1亞波羅tī哥林多ê時，保羅經過頂勢ê地方，到以弗所，tú-tio̍h kúi-nā 個學生；A-pho-lô tī Ko-lîm-to ê sî, Pó-lô keng-kè téng-sì ê tōe-hng, kàu Í-hut-só͘, tú-tio̍h kúi-nā ê ha̍k-seng;

2問in，講，Lín信ê時bat受tio̍h聖神無？應講，連有聖神ê賞賜á無，阮亦未bat聽見。mn̄g in, kóng, Lín sìn ê sî bat siū-tio̍h Sèng Sîn bô? Ìn kóng, Liân ū Sèng Sîn ê siúⁿ-sù á bô, goán ia̍h bē bat thiaⁿ-kìⁿ.

3講，Án-ni，就lín受洗禮來歸tī甚麼ah？In就講，約翰ê洗禮。Kóng, Án-ni, chiū lín siū sóe-lé lâi kui tī sím-mi̍h ah? In chiū kóng, Iok-hān ê sóe-lé.

4保羅講，約翰行反悔ê洗禮，kā百姓講tio̍h信tè尾伊來ê，就是耶穌。Pó-lô kóng, Iok-hān kiâⁿ hoán-hóe ê sóe-lé, kā peh-sìⁿ kóng tio̍h sìn tè-bé i lâi ê, chiū-sī Iâ-so͘.

5Hiah-ê人聽見，就受洗禮歸tī主耶穌ê名。Hiah ê lâng thiaⁿ-kìⁿ, chiū siū sóe-lé kui tī Chú Iâ-so͘ ê miâ.

6保羅kā in按手，聖神就到tī in；in隨時講chiah-ê腔口kap先知ê話。Pó-lô kā in hōaⁿ chhiú, Sèng Sîn chiū kàu tī in; in sûi-sî kóng chiah ê khiuⁿ-kháu kap sian-ti ê ōe.

7共約略十二人。Kiōng iok-lio̍k cha̍p-jī lâng.

8保羅入會堂，好膽來講，歷過三月日久，用上帝國ê事來辯論苦勸。Pó-lô ji̍p hōe-tn̂g, hó-táⁿ lâi kóng, le̍k-kè saⁿ ge̍h ji̍t kú, ēng Siōng-tè kok ê sū lâi piān-lūn khó͘-khǹg.

9但是有kúi-nā人硬心m̄順thàn，當眾人ê面前譭謗chit-ê路；保羅就離開in，亦hō͘學生kap in相離，就tī Chhui-lat-lô͘ ê學堂日日辯論。Nā-sī ū kúi-nā lâng ngī-sim m̄ sūn-thàn, tng chèng lâng ê bīn-chêng húi-pòng chit ê Lō͘; Pó-lô chiū lī-khui in, ia̍h hō͘ ha̍k-seng kap in saⁿ-lī, chiū tī Chhui-lat-lô͘ ê o̍h-tn̂g ji̍t-ji̍t piān-lūn.

10親像án-ni兩年久；致到tiàm-tī亞西亞ê人無論猶太、希利尼，lóng聽見主ê道理。Chhin-chhiūⁿ án-ni nn̄g nî kú; tì-kàu tiàm-tī A-se-a ê lâng bô lūn Iû-thài, Hi-lī-nî, lóng thiaⁿ-kìⁿ Chú ê tō-lí.

11上帝用保羅ê手行罕得有ê權能；Siōng-tè ēng Pó-lô ê chhiú kiâⁿ hán-tit ū ê koân-lêng;

12甚至有人對伊ê身軀the̍h手巾，á是圍身裙，hē tī病人ê身上，in ê病就退去，惡神亦出去。sīm-chì ū lâng tùi i ê sin-khu the̍h chhiú-kun, á-sī ûi-sin-kûn, hē tī pīⁿ-lâng ê sin-chiūⁿ, in ê pīⁿ chiū thè-khì, ok-sîn ia̍h chhut-khì.

13總是有kúi-nā個四界行，念chiù趕鬼ê猶太人，tùi hiah-ê hō͘惡神上身ê人，自專叫主耶穌ê名，講，我óa靠保羅所傳ê耶穌，命令你出去。Chóng-sī ū kúi-nā ê sì-kè kiâⁿ, liām-chiù kóaⁿ kúi ê Iû-thài lâng, tùi hiah ê hō͘ ok-sîn chiūⁿ sin ê lâng, chū-choan kiò Chú Iâ-so͘ ê miâ, kóng, Góa óa-khò Pó-lô só͘ thoân ê Iâ-so͘, bēng-lēng lí chhut-khì.

14有猶太ê祭司頭Sū-ki-óa七個kiáⁿ，亦行chit-ê tāi-chì。Ū Iû-thài ê chè-si-thâu Sū-ki-óa chhit ê kiáⁿ, ia̍h kiâⁿ chit ê tāi-chì.

15惡神應講，耶穌我知伊，保羅我亦bat伊；但是lín是是誰 ah？Ok-sîn ìn kóng, Iâ-so͘ góa chai I, Pó-lô góa ia̍h bat i; nā-sī lín sī chī-chūi ah?

16惡神上身ê人就跳tī in身上，贏in兩人，壓制in，致到in thǹg-pak-theh，受傷，走出hit間厝。Ok-sîn chiūⁿ sin ê lâng chiū thiàu tī in sin-chiūⁿ, iâⁿ in nn̄g lâng, ap-chè in, tì-kàu in thǹg-pak-theh, siū siong, cháu-chhut hit keng chhù.

17khiā起以弗所ê猶太人、希利尼人lóng知，無m̄驚惶；主耶穌ê名就大榮顯。Khiā-khí Í-hut-só͘ ê Iû-thài lâng, Hi-lī-nî lâng lóng chai, bô m̄ kiaⁿ-hiâⁿ; Chú Iâ-so͘ ê miâ chiū tōa êng-hián.

18已經信ê人chōe-chōe到，明明認，koh講起in ê所行。Í-keng sìn ê lâng chōe-chōe kàu, bêng-bêng jīn, koh kóng-khí in ê só͘ kiâⁿ.

19平素行法術ê，亦有chōe-chōe人將in ê冊聚集，hē tī眾人ê面前來燒；算in ê價錢，就知值銀五萬。Pêng-sò͘ kiâⁿ hoat-su̍t ê, ia̍h ū chōe-chōe lâng chiong in ê chheh chū-chi̍p, hē tī chèng lâng ê bīn-chêng lâi sio; sǹg in ê kè-chîⁿ, chiū chai ta̍t gûn gō͘ bān.

20主ê道理大大興旺得勝，有親像án-ni。Chú ê tō-lí tōa-tōa heng-ōng tek-sèng, ū chhin-chhiūⁿ án-ni.

21Chiah-ê事已經明白，保羅定tio̍h意思，經過馬其頓、A-kai-a，chiah beh去耶路撒冷，講，到hia了後，我亦tio̍h去看羅馬。Chiah ê sū í-keng bêng-pe̍k, Pó-lô tiāⁿ-tio̍h ì-sù, keng-kè Má-kî-tùn, A-kai-a, chiah beh khì Iâ-lō͘-sat-léng, kóng, Kàu hia liáu-āu, góa ia̍h tio̍h khì khòaⁿ Lô-má.

22就差跟隨伊ê從中兩人，提摩太、Í-lah-to͘去馬其頓；本身暫時tòa亞西亞。Chiū chhe kun-sûi i ê chiông-tiong nn̄g lâng, Thê-mô͘-thài, Í-lah-to͘ khì Má-kî-tùn; pún-sin chiām-sî tòa A-se-a.

23當時，為tio̍h主ê路，有起大擾動。Tng sî, ūi-tio̍h Chú ê Lō͘, ū khí tōa jiáu-tōng.

24因為有銀匠，名Tí-bí-tiu，平素做A-tí-bí ê銀龕，伊hō͘做chit號工ê人thàn錢無少；In-ūi ū gûn-chhiūⁿ, miâ Tí-bí-tiu, pêng-sò͘ chòe A-tí-bí ê gûn-kham, i hō͘ chòe chit hō kang ê lâng thàn chîⁿ bô chió;

25就聚集in，以及thàn chit號食ê人，講，大家，lín知咱óa靠chit-ê手藝來thàn錢。chiū chū-chi̍p in, í-ki̍p thàn chit hō chia̍h ê lâng, kóng, Tāi-ke, lín chai lán óa-khò chit ê chhiú-gē lâi thàn chîⁿ.

26Taⁿ chit-ê保羅，m̄-nā tī以弗所，也差不多遍亞西亞，用伊ê勸勉來迷惑chōe-chōe人，講手所妝ê m̄是神明；這是lín所看見，所聽見ê。Taⁿ chit ê Pó-lô, m̄-nā tī Í-hut-só͘, iā chha-put-to piàn A-se-a, ēng i ê khoàn-bián lâi bê-he̍k chōe-chōe lâng, kóng chhiú só͘ chng ê m̄ sī sîn-bêng; che sī lín só͘ khòaⁿ-kìⁿ, só͘ thiaⁿ-kìⁿ ê.

27親像án-ni，m̄-nā咱chit號工業危險hō͘人看輕；就大女神A-tí-bí ê廟亦beh hō͘人目地無，koh遍亞西亞kap天下所拜ê A-tí-bí beh失伊ê威風。Chhin-chhiūⁿ án-ni, m̄ nā lán chit hō kang-gia̍p gûi-hiám hō͘ lâng khòaⁿ-khin; chiū tōa lú-sîn A-tí-bí ê biō ia̍h beh hō͘ lâng ba̍k-tē-bô, koh piàn A-se-a kap thiⁿ-ē só͘ pài ê A-tí-bí beh sit i ê ui-hong.

28In聽見就大受氣，叫講，大ah！以弗所人ê A-tí-bí！In thiaⁿ-kìⁿ chiū tōa siū-khì, kiò kóng, Tōa ah! Í-hut-só͘ lâng ê A-tí-bí!

29Thong城擾亂；已經掠保羅同行ê馬其頓人，Kai-iû kap A-lí-ta̍t-kó͘，就同心khoeh入戲園。Thong siâⁿ jiáu-loān; í-keng lia̍h Pó-lô tâng kiâⁿ ê Má-kî-tùn lâng, Kai-iû kap A-lí-ta̍t-kó͘, chiū tâng-sim khoeh ji̍p hì-hn̂g.

30保羅心想ài入去見百姓，學生m̄准。Pó-lô sim siūⁿ ài ji̍p-khì kìⁿ peh-sìⁿ, ha̍k-seng m̄ chún.

31iáu有亞西亞幾個頭目，是保羅ê朋友，差人勸伊莫得冒險入戲園。Iáu ū A-se-a kúi ê thâu-ba̍k, sī Pó-lô ê pêng-iú, chhe lâng khǹg i bo̍h-tit mō͘-hiám ji̍p hì-hn̂g.

32會眾紛亂，一人hoah一款；大半m̄知是因為啥事來聚集。Hōe-chiòng hun-loān, chi̍t lâng hoah chi̍t khoán; tōa pòaⁿ m̄ chai sī in-ūi siáⁿ-sū lâi chū-chi̍p.

33有人牽亞力山大出眾人ê中間，猶太人亦舉伊進前。亞力山大搖手，ài對百姓分訴。Ū lâng khan A-le̍k-san-tāi chhut chèng lâng ê tiong-kan, Iû-thài lâng ia̍h kú i chìn-chêng. A-le̍k-san-tāi iô chhiú, ài tùi peh-sìⁿ hun-sò͘.

34眾人知伊是猶太人，就同聲叫講，大ah！以弗所人ê A-tí-bí！親像án-ni，約量一時久。Chèng lâng chai i sī Iû-thài lâng, chiū tâng siaⁿ kiò kóng, Tōa ah! Í-hut-só͘ lâng ê A-tí-bí! chhin-chhiūⁿ án-ni, iok-liōng chi̍t sî kú.

35書記官已經hō͘眾人安靜，就講，以弗所人ah，是誰 m̄知以弗所人ê城就是顧守大A-tí-bí ê殿，kap tùi宙斯所降落ê像ah？Su-kì-koaⁿ í-keng hō͘ chèng lâng an-chēng, chiū kóng, Í-hut-só͘ lâng ah, chī-chūi m̄ chai Í-hut-só͘ lâng ê siâⁿ chiū-sī kò͘-siú tōa A-tí-bí ê tiān, kap tùi Tiū-su só͘ kàng-lo̍h ê siōng ah?

36Chiah-ê事已經bōe辯駁得，lín眾人tio̍h靜靜，m̄-thang chhiong-pōng。Chiah ê sū í-keng bōe piān-pok tit, lín chèng lâng tio̍h chēng-chēng, m̄-thang chhiong-pōng.

37何況chiah-ê人m̄是偷the̍h廟內ê物，亦m̄是謗瀆咱ê女神ê，lín竟然帶in到chia。Hô-hòng chiah ê lâng m̄ sī thau-the̍h biō-lāi ê mi̍h, ia̍h m̄ sī pòng-to̍k lán ê lú-sîn ê, lín kèng-jiân tòa in kàu chia.

38若Tí-bí-tiu以及hiah-ê óa伊ê師傅，kap人有tāi-chì，就有聽相告ê日期，亦有總督，大家thang對訊。Nā Tí-bí-tiu í-ki̍p hiah ê óa i ê sai-hū, kap lâng ū tāi-chì, chiū ū thiaⁿ saⁿ-kò ê ji̍t-kî, ia̍h ū chóng-tok, tāi-ke thang tùi-sìn.

39Lín若問別物事，thang tī合例ê會來擬斷。Lín nā mn̄g pa̍t mi̍h sū, thang tī ha̍p-lē ê hōe lâi gí-toàn.

40是因為今á日無緣故ê擾亂，驚了咱bōe免得受查問；koh亦無能thang改chit-ê聚會ê因由。Sī in-ūi kin-á-ji̍t bô iân-kò͘ ê jiáu-loān, kiaⁿ-liáu lán bōe bián-tit siū chhâ-mn̄g; koh ia̍h bô ōe thang kóe chit ê chū-hōe ê in-iû.

41講soah，就散會。Kóng soah, chiū sòaⁿ hōe.

1Hán-hōa已經定，保羅叫學生來，勸in；就kap in離別，起身beh去馬其頓。Hán-hōa í-keng tiāⁿ, Pó-lô kiò ha̍k-seng lâi, khǹg in; chiū kap in lī-pia̍t, khí-sin beh khì Má-kî-tùn.

2已經經過hiah-ê地方，用chōe-chōe話苦勸in，就到希利尼。Í-keng keng-kè hiah ê tōe-hng, ēng chōe-chōe ōe khó͘-khǹg in, chiū kàu Hi-lī-nî.

3Tiàm hia三月日；beh搭船去敘利亞。猶太人設計beh害伊；伊就定tio̍h意思tùi馬其頓倒tńg。Tiàm hia saⁿ ge̍h ji̍t; beh tah chûn khì Sū-lī-a. Iû-thài lâng siat-kè beh hāi i; i chiū tiāⁿ-tio̍h ì-sù tùi Má-kî-tùn tò-tńg.

4Tè伊去亞西亞ê人，有Pì-lí-a人，Pit-lō͘ ê kiaN2Sou2-pá-tek；帖撒羅尼迦人，A-lí-ta̍t-kó͘ kap Se-kong-to͘；Te̍k-pì人Ka-iû，kap提摩太；koh有亞西亞人Chhui-ki-kó͘ kap Te̍k-lô-hui-mô͘。Tè i khì A-se-a ê lâng, ū Pì-lí-a lâng, Pit-lō͘ ê kiáⁿ Só͘-pá-tek; Thiap-sat-lô-nî-ka lâng, A-lí-ta̍t-kó͘ kap Se-kong-to͘; Te̍k-pì lâng Ka-iû, kap Thê-mô͘-thài; koh ū A-se-a lâng Chhui-ki-kó͘ kap Te̍k-lô-hui-mô͘.

5Chit幾人事先去，tī Te̍k-lô-a thèng候阮。Chit kúi lâng tāi-seng khì, tī Te̍k-lô-a thèng-hāu goán.

6除酵節後，阮tùi腓立比開船，五日到Te̍k-lô-a，kap in相會；tiàm hia七日。Tû-kàⁿ-choeh āu, goán tùi Hui-li̍p-pí khui chûn, gō͘ ji̍t kàu Te̍k-lô-a, kap in siong-hōe; tiàm hia chhit ji̍t.

7七日ê頭一日，阮chiah-ê聚集beh peh餅，保羅ài tī隔日起身，就kap in講論道理，chhiân到半暝。Chhit ji̍t ê thâu chi̍t ji̍t, goán chiah-ê chū-chi̍p beh peh piáⁿ, Pó-lô ài tī keh ji̍t khí-sin, chiū kap in káng-lūn tō-lí, chhiân kàu pòaⁿ-mî.

8阮所聚集ê樓有點chōe-chōe燈。Goán só͘ chū-chi̍p ê lâu ū tiám chōe-chōe teng.

9有一個少年人，名Iû-chhui-kó͘，坐tī窗á頂，睏重眠；保羅講論已經久，少年人因為睏，tùi三層樓跋落來；人來扶伊，已經死lah。Ū chi̍t ê siàu-liân lâng, miâ Iû-chhui-kó͘, chē tī thang-á téng, khùn tāng bîn; Pó-lô káng-lūn í-keng kú, siàu-liân lâng in-ūi khùn, tùi saⁿ chàn lâu poa̍h-lo̍h-lâi; lâng lâi hû i, í-keng sí lah.

10保羅落去仆tī伊ê身上，抱伊，講，Lín莫做聲；伊ê魂iáu tī-teh。Pó-lô lo̍h-khì phak tī i ê sin-chiūⁿ, phō i, kóng, Lín bo̍h chòe siaⁿ; i ê hûn iáu tī-teh.

11就koh上去peh餅來食，saⁿ-kap談論久久；到天光就起身。Chiū koh chiūⁿ-khì peh piáⁿ lâi chia̍h, saⁿ-kap tâm-lūn kú-kú; kàu thiⁿ-kng chiū khí-sin.

12Gín-ná已經活，人chhōa伊來，大受安慰。Gín-ná í-keng oa̍h, lâng chhōa i lâi, tōa siū an-ùi.

13阮事先上船，開船去 A-sok，ài tī hia chih接保羅：因為伊有án-ni吩咐，家己beh tùi路去。Goán tāi-seng chiūⁿ chûn, khui chûn khì A-sok, ài tī hia chih-chiap Pó-lô: in-ūi i ū án-ni hoan-hù, ka-kī beh tùi lō͘ khì.

14已經tī A-sok kap阮相會，阮就chih伊上船，去Bí-chhui-lī-nî。Í-keng tī A-sok kap goán siong-hōe, goán chiū chih i chiūⁿ chûn, khì Bí-chhui-lī-nî.

15Tùi hia開船，第二日到Ki-ôe對面；隔日船擱tī Sat-mô͘；koh一日到Bí-lī-to͘。Tùi hia khui chûn tē jī ji̍t kàu Ki-o ê tùi-bīn; keh ji̍t chûn koa tī Sat-mô͘; koh chi̍t ji̍t kàu Bí-lī-to͘.

16因為保羅決意搭船閃過以弗所，免得久久tiàm-tī亞西亞；就趕緊行，看ōe-thang tī五旬節日到耶路撒冷。In-ūi Pó-lô koat-ì tah chûn siám kè Í-hut-só͘, bián-tit kú-kú tiàm tī A-se-a; chiū kóaⁿ-kín kiâⁿ, khòaⁿ ōe thang tī gō͘-sûn-choeh ji̍t kàu Iâ-lō͘-sat-léng.

17Tùi Bí-lī-to͘差人到以弗所，請教會ê長老來。Tùi Bí-lī-to͘ chhe lâng kàu Í-hut-só͘, chhiáⁿ kàu-hōe ê tiúⁿ-ló lâi.

18In已經到，就對in講， Lín家己知我tùi起頭踏tio̍h亞西亞地 ê日，頭到尾kap lín怎樣；In í-keng kàu, chiū tùi in kóng, Lín ka-kī chai góa tùi khí-thâu ta̍h-tio̍h A-se-a tōe ê ji̍t, thâu kàu bé kap lín cháiⁿ-iūⁿ;

19我服事主凡事謙遜，koh流目屎，koh tùi猶太人ê 謀害歷過試煉；góa ho̍k-sāi Chú hoān sū khiam-sùn, koh lâu ba̍k-sái, koh tùi Iû-thài lâng ê bô͘-hāi le̍k-kè chhì-liān;

20凡有利益ê，我未bat kiu-koe̍h無kā lín講，來教示lín，無論tī眾人ê面前，á是tī chiah-ê人家；hoān ū lī-ek ê, góa bē bat kiu-koe̍h bô kā lín kóng, lâi kà-sī lín, bô lūn tī chèng lâng ê bīn-chêng, á-sī tī chiah ê jîn-ke;

21tùi猶太kap希利尼人證明，tio̍h ǹg上帝來反悔，koh tio̍h ǹg咱ê主耶穌基督來信。tùi Iû-thài kap Hi-lī-nî lâng chèng-bêng, tio̍h ǹg Siōng-tè lâi hoán-hóe, koh tio̍h ǹg lán ê Chú Iâ-so͘ Ki-tok lâi sìn.

22Taⁿ我ê心神受縛去耶路撒冷，未知tī hia beh tú-tio̍h怎樣；Taⁿ góa ê sim-sîn siū pa̍k khì Iâ-lō͘-sat-léng, bē chai tī hia beh tú-tio̍h cháiⁿ-iūⁿ;

23獨獨聖神tī ta̍k-ê城對我證明，講有鎖鏈kap患難teh thèng候我。to̍k-to̍k Sèng Sîn tī ta̍k ê siâⁿ tùi góa chèng-bêng, kóng ū só-liān kap hoān-lān teh thèng-hāu góa.

24但是我無掠性命做要緊，來看做寶貝，獨獨是beh盡我ê路站，kap tùi主耶穌所受ê職份，來證明上帝恩典ê福音。Nā-sī góa bô lia̍h sìⁿ-miā chòe iàu-kín, lâi khòaⁿ chòe pó-pòe, to̍k-to̍k sī beh chīn góa ê lō͘-chām, kap tùi Chú Iâ-so͘ só͘ siū ê chit-hūn, lâi chèng-bêng Siōng-tè un-tián ê hok-im.

25我平素四界行tī lín中間傳上帝ê國，taⁿ我知lín眾人無koh見我ê面。Góa pêng-sò͘ sì-kè kiâⁿ tī lín tiong-kan thoân Siōng-tè ê kok, taⁿ góa chai lín chèng lâng bô koh kìⁿ góa ê bīn.

26所以我今á日tùi lín干證，若有人沉淪，我無責成。Só͘-í góa kin-á-ji̍t tùi lín kan-chèng, nā ū lâng tîm-lûn, góa bô chek-sêng.

27因為我未bat kiu-koe̍h無用上帝ê旨意一盡kā lín講。In-ūi góa bē bat kiu-koe̍h bô ēng Siōng-tè ê chí-ì it-chīn kā lín kóng.

28Lín tio̍h家己謹慎，亦tio̍h謹慎全群，聖神tī in中間設立lín做監督，來照顧上帝ê教會，就是伊用家己ê血所得tio̍h ê。Lín tio̍h ka-kī kín-sīn, ia̍h tio̍h kín-sīn choân kûn, Sèng Sîn tī in tiong-kan siat-li̍p lín chòe kàm-tok, lâi chiàu-kò͘ Siōng-tè ê kàu-hōe, chiū-sī I ēng ka-kī ê huih só͘ tit-tio̍h ê.

29我知我離開了後，beh有兇惡ê豺狼入lín中間，無惜羊群；Góa chai góa lī-khui liáu-āu, beh ū hiong-ok ê chhâi-lông ji̍p lín tiong-kan, bô sioh iûⁿ-kûn;

30koh tùi lín家己ê中間，beh有人起來講逆理ê話，ài引誘學生thàn伊。koh tùi lín ka-kī ê tiong-kan, beh ū lâng khí-lâi kóng ge̍k-lí ê ōe, ài ín-iú ha̍k-seng thàn i.

31所以lín tio̍h警醒，記念我三年ê 久，暝日無soah，流目屎來警戒lín ta̍k人。Só͘-í lín tio̍h kéng-séng, kì-liām góa saⁿ nî ê kú, mî-ji̍t bô soah, lâu ba̍k-sái lâi kéng-kài lín ta̍k lâng.

32Taⁿ我將lín交託上帝，kap伊恩典ê道，是能建立lín，hō͘ lín得tio̍h業 tī lóng總成聖ê人ê中間。Taⁿ góa chiong lín kau-thok Siōng-tè, kap I un-tián ê tō, sī ōe kiàn-li̍p lín, hō͘ lín tit-tio̍h gia̍p tī lóng-chóng chiâⁿ-sèng ê lâng ê tiong-kan.

33我未bat貪人ê銀、金、衣服。Góa bē bat tham lâng ê gûn, kim, i-ho̍k.

34Lín家己知，chit兩支手有供給我ê欠用，以及kap我tī-teh ê人。Lín ka-kī chai, chit nn̄g ki chhiú ū kiong-kip góa ê khiàm-ēng, í-ki̍p kap góa tī-teh ê lâng.

35我凡事做lín ê模樣，tio̍h án-ni tio̍h磨，來扶持軟弱ê人；koh tio̍h記得主耶穌本身ê話，講，hō͘人ê，比tùi人the̍h ê，khah有福氣。Góa hoān sū chòe lín ê bô͘-iūⁿ, tio̍h án-ni tio̍h-bôa, lâi hû-chhî loán-jio̍k ê lâng; koh tio̍h kì-tit Chú Iâ-so͘ pún-sin ê ōe, kóng, Hō͘ lâng ê, pí tùi lâng the̍h ê, khah ū hok-khì.

36講soah，跪落kap in眾人祈禱。Kóng soah, kūi-lo̍h kap in chèng lâng kî-tó.

37眾人大啼哭，抱保羅ê頷頸，chim伊；Chèng lâng tōa thî-khàu, phō Pó-lô ê ām-kún, chim i;

38第一煩惱ê，就是伊所講ê話，以後bōe koh見tio̍h伊ê面。就送伊落船。tē it hoân-ló ê, chiū-sī i só͘ kóng ê ōe, í-āu bōe koh kìⁿ-tio̍h i ê bīn. Chiū sàng i lo̍h chûn.

1阮已經離別in開船，直直到Ko-sū，隔日到Lô-tí，tùi hia koh到Phàⁿ-tāi-lah；Goán í-keng lī-pia̍t in khui chûn, ti̍t-ti̍t kàu Ko-sū, keh ji̍t kàu Lô-tí, tùi hia koh kàu Phàⁿ-tāi-lah;

2tú-tio̍h一隻船beh過去腓尼基，就搭伊起身。tú-tio̍h chi̍t chiah chûn beh kè-khì Hui-nî-ki, chiū tah i khí-sin.

3已經能看見居比路，tùi chiàⁿ-pêng 行過，到敘利亞，tī Chhui-lô上山；因為船tī hia卸載。Í-keng ōe khòaⁿ-kìⁿ Ku-pí-lō͘, tùi chiàⁿ pêng kiâⁿ-kè, kàu Sū-lī-a, tī Chhui-lô chiūⁿ soaⁿ; in-ūi chûn tī hia sià chāi.

4Chhē-tio̍h有學生，kap in tòa 七日；in tùi神感動，kā保羅講莫得行到耶路撒冷。Chhē-tio̍h ū ha̍k-seng, kap in tòa chhit ji̍t; in tùi Sîn kám-tōng, kā Pó-lô kóng bo̍h-tit kiâⁿ kàu Iâ-lō͘-sat-léng.

5Chiah-ê日已經滿，阮起身行，眾人kap bó͘ kiáⁿ送阮到城外；Chiah ê ji̍t í-keng móa, goán khí-sin kiâⁿ, chèng lâng kap bó͘ kiáⁿ sàng goán kàu siâⁿ-gōa;

6就lóng跪落tī海邊祈禱，大家相辭；阮上船，in tò去in tau。chiū lóng kūi-lo̍h tī hái-piⁿ kî-tó, tāi-ke saⁿ-sî; goán chiūⁿ chûn, in tò-khì in tau.

7阮tùi Chhui-lô水路行盡，就到To-lī-mái，請安兄弟，kap in tòa一日。Goán tùi Chhui-lô chúi-lō͘ kiâⁿ chīn, chiū kàu To-lī-mái, chhéng-an hiaⁿ-tī, kap in tòa chi̍t ji̍t.

8隔日起身到該撒利亞；入傳福音ê人腓力ê家，kap伊saⁿ-kap tòa；伊是hit 七人中一個。Keh ji̍t khí-sin kàu Kai-sat-lī-a; ji̍p thoân hok-im ê lâng Hui-le̍k ê ke, kap i saⁿ-kap tòa; i sī hit chhit-lâng tiong chi̍t ê.

9伊有四個cha-bó͘-kiáⁿ，lóng是在室女，也做先知。I ū sì ê cha-bó͘-kiáⁿ, lóng sī chāi-sek-lú, iā chòe sian-ti.

10阮tiàm hia kúi-nā日，有先知，名A-ka-pò͘，tùi猶太落來。Goán tiàm hia kúi-nā ji̍t, ū sian-ti, miâ A-ka-pò͘, tùi Iû-thài lo̍h-lâi.

11就近阮，the̍h保羅ê帶，縛家己ê腳手，講，聖神講，猶太人tī耶路撒冷beh án-ni縛chit條帶ê主人，交tī外邦人ê手。Chiū-kūn goán, the̍h Pó-lô ê tòa, pa̍k ka-kī ê kha-chhiú, kóng, Sèng Sîn kóng, Iû-thài lâng tī Iâ-lō͘-sat-léng beh án-ni pa̍k chit tiâu tòa ê chú-lâng, kau tī gōa-pang lâng ê chhiú.

12阮聽見chiah-ê話，就kap hit所在ê人khǹg保羅m̄-thang上耶路撒冷。Goán thiaⁿ-kìⁿ chiah ê ōe, chiū kap hit só͘-chāi ê lâng khǹg Pó-lô m̄-thang chiūⁿ Iâ-lō͘-sat-léng.

13保羅就應，講，Lín啥事啼哭，來chô-chak我ê心ah？我為tio̍h主耶穌ê名，m̄-nā受縛，就死tī耶路撒冷，亦已經便lah。Pó-lô chiū ìn, kóng, Lín siáⁿ-sū thî-khàu, lâi chô-chak góa ê sim ah? Góa ūi-tio̍h Chú Iâ-so͘ ê miâ, m̄ nā siū pa̍k, chiū sí tī Iâ-lō͘-sat-léng, ia̍h í-keng piān lah.

14伊m̄受苦勸，阮就soah，講，主ê旨意得tio̍h成，就是。I m̄ siū khó͘-khǹg, goán chiū soah, kóng, Chú ê chí-ì tit-tio̍h chiâⁿ, chiū-sī.

15Chiah-ê日了後，阮收拾行李，上耶路撒冷。Chiah ê ji̍t liáu-āu, goán siu-si̍p hêng-lí, chiūⁿ Iâ-lō͘-sat-léng.

16該撒利亞kúi-nā個學生kap阮去，亦chhōa一個居比路人Ná-sun，是舊ê學生；阮beh歇in tau。Kai-sat-lī-a kúi-nā ê ha̍k-seng kap goán khì, ia̍h chhōa chi̍t ê Ku-pí-lō͘ lâng Ná-sun, sī kū ê ha̍k-seng; goán beh hioh in tau.

17到耶路撒冷兄弟歡喜chih接阮。Kàu Iâ-lō͘-sat-léng hiaⁿ-tī hoaⁿ-hí chih-chiap goán.

18隔日，保羅kap阮入去見雅各；眾長老亦tī-teh。Keh ji̍t, Pó-lô kap goán ji̍p khì kìⁿ Ngá-kok; chèng tiúⁿ-ló ia̍h tī-teh.

19保羅已經kā in請安，就將上帝用伊做工，所行tī外邦ê，一項一項講明。Pó-lô í-keng kā in chhéng-an, chiū chiong Siōng-tè ēng i chòe kang, só͘ kiâⁿ tī gōa-pang ê, chi̍t hāng chi̍t hāng kóng bêng.

20In聽見就歸榮光上帝；也 對保羅講，兄弟ah，你看見猶太人ê中間信ê jōa-chōe萬；In thiaⁿ-kìⁿ chiū kui êng-kng Siōng-tè; iā tùi Pó-lô kóng, Hiaⁿ-tī ah, lí khòaⁿ-kìⁿ Iû-thài lâng ê tiong-kan sìn-ê jōa chōe bān;

21lóng是為tio̍h律法teh熱心；in bat聽見人講你教示外邦中ê猶太人lóng背摩西，講莫得kā in ê kiáⁿ行割禮，亦莫得thàn chiah-ê規例。Taⁿ beh怎樣？lóng sī ūi-tio̍h lu̍t-hoat teh jia̍t-sim; in bat thiaⁿ-kìⁿ lâng kóng lí kà-sī gōa-pang tiong ê Iû-thài lâng lóng pōe Mô͘-se, kóng bo̍h-tit kā in ê kiáⁿ kiâⁿ kat-lé, ia̍h bo̍h-tit thàn chiah ê kui-lē. Taⁿ beh cháiⁿ-iūⁿ?

22In的確會聽見你來。In tek-khak ōe thiaⁿ-kìⁿ lí lâi.

23所以阮所kā你講ê，你tio̍h 行伊。Só͘-í goán só͘ kā lí kóng ê, lí tio̍h kiâⁿ i.

24阮chia有四個人hē願；你chhōa chiah-ê人kap in成清氣，出所費hō͘ in剃頭毛；án-ni就眾人會知所聽見講起你ê tāi-chì，是無影；就你本身亦是守律法來行。Goán chia ū sì ê lâng hē goān; lí chhōa chiah ê lâng kap in chiâⁿ chheng-khì, chhut só͘-hùi hō͘ in thì thâu-mn̂g; án-ni chiū chèng lâng ōe chai só͘ thiaⁿ-kìⁿ kóng-khí lí ê tāi-chì, sī bô iáⁿ; chiū lí pún-sin ia̍h sī siú lu̍t-hoat lâi kiâⁿ.

25論到信主ê外邦人，阮已經bat寄phoe議定tio̍h禁戒祭偶像ê物，kap血，kap捏死ê物，kap淫亂。Lūn-kàu sìn Chú ê gōa-pang lâng, goán í-keng bat kià phoe gī-tiāⁿ tio̍h kìm-kài chè ngó͘-siōng ê mi̍h, kap huih, kap ni̍h-sí ê mi̍h, kap îm-loān.

26保羅就chhōa hiah-ê人，第二日kap in成清氣，入殿，報bêng清氣ê日期滿lah，thèng候kā in ta̍k人獻禮物。Pó-lô chiū chhōa hiah ê lâng, tē jī ji̍t kap in chiâⁿ chheng-khì, ji̍p tiān, pò bêng chheng-khì ê ji̍t-kî móa lah, thèng-hāu kā in ta̍k lâng hiàn lé-mi̍h.

27Hit 七日teh-beh滿，tùi亞西亞來ê猶太人看見保羅tī殿裡，就教唆眾百姓，下手掠伊，叫講，以色列人ah，來幫贊；Hí chhit ji̍t teh-beh móa, tùi A-se-a lâi ê Iû-thài lâng khòaⁿ-kìⁿ Pó-lô tī tiān-ni̍h, chiū kàu-so chèng peh-sìⁿ, hē chhiú lia̍h i, kiò kóng, Í-sek-lia̍t lâng ah, lâi pang-chān;

28chit人就是hit-ê tī ta̍k所在教示眾人，攻擊咱ê百姓，kap律法，kap chit所在ê；koh有chhōa希利尼人入殿，phah lâ-sâm chit-ê聖ê所在。chit lâng chiū-sī hit ê tī ta̍k só͘-chāi kà-sī chèng lâng, kong-kek lán ê peh-sìⁿ, kap lu̍t-hoat, kap chit só͘-chāi ê; koh ū chhōa Hi-lī-nî lâng ji̍p tiān, phah lâ-sâm chit ê sèng ê só͘-chāi.

29因為in bat看見以弗所人Te̍k-lô-hui-mô͘ kap伊tī城內，phah算保羅有chhōa伊入殿。In-ūi in bat khòaⁿ-kìⁿ Í-hut-só͘ lâng Te̍k-lô-hui-mô͘ kap i tī siâⁿ-lāi, phah-sǹg Pó-lô ū chhōa i ji̍p tiān.

30Tùi án-ni，thong城搖choah，百姓lóng走來；掠保羅，拖伊出殿；chiah-ê門liâm-piⁿ關。Tùi án-ni thong siâⁿ iô-choah, peh-sìⁿ lóng cháu-lâi; lia̍h Pó-lô, thoa i chhut tiān; chiah ê mn̂g liâm-piⁿ koaiⁿ.

31In teh-beh thâi伊，有消息傳到營裡ê千總，講thong耶路撒冷紛亂。In teh-beh thâi i, ū siau-sit thoân kàu iâⁿ-ni̍h ê chhian-chóng, kóng thong Iâ-lō͘-sat-léng hun-loān.

32伊liâm-piⁿ chhōa兵丁kap百總kúi-nā個，走落去到in hia；in看見千總kap兵丁，就停手，無koh phah保羅。I liâm-piⁿ chhōa peng-teng kap pé-chóng kúi-nā ê, cháu lo̍h-khì kàu in hia; in khòaⁿ-kìⁿ chhian-chóng kap peng-teng, chiū thêng chhiú, bô koh phah Pó-lô.

33千總近前掠保羅，命令用兩條鏈縛伊；問伊是是誰，做甚麼tāi-chì。Chhian-chóng kūn chêng lia̍h Pó-lô, bēng-lēng ēng nn̄g tiâu liān pa̍k i; mn̄g i sī chī-chūi, chòe sím-mi̍h tāi-chì.

34眾人一個hoah一款；因為hán-hōa，bōe知hit-ê實情，就命令帶伊入營盤。Chèng lâng chi̍t ê hoah chi̍t khoán; in-ūi hán-hōa, bōe chai hit ê si̍t-chêng, chiū bēng-lēng tòa i ji̍p iâⁿ-pôaⁿ.

35已經到崎á，因為眾人oe-khoeh真hiông，兵丁就將保羅chhah上去；Í-keng kàu kiā-á, in-ūi chèng lâng oe-khoeh chin hiông, peng-teng chiū chiong Pó-lô chhah chiūⁿ-khì;

36是眾百姓tè tī後面，叫講，kā伊除去。sī chèng peh-sìⁿ tè tī āu-bīn, kiò kóng, Kā i tû-khì.

37保羅hō͘ in帶去beh入營盤ê時，對千總講，我一句話kā你講，thang mah？伊講，你bat希利尼話mah？Pó-lô hō͘ in tòa-khì beh ji̍p iâⁿ-pôaⁿ ê sî, tùi chhian-chóng kóng, Góa chi̍t kù ōe kā lí kóng, thang mah? I kóng, Lí bat Hi-lī-nî ōe mah?

38你kiám m̄是hit-ê埃及人，前日起擾亂，chhōa四千ê兇手出去曠野ê mah？Lí kiám m̄ sī hit ê Ai-ki̍p lâng, chêng ji̍t khí jiáu-loān, chhōa sì-chheng ê hiong-siú chhut-khì khòng-iá ê mah?

39保羅講，我是猶太人，出世tī Ki-lī-ka ê大數，是出名ê城ê百姓；求你准我tùi百姓講。Pó-lô kóng, Góa sī Iû-thài lâng, chhut-sì tī Ki-lī-ka ê Tāi-sò͘, sī chhut-miâ ê siâⁿ ê peh-sìⁿ; kiû lí chún góa tùi peh-sìⁿ kóng.

40已經准伊，保羅就khiā tī 崎á頂，對百姓搖手；眾人靜靜，就用希伯來ê腔口對in講，Í-keng chún i, Pó-lô chiū khiā tī kiā-á téng, tùi peh-sìⁿ iô chhiú; chèng lâng chēng-chēng, chiū ēng Hi-pek-lâi ê khiuⁿ-kháu tùi in kóng,