1祭司頭就講，Chiah-ê事是án-ni mah？Chè-si-thâu chiū kóng, Chiah ê sū sī án-ni mah?

2司提反講，列位父兄，請聽，咱ê祖亞伯拉罕，iáu tī Bí-só͘-pho-tāi-bí，bē khiā起Hap-lân ê時，榮光ê上帝對伊顯現，kā伊講，Sū-thê-hoán kóng, Lia̍t-ūi hū-heng, chhiáⁿ thiaⁿ, Lán ê chó͘ A-pek-la̍h-hán, iáu tī Bí-só͘-pho-tāi-bí, bē khiā-khí Hap-lân ê sî, êng-kng ê Siōng-tè tùi i hián-hiān, kā i kóng,

3離開你ê地方kap宗族，到我所beh指示你ê地方。Lī-khui lí ê tōe-hng kap chong-cho̍k, kàu góa só͘ beh chí-sī lí ê tōe-hng.

4Hit時伊就出Ka-le̍k-tí人ê地方，khiā起tī Hap-lân；伊ê老父死了後，上帝tùi hia kā伊徙到chit所在，就是lín taⁿ所khiā起ê；Hit sî i chiū chhut Ka-le̍k-tí lâng ê tōe-hng, khiā-khí tī Hap-lân; i ê lāu-pē sí liáu-āu, Siōng-tè tùi hia kā i sóa kàu chit só͘-chāi, chiū-sī lín taⁿ só͘ khiā-khí ê;

5tī chia並無產業hō͘伊，連khiā腳ê所在也無；hit時伊iáu-bē有kiáⁿ，但是上帝應允beh用chit所在hō͘伊做業，續到伊ê後裔。tī chia pēng bô sán-gia̍p hō͘ i, liân khiā-kha ê só͘-chāi iā bô; hit sî i iáu-bē ū kiáⁿ, nā-sī Siōng-tè èng-ún beh ēng chit só͘-chāi hō͘ i chòe gia̍p, sòa kàu i ê hō͘-è.

6總是上帝有án-ni講，伊ê後裔teh-beh出外tī異邦，人beh用in做奴才，pháiⁿ款待in，四百年久。Chóng-sī Siōng-tè ū án-ni kóng, i ê hō͘-è teh-beh chhut-gōa tī īⁿ-pang, lâng beh ēng in chòe lô͘-châi, pháiⁿ khoán-thāi in, sì-pah nî kú.

7上帝koh講，In做奴才所服事ê國，我beh審判伊；後來in beh出來，服事我tī chit位。Siōng-tè koh kóng, In chòe lô͘-châi só͘ ho̍k-sāi ê kok, góa beh sím-phòaⁿ i; āu-lâi in beh chhut-lâi, ho̍k-sāi góa tī chit ūi.

8Koh用割禮ê約hō͘伊；Tùi án-ni，伊生以撒，第八日kā伊行割禮；以撒生雅各，雅各生咱十二個祖。Koh ēng kat-lé ê iok hō͘ i; tùi án-ni i siⁿ Í-sat, tē poeh ji̍t kā i kiâⁿ kat-lé; Í-sat siⁿ Ngá-kok, Ngá-kok siⁿ lán cha̍p-jī ê chó͘.

9列祖怨妒約瑟，賣伊去埃及；Lia̍t-chó͘ oàn-tò͘ Iok-sek, bōe i khì Ai-ki̍p;

10但是上帝kap伊tī-teh，救伊脫離lóng總ê苦難，hō͘伊tī埃及王法老ê面前得tio̍h恩典kap智慧；法老就立伊總理埃及國，kap伊ê全家。nā-sī Siōng-tè kap i tī-teh, kiù i thoat-lī lóng-chóng ê khó͘-lān, hō͘ i tī Ai-ki̍p ông Hoat-ló ê bīn-chêng tit-tio̍h un-tián kap tì-hūi; Hoat-ló chiū li̍p i chóng-lí Ai-ki̍p kok, kap i ê choân ke.

11Tú-tio̍h埃及、迦南，遍地飢荒，大艱苦；咱ê列祖chhē無米糧。Tú-tio̍h Ai-ki̍p, Ka-lâm, piàn tōe ki-hng, tōa kan-khó͘; lán ê lia̍t-chó͘ chhē bô bí-niû.

12雅各聽見埃及有五穀，就頭一pái 差咱ê列祖去。Ngá-kok thiaⁿ-kìⁿ Ai-ki̍p ū gō͘-kak, chiū thâu chi̍t pái chhe lán ê lia̍t-chó͘ khì.

13到第二pái約瑟hō͘兄弟bat伊；約瑟ê族法老續得tio̍h知。Kàu tē jī pái Iok-sek hō͘ hiaⁿ-tī bat i; Iok-sek ê cho̍k Hoat-ló sòa tit-tio̍h chai.

14約瑟就差人poaⁿ請老父雅各，kap全族，七十五人來。Iok-sek chiū chhe lâng poaⁿ-chhiáⁿ lāu-pē Ngá-kok, kap choân cho̍k, chhit-cha̍p-gō͘ lâng lâi.

15雅各就落去埃及；伊kap咱ê列祖死tī hia；Ngá-kok chiū lo̍h-khì Ai-ki̍p; i kap lán ê lia̍t-chó͘ sí tī hia;

16運棺到Sī-kiàm，埋葬tī亞伯拉罕用銀tùi Hap-boat ê kiaⁿ孫所買tī Sī-kiàm ê墓地。ūn koan kàu Sī-kiàm, bâi-chòng tī A-pek-la̍h-hán ēng gûn tùi Hap-boat ê kiáⁿ-sun só͘ bóe tī Sī-kiàm ê bōng-tōe.

17到上帝tùi亞伯拉罕用chiù-chōa所應允ê，hit-ê期已經近，百姓就生湠興旺tī埃及；Kàu Siōng-tè tùi A-pek-la̍h-hán ēng chiù-chōa só͘ èng-ún ê, hit ê kî í-keng kūn, peh-sìⁿ chiū siⁿ-thòaⁿ heng-ōng tī Ai-ki̍p;

18到別個王m̄-bat約瑟ê，起來管理埃及。kàu pa̍t ê ông m̄ bat Iok-sek ê, khí-lâi koán-lí Ai-ki̍p.

19伊謀害咱ê族，pháiⁿ款待咱ê祖，命令tio̍h棄sak in ê嬰á，hō͘ in bōe活。I bô͘-hāi lán ê cho̍k, pháiⁿ khoán-thāi lán ê chó͘, bēng-lēng tio̍h khì-sak in ê eⁿ-á, hō͘ in bōe oa̍h.

20Hit時摩西出世，非常ê清秀；養飼tī老父ê家三月日；Hit sî Mô͘-se chhut-sì, hui-siông ê chheng-siù; iúⁿ-chhī tī lāu-pē ê ke saⁿ ge̍h ji̍t;

21受棄sake5時，法老ê cha-bó͘-kiáⁿ拾去，養飼做家己ê kiáⁿ。siū khì-sak ê sî, Hoat-ló ê cha-bó͘-kiáⁿ khioh-khì, iúⁿ-chhī chòe ka-kī ê kiáⁿ.

22摩西學習埃及人lóng總ê學問；講話行tāi-chì lóng有才能。Mô͘-se ha̍k-si̍p Ai-ki̍p lâng lóng-chóng ê ha̍k-būn; kóng ōe kiâⁿ tāi-chì lóng ū châi-lêng.

23將近四十歲，想beh去看伊ê兄弟，以色列ê kiaⁿ孫。Chiong-kūn sì-cha̍p hè, siūⁿ beh khì khòaⁿ i ê hiaⁿ-tī, Í-sek-lia̍t ê kiáⁿ-sun.

24看見一人受冤枉，就保護伊，替受屈ê人伸冤，phah埃及人；Khòaⁿ-kìⁿ chi̍t lâng siū oan-óng, chiū pó-hō͘ i, thòe siū khut ê lâng sin-oan, phah Ai-ki̍p lâng;

25phah算兄弟會曉悟上帝用伊ê手救in；但是in bōe曉悟。phah-sǹg hiaⁿ-tī ōe hiáu-ngō͘ Siōng-tè ēng i ê chhiú kiù in; nā-sī in bōe hiáu-ngō͘.

26隔日tú-tn̄g in teh相phah，ài hō͘ in koh和，就講，Lín是兄弟，啥事相欺負？Keh ji̍t tú-tn̄g in teh saⁿ-phah, ài hō͘ in koh hô, chiū kóng, Lín sī hiaⁿ-tī, siáⁿ-sū saⁿ khi-hū?

27Hit-ê欺負厝邊ê人拒絕伊，講，Chī-chūi設立你做官府，做審判司，來治理阮ah？Hit ê khi-hū chhù-piⁿ ê lâng kū-choa̍t i, kóng, Chī-chūi siat-li̍p lí chòe koaⁿ-hú, chòe sím-phòaⁿ si, lâi tī-lí goán ah?

28你ài beh害死我，親像昨日害死hit-ê埃及人mah？Lí ài beh hāi-sí góa, chhin-chhiūⁿ chā-ji̍t hāi-sí hit ê Ai-ki̍p lâng mah?

29摩西因為chit句話就走，出外tī米甸ê地方；tī hia生兩個kiáⁿ。Mô͘-se in-ūi chit kù ōe chiū cháu, chhut-gōa tī Bí-tiân ê tōe-hng; tī hia siⁿ nn̄g ê kiáⁿ.

30過四十年，tī西奈山ê曠野，刺phè火燄ê中間，有天使對伊顯現。Kè sì-cha̍p nî, tī Se-nái soaⁿ ê khòng-iá, chhì-phè hé-iām ê tiong-kan, ū thiⁿ-sài tùi i hián-hiān.

31摩西看了，奇怪所看見ê；tú-á近óa beh認真看，就有主ê聲，講，Mô͘-se khòaⁿ-liáu, kî-koài só͘ khòaⁿ-kìⁿ ê; tú-á kūn-óa beh jīn-chin khòaⁿ, chiū ū Chú ê siaⁿ, kóng,

32我就是你ê列祖ê上帝，就是亞伯拉罕、以撒、雅各ê上帝。摩西ngia̍uh-ngia̍uh-chhoah，m̄敢認真看。Góa chiū-sī lí ê lia̍t-chó͘ ê Siōng-tè, chiū-sī A-pek-la̍h-hán, Í-sat, Ngá-kok ê Siōng-tè. Mô͘-se ngia̍uh-ngia̍uh-chhoah, m̄ káⁿ jīn-chin khòaⁿ.

33主kā伊講，你ê鞋tio̍h thǹg起來；因為你所khiā ê位是聖地。Chú kā i kóng, Lí ê ôe tio̍h thǹg-khí-lâi; in-ūi lí só͘ khiā ê ūi sī sèng tōe.

34我ê百姓tī埃及，我實在看見in ê困苦，亦聽見in ê吐氣，就降臨來救in；taⁿ你來，我beh差你去埃及。Góa ê peh-sìⁿ tī Ai-ki̍p, góa si̍t-chāi khòaⁿ-kìⁿ in ê khùn-khó͘, ia̍h thiaⁿ-kìⁿ in ê thó͘-khùi, chiū kàng-lîm lâi kiù in; taⁿ lí lâi, góa beh chhe lí khì Ai-ki̍p.

35Chit-ê摩西就是in所拒絕ê，講，Chī-chūi設立你做官府，做審判司ah？Chit-ê人上帝託刺phè內對伊所顯現ê天使，差伊做官府，做救贖ê。Chit ê Mô͘-se chiū-sī in só͘ kū-choa̍t ê, kóng, Chī-chūi siat-li̍p lí chòe koaⁿ-hú, chòe sím-phòaⁿ si ah? Chit ê lâng Siōng-tè thok chhì-phè lāi tùi i só͘ hián-hiān ê thiⁿ-sài, chhe i chòe koaⁿ-hú, chòe kiù-sio̍k ê.

36Chit-ê人chhōa in出，行奇事神蹟，tī埃及、紅海，kap曠野，四十年久。Chit ê lâng chhōa in chhut, kiâⁿ kî-sū sîn-jiah, tī Ai-ki̍p, Âng-hái, kap khòng-iá, sì-cha̍p nî kú.

37Chit-ê人就是hit-ê kā以色列kiáⁿ孫講ê摩西，講，上帝beh tùi lín兄弟ê中間為tio̍h lín théng-siⁿ一個先知，親像我。Chit ê lâng chiū-sī hit ê kā Í-sek-lia̍t kiáⁿ-sun kóng ê Mô͘-se, kóng, Siōng-tè beh tùi lín hiaⁿ-tī ê tiong-kan ūi-tio̍h lín théng siⁿ chi̍t ê sian-ti, chhin-chhiūⁿ góa.

38Chit-ê人就是hit-ê tī曠野裡 ê會中，kap tī西奈山對伊講話ê天使，以及列祖，saⁿ-kap tī-teh ê；伊亦得tio̍h活ê詔命傳hō͘咱；Chit ê lâng chiū-sī hit ê tī khòng-iá-ni̍h ê hōe-tiong, kap tī Se-nái soaⁿ tùi i kóng ōe ê thiⁿ-sài, í-ki̍p lia̍t-chó͘, saⁿ-kap tī-teh ê; i ia̍h tit-tio̍h oa̍h ê chiàu-bēng thoân hō͘ lán;

39咱ê列祖m̄-ài順thàn伊，反tńg拒絕伊，心倒tńg tī埃及，kā亞倫講，lán ê lia̍t-chó͘ m̄ ài sūn-thàn i, hoán-tńg kū-choa̍t i, sim tò-tńg tī Ai-ki̍p, kā A-lûn kóng,

40你tio̍h kā阮造神明做頭chhōa阮；因為chit-ê chhōa阮出埃及ê摩西，m̄知伊怎樣。Lí tio̍h kā goán chō sîn-bêng chòe thâu chhōa goán; in-ūi chit ê chhōa goán chhut Ai-ki̍p ê Mô͘-se, m̄ chai i cháiⁿ-iūⁿ.

41Hit時in就造牛á，koh獻祭tī hit-ê像，歡喜in家己ê手所做ê。Hit sî in chiū chō gû-á, koh hiàn-chè tī hit ê siōng, hoaⁿ-hí in ka-kī ê chhiú só͘ chòe ê.

42上帝就oa̍t-lìn-tńg，chhut-chāi in服事天象；親像先知ê冊所記載，講， 以色列家ah，lín tī曠野歷過四十年， Kiám bat用牲禮祭物獻hō͘我mah？Siōng-tè chiū oa̍t-lìn-tńg, chhut-chāi in ho̍k-sāi thian-siōng; chhin-chhiūⁿ sian-ti ê chheh só͘ kì-chài, kóng, Í-sek-lia̍t ke ah, lín tī khòng-iá le̍k-kè sì-cha̍p nî, Kiám bat ēng seng-lé chè-mi̍h hiàn hō͘ góa mah?

43Lín扛Mô͘-lo̍k ê布棚， Kap Lí-hoan神ê星， 就是lín所造來拜ê像； 我beh遷徙lín tī巴比倫外。Lín kng Mô͘-lo̍k ê pò͘-pîⁿ, Kap Lí-hoan sîn ê chhiⁿ, Chiū-sī lín só͘ chō lâi pài ê siōng; Góa beh chhian-sóa lín tī Pa-pí-lûn gōa.

44咱列祖tī曠野有證據ê會幕，親像tùi摩西講ê吩咐，Tio̍h照所看見ê款式來造伊。Lán lia̍t-chó͘ tī khòng-iá ū chèng-kù ê hōe-bō͘, chhin-chhiūⁿ tùi Mô͘-se kóng ê hoan-hù, Tio̍h chiàu só͘ khòaⁿ-kìⁿ ê khoán-sit lâi chō i.

45後來上帝趕逐外邦人tī咱ê祖ê面前，咱ê祖kap約書亞既然承接chit-ê會幕，就帶伊入去tiàm-tī hit-ê地方，直到大衛ê時；Āu-lâi Siōng-tè kóaⁿ-tio̍k gōa-pang lâng tī lán ê chó͘ ê bīn-chêng, lán ê chó͘ kap Iok-su-a kì-jiân sêng-chiap chit ê hōe-bō͘, chiū tòa i ji̍p khì tiàm-tī hit ê tōe-hng, ti̍t kàu Tāi-pi̍t ê sî;

46伊得tio̍h恩典tī上帝ê面前，ài beh kā雅各ê上帝chhē一個khiā起ê位。i tit-tio̍h un-tián tī Siōng-tè ê bīn-chêng, ài beh kā Ngá-kok ê Siōng-tè chhē chi̍t ê khiā-khí ê ūi.

47獨獨所羅門chiah kā伊起厝。To̍k-to̍k Só͘-lô-bûn chiah kā i khí chhù.

48總是至koânê無tiàm-tī人ê手所起ê；親像先知講，Chóng-sī Chì-koâiⁿ-ê bô tiàm tī lâng ê chhiú só͘ khí ê; chhin-chhiūⁿ sian-ti kóng,

49主講，天是我ê座位， 地是我ê腳踏椅。 Lín beh kā我起甚麼號ê厝？ Á是我安歇ê所在tī tá-lo̍h ah？Chú kóng, Thiⁿ sī góa ê chō-ūi, Tōe sī góa ê kha-ta̍h-í. Lín beh kā góa khí sím-mi̍h hō ê chhù? Á-sī góa an-hioh ê só͘-chāi tī tá-lo̍h ah?

50Chiah-ê一切kiám m̄是我ê手所創造ê mah？Chiah-ê it-chhè kiám m̄ sī góa ê chhiú só͘ chhòng-chō ê mah?

51Lín ê頷頸硬，心kap耳未受割禮ê人，常常悖逆聖神；lín ê祖án-ni，lín 也án-ni。Lín ê ām-kún ngī, sim kap hī bē siū kat-lé ê lâng, siông-siông pōe-ge̍k Sèng Sîn; lín ê chó͘ án-ni, lín iā án-ni.

52先知中tá-lo̍h一個無hō͘ lín ê祖khún-tio̍k伊ah？hiah-ê讖語義ê teh-beh到ê人，in也害死in；taⁿ chit-ê義ê lín bat送交來害死伊；Sian-ti tiong tá-lo̍h chi̍t-ê bô hō͘ lín ê chó͘ khún-tio̍k i ah? hiah ê chhàm-gú Gī-ê teh-beh kàu ê lâng, in iā hāi-sí in; taⁿ chit ê Gī-ê lín bat sàng-kau lâi hāi-sí I;

53tùi天使來設ê律法，lín受tio̍h也無守伊。tùi thiⁿ-sài lâi siat ê lu̍t-hoat, lín siū-tio̍h iā bô siú i.

54In聽見chiah-ê話，心內盡在受氣，ǹg伊咬牙切齒。In thiaⁿ-kìⁿ chiah ê ōe, sim-lāi chīn-chāi siū-khì, ǹg i kā-gê chhiat-chhí.

55獨獨司提反hō͘聖神充滿，注目看天，看見上帝ê榮光，耶穌khiā tī上帝ê大pêng，To̍k-to̍k Sū-thê-hoán hō͘ Sèng Sîn chhiong-móa, chù-ba̍k khòaⁿ thiⁿ, khòaⁿ-kìⁿ Siōng-tè ê êng-kng, Iâ-so͘ khiā tī Siōng-tè ê tōa pêng,

56就講，看ah！我看見天開，人子khiā tī上帝ê大pêng。chiū kóng, Khòaⁿ ah! góa khòaⁿ-kìⁿ thiⁿ khui, Jîn-chú khiā tī Siōng-tè ê tōa pêng.

57In大聲喉叫，ng耳孔，同心oe-khoeh伊；In tōa siaⁿ âu-kiò, ng hī-khang, tâng sim oe-khoeh i;

58趕伊出城，用石頭tìm伊；做干證ê人將in ê衫hē tī少年人，名叫掃羅，ê腳前。kóaⁿ i chhut siâⁿ, ēng chio̍h-thâu tìm i; chòe kan-chèng ê lâng chiong in ê saⁿ hē tī siàu-liân lâng, miâ kiò Sò-lô, ê kha-chêng.

59In用石頭tìm司提反；司提反求，講，主耶穌ah，接納我ê神。In ēng chio̍h-thâu tìm Sū-thê-hoán; Sū-thê-hoán kiû, kóng, Chú Iâ-so͘ ah, chiap-la̍p góa ê sîn.

60Koh跪落去，大聲叫，講，主ah，莫得用chit-ê罪歸tī in。講soah就睏。掃羅也歡喜伊死。Koh kūi-lo̍h-khì, tōa siaⁿ kiò, kóng, Chú ah, bo̍h-tit ēng chit ê chōe kui tī in. Kóng soah chiū khùn. Sò-lô iā hoaⁿ-hí i sí.

1Hit日tī耶路撒冷ê教會tú-tio̍h大khún-tio̍k；使徒以外，lóng四散tī猶太、撒馬利亞chiah-ê地方。Hit ji̍t tī Iâ-lō͘-sat-léng ê kàu-hōe tú-tio̍h tōa khún-tio̍k; sù-tô͘ í-gōa, lóng sì-sòaⁿ tī Iû-thài, Sat-má-lī-a chiah ê tōe-hng.

2有敬虔ê人埋葬司提反，為tio̍h伊搥胸大啼哭。Ū kèng-khiân ê lâng bâi-chòng Sū-thê-hoán, ūi-tio̍h i tûi heng tōa thî-khàu.

3掃羅大陷害教會，入ta̍k人ê家，拖in ê男女，送交落監。Sò-lô tōa hām-hāi kàu-hōe, ji̍p ta̍k lâng ê ke, thoa in ê lâm-lú, sàng-kau lo̍h kaⁿ.

4Tùi án-ni，hiah-ê四散ê人遍行，傳福音ê道理。Tùi án-ni hiah ê sì-sòaⁿ ê lâng piàn kiâⁿ, thoân hok-im ê tō-lí.

5腓力落去撒馬利亞ê城，用基督傳hō͘ in。Hui-le̍k lo̍h-khì Sat-má-lī-a ê siâⁿ, ēng Ki-tok thoân hō͘ in.

6眾人聽見，koh看見所行ê神蹟，就同心意向腓力ê話。Chèng lâng thiaⁿ-kìⁿ, koh khòaⁿ-kìⁿ só͘ kiâⁿ ê sîn-jiah, chiū tâng sim ì-hiòng Hui-le̍k ê ōe.

7因為chōe-chōe人有患tio̍h邪神，hiah-ê邪神大聲喉叫出去；piàn-sūi ê、跛腳ê，亦chōe-chōe得tio̍h醫好。In-ūi chōe-chōe lâng ū hoān-tio̍h siâ-sîn, hiah ê siâ-sîn tōa siaⁿ âu-kiò chhut-khì; piàn-sūi ê, pái-kha ê, ia̍h chōe-chōe tit-tio̍h i-hó.

8Hit-ê城內大歡喜。Hit ê siâⁿ-lāi tōa hoaⁿ-hí.

9總是有一人，名叫西門，平素tī城內行邪術，自誇做大，hō͘撒馬利亞ê百姓gông-ngia̍h；Chóng-sī ū chi̍t lâng, miâ kiò Se-bûn, pêng-sò͘ tī siâⁿ-lāi kiâⁿ siâ-su̍t, chū-khoa chòe tōa, hō͘ Sat-má-lī-a ê peh-sìⁿ gông-ngia̍h;

10tùi細到大，無m̄意向伊，講，Chit人是上帝ê權能，就是hit-ê稱做大ê。tùi sòe kàu tōa, bô m̄ ì-hiòng i, kóng, Chit lâng sī Siōng-tè ê koân-lêng, chiū-sī hit ê chheng chòe Tōa ê.

11In意向伊ê緣故，是因為伊久久用邪術hō͘ in gông-ngia̍h。In ì-hiòng i ê iân-kò͘, sī in-ūi i kú-kú ēng siâ-su̍t hō͘ in gông-ngia̍h.

12到in信腓力所傳ê福音，論上帝ê國kap耶穌基督ê名，就有男女受洗禮。Kàu in sìn Hui-le̍k só͘ thoân ê hok-im, lūn Siōng-tè ê kok kap Iâ-so͘ Ki-tok ê miâ, chiū ū lâm-lú siū sóe-lé.

13西門家己也信；已經受洗禮，常常跟隨腓力；看伊所行chiah-ê神蹟大權能，就gông-ngia̍h。Se-bûn ka-kī iā sìn; í-keng siū sóe-lé, siông-siông kun-sûi Hui-le̍k; khòaⁿ i só͘ kiâⁿ chiah ê sîn-jiah tōa koân-lêng, chiū gông-ngia̍h.

14Tī耶路撒冷ê使徒聽見撒馬利亞已經接納上帝ê道理，就差彼得約翰去in hia。Tī Iâ-lō͘-sat-léng ê sù-tô͘ thiaⁿ-kìⁿ Sat-má-lī-a í-keng chiap-la̍p Siōng-tè ê tō-lí, chiū chhe Pí-tek Iok-hān khì in hia.

15In已經落去，就替in祈禱，hō͘ in受聖神；In í-keng lo̍h-khì, chiū thòe in kî-tó, hō͘ in siū Sèng Sîn;

16因為聖神iáu-bē臨到in一人；in只有受洗禮，歸tī主耶穌ê名nā-tiāⁿ。in-ūi Sèng Sîn iáu-bē lîm-kàu in chi̍t lâng; in chí-ū siū sóe-lé, kui tī Chú Iâ-so͘ ê miâ nā-tiāⁿ.

17Tùi án-ni，kā in按手，in就受聖神。Tùi án-ni kā in hōaⁿ chhiú, in chiū siū Sèng Sîn .

18總是西門看見tùi使徒ê按手就有聖神hō͘人，chiah將錢獻hō͘ in，Chóng-sī Se-bûn khòaⁿ-kìⁿ tùi sù-tô͘ ê hōaⁿ chhiú chiū ū Sèng Sîn hō͘ lâng, chiah chiong chîⁿ hiàn hō͘ in,

19講，亦將chit-ê權hō͘我，致到我ê手所hōaⁿ ê人受tio̍h聖神。kóng, Ia̍h chiong chit ê koân hō͘ góa, tì-kàu góa ê chhiú só͘ hōaⁿ ê lâng siū-tio̍h Sèng Sîn.

20獨獨彼得對伊講，你ê銀kap你saⁿ-kap滅無，因為你phah算上帝ê賞賜beh用錢來買。To̍k-to̍k Pí-tek tùi i kóng, Lí ê gûn kap lí saⁿ-kap bia̍t-bô, in-ūi lí phah-sǹg Siōng-tè ê siúⁿ-sù beh ēng chîⁿ lâi bóe.

21你tī chit-ê事無份，無干涉；因為tī上帝ê面前你ê心不正。Lí tī chit ê sū bô hūn, bô kan-sia̍p; in-ūi tī Siōng-tè ê bīn-chêng lí ê sim put-chèng.

22所以tio̍h反悔離開你chit-ê pháiⁿ，來求主，kiám-chhái你心內ê念頭會得赦免。Só͘-í tio̍h hoán-hóe lī-khui lí chit ê pháiⁿ, lâi kiû Chú, kiám-chhái lí sim-lāi ê liām-thâu ōe tit sià-bián.

23因為我看見你入tī苦膽ê中間，hō͘不義綑縛。In-ūi góa khòaⁿ-kìⁿ lí ji̍p tī khó͘-táⁿ ê tiong-kan, hō͘ put-gī khún-pa̍k.

24西門應講，Lín替我求主，hō͘ lín所講ê lóng無到tī我。Se-bûn ìn kóng, Lín thòe góa kiû Chú, hō͘ lín só͘ kóng ê lóng bô kàu tī góa.

25In已經做干證來傳主ê道理，就tò去耶路撒冷；tī撒馬利亞人chōe-chōe ê鄉社傳福音。In í-keng chòe kan-chèng lâi thoân Chú ê tō-lí, chiū tò-khì Iâ-lō͘-sat-léng; tī Sat-má-lī-a lâng chōe-chōe ê hiuⁿ-siā thoân hok-im.

26主ê天使tùi腓力講，起來，tùi南勢去，到tùi耶路撒冷落去Ka-sat ê路；hia就是曠野。Chú ê thiⁿ-sài tùi Hui-le̍k kóng, Khí-lâi, tùi lâm-sì khì, kàu tùi Iâ-lō͘-sat-léng lo̍h-khì Ka-sat ê lō͘; hia chiū-sī khòng-iá.

27就起來去；tú-tn̄g有一個Ai-thê-o-pek人，就是Ai-thê-o-pek女王，Kan-tāi-ki，有權ê太監，總管伊ê銀庫；伊已經到耶路撒冷敬拜；Chiū khí-lâi khì; tú-tn̄g ū chi̍t ê Ai-thê-o-pek lâng, chiū-sī Ai-thê-o-pek lú-ông, Kan-tāi-ki, ū koân ê thài-kàm, chóng-koán i ê gûn-khò͘; i í-keng kàu Iâ-lō͘-sat-léng kèng-pài;

28倒tńg來，坐tī車裡，teh讀先知以賽亞ê冊。tò-tńg-lâi, chē tī chhia-ni̍h, teh tha̍k sian-ti Í-sài-a ê chheh.

29聖神kā腓力講，進前去近óa hit張車。Sèng Sîn kā Hui-le̍k kóng, Chìn-chêng khì kūn-óa hit tiuⁿ chhia.

30腓力走去就近伊，聽見伊teh讀先知以賽亞ê冊，就講，你所讀ê，你會明白mah？Hui-le̍k cháu-khì chiū-kūn i, thiaⁿ-kìⁿ i teh tha̍k sian-ti Í-sài-a ê chheh, chiū kóng, Lí só͘ tha̍k ê, lí ōe bêng-pe̍k mah?

31伊講，無人指示我，thái-thó話？就請腓力上車saⁿ-kap坐。I kóng, Bô lâng chí-sī góa, thái-thó ōe? Chiū chhiáⁿ Hui-le̍k chiūⁿ chhia saⁿ-kap chē.

32所讀ê聖經就是chit段， 伊hō͘人牽，親像羊到受thâi ê所在， 伊無開嘴，親像羊á tùi煎毛ê無出聲；Só͘ tha̍k ê sèng-keng chiū-sī chit tōaⁿ, I hō͘ lâng khan, chhin-chhiūⁿ iûⁿ kàu siū thâi ê só͘-chāi, I bô khui chhùi, Chhin-chhiūⁿ iûⁿ-á tùi chián-mn̂g ê bô chhut siaⁿ;

33伊卑微ê時，受無公義ê審判。 伊ê世代是誰 beh傳述？ 因為伊ê活命tùi地上受奪去。I pi-bî ê sî, siū bô kong-gī ê sím-phòaⁿ. I ê sè-tāi chī-chūi beh thoân-su̍t? In-ūi I ê oa̍h-miā tùi tōe-chiūⁿ siū toa̍t-khì.

34太監應腓力講，請問，先知講chit-ê話是指甚麼人？是指本身，á是別人ah？Thài-kàm ìn Hui-le̍k kóng, Chhiáⁿ mn̄g, sian-ti kóng chit ê ōe sī chí sím-mi̍h lâng? sī chí pún-sin, á-sī pa̍t lâng ah?

35腓力就開嘴，tùi chit-ê聖經起，用耶穌傳hō͘伊。Hui-le̍k chiū khui chhùi, tùi chit ê sèng-keng khí, ēng Iâ-so͘ thoân hō͘ i.

36行路ê時，到有水ê位；太監講，你看，chia有水；我受洗禮有甚麼阻礙？Kiâⁿ lō͘ ê sî, kàu ū chúi ê ūi; thài-kàm kóng, Lí khòaⁿ, chia ū chúi; góa siū sóe-lé ū sím-mi̍h chó͘-gāi?

38就吩咐停車；腓力kap太監兩人落水；腓力就kā伊行洗禮。Chiū hoan-hù thêng chhia; Hui-le̍k kap thài-kàm nn̄g lâng lo̍h chúi; Hui-le̍k chiū kā i kiâⁿ sóe-lé.

39Tùi水裡上來ê時，主ê神帶腓力去；太監無koh看見伊，因為做伊上路，也真歡喜。Tùi chúi-ni̍h chiūⁿ-lâi ê sî, Chú ê Sîn tòa Hui-le̍k khì; thài-kàm bô koh khòaⁿ-kìⁿ i, in-ūi chòe i chiūⁿ lō͘, iā chin hoaⁿ-hí.

40後來腓力tī A-só-to͘ hō͘人tú-tio̍h；就遍行chiah-ê城傳福音，直到該撒利亞。Āu-lâi Hui-le̍k tī A-só-to͘ hō͘ lâng tú-tio̍h; chiū piàn kiâⁿ chiah ê siâⁿ thoân hok-im, ti̍t kàu Kai-sat-lī-a.

1掃羅iáu-kú一味háng-hoah ài thâi主ê學生，去見祭司頭，Sò-lô iáu-kú it-bī háng-hoah ài thâi Chú ê ha̍k-seng, khì kìⁿ chè-si-thâu,

2tùi伊求phoe hō͘大馬色chiah-ê會堂，若tú-tio̍h thàn chit-ê路ê人，無論男女，伊就thang縛in，帶到耶路撒冷。tùi i kiû phoe hō͘ Tāi-má-sek chiah ê hōe-tn̂g, nā tú-tio̍h thàn chit ê Lō͘ ê lâng, bô lūn lâm-lú, i chiū thang pa̍k in, tòa kàu Iâ-lō͘-sat-léng.

3行近大馬色ê時，忽然tùi天有光圍纍照伊；Kiâⁿ kūn Tāi-má-sek ê sî, hut-jiân tùi thiⁿ ū kng ûi-lûi chiò i;

4伊就跋倒tī地裡，聽見聲kā伊講，掃羅，掃羅，啥事khún-tio̍k我？i chiū poa̍h-tó tī tōe-ni̍h, thiaⁿ-kìⁿ siaⁿ kā i kóng, Sò-lô, Sò-lô, siáⁿ-sū khún-tio̍k góa?

5伊講，主ah，你是是誰？講，我就是你所khún-tio̍k ê耶穌。I kóng, Chú ah, lí sī chī-chūi? Kóng, Góa chiū-sī lí só͘ khún-tio̍k ê Iâ-so͘.

6總是你tio̍h起來入城，你所應該做ê beh kā你講。Chóng-sī lí tio̍h khí-lâi ji̍p siâⁿ, lí só͘ eng-kai chòe ê beh kā lí kóng.

7同行ê人靜靜khiā-teh，聽見聲，也無看見人。Tâng kiâⁿ ê lâng chēng-chēng khiā-teh, thiaⁿ-kìⁿ siaⁿ, iā bô khòaⁿ-kìⁿ lâng.

8掃羅tùi地裡起來；目睭thí開，bōe看見甚麼；人牽伊ê手，chhōa伊入大馬色。Sò-lô tùi tōe-ni̍h khí-lâi; ba̍k-chiu thí-khui, bōe khòaⁿ-kìⁿ sím-mi̍h; lâng khan i ê chhiú, chhōa i ji̍p Tāi-má-sek.

9歷過三日bōe看見，無食也無lim。Le̍k-kè saⁿ ji̍t bōe khòaⁿ-kìⁿ, bô chia̍h iā bô lim.

10Tī大馬色有一個學生名亞拿尼亞；主tī異象中kā伊講，亞拿尼亞ah。伊講，主ah，我tī chia。Tī Tāi-má-sek ū chi̍t ê ha̍k-seng miâ A-ná-nî-a; Chú tī īⁿ-siōng tiong kā i kóng, A-ná-nî-a ah. I kóng, Chú ah, góa tī chia.

11主對伊講，起來，去 hit條街路叫做直ê，tī猶大ê 家chhē大數人，名掃羅：因為伊tú-tú teh祈禱；Chú tùi i kóng, Khí-lâi, khì hit tiâu ke-lō͘ kiò chòe Ti̍t ê, tī Iû-tāi ê ke chhē Tāi-sò͘ lâng, miâ Sò-lô: in-ūi i tú-tú teh kî-tó;

12koh有看見一人，名亞拿尼亞，入來，kā伊按手，hō͘伊能看見。koh ū khòaⁿ-kìⁿ chi̍t lâng, miâ A-ná-nî-a, ji̍p-lâi, kā i hōaⁿ chhiú, hō͘ i ōe khòaⁿ-kìⁿ.

13但是亞拿尼亞應講，主ah，我聽見chōe-chōe人講，chit人tī耶路撒冷bat怎樣大pháiⁿ款待你chiah-ê聖徒；Nā-sī A-ná-nî-a ìn kóng, Chú ah, góa thiaⁿ-kìⁿ chōe-chōe lâng kóng, chit lâng tī Iâ-lō͘-sat-léng bat cháiⁿ-iūⁿ tōa pháiⁿ khoán-thāi lí chiah ê sèng-tô͘;

14koh伊tī chia有chiah-ê祭司頭ê權，thang來縛見若求叫你ê名ê人。koh i tī chia ū chiah ê chè-si-thâu ê koân, thang lâi pa̍k kìⁿ-nā kiû-kiò lí ê miâ ê lâng.

15獨獨主kā伊講，做你去；伊是我揀選ê器具，beh報揚我ê名tī外邦，kap國王，以及以色列kiaⁿ孫ê面前；To̍k-to̍k Chú kā i kóng, Chòe lí khì; i sī góa kéng-soán ê khì-kū, beh pò-iông góa ê miâ tī gōa-pang, kap kok-ông, í-ki̍p Í-sek-lia̍t kiáⁿ-sun ê bīn-chêng;

16我也beh hō͘伊知，伊tio̍h 因為我ê名受jōa-chōe ê艱苦。góa iā beh hō͘ i chai, i tio̍h in-ūi góa ê miâ siū jōa chōe ê kan-khó͘.

17亞拿尼亞就去，入伊ê厝；手hōaⁿ伊，講，兄弟掃羅，主，就是你來ê時路中出現hō͘你看ê耶穌，差我來，hō͘你能看見，koh得tio̍h聖神充滿。A-ná-nî-a chiū khì, ji̍p i ê chhù; chhiú hōaⁿ i, kóng, Hiaⁿ-tī Sò-lô, Chú, chiū-sī lí lâi ê sî lō͘-tiong chhut-hiān hō͘ lí khòaⁿ ê Iâ-so͘, chhe góa lâi, hō͘ lí ōe khòaⁿ-kìⁿ, koh tit-tio̍h Sèng Sîn chhiong-móa.

18Liâm-piⁿ對伊ê目睭有物ka-la̍uh，親像魚鱗，伊就看見；起來受洗禮；Liâm-piⁿ tùi i ê ba̍k-chiu ū mi̍h ka-la̍uh, chhin-chhiūⁿ hî-lân, i chiū khòaⁿ-kìⁿ; khí-lâi siū sóe-lé;

19已經食就勇健。 掃羅kap大馬色ê學生saⁿ-kap tòa kúi-nā日。í-keng chia̍h chiū ióng-kiāⁿ. Sò-lô kap Tāi-má-sek ê ha̍k-seng saⁿ-kap tòa kúi-nā ji̍t.

20Liâm-piⁿ tī chiah-ê會堂宣傳耶穌，講伊是上帝ê kiáⁿ。Liâm-piⁿ tī chiah ê hōe-tn̂g soan-thoân Iâ-so͘, kóng I sī Siōng-tè ê Kiáⁿ.

21聽見ê人lóng gông-ngia̍h，講，Chit人kiám m̄是hit-ê tī耶路撒冷殘害凡若求叫chit-ê名ê mah？koh來chia tiau-tî beh縛來拖in交hō͘ chiah-ê祭司頭。Thiaⁿ-kìⁿ ê lâng lóng gông-ngia̍h, kóng, Chit lâng kiám m̄ sī hit ê tī Iâ-lō͘-sat-léng chân-hāi hoān-nā kiû-kiò chit ê miâ ê mah? koh lâi chia tiau-tî beh pa̍k lâi thoa in kau hō͘ chiah ê chè-si-thâu.

22獨獨掃羅益發有能力，駁倒tòa tī大馬色ê猶太人，辯明chit-ê是基督。To̍k-to̍k Sò-lô it-hoat ū lêng-le̍k, pok-tó tòa tī Tāi-má-sek ê Iû-thài lâng, piān-bêng chit-ê sī Ki-tok.

23過chōe-chōe日，猶太人saⁿ-kap計謀beh thâi伊；總是in ê計謀掃羅知。Kè chōe-chōe ji̍t, Iû-thài lâng saⁿ-kap kè-bô͘ beh thâi i; chóng-sī in ê kè-bô͘ Sò-lô chai.

24In亦日暝tī城門裡當等beh thâi伊；In ia̍h ji̍t mî tī siâⁿ-mn̂g-ni̍h tng-tán beh thâi i;

25但是伊ê學生透暝將掃羅用籃tùi城牆kā伊lūi落去。nā-sī i ê ha̍k-seng thàu-mî chiong Sò-lô ēng nâ tùi siâⁿ-chhiûⁿ kā i lūi-lo̍h-khì.

26已經到耶路撒冷，beh kap學生交陪；in lóng驚伊，m̄信伊是學生。Í-keng kàu Iâ-lō͘-sat-léng, beh kap ha̍k-seng kau-pôe; in lóng kiaⁿ i, m̄ sìn i sī ha̍k-seng.

27獨獨巴拿巴chhōa伊就近使徒，將伊tī路中怎樣看見主，主kap伊講話，以及伊tòa大馬色怎樣好膽tī耶穌ê名來傳，lóng總講起。To̍k-to̍k Pa-ná-pa chhōa i chiū-kūn sù-tô͘, chiong i tī lō͘-tiong cháiⁿ-iūⁿ khòaⁿ-kìⁿ Chú, Chú kap i kóng ōe, í-ki̍p i tòa Tāi-má-sek cháiⁿ-iūⁿ hó-táⁿ tī Iâ-so͘ ê miâ lâi thoân, lóng-chóng kóng-khí.

28就tī耶路撒冷kap in出入，好膽tī主ê名來傳；Chiū tī Iâ-lō͘-sat-léng kap in chhut ji̍p, hó-táⁿ tī Chú ê miâ lâi thoân;

29亦kap講希利尼話ê猶太人講話辯論；獨獨hiah-ê人圖謀beh thâi伊。ia̍h kap kóng Hi-lī-nî ōe ê Iû-thài lâng kóng ōe piān-lūn; to̍k-to̍k hiah ê lâng tô͘-bô͘ beh thâi i.

30兄弟知，就送伊落該撒利亞，hō͘伊tò去大數。Hiaⁿ-tī chai, chiū sàng i lo̍h Kai-sat-lī-a, hō͘ i tò-khì Tāi-sò͘.

31Tùi án-ni，遍猶太、加利利，撒馬利亞ê教會有平安，得tio̍h建立，行tāi-chì敬畏主，也受聖神ê安慰，人額ná加添。Tùi án-ni piàn Iû-thài, Ka-lī-lī, Sat-má-lī-a ê kàu-hōe ū pêng-an, tit-tio̍h kiàn-li̍p, kiâⁿ tāi-chì kèng-ùi Chú, iā siū Sèng Sîn ê an-ùi, lâng-gia̍h ná ke-thiⁿ.

32彼得遍行四方ê時，也落去就近tiàm-tī Lū-tāi ê聖徒。Pí-tek piàn kiâⁿ sì-hng ê sî, iā lo̍h-khì chiū-kūn tiàm-tī Lū-tāi ê sèng-tô͘.

33Tī hia tú-tio̍h一人，名Í-nî-ngá，因為患tio̍h piàn-sūi，倒床八年。Tī hia tú-tio̍h chi̍t lâng, miâ Í-nî-ngá, in-ūi hoān-tio̍h piàn-sūi, tó chhn̂g poeh nî.

34彼得kā伊講，Í-nî-ngá，耶穌基督醫好你lah；起來，你ê舖á家己整頓。伊liâm-piⁿ起來。Pí-tek kā i kóng, Í-nî-ngá, Iâ-so͘ Ki-tok i-hó lí lah; khí-lâi, lí ê pho͘-á ka-kī chéng-tùn. I liâm-piⁿ khí-lâi.

35見若tòa tī Lū-tāi kap Sat-lûn ê人看見伊，就歸服主。Kìⁿ-nā tòa tī Lū-tāi kap Sat-lûn ê lâng khòaⁿ-kìⁿ i, chiū kui-ho̍k Chú.

36Tī Iok-phàⁿ有一個女徒，名Tāi-pí-tāi，翻譯就是To-ka：行好事kap賑濟滿滿。Tī Iok-phàⁿ ū chi̍t ê lú-tō͘, miâ Tāi-pí-tāi, hoan-e̍k chiū-sī To-ka: kiâⁿ hó sū kap chín-chè móa-móa.

37當時破病死；人洗伊ê身屍，hē tī樓頂。Tong sî phòa-pīⁿ sí; lâng sóe i ê sin-si, hē tī lâu-téng.

38Lū-tāi近Iok-phàⁿ，學生聽見彼得tī hia，就差兩人去chhē伊，求講，請來阮chia，m̄-thang 延chhiân。Lū-tāi kūn Iok-phàⁿ, ha̍k-seng thiaⁿ-kìⁿ Pí-tek tī hia, chiū chhe nn̄g lâng khì chhē i, kiû kóng, Chhiáⁿ lâi goán chia, m̄-thang iân-chhiân.

39彼得就起身kap in 去。已經到，chhōa伊上樓；眾守寡人khiā tī彼得ê身邊，teh哮，將To-ka kap in tī-teh ê時所做ê衣服hō͘伊看。Pí-tek chiū khí-sin kap in khì. Í-keng kàu, chhōa i chiūⁿ lâu; chèng chiú-kóaⁿ lâng khiā tī Pí-tek ê sin-piⁿ, teh háu, chiong To-ka kap in tī-teh ê sî só͘ chòe ê i-ho̍k hō͘ i khòaⁿ.

40彼得就kah眾人出去，跪落去，祈禱；oa̍t-tńg身ǹg身屍，講Tāi-pí-tāi，起來。伊ê目睭thí開；看見彼得，就起來坐。Pí-tek chiū kah chèng lâng chhut-khì, kūi-lo̍h-khì, kî-tó; oa̍t-tńg-sin ǹg sin-si, kóng Tāi-pí-tāi, khí-lâi. I ê ba̍k-chiu thí-khui; khòaⁿ-kìⁿ Pí-tek, chiū khí-lâi chē.

41彼得伸手扶伊起來，叫chiah-ê聖徒kap守寡人入來，將koh活ê To-ka交hō͘ in。Pí-tek chhun chhiú hû i khí-lâi, kiò chiah ê sèng-tô͘ kap chiú-kóaⁿ lâng ji̍p-lâi, chiong koh-oa̍h ê To-ka kau hō͘ in.

42Thong Iok-phàⁿ lóng知；就有chōe-chōe人信主。Thong Iok-phàⁿ lóng chai; chiū ū chōe-chōe lâng sìn Chú.

43彼得tī Iok-phàⁿ久久kap一個礬皮師傅西門saⁿ-kap tòa。Pí-tek tī Iok-phàⁿ kú-kú kap chi̍t ê hoân-phê sai-hū Se-bûn saⁿ-kap tòa.