1Hit時耶和華kā我講：你tio̍h phah兩塊石碑，親像前ê款，上山來我chia；koh tio̍h做一個柴ê櫃。Hit-sî Iâ-hô-hoa kā góa kóng, Lí tio̍h phah nn̄g tè chio̍h-pi, chhin-chhiūⁿ chêng ê khoán, chiūⁿ-soaⁿ lâi Góa chia; koh tio̍h chòe chi̍t ê chhâ ê kūi.

2你前所phah折hiah-ê碑，hit頂面ê話，我beh寫tī chiah-ê碑ê頂面；你tio̍h hē in tī櫃內。Lí chêng só͘ phah-chi̍h hiah ê pi, hit téng-bīn ê ōe, Góa beh siá tī chiah ê pi ê téng-bīn; lí tio̍h hē in tī kūi-lāi.

3我就用chō-kiap柴做一個櫃，koh phah兩塊石碑親像前ê款；我親手the̍h chit兩塊碑上山。Góa chiū ēng chō-kiap-chhâ chòe chi̍t ê kūi, koh phah nn̄g-tè chio̍h-pi chhin-chhiūⁿ chêng ê khoán; góa chhin-chhiú the̍h chit nn̄g-tè pi chiūⁿ-soaⁿ.

4耶和華將伊tī大會 ê日，tī山頂，tùi火中kā你講ê十誡，照前所寫ê款，寫tī hiah-ê碑裡；耶和華就將hiah-ê交代我。Iâ-hô-hoa chiong I tī tōa-hōe ê ji̍t, tī soaⁿ-téng, tùi hé-tiong kā lí kóng ê cha̍p-kài, chiàu chêng só͘ siá ê khoán, siá tī hiah ê pi-ni̍h; Iâ-hô-hoa chiū chiong hiah-ê kau-tài góa.

5我oa̍t-tńg身落山，將hiah-ê碑hē tī我所做ê櫃，照耶和華ê命令；到taⁿ iáu tī-hia。Góa oa̍t-tńg-sin lo̍h-soaⁿ, chiong hiah ê pi hē tī góa só͘ chòe ê kūi, chiàu Iâ-hô-hoa ê bēng-lēng; kàu-taⁿ iáu tī-hia.

6(以色列人tùi Pí-lô-pí-nî-a-kan起身，到Mô͘-se-la̍h；亞倫死tī-hia，就埋葬tī-hia；伊ê kiáⁿ Í-li-a-sat續接伊擔當祭司ê職。(Í-sek-lia̍t lâng tùi Pí-lô-pí-nî-a-kan khí-sin, kàu Mô͘-se-la̍h; A-lûn sí tī-hia, chiū bâi-chòng tī-hia; i ê kiáⁿ Í-lī-a-sat sòa-chiap i tam-tng chè-si ê chit.

7In tùi hia起身，到Kok-ko-tāi，koh tùi Kok-ko-tāi到Iok-pa-tha，就是有溪水ê地；In tùi hia khí-sin, kàu Kok-ko-tāi, koh tùi Kok-ko-tāi kàu Iok-pa-tha, chiū-sī ū khoe-chúi ê tōe;

8Hit時耶和華分別利未支派，扛耶和華ê約櫃，khiā tī耶和華ê面前來服事伊，奉伊ê名來祝福，到今á日；hit-sî Iâ-hô-hoa hun-piat Lī-bī chi-phài, kng Iâ-hô-hoa ê iok-kūi, khiā tī Iâ-hô-hoa ê bīn-chêng lâi ho̍k-sāi I, hōng I ê miâ lâi chiok-hok, kàu kin-á-ji̍t;

9所以利未tī伊ê兄弟中無份無業，耶和華是伊ê產業，照耶和華你ê上帝所對伊講ê。)só͘-í Lī-bī tī i ê hiaⁿ-tī-tiong bô-hūn bô-gia̍p, Iâ-hô-hoa sī i ê sán-gia̍p, chiàu Iâ-hô-hoa lí ê Siōng-tè só͘ tùi i kóng ê.)

10我koh親像頭pái tiàm tī山頂四十日四十暝；hit-pái耶和華也聽我，耶和華m̄-kam滅你。Góa koh chhin-chhiūⁿ thâu-pái tiàm tī soaⁿ-téng sì-cha̍p ji̍t sì-cha̍p mî; hit-pái Iâ-hô-hoa iā thiaⁿ góa, Iâ-hô-hoa m̄-kam bia̍t lí.

11耶和華kā我講：你起來做頭行tī百姓ê面前，hō͘ in入去承接我所對in ê列祖chiù-chōa beh hō͘ in ê地。Iâ-hô-hoa kā góa kóng, Lí khí-lâi chòe-thâu kiâⁿ tī peh-sìⁿ ê bīn-chêng, hō͘ in ji̍p-khì sêng-chiap Góa só͘ tùi in ê lia̍t-chó͘ chiù-chōa beh hō͘ in ê tōe.

12以色列ah，taⁿ耶和華你ê上帝ài你甚麼ah？Kiám-m̄是獨獨ài你敬畏耶和華你ê上帝，行伊一切ê道路，疼伊，盡心盡性服事耶和華你ê上帝；Í-sek-lia̍t ah, taⁿ Iâ-hô-hoa lí ê Siōng-tè ài lí sím-mi̍h ah? Kiám-m̄-sī to̍k-to̍k ài lí kèng-ùi Iâ-hô-hoa lí ê Siōng-tè, kiâⁿ I it-chhè ê tō-lō͘, thiàⁿ I, chīn-sim chīn-sèng ho̍k-sāi Iâ-hô-hoa lí ê Siōng-tè;

13守耶和華chiah-ê誡命，kap伊ê律例，就是我今á日所命令你ê，為tio̍h beh hō͘你得tio̍h福氣mah？siú Iâ-hô-hoa chiah ê kài-bēng, kap I ê lu̍t-lē, chiū-sī góa kin-á-ji̍t só͘ bēng-lēng lí ê, ūi-tio̍h beh hō͘ lí tit-tio̍h hok-khì mah?

14看ah，天kap chiah-ê天ê天，地kap地上所有ê，lóng屬耶和華你ê上帝。Khòaⁿ ah, thiⁿ kap chiah ê thiⁿ ê thiⁿ, tōe kap tōe-chiūⁿ só͘-ū-ê, lóng sio̍k Iâ-hô-hoa lí ê Siōng-tè.

15耶和華獨獨歡喜你ê列祖，疼in，揀in ê後裔tī萬百姓中，就是lín chiah-ê，親像今á日就是。Iâ-hô-hoa to̍k-to̍k hoaⁿ-hí lí ê lia̍t-chó͘, thiàⁿ in, kéng in ê hō͘-è tī bān peh-sìⁿ tiong, chiū-sī lín chiah-ê, chhin-chhiūⁿ kin-á-ji̍t chiū-sī.

16所以lín tio̍h kā lín ê心行割禮，m̄-thang硬lín ê頷頸。Só͘-í lín tio̍h kā lín ê sim kiâⁿ kat-lé, m̄-thang ngī lín ê ām-kún.

17因為耶和華lín ê上帝，伊是chiah-ê上帝ê上帝，chiah-ê主ê主。伊是至大ê上帝，有能力koh thang驚畏ê；無用外貌取人，也無受pò͘賂。In-ūi Iâ-hô-hoa lín ê Siōng-tè, I sī chiah ê siōng-tè ê Siōng-tè, chiah ê chú ê Chú. I sī chì-tōa ê Siōng-tè, ū lêng-le̍k koh thang kiaⁿ-ùi-ê; bô ēng gōa-māu chhú-lâng, iā bô siū pò͘-lō͘.

18伊為tio̍h孤兒kap寡婦判斷；koh疼出外人，hō͘伊食穿；I ūi-tio̍h ko͘-jî kap kóaⁿ-hū phòaⁿ-toàn; koh thiàⁿ chhut-gōa lâng, hō͘ i chia̍h-chhēng;

19所以lín tio̍h疼出外人，因為lín也bat出外tī埃及地。só͘-í lín tio̍h thiàⁿ chhut-gōa lâng, in-ūi lín iā bat chhut-gōa tī Ai-ki̍p tōe.

20你tio̍h敬畏耶和華你ê上帝，服事伊，結聯伊，kí伊ê名來chiù-chōa。Lí tio̍h kèng-ùi Iâ-hô-hoa lí ê Siōng-tè, ho̍k-sāi I, kiat-liân I, kí I ê miâ lâi chiù-chōa.

21伊是你所o-ló ê，是你ê上帝，為tio̍h你做hit-ê大koh thang驚ê事，是你親目所看見ê。I sī lí só͘ o-ló ê, sī lí ê Siōng-tè, ūi-tio̍h lí chòe hit ê tōa koh thang kiaⁿ ê sū, sī lí chhin-ba̍k só͘ khòaⁿ-kìⁿ-ê.

22你ê列祖七十人落埃及，taⁿ耶和華你ê上帝hō͘你親像天頂ê星hiah-ni̍h chōe。Lí ê lia̍t-chó͘ chhit-cha̍p lâng lo̍h Ai-ki̍p, taⁿ Iâ-hô-hoa lí ê Siōng-tè hō͘ lí chhin-chhiūⁿ thiⁿ-téng ê chhiⁿ hiah-nih chōe.

1所以你tio̍h疼耶和華你ê上帝，常常守伊所吩咐你守ê，kap伊ê律例、法度、誡命。Só͘-í lí tio̍h thiàⁿ Iâ-hô-hoa lí ê Siōng-tè, siông-siông siú I só͘ hoan-hù lí siú ê, kap I ê lu̍t-lē, hoat-tō͘, kài-bēng.

2Lín今á日tio̍h知，因為我m̄是kap lín ê kiáⁿ兒講：in m̄知，也無看見耶和華lín上帝ê教督、威嚴、大權能ê手，kap伸出ê手骨；Lín kin-á-ji̍t tio̍h chai, in-ūi góa m̄-sī kap lín ê kiáⁿ-jî kóng, in m̄-chai, iā bô khòaⁿ-kìⁿ Iâ-hô-hoa lín Siōng-tè ê kàu-tok, ui-giâm, tōa koân-lêng ê chhiú, kap chhun-chhut ê chhiú-kut;

3以及伊ê神蹟，伊ê所做，見若tī埃及中對埃及王法老，kap伊ê全地，所行ê；í-ki̍p I ê sîn-jiah, I ê só͘ chòe, kìⁿ-nā tī Ai-ki̍p tiong tùi Ai-ki̍p ông Hoat-ló, kap i ê choân-tōe, só͘ kiâⁿ ê;

4也伊怎樣款待埃及ê軍兵，kap in ê馬，in ê車；in追jip lín ê時，耶和華怎樣hō͘紅海ê水淹in，滅無in到今á日；iā I cháiⁿ-iūⁿ khoán-thāi Ai-ki̍p ê kun-peng, kap in ê bé, in ê chhia; in tui-jip lín ê sî, Iâ-hô-hoa cháiⁿ-iūⁿ hō͘ Âng-hái ê chúi im-in, bia̍t-bô in kàu kin-á-ji̍t;

5koh伊tī曠野怎樣款待lín，到lín來chit-ê所在；koh I tī khòng-iá cháiⁿ-iūⁿ khoán-thāi lín, kàu lín lâi chit ê só͘-chāi;

6koh伊怎樣款待Liû-piān ê kiáⁿ孫Í-lī-ap ê kiáⁿ、Tāi-tan、A-pí-lân；地怎樣tī以色列人ê中間開嘴吞in，kap in ê家眷，以及in ê布棚，kap一切跟tè in ê活物；koh I cháiⁿ-iūⁿ khoán-thāi Liû-piān ê kiáⁿ-sun Í-lī-ap ê kiáⁿ, Tāi-tan, A-pí-lân; tōe cháiⁿ-iūⁿ tī Í-sek-lia̍t lâng ê tiong-kan khui-chhùi thun in, kap in ê ke-koàn, í-ki̍p in ê pò͘-pîⁿ, kap it-chhè kun-tè in ê oa̍h-mi̍h;

7只有lín親目看見耶和華所做一切ê大事。chí-ū lín chhin-ba̍k khòaⁿ-kìⁿ Iâ-hô-hoa só͘ chòe it-chhè ê tōa-sū.

8所以lín tio̍h守我今á日所命令一切ê誡命，hō͘ lín壯膽，能入去承接lín所beh過去承接ê地；Só͘-í lín tio̍h siú góa kin-á-ji̍t só͘ bēng-lēng it-chhè ê kài-bēng, hō͘ lín chòng-táⁿ, ōe ji̍p-khì sêng-chiap lín só͘ beh kè-khì sêng-chiap ê tōe;

9也hō͘ lín ê日子久長tī耶和華所kap lín ê列祖chiù-chōa賞賜in kap in ê後裔ê地，就是hit號流奶kap蜜ê地。iā hō͘ lín ê ji̍t-chí kú-tn̂g tī Iâ-hô-hoa só͘ kap lín ê lia̍t-chó͘ chiù-chōa siúⁿ-sù in kap in ê hō͘-è ê tōe, chiū-sī hit-hō lâu lin kap bi̍t ê tōe.

10因為你beh入去承接ê地，m̄是親像lín出來ê埃及地，你tī-hia掖種，用腳踏來灌ak，親像菜園；In-ūi lí beh ji̍p-khì sêng-chiap ê tōe, m̄-sī chhin-chhiūⁿ lín chhut-lâi ê Ai-ki̍p tōe, lí tī-hia iā-chéng, ēng kha ta̍h lâi koàn-ak, chhin-chhiūⁿ chhài-hn̂g;

11獨獨lín所beh入去承接ê地，就是有山，有山谷，來承受天ê雨水ê地；to̍k-to̍k lín só͘ beh ji̍p-khì sêng-chiap ê tōe, chiū-sī ū soaⁿ, ū soaⁿ-kok, lâi sêng-siū thiⁿ ê hō͘-chúi ê tōe;

12是耶和華你上帝所眷顧ê地，tùi年頭到年尾；耶和華你上帝ê目睭常常看伊。sī Iâ-hô-hoa lí Siōng-tè só͘ koàn-kò͘ ê tōe, tùi nî-thâu kàu nî-bé; Iâ-hô-hoa lí Siōng-tè ê ba̍k-chiu siông-siông khòaⁿ i.

13Lín若留心聽thàn我ê誡命，就是我今á日所命令lín ê，疼耶和華lín ê上帝，盡心盡性服事伊，Lín nā liû-sim thiaⁿ-thàn góa ê kài-bēng, chiū-sī góa kin-á-ji̍t só͘ bēng-lēng lín ê, thiàⁿ Iâ-hô-hoa lín ê Siōng-tè, chīn-sim chīn-sèng ho̍k-sāi I,

14就我beh照時落你ê地所欠用ê雨，就是前ê雨，後ê雨，hō͘你thang收成你ê五穀，你ê酒，你ê油；chiū Góa beh chiàu-sî lo̍h lí ê tōe só͘ khiàm-ēng ê hō͘, chiū-sī chêng ê hō͘, āu ê hō͘, hō͘ lí thang siu-sêng lí ê gō͘-kak, lí ê chiú, lí ê iû;

15也hō͘你ê田野發草，飼你ê cheng-siⁿ，你也beh得tio̍h飽足。iā hō͘ lí ê chhân-iá hoat-chháu, chhī lí ê cheng-siⁿ, lí iā beh tit-tio̍h pá-chiok.

16Lín tio̍h家己謹慎，免得lín ê心受迷，致到lín歪chhoa̍h，去服事別ê上帝，來敬拜伊；Lín tio̍h ka-kī kín-sīn, bián-tit lín ê sim siū bê, tì-kàu lín oai-chhoa̍h, khì ho̍k-sāi pa̍t ê siōng-tè, lâi kèng-pài i;

17致到耶和華大受氣lín，hō͘天關密無落雨，地也無出產；lín就tī耶和華所賞賜lín ê súi地緊緊滅無。tì-kàu Iâ-hô-hoa tōa siū-khì lín, hō͘ thiⁿ koaiⁿ-ba̍t bô lo̍h hō͘, tōe iā bô chhut-sán; lín chiū tī Iâ-hô-hoa só͘ siúⁿ-sù lín ê súi tōe kín-kín bia̍t-bô.

18所以lín tio̍h用我chiah-ê話記tī lín ê心，lín ê腦；也tio̍h縛tī lín ê手做記號，戴tī lín兩蕊目睭ê中央做記念；Só͘-í lín tio̍h ēng góa chiah ê ōe kì tī lín ê sim, lín ê náu; iā tio̍h pa̍k tī lín ê chhiú chòe kì-hō, tì tī lín nn̄g lúi ba̍k-chiu ê tiong-ng chòe kì-liām;

19也tio̍h用這教示lín ê kiáⁿ兒，無論你坐tī厝內，行tī路裡，睏á是起來，lóng tio̍h講論；iā tio̍h ēng che kà-sī lín ê kiáⁿ-jî, bô-lūn lí chē tī chhù-lāi, kiâⁿ tī lō͘-ni̍h, khùn á-sī khí-lâi, lóng tio̍h káng-lūn;

20koh tio̍h寫tī你ê厝ê門khiā，以及你ê門；koh tio̍h siá tī lí ê chhù ê mn̂g-khiā, í-ki̍p lí ê mn̂g;

21Hō͘ lín ê日子，kap lín ê kiáⁿ孫ê日子，tī耶和華對lín ê列祖chiù-chōa賞賜in ê地，得tio̍h加添chōe-chōe，親像天蓋地ê日hiah久。hō͘ lín ê ji̍t-chí, kap lín ê kiáⁿ-sun ê ji̍t-chí, tī Iâ-hô-hoa tùi lín ê lia̍t-chó͘ chiù-chōa siúⁿ-sù in ê tōe, tit-tio̍h ke-thiⁿ chōe-chōe, chhin-chhiūⁿ thiⁿ khàm-tōe ê ji̍t hiah kú.

22Lín若注意執守我所命令lín一切ê誡命，來行伊，疼耶和華lín ê上帝，行伊一切ê路，結聯tī伊，Lín nā chù-ì chip-siú góa só͘ bēng-lēng lín it-chhè ê kài-bēng, lâi kiâⁿ i, thiàⁿ Iâ-hô-hoa lín ê Siōng-tè, kiâⁿ I it-chhè ê lō͘, kiat-liân tī I,

23耶和華就beh tùi lín面前趕出這一切ê國，lín也beh得tio̍h比lín khah大khah強ê國。Iâ-hô-hoa chiū beh tùi lín bīn-chêng kóaⁿ-chhut che it-chhè ê kok, lín iā beh tit-tio̍h pí lín khah-tōa khah-kiông ê kok.

24見若lín ê腳掌所踏ê地，lóng beh歸hō͘ lín，tùi曠野kap Lī-pa-lùn，tùi hit-ê河，就是Pek-la̍h河，到西pêng ê海，lóng beh做lín ê境界；Kìⁿ-nā lín ê kha-chiúⁿ só͘ ta̍h ê tōe, lóng beh kui hō͘ lín, tùi khòng-iá kap Lī-pa-lùn, tùi hit ê hô, chiū-sī Pek-la̍h hô, kàu sai-pêng ê hái, lóng beh chòe lín ê kéng-kài;

25beh無一人能khiā-tiâu tī lín ê面前；耶和華lín ê上帝beh hō͘ lín所踏ê全地lóng驚lín，忍lín，照伊所對lín講ê。beh bô chi̍t-lâng ōe khiā-tiâu tī lín ê bīn-chêng; Iâ-hô-hoa lín ê Siōng-tè beh hō͘ lín só͘ ta̍h ê choân-tōe lóng kiaⁿ lín, lún lín, chiàu I só͘ tùi lín kóng ê.

26看ah，我今á日將祝福kap咒詛排tī lín ê面前；Khòaⁿ ah, góa kin-á-ji̍t chiong chiok-hok kap chiù-chó͘ pâi tī lín ê bīn-chêng;

27lín若thàn耶和華lín上帝ê誡命，我今á日所命令lín ê，就是祝福；lín nā thàn Iâ-hô-hoa lín Siōng-tè ê kài-bēng, góa kin-á-ji̍t só͘ bēng-lēng lín ê, chiū-sī chiok-hok;

28lín若m̄-thàn耶和華lín上帝ê誡命，歪chhoa̍h我今á日所命令lín ê路，去thàn別ê上帝，lín平素所m̄-bat ê，就是咒詛。lín nā m̄-thàn Iâ-hô-hoa lín Siōng-tè ê kài-bēng, oai-chhoa̍h góa kin-á-ji̍t só͘ bēng-lēng lín ê lō͘, khì thàn pa̍t ê siōng-tè, lín pêng-sò͘ só͘ m̄-bat ê, chiū-sī chiù-chó͘.

29將來耶和華你ê上帝chhōa你到你所beh入去承接ê地，你tio̍h hē hit-ê祝福tī Ki-lī-sim山，hē hit-ê咒詛tī Í-pa-lō͘山。Chiong-lâi Iâ-hô-hoa lí ê Siōng-tè chhōa lí kàu lí só͘ beh ji̍p-khì sêng-chiap ê tōe, lí tio̍h hē hit ê chiok-hok tī Ki-lī-sim soaⁿ, hē hit ê chiù-chó͘ tī Í-pa-lō͘ soaⁿ.

30Chit兩個山kiám-m̄是tī約旦河hit-pêng，日落ê路ê後面，tī khiā起A-la̍h-pa ê迦南人ê地，kap Kiat-kah相對，óa近Mô͘-lī橡樹mah？Chit nn̄g ê soaⁿ kiám-m̄-sī tī Iok-tàn hô hit-pêng, ji̍t-lo̍h ê lō͘ ê āu-bīn, tī khiā-khí A-la̍h-pa ê Ka-lâm lâng ê tōe, kap Kiat-kah saⁿ-tùi, óa-kūn Mô͘-lī siōng-chhiū mah?

31因為lín beh過約旦河，入去承接耶和華lín上帝所賞賜lín做業ê地，lín beh tī-hia khiā起。In-ūi lín beh kè Iok-tàn hô, ji̍p-khì sêng-chiap Iâ-hô-hoa lín Siōng-tè só͘ siúⁿ-sù lín chòe-gia̍p ê tōe, lín beh tī-hia khiā-khí.

32Lín tio̍h執守來行我今á日tī lín ê面前所排列一切ê律例法度。Lín tio̍h chip-siú lâi kiâⁿ góa kin-á-ji̍t tī lín ê bīn-chêng só͘ pâi-lia̍t it-chhè ê lu̍t-lē hoat-tō͘.

1Lín tī世間一生ê日，tī耶和華lín列祖ê上帝所賞賜lín做業ê地，tio̍h執守來行ê律例法度，就是chiah-ê。Lín tī sè-kan it-seng ê ji̍t, tī Iâ-hô-hoa lín lia̍t-chó͘ ê Siōng-tè só͘ siúⁿ-sù lín chòe-gia̍p ê tōe, tio̍h chip-siú lâi kiâⁿ ê lu̍t-lē hoat-tō͘, chiū-sī chiah-ê.

2Lín所beh趕來承接ê列國，見若in服事in hiah-ê上帝ê所在，無論tī高山，tī小山，tī lóng總青翠ê樹腳，lóng tio̍h毀壞伊n；Lín só͘ beh kóaⁿ lâi sêng-chiap ê lia̍t-kok, kìⁿ-nā in ho̍k-sāi in hiah ê siōng-tè ê só͘-chāi, bô-lūn tī koâiⁿ-soaⁿ, tī sió-soaⁿ, tī lóng-chóng chhiⁿ-chhùi ê chhiū-kha, lóng tio̍h húi-hoāi in;

3lín也tio̍h拆毀in ê祭壇，phah碎in雕刻ê柱，用火燒in ê A-sià-lîm，剉伊n所雕刻ê上帝ê像，也tio̍h tùi hit所在除滅in ê名；lín iā tio̍h thiah-húi in ê chè-tôaⁿ, phah-chhùi in tiau-khek ê thiāu, ēng hé sio in ê A-sià-lîm, chhò in só͘ tiau-khek ê siōng-tè ê siōng, iā tio̍h tùi hit só͘-chāi tû-bia̍t in ê miâ;

4lín m̄-thang親像án-ni來服事耶和華lín ê上帝。lín m̄-thang chhin-chhiūⁿ án-ni lâi ho̍k-sāi Iâ-hô-hoa lín ê Siōng-tè.

5獨獨耶和華lín ê上帝將來tùi lín眾支派中所beh揀ê所在，thang tī-hia安置伊ê名，就是伊khiā起ê所在，lín tio̍h去hia chhē伊；To̍k-to̍k Iâ-hô-hoa lín ê Siōng-tè chiong-lâi tùi lín chèng chi-phài tiong só͘ beh kéng ê só͘-chāi, thang tī-hia an-tì I ê miâ, chiū-sī I khiā-khí ê só͘-chāi, lín tio̍h khì hia chhē I;

6將lín ê燒祭kap別號ê祭，十份取一份ê物，kap手裡ê舉祭，以及謝願ê祭，甘心獻ê祭，以及牛群羊群中頭水生ê，lóng tio̍h帶到hia；chiong lín ê sio-chè kap pa̍t-hō ê chè, cha̍p-hūn chhú chi̍t-hūn ê mi̍h, kap chhiú-ni̍h ê kú-chè, í-ki̍p siā-goān ê chè, kam-sim hiàn ê chè, í-ki̍p gû-kûn iûⁿ-kûn tiong thâu-chúi-siⁿ-ê, lóng tio̍h tòa kàu hia;

7tī-hia lín tī耶和華lín上帝ê面前為tio̍h lín ê手所做一切ê事，得tio̍h耶和華lín上帝賜福ê，lín kap lín ê家眷lóng tio̍h lim食歡喜。tī-hia lín tī Iâ-hô-hoa lín Siōng-tè ê bīn-chêng ūi-tio̍h lín ê chhiú só͘ chòe it-chhè ê sū, tit-tio̍h Iâ-hô-hoa lín Siōng-tè sù-hok ê, lín kap lín ê ke-koàn lóng tio̍h lim-chia̍h hoaⁿ-hí.

8咱今á日tī-chia所行ê事，是ta̍k人行伊家己看做tio̍h-ê，lín將來m̄-thang án-ni行。Lán kin-á-ji̍t tī-chia só͘ kiâⁿ ê sū, sī ta̍k-lâng kiâⁿ i ka-kī khòaⁿ-chòe tio̍h-ê, lín chiong-lâi m̄-thang án-ni kiâⁿ.

9因為lín現今iáu未有夠耶和華你ê上帝所賞賜你ê安歇kap產業。In-ūi lín hiān-kim iáu-bē ū kàu Iâ-hô-hoa lí ê Siōng-tè só͘ siúⁿ-sù lí ê an-hioh kap sán-gia̍p.

10總是lín過約旦，得tio̍h khiā起tī耶和華lín上帝賞賜lín承接ê地，koh hō͘ lín脫離四圍lóng總ê對敵，得tio̍h安歇，來安穩khiā起；Chóng-sī lín kè Iok-tàn, tit-tio̍h khiā-khí tī Iâ-hô-hoa lín Siōng-tè siúⁿ-sù lín sêng-chiap ê tōe, koh hō͘ lín thoat-lī sì-ûi lóng-chóng ê tùi-te̍k, tit-tio̍h an-hioh, lâi an-ún khiā-khí;

11就beh有一所在，是耶和華lín ê上帝所揀來安置伊ê名ê，見若我所命令lín ê，就是lín ê燒祭，kap別號ê祭，十份取一份ê物，kap手裡ê舉祭，以及你對耶和華所下願極好ê物，lóng tio̍h帶到hia。chiū beh ū chi̍t só͘-chāi, sī Iâ-hô-hoa lín ê Siōng-tè só͘ kéng lâi an-tì I ê miâ ê, kìⁿ-nā góa só͘ bēng-lēng lín ê, chiū-sī lín ê sio-chè, kap pa̍t-hō ê chè, cha̍p-hūn chhú chi̍t-hūn ê mi̍h, kap chhiú-ni̍h ê kú-chè, í-ki̍p lí tùi Iâ-hô-hoa só͘ hē-goān ke̍k-hó ê mi̍h, lóng tio̍h tòa kàu hia.

12Lín kap lín ê kiáⁿ、cha-bó͘-kiáⁿ、奴僕、女婢，lóng tio̍h歡喜tī耶和華lín上帝ê面前；利未人tiàm tī lín ê門內ê也是án-ni，因為in tī lín中間無份無業。Lín kap lín ê kiáⁿ, cha-bó͘-kiáⁿ, lô͘-po̍k, lú-pī, lóng tio̍h hoaⁿ-hí tī Iâ-hô-hoa lín Siōng-tè ê bīn-chêng; Lī-bī lâng tiàm tī lín ê mn̂g-lāi-ê iā sī án-ni, in-ūi in tī lín tiong-kan bô-hūn bô-gia̍p.

13你tio̍h家己謹慎，m̄-thang tī你看合意ê所在獻lín ê燒祭；Lí tio̍h ka-kī kín-sīn, m̄-thang tī lí khòaⁿ kah-ì ê só͘-chāi hiàn lín ê sio-chè;

14獨獨tī你chiah-ê支派中ê一個，耶和華所beh揀ê所在，lín tī-hia tio̍h獻你ê燒祭；koh tī-hia行我一切所命令你ê。to̍k-to̍k tī lí chiah ê chi-phài tiong ê chi̍t-ê, Iâ-hô-hoa só͘ beh kéng ê só͘-chāi, lín tī-hia tio̍h hiàn lí ê sio-chè; koh tī-hia kiâⁿ góa it-chhè só͘ bēng-lēng lí ê.

15總是你tī你ta̍k-ê門內，thang照耶和華你上帝所賞賜你ê福份，照你ê心所ài，thâi cheng-siⁿ食肉；無論清氣ê人，無清氣ê人，lóng thang食伊，親像食羚羊kap鹿一般。Chóng-sī lí tī lí ta̍k ê mn̂g-lāi, thang chiàu Iâ-hô-hoa lí Siōng-tè só͘ siúⁿ-sù lí ê hok-hūn, chiàu lí ê sim só͘ ài, thâi cheng-siⁿ chia̍h-bah; bô-lūn chheng-khì ê lâng, bô chheng-khì ê lâng, lóng thang chia̍h i, chhin-chhiūⁿ chia̍h lêng-iông kap lo̍k chi̍t-poaⁿ.

16總是血m̄-thang食，tio̍h piàⁿ tī地裡，親像piàⁿ水一樣。Chóng-sī huih m̄-thang chia̍h, tio̍h piàⁿ tī tōe-ni̍h, chhin-chhiūⁿ piàⁿ-chúi chi̍t-iūⁿ.

17你ê五穀、酒、油，十份ê一份，或是牛群羊群中頭水生ê，或是你下願獻ê，甘心獻ê，或是手裡ê舉祭，lóng m̄-thang tī你ê門內食伊；Lí ê ngó͘-kok, chiú, iû, cha̍p-hūn ê chi̍t-hūn, he̍k-sī gû-kûn iûⁿ-kûn tiong thâu-chúi siⁿ-ê, he̍k-sī lí hē-goān hiàn-ê, kam-sim hiàn-ê, he̍k-sī chhiú-ni̍h ê kú-chè, lóng m̄-thang tī lí ê mn̂g-lāi chia̍h i;

18獨獨tī耶和華你ê上帝ê面前食伊，就是tī耶和華你ê上帝所beh揀ê所在，你kap你ê kiáⁿ，你ê cha-bó͘-kiáⁿ、奴僕、女婢，以及tiàm tī你門內ê利未人，lóng tio̍h食伊；見若你ê手所做ê，tī耶和華你上帝ê面前，thang歡喜。to̍k-to̍k tī Iâ-hô-hoa lí ê Siōng-tè ê bīn-chêng chia̍h i, chiū-sī tī Iâ-hô-hoa lí ê Siōng-tè só͘ beh kéng ê só͘-chāi, lí kap lí ê kiáⁿ, lí ê cha-bó͘-kiáⁿ, lô͘-po̍k, lú-pī, í-ki̍p tiàm tī lí mn̂g-lāi ê Lī-bī lâng, lóng tio̍h chia̍h i; kìⁿ-nā lí ê chhiú só͘ chòe ê, tī Iâ-hô-hoa lí Siōng-tè ê bīn-chêng, thang hoaⁿ-hí.

19你tio̍h家己謹慎，tī你ê地方，一世人m̄-thang放sak利未人。Lí tio̍h ka-kī kín-sīn, tī lí ê tōe-hng, chi̍t-sì-lâng m̄-thang pàng-sak Lī-bī lâng.

20耶和華你ê上帝照伊所應允你ê，開闊你ê境界ê時，你ê心ài食肉，所以講：我beh食肉，就thang照你ê心所ài ê來食肉。Iâ-hô-hoa lí ê Siōng-tè chiàu I só͘ èng-ún lí ê, khui-khoah lí ê kéng-kài ê sî, lí ê sim ài chia̍h-bah, só͘-í kóng, Góa beh chia̍h-bah, chiū thang chiàu lí ê sim só͘-ài ê lâi chia̍h-bah.

21耶和華你ê上帝所揀beh安置伊ê名ê所在，若離開你真遠，就thang照我所命令你ê，將耶和華賞賜你ê牛、羊，取來thâi伊，thang照心所ài ê，tī你ê門內食伊。Iâ-hô-hoa lí ê Siōng-tè só͘ kéng beh an-tì I ê miâ ê só͘-chāi, nā lī-khui lí chin-hn̄g, chiū thang chiàu góa só͘ bēng-lēng lí ê, chiong Iâ-hô-hoa siúⁿ-sù lí ê gû, iûⁿ, chhú lâi thâi i, thang chiàu sim só͘-ài ê, tī lí ê mn̂g-lāi chia̍h i.

22你食伊，親像食羚羊kap鹿一般；無清氣kap清氣ê人平平thang食；Lí chia̍h i, chhin-chhiūⁿ chia̍h lêng-iông kap lo̍k chi̍t-poaⁿ; bô chheng-khì kap chheng-khì ê lâng pîⁿ-pîⁿ thang chia̍h;

23獨獨你tio̍h決意，m̄-thang食血，因為血是活命；你m̄-thang食肉，續食伊ê活命；to̍k-to̍k lí tio̍h koat-ì, m̄-thang chia̍h huih, in-ūi huih sī oa̍h-miā; lí m̄-thang chia̍h bah, sòa chia̍h i ê oa̍h-miā;

24m̄-thang食伊，tio̍h piàⁿ tī地裡，親像piàⁿ水一樣；m̄-thang chia̍h i, tio̍h piàⁿ tī tōe-ni̍h, chhin-chhiūⁿ piàⁿ chúi chi̍t-iūⁿ;

25m̄-thang食伊；án-ni你行耶和華所看做tio̍h ê事，你kap你ê kiáⁿ孫就會得tio̍h福氣。m̄-thang chia̍h i; án-ni lí kiâⁿ Iâ-hô-hoa só͘ khòaⁿ-chòe tio̍h ê sū, lí kap lí ê kiáⁿ-sun chiū ōe tit-tio̍h hok-khì.

26獨獨你所有ê聖物，kap你所下願ê，tio̍h帶到耶和華所beh揀ê所在。To̍k-to̍k lí só͘ ū ê sèng-mi̍h, kap lí só͘ hē-goān ê, tio̍h tòa kàu Iâ-hô-hoa só͘ beh kéng ê só͘-chāi.

27你ê燒祭，肉kap血，tio̍h獻tī耶和華你上帝ê壇頂；你祭物ê血，tio̍h piàⁿ tī耶和華你上帝ê壇；hit-ê肉，你thang食。Lí ê sio-chè, bah kap huih, tio̍h hiàn tī Iâ-hô-hoa lí Siōng-tè ê tôaⁿ-téng; lí chè-mi̍h ê huih, tio̍h piàⁿ tī Iâ-hô-hoa lí Siōng-tè ê tôaⁿ; hit ê bah, lí thang chia̍h.

28你tio̍h執守，聽thàn我命令你一切ê話，行耶和華你上帝所看做好做tio̍h ê事；án-ni你kap你ê後裔就thang永遠得tio̍h福氣。Lí tio̍h chip-siú, thiaⁿ-thàn góa bēng-lēng lí it-chhè ê ōe, kiâⁿ Iâ-hô-hoa lí Siōng-tè só͘ khòaⁿ-chòe hó chòe-tio̍h ê sū; án-ni lí kap lí ê hō͘-è chiū thang éng-oán tit-tio̍h hok-khì.

29耶和華你ê上帝tùi對你ê面前除滅你所beh去承接ê國，你承接伊，來khiā起伊ê地；Iâ-hô-hoa lí ê Siōng-tè tùi lí ê bīn-chêng tû-bia̍t lí só͘ beh khì sêng-chiap ê kok, lí sêng-chiap i, lâi khiā-khí i ê tōe;

30Hit時你tio̍h家己謹慎，m̄-thang tī in tùi lín ê面前除滅了後，陷落in ê羅網，來tè in；也m̄-thang探聽in ê上帝ê事，講：Chiah-ê國怎樣服事in ê上帝，我也beh án-ni行。hit-sî lí tio̍h ka-kī kín-sīn, m̄-thang tī in tùi lín ê bīn-chêng tû-bia̍t liáu-āu, hām-lo̍h in ê lô-bāng, lâi tè in; iā m̄-thang thàm-thiaⁿ in ê siōng-tè ê sū, kóng, Chiah ê kok cháiⁿ-iūⁿ ho̍k-sāi in ê siōng-tè, góa iā beh án-ni kiâⁿ.

31你m̄-thang對耶和華你ê上帝án-ni行；因為in對in ê上帝行耶和華一切所痛恨厭惡ê事；甚至用in ê kiáⁿ cha-bó͘-kiáⁿ用火燒，獻hō͘ in ê上帝。Lí m̄-thang tùi Iâ-hô-hoa lí ê Siōng-tè án-ni kiâⁿ; in-ūi in tùi in ê siōng-tè kiâⁿ Iâ-hô-hoa it-chhè só͘ thòng-hūn iàm-ò͘ⁿ ê sū; sīm-chì ēng in ê kiáⁿ cha-bó͘-kiáⁿ ēng hé sio, hiàn hō͘ in ê siōng-tè.

32見若我所命令lín ê，lín lóng tio̍h執守來行；你m̄-thang加添，也m̄-thang減少。Kìⁿ-nā góa só͘ bēng-lēng lín ê, lín lóng tio̍h chip-siú lâi kiâⁿ; lí m̄-thang ke-thiⁿ, iā m̄-thang kiám-chió.