1Hui-sū-to͘到任三日，就tùi該撒利亞上耶路撒冷。Hui-sū-to͘ tò jīm saⁿ ji̍t, chiū tùi Kai-sat-lī-a chiūⁿ Iâ-lō͘-sat-léng.

2Chiah-ê祭司頭kap猶太ê頭人，對伊告保羅；Chiah ê chè-si-thâu kap Iû-thài ê thâu-lâng, tùi i kò Pó-lô;

3續求情beh害保羅，sòe伊帶保羅到耶路撒冷；in tī路裡teh設埋伏，beh thâi伊。sòa kiû chêng beh hāi Pó-lô, sòe i tòa Pó-lô kàu Iâ-lō͘-sat-léng; in tī lō͘-ni̍h teh siat bâi-ho̍k, beh thâi i.

4但是Hui-sū-to͘應講，保羅是顧守tī該撒利亞，我本身亦beh緊緊tò去。Nā-sī Hui-sū-to͘ ìn kóng, Pó-lô sī kò͘-siú tī Kai-sat-lī-a, góa pún-sin ia̍h beh kín-kín tò-khì.

5Koh講，Lín中間khah能ê人thang saⁿ-kap落去；hit人若有甚麼不是，就thang告伊。Koh kóng, Lín tiong-kan khah ōe ê lâng thang saⁿ-kap lo̍h-khì; hit lâng nā ū sím-mi̍h put-sī, chiū thang kò i.

6Hui-sū-to͘ tiàm hia不過十日八日，就落去該撒利亞；隔日坐堂，命令帶保羅來。Hui-sū-to͘ tiàm hia put-kò cha̍p-ji̍t poeh-ji̍t, chiū lo̍h-khì Kai-sat-lī-a; keh ji̍t chē tn̂g, bēng-lēng tòa Pó-lô lâi.

7已經到，tùi耶路撒冷落來ê猶太人圍纍teh khiā，用chōe-chōe重 ê案件來告伊；但是無憑據thang證明。Í-keng kàu, tùi Iâ-lō͘-sat-léng lo̍h-lâi ê Iû-thài lâng ûi-lûi teh khiā, ēng chōe-chōe tāng ê àn-kiāⁿ lâi kò i; nā-sī bô pîn-kù thang chèng-bêng.

8保羅分訴講，猶太人ê律法，á是殿堂，á是該撒，我未bat患tio̍h。Pó-lô hun-sò͘ kóng, Iû-thài lâng ê lu̍t-hoat, á-sī tiān-tn̂g, á-sī Kai-sat, góa bē bat hoān-tio̍h.

9Hui-sū-to͘ ài hō͘猶太人歡喜，應保羅講，論chiah-ê事，你甘願上耶路撒冷，tī hia當我ê面前受審判mah？Hui-sū-to͘ ài hō͘ Iû-thài lâng hoaⁿ-hí, ìn Pó-lô kóng, Lūn chiah ê sū, lí kam-goān chiūⁿ Iâ-lō͘-sat-léng, tī hia tng góa ê bīn-chêng siū sím-phòaⁿ mah?

10總是保羅講，我khiā tī該撒ê公堂，是我應該受審判ê位；我未bat用不義款待猶太人，這亦是你所明明知ê。Chóng-sī Pó-lô kóng, Góa khiā tī Kai-sat ê kong-tn̂g, sī góa eng-kai siū sím-phòaⁿ ê ūi; góa bē bat ēng put-gī khoán-thāi Iû-thài lâng, che ia̍h sī lí só͘ bêng-bêng chai ê.

11我若有行不義，á是患tio̍h死罪，就死亦無推辭；但是in所告我ê無一項實，就無人thang順人情將我交hō͘ in。我對該撒告御狀。Góa nā ū kiâⁿ put-gī, á-sī hoān-tio̍h sí chōe, chiū sí ia̍h bô the-sî; nā-sī in só͘ kò góa ê bô chi̍t hāng si̍t, chiū bô lâng thang sūn jîn-chêng chiong góa kau hō͘ in. Góa tùi Kai-sat kò gū-chn̄g.

12Hui-sū-to͘ kap議會saⁿ-kap議論了，就應講，你已經對該撒告御狀，就去見該撒。Hui-sū-to͘ kap gī-hōe saⁿ-kap gī-lūn liáu, chiū ìn kóng, Lí í-keng tùi Kai-sat kò gū-chn̄g, chiū khì kìⁿ Kai-sat.

13過 kúi-nā日，A-ki-phàⁿ王kap Pek-nî-ki到該撒利亞，請安Hui-sū-to͘。Kè kúi-nā ji̍t A-ki-phàⁿ ông kap Pek-nî-ki kàu Kai-sat-lī-a, chhéng-an Hui-sū-to͘.

14Tiàm hia chōe-chōe日，Hui-sū-to͘將保羅ê事對王排列，講，有一人就是Hui-le̍k-sū所留tī監裡ê；Tiàm hia chōe-chōe ji̍t, Hui-sū-to͘ chiong Pó-lô ê sū tùi ông pâi-lia̍t, kóng, Ū chi̍t lâng chiū-sī Hui-le̍k-sū só͘ lâu tī kaⁿ-ni̍h ê;

15我tī耶路撒冷ê時，chiah-ê祭司頭kap猶太ê長老告伊，求定伊ê罪。góa tī Iâ-lō͘-sat-léng ê sî, chiah ê chè-si-thâu kap Iû-thài ê tiúⁿ-ló kò i, kiû tēng i ê chōe.

16我應講，被告kap原告iáu-bē對訊，bē得tio̍h機會分訴伊ê案情，就順人情將伊交hō͘人，m̄是羅馬人ê例。Góa ìn kóng, Pī-kò kap goân-kò iáu-bē tùi-sìn, bē tit-tio̍h ki-hōe hun-sò͘ i ê àn-chêng, chiū sūn jîn-chêng chiong i kau hō͘ lâng, m̄ sī Lô-má lâng ê lē.

17所以in聚集tī chia，我無延chhiân，隔日坐堂，命令帶hit人到。Só͘-í in chū-chi̍p tī chia, góa bô iân-chhiân, keh ji̍t chē tn̂g, bēng-lēng tòa hit lâng kàu.

18告伊ê人lóng khiā-teh；所告ê m̄是我所事先phah算ê pháiⁿ事，Kò i ê lâng lóng khiā-teh; só͘ kò ê m̄ sī góa só͘ tāi-seng phah-sǹg ê pháiⁿ sū,

19不過有幾項ê辯論，就是論 in敬神明ê事，koh論一個耶穌，已經死，保羅講伊活，為tio̍h án-ni來告伊。put-kò ū kúi hāng ê piān-lūn, chiū-sī lūn in kèng sîn-bêng ê sū, koh lūn chi̍t ê Iâ-so͘, í-keng sí, Pó-lô kóng i oa̍h, ūi-tio̍h án-ni lâi kò i.

20Chiah-ê事tio̍h怎樣查問，我既然bōe明，所以問伊甘願去耶路撒冷，tī hia受審問chiah-ê事á m̄。Chiah ê sū tio̍h cháiⁿ-iūⁿ chhâ-mn̄g, góa kì-jiân bōe bêng, só͘-í mn̄g i kam-goān khì Iâ-lō͘-sat-léng, tī hia siū sím-mn̄g chiah ê sū á m̄.

21獨獨保羅已經告御狀，ài我留伊交hō͘皇帝判斷，我就命令留伊，thèng候解送hō͘該撒。To̍k-to̍k Pó-lô í-keng kò gū-chn̄g, ài góa lâu i kau hō͘ hông-tè phòaⁿ-toàn, góa chiū bēng-lēng lâu i, thèng-hāu ké-sàng hō͘ Kai-sat.

22A-ki-phàⁿ對Hui-sū-to͘講，我本也ài聽chit-ê人。講，明á日thang聽伊。A-ki-phàⁿ tùi Hui-sū-to͘ kóng, Góa pún iā ài thiaⁿ chit ê lâng. Kóng, Bîn-á-ji̍t thang thiaⁿ i.

23隔日A-ki-phàⁿ kap Pek-nî-ki大設威儀來，kap chiah-ê千總，以及城內尊貴ê人，入公堂，Hui-sū-to͘出命令，就帶保羅到。Keh ji̍t A-ki-phàⁿ kap Pek-nî-ki tōa siat ui-gî lâi, kap chiah ê chhian-chóng, í-ki̍p siâⁿ-lāi chun-kùi ê lâng, ji̍p kong-tn̂g, Hui-sū-to͘ chhut bēng-lēng, chiū tòa Pó-lô kàu.

24Hui-sū-to͘講，A-ki-phàⁿ王以及kap阮tī-teh ê眾人ah，lín看chit-ê人，就是眾猶太人，tī耶路撒冷kap tī chia，求我叫講，伊m̄應該iáu活 ê。Hui-sū-to͘ kóng, A-ki-phàⁿ ông í-ki̍p kap goán tī-teh ê chèng lâng ah, lín khòaⁿ chit ê lâng, chiū-sī chèng Iû-thài lâng, tī Iâ-lō͘-sat-léng kap tī chia, kiû góa kiò kóng, i m̄ eng-kai iáu oa̍h ê.

25但是我查明伊未bat行應該死ê事；koh伊已經告御狀tī皇帝，所以我擬定解送伊。Nā-sī góa chhâ-bêng i bē bat kiâⁿ eng-kai sí ê sū; koh i í-keng kò gū-chn̄g tī hông-tè, só͘-í góa gí-tiāⁿ ké-sàng i.

26獨獨bē得tio̍h伊ê實情thangh奏我ê 主。所以帶伊出來tī lín ê面前，koh khah要緊tī A-ki-phàⁿ王你ê面前，chiah tī審問了有所thang奏。To̍k-to̍k bē tit-tio̍h i ê si̍t-chêng thang chàu góa ê chú. Só͘-í tòa i chhut-lâi tī lín ê bīn-chêng, koh khah iàu-kín tī A-ki-phàⁿ ông lí ê bīn-chêng, chiah tī sím-mn̄g liáu ū só͘ thang chàu.

27因為照我phah算，解送犯人，若無指明告伊ê事，是無合理。In-ūi chiàu góa phah-sǹg, ké-sàng hoān-lâng, nā bô chí-bêng kò i ê sū, sī bô ha̍p lí.

1A-ki-phàⁿ對保羅講，准你家己排列。保羅就kia̍h-起手分訴講：A-ki-phàⁿ tùi Pó-lô kóng, Chún lí ka-kī pâi-lia̍t. Pó-lô chiū kia̍h-khí chhiú hun-sò͘ kóng:

2A-ki-phàⁿ王 ah，我hō͘猶太人所告ê，今á日beh lóng分訴tī你ê面前，是真佳哉：A-ki-phàⁿ ông ah, góa hō͘ Iû-thài lâng só͘ kò ê, kin-á-ji̍t beh lóng hun-sò͘ tī lí ê bīn-chêng, sī chin kai-chài:

3koh khah佳哉ê，是因為猶太人ê規例kap in ê辯論，你lóng知；所以求你寬容聽我。koh khah kai-chài ê, sī in-ūi Iû-thài lâng ê kui-lē kap in ê piān-lūn, lí lóng chai; só͘-í kiû lí khoan-iông thiaⁿ góa.

4我tùi起頭tī我ê百姓ê中間，kap tī耶路撒冷，tùi少年做人怎樣，猶太人lóng知。Góa tùi khí-thâu tī góa ê peh-sìⁿ ê tiong-kan, kap tī Iâ-lō͘-sat-léng, tùi siàu-liân chòe-lâng cháiⁿ-iūⁿ, Iû-thài lâng lóng chai.

5In tùi起頭bat我，設使肯做干證，就知我照咱教中極嚴ê派，做法利賽人。In tùi khí-thâu bat góa, siat-sú khéng chòe kan-chèng, chiū chai góa chiàu lán kàu-tiong ke̍k giâm ê phài, chòe Hoat-lī-sài lâng.

6現在我khiā tī chia來受審判，就是因為ǹg望上帝對咱ê列祖所應允ê；Hiān-chāi góa khiā tī chia lâi siū sím-phòaⁿ, chiū-sī in-ūi ǹg-bāng Siōng-tè tùi lán ê lia̍t-chó͘ só͘ èng-ún ê;

7咱十二支派，日暝慇勤服事，亦是ǹg望到tī chit-ê。王 ah，我為tio̍h chit-ê ǹg望，chiah hō͘猶太人告。lán cha̍p-jī chi-phài, ji̍t-mî un-khûn ho̍k-sāi, ia̍h sī ǹg-bāng kàu tī chit-ê. Ông ah, góa ūi-tio̍h chit ê ǹg-bāng, chiah hō͘ Iû-thài lâng kò.

8上帝若hō͘死人koh活，lín怎樣掠做bōe信得ah？Siōng-tè nā hō͘ sí-lâng koh-oa̍h, lín cháiⁿ-iūⁿ lia̍h chòe bōe sìn tit ah?

9前我家己phah算tio̍h用chōe-chōe項來攻擊拿撒勒耶穌ê名。Chêng góa ka-kī phah-sǹg tio̍h ēng chōe-chōe hāng lâi kong-kek Ná-sat-le̍k Iâ-so͘ ê miâ.

10Tī耶路撒冷果然bat án-ni行；已經受tio̍h chiah-ê祭司頭ê權，將chōe-chōe聖徒關tī監裡；in受thâi死，我亦擬有份。Tī Iâ-lō͘-sat-léng kó-jiân bat án-ni kiâⁿ; í-keng siū-tio̍h chiah ê chè-si-thâu ê koân, chiong chōe-chōe sèng-tô͘ koaiⁿ tī kaⁿ-ni̍h; in siū thâi-sí, góa ia̍h gí ū hūn.

11Koh tī ta̍k-ê會堂，我ta̍uh-ta̍uh刑罰in，強迫in講謗瀆ê話；攻擊in ná hiông，到外位ê城亦khún-tio̍k in。Koh tī ta̍k ê hōe-tn̂g góa ta̍uh-ta̍uh hêng-hoa̍t in, kiông-pek in kóng pòng-to̍k ê ōe; kong-kek in ná hiông, kàu gōa-ūi ê siâⁿ ia̍h khún-tio̍k in.

12Hit-tia̍p我去大馬色ê時，有得tio̍h chiah-ê祭司頭ê權kap命令。Hit tia̍p góa khì Tāi-má-sek ê sî, ū tit-tio̍h chiah ê chè-si-thâu ê koân kap bēng-lēng.

13王 ah，我tī路上，日中晝ê時，看見tùi天有光，贏過日ê燦爛，圍纍照我kap同行ê人。Ông ah, góa tī lō͘-chiūⁿ, ji̍t tiong-tàu ê sî, khòaⁿ-kìⁿ tùi thiⁿ ū kng, iâⁿ-kè ji̍t ê chhàn-lān, ûi-lûi chiò góa kap tâng kiâⁿ ê lâng.

14阮lóng倒tī地裡，我聽見有聲用希伯來ê腔口對我講，掃羅，掃羅，你啥事khún-tio̍k我？你用腳踢刺是艱苦。Goán lóng tó tī tōe-ni̍h, góa thiaⁿ-kìⁿ ū siaⁿ ēng Hi-pek-lâi ê khiuⁿ-kháu tùi góa kóng, Sò-lô, Sò-lô, lí siáⁿ-sū khún-tio̍k góa? lí ēng kha that chhì sī kan-khó͘.

15我講，主ah，你是是誰？主講，我就是你所khún-tio̍k ê耶穌。Góa kóng, Chú ah, lí sī chī-chūi? Chú kóng, Góa chiū-sī lí só͘ khún-tio̍k ê Iâ-so͘.

16總是你tio̍h起來khiā；因為我tiâu-tî對你出現，beh設立你做差用，做干證ê，tī你所看見我kap我所beh出現hō͘你看ê事；Chóng-sī lí tio̍h khí-lâi khiā; in-ūi góa tiâu-tî tùi lí chhut-hiān, beh siat-li̍p lí chòe chhe-ēng, chòe kan-chèng ê, tī lí só͘ khòaⁿ-kìⁿ góa kap góa só͘ beh chhut-hiān hō͘ lí khòaⁿ ê sū;

17救你出chit-ê百姓kap外邦人ê手，就是現今差你就近in ê；kiù lí chhut chit ê peh-sìⁿ kap gōa-pang lâng ê chhiú, chiū-sī hiān-kim chhe lí chiū-kūn in ê;

18來開in ê目睭，hō͘ in tùi暗oa̍t-tńg到tī光；離開撒旦ê權勢來歸ǹg上帝，tùi信我來得tio̍h赦罪，koh得tio̍h基業 tī成聖ê ê中間。lâi khui in ê ba̍k-chiu, hō͘ in tùi àm oa̍t-tńg kàu tī kng; lī-khui Sat-tàn ê koân-sè lâi kui-ǹg Siōng-tè, tùi sìn góa lâi tit-tio̍h sià-chōe, koh tit-tio̍h ki-gia̍p tī chiâⁿ-sèng ê ê tiong-kan.

19A-ki-phàⁿ王 ah，所以我無違逆tùi天所顯現ê：A-ki-phàⁿ ông ah, só͘-í góa bô ûi-ke̍h tùi thiⁿ só͘ hián-hiān ê:

20就事先tī大馬色，後來tī耶路撒冷，kap猶太ê全地，以及外邦，勸人tio̍h反悔來歸ǹg上帝，行tāi-chì kap反悔相合。chiū tāi-seng tī Tāi-má-sek, āu-lâi tī Iâ-lō͘-sat-léng, kap Iû-thài ê choân tōe, í-ki̍p gōa-pang, khǹg lâng tio̍h hoán-hóe lâi kui-ǹg Siōng-tè, kiâⁿ tāi-chì kap hoán-hóe saⁿ-ha̍p.

21因為án-ni，猶太人tī殿裡掠我beh thâi我。In-ūi án-ni, Iû-thài lâng tī tiān-ni̍h lia̍h góa beh thâi góa.

22但是我得tio̍h上帝ê庇佑，到今á日iáu tī-teh，tùi大到細做干證；所講ê無m̄是chiah-ê先知kap摩西所講beh到ê事；Nā-sī góa tit-tio̍h Siōng-tè ê pì-iū, kàu kin-á-ji̍t iáu tī-teh, tùi tōa kàu sòe chòe kan-chèng; só͘ kóng ê bô m̄ sī chiah ê sian-ti kap Mô͘-se só͘ kóng beh kàu ê sū;

23就是基督怎樣tio̍h受苦，koh怎樣做頭用死人koh活ê事，來傳報光明hō͘ chit-ê百姓kap外邦。chiū-sī Ki-tok cháiⁿ-iūⁿ tio̍h siū khó͘, koh cháiⁿ-iūⁿ chòe thâu ēng sí-lâng koh-oa̍h ê sū, lâi thoân-pò kng-bêng hō͘ chit ê peh-sìⁿ kap gōa-pang.

24保羅án-ni分訴，Hui-sū-to͘大聲講，保羅，你teh狂lah；你ê chōe-chōe學問hō͘你變做狂。Pó-lô án-ni hun-sò͘, Hui-sū-to͘ tōa siaⁿ kóng, Pó-lô, lí teh kông lah; lí ê chōe-chōe ha̍k-būn hō͘ lí pìⁿ chòe kông.

25保羅講，Hui-sū-to͘大人，我m̄是狂；我是講真實端正ê話。Pó-lô kóng, Hui-sū-to͘ tāi-jîn, góa m̄ sī kông; góa sī kóng chin-si̍t toan-chiàⁿ ê ōe.

26因為王知chiah-ê事，我亦好膽對伊講；是chiah-ê事，我深信無一項隱密tī王；因為這m̄是行tī偏僻ê所在。In-ūi ông chai chiah ê sū, góa ia̍h hó-táⁿ tùi i kóng; sī chiah ê sū, góa chhim-sìn bô chi̍t hāng ún-ba̍t tī ông; in-ūi che m̄ sī kiâⁿ tī phian-phiah ê só͘-chāi.

27A-ki-phàⁿ王 ah，你信chiah-ê先知mah？我知你信。A-ki-phàⁿ ông ah, lí sìn chiah ê sian-ti mah? góa chai lí sìn.

28A-ki-phàⁿ對保羅講，你想用小khóa苦勸，beh hō͘我做基督徒ah。A-ki-phàⁿ tùi Pó-lô kóng, Lí siūⁿ ēng sió-khóa khó͘-khǹg, beh hō͘ góa chòe Ki-tok-tô͘ ah.

29保羅講，我求上帝，無論用小khóa，á是大，m̄-nā hō͘你，亦hō͘今á日見若聽我講ê，lóng kap我一樣，獨獨無chiah-ê鎖鏈。Pó-lô kóng, Góa kiû Siōng-tè, bô lūn ēng sió-khóa á-sī tōa, m̄ nā hō͘ lí, ia̍h hō͘ kin-á-ji̍t kìⁿ-nā thiaⁿ góa kóng ê, lóng kap góa chi̍t iūⁿ, to̍k-to̍k bô chiah ê só-liān.

30王kap總督kap Pek-nî-ki，以及同坐ê人lóng起來：Ông kap chóng-tok kap Pek-nî-ki, í-ki̍p tâng chē ê lâng lóng khí-lâi:

31退去saⁿ-kap談論講，Chit人所做無應該死應該縛ê事。thè-khì saⁿ-kap tâm-lūn kóng, Chit lâng só͘ chòe bô eng-kai sí eng-kai pa̍k ê sū.

32A-ki-phàⁿ kā Hui-sū-to͘講，Chit人若未有對該撒告御狀，就thang放伊。A-ki-phàⁿ kā Hui-sū-to͘ kóng, Chit lâng nā bē ū tùi Kai-sat kò gū-chn̄g, chiū thang pàng i.

1已經定tio̍h意思hō͘阮過海去意大利，就將保羅kap另外kúi-nā個犯人，交hō͘ Se-pa-sū-tok營ê百總，名Iû-liû。Í-keng tiāⁿ-tio̍h ì-sù hō͘ goán kè hái khì Í-tāi-lī, chiū chiong Pó-lô kap lēng-gōa kúi-nā ê hoān-lâng, kau hō͘ Se-pa-sū-tok iâⁿ ê pé-chóng, miâ Iû-liû.

2有A-tāi-bí-tiân ê船beh行到亞西亞海墘kúi-nā所在，阮就搭伊起身；有馬其頓ê帖撒羅尼迦人，A-lí-ta̍t-kó͘，kap阮去。Ū A-tāi-bí-tiân ê chûn beh kiâⁿ kàu A-se-a hái-kîⁿ kúi-nā só͘-chāi, goán chiū tah i khí-sin; ū Má-kî-tùn ê Thiap-sat-lô-nî-ka lâng, A-lí-ta̍t-kó͘, kap goán khì.

3隔日到Se-tùn；Iû-liû好款待保羅，准伊就近chiah-ê朋友，受in ê照應。Keh ji̍t kàu Se-tùn; Iû-liû hó khoán-thāi Pó-lô, chún i chiū-kūn chiah ê pêng-iú, siū in ê chiàu-èng.

4Tùi hia開船；因為對頭風ê緣故，就tùi居比路下勢經過。Tùi hia khui chûn; in-ūi tùi-thâu hong ê iân-kò͘, chiū tùi Ku-pí-lō͘ ē-sì keng-kè.

5已經過 Ki-lī-ka，Pông-hui-lī-a ê海，到Lū-ka ê Múi-lah。Í-keng kè Ki-lī-ka, Pông-hui-lī-a ê hái, kàu Lū-ka ê Múi-lah.

6Tī hia百總tú-tio̍h亞力山大ê船，beh去意大利ê，就kah阮搭伊。Tī hia pé-chóng tú-tio̍h A-le̍k-san-tāi ê chûn, beh khì Í-tāi-lī ê, chiū kah goán tah i.

7行真慢，chōe-chōe日chiah lím-á到Kek-nî-thó͘對面；因為風阻擋，就閃Kek-lí-tí下，tùi Sat-mô͘-nî 過；Kiâⁿ chin bān, chōe-chōe ji̍t chiah lím-á kàu Kek-nî-thó͘ tùi-bīn; in-ūi hong chó͘-tòng, chiū siám Kek-lí-tí ē, tùi Sat-mô͘-nî kè;

8lím-lím-á ōe-thang沿岸行到一所在，名Ka-ò；近chia有Lah-se-a ê城。lím-lím-á ōe thang iân hōaⁿ kiâⁿ kàu chi̍t só͘-chāi, miâ Ka-ò; kūn chia ū Lah-se-a ê siâⁿ.

9歷過chōe-chōe日，禁食ê期已經過，行船危險，保羅勸in講，Le̍k-kè chōe-chōe ji̍t, kìm-chia̍h ê kî í-keng kè, kiâⁿ chûn gûi-hiám, Pó-lô khǹg in kóng,

10大家ah，我看chit pái行船，m̄-nā貨物kap船，連咱ê性命亦beh受害kap大損失。Tāi-ke ah, góa khòaⁿ chit pái kiâⁿ chûn, m̄ nā hè-mi̍h kap chûn, liân lán ê sìⁿ-miā ia̍h beh siū hāi kap tōa sún-sit.

11但是百總信舵工kap船主，khah過頭tī保羅所講ê。Nā-sī pé-chóng sìn tāi-kong kap chûn-chú, khah kè-thâu tī Pó-lô só͘ kóng ê.

12Koh tī chit-ê垵澳過冬天m̄利便；大半ê人想ài開船離開chia，看ōe-thang到腓尼基過冬天；hit位就是Kek-lí-tí一個垵澳，一面ǹg東南，一面ǹg東北。Koh tī chit ê oaⁿ-ù kè tang-thiⁿ m̄ lī-piān; tōa pòaⁿ ê lâng siūⁿ ài khui chûn lī-khui chia, khòaⁿ ōe thang kàu Hui-nî-ki kè tang-thiⁿ; hit ūi chiū-sī Kek-lí-tí chi̍t ê oaⁿ-ù, chi̍t bīn ǹg tang-lâm, chi̍t bīn ǹg tang-pak.

13Chit時南風微微á來，眾人掠做得意，就起綻，óa Kek-lí-tí岸來行。Chit sî lâm hong bî-bî-á lâi, chèng lâng lia̍h chòe tek-ì, chiū khí tiàⁿ, óa Kek-lí-tí hōaⁿ lâi kiâⁿ.

14無jōa久，狂風tùi海嶼頂phah落來；hit-ê風名Iú-lah-ku-lûn；Bô jōa kú, kông hong tùi hái-sū téng phah lo̍h-lâi; hit ê hong miâ Iú-lah-ku-lûn;

15船hō͘風掃，chih載bōe-tiâu，就chhut-chāi伊漂流。chûn hō͘ hong sàu, chih-chài bōe tiâu, chiū chhut-chāi i phiau-liû.

16駛到小海嶼下，名叫Ko-tāi lím-lím能收舢板起來。Sái kàu sió hái-sū ē, miâ kiò Ko-tāi lím-lím ōe siu sam-pán khí-lâi.

17舢板已經收起來，就用方法綑縛船底，koh驚了khòa-tio̍h Sài-ní-tí ê沙汕，就落帆，hō͘風押去。Sam-pán í-keng siu-khí-lâi, chiū ēng hong-hoat khún-pa̍k chûn-tóe, koh kiaⁿ-liáu khòa-tio̍h Sài-ní-tí ê soa-sòaⁿ, chiū lo̍h phâng, hō͘ hong ah[a̍h]-khì.

18阮hō͘風湧大搖簸，隔日in就用貨物hiat落海；Goán hō͘ hong éng tōa iô-pòa, keh ji̍t in chiū ēng hè-mi̍h hiat-lo̍h hái;

19第三日koh親手hiat-ka̍k船裡ê器具。tē saⁿ ji̍t koh chhin chhiú hiat-ka̍k chûn-ni̍h ê khì-kū.

20日kap星chōe-chōe日無出現，koh hō͘ 風湧phah不止thiám，阮得救ê ǹg望就lóng無lah。Ji̍t kap chhiⁿ chōe-chōe ji̍t bô chhut-hiān, koh hō͘ hong éng phah put-chí thiám, goán tit kiù ê ǹg-bāng chiū lóng bô lah.

21眾人久久無食，保羅khiā tī in中間，講，大家ah，lín前tio̍h聽我ê話，莫得開船離開Kek-lí-tí，來tú-tio̍h chit號傷害kap損失。Chèng lâng kú-kú bô chia̍h, Pó-lô khiā tī in tiong-kan, kóng, Tāi-ke ah, lín chêng tio̍h thiaⁿ góa ê ōe, bo̍h-tit khui chûn lī-khui Kek-lí-tí, lâi tú-tio̍h chit hō siong-hāi kap sún-sit.

22Taⁿ我勸lín安心；因為lín中間無一人會失落性命，獨獨失落船nā-tiāⁿ。Taⁿ góa khǹg lín an-sim; in-ūi lín tiong-kan bô chi̍t lâng ōe sit-lo̍h sìⁿ-miā, to̍k-to̍k sit-lo̍h chûn nā-tiāⁿ.

23因為我所屬，所服事ê上帝，伊ê天使昨暝khiā tī我身邊，講，保羅，m̄免驚；In-ūi góa só͘ sio̍k, só͘ ho̍k-sāi ê Siōng-tè, I ê thiⁿ-sài chā-mî khiā tī góa sin-piⁿ, kóng, Pó-lô, m̄ bián kiaⁿ;

24你的確tio̍h khiā tī該撒ê面前；看ah，上帝用船內ê人lóng總賞賜你。lí tek-khak tio̍h khiā tī Kai-sat ê bīn-chêng; khòaⁿ ah, Siōng-tè ēng chûn-lāi ê lâng lóng-chóng siúⁿ-sù lí.

25所以大家ah，lín tio̍h安心；因為我信上帝，tāi-chì teh-beh照伊所kā我講ê。Só͘-í tāi-ke ah, lín tio̍h an-sim; in-ūi góa sìn Siōng-tè, tāi-chì teh-beh chiàu I só͘ kā góa kóng ê.

26但是咱chiah-ê的確khòa tī一個海嶼。Nā-sī lán chiah-ê tek-khak khòa tī chi̍t ê hái-sū.

27到第十四暝，阮漂流tī A-tí-a海，約略半暝，水手掠做近山；Kàu tē cha̍p-sì mî, goán phiau-liû tī A-tí-a hái, iok-lio̍k pòaⁿ mî, chúi-siú lia̍h-chòe kūn soaⁿ;

28phah水tô，得tio̍h二十siâm；略略á進前，koh phah水tô，得tio̍h十五siâm。phah chúi-tô, tit-tio̍h jī-cha̍p siâm; lio̍h-lio̍h-á chìn-chêng, koh phah chúi-tô, tit-tio̍h cha̍p-gō͘ siâm.

29驚了lôe-tio̍h石，就tī船尾拋四弓綻，切切ǹg望天光。Kiaⁿ-liáu lôe-tio̍h chio̍h, chiū tī chûn-bé pha sì keng tiàⁿ, chhiat-chhiat ǹg-bāng thiⁿ kng.

30水手ài beh離開船逃走；放舢板落海，假做beh tùi船頭拋綻。Chúi-siú ài beh lī-khui chûn tô-cháu; pàng sam-pán lo̍h hái, ké-chòe beh tùi chûn-thâu pha tiàⁿ.

31保羅對百總kap兵丁講，Chiah-ê人無tiàm-tī船裡，lín bōe會得救。Pó-lô tùi pé-chóng kap peng-teng kóng, Chiah ê lâng bô tiàm tī chûn-ni̍h, lín bōe-ōe tit-kiù.

32兵丁就斬斷舢板ê索，chhut-chāi伊家己墜落。Peng-teng chiū chām-tn̄g sam-pán ê soh, chhut-chāi i ka-kī tūi-lo̍h.

33到天beh光，保羅勸眾人tio̍h食，講，Lín大家teh暸望，忍iau m̄成食，今á日是第十四日lah。Kàu thiⁿ beh kng, Pó-lô khǹg chèng lâng tio̍h chia̍h, kóng, Lín tāi-ke teh liâu bāng, lún iau m̄ chiâⁿ chia̍h, kin-á-ji̍t sī tē cha̍p-sì ji̍t lah.

34所以勸lín tio̍h食；這是關係lín ê得救，因為lín無一人會失落一支頭毛。Só͘-í khǹg lín tio̍h chia̍h; che sī koan-hē lín ê tit kiù, in-ūi lín bô chi̍t lâng ōe sit-lo̍h chi̍t ki thâu-mn̂g.

35講soah，the̍h餅，當眾人ê面前感謝上帝；peh破來食。Kóng soah, the̍h piáⁿ, tng chèng lâng ê bīn-chêng kám-siā Siōng-tè; peh-phòa lâi chia̍h.

36Tùi án-ni，眾人lóng安心，亦ta̍k-ê食。Tùi án-ni chèng lâng lóng an-sim, ia̍h ta̍k-ê chia̍h.

37阮tī船裡ê計共兩百七十六人。Goán tī chûn-ni̍h ê kè-kiōng nn̄g pah chhit cha̍p la̍k lâng.

38已經食飽，hiat麥落海，hō͘船khah輕。Í-keng chia̍h pá, hiat be̍h lo̍h hái, hō͘ chûn khah khin.

39到天光，m̄-bat hit-ê所在；獨獨看見一個海灣有沙坡，就saⁿ-kap計謀看能hō͘船lôe-chiūⁿ頂面á bōe。Kàu thiⁿ kng, m̄ bat hit ê só͘-chāi; to̍k-to̍k khòaⁿ-kìⁿ chi̍t ê hái-oan ū soa-pho, chiū saⁿ-kap kè-bô͘ khòaⁿ ōe hō͘ chûn lôe-chiūⁿ téng-bīn á bōe.

40就棄sak chiah-ê綻，放tī海裡，也 tháu開吊船舵ê索；起頭帆，hō͘伊食風，ǹg沙坡進前。Chiū khì-sak chiah ê tiàⁿ, pàng tī hái-ni̍h, iā tháu-khui tiàu chûn-tōa ê soh; khí thâu phâng, hō͘ i chia̍h hong, ǹg soa-pho chìn-chêng.

41Tú-tio̍h雙夾流ê位，船就khòa淺；船頭咬tiâu bōe振動，船尾hō͘大湧siak破。Tú-tio̍h siang-kiap lâu ê ūi, chûn chiū khòa chhián; chûn-thâu kā-tiâu bōe tín-tāng, chûn-bé hō͘ tōa éng siak phòa.

42兵丁ê意思beh thâi chiah-ê犯人，驚了有ê泅走。Peng-teng ê ì-sù beh thâi chiah ê hoān-lâng, kiaⁿ-liáu ū-ê siû cháu.

43獨獨百總ài救保羅，阻擋in所計謀；命令會泅ê人事先落水上山；To̍k-to̍k pé-chóng ài kiù Pó-lô, chó͘-tòng in só͘ kè-bô͘; bēng-lēng ōe siû ê lâng tāi-seng lo̍h chúi chiūⁿ soaⁿ;

44其餘ê人有ê用枋，有ê用船內ê物。Tùi án-ni，眾人lóng得救上山。kî-û ê lâng ū-ê ēng pang, ū-ê ēng chûn-lāi ê mi̍h. Tùi án-ni chèng lâng lóng tit kiù chiūⁿ soaⁿ.