1已經定tio̍h意思hō͘阮過海去意大利，就將保羅kap另外kúi-nā個犯人，交hō͘ Se-pa-sū-tok營ê百總，名Iû-liû。Í-keng tiāⁿ-tio̍h ì-sù hō͘ goán kè hái khì Í-tāi-lī, chiū chiong Pó-lô kap lēng-gōa kúi-nā ê hoān-lâng, kau hō͘ Se-pa-sū-tok iâⁿ ê pé-chóng, miâ Iû-liû.

2有A-tāi-bí-tiân ê船beh行到亞西亞海墘kúi-nā所在，阮就搭伊起身；有馬其頓ê帖撒羅尼迦人，A-lí-ta̍t-kó͘，kap阮去。Ū A-tāi-bí-tiân ê chûn beh kiâⁿ kàu A-se-a hái-kîⁿ kúi-nā só͘-chāi, goán chiū tah i khí-sin; ū Má-kî-tùn ê Thiap-sat-lô-nî-ka lâng, A-lí-ta̍t-kó͘, kap goán khì.

3隔日到Se-tùn；Iû-liû好款待保羅，准伊就近chiah-ê朋友，受in ê照應。Keh ji̍t kàu Se-tùn; Iû-liû hó khoán-thāi Pó-lô, chún i chiū-kūn chiah ê pêng-iú, siū in ê chiàu-èng.

4Tùi hia開船；因為對頭風ê緣故，就tùi居比路下勢經過。Tùi hia khui chûn; in-ūi tùi-thâu hong ê iân-kò͘, chiū tùi Ku-pí-lō͘ ē-sì keng-kè.

5已經過 Ki-lī-ka，Pông-hui-lī-a ê海，到Lū-ka ê Múi-lah。Í-keng kè Ki-lī-ka, Pông-hui-lī-a ê hái, kàu Lū-ka ê Múi-lah.

6Tī hia百總tú-tio̍h亞力山大ê船，beh去意大利ê，就kah阮搭伊。Tī hia pé-chóng tú-tio̍h A-le̍k-san-tāi ê chûn, beh khì Í-tāi-lī ê, chiū kah goán tah i.

7行真慢，chōe-chōe日chiah lím-á到Kek-nî-thó͘對面；因為風阻擋，就閃Kek-lí-tí下，tùi Sat-mô͘-nî 過；Kiâⁿ chin bān, chōe-chōe ji̍t chiah lím-á kàu Kek-nî-thó͘ tùi-bīn; in-ūi hong chó͘-tòng, chiū siám Kek-lí-tí ē, tùi Sat-mô͘-nî kè;

8lím-lím-á ōe-thang沿岸行到一所在，名Ka-ò；近chia有Lah-se-a ê城。lím-lím-á ōe thang iân hōaⁿ kiâⁿ kàu chi̍t só͘-chāi, miâ Ka-ò; kūn chia ū Lah-se-a ê siâⁿ.

9歷過chōe-chōe日，禁食ê期已經過，行船危險，保羅勸in講，Le̍k-kè chōe-chōe ji̍t, kìm-chia̍h ê kî í-keng kè, kiâⁿ chûn gûi-hiám, Pó-lô khǹg in kóng,

10大家ah，我看chit pái行船，m̄-nā貨物kap船，連咱ê性命亦beh受害kap大損失。Tāi-ke ah, góa khòaⁿ chit pái kiâⁿ chûn, m̄ nā hè-mi̍h kap chûn, liân lán ê sìⁿ-miā ia̍h beh siū hāi kap tōa sún-sit.

11但是百總信舵工kap船主，khah過頭tī保羅所講ê。Nā-sī pé-chóng sìn tāi-kong kap chûn-chú, khah kè-thâu tī Pó-lô só͘ kóng ê.

12Koh tī chit-ê垵澳過冬天m̄利便；大半ê人想ài開船離開chia，看ōe-thang到腓尼基過冬天；hit位就是Kek-lí-tí一個垵澳，一面ǹg東南，一面ǹg東北。Koh tī chit ê oaⁿ-ù kè tang-thiⁿ m̄ lī-piān; tōa pòaⁿ ê lâng siūⁿ ài khui chûn lī-khui chia, khòaⁿ ōe thang kàu Hui-nî-ki kè tang-thiⁿ; hit ūi chiū-sī Kek-lí-tí chi̍t ê oaⁿ-ù, chi̍t bīn ǹg tang-lâm, chi̍t bīn ǹg tang-pak.

13Chit時南風微微á來，眾人掠做得意，就起綻，óa Kek-lí-tí岸來行。Chit sî lâm hong bî-bî-á lâi, chèng lâng lia̍h chòe tek-ì, chiū khí tiàⁿ, óa Kek-lí-tí hōaⁿ lâi kiâⁿ.

14無jōa久，狂風tùi海嶼頂phah落來；hit-ê風名Iú-lah-ku-lûn；Bô jōa kú, kông hong tùi hái-sū téng phah lo̍h-lâi; hit ê hong miâ Iú-lah-ku-lûn;

15船hō͘風掃，chih載bōe-tiâu，就chhut-chāi伊漂流。chûn hō͘ hong sàu, chih-chài bōe tiâu, chiū chhut-chāi i phiau-liû.

16駛到小海嶼下，名叫Ko-tāi lím-lím能收舢板起來。Sái kàu sió hái-sū ē, miâ kiò Ko-tāi lím-lím ōe siu sam-pán khí-lâi.

17舢板已經收起來，就用方法綑縛船底，koh驚了khòa-tio̍h Sài-ní-tí ê沙汕，就落帆，hō͘風押去。Sam-pán í-keng siu-khí-lâi, chiū ēng hong-hoat khún-pa̍k chûn-tóe, koh kiaⁿ-liáu khòa-tio̍h Sài-ní-tí ê soa-sòaⁿ, chiū lo̍h phâng, hō͘ hong ah[a̍h]-khì.

18阮hō͘風湧大搖簸，隔日in就用貨物hiat落海；Goán hō͘ hong éng tōa iô-pòa, keh ji̍t in chiū ēng hè-mi̍h hiat-lo̍h hái;

19第三日koh親手hiat-ka̍k船裡ê器具。tē saⁿ ji̍t koh chhin chhiú hiat-ka̍k chûn-ni̍h ê khì-kū.

20日kap星chōe-chōe日無出現，koh hō͘ 風湧phah不止thiám，阮得救ê ǹg望就lóng無lah。Ji̍t kap chhiⁿ chōe-chōe ji̍t bô chhut-hiān, koh hō͘ hong éng phah put-chí thiám, goán tit kiù ê ǹg-bāng chiū lóng bô lah.

21眾人久久無食，保羅khiā tī in中間，講，大家ah，lín前tio̍h聽我ê話，莫得開船離開Kek-lí-tí，來tú-tio̍h chit號傷害kap損失。Chèng lâng kú-kú bô chia̍h, Pó-lô khiā tī in tiong-kan, kóng, Tāi-ke ah, lín chêng tio̍h thiaⁿ góa ê ōe, bo̍h-tit khui chûn lī-khui Kek-lí-tí, lâi tú-tio̍h chit hō siong-hāi kap sún-sit.

22Taⁿ我勸lín安心；因為lín中間無一人會失落性命，獨獨失落船nā-tiāⁿ。Taⁿ góa khǹg lín an-sim; in-ūi lín tiong-kan bô chi̍t lâng ōe sit-lo̍h sìⁿ-miā, to̍k-to̍k sit-lo̍h chûn nā-tiāⁿ.

23因為我所屬，所服事ê上帝，伊ê天使昨暝khiā tī我身邊，講，保羅，m̄免驚；In-ūi góa só͘ sio̍k, só͘ ho̍k-sāi ê Siōng-tè, I ê thiⁿ-sài chā-mî khiā tī góa sin-piⁿ, kóng, Pó-lô, m̄ bián kiaⁿ;

24你的確tio̍h khiā tī該撒ê面前；看ah，上帝用船內ê人lóng總賞賜你。lí tek-khak tio̍h khiā tī Kai-sat ê bīn-chêng; khòaⁿ ah, Siōng-tè ēng chûn-lāi ê lâng lóng-chóng siúⁿ-sù lí.

25所以大家ah，lín tio̍h安心；因為我信上帝，tāi-chì teh-beh照伊所kā我講ê。Só͘-í tāi-ke ah, lín tio̍h an-sim; in-ūi góa sìn Siōng-tè, tāi-chì teh-beh chiàu I só͘ kā góa kóng ê.

26但是咱chiah-ê的確khòa tī一個海嶼。Nā-sī lán chiah-ê tek-khak khòa tī chi̍t ê hái-sū.

27到第十四暝，阮漂流tī A-tí-a海，約略半暝，水手掠做近山；Kàu tē cha̍p-sì mî, goán phiau-liû tī A-tí-a hái, iok-lio̍k pòaⁿ mî, chúi-siú lia̍h-chòe kūn soaⁿ;

28phah水tô，得tio̍h二十siâm；略略á進前，koh phah水tô，得tio̍h十五siâm。phah chúi-tô, tit-tio̍h jī-cha̍p siâm; lio̍h-lio̍h-á chìn-chêng, koh phah chúi-tô, tit-tio̍h cha̍p-gō͘ siâm.

29驚了lôe-tio̍h石，就tī船尾拋四弓綻，切切ǹg望天光。Kiaⁿ-liáu lôe-tio̍h chio̍h, chiū tī chûn-bé pha sì keng tiàⁿ, chhiat-chhiat ǹg-bāng thiⁿ kng.

30水手ài beh離開船逃走；放舢板落海，假做beh tùi船頭拋綻。Chúi-siú ài beh lī-khui chûn tô-cháu; pàng sam-pán lo̍h hái, ké-chòe beh tùi chûn-thâu pha tiàⁿ.

31保羅對百總kap兵丁講，Chiah-ê人無tiàm-tī船裡，lín bōe會得救。Pó-lô tùi pé-chóng kap peng-teng kóng, Chiah ê lâng bô tiàm tī chûn-ni̍h, lín bōe-ōe tit-kiù.

32兵丁就斬斷舢板ê索，chhut-chāi伊家己墜落。Peng-teng chiū chām-tn̄g sam-pán ê soh, chhut-chāi i ka-kī tūi-lo̍h.

33到天beh光，保羅勸眾人tio̍h食，講，Lín大家teh暸望，忍iau m̄成食，今á日是第十四日lah。Kàu thiⁿ beh kng, Pó-lô khǹg chèng lâng tio̍h chia̍h, kóng, Lín tāi-ke teh liâu bāng, lún iau m̄ chiâⁿ chia̍h, kin-á-ji̍t sī tē cha̍p-sì ji̍t lah.

34所以勸lín tio̍h食；這是關係lín ê得救，因為lín無一人會失落一支頭毛。Só͘-í khǹg lín tio̍h chia̍h; che sī koan-hē lín ê tit kiù, in-ūi lín bô chi̍t lâng ōe sit-lo̍h chi̍t ki thâu-mn̂g.

35講soah，the̍h餅，當眾人ê面前感謝上帝；peh破來食。Kóng soah, the̍h piáⁿ, tng chèng lâng ê bīn-chêng kám-siā Siōng-tè; peh-phòa lâi chia̍h.

36Tùi án-ni，眾人lóng安心，亦ta̍k-ê食。Tùi án-ni chèng lâng lóng an-sim, ia̍h ta̍k-ê chia̍h.

37阮tī船裡ê計共兩百七十六人。Goán tī chûn-ni̍h ê kè-kiōng nn̄g pah chhit cha̍p la̍k lâng.

38已經食飽，hiat麥落海，hō͘船khah輕。Í-keng chia̍h pá, hiat be̍h lo̍h hái, hō͘ chûn khah khin.

39到天光，m̄-bat hit-ê所在；獨獨看見一個海灣有沙坡，就saⁿ-kap計謀看能hō͘船lôe-chiūⁿ頂面á bōe。Kàu thiⁿ kng, m̄ bat hit ê só͘-chāi; to̍k-to̍k khòaⁿ-kìⁿ chi̍t ê hái-oan ū soa-pho, chiū saⁿ-kap kè-bô͘ khòaⁿ ōe hō͘ chûn lôe-chiūⁿ téng-bīn á bōe.

40就棄sak chiah-ê綻，放tī海裡，也 tháu開吊船舵ê索；起頭帆，hō͘伊食風，ǹg沙坡進前。Chiū khì-sak chiah ê tiàⁿ, pàng tī hái-ni̍h, iā tháu-khui tiàu chûn-tōa ê soh; khí thâu phâng, hō͘ i chia̍h hong, ǹg soa-pho chìn-chêng.

41Tú-tio̍h雙夾流ê位，船就khòa淺；船頭咬tiâu bōe振動，船尾hō͘大湧siak破。Tú-tio̍h siang-kiap lâu ê ūi, chûn chiū khòa chhián; chûn-thâu kā-tiâu bōe tín-tāng, chûn-bé hō͘ tōa éng siak phòa.

42兵丁ê意思beh thâi chiah-ê犯人，驚了有ê泅走。Peng-teng ê ì-sù beh thâi chiah ê hoān-lâng, kiaⁿ-liáu ū-ê siû cháu.

43獨獨百總ài救保羅，阻擋in所計謀；命令會泅ê人事先落水上山；To̍k-to̍k pé-chóng ài kiù Pó-lô, chó͘-tòng in só͘ kè-bô͘; bēng-lēng ōe siû ê lâng tāi-seng lo̍h chúi chiūⁿ soaⁿ;

44其餘ê人有ê用枋，有ê用船內ê物。Tùi án-ni，眾人lóng得救上山。kî-û ê lâng ū-ê ēng pang, ū-ê ēng chûn-lāi ê mi̍h. Tùi án-ni chèng lâng lóng tit kiù chiūⁿ soaⁿ.

1阮已經得tio̍h救，就知hit-ê海嶼名叫Bí-lī-tāi。Goán í-keng tit-tio̍h kiù, chiū chai hit ê hái-sū miâ kiò Bí-lī-tāi.

2番人用罕得有ê仁愛款待阮；因為落雨koh寒，in就起火，接納阮眾人。Hoan-lâng ēng hán-tit ū ê jîn-ài khoán-thāi goán; in-ūi lo̍h hō͘ koh kôaⁿ, in chiū khí hé, chiap-la̍p goán chèng lâng.

3保羅拾柴一把，hē tī火裡；有毒蛇，因為火熱，chông出來，咬tiâu tī伊ê手。Pó-lô khioh chhâ chi̍t pé, hē tī hé-ni̍h; ū to̍k chôa, in-ūi hé jia̍t, chông-chhut-lâi, kā-tiâu tī i ê chhiú.

4番人看見毒物tiâu tī伊ê手，就saⁿ-kap講，Chit-ê人的確是兇手，雖bóng海裡得tio̍h救，天理 bōe容允伊活。Hoan-lâng khòaⁿ-kìⁿ to̍k mi̍h tiâu tī i ê chhiú, chiū saⁿ-kap kóng, Chit ê lâng tek-khak sī hiong-siú, sui-bóng hái-ni̍h tit-tio̍h kiù, Thian-lí bōe iông-ún i oa̍h.

5保羅pōaⁿ毒物tī火裡，lóng無受傷。Pó-lô pōaⁿ to̍k mi̍h tī hé-ni̍h, lóng bô siū siong.

6番人thèng候伊腫，á是忽然死，跋倒；thèng候久久，看見伊無tāi-chì，就反tńg phah算講伊是神明。Hoan-lâng thèng-hāu i chéng, á-sī hut-jiân sí, poa̍h-tó; thèng-hāu kú-kú, khòaⁿ-kìⁿ i bô tāi-chì, chiū hoán-tńg phah-sǹg kóng i sī sîn-bêng.

7海嶼ê頭人，名Pō͘-pek-liû，有田園近tī hia；伊接納阮，三日久好禮相款待。Hái-sū ê thâu-lâng, miâ Pō͘-pek-liû, ū chhân-hn̂g kūn tī hia; i chiap-la̍p goán, saⁿ ji̍t kú hó-lé saⁿ khoán-thāi.

8Tú-tio̍h Pō͘-pek-liû ê老父有熱病kap做痢，倒teh；保羅入去就近伊，祈禱，kā伊按手，醫好伊。Tú-tio̍h Pō͘-pek-liû ê lāu-pē ū jia̍t-pīⁿ kap chòe-lī, tó-teh; Pó-lô ji̍p-khì chiū-kūn i, kî-tó, kā i hōaⁿ chhiú, i-hó i.

9Tùi án-ni，海嶼中其餘ê破病人亦來得tio̍h醫好；Tùi án-ni hái-sū tiong kî-û ê phòa-pīⁿ lâng ia̍h lâi tit-tio̍h i-hó;

10in也用chōe-chōe禮數尊敬阮；開船ê時，將所欠用ê，送到船裡。in iā ēng chōe-chōe lé-sò͘ chun-kèng goán; khui chûn ê sî, chiong só͘ khiàm-ēng ê, sàng kàu chûn-ni̍h.

11過三月日，阮搭亞力山大ê船起身，hit隻船號做Tiu-sū ê雙生kiáⁿ，是tī chit-ê海嶼過冬天ê。Kè saⁿ ge̍h ji̍t, goán tah A-le̍k-san-tāi ê chûn khí-sin, hit chiah chûn hō chòe Tiū-su ê Siang-siⁿ-kiáⁿ, sī tī chit ê hái-sū kè tang-thiⁿ ê.

12到Sū-lah-kó͘拋teh；阮tiàm hia三日。Kàu Sū-lah-kó͘ pha-teh; goán tiàm hia saⁿ ji̍t.

13Tùi hia se̍h到Lī-kî-ong；過一日南風起，第二日到Pō͘-tiu-lī；Tùi hia se̍h kàu Lī-kî-ong; kè chi̍t ji̍t lâm hong khí, tē jī ji̍t kàu Pō͘-tiu-lī;

14tī hia tú-tio̍h兄弟，請阮saⁿ-kap tiàm 七日；就到羅馬。tī hia tú-tio̍h hiaⁿ-tī, chhiáⁿ goán saⁿ-kap tiàm chhit ji̍t; chiū kàu Lô-má.

15羅馬ê兄弟聽見阮ê消息，就tùi hia來到A-pí-o͘市，kap Sam-koán ê所在，chih接阮；保羅看見in，感謝上帝，就壯膽。Lô-má ê hiaⁿ-tī thiaⁿ-kìⁿ goán ê siau-sit, chiū tùi hia lâi kàu A-pí-o͘ chhī, kap Sam-koán ê só͘-chāi, chih-chiap goán; Pó-lô khòaⁿ-kìⁿ in, kám-siā Siōng-tè, chiū chòng-táⁿ.

16已經入羅馬，准保羅kap一個看守伊ê兵另外tòa。Í-keng ji̍p Lô-má, chún Pó-lô kap chi̍t ê khàn-siú i ê peng lēng-gōa tòa.

17過三日，保羅請猶太人ê序大來相會；已經聚集，就對in講，兄弟ah，我雖然未bat患tio̍h咱ê百姓，á是列祖ê規例，但是tùi耶路撒冷受縛，送交羅馬人ê手；Kè saⁿ ji̍t, Pó-lô chhiáⁿ Iû-thài lâng ê sī-tōa lâi siong-hōe; í-keng chū-chi̍p, chiū tùi in kóng, Hiaⁿ-tī ah, góa sui-jiân bē bat hoān-tio̍h lán ê peh-sìⁿ, á-sī lia̍t-chó͘ ê kui-lē, nā-sī tùi Iâ-lō͘-sat-léng siū pa̍k, sàng-kau Lô-má lâng ê chhiú;

18in已經審判我，看我無死罪，就ài放我。in í-keng sím-phòaⁿ góa, khòaⁿ góa bô sí chōe, chiū ài pàng góa.

19獨獨猶太人反對，我不得已對該撒告御狀，lóng m̄是有因端beh告我ê百姓。To̍k-to̍k Iû-thài lâng hoán-tùi, góa put-tek-í tùi Kai-sat kò gū-chn̄g, lóng m̄ sī ū in-toaⁿ beh kò góa ê peh-sìⁿ.

20因為án-ni chiah請lín來相見，saⁿ-kap議論；是我為tio̍h以色列所ǹg望ê，chiah受chit-ê鎖鏈綑縛。In-ūi án-ni chiah chhiáⁿ lín lâi saⁿ-kìⁿ, saⁿ-kap gī-lūn; sī góa ūi-tio̍h Í-sek-lia̍t só͘ ǹg-bāng ê, chiah siū chit ê só-liān khún-pa̍k.

21In對伊講，阮未bat tùi猶太接tio̍h phoe講到你ê事，也 未有甚麼兄弟到chia通報，á是講你有甚麼pháiⁿ。In tùi i kóng, Goán bē bat tùi Iû-thài chih-tio̍h phoe kóng kàu lí ê sū, iā bē ū sím-mi̍h hiaⁿ-tī kàu chia thong-pò, á-sī kóng lí ū sím-mi̍h pháiⁿ.

22獨獨阮ài聽你ê意見怎樣；因為chit-ê 黨，阮知ta̍k所在hō͘人嫌。To̍k-to̍k goán ài thiaⁿ lí ê ì-kiàn cháiⁿ-iūⁿ; in-ūi chit ê tóng, goán chai ta̍k só͘-chāi hō͘ lâng hiâm.

23In已經kap伊定tio̍h日期，chōe-chōe人就近伊tī伊歇ê厝；保羅tùi早起到ê-hng排列來證明上帝ê國，引摩西ê律法，kap chiah-ê先知，用耶穌ê事苦勸in。In í-keng kap i tiāⁿ-tio̍h ji̍t-kî, chōe-chōe lâng chiū-kūn i tī i hioh ê chhù; Pó-lô tùi chá-khí kàu ê-hng pâi-lia̍t lâi chèng-bêng Siōng-tè ê kok, ín Mô͘-se ê lu̍t-hoat, kap chiah ê sian-ti, ēng Iâ-so͘ ê sū khó͘-khǹg in.

24伊所講ê，有ê信，有ê m̄信。I só͘ kóng ê, ū-ê sìn, ū-ê m̄ sìn.

25兩pêng bōe相合，就四散；保羅事先講一句話，講，聖神用先知以賽亞ê嘴，kā lín ê列祖所講ê話是真tio̍h，Nn̄g pêng bōe saⁿ-ha̍p, chiū sì-sòaⁿ; Pó-lô tāi-seng kóng chi̍t kù ōe, kóng, Sèng Sîn ēng sian-ti Í-sài-a ê chhùi, kā lín ê lia̍t-chó͘ só͘ kóng ê ōe sī chin tio̍h,

26去kā chit-ê百姓講， Lín聽是beh聽，也 lóng bōe曉悟； Lín看是beh看，也看lóng bōe見；Khì kā chit ê peh-sìⁿ kóng, Lín thiaⁿ sī beh thiaⁿ, iā lóng bōe hiáu-ngō͘; Lín khòaⁿ sī beh khòaⁿ, iā khòaⁿ lóng bōe kìⁿ;

27因為chit-ê百姓心鈍， 耳孔重， 目睭放khoeh； 驚了in用目睭看見， 用耳孔聽見， 用心曉悟， 來oa̍t-lìn-tńg， 我就醫好in。In-ūi chit ê peh-sìⁿ sim tūn, Hī-khang tāng, Ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi oa̍t-lìn-tńg, Góa chiū i-hó in.

28所以lín tio̍h知，上帝chit-ê拯救已經施行外邦，in亦beh聽受。Só͘-í lín tio̍h chai, Siōng-tè chit ê chín-kiù í-keng si-hêng gōa-pang, in ia̍h beh thiaⁿ-siū.

29(Ū ê pán-pún ū 29 chat: Pó-lô kóng chiah-ê ōe liáu-āu, hiah-ê Iû-thài-lâng gī-lūn hun-hun, chiū lī-khui khì.)(Ū ê pán-pún ū 29 chat: Pó-lô kóng chiah-ê ōe liáu-āu, hiah-ê Iû-thài-lâng gī-lūn hun-hun, chiū lī-khui khì.)

30保羅khiā家己稅ê厝兩年久；凡若入來見伊ê，伊lóng接納in，Pó-lô khiā ka-kī sè ê chhù nn̄g nî kú; hoān-nā ji̍p lâi kìⁿ i ê, i lóng chiap-la̍p in,

31傳上帝ê國，將主耶穌基督ê tāi-chì真好膽教示人，無人禁伊。thoân Siōng-tè ê kok, chiong Chú Iâ-so͘ Ki-tok ê tāi-chì chin hó-táⁿ kà-sī lâng, bô lâng kìm i.

1耶穌基督ê奴僕保羅，受召做使徒，分別伊來傳上帝ê福音，Iâ-so͘ Ki-tok ê lô͘-po̍k Pó-lô, siū tiàu chòe sù-tô͘, hun-piat i lâi thoân Siōng-tè ê hok-im,

2就是上帝從前託伊chiah-ê先知tī聖經所應允ê，chiū-sī Siōng-tè chiông-chiân thok I chiah ê sian-ti tī sèng-keng só͘ èng-ún ê,

3論伊ê Kiáⁿ，照肉體是tùi大衛ê後裔生ê，lūn I ê Kiáⁿ, chiàu jio̍k-thé sī tùi Tāi-pi̍t ê hō͘-è siⁿ ê,

4照聖德ê神就tùi死人ê koh活，用權能顯明伊是上帝ê Kiáⁿ，chiàu sèng-tek ê Sîn chiū tùi sí-lâng ê koh-oa̍h, ēng koân-lêng hián-bêng I sī Siōng-tè ê Kiáⁿ,

5就是咱ê主耶穌基督：阮對伊受恩kap使徒ê職，beh為tio̍h伊ê名hō͘人tī萬邦中信來順thàn；chiū-sī lán ê Chú Iâ-so͘ Ki-tok: goán tùi I siū un kap sù-tô͘ ê chit, beh ūi-tio̍h I ê miâ hō͘ lâng tī bān pang tiong sìn lâi sūn-thàn;

6從中也有lín chiah-ê受召屬耶穌基督ê：chiông-tiong iā ū lín chiah-ê siū tiàu sio̍k Iâ-so͘ Ki-tok ê:

7phoe寄hō͘見若tòa tī羅馬，上帝所疼，受召做聖徒ê；願lín對咱ê父上帝kap主耶穌基督得tio̍h恩典平安。phoe kià hō͘ kìⁿ-nā tòa tī Lô-má, Siōng-tè só͘ thiàⁿ, siū tiàu chòe sèng-tô͘ ê; goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

8頭一項，因為lín ê信報揚tī thong世間，所以我對耶穌基督為tio̍h lín眾人感謝我ê上帝。Thâu chi̍t hāng, in-ūi lín ê sìn pò-iông tī thong sè-kan, só͘-í góa tùi Iâ-so͘ Ki-tok ūi-tio̍h lín chèng lâng kám-siā góa ê Siōng-tè.

9因為我tī伊ê Kiáⁿ ê福音，用我ê神所服事ê上帝做我ê干證，我怎樣siàu念lín無soah，In-ūi góa tī I ê Kiáⁿ ê hok-im ēng góa ê sîn só͘ ho̍k-sāi ê Siōng-tè chòe góa ê kan-chèng, góa cháiⁿ-iūⁿ siàu-liām lín bô soah,

10祈禱ê中間常常求，看chit-tia̍p有thang照上帝ê旨意得tio̍h平坦ê路就近lín。kî-tó ê tiong-kan siông-siông kiû, khòaⁿ chit tia̍p ū thang chiàu Siōng-tè ê chí-ì tit-tio̍h pîⁿ-tháⁿ ê lō͘ chiū-kūn lín.

11因為我欣慕見tio̍h lín，thang將神靈ê恩賜分hō͘ lín，hō͘ lín堅固；In-ūi góa him-bō͘ kìⁿ-tio̍h lín, thang chiong sîn-lêng ê un-sù pun hō͘ lín, hō͘ lín kian-kò͘;

12就是我tī lín中間，lín對我ê信，我tùi lín ê信，大家得tio̍h安慰。chiū-sī góa tī lín tiong-kan, lín tùi góa ê sìn, góa tùi lín ê sìn, tāi-ke tit-tio̍h an-ùi.

13兄弟ah，我m̄-ài lín m̄知我chōe-chōe pái立志beh就近lín，ài tī lín中間得tio̍h果子親像tī其餘ê外邦；總是到taⁿ iáu有阻擋。Hiaⁿ-tī ah, góa m̄ ài lín m̄ chai góa chōe-chōe pái li̍p-chì beh chiū-kūn lín, ài tī lín tiong-kan tit-tio̍h ké-chí chhin-chhiūⁿ tī kî-û ê gōa-pang; chóng-sī kàu taⁿ iáu ū chó͘-tòng.

14無論希利尼人á是番人，聰明ê á是愚戇ê，我lóng欠in ê債。Bô lūn Hi-lī-nî lâng á-sī hoan-lâng, chhang-miâ ê á-sī gû-gōng ê, góa lóng khiàm in ê chè.

15所以在tī我lóng便便，beh用福音續傳hō͘ lín tòa tī羅馬ê人。Só͘-í chāi-tī góa lóng piān-piān, beh ēng hok-im sòa thoân hō͘ lín tòa tī Lô-má ê lâng.

16因為我無掠福音做見笑，因為是上帝ê權能beh救lóng總信ê人，事先猶太，後來希利尼。In-ūi góa bô lia̍h hok-im chòe kiàn-siàu, in-ūi sī Siōng-tè ê koân-lêng beh kiù lóng-chóng sìn ê lâng, tāi-seng Iû-thài, āu-lâi Hi-lī-nî.

17因為tī福音ê內面有顯明上帝ê義，tùi信到tī信；照聖經所記載講，義ê人beh tùi信來活。In-ūi tī hok-im ê lāi-bīn ū hián-bêng Siōng-tè ê gī, tùi sìn kàu tī sìn; chiàu sèng-keng só͘ kì-chài kóng, Gī ê lâng beh tùi sìn lâi oa̍h.

18因為上帝ê受氣對天顯明，到tī人lóng總ê不虔不義，就是用不義壓制真理ê人ê；In-ūi Siōng-tè ê siū-khì tùi thiⁿ hián-bêng, kàu tī lâng lóng-chóng ê put-khiân put-gī, chiū-sī ēng put-gī ap-chè chin-lí ê lâng ê;

19因為論到上帝，人所thang bat伊ê，有顯明tī in ê心內；因為上帝bat顯明指示in；in-ūi lūn-kàu Siōng-tè, lâng só͘ thang bat I ê, ū hián-bêng tī in ê sim-lāi; in-ūi Siōng-tè bat hián-bêng chí-sī in;

20因為tùi創造世間以來，上帝永遠ê權能kap聖質，凡所bōe看見伊ê，tùi受創造ê物，想了就明明看見；hō͘ in無路thang推託。in-ūi tùi chhòng-chō sè-kan í-lâi, Siōng-tè éng-oán ê koân-lêng kap sèng-chit, hoān só͘ bōe khòaⁿ-kìⁿ I ê, tùi siū chhòng-chō ê mi̍h, siūⁿ-liáu chiū bêng-bêng khòaⁿ-kìⁿ; hō͘ in bô lō͘ thang the-thok.

21因為in既然bat上帝，但是無榮光伊做上帝，亦無感謝伊；就是in ê思想變做空空，in ê bōe曉悟ê心變做烏暗；In-ūi in kì-jiân bat Siōng-tè, nā-sī bô êng-kng I chòe Siōng-tè, ia̍h bô kám-siā I; chiū-sī in ê su-siūⁿ pìⁿ-chòe khang-khang, in ê bōe hiáu-ngō͘ ê sim pìⁿ chòe o͘-àm;

22家己稱做知識，反tńg做戇，ka-kī chheng chòe tì-sek, hoán-tńg chòe gōng,

23將bōe敗壞ê上帝ê榮光來換會敗壞ê人kap禽獸、蟲thōa chiah-ê像ê款式。chiong bōe pāi-hoāi ê Siōng-tè ê êng-kng lâi ōaⁿ ōe pāi-hoāi ê lâng kap khîm-siù thâng-thōa chiah ê siōng ê khoán-sit.

24所以照in心內ê私慾，上帝交付in tī無清氣，hō͘ in ê身軀相凌辱；Só͘-í chiàu in sim-lāi ê su-io̍k, Siōng-tè kau-hù in tī bô chheng-khì, hō͘ in ê seng-khu saⁿ lêng-jio̍k;

25in用上帝ê真換做假，敬拜服事受造ê物，khah過頭tī造物ê主；伊是堪得o-ló到代代ê。À-bēng。in ēng Siōng-tè ê chin ōaⁿ chòe ké, kèng-pài ho̍k-sāi siū chō ê mi̍h, khah kè-thâu tī chō mi̍h ê Chú; I sī kham-tit o-ló kàu tāi-tāi ê. À-bēng.

26因為án-ni，上帝交付in tī見笑ê情；in ê婦人人用順性ê路用變做逆性ê路用；In-ūi án-ni, Siōng-tè kau-hù in tī kiàn-siàu ê chêng; in ê hū-jîn-lâng ēng sūn-sèng ê lō͘-ēng pìⁿ chòe ge̍k-sèng ê lō͘-ēng;

27ta-po͘人也án-ni放sak婦人人順性ê路用，相意愛，慾火動心，ta-po͘ kap ta-po͘行無正經ê事；tī in本身受in ê差謬所應該tú-tio̍h ê報應。ta-po͘-lâng iā án-ni pàng-sak hū-jîn-lâng sūn-sèng ê lō͘-ēng, saⁿ ì-ài, io̍k-hé tōng-sim, ta-po͘ kap ta-po͘ kiâⁿ bô chèng-keng ê sū; tī in pún-sin siū in ê chha-biū só͘ eng-kai tú-tio̍h ê pò-èng.

28In既然m̄肯存上帝tī in ê心思，上帝交付in tī不重用ê心，行m̄合宜ê事，In kì-jiân m̄ khéng chûn Siōng-tè tī in ê sim-su, Siōng-tè kau-hù in tī put-tiòng-iōng ê sim, kiâⁿ m̄ ha̍p-gî ê sū,

29充滿lóng總ê不義、pháiⁿ tāi、貪心、惡毒、滿滿怨妒、行兇、相爭、奸詐、臭心行，chhiong-móa lóng-chóng ê put-gī, pháiⁿ tāi, tham-sim, ok-to̍k, móa-móa oàn-tò͘, hêng-hiong, saⁿ-chiⁿ, kan-chà, chhàu-sim-hēng,

30做講ka-chiah-後話ê、譭謗ê、怨恨上帝ê、侮慢ê、驕傲ê、phín-phóng ê、造作pháiⁿ tāi ê、忤逆父母ê、chòe kóng ka-chiah-āu ōe ê, húi-pòng ê, oàn-hūn Siōng-tè ê, bú-bān ê, kiau-ngō͘ ê, phín-phóng ê, chō-chok pháiⁿ tāi ê, ngó͘-ge̍k pē-bú ê,

31無明理ê、無守約ê、無親人情ê、無憐憫ê。bô bêng-lí ê, bô siú iok ê, bô chhin-lâng-chêng ê, bô lîn-bín ê.

32In既然知上帝ê擬斷行chiah-ê tāi-chì ê人應該死，就m̄-nā家己行，koh別人行，in也kap in歡喜。In kì-jiân chai Siōng-tè ê gí-toàn kiâⁿ chiah ê tāi-chì ê lâng eng-kai sí, chiū m̄ nā ka-kī kiâⁿ, koh pa̍t lâng kiâⁿ, in iā kap in hoaⁿ-hí.