1馬大族A-hap-sûi-ló͘ ê kiáⁿ Tāi-lī-o͘立做Ka-le̍k-tí國ê王元年；Má-tāi cho̍k A-hap-sûi-ló͘ ê kiáⁿ Tāi-lī-o͘ li̍p-chòe Ka-le̍k-tí kok ê ông goân--nî;

2就是伊坐位ê元年，我但以理tùi冊裡得tio̍h知hiah-ê年ê數額，就是耶和華ê話臨到先知耶利米講起耶路撒冷tú-tio̍h荒廢tio̍h滿七十年。chiū-sī i chē-ūi ê goân--nî, góa Tān-í-lí tùi chheh--nih tit-tio̍h chai hiah ê nî ê siàu-gia̍h, chiū-sī Iâ-hô-hoa ê ōe lîm-kàu sian-ti Iâ-lī-bí kóng-khí Iâ-lō͘-sat-léng tú-tio̍h hong-hòe tio̍h móa chhit-cha̍p nî.

3我決意ǹg主上帝ài用祈禱懇求、禁食，穿麻衫，sám火灰，來chhē伊。Góa koat-ì ǹg Chú Siōng-tè ài ēng kî-tó khún-kiû, kìm-chia̍h, chhēng môa-saⁿ, sám hé-hu, lâi chhē I.

4我祈禱耶和華，我ê上帝，認罪，講，主，至大thang驚畏ê上帝ah，就是守約施恩hō͘見若疼伊，謹守伊誡命ê人ê；Góa kî-tó Iâ-hô-hoa, góa ê Siōng-tè, jīn-chōe, kóng, Chú, chì-tōa thang kiaⁿ-ùi ê Siōng-tè ah, chiū-sī siú-iok si-un hō͘ kìⁿ-nā thiàⁿ I, kín-siú I kài-bēng ê lâng ê;

5阮有犯罪、作孽、行pháiⁿ、背叛，離開你ê誡命法度；goán ū hoān-chōe, chok-gia̍t, kiâⁿ-pháiⁿ, pōe-poān, lī-khui Lí ê kài-bēng hoat-tō͘;

6無聽你ê奴僕chiah-ê先知，就是奉你ê名對阮ê君王、貴族、列祖，kap國內一切ê百姓，講話ê。bô thiaⁿ Lí ê lô͘-po̍k chiah ê sian-ti, chiū-sī hōng Lí ê miâ tùi goán ê kun-ông, kùi-cho̍k, lia̍t-chó͘, kap kok-lāi it-chhè ê peh-sìⁿ, kóng-ōe--ê.

7主ah，公義歸tī祢，見笑歸tī阮，親像今á日；就是歸tī猶大人，kap耶路撒冷ê百姓，以及以色列眾人，或是近ê，或是遠ê，tī祢，為tio̍h in得罪祢，來趕in到ê ta̍k國。Chú ah, kong-gī kui tī Lí, kiàn-siàu kui tī goán, chhin-chhiūⁿ kin-á-ji̍t; chiū-sī kui tī Iû-tāi lâng, kap Iâ-lō͘-sat-léng ê peh-sìⁿ, í-ki̍p Í-sek-lia̍t chèng-lâng, he̍k-sī kūn-ê, he̍k-sī hn̄g-ê, tī Lí, ūi-tio̍h in tek-chōe Lí, lâi kóaⁿ in kàu ê ta̍k-kok.

8主ah，見笑歸tī阮，歸tī阮ê君王、貴族、列祖，因為阮得罪祢。Chú ah, kiàn-siàu kui tī goán, kui tī goán ê kun-ông, kùi-cho̍k, lia̍t-chó͘, in-ūi goán tek-chōe Lí.

9阮雖然悖逆主，阮ê上帝，總是憐憫赦罪是在tī祂；Goán sui-jiân pōe-ge̍k Chú, goán ê Siōng-tè, chóng-sī lîn-bín sià-chōe sī chāi-tī I;

10也無聽耶和華阮ê上帝ê話，來行祂託重祂ê奴僕chiah-ê先知所排列tī阮ê面前ê律法。iā bô thiaⁿ Iâ-hô-hoa goán ê Siōng-tè ê ōe, lâi kiâⁿ I thok-tiōng I ê lô͘-po̍k chiah ê sian-ti só͘ pâi-lia̍t tī goán ê bīn-chêng ê lu̍t-hoat.

11以色列全族lóng有犯tio̍h祢ê律法，行偏路無聽thàn祢ê話；因為án-ni，chit-ê咒詛，以及上帝ê奴僕摩西律法中所記ê chiù-chōa，lóng piàⁿ tī阮ê身上，因為阮有得罪祢。Í-sek-lia̍t choân-cho̍k lóng ū hoān-tio̍h Lí ê lu̍t-hoat, kiâⁿ phian-lō͘ bô thiaⁿ-thàn Lí ê ōe; in-ūi án-ni, chit ê chiù-chó͘, í-ki̍p Siōng-tè ê lô͘-po̍k Mô͘-se lu̍t-hoat-tiong só͘ kì ê chiù-chōa, lóng piàⁿ tī goán ê sin-chiūⁿ, in-ūi goán ū tek-chōe Lí.

12祂bat降大災厄hō͘阮，來應驗祂前警戒阮也警戒審判阮士師ê話；因為tī普天下m̄-bat行親像所行tī耶路撒冷ê。I bat kàng tōa chai-ē hō͘ goán, lâi èng-giām I chêng kéng-kài goán iā kéng-kài sím-phòaⁿ goán sū-su ê ōe; in-ūi tī phó͘-thiⁿ-ē m̄-bat kiâⁿ chhin-chhiūⁿ só͘ kiâⁿ tī Iâ-lō͘-sat-léng ê.

13這一切ê災厄臨到阮，是照摩西律法中所記載ê；總是阮iáu無求耶和華阮ê上帝施恩，hō͘阮oa̍t頭離開阮ê罪過，明白祢ê真理。Che it-chhè ê chai-ē lîm-kàu goán, sī chiàu Mô͘-se lu̍t-hoat-tiong só͘ kì-chài-ê; chóng-sī goán iáu bô kiû Iâ-hô-hoa goán ê Siōng-tè si-un, hō͘ goán oa̍t-thâu lī-khui goán ê chōe-kòa, bêng-pe̍k Lí ê chin-lí.

14所以耶和華注意hō͘ chit-ê災厄臨到阮；因為耶和華阮ê上帝tī祂所行ê事lóng是公義；阮並無聽thàn祂ê話。Só͘-í Iâ-hô-hoa chù-ì hō͘ chit ê chai-ē lîm-kàu goán; in-ūi Iâ-hô-hoa goán ê Siōng-tè tī I só͘ kiâⁿ ê sū lóng sī kong-gī; goán pēng-bô thiaⁿ-thàn I ê ōe.

15主，阮ê上帝ah，祢bat用大權能ê手帶祢ê百姓出埃及地，hō͘你有名聲，親像今á日；阮有犯罪，阮有行pháiⁿ。Chú, goán ê Siōng-tè ah, Lí bat ēng tōa koân-lêng ê chhiú tòa Lí ê peh-sìⁿ chhut Ai-ki̍p tōe, hō͘ Lí ū miâ-siaⁿ, chhin-chhiūⁿ kin-á-ji̍t; goán ū hoān-chōe, goán ū kiâⁿ-pháiⁿ.

16主ah，求祢照祢ê公義hō͘祢ê受氣kap祢ê大受氣oa̍t-tńg離開祢ê城耶路撒冷，就是祢ê聖山；因為tùi阮ê罪惡，kap阮列祖ê罪過，耶路撒冷kap祢ê百姓hō͘四圍ê人所凌辱。Chú ah, kiû Lí chiàu Lí ê kong-gī hō͘ Lí ê siū-khì kap Lí ê tōa siū-khì oa̍t-tńg lī-khui Lí ê siâⁿ Iâ-lō͘-sat-léng, chiū-sī Lí ê sèng-soaⁿ; in-ūi tùi goán ê chōe-ok, kap goán lia̍t-chó͘ ê chōe-kòa, Iâ-lō͘-sat-léng kap Lí ê peh-sìⁿ hō͘ sì-ûi ê lâng só͘ lêng-jio̍k.

17所以阮ê上帝ah，taⁿ求祢聽祢ê奴僕ê祈禱懇求；koh因為主ê緣故，hō͘祢ê面ê光照祢拋荒ê聖所。Só͘-í goán ê Siōng-tè ah, taⁿ kiû Lí thiaⁿ Lí ê lô͘-po̍k ê kî-tó khún-kiû; koh in-ūi Chú ê iân-kò͘, hō͘ Lí ê bīn ê kng chiò Lí pha-hng ê sèng-só͘.

18我ê上帝ah，求祢俯耳孔來聽，開祢ê目睭來看阮拋荒ê地，kap用祢ê名來稱ê城；因為阮獻阮ê祈禱tī祢ê面前，m̄是因為家己ê義，就是因為祢ê大憐憫。Góa ê Siōng-tè ah, kiû Lí àⁿ hī-khang lâi thiaⁿ, khui Lí ê ba̍k-chiu lâi khòaⁿ goán pha-hng ê tōe, kap ēng Lí ê miâ lâi chheng ê siâⁿ; in-ūi goán hiàn goán ê kî-tó tī Lí ê bīn-chêng, m̄-sī in-ūi ka-kī ê gī, chiū-sī in-ūi Lí ê tōa lîn-bín.

19主ah，聽，主ah，赦免，主ah，聽來行；我ê上帝為祢ê緣故莫得延chhiân，因為祢ê城，祢ê百姓，lóng是用祢ê名來稱ê。Chú ah, thiaⁿ, Chú ah, sià-bián, Chú ah, thiaⁿ lâi kiâⁿ; góa ê Siōng-tè ūi Lí ê iân-kò͘ bo̍h-tit iân-chhiân, in-ūi Lí ê siâⁿ, Lí ê peh-sìⁿ, lóng sī ēng Lí ê miâ lâi chheng-ê.

20我teh講teh祈禱ê時，認我ê罪kap我ê百姓以色列ê罪，為tio̍h我ê上帝ê聖山，獻我ê懇求tī我ê上帝耶和華ê面前；Góa teh kóng teh kî-tó ê sî, jīn góa ê chōe kap góa ê peh-sìⁿ Í-sek-lia̍t ê chōe, ūi-tio̍h góa ê Siōng-tè ê sèng-soaⁿ hiàn góa ê khún-kiû tī góa ê Siōng-tè Iâ-hô-hoa ê bīn-chêng;

21我祈禱ê話講未完，我起頭tī異象中所看見ê人，Ka-pek-lia̍t，奉命令緊緊飛來，約略tī獻ê-hng祭ê時，來摸我。góa kî-tó ê ōe kóng bē oân, góa khí-thâu tī īⁿ-siōng-tiong só͘ khòaⁿ-kìⁿ ê lâng, Ka-pek-lia̍t, hōng bēng-lēng kín-kín pe--lâi, iok-lio̍k tī hiàn ê-hng-chè ê sî, lâi bong góa.

22伊教示我，kā我講，但以理ah，我來是beh hō͘你有智慧聰明。I kà-sī góa, kā góa kóng, Tān-í-lí ah, góa lâi sī beh hō͘ lí ū tì-hūi chhang-miâ.

23你起頭祈禱ê時，就有命令發出，taⁿ我來kā你講；因為你大大得tio̍h寵愛；所以你tio̍h想chit-ê事，來明白chit-ê異象。Lí khí-thâu kî-tó ê sî, chiū ū bēng-lēng hoat-chhut, taⁿ góa lâi kā lí kóng; in-ūi lí tōa-tōa tit-tio̍h thióng-ài; só͘-í lí tio̍h siūⁿ chit ê sū, lâi bêng-pe̍k chit ê īⁿ-siōng.

24論到你ê百姓kap你ê聖城已經限定七十個七日期，beh遏止過失，除盡罪惡，救贖罪過，引進永遠ê義，封密異象kap讖語，koh用油抹至聖ê。Lūn-kàu lí ê peh-sìⁿ kap lí ê sèng-siâⁿ í-keng hān-tiāⁿ chhit-cha̍p ê chhit-ji̍t-kî, beh at-chí kè-sit, tû-chīn chōe-ok, kiù-sio̍k chōe-kòa, ín-chìn éng-oán ê gī, hong-ba̍t īⁿ-siōng kap chhàm-gú, koh ēng iû boah chì-sèng-ê.

25所以你tio̍h知tio̍h明，tùi出命重新起造耶路撒冷直到受抹油ê人君ê時，beh有七個七日期；koh六十二個七日期，當tī艱難ê時伊kap街路kap河溝lóng beh koh起造。Só͘-í lí tio̍h chai tio̍h bêng, tùi chhut-bēng têng-sin khí-chō Iâ-lō͘-sat-léng ti̍t-kàu siū boah-iû ê jîn-kun ê sî, beh ū chhit ê chhit-ji̍t-kî; koh la̍k-cha̍p-jī ê chhit-ji̍t-kî, tng tī kan-lân ê sî i kap ke-lō͘ kap hô-kau lóng beh koh khí-chō.

26過六十二個七日期 ê了後，受抹油ê beh tú-tio̍h剪除，也lóng無所有；beh有一個人君ê百姓到來毀滅城kap聖所，伊ê結局beh親像用大水，到路尾beh有交戰；拋荒ê事已經定tio̍h。Kè la̍k-cha̍p-jī ê chhit-ji̍t-kî ê liáu-āu, siū-boah-iû-ê beh tú-tio̍h chián-tû, iā lóng bô só͘ ū; beh ū chi̍t ê jîn-kun ê peh-sìⁿ kàu lâi húi-bia̍t siâⁿ kap sèng-só͘, i ê kiat-kio̍k beh chhin-chhiūⁿ ēng tōa-chúi, kàu lō͘-bé beh ū kau-chiàn; pha-hng ê sū í-keng tiāⁿ-tio̍h.

27一個七日期ê內面，伊beh kap chōe-chōe人立堅固ê約；七日期 ê一半伊beh hō͘祭祀kap禮物lóng soah；殘害ê借可惡ê ê翼來；koh有大受氣piàⁿ tī hit-ê行毀滅ê ê身上，到tī所定tio̍h ê末期。Chi̍t ê chhit-ji̍t-kî ê lāi-bīn, i beh kap chōe-chōe lâng li̍p kian-kò͘ ê iok; chhit-ji̍t-kî ê chi̍t-pòaⁿ i beh hō͘ chè-sū kap lé-mi̍h lóng soah; chân-hāi--ê chioh khó-ò͘ⁿ-ê ê si̍t lâi; koh ū tōa siū-khì piàⁿ tī hit ê kiâⁿ húi-bia̍t-ê ê sin-chiūⁿ, kàu tī só͘ tiāⁿ-tio̍h ê boa̍t-kî.

1波斯王Kó͘-lia̍t第三年，有tāi-chì顯明hō͘稱做Pek-thê-sa-sat ê但以理；chit-ê事是真實，關係大交戰，但以理通達chit-ê事，明白chit-ê異象。Pho-su ông Kó͘-lia̍t tē-saⁿ--nî, ū tāi-chì hián-bêng hō͘ chheng-chòe Pek-thê-sa-sat ê Tān-í-lí; chit ê sū sī chin-si̍t, koan-hē tōa kau-chiàn, Tān-í-lí thong-ta̍t chit ê sū, bêng-pe̍k chit ê īⁿ-siōng.

2Hit時我但以理憂悶三個七日期。Hit-sî góa Tān-í-lí iu-būn saⁿ ê chhit-ji̍t-kî.

3好ê物我無食，肉kap酒無入我ê嘴，也無用油抹我ê身軀，直到滿三個七日期。Hó ê mi̍h góa bô chia̍h, bah kap chiú bô ji̍p góa ê chhùi, iā bô ēng iû boah góa ê seng-khu, ti̍t-kàu móa saⁿ ê chhit-ji̍t-kî.

4正月二四日，我tī Hi-tí-kiat大河邊，Chiaⁿ-ge̍h jī-sì-ji̍t, góa tī Hi-tí-kiat tōa-hô piⁿ,

5kia̍h目teh看，看ah，有一人，身軀穿幼苧布ê衫，腰hâ O͘-hoat ê好金；kia̍h-ba̍k teh khòaⁿ, khòaⁿ ah, ū chi̍t-lâng, seng-khu chhēng iù-tōe-pò͘ ê saⁿ, io hâ O͘-hoat ê hó-kim;

6伊ê身軀親像黃玉，面貌親像sih-nà ê款，伊ê目睭親像火把，伊ê手kap腳色緻親像磨光ê銅，伊講話ê聲親像kui陣人ê聲。i ê seng-khu chhin-chhiūⁿ n̂g-ge̍k, bīn-māu chhin-chhiūⁿ sih-nà ê khoán, i ê ba̍k-chiu chhin-chhiūⁿ hé-pé, i ê chhiú kap kha sek-tì chhin-chhiūⁿ bôa-kng ê tâng, i kóng-ōe ê siaⁿ chhin-chhiūⁿ kui-tīn lâng ê siaⁿ.

7Chit-ê異象只有我但以理一人看見；因為kap我tī-teh ê人無看見hit-ê異象；kan-ta ngia̍uh-ngia̍uh-chhoah，走去bih。Chit ê īⁿ-siōng chí-ū góa Tān-í-lí chi̍t-lâng khòaⁿ-kìⁿ; in-ūi kap góa tī-teh ê lâng bô khòaⁿ-kìⁿ hit ê īⁿ-siōng; kan-ta ngia̍uh-ngia̍uh-chhoah, cháu--khì bih.

8Chhun我家己tī-teh；我看見chit-ê大異象；身體lóng無力；koh我ê súi色變pháiⁿ，到lóng無力。Chhun góa ka-kī tī-teh; góa khòaⁿ-kìⁿ chit ê tōa īⁿ-siōng; sin-thé lóng bô la̍t; koh góa ê súi-sek pìⁿ-pháiⁿ, kàu lóng bô la̍t.

9總是我聽見伊講話ê聲；聽見伊講話ê時，我仆落地，面俯地，就睏重眠。Chóng-sī góa thiaⁿ-kìⁿ i kóng-ōe ê siaⁿ; thiaⁿ-kìⁿ i kóng-ōe ê sî, góa phak-lo̍h tōe, bīn àⁿ tōe, chiū khùn tāng-bîn.

10看ah，有一支手摸我，hō͘我用腳頭u kap手掌罩tī地裡，teh chhoah。Khòaⁿ ah, ū chi̍t ki chhiú bong góa, hō͘ góa ēng kha-thâu-u kap chhiú-chiúⁿ tà tī tōe--nih, teh chhoah.

11伊就對我講，大大得tio̍h寵愛ê人，但以理ah，你tio̍h明我kap你所講chiah-ê話；起來khiā，因為我taⁿ奉差到你chia；伊對我講chit-ê話，我就khiā-teh gī-gī-chhoah。I chiū tùi góa kóng, Tōa-tōa tit-tio̍h thióng-ài ê lâng, Tān-í-lí ah, lí tio̍h bêng góa kap lí só͘ kóng chiah ê ōe; khí-lâi khiā, in-ūi góa taⁿ hōng-chhe kàu lí chia; i tùi góa kóng chit ê ōe, góa chiū khiā-teh gī-gī-chhoah.

12伊koh對我講，但以理ah，m̄免驚；因為對你頭一日專心ài明白，koh家己謙卑tī你上帝ê面前ê時，你ê話已經得tio̍h聽見；koh我因為你ê話chiah來。I koh tùi góa kóng, Tān-í-lí ah, m̄-bián kiaⁿ; in-ūi tùi lí thâu-chi̍t-ji̍t choan-sim ài bêng-pe̍k, koh ka-kī khiam-pi tī lí Siōng-tè ê bīn-chêng ê sî, lí ê ōe í-keng tit-tio̍h thiaⁿ-kìⁿ; koh góa in-ūi lí ê ōe chiah lâi.

13但是波斯國ê人君阻擋我二十一日；看ah，有大人君ê一個，Bí-ka-le̍k，來幫贊我，我就停tī-hia，kap波斯hiah-ê王做陣。Nā-sī Pho-su kok ê jîn-kun chó͘-tòng góa jī-cha̍p-it ji̍t; khòaⁿ ah, ū tōa jîn-kun ê chi̍t-ê, Bí-ka-le̍k, lâi pang-chān góa, góa chiū thêng tī-hia, kap Pho-su hiah ê ông chòe-tīn.

14Taⁿ我來是beh hō͘你明你ê百姓日後所beh tú-tio̍h ê事；因為chit-ê異象iáu-kú關係chōe-chōe日。Taⁿ góa lâi sī beh hō͘ lí bêng lí ê peh-sìⁿ ji̍t-āu só͘ beh tú-tio̍h ê sū; in-ūi chit ê īⁿ-siōng iáu-kú koan-hē chōe-chōe ji̍t.

15伊用chiah-ê話kā我講，我就面ǹg地，靜靜無講話。I ēng chiah ê ōe kā góa kóng, góa chiū bīn ǹg-tōe, chēng-chēng bô kóng-ōe.

16看ah，有一位親像人ê款摸我ê嘴唇；我就開嘴，對hit位khiā tī我ê面前ê講，我ê主ah，因為chit-ê異象我真憂悶，致到我lóng無力。Khòaⁿ ah, ū chi̍t-ūi chhin-chhiūⁿ lâng ê khoán bong góa ê chhùi-tûn; góa chiū khui-chhùi, tùi hit-ūi khiā tī góa ê bīn-chêng-ê kóng, Góa ê chú ah, in-ūi chit ê īⁿ-siōng góa chin iu-būn, tì-kàu góa lóng bô la̍t.

17我ê主ê奴僕怎樣能kap我ê主講話ah？因為chit時我ê身軀lóng無力，也lóng無喘氣。Góa ê chú ê lô͘-po̍k cháiⁿ-iūⁿ ōe kap góa ê chú kóng-ōe ah? in-ūi chit-sî góa ê seng-khu lóng bô la̍t, iā lóng bô chhoán-khùi.

18Koh一位親像人ê款ê來摸我，hō͘我有力。Koh chi̍t-ūi chhin-chhiūⁿ lâng ê khoán-ê lâi bong góa, hō͘ góa ū la̍t.

19伊講，大得tio̍h寵愛ê人，m̄免驚；願你平安；你tio̍h勇壯，tio̍h勇壯。伊一下對我講話，我就得tio̍h有力，講，我ê主ah，請你講，因為你已經hō͘我有力。I kóng, Tōa tit-tio̍h thióng-ài ê lâng, m̄-bián kiaⁿ; goān lí pêng-an; lí tio̍h ióng-chòng, tio̍h ióng-chòng. I chi̍t-ē tùi góa kóng-ōe, góa chiū tit-tio̍h ū la̍t, kóng, Góa ê chú ah, chhiáⁿ lí kóng, in-ūi lí í-keng hō͘ góa ū la̍t.

20伊就講，你知我為何來你chia mah？Taⁿ我beh tò去kap波斯ê人君交戰；我去了，看ah，希臘ê人君beh來。I chiū kóng, Lí chai góa ūi-hô lâi lí chia mah? Taⁿ góa beh tò--khì kap Pho-su ê jîn-kun kau-chiàn; góa khì-liáu, khòaⁿ ah, Hi-lia̍p ê jîn-kun beh lâi.

21總是我beh將記載tī真實ê冊ê指示你；除你ê大人君Bí-ka-le̍k以外，無一個kap我tàu出力來抵擋in。Chóng-sī góa beh chiong kì-chài tī chin-si̍t ê chheh-ê chí-sī lí; tû lí ê tōa jîn-kun Bí-ka-le̍k í-gōa, bô chi̍t-ê kap góa tàu chhut-la̍t lâi tí-tng in.

1當馬大王Tāi-lī-o͘元年，我khiā起來，hō͘伊堅固勇壯。Tng Má-tāi ông Tāi-lī-o͘ goân--nî, góa khiā--khí-lâi, hō͘ i kian-kò͘ ióng-chòng.

2Taⁿ我將真實ê事指示你。看ah，波斯beh koh有三個王興起；第四個beh真好額，贏過in hiah-ê；伊túi伊ê好額成做強猛ê時，就beh激動眾人攻擊希臘國。Taⁿ góa chiong chin-si̍t ê sū chí-sī lí. Khòaⁿ ah, Pho-su beh koh ū saⁿ ê ông heng-khí; tē-sì-ê beh chin hó-gia̍h, iâⁿ-kè in hiah-ê; i túi i ê hó-gia̍h chiâⁿ-chòe kiông-béng ê sî, chiū beh kek-tōng chèng-lâng kong-kek Hi-lia̍p kok.

3Beh有一個勇猛ê王起來，用大權來治理，照意思來行。Beh ū chi̍t ê ióng-béng ê ông khí-lâi, ēng tōa-koân lâi tī-lí, chiàu ì-sù lâi kiâⁿ.

4伊興起ê時，伊ê國beh分裂，ǹg天ê四面ê方分開；總是無歸伊ê後裔，也bōe比得伊前所掌ê權；因為伊ê國beh tú-tio̍h拔起來，歸tī chiah-ê以外ê別人。I heng-khí ê sî, i ê kok beh hun-li̍h, ǹg-thiⁿ ê sì-bīn ê hong pun-khui; chóng-sī bô kui i ê hō͘-è, iā bōe pí-tit i chêng só͘ chiáng ê koân; in-ūi i ê kok beh tú-tio̍h pu̍ih--khí-lâi, kui tī chiah-ê í-gōa ê pa̍t-lâng.

5南方ê王beh強猛；總是伊大臣ê中間beh有一個比伊khah強猛，得tio̍h權；伊ê權beh做真大ê權。Lâm-hng ê ông beh kiông-béng; chóng-sī i tāi-sîn ê tiong-kan beh ū chi̍t-ê pí i khah kiông-béng, tit-tio̍h koân; i ê koân beh chòe chin-tōa ê koân.

6過kúi-nā年後，in beh相連合；南方ê國ê cha-bó͘-kiáⁿ beh就近北方ê王，ài立盟約；總是chit-ê cha-bó͘-kiáⁿ幫贊ê力bōe能久長；chit-ê王kap伊幫贊ê力bōe能存在；koh chit-ê cha-bó͘-kiáⁿ kap帶伊來ê，kap生伊ê，以及當時扶助伊ê，lóng beh受交付。Kè kúi-nā nî āu, in beh saⁿ liân-ha̍p; lâm-hng ê kok ê cha-bó͘-kiáⁿ beh chiū-kūn pak-hng ê ông, ài li̍p bêng-iok; chóng-sī chit ê cha-bó͘-kiáⁿ pang-chān ê la̍t bōe-ōe kú-tn̂g; chit ê ông kap i pang-chān ê la̍t bōe-ōe chûn-chāi; koh chit ê cha-bó͘-kiáⁿ kap tòa i lâi ê, kap siⁿ i ê, í-ki̍p tng-sî hû-chō͘ i ê, lóng beh siū kau-hù.

7總是chit-ê cha-bó͘-kiáⁿ ê本家beh koh出一個，續接王位，伊beh帶軍隊來，進入北方ê王ê險要，攻擊來khah贏in。Chóng-sī chit ê cha-bó͘-kiáⁿ ê pún-ke beh koh chhut chi̍t-ê, sòa-chiap ông-ūi, i beh tòa kun-tūi lâi, chìn-ji̍p pak-hng ê ông ê hiám-iàu, kong-kek lâi khah-iâⁿ in.

8也將in ê上帝，kap所鑄ê偶像，以及銀金ê寶器搶掠到埃及；kúi-nā年久無chhap北方ê王。Iā chiong in ê siōng-tè, kap só͘ chù ê ngó͘-siōng, í-ki̍p gûn kim ê pó-khì chhiúⁿ-lia̍h kàu Ai-ki̍p; kúi-nā nî kú bô chhap pak-hng ê ông.

9伊beh入南方ê王ê國，總是beh猶原tò去本所在。I beh ji̍p lâm-hng ê ông ê kok, chóng-sī beh iû-goân tò--khì pún só͘-chāi.

10伊hiah-ê kiáⁿ beh起交戰，招集chōe-chōe軍隊，伊beh進前親像水氾濫tùi-hia經過，就beh tò去，koh起交戰直到伊ê險要。I hiah ê kiáⁿ beh khí kau-chiàn, chio-chi̍p chōe-chōe kun-tūi, i beh chìn-chêng chhin-chhiūⁿ chúi hoàn-lām tùi-hia keng-kè, chiū beh tò--khì, koh khí kau-chiàn ti̍t-kàu i ê hiám-iàu.

11南方ê王beh大受氣，出來kap北方ê王交戰；伊beh排列大軍隊，大軍隊beh交付伊ê手。Lâm-hng ê ông beh tōa siū-khì, chhut-lâi kap pak-hng ê ông kau-chiàn; i beh pâi-lia̍t tōa kun-tūi, tōa kun-tūi beh kau-hù i ê chhiú.

12已經除去大軍隊，伊ê心自高；伊雖然hō͘ kúi-nā萬人倒落去，究竟無得tio̍h khah贏。Í-keng tû--khì tōa kun-tūi, i ê sim chū-ko; i sui-jiân hō͘ kúi-nā bān lâng tó--lo̍h-khì, kiù-kèng bô tit-tio̍h khah-iâⁿ.

13北方ê王beh tò來，koh排列大軍隊，比前ê koh khah chōe；過kúi-nā年後，伊beh帶大軍隊kap chōe-chōe跟蹤來。Pak-hng ê ông beh tò--lâi, koh pâi-lia̍t tōa kun-tūi, pí chêng-ê koh khah chōe; kè kúi-nā nî āu, i beh tòa tōa kun-tūi kap chōe-chōe kun-chong lâi.

14Hit時beh有chōe-chōe人起來攻擊南方ê王；koh你ê百姓中強暴ê人也beh起來，ài hō͘異象得tio̍h應驗；總是in beh敗無。Hit-sî beh ū chōe-chōe lâng khí-lâi kong-kek lâm-hng ê ông; koh lí ê peh-sìⁿ tiong kiông-pō ê lâng iā beh khí-lâi, ài hō͘ īⁿ-siōng tit-tio̍h èng-giām; chóng-sī in beh pāi-bô.

15北方ê王beh來，也beh起土堆，攻取堅固ê城；南方ê軍隊beh khiā-bōe-tiâu，伊所揀ê百姓也無力thang khiā-tiâu。Pak-hng ê ông beh lâi, iā beh khí thô͘-tui, kong-chhú kian-kò͘ ê siâⁿ; lâm-hng ê kun-tūi beh khiā-bōe-tiâu, i só͘ kéng ê peh-sìⁿ iā bô la̍t thang khiā-tiâu.

16獨獨來攻擊伊ê，beh chhut-chāi意思來行，無人tī伊ê面前khiā-ōe-tiâu；伊beh khiā tī榮耀ê地，伊ê手行剿滅。To̍k-to̍k lâi kong-kek i ê, beh chhut-chāi ì-sù lâi kiâⁿ, bô lâng tī i ê bīn-chêng khiā-ōe-tiâu; i beh khiā tī êng-iāu ê tōe, i ê chhiú kiâⁿ châu-bia̍t.

17伊決意用全國ê力來，也有正直ê人kap伊來，伊beh照意思行；koh beh用婦人人ê cha-bó͘-kiáⁿ hō͘伊，beh敗壞伊；總是伊bōe成立，也無做伊ê利益。I koat-ì ēng choân-kok ê la̍t lâi, iā ū chèng-ti̍t ê lâng kap i lâi, i beh chiàu ì-sù kiâⁿ; koh beh ēng hū-jîn-lâng ê cha-bó͘-kiáⁿ hō͘ i, beh pāi-hoāi i; chóng-sī i bōe sêng-li̍p, iā bô chòe i ê lī-ek.

18Hit-tia̍p了後，伊beh oa̍t-tńg面ǹg hiah-ê海嶼，chōe-chōe取伊；總是beh有一個大臣除去伊所施ê凌辱；koh hō͘ hit-ê凌辱歸伊本身。Hit-tia̍p liáu-āu i beh oa̍t-tńg-bīn ǹg hiah ê hái-sū, chōe-chōe chhú i; chóng-sī beh ū chi̍t ê tāi-sîn tû--khì i só͘ si ê lêng-jio̍k; koh hō͘ hit ê lêng-jio̍k kui i pún-sin.

19後來伊beh oa̍t-tńg面ǹg家己境內ê險要；總是伊beh tio̍h-tak來跋倒；到尾無koh看見。Āu-lâi i beh oa̍t-tńg-bīn ǹg ka-kī kéng-lāi ê hiám-iàu; chóng-sī i beh tio̍h-tak lâi poa̍h-tó; kàu-bé bô koh khòaⁿ-kìⁿ.

20Hit時beh有一人起來，續接伊ê位，hō͘一個綠色ê遍行國內榮耀ê地；總是無幾日內伊beh受滅無，m̄是tùi受氣，也m̄是tùi交戰。Hit-sî beh ū chi̍t-lâng khí-lâi, sòa-chiap i ê ūi, hō͘ chi̍t ê le̍k-sek-ê piàn-kiâⁿ kok-lāi êng-iāu ê tōe; chóng-sī bô kúi-ji̍t-lāi i beh siū bia̍t-bô, m̄-sī tùi siū-khì, iā m̄-sī tùi kau-chiàn.

21Beh有一個卑賤ê人起來，續接伊ê位，人m̄-bat用國ê榮光hō͘伊；是thàn人無持防ê時，用諂媚來得tio̍h國。Beh ū chi̍t ê pi-chiān ê lâng khí-lâi, sòa-chiap i ê ūi, lâng m̄-bat ēng kok ê êng-kng hō͘ i; sī thàn lâng bô tî-hông ê sî, ēng thiám-mī lâi tit-tio̍h kok.

22大隊ê兵力beh受毀滅tī伊ê面前，親像hō͘大水流去，同會盟ê人君也beh án-ni。Tōa-tūi ê peng-la̍t beh siū húi-bia̍t tī i ê bīn-chêng, chhin-chhiūⁿ hō͘ tōa-chúi lâu--khì, tâng hōe-bêng ê jîn-kun iā beh án-ni.

23立約了後伊beh行詭詐；因為伊beh上來，用少少ê百姓成做強猛。Li̍p-iok liáu-āu i beh kiâⁿ khúi-chà; in-ūi i beh chiūⁿ--lâi, ēng chió-chió ê peh-sìⁿ chiâⁿ-chòe kiông-béng.

24趁人無持防ê時，伊beh來到省內ê肥地，也beh行伊ê列祖，kap in ê列祖，所bē-bat行ê；beh用所搶ê，所劫ê，kap貨財分散hō͘人；koh beh設計謀攻擊chiah-ê險要ê所在，到伊ê時期。Thàn lâng bô tî-hông ê sî, i beh lâi kàu séng-lāi ê pûi-tōe, iā beh kiâⁿ i ê lia̍t-chó͘, kap in ê lia̍t-chó͘, só͘ bē-bat kiâⁿ--ê; beh ēng só͘ chhiúⁿ-ê, só͘ kiap-ê, kap hè-châi hun-sòaⁿ hō͘ lâng; koh beh siat kè-bô͘ kong-kek chiah ê hiám-iàu ê só͘-chāi, kàu i ê sî-kî.

25伊beh出大力奮志，用大ê軍隊攻擊南方ê王；南方ê王，也beh用極大極強ê軍兵kap伊交戰；總是khiā-bōe-tiâu，因為人設計謀beh害伊；I beh chhut tōa-la̍t hùn-chì, ēng tōa ê kun-tūi kong-kek lâm-hng ê ông; lâm-hng ê ông, iā beh ēng ke̍k-tōa ke̍k-kiông ê kun-peng kap i kau-chiàn; chóng-sī khiā-bōe-tiâu, in-ūi lâng siat kè-bô͘ beh hāi i;

26食伊ê奉祿ê beh滅伊，伊ê軍兵beh四散；koh受thâi-ê真chōe。chia̍h i ê hōng-lo̍k-ê beh bia̍t i, i ê kun-peng beh sì-sòaⁿ; koh siū-thâi-ê chin-chōe.

27Chit兩個王，心存pháiⁿ意，同桌ê時講白賊；總是伊ê計謀bōe成；因為到定tio̍h ê期in ê結局會到。Chí(Chit) nn̄g ê ông, sim chûn pháiⁿ-ì, tâng-toh ê sî kóng pe̍h-chha̍t; chóng-sī i ê kè-bô͘ bōe chiâⁿ; in-ūi kàu tiāⁿ-tio̍h ê kî in ê kiat-kio̍k ōe kàu.

28伊beh帶chōe-chōe貨財tò去本國；伊ê心反對聖約；照伊ê意思行，tò去本國。I beh tòa chōe-chōe hè-châi tò--khì pún-kok; i ê sim hoán-tùi sèng-iok; chiàu i ê ì-sù kiâⁿ, tò--khì pún-kok.

29到定tio̍h ê期，伊beh倒tńg，來到南方；總是chit路尾pái無親像前pái。Kàu tiāⁿ-tio̍h ê kî, i beh tò-tńg, lâi kàu lâm-hng; chóng-sī chí(**chit) lō͘-bé pái bô chhin-chhiūⁿ chêng-pái.

30因為Ki-thê ê船beh到攻擊伊，致到伊憂悶就tò去，痛恨聖約，照伊ê意思來行；伊beh tò來，kap棄sak聖約ê人相kap計謀。In-ūi Ki-thê ê chûn beh kàu kong-kek i, tì-kàu i iu-būn chiū tò--khì, thòng-hūn sèng-iok, chiàu i ê ì-sù lâi kiâⁿ; i beh tò--lâi, kap khì-sak sèng-iok ê lâng saⁿ-kap kè-bô͘.

31伊beh起兵，in beh phah lâ-sâm聖所，就是衛所，除去日日所獻ê祭祀，khiā hit-ê殘害可惡ê物。I beh khí-peng, in beh phah lâ-sâm sèng-só͘, chiū-sī ōe-só͘, tû--khì ji̍t-ji̍t só͘ hiàn ê chè-sū, khiā hit ê chân-hāi khó-ò͘ⁿ ê mi̍h.

32行pháiⁿ背約ê，伊beh用諂媚ê話引誘in；獨獨bat in ê上帝ê百姓beh勇敢行tāi-chì。Kiâⁿ-pháiⁿ pōe-iok-ê, i beh ēng thiám-mī ê ōe ín-iú in; to̍k-to̍k bat in ê Siōng-tè ê peh-sìⁿ beh ióng-kám kiâⁿ tāi-chì.

33百姓中智慧ê人beh教示chōe-chōe人；總是in chōe-chōe日beh tùi刀劍、火燒，hō͘人掠，hō͘人搶，來失敗。Peh-sìⁿ-tiong tì-hūi ê lâng beh kà-sī chōe-chōe lâng; chóng-sī in chōe-chōe ji̍t beh tùi to-kiàm, hé-sio, hō͘ lâng lia̍h, hō͘ lâng chhiúⁿ, lâi sit-pāi.

34In失敗ê時beh略略á得tio̍h扶助；也有chōe-chōe人beh用諂媚kap in連絡。In sit-pāi ê sî beh lio̍h-lio̍h-á tit-tio̍h hû-chō͘; iā ū chōe-chōe lâng beh ēng thiám-mī kap in liân-lo̍k.

35智慧ê人ê中間有ê beh失敗，來鍛鍊in，hō͘ in清氣，hō͘ in白白，直到路尾ê日；因為到定tio̍h ê期，結局就到。Tì-hūi ê lâng ê tiong-kan ū-ê beh sit-pāi, lâi thoàn-liān in, hō͘ in chheng-khì, hō͘ in pe̍h-pe̍h, ti̍t-kàu lō͘-bé ê ji̍t; in-ūi kàu tiāⁿ-tio̍h ê kî, kiat-kio̍k chiū kàu.

36Hit-ê王beh chhut-chāi意思來行，beh自高自大pôaⁿ過一切ê上帝，koh用奇異ê話攻擊chiah-ê上帝ê上帝；伊beh興通到大受氣明白；因為所定tio̍h ê事的確成。Hit ê ông beh chhut-chāi ì-sù lâi kiâⁿ, beh chū-ko chū-tōa pôaⁿ-kè it-chhè ê siōng-tè, koh ēng kî-īⁿ ê ōe kong-kek chiah ê siōng-tè ê Siōng-tè; i beh heng-thong kàu tōa siū-khì bêng-pe̍k; in-ūi só͘ tiāⁿ-tio̍h ê sū tek-khak chiâⁿ.

37伊無beh要緊伊ê列祖ê上帝，以及婦女所欣慕ê，無論甚麼上帝伊無要緊；因為伊beh自大pôaⁿ過一切。I bô beh iàu-kín i ê lia̍t-chó͘ ê siōng-tè, í-ki̍p hū-lú só͘ him-bō͘--ê, bô-lūn sím-mi̍h siōng-tè i bô iàu-kín; in-ūi i beh chū-tōa pôaⁿ-kè it-chhè.

38伊beh tī伊ê位敬拜衛所ê上帝；koh伊ê列祖所m̄-bat ê上帝，伊beh用金、銀、玉石、寶物來敬伊。I beh tī i ê ūi kèng-pài ōe-só͘ ê siōng-tè; koh i ê lia̍t-chó͘ só͘ m̄-bat ê siōng-tè, i beh ēng kim, gûn, ge̍k-chio̍h, pó-mi̍h lâi kèng i.

39伊beh óa靠別號ê上帝來設法堅固ê衛所；凡若承認伊ê，伊beh將榮光hō͘ in，也beh hō͘ in管轄chōe-chōe人，koh beh分土地報賞in。I beh óa-khò pa̍t-hō ê siōng-tè lâi siat-hoat kian-kò͘ ê ōe-só͘; hoān-nā sêng-jīn-i--ê, i beh chiong êng-kng hō͘ in, iā beh hō͘ in koán-hat chōe-chōe lâng, koh beh pun thô͘-tōe pò-siúⁿ in.

40到路尾ê時，南方ê王beh觸犯伊；北方ê王beh攻擊伊親像捲螺風，用車，用馬兵，用chōe-chōe船隻；也beh進入hiah-ê國，親像氾濫ê水經過。Kàu lō͘-bé ê sî, lâm-hng ê ông beh chhiok-hoān i; pak-hng ê ông beh kong-kek i chhin-chhiūⁿ kńg-lê-hong, ēng chhia, ēng bé-peng, ēng chōe-chōe chûn-chiah; iā beh chìn-ji̍p hiah ê kok, chhin-chhiūⁿ hoàn-lām ê chúi keng-kè.

41Koh beh進入榮耀ê地，chōe-chōe國hō͘伊chhia倒；獨獨Í-tong、Mô͘-ap，kap A-bûn kiáⁿ孫尊貴ê人會脫離伊ê手。Koh beh chìn-ji̍p êng-iāu ê tōe, chōe-chōe kok hō͘ i chhia-tó; to̍k-to̍k Í-tong, Mô͘-ap, kap A-bûn kiáⁿ-sun chun-kùi ê lâng ōe thoat-lī i ê chhiú.

42伊beh伸手攻擊列國；埃及地也無得tio̍h脫離。I beh chhun-chhiú kong-kek lia̍t-kok; Ai-ki̍p tōe iā bô tit-tio̍h thoat-lī.

43伊beh掌管埃及金銀ê財寶以及一切ê寶物；Lū-pí-a kap Kó͘-si̍t人lóng beh跟tè伊。I beh chiáng-koán Ai-ki̍p kim-gûn ê châi-pó í-ki̍p it-chhè ê pó-mi̍h; Lū-pí-a kap Kó͘-si̍t lâng lóng beh kun-tè i.

44Tùi東tùi北beh有消息到來擾亂伊；伊beh大受氣出去，一盡除滅chōe-chōe人。Tùi-tang tùi-pak beh ū siau-sit kàu lâi jiáu-loān i; i beh tōa siū-khì chhut-khì, it-chīn tû-bia̍t chōe-chōe lâng.

45伊beh tī海kap榮耀ê聖山ê中間搭伊宮殿ê布棚；總是伊beh到伊ê結局，也無幫贊伊ê。I beh tī hái kap êng-iāu ê sèng-soaⁿ ê tiong-kan tah i kiong-tiān ê pò͘-pîⁿ; chóng-sī i beh kàu i ê kiat-kio̍k, iā bô pang-chān i ê.