1列位父兄ah，我taⁿ tùi lín家己分訴；請lín聽。Lia̍t-ūi hū-heng ah, góa taⁿ tùi lín ka-kī hun-sò͘; chhiáⁿ lín thiaⁿ.

2In聽見伊用希伯來ê腔口對in講，就koh khah安靜：保羅講，In thiaⁿ-kìⁿ i ēng Hi-pek-lâi ê khiuⁿ-kháu tùi in kóng, chiū koh khah an-chēng: Pó-lô kóng,

3我就是猶太人，出世tī Ki-lī-ka ê大數，長成tī chit-ê城做Ka-má-lia̍t ê學生，照咱祖宗律法ê嚴謹來受教示，為tio̍h上帝來熱心，親像今á日lín眾人一樣。Góa chiū-sī Iû-thài lâng, chhut-sì tī Ki-lī-ka ê Tāi-sò͘, tióng-sêng tī chit ê siâⁿ chòe Ka-má-lia̍t ê ha̍k-seng, chiàu lán chó͘-chong lu̍t-hoat ê giâm-kín lâi siū kà-sī, ūi-tio̍h Siōng-tè lâi jia̍t-sim, chhin-chhiūⁿ kin-á-ji̍t lín chèng lâng chi̍t iūⁿ.

4我bat khún-tio̍k thàn chit-ê路ê人hō͘伊死，無論男女lóng縛in，送落監。Góa bat khún-tio̍k thàn chit ê Lō͘ ê lâng hō͘ i sí, bô lūn lâm-lú lóng pa̍k in, sàng lo̍h kaⁿ.

5祭司頭kap長老ê全會thang做我ê干證；我亦對in得tio̍h寄hō͘兄弟ê phoe，去大馬色，beh縛tiàm-tī hia ê人拖到耶路撒冷，受刑罰。Chè-si-thâu kap tiúⁿ-ló ê choân-hōe thang chòe góa ê kan-chèng; góa ia̍h tùi in tit-tio̍h kià hō͘ hiaⁿ-tī ê phoe, khì Tāi-má-sek, beh pa̍k tiàm tī hia ê lâng thoa kàu Iâ-lō͘-sat-léng, siū hêng-hoa̍t.

6行近大馬色，hit時約略日中晝，忽然tùi天有大光圍纍照我。Kiâⁿ kūn Tāi-má-sek, hit sî iok-lio̍k ji̍t tiong-tàu, hut-jiân tùi thiⁿ ū tōa kng ûi-lûi chiò góa.

7我就仆tī地裡，聽見有聲對我講，掃羅，掃羅，啥事khún-tio̍k我？Góa chiū phak tī tōe-ni̍h, thiaⁿ-kìⁿ ū siaⁿ tùi góa kóng, Sò-lô, Sò-lô, siáⁿ-sū khún-tio̍k góa?

8我應講，主ah，你是是誰？伊應我講，我就是拿撒勒ê耶穌，你所khún-tio̍k ê。Góa ìn kóng, Chú ah, lí sī chī-chūi? I ìn góa kóng, Góa chiū-sī Ná-sat-le̍k ê Iâ-so͘, lí só͘ khún-tio̍k ê.

9Kap我tī-teh ê人看見hit-ê光，無聽見kā我講ê ê聲。Kap góa tī-teh ê lâng khòaⁿ-kìⁿ hit ê kng, bô thiaⁿ-kìⁿ kā góa kóng ê ê siaⁿ.

10我講，主ah，我tio̍h怎樣做？主kā我講，起來，入大馬色；凡所定tio̍h你行ê，tī hia beh kā你講。Góa kóng, Chú ah, góa tio̍h cháiⁿ-iūⁿ chòe? Chú kā góa kóng, Khí-lâi, ji̍p Tāi-má-sek; hoān só͘ tiāⁿ-tio̍h lí kiâⁿ ê, tī hia beh kā lí kóng.

11我因為hit-ê光ê燦爛，就bōe看見，hō͘ saⁿ-kap tī-teh ê人牽入大馬色。Góa in-ūi hit ê kng ê chhàn-lān, chiū bōe khòaⁿ-kìⁿ, hō͘ saⁿ-kap tī-teh ê lâng khan ji̍p Tāi-má-sek.

12有一人，名叫亞拿尼亞，照律法是敬虔ê人，hō͘ tiàm-tī hia ê 眾猶太人所o-ló；Ū chi̍t lâng, miâ kiò A-ná-nî-a, chiàu lu̍t-hoat sī kèng-khiân ê lâng, hō͘ tiàm tī hia ê chèng Iû-thài lâng só͘ o-ló;

13伊就近我來khiā tī身邊，kā我講，兄弟掃羅，你thang koh看。i chiū-kūn góa lâi khiā tī sin-piⁿ, kā góa kóng, Hiaⁿ-tī Sò-lô, lí thang koh khòaⁿ.

14我即時kia̍h目看伊。Koh講，咱列祖ê上帝已經定tio̍h你來知伊ê旨意，看hit-ê義ê，koh聽伊ê嘴所出ê聲。Góa chek-sî kia̍h ba̍k khòaⁿ i. Koh kóng, Lán lia̍t-chó͘ ê Siōng-tè í-keng tiāⁿ-tio̍h lí lâi chai I ê chí-ì, khòaⁿ hit ê Gī-ê, koh thiaⁿ I ê chhùi só͘ chhut ê siaⁿ.

15因為你beh將所看見所聽見ê，為tio̍h伊做干證tī眾人。In-ūi lí beh chiong só͘ khòaⁿ-kìⁿ só͘ thiaⁿ-kìⁿ ê, ūi-tio̍h I chòe kan-chèng tī chèng lâng.

16Taⁿ啥事延chhiân ah？起來，求伊ê名，來受洗禮，洗除你ê罪。Taⁿ siáⁿ-sū iân-chhiân ah? khí-lâi, kiû I ê miâ, lâi siū sóe-lé, sóe-tû lí ê chōe.

17後來我倒tńg到耶路撒冷，tī殿裡祈禱ê時，神遊tī象外，Āu-lâi góa tò-tńg kàu Iâ-lō͘-sat-léng, tī tiān-ni̍h kî-tó ê sî, sîn iû tī siōng-gōa,

18看見伊對我講，你tio̍h趕緊出耶路撒冷，因為你為tio̍h我所干證ê，hiah-ê人teh-beh m̄接納。khòaⁿ-kìⁿ I tùi góa kóng, Lí tio̍h kóaⁿ-kín chhut Iâ-lō͘-sat-léng, in-ūi lí ūi-tio̍h góa só͘ kan-chèng ê, hiah ê lâng teh-beh m̄ chiap-la̍p.

19我講，主ah，in lóng知我平素tī ta̍k-ê會堂將信你ê人關監koh phah in；Góa kóng, Chú ah, in lóng chai góa pêng-sò͘ tī ta̍k ê hōe-tn̂g chiong sìn lí ê lâng koaiⁿ-kaⁿ koh phah in;

20koh做你ê干證ê司提反流血ê時，我亦khiā-óa，同歡喜，koh顧害死伊ê人ê衫。koh chòe lí ê kan-chèng ê Sū-thê-hoán lâu huih ê sî, góa ia̍h khiā-óa, tâng hoaⁿ-hí, koh kò͘ hāi-sí i ê lâng ê saⁿ.

21主kā我講，去 ah；我beh差你去遠遠，就近外邦人。Chú kā góa kóng, Khì ah; góa beh chhe lí khì hn̄g-hn̄g, chiū-kūn gōa-pang lâng.

22In聽到chit句話；就大聲講，chit號人tio̍h tùi地裡除去，伊m̄應該活。In thiaⁿ kàu chit kù ōe; chiū tōa siaⁿ kóng, chit hō lâng tio̍h tùi tōe-ni̍h tû-khì, i m̄ eng-kai oa̍h.

23眾人嘩嘩嚷，thǹg衫，pōaⁿ土粉tī空中。Chèng lâng hōa-hōa jióng, thǹg saⁿ, pōaⁿ thô͘-hún tī khong-tiong.

24千總就命令帶保羅入營盤，用鞭phah來審問伊，ài知為tio̍h甚麼緣故眾人án-ni嚷伊。Chhian-chóng chiū bēng-lēng tòa Pó-lô ji̍p iâⁿ-pôaⁿ, ēng piⁿ phah lâi sím-mn̄g i, ài chai ūi-tio̍h sím-mi̍h iân-kò͘ chèng lâng án-ni jióng i.

25Tú-á用皮帶縛伊，保羅對邊á teh khiā ê百總講，做羅馬人，bē定罪，lín phah伊，thang mah？Tú-á ēng phê-tòa pa̍k i, Pó-lô tùi piⁿ-á teh khiā ê pé-chóng kóng, Chòe Lô-má lâng, bē tēng chōe, lín phah i, thang mah?

26百總聽見，就去kā千總講，你beh怎樣做？因為chit-ê是羅馬人。Pé-chóng thiaⁿ-kìⁿ, chiū khì kā chhian-chóng kóng, Lí beh cháiⁿ-iūⁿ chòe? in-ūi chit ê sī Lô-má lâng.

27千總就近來對伊講，Kā我講，你是羅馬人á m̄是？伊講，是。Chhian-chóng chiū-kūn lâi tùi i kóng, Kā góa kóng, lí sī Lô-má lâng á m̄ sī? I kóng, Sī.

28千總應講，我用chōe-chōe銀買入chit-ê籍。保羅講，我出世就是。Chhian-chóng ìn kóng, Góa ēng chōe-chōe gûn bóe ji̍p chit ê che̍k. Pó-lô kóng, Góa chhut-sì chiū-sī.

29Tùi án-ni，beh phah問伊ê人就liâm-piⁿ離開伊；千總既然知伊是羅馬人，因為bat縛伊，亦真驚。Tùi án-ni beh phah-mn̄g i ê lâng chiū liâm-piⁿ lī-khui i; chhian-chóng kì-jiân chai i sī Lô-má lâng, in-ūi bat pa̍k i, ia̍h chin kiaⁿ.

30隔日，ài知保羅hō͘猶太人告ê實情，就kā伊tháu 開，命令chiah-ê祭司頭kap全公會聚集；就帶保羅落來，hō͘伊khiā tī in ê面前。Keh ji̍t, ài chai Pó-lô hō͘ Iû-thài lâng kò ê si̍t-chêng, chiū kā i tháu khui, bēng-lēng chiah ê chè-si-thâu kap choân kong-hōe chū-chi̍p; chiū tòa Pó-lô lo̍h-lâi, hō͘ i khiā tī in ê bīn-chêng.

1保羅注目看公會，講，兄弟ah，我平素做人ǹg上帝，凡事存良心，到今á日。Pó-lô chù-ba̍k khòaⁿ kong-hōe, kóng, Hiaⁿ-tī ah, góa pêng-sò͘ chòe lâng ǹg Siōng-tè, hoān-sū chûn liông-sim, kàu kin-á-ji̍t.

2祭司頭亞拿尼亞命令身邊teh khiā ê人phah伊ê嘴。Chè-si-thâu A-ná-nî-a bēng-lēng sin-piⁿ teh khiā ê lâng phah i ê chhùi.

3保羅就對伊講，粉白ê 牆ah，上帝beh phah你；你坐teh照律法審判我，竟然違逆律法命令phah我mah？Pó-lô chiū tùi i kóng, Hún-pe̍h ê chhiûⁿ ah, Siōng-tè beh phah lí; lí chē teh chiàu lu̍t-hoat sím-phòaⁿ góa, kèng-jiân ûi-ke̍h lu̍t-hoat bēng-lēng phah góa mah?

4身邊teh khiā ê人講，上帝ê祭司頭，你罵伊mah？Sin-piⁿ teh khiā ê lâng kóng, Siōng-tè ê chè-si-thâu, lí mē i mah?

5保羅講，兄弟ah，我m̄-bat伊是祭司頭；因為聖經有記，講，莫得罵你ê百姓ê序大。Pó-lô kóng, Hiaⁿ-tī ah, góa m̄ bat i sī chè-si-thâu; in-ūi sèng-keng ū kì, kóng, Bo̍h-tit mē lí ê peh-sìⁿ ê sī-tōa.

6但是保羅知in一pêng是撒都該人，一pêng是法利賽人；就tī公會中叫講，兄弟ah，我是法利賽人，亦是法利賽人ê kiáⁿ；chit-tia̍p受審判就是因為死人koh活ê ǹg望。Nā-sī Pó-lô chai in chi̍t pêng sī Sat-thó͘-kai lâng, chi̍t pêng sī Hoat-lī-sài lâng; chiū tī kong-hōe tiong kiò kóng, Hiaⁿ-tī ah, góa sī Hoat-lī-sài lâng, ia̍h sī Hoat-lī-sài lâng ê kiáⁿ; chit tia̍p siū sím-phòaⁿ chiū-sī in-ūi sí-lâng koh-oa̍h ê ǹg-bāng.

7講án-ni，法利賽人kap撒都該人相爭；眾人就分pêng。Kóng án-ni, Hoat-lī-sài lâng kap Sat-thó͘-kai lâng saⁿ-chiⁿ; chèng lâng chiū hun-pêng.

8因為撒都該人講無koh活，亦無天使，亦無神；但是法利賽人就認兩項lóng有。In-ūi Sat-thó͘-kai lâng kóng bô koh-oa̍h, ia̍h bô thiⁿ-sài, ia̍h bô sîn; nā-sī Hoat-lī-sài lâng chiū jīn nn̄g hāng lóng ū.

9就有大喧嚷；法利賽hit-pêng ê經學士kúi-nā個起來，爭辯講，阮看chit人lóng無pháiⁿ；若beh是有神，á是天使，kap伊講話ni̍h？Chiū ū tōa soan-jióng; Hoat-lī-sài hit pêng ê keng-ha̍k-sū kúi-nā ê khí-lâi, cheng-piān kóng, Goán khòaⁿ chit lâng lóng bô pháiⁿ; nā beh sī ū sîn, á-sī thiⁿ-sài, kap i kóng ōe ni̍h?

10Hit時tú-tú大相爭；千總驚了保羅hō͘ in拆裂，命令兵丁落去對in中間搶出，chhōa伊入營盤。Hit sî tú-tú tōa saⁿ-chiⁿ; chhian-chóng kiaⁿ-liáu Pó-lô hō͘ in thiah-li̍h, bēng-lēng peng-teng lo̍h-khì tùi in tiong-kan chhiúⁿ-chhut, chhōa i ji̍p iâⁿ-pôaⁿ.

11Hit暝主khiā tī保羅ê身邊，講，壯你ê心；你bat tī耶路撒冷為tio̍h我做干證，亦的確án-ni做干證tī羅馬。Hit mî Chú khiā tī Pó-lô ê sin-piⁿ, kóng, Chòng lí ê sim; lí bat tī Iâ-lō͘-sat-léng ūi-tio̍h góa chòe kan-chèng, ia̍h tek-khak án-ni chòe kan-chèng tī Lô-má.

12到天光，猶太人結黨chiù-chōa，講，若無到thâi死保羅，m̄ lim m̄食。Kàu thiⁿ kng, Iû-thài lâng kiat-tóng chiù-chōa, kóng, Nā bô kàu thâi-sí Pó-lô, m̄ lim m̄ chia̍h.

13Án-ni同心chiù-chōa ê有四十gōa人。Án-ni tâng sim chiù-chōa ê ū sì-cha̍p gōa lâng.

14就就近chiah-ê祭司頭kap長老，講，阮chiah-ê已經chiù重chōa，若無到thâi死保羅，半項物to m̄食。Chiū chiū-kūn chiah ê chè-si-thâu kap tiúⁿ-ló, kóng, Goán chiah-ê í-keng chiù tāng chōa, nā bô kàu thâi-sí Pó-lô, pòaⁿ hāng mi̍h to m̄ chia̍h.

15Taⁿ lín kap公會tio̍h kā千總講，請伊chhōa保羅到lín ê面前，ná親像lín beh koh詳細查問伊ê案情；阮已經備辦好lah，tī伊bē近óa ê時來thâi伊。Taⁿ lín kap kong-hōe tio̍h kā chhian-chóng kóng, chhiáⁿ i chhōa Pó-lô kàu lín ê bīn-chêng, ná chhin-chhiūⁿ lín beh koh siông-sè chhâ-mn̄g i ê àn-chêng; goán í-keng pī-pān hó lah, tī i bē kūn-óa ê sî lâi thâi i.

16獨獨保羅ê外甥聽見in beh埋伏，就去入營kā保羅講。To̍k-to̍k Pó-lô ê gōe-seng thiaⁿ-kìⁿ in beh bâi-ho̍k, chiū khì ji̍p iâⁿ kā Pó-lô kóng.

17保羅叫一個百總來，講，Chhōa chit-ê少年人去見千總；因為伊有tāi-chì beh報伊知。Pó-lô kiò chi̍t ê pé-chóng lâi, kóng, Chhōa chit ê siàu-liân lâng khì kìⁿ chhian-chóng; in-ūi i ū tāi-chì beh pò i chai.

18就牽伊，chhōa伊去見千總，講，Hit-ê受關ê保羅叫我去，求我chhōa chit-ê少年人見你；有tāi-chì beh kā你講。Chiū khan i, chhōa i khì kìⁿ chhian-chóng, kóng, Hit ê siū koaiⁿ ê Pó-lô kiò góa khì, kiû góa chhōa chit ê siàu-liân lâng kìⁿ lí; ū tāi-chì beh kā lí kóng.

19千總牽伊ê手，到偏僻ê所在，問講，Beh報我知甚麼？Chhian-chóng khan i ê chhiú, kàu phian-phiah ê só͘-chāi, mn̄g kóng, Beh pò góa chai sím-mi̍h?

20講，猶太人相約，求你明á日chhōa保羅落公會，ná親像你beh詳細查問伊ê案情。Kóng, Iû-thài lâng siong iok, kiû lí bîn-á-ji̍t chhōa Pó-lô lo̍h kong-hōe, ná chhin-chhiūⁿ lí beh siông-sè chhâ-mn̄g i ê àn-chêng.

21求你莫得thàn伊；因為in有四十gōa人埋伏teh當等伊；in bat chiù-chōa講，若無到thâi死保羅，m̄ lim m̄食；taⁿ已經備辦好，teh thèng候你允准nā-tiāⁿ。Kiû lí bo̍h-tit thàn i; in-ūi in ū sì-cha̍p gōa lâng bâi-ho̍k teh tng-tán i; in bat chiù-chōa kóng, Nā bô kàu thâi-sí Pó-lô, m̄ lim m̄ chia̍h; taⁿ í-keng pī-pān hó, teh thèng-hāu lí ún-chún nā-tiāⁿ.

22千總kah少年人去，吩咐伊講，M̄-thang對人講你有將chiah-ê tāi-chì通知我。Chhian-chóng kah siàu-liân lâng khì, hoan-hù i kóng, M̄-thang tùi lâng kóng lí ū chiong chiah ê tāi-chì thong-ti góa.

23就召百總兩人，講，備辦步兵兩百，馬兵七十，kia̍h鎗ê兩百，今暝二更去該撒利亞；Chiū tiàu pé-chóng nn̄g lâng, kóng, Pī-pān pō͘-peng nn̄g pah, bé-peng chhit-cha̍p, kia̍h chhiuⁿ ê nn̄g pah, kim-mî jī kiⁿ khì Kai-sat-lī-a;

24koh備辦cheng-siⁿ hō͘保羅騎，保護伊到總督Hui-le̍k-sū hia。koh pī-pān cheng-siⁿ hō͘ Pó-lô khiâ, pó-hō͘ i kàu chóng-tok Hui-le̍k-sū hia.

25就寫文書，hit-ê大略是講：Chiū siá bûn-su, hit ê tāi-lio̍k sī kóng:

26Kek-ló-tiu Lū-se-a請安總督Hui-le̍k-sū大人。Kek-ló-tiu Lū-se-a chhéng-an chóng-tok Hui-le̍k-sū tāi-jîn.

27Chit人hō͘猶太人掠；beh thâi伊，我一下知伊是羅馬人，就chhōa兵去救伊。Chit lâng hō͘ Iû-thài lâng lia̍h; beh thâi i, góa chi̍t-ē chai i sī Lô-má lâng, chiū chhōa peng khì kiù i.

28Ài知in告伊ê緣故，就送伊落 in ê公會：Ài chai in kò i ê iân-kò͘, chiū sàng i lo̍h in ê kong-hōe:

29查出伊受告，是為tio̍h in律法ê辯論，並無應該死應該縛ê案情。chhâ-chhut i siū kò, sī ūi-tio̍h in lu̍t-hoat ê piān-lūn, pēng bô eng-kai sí eng-kai pa̍k ê àn-chêng.

30有人kā我講，teh-beh有計謀陷害chit人，我即時差伊就近你，亦命令告伊ê人tī你ê面前告伊。Ū lâng kā góa kóng, teh-beh ū kè-bô͘ hām-hāi chit lâng, góa chek-sî chhe i chiū-kūn lí, ia̍h bēng-lēng kò i ê lâng tī lí ê bīn-chêng kò i.

31兵丁奉命令，將保羅透暝chhōa到An-thê-phàⁿ-tí。Peng-teng hōng bēng-lēng, chiong Pó-lô thàu-mî chhōa kàu An-thê-phàⁿ-tí.

32隔日hō͘馬兵kap伊去，in就tò去營盤。Keh ji̍t hō͘ bé-peng kap i khì, in chiū tò-khì iâⁿ-pôaⁿ.

33Hiah-ê馬兵入該撒利亞，將文書獻總督，就hō͘保羅khiā tī伊ê面前。Hiah ê bé-peng ji̍p Kai-sat-lī-a, chiong bûn-su hiàn chóng-tok, chiū hō͘ Pó-lô khiā tī i ê bīn-chêng.

34看了，問伊是甚麼省ê人；知伊屬Ki-lī-ka。Khòaⁿ-liáu, mn̄g i sī sím-mi̍h séng ê lâng; chai i sio̍k Ki-lī-ka.

35就講，告你ê人若來，我beh詳細聽你ê事；就吩咐顧守伊tī希律ê衙門。Chiū kóng, Kò lí ê lâng nā lâi, góa beh siông-sè thiaⁿ lí ê sū; chiū hoan-hù kò͘-siú i tī Hi-lu̍t ê gê-mn̂g.

1五日後，祭司頭亞拿尼亞kap kúi-nā個長老，kap chit-ê辯護士 Thiap-thó͘-lô，落來；對總督告保羅。Gō͘ ji̍t āu chè-si-thâu A-ná-nî-a kap kúi-nā ê tiúⁿ-ló, kap chit ê piān-hō͘-sū Thiap-thó͘-lô, lo̍h-lâi; tùi chóng-tok kò Pó-lô.

2保羅受召，Thiap-thó͘-lô就告伊，講，Pó-lô siū tiàu, Thiap-thó͘-lô chiū kò i, kóng,

3Hui-le̍k-sū大人，阮對你得tio̍h太平，koh對你ê先見，chit國ê弊病得tio̍h 改正，ta̍k時ta̍k所在，阮承受伊，來感謝無soah。Hui-le̍k-sū tāi-jîn, goán tùi lí tit-tio̍h thài-pêng, koh tùi lí ê sian-kiàn, chit kok ê pē-pēng tit-tio̍h kái-chèng, ta̍k sî ta̍k só͘-chāi, goán sêng-siū i, lâi kám-siā bô soah.

4Taⁿ m̄敢chhiân你siuⁿ久，求你寬容聽阮kúi句話。Taⁿ m̄ káⁿ chhiân lí siuⁿ kú, kiû lí khoan-iông thiaⁿ goán kúi kù ōe.

5因為有查出chit人親像瘟疫，tī天下生起擾亂，做拿撒勒黨 ê頭目，In-ūi ū chhâ-chhut chit lâng chhin-chhiūⁿ un-e̍k, tī thiⁿ-ē siⁿ-khí jiáu-loān, chòe Ná-sat-le̍k tóng ê thâu-ba̍k,

6連聖殿伊亦beh phah lâ-sâm；liân sèng-tiān i ia̍h beh phah lâ-sâm;

8阮就掠伊；你家己審問伊，就阮所告伊ta̍k項ê因端，能確實知。goán chiū lia̍h i; lí ka-kī sím-mn̄g i, chiū goán só͘ kò i ta̍k hāng ê in-toaⁿ, ōe khak-si̍t chai.

9猶太人同聲告伊講，tāi-chì實在是án-ni。Iû-thài lâng tâng siaⁿ kò i kóng, tāi-chì si̍t-chāi sī án-ni.

10總督tìm頭，kah保羅講；伊就應講，我知你做chit邦國ê審判司chōe-chōe 年，所以歡喜分訴家己ê tāi-chì；Chóng-tok tìm thâu, kah Pó-lô kóng; i chiū ìn kóng, Góa chai lí chòe chit pang kok ê sím-phòaⁿ si chōe-chōe nî, só͘-í hoaⁿ-hí hun-sò͘ ka-kī ê tāi-chì;

11你會知，我上耶路撒冷敬拜到taⁿ不過十二日；lí ōe chai, góa chiūⁿ Iâ-lō͘-sat-léng kèng-pài kàu taⁿ put-kò cha̍p-jī ji̍t;

12in未bat tú-tio̍h我tī殿內kap人辯論，á是擾動眾人，就tī會堂亦無，城內亦無。in bē bat tú-tio̍h góa tī tiān-lāi kap lâng piān-lūn, á-sī jiáu-tōng chèng lâng, chiū tī hōe-tn̂g ia̍h bô, siâⁿ-lāi ia̍h bô.

13Koh現在所告我ê事，in lóng bōe會對你顯出證據。Koh hiān-chāi só͘ kò góa ê sū, in lóng bōe-ōe tùi lí hián-chhut chèng-kù.

14獨獨一項我對你認，就是in所叫做結黨ê路，我照án-ni來服事列祖ê上帝，koh信lóng總合tī律法ê以及記載tī先知ê冊ê；To̍k-to̍k chi̍t hāng góa tùi lí jīn, chiū-sī in só͘ kiò chòe kiat-tóng ê Lō͘, góa chiàu án-ni lâi ho̍k-sāi lia̍t-chó͘ ê Siōng-tè, koh sìn lóng-chóng ha̍p tī lu̍t-hoat ê í-ki̍p kì-chài tī sian-ti ê chheh ê;

15koh對上帝有ǹg望，就是無論義人kap不義ê人beh lóng koh活，這亦是in家己所teh欣慕ê。koh tùi Siōng-tè ū ǹg-bāng, chiū-sī bô lūn gī lâng kap put-gī ê lâng beh lóng koh-oa̍h, che ia̍h sī in ka-kī só͘ teh him-bō͘ ê.

16我tī chit-ê家己練習，就是對上帝，對人，常常存無虧負ê良心。Góa tī chit-ê ka-kī liān-si̍p, chiū-sī tùi Siōng-tè, tùi lâng, siông-siông chûn bô khui-hū ê liông-sim.

17Taⁿ過 kúi-nā年，我tò來是beh賑濟本國，kap獻禮物；Taⁿ kè kúi-nā nî, góa tò-lâi sī beh chín-chè pún kok, kap hiàn lé-mi̍h;

18teh獻ê時，in tú-tio̍h我tī殿裡已經清氣，並無結kui群，也無hán-hōa；只有幾個猶太人tùi亞西亞來ê，teh hiàn ê sî, in tú-tio̍h góa tī tiān-ni̍h í-keng chheng-khì, pēng bô kiat kui-kûn iā bô hán-hōa; chí-ū kúi ê Iû-thài lâng tùi A-se-a lâi ê,

19in若有thang責罪我，就應該來tī你ê面前告我。in nā ū thang chek-chōe góa, chiū eng-kai lâi tī lí ê bīn-chêng kò góa.

20á是tī chia ê人，若看見我khiā tī公會ê面前，有甚麼不義，in亦tio̍h家己講；Á-sī tī chia ê lâng, nā khòaⁿ-kìⁿ góa khiā tī kong-hōe ê bīn-chêng, ū sím-mi̍h put-gī, in ia̍h tio̍h ka-kī kóng;

21設使有，亦不過chit一句nā-tiāⁿ，就是我khiā tī in中間，叫講，為tio̍h死人koh活ê事，我今á日tī lín ê面前受審判。siat-sú ū, ia̍h put-kò chí chi̍t kù nā-tiāⁿ, chiū-sī góa khiā tī in tiong-kan, kiò kóng, Ūi-tio̍h sí-lâng koh-oa̍h ê sū, góa kin-á-ji̍t tī lín ê bīn-chêng siū sím-phòaⁿ.

22Hui-le̍k-sū本詳細知關涉chit-ê路ê事，就延chhiân in，講，千總Lū-se-a落來ê時，我就beh審斷lín ê tāi-chì。Hui-le̍k-sū pún siông-sè chai koan-sia̍p chit ê Lō͘ ê sū, chiū iân-chhiân in, kóng, Chhian-chóng Lū-se-a lo̍h-lâi ê sî, góa chiū beh sím-toàn lín ê tāi-chì.

23Tùi án-ni，命令百總顧守保羅，亦放寬伊；伊ê人若來供給伊，lóng莫得阻擋。Tùi án-ni bēng-lēng pé-chóng kò͘-siú Pó-lô, ia̍h pàng-khoan i; i ê lâng nā lâi kiong-kip i, lóng bo̍h-tit chó͘-tòng.

24過 kúi-nā日，Hui-le̍k-sū kap伊ê bó͘，Thó͘-se-lah，是猶太人，saⁿ-kap來，就召保羅，ài聽伊論信基督耶穌ê道理。Kè kúi-nā ji̍t, Hui-le̍k-sū kap i ê bó͘, Thó͘-se-lah, sī Iû-thài lâng, saⁿ-kap lâi, chiū tiàu Pó-lô, ài thiaⁿ i lūn sìn Ki-tok Iâ-so͘ ê tō-lí.

25保羅議論公義、貞節，kap將來ê審判，Hui-le̍k-sū不止驚，應講，Taⁿ請退去；有利便ê時，chiah召你。Pó-lô gī-lūn kong-gī, cheng-chiat, kap chiong-lâi ê sím-phòaⁿ, Hui-le̍k-sū put-chí kiaⁿ, ìn kóng, Taⁿ chhiáⁿ thè-khì; ū lī-piān ê sî, chiah tiàu lí.

26伊亦ǹg望保羅beh銀hō͘伊；所以ta̍uh-ta̍uh召伊來，kap伊談論。I ia̍h ǹg-bāng Pó-lô beh gûn hō͘ i; só͘-í ta̍uh-ta̍uh tiàu i lâi, kap i tâm-lūn.

27過兩年，Pho-kiû Hui-sū-to͘接Hui-le̍k-sū ê任；Hui-le̍k-sū ài取猶太人歡喜，就留保羅猶原縛teh。Kè nn̄g nî, Pho-kiû Hui-sū-to͘ chiap Hui-le̍k-sū ê jīm; Hui-le̍k-sū ài chhú Iû-thài lâng hoaⁿ-hí, chiū lâu Pó-lô iû-goân pa̍k-teh.