1以色列ah，tio̍h聽；你今á日beh過約旦，入去承接hiah-ê比你khah大，khah猛ê國，得tio̍h闊大koh堅固到抵天ê城；Í-sek-lia̍t ah, tio̍h thiaⁿ; lí kin-á-ji̍t beh kè Iok-tàn, ji̍p-khì sêng-chiap hiah ê pí lí khah-tōa, khah-béng ê kok, tit-tio̍h khoah-tōa koh kian-kò͘ kàu tú-thiⁿ ê siâⁿ;

2Hit-ê百姓，大koh lò，是A-la̍p ê族，lín所知ê，也bat聽見有人指in講：Chī-chūi tī A-la̍p族ê面前khiā能tiâu ah？hit ê peh-sìⁿ, tōa koh lò, sī A-la̍p ê cho̍k, lín só͘ chai ê, iā bat thiaⁿ-kìⁿ ū lâng chí in kóng, Chī-chūi tī A-la̍p cho̍k ê bīn-chêng khiā-ōe-tiâu ah?

3今á日你tio̍h知，耶和華你ê上帝做你ê頭前過去，親像烈烈ê火；伊beh滅無in，hō͘ in大大thâi輸tī lín ê面前；lín tio̍h趕in出，hō͘ in緊緊滅無，照耶和華所對lín講ê。Kin-á-ji̍t lí tio̍h chai, Iâ-hô-hoa lí ê Siōng-tè chòe lí ê thâu-chêng kè-khì, chhin-chhiūⁿ lia̍t-lia̍t ê hé; I beh bia̍t-bô in, hō͘ in tōa-tōa thâi-su tī lín ê bīn-chêng; lín tio̍h kóaⁿ in chhut, hō͘ in kín-kín bia̍t-bô, chiàu Iâ-hô-hoa só͘ tùi lín kóng ê.

4耶和華你ê上帝對你ê面前趕出in了後，你心內m̄-thang想講：耶和華chhōa我入來承接chit-ê地是因為我ê義；其實耶和華是為tio̍h hiah-ê國ê pháiⁿ，chiah對你ê面前趕in出。Iâ-hô-hoa lí ê Siōng-tè tùi lí ê bīn-chêng kóaⁿ-chhut in liáu-āu, lí sim-lāi m̄-thang siūⁿ kóng, Iâ-hô-hoa chhōa góa ji̍p-lâi sêng-chiap chit ê tōe sī in-ūi góa ê gī; kî-si̍t Iâ-hô-hoa sī ūi-tio̍h hiah ê kok ê pháiⁿ, chiah tùi lí ê bīn-chêng kóaⁿ in chhut.

5你入去承接in ê地，並m̄是因為你ê義，也m̄是因為你ê心正直；就是因為chiah-ê國ê pháiⁿ，耶和華你ê上帝chiah對你ê面前趕in出去；koh因為耶和華beh堅固伊對你ê列祖亞伯拉罕、以撒、雅各，所chiù-chōa ê話。Lí ji̍p-khì sêng-chiap in ê tōe, pēng m̄-sī in-ūi lí ê gī, iā m̄-sī in-ūi lí ê sim chèng-ti̍t; chiū-sī in-ūi chiah ê kok ê pháiⁿ, Iâ-hô-hoa lí ê Siōng-tè chiah tùi lí ê bīn-chêng kóaⁿ in chhut-khì; koh in-ūi Iâ-hô-hoa beh kian-kò͘ I tùi lí ê lia̍t-chó͘ A-pek-la̍h-hán, Í-sat, Ngá-kok, só͘ chiù-chōa ê ōe.

6你tio̍h知，耶和華你ê上帝用súi ê地賞賜lín做業，m̄是因為你ê義，因為你是頷頸硬ê百姓。Lí tio̍h chai, Iâ-hô-hoa lí ê Siōng-tè ēng súi ê tōe siúⁿ-sù lín chòe-gia̍p, m̄-sī in-ūi lí ê gī, in-ūi lí sī ām-kún ngī ê peh-sìⁿ.

7你tio̍h記得，m̄-thang bōe記得，你tī曠野惹tio̍h耶和華你ê上帝ê受氣；tùi lín出埃及地hit日，到lín來到chit-ê所在，lín常常悖逆耶和華。Lí tio̍h kì-tit, m̄-thang bōe-kì-tit, lí tī khòng-iá jiá-tio̍h Iâ-hô-hoa lí ê Siōng-tè ê siū-khì; tùi lín chhut Ai-ki̍p tōe hit-ji̍t, kàu lín lâi kàu chit ê só͘-chāi, lín siông-siông pōe-ge̍k Iâ-hô-hoa.

8Lín tī何烈山koh惹耶和華受氣，致到耶和華受氣lín，beh滅無lín。Lín tī Hô-lia̍t soaⁿ koh jiá Iâ-hô-hoa siū-khì, tì-kàu Iâ-hô-hoa siū-khì lín, beh bia̍t-bô lín.

9當時我上山，beh領受石碑，就是耶和華kap lín立約ê碑；hit時我tiàm tī山裡四十日四十暝，無食餅，無lim水。Tng-sî góa chiūⁿ-soaⁿ, beh niá-siū chio̍h-pi, chiū-sī Iâ-hô-hoa kap lín li̍p-iok ê pi; hit-sî góa tiàm tī soaⁿ-ni̍h sì-cha̍p ji̍t sì-cha̍p mî, bô chia̍h-piáⁿ, bô lim-chúi.

10耶和華用兩塊石碑交代我，是上帝用指頭á寫ê；hit頂面所寫ê，是照耶和華tī大會ê日，tī山頂，tī火中，對lín所講一切ê話。Iâ-hô-hoa ēng nn̄g tè chio̍h-pi kau-tài góa, sī Siōng-tè ēng chńg-thâu-á siá ê; hit téng-bīn só͘ siá ê, sī chiàu Iâ-hô-hoa tī tōa-hōe ê ji̍t, tī soaⁿ-téng, tī hé-tiong, tùi lín só͘ kóng it-chhè ê ōe.

11四十日四十暝了後，耶和華用hit兩塊石碑，就是約碑，交代我。Sì-cha̍p ji̍t sì-cha̍p mî liáu-āu, Iâ-hô-hoa ēng hit nn̄g tè chio̍h-pi, chiū-sī iok-pi, kau-tài góa.

12耶和華對我講，你起來，緊緊tùi chia落去；因為你ê百姓，你tùi埃及chhōa出來ê，已經敗壞家己；in快快偏歪我所命令ê路；因為in為家己鑄一sian偶像。Iâ-hô-hoa tùi góa kóng, Lí khí-lâi, kín-kín tùi chia lo̍h-khì; in-ūi lí ê peh-sìⁿ, lí tùi Ai-ki̍p chhōa-chhut-lâi ê, í-keng pāi-hoāi ka-kī; in khoài-khoài phian-oai Góa só͘ bēng-lēng ê lō͘; in-ūi in ūi ka-kī chù chi̍t sian ngó͘-siōng.

13耶和華koh吩咐我講：我看chit-ê百姓，看ah，是頷頸硬ê百姓。Iâ-hô-hoa koh hoan-hù góa kóng, Góa khòaⁿ chit ê peh-sìⁿ, khòaⁿ ah, sī ām-kún ngī ê peh-sìⁿ.

14你chhut-chāi我，我beh滅in，tùi天下擦滅in ê名；我beh hō͘你成做一國比in khah強khah大。Lí chhut-chāi Góa, Góa beh bia̍t in, tùi thiⁿ-ē chhat-bia̍t in ê miâ; Góa beh hō͘ lí chiâⁿ-chòe chi̍t-kok pí in khah-kiông khah-tōa.

15我就oa̍t-tńg身落山，山hō͘火燒to̍h，兩塊約碑tī我兩支手裡；Góa chiū oa̍t-tńg-sin lo̍h-soaⁿ, soaⁿ hō͘ hé sio-to̍h, nn̄g tè iok-pi tī góa nn̄g ki chhiú-ni̍h;

16我一下看，lín已經得罪耶和華lín ê上帝，為家己鑄一隻牛á，緊緊歪chhoa̍h耶和華所命令lín ê路。góa chi̍t-ē khòaⁿ, lín í-keng tek-chōe Iâ-hô-hoa lín ê Siōng-tè, ūi ka-kī chù chi̍t chiah gû-á, kín-kín oai-chhoa̍h Iâ-hô-hoa só͘ bēng-lēng lín ê lō͘.

17我用hit兩塊碑tùi我ê雙手hiat落去，phah折tī lín ê目睭前。Góa ēng hit nn̄g tè pi tùi góa ê siang-chhiú hiat-lo̍h-khì, phah-chi̍h tī lín ê ba̍k-chiu-chêng.

18我仆tī耶和華ê面前，親像前ê款，四十日四十暝，無食餅，無lim水；因為lín所犯一切ê罪，行耶和華看做pháiⁿ ê事，惹伊ê受氣。Góa phak tī Iâ-hô-hoa ê bīn-chêng, chhin-chhiūⁿ chêng ê khoán, sì-cha̍p ji̍t sì-cha̍p mî, bô chia̍h-piáⁿ, bô lim-chúi; in-ūi lín só͘ hoān it-chhè ê chōe, kiâⁿ Iâ-hô-hoa khòaⁿ-chòe pháiⁿ ê sū, jiá I ê siū-khì.

19Hit時耶和華大m̄甘願，受氣lín，我就真驚，因為伊受氣beh滅lín；總是hit-pái耶和華koh聽我。Hit-sî Iâ-hô-hoa tōa m̄ kam-goān, siū-khì lín, góa chiū chin kiaⁿ, in-ūi I siū-khì beh bia̍t lín; chóng-sī hit-pái Iâ-hô-hoa koh thiaⁿ góa.

20耶和華也受氣亞倫，beh滅伊，siâng hit時我也替亞倫祈禱。Iâ-hô-hoa iā siū-khì A-lûn, beh bia̍t i, siâng hit-sî góa iā thòe A-lûn kî-tó.

21Hit時我用lín犯罪ê物，就是lín所鑄ê牛á，用火燒伊，koh搥伊，研到幼幼，幼到親像土粉；我用chit-ê土粉也tī tùi山頂流落來ê溪。Hit-sî góa ēng lín hoān-chōe ê mi̍h, chiū-sī lín só͘ chù ê gû-á, ēng hé sio i, koh tûi i, géng kàu iù-iù, iù kàu chhin-chhiūⁿ thô͘-hún; góa ēng chit ê thô͘-hún iā tī tùi soaⁿ-téng lâu-lo̍h-lâi ê khoe.

22Lín也tī Tha-pī-la̍h，tī Má-sat，tī Ki-phok-lô-hap-tha-óa，koh激起耶和華ê受氣。Lín iā tī Tha-pī-la̍h, tī Má-sat, tī Ki-phok-lô-hap-tha-óa, koh kek-khí Iâ-hô-hoa ê siū-khì.

23耶和華差lín離開Ka-te-su Pa-nî-a講：Lín上去承接我所賞賜lín ê地；hit時lín違背耶和華lín上帝ê命令，m̄信伊，也m̄聽伊ê話。Iâ-hô-hoa chhe lín lī-khui Ka-te-su Pa-nî-a kóng, Lín chiūⁿ-khì sêng-chiap Góa só͘ siúⁿ-sù lín ê tōe; hit-sî lín ûi-pōe Iâ-hô-hoa lín Siōng-tè ê bēng-lēng, m̄-sìn I, iā m̄ thiaⁿ I ê ōe.

24Tùi我bat lín ê日，lín常常悖逆耶和華。Tùi góa bat lín ê ji̍t, lín siông-siông pōe-ge̍k Iâ-hô-hoa.

25我因為耶和華講beh滅lín，就仆tī耶和華ê面前，仆teh四十日四十暝。Góa in-ūi Iâ-hô-hoa kóng beh bia̍t lín, chiū phak tī Iâ-hô-hoa ê bīn-chêng, phak-teh sì-cha̍p ji̍t sì-cha̍p mî.

26我祈禱耶和華講：主耶和華ah，求你莫得滅無你ê百姓，你ê產業，就是你用大氣力贖回ê，用大權能ê手chhōa出埃及ê；Góa kî-tó Iâ-hô-hoa kóng, Chú Iâ-hô-hoa ah, kiû Lí bo̍h-tit bia̍t-bô Lí ê peh-sìⁿ, Lí ê sán-gia̍p, chiū-sī Lí ēng tōa khùi-la̍t sio̍k-hôe ê, ēng tōa koân-lêng ê chhiú chhōa-chhut Ai-ki̍p ê;

27求你tio̍h記得你ê奴僕亞伯拉罕、以撒、雅各；莫得記念chit-ê百姓ê硬心kap in ê pháiⁿ，in ê罪；kiû Lí tio̍h kì-tit Lí ê lô͘-po̍k A-pek-la̍h-hán, Í-sat, Ngá-kok; bo̍h-tit kì-liām chit ê peh-sìⁿ ê ngī-sim kap in ê pháiⁿ, in ê chōe;

28驚了你chhōa阮出來hit所在ê人講：耶和華因為bōe會chhōa in入伊所應允in ê地，koh怨恨in，所以chhōa in出去，beh滅in tī曠野。kiaⁿ-liáu Lí chhōa goán chhut-lâi hit só͘-chāi ê lâng kóng, Iâ-hô-hoa in-ūi bōe-ōe chhōa in ji̍p I só͘ èng-ún in ê tōe, koh oàn-hūn in, só͘-í chhōa in chhut-khì, beh bia̍t in tī khòng-iá.

29M̄-kú in是你ê百姓，你ê產業，是你用你ê大權能，用你伸出來ê手，所chhōa出來ê。M̄-kú in sī Lí ê peh-sìⁿ, Lí ê sán-gia̍p, sī Lí ēng Lí ê tōa koân-lêng, ēng Lí chhun-chhut-lâi ê chhiú, só͘ chhōa-chhut-lâi ê.

1Hit時耶和華kā我講：你tio̍h phah兩塊石碑，親像前ê款，上山來我chia；koh tio̍h做一個柴ê櫃。Hit-sî Iâ-hô-hoa kā góa kóng, Lí tio̍h phah nn̄g tè chio̍h-pi, chhin-chhiūⁿ chêng ê khoán, chiūⁿ-soaⁿ lâi Góa chia; koh tio̍h chòe chi̍t ê chhâ ê kūi.

2你前所phah折hiah-ê碑，hit頂面ê話，我beh寫tī chiah-ê碑ê頂面；你tio̍h hē in tī櫃內。Lí chêng só͘ phah-chi̍h hiah ê pi, hit téng-bīn ê ōe, Góa beh siá tī chiah ê pi ê téng-bīn; lí tio̍h hē in tī kūi-lāi.

3我就用chō-kiap柴做一個櫃，koh phah兩塊石碑親像前ê款；我親手the̍h chit兩塊碑上山。Góa chiū ēng chō-kiap-chhâ chòe chi̍t ê kūi, koh phah nn̄g-tè chio̍h-pi chhin-chhiūⁿ chêng ê khoán; góa chhin-chhiú the̍h chit nn̄g-tè pi chiūⁿ-soaⁿ.

4耶和華將伊tī大會 ê日，tī山頂，tùi火中kā你講ê十誡，照前所寫ê款，寫tī hiah-ê碑裡；耶和華就將hiah-ê交代我。Iâ-hô-hoa chiong I tī tōa-hōe ê ji̍t, tī soaⁿ-téng, tùi hé-tiong kā lí kóng ê cha̍p-kài, chiàu chêng só͘ siá ê khoán, siá tī hiah ê pi-ni̍h; Iâ-hô-hoa chiū chiong hiah-ê kau-tài góa.

5我oa̍t-tńg身落山，將hiah-ê碑hē tī我所做ê櫃，照耶和華ê命令；到taⁿ iáu tī-hia。Góa oa̍t-tńg-sin lo̍h-soaⁿ, chiong hiah ê pi hē tī góa só͘ chòe ê kūi, chiàu Iâ-hô-hoa ê bēng-lēng; kàu-taⁿ iáu tī-hia.

6(以色列人tùi Pí-lô-pí-nî-a-kan起身，到Mô͘-se-la̍h；亞倫死tī-hia，就埋葬tī-hia；伊ê kiáⁿ Í-li-a-sat續接伊擔當祭司ê職。(Í-sek-lia̍t lâng tùi Pí-lô-pí-nî-a-kan khí-sin, kàu Mô͘-se-la̍h; A-lûn sí tī-hia, chiū bâi-chòng tī-hia; i ê kiáⁿ Í-lī-a-sat sòa-chiap i tam-tng chè-si ê chit.

7In tùi hia起身，到Kok-ko-tāi，koh tùi Kok-ko-tāi到Iok-pa-tha，就是有溪水ê地；In tùi hia khí-sin, kàu Kok-ko-tāi, koh tùi Kok-ko-tāi kàu Iok-pa-tha, chiū-sī ū khoe-chúi ê tōe;

8Hit時耶和華分別利未支派，扛耶和華ê約櫃，khiā tī耶和華ê面前來服事伊，奉伊ê名來祝福，到今á日；hit-sî Iâ-hô-hoa hun-piat Lī-bī chi-phài, kng Iâ-hô-hoa ê iok-kūi, khiā tī Iâ-hô-hoa ê bīn-chêng lâi ho̍k-sāi I, hōng I ê miâ lâi chiok-hok, kàu kin-á-ji̍t;

9所以利未tī伊ê兄弟中無份無業，耶和華是伊ê產業，照耶和華你ê上帝所對伊講ê。)só͘-í Lī-bī tī i ê hiaⁿ-tī-tiong bô-hūn bô-gia̍p, Iâ-hô-hoa sī i ê sán-gia̍p, chiàu Iâ-hô-hoa lí ê Siōng-tè só͘ tùi i kóng ê.)

10我koh親像頭pái tiàm tī山頂四十日四十暝；hit-pái耶和華也聽我，耶和華m̄-kam滅你。Góa koh chhin-chhiūⁿ thâu-pái tiàm tī soaⁿ-téng sì-cha̍p ji̍t sì-cha̍p mî; hit-pái Iâ-hô-hoa iā thiaⁿ góa, Iâ-hô-hoa m̄-kam bia̍t lí.

11耶和華kā我講：你起來做頭行tī百姓ê面前，hō͘ in入去承接我所對in ê列祖chiù-chōa beh hō͘ in ê地。Iâ-hô-hoa kā góa kóng, Lí khí-lâi chòe-thâu kiâⁿ tī peh-sìⁿ ê bīn-chêng, hō͘ in ji̍p-khì sêng-chiap Góa só͘ tùi in ê lia̍t-chó͘ chiù-chōa beh hō͘ in ê tōe.

12以色列ah，taⁿ耶和華你ê上帝ài你甚麼ah？Kiám-m̄是獨獨ài你敬畏耶和華你ê上帝，行伊一切ê道路，疼伊，盡心盡性服事耶和華你ê上帝；Í-sek-lia̍t ah, taⁿ Iâ-hô-hoa lí ê Siōng-tè ài lí sím-mi̍h ah? Kiám-m̄-sī to̍k-to̍k ài lí kèng-ùi Iâ-hô-hoa lí ê Siōng-tè, kiâⁿ I it-chhè ê tō-lō͘, thiàⁿ I, chīn-sim chīn-sèng ho̍k-sāi Iâ-hô-hoa lí ê Siōng-tè;

13守耶和華chiah-ê誡命，kap伊ê律例，就是我今á日所命令你ê，為tio̍h beh hō͘你得tio̍h福氣mah？siú Iâ-hô-hoa chiah ê kài-bēng, kap I ê lu̍t-lē, chiū-sī góa kin-á-ji̍t só͘ bēng-lēng lí ê, ūi-tio̍h beh hō͘ lí tit-tio̍h hok-khì mah?

14看ah，天kap chiah-ê天ê天，地kap地上所有ê，lóng屬耶和華你ê上帝。Khòaⁿ ah, thiⁿ kap chiah ê thiⁿ ê thiⁿ, tōe kap tōe-chiūⁿ só͘-ū-ê, lóng sio̍k Iâ-hô-hoa lí ê Siōng-tè.

15耶和華獨獨歡喜你ê列祖，疼in，揀in ê後裔tī萬百姓中，就是lín chiah-ê，親像今á日就是。Iâ-hô-hoa to̍k-to̍k hoaⁿ-hí lí ê lia̍t-chó͘, thiàⁿ in, kéng in ê hō͘-è tī bān peh-sìⁿ tiong, chiū-sī lín chiah-ê, chhin-chhiūⁿ kin-á-ji̍t chiū-sī.

16所以lín tio̍h kā lín ê心行割禮，m̄-thang硬lín ê頷頸。Só͘-í lín tio̍h kā lín ê sim kiâⁿ kat-lé, m̄-thang ngī lín ê ām-kún.

17因為耶和華lín ê上帝，伊是chiah-ê上帝ê上帝，chiah-ê主ê主。伊是至大ê上帝，有能力koh thang驚畏ê；無用外貌取人，也無受pò͘賂。In-ūi Iâ-hô-hoa lín ê Siōng-tè, I sī chiah ê siōng-tè ê Siōng-tè, chiah ê chú ê Chú. I sī chì-tōa ê Siōng-tè, ū lêng-le̍k koh thang kiaⁿ-ùi-ê; bô ēng gōa-māu chhú-lâng, iā bô siū pò͘-lō͘.

18伊為tio̍h孤兒kap寡婦判斷；koh疼出外人，hō͘伊食穿；I ūi-tio̍h ko͘-jî kap kóaⁿ-hū phòaⁿ-toàn; koh thiàⁿ chhut-gōa lâng, hō͘ i chia̍h-chhēng;

19所以lín tio̍h疼出外人，因為lín也bat出外tī埃及地。só͘-í lín tio̍h thiàⁿ chhut-gōa lâng, in-ūi lín iā bat chhut-gōa tī Ai-ki̍p tōe.

20你tio̍h敬畏耶和華你ê上帝，服事伊，結聯伊，kí伊ê名來chiù-chōa。Lí tio̍h kèng-ùi Iâ-hô-hoa lí ê Siōng-tè, ho̍k-sāi I, kiat-liân I, kí I ê miâ lâi chiù-chōa.

21伊是你所o-ló ê，是你ê上帝，為tio̍h你做hit-ê大koh thang驚ê事，是你親目所看見ê。I sī lí só͘ o-ló ê, sī lí ê Siōng-tè, ūi-tio̍h lí chòe hit ê tōa koh thang kiaⁿ ê sū, sī lí chhin-ba̍k só͘ khòaⁿ-kìⁿ-ê.

22你ê列祖七十人落埃及，taⁿ耶和華你ê上帝hō͘你親像天頂ê星hiah-ni̍h chōe。Lí ê lia̍t-chó͘ chhit-cha̍p lâng lo̍h Ai-ki̍p, taⁿ Iâ-hô-hoa lí ê Siōng-tè hō͘ lí chhin-chhiūⁿ thiⁿ-téng ê chhiⁿ hiah-nih chōe.

1所以你tio̍h疼耶和華你ê上帝，常常守伊所吩咐你守ê，kap伊ê律例、法度、誡命。Só͘-í lí tio̍h thiàⁿ Iâ-hô-hoa lí ê Siōng-tè, siông-siông siú I só͘ hoan-hù lí siú ê, kap I ê lu̍t-lē, hoat-tō͘, kài-bēng.

2Lín今á日tio̍h知，因為我m̄是kap lín ê kiáⁿ兒講：in m̄知，也無看見耶和華lín上帝ê教督、威嚴、大權能ê手，kap伸出ê手骨；Lín kin-á-ji̍t tio̍h chai, in-ūi góa m̄-sī kap lín ê kiáⁿ-jî kóng, in m̄-chai, iā bô khòaⁿ-kìⁿ Iâ-hô-hoa lín Siōng-tè ê kàu-tok, ui-giâm, tōa koân-lêng ê chhiú, kap chhun-chhut ê chhiú-kut;

3以及伊ê神蹟，伊ê所做，見若tī埃及中對埃及王法老，kap伊ê全地，所行ê；í-ki̍p I ê sîn-jiah, I ê só͘ chòe, kìⁿ-nā tī Ai-ki̍p tiong tùi Ai-ki̍p ông Hoat-ló, kap i ê choân-tōe, só͘ kiâⁿ ê;

4也伊怎樣款待埃及ê軍兵，kap in ê馬，in ê車；in追jip lín ê時，耶和華怎樣hō͘紅海ê水淹in，滅無in到今á日；iā I cháiⁿ-iūⁿ khoán-thāi Ai-ki̍p ê kun-peng, kap in ê bé, in ê chhia; in tui-jip lín ê sî, Iâ-hô-hoa cháiⁿ-iūⁿ hō͘ Âng-hái ê chúi im-in, bia̍t-bô in kàu kin-á-ji̍t;

5koh伊tī曠野怎樣款待lín，到lín來chit-ê所在；koh I tī khòng-iá cháiⁿ-iūⁿ khoán-thāi lín, kàu lín lâi chit ê só͘-chāi;

6koh伊怎樣款待Liû-piān ê kiáⁿ孫Í-lī-ap ê kiáⁿ、Tāi-tan、A-pí-lân；地怎樣tī以色列人ê中間開嘴吞in，kap in ê家眷，以及in ê布棚，kap一切跟tè in ê活物；koh I cháiⁿ-iūⁿ khoán-thāi Liû-piān ê kiáⁿ-sun Í-lī-ap ê kiáⁿ, Tāi-tan, A-pí-lân; tōe cháiⁿ-iūⁿ tī Í-sek-lia̍t lâng ê tiong-kan khui-chhùi thun in, kap in ê ke-koàn, í-ki̍p in ê pò͘-pîⁿ, kap it-chhè kun-tè in ê oa̍h-mi̍h;

7只有lín親目看見耶和華所做一切ê大事。chí-ū lín chhin-ba̍k khòaⁿ-kìⁿ Iâ-hô-hoa só͘ chòe it-chhè ê tōa-sū.

8所以lín tio̍h守我今á日所命令一切ê誡命，hō͘ lín壯膽，能入去承接lín所beh過去承接ê地；Só͘-í lín tio̍h siú góa kin-á-ji̍t só͘ bēng-lēng it-chhè ê kài-bēng, hō͘ lín chòng-táⁿ, ōe ji̍p-khì sêng-chiap lín só͘ beh kè-khì sêng-chiap ê tōe;

9也hō͘ lín ê日子久長tī耶和華所kap lín ê列祖chiù-chōa賞賜in kap in ê後裔ê地，就是hit號流奶kap蜜ê地。iā hō͘ lín ê ji̍t-chí kú-tn̂g tī Iâ-hô-hoa só͘ kap lín ê lia̍t-chó͘ chiù-chōa siúⁿ-sù in kap in ê hō͘-è ê tōe, chiū-sī hit-hō lâu lin kap bi̍t ê tōe.

10因為你beh入去承接ê地，m̄是親像lín出來ê埃及地，你tī-hia掖種，用腳踏來灌ak，親像菜園；In-ūi lí beh ji̍p-khì sêng-chiap ê tōe, m̄-sī chhin-chhiūⁿ lín chhut-lâi ê Ai-ki̍p tōe, lí tī-hia iā-chéng, ēng kha ta̍h lâi koàn-ak, chhin-chhiūⁿ chhài-hn̂g;

11獨獨lín所beh入去承接ê地，就是有山，有山谷，來承受天ê雨水ê地；to̍k-to̍k lín só͘ beh ji̍p-khì sêng-chiap ê tōe, chiū-sī ū soaⁿ, ū soaⁿ-kok, lâi sêng-siū thiⁿ ê hō͘-chúi ê tōe;

12是耶和華你上帝所眷顧ê地，tùi年頭到年尾；耶和華你上帝ê目睭常常看伊。sī Iâ-hô-hoa lí Siōng-tè só͘ koàn-kò͘ ê tōe, tùi nî-thâu kàu nî-bé; Iâ-hô-hoa lí Siōng-tè ê ba̍k-chiu siông-siông khòaⁿ i.

13Lín若留心聽thàn我ê誡命，就是我今á日所命令lín ê，疼耶和華lín ê上帝，盡心盡性服事伊，Lín nā liû-sim thiaⁿ-thàn góa ê kài-bēng, chiū-sī góa kin-á-ji̍t só͘ bēng-lēng lín ê, thiàⁿ Iâ-hô-hoa lín ê Siōng-tè, chīn-sim chīn-sèng ho̍k-sāi I,

14就我beh照時落你ê地所欠用ê雨，就是前ê雨，後ê雨，hō͘你thang收成你ê五穀，你ê酒，你ê油；chiū Góa beh chiàu-sî lo̍h lí ê tōe só͘ khiàm-ēng ê hō͘, chiū-sī chêng ê hō͘, āu ê hō͘, hō͘ lí thang siu-sêng lí ê gō͘-kak, lí ê chiú, lí ê iû;

15也hō͘你ê田野發草，飼你ê cheng-siⁿ，你也beh得tio̍h飽足。iā hō͘ lí ê chhân-iá hoat-chháu, chhī lí ê cheng-siⁿ, lí iā beh tit-tio̍h pá-chiok.

16Lín tio̍h家己謹慎，免得lín ê心受迷，致到lín歪chhoa̍h，去服事別ê上帝，來敬拜伊；Lín tio̍h ka-kī kín-sīn, bián-tit lín ê sim siū bê, tì-kàu lín oai-chhoa̍h, khì ho̍k-sāi pa̍t ê siōng-tè, lâi kèng-pài i;

17致到耶和華大受氣lín，hō͘天關密無落雨，地也無出產；lín就tī耶和華所賞賜lín ê súi地緊緊滅無。tì-kàu Iâ-hô-hoa tōa siū-khì lín, hō͘ thiⁿ koaiⁿ-ba̍t bô lo̍h hō͘, tōe iā bô chhut-sán; lín chiū tī Iâ-hô-hoa só͘ siúⁿ-sù lín ê súi tōe kín-kín bia̍t-bô.

18所以lín tio̍h用我chiah-ê話記tī lín ê心，lín ê腦；也tio̍h縛tī lín ê手做記號，戴tī lín兩蕊目睭ê中央做記念；Só͘-í lín tio̍h ēng góa chiah ê ōe kì tī lín ê sim, lín ê náu; iā tio̍h pa̍k tī lín ê chhiú chòe kì-hō, tì tī lín nn̄g lúi ba̍k-chiu ê tiong-ng chòe kì-liām;

19也tio̍h用這教示lín ê kiáⁿ兒，無論你坐tī厝內，行tī路裡，睏á是起來，lóng tio̍h講論；iā tio̍h ēng che kà-sī lín ê kiáⁿ-jî, bô-lūn lí chē tī chhù-lāi, kiâⁿ tī lō͘-ni̍h, khùn á-sī khí-lâi, lóng tio̍h káng-lūn;

20koh tio̍h寫tī你ê厝ê門khiā，以及你ê門；koh tio̍h siá tī lí ê chhù ê mn̂g-khiā, í-ki̍p lí ê mn̂g;

21Hō͘ lín ê日子，kap lín ê kiáⁿ孫ê日子，tī耶和華對lín ê列祖chiù-chōa賞賜in ê地，得tio̍h加添chōe-chōe，親像天蓋地ê日hiah久。hō͘ lín ê ji̍t-chí, kap lín ê kiáⁿ-sun ê ji̍t-chí, tī Iâ-hô-hoa tùi lín ê lia̍t-chó͘ chiù-chōa siúⁿ-sù in ê tōe, tit-tio̍h ke-thiⁿ chōe-chōe, chhin-chhiūⁿ thiⁿ khàm-tōe ê ji̍t hiah kú.

22Lín若注意執守我所命令lín一切ê誡命，來行伊，疼耶和華lín ê上帝，行伊一切ê路，結聯tī伊，Lín nā chù-ì chip-siú góa só͘ bēng-lēng lín it-chhè ê kài-bēng, lâi kiâⁿ i, thiàⁿ Iâ-hô-hoa lín ê Siōng-tè, kiâⁿ I it-chhè ê lō͘, kiat-liân tī I,

23耶和華就beh tùi lín面前趕出這一切ê國，lín也beh得tio̍h比lín khah大khah強ê國。Iâ-hô-hoa chiū beh tùi lín bīn-chêng kóaⁿ-chhut che it-chhè ê kok, lín iā beh tit-tio̍h pí lín khah-tōa khah-kiông ê kok.

24見若lín ê腳掌所踏ê地，lóng beh歸hō͘ lín，tùi曠野kap Lī-pa-lùn，tùi hit-ê河，就是Pek-la̍h河，到西pêng ê海，lóng beh做lín ê境界；Kìⁿ-nā lín ê kha-chiúⁿ só͘ ta̍h ê tōe, lóng beh kui hō͘ lín, tùi khòng-iá kap Lī-pa-lùn, tùi hit ê hô, chiū-sī Pek-la̍h hô, kàu sai-pêng ê hái, lóng beh chòe lín ê kéng-kài;

25beh無一人能khiā-tiâu tī lín ê面前；耶和華lín ê上帝beh hō͘ lín所踏ê全地lóng驚lín，忍lín，照伊所對lín講ê。beh bô chi̍t-lâng ōe khiā-tiâu tī lín ê bīn-chêng; Iâ-hô-hoa lín ê Siōng-tè beh hō͘ lín só͘ ta̍h ê choân-tōe lóng kiaⁿ lín, lún lín, chiàu I só͘ tùi lín kóng ê.

26看ah，我今á日將祝福kap咒詛排tī lín ê面前；Khòaⁿ ah, góa kin-á-ji̍t chiong chiok-hok kap chiù-chó͘ pâi tī lín ê bīn-chêng;

27lín若thàn耶和華lín上帝ê誡命，我今á日所命令lín ê，就是祝福；lín nā thàn Iâ-hô-hoa lín Siōng-tè ê kài-bēng, góa kin-á-ji̍t só͘ bēng-lēng lín ê, chiū-sī chiok-hok;

28lín若m̄-thàn耶和華lín上帝ê誡命，歪chhoa̍h我今á日所命令lín ê路，去thàn別ê上帝，lín平素所m̄-bat ê，就是咒詛。lín nā m̄-thàn Iâ-hô-hoa lín Siōng-tè ê kài-bēng, oai-chhoa̍h góa kin-á-ji̍t só͘ bēng-lēng lín ê lō͘, khì thàn pa̍t ê siōng-tè, lín pêng-sò͘ só͘ m̄-bat ê, chiū-sī chiù-chó͘.

29將來耶和華你ê上帝chhōa你到你所beh入去承接ê地，你tio̍h hē hit-ê祝福tī Ki-lī-sim山，hē hit-ê咒詛tī Í-pa-lō͘山。Chiong-lâi Iâ-hô-hoa lí ê Siōng-tè chhōa lí kàu lí só͘ beh ji̍p-khì sêng-chiap ê tōe, lí tio̍h hē hit ê chiok-hok tī Ki-lī-sim soaⁿ, hē hit ê chiù-chó͘ tī Í-pa-lō͘ soaⁿ.

30Chit兩個山kiám-m̄是tī約旦河hit-pêng，日落ê路ê後面，tī khiā起A-la̍h-pa ê迦南人ê地，kap Kiat-kah相對，óa近Mô͘-lī橡樹mah？Chit nn̄g ê soaⁿ kiám-m̄-sī tī Iok-tàn hô hit-pêng, ji̍t-lo̍h ê lō͘ ê āu-bīn, tī khiā-khí A-la̍h-pa ê Ka-lâm lâng ê tōe, kap Kiat-kah saⁿ-tùi, óa-kūn Mô͘-lī siōng-chhiū mah?

31因為lín beh過約旦河，入去承接耶和華lín上帝所賞賜lín做業ê地，lín beh tī-hia khiā起。In-ūi lín beh kè Iok-tàn hô, ji̍p-khì sêng-chiap Iâ-hô-hoa lín Siōng-tè só͘ siúⁿ-sù lín chòe-gia̍p ê tōe, lín beh tī-hia khiā-khí.

32Lín tio̍h執守來行我今á日tī lín ê面前所排列一切ê律例法度。Lín tio̍h chip-siú lâi kiâⁿ góa kin-á-ji̍t tī lín ê bīn-chêng só͘ pâi-lia̍t it-chhè ê lu̍t-lē hoat-tō͘.