1Tùi上帝ê旨意做基督耶穌ê使徒，保羅，kap兄弟提摩太，Tùi Siōng-tè ê chí-ì chòe Ki-tok Iâ-so͘ ê sù-tô͘, Pó-lô, kap hiaⁿ-tī Thê-mô͘-thài,

2phoe寄hō͘歌羅西tiàm-tī基督ê聖徒，忠信ê兄弟：願lín對咱ê父上帝得tio̍h恩典平安。phoe kià hō͘ Ko-lô-se tiàm-tī Ki-tok ê sèng-tô͘, tiong-sìn ê hiaⁿ-tī: goān lín tùi lán ê Pē Siōng-tè tit-tio̍h un-tián pêng-an.

3阮常常替lín祈禱，感謝上帝就是咱ê主耶穌基督ê父，Goán siông-siông thòe lín kî-tó, kám-siā Siōng-tè chiū-sī lán ê Chú Iâ-so͘ Ki-tok ê Pē,

4因為bat聽見lín tī基督耶穌ê信，kap ǹg lóng總ê聖徒所有ê疼，in-ūi bat thiaⁿ-kìⁿ lín tī Ki-tok Iâ-so͘ ê sìn, kap ǹg lóng-chóng ê sèng-tô͘ só͘ ū ê thiàⁿ,

5因為所kā lín khǹg tī天裡ê ǹg望，就是lín前tī福音真理ê道所聽見ê；in-ūi só͘ kā lín khǹg tī thiⁿ-ni̍h ê ǹg-bāng, chiū-sī lín chêng tī hok-im chin-lí ê tō só͘ thiaⁿ-kìⁿ ê;

6chit-ê福音已經到tī lín；親像tī遍世間teh結果子，也ná大叢，親像tī lín中間一樣，tùi lín bat聽見也真實知上帝ê恩典hit日；chit ê hok-im í-keng kàu tī lín; chhin-chhiūⁿ tī piàn sè-kan teh kiat ké-chí, iā ná tōa châng, chhin-chhiūⁿ tī lín tiong-kan chi̍t iūⁿ, tùi lín bat thiaⁿ-kìⁿ iā chin-si̍t chai Siōng-tè ê un-tián hit ji̍t;

7親像lín tùi Í-pa-hut所學習ê，伊是阮所疼同做奴僕ê，也為tio̍h阮做基督忠信ê差用；chhin-chhiūⁿ lín tùi Í-pa-hut só͘ ha̍k-si̍p ê, i sī goán só͘ thiàⁿ tâng chòe lô͘-po̍k ê, iā ūi-tio̍h goán chòe Ki-tok tiong-sìn ê chhe-ēng;

8伊也bat將lín tī聖神ê仁愛報阮知。i iā bat chiong lín tī Sèng Sîn ê jîn-ài pò goán chai.

9所以阮tùi聽見ê日，替lín祈禱懇求無soah，願lín tī神靈ta̍k樣ê智慧kap靈通，得tio̍h知伊ê旨意到滿滿，Só͘-í goán tùi thiaⁿ-kìⁿ ê ji̍t, thòe lín kî-tó khún-kiû bô soah, goān lín tī sîn-lêng ta̍k iūⁿ ê tì-hūi kap lêng-thong, tit-tio̍h chai I ê chí-ì kàu móa-móa,

10hō͘ lín所行合tī主，凡事hō͘伊歡喜，tī ta̍k項好事結果子，kohbat上帝ná久ná進步；hō͘ lín só͘ kiâⁿ ha̍p tī Chú, hoān sū hō͘ I hoaⁿ-hí, tī ta̍k hāng hó-sū kiat ké-chí, koh bat Siōng-tè ná kú ná chìn-pō͘;

11koh照伊榮光ê氣力，用ta̍k樣ê權能hō͘ lín有權能，致到lín凡事歡喜吞忍寬容；koh chiàu I êng-kng ê khùi-la̍t, ēng ta̍k iūⁿ ê koân-lêng hō͘ lín ū koân-lêng, tì-kàu lín hoān sū hoaⁿ-hí thun-lún khoan-iông;

12koh感謝父，因為伊hō͘咱堪得有份聖徒ê業tī光明ê所在；koh kám-siā Pē, in-ūi I hō͘ lán kham-tit ū hūn sèng-tô͘ ê gia̍p tī kng-bêng ê só͘-chāi;

13伊已經救咱脫離烏暗ê權勢，來搬徙咱入伊所疼ê Kiáⁿ ê國；I í-keng kiù lán thoat-lī o͘-àm ê koân-sè, lâi poaⁿ-sóa lán ji̍p I só͘ thiàⁿ ê Kiáⁿ ê kok;

14tiàm-tī伊咱得tio̍h贖回，就是咱ê罪赦免；tiàm-tī I lán tit-tio̍h sio̍k-hôe, chiū-sī lán ê chōe sià-bián;

15伊是bōe得thang看見ê上帝ê像，伊是頭一個生ê，tī lóng總受創造ê ê事先；I sī bōe tit thang khòaⁿ-kìⁿ ê Siōng-tè ê siōng, I sī thâu chi̍t ê siⁿ ê, tī lóng-chóng siū chhòng-chō ê ê tāi-seng;

16因為萬物tī伊來創造，tī天裡kap tī地裡ê，有thang看見kap無thang看見ê，或是座位ê，或是治理ê，或是辦政事ê，或是掌權ê，萬項有lóng是tùi伊，也為tio̍h伊，chiah受創造。in-ūi bān mi̍h tī I lâi chhòng-chō, tī thiⁿ-ni̍h kap tī tōe-ni̍h ê, ū thang khòaⁿ-kìⁿ kap bô thang khòaⁿ-kìⁿ ê, he̍k-sī chō-ūi ê, he̍k-sī tī-lí ê, he̍k-sī pān chèng-sū ê, he̍k-sī chiáng-koân ê, bān-hāng-ū lóng sī tùi I, iā ūi-tio̍h I, chiah siū chhòng-chō.

17伊tī萬項有ê事先；萬項有tiàm-tī伊來saⁿ-kap khiā在。I tī bān-hāng-ū ê tāi-seng; bān-hāng-ū tiàm-tī I lâi saⁿ-kap khiā-chāi.

18伊是身軀ê頭，身軀就是教會；伊是源起頭，tùi死人中起來ê頭一個生ê，hō͘伊tī萬項有中做第一。I sī seng-khu ê thâu, seng-khu chiū-sī kàu-hōe; I sī goân-khí-thâu, tùi sí-lâng tiong khí-lâi ê thâu chi̍t ê siⁿ ê, hō͘ I tī bān-hāng-ū tiong chòe tē it.

19因為父歡喜hō͘一切ê豐盛tiàm-tī伊；In-ūi Pē hoaⁿ-hí hō͘ it-chhè ê hong-sēng tiàm-tī I;

20已經將伊十字架ê血來成就和平，就tùi伊hō͘萬項有kap伊本身koh再和，或是地上ê，或是tī天裡ê，lóng是tùi伊。í-keng chiong I si̍p-jī-kè ê huih lâi sêng-chiū hô-pêng, chiū tùi I hō͘ bān-hāng-ū kap I pún-sin koh-chài hô, he̍k-sī tōe-chiūⁿ ê, he̍k-sī tī thiⁿ-ni̍h ê, lóng sī tùi I.

21Koh lín平素tī pháiⁿ ê所行kap上帝隔斷，心內做對敵，Koh lín pêng-sò͘ tī pháiⁿ ê só͘ kiâⁿ kap Siōng-tè keh-tn̄g, sim-lāi chòe tùi-te̍k,

22taⁿ伊tī伊肉體ê身軀，tùi伊ê死，已經hō͘ lín koh再和，beh hō͘ lín chiah-ê成聖，無瑕疵無thang嫌ê，khiā tī伊ê面前；taⁿ I tī I jio̍k-thé ê seng-khu, tùi I ê sí, í-keng hō͘ lín koh-chài hô, beh hō͘ lín chiah-ê chiâⁿ-sèng, bô hâ-chhû bô thang hiâm ê, khiā tī I ê bīn-chêng;

23若lín長長tiàm-tī信，有地基koh堅固，無受搖動，來離開福音ê ǹg望，這福音就是lín所bat聽見ê，koh是傳tī天下lóng總受創造ê ê中間；我保羅已經設立做伊ê差用。nā lín tn̂g-tn̂g tiàm-tī sìn, ū tōe-ki koh kian-kò͘, bô siū iô-tāng, lâi lī-khui hok-im ê ǹg-bāng, che hok-im chiū-sī lín só͘ bat thiaⁿ-kìⁿ ê, koh sī thoân tī thiⁿ-ē lóng-chóng siū chhòng-chō ê ê tiong-kan; góa Pó-lô í-keng siat-li̍p chòe i ê chhe-ēng.

24Taⁿ我為tio̍h lín受chiah-ê艱苦是歡喜；我為tio̍h基督ê身軀就是教會，tī我ê肉體，補滿伊所未有盡ê患難；Taⁿ góa ūi-tio̍h lín siū chiah ê kan-khó͘ sī hoaⁿ-hí; góa ūi-tio̍h Ki-tok ê seng-khu chiū-sī kàu-hōe, tī góa ê jio̍k-thé, pó͘-móa I só͘ bē ū chīn ê hoān-lān;

25我設立做chit-ê教會ê差用，照上帝為tio̍h lín所交付我ê職份，來完滿上帝ê道理，góa siat-li̍p chòe chit ê kàu-hōe ê chhe-ēng, chiàu Siōng-tè ūi-tio̍h lín só͘ kau-hù góa ê chit-hūn, lâi oân-móa Siōng-tè ê tō-lí,

26就是萬世萬代以來所khǹg密ê奧妙；taⁿ已經顯明tī伊ê聖徒；chiū-sī bān sè bān tāi í-lâi só͘ khǹg-ba̍t ê ò-biāu; taⁿ í-keng hián-bêng tī I ê sèng-tô͘;

27上帝ài beh hō͘ in知chit-ê奧妙ê榮光tī外邦中有jōa富有，就是基督tiàm-tī lín，做榮光ê ǹg望ê；Siōng-tè ài beh hō͘ in chai chit ê ò-biāu ê êng-kng tī gōa-pang tiong ū jōa pù-ū, chiū-sī Ki-tok tiàm-tī lín, chòe êng-kng ê ǹg-bāng ê;

28阮傳伊，用ta̍k樣ê智慧苦勸ta̍k人，教示ta̍k人，beh獻ta̍k人tiàm-tī基督來完全。goán thoân I, ēng ta̍k iūⁿ ê tì-hūi khó͘-khǹg ta̍k lâng, kà-sī ta̍k lâng, beh hiàn ta̍k lâng tiàm-tī Ki-tok lâi oân-choân.

29為tio̍h chit-ê我tio̍h磨，照伊出力行tī我內面ê功用來爭戰。Ūi-tio̍h chit-ê góa tio̍h-bôa, chiàu I chhut-la̍t kiâⁿ tī góa lāi-bīn ê kong-iōng lâi cheng-chiàn.

1因為我ài lín知，我為tio̍h lín，kap hiah-ê tòa tī Ló-tí-ka ê，以及見若tī肉體未bat見tio̍h我ê面ê，有怎樣爭戰，In-ūi góa ài lín chai góa ūi-tio̍h lín, kap hiah ê tòa tī Ló-tí-ka ê, í-ki̍p kìⁿ-nā tī jio̍k-thé bē bat kìⁿ-tio̍h góa ê bīn ê, ū cháiⁿ-iūⁿ cheng-chiàn,

2thang hō͘ in ê心受安慰，tī仁愛相結聯，tùi充滿ê曉悟得tio̍h一切ê富有，來深知上帝ê奧妙，就是基督；thang hō͘ in ê sim siū an-ùi, tī jîn-ài saⁿ kiat-liân, tùi chhiong-móa ê hiáu-ngō͘ tit-tio̍h it-chhè ê pù-ū, lâi chhim chai Siōng-tè ê ò-biāu, chiū-sī Ki-tok;

3凡若智慧kap知識ê寶貝lóng khǹg tī伊。hoān-nā tì-hūi kap chai-bat ê pó-pòe lóng khǹg tī I.

4我講án-ni，免得人用奇巧ê話來迷惑lín。Góa kóng án-ni, bián-tit lâng ēng kî-khá ê ōe lâi bê-he̍k lín.

5因為我肉體離開lín，神kap lín tī-teh，歡喜看見lín ê整齊，以及lín信靠基督ê堅固。In-ūi góa jio̍k-thé lī-khui lín, sîn kap lín tī-teh, hoaⁿ-hí khòaⁿ-kìⁿ lín ê chéng-chôe, í-ki̍p lín sìn-khò Ki-tok ê kian-kò͘.

6所以lín既然接納主基督耶穌，就tio̍h照án-ni tiàm-tī伊來行，Só͘-í lín kì-jiân chiap-la̍p Chú Ki-tok Iâ-so͘, chiū tio̍h chiàu án-ni tiàm-tī I lâi kiâⁿ,

7已經釘根tī伊，就直直受起造，tùi信來堅固，照lín所bat受ê教示，滿滿感謝。í-keng tèng kun tī I, chiū ti̍t-ti̍t siū khí-chō, tùi sìn lâi kian-kò͘, chiàu lín só͘ bat siū ê kà-sī, móa-móa kám-siā.

8Tio̍h謹慎，免得hō͘人用伊ê哲學kap空空ê無影話來迷惑lín，照人ê遺傳，照世間ê小學，m̄是照基督。Tio̍h kín-sīn bián-tit hō͘ lâng ēng i ê tiat-ha̍k kap khang-khang ê bô-iáⁿ ōe lâi bê-he̍k lín, chiàu lâng ê ûi-thoân, chiàu sè-kan ê siáu-ha̍k, m̄ sī chiàu Ki-tok.

9因為上帝性質ê豐盛lóng齊備tiàm-tī伊。In-ūi Siōng-tè sèng-chit ê hong-sēng lóng chiâu-pī tiàm-tī I.

10Lín tiàm-tī伊也得tio̍h豐盛；伊是一切辦政事掌權ê ê頭。Lín tiàm-tī I iā tit-tio̍h hong-sēng; I sī it-chhè pān chèng-sū chiáng-koân ê ê thâu.

11Tiàm-tī伊lín也已經受割禮，m̄是用手來行ê割禮，就是基督ê割禮，thǹg去肉體ê身軀；Tiàm-tī I lín iā í-keng siū kat-lé, m̄ sī ēng chhiú lâi kiâⁿ ê kat-lé, chiū-sī Ki-tok ê kat-lé, thǹg-khì jio̍k-thé ê seng-khu;

12已經tī洗禮kap伊同埋葬，就tī chit-ê洗禮也kap伊同起來，是tùi信上帝ê功用，就是tùi死人中hō͘伊起來ê。í-keng tī sóe-lé kap I tâng bâi-chòng, chiū tī chit ê sóe-lé iā kap I tâng khí-lâi, sī tùi sìn Siōng-tè ê kong-iōng, chiū-sī tùi sí-lâng tiong hō͘ I khí-lâi ê.

13Koh lín前為tio̍h罪過kap肉體ê無割禮來死ê，taⁿ上帝hō͘ lín kap基督同koh活，已經赦免咱lóng總ê罪過，Koh lín chêng ūi-tio̍h chōe-kòa kap jio̍k-thé ê bô kat-lé lâi sí ê, taⁿ Siōng-tè hō͘ lín kap Ki-tok tâng koh-oa̍h, í-keng sià-bián lán lóng-chóng ê chōe-kòa,

14擦消攻擊咱chiah-ê規例ê字樣，就是對敵咱ê，釘伊tī十字架，來tùi中間除伊；chhat-siau kong-kek lán chiah ê kui-lē ê jī-iūⁿ, chiū-sī tùi-te̍k lán ê, tèng i tī si̍p-jī-kè, lâi tùi tiong-kan tû i;

15既然敗hiah-ê辦政事ê，掌權ê，就公行顯明in，tī十字架贏in來大悅。kì-jiân pāi hiah ê pān chèng-sū ê, chiáng-koân ê, chiū kong-hêng hián-bêng in, tī si̍p-jī-kè iâⁿ in lâi tāi-ia̍t.

16所以莫得因為所食所lim ê，á是為tio̍h節期，初一，以及安歇日ê緣故，hō͘人擬議；Só͘-í bo̍h-tit in-ūi só͘ chia̍h só͘ lim ê, á-sī ūi-tio̍h choeh-kî, chhoe it, í-ki̍p an-hioh-ji̍t ê iân-kò͘, hō͘ lâng gí-gī;

17chiah-ê lóng是將來ê事ê影，但是形就是基督ê。chiah-ê lóng sī chiong-lâi ê sū ê iáⁿ, nā-sī hêng chiū-sī Ki-tok ê.

18莫得hō͘人搶lín ê報賞，in故意謙卑敬拜天使，óa靠in所有看見ê，照in肉體ê心志kan-ta teh phòng-hong，Bo̍h-tit hō͘ lâng chhiúⁿ lín ê pò-siúⁿ, in kò͘-ì khiam-pi kèng-pài thiⁿ-sài, óa-khò in só͘ ū khòaⁿ-kìⁿ ê, chiàu in jio̍k-thé ê sim-chì kan-ta teh phòng-hong,

19無連tiâu tī hit-ê頭，全身是óa靠hit-ê頭，tùi chiah-ê節kap根得tio̍h接應連絡，照上帝所賞賜ê長成來長成。bô liân-tiâu tī hit ê Thâu, choân sin sī óa-khò hit ê Thâu, tùi chiah ê chat kap kun tit-tio̍h chiap-èng liân-lo̍k, chiàu Siōng-tè só͘ siúⁿ-sù ê tióng-sêng lâi tióng-sêng.

20Lín若kap基督同死，脫離世間ê小學，怎樣ná親像活tī世間，來家己降服tī chiah-ê規例，親像講，Lín nā kap Ki-tok tâng sí, thoat-lī sè-kan ê siáu-ha̍k, cháiⁿ-iūⁿ ná chhin-chhiūⁿ oa̍h tī sè-kan, lâi ka-kī hâng-ho̍k tī chiah ê kui-lē, chhin-chhiūⁿ kóng,

21莫得the̍h-tio̍h，莫得試食，莫得摸tio̍h，Bo̍h-tit the̍h-tio̍h, Bo̍h-tit chhì-chia̍h, Bo̍h-tit bong-tio̍h,

22(chiah-ê物lóng是用了會敗壞ê) ，是照人ê條規kap教示。(chiah ê mi̍h lóng sī ēng-liáu ōe pāi-hoāi ê), sī chiàu lâng ê tiâu-kui kap kà-sī.

23Chiah-ê規例是hō͘人行自專ê敬拜，家己謙卑，無惜身軀；名是有智慧，其實lóng無功效thang約束肉體ê放縱。Chiah ê kui-lē sī hō͘ lâng kiâⁿ chū-choan ê kèng-pài, ka-kī khiam-pi, bô sioh seng-khu; miâ sī ū tì-hūi, kî-si̍t lóng bô kong-hāu thang iok-sok jio̍k-thé ê hòng-chhiòng.

1所以lín若bat kap基督同koh活，就tio̍h求tī頂面ê事；基督tī hia，坐tī上帝ê大pêng。Só͘-í lín nā bat kap Ki-tok tâng koh-oa̍h, chiū tio̍h kiû tī téng-bīn ê sū; Ki-tok tī hia, chē tī Siōng-tè ê tōa pêng.

2Tio̍h致意頂面ê事，m̄-thang致意地上ê事。Tio̍h tì-ì téng-bīn ê sū, m̄ thang tì-ì tōe-chiūⁿ ê sū.

3因為lín bat死，也lín ê活命kap基督saⁿ-kap khǹg tī上帝。In-ūi lín bat sí, iā lín ê oa̍h-miā kap Ki-tok saⁿ-kap khǹg tī Siōng-tè.

4基督是咱ê活命；到伊顯明ê時，lín也beh saⁿ-kap顯明tī榮光ê中央。Ki-tok sī lán ê oa̍h-miā; kàu I hián-bêng ê sî, lín iā beh saⁿ-kap hián-bêng tī êng-kng ê tiong-ng.

5所以lín tio̍h phah死lín tī地裡ê百體，就是姦淫、污穢、邪ê心情、pháiⁿ ê私慾，kap貪心就是拜偶像；Só͘-í lín tio̍h phah-sí lín tī tōe-ni̍h ê pah-thé, chiū-sī kan-îm, ù-òe, siâ ê sim-chêng, pháiⁿ ê su-io̍k, kap tham-sim chiū-sī pài ngó͘-siōng;

6因為tùi chiah-ê事，上帝ê受氣臨到悖逆ê人。in-ūi tùi chiah ê sū, Siōng-tè ê siū-khì lîm-kàu pōe-ge̍k ê lâng.

7Lín活tī in中間ê時，也bat行tī chiah-ê。Lín oa̍h tī in tiong-kan ê sî, iā bat kiâⁿ tī chiah-ê.

8但是chit-tia̍p lín也tio̍h除去chiah-ê一切ê事，就是怨恨、受氣、惡毒、譭謗，kap嘴內見笑ê話。Nā-sī chit tia̍p lín iā tio̍h tû-khì chiah ê it-chhè ê sū, chiū-sī oàn-hūn, siū-khì, ok-to̍k, húi-pòng, kap chhùi-lāi kiàn-siàu ê ōe.

9莫得講白賊相騙，因為lín已經thǹg去舊ê人kap伊ê行做，Bo̍h-tit kóng pe̍h-chha̍t saⁿ-phiàn, in-ūi lín í-keng thǹg-khì kū ê lâng kap i ê kiâⁿ-chòe,

10也有穿新ê人，就是日日換新，到得tio̍h知識，照創造伊ê ê像。iā ū chhēng sin ê lâng, chiū-sī ji̍t-ji̍t ōaⁿ-sin, kàu tit-tio̍h chai-bat, chiàu chhòng-chō i ê ê siōng.

11其中無有分別希利尼、猶太，割禮ê、無割禮ê，化外ê人、Se-kó͘-thê人，做奴僕ê、自由ê，獨獨基督是萬有，koh tī萬有中。Kî-tiong bô ū hun-piat Hi-lī-nî Iû-thài, kat-lé ê bô kat-lé ê, hòa-gōa ê lâng, Se-kó͘-thê lâng, chòe lô͘-po̍k ê, chū-iû ê, to̍k-to̍k Ki-tok sī bān-ū, koh tī bān-ū tiong.

12Lín既然hō͘上帝所揀，是聖也得tio̍h疼ê，tio̍h用憐憫ê心，kap仁慈、謙卑、溫柔、吞忍，來穿；Lín kì-jiân hō͘ Siōng-tè só͘ kéng, sī sèng iā tit-tio̍h thiàⁿ ê, tio̍h ēng lîn-bín ê sim, kap jîn-chû, khiam-pi, un-jiû, thun-lún, lâi chhēng;

13設使jī-pí有hia̍p嫌，就tio̍h相寬容，相赦免；親像主bat赦免lín，lín也tio̍h án-ni。siat-sú jī-pí ū hia̍p-hiâm, chiū tio̍h saⁿ khoan-iông, saⁿ sià-bián; chhin-chhiūⁿ Chú bat sià-bián lín, lín iā tio̍h án-ni.

14Tī chiah-ê ê頂面tio̍h穿仁愛，就是完全ê結聯。Tī chiah-ê ê téng-bīn tio̍h chhēng jîn-ài, chiū-sī oân-choân ê kiat-liân.

15Tio̍h hō͘基督ê和平tī lín心內做主，lín受召成做一體也是為tio̍h chit-ê；koh tio̍h感謝。Tio̍h hō͘ Ki-tok ê hô-pêng tī lín sim-lāi chòe chú, lín siū tiàu chiâⁿ-chòe chi̍t thé iā sī ūi-tio̍h chit-ê; koh tio̍h kám-siā.

16Tio̍h hō͘基督ê道理，tī ta̍k樣ê智慧，充滿tī lín ê心；用詩，用歌，用神ê賦，相教示相苦勸，tùi恩典tī心內teh吟來o-ló上帝。Tio̍h hō͘ Ki-tok ê tō-lí, tī ta̍k iūⁿ ê tì-hūi, chhiong-móa tī lín ê sim; ēng si, ēng koa, ēng sîn ê hù, saⁿ kà-sī saⁿ khó͘-khǹg, tùi un-tián tī sim-lāi teh gîm lâi o-ló Siōng-tè.

17Koh凡所做ê，或是講或是行，lóng tio̍h tī主耶穌ê名來做伊；也tùi伊來感謝父上帝。Koh hoān só͘ chòe ê, he̍k-sī kóng he̍k-sī kiâⁿ, lóng tio̍h tī Chú Iâ-so͘ ê miâ lâi chòe i; iā tùi I lâi kám-siā Pē Siōng-tè.

18做婦人人ê，lín tio̍h順服丈夫，照tiàm-tī主所合宜ê。Chòe hū-jîn-lâng ê, lín tio̍h sūn-ho̍k tiōng-hu, chiàu tiàm-tī Chú só͘ ha̍p-gî ê.

19做丈夫ê，lín tio̍h疼婦人人，m̄-thang pháiⁿ款待in。Chòe tiōng-hu ê, lín tio̍h thiàⁿ hū-jîn-lâng, m̄ thang pháiⁿ khoán-thāi in.

20做kiáⁿ兒ê，lín tio̍h凡事順thàn父母，因為這是主所歡喜ê。Chòe kiáⁿ-jî ê, lín tio̍h hoān sū sūn-thàn pē-bú, in-ūi che sī Chú só͘ hoaⁿ-hí ê.

21做老父ê，lín m̄-thang激hō͘ lín ê kiáⁿ兒受氣，驚了in失志。Chòe lāu-pē ê, lín m̄ thang kek hō͘ lín ê kiáⁿ-jî siū-khì, kiaⁿ-liáu in sit-chì.

22做奴僕ê，lín tio̍h凡事順thàn hiah-ê照肉體做lín ê主人ê；m̄是用hit號tī人ê目睭前ê慇勤，親像取hō͘人歡喜ê，tio̍h用誠實心敬畏主；Chòe lô͘-po̍k ê, lín tio̍h hoān sū sūn-thàn hiah ê chiàu jio̍k-thé chòe lín ê chú-lâng ê; m̄ sī ēng hit hō tī lâng ê ba̍k-chiu chêng ê un-khûn, chhin-chhiūⁿ chhú hō͘ lâng hoaⁿ-hí ê, tio̍h ēng sêng-si̍t sim kèng-ùi Chú;

23見若lín所做，tio̍h出tī心來做，親像服事主，m̄是服事人；kìⁿ-nā lín só͘ chòe, tio̍h chhut tī sim lâi chòe, chhin-chhiūⁿ ho̍k-sāi Chú, m̄ sī ho̍k-sāi lâng;

24知lín beh tùi主得tio̍h承接業ê報賞；lín是服事主基督。chai lín beh tùi Chú tit-tio̍h sêng-chiap gia̍p ê pò-siúⁿ; lín sī ho̍k-sāi Chú Ki-tok.

25因為行不義ê beh受伊不義ê報應；上帝也無照外貌取人。In-ūi kiâⁿ put-gī ê beh siū i put-gī ê pò-èng; Siōng-tè iā bô chiàu gōa-māu chhú lâng.