1Hit日tī耶路撒冷ê教會tú-tio̍h大khún-tio̍k；使徒以外，lóng四散tī猶太、撒馬利亞chiah-ê地方。Hit ji̍t tī Iâ-lō͘-sat-léng ê kàu-hōe tú-tio̍h tōa khún-tio̍k; sù-tô͘ í-gōa, lóng sì-sòaⁿ tī Iû-thài, Sat-má-lī-a chiah ê tōe-hng.

2有敬虔ê人埋葬司提反，為tio̍h伊搥胸大啼哭。Ū kèng-khiân ê lâng bâi-chòng Sū-thê-hoán, ūi-tio̍h i tûi heng tōa thî-khàu.

3掃羅大陷害教會，入ta̍k人ê家，拖in ê男女，送交落監。Sò-lô tōa hām-hāi kàu-hōe, ji̍p ta̍k lâng ê ke, thoa in ê lâm-lú, sàng-kau lo̍h kaⁿ.

4Tùi án-ni，hiah-ê四散ê人遍行，傳福音ê道理。Tùi án-ni hiah ê sì-sòaⁿ ê lâng piàn kiâⁿ, thoân hok-im ê tō-lí.

5腓力落去撒馬利亞ê城，用基督傳hō͘ in。Hui-le̍k lo̍h-khì Sat-má-lī-a ê siâⁿ, ēng Ki-tok thoân hō͘ in.

6眾人聽見，koh看見所行ê神蹟，就同心意向腓力ê話。Chèng lâng thiaⁿ-kìⁿ, koh khòaⁿ-kìⁿ só͘ kiâⁿ ê sîn-jiah, chiū tâng sim ì-hiòng Hui-le̍k ê ōe.

7因為chōe-chōe人有患tio̍h邪神，hiah-ê邪神大聲喉叫出去；piàn-sūi ê、跛腳ê，亦chōe-chōe得tio̍h醫好。In-ūi chōe-chōe lâng ū hoān-tio̍h siâ-sîn, hiah ê siâ-sîn tōa siaⁿ âu-kiò chhut-khì; piàn-sūi ê, pái-kha ê, ia̍h chōe-chōe tit-tio̍h i-hó.

8Hit-ê城內大歡喜。Hit ê siâⁿ-lāi tōa hoaⁿ-hí.

9總是有一人，名叫西門，平素tī城內行邪術，自誇做大，hō͘撒馬利亞ê百姓gông-ngia̍h；Chóng-sī ū chi̍t lâng, miâ kiò Se-bûn, pêng-sò͘ tī siâⁿ-lāi kiâⁿ siâ-su̍t, chū-khoa chòe tōa, hō͘ Sat-má-lī-a ê peh-sìⁿ gông-ngia̍h;

10tùi細到大，無m̄意向伊，講，Chit人是上帝ê權能，就是hit-ê稱做大ê。tùi sòe kàu tōa, bô m̄ ì-hiòng i, kóng, Chit lâng sī Siōng-tè ê koân-lêng, chiū-sī hit ê chheng chòe Tōa ê.

11In意向伊ê緣故，是因為伊久久用邪術hō͘ in gông-ngia̍h。In ì-hiòng i ê iân-kò͘, sī in-ūi i kú-kú ēng siâ-su̍t hō͘ in gông-ngia̍h.

12到in信腓力所傳ê福音，論上帝ê國kap耶穌基督ê名，就有男女受洗禮。Kàu in sìn Hui-le̍k só͘ thoân ê hok-im, lūn Siōng-tè ê kok kap Iâ-so͘ Ki-tok ê miâ, chiū ū lâm-lú siū sóe-lé.

13西門家己也信；已經受洗禮，常常跟隨腓力；看伊所行chiah-ê神蹟大權能，就gông-ngia̍h。Se-bûn ka-kī iā sìn; í-keng siū sóe-lé, siông-siông kun-sûi Hui-le̍k; khòaⁿ i só͘ kiâⁿ chiah ê sîn-jiah tōa koân-lêng, chiū gông-ngia̍h.

14Tī耶路撒冷ê使徒聽見撒馬利亞已經接納上帝ê道理，就差彼得約翰去in hia。Tī Iâ-lō͘-sat-léng ê sù-tô͘ thiaⁿ-kìⁿ Sat-má-lī-a í-keng chiap-la̍p Siōng-tè ê tō-lí, chiū chhe Pí-tek Iok-hān khì in hia.

15In已經落去，就替in祈禱，hō͘ in受聖神；In í-keng lo̍h-khì, chiū thòe in kî-tó, hō͘ in siū Sèng Sîn;

16因為聖神iáu-bē臨到in一人；in只有受洗禮，歸tī主耶穌ê名nā-tiāⁿ。in-ūi Sèng Sîn iáu-bē lîm-kàu in chi̍t lâng; in chí-ū siū sóe-lé, kui tī Chú Iâ-so͘ ê miâ nā-tiāⁿ.

17Tùi án-ni，kā in按手，in就受聖神。Tùi án-ni kā in hōaⁿ chhiú, in chiū siū Sèng Sîn .

18總是西門看見tùi使徒ê按手就有聖神hō͘人，chiah將錢獻hō͘ in，Chóng-sī Se-bûn khòaⁿ-kìⁿ tùi sù-tô͘ ê hōaⁿ chhiú chiū ū Sèng Sîn hō͘ lâng, chiah chiong chîⁿ hiàn hō͘ in,

19講，亦將chit-ê權hō͘我，致到我ê手所hōaⁿ ê人受tio̍h聖神。kóng, Ia̍h chiong chit ê koân hō͘ góa, tì-kàu góa ê chhiú só͘ hōaⁿ ê lâng siū-tio̍h Sèng Sîn.

20獨獨彼得對伊講，你ê銀kap你saⁿ-kap滅無，因為你phah算上帝ê賞賜beh用錢來買。To̍k-to̍k Pí-tek tùi i kóng, Lí ê gûn kap lí saⁿ-kap bia̍t-bô, in-ūi lí phah-sǹg Siōng-tè ê siúⁿ-sù beh ēng chîⁿ lâi bóe.

21你tī chit-ê事無份，無干涉；因為tī上帝ê面前你ê心不正。Lí tī chit ê sū bô hūn, bô kan-sia̍p; in-ūi tī Siōng-tè ê bīn-chêng lí ê sim put-chèng.

22所以tio̍h反悔離開你chit-ê pháiⁿ，來求主，kiám-chhái你心內ê念頭會得赦免。Só͘-í tio̍h hoán-hóe lī-khui lí chit ê pháiⁿ, lâi kiû Chú, kiám-chhái lí sim-lāi ê liām-thâu ōe tit sià-bián.

23因為我看見你入tī苦膽ê中間，hō͘不義綑縛。In-ūi góa khòaⁿ-kìⁿ lí ji̍p tī khó͘-táⁿ ê tiong-kan, hō͘ put-gī khún-pa̍k.

24西門應講，Lín替我求主，hō͘ lín所講ê lóng無到tī我。Se-bûn ìn kóng, Lín thòe góa kiû Chú, hō͘ lín só͘ kóng ê lóng bô kàu tī góa.

25In已經做干證來傳主ê道理，就tò去耶路撒冷；tī撒馬利亞人chōe-chōe ê鄉社傳福音。In í-keng chòe kan-chèng lâi thoân Chú ê tō-lí, chiū tò-khì Iâ-lō͘-sat-léng; tī Sat-má-lī-a lâng chōe-chōe ê hiuⁿ-siā thoân hok-im.

26主ê天使tùi腓力講，起來，tùi南勢去，到tùi耶路撒冷落去Ka-sat ê路；hia就是曠野。Chú ê thiⁿ-sài tùi Hui-le̍k kóng, Khí-lâi, tùi lâm-sì khì, kàu tùi Iâ-lō͘-sat-léng lo̍h-khì Ka-sat ê lō͘; hia chiū-sī khòng-iá.

27就起來去；tú-tn̄g有一個Ai-thê-o-pek人，就是Ai-thê-o-pek女王，Kan-tāi-ki，有權ê太監，總管伊ê銀庫；伊已經到耶路撒冷敬拜；Chiū khí-lâi khì; tú-tn̄g ū chi̍t ê Ai-thê-o-pek lâng, chiū-sī Ai-thê-o-pek lú-ông, Kan-tāi-ki, ū koân ê thài-kàm, chóng-koán i ê gûn-khò͘; i í-keng kàu Iâ-lō͘-sat-léng kèng-pài;

28倒tńg來，坐tī車裡，teh讀先知以賽亞ê冊。tò-tńg-lâi, chē tī chhia-ni̍h, teh tha̍k sian-ti Í-sài-a ê chheh.

29聖神kā腓力講，進前去近óa hit張車。Sèng Sîn kā Hui-le̍k kóng, Chìn-chêng khì kūn-óa hit tiuⁿ chhia.

30腓力走去就近伊，聽見伊teh讀先知以賽亞ê冊，就講，你所讀ê，你會明白mah？Hui-le̍k cháu-khì chiū-kūn i, thiaⁿ-kìⁿ i teh tha̍k sian-ti Í-sài-a ê chheh, chiū kóng, Lí só͘ tha̍k ê, lí ōe bêng-pe̍k mah?

31伊講，無人指示我，thái-thó話？就請腓力上車saⁿ-kap坐。I kóng, Bô lâng chí-sī góa, thái-thó ōe? Chiū chhiáⁿ Hui-le̍k chiūⁿ chhia saⁿ-kap chē.

32所讀ê聖經就是chit段， 伊hō͘人牽，親像羊到受thâi ê所在， 伊無開嘴，親像羊á tùi煎毛ê無出聲；Só͘ tha̍k ê sèng-keng chiū-sī chit tōaⁿ, I hō͘ lâng khan, chhin-chhiūⁿ iûⁿ kàu siū thâi ê só͘-chāi, I bô khui chhùi, Chhin-chhiūⁿ iûⁿ-á tùi chián-mn̂g ê bô chhut siaⁿ;

33伊卑微ê時，受無公義ê審判。 伊ê世代是誰 beh傳述？ 因為伊ê活命tùi地上受奪去。I pi-bî ê sî, siū bô kong-gī ê sím-phòaⁿ. I ê sè-tāi chī-chūi beh thoân-su̍t? In-ūi I ê oa̍h-miā tùi tōe-chiūⁿ siū toa̍t-khì.

34太監應腓力講，請問，先知講chit-ê話是指甚麼人？是指本身，á是別人ah？Thài-kàm ìn Hui-le̍k kóng, Chhiáⁿ mn̄g, sian-ti kóng chit ê ōe sī chí sím-mi̍h lâng? sī chí pún-sin, á-sī pa̍t lâng ah?

35腓力就開嘴，tùi chit-ê聖經起，用耶穌傳hō͘伊。Hui-le̍k chiū khui chhùi, tùi chit ê sèng-keng khí, ēng Iâ-so͘ thoân hō͘ i.

36行路ê時，到有水ê位；太監講，你看，chia有水；我受洗禮有甚麼阻礙？Kiâⁿ lō͘ ê sî, kàu ū chúi ê ūi; thài-kàm kóng, Lí khòaⁿ, chia ū chúi; góa siū sóe-lé ū sím-mi̍h chó͘-gāi?

38就吩咐停車；腓力kap太監兩人落水；腓力就kā伊行洗禮。Chiū hoan-hù thêng chhia; Hui-le̍k kap thài-kàm nn̄g lâng lo̍h chúi; Hui-le̍k chiū kā i kiâⁿ sóe-lé.

39Tùi水裡上來ê時，主ê神帶腓力去；太監無koh看見伊，因為做伊上路，也真歡喜。Tùi chúi-ni̍h chiūⁿ-lâi ê sî, Chú ê Sîn tòa Hui-le̍k khì; thài-kàm bô koh khòaⁿ-kìⁿ i, in-ūi chòe i chiūⁿ lō͘, iā chin hoaⁿ-hí.

40後來腓力tī A-só-to͘ hō͘人tú-tio̍h；就遍行chiah-ê城傳福音，直到該撒利亞。Āu-lâi Hui-le̍k tī A-só-to͘ hō͘ lâng tú-tio̍h; chiū piàn kiâⁿ chiah ê siâⁿ thoân hok-im, ti̍t kàu Kai-sat-lī-a.

1掃羅iáu-kú一味háng-hoah ài thâi主ê學生，去見祭司頭，Sò-lô iáu-kú it-bī háng-hoah ài thâi Chú ê ha̍k-seng, khì kìⁿ chè-si-thâu,

2tùi伊求phoe hō͘大馬色chiah-ê會堂，若tú-tio̍h thàn chit-ê路ê人，無論男女，伊就thang縛in，帶到耶路撒冷。tùi i kiû phoe hō͘ Tāi-má-sek chiah ê hōe-tn̂g, nā tú-tio̍h thàn chit ê Lō͘ ê lâng, bô lūn lâm-lú, i chiū thang pa̍k in, tòa kàu Iâ-lō͘-sat-léng.

3行近大馬色ê時，忽然tùi天有光圍纍照伊；Kiâⁿ kūn Tāi-má-sek ê sî, hut-jiân tùi thiⁿ ū kng ûi-lûi chiò i;

4伊就跋倒tī地裡，聽見聲kā伊講，掃羅，掃羅，啥事khún-tio̍k我？i chiū poa̍h-tó tī tōe-ni̍h, thiaⁿ-kìⁿ siaⁿ kā i kóng, Sò-lô, Sò-lô, siáⁿ-sū khún-tio̍k góa?

5伊講，主ah，你是是誰？講，我就是你所khún-tio̍k ê耶穌。I kóng, Chú ah, lí sī chī-chūi? Kóng, Góa chiū-sī lí só͘ khún-tio̍k ê Iâ-so͘.

6總是你tio̍h起來入城，你所應該做ê beh kā你講。Chóng-sī lí tio̍h khí-lâi ji̍p siâⁿ, lí só͘ eng-kai chòe ê beh kā lí kóng.

7同行ê人靜靜khiā-teh，聽見聲，也無看見人。Tâng kiâⁿ ê lâng chēng-chēng khiā-teh, thiaⁿ-kìⁿ siaⁿ, iā bô khòaⁿ-kìⁿ lâng.

8掃羅tùi地裡起來；目睭thí開，bōe看見甚麼；人牽伊ê手，chhōa伊入大馬色。Sò-lô tùi tōe-ni̍h khí-lâi; ba̍k-chiu thí-khui, bōe khòaⁿ-kìⁿ sím-mi̍h; lâng khan i ê chhiú, chhōa i ji̍p Tāi-má-sek.

9歷過三日bōe看見，無食也無lim。Le̍k-kè saⁿ ji̍t bōe khòaⁿ-kìⁿ, bô chia̍h iā bô lim.

10Tī大馬色有一個學生名亞拿尼亞；主tī異象中kā伊講，亞拿尼亞ah。伊講，主ah，我tī chia。Tī Tāi-má-sek ū chi̍t ê ha̍k-seng miâ A-ná-nî-a; Chú tī īⁿ-siōng tiong kā i kóng, A-ná-nî-a ah. I kóng, Chú ah, góa tī chia.

11主對伊講，起來，去 hit條街路叫做直ê，tī猶大ê 家chhē大數人，名掃羅：因為伊tú-tú teh祈禱；Chú tùi i kóng, Khí-lâi, khì hit tiâu ke-lō͘ kiò chòe Ti̍t ê, tī Iû-tāi ê ke chhē Tāi-sò͘ lâng, miâ Sò-lô: in-ūi i tú-tú teh kî-tó;

12koh有看見一人，名亞拿尼亞，入來，kā伊按手，hō͘伊能看見。koh ū khòaⁿ-kìⁿ chi̍t lâng, miâ A-ná-nî-a, ji̍p-lâi, kā i hōaⁿ chhiú, hō͘ i ōe khòaⁿ-kìⁿ.

13但是亞拿尼亞應講，主ah，我聽見chōe-chōe人講，chit人tī耶路撒冷bat怎樣大pháiⁿ款待你chiah-ê聖徒；Nā-sī A-ná-nî-a ìn kóng, Chú ah, góa thiaⁿ-kìⁿ chōe-chōe lâng kóng, chit lâng tī Iâ-lō͘-sat-léng bat cháiⁿ-iūⁿ tōa pháiⁿ khoán-thāi lí chiah ê sèng-tô͘;

14koh伊tī chia有chiah-ê祭司頭ê權，thang來縛見若求叫你ê名ê人。koh i tī chia ū chiah ê chè-si-thâu ê koân, thang lâi pa̍k kìⁿ-nā kiû-kiò lí ê miâ ê lâng.

15獨獨主kā伊講，做你去；伊是我揀選ê器具，beh報揚我ê名tī外邦，kap國王，以及以色列kiaⁿ孫ê面前；To̍k-to̍k Chú kā i kóng, Chòe lí khì; i sī góa kéng-soán ê khì-kū, beh pò-iông góa ê miâ tī gōa-pang, kap kok-ông, í-ki̍p Í-sek-lia̍t kiáⁿ-sun ê bīn-chêng;

16我也beh hō͘伊知，伊tio̍h 因為我ê名受jōa-chōe ê艱苦。góa iā beh hō͘ i chai, i tio̍h in-ūi góa ê miâ siū jōa chōe ê kan-khó͘.

17亞拿尼亞就去，入伊ê厝；手hōaⁿ伊，講，兄弟掃羅，主，就是你來ê時路中出現hō͘你看ê耶穌，差我來，hō͘你能看見，koh得tio̍h聖神充滿。A-ná-nî-a chiū khì, ji̍p i ê chhù; chhiú hōaⁿ i, kóng, Hiaⁿ-tī Sò-lô, Chú, chiū-sī lí lâi ê sî lō͘-tiong chhut-hiān hō͘ lí khòaⁿ ê Iâ-so͘, chhe góa lâi, hō͘ lí ōe khòaⁿ-kìⁿ, koh tit-tio̍h Sèng Sîn chhiong-móa.

18Liâm-piⁿ對伊ê目睭有物ka-la̍uh，親像魚鱗，伊就看見；起來受洗禮；Liâm-piⁿ tùi i ê ba̍k-chiu ū mi̍h ka-la̍uh, chhin-chhiūⁿ hî-lân, i chiū khòaⁿ-kìⁿ; khí-lâi siū sóe-lé;

19已經食就勇健。 掃羅kap大馬色ê學生saⁿ-kap tòa kúi-nā日。í-keng chia̍h chiū ióng-kiāⁿ. Sò-lô kap Tāi-má-sek ê ha̍k-seng saⁿ-kap tòa kúi-nā ji̍t.

20Liâm-piⁿ tī chiah-ê會堂宣傳耶穌，講伊是上帝ê kiáⁿ。Liâm-piⁿ tī chiah ê hōe-tn̂g soan-thoân Iâ-so͘, kóng I sī Siōng-tè ê Kiáⁿ.

21聽見ê人lóng gông-ngia̍h，講，Chit人kiám m̄是hit-ê tī耶路撒冷殘害凡若求叫chit-ê名ê mah？koh來chia tiau-tî beh縛來拖in交hō͘ chiah-ê祭司頭。Thiaⁿ-kìⁿ ê lâng lóng gông-ngia̍h, kóng, Chit lâng kiám m̄ sī hit ê tī Iâ-lō͘-sat-léng chân-hāi hoān-nā kiû-kiò chit ê miâ ê mah? koh lâi chia tiau-tî beh pa̍k lâi thoa in kau hō͘ chiah ê chè-si-thâu.

22獨獨掃羅益發有能力，駁倒tòa tī大馬色ê猶太人，辯明chit-ê是基督。To̍k-to̍k Sò-lô it-hoat ū lêng-le̍k, pok-tó tòa tī Tāi-má-sek ê Iû-thài lâng, piān-bêng chit-ê sī Ki-tok.

23過chōe-chōe日，猶太人saⁿ-kap計謀beh thâi伊；總是in ê計謀掃羅知。Kè chōe-chōe ji̍t, Iû-thài lâng saⁿ-kap kè-bô͘ beh thâi i; chóng-sī in ê kè-bô͘ Sò-lô chai.

24In亦日暝tī城門裡當等beh thâi伊；In ia̍h ji̍t mî tī siâⁿ-mn̂g-ni̍h tng-tán beh thâi i;

25但是伊ê學生透暝將掃羅用籃tùi城牆kā伊lūi落去。nā-sī i ê ha̍k-seng thàu-mî chiong Sò-lô ēng nâ tùi siâⁿ-chhiûⁿ kā i lūi-lo̍h-khì.

26已經到耶路撒冷，beh kap學生交陪；in lóng驚伊，m̄信伊是學生。Í-keng kàu Iâ-lō͘-sat-léng, beh kap ha̍k-seng kau-pôe; in lóng kiaⁿ i, m̄ sìn i sī ha̍k-seng.

27獨獨巴拿巴chhōa伊就近使徒，將伊tī路中怎樣看見主，主kap伊講話，以及伊tòa大馬色怎樣好膽tī耶穌ê名來傳，lóng總講起。To̍k-to̍k Pa-ná-pa chhōa i chiū-kūn sù-tô͘, chiong i tī lō͘-tiong cháiⁿ-iūⁿ khòaⁿ-kìⁿ Chú, Chú kap i kóng ōe, í-ki̍p i tòa Tāi-má-sek cháiⁿ-iūⁿ hó-táⁿ tī Iâ-so͘ ê miâ lâi thoân, lóng-chóng kóng-khí.

28就tī耶路撒冷kap in出入，好膽tī主ê名來傳；Chiū tī Iâ-lō͘-sat-léng kap in chhut ji̍p, hó-táⁿ tī Chú ê miâ lâi thoân;

29亦kap講希利尼話ê猶太人講話辯論；獨獨hiah-ê人圖謀beh thâi伊。ia̍h kap kóng Hi-lī-nî ōe ê Iû-thài lâng kóng ōe piān-lūn; to̍k-to̍k hiah ê lâng tô͘-bô͘ beh thâi i.

30兄弟知，就送伊落該撒利亞，hō͘伊tò去大數。Hiaⁿ-tī chai, chiū sàng i lo̍h Kai-sat-lī-a, hō͘ i tò-khì Tāi-sò͘.

31Tùi án-ni，遍猶太、加利利，撒馬利亞ê教會有平安，得tio̍h建立，行tāi-chì敬畏主，也受聖神ê安慰，人額ná加添。Tùi án-ni piàn Iû-thài, Ka-lī-lī, Sat-má-lī-a ê kàu-hōe ū pêng-an, tit-tio̍h kiàn-li̍p, kiâⁿ tāi-chì kèng-ùi Chú, iā siū Sèng Sîn ê an-ùi, lâng-gia̍h ná ke-thiⁿ.

32彼得遍行四方ê時，也落去就近tiàm-tī Lū-tāi ê聖徒。Pí-tek piàn kiâⁿ sì-hng ê sî, iā lo̍h-khì chiū-kūn tiàm-tī Lū-tāi ê sèng-tô͘.

33Tī hia tú-tio̍h一人，名Í-nî-ngá，因為患tio̍h piàn-sūi，倒床八年。Tī hia tú-tio̍h chi̍t lâng, miâ Í-nî-ngá, in-ūi hoān-tio̍h piàn-sūi, tó chhn̂g poeh nî.

34彼得kā伊講，Í-nî-ngá，耶穌基督醫好你lah；起來，你ê舖á家己整頓。伊liâm-piⁿ起來。Pí-tek kā i kóng, Í-nî-ngá, Iâ-so͘ Ki-tok i-hó lí lah; khí-lâi, lí ê pho͘-á ka-kī chéng-tùn. I liâm-piⁿ khí-lâi.

35見若tòa tī Lū-tāi kap Sat-lûn ê人看見伊，就歸服主。Kìⁿ-nā tòa tī Lū-tāi kap Sat-lûn ê lâng khòaⁿ-kìⁿ i, chiū kui-ho̍k Chú.

36Tī Iok-phàⁿ有一個女徒，名Tāi-pí-tāi，翻譯就是To-ka：行好事kap賑濟滿滿。Tī Iok-phàⁿ ū chi̍t ê lú-tō͘, miâ Tāi-pí-tāi, hoan-e̍k chiū-sī To-ka: kiâⁿ hó sū kap chín-chè móa-móa.

37當時破病死；人洗伊ê身屍，hē tī樓頂。Tong sî phòa-pīⁿ sí; lâng sóe i ê sin-si, hē tī lâu-téng.

38Lū-tāi近Iok-phàⁿ，學生聽見彼得tī hia，就差兩人去chhē伊，求講，請來阮chia，m̄-thang 延chhiân。Lū-tāi kūn Iok-phàⁿ, ha̍k-seng thiaⁿ-kìⁿ Pí-tek tī hia, chiū chhe nn̄g lâng khì chhē i, kiû kóng, Chhiáⁿ lâi goán chia, m̄-thang iân-chhiân.

39彼得就起身kap in 去。已經到，chhōa伊上樓；眾守寡人khiā tī彼得ê身邊，teh哮，將To-ka kap in tī-teh ê時所做ê衣服hō͘伊看。Pí-tek chiū khí-sin kap in khì. Í-keng kàu, chhōa i chiūⁿ lâu; chèng chiú-kóaⁿ lâng khiā tī Pí-tek ê sin-piⁿ, teh háu, chiong To-ka kap in tī-teh ê sî só͘ chòe ê i-ho̍k hō͘ i khòaⁿ.

40彼得就kah眾人出去，跪落去，祈禱；oa̍t-tńg身ǹg身屍，講Tāi-pí-tāi，起來。伊ê目睭thí開；看見彼得，就起來坐。Pí-tek chiū kah chèng lâng chhut-khì, kūi-lo̍h-khì, kî-tó; oa̍t-tńg-sin ǹg sin-si, kóng Tāi-pí-tāi, khí-lâi. I ê ba̍k-chiu thí-khui; khòaⁿ-kìⁿ Pí-tek, chiū khí-lâi chē.

41彼得伸手扶伊起來，叫chiah-ê聖徒kap守寡人入來，將koh活ê To-ka交hō͘ in。Pí-tek chhun chhiú hû i khí-lâi, kiò chiah ê sèng-tô͘ kap chiú-kóaⁿ lâng ji̍p-lâi, chiong koh-oa̍h ê To-ka kau hō͘ in.

42Thong Iok-phàⁿ lóng知；就有chōe-chōe人信主。Thong Iok-phàⁿ lóng chai; chiū ū chōe-chōe lâng sìn Chú.

43彼得tī Iok-phàⁿ久久kap一個礬皮師傅西門saⁿ-kap tòa。Pí-tek tī Iok-phàⁿ kú-kú kap chi̍t ê hoân-phê sai-hū Se-bûn saⁿ-kap tòa.

1Tī該撒利亞有一人，名哥尼流，做意大利營ê百總，Tī Kai-sat-lī-a ū chi̍t lâng, miâ Ko-nî-liû, chòe Í-tāi-lī iâⁿ ê pé-chóng,

2伊是敬虔ê人，kap全家敬畏上帝，chōe-chōe賑濟百姓，常常祈禱上帝。i sī kèng-khiân ê lâng, kap choân ke kèng-ùi Siōng-tè, chōe-chōe chín-chè peh-sìⁿ, siông-siông kî-tó Siōng-tè.

3日時約略三點鐘，tī異象中明明看見上帝ê天使入來就近伊，對伊講，哥尼流。Ji̍t-sî iok-lio̍k saⁿ tiám cheng, tī īⁿ-siōng tiong bêng-bêng khòaⁿ-kìⁿ Siōng-tè ê thiⁿ-sài ji̍p-lâi chiū-kūn i, tùi i kóng, Ko-nî-liû.

4伊注目看，真驚，講，主ah，有啥事？就kā伊講，你ê祈禱，你ê賑濟已經上到上帝ê面前做記念。I chù-ba̍k khòaⁿ, chin kiaⁿ, kóng, Chú ah, ū siáⁿ-sū? Chiū kā i kóng, Lí ê kî-tó, lí ê chín-chè í-keng chiūⁿ kàu Siōng-tè ê bīn-chêng chòe kì-liām.

5Taⁿ你tio̍h差人去Iok-phàⁿ，請hit-ê西門，稱做彼得ê，來；Taⁿ lí tio̍h chhe lâng khì Iok-phàⁿ, chhiáⁿ hit ê Se-bûn, chheng chòe Pí-tek ê, lâi;

6伊歇tī礬皮師傅西門tau，伊ê厝tī海邊。i hioh tī hoân-phê sai-hū Se-bûn tau , i ê chhù tī hái-piⁿ.

7Kap伊講話ê天使已經退去，哥尼流就叫兩個奴僕，kap一個敬虔ê兵時常跟隨伊ê；Kap i kóng ōe ê thiⁿ-sài í-keng thè-khì, Ko-nî-liû chiū kiò nn̄g ê lô͘-po̍k, kap chi̍t ê kèng-khiân ê peng sî-siông kun-sûi i ê;

8將chiah-ê tāi-chì lóng kā in講，就差in 去Iok-phàⁿ。chiong chiah ê tāi-chì lóng kā in kóng, chiū chhe in khì Iok-phàⁿ.

9隔日，in行路已經近城，約略日中晝，彼得上厝頂祈禱；Keh ji̍t, in kiâⁿ lō͘ í-keng kūn siâⁿ, iok-lio̍k ji̍t tiong-tàu, Pí-tek chiūⁿ chhù-téng kî-tó;

10真iau，ài食；人tú-tú teh備辦tǹg；彼得ê神魂遊tī象外；chin iau, ài chia̍h; lâng tú-tú teh pī-pān tǹg; Pí-tek ê sîn-hûn iû tī siōng gōa;

11就看見天開，有器具降落，親像大幅布，縛四ê角頭，墜tī地裡：chiū khòaⁿ-kìⁿ thiⁿ khui, ū khì-kū kàng-lo̍h, chhin-chhiūⁿ tōa pak pò͘, pa̍k sì ê kak-thâu, tūi tī tōe-ni̍h:

12內面有地上ta̍k類四腳ê獸，蟲thōa，kap天中ê飛鳥。lāi-bīn ū tōe-chiūⁿ ta̍k lūi sì-kha ê siù, thâng-thōa, kap thiⁿ tiong ê pe-chiáu.

13Koh有聲對伊講，彼得，起來；thâi來食。Koh ū siaⁿ tùi i kóng, Pí-tek, khí-lâi; thâi lâi chia̍h.

14但是彼得講，主ah，斷斷m̄-thang，因為凡若粗俗ê物kap無清氣ê，我未bat食。Nā-sī Pí-tek kóng, Chú ah, toàn-toàn m̄-thang, in-ūi hoān-nā chho͘-sio̍k ê mi̍h kap bô chheng-khì ê, góa bē bat chia̍h.

15第二pái有聲koh對伊講，上帝所hō͘伊清氣ê，你莫得掠做粗俗。Tē jī pái ū siaⁿ koh tùi i kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k.

16Án-ni三pái；hit-ê器具liâm-piⁿ收上天。Án-ni saⁿ pái; hit ê khì-kū liâm-piⁿ siu chiūⁿ thiⁿ.

17彼得心內teh躊躇所看見ê異象甚麼意思，tú-tú hit-tia̍p哥尼流所差來ê人，有問到西門ê厝，khiā tī門外，Pí-tek sim-lāi teh tiû-tû só͘ khòaⁿ-kìⁿ ê īⁿ-siōng sím-mi̍h ì-sù, tú-tú hit tia̍p Ko-nî-liû só͘ chhe lâi ê lâng, ū mn̄g kàu Se-bûn ê chhù, khiā tī mn̂g-gōa,

18出聲teh問看有西門，稱做彼得ê，歇tī chia á無。chhut siaⁿ teh mn̄g khòaⁿ ū Se-bûn, chheng chòe Pí-tek ê, hioh tī chia á bô.

19彼得iáu teh想異象ê時，聖神kā伊講，有三人teh chhē你。Pí-tek iáu teh siūⁿ īⁿ-siōng ê sî, Sèng Sîn kā i kóng, Ū saⁿ lâng teh chhē lí.

20Taⁿ tio̍h起來，落去，kap in 去，m̄免僥疑；因為是我差in。Taⁿ tio̍h khí-lâi, lo̍h-khì, kap in khì, m̄ bián giâu-gî; in-ūi sī góa chhe in.

21彼得落去，見hiah-ê人，講，我就是lín所chhē ê人；lín來是為tio̍h啥事？Pí-tek lo̍h-khì, kìⁿ hiah ê lâng, kóng, Góa chiū-sī lín só͘ chhē ê lâng; lín lâi sī ūi-tio̍h siáⁿ-sū?

22In就講，百總哥尼流是義人，koh敬畏上帝，hō͘猶太全國所o-ló，奉聖ê天使指示伊，tio̍h請你到伊ê厝，續聽你ê話。In chiū kóng, Pé-chóng Ko-nî-liû sī gī lâng, koh kèng-ùi Siōng-tè, hō͘ Iû-thài choân kok só͘ o-ló, hōng sèng ê thiⁿ-sài chí-sī i, tio̍h chhiáⁿ lí kàu i ê chhù, sòa thiaⁿ lí ê ōe.

23彼得就請in入來，留in歇teh。 隔日起身kap in 去，koh有Iok-phàⁿ ê兄弟kúi-nā人kap伊同行。Pí-tek chiū chhiáⁿ in ji̍p-lâi, lâu in hioh-teh. Keh ji̍t khí-sin kap in khì, koh ū Iok-phàⁿ ê hiaⁿ-tī kúi-nā lâng kap i tâng kiâⁿ.

24Koh隔日，入該撒利亞。哥尼流已經聚集伊ê親人kap好朋友，teh thèng候in。Koh keh ji̍t, ji̍p Kai-sat-lī-a. Ko-nî-liû í-keng chū-chi̍p i ê chhin-lâng kap hó pêng-iú, teh thèng-hāu in.

25彼得tú-á入去ê時，哥尼流迎接伊，仆tī伊ê腳前，來拜伊。Pí-tek tú-á ji̍p-khì ê sî, Ko-nî-liû ngiâ-chih i, phak tī i ê kha-chêng, lâi pài i.

26總是彼得牽伊起來，講，起來；我家己也是人。Chóng-sī Pí-tek khan i khí-lâi, kóng, Khí-lâi; góa ka-kī iā sī lâng.

27Kap伊講話就入去看見chōe-chōe人聚集；Kap i kóng ōe chiū ji̍p-khì khòaⁿ-kìⁿ chōe-chōe lâng chū-chi̍p;

28就對in講，lín知猶太人kap別族ê人親近，á是來往，本是無合例；但是上帝已經指示我，無論甚麼人m̄-thang講伊做粗俗無清氣；chiū tùi in kóng, lín chai Iû-thài lâng kap pa̍t cho̍k ê lâng chhin-kūn, á-sī lâi-óng, pún sī bô ha̍p lē; nā-sī Siōng-tè í-keng chí-sī góa, bô lūn sím-mi̍h lâng m̄-thang kóng i chòe chho͘-sio̍k bô chheng-khì;

29所以我受請，無推辭，就來。Taⁿ問，lín請我甚麼意思。só͘-í góa siū chhiáⁿ, bô the-sî, chiū lâi. Taⁿ mn̄g, lín chhiáⁿ góa sím-mi̍h ì-sù.

30哥尼流講，四日前chit-ê時，我tī厝內，下晡三點鐘，teh祈禱；就忽然有一人，衣裳光iàⁿ-iàⁿ，khiā tī我ê面前，Ko-nî-liû kóng, Sì ji̍t chêng chit ê sî, góa tī chhù-lāi, ē-po͘ saⁿ tiám cheng, teh kî-tó; chiū hut-jiân ū chi̍t lâng, i-chiûⁿ kng-iàⁿ-iàⁿ, khiā tī góa ê bīn-chêng,

31講，哥尼流，tī上帝ê面前你ê祈禱已經聽見，你ê賑濟已經得tio̍h記念。kóng, Ko-nî-liû, tī Siōng-tè ê bīn-chêng lí ê kî-tó í-keng thiaⁿ-kìⁿ, lí ê chín-chè í-keng tit-tio̍h kì-liām.

32Taⁿ tio̍h差人到Iok-phàⁿ，請西門，稱做彼得ê，來；伊tiàm-tī海邊，礬皮師傅西門ê厝。Taⁿ tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê, lâi; i tiàm tī hái-piⁿ, hoân-phê sai-hū Se-bûn ê chhù.

33所以我liâm-piⁿ 差人到你hia；你來真好。Taⁿ阮lóng tī上帝ê面前，ài beh聽主所命令你lóng總ê話。Só͘-í góa liâm-piⁿ chhe lâng kàu lí hia; lí lâi chin hó. Taⁿ goán lóng tī Siōng-tè ê bīn-chêng, ài beh thiaⁿ Chú só͘ bēng-lēng lí lóng-chóng ê ōe.

34彼得開嘴，講，Taⁿ我真正知上帝無用外貌取人；Pí-tek khui chhùi, kóng, Taⁿ góa chin-chiàⁿ chai Siōng-tè bô ēng gōa-māu chhú lâng;

35獨獨tī ta̍k邦國見有敬畏伊來行義ê人，hō͘伊歡喜接納。to̍k-to̍k tī ta̍k pang-kok kìⁿ ū kèng-ùi I lâi kiâⁿ gī ê lâng, hō͘ I hoaⁿ-hí chiap-la̍p.

36上帝所寄hō͘以色列kiaⁿ孫ê話，tùi耶穌基督來傳和平ê福音，(伊是萬有ê主) ，Siōng-tè só͘ kià hō͘ Í-sek-lia̍t kiáⁿ-sun ê ōe, tùi Iâ-so͘ Ki-tok lâi thoân hô-pêng ê hok-im, (I sī bān ū ê Chú),

37chit-ê消息lín知是tī約翰所傳ê洗禮以後，tùi加利利起到遍猶太；chit ê siau-sit lín chai sī tī Iok-hān só͘ thoân ê sóe-lé í-āu, tùi Ka-lī-lī khí kàu piàn Iû-thài;

38就是拿撒勒人耶穌，上帝有怎樣用聖神kap才能抹伊；伊就四界行做好事，醫好見若魔鬼所壓制ê；因為上帝kap伊tī-teh。chiū-sī Ná-sat-le̍k lâng Iâ-so͘, Siōng-tè ū cháiⁿ-iūⁿ ēng Sèng Sîn kap châi-lêng boah I; I chiū sì-kè kiâⁿ chòe hó sū, i-hó kìⁿ-nā Mô͘-kúi só͘ ap-chè ê; in-ūi Siōng-tè kap I tī-teh.

39見若伊tī猶太人ê地方kap耶路撒冷所行ê，阮做干證；人就吊伊tī柴裡，來害死伊。Kìⁿ-nā I tī Iû-thài lâng ê tōe-hng kap Iâ-lō͘-sat-léng só͘ kiâⁿ ê, goán chòe kan-chèng; lâng chiū tiàu I tī chhâ-ni̍h, lâi hāi-sí I.

40到第三日，上帝hō͘伊koh活，續出現，Kàu tē saⁿ ji̍t, Siōng-tè hō͘ I koh-oa̍h, sòa chhut-hiān,

41m̄是hō͘眾百姓看，是hō͘上帝事先所揀選為tio̍h伊做干證ê人看，就是阮chiah-ê，tī伊tùi死人中koh活ê了後kap伊saⁿ-kap lim食ê人。m̄ sī hō͘ chèng peh-sìⁿ khòaⁿ, sī hō͘ Siōng-tè tāi-seng só͘ kéng-soán ūi-tio̍h I chòe kan-chèng ê lâng khòaⁿ, chiū-sī goán chiah-ê, tī I tùi sí-lâng tiong koh-oa̍h ê liáu-āu kap I saⁿ-kap lim-chia̍h ê lâng.

42伊koh命令阮傳hō͘百姓，干證chit-ê是上帝所立定做活人死人ê審判司。I koh bēng-lēng goán thoân hō͘ peh-sìⁿ, kan-chèng chit-ê sī Siōng-tè só͘ li̍p-tiāⁿ chòe oa̍h-lâng sí-lâng ê sím-phòaⁿ si.

43眾先知亦為tio̍h伊做干證，就是凡若信伊ê人，tùi伊ê名得tio̍h罪赦。Chèng sian-ti ia̍h ūi-tio̍h I chòe kan-chèng, chiū-sī hoān-nā sìn I ê lâng, tùi I ê miâ tit-tio̍h chōe sià.

44彼得iáu-kú teh講chiah-ê話ê時，聖神降臨tī見若聽道理ê人。Pí-tek iáu-kú teh kóng chiah ê ōe ê sî, Sèng Sîn kàng-lîm tī kìⁿ-nā thiaⁿ tō-lí ê lâng.

45奉割禮ê信徒，kap彼得saⁿ-kap來ê，因為聖神ê賞賜亦降落tī外邦人，就lóng奇怪。Hōng kat-lé ê sìn-tô͘, kap Pí-tek saⁿ-kap lâi ê, in-ūi Sèng Sîn ê siúⁿ-sù ia̍h kàng-lo̍h tī gōa-pang lâng, chiū lóng kî-koài.

46因為聽見in用chiah-ê腔口teh講，koh o-ló上帝做大。In-ūi thiaⁿ-kìⁿ in ēng chiah ê khiuⁿ-kháu teh kóng, koh o-ló Siōng-tè chòe tōa.

47彼得就應講，Chiah-ê人已經受tio̍h聖神，親像咱一樣，是誰會禁得用水kā in行洗禮ah？Pí-tek chiū ìn kóng, Chiah ê lâng í-keng siū-tio̍h Sèng Sîn, chhin-chhiūⁿ lán chi̍t iūⁿ, chī-chūi ōe kìm-tit ēng chúi kā in kiâⁿ sóe-lé ah?

48就命令in tī耶穌基督ê名受洗禮。Tùi án-ni，請伊tòa kúi-nā日。Chiū bēng-lēng in tī Iâ-so͘ Ki-tok ê miâ siū sóe-lé. Tùi án-ni chhiáⁿ i tòa kúi-nā ji̍t.