1Pek-sa-sat王設大筵席，請伊ê大臣一千人；tī hit一千人ê面前lim酒。Pek-sa-sat ông siat tōa iân-sia̍h, chhiáⁿ i ê tāi-sîn chi̍t-chheng lâng; tī hit chi̍t-chheng lâng ê bīn-chêng lim-chiú.

2Pek-sa-sat起頭lim酒ê時，吩咐人將伊ê老父Nî-pò͘-kah-nî-sat tùi耶路撒冷ê殿內所搶金銀ê器具the̍h來；hō͘王kap伊ê大臣以及伊ê后妃thang用chiah-ê lim酒。Pek-sa-sat khí-thâu lim chiú ê sî, hoan-hù lâng chiong i ê lāu-pē Nî-pò͘-kah-nî-sat tùi Iâ-lō͘-sat-léng ê tiān-lāi só͘ chhiúⁿ kim gûn ê khì-kū the̍h-lâi; hō͘ ông kap i ê tāi-sîn í-ki̍p i ê hō͘-hui thang ēng chiah-ê lim-chiú.

3In就將所搶耶路撒冷上帝ê厝殿內金ê器具the̍h來；王kap大臣kap后妃用伊來lim。In chiū chiong só͘ chhiúⁿ Iâ-lō͘-sat-léng Siōng-tè ê chhù tiān-lāi kim ê khì-kū the̍h-lâi; ông kap tāi-sîn kap hō͘-hui ēng i lâi lim.

4In lim酒，o-ló in金、銀、銅、鐵、柴、石ê上帝。In lim-chiú, o-ló in kim, gûn, tâng, thih, chhâ, chio̍h ê siōng-tè.

5當hit時有人ê手指頭á出現，寫字tī王宮ê粉壁，燈台相對ê所在；王看見寫字ê手。Tng hit-sî ū lâng ê chhiú chńg-thâu-á chhut-hiān, siá-jī tī ông-kiong ê hún-piah, teng-tâi saⁿ-tùi ê só͘-chāi; ông khòaⁿ-kìⁿ siá-jī ê chhiú.

6王ê面就失色，心內擘腹，腰骨lu̍t-lûn，腳頭u相kha̍p。Ông ê bīn chiū sit-sek, sim-lāi peh-pak, io-kut lu̍t-lûn, kha-thâu-u saⁿ-kha̍p.

7王大聲命令召hiah-ê術士，Ka-le̍k-tí人，占卜ê lóng入來。王對巴比倫智慧ê人講，看甚麼人能讀chit-ê文字，解明hō͘我知，beh hō͘伊穿紫色ê袍，頷頸掛金鍊，tī國內職位居第三。Ông tōa-siaⁿ bēng-lēng tiàu hiah ê su̍t-sū, Ka-le̍k-tí lâng, chiam-pok-ê lóng ji̍p-lâi. Ông tùi Pa-pí-lûn tì-hūi ê lâng kóng, Khòaⁿ sím-mi̍h lâng ōe tha̍k chit ê bûn-jī, kóe-bêng hō͘ góa chai, beh hō͘ i chhēng chí-sek ê phàu, ām-kún kòa kim-liān, tī kok-lāi chit-ūi ku tē-saⁿ.

8Tùi hit時，王一切智慧人lóng入來；總是bōe能讀hit-ê文字，也bōe能解明hō͘王知。Tùi hit-sî ông it-chhè tì-hūi lâng lóng ji̍p-lâi; chóng-sī bōe-ōe tha̍k hit ê bûn-jī, iā bōe-ōe kóe-bêng hō͘ ông chai.

9Pek-sa-sat王真擘腹，面失色，伊ê大臣也lóng gông-ngia̍h。Pek-sa-sat ông chin peh-pak, bīn sit-sek, i ê tāi-sîn iā lóng gông-ngia̍h.

10王后因為王kap伊ê大臣所講ê話就入辦筵席ê厝；王后kā伊講，願王萬歲；你ê心莫得擘腹，面莫得失色。Ông-hō͘ in-ūi ông kap i ê tāi-sîn só͘ kóng ê ōe chiū ji̍p pān iân-sia̍h ê chhù; ông-hō͘ kā i kóng, Goān ông bān-sòe; lí ê sim bo̍h-tit peh-pak, bīn bo̍h-tit sit-sek.

11Tī你ê國內有一人伊ê心內有hiah-ê聖ê上帝ê神；你ê老父在生ê日看出伊ê心內有光明、聰明、智慧，親像chiah-ê上帝ê智慧；你ê老父Nî-pò͘-kah-nî-sat王，就是王你ê老父，設立伊做博士、術士，Ka-le̍k-tí人kap占卜ê ê頭人；Tī lí ê kok-lāi ū chi̍t-lâng i ê sim-lāi ū hiah ê sèng ê siōng-tè ê sîn; lí ê lāu-pē chāi-siⁿ ê ji̍t khòaⁿ-chhut i ê sim-lāi ū kng-bêng, chhang-miâ, tì-hūi, chhin-chhiūⁿ chiah ê siōng-tè ê tì-hūi; lí ê lāu-pē Nî-pò͘-kah-nî-sat ông, chiū-sī ông lí ê lāu-pē, siat-li̍p i chòe phok-sū, su̍t-sū, Ka-le̍k-tí lâng kap chiam-pok-ê ê thâu-lâng;

12伊有好性情，有智識聰明，能圓夢，能開拆奧妙，解釋僥疑ê事；chit人名叫但以理，王koh稱伊做Pek-thê-sa-sat。Taⁿ thang叫但以理來，伊beh kā你解明。i ū hó sèng-chêng, ū tì-sek chhang-miâ, ōe oân-bāng, ōe khui-thiah ò-biāu, kái-sek giâu-gî ê sū; chit-lâng miâ kiò Tān-í-lí, ông koh chheng i chòe Pek-thê-sa-sat. Taⁿ thang kiò Tān-í-lí lâi, i beh kā lí kóe-bêng.

13就chhōa但以理到王ê面前。王問但以理講，你是受掠ê猶大人中間ê但以理，就是我ê老父做王ê時tùi猶大掠來ê mah？Chiū chhōa Tān-í-lí kàu ông ê bīn-chêng. Ông mn̄g Tān-í-lí kóng, Lí sī siū-lia̍h ê Iû-tāi lâng tiong-kan ê Tān-í-lí, chiū-sī góa ê lāu-pē chòe ông ê sî tùi Iû-tāi lia̍h-lâi-ê mah?

14我聽見講你ê心內有hiah-ê上帝ê神，koh你有光明，聰明kap好ê智慧。Góa thiaⁿ-kìⁿ kóng lí ê sim-lāi ū hiah ê siōng-tè ê sîn, koh lí ū kng-bêng, chhang-miâ kap hó ê tì-hūi.

15Taⁿ hiah-ê智慧ê人kap術士已經帶來我ê面前，beh hō͘ in讀hiah-ê文字來解明hō͘我知；總是in bōe能解明chit-ê事。Taⁿ hiah ê tì-hūi ê lâng kap su̍t-sū í-keng tòa--lâi góa ê bīn-chêng, beh hō͘ in tha̍k hiah ê bûn-jī lâi kóe-bêng hō͘ góa chai; chóng-sī in bōe-ōe kóe-bêng chit ê sū.

16我bat聽見你ê事，你gâu解明，能解釋僥疑ê事；taⁿ你若能讀chit-ê文字，解明hō͘我知，就beh hō͘你穿紫色ê袍，頷頸掛金鍊，tī國內職位居第三。Góa bat thiaⁿ-kìⁿ lí ê sū, lí gâu kóe-bêng, ōe kái-sek giâu-gî ê sū; taⁿ lí nā ōe tha̍k chit ê bûn-jī, kóe-bêng hō͘ góa chai, chiū beh hō͘ lí chhēng chí-sek ê phàu, ām-kún kòa kim-liān, tī kok-lāi chit-ūi ku tē-saⁿ.

17但以理tī王ê面前應講，你ê贈品thang歸tī你本身，你ê報賞thang歸hō͘別人；總是我beh kā王讀chit-ê文字，解明hō͘王知。Tān-í-lí tī ông ê bīn-chêng ìn kóng, Lí ê chēng-phín thang kui tī lí pún-sin, lí ê pò-siúⁿ thang kui hō͘ pa̍t-lâng; chóng-sī góa beh kā ông tha̍k chit ê bûn-jī, kóe-bêng hō͘ ông chai.

18王ah，至koânê上帝bat將國位、大權、榮耀、威風賞賜你ê老父Nî-pò͘-kah-nî-sat。Ông ah, chì-koâiⁿ ê Siōng-tè bat chiong kok-ūi, tōa-koân, êng-iāu, ui-hong siúⁿ-sù lí ê lāu-pē Nî-pò͘-kah-nî-sat.

19因為上帝所賞賜伊ê大權，chiah-ê百姓，chiah-ê國，chiah-ê腔口ê人lóng驚惶ngia̍uh-ngia̍uh-chhoah tī伊ê面前；伊隨意hō͘人死，隨意hō͘人活；隨意kā人高升，隨意kā人降低。In-ūi Siōng-tè só͘ siúⁿ-sù i ê tōa-koân, chiah ê peh-sìⁿ, chiah ê kok, chiah ê khiuⁿ-kháu ê lâng lóng kiaⁿ-hiâⁿ ngia̍uh-ngia̍uh-chhoah tī i ê bīn-chêng; i sûi-ì hō͘ lâng sí, sûi-ì hō͘ lâng oa̍h; sûi-ì kā lâng ko-seng, sûi-ì kā lâng kàng-kē.

20總是伊ê心自高，伊ê性剛硬，致到行驕傲，就lut伊ê王位，搶奪伊ê榮光；Chóng-sī i ê sim chū-ko, i ê sèng kong-ngī, tì-kàu kiâⁿ kiau-ngō͘, chiū lut i ê ông-ūi, chhiúⁿ-toa̍t i ê êng-kng;

21伊受趕出離開人，伊ê心變成親像走獸ê心，kap野驢相kap khiā起；hō͘伊食草親像牛，身軀hō͘天ê露水濕tâm；到伊知至koânê上帝掌管人ê國，照祂ê意思設立人治理伊。i siū kóaⁿ-chhut lī-khui lâng, i ê sim pìⁿ-chiâⁿ chhin-chhiūⁿ cháu-siù ê sim, kap iá-lû saⁿ-kap khiā-khí; hō͘ i chia̍h-chháu chhin-chhiūⁿ gû, seng-khu hō͘ thiⁿ ê lō͘-chúi sip-tâm; kàu i chai chì-koâiⁿ ê Siōng-tè chiáng-koán lâng ê kok, chiàu I ê ì-sù siat-li̍p lâng tī-lí i.

22Pek-sa-sat ah，你是伊ê kiáⁿ，你雖然知這一切，你ê心無家己謙卑；Pek-sa-sat ah, lí sī i ê kiáⁿ, lí sui-jiân chai che it-chhè, lí ê sim bô ka-kī khiam-pi;

23竟然自高，攻擊天頂ê主；in有帶祂殿內ê器具到你ê面前，也你kap你chiah-ê大臣以及你ê后妃lóng用伊來lim酒；你koh o-ló hiah-ê銀、金、銅、鐵、柴、石所做ê上帝，就是bōe看，bōe聽，bōe知ê，總是管你ê喘氣，定tio̍h你遭遇ê上帝你無榮光祂。kèng-jiân chū-ko, kong-kek thiⁿ-téng ê Chú; in ū tòa I tiān-lāi ê khì-kū kàu lí ê bīn-chêng, iā lí kap lí chiah ê tāi-sîn í-ki̍p lí ê hō͘-hui lóng ēng i lâi lim-chiú; lí koh o-ló hiah ê gûn, kim, tâng, thih, chhâ, chio̍h só͘ chòe ê siōng-tè, chiū-sī bōe khòaⁿ, bōe thiaⁿ, bōe chai ê, chóng-sī koán lí ê chhoán-khùi, tiāⁿ-tio̍h lí cho-gū ê Siōng-tè lí bô êng-kng I.

24Tùi án-ni，tùi祂ê面前差出hit支手寫chit-ê文字。Tùi án-ni, tùi I ê bīn-chêng chhe-chhut hit ki chhiú siá chit ê bûn-jī.

25所寫ê文字就是chit-ê：　　BÍ-NÎ，BÍ-NÎ，THÊ-KHEK-LIA̍T，O͘-HOAT-JÍⁿ-SIⁿ。Só͘ siá ê bûn-jī chiū-sī chit-ê:BÍ-NÎ, BÍ-NÎ, THÊ-KHEK-LIA̍T, O͘-HOAT-JÍⁿ-SIⁿ.

26解明就是án-ni：BÍ-NÎ；就是上帝已經算你ê國運，hō͘伊soah。Kóe-bêng chiū-sī án-ni: BÍ-NÎ; chiū-sī Siōng-tè í-keng sǹg lí ê kok-ūn, hō͘ i soah.

27THÊ-KHEK-LIA̍T；就是你受秤tī天秤，顯明你ê無夠額。THÊ-KHEK-LIA̍T; chiū-sī lí siū chhìn tī thian-pêng, hián-bêng lí ê bô kàu-gia̍h.

28PÍ-LE̍K-SU；就是你ê國分裂(pun-li̍h)，歸hō͘馬大人kap波斯人。PÍ-LE̍K-SU; chiū-sī lí ê kok pun-li̍h, kui hō͘ Má-tāi lâng kap Pho-su lâng.

29Tùi án-ni，Pek-sa-sat出令，人就將紫色袍hō͘但以理穿，用金鍊掛tī伊ê頷頸，koh傳令hō͘伊tī國內職位居第三。Tùi án-ni Pek-sa-sat chhut-lēng, lâng chiū chiong chí-sek phàu hō͘ Tān-í-lí chhēng, ēng kim-liān kòa tī i ê ām-kún, koh thoân-lēng hō͘ i tī kok-lāi chit-ūi ku tē-saⁿ.

30Tī hit暝，Ka-le̍k-tí王Pek-sa-sat hō͘人thâi。Tī hit-mî Ka-le̍k-tí ông Pek-sa-sat hō͘ lâng thâi.

31馬大人Tāi-lī-o͘得tio̍h國位，hit時六十二歲。Má-tāi lâng Tāi-lī-o͘ tit-tio̍h kok-ūi, hit-sî la̍k-cha̍p-jī hè.

1Tāi-lī-o͘照伊ê意思設立一百二十個總督，hō͘ in分管全國，Tāi-lī-o͘ chiàu i ê ì-sù siat-li̍p chi̍t-pah jī-cha̍p ê chóng-tok, hō͘ in hun-koán choân-kok,

2koh tī in ê頂面設立總長三人，其中但以理是一個；hō͘ hiah-ê總督將正事對in稟明，免得王虧損。koh tī in ê téng-bīn siat-li̍p chóng-tiúⁿ saⁿ-lâng, kî-tiong Tān-í-lí sī chi̍t-ê; hō͘ hiah ê chóng-tok chiong chèng-sū tùi in pín-bêng, bián-tit ông khui-sún.

3因為chit-ê但以理有好性情，所以贏過其餘ê總長kap總督；王就想beh設立伊治理thong國。In-ūi chit ê Tān-í-lí ū hó sèng-chêng, só͘-í iâⁿ-kè kî-û ê chóng-tiúⁿ kap chóng-tok; ông chiū siūⁿ beh siat-li̍p i tī-lí thong-kok.

4Tùi án-ni，總長kap總督tī國政中chhē縫beh告但以理；總是chhē無伊ê孔縫kap過失；因為伊盡忠，lóng chhē無伊ê錯誤過失。Tùi án-ni chóng-tiúⁿ kap chóng-tok tī kok-chèng-tiong chhē-phāng beh kò Tān-í-lí; chóng-sī chhē bô i ê khang-phāng kap kè-sit; in-ūi i chīn-tiong, lóng chhē bô i ê chhò-gō͘ kè-sit.

5Hiah-ê人就相kap講，chit-ê但以理，除去伊趁伊ê上帝ê律法以外，咱無thang chhē伊ê空隙來告伊。Hiah ê lâng chiū saⁿ-kap kóng, Chit ê Tān-í-lí, tû--khì i thàn i ê Siōng-tè ê lu̍t-hoat í-gōa, lán bô thang chhē i ê khang-khiah lâi kò i.

6Tùi hit-tia̍p，hiah-ê總長kap總督紛紛聚集來見王，講，願Tāi-lí-o͘王萬歲。Tùi hit-tia̍p hiah ê chóng-tiúⁿ kap chóng-tok hun-hun chū-chi̍p lâi kìⁿ ông, kóng, Goān Tāi-lí-o͘ ông bān-sòe.

7國內總長、欽差、總督、謀士，kap 巡撫 lóng相kap議論ài beh設一條王ê例，來立一條嚴ê禁令，tī三十日內，除起求王以外，見若對不論甚麼上帝á是對人來求ê，tio̍h hiat伊落獅穴。Kok-lāi chóng-tiúⁿ, khim-chhe, chóng-tok, bô͘-sū, kap sûn-bú lóng saⁿ-kap gī-lūn ài beh siat chi̍t tiâu ông ê lē, lâi li̍p chi̍t tiâu giâm ê kìm-lēng, tī saⁿ-cha̍p ji̍t lāi, tû-khí kiû ông í-gōa, kìⁿ-nā tùi put-lūn sím-mi̍h siōng-tè á-sī tùi lâng lâi kiû--ê, tio̍h hiat i lo̍h sai-hia̍t.

8王ah，taⁿ求你設立hit-ê禁令，簽字tī hit-ê詔，hō͘伊bōe改換得，照馬大kap波斯ê例，bōe-thang改得。Ông ah, taⁿ kiû lí siat-li̍p hit ê kìm-lēng, chhiam-jī tī hit ê chiàu, hō͘ i bōe kóe-ōaⁿ--tit, chiàu Má-tāi kap Pho-su ê lē, bōe thang kóe--tit.

9Tùi án-ni，Tāi-lī-o͘王簽字tī hit-ê詔kap禁令。Tùi án-ni Tāi-lī-o͘ ông chhiam-jī tī hit ê chiàu kap kìm-lēng.

10但以理知chit-ê詔已經簽字，就到伊ê厝；(伊房內ê窗開ǹg耶路撒冷) ；一日三pái跪tī伊ê上帝ê面前祈禱感謝，kap平日無各樣。Tān-í-lí chai chit ê chiàu í-keng chhiam-jī, chiū kàu i ê chhù; (i pâng-lāi ê thang khui ǹg Iâ-lō͘-sat-léng); chi̍t-ji̍t saⁿ-pái kūi tī i ê Siōng-tè ê bīn-chêng kî-tó kám-siā, kap pêng-ji̍t bô koh-iūⁿ.

11Chiah-ê人就紛紛聚集，看見但以理tī伊ê上帝ê面前祈禱懇求。Chiah ê lâng chiū hun-hun chū-chi̍p, khòaⁿ-kìⁿ Tān-í-lí tī i ê Siōng-tè ê bīn-chêng kî-tó khún-kiû.

12In就到王ê面前，提起王ê禁令講，王ah，tī三十日內除起求王以外，見若對不論甚麼上帝á是對人來求ê，tio̍h hiat伊落獅穴，你kiám m̄是簽字tī chit-ê詔mah？王應講，chit-ê事實在有，照馬大kap波斯ê例，bōe-thang 改得。In chiū kàu ông ê bīn-chêng, thê-khí ông ê kìm-lēng kóng, Ông ah, tī saⁿ-cha̍p ji̍t lāi tû-khí kiû ông í-gōa, kìⁿ-nā tùi put-lūn sím-mi̍h siōng-tè á-sī tùi lâng lâi kiû--ê, tio̍h hiat i lo̍h sai-hia̍t, lí kiám-m̄-sī chhiam-jī tī chit ê chiàu mah? Ông ìn kóng, Chit ê sū si̍t-chāi ū, chiàu Má-tāi kap Pho-su ê lē, bōe thang kóe--tit.

13In tī王ê面前應講，王ah，tī猶大族受掠ê ê中間，hit-ê但以理無掠你kap你所簽字ê禁令做要緊；伊竟然一日三pái祈禱。In tī ông ê bīn-chêng ìn kóng, Ông ah, tī Iû-tāi cho̍k siū-lia̍h-ê ê tiong-kan hit ê Tān-í-lí bô lia̍h lí kap lí só͘ chhiam-jī ê kìm-lēng chòe iàu-kín; i kèng-jiân chi̍t-ji̍t saⁿ-pái kî-tó.

14王聽見chiah-ê話，盡在煩惱，留心beh救但以理，直直想救伊ê法度到日落。Ông thiaⁿ-kìⁿ chiah ê ōe, chīn-chāi hoân-ló, liû-sim beh kiù Tān-í-lí ti̍t-ti̍t siūⁿ kiù i ê hoat-tō͘ kàu ji̍t-lo̍h.

15Chiah-ê人就紛紛聚集來見王，kā王講，王ah，tio̍h知馬大人kap波斯人有例，見若王所立ê禁令kap律例lóng bōe改換得。Chiah ê lâng chiū hun-hun chū-chi̍p lâi kìⁿ ông, kā ông kóng, Ông ah, tio̍h chai Má-tāi lâng kap Pho-su lâng ū lē, kìⁿ-nā ông só͘ li̍p ê kìm-lēng kap lu̍t-lē lóng bōe kóe-ōaⁿ--tit.

16王就出令，人就帶但以理來，hiat伊tī 獅穴。王對但以理講，你ê上帝，你所常常服事ê，祂beh救你。Ông chiū chhut-lēng, lâng chiū tòa Tān-í-lí lâi, hiat i tī sai-hia̍t. Ông tùi Tān-í-lí kóng, Lí ê Siōng-tè, lí só͘ siông-siông ho̍k-sāi ê, I beh kiù lí.

17人搬石頭來hē tī 穴口；王用家己ê印kap大臣ê印封密伊，hō͘但以理ê tāi-chì lóng bōe改換得。Lâng poaⁿ chio̍h-thâu lâi hē tī hia̍t-kháu; ông ēng ka-kī ê ìn kap tāi-sîn ê ìn hong-ba̍t i, hō͘ Tān-í-lí ê tāi-chì lóng bōe kóe-ōaⁿ--tit.

18王tò去宮內，thong暝禁食；無人作樂tī伊ê面前，伊也bōe睏得。Ông tò--khì kiong-lāi, thong-mî kìm-chia̍h; bô lâng chok-ga̍k tī i ê bīn-chêng, i iā bōe khùn--tit.

19隔早起，王早早起來，緊緊去到獅穴。Keh chá-khí ông chá-chá khí-lâi, kín-kín khì kàu sai-hia̍t.

20將近穴邊，出哀傷ê聲叫但以理；王對但以理講，永活上帝ê奴僕，但以理ah，你ê上帝，你所常常服事ê，能救你脫離hiah-ê獅mah？Chiong-kūn hia̍t-piⁿ, chhut ai-siong ê siaⁿ kiò Tān-í-lí; ông tùi Tān-í-lí kóng, Éng-oa̍h Siōng-tè ê lô͘-po̍k, Tān-í-lí ah, lí ê Siōng-tè, lí só͘ siông-siông ho̍k-sāi-ê, ōe kiù lí thoat-lī hiah ê sai mah?

21但以理對王講，願王萬歲。Tān-í-lí tùi ông kóng, Goān ông bān-sòe.

22我ê上帝差祂ê使者，ni̍h chiah-ê獅ê嘴，hō͘ in無傷害我；因為我tī祂ê面前無罪；王ah，我tī你ê面前也無行刻虧你ê事。Góa ê Siōng-tè chhe I ê sù-chiá, ni̍h chiah ê sai ê chhùi, hō͘ in bô siong-hāi góa; in-ūi góa tī I ê bīn-chêng bô-chōe; ông ah, góa tī lí ê bīn-chêng iā bô kiâⁿ khek-khui lí ê sū.

23王為tio̍h án-ni歡喜到極，命令人取但以理出穴。Tùi án-ni，取但以理出穴；伊ê身軀lóng無受傷，因為伊óa靠伊ê上帝。Ông ūi-tio̍h án-ni hoaⁿ-hí kàu-ke̍k, bēng-lēng lâng chhú Tān-í-lí chhut-hia̍t. Tùi án-ni chhú Tān-í-lí chhut-hia̍t; i ê seng-khu lóng bô siū-siong, in-ūi i óa-khò i ê Siōng-tè.

24王就出令，人就將hiah-ê告但以理ê人，連in ê bó͘-kiáⁿ，lóng帶來，hiat落獅穴；in iáu未到穴底，獅就sah in，咬碎in ê骨頭。Ông chiū chhut-lēng, lâng chiū chiong hiah ê kò Tān-í-lí ê lâng, liân in ê bó͘-kiáⁿ, lóng tòa--lâi, hiat lo̍h sai-hia̍t; in iáu-bē kàu hia̍t-tóe, sai chiū sah in, kā-chhùi in ê kut-thâu.

25Hit時，Tāi-lī-o͘王頒詔hō͘全地hiah-ê百姓hiah-ê國，hiah-ê腔口ê人講：願lín大大享受平安。Hit-sî Tāi-lī-o͘ ông pan-chiàu hō͘ choân-tōe hiah ê peh-sìⁿ hiah ê kok, hiah ê khiuⁿ-kháu ê lâng kóng: Goān lín tōa-tōa hióng-siū pêng-an.

26Taⁿ我出令，吩咐我所管轄thong國百姓tio̍h tī但以理ê上帝ê面前驚惶ngia̍uh-ngia̍uh-chhoah，因為伊是活ê上帝，長長tī-teh，伊ê國永遠無滅，伊ê權柄無窮無盡；Taⁿ góa chhut-lēng, hoan-hù góa só͘ koán-hat thong-kok peh-sìⁿ tio̍h tī Tān-í-lí ê Siōng-tè ê bīn-chêng kiaⁿ-hiâⁿ ngia̍uh-ngia̍uh-chhoah, in-ūi I sī oa̍h ê Siōng-tè, tn̂g-tn̂g tī--teh, I ê kok éng-oán bô bia̍t, I ê koân-pèng bû-kiông bû-chīn;

27祂行拯救，tī天裡tī地裡行神跡奇事；祂有救但以理脫離獅ê嘴。I kiâⁿ chín-kiù, tī thiⁿ--nih tī tōe--nih kiâⁿ sîn-jiah kî-sū; I ū kiù Tān-í-lí thoat-lī sai ê chhùi.

28Án-ni chit-ê但以理當Tāi-lī-o͘坐位ê時，kap波斯人Kó͘-lia̍t坐位ê時，lóng得tio̍h興通。Án-ni chit ê Tān-í-lí tng Tāi-lī-o͘ chē-ūi ê sî kap Pho-su lâng Kó͘-lia̍t chē-ūi ê sî, lóng tit-tio̍h heng-thong.

1當巴比倫王Pek-sa-sat元年，但以理tī床裡有夢見，心內看見異象；伊就寫hit-ê夢，講起其中ê大意。Tng Pa-pí-lûn ông Pek-sa-sat goân--nî, Tān-í-lí tī chhn̂g--nih ū bāng-kìⁿ, sim-lāi khòaⁿ-kìⁿ īⁿ-siōng; i chiū siá hit ê bāng, kóng-khí kî-tiong ê tāi-ì.

2但以理講，我暝時看見異象；看ah，天裡四面ê風忽然起，吹tī大海ê頂面。Tān-í-lí kóng, Góa mî--sî khòaⁿ-kìⁿ īⁿ-siōng; khòaⁿ ah, thiⁿ--nih sì-bīn ê hong hut-jiân khí, chhe tī tōa-hái ê téng-bīn.

3有四隻獸，真大隻，tùi海裡起來，款式各無相同。Ū sì chiah siù, chin tōa-chiah, tùi hái--nih khí--lâi, khoán-sit kok bô saⁿ-tâng.

4頭一隻親像獅，有鷹鳥ê翼；我看見到伊ê翼受拔起來，koh tī地上得tio̍h扶起來hō͘伊兩支腳khiā起來親像人一樣，也hō͘伊有人ê心。Thâu-chi̍t-chiah chhin-chhiūⁿ sai, ū eng-chiáu ê si̍t; góa khòaⁿ-kìⁿ kàu i ê si̍t siū pu̍ih--khí-lâi, koh tī tōe-chiūⁿ tit-tio̍h hû--khí-lâi hō͘ i nn̄g ki kha khiā--khí-lâi chhin-chhiūⁿ lâng chi̍t-iūⁿ, iā hō͘ i ū lâng ê sim.

5看ah，koh一隻獸是第二隻，親像熊，挺起伊身體ê一pêng，伊ê嘴內有三支脇骨，kâm tī嘴齒中；in kā伊講，起來，吞食chōe-chōe肉。Khòaⁿ ah, koh chi̍t chiah siù sī tē-jī-chiah, chhin-chhiūⁿ hîm, théng-khí i sin-thé ê chi̍t-pêng, i ê chhùi-lāi ū saⁿ ki hia̍p-kut, kâm tī chhùi-khí-tiong; in kā i kóng, Khí-lâi, thun-chia̍h chōe-chōe bah.

6後來我koh看，看ah，koh有一隻獸，款式親像豹，ka-chiah有四個翼親像鳥；chit隻獸有四個頭殼，koh有權柄hō͘伊。Āu-lâi góa koh khòaⁿ, khòaⁿ ah, koh ū chi̍t chiah siù, khoán-sit chhin-chhiūⁿ pà, ka-chiah ū sì ê si̍t chhin-chhiūⁿ chiáu; chit chiah siù ū sì ê thâu-khak, koh ū koân-pèng hō͘ i.

7後來我tī暝時ê異象中teh看，看ah，有第四隻ê獸，thang驚thang忍，也是不止強；有大支ê鐵齒，伊吞咬拆碎，所chhun-ê用腳踏伊；kap以前hiah-ê獸各樣；koh發十支角。Āu-lâi góa tī mî--sî ê īⁿ-siōng-tiong teh khòaⁿ, khòaⁿ ah, ū tē-sì-chiah ê siù, thang kiaⁿ thang lún, iā sī put-chí kiông; ū tōa-ki ê thih-khí, i thun-kā thiah-chhùi, só͘-chhun--ê ēng kha ta̍h i; kap í-chêng hiah ê siù koh-iūⁿ; koh hoat cha̍p ki kak.

8我teh看hiah-ê角，看ah，hit中間有另外發一支細支角；從前hiah-ê角ê中間有三支角hâm根拔起來tī細支角ê頭前；看ah，chit支角有目睭親像人ê目睭，koh有嘴teh講大話。Góa teh khòaⁿ hiah ê kak, khòaⁿ ah, hit tiong-kan ū lēng-gōa hoat chi̍t-ki sòe-ki-kak; chiông-chiân hiah ê kak ê tiong-kan ū saⁿ ki kak hâm kun pu̍ih--khí-lâi tī sòe ki kak ê thâu-chêng; khòaⁿ ah, chit ki kak ū ba̍k-chiu chhin-chhiūⁿ lâng ê ba̍k-chiu, koh ū chhùi teh kóng tōa-ōe.

9我koh看到hiah-ê座位排列，有一個tùi古早就有ê坐teh；伊ê衣服白親像雪，伊ê頭毛親像真清氣ê羊毛；伊ê寶座就是火燄，伊ê輪親像火teh to̍h。Góa koh khòaⁿ kàu hiah ê chō-ūi pâi-lia̍t, ū chi̍t-ê tùi kó͘-chá chiū ū-ê chē--teh; i ê i-ho̍k pe̍h chhin-chhiūⁿ seh, i ê thâu-mn̂g chhin-chhiūⁿ chin chheng-khì ê iûⁿ-mn̂g; i ê pó-chō chiū-sī hé-iām, i ê lûn chhin-chhiūⁿ hé teh to̍h.

10有火親像溪發出流tī伊ê面前；服事伊ê有千千，跟隨tī伊ê面前ê有萬萬；審判ê事lóng便，冊lóng掀開。Ū hé chhin-chhiūⁿ khoe hoat-chhut lâu tī i ê bīn-chêng; ho̍k-sāi i-ê ū chheng-chheng, kun-sûi tī i ê bīn-chêng-ê ū bān-bān; sím-phòaⁿ ê sū lóng piān, chheh lóng hian-khui.

11Hit時我因為hit支角所講大話ê聲就看伊；看到hit隻獸受thâi，伊ê身體受毀壞，hiat tī火裡燒。Hit-sî góa in-ūi hit ki kak só͘ kóng tōa-ōe ê siaⁿ chiū khòaⁿ i; khòaⁿ kàu hit chiah siù siū-thâi, i ê sin-thé siū húi-hoāi, hiat tī hé--nih sio.

12論到其餘chiah-ê獸，伊ê權lóng失落，總是in ê性命iáu留teh到tī定tio̍h ê時定tio̍h ê日期。Lūn-kàu kî-û chiah ê siù, i ê koân lóng sit-lo̍h, chóng-sī in ê sìⁿ-miā iáu lâu--teh kàu tī tiāⁿ-tio̍h ê sî tiāⁿ-tio̍h ê ji̍t-kî.

13我tī暝時ê異象中teh看，看ah，有一個親像人ê款坐天頂ê雲來到tī hit-ê tùi古早就有ê，in就chhōa伊到伊ê面前。Góa tī mî--sî ê īⁿ-siōng-tiong teh khòaⁿ, khòaⁿ ah, ū chi̍t-ê chhin-chhiūⁿ lâng ê khoán chē thiⁿ-téng ê hûn lâi kàu tī hit ê tùi kó͘-chá chiū ū-ê, in chiū chhōa i kàu i ê bīn-chêng.

14就賞賜伊有權柄、榮光、國位，hō͘萬百姓、萬國、萬腔口ê人lóng服事伊；伊ê權柄是永遠ê權柄，bōe會無去，伊ê國位的確無廢無。Chiū siúⁿ-sù i ū koân-pèng, êng-kng, kok-ūi, hō͘ bān peh-sìⁿ, bān-kok, bān khiuⁿ-kháu ê lâng lóng ho̍k-sāi i; i ê koân-pèng sī éng-oán ê koân-pèng, bōe-ōe bô--khì, i ê kok-ūi tek-khak bô hòe-bô.

15我但以理心神tī我ê內面憂悶，心內ê異象hō͘我擘腹。Góa Tān-í-lí sim-sîn tī góa ê lāi-bīn iu-būn, sim-lāi ê īⁿ-siōng hō͘ góa peh-pak.

16我就去chhē hiah-ê khiā tī邊á ê一個，問伊chiah-ê事ê實在。伊就對我講，也解明hiah-ê事hō͘我知。Góa chiū khì chhē hiah ê khiā tī piⁿ--á ê chi̍t-ê, mn̄g i chiah ê sū ê si̍t-chāi. I chiū tùi góa kóng, iā kóe-bêng hiah ê sū hō͘ góa chai.

17Hit四隻大獸是四個王，beh tùi地上興起。Hí(**Hit) sì-chiah tōa-siù sī sì ê ông, beh tùi tōe-chiūⁿ heng-khí.

18總是至koânê聖ê百姓beh得tio̍h國位，長長掌理國權，永遠無soah。Chóng-sī Chì-koâiⁿ-ê sèng ê peh-sìⁿ beh tit-tio̍h kok-ūi, tn̂g-tn̂g chiáng-lí kok-koân, éng-oán bô soah.

19Hit時我ài知第四隻獸ê實在，伊kap in hiah-ê獸各樣，不止thang驚，伊ê嘴齒是鐵ê，伊ê爪是銅ê；伊吞咬拆碎，所chhun-ê用腳踏伊；Hit-sî góa ài chai tē-sì-chiah siù ê si̍t-chāi, i kap in hiah ê siù koh-iūⁿ, put-chí thang kiaⁿ, i ê chhùi-khí sī thih-ê, i ê jiáu sī tâng-ê; i thun-kā thiah-chhùi, só͘ chhun-ê ēng kha ta̍h i;

20koh ài知伊頭殼所發十支角ê實在，kap hit支另外發ê角，hō͘三支角lak落tī伊ê頭前，就是有目睭，有嘴講大話ê角，伊ê款式khah強猛伊ê同類。koh ài chai i thâu-khak só͘ hoat cha̍p ki kak ê si̍t-chāi, kap hit-ki lēng-gōa hoat ê kak, hō͘ saⁿ ki kak lak-lo̍h tī i ê thâu-chêng, chiū-sī ū ba̍k-chiu, ū chhùi kóng tōa-ōe ê kak, i ê khoán-sit khah kiông-béng i ê tâng-lūi.

21我看見chit支角kap聖ê百姓交戰，來khah贏in；Góa khòaⁿ-kìⁿ chit ki kak kap sèng ê peh-sìⁿ kau-chiàn, lâi khah-iâⁿ in;

22直到hit-ê tùi古早就有ê來；kā至koânê聖ê百姓判斷，到聖徒得tio̍h國位ê日期到。ti̍t-kàu hit ê tùi kó͘-chá chiū ū-ê lâi; kā Chì-koâiⁿ-ê sèng ê peh-sìⁿ phòaⁿ-toàn, kàu sèng-tô͘ tit-tio̍h kok-ūi ê ji̍t-kî kàu.

23伊án-ni講，第四隻獸beh做地上ê第四國，伊kap lóng總ê國無同；koh beh吞咬全地，beh thún踏伊，拆碎伊。I án-ni kóng, Tē-sì-chiah siù beh chòe tōe-chiūⁿ ê tē sì kok, i kap lóng-chóng ê kok bô tâng; koh beh thun-kā choân-tōe, beh thún-ta̍h i, thiah-chhùi i.

24論到hit十支角，就是tùi hit-ê國內beh興起十個王；後來另外有一個王興起，kap前hiah-ê無同，伊beh hō͘三個王降服伊。Lūn-kàu hí(**hit) cha̍p ki kak, chiū-sī tùi hit ê kok-lāi beh heng-khí cha̍p ê ông; āu-lâi lēng-gōa ū chi̍t ê ông heng-khí, kap chêng hiah-ê bô tâng, i beh hō͘ saⁿ ê ông hâng-ho̍k i.

25伊beh講話忤逆至koânê，也beh苦楚至koânê聖ê百姓；也想beh改換節期、律法；in beh交代伊ê手，歷過一時，koh兩時，koh半時。I beh kóng-ōe ngó͘-ge̍k Chì-koâiⁿ-ê, iā beh khó͘-chhó͘ Chì-koâiⁿ ê sèng ê peh-sìⁿ; iā siūⁿ beh kóe-ōaⁿ choeh-kî, lu̍t-hoat; in beh kau-tài i ê chhiú, le̍k-kè chi̍t-sî, koh nn̄g-sî, koh pòaⁿ-sî.

26審判司beh坐位，in beh搶奪王ê權，毀壞伊，滅無伊到徹底。Sím-phòaⁿ-si beh chē-ūi, in beh chhiúⁿ-toa̍t ông ê koân, húi-hoāi i, bia̍t-bô i kàu thiat-tí.

27普天下ê國位、權柄，kap列國ê威權lóng交hō͘至koânê聖ê百姓；伊ê國是永遠ê國，見若有權ê lóng beh服事順趁伊。Phó͘-thiⁿ-ē ê kok-ūi, koân-pèng, kap lia̍t-kok ê ui-koân lóng kau-hō͘ Chì-koâiⁿ-ê sèng ê peh-sìⁿ; I ê kok sī éng-oán ê kok, kìⁿ-nā ū-koân-ê lóng beh ho̍k-sāi sūn-thàn I.

28Chit-ê tāi-chì到chia結局；我但以理心內想了擘腹，面也變色；總是我用chit-ê事khǹg tī心內。Chit ê tāi-chì kàu-chia kiat-kio̍k; góa Tān-í-lí sim-lāi siūⁿ-liáu peh-pak, bīn iā piàn-sek; chóng-sī góa ēng chit ê sū khǹg tī sim-lāi.