1五旬節ê期已經到，in lóng聚集tī一所在。Gō͘-sûn-choeh ê kî í-keng kàu, in lóng chū-chi̍p tī chi̍t só͘-chāi.

2忽然tùi天有聲，親像大風teh吹，充滿in所坐kui間ê厝。Hut-jiân tùi thiⁿ ū siaⁿ, chhin-chhiūⁿ tōa hong teh chhe, chhiong-móa in só͘ chē kui-keng ê chhù.

3就有teh分開ê舌，出現hō͘ in看見，親像火ê舌，歇tī ta̍k人ê頂面。Chiū ū teh hun-khui ê chi̍h, chhut-hiān hō͘ in khòaⁿ-kìⁿ, chhin-chhiūⁿ hé ê chi̍h, hioh tī ta̍k lâng ê téng-bīn.

4In lóng受聖神充滿，chiah開嘴講別樣ê腔口，是照聖神所賞賜in講ê。In lóng siū Sèng Sîn chhiong-móa, chiah khui chhùi kóng pa̍t iūⁿ ê khiuⁿ-kháu, sī chiàu Sèng Sîn só͘ siúⁿ-sù in kóng ê.

5Hit時有虔誠ê猶太人，tùi天下ta̍k國來ê，tòa tī耶路撒冷。Hit sî ū khiân-sêng ê Iû-thài lâng, tùi thiⁿ-ē ta̍k kok lâi ê, tòa tī Iâ-lō͘-sat-léng.

6Chit-ê聲一下起，眾人聚集紛紛亂亂，因為ta̍k人聽見in照伊家己ê土腔來講。Chit ê siaⁿ chi̍t ē khí, chèng lâng chū-chi̍p hun-hun loān-loān, in-ūi ta̍k lâng thiaⁿ-kìⁿ in chiàu i ka-kī ê thó͘-khiuⁿ lâi kóng.

7就lóng gông-ngia̍h奇怪，講，你看，chiah-ê teh講ê kiám無一概是加利利人mah？Chiū lóng gông-ngia̍h kî-koài, kóng, Lí khòaⁿ, chiah ê teh kóng ê kiám bô it-khài sī Ka-lī-lī lâng mah?

8怎樣咱聽in講照咱ta̍k人所出世ê土腔ah？Cháiⁿ-iūⁿ lán thiaⁿ in kóng chiàu lán ta̍k lâng só͘ chhut-sì ê thó͘-khiuⁿ ah?

9咱chiah-ê Phàⁿ-th ê-a人、Bí-thài人、Í-lân人，kap tiàm-tī Bí-só͘-pho-tāi-bí，猶太kap Ka-phàⁿ-to-ka，Pún-to͘ kap亞西亞，Lán chiah ê Phàⁿ-thê-a lâng, Bí-thài lâng, Í-lân lâng, kap tiàm-tī Bí-só͘-pho-tāi-bí, Iû-thài kap Ka-phàⁿ-to-ka, Pún-to͘ kap A-se-a,

10Hut-lū-ka kap Pông-hui-lī-a，埃及近óa 古利奈 ê Lū-pí-a，chiah-ê地方ê人，以及tùi羅馬來ê出外人，Hut-lū-ka kap Pông-hui-lī-a, Ai-ki̍p kūn-óa Kó͘-lī-nāi ê Lū-pí-a, chiah ê tōe-hng ê lâng, í-ki̍p tùi Lô-má lâi ê chhut-gōa lâng,

11有ê是猶太人，有ê是入猶太教ê人、Kek-lí-tí人、A-lat-pek人，lóng聽in用咱ê腔口來講上帝ê大事。ū-ê sī Iû-thài lâng, ū-ê sī ji̍p Iû-thài kàu ê lâng, Kek-lí-tí lâng, A-lat-pek lâng, lóng thiaⁿ in ēng lán ê khiuⁿ-kháu lâi kóng Siōng-tè ê tōa sū.

12就lóng gông-ngia̍h躊躇，saⁿ-kap講，這甚麼意思？Chiū lóng gông-ngia̍h tiû-tû, saⁿ-kap kóng, Che sím-mi̍h ì-sù?

13亦有別人恥笑in講，in是lim新酒teh醉。Ia̍h ū pa̍t lâng thí-chhiò in kóng, In sī lim sin chiú teh chùi.

14總是彼得kap十一個使徒khiā-teh，大聲kā in講，猶太人，kap lóng總khiā起tī耶路撒冷ê百姓ah，lín tio̍h知chit-ê，亦tio̍h致意聽我ê話。Chóng-sī Pí-tek kap cha̍p-it ê sù-tô͘ khiā-teh, tōa siaⁿ kā in kóng, Iû-thài lâng, kap lóng-chóng khiā-khí tī Iâ-lō͘-sat-léng ê peh-sìⁿ ah, lín tio̍h chai chit-ê, ia̍h tio̍h tì-ì thiaⁿ góa ê ōe.

15Chiah-ê人m̄是酒醉，親像lín所phah算；因為chit-tia̍p tú-chiah頂晡九點鐘：Chiah ê lâng m̄ sī chiú-chùi, chhin-chhiūⁿ lín só͘ phah-sǹg; in-ūi chit tia̍p tú-chiah téng-po͘ káu tiám cheng:

16這就是託先知約珥所講ê，講，che chiū-sī thok sian-ti Iok-jíⁿ só͘ kóng ê, kóng,

17上帝講，Tī路尾ê時日， 我beh用我ê神降落tī凡有肉體ê； Lín ê後生lín ê cha-bó͘-kiáⁿ beh做先知講話， Lín ê少年人beh看見異象， Lín ê老人beh得tio̍h眠夢；Siōng-tè kóng, Tī lō͘-bé ê sî-ji̍t, Góa beh ēng góa ê Sîn kàng-lo̍h tī hoān ū jio̍k-thé ê; Lín ê hāu-siⁿ lín ê cha-bó͘-kiáⁿ beh chòe sian-ti kóng ōe, Lín ê siàu-liân lâng beh khòaⁿ-kìⁿ īⁿ-siōng, Lín ê lāu-lâng beh tit-tio̍h bîn-bāng;

18Tī hiah-ê日我也beh用我ê神 降落tī我ê奴僕女婢；in亦beh做先知來講。Tī hiah ê ji̍t góa iā beh ēng góa ê Sîn Kàng-lo̍h tī góa ê lô͘-po̍k lú-pī; in ia̍h beh chòe sian-ti lâi kóng.

19頂面tī天裡我beh顯出奇事， 下面tī地裡我beh顯出神蹟， 就是血，kap火，kap煙霧；Téng-bīn tī thiⁿ-ni̍h góa beh hián-chhut kî-sū, Ē-bīn tī tōe-ni̍h góa beh hián-chhut sîn-jiah, Chiū-sī huih, kap hé, kap ian-bū;

20日beh變做暗， 月beh變做血， Tī主大koh榮顯ê日，bē到ê事先；Ji̍t beh pìⁿ chòe àm, Ge̍h beh pìⁿ chòe huih, Tī Chú tōa koh êng-hián ê ji̍t, Bē kàu ê tāi-seng;

21Koh凡若求叫主ê名ê，會得tio̍h救。Koh hoān-nā kiû-kiò Chú ê miâ ê, ōe tit-tio̍h kiù.

22以色列人ah，tio̍h聽我ê話：拿撒勒人耶穌，上帝bat用伊tī lín中間行各樣ê權能、奇事，kap神蹟，來tùi lín證明伊，這就是lín所知ê；Í-sek-lia̍t lâng ah, tio̍h thiaⁿ góa ê ōe: Ná-sat-le̍k lâng Iâ-so͘, Siōng-tè bat ēng I tī lín tiong-kan kiâⁿ koh-iūⁿ ê koân-lêng, kî-sū, kap sîn-jiah, lâi tùi lín chèng-bêng I, che chiū-sī lín só͘ chai ê;

23伊照上帝定tio̍h ê旨意kap事先知ê，已經受解送，lín chiah-ê借不法ê人ê手釘十字架害死伊；I chiàu Siōng-tè tiāⁿ-tio̍h ê chí-ì kap tāi-seng chai ê, í-keng siū ké-sàng, lín chiah-ê chioh put-hoat ê lâng ê chhiú tèng si̍p-jī-kè hāi-sí I;

24總是上帝tháu放hiah-ê死ê苦痛，hō͘伊koh活；是伊bōe會hō͘死所把縛。chóng-sī Siōng-tè tháu-pàng hiah ê sí ê khó͘-thàng, hō͘ I koh-oa̍h; sī I bōe-ōe hō͘ sí só͘ pé-pa̍k.

25因為大衛有指伊講， 我看主常常tī我ê面前； 伊tiàm-tī我ê chiàⁿ-pêng，hō͘我免搖動；In-ūi Tāi-pi̍t ū chí I kóng, Góa khòaⁿ Chú siông-siông tī góa ê bīn-chêng; I tiàm tī góa ê chiàⁿ pêng, hō͘ góa bián iô-tāng;

26所以我ê心歡喜，我ê舌快樂； Koh我ê肉體也beh tiàm-tī ǹg望中；Só͘-í góa ê sim hoaⁿ-hí, góa ê chi̍h khoài-lo̍k; Koh góa ê jio̍k-thé iā beh tiàm tī ǹg-bāng tiong;

27因為你無beh將我ê靈魂放下tī陰間， 也無beh hō͘你ê聖ê tú-tio̍h朽爛。In-ūi lí bô beh chiong góa ê lêng-hûn pàng-hē tī im-kan, Iā bô beh hō͘ lí ê Sèng-ê tú-tio̍h hiú-nōa.

28你bat用活命ê路指示我； Beh hō͘我tī你ê面前滿心快樂。Lí bat ēng oa̍h-miā ê lō͘ chí-sī góa; Beh hō͘ góa tī lí ê bīn-chêng móa-sim khoài-lo̍k.

29兄弟ah，先祖大衛ê事我thang好膽對lín講，伊已經死koh埋葬，伊ê墓到今á日iáu tī咱中間。Hiaⁿ-tī ah, sian-chó͘ Tāi-pi̍t ê sū góa thang hó-táⁿ tùi lín kóng, i í-keng sí koh bâi-chòng, i ê bōng kàu kin-á-ji̍t iáu tī lán tiong-kan.

30伊既然是先知，koh知上帝bat kap伊chiù-chōa，beh tī伊後裔中設立一人坐伊ê座位。I kì-jiân sī sian-ti, koh chai Siōng-tè bat kap i chiù-chōa, beh tī i hō͘-è tiong siat-li̍p chi̍t lâng chē i ê chō-ūi.

31伊事先看出án-ni，就論基督ê koh活講，伊無放下tī陰間，亦伊ê肉體無tú-tio̍h朽爛。I tāi-seng khòaⁿ-chhut án-ni, chiū lūn Ki-tok ê koh-oa̍h kóng, I bô pàng-hē tī im-kan, ia̍h I ê jio̍k-thé bô tú-tio̍h hiú-nōa.

32Chit-ê耶穌，上帝已經hō͘伊koh活，阮chiah-ê lóng做伊ê干證。Chit ê Iâ-so͘, Siōng-tè í-keng hō͘ I koh-oa̍h, goán chiah-ê lóng chòe I ê kan-chèng.

33伊既然hō͘上帝ê chiàⁿ手舉伊高高，koh tùi父受所應允ê聖神，就將chit-ê降落，就是lín所看見，所聽見ê。I kì-jiân hō͘ Siōng-tè ê chiàⁿ chhiú kú I koâiⁿ-koâiⁿ, koh tùi Pē siū só͘ èng-ún ê Sèng Sîn, chiū chiong chit ê kàng-lo̍h, chiū-sī lín só͘ khòaⁿ-kìⁿ, só͘ thiaⁿ-kìⁿ ê.

34因為大衛未bat上天；獨獨家己講， 主kā我ê主講， 你坐我ê大pêng，In-ūi Tāi-pi̍t bē bat chiūⁿ thiⁿ; to̍k-to̍k ka-kī kóng, Chú kā góa ê Chú kóng, Lí chē góa ê tōa pêng,

35thèng候我hō͘你ê對敵做你ê腳踏椅。Thèng-hāu góa hō͘ lí ê tùi-te̍k chòe lí ê kha-ta̍h-í.

36Án-ni以色列全家tio̍h確實知，chit-ê耶穌，上帝已經設立伊做主，做基督，就是lín所釘tī十字架ê。Án-ni Í-sek-lia̍t choân-ke tio̍h khak-si̍t chai, chit ê Iâ-so͘, Siōng-tè í-keng siat-li̍p I chòe Chú, chòe Ki-tok, chiū-sī lín só͘ tèng tī si̍p-jī-kè ê.

37眾人聽了，心內刺鑿，對彼得kap其餘ê使徒講，兄弟ah，阮tio̍h怎樣做？Chèng lâng thiaⁿ-liáu, sim-lāi chhì-chha̍k, tùi Pí-tek kap kî-û ê sù-tô͘ kóng, Hiaⁿ-tī ah, goán tio̍h cháiⁿ-iūⁿ chòe?

38彼得kā in講，Lín tio̍h反悔，ta̍k人tī耶穌基督ê名受洗禮，到hō͘ lín ê罪赦免；koh beh受聖神ê賞賜。Pí-tek kā in kóng, Lín tio̍h hoán-hóe, ta̍k lâng tī Iâ-so͘ Ki-tok ê miâ siū sóe-lé, kàu hō͘ lín ê chōe sià-bián; koh beh siū Sèng Sîn ê siúⁿ-sù.

39因為所應允ê歸tī lín，kap lín ê kiaⁿ孫，以及lóng總遠遠ê人，就是見若主，咱ê上帝，所beh召ê。In-ūi só͘ èng-ún ê kui tī lín, kap lín ê kiáⁿ-sun, í-ki̍p lóng-chóng hn̄g-hn̄g ê lâng, chiū-sī kìⁿ-nā Chú, lán ê Siōng-tè, só͘ beh tiàu ê.

40Koh另外用chōe-chōe話干證，來苦勸in，講，Lín tio̍h救家己脫離chit-ê邪ê世代。Koh lēng-gōa ēng chōe-chōe ōe kan-chèng, lâi khó͘-khǹg in, kóng, Lín tio̍h kiù ka-kī thoat-lī chit ê siâ ê sè-tāi.

41Tùi án-ni，接納in ê話ê人lóng受洗禮；hit日約略加添三千人。Tùi án-ni chiap-la̍p in ê ōe ê lâng lóng siū sóe-lé; hit ji̍t iok-lio̍k ke-thiⁿ saⁿ chheng lâng.

42常常專務使徒ê教示，saⁿ-kap交陪、peh餅、祈禱。Siông-siông choan-bū sù-tô͘ ê kà-sī, saⁿ-kap kau-pôe, peh-piáⁿ, kî-tó.

43眾人lóng驚惶；使徒koh行chōe-chōe奇事神蹟。Chèng lâng lóng kiaⁿ-hiâⁿ; sù-tô͘ koh kiâⁿ chōe-chōe kî-sū sîn-jiah.

44信ê人lóng聚集tī一所在，所有ê物公家用；Sìn ê lâng lóng chū-chi̍p tī chi̍t só͘-chāi, só͘ ū ê mi̍h kong-ke ēng;

45koh賣物產家業，照ta̍k人所欠用分hō͘ in。koh bōe bu̍t-sán ke-gia̍p, chiàu ta̍k lâng só͘ khiàm-ēng pun hō͘ in.

46日日同心專務tī殿內，也tī人家peh餅，用歡喜誠實ê心來食，o-ló上帝，Ji̍t-ji̍t tâng-sim choan-bū tī tiān-lāi, iā tī jîn-ke peh piáⁿ, ēng hoaⁿ-hí sêng-si̍t ê sim lâi chia̍h, o-ló Siōng-tè,

47亦得tio̍h眾百姓歡喜in。主將得救ê人日日加添hō͘ in。ia̍h tit-tio̍h chèng peh-sìⁿ hoaⁿ-hí in. Chú chiong tit kiù ê lâng ji̍t-ji̍t ke-thiⁿ hō͘ in.

1三點鐘祈禱ê時，彼得kap約翰上殿。Saⁿ tiám cheng kî-tó ê sî, Pí-tek kap Iok-hān chiūⁿ tiān.

2有一人，tùi出世就軟腳，ta̍k日hō͘人扛來hē tī殿門，就是hit-ê叫做Súi ê門，beh求入殿 ê人捨施；Ū chi̍t lâng, tùi chhut-sì chiū nńg-kha, ta̍k ji̍t hō͘ lâng kng lâi hē tī tiān mn̂g, chiū-sī hit ê kiò chòe Súi ê mn̂g, beh kiû ji̍p tiān ê lâng siá-sì;

3看見彼得約翰teh-beh入殿，就求捨施。khòaⁿ-kìⁿ Pí-tek Iok-hān teh-beh ji̍p tiān, chiū kiû siá-si.

4彼得kap約翰注目看伊，講，看阮。Pí-tek kap Iok-hān chù-ba̍k khòaⁿ i, kóng, Khòaⁿ goán.

5伊就注神看in，ǹg望對in有所得tio̍h。I chiū chù-sîn khòaⁿ in, ǹg-bāng tùi in ū só͘ tit-tio̍h.

6但是彼得講，金銀我lóng無；獨獨我所有ê hō͘你。Tī拿撒勒耶穌基督ê名，你起來行。Nā-sī Pí-tek kóng, Kim gûn góa lóng bô; to̍k-to̍k góa só͘ ū ê hō͘ lí. Tī Ná-sat-le̍k Iâ-so͘ Ki-tok ê miâ, lí khí-lâi kiâⁿ.

7就牽伊ê chiàⁿ手，hō͘伊起來；伊ê腳kap腳目liâm-piⁿ勇健。Chiū khan i ê chiàⁿ chhiú, hō͘ i khí-lâi; i ê kha kap kha-ba̍k liâm-piⁿ ióng-kiāⁿ.

8就跳起來khiā-teh，koh行，kap in入殿；亦行，亦跳，亦o-ló上帝。Chiū thiàu-khí-lâi khiā-teh, koh kiâⁿ, kap in ji̍p tiān; ia̍h kiâⁿ, ia̍h thiàu, ia̍h o-ló Siōng-tè.

9眾百姓看見伊teh行teh o-ló上帝；Chèng peh-sìⁿ khòaⁿ-kìⁿ i teh kiâⁿ teh o-ló Siōng-tè;

10koh認得伊是平素坐tī 殿 ê Súi門求捨施 ê；就因為伊所tú-tio̍h ê事，滿心奇怪gông-ngia̍h。koh jīn-tit i sī pêng-sò͘ chē tī tiān ê Súi-mn̂g kiû siá-si ê; chiū in-ūi i só͘ tú-tio̍h ê sū, móa-sim kî-koài gông-ngia̍h.

11Hit人牽彼得約翰ê時，眾百姓大奇怪，一齊走來就近in，tī hit-ê名叫所羅門ê léng廊。Hit lâng khan Pí-tek Iok-hān ê sî, chèng peh-sìⁿ tōa kî-koài, chi̍t chôe cháu lâi chiū-kūn in, tī hit-ê miâ kiò Só͘-lô-bûn ê léng-lông.

12彼得看見，就tùi百姓講，以色列人ah，啥事掠chit-ê做奇怪？啥事注目看阮，ná親像阮用家己ê才能，á是敬虔，hō͘伊行？Pí-tek khòaⁿ-kìⁿ, chiū tùi peh-sìⁿ kóng, Í-sek-lia̍t lâng ah, siáⁿ-sū lia̍h chit-ê chòe kî-koài? siáⁿ-sū chù-ba̍k khòaⁿ goán, ná chhin-chhiūⁿ goán ēng ka-kī ê châi-lêng, á-sī kèng-khiân, hō͘ i kiâⁿ?

13亞伯拉罕、以撒、雅各ê上帝，就是咱列祖ê上帝，已經榮光伊ê奴僕耶穌；就是lín chiah-ê所送交ê，koh tī彼拉多ê面前，當伊擬beh放伊ê時，lín koh m̄認伊。A-pek-la̍h-hán, Í-sat, Ngá-kok ê Siōng-tè, chiū-sī lán lia̍t-chó͘ ê Siōng-tè, í-keng êng-kng I ê Lô͘-po̍k Iâ-so͘; chiū-sī lín chiah-ê só͘ sàng-kau ê, koh tī Pí-lia̍p-to ê bīn-chêng, tng i gí beh pàng I ê sî, lín koh m̄ jīn I.

14Án-ni lín m̄認hit-ê聖koh義ê，反tńg求伊用一個凶犯hō͘ lín；Án-ni lín m̄ jīn hit ê Sèng koh Gī ê, hoán-tńg kiû i ēng chi̍t ê hiong-hoān hō͘ lín;

15lín害死活命ê人君，就是上帝tùi死人中hō͘伊koh活ê；阮chiah-ê做伊ê干證。lín hāi-sí oa̍h-miā ê Jîn-kun, chiū-sī Siōng-tè tùi sí-lâng tiong hō͘ I koh-oa̍h ê; goán chiah-ê chòe I ê kan-chèng.

16因為信伊ê名，就伊ê名hō͘ chit-ê lín所看所bat ê人勇健；是hit-ê對伊來ê信hō͘伊齊全好tī lín眾人ê面前。In-ūi sìn I ê miâ, chiū I ê miâ hō͘ chit-ê lín só͘ khòaⁿ só͘ bat ê lâng ióng-kiāⁿ; sī hit-ê tùi I lâi ê sìn hō͘ i chiâu-chn̂g hó tī lín chèng lâng ê bīn-chêng.

17兄弟ah，taⁿ我知lín án-ni行是tùi m̄知影，lín ê官府也是án-ni。Hiaⁿ-tī ah, taⁿ góa chai lín án-ni kiâⁿ sī tùi m̄ chai-iáⁿ, lín ê koaⁿ-hú iā sī án-ni.

18獨獨上帝用眾先知ê嘴讖語伊ê基督所beh受ê害，伊有án-ni應驗伊。To̍k-to̍k Siōng-tè ēng chèng sian-ti ê chhùi chhàm-gú I ê Ki-tok só͘ beh siū ê hāi, I ū án-ni èng-giām i.

19所以lín tio̍h反悔，來oa̍t-tńg頭，hō͘ lín ê罪會得擦消，hō͘安樂ê日期會tùi主ê面前來；Só͘-í lín tio̍h hoán-hóe, lâi oa̍t-tńg-thâu, hō͘ lín ê chōe ōe tit chhat-siau, hō͘ an-lo̍k ê ji̍t-kî ōe tùi Chú ê bīn-chêng lâi;

20koh主beh差為tio̍h lín事先定tio̍h ê基督，就是耶穌。koh Chú beh chhe ūi-tio̍h lín tāi-seng tiāⁿ-tio̍h ê Ki-tok, chiū-sī Iâ-so͘.

21天的確tio̍h接納伊，到萬物復到ê時，就是上帝tùi創世以來用伊聖先知ê嘴所講ê。Thiⁿ tek-khak tio̍h chiap-la̍p I, kàu bān mi̍h ho̍k-tò ê sî, chiū-sī Siōng-tè tùi chhòng-sè í-lâi ēng I sèng sian-ti ê chhùi só͘ kóng ê.

22摩西bat講，主上帝beh tī lín兄弟ê中間kā lín挺起一個先知，親像我；凡若伊所kā lín講lín tio̍h聽伊。Mô͘-se bat kóng, Chú Siōng-tè beh tī lín hiaⁿ-tī ê tiong-kan kā lín théng-khí chi̍t ê sian-ti, chhin-chhiūⁿ góa; hoān-nā I só͘ kā lín kóng lín tio̍h thiaⁿ I.

23凡若m̄聽chit-ê先知ê，beh tùi百姓ê中間一盡滅伊。Hoān-nā m̄ thiaⁿ chit ê sian-ti ê, beh tùi peh-sìⁿ ê tiong-kan it-chīn bia̍t i.

24Koh chiah-ê先知，tùi撒母耳以來，見有講ê，lóng是傳報chiah-ê日。Koh chiah ê sian-ti, tùi Sat-bó͘-ní í-lâi, kìⁿ ū kóng ê, lóng sī thoân-pò chiah ê ji̍t.

25Lín是先知ê kiaⁿ孫，承接上帝kap lín列祖所立 ê約，就是kā亞伯拉罕講，天下萬族beh tī你ê後裔得tio̍h福氣。Lín sī sian-ti ê kiáⁿ-sun, sêng-chiap Siōng-tè kap lín lia̍t-chó͘ só͘ li̍p ê iok, chiū-sī kā A-pek-la̍h-hán kóng, Thiⁿ-ē bān cho̍k beh tī lí ê hō͘-è tit-tio̍h hok-khì.

26上帝已經挺起伊ê奴僕，差伊來事先賜福hō͘ lín，就是hō͘ lín ta̍k人oa̍t-tńg離開lín ê pháiⁿ。Siōng-tè í-keng théng-khí I ê Lô͘-po̍k, chhe I lâi tāi-seng sù hok hō͘ lín, chiū-sī hō͘ lín ta̍k lâng oa̍t-tńg lī-khui lín ê pháiⁿ.

1In對百姓講話ê時，chiah-ê祭司，kap殿司，以及撒都該人忽然到；In tùi peh-sìⁿ kóng ōe ê sî, chiah ê chè-si, kap tiān-si, í-ki̍p Sat-thó͘-kai lâng hut-jiân kàu;

2因為in教示百姓，koh引起耶穌來傳tùi死人中koh活ê道理，就大m̄歡喜。in-ūi in kà-sī peh-sìⁿ, koh ín-khí Iâ-so͘ lâi thoân tùi sí-lâng tiong koh-oa̍h ê tō-lí, chiū tōa m̄ hoaⁿ-hí.

3Tùi án-ni，下手掠in；因為日暗，關in tī監裡，來thèng候隔日。Tùi án-ni hē chhiú lia̍h in; in-ūi ji̍t àm, koaiⁿ in tī kaⁿ-ni̍h, lâi thèng-hāu keh ji̍t.

4但是聽道理ê人chōe-chōe信；人額約略到五千。Nā-sī thiaⁿ tō-lí ê lâng chōe-chōe sìn; lâng-gia̍h iok-lio̍k kàu gō͘ chheng.

5隔日，in ê官府、長老、經學士聚集tī耶路撒冷；Keh ji̍t, in ê koaⁿ-hú, tiúⁿ-ló, keng-ha̍k-sū chū-chi̍p tī Iâ-lō͘-sat-léng;

6祭司頭A-ná tī-teh，koh有Kai-a-hoat、約翰、亞力山大，以及凡若屬祭司頭ê宗族亦tī-teh。chè-si-thâu A-ná tī-teh, koh ū Kai-a-hoat, Iok-hān, A-le̍k-san-tāi, í-ki̍p hoān-nā sio̍k chè-si-thâu ê chong-cho̍k ia̍h tī-teh.

7hō͘ in khiā tī中央，問講，lín用甚麼權能，用甚麼名，行chit-ê tāi-chì ah？Hō͘ in khiā tī tiong-ng, mn̄g kóng, Lín ēng sím-mi̍h koân-lêng, ēng sím-mi̍h miâ, kiâⁿ chit ê tāi-chì ah?

8彼得hit時hō͘聖神充滿，對in講，Pí-tek hit sî hō͘ Sèng Sîn chhiong-móa, tùi in kóng,

9百姓ê官府，kap長老ah，阮chiah-ê今á日若為tio̍h行tī軟弱ê人ê好事來受審問，看伊àn怎樣得救；Peh-sìⁿ ê koaⁿ-hú, kap tiúⁿ-ló ah, goán chiah-ê kin-á-ji̍t nā ūi-tio̍h kiâⁿ tī loán-jio̍k ê lâng ê hó sū lâi siū sím-mn̄g, khòaⁿ i àn-cháiⁿ-iūⁿ tit kiù;

10就lín眾人，kap thong以色列百姓tio̍h知，是tī拿撒勒人耶穌基督ê名，lín所釘tī十字架，上帝hō͘伊tùi死人中koh活ê，就是tī伊ê名，chit人好好khiā tī lín ê面前。chiū lín chèng lâng, kap thong Í-sek-lia̍t peh-sìⁿ tio̍h chai, sī tī Ná-sat-le̍k lâng Iâ-so͘ Ki-tok ê miâ, lín só͘ tèng tī si̍p-jī-kè, Siōng-tè hō͘ I tùi sí-lâng tiong koh-oa̍h ê, chiū-sī tī I ê miâ, chit lâng hó-hó khiā tī lín ê bīn-chêng.

11伊就是lín師傅所m̄-ti̍h ê石，已經成做厝角ê頭。I chiū-sī lín sai-hū só͘ m̄ ti̍h ê chio̍h, í-keng chiâⁿ-chòe chhù-kak ê thâu.

12Koh tī別ê並無拯救；因為tī天下，無賞賜別個名tī人ê中間，hō͘咱tiàm-tī伊來得救。Koh tī pa̍t-ê pēng bô chín-kiù; in-ūi tī thiⁿ-ē, bô siúⁿ-sù pa̍t ê miâ tī lâng ê tiong-kan, hō͘ lán tiàm-tī i lâi tit kiù.

13眾人看見彼得約翰ê好膽，koh知in是無學問ê平常人，就奇怪；koh認得in bat tè耶穌。Chèng lâng khòaⁿ-kìⁿ Pí-tek Iok-hān ê hó-táⁿ, koh chai in sī bô ha̍k-būn ê pêng-siông lâng, chiū kî-koài; koh jīn-tit in bat tè Iâ-so͘.

14亦看見得tio̍h好ê人kap in saⁿ-kap khiā-teh，就無話thang辯駁。Ia̍h khòaⁿ-kìⁿ tit-tio̍h hó ê lâng kap in saⁿ-kap khiā-teh, chiū bô ōe thang piān-pok.

15Chiah kah in出會所，也saⁿ-kap議論，講，Chiah kah in chhut hōe-só͘, iā saⁿ-kap gī-lūn, kóng,

16Chiah-ê人beh怎樣辦in？in顯然行神蹟，tiàm-tī耶路撒冷ê人lóng知；咱chiah-ê bōe講無--得。Chiah ê lâng beh cháiⁿ-iūⁿ pān in? in hián-jiân kiâⁿ sîn-jiah, tiàm-tī Iâ-lō͘-sat-léng ê lâng lóng chai; lán chiah-ê bōe kóng bô--tit.

17總是免得chit-ê事益發報揚tī百姓ê中間，咱tio̍h哄in，斷斷m̄-thang koh將chit-ê名對人講。Chóng-sī bián-tit chit ê sū it-hoat pò-iông tī peh-sìⁿ ê tiong-kan, lán tio̍h háng in, toàn-toàn m̄-thang koh chiong chit ê miâ tùi lâng kóng.

18就叫in來，禁止in，千萬m̄-thang用耶穌ê名來講起，來教示。Chiū kiò in lâi, kìm-chí in, chhian-bān m̄-thang ēng Iâ-so͘ ê miâ lâi kóng-khí, lâi kà-sī.

19但是彼得約翰應講，聽lín khah過頭聽上帝，tī上帝ê面前合宜á無，lín chiah擬斷：Nā-sī Pí-tek Iok-hān ìn kóng, Thiaⁿ lín khah kè-thâu thiaⁿ Siōng-tè, tī Siōng-tè ê bīn-chêng ha̍p-gî á bô, lín chiah gí-toàn:

20因為阮所bat看bat聽ê，bōe得thang無講。in-ūi goán só͘ bat khòaⁿ bat thiaⁿ ê, bōe tit thang bô kóng.

21Hiah-ê人，因為百姓ê緣故，想無步thang刑罰in；就koh再háng-hoah，chiah放in；是眾人為tio̍h in所行ê，來歸榮光上帝。Hiah ê lâng, in-ūi peh-sìⁿ ê iân-kò͘, siūⁿ bô pō͘ thang hêng-hoa̍t in; chiū koh-chài háng-hoah, chiah pàng in; sī chèng lâng ūi-tio̍h in só͘ kiâⁿ ê, lâi kui êng-kng Siōng-tè.

22因為tùi神蹟得tio̍h醫好ê人，已經四十外歲。In-ūi tùi sîn-jiah tit-tio̍h i-hó ê lâng, í-keng sì-cha̍p gōa hè.

23In已經得tio̍h tháu放，就去chhē in ê朋友，將chiah-ê祭司頭kap長老所講ê話對in講。In í-keng tit-tio̍h tháu-pàng, chiū khì chhē in ê pêng-iú, chiong chiah ê chè-si-thâu kap tiúⁿ-ló só͘ kóng ê ōe tùi in kóng.

24In聽見，就同心出聲對上帝講，主宰ah，你是創造天、地、海，kap其中萬物ê；In thiaⁿ-kìⁿ, chiū tâng-sim chhut siaⁿ tùi Siōng-tè kóng, Chú-cháiⁿ ah, lí sī chhòng-chō thiⁿ, tōe, hái, kap kî-tiong bān mi̍h ê;

25你bat對聖神用你ê奴僕，阮ê祖，大衛ê嘴，來講， 列邦啥事大受氣， Chiah-ê百姓啥事計謀空空ê tāi？lí bat tùi Sèng Sîn ēng lí ê lô͘-po̍k, goán ê chó͘, Tāi-pi̍t ê chhùi, lâi kóng, Lia̍t-pang siáⁿ-sū tōa siū-khì, Chiah ê peh-sìⁿ siáⁿ-sū kè-bô͘ khang-khang ê tāi?

26地上ê列王一齊khiā-teh， Chiah-ê官員也saⁿ-kap聚集， 來對敵主，kap伊ê基督；Tōe-chiūⁿ ê lia̍t-ông chi̍t chôe khiā-teh, Chiah ê koaⁿ-oân iā saⁿ-kap chū-chi̍p, Lâi tùi-te̍k Chú, kap I ê Ki-tok;

27因為希律，本丟彼拉多，kap外邦人，以及以色列chiah-ê百姓，果然聚集tī chit-ê城，來攻擊你所抹油聖ê奴僕耶穌，in-ūi Hi-lu̍t, Pún-tiu Pí-lia̍p-to, kap gōa-pang lâng, í-ki̍p Í-sek-lia̍t chiah ê peh-sìⁿ, kó-jiân chū-chi̍p tī chit ê siâⁿ, lâi kong-kek lí só͘ boah-iû sèng ê Lô͘-po̍k Iâ-so͘,

28來行你ê手，你ê旨意所事先定tio̍h一切beh成ê事。lâi kiâⁿ lí ê chhiú, lí ê chí-ì só͘ tāi-seng tiāⁿ-tio̍h it-chhè beh chiâⁿ ê sū.

29Taⁿ主ah，tio̍h鑑察hiah-ê人ê háng-hoah；hō͘你chiah-ê奴僕好膽講你ê道理，Taⁿ Chú ah, tio̍h kàm-chhat hiah ê lâng ê háng-hoah; hō͘ lí chiah ê lô͘-po̍k hó-táⁿ kóng lí ê tō-lí,

30照時伸你ê手來醫病；hō͘神蹟奇事對你聖ê奴僕耶穌ê名來成。chiàu sî chhun lí ê chhiú lâi i pīⁿ; hō͘ sîn-jiah kî-sū tùi lí sèng ê Lô͘-po̍k Iâ-so͘ ê miâ lâi chiâⁿ.

31祈禱soah，聚集ê所在大振動；眾人lóng受聖神充滿，好膽講上帝ê道理。Kî-tó soah, chū-chi̍p ê só͘-chāi tōa tín-tāng; chèng lâng lóng siū Sèng Sîn chhiong-móa, hó-táⁿ kóng Siōng-tè ê tō-lí.

32信ê人lóng一心一志；無人講伊所有ê屬家己；是ta̍k項物做公ê。Sìn ê lâng lóng chi̍t sim chi̍t chì; bô lâng kóng i só͘ ū ê sio̍k ka-kī; sī ta̍k hāng mi̍h chòe kong ê.

33使徒用大權能干證主耶穌ê koh活；眾人也得tio̍h大恩典。Sù-tô͘ ēng tōa koân-lêng kan-chèng Chú Iâ-so͘ ê koh-oa̍h; chèng lâng iā tit-tio̍h tōa un-tián.

34其中無欠缺ê人；因為見有田園厝宅ê，lóng賣伊，帶in所賣ê銀，hē tī使徒ê腳下；Kî-tiong bô khiàm-kheh ê lâng; in-ūi kìⁿ ū chhân-hn̂g chhù-the̍h ê, lóng bōe i, tòa in só͘ bōe ê gûn, hē tī sù-tô͘ ê kha-ē;

35照ta̍k人所欠用，分hō͘ in。chiàu ta̍k lâng só͘ khiàm-ēng, pun hō͘ in.

36有利未族ê人，出世tī居比路，名約瑟，使徒叫伊做巴拿巴，(翻譯就是gâu安慰ê人) ，Ū Lī-bī cho̍k ê lâng, chhut-sì tī Ku-pí-lō͘, miâ Iok-sek, sù-tô͘ kiò i chòe Pa-ná-pa, (hoan-e̍k chiū-sī gâu an-ùi ê lâng),

37伊有園就賣去，將所賣ê銀帶來，hē tī使徒ê腳下。i ū hn̂g chiū bōe-khì, chiong só͘ bōe ê gûn tòa-lâi, hē tī sù-tô͘ ê kha-ē.