1支派ê名照下底所記ê；tùi極北ê界tùi Hi-te̍k-lûn ê路，到Hap-má出入ê所在，tī大馬色警戒Hap-sat-í-lân ǹg北近óa Hap-má ê地，tùi東到西；Tàn，一份。Chi-phài ê miâ chiàu ē-tóe só͘ kì--ê; tùi ke̍k-pak ê kài tùi Hi-te̍k-lûn ê lō͘, kàu Hap-má chhut-ji̍p ê só͘-chāi, tī Tāi-má-sek kéng-kài Hap-sat-í-lân ǹg-pak kūn-óa Hap-má ê tōe, tùi-tang kàu sai; Tàn, chi̍t-hūn.

2Óa近Tàn ê地界，tùi東到西；A-siat，一份。Óa-kūn Tàn ê tōe-kài, tùi-tang kàu sai; A-siat, chi̍t-hūn.

3Óa近A-siat ê地界，tùi東到西；Ná-hut-tha-lī，一份。Óa-kūn A-siat ê tōe-kài, tùi tang kàu sai; Ná-hut-tha-lī, chi̍t-hūn.

4Óa近Ná-hut-tha-lī ê地界，tùi東到西；Má-ná-se，一份。Óa-kūn Ná-hut-tha-lī ê tōe-kài, tùi-tang kàu-sai; Má-ná-se, chi̍t-hūn.

5Óa近Má-ná-se ê地界，tùi東到西；Í-hoat-liân，一份。Óa-kūn Má-ná-se ê tōe-kài, tùi-tang kàu-sai; Í-hoat-liân, chi̍t-hūn.

6Óa近Í-hoat-liân ê地界，tùi東到西；Liû-piān，一份。Óa-kūn Í-hoat-liân ê tōe-kài, tùi-tang kàu sai; Liû-piān, chi̍t-hūn.

7Óa近Liû-piān ê地界，tùi東到西；猶大，一份。Óa-kūn Liû-piān ê tōe-kài, tùi-tang kàu sai; Iû-tāi, chi̍t-hūn.

8Óa近猶大ê地界，tùi東到西，是lín所獻ê地，闊兩萬五千篙尺，tùi東到西，長kap hiah-ê份ê一個相同，聖所tī hit中間。Óa-kūn Iû-tāi ê tōe-kài, tùi-tang kàu sai, sī lín só͘ hiàn ê tōe, khoah nn̄g-bān gō͘-chheng ko-chhioh, tùi-tang kàu-sai, tn̂g kap hiah ê hūn ê chi̍t-ê saⁿ-tâng, sèng-só͘ tī hit tiong-kan.

9Lín所獻hō͘耶和華ê地tio̍h長兩萬五千篙尺，闊一萬。Lín só͘ hiàn hō͘ Iâ-hô-hoa ê tōe tio̍h tn̂g nn̄g-bān gō͘-chheng ko-chhioh, khoah chi̍t-bān.

10所獻ê聖地tio̍h歸hō͘祭司；北勢長兩萬五千，西勢闊一萬，東勢闊一萬，南勢長兩萬五千；耶和華ê聖所tī hit中央。Só͘ hiàn ê sèng-tōe tio̍h kui hō͘ chè-si; pak--sì tn̂g nn̄g-bān gō͘-chheng, sai--sì khoah chi̍t-bān, tang--sì khoah chi̍t-bān, lâm--sì tn̂g nn̄g-bān gō͘-chheng; Iâ-hô-hoa ê sèng-só͘ tī hit tiong-ng.

11Tio̍h歸hō͘ Sat-tok ê kiáⁿ孫中成做聖ê祭司，就是顧守我所交代ê；當以色列人行迷路ê時，in無行迷路親像利未人行迷路。Tio̍h kui hō͘ Sat-tok ê kiáⁿ-sun-tiong chiâⁿ-chòe sèng ê chè-si, chiū-sī kò͘-siú Góa só͘ kau-tài--ê; tng Í-sek-lia̍t lâng kiâⁿ bê-lō͘ ê sî, in bô kiâⁿ bê-lō͘ chhin-chhiūⁿ Lī-bī lâng kiâⁿ bê-lō͘.

12Chit-ê tio̍h歸hō͘ in，就是tùi所獻ê全地中獻hō͘ in做至聖ê，óa近利未人ê地界。Chit-ê tio̍h kui hō͘ in, chiū-sī tùi só͘ hiàn ê choân-tōe-tiong hiàn hō͘ in chòe chì-sèng--ê, óa-kūn Lī-bī lâng ê tōe-kài.

13利未人所得tio̍h ê地tio̍h長兩萬五千，闊一萬，kap祭司ê地界相同；lóng總長兩萬五千，闊一萬。Lī-bī lâng só͘ tit-tio̍h ê tōe tio̍h tn̂g nn̄g-bān gō͘-chheng, khoah chi̍t-bān, kap chè-si ê tōe-kài saⁿ-tâng; lóng-chóng tn̂g nn̄g-bān gō͘-chheng, khoah chi̍t-bān.

14Chit-ê地m̄-thang賣，m̄-thang對換，起頭熟 ê物m̄-thang歸hō͘別人；因為是歸tī耶和華做聖ê。Chit ê tōe m̄-thang bōe, m̄-thang tùi-ōaⁿ, khí-thâu-se̍k ê mi̍h m̄-thang kui hō͘ pa̍t-lâng; in-ūi sī kui tī Iâ-hô-hoa chòe-sèng--ê.

15所chhun五千闊ê地，是tī hit-ê兩萬五千ê頭前，tio̍h做平常ê路用，thang起城，起厝，做郊野ê地；城tio̍h tī中央。Só͘-chhun gō͘-chheng khoah ê tōe, sī tī hit ê nn̄g-bān gō͘-chheng ê thâu-chêng, tio̍h chòe pêng-siông ê lō͘-ēng, thang khí siâⁿ, khí chhù, chòe kau-iá ê tōe; siâⁿ tio̍h tī tiong-ng.

16伊ê寸尺就是án-ni；北面四千五百，南面四千五百，東面四千五百，西面四千五百。I ê chhùn-chhioh chiū-sī án-ni; pak-bīn sì-chheng gō͘-pah, lâm-bīn sì-chheng gō͘-pah, tang-bīn sì-chheng gō͘-pah, sai-bīn sì-chheng gō͘-pah.

17城tio̍h郊野；ǹg北兩百五十，ǹg南兩百五十，ǹg東兩百五十，ǹg西兩百五十。Siâⁿ tio̍h kau-iá; ǹg-pak nn̄g-pah gō͘-cha̍p, ǹg-lâm nn̄g-pah gō͘-cha̍p, ǹg-tang nn̄g-pah gō͘-cha̍p, ǹg-sai nn̄g-pah gō͘-cha̍p.

18以外所chhun ê長kap所獻ê聖地相同，ǹg東一萬，ǹg西一萬；koh kap所獻ê聖地相同；其中所出產beh hō͘城內做工ê人做食物。Í-gōa só͘ chhun ê tn̂g kap só͘ hiàn ê sèng-tōe saⁿ-tâng, ǹg-tang chi̍t-bān, ǹg-sai chi̍t-bān; koh kap só͘ hiàn ê sèng-tōe saⁿ-tâng; kî-tiong só͘ chhut-sán beh hō͘ siâⁿ-lāi chòe-kang ê lâng chòe chia̍h-mi̍h.

19Tùi以色列眾支派ê中間tī城內做工ê beh tī-hia種作。Tùi Í-sek-lia̍t chèng chi-phài ê tiong-kan tī siâⁿ-lāi chòe-kang--ê beh tī-hia chèng-choh.

20Lín所獻ê全地，長兩萬五千，闊兩萬五千；lín所獻ê聖地kap屬tī城ê地是四方ê。Lín só͘ hiàn ê choân-tōe, tn̂g nn̄g-bān gō͘-chheng, khoah nn̄g-bān gō͘-chheng; lín só͘ hiàn ê sèng-tōe kap sio̍k tī siâⁿ ê tōe sī sù-hong--ê.

21所獻ê聖地以及屬tī城ê地，雙pêng chhun ê地tio̍h歸tī 人君，所獻ê地tī hit兩萬五千ê頭前到東勢ê界，koh ǹg西tī hit兩萬五千ê頭前到西勢ê界，kap hiah-ê份ê地相同，lóng歸tī人君；所獻ê聖地kap殿ê聖地lóng tī hit內面。Só͘ hiàn ê sèng-tōe í-ki̍p sio̍k tī siâⁿ ê tōe, siang-pêng chhun ê tōe tio̍h kui tī jîn-kun, só͘ hiàn ê tōe tī hit nn̄g-bān gō͘-chheng ê thâu-chêng kàu tang--sì ê kài, koh ǹg-sai tī hit nn̄g-bān gō͘-chheng ê thâu-chêng kàu sai--sì ê kài, kap hiah ê hūn ê tōe saⁿ-tâng, lóng kui tī jîn-kun; só͘ hiàn ê sèng-tōe kap tiān ê sèng-tōe lóng tī hit lāi-bīn.

22Koh tùi利未人ê業，tùi屬tī城ê業，是屬人君ê ê中間，tī猶大ê界kap便雅憫ê界ê中間，lóng歸人君ê。Koh tùi Lī-bī lâng ê gia̍p, tùi sio̍k tī siâⁿ ê gia̍p, sī sio̍k jîn-kun-ê ê tiong-kan, tī Iû-tāi ê kài kap Piān-ngá-bín ê kài ê tiong-kan, lóng kui jîn-kun ê.

23論到其餘ê支派；tùi東到西；便雅憫，一份。Lūn-kàu kî-û ê chi-phài; tùi-tang kàu-sai; Piān-ngá-bín, chi̍t-hūn.

24Óa近便雅憫ê地界tùi東到西；西門一份。Óa-kūn Piān-ngá-bín ê tōe-kài tùi-tang kàu-sai; Se-biān chi̍t-hūn.

25Óa近西門ê地界tùi東到西；Í-sat-ka，一份。Óa-kūn Se-biān ê tōe-kài tùi-tang kàu-sai; Í-sat-ka, chi̍t-hūn.

26Óa近Í-sat-ka ê地界tùi東到西；Se-pò͘-lûn，一份。Óa-kūn Í-sat-ka ê tōe-kài tùi-tang kàu-sai; Se-pò͘-lûn, chi̍t-hūn.

27Óa近Se-pò͘-lûn ê地界，tùi東到西；Ka-tek，一份。Óa-kūn Se-pò͘-lûn ê tōe-kài tùi-tang kàu-sai; Ka-tek, chi̍t-hūn.

28Óa近Ka-tek ê地界，南pêng ǹg南，hit-ê地界tùi Tha-má到Bí-lī-pa Ka-tē-su ê水，到埃及ê溪thàng到大海。Óa-kūn Ka-tek ê tōe-kài, lâm-pêng ǹg-lâm, hit ê tōe-kài tùi Tha-má kàu Bí-lī-pa Ka-tē-su ê chúi, kàu Ai-ki̍p ê khoe thàng-kàu tōa-hái.

29這是lín tio̍h liam-khau分hō͘以色列ê支派做業ê地，in ta̍k-ê所得tio̍h ê業就是án-ni；這是主耶和華所講ê。Che sī lín tio̍h liam-khau pun hō͘ Í-sek-lia̍t ê chi-phài chòe-gia̍p ê tōe, in ta̍k-ê só͘ tit-tio̍h ê gia̍p chiū-sī án-ni; che sī Chú Iâ-hô-hoa só͘ kóng--ê.

30Tùi城出去ê路是照下面所記ê；tī北面照所量ê，四千五百篙尺。Tùi siâⁿ chhut--khì ê lō͘ sī chiàu ē-bīn só͘ kì ê; tī pak-bīn chiàu só͘ niû--ê, sì-chheng gō͘-pah ko-chhioh.

31城hiah-ê門tio̍h照以色列支派ê名；北面有三個門；Liû-piān ê門，一個；猶大ê門，一個；利未ê門，一個。Siâⁿ hiah ê mn̂g tio̍h chiàu Í-sek-lia̍t chi-phài ê miâ; pak-bīn ū saⁿ ê mn̂g; Liû-piān ê mn̂g, chi̍t-ê; Iû-tāi ê mn̂g, chi̍t-ê; Lī-bī ê mn̂g, chi̍t-ê.

32東面四千五百，有三個門；約瑟ê門，一個；便雅憫ê門，一個；Tàn ê門，一個。Tang-bīn sì-chheng gō͘-pah, ū saⁿ ê mn̂g; Iok-sek ê mn̂g, chi̍t-ê; Piān-ngá-bín ê mn̂g, chi̍t-ê; Tàn ê mn̂g, chi̍t-ê.

33南面四千五百，有三個門；西門ê門，一個；Í-sat-ka ê門，一個；Se-pò͘-lûn ê門，一個。Lâm-bīn sì-chheng gō͘-pah, ū saⁿ ê mn̂g; Se-biān ê mn̂g, chi̍t-ê; Í-sat-ka ê mn̂g, chi̍t-ê; Se-pò͘-lûn ê mn̂g, chi̍t-ê.

34西面四千五百，有三個門；Ka-tek ê門，一個；A-siat ê門，一個；Nà-hut-tha-lī ê門，一個。Sai-bīn sì-chheng gō͘-pah, ū saⁿ ê mn̂g; Ka-tek ê mn̂g, chi̍t-ê; A-siat ê mn̂g, chi̍t-ê; Nà-hut-tha-lī ê mn̂g, chi̍t-ê.

35城四圍共一萬八千；tùi hit日以後城ê名叫做，耶和華tī-hia。Siâⁿ sì-ûi kiōng chi̍t-bān poeh-chheng; tùi hit-ji̍t í-āu siâⁿ ê miâ kiò-chòe, Iâ-hô-hoa tī-hia.

1猶大王Iok-ngá-kèng坐位第三年，巴比倫王Nî-pò͘-kah-nî-sat來到耶路撒冷，圍來攻擊伊。Iû-tāi ông Iok-ngá-kèng chē-ūi tē-saⁿ-nî, Pa-pí-lûn ông Nî-pò͘-kah-nî-sat lâi kàu Iâ-lō͘-sat-léng, ûi lâi kong-kek i.

2主用猶大王Iok-ngá-kèng kap上帝厝內器具ê一份交tī伊ê手；伊將in帶到Sī-ná ê地，入伊ê上帝ê厝，用hiah-ê器具hē tī伊ê上帝ê庫房內。Chú ēng Iû-tāi ông Iok-ngá-kèng kap Siōng-tè chhù-lāi khì-kū ê chi̍t-hūn kau tī i ê chhiú; i chiong in tòa kàu Sī-ná ê tōe, ji̍p i ê siōng-tè ê chhù, ēng hiah ê khì-kū hē tī i ê siōng-tè ê khò͘-pâng-lāi.

3王吩咐太監長，A-si-pí-ná，tio̍h tùi以色列ê王親kap貴族ê中間帶kúi-nā人來；Ông hoan-hù thài-kàm-tiúⁿ, A-si-pí-ná, tio̍h tùi Í-sek-lia̍t ê ông-chhin kap kùi-cho̍k ê tiong-kan tòa kúi-nā lâng lâi;

4就是少年，無瑕疵，面貌súi，有聰明智識，通達ta̍k樣ê學問，明白格致，夠額thang跟隨tī王宮ê，tio̍h教示in Ka-le̍k-tí人ê文學kap言語。chiū-sī siàu-liân, bô hâ-chhû, bīn-māu súi, ū chhang-miâ tì-sek, thong-ta̍t ta̍k-iūⁿ ê ha̍k-būn, bêng-pe̍k kek-tì, kàu-gia̍h thang kun-sûi tī ông-kiong ê, tio̍h kà-sī in Ka-le̍k-tí lâng ê bûn-ha̍k kap giân-gú.

5王就分派將王所食ê好物kap所lim ê酒，每日hō͘ in一份，培養in三年久；然後hō͘ in跟隨tī王ê面前。Ông chiū hun-phài chiong ông só͘ chia̍h ê hó-mi̍h kap só͘ lim ê chiú, múi-ji̍t hō͘ in chi̍t-hūn, pôe-iúⁿ in saⁿ-nî kú; jiân-āu hō͘ in kun-sûi tī ông ê bīn-chêng.

6In中間有猶大族ê人，但以理、Hap-ná-nî-ngá、Bí-sa-lī、A-sat-lī-ngá。In tiong-kan ū Iû-tāi cho̍k ê lâng, Tān-í-lí, Hap-ná-nî-ngá, Bí-sa-lī, A-sat-lī-ngá.

7太監長kā in號名；稱但以理做Pek-thê-sa-sat；稱Hap-ná-nî-ngá做Sa-tek-la̍h；稱Bí-sa-lī做Bí-soah；稱A-sat-lī-ngá做A-pek-nî-ko。Thài-kàm-tiúⁿ kā in hō-miâ; chheng Tān-í-lí chòe Pek-thê-sa-sat; chheng Hap-ná-nî-ngá chòe Sa-tek-la̍h; chheng Bí-sa-lī chòe Bí-soah; chheng A-sat-lī-ngá chòe A-pek-nî-ko.

8總是但以理立志無beh用王ê好物kap伊所lim ê酒phah lâ-sâm家己，所以求太監長容允伊免得phah lâ-sâm家己。Chóng-sī Tān-í-lí li̍p-chì bô beh ēng ông ê hó-mi̍h kap i só͘ lim ê chiú phah lâ-sâm ka-kī, só͘-í kiû thài-kàm-tiúⁿ iông-ún i bián-tit phah lâ-sâm ka-kī.

9上帝hō͘但以理tī太監長ê面前得tio̍h恩惠憐憫。Siōng-tè hō͘ Tān-í-lí tī thài-kàm-tiúⁿ ê bīn-chêng tit-tio̍h un-hūi lîn-bín.

10太監長kā但以理講，我驚畏我ê主，我ê王；伊已經分派lín ê lim食；thái-thó thang hō͘伊看見lín ê面貌khah輸lín同年ê少年人ah？若án-ni，就hō͘我ê頭殼oh得保全tī王ê面前。Thài-kàm-tiúⁿ kā Tān-í-lí kóng, Góa kiaⁿ-ùi góa ê chú, góa ê ông; i í-keng hun-phài lín ê lim-chia̍h; thái-thó thang hō͘ i khòaⁿ-kìⁿ lín ê bīn-māu khah-su lín tâng-nî ê siàu-liân lâng ah? nā án-ni, chiū hō͘ góa ê thâu-khak oh-tit pó-choân tī ông ê bīn-chêng.

11太監長有派一個監護ê管理但以理、Hap-ná-nî-ngá、Bí-sa-lī、A-sat-lī-ngá；Thài-kàm-tiúⁿ ū phài chi̍t ê kam(**kàm)-hō͘--ê koán-lí Tān-í-lí, Hap-ná-nî-ngá, Bí-sa-lī, A-sat-lī-ngá;

12但以理對伊講，求你試看你chiah-ê奴僕十日久，hō͘阮食菜lim水。Tān-í-lí tùi i kóng, Kiû lí chhì-khòaⁿ lí chiah ê lô͘-po̍k cha̍p-ji̍t-kú, hō͘ goán chia̍h-chhài lim-chúi.

13然後你thang看阮ê面貌kap hiah-ê食王好物ê少年人ê面貌；就照你所看見ê，款待你chiah-ê奴僕。Jiân-āu lí thang khòaⁿ goán ê bīn-māu kap hiah ê chia̍h ông hó-mi̍h ê siàu-liân lâng ê bīn-māu; chiū chiàu lí só͘ khòaⁿ-kìⁿ ê, khoán-thāi lí chiah ê lô͘-po̍k.

14Chit-ê事伊有允准in，試in十日久。Chit ê sū i ū ún-chún in, chhì in cha̍p-ji̍t kú.

15十日後看見in ê面貌比hiah-ê食王ê好物ê少年人koh khah súi khah phauh。Cha̍p-ji̍t-āu khòaⁿ-kìⁿ in ê bīn-māu pí hiah ê chia̍h ông ê hó-mi̍h ê siàu-liân lâng koh khah súi khah phauh.

16Tùi án-ni，監護就撤去所hō͘ in ê好物所tio̍h lim ê酒，hō͘ in食菜。Tùi án-ni kam-hō͘ chiū thiat--khì só͘ hō͘ in ê hó-mi̍h só͘ tio̍h lim ê chiú, hō͘ in chia̍h chhài.

17Chit四個少年人，上帝hō͘ in tī ta̍k樣ê文字、學問、聰明、智識；但以理koh明白ta̍k樣ê異象kap夢見ê兆頭。Chí(**Chit) sì ê siàu-liân lâng, Siōng-tè hō͘ in tī ta̍k-iūⁿ ê bûn-jī, ha̍k-būn, chhang-miâ, tì-sek; Tān-í-lí koh bêng-pe̍k ta̍k-iūⁿ ê īⁿ-siōng kap bāng-kìⁿ ê tiāu-thâu.

18王所定tio̍h chhōa in入去ê日已經到，太監長就chhōa in入去到Nî-pò͘-kah-nî-sat ê面前。Ông só͘ tiāⁿ-tio̍h chhōa in ji̍p--khì ê ji̍t í-keng kàu, thài-kàm-tiúⁿ chiū chhōa in ji̍p-khì kàu Nî-pò͘-kah-nî-sat ê bīn-chêng.

19王kap in講話，tī in眾人ê中間看無一個能比得但以理、Hap-ná-nî-ngá、Bí-sa-lī、A-sat-lī-ngá；所以in得tio̍h khiā tī王ê面前。Ông kap in kóng-ōe, tī in chèng-lâng ê tiong-kan khòaⁿ bô chi̍t-ê ōe pí-tit Tān-í-lí, Hap-ná-nî-ngá, Bí-sa-lī, A-sat-lī-ngá; só͘-í in tit-tio̍h khiā tī ông ê bīn-chêng.

20王見有所問in ê事，就知in ê智慧聰明比thong國ê博士kap術士贏過十倍。Ông kìⁿ ū só͘ mn̄g in ê sū, chiū chai in ê tì-hūi chhang-miâ pí thong-kok ê phok-sū kap su̍t-sū iâⁿ-kè cha̍p-pē.

21但以理到Kó͘-lia̍t王元年iáu tī-teh。Tān-í-lí kàu Kó͘-lia̍t ông goân--nî iáu tī-teh.

1Nî-pò͘-kah-nî-sat坐位第二年，Nî-pò͘-kah-nî-sat夢見；心擘腹bōe睏得。Nî-pò͘-kah-nî-sat chē-ūi tē-jī-nî, Nî-pò͘-kah-nî-sat bāng-kìⁿ; sim peh-pak bōe khùn-tit.

2王命令召博士、術士、司公，kap Ka-le̍k-tí人來，ài in用王ê夢kā伊講。In就來，khiā tī王ê面前。Ông bēng-lēng tiàu phok-sū, su̍t-sū, sai-kong, kap Ka-le̍k-tí lâng lâi, ài in ēng ông ê bāng kā i kóng. In chiū lâi, khiā tī ông ê bīn-chêng.

3王kā in講，我有夢見一個夢，我ê心擘腹，ài beh知hit-ê夢是甚麼。Ông kā in kóng, Góa ū bāng-kìⁿ chi̍t ê bāng, góa ê sim peh-pak, ài beh chai hit ê bāng sī sím-mi̍h.

4Ka-le̍k-tí人用A-lân ê腔口對王講，願王萬歲；請將hit-ê夢kā你chiah-ê奴僕講，阮就beh解明。Ka-le̍k-tí lâng ēng A-lân ê khiuⁿ-kháu tùi ông kóng, Goān ông bān-sòe; chhiáⁿ chiong hit ê bāng kā lí chiah ê lô͘-po̍k kóng, goán chiū beh kóe-bêng.

5王應Ka-le̍k-tí人講，hit-ê事我已經bōe記得lah；lín若無將我所夢見講hō͘我聽，續解明伊，就beh將lín ê肉割碎碎，也lín ê厝beh做糞埽堆。Ông ìn Ka-le̍k-tí lâng kóng, Hit ê sū góa í-keng bōe-kì-tit lah; lín nā bô chiong góa só͘ bāng-kìⁿ kóng hō͘ góa thiaⁿ, sòa kóe-bêng i, chiū beh chiong lín ê bah koah chhùi-chhùi, iā lín ê chhù beh chòe pùn-sò-tui.

6總是lín若將我所夢見kā我講，續解明伊，lín beh tùi我得tio̍h贈品、報賞、大榮光；taⁿ lín tio̍h將我所夢見講hō͘我聽，續解明伊。Chóng-sī lín nā chiong góa só͘ bāng-kìⁿ kā góa kóng, sòa kóe-bêng i, lín beh tùi góa tit-tio̍h chēng-phín, pò-siúⁿ, tōa êng-kng; taⁿ lín tio̍h chiong góa só͘ bāng-kìⁿ kóng hō͘ góa thiaⁿ, sòa kóe-bêng i.

7In第二pái koh對王講，請王將所夢見ê kā chiah-ê奴僕講，阮就beh解明伊。In tē-jī-pái koh tùi ông kóng, Chhiáⁿ ông chiong só͘ bāng-kìⁿ-ê kā chiah ê lô͘-po̍k kóng, goán chiū beh kóe-bêng i.

8王應講，我準準知lín是故意延chhiân，因為lín知hit-ê夢我已經bōe記得lah。Ông ìn kóng, Góa chún-chún chai lín sī kò͘-ì iân-chhiân, in-ūi lín chai hit ê bāng góa í-keng bōe-kì-tit lah.

9Lín若無將我所夢見kā我講，只有一法thang款待lín；因為lín已經有備辦謊言亂語對我講，teh thèng候時勢ê改變；taⁿ lín tio̍h將所夢見kā我講，我就知lín能解明伊。Lín nā bô chiong góa só͘ bāng-kìⁿ kā góa kóng, chí-ū chi̍t-hoat thang khoán-thāi lín; in-ūi lín í-keng ū pī-pān hong-giân loān-gú tùi góa kóng, teh thèng-hāu sî-sè ê kái-piàn; taⁿ lín tio̍h chiong só͘ bāng-kìⁿ kā góa kóng, góa chiū chai lín ōe kóe-bêng i.

10Ka-le̍k-tí人tī王ê面前應講，王chit號事，地上無人會講出；因為bē-bat有君王、大臣、掌權ê kah博士，á是術士，á是Ka-le̍k-tí人tio̍h án-ni做。Ka-le̍k-tí lâng tī ông ê bīn-chêng ìn kóng, Ông chit hō sū, tōe-chiūⁿ bô lâng ōe kóng-chhut; in-ūi bē-bat ū kun-ông, tāi-sîn, chiáng-koân-ê kah phok-sū, á-sī su̍t-sū, á-sī Ka-le̍k-tí lâng tio̍h án-ni chòe.

11王所問ê是稀奇ê事；除去無kap世間人同khiā起ê神明以外，無一個能tī王ê面前講出。Ông só͘ mn̄g--ê sī hi-kî ê sū; tû--khì bô kap sè-kan lâng tâng khiā-khí ê sîn-bêng í-gōa, bô chi̍t-ê ōe tī ông ê bīn-chêng kóng-chhut.

12王受氣，受氣到極，命令剿滅巴比倫一切智慧ê人。Ông siū-khì, siū-khì kàu-ke̍k, bēng-lēng châu-bia̍t Pa-pí-lûn it-chhè tì-hūi ê lâng.

13Tùi án-ni，出命令beh thâi智慧ê人；就chhē但以理kap伊ê同伴beh thâi in。Tùi án-ni chhut bēng-lēng beh thâi tì-hūi ê lâng; chiū chhē Tān-í-lí kap i ê tâng-phōaⁿ beh thâi in.

14王ê侍衛長，A-lio̍k，出來beh thâi巴比倫智慧ê人，但以理用精通智慧ê話應伊；Ông ê sī-ōe-tiúⁿ, A-lio̍k, chhut-lâi beh thâi Pa-pí-lûn tì-hūi ê lâng, Tān-í-lí ēng cheng-thong tì-hūi ê ōe ìn i;

15就對王ê侍衛長，A-lio̍k，講，王所出ê命令怎樣到chiah緊急ah？A-lio̍k就將chit-ê tāi-chì kā但以理講。chiū tùi ông ê sī-ōe-tiúⁿ, A-lio̍k, kóng, Ông só͘ chhut ê bēng-lēng cháiⁿ-iūⁿ kàu chiah kín-kip ah? A-lio̍k chiū chiong chit ê tāi-chì kā Tān-í-lí kóng.

16但以理就入去，求王寬限(ān)，就beh將夢kā王解明。Tān-í-lí chiū ji̍p--khì, kiû ông khoan-ān, chiū beh chiong bāng kā ông kóe-bêng.

17但以理tò去伊ê厝，將chit-ê事kā伊同伴Hap-ná-nî-ngá、Bí-sa-lī、A-sat-lī-ngá講，Tān-í-lí tò--khì i ê chhù, chiong chit ê sū kā i tâng-phōaⁿ Hap-ná-nî-ngá, Bí-sa-lī, A-sat-lī-ngá kóng,

18ài in為tio̍h chit-ê祕密ê事祈求天頂ê上帝憐憫，免得但以理kap伊ê同伴kap巴比倫其餘智慧ê人相kap滅無。ài in ūi-tio̍h chit ê pì-bi̍t ê sū kî-kiû thiⁿ-téng ê Siōng-tè lîn-bín, bián-tit Tān-í-lí kap i ê tâng-phōaⁿ kap Pa-pí-lûn kî-û tì-hūi ê lâng saⁿ-kap bia̍t-bô.

19Chit-ê祕密ê事就tī暝時異象中對但以理顯明。但以理就o-ló天頂ê上帝。Chit ê pì-bi̍t ê sū chiū tī mî--sî īⁿ-siōng-tiong tùi Tān-í-lí hián-bêng. Tān-í-lí chiū o-ló thiⁿ-téng ê Siōng-tè.

20但以理講，上帝ê名應該受o-ló到永遠；因為智慧、權能lóng屬tī祂。Tān-í-lí kóng, Siōng-tè ê miâ eng-kai siū o-ló kàu éng-oán; in-ūi tì-hūi koân-lêng lóng sio̍k tī I.

21祂變換時期節季；祂廢無王，設立王；將智慧hō͘智慧ê人，將見識hō͘聰明ê人。I piàn-ōaⁿ sî-kî choeh-kùi; I hòe-bô ông, siat-li̍p ông; chiong tì-hūi hō͘ tì-hūi ê lâng, chiong kiàn-sek hō͘ chhong-bêng ê lâng.

22祂指示深奧祕密ê事；暗中所有ê祂lóng知，光也kap伊相kap tòa。I chí-sī chhim-ò pì-bi̍t ê sū; àm-tiong só͘-ū-ê I lóng chai, kng iā kap I saⁿ-kap tòa.

23我ê列祖ê上帝ah，我感謝祢o-ló祢，因為祢賞賜我智慧才能，taⁿ用阮對祢所求ê已經指示我；因為祢有用王ê事指示阮。Góa ê lia̍t-chó͘ ê Siōng-tè ah, góa kám-siā Lí o-ló Lí, in-ūi Lí siúⁿ-sù góa tì-hūi châi-lêng, taⁿ ēng goán tùi Lí só͘-kiû-ê í-keng chí-sī góa; in-ūi Lí ū ēng ông ê sū chí-sī goán.

24Tùi hit-tia̍p，但以理入去見A-lio̍k，就是王所派剿滅巴比倫hiah-ê智慧ê人ê；伊去kā伊講，莫得剿滅巴比倫hiah-ê智慧ê人；chhōa我到王ê面前，我beh將夢kā王解明。Tùi hit-tia̍p Tān-í-lí ji̍p--khì kìⁿ A-lio̍k, chiū-sī ông só͘ phài châu-bia̍t Pa-pí-lûn hiah ê tì-hūi ê lâng ê; i khì kā i kóng, Bo̍h-tit châu-bia̍t Pa-pí-lûn hiah ê tì-hūi ê lâng; chhōa góa kàu ông ê bīn-chêng, góa beh chiong bāng kā ông kóe-bêng.

25A-lio̍k即時chhōa但以理到王ê面前，對伊講，我tī猶大受掠ê人ê中間tú-tio̍h一人，伊會將夢kā王解明，A-lio̍k chek-sî chhōa Tān-í-lí kàu ông ê bīn-chêng, tùi i kóng, Góa tī Iû-tāi siū-lia̍h ê lâng ê tiong-kan tú-tio̍h chi̍t-lâng, i ōe chiong bāng kā ông kóe-bêng,

26王對稱做Pek-thê-sa-sat ê但以理講，你能將我所看見ê夢kā我講，續kā我解明mah？Ông tùi chheng-chòe Pek-thê-sa-sat ê Tān-í-lí kóng, Lí ōe chiong góa só͘ khòaⁿ-kìⁿ ê bāng kā góa kóng, sòa kā góa kóe-bêng mah?

27但以理tī王ê面前應講，王所問ê祕密，智慧ê人、術士、博士、卜卦ê，lóng bōe kā王指明；Tān-í-lí tī ông ê bīn-chêng ìn kóng, Ông só͘ mn̄g ê pì-bi̍t, tì-hūi ê lâng, su̍t-sū, phok-sū, pok-kòa-ê, lóng bōe kā ông chí-bêng;

28總是天頂有一位上帝能顯明祕密ê事；taⁿ用後日teh-beh有ê事有指示Nî-pò͘-kah-nî-sat王。你所夢見ê kap你tī床裡所想ê異象是án-ni：chóng-sī thiⁿ-téng ū chi̍t ūi Siōng-tè ōe hián-bêng pì-bi̍t ê sū; taⁿ ēng āu-ji̍t teh-beh ū ê sū ū chí-sī Nî-pò͘-kah-nî-sat ông. Lí só͘ bāng-kìⁿ-ê kap lí tī chhn̂g--nih só͘ siūⁿ ê īⁿ-siōng sī án-ni:

29王ah，你tī床裡想到將來ê事；hit位顯明祕密ê事ê用將來所beh有ê事指示你。ông ah, lí tī chhn̂g--nih siūⁿ kàu chiong-lâi ê sū; hit-ūi hián-bêng pì-bi̍t ê sū-ê ēng chiong-lâi só͘ beh ū ê sū chí-sī lí.

30論到我，hit-ê祕密ê事顯明tī我，m̄是為tio̍h我有智慧贏過一切活teh ê人，就是tiâu-tî beh解明hō͘王知，koh hō͘你知你ê心ê念頭。Lūn-kàu góa, hit ê pì-bi̍t ê sū hián-bêng tī góa, m̄-sī ūi-tio̍h góa ū tì-hūi iâⁿ-kè it-chhè oa̍h-teh ê lâng, chiū-sī tiâu-tî beh kóe-bêng hō͘ ông chai, koh hō͘ lí chai lí ê sim ê liām-thâu.

31王ah，你teh看，就看見有一sian大像；chit-ê像真高，極其燦爛，khiā tī你ê面前；伊ê形狀真thang驚。Ông ah, lí teh khòaⁿ, chiū khòaⁿ-kìⁿ ū chi̍t sian tōa-siōng; chit ê siōng chin koâiⁿ, ke̍k-kî chhàn-lān, khiā tī lí ê bīn-chêng; i ê hêng-chōng chin thang kiaⁿ.

32Chit-ê像，伊ê頭殼是好金ê，伊ê胸ha̍h kap手骨是銀ê，腹肚kap大腿是銅ê；Chit ê siōng, i ê thâu-khak sī hó-kim-ê, i ê heng-ha̍h kap chhiú-kut sī gûn-ê, pak-tó͘ kap tōa-thúi sī tâng-ê;

33伊ê腳胴是鐵ê，伊ê腳盤一半鐵，一半土ê。i ê kha-tâng sī thih-ê, i ê kha-pôaⁿ chi̍t-pòaⁿ thih, chi̍t-pòaⁿ thô͘ ê.

34你teh看到有一塊石phah出來，m̄是用手phah-ê，摃tio̍h hit sian像鐵kap土ê腳盤，來phah破in。Lí teh khòaⁿ kàu ū chi̍t tè chio̍h phah--chhut-lâi, m̄-sī ēng chhiú phah-ê, kòng-tio̍h hit sian siōng thih kap thô͘ ê kha-pôaⁿ, lâi phah-phòa in.

35Tùi án-ni，hit-ê鐵、土、銅、銀、金做一下phah碎碎，變做夏天五穀場ê粗糠，hō͘風吹散，無koh有in ê位處；koh chit-ê摃tio̍h像ê石變成大山，充滿全地。Tùi án-ni hit ê thih, thô͘, tâng, gûn, kim chòe chi̍t-ē phah chhùi-chhùi, pìⁿ-chòe hē-thiⁿ gō͘-kak-tiûⁿ ê chho͘-khng, hō͘ hong chhe-sòaⁿ, bô koh ū in ê ūi-chhù; koh chit ê kòng-tio̍h siōng ê chio̍h pìⁿ-chiâⁿ tōa-soaⁿ, chhiong-móa choân-tōe.

36這就是hit-ê夢；阮taⁿ beh tī王ê面前解明伊。Che chiū-sī hit ê bāng; goán taⁿ beh tī ông ê bīn-chêng kóe-bêng i.

37王ah，你是列王ê王，天頂ê上帝已經將國度、權柄、能力、榮光賞賜你；Ông ah, lí sī lia̍t-ông ê ông, thiⁿ-téng ê Siōng-tè í-keng chiong kok-tō͘, koân-pèng, lêng-le̍k, êng-kng siúⁿ-sù lí;

38見若世間人khiā起ê所在，連山野ê走獸，空中ê飛鳥，祂lóng交付你ê手，hō͘你掌管chiah-ê一切；你就是hit-ê金ê頭殼。kìⁿ-nā sè-kan lâng khiā-khí ê só͘-chāi, liân soaⁿ-iá ê cháu-siù, khong-tiong ê pe-chiáu, I lóng kau-hù lí ê chhiú, hō͘ lí chiáng-koán chiah-ê it-chhè; lí chiū-sī hit ê kim ê thâu-khak.

39你以後beh koh興起一國m̄值tio̍h你；koh有第三國，就是銅ê，beh掌管天下。Lí í-āu beh koh heng-khí chi̍t-kok m̄-ta̍t-tio̍h lí; koh ū tē-saⁿ kok, chiū-sī tâng--ê, beh chiáng-koán thiⁿ-ē.

40第四國beh堅定親像鐵；鐵能phah破萬物hō͘伊降服；koh親像鐵teh碎一切，伊也beh phah破列國teh碎in。Tē-sì kok beh kian-tēng chhin-chhiūⁿ thih; thih ōe phah-phòa bān-mi̍h hō͘ i hâng-ho̍k; koh chhin-chhiūⁿ thih teh-chhùi it-chhè, i iā beh phah-phòa lia̍t-kok teh-chhùi in.

41你也看見伊ê腳盤kap腳指頭á一半是燒磁ê土一半是鐵，hit-ê國也beh分開；總是你看見鐵kap爛土相參，chit-ê國也beh有鐵ê力。Lí iā khòaⁿ-kìⁿ i ê kha-pôaⁿ kap kha-chńg-thâu-á chi̍t-pòaⁿ sī sio-hûi ê thô͘ chi̍t-pòaⁿ sī thih, hit ê kok iā beh pun-khui; chóng-sī lí khòaⁿ-kìⁿ thih kap nōa-thô͘ saⁿ-chham, chit ê kok iā beh ū thih ê la̍t.

42Hiah-ê腳指頭á既然一半是鐵一半是土，án-ni hit-ê國beh一半強，一半弱。Hiah ê kha-chńg-thâu-á kì-jiân chi̍t-pòaⁿ sī thih chi̍t-pòaⁿ sī thô͘, án-ni hit ê kok beh chi̍t-pòaⁿ kiông, chi̍t-pòaⁿ jio̍k.

43你既然看見鐵kap爛土相參，in beh kap人ê種族相參；總是二彼bōe相合，親像鐵kap土bōe相參得。Lí kì-jiân khòaⁿ-kìⁿ thih kap nōa-thô͘ saⁿ-chham, in beh kap lâng ê chióng-cho̍k saⁿ-chham; chóng-sī jī-pí bōe saⁿ-ha̍p, chhin-chhiūⁿ thih kap thô͘ bōe saⁿ-chham--tit.

44當hiah-ê列王ê日，天頂ê上帝beh設立一國，永遠bōe廢無，伊ê權柄bōe會歸tī別國；總是伊beh毀壞hiah-ê國來滅伊；家己beh永遠khiā在。Tng hiah ê lia̍t-ông ê ji̍t, thiⁿ-téng ê Siōng-tè beh siat-li̍p chi̍t-kok, éng-oán bōe hòe-bô, i ê koân-pèng bōe-ōe kui tī pa̍t-kok; chóng-sī i beh húi-hoāi hiah ê kok lâi bia̍t i; ka-kī beh éng-oán khiā-chāi.

45你既然看見有石tùi山裡phah出來，m̄是用手phah-ê，來phah破hit-ê鐵、銅、土、銀、金；就是至大ê上帝用將來beh有ê tāi-chì指示王；hit-ê夢是真，hit-ê解明是確實。Lí kì-jiân khòaⁿ-kìⁿ ū chio̍h tùi soaⁿ--nih phah--chhut-lâi, m̄-sī ēng chhiú phah-ê, lâi phah-phòa hit ê thih, tâng, thô͘, gûn, kim; chiū-sī chì-tōa ê Siōng-tè ēng chiong-lâi beh ū ê tāi-chì chí-sī ông; hit ê bāng sī chin, hit ê kóe-bêng sī khak-si̍t.

46當時Nî-pò͘-kah-nî-sat王仆tī地裡，拜但以理；命令用禮物芳料獻hō͘伊。Tng-sî Nî-pò͘-kah-nî-sat ông phak tī tōe--nih, pài Tān-í-lí; bēng-lēng ēng lé-mi̍h phang-liāu hiàn hō͘ i.

47王應但以理對伊講，你已經能顯明chit-ê祕密ê事，lín ê上帝真正是chiah-ê上帝ê上帝，chiah-ê王ê主，koh是顯明hiah-ê祕密ê。Ông ìn Tān-í-lí tùi i kóng, Lí í-keng ōe hián-bêng chit ê pì-bi̍t ê sū, lín ê Siōng-tè chin-chiàⁿ sī chiah ê siōng-tè ê Siōng-tè, chiah ê ông ê Chú, koh sī hián-bêng hiah ê pì-bi̍t-ê.

48Tùi hit-tia̍p，王高升但以理，賞賜伊chōe-chōe上品ê禮物，派伊管理巴比倫全省；koh做總理來掌管巴比倫一切智慧ê人。Tùi hit-tia̍p ông ko-seng Tān-í-lí, siúⁿ-sù i chōe-chōe siōng-phín ê lé-mi̍h, phài i koán-lí Pa-pí-lûn choân-séng; koh chòe chóng-lí lâi chiáng-koán Pa-pí-lûn it-chhè tì-hūi ê lâng.

49但以理求王，王就派Sa-tek-la̍h、Bí-soah、A-pek-nî-ko管理巴比倫省ê事務；獨獨但以理跟隨tī王宮。Tān-í-lí kiû ông, ông chiū phài Sa-tek-la̍h, Bí-soah, A-pek-nî-ko koán-lí Pa-pí-lûn séng ê sū-bū; to̍k-to̍k Tān-í-lí kun-sûi tī ông-kiong.