1Lín Pa-san ê牛母，tiàm-tī撒馬利亞山ê，tio̍h聽chit-ê話；lín欺負sòng-hiong人，壓制艱苦人，對in ê丈夫講，捧酒來hō͘阮lim。Lín Pa-san ê gû-bú, tiàm-tī Sat-má-lī-a soaⁿ--ê, tio̍h thiaⁿ chit ê ōe; lín khi-hū sòng-hiong lâng, ap-chè kan-khó͘ lâng, tùi in ê tiōng-hu kóng, Phâng-chiú lâi hō͘ goán lim.

2主耶和華kí家己ê聖來chiù-chōa講，看ah，日子beh臨到lín，人beh用鉤掠lín去，用釣魚鉤掠lín所chhun-ê去。Chú Iâ-hô-hoa kí ka-kī ê sèng lâi chiù-chōa kóng, Khòaⁿ ah, ji̍t-chí beh lîm-kàu lín, lâng beh ēng kau lia̍h lín khì, ēng tiò-hî-kau lia̍h lín só͘ chhun--ê khì.

3Lín ta̍k人beh tùi破隙直直進前去，走入Hap-bûn；這是耶和華講ê。Lín ta̍k-lâng beh tùi phòa-khiah ti̍t-ti̍t chìn-chêng khì, cháu-ji̍p Hap-bûn; che sī Iâ-hô-hoa kóng--ê.

4Lín去Pek-te̍k-lī犯罪，到Kiat-kah加添lín ê罪；ta̍k早起獻lín ê祭物，每三日獻lín ê十份一；Lín khì Pek-te̍k-lī hoān-chōe, kàu Kiat-kah ke-thiⁿ lín ê chōe; ta̍k chá-khí hiàn lín ê chè-mi̍h, múi saⁿ-ji̍t hiàn lín ê cha̍p-hūn-chi̍t;

5亦獻有酵ê物做謝恩祭，將甘心祭來報揚宣傳；以色列人ah，這是lín所歡喜ê；主耶和華講伊lah。ia̍h hiàn ū-kàⁿ ê mi̍h chòe siā-un-chè, chiong kam-sim-chè lâi pò-iông soan-thoân; Í-sek-lia̍t lâng ah, che sī lín só͘ hoaⁿ-hí--ê; Chú Iâ-hô-hoa kóng i lah.

6我hō͘ lín tī ta̍k-ê城內嘴齒lóng無物thang pō͘，tī lín ê ta̍k所在欠缺米糧；lín iáu-kú無歸向我；這是耶和華講ê。Góa hō͘ lín tī ta̍k ê siâⁿ-lāi chhùi-khí lóng bô mi̍h thang pō͘, tī lín ê ta̍k só͘-chāi khiàm-kheh bí-niû; lín iáu-kú bô kui-ǹg Góa; che sī Iâ-hô-hoa kóng--ê.

7Tī收割以前三月日，我禁止落雨tī lín hia；我落雨tī chit-ê城，無落雨tī hit-ê城；chit所在有雨，hit所在無雨，就枯焦。Tī siu-koah í-chêng saⁿ ge̍h-ji̍t, Góa kìm-chí lo̍h-hō͘ tī lín hia; Góa lo̍h-hō͘ tī chit ê siâⁿ, bô lo̍h-hō͘ tī hit ê siâⁿ; chit só͘-chāi ū hō͘, hit só͘-chāi bô hō͘, chiū ko͘-tâ.

8Án-ni兩三個城ê人，四界顛到一個城chhē-水，亦無thang止渴；lín iáu-kú無歸向我；這是耶和華講ê。Án-ni nn̄g-saⁿ ê siâⁿ ê lâng, sì-kòe tian kàu chi̍t ê siâⁿ chhē-chúi, ia̍h bô thang chí-khoah; lín iáu-kú bô kui-ǹg Góa; che sī Iâ-hô-hoa kóng--ê.

9我用枯焦朽爛攻擊lín；lín ê園ê出產，lín ê葡萄園、無花果樹、橄欖樹，lóng hō͘剪蟲食去；lín iáu-kú無歸ǹg我；這是耶和華講ê。Góa ēng ko͘-tâ hiú-nōa kong-kek lín; lín ê hn̂g ê chhut-sán, lín ê phû-tô-hn̂g, bû-hoa-kó chhiū, kaⁿ-ná-chhiū, lóng hō͘ chián-thâng chia̍h--khì; lín iáu-kú bô kui-ǹg Góa; che sī Iâ-hô-hoa kóng--ê.

10我降瘟疫tī lín中間，親像tī埃及ê款；用刀thâi死lín ê少年人；lín hiah-ê馬hō͘人牽去，營內ê臭味chhèng到lín ê鼻孔；lín iáu-kú無歸ǹg我；這是耶和華講ê。Góa kàng un-e̍k tī lín tiong-kan, chhin-chhiūⁿ tī Ai-ki̍p ê khoán; ēng to thâi-sí lín ê siàu-liân lâng; lín hiah ê bé hō͘ lâng khan--khì, iâⁿ-lāi ê chhàu-bī chhèng kàu lín ê phīⁿ-khang; lín iáu-kú bô kui-ǹg Góa; che sī Iâ-hô-hoa kóng--ê.

11我chhia倒lín中間kúi-nā ê城，親像上帝chhia倒所多瑪蛾摩拉一樣，lín親像一塊á柴tùi火中抽出來；lín iáu-kú無歸ǹg我；這是耶和華講ê。Góa chhia-tó lín tiong-kan kúi-nā ê siâⁿ, chhin-chhiūⁿ Siōng-tè chhia-tó Só͘-to-má Gô-mô͘-la̍h chi̍t-iūⁿ, lín chhin-chhiūⁿ chi̍t-tè-á chhâ tùi hé-tiong thiu--chhut-lâi; lín iáu-kú bô kui-ǹg Góa; che sī Iâ-hô-hoa kóng--ê.

12以色列ah，所以我beh án-ni款待你；為tio̍h我beh án-ni款待你，以色列ah，你tio̍h備辦來見你ê上帝。Í-sek-lia̍t ah, só͘-í Góa beh án-ni khoán-thāi lí; ūi-tio̍h Góa beh án-ni khoán-thāi lí, Í-sek-lia̍t ah, lí tio̍h pī-pān lâi kìⁿ lí ê Siōng-tè.

13Hit-ê chhòng山造風，將祂ê心意指示人，hō͘早起時變做烏暗，kha踏tī地裡高ê所在ê，祂ê名就是萬軍ê上帝耶和華。Hit ê chhòng-soaⁿ chō-hong, chiong I ê sim-ì chí-sī lâng, hō͘ chá-khí-sî piàn-chòe o͘-àm, kha ta̍h tī tōe--nih koâiⁿ ê só͘-chāi--ê, I ê miâ chiū-sī bān-kun ê Siōng-tè Iâ-hô-hoa.

1以色列家ah，tio̍h聽chit-ê話，就是我所論到lín ê哀歌。Í-sek-lia̍t-ke ah, tio̍h thiaⁿ chit ê ōe, chiū-sī Góa só͘ lūn-kàu lín ê ai-ko.

2以色列百姓跋倒，bōe koh起來；受hiat tī地裡，無人扶伊起來。Í-sek-lia̍t peh-sìⁿ poa̍h-tó, bōe koh khí-lâi; siū hiat tī tōe--nih, bô lâng hû i khí-lâi.

3因為主耶和華án-ni講，以色列家ê城，出一千人ê，只有chhun一百；出一百ê，只有chhun十ê。In-ūi Chú Iâ-hô-hoa án-ni kóng, Í-sek-lia̍t-ke ê siâⁿ, chhut chi̍t-chheng lâng--ê, chí-ū chhun chi̍t-pah; chhut chi̍t-pah--ê, chí-ū chhun cha̍p--ê.

4因為耶和華對以色列家講，Lín tio̍h chhē我，就得tio̍h活。In-ūi Iâ-hô-hoa tùi Í-sek-lia̍t-ke kóng, Lín tio̍h chhē Góa, chiū tit-tio̍h oa̍h.

5莫得chhē Pek-te̍k-lī，莫得入Kiat-kah，莫得過去別是巴；因為Kiat-kah的確hō͘人掠，Pek-te̍k-lī也beh歸tī無。Bo̍h-tit chhē Pek-te̍k-lī, bo̍h-tit ji̍p Kiat-kah, bo̍h-tit kè-khì Pia̍t-sī-pa; in-ūi Kiat-kah tek-khak hō͘ lâng lia̍h, Pek-te̍k-lī iā beh kui tī bô.

6Lín tio̍h chhē耶和華就得tio̍h活；驚了伊親像火發出tī約瑟ê家，燒tī Pek-te̍k-lī，無人phah熄。Lín tio̍h chhē Iâ-hô-hoa chiū tit-tio̍h oa̍h; kiaⁿ-liáu I chhin-chhiūⁿ hé hoat-chhut tī Iok-sek ê ke, sio tī Pek-te̍k-lī, bô lâng phah-sit.

7Lín chiah-ê hō͘公平變做茵籐，將公義hiat tī地裡ê，Lín chiah-ê hō͘ kong-pêng piàn-chòe in-tîn, chiong kong-gī hiat tī tōe--nih-ê,

8lín tio̍h chhē hit-ê造Báu-chhiⁿ kap Chham-chhiⁿ，hō͘死蔭變做早起時，hō͘日時變做烏暗暝；叫海水來piàⁿ tī地裡ê，祂ê名是耶和華；lín tio̍h chhē hit-ê chō Báu-chhiⁿ kap Chham-chhiⁿ, hō͘ sí-ìm piàn-chòe chá-khí-sî, hō͘ ji̍t--sî piàn-chòe o͘-àm-mî; kiò hái-chúi lâi piàⁿ tī tōe--nih-ê, I ê miâ sī Iâ-hô-hoa;

9祂hō͘強猛ê忽然tú-tio̍h敗無，致到衛所tú-tio̍h敗無。I hō͘ kiông-béng-ê hut-jiân tú-tio̍h pāi-bô, tì-kàu ōe-só͘ tú-tio̍h pāi-bô.

10Chiah-ê人怨恨hit-ê tī城門責備人ê，厭惡hit-ê講正直話ê。Chiah ê lâng oàn-hūn hit-ê tī siâⁿ-mn̂g chek-pī lâng--ê, iàm-ò͘ⁿ hit-ê kóng chèng-ti̍t-ōe--ê.

11因為lín thún踏sòng-hiong人，勒索伊ê麥，所以lín用雕琢ê石起厝，總是bōe得tio̍h khiā tī hit內面；栽種好ê葡萄園，也無thang lim伊ê酒。In-ūi lín thún-ta̍h sòng-hiong lâng, le̍k-sek i ê be̍h, só͘-í lín ēng tiau-tok ê chio̍h khí-chhù, chóng-sī bōe tit-tio̍h khiā tī hit lāi-bīn; chai-chèng hó ê phû-tô-hn̂g, iā bô thang lim i ê chiú.

12因為我知lín ê罪過怎樣ê罪，lín ê pháiⁿ怎樣ê大；lín pháiⁿ款待義人，受pò͘賂，tī城門口冤枉sòng-hiong人。In-ūi Góa chai lín ê chōe-kòa cháiⁿ-iūⁿ ê chōe, lín ê pháiⁿ cháiⁿ-iūⁿ ê tōa; lín pháiⁿ khoán-thāi gī-lâng, siū pò͘-lō͘, tī siâⁿ-mn̂g-kháu oan-óng sòng-hiong lâng.

13所以通達ê人看見chit號時勢，beh靜靜無講話；因為時勢真pháiⁿ。Só͘-í thong-ta̍t ê lâng khòaⁿ-kìⁿ chit-hō sî-sè, beh chēng-chēng bô kóng-ōe; in-ūi sî-sè chin pháiⁿ.

14Lín tio̍h求好m̄-thang求pháiⁿ，hō͘ lín得tio̍h活；án-ni耶和華萬軍ê上帝beh kap lín tī-teh，照lín所講。Lín tio̍h kiû-hó m̄-thang kiû-pháiⁿ, hō͘ lín tit-tio̍h oa̍h; án-ni Iâ-hô-hoa bān-kun ê Siōng-tè beh kap lín tī-teh, chiàu lín só͘ kóng.

15Tio̍h怨恨pháiⁿ，ài好，tī城門行公義ê審判；kiám-chhái耶和華，萬軍ê上帝，beh施恩tī約瑟chhun ê百姓。Tio̍h oàn-hūn pháiⁿ, ài hó, tī siâⁿ-mn̂g kiâⁿ kong-gī ê sím-phòaⁿ; kiám-chhái Iâ-hô-hoa, bān-kun ê Siōng-tè, beh si-un tī Iok-sek chhun ê peh-sìⁿ.

16所以主萬軍ê上帝耶和華án-ni講，Tī一切開闊ê所在beh有哀哭，tī ta̍k條街路beh有人講，慘ah，慘ah！koh beh叫作田人來啼哭，叫gâu唱哀歌ê，來哀哭。Só͘-í Chú bān-kun ê Siōng-tè Iâ-hô-hoa án-ni kóng, Tī it-chhè khui-khoah ê só͘-chāi beh ū ai-khàu, tī ta̍k-tiâu ke-lō͘ beh ū lâng kóng, Chhám ah, chhám ah! koh beh kiò choh-chhân lâng lâi thî-khàu, kiò gâu chhiùⁿ ai-ko--ê, lâi ai-khàu.

17Tī lóng總ê葡萄園也beh哀哭；因為我beh tùi你中間經過；這是耶和華講ê。Tī lóng-chóng ê phû-tô-hn̂g iā beh ai-khàu; in-ūi Góa beh tùi lí tiong-kan keng-kè; che sī Iâ-hô-hoa kóng--ê.

18Lín ǹg望耶和華ê日ê，有災厄ah！Lín啥事ǹg望耶和華ê日ah？hit日是暗，m̄是光。Lín ǹg-bāng Iâ-hô-hoa ê ji̍t--ê, ū chai-ē ah! Lín siáⁿ-sū ǹg-bāng Iâ-hô-hoa ê ji̍t ah? hit-ji̍t sī àm, m̄-sī kng.

19是親像人閃避獅來走，koh tú-tio̍h熊；入厝，手óa壁，就hō͘蛇咬tio̍h。Sī chhin-chhiūⁿ lâng siám-pī sai lâi cháu, koh tú-tio̍h hîm; ji̍p chhù, chhiú óa piah, chiū hō͘ chôa kā-tio̍h.

20耶和華ê日kiám m̄是暗暗無光，烏暗無光明mah？Iâ-hô-hoa ê ji̍t kiám m̄-sī àm-àm bô kng, o͘-àm bô kng-bêng mah?

21我厭惡看輕lín ê節期，也無歡喜lín ê嚴肅會。Góa iàm-ò͘ⁿ khòaⁿ-khin lín ê choeh-kî, iā bô hoaⁿ-hí lín ê giâm-siok-hōe.

22Lín雖然獻燒祭kap lín ê素祭hō͘我，我也無歡喜；lín獻肥ê cheng-siⁿ做謝恩祭，我無beh監納。Lín sui-jiân hiàn sio-chè kap lín ê sò͘-chè hō͘ Góa, Góa iā bô hoaⁿ-hí; lín hiàn pûi ê cheng-siⁿ chòe siā-un-chè, Góa bô beh kàm-la̍p.

23Tio̍h hō͘ lín唱歌ê聲離開我；因為lín彈琴ê調，我無beh聽。Tio̍h hō͘ lín chhiùⁿ-koa ê siaⁿ lī-khui Góa; in-ūi lín tôaⁿ-khîm ê tiāu, Góa bô beh thiaⁿ.

24獨獨tio̍h hō͘公平親像大水直直流，hō͘公義親像長流ê江河。To̍k-to̍k tio̍h hō͘ kong-pêng chhin-chhiūⁿ tōa-chúi ti̍t-ti̍t lâu, hō͘ kong-gī chhin-chhiūⁿ tn̂g lâu ê kang-hô.

25以色列家ah，lín tī曠野四十年，有用祭祀kap禮物獻hō͘我無？Í-sek-lia̍t-ke ah, lín tī khòng-iá sì-cha̍p nî, ū ēng chè-sū kap lé-mi̍h hiàn hō͘ Góa bô?

26Lín扛lín ê王Se-khut，kap lín ê像Ki-ûn，就是lín ê上帝ê星，為tio̍h本身所造ê。Lín kng lín ê ông Se-khut, kap lín ê siōng Ki-ûn, chiū-sī lín ê siōng-tè ê chhiⁿ, ūi-tio̍h pún-sin só͘ chō--ê.

27所以我beh hō͘ lín受掠到大馬色ê外面；這是耶和華講ê，伊ê名是萬軍ê上帝。Só͘-í Góa beh hō͘ lín siū-lia̍h kàu Tāi-má-sek ê gōa-bīn; che sī Iâ-hô-hoa kóng--ê, I ê miâ sī bān-kun ê Siōng-tè.

1Tī錫安無掛慮ê，tī撒馬利亞山掠做穩當ê，tī萬國中做第一國ê首領，就是以色列家所歸óa-ê，有災厄ah。Tī Sek-an bô khòa-lū--ê, tī Sat-má-lī-a soaⁿ lia̍h-chòe ún-tàng--ê, tī bān-kok-tiong chòe tē-it kok ê siú-léng, chiū-sī Í-sek-lia̍t-ke só͘ kui-óa--ê, ū chai-ē ah.

2Lín tio̍h去Kah-nî來看，tùi hia去到大城Hap-má；koh落去腓利士ê Ka-te̍k；in kiám有khah贏chiah-ê國mah？in ê境界比lín ê境界khah闊mah？Lín tio̍h khì Kah-nî lâi khòaⁿ, tùi hia khì kàu tōa-siâⁿ Hap-má; koh lo̍h-khì Hui-lī-sū ê Ka-te̍k; in kiám ū khah-iâⁿ chiah ê kok mah? in ê kéng-kài pí lín ê kéng-kài khah khoah mah?

3lín家己掠做降災厄ê日iáu-kú遠，hō͘暴虐ê座位近óa。lín ka-kī lia̍h-chòe kàng chai-ē ê ji̍t iáu-kú hn̄g, hō͘ pō-gio̍k ê chō-ūi kūn-óa.

4Lín倒tī象牙ê眠床，the tī囥(khòng)床，食羊群中ê羊á，kap tiâu內ê牛á，Lín tó tī chhiūⁿ-gê ê bîn-chhn̂g, the tī khòng-chhn̂g, chia̍h iûⁿ-kûn-tiong ê iûⁿ-á, kap tiâu-lāi ê gû-á,

5彈琴彈瑟，唱拉閒(la-êng)ê歌曲，為家己做樂器，親像大衛。tôaⁿ-khîm tôaⁿ-sek, chhiùⁿ la-êng ê koa-khek, ūi ka-kī chòe ga̍k-khì, chhin-chhiūⁿ Tāi-pi̍t.

6用碗lim酒，用siōng好ê油家己抹；總是無為約瑟ê敗壞擔憂。Ēng óaⁿ lim-chiú, ēng siōng-hó ê iû ka-kī boah; chóng-sī bô ūi Iok-sek ê pāi-hoāi tam-iu.

7所以in beh tī受掠ê人ê中間事先受掠；the tī khòng床ê人in ê宴樂beh無去。Só͘-í in beh tī siū-lia̍h ê lâng ê tiong-kan tāi-seng siū-lia̍h; the tī khòng-chhn̂g ê lâng in ê iàn-lo̍k beh bô--khì.

8萬軍ê上帝耶和華講，主耶和華kí家己來chiù-chōa講，我厭賤雅各ê榮華，怨恨伊ê宮殿；因為án-ni我beh將城，kap其中所有ê，lóng交付對敵。Bān-kun ê Siōng-tè Iâ-hô-hoa kóng, Chú Iâ-hô-hoa kí ka-kī lâi chiù-chōa kóng, Góa iàm-chiān Ngá-kok ê êng-hôa, oàn-hūn i ê kiong-tiān; in-ūi án-ni Góa beh chiong siâⁿ, kap kî-tiong só͘-ū--ê, lóng kau-hù tùi-te̍k.

9Hit時若chhun十人tī一間厝，亦lóng beh死；Hit-sî nā chhun cha̍p-lâng tī chi̍t keng chhù, ia̍h lóng beh sí;

10死人ê該親，就是燒伊ê身屍ê，kā伊扶起來，beh帶伊ê屍骸出厝外，就問內房ê人，講，你hia iáu有人無？伊應講，無；伊就講，M̄-thang出聲；因為咱m̄-thang講起耶和華ê名。sí-lâng ê kai-chhin, chiū-sī sio i ê sin-si--ê, kā i hû--khí lâi, beh tòa i ê si-hâi chhut chhù-gōa, chiū mn̄g lāi-pâng ê lâng, kóng, Lí hia iáu ū lâng bô? i ìn kóng, Bô; i chiū kóng, M̄-thang chhut-siaⁿ; in-ūi lán m̄-thang kóng-khí Iâ-hô-hoa ê miâ.

11看ah，耶和華出命令，phah大間厝hō͘伊碎碎，phah細間厝hō͘伊裂裂開。Khòaⁿ ah, Iâ-hô-hoa chhut bēng-lēng, phah tōa-keng chhù hō͘ i chhùi-chhùi, phah sòe-keng chhù hō͘ i li̍h-li̍h--khui.

12馬kiám會跑tī石磐頂mah？人kiám會用牛犁tī-hia mah？Lín竟然hō͘公平變做苦膽，hō͘公義ê果子變做茵籐。Bé kiám ōe pháu tī chio̍h-pôaⁿ-téng mah? Lâng kiám ōe ēng gû lôe tī-hia mah? Lín kéng-jiân hō͘ kong-pêng piàn-chòe khó͘-táⁿ, hō͘ kong-gī ê ké-chí piàn-chòe in-tîn.

13Lín歡喜虛假ê事，也講，阮kiám m̄是用家己ê氣力取兩支角mah？Lín hoaⁿ-hí hu-ké ê sū, iā kóng, Goán kiám-m̄-sī ēng ka-kī ê khùi-la̍t chhú nn̄g-ki kak mah?

14耶和華萬軍ê上帝講，看ah，以色列家，我beh興起一國攻擊lín；in beh苦楚lín，tùi入Hap-má ê路到A-la̍h-pa ê溪。Iâ-hô-hoa bān-kun ê Siōng-tè kóng, Khòaⁿ ah, Í-sek-lia̍t-ke, Góa beh heng-khí chi̍t-kok kong-kek lín; in beh khó͘-chhó͘ lín, tùi ji̍p Hap-má ê lō͘ kàu A-la̍h-pa ê khoe.