1有kúi-nā人tùi猶太落來，教示兄弟，講，若無遵thàn摩西ê律例受割禮，就lín bōe得tio̍h救。Ū kúi-nā lâng tùi Iû-thài lo̍h-lâi, kà-sī hiaⁿ-tī, kóng, Nā bô chun-thàn Mô͘-se ê lu̍t-lē siū kat-lé, chiū lín bōe tit-tio̍h kiù.

2保羅、巴拿巴已經kap in大相爭辯論，兄弟就phài保羅、巴拿巴kap in中間另外kúi-nā人，將所辯論ê事上耶路撒冷，見使徒kap長老。Pó-lô, Pa-ná-pa í-keng kap in tōa saⁿ-chiⁿ piān-lūn, hiaⁿ-tī chiū phài Pó-lô, Pa-ná-pa kap in tiong-kan lēng-gōa kúi-nā lâng, chiong só͘ piān-lūn ê sū chiūⁿ Iâ-lō͘-sat-léng, kìⁿ sù-tô͘ kap tiúⁿ-ló.

3Tùi án-ni，教會送in起身；in就經過腓尼基、撒馬利亞，講起外邦人ê歸正，hō͘ 眾兄弟大歡喜。Tùi án-ni kàu-hōe sàng in khí-sin; in chiū keng-kè Hui-nî-ki, Sat-má-lī-a, kóng-khí gōa-pang lâng ê kui-chèng, hō͘ chèng hiaⁿ-tī tōa hoaⁿ-hí.

4到耶路撒冷，hō͘教會kap使徒、長老接納；in就講起上帝所kap in行一切ê事。Kàu Iâ-lō͘-sat-léng, hō͘ kàu-hōe kap sù-tô͘, tiúⁿ-ló chiap-la̍p; in chiū kóng-khí Siōng-tè só͘ kap in kiâⁿ it-chhè ê sū.

5但是有kúi-nā個信徒屬法利賽黨 ê起來講，的確tio̍h kā in行割禮，命令in 守摩西ê律法。Nā-sī ū kúi-nā ê sìn-tô͘ sio̍k Hoat-lī-sài tóng ê khí-lâi kóng, Tek-khak tio̍h kā in kiâⁿ kat-lé, bēng-lēng in siú Mô͘-se ê lu̍t-hoat.

6使徒、長老聚集參詳chit節事。Sù-tô͘, tiúⁿ-ló chū-chi̍p chham-siông chit chat sū.

7已經辯論久久，彼得就起來對in講，列位兄弟ah，lín lóng知，早上帝tī lín中間揀我，hō͘外邦人tùi我ê嘴聽見福音ê道理來信。Í-keng piān-lūn kú-kú, Pí-tek chiū khí-lâi tùi in kóng, Lia̍t-ūi hiaⁿ-tī ah, lín lóng chai, chá Siōng-tè tī lín tiong-kan kéng góa, hō͘ gōa-pang lâng tùi góa ê chhùi thiaⁿ-kìⁿ hok-im ê tō-lí lâi sìn.

8Koh, bat人ê心ê上帝kā in做干證，Koh bat lâng ê sim ê Siōng-tè kā in chòe kan-chèng,

9用聖神賞賜in，親像賞賜咱一樣；無分別in kap咱，是用信清氣in ê心。ēng Sèng Sîn siúⁿ-sù in, chhin-chhiūⁿ siúⁿ-sù lán chi̍t iūⁿ; bô hun-piat in kap lán, sī ēng sìn chheng-khì in ê sim.

10Taⁿ啥事試上帝，用咱ê祖kap咱所bōe背ê taⁿ，hē tī學生ê頷頸ah？Taⁿ siáⁿ-sū chhì Siōng-tè, ēng lán ê chó͘ kap lán só͘ bōe pē ê taⁿ, hē tī ha̍k-seng ê ām-kún ah?

11咱是tùi主耶穌ê恩得救，親像in一樣，這是咱所信。Lán sī tùi Chú Iâ-so͘ ê un tit kiù, chhin-chhiūⁿ in chi̍t iūⁿ, che sī lán só͘ sìn.

12眾人lóng靜靜；聽巴拿巴、保羅講起上帝用in tī外邦人ê中間所行chiah-ê神蹟奇事。Chèng lâng lóng chēng-chēng; thiaⁿ Pa-ná-pa, Pó-lô kóng-khí Siōng-tè ēng in tī gōa-pang lâng ê tiong-kan só͘ kiâⁿ chiah ê sîn-jiah kî-sū.

13講soah，雅各就應講，列位兄弟ah，請聽我講：Kóng soah, Ngá-kok chiū ìn kóng, Lia̍t-ūi hiaⁿ-tī ah, chhiáⁿ thiaⁿ góa kóng:

14西門已經講起上帝起頭怎樣眷顧外邦人，對in中間取百姓來歸tī伊ê名。Se-biān í-keng kóng-khí Siōng-tè khí-thâu cháiⁿ-iūⁿ koàn-kò͘ gōa-pang lâng, tùi in tiong-kan chhú peh-sìⁿ lâi kui tī I ê miâ.

15Chiah-ê先知ê話，也kap chit-ê事相合；Chiah ê sian-ti ê ōe, iā kap chit ê sū saⁿ-ha̍p;

16親像所記載，講， Chiah-ê tāi-chì了後，我beh 倒tńg來， Koh起大衛倒落去ê布棚； Beh koh起hiah-ê破壞ê， 來建立伊；chhin-chhiūⁿ só͘ kì-chài, kóng, Chiah ê tāi-chì liáu-āu, góa beh tò-tńg-lâi, Koh khí Tāi-pi̍t tó-lo̍h-khì ê pò͘-pîⁿ; Beh koh khí hiah ê phòa-hoāi ê, Lâi kiàn-li̍p i;

17Hō͘其餘ê百姓， Kap見若奉我ê名ê外邦人，lóng chhē主；Hō͘ kî-û ê peh-sìⁿ, Kap kìⁿ-nā hōng góa ê miâ ê gōa-pang lâng, lóng chhē Chú;

18Chiah-ê話是tùi世間ê起頭顯明chiah-ê tāi-chì ê主所講ê。Chiah ê ōe sī tùi sè-kan ê khí-thâu hián-bêng chiah ê tāi-chì ê Chú só͘ kóng ê.

19所以我phah算外邦人歸主ê，m̄-thang攪擾伊；Só͘-í góa phah-sǹg gōa-pang lâng kui Chú ê, m̄-thang kiáu-jiáu i;

20獨獨寫phoe吩咐in禁戒偶像ê污穢，kap淫亂，kap食捏死ê物，kap血。to̍k-to̍k siá phoe hoan-hù in kìm-kài ngó͘-siōng ê ù-òe, kap îm-loān, kap chia̍h ni̍h-sí ê mi̍h, kap huih.

21因為tùi 早以來tī ta̍k-ê城有傳摩西ê冊，就是ta̍k-ê安歇日tī會堂所讀ê。In-ūi tùi chá í-lâi tī ta̍k ê siâⁿ ū thoân Mô͘-se ê chheh, chiū-sī ta̍k ê an-hioh-ji̍t tī hōe-tn̂g só͘ tha̍k ê.

22Hit時使徒、長老kap thong教會，決意對in中間揀人，就是稱做Pa-sat-pa ê猶大kap Se-lah，chit兩人就是兄弟中出tioh ê，Hit sî sù-tô͘, tiúⁿ-ló kap thong kàu-hōe, koat-ì tùi in tiong-kan kéng lâng, chiū-sī chheng chòe Pa-sat-pa ê Iû-tāi kap Se-lah, chit nn̄g lâng chiū-sī hiaⁿ-tī tiong chhut-tioh ê,

23差in kap保羅、巴拿巴同去安提阿；用phoe交代in ê手，講，使徒kap chiah-ê老兄弟，請安tiàm-tī安提阿、敘利亞、Ki-lī-ka外邦中chiah-ê兄弟：chhe in kap Pó-lô, Pa-ná-pa tâng khì An-thê-o; ēng phoe kau-tāi in ê chhiú, kóng, Sù-tô͘ kap chiah ê lāu hiaⁿ-tī, chhéng-an tiàm tī An-thê-o, Sū-lī-a, Ki-lī-ka gōa-pang tiong chiah ê hiaⁿ-tī:

24因為聽見kúi-nā人tùi阮中間出去，用話攪擾lín，phah亂lín ê心；其實m̄是阮所命令ê；in-ūi thiaⁿ-kìⁿ kúi-nā lâng tùi goán tiong-kan chhut-khì, ēng ōe kiáu-jiáu lín, phah-loān lín ê sim; kî-si̍t m̄ sī goán só͘ bēng-lēng ê;

25阮chiah-ê已經同心決意，揀人差伊kap阮所疼ê巴拿巴、保羅就近lín。goán chiah-ê í-keng tâng-sim koat-ì, kéng lâng chhe i kap goán só͘ thiàⁿ ê Pa-ná-pa, Pó-lô chiū-kūn lín.

26Chit兩人是為tio̍h咱ê主耶穌基督ê名，無惜性命ê。Chit nn̄g lâng sī ūi-tio̍h lán ê Chú Iâ-so͘ Ki-tok ê miâ, bô sioh sìⁿ-miā ê.

27所以差猶大kap Se-lah，in也beh親嘴講起chiah-ê事。Só͘-í chhe Iû-tāi kap Se-lah, in iā beh chhin-chhùi kóng-khí chiah ê sū.

28因為聖神kap阮決意，tû chit幾項要緊ê事以外，無用重擔hē tī lín ê身：In-ūi Sèng Sîn kap goán koat-ì, tû chit kúi hāng iàu-kín ê sū í-gōa, bô ēng tāng tàⁿ hē tī lín ê sin:

29就是禁戒祭偶像ê物，kap血，kap捏死ê物，kap淫亂；lín若禁戒chiah-ê就會興通。願lín平安。chiū-sī kìm-kài chè ngó͘-siōng ê mi̍h, kap huih, kap ni̍h-sí ê mi̍h, kap îm-loān; lín nā kìm-kài chiah-ê chiū ōe heng-thong. Goān lín pêng-an.

30In奉差，就落去安提阿；已經聚集眾人，就將phoe交in。In hōng chhe, chiū lo̍h-khì An-thê-o; í-keng chū-chi̍p chèng lâng, chiū chiong phoe kau in.

31眾人讀了歡喜hiah-ê安慰ê話。Chèng lâng tha̍k-liáu hoaⁿ-hí hiah ê an-ùi ê ōe.

32猶大、Se-lah本身也是先知，用chōe-chōe話安慰兄弟，來堅固in。Iû-tāi, Se-lah pún-sin iā sī sian-ti, ēng chōe-chōe ōe an-ùi hiaⁿ-tī, lâi kian-kò͘ in.

33Tiàm hia有hiah久，兄弟就hō͘ in平安tò去，就近差in ê。Tiàm hia ū hiah kú, hiaⁿ-tī chiū hō͘ in pêng-an tò-khì, chiū-kūn chhe in ê.

35但是保羅、巴拿巴tiàm-tī安提阿kap chōe-chōe別人saⁿ-kap教示人，傳主福音ê道理。Nā-sī Pó-lô, Pa-ná-pa tiàm tī An-thê-o kap chōe-chōe pa̍t lâng saⁿ-kap kà-sī lâng, thoân Chú hok-im ê tō-lí.

36過 kúi-nā日，保羅對巴拿巴講，咱tio̍h koh去前傳主ê道理ê ta̍k-ê城，看兄弟怎樣。Kè kúi-nā ji̍t, Pó-lô tùi Pa-ná-pa kóng, Lán tio̍h koh khì chêng thoân Chú ê tō-lí ê ta̍k ê siâⁿ, khòaⁿ hiaⁿ-tī cháiⁿ-iūⁿ.

37巴拿巴ài beh帶約翰，名馬可ê，saⁿ-kap 去。Pa-ná-pa ài beh tòa Iok-hān, miâ Má-khó ê, saⁿ-kap khì.

38獨獨保羅phah算帶伊去是無合，因為伊tī Pông-hui-lī-a bat離開in，無kap in去做工。To̍k-to̍k Pó-lô phah-sǹg tòa i khì sī bô ha̍p, in-ūi i tī Pông-hui-lī-a bat lī-khui in, bô kap in khì chòe kang.

39就相激，致到大家分開；巴拿巴帶馬可搭船去居比路；Chiū saⁿ-kek, tì-kàu tāi-ke pun-khui; Pa-ná-pa tòa Má-khó tah chûn khì Ku-pí-lō͘;

40保羅揀Se-lah saⁿ-kap 去；兄弟將伊交託tī主ê恩。Pó-lô kéng Se-lah saⁿ-kap khì; hiaⁿ-tī chiong i kau-thok tī Chú ê un.

41伊遍行敘利亞、Ki-lī-ka，堅固chiah-ê教會。I piàn kiâⁿ Sū-lī-a, Ki-lī-ka, kian-kò͘ chiah ê kàu-hōe.

1保羅到Te̍k-pì，koh到Lō͘-sū-tek：tú-tn̄g tī hia有一個學生名提摩太，伊ê老母是猶太信ê婦人人；伊ê老父是希利尼人。Pó-lô kàu Te̍k-pì, koh kàu Lō͘-sū-tek: tú-tn̄g tī hia ū chi̍t ê ha̍k-seng miâ Thê-mô͘-thài, i ê lāu-bú sī Iû-thài sìn ê hū-jîn-lâng; i ê lāu-pē sī Hi-lī-nî lâng.

2伊hō͘ Lō͘-sū-tek、 Í-ko-liām chiah-ê兄弟所o-ló。I hō͘ Lō͘-sū-tek Í-ko-liām chiah ê hiaⁿ-tī só͘ o-ló.

3保羅ài chit人kap伊去；為tio̍h hiah-ê所在ê猶太人，就kā伊行割禮；因為in lóng知伊ê老父是希利尼人。Pó-lô ài chit lâng kap i khì; ūi-tio̍h hiah ê só͘-chāi ê Iû-thài lâng, chiū kā i kiâⁿ kat-lé; in-ūi in lóng chai i ê lāu-pē sī Hi-lī-nî lâng.

4In經過chiah-ê城ê時，將耶路撒冷使徒、長老所定tio̍h ê命令傳hō͘ in 守。In keng-kè chiah ê siâⁿ ê sî, chiong Iâ-lō͘-sat-léng sù-tô͘, tiúⁿ-ló só͘ tiāⁿ-tio̍h ê bēng-lēng thoân hō͘ in siú.

5Tùi án-ni，chiah-ê教會信ná堅固，人額日日加添。Tùi án-ni chiah ê kàu-hōe sìn ná kian-kò͘, lâng-gia̍h ji̍t-ji̍t ke-thiⁿ.

6In經過Hut-lū-ka、加拉太ê地方，因為聖神bat禁in傳道理tī亞西亞，In keng-kè Hut-lū-ka, Ka-lia̍p-thài ê tōe-hng, in-ūi Sèng Sîn bat kìm in thoân tō-lí tī A-se-a,

7就行到Múi-se-a ê邊界，想beh去Pì-chhui-nî；chiū kiâⁿ kàu Múi-se-a ê pian-kài, siūⁿ beh khì Pì-chhui-nî;

8耶穌ê神m̄准；就tùi Múi-se-a經過，落到Te̍k-lô-a。Iâ-so͘ ê Sîn m̄ chún; chiū tùi Múi-se-a keng-kè, lo̍h kàu Te̍k-lô-a.

9保羅暝時看見異象；有一個馬其頓人khiā-teh求伊講，請過來馬其頓幫贊阮。Pó-lô mî-sî khòaⁿ-kìⁿ īⁿ-siōng; ū chi̍t ê Má-kî-tùn lâng khiā-teh kiû i kóng, Chhiáⁿ kè-lâi Má-kî-tùn pang-chān goán.

10保羅已經看見異象，阮chiah-ê liâm-piⁿ意愛beh去馬其頓，掠做是上帝召阮傳福音hō͘ in。Pó-lô í-keng khòaⁿ-kìⁿ īⁿ-siōng, goán chiah-ê liâm-piⁿ ì-ài beh khì Má-kî-tùn, lia̍h-chòe sī Siōng-tè tiàu goán thoân hok-im hō͘ in.

11所以tùi Te̍k-lô-a搭船直直到Sat-mô͘-te̍k-lat，隔日到Nî-a-pho-lī；Só͘-í tùi Te̍k-lô-a tah chûn ti̍t-ti̍t kàu Sat-mô͘-te̍k-lat, keh ji̍t kàu Nî-a-pho-lī;

12tùi hia到腓立比，就是馬其頓hit-tè頭一個城，也是羅馬人分設ê城：阮tī chit-ê城tiàm kúi-nā日。tùi hia kàu Hui-li̍p-pí, chiū-sī Má-kî-tùn hit tè thâu chi̍t ê siâⁿ, iā sī Lô-má lâng hun-siat ê siâⁿ: goán tī chit ê siâⁿ tiàm kúi-nā ji̍t.

13Tī安歇日出城門外到河邊，phah算tī hia有祈禱ê所在；就坐teh，kap所聚集ê婦人人談論。Tī an-hioh-ji̍t chhut siâⁿ-mn̂g gōa kàu hô-piⁿ, phah-sǹg tī hia ū kî-tó ê só͘-chāi; chiū chē-teh, kap só͘ chū-chi̍p ê hū-jîn-lâng tâm-lūn.

14有一個賣紫色布ê婦人人，名Lū-tí-a，來聽，伊是Chhui-ngá-chhui-lat城ê人，平素敬拜上帝；主開伊ê心，hō͘伊專ǹg保羅所講ê話。Ū chi̍t-ê bōe chí-sek pò͘ ê hū-jîn-lâng, miâ Lū-tí-a, lâi thiaⁿ, i sī Chhui-ngá-chhui-lat siâⁿ ê lâng, pêng-sò͘ kèng-pài Siōng-tè; Chú khui i ê sim, hō͘ i choan ǹg Pó-lô só͘ kóng ê ōe.

15伊kap伊ê家已經受洗禮，就求阮，講，若掠我做真實信主ê人，請kah我ê家tòa。就強強留阮。I kap i ê ke í-keng siū sóe-lé, chiū kiû goán, kóng, Nā lia̍h góa chòe chin-si̍t sìn Chú ê lâng, chhiáⁿ kàu góa ê ke tòa. Chiū kiông-kiông lâu goán.

16後來阮去祈禱ê所在，有一個女婢tú-tio̍h阮，伊hō͘卜卦ê神上身；平素用卜卦hō͘ hiah-ê主人大thàn錢。Āu-lâi goán khì kî-tó ê só͘-chāi, ū chi̍t ê lú-pī tú-tio̍h goán, i hō͘ pok-kòa ê sîn chiūⁿ sin; pêng-sò͘ ēng pok-kòa hō͘ hiah ê chú-lâng tōa thàn chîⁿ.

17伊tè保羅kap阮，叫講，Chiah-ê人就是至koân上帝ê奴僕，用拯救ê路傳hō͘ lín。I tè Pó-lô kap goán, kiò kóng, Chiah ê lâng chiū-sī chì-koâiⁿ Siōng-tè ê lô͘-po̍k, ēng chín-kiù ê lō͘ thoân hō͘ lín.

18伊chōe-chōe日án-ni行。保羅真厭恨，oa̍t-tńg身kā hit-ê神講，我託耶穌基督ê名，命令你對伊出去。神即時出去。I chōe-chōe ji̍t án-ni kiâⁿ. Pó-lô chin iàm-hūn, oa̍t-tńg-sin kā hit ê sîn kóng, Góa thok Iâ-so͘ Ki-tok ê miâ bēng-lēng lí tùi i chhut-khì. Sîn chek-sî chhut-khì.

19伊hiah-ê主人看見thàn錢ê ǹg望已經失落，就掠保羅、Se-lah，拖in入街市，去見有司官，koh解送到上司官講，I hiah ê chú-lâng khòaⁿ-kìⁿ thàn chîⁿ ê ǹg-bāng í-keng sit-lo̍h, chiū lia̍h Pó-lô, Se-lah, thoa in ji̍p koe-chhī, khì kìⁿ iú-si-koaⁿ, koh ké-sàng kàu chiūⁿ-si-koaⁿ kóng,

20Chiah-ê人是猶太人，大攪擾咱ê城，Chiah ê lâng sī Iû-thài lâng, tōa kiáu-jiáu lán ê siâⁿ,

21傳咱羅馬人所m̄應該守，m̄應該行ê規例。thoân lán Lô-má lâng só͘ m̄ eng-kai siú, m̄ eng-kai kiâⁿ ê kui-lē.

22眾人kui群起來攻擊in；上司官pak in ê衫，命令用棍phah in。Chèng lâng kui-kûn khí-lâi kong-kek in; chiūⁿ-si-koaⁿ pak in ê saⁿ, bēng-lēng ēng kùn phah in.

23Phah真chōe下，就關in落監，吩咐顧監ê嚴謹顧守；Phah chin chōe ē, chiū koaiⁿ in lo̍h kaⁿ, hoan-hù kò͘-kaⁿ ê giâm-kín kò͘-siú;

24顧監ê受chit號命令，就關in 落內重監，kông in ê 腳tī柴kông裡。kò͘-kaⁿ ê siū chit hō bēng-lēng, chiū koaiⁿ in lo̍h lāi-têng kaⁿ, kông in ê kha tī chhâ-kông ni̍h.

25但是半暝保羅、Se-lah祈禱吟詩，o-ló上帝；Nā-sī pòaⁿ-mî Pó-lô, Se-lah kî-tó gîm si, o-ló Siōng-tè;

26關tī監裡ê人也注意teh聽；忽然地大動，致到監ê地基lóng搖動；chiah-ê門也 liâm-pin lóng開；眾人ê刑具一盡lak。koaiⁿ tī kaⁿ-ni̍h ê lâng iā chù-ì teh thiaⁿ; hut-jiân tōe tōa tāng, tì-kàu kaⁿ ê tōe-ki lóng iô-tāng; chiah ê mn̂g iā liâm-piⁿ lóng khui; chèng lâng ê hêng-kū it-chīn lak.

27顧監ê人醒，看見監門開，phah算監囚lóng已經逃走，就拔刀，beh家己thâi。Kò͘-kaⁿ ê lâng chhíⁿ, khòaⁿ-kìⁿ kaⁿ-mn̂g khui, phah-sǹg kaⁿ-siû lóng í-keng tô-cháu, chiū pu̍ih to, beh ka-kī thâi.

28但是保羅大聲叫，講，莫得家己相害；阮lóng tī chia。Nā-sī Pó-lô tōa siaⁿ kiò, kóng, Bo̍h-tit ka-kī siong-hāi; goán lóng tī chia.

29顧監ê人叫人kia̍h火來，跳入去，ngia̍uh-ngia̍uh-chhoah仆tī保羅、Se-lah ê面前，chhōa in出來，講，Kò͘-kaⁿ ê lâng kiò lâng kia̍h hé lâi, thiàu ji̍p khì, ngia̍uh-ngia̍uh-chhoah phak tī Pó-lô, Se-lah ê bīn-chêng, chhōa in chhut-lâi, kóng,

30先生ah，我tio̍h怎樣做，chiah會得tio̍h救？Sian-siⁿ ah, góa tio̍h cháiⁿ-iūⁿ chòe, chiah ōe tit-tio̍h kiù?

31應講，Tio̍h信主耶穌，你就得tio̍h救，以及你ê家。Ìn kóng, Tio̍h sìn Chú Iâ-so͘, lí chiū tit-tio̍h kiù, í-ki̍p lí ê ke.

32就用主ê 道理講hō͘伊kap伊家內lóng總ê人聽。Chiū ēng Chú ê tō-lí kóng hō͘ i kap i ke-lāi lóng-chóng ê lâng thiaⁿ.

33Tī hit暝 hit時，顧監ê人chhōa in 去洗in ê傷；伊kap全家ê人即時lóng受洗禮。Tī hit mî hit sî, kò͘-kaⁿ ê lâng chhōa in khì sóe in ê siong; i kap choân-ke ê lâng chek-sî lóng siū sóe-lé.

34Chhōa in上伊ê厝，備辦hō͘ in食；已經信上帝，就kap thong家大歡喜。Chhōa in chiūⁿ i ê chhù, pī-pān hō͘ in chia̍h; í-keng sìn Siōng-tè, chiū kap thong-ke tōa hoaⁿ-hí.

35到天光，上司官差衙役來，講，放hiah-ê人。Kàu thiⁿ kng, chiūⁿ-si-koaⁿ chhe gê-ia̍h lâi, kóng, Pàng hiah ê lâng.

36顧監ê將chiah-ê話kā保羅講，上司官差人來beh放lín；taⁿ thang出來，安然去。Kò͘-kaⁿ ê chiong chiah ê ōe kā Pó-lô kóng, Chiūⁿ-si-koaⁿ chhe lâng lâi beh pàng lín; taⁿ thang chhut-lâi, an-jiân khì.

37但是保羅kā hiah-ê人講，阮是羅馬人，bē審問，就公刑phah阮，koh關阮落監；taⁿ beh暗靜趕阮出mah？的確bōe做得，tio̍h in親身來chhōa阮出。Nā-sī Pó-lô kā hiah ê lâng kóng, Goán sī Lô-má lâng, bē sím-mn̄g, chiū kong-hêng phah goán, koh koaiⁿ goán lo̍h kaⁿ; taⁿ beh àm-chīⁿ kóaⁿ goán chhut mah? tek-khak bōe chòe tit, tio̍h in chhin-sin lâi chhōa goán chhut.

38衙役將chiah-ê話回覆上司官；上司官聽見in是羅馬人，就驚。Gê-ia̍h chiong chiah ê ōe hê-hok chiūⁿ-si-koaⁿ; chiūⁿ-si-koaⁿ thiaⁿ-kìⁿ in sī Lô-má lâng, chiū kiaⁿ.

39Chiah來苦勸in；chhōa in出，請in離開hit-ê城。Chiah lâi khó͘-khǹg in; chhōa in chhut, chhiáⁿ in lī-khui hit ê siâⁿ.

40In出監，入Lū-tí-a ê厝；已經見tio̍h chiah-ê兄弟，就苦勸in，chiah離開hia。In chhut kaⁿ, ji̍p Lū-tí-a ê chhù; í-keng kìⁿ-tio̍h chiah ê hiaⁿ-tī, chiū khó͘-khǹg in, chiah lī-khui hia.

1In經過Àm-hui-pho-lí、A-pho-lô-nî-a，到帖撒羅尼迦，tī hia有猶太人ê會堂；In keng-kè Àm-hui-pho-lí, A-pho-lô-nî-a, kàu Thiap-sat-lô-nî-ka, tī hia ū Iû-thài lâng ê hōe-tn̂g;

2保羅照平常ê款入去就近in；tī三個安歇日，Pó-lô chiàu pêng-siông ê khoán ji̍p-khì chiū-kūn in; tī saⁿ ê an-hioh-ji̍t,

3引起聖經kap in辯論，開拆指明基督應該受害，tùi死人中koh活；koh講，我所對lín傳ê耶穌就是基督。ín-khí sèng-keng kap in piān-lūn, khui-thiah chí-bêng Ki-tok eng-kai siū hāi, tùi sí-lâng tiong koh-oa̍h; koh kóng, Góa só͘ tùi lín thoân ê Iâ-so͘ chiū-sī Ki-tok.

4In中間有ê受苦勸，就歸óa保羅、Se-lah；koh有敬虔ê希利尼人不止chōe，尊貴ê婦人人亦無少。In tiong-kan ū-ê siū khó͘-khǹg, chiū kui-óa Pó-lô, Se-lah; koh ū kèng-khiân ê Hi-lī-nî lâng put-chí chōe, chun-kùi ê hū-jîn-lâng ia̍h bô chió.

5獨獨猶太人怨妒，招街市ê 匪類kúi-nā人，教唆百姓kui群聚集，擾動thong城，攻入Iâ-sun ê厝，ài掠in出來交hō͘百姓。To̍k-to̍k Iû-thài lâng oàn-tò͘, chio koe-chhī ê húi-lūi kúi-nā lâng, kàu-so peh-sìⁿ kui kûn chū-chi̍p, jiáu-tōng thong siâⁿ, kong-ji̍p Iâ-sun ê chhù, ài lia̍h in chhut-lâi kau hō͘ peh-sìⁿ.

6無tú-tio̍h，就拖Iâ-sun kap kúi-nā個兄弟，送hō͘地方官；叫講，Chiah-ê phah亂天下ê人亦到chia；Bô tú-tio̍h, chiū thoa Iâ-sun kap kúi-nā ê hiaⁿ-tī, sàng hō͘ tōe-hng koaⁿ; kiò kóng, Chiah ê phah-loān thiⁿ-ē ê lâng ia̍h kàu chia;

7Iâ-sun接納in；chiah-ê人lóng違逆該撒ê命令，講有別個王，耶穌。Iâ-sun chiap-la̍p in; chiah ê lâng lóng ûi-ke̍h Kai-sat ê bēng-lēng, kóng ū pa̍t ê ông, Iâ-so͘.

8眾百姓kap地方官聽見這，就驚惶。Chèng peh-sìⁿ kap tōe-hng koaⁿ thiaⁿ-kìⁿ che, chiū kiaⁿ-hiâⁿ.

9已經收Iâ-sun kap其餘ê人ê 保狀，就放in。Í-keng siu Iâ-sun kap kî-û ê lâng ê pó-chn̄g, chiū pàng in.

10Tùi án-ni，兄弟隨時差保羅、Se-lah透暝去Pì-lí-a；兩人已經到tè，就入猶太人ê會堂。Tùi án-ni hiaⁿ-tī sûi-sî chhe Pó-lô, Se-lah thàu-mî khì Pì-lí-a; nn̄g lâng í-keng kàu tè, chiū ji̍p Iû-thài lâng ê hōe-tn̂g.

11Hiah-ê人比帖撒羅尼迦人khah文明，因為in注意受道理，ta̍k日查考聖經，看chiah-ê事果然有án-ni á無。Hiah ê lâng pí Thiap-sat-lô-nî-ka lâng khah bûn-bêng, in-ūi in chù-ì siū tō-lí, ta̍k ji̍t chhâ-khó sèng-keng, khòaⁿ chiah ê sū kó-jiân ū án-ni á bô.

12所以其中有chōe-chōe人信；koh有希利尼尊貴ê婦人人，kap ta-po͘人無少。Só͘-í kî-tiong ū chōe-chōe lâng sìn; koh ū Hi-lī-nî chun-kùi ê hū-jîn-lâng, kap ta-po͘-lâng bô chió.

13獨獨帖撒羅尼迦ê猶太人知保羅tī Pì-lí-a傳上帝ê道理，就到hia，搖動攪擾眾人。To̍k-to̍k Thiap-sat-lô-nî-ka ê Iû-thài lâng chai Pó-lô tī Pì-lí-a thoân Siōng-tè ê tō-lí, chiū kàu hia, iô-tāng kiáu-jiáu chèng lâng.

14兄弟liâm-piⁿ 差保羅去到海邊；獨獨Se-lah、提摩太猶原tòa hia。Hiaⁿ-tī liâm-piⁿ chhe Pó-lô khì kàu hái-piⁿ; to̍k-to̍k Se-lah, Thê-mô͘-thài iû-goân tòa hia.

15送保羅ê人chhōa伊教雅典；受命令叫Se-lah提摩太緊緊就近伊，就tò去。Sàng Pó-lô ê lâng chhōa i kàu Ngá-tián; siū bēng-lēng kiò Se-lah Thê-mô͘-thài kín-kín chiū-kūn i, chiū tò-khì.

16保羅tī雅典thèng候in，看見滿城lóng是偶像，就傷心著急。Pó-lô tī Ngá-tián thèng-hāu in, khòaⁿ-kìⁿ móa siâⁿ lóng sī Ngó͘-siōng, chiū siong-sim tio̍h-kip.

17所以tī會堂kap猶太人以及敬虔ê人辯論，ta̍k日tī街市裡kap所tú-tio̍h ê亦是án-ni。Só͘-í tī hōe-tn̂g kap Iû-thài lâng í-ki̍p kèng-khiân ê lâng piān-lūn, ta̍k ji̍t tī koe-chhī-ni̍h kap só͘ tú-tio̍h ê ia̍h sī án-ni.

18有Í-pí-kó͘-lô Sū-to-a，兩教門ê哲士kap伊辯論。有ê講，chit-ê拾人ê話phoh ê beh講甚麼？有ê講，伊是親像傳別邦國ê鬼神ê；是因為伊傳耶穌kap koh活ê道理。Ū Í-pí-kó͘-lô Sū-to-a, nn̄g kàu-mn̂g ê tiat-sū kap i piān-lūn. Ū-ê kóng, chit-ê khioh lâng ê ōe-phoh ê beh kóng sím-mi̍h? Ū-ê kóng, I sī chhin-chhiūⁿ thoân pa̍t pang-kok ê kúi-sîn ê; sī in-ūi i thoân Iâ-so͘ kap koh-oa̍h ê tō-lí.

19In就chhōa伊教A-lio̍k山，講，你所講新ê教thang得tio̍h知mah？In chiū chhōa i kàu A-lio̍k soaⁿ, kóng, Lí só͘ kóng sin ê kàu thang tit-tio̍h chai mah?

20因為你用奇怪ê事傳入阮ê耳孔：所以阮ài知hiah-ê是甚麼意思。In-ūi lí ēng kî-koài ê sū thoân ji̍p goán ê hī-khang: só͘-í goán ài chai hiah-ê sī sím-mi̍h ì-sù.

21(雅典人kap tiàm hia ê出外人bōe顧得別項事，獨獨是將新ê事來講，來聽nā-tiāⁿ)(Ngá-tián lâng kap tiàm hia ê chhut-gōa lâng bōe kò͘-tit pa̍t hāng sū, to̍k-to̍k sī chiong sin ê sū lâi kóng, lâi thiaⁿ nā-tiāⁿ)

22保羅khiā tī A-lio̍k山中，講， 雅典人ah，我看lín凡事敬畏神明，嶄然熱心。Pó-lô khiā tī A-lio̍k soaⁿ tiong, kóng, Ngá-tián lâng ah, góa khòaⁿ lín hoān sū kèng-ùi sîn-bêng, chám-jiân jia̍t-sim.

23因為我teh行遊ê時,看見lín所敬拜ê，tú-tio̍h一座壇，頂面寫，講，未bat ê上帝。Lín所未bat來敬拜ê，我用伊來kā lín講。In-ūi góa teh kiâⁿ-iû ê sî khòaⁿ-kìⁿ lín só͘ kèng-pài ê, tú-tio̍h chi̍t chō tôaⁿ, téng-bīn siá, kóng, Bē bat ê Siōng-tè. Lín só͘ bē bat lâi kèng-pài ê, góa ēng I lâi kā lín kóng.

24Hit-ê創造世間kap其中萬物ê上帝，既然是天地ê主，無khiā起手造 ê殿；Hit ê chhòng-chō sè-kan kap kî-tiong bān mi̍h ê Siōng-tè, kì-jiân sī thiⁿ tōe ê Chú, bô khiā-khí chhiú chō ê tiān;

25無hō͘人ê手服事，ná親像伊有所欠缺；是家己用活命、喘氣，kap萬物hō͘眾人；bô hō͘ lâng ê chhiú ho̍k-sāi, ná chhin-chhiūⁿ I ū só͘ khiàm-kheh; sī ka-kī ēng oa̍h-miā, chhoán-khùi, kap bān mi̍h hō͘ chèng lâng;

26koh創造萬邦ê人，tùi一個本源，khiā起tī全地面，koh kā in限事先定tio̍h ê時期，kap所khiā起ê地界；koh chhòng-chō bān pang ê lâng, tùi chi̍t ê pún-goân, khiā-khí tī choân tōe-bīn, koh kā in hān tāi-seng tiāⁿ-tio̍h ê sî-kî, kap só͘ khiā-khí ê tōe-kài;

27是beh hō͘ in chhē上帝，kiám-chhái thang揣摩來得tio̍h，其實伊離開咱ta̍k人無遠。sī beh hō͘ in chhē Siōng-tè, kiám-chhái thang chhúi-mô͘ lâi tit-tio̍h, kî-si̍t I lī-khui lán ta̍k lâng bô hn̄g.

28因為咱tiàm-tī伊來活，來振動，來tī-teh；親像lín中間做詩ê人有ê有講，因為咱chiah-ê亦是伊ê kiáⁿ類。In-ūi lán tiàm-tī I lâi oa̍h, lâi tín-tāng, lâi tī-teh; chhin-chhiūⁿ lín tiong-kan chòe si ê lâng ū-ê ū kóng, In-ūi lán chiah-ê ia̍h sī I ê kiáⁿ-lūi.

29Taⁿ既然是上帝ê kiáⁿ類，就m̄應該掠做上帝ê本質親像金、銀、石，人ê工夫人ê心事所雕琢ê。Taⁿ kì-jiân sī Siōng-tè ê kiáⁿ-lūi, chiū m̄ eng-kai lia̍h chòe Siōng-tè ê pún-chit chhin-chhiūⁿ kim, gûn, chio̍h, lâng ê kang-hu lâng ê sim-sū só͘ tiau-tok ê.

30Hiah-ê m̄知影ê時代，上帝無窮勘；taⁿ就命令ta̍k所在ê人lóng總tio̍h反悔：Hiah ê m̄ chai-iáⁿ ê sî-tāi, Siōng-tè bô khêng-khàm; taⁿ chiū bēng-lēng ta̍k só͘-chāi ê lâng lóng-chóng tio̍h hoán-hóe:

31因為有定tio̍h一日，beh用伊所設立 ê人，照公義審判天下；是tùi死人中hō͘伊koh活，hō͘眾人有憑據thang信。in-ūi ū tiāⁿ-tio̍h chi̍t ji̍t, beh ēng I só͘ siat-li̍p ê lâng, chiàu kong-gī sím-phòaⁿ thiⁿ-ē; sī tùi sí-lâng tiong hō͘ I koh-oa̍h, hō͘ chèng lâng ū pîn-kù thang sìn.

32In聽見死人koh活ê話，有ê笑伊；有ê講，阮beh koh聽你講這。In thiaⁿ-kìⁿ sí-lâng koh-oa̍h ê ōe, ū-ê chhiò i; ū-ê kóng, Goán beh koh thiaⁿ lí kóng che.

33Tùi án-ni，保羅對in中間出去。Tùi án-ni Pó-lô tùi in tiong-kan chhut-khì.

34但是有kúi-nā人óa伊來信；中間有A-lio̍k山ê會員Ttiu-nî-siu，kap一個婦人人，名叫Tāi-má-lí，koh也有別人。Nā-sī ū kúi-nā lâng óa i lâi sìn; tiong-kan ū A-lio̍k soaⁿ ê hōe-oân Tiu-nî-siu, kap chi̍t ê hū-jîn-lâng, miâ kiò Tāi-má-lí, koh iā ū pa̍t lâng.