示。Chóng-tok khòaⁿ-kìⁿ só͘ chòe ê sū, chiū sìn, tōa kî-koài Chú ê kà-sī.

13保羅kap同伴tùi Phàⁿ-hut開船，到Pông-hui-lī-a ê Pia̍t-ka；約翰離開in，tò去耶路撒冷。Pó-lô kap tâng-phōaⁿ tùi Phàⁿ-hut khui chûn, kàu Pông-hui-lī-a ê Pia̍t-ka; Iok-hān lī-khui in, tò-khì Iâ-lō͘-sat-léng.

14In就tùi Pia̍t-ka行，過去到Pí-se-tí ê安提阿；當安歇日入會堂，坐teh。In chiū tùi Pia̍t-ka kiâⁿ, kè-khì kàu Pí-se-tí ê An-thê-o; tng an-hioh-ji̍t ji̍p hōe-tn̂g, chē-teh.

15律法kap先知ê冊讀明白，hiah-ê 管會堂ê 差人就近in講，兄弟ah，lín若有苦勸百姓ê話，請講。Lu̍t-hoat kap sian-ti ê chheh tha̍k bêng-pe̍k, hiah ê koán hōe-tn̂g ê chhe lâng chiū-kūn in kóng, Hiaⁿ-tī ah, lín nā ū khó͘-khǹg peh-sìⁿ ê ōe, chhiáⁿ kóng.

16保羅起來khiā，搖手，講，列位以色列人，kap敬畏上帝ê，請聽。Pó-lô khí-lâi khiā, iô-chhiú, kóng, Lia̍t-ūi Í-sek-lia̍t lâng, kap kèng-ùi Siōng-tè ê, chhiáⁿ thiaⁿ.

17Chit-ê以色列百姓ê上帝揀咱ê列祖，當百姓出外tī埃及地ê時，kā in升高，kia̍h起手chhōa in出hia。Chit ê Í-sek-lia̍t peh-sìⁿ ê Siōng-tè kéng lán ê lia̍t-chó͘, tng peh-sìⁿ chhut-gōa tī Ai-ki̍p tōe ê sî, kā in seng koâiⁿ, kia̍h-khí chhiú chhōa in chhut hia.

18Koh tī曠野吞忍寬容in，約略四十年久。Koh tī khòng-iá thun-lún khoan-iông in, iok-lio̍k sì-cha̍p nî kú.

19已經滅迦南地七族ê人，就將hit-ê土地分hō͘ in做業，約略有四百五十年；Í-keng bia̍t Ka-lâm tōe chhit cho̍k ê lâng, chiū chiong hit ê thó͘-tōe pun hō͘ in chòe gia̍p, iok-lio̍k ū sì-pah gō͘-cha̍p nî;

20chiah-ê tāi-chì了後，用士師hō͘ in，到tī先知撒母耳。chiah ê tāi-chì liáu-āu, ēng sū-su hō͘ in, kàu tī sian-ti Sat-bó͘-ní.

21以後百姓求一個王；上帝就將便雅憫支派ê人，Ki-sū ê kiáⁿ，掃羅，hō͘ in，歷過四十年久。Í-āu peh-sìⁿ kiû chi̍t ê ông; Siōng-tè chiū chiong Piān-ngá-bín chi-phài ê lâng, Ki-sū ê kiáⁿ, Sò-lô, hō͘ in, le̍k-kè sì-cha̍p nî kú.

22已經廢伊，就久舉大衛做in ê王；干證伊，講，我得tio̍h耶西ê kiáⁿ大衛，伊是合我ê心，凡事beh遵thàn我ê旨意。Í-keng hòe i, chiū kú Tāi-pi̍t chòe in ê ông; kan-chèng i, kóng, Góa tit-tio̍h Iâ-se ê kiáⁿ Tāi-pi̍t, i sī ha̍h góa ê sim, hoān sū beh chun-thàn góa ê chí-ì.

23Tùi chit人ê後裔，上帝照所應允ê，kā以色列人立一個救主，就是耶穌。Tùi chit lâng ê hō͘-è, Siōng-tè chiàu só͘ èng-ún ê, kā Í-sek-lia̍t lâng li̍p chi̍t ê Kiù-chú, chiū-sī Iâ-so͘.

24當伊bē出頭ê時，約翰事先用反悔ê洗禮宣傳tī以色列ê眾百姓。Tng I bē chhut-thâu ê sî, Iok-hān tāi-seng ēng hoán-hóe ê sóe-lé soan-thoân tī Í-sek-lia̍t ê chèng peh-sìⁿ.

25約翰teh-beh上伊ê路站ê時，講，Lín phah算我是是誰？我m̄是基督。有路尾我來ê，我tháu伊ê鞋帶亦bōe堪得。Iok-hān teh-beh chīn i ê lō͘-chām ê sî, kóng, Lín phah-sǹg góa sī chī-chūi? góa m̄ sī Ki-tok. Ū lō͘-bé góa lâi ê, góa tháu I ê ôe-tòa ia̍h bōe kham-tit.

26兄弟ah，亞伯拉罕ê後裔，kap lín中間敬畏上帝ê人，chit-ê拯救ê道已經傳到tī咱lah。Hiaⁿ-tī ah, A-pek-la̍h-hán ê hō͘-è, kap lín tiong-kan kèng-ùi Siōng-tè ê lâng, chit ê chín-kiù ê tō í-keng thoân kàu tī lán lah.

27因為khiā起tī耶路撒冷ê人，kap in ê官府，m̄-bat伊，亦m̄-bat ta̍k-ê安歇日所讀先知ê話，chiah擬定伊，tú-tú是應驗chiah-ê話。In-ūi khiā-khí tī Iâ-lō͘-sat-léng ê lâng, kap in ê koaⁿ-hú, m̄ bat I, ia̍h m̄ bat ta̍k ê an-hioh-ji̍t só͘ tha̍k sian-ti ê ōe, chiah gí-tiāⁿ I, tú-tú sī èng-giām chiah ê ōe.

28雖然查伊無死chōe，iáu-kú求彼拉多thâi伊。Sui-jiân chhâ I bô sí chōe, iáu-kú kiû Pí-lia̍p-to thâi I.

29凡若所記載指伊ê話已經應驗，就tùi柴裡收伊落來，hē tī墓內。Hoān-nā só͘ kì-chài chí I ê ōe í-keng èng-giām, chiū tùi chhâ-ni̍h siu I lo̍h-lâi, hē tī bōng-lāi.

30獨獨上帝tùi死人中hō͘伊koh活。To̍k-to̍k Siōng-tè tùi sí-lâng tiong hō͘ I koh-oa̍h.

31伊chōe-chōe日hō͘ hiah-ê tùi加利利kap伊上耶路撒冷ê人看見；taⁿ in有對百姓做伊ê干證。I chōe-chōe ji̍t hō͘ hiah ê tùi Ka-lī-lī kap I chiūⁿ Iâ-lō͘-sat-léng ê lâng khòaⁿ-kìⁿ; taⁿ in ū tùi peh-sìⁿ chòe I ê kan-chèng.

32Koh阮報 lín好消息，就是早所應允列祖ê，Koh goán pò lín hó siau-sit, chiū-sī chá só͘ èng-ún lia̍t-chó͘ ê,

33taⁿ上帝有kā咱ê kiaⁿ孫應驗伊，因為伊有hō͘耶穌koh活；亦親像詩篇第二篇記載，講，你就是我ê kiáⁿ，我今á日生你。taⁿ Siōng-tè ū kā lán ê kiáⁿ-sun èng-giām i, in-ūi I ū hō͘ Iâ-so͘ koh-oa̍h; ia̍h chhin-chhiūⁿ si-phian tē jī phiⁿ kì-chài, kóng, Lí chiū-sī góa ê Kiáⁿ, góa kin-á-ji̍t siⁿ lí.

34論到伊hō͘伊tùi死人中koh活無koh歸tī朽爛，有án-ni講，我beh用大衛聖koh實在ê恩惠hō͘你。Lūn-kàu I hō͘ I tùi sí-lâng tiong koh-oa̍h bô koh kui tī hiú-nōa, ū án-ni kóng, Góa beh ēng Tāi-pi̍t sèng koh si̍t-chāi ê un-hūi hō͘ lí.

35Koh別篇亦有講，你無beh hō͘你ê聖ê tú-tio̍h朽爛。Koh pa̍t phiⁿ ia̍h ū kóng, Lí bô beh hō͘ lí ê Sèng-ê tú-tio̍h hiú-nōa.

36因為大衛tī伊ê世代遵thàn上帝ê旨意，就去睏，kap伊ê列祖saⁿ-kap hē-teh，來tú-tio̍h朽爛；In-ūi Tāi-pi̍t tī i ê sè-tāi chun-thàn Siōng-tè ê chí-ì, chiū khì khùn, kap i ê lia̍t-chó͘ saⁿ-kap hē-teh, lâi tú-tio̍h hiú-nōa;

37獨獨上帝所hō͘伊koh活ê無tú-tio̍h朽爛。to̍k-to̍k Siōng-tè só͘ hō͘ I koh-oa̍h ê bô tú-tio̍h hiú-nōa.

38兄弟ah，án-ni lín tio̍h知，tùi chit人chiah有赦罪ê道理傳hō͘ lín；Hiaⁿ-tī ah, án-ni lín tio̍h chai, tùi chit lâng chiah ū sià-chōe ê tō-lí thoân hō͘ lín;

39lín 靠摩西ê律法，所bōe得tio̍h稱做義ê事，見若靠 chit人，就一切得tio̍h稱做義。lín khò Mô͘-se ê lu̍t-hoat, só͘ bōe tit-tio̍h chheng-chòe-gī ê sū, kìⁿ-nā khò chit lâng, chiū it-chhè tit-tio̍h chheng-chòe-gī.

40所以tio̍h謹慎，驚了先知ê話到tī lín：Só͘-í tio̍h kín-sīn, kiaⁿ-liáu sian-ti ê ōe kàu tī lín:

41伊ê話講， 藐視ê人ah，lín tio̍h看，來gông-ngia̍h，來滅無； 因為當lín ê時日我行一項事， 就是雖然有人kā lín講，lín 也m̄信ê。i ê ōe kóng, Biáu-sī ê lâng ah, lín tio̍h khòaⁿ, lâi gông-ngia̍h, lâi bia̍t-bô; In-ūi tng lín ê sî-ji̍t góa kiâⁿ chi̍t hāng sū, Chiū-sī sui-jiân ū lâng kā lín kóng, lín iā m̄ sìn ê.

42In出去ê時，有人求in tī後ê安歇日用chiah-ê話koh kā in講。In chhut-khì ê sî, ū lâng kiû in tī āu ê an-hioh-ji̍t ēng chiah ê ōe koh kā in kóng.

43會眾已經四散，猶太人，kap入in ê教敬虔ê人，chōe-chōe tè保羅、巴拿巴；in kap in講話，勸in長長tiàm-tī上帝ê恩。Hōe-chiòng í-keng sì-sòaⁿ, Iû-thài lâng, kap ji̍p in ê kàu kèng-khiân ê lâng, chōe-chōe tè Pó-lô, Pa-ná-pa; in kap in kóng ōe, khǹg in tn̂g-tn̂g tiàm tī Siōng-tè ê un.

44後安歇日，thong城ê人差不多lóng聚集，來聽上帝ê道理。Āu an-hioh-ji̍t, thong siâⁿ ê lâng chha-put-to lóng chū-chi̍p, lâi thiaⁿ Siōng-tè ê tō-lí.

45但是猶太人看見人hiah chōe，就滿心怨妒，辯駁保羅所講ê，續謗瀆in。Nā-sī Iû-thài lâng khòaⁿ-kìⁿ lâng hiah chōe, chiū móa-sim oàn-tò͘, piān-pok Pó-lô só͘ kóng ê, sòa pòng-to̍k in.

46保羅、巴拿巴好膽講，上帝ê道理事先tùi lín講，是應該。但是lín已經棄sak伊，擬斷家己bōe堪得受tio̍h永活，taⁿ阮chiah-ê beh轉ǹg外邦人lah。Pó-lô, Pa-ná-pa hó-táⁿ kóng, Siōng-tè ê tō-lí tāi-seng tùi lín kóng, sī eng-kai. Nā-sī lín í-keng khì-sak i, gí-toàn ka-kī bōe kham-tit siū-tio̍h éng-oa̍h, taⁿ goán chiah-ê beh choán ǹg gōa-pang lâng lah.

47因為主bat án-ni命令阮，講， 我已經設立你做外邦ê光， hō͘你做拯救ê到tī地極。In-ūi Chú bat án-ni bēng-lēng goán, kóng, Góa í-keng siat-li̍p lí chòe gōa-pang ê kng, Hō͘ lí chòe chín-kiù-ê kàu tī tōe-ke̍k.

48外邦人聽了，就歡喜，o-ló上帝ê道理；凡若受定tio̍h beh得tio̍h永活ê人lóng信。Gōa-pang lâng thiaⁿ-liáu, chiū hoaⁿ-hí, o-ló Siōng-tè ê tō-lí; hoān-nā siū tiāⁿ-tio̍h beh tit-tio̍h éng-oa̍h ê lâng lóng sìn.

49Tùi án-ni，主ê道理遍傳tī hit-ê地方。Tùi án-ni Chú ê tō-lí piàn-thoân tī hit ê tōe-hng.

50獨獨猶太人催逼敬虔尊貴ê婦人人，kap城內ê頭人，生事khún-pek保羅、巴拿巴，將in趕出境外。To̍k-to̍k Iû-thài lâng chhui-pek kèng-khiân chun-kùi ê hū-jîn-lâng, kap siâⁿ-lāi ê thâu-lâng, siⁿ sū khún-pek Pó-lô, Pa-ná-pa, chiong in kóaⁿ chhut kéng-gōa.

51但是in對眾人拌去腳ê土粉，就去Í-ko-liām。Nā-sī in tùi chèng lâng pōaⁿ-khì kha ê thô͘-hún, chiū khì Í-ko-liām.

52學生滿心歡喜，koh hō͘聖神充滿。Ha̍k-seng móa-sim hoaⁿ-hí, koh hō͘ Sèng Sîn chhiong-móa.

1In tī Í-ko-liām saⁿ-kap入猶太人ê會堂，來講論；致到猶太人kap希利尼人chōe-chōe來信。In tī Í-ko-liām saⁿ-kap ji̍p Iû-thài lâng ê hōe-tn̂g, lâi káng-lūn; tì-kàu Iû-thài lâng kap Hi-lī-nî lâng chōe-chōe lâi sìn.

2但是hiah-ê m̄順thàn ê猶太人搖動外邦人ê心，hō͘ in怨恨chiah-ê兄弟。Nā-sī hiah ê m̄ sūn-thàn ê Iû-thài lâng iô-tāng gōa-pang lâng ê sim, hō͘ in oàn-hūn chiah ê hiaⁿ-tī.

3In就tiàm hia chōe-chōe日，óa靠主好膽來講；主賞賜神蹟奇事，對in ê手來成，干證伊恩典ê道理。In chiū tiàm hia chōe-chōe ji̍t, óa-khò Chú hó-táⁿ lâi kóng; Chú siúⁿ-sù sîn-jiah kî-sū, tùi in ê chhiú lâi chiâⁿ, kan-chèng I un-tián ê tō-lí.

4城內ê眾人就分pêng，有ê tè猶太人，有ê tè使徒。Siâⁿ-lāi ê chèng lâng chiū hun-pêng, ū-ê tè Iû-thài lâng, ū-ê tè sù-tô͘.

5Hit時外邦人、猶太人，kap in ê序大ài oe-khoeh凌辱，用石頭tìm in。Hit sî gōa-pang lâng, Iû-thài lâng, kap in ê sī-tōa ài oe-khoeh lêng-jio̍k, ēng chio̍h-thâu tìm in.

6In知，就逃走去Lū-ko-nî ê Lō͘-sū-tek、Te̍k-pì chiah-ê城，kap周圍ê地方；In chai, chiū tô-cháu khì Lū-ko-nî ê Lō͘-sū-tek Te̍k-pì chiah ê siâⁿ, kap chiu-ûi ê tōe-hng;

7tī hia傳福音。tī hia thoân hok-im.

8Tī Lō͘-sū-tek有一人坐teh，雙腳無力，是tùi出世就軟腳，lóng 未bat行。Tī Lō͘-sū-tek ū chi̍t lâng chē-teh, siang-kha bô la̍t, sī tùi chhut-sì chiū nńg-kha, lóng bē bat kiâⁿ.

9伊聽保羅講道理；保羅注目看伊，看見伊有信thang得tio̍h 好，I thiaⁿ Pó-lô kóng tō-lí; Pó-lô chù-ba̍k khòaⁿ i, khòaⁿ-kìⁿ i ū sìn thang tit-tio̍h hó,

10就大聲講，起來，雙腳khiā正，挺身。Hit人就跳起來行。chiū tōa siaⁿ kóng, Khí-lâi, siang-kha khiā chiàⁿ, thêng sin. Hit lâng chiū thiàu-khí-lâi kiâⁿ.

11眾人看見保羅所做，就用Lū-ko-nî ê腔口大聲講，Chiah-ê神明借人ê形，臨到咱lah。Chèng lâng khòaⁿ-kìⁿ Pó-lô só͘ chòe, chiū ēng Lū-ko-nî ê khiuⁿ-kháu tōa siaⁿ kóng, Chiah ê sîn-bêng chioh lâng ê hêng, lîm-kàu lán lah.

12就稱巴拿巴做宙斯 ；因為保羅出頭講話，稱伊做Hi-ní-bí。Chiū chheng Pa-ná-pa chòe Tiū-su; in-ūi Pó-lô chhut-thâu kóng ōe, chheng i chòe Hi-ní-bí.

13城外宙斯 ê祭司牽牛á，the̍h 花環，到門前，beh kap眾人獻祭。Siâⁿ-gōa Tiū-su ê chè-si khan gû-á, the̍h hoe-khoân, kàu mn̂g chêng, beh kap chèng lâng hiàn-chè.

14但是使徒巴拿巴、保羅聽見，就拆裂衫，跳出來眾人ê中間，叫講，Nā-sī sù-tô͘ Pa-ná-pa, Pó-lô thiaⁿ-kìⁿ, chiū thiah-li̍h saⁿ, thiàu-chhut-lâi chèng lâng ê tiong-kan, kiò kóng,

15Lín大家啥事行án-ni？阮chiah-ê亦是人kap lín tâng情，傳福音，hō͘ lín離開chiah-ê無影跡ê，來歸tī真活ê上帝，就是創造天、地、海，kap其中萬物ê。Lín tāi-ke siáⁿ-sū kiâⁿ án-ni? Goán chiah-ê ia̍h sī lâng kap lín tâng chêng, thoân hok-im, hō͘ lín lī-khui chiah ê bô iáⁿ-chiah ê, lâi kui tī chin-oa̍h ê Siōng-tè, chiū-sī chhòng-chō thiⁿ, tōe, hái, kap kî-tiong bān mi̍h ê.

16伊tī事先ê世代，容允萬邦行in ê路。I tī tāi-seng ê sè-tāi, iông-ún bān pang kiâⁿ in ê lō͘.

17但是伊未bat無為tio̍h本身顯出證據，就是行好事，kā lín tùi天落雨，照時出果子，用日食kap歡喜充滿lín ê心。Nā-sī I bē bat bô ūi-tio̍h pún-sin hián-chhut chèng-kù, chiū-sī kiâⁿ hó sū, kā lín tùi thiⁿ lo̍h hō͘, chiàu sî chhut ké-chí, ēng ji̍t-si̍t kap hoaⁿ-hí chhiong-móa lín ê sim.

18In講án-ni，lím-lím-á禁止眾人無祭獻in。In kóng án-ni, lím-lím-á kìm-chí chèng lâng bô chè-hiàn in.

19總是有猶太人tùi安提阿Í-ko-liām來；教唆眾人，就用石頭tìm保羅；phah算伊已經死，就拖伊出城外。Chóng-sī ū Iû-thài lâng tùi An-thê-o Í-ko-liām lâi; kàu-so chèng lâng, chiū ēng chio̍h-thâu tìm Pó-lô; phah-sǹg i í-keng sí, chiū thoa i chhut siâⁿ-gōa.

20但是學生圍伊，伊就起來入城；隔日kap巴拿巴離開hia，去 Te̍k-pì。Nā-sī ha̍k-seng ûi i, i chiū khí-lâi ji̍p siâⁿ; keh ji̍t kap Pa-ná-pa lī-khui hia, khì Te̍k-pì.

21已經傳福音tī hit-ê城，hō͘ chōe-chōe人來做學生，就倒tńg 去 Lō͘-sū-tek、Í-ko-liām、安提阿，Í-keng thoân hok-im tī hit ê siâⁿ, hō͘ chōe-chōe lâng lâi chòe ha̍k-seng, chiū tò-tńg khì Lō͘-sū-tek, Í-ko-liām, An-thê-o,

22堅固學生ê心，勸in長長tiàm-tī信；koh講，咱tio̍h tùi chōe-chōe艱苦來入上帝ê國。kian-kò͘ ha̍k-seng ê sim, khǹg in tn̂g-tn̂g tiàm tī sìn; koh kóng, Lán tio̍h tùi chōe-chōe kan-khó͘ lâi ji̍p Siōng-tè ê kok.

23In tī ta̍k-ê教會kā in設立所揀ê長老，禁食祈禱，就將in交託tī in所信ê主。In tī ta̍k ê kàu-hōe kā in siat-li̍p só͘ kéng ê tiúⁿ-ló, kìm-chia̍h kî-tó, chiū chiong in kau-thok tī in só͘ sìn ê Chú.

24就經過Pí-se-tí，到Pông-hui-lī-a。Chiū keng-kè Pí-se-tí, kàu Pông-hui-lī-a.

25已經講道理tī Pia̍t-ka，就落去A-tāi-lī；Í-keng kóng tō-lí tī Pia̍t-ka, chiū lo̍h-khì A-tāi-lī;

26tùi hia搭船到安提阿，就是in bat tī hia受交託tī上帝ê恩典，來行in所完滿ê工。tùi hia tah chûn kàu An-thê-o, chiū-sī in bat tī hia siū kau-thok tī Siōng-tè ê un-tián, lâi kiâⁿ in só͘ oân-móa ê kang.

27已經到，聚集教會，講起上帝所kap in行一切ê事，亦講上帝àn怎樣kā外邦人開信ê門。Í-keng kàu, chū-chi̍p kàu-hōe, kóng-khí Siōng-tè só͘ kap in kiâⁿ it-chhè ê sū, ia̍h kóng Siōng-tè àn-cháiⁿ-iūⁿ kā gōa-pang lâng khui sìn ê mn̂g.

28就kap學生saⁿ-kap tòa嶄然久。Chiū kap ha̍k-seng saⁿ-kap tòa chám-jiân kú.

1有kúi-nā人tùi猶太落來，教示兄弟，講，若無遵thàn摩西ê律例受割禮，就lín bōe得tio̍h救。Ū kúi-nā lâng tùi Iû-thài lo̍h-lâi, kà-sī hiaⁿ-tī, kóng, Nā bô chun-thàn Mô͘-se ê lu̍t-lē siū kat-lé, chiū lín bōe tit-tio̍h kiù.

2保羅、巴拿巴已經kap in大相爭辯論，兄弟就phài保羅、巴拿巴kap in中間另外kúi-nā人，將所辯論ê事上耶路撒冷，見使徒kap長老。Pó-lô, Pa-ná-pa í-keng kap in tōa saⁿ-chiⁿ piān-lūn, hiaⁿ-tī chiū phài Pó-lô, Pa-ná-pa kap in tiong-kan lēng-gōa kúi-nā lâng, chiong só͘ piān-lūn ê sū chiūⁿ Iâ-lō͘-sat-léng, kìⁿ sù-tô͘ kap tiúⁿ-ló.

3Tùi án-ni，教會送in起身；in就經過腓尼基、撒馬利亞，講起外邦人ê歸正，hō͘ 眾兄弟大歡喜。Tùi án-ni kàu-hōe sàng in khí-sin; in chiū keng-kè Hui-nî-ki, Sat-má-lī-a, kóng-khí gōa-pang lâng ê kui-chèng, hō͘ chèng hiaⁿ-tī tōa hoaⁿ-hí.

4到耶路撒冷，hō͘教會kap使徒、長老接納；in就講起上帝所kap in行一切ê事。Kàu Iâ-lō͘-sat-léng, hō͘ kàu-hōe kap sù-tô͘, tiúⁿ-ló chiap-la̍p; in chiū kóng-khí Siōng-tè só͘ kap in kiâⁿ it-chhè ê sū.

5但是有kúi-nā個信徒屬法利賽黨 ê起來講，的確tio̍h kā in行割禮，命令in 守摩西ê律法。Nā-sī ū kúi-nā ê sìn-tô͘ sio̍k Hoat-lī-sài tóng ê khí-lâi kóng, Tek-khak tio̍h kā in kiâⁿ kat-lé, bēng-lēng in siú Mô͘-se ê lu̍t-hoat.

6使徒、長老聚集參詳chit節事。Sù-tô͘, tiúⁿ-ló chū-chi̍p chham-siông chit chat sū.

7已經辯論久久，彼得就起來對in講，列位兄弟ah，lín lóng知，早上帝tī lín中間揀我，hō͘外邦人tùi我ê嘴聽見福音ê道理來信。Í-keng piān-lūn kú-kú, Pí-tek chiū khí-lâi tùi in kóng, Lia̍t-ūi hiaⁿ-tī ah, lín lóng chai, chá Siōng-tè tī lín tiong-kan kéng góa, hō͘ gōa-pang lâng tùi góa ê chhùi thiaⁿ-kìⁿ hok-im ê tō-lí lâi sìn.

8Koh, bat人ê心ê上帝kā in做干證，Koh bat lâng ê sim ê Siōng-tè kā in chòe kan-chèng,

9用聖神賞賜in，親像賞賜咱一樣；無分別in kap咱，是用信清氣in ê心。ēng Sèng Sîn siúⁿ-sù in, chhin-chhiūⁿ siúⁿ-sù lán chi̍t iūⁿ; bô hun-piat in kap lán, sī ēng sìn chheng-khì in ê sim.

10Taⁿ啥事試上帝，用咱ê祖kap咱所bōe背ê taⁿ，hē tī學生ê頷頸ah？Taⁿ siáⁿ-sū chhì Siōng-tè, ēng lán ê chó͘ kap lán só͘ bōe pē ê taⁿ, hē tī ha̍k-seng ê ām-kún ah?

11咱是tùi主耶穌ê恩得救，親像in一樣，這是咱所信。Lán sī tùi Chú Iâ-so͘ ê un tit kiù, chhin-chhiūⁿ in chi̍t iūⁿ, che sī lán só͘ sìn.

12眾人lóng靜靜；聽巴拿巴、保羅講起上帝用in tī外邦人ê中間所行chiah-ê神蹟奇事。Chèng lâng lóng chēng-chēng; thiaⁿ Pa-ná-pa, Pó-lô kóng-khí Siōng-tè ēng in tī gōa-pang lâng ê tiong-kan só͘ kiâⁿ chiah ê sîn-jiah kî-sū.

13講soah，雅各就應講，列位兄弟ah，請聽我講：Kóng soah, Ngá-kok chiū ìn kóng, Lia̍t-ūi hiaⁿ-tī ah, chhiáⁿ thiaⁿ góa kóng:

14西門已經講起上帝起頭怎樣眷顧外邦人，對in中間取百姓來歸tī伊ê名。Se-biān í-keng kóng-khí Siōng-tè khí-thâu cháiⁿ-iūⁿ koàn-kò͘ gōa-pang lâng, tùi in tiong-kan chhú peh-sìⁿ lâi kui tī I ê miâ.

15Chiah-ê先知ê話，也kap chit-ê事相合；Chiah ê sian-ti ê ōe, iā kap chit ê sū saⁿ-ha̍p;

16親像所記載，講， Chiah-ê tāi-chì了後，我beh 倒tńg來， Koh起大衛倒落去ê布棚； Beh koh起hiah-ê破壞ê， 來建立伊；chhin-chhiūⁿ só͘ kì-chài, kóng, Chiah ê tāi-chì liáu-āu, góa beh tò-tńg-lâi, Koh khí Tāi-pi̍t tó-lo̍h-khì ê pò͘-pîⁿ; Beh koh khí hiah ê phòa-hoāi ê, Lâi kiàn-li̍p i;

17Hō͘其餘ê百姓， Kap見若奉我ê名ê外邦人，lóng chhē主；Hō͘ kî-û ê peh-sìⁿ, Kap kìⁿ-nā hōng góa ê miâ ê gōa-pang lâng, lóng chhē Chú;

18Chiah-ê話是tùi世間ê起頭顯明chiah-ê tāi-chì ê主所講ê。Chiah ê ōe sī tùi sè-kan ê khí-thâu hián-bêng chiah ê tāi-chì ê Chú só͘ kóng ê.

19所以我phah算外邦人歸主ê，m̄-thang攪擾伊；Só͘-í góa phah-sǹg gōa-pang lâng kui Chú ê, m̄-thang kiáu-jiáu i;

20獨獨寫phoe吩咐in禁戒偶像ê污穢，kap淫亂，kap食捏死ê物，kap血。to̍k-to̍k siá phoe hoan-hù in kìm-kài ngó͘-siōng ê ù-òe, kap îm-loān, kap chia̍h ni̍h-sí ê mi̍h, kap huih.

21因為tùi 早以來tī ta̍k-ê城有傳摩西ê冊，就是ta̍k-ê安歇日tī會堂所讀ê。In-ūi tùi chá í-lâi tī ta̍k ê siâⁿ ū thoân Mô͘-se ê chheh, chiū-sī ta̍k ê an-hioh-ji̍t tī hōe-tn̂g só͘ tha̍k ê.

22Hit時使徒、長老kap thong教會，決意對in中間揀人，就是稱做Pa-sat-pa ê猶大kap Se-lah，chit兩人就是兄弟中出tioh ê，Hit sî sù-tô͘, tiúⁿ-ló kap thong kàu-hōe, koat-ì tùi in tiong-kan kéng lâng, chiū-sī chheng chòe Pa-sat-pa ê Iû-tāi kap Se-lah, chit nn̄g lâng chiū-sī hiaⁿ-tī tiong chhut-tioh ê,

23差in kap保羅、巴拿巴同去安提阿；用phoe交代in ê手，講，使徒kap chiah-ê老兄弟，請安tiàm-tī安提阿、敘利亞、Ki-lī-ka外邦中chiah-ê兄弟：chhe in kap Pó-lô, Pa-ná-pa tâng khì An-thê-o; ēng phoe kau-tāi in ê chhiú, kóng, Sù-tô͘ kap chiah ê lāu hiaⁿ-tī, chhéng-an tiàm tī An-thê-o, Sū-lī-a, Ki-lī-ka gōa-pang tiong chiah ê hiaⁿ-tī:

24因為聽見kúi-nā人tùi阮中間出去，用話攪擾lín，phah亂lín ê心；其實m̄是阮所命令ê；in-ūi thiaⁿ-kìⁿ kúi-nā lâng tùi goán tiong-kan chhut-khì, ēng ōe kiáu-jiáu lín, phah-loān lín ê sim; kî-si̍t m̄ sī goán só͘ bēng-lēng ê;

25阮chiah-ê已經同心決意，揀人差伊kap阮所疼ê巴拿巴、保羅就近lín。goán chiah-ê í-keng tâng-sim koat-ì, kéng lâng chhe i kap goán só͘ thiàⁿ ê Pa-ná-pa, Pó-lô chiū-kūn lín.

26Chit兩人是為tio̍h咱ê主耶穌基督ê名，無惜性命ê。Chit nn̄g lâng sī ūi-tio̍h lán ê Chú Iâ-so͘ Ki-tok ê miâ, bô sioh sìⁿ-miā ê.

27所以差猶大kap Se-lah，in也beh親嘴講起chiah-ê事。Só͘-í chhe Iû-tāi kap Se-lah, in iā beh chhin-chhùi kóng-khí chiah ê sū.

28因為聖神kap阮決意，tû chit幾項要緊ê事以外，無用重擔hē tī lín ê身：In-ūi Sèng Sîn kap goán koat-ì, tû chit kúi hāng iàu-kín ê sū í-gōa, bô ēng tāng tàⁿ hē tī lín ê sin:

29就是禁戒祭偶像ê物，kap血，kap捏死ê物，kap淫亂；lín若禁戒chiah-ê就會興通。願lín平安。chiū-sī kìm-kài chè ngó͘-siōng ê mi̍h, kap huih, kap ni̍h-sí ê mi̍h, kap îm-loān; lín nā kìm-kài chiah-ê chiū ōe heng-thong. Goān lín pêng-an.

30In奉差，就落去安提阿；已經聚集眾人，就將phoe交in。In hōng chhe, chiū lo̍h-khì An-thê-o; í-keng chū-chi̍p chèng lâng, chiū chiong phoe kau in.

31眾人讀了歡喜hiah-ê安慰ê話。Chèng lâng tha̍k-liáu hoaⁿ-hí hiah ê an-ùi ê ōe.

32猶大、Se-lah本身也是先知，用chōe-chōe話安慰兄弟，來堅固in。Iû-tāi, Se-lah pún-sin iā sī sian-ti, ēng chōe-chōe ōe an-ùi hiaⁿ-tī, lâi kian-kò͘ in.

33Tiàm hia有hiah久，兄弟就hō͘ in平安tò去，就近差in ê。Tiàm hia ū hiah kú, hiaⁿ-tī chiū hō͘ in pêng-an tò-khì, chiū-kūn chhe in ê.

35但是保羅、巴拿巴tiàm-tī安提阿kap chōe-chōe別人saⁿ-kap教示人，傳主福音ê道理。Nā-sī Pó-lô, Pa-ná-pa tiàm tī An-thê-o kap chōe-chōe pa̍t lâng saⁿ-kap kà-sī lâng, thoân Chú hok-im ê tō-lí.

36過 kúi-nā日，保羅對巴拿巴講，咱tio̍h koh去前傳主ê道理ê ta̍k-ê城，看兄弟怎樣。Kè kúi-nā ji̍t, Pó-lô tùi Pa-ná-pa kóng, Lán tio̍h koh khì chêng thoân Chú ê tō-lí ê ta̍k ê siâⁿ, khòaⁿ hiaⁿ-tī cháiⁿ-iūⁿ.

37巴拿巴ài beh帶約翰，名馬可ê，saⁿ-kap 去。Pa-ná-pa ài beh tòa Iok-hān, miâ Má-khó ê, saⁿ-kap khì.

38獨獨保羅phah算帶伊去是無合，因為伊tī Pông-hui-lī-a bat離開in，無kap in去做工。To̍k-to̍k Pó-lô phah-sǹg tòa i khì sī bô ha̍p, in-ūi i tī Pông-hui-lī-a bat lī-khui in, bô kap in khì chòe kang.

39就相激，致到大家分開；巴拿巴帶馬可搭船去居比路；Chiū saⁿ-kek, tì-kàu tāi-ke pun-khui; Pa-ná-pa tòa Má-khó tah chûn khì Ku-pí-lō͘;

40保羅揀Se-lah saⁿ-kap 去；兄弟將伊交託tī主ê恩。Pó-lô kéng Se-lah saⁿ-kap khì; hiaⁿ-tī chiong i kau-thok tī Chú ê un.

41伊遍行敘利亞、Ki-lī-ka，堅固chiah-ê教會。I piàn kiâⁿ Sū-lī-a, Ki-lī-ka, kian-kò͘ chiah ê kàu-hōe.