1所以我所疼所欣慕ê兄弟，做我ê歡喜，做我ê冕旒ê，所疼ê ah，tio̍h án-ni khiā在tī主。Só͘-í góa só͘ thiàⁿ só͘ him-bō͘ ê hiaⁿ-tī, chòe góa ê hoaⁿ-hí, chòe góa ê bián-liû ê, só͘ thiàⁿ ê ah, tio̍h án-ni khiā-chāi tī Chú.

2我勸Iú-o-tia，koh勸Sûn-to͘-ki，tio̍h同心tī主。Góa khǹg Iú-o-tia koh khǹg Sûn-to͘-ki, tio̍h tâng-sim tī Chú.

3Koh真ê同伴ah，我也求你幫贊chit兩個婦人人，因為in bat kap我同出力tī福音，也kap Kek-lī-bián，以及其餘kap我同tio̍h磨ê，in ê名記tī活命ê冊。Koh chin ê tâng-phōaⁿ ah, góa iā kiû lí pang-chān chí nn̄g ê hū-jîn-lâng, in-ūi in bat kap góa tâng chhut-la̍t tī hok-im, iā kap Kek-lī-bián, í-ki̍p kî-û kap góa tâng tio̍h-bôa ê, in ê miâ kì tī oa̍h-miā ê chheh.

4Tio̍h常常tiàm-tī主來歡喜； 我beh koh講伊，tio̍h歡喜。Tio̍h siông-siông tiàm-tī Chú lâi hoaⁿ-hí; góa beh koh kóng i, Tio̍h hoaⁿ-hí.

5Lín ê純良tio̍h對眾人顯明。主近lah。Lín ê sûn-liông tio̍h tùi chèng lâng hián-bêng. Chú kūn lah.

6一概莫得掛慮； 獨獨萬事tio̍h用祈禱懇求kap感謝，將lín所求ê排列tī上帝；It-khài bo̍h-tit khòa-lū; to̍k-to̍k bān sū tio̍h ēng kî-tó khún-kiû kap kám-siā, chiong lín só͘ kiû ê pâi-lia̍t tī Siōng-tè;

7就上帝ê平安，pôaⁿ過一切人所想會到ê，beh tī基督耶穌保守lín ê心，lín ê念頭。chiū Siōng-tè ê pêng-an, pôaⁿ-kè it-chhè lâng só͘ siūⁿ ōe kàu ê, beh tī Ki-tok Iâ-so͘ pó-siú lín ê sim, lín ê liām-thâu.

8Taⁿ兄弟ah，結尾來講，見若真實ê，見若可敬ê，見若公義ê，見若清潔ê，見若thang疼ê，見若好名聲ê，若有甚麼德行，甚麼thang o-ló，chiah-ê lín tio̍h siàu念。Taⁿ hiaⁿ-tī ah, kiat-bé lâi kóng, kìⁿ-nā chin-si̍t ê, kìⁿ-nā khó-kèng ê, kìⁿ-nā kong-gī ê, kìⁿ-nā chheng-kiat ê, kìⁿ-nā thang thiàⁿ ê, kìⁿ-nā hó miâ-siaⁿ ê, nā ū sím-mi̍h tek-hēng, sím-mi̍h thang o-ló, chiah-ê lín tio̍h siàu-liām.

9Lín tùi我所學習，所領受，所聽見，所看見ê，lóng tio̍h行伊； 就賞賜平安ê上帝beh kap lín tī-teh。Lín tùi góa só͘ ha̍k-si̍p, só͘ niá-siū, só͘ thiaⁿ-kìⁿ, só͘ khòaⁿ-kìⁿ ê, lóng tio̍h kiâⁿ i; chiū siúⁿ-sù pêng-an ê Siōng-tè beh kap lín tī-teh.

10我tiàm-tī主大大歡喜，因為lín siàu念我ê心志taⁿ有koh puh-íⁿ； lín平素有chit號siàu念，不過是無機會nā-tiāⁿ。Góa tiàm-tī Chú tōa-tōa hoaⁿ-hí, in-ūi lín siàu-liām góa ê sim-chì taⁿ ū koh puh-íⁿ; lín pêng-sò͘ ū chit hō siàu-liām, put-kò sī bô ki-hōe nā-tiāⁿ.

11我講án-ni，m̄是為tio̍h用無夠ê緣故； 因為我已經學習，不論甚麼境遇，無m̄知足。Góa kóng án-ni, m̄ sī ūi-tio̍h ēng bô kàu ê iân-kò͘; in-ūi góa í-keng ha̍k-si̍p, put-lūn sím-mi̍h kéng-gū, bô m̄ ti-chiok.

12我知影tiàm-tī卑賤，也知影tiàm-tī富足； 或是飽，或是iau，或是富足，或是缺欠，凡事我lóng老練。Góa chai-iáⁿ tiàm-tī pi-chiān, iā chai-iáⁿ tiàm-tī hù-chiok; he̍k-sī pá, he̍k-sī iau, he̍k-sī hù-chiok, he̍k-sī kheh-khiàm, hoān sū góa lóng láu-liān.

13tiàm-tī賞賜我氣力ê，我事事lóng能。Tiàm-tī siúⁿ-sù góa khùi-la̍t ê, góa sū-sū lóng ōe.

14雖是án-ni，lín體貼我ê患難，這是真好。Sui sī án-ni, lín thé-thiap góa ê hoān-lān, che sī chin hó.

15腓立比人ah，lín也家己知tī傳福音ê起頭，我離開馬其頓ê時，kap我接手ê只有lín，別個教會無；Hui-li̍p-pí lâng ah, lín iā ka-kī chai tī thoân hok-im ê khí-thâu, góa lī-khui Má-kî-tùn ê sî, kap góa chiap-chhiú ê chí ū lín, pa̍t ê kàu-hōe bô;

16因為連我tī帖撒羅尼迦ê時，lín也一pái koh一pái差人供給我所欠用。in-ūi liân góa tī Thiap-sat-lô-nî-ka ê sî, lín iā chi̍t pái koh chi̍t pái chhe lâng kiong-kip góa só͘ khiàm-ēng.

17M̄是我teh求人送物，獨獨是求果子ná chōe，來記落lín ê賬。M̄ sī góa teh kiû lâng sàng mi̍h, to̍k-to̍k sī kiû ké-chí ná chōe, lâi kì-lo̍h lín ê siàu.

18但是我有chiah-ê物，夠額有chhun； 我已經充足，是bat tùi Í-pa-hut-thê受tio̍h lín寄來ê物，就是芳芳ê味，做thang接納ê祭物，上帝所歡喜ê。Nā-sī góa ū chiah ê mi̍h, kàu-gia̍h ū chhun; góa í-keng chhiong-chiok, sī bat tùi Í-pa-hut-thê siū-tio̍h lín kià-lâi ê mi̍h, chiū-sī phang-phang ê bī, chòe thang chiap-la̍p ê chè-mi̍h, Siōng-tè só͘ hoaⁿ-hí ê.

19Koh我ê上帝beh照伊榮光中ê富有，tī基督耶穌，補足lín一切ê欠缺。Koh góa ê Siōng-tè beh chiàu I êng-kng tiong ê pù-ū, tī Ki-tok Iâ-so͘, pó͘-chiok lín it-chhè ê khiàm-kheh.

20願榮光歸tī咱ê上帝咱ê父，到代代無soah。À-bēng。Goān êng-kng kui tī lán ê Siōng-tè lán ê Pē, kàu tāi-tāi bô soah. À-bēng.

21請安tiàm-tī基督耶穌ta̍k-ê聖徒。Chiah-ê kap我tī-teh ê兄弟請安lín。Chhéng-an tiàm-tī Ki-tok Iâ-so͘ ta̍k ê sèng-tô͘. Chiah ê kap góa tī-teh ê hiaⁿ-tī chhéng-an lín.

22Chiah-ê聖徒lóng請安lín； 屬tī該撒ê家ê，koh-khah致意請安lín。Chiah ê sèng-tô͘ lóng chhéng-an lín; sio̍k tī Kai-sat ê ke ê, koh khah tì-ì chhéng-an lín.

23願主耶穌基督ê恩典kap lín ê神saⁿ-kap tī-teh。Goān Chú Iâ-so͘ Ki-tok ê un-tián kap lín ê sîn saⁿ-kap tī-teh.

1Tùi上帝ê旨意做基督耶穌ê使徒，保羅，kap兄弟提摩太，Tùi Siōng-tè ê chí-ì chòe Ki-tok Iâ-so͘ ê sù-tô͘, Pó-lô, kap hiaⁿ-tī Thê-mô͘-thài,

2phoe寄hō͘歌羅西tiàm-tī基督ê聖徒，忠信ê兄弟：願lín對咱ê父上帝得tio̍h恩典平安。phoe kià hō͘ Ko-lô-se tiàm-tī Ki-tok ê sèng-tô͘, tiong-sìn ê hiaⁿ-tī: goān lín tùi lán ê Pē Siōng-tè tit-tio̍h un-tián pêng-an.

3阮常常替lín祈禱，感謝上帝就是咱ê主耶穌基督ê父，Goán siông-siông thòe lín kî-tó, kám-siā Siōng-tè chiū-sī lán ê Chú Iâ-so͘ Ki-tok ê Pē,

4因為bat聽見lín tī基督耶穌ê信，kap ǹg lóng總ê聖徒所有ê疼，in-ūi bat thiaⁿ-kìⁿ lín tī Ki-tok Iâ-so͘ ê sìn, kap ǹg lóng-chóng ê sèng-tô͘ só͘ ū ê thiàⁿ,

5因為所kā lín khǹg tī天裡ê ǹg望，就是lín前tī福音真理ê道所聽見ê；in-ūi só͘ kā lín khǹg tī thiⁿ-ni̍h ê ǹg-bāng, chiū-sī lín chêng tī hok-im chin-lí ê tō só͘ thiaⁿ-kìⁿ ê;

6chit-ê福音已經到tī lín；親像tī遍世間teh結果子，也ná大叢，親像tī lín中間一樣，tùi lín bat聽見也真實知上帝ê恩典hit日；chit ê hok-im í-keng kàu tī lín; chhin-chhiūⁿ tī piàn sè-kan teh kiat ké-chí, iā ná tōa châng, chhin-chhiūⁿ tī lín tiong-kan chi̍t iūⁿ, tùi lín bat thiaⁿ-kìⁿ iā chin-si̍t chai Siōng-tè ê un-tián hit ji̍t;

7親像lín tùi Í-pa-hut所學習ê，伊是阮所疼同做奴僕ê，也為tio̍h阮做基督忠信ê差用；chhin-chhiūⁿ lín tùi Í-pa-hut só͘ ha̍k-si̍p ê, i sī goán só͘ thiàⁿ tâng chòe lô͘-po̍k ê, iā ūi-tio̍h goán chòe Ki-tok tiong-sìn ê chhe-ēng;

8伊也bat將lín tī聖神ê仁愛報阮知。i iā bat chiong lín tī Sèng Sîn ê jîn-ài pò goán chai.

9所以阮tùi聽見ê日，替lín祈禱懇求無soah，願lín tī神靈ta̍k樣ê智慧kap靈通，得tio̍h知伊ê旨意到滿滿，Só͘-í goán tùi thiaⁿ-kìⁿ ê ji̍t, thòe lín kî-tó khún-kiû bô soah, goān lín tī sîn-lêng ta̍k iūⁿ ê tì-hūi kap lêng-thong, tit-tio̍h chai I ê chí-ì kàu móa-móa,

10hō͘ lín所行合tī主，凡事hō͘伊歡喜，tī ta̍k項好事結果子，kohbat上帝ná久ná進步；hō͘ lín só͘ kiâⁿ ha̍p tī Chú, hoān sū hō͘ I hoaⁿ-hí, tī ta̍k hāng hó-sū kiat ké-chí, koh bat Siōng-tè ná kú ná chìn-pō͘;

11koh照伊榮光ê氣力，用ta̍k樣ê權能hō͘ lín有權能，致到lín凡事歡喜吞忍寬容；koh chiàu I êng-kng ê khùi-la̍t, ēng ta̍k iūⁿ ê koân-lêng hō͘ lín ū koân-lêng, tì-kàu lín hoān sū hoaⁿ-hí thun-lún khoan-iông;

12koh感謝父，因為伊hō͘咱堪得有份聖徒ê業tī光明ê所在；koh kám-siā Pē, in-ūi I hō͘ lán kham-tit ū hūn sèng-tô͘ ê gia̍p tī kng-bêng ê só͘-chāi;

13伊已經救咱脫離烏暗ê權勢，來搬徙咱入伊所疼ê Kiáⁿ ê國；I í-keng kiù lán thoat-lī o͘-àm ê koân-sè, lâi poaⁿ-sóa lán ji̍p I só͘ thiàⁿ ê Kiáⁿ ê kok;

14tiàm-tī伊咱得tio̍h贖回，就是咱ê罪赦免；tiàm-tī I lán tit-tio̍h sio̍k-hôe, chiū-sī lán ê chōe sià-bián;

15伊是bōe得thang看見ê上帝ê像，伊是頭一個生ê，tī lóng總受創造ê ê事先；I sī bōe tit thang khòaⁿ-kìⁿ ê Siōng-tè ê siōng, I sī thâu chi̍t ê siⁿ ê, tī lóng-chóng siū chhòng-chō ê ê tāi-seng;

16因為萬物tī伊來創造，tī天裡kap tī地裡ê，有thang看見kap無thang看見ê，或是座位ê，或是治理ê，或是辦政事ê，或是掌權ê，萬項有lóng是tùi伊，也為tio̍h伊，chiah受創造。in-ūi bān mi̍h tī I lâi chhòng-chō, tī thiⁿ-ni̍h kap tī tōe-ni̍h ê, ū thang khòaⁿ-kìⁿ kap bô thang khòaⁿ-kìⁿ ê, he̍k-sī chō-ūi ê, he̍k-sī tī-lí ê, he̍k-sī pān chèng-sū ê, he̍k-sī chiáng-koân ê, bān-hāng-ū lóng sī tùi I, iā ūi-tio̍h I, chiah siū chhòng-chō.

17伊tī萬項有ê事先；萬項有tiàm-tī伊來saⁿ-kap khiā在。I tī bān-hāng-ū ê tāi-seng; bān-hāng-ū tiàm-tī I lâi saⁿ-kap khiā-chāi.

18伊是身軀ê頭，身軀就是教會；伊是源起頭，tùi死人中起來ê頭一個生ê，hō͘伊tī萬項有中做第一。I sī seng-khu ê thâu, seng-khu chiū-sī kàu-hōe; I sī goân-khí-thâu, tùi sí-lâng tiong khí-lâi ê thâu chi̍t ê siⁿ ê, hō͘ I tī bān-hāng-ū tiong chòe tē it.

19因為父歡喜hō͘一切ê豐盛tiàm-tī伊；In-ūi Pē hoaⁿ-hí hō͘ it-chhè ê hong-sēng tiàm-tī I;

20已經將伊十字架ê血來成就和平，就tùi伊hō͘萬項有kap伊本身koh再和，或是地上ê，或是tī天裡ê，lóng是tùi伊。í-keng chiong I si̍p-jī-kè ê huih lâi sêng-chiū hô-pêng, chiū tùi I hō͘ bān-hāng-ū kap I pún-sin koh-chài hô, he̍k-sī tōe-chiūⁿ ê, he̍k-sī tī thiⁿ-ni̍h ê, lóng sī tùi I.

21Koh lín平素tī pháiⁿ ê所行kap上帝隔斷，心內做對敵，Koh lín pêng-sò͘ tī pháiⁿ ê só͘ kiâⁿ kap Siōng-tè keh-tn̄g, sim-lāi chòe tùi-te̍k,

22taⁿ伊tī伊肉體ê身軀，tùi伊ê死，已經hō͘ lín koh再和，beh hō͘ lín chiah-ê成聖，無瑕疵無thang嫌ê，khiā tī伊ê面前；taⁿ I tī I jio̍k-thé ê seng-khu, tùi I ê sí, í-keng hō͘ lín koh-chài hô, beh hō͘ lín chiah-ê chiâⁿ-sèng, bô hâ-chhû bô thang hiâm ê, khiā tī I ê bīn-chêng;

23若lín長長tiàm-tī信，有地基koh堅固，無受搖動，來離開福音ê ǹg望，這福音就是lín所bat聽見ê，koh是傳tī天下lóng總受創造ê ê中間；我保羅已經設立做伊ê差用。nā lín tn̂g-tn̂g tiàm-tī sìn, ū tōe-ki koh kian-kò͘, bô siū iô-tāng, lâi lī-khui hok-im ê ǹg-bāng, che hok-im chiū-sī lín só͘ bat thiaⁿ-kìⁿ ê, koh sī thoân tī thiⁿ-ē lóng-chóng siū chhòng-chō ê ê tiong-kan; góa Pó-lô í-keng siat-li̍p chòe i ê chhe-ēng.

24Taⁿ我為tio̍h lín受chiah-ê艱苦是歡喜；我為tio̍h基督ê身軀就是教會，tī我ê肉體，補滿伊所未有盡ê患難；Taⁿ góa ūi-tio̍h lín siū chiah ê kan-khó͘ sī hoaⁿ-hí; góa ūi-tio̍h Ki-tok ê seng-khu chiū-sī kàu-hōe, tī góa ê jio̍k-thé, pó͘-móa I só͘ bē ū chīn ê hoān-lān;

25我設立做chit-ê教會ê差用，照上帝為tio̍h lín所交付我ê職份，來完滿上帝ê道理，góa siat-li̍p chòe chit ê kàu-hōe ê chhe-ēng, chiàu Siōng-tè ūi-tio̍h lín só͘ kau-hù góa ê chit-hūn, lâi oân-móa Siōng-tè ê tō-lí,

26就是萬世萬代以來所khǹg密ê奧妙；taⁿ已經顯明tī伊ê聖徒；chiū-sī bān sè bān tāi í-lâi só͘ khǹg-ba̍t ê ò-biāu; taⁿ í-keng hián-bêng tī I ê sèng-tô͘;

27上帝ài beh hō͘ in知chit-ê奧妙ê榮光tī外邦中有jōa富有，就是基督tiàm-tī lín，做榮光ê ǹg望ê；Siōng-tè ài beh hō͘ in chai chit ê ò-biāu ê êng-kng tī gōa-pang tiong ū jōa pù-ū, chiū-sī Ki-tok tiàm-tī lín, chòe êng-kng ê ǹg-bāng ê;

28阮傳伊，用ta̍k樣ê智慧苦勸ta̍k人，教示ta̍k人，beh獻ta̍k人tiàm-tī基督來完全。goán thoân I, ēng ta̍k iūⁿ ê tì-hūi khó͘-khǹg ta̍k lâng, kà-sī ta̍k lâng, beh hiàn ta̍k lâng tiàm-tī Ki-tok lâi oân-choân.

29為tio̍h chit-ê我tio̍h磨，照伊出力行tī我內面ê功用來爭戰。Ūi-tio̍h chit-ê góa tio̍h-bôa, chiàu I chhut-la̍t kiâⁿ tī góa lāi-bīn ê kong-iōng lâi cheng-chiàn.

1因為我ài lín知，我為tio̍h lín，kap hiah-ê tòa tī Ló-tí-ka ê，以及見若tī肉體未bat見tio̍h我ê面ê，有怎樣爭戰，In-ūi góa ài lín chai góa ūi-tio̍h lín, kap hiah ê tòa tī Ló-tí-ka ê, í-ki̍p kìⁿ-nā tī jio̍k-thé bē bat kìⁿ-tio̍h góa ê bīn ê, ū cháiⁿ-iūⁿ cheng-chiàn,

2thang hō͘ in ê心受安慰，tī仁愛相結聯，tùi充滿ê曉悟得tio̍h一切ê富有，來深知上帝ê奧妙，就是基督；thang hō͘ in ê sim siū an-ùi, tī jîn-ài saⁿ kiat-liân, tùi chhiong-móa ê hiáu-ngō͘ tit-tio̍h it-chhè ê pù-ū, lâi chhim chai Siōng-tè ê ò-biāu, chiū-sī Ki-tok;

3凡若智慧kap知識ê寶貝lóng khǹg tī伊。hoān-nā tì-hūi kap chai-bat ê pó-pòe lóng khǹg tī I.

4我講án-ni，免得人用奇巧ê話來迷惑lín。Góa kóng án-ni, bián-tit lâng ēng kî-khá ê ōe lâi bê-he̍k lín.

5因為我肉體離開lín，神kap lín tī-teh，歡喜看見lín ê整齊，以及lín信靠基督ê堅固。In-ūi góa jio̍k-thé lī-khui lín, sîn kap lín tī-teh, hoaⁿ-hí khòaⁿ-kìⁿ lín ê chéng-chôe, í-ki̍p lín sìn-khò Ki-tok ê kian-kò͘.

6所以lín既然接納主基督耶穌，就tio̍h照án-ni tiàm-tī伊來行，Só͘-í lín kì-jiân chiap-la̍p Chú Ki-tok Iâ-so͘, chiū tio̍h chiàu án-ni tiàm-tī I lâi kiâⁿ,

7已經釘根tī伊，就直直受起造，tùi信來堅固，照lín所bat受ê教示，滿滿感謝。í-keng tèng kun tī I, chiū ti̍t-ti̍t siū khí-chō, tùi sìn lâi kian-kò͘, chiàu lín só͘ bat siū ê kà-sī, móa-móa kám-siā.

8Tio̍h謹慎，免得hō͘人用伊ê哲學kap空空ê無影話來迷惑lín，照人ê遺傳，照世間ê小學，m̄是照基督。Tio̍h kín-sīn bián-tit hō͘ lâng ēng i ê tiat-ha̍k kap khang-khang ê bô-iáⁿ ōe lâi bê-he̍k lín, chiàu lâng ê ûi-thoân, chiàu sè-kan ê siáu-ha̍k, m̄ sī chiàu Ki-tok.

9因為上帝性質ê豐盛lóng齊備tiàm-tī伊。In-ūi Siōng-tè sèng-chit ê hong-sēng lóng chiâu-pī tiàm-tī I.

10Lín tiàm-tī伊也得tio̍h豐盛；伊是一切辦政事掌權ê ê頭。Lín tiàm-tī I iā tit-tio̍h hong-sēng; I sī it-chhè pān chèng-sū chiáng-koân ê ê thâu.

11Tiàm-tī伊lín也已經受割禮，m̄是用手來行ê割禮，就是基督ê割禮，thǹg去肉體ê身軀；Tiàm-tī I lín iā í-keng siū kat-lé, m̄ sī ēng chhiú lâi kiâⁿ ê kat-lé, chiū-sī Ki-tok ê kat-lé, thǹg-khì jio̍k-thé ê seng-khu;

12已經tī洗禮kap伊同埋葬，就tī chit-ê洗禮也kap伊同起來，是tùi信上帝ê功用，就是tùi死人中hō͘伊起來ê。í-keng tī sóe-lé kap I tâng bâi-chòng, chiū tī chit ê sóe-lé iā kap I tâng khí-lâi, sī tùi sìn Siōng-tè ê kong-iōng, chiū-sī tùi sí-lâng tiong hō͘ I khí-lâi ê.

13Koh lín前為tio̍h罪過kap肉體ê無割禮來死ê，taⁿ上帝hō͘ lín kap基督同koh活，已經赦免咱lóng總ê罪過，Koh lín chêng ūi-tio̍h chōe-kòa kap jio̍k-thé ê bô kat-lé lâi sí ê, taⁿ Siōng-tè hō͘ lín kap Ki-tok tâng koh-oa̍h, í-keng sià-bián lán lóng-chóng ê chōe-kòa,

14擦消攻擊咱chiah-ê規例ê字樣，就是對敵咱ê，釘伊tī十字架，來tùi中間除伊；chhat-siau kong-kek lán chiah ê kui-lē ê jī-iūⁿ, chiū-sī tùi-te̍k lán ê, tèng i tī si̍p-jī-kè, lâi tùi tiong-kan tû i;

15既然敗hiah-ê辦政事ê，掌權ê，就公行顯明in，tī十字架贏in來大悅。kì-jiân pāi hiah ê pān chèng-sū ê, chiáng-koân ê, chiū kong-hêng hián-bêng in, tī si̍p-jī-kè iâⁿ in lâi tāi-ia̍t.

16所以莫得因為所食所lim ê，á是為tio̍h節期，初一，以及安歇日ê緣故，hō͘人擬議；Só͘-í bo̍h-tit in-ūi só͘ chia̍h só͘ lim ê, á-sī ūi-tio̍h choeh-kî, chhoe it, í-ki̍p an-hioh-ji̍t ê iân-kò͘, hō͘ lâng gí-gī;

17chiah-ê lóng是將來ê事ê影，但是形就是基督ê。chiah-ê lóng sī chiong-lâi ê sū ê iáⁿ, nā-sī hêng chiū-sī Ki-tok ê.

18莫得hō͘人搶lín ê報賞，in故意謙卑敬拜天使，óa靠in所有看見ê，照in肉體ê心志kan-ta teh phòng-hong，Bo̍h-tit hō͘ lâng chhiúⁿ lín ê pò-siúⁿ, in kò͘-ì khiam-pi kèng-pài thiⁿ-sài, óa-khò in só͘ ū khòaⁿ-kìⁿ ê, chiàu in jio̍k-thé ê sim-chì kan-ta teh phòng-hong,

19無連tiâu tī hit-ê頭，全身是óa靠hit-ê頭，tùi chiah-ê節kap根得tio̍h接應連絡，照上帝所賞賜ê長成來長成。bô liân-tiâu tī hit ê Thâu, choân sin sī óa-khò hit ê Thâu, tùi chiah ê chat kap kun tit-tio̍h chiap-èng liân-lo̍k, chiàu Siōng-tè só͘ siúⁿ-sù ê tióng-sêng lâi tióng-sêng.

20Lín若kap基督同死，脫離世間ê小學，怎樣ná親像活tī世間，來家己降服tī chiah-ê規例，親像講，Lín nā kap Ki-tok tâng sí, thoat-lī sè-kan ê siáu-ha̍k, cháiⁿ-iūⁿ ná chhin-chhiūⁿ oa̍h tī sè-kan, lâi ka-kī hâng-ho̍k tī chiah ê kui-lē, chhin-chhiūⁿ kóng,

21莫得the̍h-tio̍h，莫得試食，莫得摸tio̍h，Bo̍h-tit the̍h-tio̍h, Bo̍h-tit chhì-chia̍h, Bo̍h-tit bong-tio̍h,

22(chiah-ê物lóng是用了會敗壞ê) ，是照人ê條規kap教示。(chiah ê mi̍h lóng sī ēng-liáu ōe pāi-hoāi ê), sī chiàu lâng ê tiâu-kui kap kà-sī.

23Chiah-ê規例是hō͘人行自專ê敬拜，家己謙卑，無惜身軀；名是有智慧，其實lóng無功效thang約束肉體ê放縱。Chiah ê kui-lē sī hō͘ lâng kiâⁿ chū-choan ê kèng-pài, ka-kī khiam-pi, bô sioh seng-khu; miâ sī ū tì-hūi, kî-si̍t lóng bô kong-hāu thang iok-sok jio̍k-thé ê hòng-chhiòng.