1Nî-pò͘-kah-nî-sat坐位第二年，Nî-pò͘-kah-nî-sat夢見；心擘腹bōe睏得。Nî-pò͘-kah-nî-sat chē-ūi tē-jī-nî, Nî-pò͘-kah-nî-sat bāng-kìⁿ; sim peh-pak bōe khùn-tit.

2王命令召博士、術士、司公，kap Ka-le̍k-tí人來，ài in用王ê夢kā伊講。In就來，khiā tī王ê面前。Ông bēng-lēng tiàu phok-sū, su̍t-sū, sai-kong, kap Ka-le̍k-tí lâng lâi, ài in ēng ông ê bāng kā i kóng. In chiū lâi, khiā tī ông ê bīn-chêng.

3王kā in講，我有夢見一個夢，我ê心擘腹，ài beh知hit-ê夢是甚麼。Ông kā in kóng, Góa ū bāng-kìⁿ chi̍t ê bāng, góa ê sim peh-pak, ài beh chai hit ê bāng sī sím-mi̍h.

4Ka-le̍k-tí人用A-lân ê腔口對王講，願王萬歲；請將hit-ê夢kā你chiah-ê奴僕講，阮就beh解明。Ka-le̍k-tí lâng ēng A-lân ê khiuⁿ-kháu tùi ông kóng, Goān ông bān-sòe; chhiáⁿ chiong hit ê bāng kā lí chiah ê lô͘-po̍k kóng, goán chiū beh kóe-bêng.

5王應Ka-le̍k-tí人講，hit-ê事我已經bōe記得lah；lín若無將我所夢見講hō͘我聽，續解明伊，就beh將lín ê肉割碎碎，也lín ê厝beh做糞埽堆。Ông ìn Ka-le̍k-tí lâng kóng, Hit ê sū góa í-keng bōe-kì-tit lah; lín nā bô chiong góa só͘ bāng-kìⁿ kóng hō͘ góa thiaⁿ, sòa kóe-bêng i, chiū beh chiong lín ê bah koah chhùi-chhùi, iā lín ê chhù beh chòe pùn-sò-tui.

6總是lín若將我所夢見kā我講，續解明伊，lín beh tùi我得tio̍h贈品、報賞、大榮光；taⁿ lín tio̍h將我所夢見講hō͘我聽，續解明伊。Chóng-sī lín nā chiong góa só͘ bāng-kìⁿ kā góa kóng, sòa kóe-bêng i, lín beh tùi góa tit-tio̍h chēng-phín, pò-siúⁿ, tōa êng-kng; taⁿ lín tio̍h chiong góa só͘ bāng-kìⁿ kóng hō͘ góa thiaⁿ, sòa kóe-bêng i.

7In第二pái koh對王講，請王將所夢見ê kā chiah-ê奴僕講，阮就beh解明伊。In tē-jī-pái koh tùi ông kóng, Chhiáⁿ ông chiong só͘ bāng-kìⁿ-ê kā chiah ê lô͘-po̍k kóng, goán chiū beh kóe-bêng i.

8王應講，我準準知lín是故意延chhiân，因為lín知hit-ê夢我已經bōe記得lah。Ông ìn kóng, Góa chún-chún chai lín sī kò͘-ì iân-chhiân, in-ūi lín chai hit ê bāng góa í-keng bōe-kì-tit lah.

9Lín若無將我所夢見kā我講，只有一法thang款待lín；因為lín已經有備辦謊言亂語對我講，teh thèng候時勢ê改變；taⁿ lín tio̍h將所夢見kā我講，我就知lín能解明伊。Lín nā bô chiong góa só͘ bāng-kìⁿ kā góa kóng, chí-ū chi̍t-hoat thang khoán-thāi lín; in-ūi lín í-keng ū pī-pān hong-giân loān-gú tùi góa kóng, teh thèng-hāu sî-sè ê kái-piàn; taⁿ lín tio̍h chiong só͘ bāng-kìⁿ kā góa kóng, góa chiū chai lín ōe kóe-bêng i.

10Ka-le̍k-tí人tī王ê面前應講，王chit號事，地上無人會講出；因為bē-bat有君王、大臣、掌權ê kah博士，á是術士，á是Ka-le̍k-tí人tio̍h án-ni做。Ka-le̍k-tí lâng tī ông ê bīn-chêng ìn kóng, Ông chit hō sū, tōe-chiūⁿ bô lâng ōe kóng-chhut; in-ūi bē-bat ū kun-ông, tāi-sîn, chiáng-koân-ê kah phok-sū, á-sī su̍t-sū, á-sī Ka-le̍k-tí lâng tio̍h án-ni chòe.

11王所問ê是稀奇ê事；除去無kap世間人同khiā起ê神明以外，無一個能tī王ê面前講出。Ông só͘ mn̄g--ê sī hi-kî ê sū; tû--khì bô kap sè-kan lâng tâng khiā-khí ê sîn-bêng í-gōa, bô chi̍t-ê ōe tī ông ê bīn-chêng kóng-chhut.

12王受氣，受氣到極，命令剿滅巴比倫一切智慧ê人。Ông siū-khì, siū-khì kàu-ke̍k, bēng-lēng châu-bia̍t Pa-pí-lûn it-chhè tì-hūi ê lâng.

13Tùi án-ni，出命令beh thâi智慧ê人；就chhē但以理kap伊ê同伴beh thâi in。Tùi án-ni chhut bēng-lēng beh thâi tì-hūi ê lâng; chiū chhē Tān-í-lí kap i ê tâng-phōaⁿ beh thâi in.

14王ê侍衛長，A-lio̍k，出來beh thâi巴比倫智慧ê人，但以理用精通智慧ê話應伊；Ông ê sī-ōe-tiúⁿ, A-lio̍k, chhut-lâi beh thâi Pa-pí-lûn tì-hūi ê lâng, Tān-í-lí ēng cheng-thong tì-hūi ê ōe ìn i;

15就對王ê侍衛長，A-lio̍k，講，王所出ê命令怎樣到chiah緊急ah？A-lio̍k就將chit-ê tāi-chì kā但以理講。chiū tùi ông ê sī-ōe-tiúⁿ, A-lio̍k, kóng, Ông só͘ chhut ê bēng-lēng cháiⁿ-iūⁿ kàu chiah kín-kip ah? A-lio̍k chiū chiong chit ê tāi-chì kā Tān-í-lí kóng.

16但以理就入去，求王寬限(ān)，就beh將夢kā王解明。Tān-í-lí chiū ji̍p--khì, kiû ông khoan-ān, chiū beh chiong bāng kā ông kóe-bêng.

17但以理tò去伊ê厝，將chit-ê事kā伊同伴Hap-ná-nî-ngá、Bí-sa-lī、A-sat-lī-ngá講，Tān-í-lí tò--khì i ê chhù, chiong chit ê sū kā i tâng-phōaⁿ Hap-ná-nî-ngá, Bí-sa-lī, A-sat-lī-ngá kóng,

18ài in為tio̍h chit-ê祕密ê事祈求天頂ê上帝憐憫，免得但以理kap伊ê同伴kap巴比倫其餘智慧ê人相kap滅無。ài in ūi-tio̍h chit ê pì-bi̍t ê sū kî-kiû thiⁿ-téng ê Siōng-tè lîn-bín, bián-tit Tān-í-lí kap i ê tâng-phōaⁿ kap Pa-pí-lûn kî-û tì-hūi ê lâng saⁿ-kap bia̍t-bô.

19Chit-ê祕密ê事就tī暝時異象中對但以理顯明。但以理就o-ló天頂ê上帝。Chit ê pì-bi̍t ê sū chiū tī mî--sî īⁿ-siōng-tiong tùi Tān-í-lí hián-bêng. Tān-í-lí chiū o-ló thiⁿ-téng ê Siōng-tè.

20但以理講，上帝ê名應該受o-ló到永遠；因為智慧、權能lóng屬tī祂。Tān-í-lí kóng, Siōng-tè ê miâ eng-kai siū o-ló kàu éng-oán; in-ūi tì-hūi koân-lêng lóng sio̍k tī I.

21祂變換時期節季；祂廢無王，設立王；將智慧hō͘智慧ê人，將見識hō͘聰明ê人。I piàn-ōaⁿ sî-kî choeh-kùi; I hòe-bô ông, siat-li̍p ông; chiong tì-hūi hō͘ tì-hūi ê lâng, chiong kiàn-sek hō͘ chhong-bêng ê lâng.

22祂指示深奧祕密ê事；暗中所有ê祂lóng知，光也kap伊相kap tòa。I chí-sī chhim-ò pì-bi̍t ê sū; àm-tiong só͘-ū-ê I lóng chai, kng iā kap I saⁿ-kap tòa.

23我ê列祖ê上帝ah，我感謝祢o-ló祢，因為祢賞賜我智慧才能，taⁿ用阮對祢所求ê已經指示我；因為祢有用王ê事指示阮。Góa ê lia̍t-chó͘ ê Siōng-tè ah, góa kám-siā Lí o-ló Lí, in-ūi Lí siúⁿ-sù góa tì-hūi châi-lêng, taⁿ ēng goán tùi Lí só͘-kiû-ê í-keng chí-sī góa; in-ūi Lí ū ēng ông ê sū chí-sī goán.

24Tùi hit-tia̍p，但以理入去見A-lio̍k，就是王所派剿滅巴比倫hiah-ê智慧ê人ê；伊去kā伊講，莫得剿滅巴比倫hiah-ê智慧ê人；chhōa我到王ê面前，我beh將夢kā王解明。Tùi hit-tia̍p Tān-í-lí ji̍p--khì kìⁿ A-lio̍k, chiū-sī ông só͘ phài châu-bia̍t Pa-pí-lûn hiah ê tì-hūi ê lâng ê; i khì kā i kóng, Bo̍h-tit châu-bia̍t Pa-pí-lûn hiah ê tì-hūi ê lâng; chhōa góa kàu ông ê bīn-chêng, góa beh chiong bāng kā ông kóe-bêng.

25A-lio̍k即時chhōa但以理到王ê面前，對伊講，我tī猶大受掠ê人ê中間tú-tio̍h一人，伊會將夢kā王解明，A-lio̍k chek-sî chhōa Tān-í-lí kàu ông ê bīn-chêng, tùi i kóng, Góa tī Iû-tāi siū-lia̍h ê lâng ê tiong-kan tú-tio̍h chi̍t-lâng, i ōe chiong bāng kā ông kóe-bêng,

26王對稱做Pek-thê-sa-sat ê但以理講，你能將我所看見ê夢kā我講，續kā我解明mah？Ông tùi chheng-chòe Pek-thê-sa-sat ê Tān-í-lí kóng, Lí ōe chiong góa só͘ khòaⁿ-kìⁿ ê bāng kā góa kóng, sòa kā góa kóe-bêng mah?

27但以理tī王ê面前應講，王所問ê祕密，智慧ê人、術士、博士、卜卦ê，lóng bōe kā王指明；Tān-í-lí tī ông ê bīn-chêng ìn kóng, Ông só͘ mn̄g ê pì-bi̍t, tì-hūi ê lâng, su̍t-sū, phok-sū, pok-kòa-ê, lóng bōe kā ông chí-bêng;

28總是天頂有一位上帝能顯明祕密ê事；taⁿ用後日teh-beh有ê事有指示Nî-pò͘-kah-nî-sat王。你所夢見ê kap你tī床裡所想ê異象是án-ni：chóng-sī thiⁿ-téng ū chi̍t ūi Siōng-tè ōe hián-bêng pì-bi̍t ê sū; taⁿ ēng āu-ji̍t teh-beh ū ê sū ū chí-sī Nî-pò͘-kah-nî-sat ông. Lí só͘ bāng-kìⁿ-ê kap lí tī chhn̂g--nih só͘ siūⁿ ê īⁿ-siōng sī án-ni:

29王ah，你tī床裡想到將來ê事；hit位顯明祕密ê事ê用將來所beh有ê事指示你。ông ah, lí tī chhn̂g--nih siūⁿ kàu chiong-lâi ê sū; hit-ūi hián-bêng pì-bi̍t ê sū-ê ēng chiong-lâi só͘ beh ū ê sū chí-sī lí.

30論到我，hit-ê祕密ê事顯明tī我，m̄是為tio̍h我有智慧贏過一切活teh ê人，就是tiâu-tî beh解明hō͘王知，koh hō͘你知你ê心ê念頭。Lūn-kàu góa, hit ê pì-bi̍t ê sū hián-bêng tī góa, m̄-sī ūi-tio̍h góa ū tì-hūi iâⁿ-kè it-chhè oa̍h-teh ê lâng, chiū-sī tiâu-tî beh kóe-bêng hō͘ ông chai, koh hō͘ lí chai lí ê sim ê liām-thâu.

31王ah，你teh看，就看見有一sian大像；chit-ê像真高，極其燦爛，khiā tī你ê面前；伊ê形狀真thang驚。Ông ah, lí teh khòaⁿ, chiū khòaⁿ-kìⁿ ū chi̍t sian tōa-siōng; chit ê siōng chin koâiⁿ, ke̍k-kî chhàn-lān, khiā tī lí ê bīn-chêng; i ê hêng-chōng chin thang kiaⁿ.

32Chit-ê像，伊ê頭殼是好金ê，伊ê胸ha̍h kap手骨是銀ê，腹肚kap大腿是銅ê；Chit ê siōng, i ê thâu-khak sī hó-kim-ê, i ê heng-ha̍h kap chhiú-kut sī gûn-ê, pak-tó͘ kap tōa-thúi sī tâng-ê;

33伊ê腳胴是鐵ê，伊ê腳盤一半鐵，一半土ê。i ê kha-tâng sī thih-ê, i ê kha-pôaⁿ chi̍t-pòaⁿ thih, chi̍t-pòaⁿ thô͘ ê.

34你teh看到有一塊石phah出來，m̄是用手phah-ê，摃tio̍h hit sian像鐵kap土ê腳盤，來phah破in。Lí teh khòaⁿ kàu ū chi̍t tè chio̍h phah--chhut-lâi, m̄-sī ēng chhiú phah-ê, kòng-tio̍h hit sian siōng thih kap thô͘ ê kha-pôaⁿ, lâi phah-phòa in.

35Tùi án-ni，hit-ê鐵、土、銅、銀、金做一下phah碎碎，變做夏天五穀場ê粗糠，hō͘風吹散，無koh有in ê位處；koh chit-ê摃tio̍h像ê石變成大山，充滿全地。Tùi án-ni hit ê thih, thô͘, tâng, gûn, kim chòe chi̍t-ē phah chhùi-chhùi, pìⁿ-chòe hē-thiⁿ gō͘-kak-tiûⁿ ê chho͘-khng, hō͘ hong chhe-sòaⁿ, bô koh ū in ê ūi-chhù; koh chit ê kòng-tio̍h siōng ê chio̍h pìⁿ-chiâⁿ tōa-soaⁿ, chhiong-móa choân-tōe.

36這就是hit-ê夢；阮taⁿ beh tī王ê面前解明伊。Che chiū-sī hit ê bāng; goán taⁿ beh tī ông ê bīn-chêng kóe-bêng i.

37王ah，你是列王ê王，天頂ê上帝已經將國度、權柄、能力、榮光賞賜你；Ông ah, lí sī lia̍t-ông ê ông, thiⁿ-téng ê Siōng-tè í-keng chiong kok-tō͘, koân-pèng, lêng-le̍k, êng-kng siúⁿ-sù lí;

38見若世間人khiā起ê所在，連山野ê走獸，空中ê飛鳥，祂lóng交付你ê手，hō͘你掌管chiah-ê一切；你就是hit-ê金ê頭殼。kìⁿ-nā sè-kan lâng khiā-khí ê só͘-chāi, liân soaⁿ-iá ê cháu-siù, khong-tiong ê pe-chiáu, I lóng kau-hù lí ê chhiú, hō͘ lí chiáng-koán chiah-ê it-chhè; lí chiū-sī hit ê kim ê thâu-khak.

39你以後beh koh興起一國m̄值tio̍h你；koh有第三國，就是銅ê，beh掌管天下。Lí í-āu beh koh heng-khí chi̍t-kok m̄-ta̍t-tio̍h lí; koh ū tē-saⁿ kok, chiū-sī tâng--ê, beh chiáng-koán thiⁿ-ē.

40第四國beh堅定親像鐵；鐵能phah破萬物hō͘伊降服；koh親像鐵teh碎一切，伊也beh phah破列國teh碎in。Tē-sì kok beh kian-tēng chhin-chhiūⁿ thih; thih ōe phah-phòa bān-mi̍h hō͘ i hâng-ho̍k; koh chhin-chhiūⁿ thih teh-chhùi it-chhè, i iā beh phah-phòa lia̍t-kok teh-chhùi in.

41你也看見伊ê腳盤kap腳指頭á一半是燒磁ê土一半是鐵，hit-ê國也beh分開；總是你看見鐵kap爛土相參，chit-ê國也beh有鐵ê力。Lí iā khòaⁿ-kìⁿ i ê kha-pôaⁿ kap kha-chńg-thâu-á chi̍t-pòaⁿ sī sio-hûi ê thô͘ chi̍t-pòaⁿ sī thih, hit ê kok iā beh pun-khui; chóng-sī lí khòaⁿ-kìⁿ thih kap nōa-thô͘ saⁿ-chham, chit ê kok iā beh ū thih ê la̍t.

42Hiah-ê腳指頭á既然一半是鐵一半是土，án-ni hit-ê國beh一半強，一半弱。Hiah ê kha-chńg-thâu-á kì-jiân chi̍t-pòaⁿ sī thih chi̍t-pòaⁿ sī thô͘, án-ni hit ê kok beh chi̍t-pòaⁿ kiông, chi̍t-pòaⁿ jio̍k.

43你既然看見鐵kap爛土相參，in beh kap人ê種族相參；總是二彼bōe相合，親像鐵kap土bōe相參得。Lí kì-jiân khòaⁿ-kìⁿ thih kap nōa-thô͘ saⁿ-chham, in beh kap lâng ê chióng-cho̍k saⁿ-chham; chóng-sī jī-pí bōe saⁿ-ha̍p, chhin-chhiūⁿ thih kap thô͘ bōe saⁿ-chham--tit.

44當hiah-ê列王ê日，天頂ê上帝beh設立一國，永遠bōe廢無，伊ê權柄bōe會歸tī別國；總是伊beh毀壞hiah-ê國來滅伊；家己beh永遠khiā在。Tng hiah ê lia̍t-ông ê ji̍t, thiⁿ-téng ê Siōng-tè beh siat-li̍p chi̍t-kok, éng-oán bōe hòe-bô, i ê koân-pèng bōe-ōe kui tī pa̍t-kok; chóng-sī i beh húi-hoāi hiah ê kok lâi bia̍t i; ka-kī beh éng-oán khiā-chāi.

45你既然看見有石tùi山裡phah出來，m̄是用手phah-ê，來phah破hit-ê鐵、銅、土、銀、金；就是至大ê上帝用將來beh有ê tāi-chì指示王；hit-ê夢是真，hit-ê解明是確實。Lí kì-jiân khòaⁿ-kìⁿ ū chio̍h tùi soaⁿ--nih phah--chhut-lâi, m̄-sī ēng chhiú phah-ê, lâi phah-phòa hit ê thih, tâng, thô͘, gûn, kim; chiū-sī chì-tōa ê Siōng-tè ēng chiong-lâi beh ū ê tāi-chì chí-sī ông; hit ê bāng sī chin, hit ê kóe-bêng sī khak-si̍t.

46當時Nî-pò͘-kah-nî-sat王仆tī地裡，拜但以理；命令用禮物芳料獻hō͘伊。Tng-sî Nî-pò͘-kah-nî-sat ông phak tī tōe--nih, pài Tān-í-lí; bēng-lēng ēng lé-mi̍h phang-liāu hiàn hō͘ i.

47王應但以理對伊講，你已經能顯明chit-ê祕密ê事，lín ê上帝真正是chiah-ê上帝ê上帝，chiah-ê王ê主，koh是顯明hiah-ê祕密ê。Ông ìn Tān-í-lí tùi i kóng, Lí í-keng ōe hián-bêng chit ê pì-bi̍t ê sū, lín ê Siōng-tè chin-chiàⁿ sī chiah ê siōng-tè ê Siōng-tè, chiah ê ông ê Chú, koh sī hián-bêng hiah ê pì-bi̍t-ê.

48Tùi hit-tia̍p，王高升但以理，賞賜伊chōe-chōe上品ê禮物，派伊管理巴比倫全省；koh做總理來掌管巴比倫一切智慧ê人。Tùi hit-tia̍p ông ko-seng Tān-í-lí, siúⁿ-sù i chōe-chōe siōng-phín ê lé-mi̍h, phài i koán-lí Pa-pí-lûn choân-séng; koh chòe chóng-lí lâi chiáng-koán Pa-pí-lûn it-chhè tì-hūi ê lâng.

49但以理求王，王就派Sa-tek-la̍h、Bí-soah、A-pek-nî-ko管理巴比倫省ê事務；獨獨但以理跟隨tī王宮。Tān-í-lí kiû ông, ông chiū phài Sa-tek-la̍h, Bí-soah, A-pek-nî-ko koán-lí Pa-pí-lûn séng ê sū-bū; to̍k-to̍k Tān-í-lí kun-sûi tī ông-kiong.

1Nî-pò͘-kah-nî-sat王造金像，高六十肘，闊六肘；chhāi tī巴比倫省，Tō͘-la̍h ê平洋。Nî-pò͘-kah-nî-sat ông chō kim-siōng, koâiⁿ la̍k-cha̍p tiú, khoah la̍k tiú; chhāi tī Pa-pí-lûn séng, Tō͘-la̍h ê pîⁿ-iûⁿ.

2Nî-pò͘-kah-nî-sat王召集chiah-ê總督、欽差、巡撫、按察司、布政司、謀士、法官，kap各省ê官員來赴Nî-pò͘-kah-nî-sat王所立ê像，行點眼ê禮。Nî-pò͘-kah-nî-sat ông tiàu-chi̍p chiah ê chóng-tok, khim-chhe, sûn-bú, àn-chhat-si, pò͘-chèng-si, bô͘-sū, hoat-koaⁿ, kap kok-séng ê koaⁿ-oân lâi hù Nî-pò͘-kah-nî-sat ông só͘ li̍p ê siōng, kiâⁿ tiám-gán ê lé.

3Tùi án-ni，hiah-ê總督、欽差、巡撫、按察司、布政司、謀士、法官，kap各省ê官員lóng聚集，為tio̍h Nî-pò͘-kah-nî-sat所立ê像，行點眼ê禮；就khiā tī Nî-pò͘-kah-nî-sat所立ê像ê頭前。Tùi án-ni hiah ê chóng-tok, khim-chhe, sûn-bú, àn-chhat-si, pò͘-chèng-si, bô͘-sū, hoat-koaⁿ, kap kok-séng ê koaⁿ-oân lóng chū-chi̍p, ūi-tio̍h Nî-pò͘-kah-nî-sat só͘ li̍p ê siōng, kiâⁿ tiám-gán ê lé; chiū khiā tī Nî-pò͘-kah-nî-sat só͘ li̍p ê siōng ê thâu-chêng.

4Hit時傳命令ê大聲叫講，Lín chiah-ê百姓，chiah-ê國，chiah-ê腔口ê人ah，有命令傳hō͘ lín，Hit-sî thoân bēng-lēng--ê tōa-siaⁿ kiò kóng, Lín chiah ê peh-sìⁿ, chiah ê kok, chiah ê khiuⁿ-kháu ê lâng ah, ū bēng-lēng thoân hō͘ lín,

5lín一下聽見哨角、笛á、琵琶、琴、瑟、笙，kap ta̍k樣樂器ê聲，就tio̍h仆落敬拜Nî-pò͘-kah-nî-sat王所立ê金像；lín chi̍t-ē thiaⁿ-kìⁿ sàu-kak, ta̍t-á, pî-pê, khîm, sek, seng, kap ta̍k-iūⁿ ga̍k-khì ê siaⁿ, chiū tio̍h phak-lo̍h kèng-pài Nî-pò͘-kah-nî-sat ông só͘ li̍p ê kim-siōng;

6見若無仆落敬拜ê beh即時hiat落tī炎熱ê火爐。kìⁿ-nā bô phak-lo̍h kèng-pài-ê beh chek-sî hiat-lo̍h tī iām-jia̍t ê hé-lô͘.

7因為án-ni眾百姓一下聽見哨角、笛á、琵琶、琴、瑟，kap ta̍k樣樂器ê聲，就chiah-ê百姓，chiah-ê國，chiah-ê腔口ê人lóng仆落敬拜Nî-pò͘-kah-nî-sat王所立ê金像。In-ūi án-ni chèng peh-sìⁿ chi̍t-ē thiaⁿ-kìⁿ sàu-kak, ta̍t-á, pî-pê, khîm, sek, kap ta̍k-iūⁿ ga̍k-khì ê siaⁿ, chiū chiah ê peh-sìⁿ, chiah ê kok, chiah ê khiuⁿ-kháu ê lâng lóng phak-lo̍h kèng-pài Nî-pò͘-kah-nî-sat ông só͘ li̍p ê kim-siōng.

8Hit時有kúi-nā ê Ka-le̍k-tí人進前來告猶大人。Hit-sî ū kúi-nā ê Ka-le̍k-tí lâng chìn-chêng lâi kò Iû-tāi lâng.

9In對Nî-pò͘-kah-nî-sat王講，願王萬歲。In tùi Nî-pò͘-kah-nî-sat ông kóng, Goān ông bān-sòe.

10王ah，你bat出令講見若人聽見哨角、笛á、琵琶、琴、瑟、笙，kap ta̍k樣樂器ê聲，lóng tio̍h仆落敬拜金像；Ông ah, lí bat chhut-lēng kóng kìⁿ-nā lâng thiaⁿ-kìⁿ sàu-kak, ta̍t-á, pî-pê, khîm, sek, seng, kap ta̍k-iūⁿ ga̍k-khì ê siaⁿ, lóng tio̍h phak-lo̍h kèng-pài kim-siōng;

11見若無仆落敬拜ê beh hiat落tī炎熱ê火爐。kìⁿ-nā bô phak-lo̍h kèng-pài-ê beh hiat-lo̍h tī iām-jia̍t ê hé-lô͘.

12Taⁿ有kúi-nā ê猶大人，就是你所派管理巴比倫省ê事務ê，Sa-tek-la̍h、Bí-soah、A-pek-nî-ko；王ah，chiah-ê人無要緊你ê話，m̄服事你chiah-ê上帝，也m̄敬拜你所立ê金像。Taⁿ ū kúi-nā ê Iû-tāi lâng, chiū-sī lí só͘ phài koán-lí Pa-pí-lûn séng ê sū-bū ê, Sa-tek-la̍h, Bí-soah, A-pek-nî-ko; ông ah, chiah ê lâng bô iàu-kín lí ê ōe, m̄ ho̍k-sāi lí chiah ê siōng-tè, iā m̄ kèng-pài lí só͘ li̍p ê kim-siōng.

13Hit時Nî-pò͘-kah-nî-sat大受氣到極，命令將Sa-tek-la̍h、Bí-soah、A-pek-nî-ko帶來。In就將chiah-ê人帶到王ê面前。Hit-sî Nî-pò͘-kah-nî-sat tōa siū-khì kàu-ke̍k, bēng-lēng chiong Sa-tek-la̍h, Bí-soah, A-pek-nî-ko tòa--lâi. In chiū chiong chiah ê lâng tòa kàu ông ê bīn-chêng.

14Nî-pò͘-kah-nî-sat問in講，Sa-tek-la̍h、Bí-soah、A-pek-nî-ko，lín無服事我chiah-ê上帝，也無敬拜我所立ê金像是tiâu故意mah？Nî-pò͘-kah-nî-sat mn̄g in kóng, Sa-tek-la̍h, Bí-soah, A-pek-nî-ko, lín bô ho̍k-sāi góa chiah ê siōng-tè, iā bô kèng-pài góa só͘ li̍p ê kim-siōng sī tiâu-kò͘-ì mah?

15Taⁿ lín koh聽見哨角、笛á、琵琶、琴、瑟、笙，kap ta̍k樣樂器ê聲，若便便仆落敬拜我所造ê像就好；總是lín若m̄敬拜，beh即時hiat lín落炎熱ê火爐；有甚麼上帝beh救lín脫離我ê手ah？Taⁿ lín koh thiaⁿ-kìⁿ sàu-kak, ta̍t-á, pî-pê, khîm, sek, seng, kap ta̍k-iūⁿ ga̍k-khì ê siaⁿ, nā piān-piān phak-lo̍h kèng-pài góa só͘ chō ê siōng chiū hó; chóng-sī lín nā m̄ kèng-pài, beh chek-sî hiat lín lo̍h iām-jia̍t ê hé-lô͘; ū sím-mi̍h siōng-tè beh kiù lín thoat-lī góa ê chhiú ah?

16Sa-tek-la̍h、Bí-soah、A-pek-nî-ko應王講，Nî-pò͘-kah-nî-sat ah，chit-ê事阮m̄免應你。Sa-tek-la̍h, Bí-soah, A-pek-nî-ko ìn ông kóng, Nî-pò͘-kah-nî-sat ah, chit ê sū goán m̄-bián ìn lí.

17果然án-ni，阮所服事ê上帝能救阮出炎熱ê火爐；王ah，祂也beh救阮脫離你ê手。Kó-jiân án-ni, goán só͘ ho̍k-sāi ê Siōng-tè ōe kiù goán chhut iām-jia̍t ê hé-lô͘; ông ah, I iā beh kiù goán thoat-lī lí ê chhiú.

18若無án-ni，王ah，你tio̍h知阮決斷無beh服事你chiah-ê上帝，也無beh敬拜你所立ê金像。Nā bô án-ni, ông ah, lí tio̍h chai goán koat-toàn bô beh ho̍k-sāi lí chiah ê siōng-tè, iā bô beh kèng-pài lí só͘ li̍p ê kim-siōng.

19Hit時，Nî-pò͘-kah-nî-sat滿心受氣，對Sa-tek-la̍h、Bí-soah、A-pek-nî-ko變面，命令人起火爐比平常七倍khah熱。Hit-sî, Nî-pò͘-kah-nî-sat móa-sim siū-khì, tùi Sa-tek-la̍h, Bí-soah, A-pek-nî-ko pìⁿ-bīn, bēng-lēng lâng khí hé-lô͘ pí pêng-siông chhit-pē khah jia̍t.

20也命令軍隊中勇猛ê kúi-nā人縛Sa-tek-la̍h、Bí-soah、A-pek-nî-ko，hiat tī炎熱ê火爐。Iā bēng-lēng kun-tūi-tiong ióng-béng-ê kúi-nā lâng pa̍k Sa-tek-la̍h, Bí-soah, A-pek-nî-ko, hiat tī iām-jia̍t ê hé-lô͘.

21In hiah-ê人受縛，猶原穿褲、袍，kap內衫，kap其餘ê衫，hiat tī炎熱ê火爐。In hiah ê lâng siū pa̍k, iû-goân chhēng khò͘, phàu, kap lāi-saⁿ, kap kî-û ê saⁿ, hiat tī iām-jia̍t ê hé-lô͘.

22因為王ê命令真緊急，火爐koh真熱，hiah-ê掠Sa-tek-la̍h、Bí-soah、A-pek-nî-ko ê人lóng hō͘火舌燒死。In-ūi ông ê bēng-lēng chin kín-kip, hé-lô͘ koh chin jia̍t, hiah ê lia̍h Sa-tek-la̍h, Bí-soah, A-pek-nî-ko ê lâng lóng hō͘ hé-chi̍h sio-sí.

23Sa-tek-la̍h、Bí-soah、A-pek-nî-ko，hit三個人lóng受縛，墜落tī炎熱ê火爐。Sa-tek-la̍h, Bí-soah, A-pek-nî-ko, hí(**hit) saⁿ ê lâng lóng siū-pa̍k, tūi-lo̍h tī iām-jia̍t ê hé-lô͘.

24Hit時Nî-pò͘-kah-nî-sat王gông-ngia̍h，緊緊起來，對伊ê謀士講，咱kiám m̄是縛三人，hiat tī火裡mah？In應王講，王ah，是ah。Hit-sî Nî-pò͘-kah-nî-sat ông gông-ngia̍h, kín-kín khí-lâi, tùi i ê bô͘-sū kóng, Lán kiám-m̄-sī pa̍k saⁿ-lâng, hiat tī hé--nih mah? In ìn ông kóng, Ông ah, sī ah.

25王講，看ah，我看見有四個人，並無受縛，行tī火中，也無受傷；hit-ê第四個ê容貌是親像上帝ê kiáⁿ。Ông kóng, Khòaⁿ ah, góa khòaⁿ-kìⁿ ū sì ê lâng, pēng bô siū-pa̍k, kiâⁿ tī hé-tiong, iā bô siū-siong; hit ê tē-sì-ê ê iông-māu sī chhin-chhiūⁿ siōng-tè ê kiáⁿ.

26Tùi hit-tia̍p，Nî-pò͘-kah-nî-sat行近炎熱ê火爐口；叫講，至koânê上帝ê奴僕，Sa-tek-la̍h、Bí-soah、A-pek-nî-ko，出來，來到chia。Sa-tek-la̍h、Bí-soah、A-pek-nî-ko就tùi火中出來。Tùi hit-tia̍p Nî-pò͘-kah-nî-sat kiâⁿ kūn iām-jia̍t ê hé-lô͘-kháu; kiò kóng, Chì-koâiⁿ ê Siōng-tè ê lô͘-po̍k, Sa-tek-la̍h, Bí-soah, A-pek-nî-ko, chhut-lâi, lâi kàu chia. Sa-tek-la̍h, Bí-soah, A-pek-nî-ko chiū tùi hé-tiong chhut-lâi.

27Hiah-ê總督、欽差、巡撫，kap王ê謀士相kap聚集，看見hit三人，火無力thang害in ê身軀，in ê頭毛也無燒tio̍h，衫褲無變換，in也lóng無臭火味。Hiah ê chóng-tok, khim-chhe, sûn-bú, kap ông ê bô͘-sū saⁿ-kap chū-chi̍p, khòaⁿ-kìⁿ hit saⁿ-lâng, hé bô la̍t thang hāi in ê seng-khu, in ê thâu-mn̂g iā bô sio--tio̍h, saⁿ-khò͘ bô piàn-ōaⁿ, in iā lóng bô chhàu-hé-bī.

28Nî-pò͘-kah-nî-sat講，Sa-tek-la̍h、Bí-soah、A-pek-nî-ko ê上帝是應該o-ló ê，因為祂差祂ê使者拯救hiah-ê óa靠伊ê奴僕，in反對王ê命令，放sak家己ê身軀，tī in家己ê上帝以外m̄肯服事敬拜別ê上帝。Nî-pò͘-kah-nî-sat kóng, Sa-tek-la̍h, Bí-soah, A-pek-nî-ko ê Siōng-tè sī eng-kai o-ló ê, in-ūi I chhe I ê sù-chiá chín-kiù hiah ê óa-khò I ê lô͘-po̍k, in hoán-tùi ông ê bēng-lēng, pàng-sak ka-kī ê seng-khu, tī in ka-kī ê Siōng-tè í-gōa m̄-khéng ho̍k-sāi kèng-pài pa̍t ê siōng-tè.

29所以我出令，chiah-ê百姓，chiah-ê國，chiah-ê腔口ê人，見若用話褻瀆Sa-tek-la̍h、Bí-soah、A-pek-nî-ko ê上帝，beh將in ê肉割碎碎，in ê厝beh做糞埽堆；因為無別ê上帝能救人親像án-ni。Só͘-í góa chhut-lēng, chiah ê peh-sìⁿ, chiah ê kok, chiah ê khiuⁿ-kháu ê lâng, kìⁿ-nā ēng ōe siat-to̍k Sa-tek-la̍h, Bí-soah, A-pek-nî-ko ê Siōng-tè, beh chiong in ê bah koah chhùi-chhùi, in ê chhù beh chòe pùn-sò-tui; in-ūi bô pa̍t ê siōng-tè ōe kiù lâng chhin-chhiūⁿ án-ni.

30Hit時王tī巴比倫省高升Sa-tek-la̍h、Bí-soah、A-pek-nî-ko。Hit-sî ông tī Pa-pí-lûn séng ko-seng Sa-tek-la̍h, Bí-soah, A-pek-nî-ko.

1Nî-pò͘-kah-nî-sat王頒詔hō͘天下chiah-ê百姓，chiah-ê國，chiah-ê腔口ê人講：願lín大享受平安。Nî-pò͘-kah-nî-sat ông pan-chiàu hō͘ thiⁿ-ē chiah ê peh-sìⁿ, chiah ê kok, chiah ê khiuⁿ-kháu ê lâng kóng: Goān lín tōa hióng-siū pêng-an.

2至koânê上帝所行tī我ê神跡奇事，我歡喜宣佈。Chì-koâiⁿ ê Siōng-tè só͘ kiâⁿ tī góa ê sîn-jiah kî-sū, góa hoaⁿ-hí soan-pò͘.

3大ah，伊ê神跡！豐盛ah，伊ê奇事！伊ê國是永遠ê國，伊ê權柄到代代。Tōa ah, I ê sîn-jiah! hong-sēng ah, I ê kî-sū! I ê kok sī éng-oán ê kok, I ê koân-pèng kàu tāi-tāi.

4我Nî-pò͘-kah-nî-sat tī我ê厝，安然khiā起tī我ê王宮宴樂。Góa Nî-pò͘-kah-nî-sat tī góa ê chhù, an-jiân khiā-khí tī góa ê ông-kiong iàn-lo̍k.

5我夢見一個夢hō͘我驚惶；我tī眠床裡ê思想kap心內ê異象hō͘我擘腹。Góa bāng-kìⁿ chi̍t ê bāng hō͘ góa kiaⁿ-hiâⁿ; góa tī bîn-chhn̂g--nih ê su-sióng kap sim-lāi ê īⁿ-siōng hō͘ góa peh-pak.

6所以我出令召巴比倫一切智慧ê人到我ê面前，kah in解明hit-ê夢hō͘我知。Só͘-í góa chhut-lēng tiàu Pa-pí-lûn it-chhè tì-hūi ê lâng kàu góa ê bīn-chêng, kah in kóe-bêng hit ê bāng hō͘ góa chai.

7Tùi án-ni，hiah-ê博士、術士、Ka-le̍k-tí人，占卜ê lóng入來；我將hit-ê夢當面kā in講；總是in無解明hō͘我知。Tùi án-ni hiah ê phok-sū, su̍t-sū, Ka-le̍k-tí lâng, chiam-pok-ê lóng ji̍p--lâi; góa chiong hit ê bāng tng-bīn kā in kóng; chóng-sī in bô kóe-bêng hō͘ góa chai.

8路尾有但以理，照我ê上帝ê名稱做Pek-thê-sa-sat ê，到我ê面前，伊ê心內有chiah-ê聖ê上帝ê神；Lō͘-bé ū Tān-í-lí, chiàu góa ê siōng-tè ê miâ chheng-chòe Pek-thê-sa-sat ê, kàu góa ê bīn-chêng, i ê sim-lāi ū chiah ê sèng ê siōng-tè ê sîn;

9我用夢kā伊講，博士長，Pek-thê-sa-sat ah，因為我知你ê心內有chiah-ê聖ê上帝ê神，無一項祕密ê事hō͘你為難，taⁿ tio̍h將我夢中所看見ê異象kap伊ê解明來kā我講。góa ēng bāng kā i kóng, Phok-sū-tiúⁿ, Pek-thê-sa-sat ah, in-ūi góa chai lí ê sim-lāi ū chiah ê sèng ê siōng-tè ê sîn, bô chi̍t-hāng pì-bi̍t ê sū hō͘ lí ûi-lân, taⁿ tio̍h chiong góa bāng-tiong só͘ khòaⁿ-kìⁿ ê īⁿ-siōng kap i ê kóe-bêng lâi kā góa kóng.

10我tī床裡心內ê異象是chiah-ê；我teh看，看見地ê中間有一叢樹極其高。Góa tī chhn̂g--nih sim-lāi ê īⁿ-siōng sī chiah-ê; góa teh khòaⁿ, khòaⁿ-kìⁿ tōe ê tiong-kan ū chi̍t châng chhiū ke̍k-kî koâiⁿ.

11Hit叢樹漸漸大koh堅固，高到抵天，地ê極頭也能看見。Hit châng chhiū chiām-chiām tōa koh kian-kò͘, koâiⁿ kàu tú-thiⁿ, tōe ê ke̍k-thâu iā ōe khòaⁿ-kìⁿ.

12伊ê葉茂盛，果子真chōe，hit內面有眾生ê食物；田野ê走獸tòa tī伊ê蔭影，空中ê飛鳥歇tī伊ê枝，見有血氣ê tùi伊得tio̍h食。I ê hio̍h bō͘-sēng, ké-chí chin-chōe, hit lāi-bīn ū chiòng-seng ê chia̍h-mi̍h; chhân-iá ê cháu-siù tòa tī i ê ìm-ńg, khong-tiong ê pe-chiáu hioh tī i ê ki, kìⁿ-ū hiat-khì--ê tùi i tit-tio̍h chia̍h.

13我tī眠床，tī我心內ê異象，看見有一個守望，koh是聖ê，tùi天落來。Góa tī bîn-chhn̂g, tī góa sim-lāi ê īⁿ-siōng, khòaⁿ-kìⁿ ū chi̍t ê siú-bāng, koh sī sèng--ê, tùi thiⁿ lo̍h--lâi.

14大聲叫講，剉hit叢樹，砍(khám)伊ê枝，搖落伊ê葉，phah散伊ê果子，hō͘走獸離開伊ê下面，hō͘飛鳥離開伊ê枝。Tōa-siaⁿ kiò kóng, Chhò hit châng chhiū, khám i ê ki, iô-lak i ê hio̍h, phah-sòaⁿ i ê ké-chí, hō͘ cháu-siù lī-khui i ê ē-bīn, hō͘ pe-chiáu lī-khui i ê ki.

15總是tio̍h留伊ê根頭tī地裡，用鐵kap銅ê環縛伊，tī田裡新發ê草中；用天ê露水濕tâm伊，也hō͘伊kap走獸有份tī地上ê草場；Chóng-sī tio̍h lâu i ê kun-thâu tī tōe--nih, ēng thih kap tâng ê khoân pa̍k i, tī chhân--nih sin-hoat ê chháu-tiong; ēng thiⁿ ê lō͘-chúi sip-tâm i, iā hō͘ i kap cháu-siù ū-hūn tī tōe-chiūⁿ ê chháu-tiûⁿ;

16Hō͘伊ê心變做m̄是人ê心，也用獸ê心hō͘伊，hō͘伊歷過七個時期。hō͘ i ê sim piàn-chòe m̄-sī lâng ê sim, iā ēng siù ê sim hō͘ i, hō͘ i le̍k-kè chhit ê sî-kî.

17這是chiah-ê守望ê所定tio̍h ê命，chiah-ê聖ê所出ê令；hō͘眾生知，至koânê掌管人ê國，也照家己ê意思用國賞賜人，也用至微細ê人設立做主。Che sī chiah ê siú-bāng-ê só͘ tiāⁿ-tio̍h ê bēng, chiah ê sèng-ê só͘ chhut ê lēng; hō͘ chiòng-seng chai, Chì-koâiⁿ-ê chiáng-koán lâng ê kok, iā chiàu ka-kī ê ì-sù ēng kok siúⁿ-sù lâng, iā ēng chì-bî-sòe ê lâng siat-li̍p chòe chú.

18這是我Nî-pò͘-kah-nî-sat王所看見ê夢；Pek-thê-sa-sat ah，你tio̍h解明伊，因為我國內一切智慧ê人lóng bōe能解明hō͘我知；只有你能，因為lín心內有hiah-ê聖ê上帝ê神。Che sī góa Nî-pò͘-kah-nî-sat ông só͘ khòaⁿ-kìⁿ ê bāng; Pek-thê-sa-sat ah, lí tio̍h kóe-bêng i, in-ūi góa kok-lāi it-chhè tì-hūi ê lâng lóng bōe-ōe kóe-bêng hō͘ góa chai; chí-ū lí ōe, in-ūi lín sim-lāi ū hiah ê sèng ê siōng-tè ê sîn.

19Hit時稱做Pek-thê-sa-sat ê但以理gông-ngia̍h有hiah久，心內擘腹。王對伊講，Pek-thê-sa-sat ah，m̄免為tio̍h hit-ê夢kap伊ê解明來擘腹。Pek-thê-sa-sat就應講，願hit-ê夢歸tī怨恨你ê，hit-ê解明歸tī你ê對敵。Hit-sî chheng-chòe Pek-thê-sa-sat ê Tān-í-lí gông-ngia̍h ū hiah-kú, sim-lāi peh-pak. Ông tùi i kóng, Pek-thê-sa-sat ah, m̄-bián ūi-tio̍h hit ê bāng kap i ê kóe-bêng lâi peh-pak. Pek-thê-sa-sat chiū ìn kóng, Goān hit ê bāng kui tī oàn-hūn lí ê, hit ê kóe-bêng kui tī lí ê tùi-te̍k.

20你所看見ê樹，漸漸大koh堅固，高到抵天，地ê極頭也能看見；Lí só͘ khòaⁿ-kìⁿ ê chhiū, chiām-chiām tōa koh kian-kò͘, koâiⁿ kàu tú-thiⁿ, tōe ê ke̍k-thâu iā ōe khòaⁿ-kìⁿ;

21伊ê葉茂盛，伊ê果子真chōe，hit內面有眾生ê食物，田野ê走獸tòa tī伊ê下面，空中ê飛鳥歇tī伊ê枝；i ê hio̍h bō͘-sēng, i ê ké-chí chin-chōe, hit lāi-bīn ū chiòng-seng ê chia̍h-mi̍h, chhân-iá ê cháu-siù tòa tī i ê ē-bīn, khong-tiong ê pe-chiáu hioh tī i ê ki;

22王ah，chit叢樹就是你，你漸漸大koh堅固；你ê強大漸漸進步到抵天，你ê權柄到tī地極。ông ah, chit châng chhiū chiū-sī lí, lí chiām-chiām tōa koh kian-kò͘; lí ê kiông-tōa chiām-chiām chìn-pō͘ kàu tú-thiⁿ, lí ê koân-pèng kàu tī tōe-ke̍k.

23王既然看見有一個守望koh是聖ê，tùi天落來，講，Tio̍h剉hit叢樹來毀壞伊；總是tio̍h留伊ê根頭tī地裡，用鐵kap銅ê環縛伊tī田裡新發ê草中；用天ê露水濕tâm伊，也hō͘伊kap走獸有份，歷過七個時期；Ông kì-jiân khòaⁿ-kìⁿ ū chi̍t ê siú-bāng koh sī sèng--ê, tùi thiⁿ lo̍h-lâi, kóng, Tio̍h chhò hit châng chhiū lâi húi-hoāi i; chóng-sī tio̍h lâu i ê kun-thâu tī tōe--nih, ēng thih kap tâng ê khoân pa̍k i tī chhân--nih sin-hoat ê chháu-tiong; ēng thiⁿ ê lō͘-chúi sip-tâm i, iā hō͘ i kap cháu-siù ū hūn, le̍k-kè chhit ê sî-kî;

24王ah，hit-ê解明是án-ni，koh至koânê ê命令beh到我ê王，我ê主，也是án-ni；ông ah, hit ê kóe-bêng sī án-ni, koh Chì-koâiⁿ-ê ê bēng-lēng beh kàu góa ê ông, góa ê chú, iā sī án-ni;

25你beh受趕出離開人，kap田野ê走獸相kap khiā起，也beh hō͘你食草親像牛，hō͘天ê露水濕tâm，也beh歷過七個時期，到你知至koânê掌管人ê國，也照家己ê意思用國賞賜人。lí beh siū kóaⁿ-chhut lī-khui lâng, kap chhân-iá ê cháu-siù saⁿ-kap khiā-khí, iā beh hō͘ lí chia̍h-chháu chhin-chhiūⁿ gû, hō͘ thiⁿ ê lō͘-chúi sip-tâm, iā beh le̍k-kè chhit ê sî-kî, kàu lí chai Chì-koâiⁿ-ê chiáng-koán lâng ê kok, iā chiàu ka-kī ê ì-sù ēng kok siúⁿ-sù lâng.

26In既然吩咐樹ê根頭tio̍h留teh；到你知chiah-ê天teh掌權ê時，就你ê國必定koh歸tī你。In kì-jiân hoan-hù chhiū ê kun-thâu tio̍h lâu--teh; kàu lí chai chiah ê thiⁿ teh chiáng-koân ê sî, chiū lí ê kok pit-tiāⁿ koh kui tī lí.

27王ah，taⁿ求你歡喜接納我ê苦勸，用行公義來斷絕你ê罪過，用憐憫sòng-hiong人來除去你ê過失；kiám-chhái你ê平安能久長。Ông ah, taⁿ kiû lí hoaⁿ-hí chiap-la̍p góa ê khó͘-khǹg, ēng kiâⁿ kong-gī lâi toān-choa̍t lí ê chōe-kòa, ēng lîn-bín sòng-hiong lâng lâi tû--khì lí ê kè-sit; kiám-chhái lí ê pêng-an ōe kú-tn̂g.

28Chiah-ê事lóng應驗tī Nî-pò͘-kah-nî-sat王。Chiah ê sū lóng èng-giām tī Nî-pò͘-kah-nî-sat ông.

29到十二月滿，伊行遊tī巴比倫ê王宮。Kàu cha̍p-jī ge̍h móa, i kiâⁿ-iû tī Pa-pí-lûn ê ông-kiong.

30王講，這kiám m̄是大ê巴比倫，我用我大力ê權，也為tio̍h我ê威嚴ê榮光來起ê，做本國ê宮殿mah？Ông kóng, Che kiám-m̄-sī tōa ê Pa-pí-lûn, góa ēng góa tōa-la̍t ê koân, iā ūi-tio̍h góa ê ui-giâm ê êng-kng lâi khí-ê, chòe pún-kok ê kiong-tiān mah?

31Chit-ê話iáu-kú tī王ê嘴ê時，有聲tùi天落來，講，Nî-pò͘-kah-nî-sat王ah，有話kā你講，國位已經離開你lah。Chit ê ōe iáu-kú tī ông ê chhùi ê sî, ū siaⁿ tùi thiⁿ lo̍h--lâi, kóng, Nî-pò͘-kah-nî-sat ông ah, ū ōe kā lí kóng, kok-ūi í-keng lī-khui lí lah.

32你beh受趕出離開人，kap田野ê走獸相kap khiā起，也beh hō͘你食草親像牛，也beh歷過七個時期，到你知至koânê掌管人ê國，也照家己ê意思用國賞賜人。Lí beh siū kóaⁿ-chhut lī-khui lâng, kap chhân-iá ê cháu-siù saⁿ-kap khiā-khí, iā beh hō͘ lí chia̍h-chháu chhin-chhiūⁿ gû, iā beh le̍k-kè chhit ê sî-kî, kàu lí chai Chì-koâiⁿ-ê chiáng-koán lâng ê kok, iā chiàu ka-kī ê ì-sù ēng kok siúⁿ-sù lâng.

33就hit時tāi-chì應驗tī Nî-pò͘-kah-nî-sat；伊受趕出離開人，食草親像牛，身軀hō͘天ê露水濕tâm，到伊ê毛發親像鷹鳥ê毛，伊ê指甲長親像鳥ê爪。Chiū hit-sî tāi-chì èng-giām tī Nî-pò͘-kah-nî-sat; i siū kóaⁿ-chhut lī-khui lâng, chia̍h-chháu chhin-chhiūⁿ gû, seng-khu hō͘ thiⁿ ê lō͘-chúi sip-tâm, kàu i ê mn̂g hoat chhin-chhiūⁿ eng-chiáu ê mn̂g, i ê chńg-kah tn̂g chhin-chhiūⁿ chiáu ê jiáu.

34Hiah-ê時日已經滿，我Nî-pò͘-kah-nî-sat kia̍h目ǹg天，我ê靈性就koh復到，我就祝謝至koânê，o-ló尊榮永活ê；因為祂ê權是永遠ê權，祂ê國到代代。Hiah ê sî-ji̍t í-keng móa, góa Nî-pò͘-kah-nî-sat kia̍h-ba̍k ǹg-thiⁿ, góa ê lêng-sèng chiū koh ho̍k-tò, góa chiū chiok-siā Chì-koâiⁿ-ê, o-ló chun-êng Éng-oa̍h-ê; in-ūi I ê koân sī éng-oán ê koân, I ê kok kàu tāi-tāi.

35地上khiā起ê百姓祂看做無；tī天裡ê軍隊kap地上khiā起ê百姓中，祂lóng照家己ê意思行tāi-chì；無人能阻擋祂ê手，á是問祂講，祢做甚麼ah？Tōe-chiūⁿ khiā-khí ê peh-sìⁿ I khòaⁿ-chòe bô; tī thiⁿ--nih ê kun-tūi kap tōe-chiūⁿ khiā-khí ê peh-sìⁿ-tiong, I lóng chiàu ka-kī ê ì-sù kiâⁿ tāi-chì; bô lâng ōe chó͘-tòng I ê chhiú, á-sī mn̄g I kóng, Lí chòe sím-mi̍h ah?

36Hit時我ê靈性koh復到，我ê威嚴榮耀koh歸tī我，做我ê國ê榮光；我ê謀士kap大臣也來朝見我；我ê國位koh堅固，大權柄koh加添tī我。Hit-sî góa ê lêng-sèng koh ho̍k-tò, góa ê ui-giâm êng-iāu koh kui tī góa, chòe góa ê kok ê êng-kng; góa ê bô͘-sū kap tāi-sîn iā lâi tiâu-kìⁿ góa; góa ê kok-ūi koh kian-kò͘, tōa koân-pèng koh ke-thiⁿ tī góa.

37Taⁿ我Nî-pò͘-kah-nî-sat o-ló尊敬稱呼天頂ê王；因為祂所做ê lóng真實，祂所行ê lóng公平；hiah-ê行tī驕傲ê祂會kā in降低。Taⁿ góa Nî-pò͘-kah-nî-sat o-ló chun-kèng chheng-ho͘ thiⁿ-téng ê Ông; in-ūi I só͘-chòe--ê lóng chin-si̍t, I só͘-kiâⁿ--ê lóng kong-pêng; hiah ê kiâⁿ tī kiau-ngō͘--ê I ōe kā in kàng-kē.