1三點鐘祈禱ê時，彼得kap約翰上殿。Saⁿ tiám cheng kî-tó ê sî, Pí-tek kap Iok-hān chiūⁿ tiān.

2有一人，tùi出世就軟腳，ta̍k日hō͘人扛來hē tī殿門，就是hit-ê叫做Súi ê門，beh求入殿 ê人捨施；Ū chi̍t lâng, tùi chhut-sì chiū nńg-kha, ta̍k ji̍t hō͘ lâng kng lâi hē tī tiān mn̂g, chiū-sī hit ê kiò chòe Súi ê mn̂g, beh kiû ji̍p tiān ê lâng siá-sì;

3看見彼得約翰teh-beh入殿，就求捨施。khòaⁿ-kìⁿ Pí-tek Iok-hān teh-beh ji̍p tiān, chiū kiû siá-si.

4彼得kap約翰注目看伊，講，看阮。Pí-tek kap Iok-hān chù-ba̍k khòaⁿ i, kóng, Khòaⁿ goán.

5伊就注神看in，ǹg望對in有所得tio̍h。I chiū chù-sîn khòaⁿ in, ǹg-bāng tùi in ū só͘ tit-tio̍h.

6但是彼得講，金銀我lóng無；獨獨我所有ê hō͘你。Tī拿撒勒耶穌基督ê名，你起來行。Nā-sī Pí-tek kóng, Kim gûn góa lóng bô; to̍k-to̍k góa só͘ ū ê hō͘ lí. Tī Ná-sat-le̍k Iâ-so͘ Ki-tok ê miâ, lí khí-lâi kiâⁿ.

7就牽伊ê chiàⁿ手，hō͘伊起來；伊ê腳kap腳目liâm-piⁿ勇健。Chiū khan i ê chiàⁿ chhiú, hō͘ i khí-lâi; i ê kha kap kha-ba̍k liâm-piⁿ ióng-kiāⁿ.

8就跳起來khiā-teh，koh行，kap in入殿；亦行，亦跳，亦o-ló上帝。Chiū thiàu-khí-lâi khiā-teh, koh kiâⁿ, kap in ji̍p tiān; ia̍h kiâⁿ, ia̍h thiàu, ia̍h o-ló Siōng-tè.

9眾百姓看見伊teh行teh o-ló上帝；Chèng peh-sìⁿ khòaⁿ-kìⁿ i teh kiâⁿ teh o-ló Siōng-tè;

10koh認得伊是平素坐tī 殿 ê Súi門求捨施 ê；就因為伊所tú-tio̍h ê事，滿心奇怪gông-ngia̍h。koh jīn-tit i sī pêng-sò͘ chē tī tiān ê Súi-mn̂g kiû siá-si ê; chiū in-ūi i só͘ tú-tio̍h ê sū, móa-sim kî-koài gông-ngia̍h.

11Hit人牽彼得約翰ê時，眾百姓大奇怪，一齊走來就近in，tī hit-ê名叫所羅門ê léng廊。Hit lâng khan Pí-tek Iok-hān ê sî, chèng peh-sìⁿ tōa kî-koài, chi̍t chôe cháu lâi chiū-kūn in, tī hit-ê miâ kiò Só͘-lô-bûn ê léng-lông.

12彼得看見，就tùi百姓講，以色列人ah，啥事掠chit-ê做奇怪？啥事注目看阮，ná親像阮用家己ê才能，á是敬虔，hō͘伊行？Pí-tek khòaⁿ-kìⁿ, chiū tùi peh-sìⁿ kóng, Í-sek-lia̍t lâng ah, siáⁿ-sū lia̍h chit-ê chòe kî-koài? siáⁿ-sū chù-ba̍k khòaⁿ goán, ná chhin-chhiūⁿ goán ēng ka-kī ê châi-lêng, á-sī kèng-khiân, hō͘ i kiâⁿ?

13亞伯拉罕、以撒、雅各ê上帝，就是咱列祖ê上帝，已經榮光伊ê奴僕耶穌；就是lín chiah-ê所送交ê，koh tī彼拉多ê面前，當伊擬beh放伊ê時，lín koh m̄認伊。A-pek-la̍h-hán, Í-sat, Ngá-kok ê Siōng-tè, chiū-sī lán lia̍t-chó͘ ê Siōng-tè, í-keng êng-kng I ê Lô͘-po̍k Iâ-so͘; chiū-sī lín chiah-ê só͘ sàng-kau ê, koh tī Pí-lia̍p-to ê bīn-chêng, tng i gí beh pàng I ê sî, lín koh m̄ jīn I.

14Án-ni lín m̄認hit-ê聖koh義ê，反tńg求伊用一個凶犯hō͘ lín；Án-ni lín m̄ jīn hit ê Sèng koh Gī ê, hoán-tńg kiû i ēng chi̍t ê hiong-hoān hō͘ lín;

15lín害死活命ê人君，就是上帝tùi死人中hō͘伊koh活ê；阮chiah-ê做伊ê干證。lín hāi-sí oa̍h-miā ê Jîn-kun, chiū-sī Siōng-tè tùi sí-lâng tiong hō͘ I koh-oa̍h ê; goán chiah-ê chòe I ê kan-chèng.

16因為信伊ê名，就伊ê名hō͘ chit-ê lín所看所bat ê人勇健；是hit-ê對伊來ê信hō͘伊齊全好tī lín眾人ê面前。In-ūi sìn I ê miâ, chiū I ê miâ hō͘ chit-ê lín só͘ khòaⁿ só͘ bat ê lâng ióng-kiāⁿ; sī hit-ê tùi I lâi ê sìn hō͘ i chiâu-chn̂g hó tī lín chèng lâng ê bīn-chêng.

17兄弟ah，taⁿ我知lín án-ni行是tùi m̄知影，lín ê官府也是án-ni。Hiaⁿ-tī ah, taⁿ góa chai lín án-ni kiâⁿ sī tùi m̄ chai-iáⁿ, lín ê koaⁿ-hú iā sī án-ni.

18獨獨上帝用眾先知ê嘴讖語伊ê基督所beh受ê害，伊有án-ni應驗伊。To̍k-to̍k Siōng-tè ēng chèng sian-ti ê chhùi chhàm-gú I ê Ki-tok só͘ beh siū ê hāi, I ū án-ni èng-giām i.

19所以lín tio̍h反悔，來oa̍t-tńg頭，hō͘ lín ê罪會得擦消，hō͘安樂ê日期會tùi主ê面前來；Só͘-í lín tio̍h hoán-hóe, lâi oa̍t-tńg-thâu, hō͘ lín ê chōe ōe tit chhat-siau, hō͘ an-lo̍k ê ji̍t-kî ōe tùi Chú ê bīn-chêng lâi;

20koh主beh差為tio̍h lín事先定tio̍h ê基督，就是耶穌。koh Chú beh chhe ūi-tio̍h lín tāi-seng tiāⁿ-tio̍h ê Ki-tok, chiū-sī Iâ-so͘.

21天的確tio̍h接納伊，到萬物復到ê時，就是上帝tùi創世以來用伊聖先知ê嘴所講ê。Thiⁿ tek-khak tio̍h chiap-la̍p I, kàu bān mi̍h ho̍k-tò ê sî, chiū-sī Siōng-tè tùi chhòng-sè í-lâi ēng I sèng sian-ti ê chhùi só͘ kóng ê.

22摩西bat講，主上帝beh tī lín兄弟ê中間kā lín挺起一個先知，親像我；凡若伊所kā lín講lín tio̍h聽伊。Mô͘-se bat kóng, Chú Siōng-tè beh tī lín hiaⁿ-tī ê tiong-kan kā lín théng-khí chi̍t ê sian-ti, chhin-chhiūⁿ góa; hoān-nā I só͘ kā lín kóng lín tio̍h thiaⁿ I.

23凡若m̄聽chit-ê先知ê，beh tùi百姓ê中間一盡滅伊。Hoān-nā m̄ thiaⁿ chit ê sian-ti ê, beh tùi peh-sìⁿ ê tiong-kan it-chīn bia̍t i.

24Koh chiah-ê先知，tùi撒母耳以來，見有講ê，lóng是傳報chiah-ê日。Koh chiah ê sian-ti, tùi Sat-bó͘-ní í-lâi, kìⁿ ū kóng ê, lóng sī thoân-pò chiah ê ji̍t.

25Lín是先知ê kiaⁿ孫，承接上帝kap lín列祖所立 ê約，就是kā亞伯拉罕講，天下萬族beh tī你ê後裔得tio̍h福氣。Lín sī sian-ti ê kiáⁿ-sun, sêng-chiap Siōng-tè kap lín lia̍t-chó͘ só͘ li̍p ê iok, chiū-sī kā A-pek-la̍h-hán kóng, Thiⁿ-ē bān cho̍k beh tī lí ê hō͘-è tit-tio̍h hok-khì.

26上帝已經挺起伊ê奴僕，差伊來事先賜福hō͘ lín，就是hō͘ lín ta̍k人oa̍t-tńg離開lín ê pháiⁿ。Siōng-tè í-keng théng-khí I ê Lô͘-po̍k, chhe I lâi tāi-seng sù hok hō͘ lín, chiū-sī hō͘ lín ta̍k lâng oa̍t-tńg lī-khui lín ê pháiⁿ.

1In對百姓講話ê時，chiah-ê祭司，kap殿司，以及撒都該人忽然到；In tùi peh-sìⁿ kóng ōe ê sî, chiah ê chè-si, kap tiān-si, í-ki̍p Sat-thó͘-kai lâng hut-jiân kàu;

2因為in教示百姓，koh引起耶穌來傳tùi死人中koh活ê道理，就大m̄歡喜。in-ūi in kà-sī peh-sìⁿ, koh ín-khí Iâ-so͘ lâi thoân tùi sí-lâng tiong koh-oa̍h ê tō-lí, chiū tōa m̄ hoaⁿ-hí.

3Tùi án-ni，下手掠in；因為日暗，關in tī監裡，來thèng候隔日。Tùi án-ni hē chhiú lia̍h in; in-ūi ji̍t àm, koaiⁿ in tī kaⁿ-ni̍h, lâi thèng-hāu keh ji̍t.

4但是聽道理ê人chōe-chōe信；人額約略到五千。Nā-sī thiaⁿ tō-lí ê lâng chōe-chōe sìn; lâng-gia̍h iok-lio̍k kàu gō͘ chheng.

5隔日，in ê官府、長老、經學士聚集tī耶路撒冷；Keh ji̍t, in ê koaⁿ-hú, tiúⁿ-ló, keng-ha̍k-sū chū-chi̍p tī Iâ-lō͘-sat-léng;

6祭司頭A-ná tī-teh，koh有Kai-a-hoat、約翰、亞力山大，以及凡若屬祭司頭ê宗族亦tī-teh。chè-si-thâu A-ná tī-teh, koh ū Kai-a-hoat, Iok-hān, A-le̍k-san-tāi, í-ki̍p hoān-nā sio̍k chè-si-thâu ê chong-cho̍k ia̍h tī-teh.

7hō͘ in khiā tī中央，問講，lín用甚麼權能，用甚麼名，行chit-ê tāi-chì ah？Hō͘ in khiā tī tiong-ng, mn̄g kóng, Lín ēng sím-mi̍h koân-lêng, ēng sím-mi̍h miâ, kiâⁿ chit ê tāi-chì ah?

8彼得hit時hō͘聖神充滿，對in講，Pí-tek hit sî hō͘ Sèng Sîn chhiong-móa, tùi in kóng,

9百姓ê官府，kap長老ah，阮chiah-ê今á日若為tio̍h行tī軟弱ê人ê好事來受審問，看伊àn怎樣得救；Peh-sìⁿ ê koaⁿ-hú, kap tiúⁿ-ló ah, goán chiah-ê kin-á-ji̍t nā ūi-tio̍h kiâⁿ tī loán-jio̍k ê lâng ê hó sū lâi siū sím-mn̄g, khòaⁿ i àn-cháiⁿ-iūⁿ tit kiù;

10就lín眾人，kap thong以色列百姓tio̍h知，是tī拿撒勒人耶穌基督ê名，lín所釘tī十字架，上帝hō͘伊tùi死人中koh活ê，就是tī伊ê名，chit人好好khiā tī lín ê面前。chiū lín chèng lâng, kap thong Í-sek-lia̍t peh-sìⁿ tio̍h chai, sī tī Ná-sat-le̍k lâng Iâ-so͘ Ki-tok ê miâ, lín só͘ tèng tī si̍p-jī-kè, Siōng-tè hō͘ I tùi sí-lâng tiong koh-oa̍h ê, chiū-sī tī I ê miâ, chit lâng hó-hó khiā tī lín ê bīn-chêng.

11伊就是lín師傅所m̄-ti̍h ê石，已經成做厝角ê頭。I chiū-sī lín sai-hū só͘ m̄ ti̍h ê chio̍h, í-keng chiâⁿ-chòe chhù-kak ê thâu.

12Koh tī別ê並無拯救；因為tī天下，無賞賜別個名tī人ê中間，hō͘咱tiàm-tī伊來得救。Koh tī pa̍t-ê pēng bô chín-kiù; in-ūi tī thiⁿ-ē, bô siúⁿ-sù pa̍t ê miâ tī lâng ê tiong-kan, hō͘ lán tiàm-tī i lâi tit kiù.

13眾人看見彼得約翰ê好膽，koh知in是無學問ê平常人，就奇怪；koh認得in bat tè耶穌。Chèng lâng khòaⁿ-kìⁿ Pí-tek Iok-hān ê hó-táⁿ, koh chai in sī bô ha̍k-būn ê pêng-siông lâng, chiū kî-koài; koh jīn-tit in bat tè Iâ-so͘.

14亦看見得tio̍h好ê人kap in saⁿ-kap khiā-teh，就無話thang辯駁。Ia̍h khòaⁿ-kìⁿ tit-tio̍h hó ê lâng kap in saⁿ-kap khiā-teh, chiū bô ōe thang piān-pok.

15Chiah kah in出會所，也saⁿ-kap議論，講，Chiah kah in chhut hōe-só͘, iā saⁿ-kap gī-lūn, kóng,

16Chiah-ê人beh怎樣辦in？in顯然行神蹟，tiàm-tī耶路撒冷ê人lóng知；咱chiah-ê bōe講無--得。Chiah ê lâng beh cháiⁿ-iūⁿ pān in? in hián-jiân kiâⁿ sîn-jiah, tiàm-tī Iâ-lō͘-sat-léng ê lâng lóng chai; lán chiah-ê bōe kóng bô--tit.

17總是免得chit-ê事益發報揚tī百姓ê中間，咱tio̍h哄in，斷斷m̄-thang koh將chit-ê名對人講。Chóng-sī bián-tit chit ê sū it-hoat pò-iông tī peh-sìⁿ ê tiong-kan, lán tio̍h háng in, toàn-toàn m̄-thang koh chiong chit ê miâ tùi lâng kóng.

18就叫in來，禁止in，千萬m̄-thang用耶穌ê名來講起，來教示。Chiū kiò in lâi, kìm-chí in, chhian-bān m̄-thang ēng Iâ-so͘ ê miâ lâi kóng-khí, lâi kà-sī.

19但是彼得約翰應講，聽lín khah過頭聽上帝，tī上帝ê面前合宜á無，lín chiah擬斷：Nā-sī Pí-tek Iok-hān ìn kóng, Thiaⁿ lín khah kè-thâu thiaⁿ Siōng-tè, tī Siōng-tè ê bīn-chêng ha̍p-gî á bô, lín chiah gí-toàn:

20因為阮所bat看bat聽ê，bōe得thang無講。in-ūi goán só͘ bat khòaⁿ bat thiaⁿ ê, bōe tit thang bô kóng.

21Hiah-ê人，因為百姓ê緣故，想無步thang刑罰in；就koh再háng-hoah，chiah放in；是眾人為tio̍h in所行ê，來歸榮光上帝。Hiah ê lâng, in-ūi peh-sìⁿ ê iân-kò͘, siūⁿ bô pō͘ thang hêng-hoa̍t in; chiū koh-chài háng-hoah, chiah pàng in; sī chèng lâng ūi-tio̍h in só͘ kiâⁿ ê, lâi kui êng-kng Siōng-tè.

22因為tùi神蹟得tio̍h醫好ê人，已經四十外歲。In-ūi tùi sîn-jiah tit-tio̍h i-hó ê lâng, í-keng sì-cha̍p gōa hè.

23In已經得tio̍h tháu放，就去chhē in ê朋友，將chiah-ê祭司頭kap長老所講ê話對in講。In í-keng tit-tio̍h tháu-pàng, chiū khì chhē in ê pêng-iú, chiong chiah ê chè-si-thâu kap tiúⁿ-ló só͘ kóng ê ōe tùi in kóng.

24In聽見，就同心出聲對上帝講，主宰ah，你是創造天、地、海，kap其中萬物ê；In thiaⁿ-kìⁿ, chiū tâng-sim chhut siaⁿ tùi Siōng-tè kóng, Chú-cháiⁿ ah, lí sī chhòng-chō thiⁿ, tōe, hái, kap kî-tiong bān mi̍h ê;

25你bat對聖神用你ê奴僕，阮ê祖，大衛ê嘴，來講， 列邦啥事大受氣， Chiah-ê百姓啥事計謀空空ê tāi？lí bat tùi Sèng Sîn ēng lí ê lô͘-po̍k, goán ê chó͘, Tāi-pi̍t ê chhùi, lâi kóng, Lia̍t-pang siáⁿ-sū tōa siū-khì, Chiah ê peh-sìⁿ siáⁿ-sū kè-bô͘ khang-khang ê tāi?

26地上ê列王一齊khiā-teh， Chiah-ê官員也saⁿ-kap聚集， 來對敵主，kap伊ê基督；Tōe-chiūⁿ ê lia̍t-ông chi̍t chôe khiā-teh, Chiah ê koaⁿ-oân iā saⁿ-kap chū-chi̍p, Lâi tùi-te̍k Chú, kap I ê Ki-tok;

27因為希律，本丟彼拉多，kap外邦人，以及以色列chiah-ê百姓，果然聚集tī chit-ê城，來攻擊你所抹油聖ê奴僕耶穌，in-ūi Hi-lu̍t, Pún-tiu Pí-lia̍p-to, kap gōa-pang lâng, í-ki̍p Í-sek-lia̍t chiah ê peh-sìⁿ, kó-jiân chū-chi̍p tī chit ê siâⁿ, lâi kong-kek lí só͘ boah-iû sèng ê Lô͘-po̍k Iâ-so͘,

28來行你ê手，你ê旨意所事先定tio̍h一切beh成ê事。lâi kiâⁿ lí ê chhiú, lí ê chí-ì só͘ tāi-seng tiāⁿ-tio̍h it-chhè beh chiâⁿ ê sū.

29Taⁿ主ah，tio̍h鑑察hiah-ê人ê háng-hoah；hō͘你chiah-ê奴僕好膽講你ê道理，Taⁿ Chú ah, tio̍h kàm-chhat hiah ê lâng ê háng-hoah; hō͘ lí chiah ê lô͘-po̍k hó-táⁿ kóng lí ê tō-lí,

30照時伸你ê手來醫病；hō͘神蹟奇事對你聖ê奴僕耶穌ê名來成。chiàu sî chhun lí ê chhiú lâi i pīⁿ; hō͘ sîn-jiah kî-sū tùi lí sèng ê Lô͘-po̍k Iâ-so͘ ê miâ lâi chiâⁿ.

31祈禱soah，聚集ê所在大振動；眾人lóng受聖神充滿，好膽講上帝ê道理。Kî-tó soah, chū-chi̍p ê só͘-chāi tōa tín-tāng; chèng lâng lóng siū Sèng Sîn chhiong-móa, hó-táⁿ kóng Siōng-tè ê tō-lí.

32信ê人lóng一心一志；無人講伊所有ê屬家己；是ta̍k項物做公ê。Sìn ê lâng lóng chi̍t sim chi̍t chì; bô lâng kóng i só͘ ū ê sio̍k ka-kī; sī ta̍k hāng mi̍h chòe kong ê.

33使徒用大權能干證主耶穌ê koh活；眾人也得tio̍h大恩典。Sù-tô͘ ēng tōa koân-lêng kan-chèng Chú Iâ-so͘ ê koh-oa̍h; chèng lâng iā tit-tio̍h tōa un-tián.

34其中無欠缺ê人；因為見有田園厝宅ê，lóng賣伊，帶in所賣ê銀，hē tī使徒ê腳下；Kî-tiong bô khiàm-kheh ê lâng; in-ūi kìⁿ ū chhân-hn̂g chhù-the̍h ê, lóng bōe i, tòa in só͘ bōe ê gûn, hē tī sù-tô͘ ê kha-ē;

35照ta̍k人所欠用，分hō͘ in。chiàu ta̍k lâng só͘ khiàm-ēng, pun hō͘ in.

36有利未族ê人，出世tī居比路，名約瑟，使徒叫伊做巴拿巴，(翻譯就是gâu安慰ê人) ，Ū Lī-bī cho̍k ê lâng, chhut-sì tī Ku-pí-lō͘, miâ Iok-sek, sù-tô͘ kiò i chòe Pa-ná-pa, (hoan-e̍k chiū-sī gâu an-ùi ê lâng),

37伊有園就賣去，將所賣ê銀帶來，hē tī使徒ê腳下。i ū hn̂g chiū bōe-khì, chiong só͘ bōe ê gûn tòa-lâi, hē tī sù-tô͘ ê kha-ē.

1但是有一人名亞拿尼亞，kap伊ê bó͘ Sat-hui-lat，賣伊ê產業，將所賣ê銀，暗靜留kúi-nā份，伊ê bó͘亦知；Nā-sī ū chi̍t lâng miâ A-ná-nî-a, kap i ê bó͘ Sat-hui-lat, bōe i ê sán-gia̍p, chiong só͘ bōe ê gûn, àm-chīⁿ lâu kúi-nā hūn, i ê bó͘ iāh chai;

2其餘ê帶來hē tī使徒ê腳下。kî-û ê tòa lâi hē tī sù-tô͘ ê kha-ē.

3彼得講，亞拿尼亞，啥事撒旦充滿你ê心來騙聖神，將賣園ê銀暗靜留kúi-nā 份？Pí-tek kóng, A-ná-nî-a, siáⁿ-sū Sat-tàn chhiong-móa lí ê sim lâi phiàn Sèng Sîn, chiong bōe hn̂g ê gûn àm-chīⁿ lâu kúi-nā hūn?

4園iáu-bē賣，kiám m̄是你ê？賣了，hit-ê銀kiám m̄是你主意？你心內啥事想出chit-ê tāi-chì ah？你m̄是騙人，就是騙上帝。Hn̂g iáu-bē bōe, kiám m̄ sī lí ê? Bōe liáu, hit ê gûn kiám m̄ sī lí chú-ì? Lí sim-lāi siáⁿ-sū siūⁿ-chhut chit ê tāi-chì ah? Lí m̄ sī phiàn lâng, chiū-sī phiàn Siōng-tè.

5亞拿尼亞聽見chiah-ê話，就lek落去，斷氣；聽見ê人lóng大驚。A-ná-nî-a thiaⁿ-kìⁿ chiah ê ōe, chiū lek-lo̍h-khì, tn̄g khùi; thiaⁿ-kìⁿ ê lâng lóng tōa kiaⁿ.

6Chiah-ê少年人起來，收拾伊ê身屍，扛出去埋葬。Chiah ê siàu-liân lâng khí-lâi, siu-si̍p i ê sin-si, kng chhut-khì bâi-chòng.

7約略過三點鐘久，伊ê bó͘亦入來，iáu-bē知chit-ê事。Iok-lio̍k kè saⁿ tiám cheng kú, i ê bó͘ ia̍h ji̍p-lâi, iáu-bē chai chit ê sū.

8彼得應伊講，你kā我講，lín賣園ê價錢是chiah chōe mah？講，Tio̍h，是chiah chōe。Pí-tek ìn i kóng, Lí kā góa kóng, lín bōe hn̂g ê kè-chîⁿ sī chiah chōe mah? Kóng, Tio̍h, sī chiah chōe.

9但彼得對伊講，Lín啥事同心來試主ê神ah？你看，埋葬你ê丈夫ê，in ê腳已經到門口，亦beh扛你出去。Nā-sī Pí-tek tùi i kóng, Lín siáⁿ-sū tâng-sim lâi chhì Chú ê Sîn ah? Lí khòaⁿ, bâi-chòng lí ê tiōng-hu ê, in ê kha í-keng kàu mn̂g-kháu, ia̍h beh kng lí chhut-khì.

10婦人人即時lek tī伊ê腳前，斷氣；hiah-ê少年人入來，看伊已經死，就扛伊出去，埋葬tī伊丈夫ê身邊。Hū-jîn-lâng chek-sî lek tī i ê kha-chêng, tn̄g khùi; hiah ê siàu-liân lâng ji̍p-lâi, khòaⁿ i í-keng sí, chiū kng i chhut-khì, bâi-chòng tī i tiōng-hu ê sin-piⁿ.

11全教會kap見若聽見chiah-ê tāi-chì ê，lóng大驚。Choân kàu-hōe kap kìⁿ-nā thiaⁿ-kìⁿ chiah ê tāi-chì ê, lóng tōa kiaⁿ.

12Tùi使徒ê手有行chōe-chōe神蹟kap奇事tī百姓ê中間；眾人lóng同心聚集tī所羅門ê léng廊。Tùi sù-tô͘ ê chhiú ū kiâⁿ chōe-chōe sîn-jiah kap kî-sū tī peh-sìⁿ ê tiong-kan; chèng lâng lóng tâng-sim chū-chi̍p tī Só͘-lô-bûn ê léng-lông.

13其餘ê人無一個敢近óa in；但是百姓尊重in；Kî-û ê lâng bô chi̍t-ê káⁿ kūn-óa in; nā-sī peh-sìⁿ chun-tiōng in;

14信來歸主ê人益發加添，男女lóng真chōe；sìn lâi kui Chú ê lâng it-hoat ke-thiⁿ, lâm-lú lóng chin chōe;

15甚至有扛病人到tī街路，hē tī舖á，ǹg望彼得經過ê時，in有ê話hō͘伊ê影蔭tio̍h。sīm-chì ū kng pīⁿ-lâng kàu tī ke-lō͘, hē tī pho͘-á, ǹg-bāng Pí-tek keng-kè ê sî, in ū-ê ōe hō͘ i ê iáⁿ ìm-tio̍h.

16Iáu有chōe-chōe人tùi耶路撒冷四圍ê城來；chhōa病人kap hō͘邪神所苦楚ê；in lóng得tio̍h醫好。Iáu ū chōe-chōe lâng tùi Iâ-lō͘-sat-léng sì-ûi ê siâⁿ lâi; chhōa pīⁿ-lâng kap hō͘ siâ-sîn só͘ khó͘-chhó͘ ê; in lóng tit-tio̍h i-hó.

17獨獨祭司頭，以及lóng總同--伊ê人，(就是撒都該黨，) khiā起來，滿心怨妒，To̍k-to̍k chè-si-thâu, í-ki̍p lóng-chóng tâng--i ê lâng, (chiū-sī Sat-thó͘-kai tóng,) khiā-khí-lâi, móa-sim oàn-tò͘,

18下手掠使徒，關in tī公ê監。hē chhiú lia̍h sù-tô͘, koaiⁿ in tī kong ê kaⁿ.

19但是主ê天使暝時開監門，chhōa in出，講，Nā-sī Chú ê thiⁿ-sài mî-sî khui kaⁿ mn̂g, chhōa in chhut, kóng,

20Lín tio̍h去khiā tī殿裡，用chit-ê活命ê話lóng對百姓講。Lín tio̍h khì khiā tī tiān-ni̍h, ēng chit ê Oa̍h-miā ê ōe lóng tùi peh-sìⁿ kóng.

21In聽見chiah-ê話，天phú光就入殿來教示。祭司頭kap 同--伊ê人到，招集公會，kap以色列百姓ê老大，差人去監裡帶in來。In thiaⁿ-kìⁿ chiah ê ōe, thiⁿ phú-kng chiū ji̍p tiān lâi kà-sī. Chè-si-thâu kap tâng--i ê lâng kàu, chio-chi̍p kong-hōe, kap Í-sek-lia̍t peh-sìⁿ ê lāu-tōa, chhe lâng khì kaⁿ-ni̍h tòa in lâi.

22衙役到tè，chhē in無tī監裡；就tò來報，講，Gê-ia̍h kàu tè, chhē in bô tī kaⁿ-ni̍h; chiū tò-lâi pò, kóng,

23阮看見監關到真堅固，顧守ê人khiā tī ta̍k-ê門口；到開ê時，chhē無人tī內面。Goán khòaⁿ-kìⁿ kaⁿ koaiⁿ kàu chin kian-kò͘, kò͘-siú ê lâng khiā tī ta̍k ê mn̂g-kháu; kàu khui ê sî, chhē bô lâng tī lāi-bīn.

24殿司kap chiah-ê祭司頭聽見chiah-ê話，就為tio̍h in大躊躇，m̄知chit-ê事beh怎樣。Tiān-si kap chiah ê chè-si-thâu thiaⁿ-kìⁿ chiah ê ōe, chiū ūi-tio̍h in tōa tiû-tû, m̄ chai chit ê sū beh cháiⁿ-iūⁿ.

25有一人來報in講，Lín所關tī監裡ê人，現在khiā tī殿裡教示百姓。Ū chi̍t lâng lâi pò in kóng, Lín só͘ koaiⁿ tī kaⁿ-ni̍h ê lâng hiān-chāi khiā tī tiān-ni̍h kà-sī peh-sìⁿ.

26殿司kap衙役就去chhōa in來，m̄敢用強；因為驚百姓，驚了hō͘ in用石頭tìm。Tiān-si kap gê-ia̍h chiū khì chhōa in lâi, m̄ káⁿ ēng kiông; in-ūi kiaⁿ peh-sìⁿ, kiaⁿ-liáu hō͘ in ēng chio̍h-thâu tìm.

27Chhōa來了，就hō͘ in khiā tī公會ê面前。祭司頭問in，講，Chhōa lâi liáu, chiū hō͘ in khiā tī kong-hōe ê bīn-chêng. Chè-si-thâu mn̄g in, kóng,

28阮bat嚴嚴禁lín莫得用chit-ê名教示人，lín就將lín ê教示遍傳tī耶路撒冷，beh用chit人ê血歸tī阮。Goán bat giâm-giâm kìm lín bo̍h-tit ēng chit ê miâ kà-sī lâng, lín chiū chiong lín ê kà-sī piàn thoân tī Iâ-lō͘-sat-léng, beh ēng chit lâng ê huih kui tī goán.

29彼得kap其餘ê使徒應，講，順thàn上帝khah過頭tī順thàn人，是合宜。Pí-tek kap kî-û ê sù-tô͘ ìn, kóng, Sūn-thàn Siōng-tè khah kè-thâu tī sūn-thàn lâng, sī ha̍p-gî.

30Lín所吊tī柴裡，來害死ê耶穌，咱列祖ê上帝已經hō͘伊koh活。Lín só͘ tiàu tī chhâ-ni̍h, lâi hāi-sí ê Iâ-so͘, lán lia̍t-chó͘ ê Siōng-tè í-keng hō͘ I koh-oa̍h.

31Chit-ê耶穌，上帝用家己ê chiàⁿ手舉起伊做人君，做救主，beh將反悔kap赦罪賞賜以色列百姓。Chit ê Iâ-so͘, Siōng-tè ēng ka-kī ê chiàⁿ chhiú kú-khí I chòe Jîn-kun, chòe Kiù-chú, beh chiong hoán-hóe kap sià-chōe siúⁿ-sù Í-sek-lia̍t peh-sìⁿ.

32Koh阮為tio̍h chiah-ê事做干證；上帝所賞賜hō͘順thàn伊ê人ê聖神也做干證。Koh goán ūi-tio̍h chiah ê sū chòe kan-chèng; Siōng-tè só͘ siúⁿ-sù hō͘ sūn-thàn I ê lâng ê Sèng Sîn iā chòe kan-chèng.

33In聽了，盡在受氣，ài害死in。In thiaⁿ-liáu, chīn-chāi siū-khì, ài hāi-sí in.

34獨獨有一個法利賽人，名Ka-má-lia̍t，是眾百姓所敬重ê教法師，起來khiā tī公會中，吩咐hō͘ hiah-ê人暫時出去。To̍k-to̍k ū chi̍t ê Hoat-lī-sài lâng, miâ Ka-má-lia̍t, sī chèng peh-sìⁿ só͘ kèng-tiōng ê kàu-hoat-su, khí-lâi khiā tī kong-hōe tiong, hoan-hù hō͘ hiah ê lâng chiām-sî chhut-khì.

35就對大家講，以色列人ah，lín tio̍h家己謹慎，beh怎樣辨chiah-ê人。Chiū tùi tāi-ke kóng, Í-sek-lia̍t lâng ah, lín tio̍h ka-kī kín-sīn, beh cháiⁿ-iūⁿ pān chiah ê lâng.

36因為前有Tiu-tāi出頭，家己誇口做大；óa伊ê人約略四百；伊受thâi，tè伊ê人四散，無lô去。In-ūi chêng ū Tiu-tāi chhut-thâu, ka-kī khoa-kháu chòe tōa; óa i ê lâng iok-lio̍k sì pah; i siū thâi, tè i ê lâng sì-sòaⁿ, bô-lô-khì.

37Chit人以後造家甲ê時，koh有加利利ê猶大出頭引誘百姓thàn伊；伊也滅無，tè伊ê人lóng四散。Chit lâng í-āu chō ke-kah ê sî koh ū Ka-lī-lī ê Iû-tāi chhut-thâu ín-iú peh-sìⁿ thàn i; i iā bia̍t-bô, tè i ê lâng lóng sì-sòaⁿ.

38Taⁿ我kā lín講，莫得chhap chiah-ê人，放kù-chāi in；因為chit-ê計謀，chit-ê所做，若出tī人，的確beh敗壞；Taⁿ góa kā lín kóng, Bo̍h-tit chhap chiah ê lâng, pàng kù-chāi in; in-ūi chit ê kè-bô͘, chit ê só͘ chòe, nā chhut tī lâng, tek-khak beh pāi-hoāi;

39若出tī上帝，lín就bōe敗壞in；koh驚了lín也是kap上帝交戰。nā chhut tī Siōng-tè, lín chiū bōe pāi-hoāi in; koh kiaⁿ-liáu lín iā sī kap Siōng-tè kau-chiàn.

40In就thàn伊；召使徒來phah in，命令in莫得用耶穌ê名來講，就放in。In chiū thàn i; tiàu sù-tô͘ lâi phah in, bēng-lēng in bo̍h-tit ēng Iâ-so͘ ê miâ lâi kóng, chiū pàng in.

41使徒離開公會前，lóng歡喜，是因為in得tio̍h看做會堪得為tio̍h chit-ê名受凌辱。Sù-tô͘ lī-khui kong-hōe chêng, lóng hoaⁿ-hí, sī in-ūi in tit-tio̍h khòaⁿ-chòe ōe kham-tit ūi-tio̍h chit ê Miâ siū lêng-jio̍k.

42就tī殿裡，tī人家，教示人，傳耶穌做基督，ta̍k日無soah。Chiū tī tiān-ni̍h, tī jîn-ke, kà-sī lâng, thoân Iâ-so͘ chòe Ki-tok, ta̍k ji̍t bô soah.