1Ta̍k-pái到七年ê路尾，你tio̍h行tháu放。Ta̍k-pái kàu chhit-nî ê lō͘-bé, lí tio̍h kiâⁿ tháu-pàng.

2tháu放ê例，就是án-ni；凡若債主借厝邊ê，tio̍h tháu放；m̄-thang對你ê厝邊kap兄弟追討；因為耶和華ê tháu放已經宣布lah。Tháu-pàng ê lē, chiū-sī án-ni; hoān-nā chè-chú chioh chhù-piⁿ-ê, tio̍h tháu-pàng; m̄-thang tùi lí ê chhù-piⁿ kap hiaⁿ-tī tui-thó; in-ūi Iâ-hô-hoa ê tháu-pàng í-keng soan-pò͘ lah.

3若是外國人你thang kā伊追討所欠ê；獨獨你ê物tī你ê兄弟ê，你ê手tio̍h tháu放伊。Nā-sī gōa-kok lâng lí thang kā i tui-thó só͘ khiàm ê; to̍k-to̍k lí ê mi̍h tī lí ê hiaⁿ-tī ê, lí ê chhiú tio̍h tháu-pàng i.

4你若留心聽耶和華你上帝ê話，執守來行我今á日所命令你這一切ê誡命，就beh tī lín中間無sòng-hiong人；因為tī耶和華你ê上帝所賞賜你做業ê地，耶和華beh大大賜福你。Lí nā liû-sim thiaⁿ Iâ-hô-hoa lí Siōng-tè ê ōe, chip-siú lâi kiâⁿ góa kin-á-ji̍t só͘ bēng-lēng lí che it-chhè ê kài-bēng, chiū beh tī lín tiong-kan bô sòng-hiong lâng; in-ūi tī Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe, Iâ-hô-hoa beh tōa-tōa sù-hok lí.

6因為耶和華你ê上帝beh照伊所應允賜福你；你beh借hō͘ chōe-chōe國，也你m̄免借；你beh管轄chōe-chōe國，也in bōe管轄你。In-ūi Iâ-hô-hoa lí ê Siōng-tè beh chiàu I só͘ èng-ún sù-hok lí; lí beh chioh hō͘ chōe-chōe kok, iā lí m̄-bián chioh; lí beh koán-hat chōe-chōe kok, iā in bōe koán-hat lí.

7Tī耶和華你ê上帝所賞賜你ê地，若tī你一個城門內，你ê兄弟中，有一個sòng-hiong人kap你tī-teh，就m̄-thang對你sòng-hiong ê兄弟硬你ê心，kiu你ê手；Tī Iâ-hô-hoa lí ê Siōng-tè só͘ siúⁿ-sù lí ê tōe, nā tī lí chi̍t ê siâⁿ-mn̂g-lāi, lí ê hiaⁿ-tī tiong, ū chi̍t ê sòng-hiong lâng kap lí tī-teh, chiū m̄-thang tùi lí sòng-hiong ê hiaⁿ-tī ngī lí ê sim, kiu lí ê chhiú;

8的確tio̍h對伊開你ê手，照伊所欠用ê借伊，補伊ê無夠。tek-khak tio̍h tùi i khui lí ê chhiú, chiàu i só͘ khiàm-ēng ê chioh i, pó͘ i ê bô-kàu.

9你tio̍h家己謹慎，驚了你心內有pháiⁿ念頭，講：第七年，tháu放ê年，近lah，你就gîn你sòng-hiong ê兄弟，lóng m̄ hō͘伊，致到伊為tio̍h你求叫耶和華，你就有罪；Lí tio̍h ka-kī kín-sīn, kiaⁿ-liáu lí sim-lāi ū pháiⁿ liām-thâu, kóng, Tē-chhit nî, tháu-pàng ê nî, kūn lah, lí chiū gîn lí sòng-hiong ê hiaⁿ-tī, lóng m̄ hō͘ i, tì-kàu i ūi-tio̍h lí kiû-kiò Iâ-hô-hoa, lí chiū ū-chōe;

10你的確tio̍h hō͘伊；hō͘伊ê時，心內m̄-thang煩惱；因為tùi chit-ê事，耶和華你ê上帝beh tī你一切所行ê，kap你ê手所做ê，賜福你。lí tek-khak tio̍h hō͘ i; hō͘ i ê sî, sim-lāi m̄-thang hoân-ló; in-ūi tùi chit ê sū, Iâ-hô-hoa lí ê Siōng-tè beh tī lí it-chhè só͘ kiâⁿ ê, kap lí ê chhiú só͘ chòe ê, sù-hok lí.

11因為tī hit所在，sòng-hiong人永bōe斷；所以我命令你講，Tī你ê境內，的確tio̍h對你ê兄弟，sòng-hiong ê，欠缺ê，來開你ê手。In-ūi tī hit só͘-chāi, sòng-hiong lâng éng bōe tn̄g; só͘-í góa bēng-lēng lí kóng, Tī lí ê kéng-lāi, tek-khak tio̍h tùi lí ê hiaⁿ-tī, sòng-hiong ê, khiàm-kheh ê, lâi khui lí ê chhiú.

12你ê兄弟中，若有一個希伯來ê ta-po͘人，á是希伯來ê cha-bó͘人，賣hō͘你，服事你六年；到第七年，就tháu放伊去自由。Lí ê hiaⁿ-tī tiong, nā ū chi̍t-ê Hi-pek-lâi ê ta-po͘-lâng, á-sī Hi-pek-lâi ê cha-bó͘-lâng, bōe hō͘ lí, ho̍k-sāi lí la̍k-nî; kàu tē-chhit nî, chiū tháu-pàng i khì chū-iû.

13你tháu放伊去自由ê時，m̄-thang hō͘伊空手去；Lí tháu-pàng i khì chū-iû ê sî, m̄-thang hō͘ i khang-chhiú khì;

14tio̍h對你ê羊群、五穀場、酒窟中，chōe-chōe hō͘伊；照耶和華你上帝所賜福你ê，來hō͘伊。tio̍h tùi lí ê iûⁿ-kûn, gō͘-kak-tiûⁿ, chiú-khut tiong, chōe-chōe hō͘ i; chiàu Iâ-hô-hoa lí Siōng-tè só͘ sù-hok lí ê, lâi hō͘ i.

15Tio̍h記得你tī埃及地做奴才，耶和華你ê上帝救贖你；因為án-ni，我今á日命令你chit-ê事。Tio̍h kì-tit lí tī Ai-ki̍p tōe chòe lô͘-châi, Iâ-hô-hoa lí ê Siōng-tè kiù-sio̍k lí; in-ūi án-ni, góa kin-á-ji̍t bēng-lēng lí chit ê sū.

16伊若對你講，我無beh離開你，因為伊疼你kap你ê家眷，koh因為tiàm你hia khiā真好；I nā tùi lí kóng, Góa bô beh lī-khui lí, in-ūi i thiàⁿ lí kap lí ê ke-koàn, koh in-ūi tiàm lí hia khiā chin-hó;

17你tio̍h用鑽á tùi門裡貫(kǹg)伊ê耳á，伊就永永做你ê奴僕。你款待你ê女婢也是án-ni。lí tio̍h ēng chǹg-á tùi mn̂g-ni̍h kǹg i ê hī-á, i chiū éng-éng chòe lí ê lô͘-po̍k. Lí khoán-thāi lí ê lú-pī iā sī án-ni.

18你tháu放伊去自由ê時，m̄-thang掠做刻虧，因為伊服事你六年，比倩工ê重倍值；耶和華你ê上帝beh tī你所做一切ê事，賜福你。Lí tháu-pàng i khì chū-iû ê sî, m̄-thang lia̍h-chòe khek-khui, in-ūi i ho̍k-sāi lí la̍k-nî, pí chhiàⁿ-kang-ê têng-pē ta̍t; Iâ-hô-hoa lí ê Siōng-tè beh tī lí só͘ chòe it-chhè ê sū, sù-hok lí.

19見若牛群羊群，頭水生ê，公ê，你tio̍h分別做聖，歸hō͘耶和華你ê上帝；牛群頭水生ê，m̄-thang做工；羊群頭水生ê，m̄-thang剪伊ê毛。Kìⁿ-nā gû-kûn iûⁿ-kûn, thâu-chúi-siⁿ-ê, kang-ê, lí tio̍h hun-piat chòe-sèng, kui hō͘ Iâ-hô-hoa lí ê Siōng-tè; gû-kûn thâu-chúi-siⁿ-ê, m̄-thang chòe-kang; iûⁿ-kûn thâu-chúi-siⁿ-ê, m̄-thang chián i ê mn̂g.

20你kap你ê家眷，ta̍k年tio̍h食伊tī耶和華你上帝ê面前，就是tī耶和華所beh揀ê所在。Lí kap lí ê ke-koàn, ta̍k-nî tio̍h chia̍h i tī Iâ-hô-hoa lí Siōng-tè ê bīn-chêng, chiū-sī tī Iâ-hô-hoa só͘ beh kéng ê só͘-chāi.

21若有破相ê，或是跛腳，或是chhiⁿ-mî，無論有甚麼pháiⁿ ê破相，lóng m̄-thang做祭獻hō͘耶和華你ê上帝；Nā ū phòa-siùⁿ ê, he̍k-sī pái-kha, he̍k-sī chhiⁿ-mî, bô-lūn ū sím-mi̍h pháiⁿ ê phòa-siùⁿ, lóng m̄-thang chòe-chè hiàn hō͘ Iâ-hô-hoa lí ê Siōng-tè;

22thang tī你ê門內食伊；無清氣kap清氣ê人lóng thang，親像食羚羊kap鹿一樣；thang tī lí ê mn̂g-lāi chia̍h i; bô chheng-khì kap chheng-khì ê lâng lóng thang, chhin-chhiūⁿ chia̍h lêng-iông kap lo̍k chi̍t-iūⁿ;

23獨獨m̄-thang食伊ê血；tio̍h piàⁿ tī地裡，親像piàⁿ水一樣。to̍k-to̍k m̄-thang chia̍h i ê huih; tio̍h piàⁿ tī tōe-ni̍h, chhin-chhiūⁿ piàⁿ chúi chi̍t-iūⁿ.

1你tio̍h注意A-pit月，來守耶和華你上帝ê pôaⁿ過節；因為耶和華你上帝tī A-pit月暝時chhōa你出埃及。Lí tio̍h chù-ì A-pit ge̍h, lâi siú Iâ-hô-hoa lí Siōng-tè ê pôaⁿ-kè-choeh; in-ūi Iâ-hô-hoa lí Siōng-tè tī A-pit ge̍h mî-sî chhōa lí chhut Ai-ki̍p.

2你tio̍h tī耶和華所beh揀來安置伊ê名ê所在，對你ê羊群牛群，用逾越節ê cheng-siⁿ，獻祭hō͘耶和華你ê上帝。Lí tio̍h tī Iâ-hô-hoa só͘ beh kéng lâi an-tì I ê miâ ê só͘-chāi, tùi lí ê iûⁿ-kûn gû-kûn, ēng jû-oa̍t-choeh ê cheng-siⁿ, hiàn-chè hō͘ Iâ-hô-hoa lí ê Siōng-tè.

3你m̄-thang用有酵ê餅chham teh食；七日久你tio̍h用無酵ê餅chham teh食，就是困苦ê餅；beh hō͘你一生ê日記得你出埃及地ê日；因為你出埃及地ê時真趕緊。Lí m̄-thang ēng ū-kàⁿ ê piáⁿ chham teh chia̍h; chhit-ji̍t kú lí tio̍h ēng bô-kàⁿ ê piáⁿ chham teh chia̍h, chiū-sī khùn-khó͘ ê piáⁿ; beh hō͘ lí it-seng ê ji̍t kì-tit lí chhut Ai-ki̍p tōe ê ji̍t; in-ūi lí chhut Ai-ki̍p tōe ê sî chin kóaⁿ-kín.

4Tī你ê 四境內，七日久lóng m̄-thang看見酵；頭一日ê-hng所獻ê祭肉，m̄-thang留一點á到天光。Tī lí ê sì-kéng-lāi, chhit-ji̍t kú lóng m̄-thang khòaⁿ-kìⁿ kàⁿ; thâu-chi̍t-ji̍t ê-hng só͘ hiàn ê chè-bah, m̄-thang lâu chi̍t-tiám-á kàu thiⁿ-kng.

5Tī耶和華你上帝所賞賜hiah-ê城門內，你m̄-thang獻pôaⁿ過節ê祭。Tī Iâ-hô-hoa lí Siōng-tè só͘ siúⁿ-sù hiah ê siâⁿ-mn̂g-lāi lí m̄-thang hiàn pôaⁿ-kè-choeh ê chè.

6獨獨tio̍h tī耶和華你上帝所beh揀做安置伊ê名ê所在，到ê-hng日落ê時，就是你出埃及ê時，tio̍h獻pôaⁿ過節ê祭；To̍k-to̍k tio̍h tī Iâ-hô-hoa lí Siōng-tè só͘ beh kéng chòe an-tì I ê miâ ê só͘-chāi, kàu ê-hng ji̍t-lo̍h ê sî, chiū-sī lí chhut Ai-ki̍p ê sî, tio̍h hiàn pôaⁿ-kè-choeh ê chè;

7tio̍h tī耶和華你上帝所beh揀ê所在，pek來食伊；隔早起你oa̍t-tò去你ê布棚。tio̍h tī Iâ-hô-hoa lí Siōng-tè só͘ beh kéng ê só͘-chāi, pek lâi chia̍h i; keh chá-khí lí oa̍t-tò-khì lí ê pò͘-pîⁿ.

8你tio̍h食無酵餅六日；第七日你tio̍h守耶和華你上帝ê嚴肅會；lóng m̄-thang做工。Lí tio̍h chia̍h bô-kàⁿ-piáⁿ la̍k-ji̍t; tē-chhit ji̍t lí tio̍h siú Iâ-hô-hoa lí Siōng-tè ê giâm-siok-hōe; lóng m̄-thang chòe-kang.

9你tio̍h為家己算七個七日；對你起頭用鐮á割五穀ê時，就算七個七日。Lí tio̍h ūi ka-kī sǹg chhit ê chhit-ji̍t; tùi lí khí-thâu ēng liâm-á koah ngó͘-kok ê sî, chiū sǹg chhit ê chhit-ji̍t.

10你tio̍h tī耶和華你上帝ê面前守七七日節；將你ê手ê禮物奉獻，是照你ê心所願ê，也照耶和華你ê上帝賜福你ê。Lí tio̍h tī Iâ-hô-hoa lí Siōng-tè ê bīn-chêng siú chhit-chhit-ji̍t-choeh; chiong lí ê chhiú ê lé-mi̍h hōng-hiàn, sī chiàu lí ê sim só͘ goān-ê, iā chiàu Iâ-hô-hoa lí ê Siōng-tè sù-hok lí ê.

11你kap你ê kiáⁿ、cha-bó͘-kiáⁿ、奴僕、女婢，kap tiàm tī你城門內ê利未人，以及tī lín中間寄腳ê，kap孤兒、寡婦，lóng tio̍h tī耶和華你ê上帝所beh揀安置伊ê名ê所在，tī耶和華你上帝ê面前歡喜。Lí kap lí ê kiáⁿ, cha-bó͘-kiáⁿ, lô͘-po̍k, lú-pī, kap tiàm tī lí siâⁿ-mn̂g-lāi ê Lī-bī lâng, í-ki̍p tī lín tiong-kan kià-kha-ê, kap ko͘-jî, kóaⁿ-hū, lóng tio̍h tī Iâ-hô-hoa lí ê Siōng-tè só͘ beh kéng an-tì I ê miâ ê só͘-chāi, tī Iâ-hô-hoa lí Siōng-tè ê bīn-chêng hoaⁿ-hí.

12你tio̍h記得你tī埃及bat做奴才；你tio̍h執守來行chiah-ê律例。Lí tio̍h kì-tit lí tī Ai-ki̍p bat chòe lô͘-châi; lí tio̍h chip-siú lâi kiâⁿ chiah ê lu̍t-lē.

13五穀場kap酒窟所出ê，你收khǹg了後，tio̍h守搭草寮á節七日；Gō͘-kak-tiûⁿ kap chiú-khut só͘ chhut ê, lí siu-khǹg liáu-āu, tio̍h siú tah chháu-liâu-á choeh chhit-ji̍t;

14守節 ê時，你kap你ê kiáⁿ、cha-bó͘-kiáⁿ、奴僕、女婢，kap tiàm tī你城門內ê利未人，以及寄腳ê，kap孤兒、寡婦，lóng tio̍h歡喜。siú choeh ê sî, lí kap lí ê kiáⁿ, cha-bó͘-kiáⁿ, lô͘-po̍k, lú-pī, kap tiàm tī lí siâⁿ-mn̂g-lāi ê Lī-bī lâng, í-ki̍p kià-kha-ê, kap ko͘-jî, kóaⁿ-hū, lóng tio̍h hoaⁿ-hí.

15Tī耶和華所beh揀ê所在，你tio̍h守耶和華你ê上帝ê節七日；因為耶和華你ê上帝tī你一切ê物產，kap你ê手一切所做ê，beh賜福你，你就真大歡喜。Tī Iâ-hô-hoa só͘ beh kéng ê só͘-chāi, lí tio̍h siú Iâ-hô-hoa lí ê Siōng-tè ê choeh chhit-ji̍t; in-ūi Iâ-hô-hoa lí ê Siōng-tè tī lí it-chhè ê bu̍t-sán, kap lí ê chhiú it-chhè só͘ chòe ê, beh sù-hok lí, lí chiū chin tōa hoaⁿ-hí.

16你一切ê ta-po͘丁，tio̍h tī除酵節，七七節，搭寮á節，一年三pái，lóng到耶和華你上帝ê面前，tī伊所beh揀ê所在；也m̄-thang空手到耶和華ê面前；Lí it-chhè ê ta-po͘-teng, tio̍h tī tû-kàⁿ-choeh, chhit-chhit-choeh, tah-liâu-á choeh, chi̍t-nî saⁿ-pái, lóng kàu Iâ-hô-hoa lí Siōng-tè ê bīn-chêng, tī I só͘ beh kéng ê só͘-chāi; iā m̄-thang khang-chhiú kàu Iâ-hô-hoa ê bīn-chêng;

17ta̍k人tio̍h照伊ê氣力來獻，就是照耶和華你上帝所賞賜你ê福份。ta̍k-lâng tio̍h chiàu i ê khùi-la̍t lâi hiàn, chiū-sī chiàu Iâ-hô-hoa lí Siōng-tè só͘ siúⁿ-sù lí ê hok-hūn.

18你tio̍h tī耶和華你ê上帝所賞賜ta̍k-ê城門內，照你hiah-ê支派，為家己設立審判官kap官長；in tio̍h照公義ê判斷，來審判百姓。Lí tio̍h tī Iâ-hô-hoa lí ê Siōng-tè só͘ siúⁿ-sù ta̍k ê siâⁿ-mn̂g-lāi, chiàu lí hiah ê chi-phài, ūi ka-kī siat-li̍p sím-phòaⁿ-koaⁿ kap koaⁿ-tiúⁿ; in tio̍h chiàu kong-gī ê phòaⁿ-toàn, lâi sím-phòaⁿ peh-sìⁿ.

19你ê審判m̄-thang冤枉，m̄-thang看人ê外貌，也m̄-thang受pò͘賂；因為pò͘賂會hō͘智慧ê人目睭chhiⁿ-mî，koh會 hō͘義人ê話péng-倒tńg。Lí ê sím-phòaⁿ m̄-thang oan-óng, m̄-thang khòaⁿ lâng ê gōa-māu, iā m̄-thang siū pò͘-lō͘; in-ūi pò͘-lō͘ ōe hō͘ tì-hūi ê lâng ba̍k-chiu chhiⁿ-mî, koh ōe hō͘ gī-lâng ê ōe péng-tò-tńg.

20你tio̍h追jip至公至義，hō͘你能活，承接耶和華你上帝所賞賜你ê地。Lí tio̍h tui-jip chì-kong chì-gī, hō͘ lí ōe oa̍h, sêng-chiap Iâ-hô-hoa lí Siōng-tè só͘ siúⁿ-sù lí ê tōe.

21你為家己所起耶和華你上帝ê壇，m̄-thang tī hit邊á栽甚麼樹木，做A-sià-la̍h；Lí ūi ka-kī só͘ khí Iâ-hô-hoa lí Siōng-tè ê tôaⁿ, m̄-thang tī hit piⁿ-á chai sím-mi̍h chhiū-ba̍k, chòe A-sià-la̍h;

22也m̄-thang為家己chhāi雕刻ê柱；這是耶和華你ê上帝所怨恨ê。iā m̄-thang ūi ka-kī chhāi tiau-khek ê thiāu; che sī Iâ-hô-hoa lí ê Siōng-tè só͘ oàn-hūn ê.

1見有破相，á是有甚麼pháiⁿ樣ê牛羊，你m̄-thang祭獻耶和華你ê上帝；因為這是耶和華你ê上帝所厭惡ê。Kìⁿ-ū phòa-siùⁿ, á-sī ū sím-mi̍h pháiⁿ-iūⁿ ê gû iûⁿ, lí m̄-thang chè-hiàn Iâ-hô-hoa lí ê Siōng-tè; in-ūi che sī Iâ-hô-hoa lí ê Siōng-tè só͘ iàm-ò͘ⁿ ê.

2Tī lín中間，tī耶和華你上帝所賞賜你hiah-ê城ê中間，若tú-tio̍h有人，或是男，或是女，行耶和華你上帝所看做pháiⁿ-ê，違背伊ê約，Tī lín tiong-kan, tī Iâ-hô-hoa lí Siōng-tè só͘ siúⁿ-sù lí hiah ê siâⁿ ê tiong-kan, nā tú-tio̍h ū lâng, he̍k-sī lâm, he̍k-sī lú, kiâⁿ Iâ-hô-hoa lí Siōng-tè só͘ khòaⁿ-chòe pháiⁿ-ê, ûi-pōe I ê iok,

3去服事別ê上帝來敬拜伊，或是日，或是月，á是天頂ê萬象，是我所bē-bat命令ê；khì ho̍k-sāi pa̍t ê siōng-tè lâi kèng-pài i, he̍k-sī ji̍t, he̍k-sī ge̍h, á-sī thiⁿ-téng ê bān-siōng, sī góa só͘ bē-bat bēng-lēng-ê;

4若有人kā你講，你也已經聽見，就tio̍h詳細探聽；看ah，果然有影，實在有chit-ê可惡ê事，行tī以色列中；nā ū lâng kā lí kóng, lí iā í-keng thiaⁿ-kìⁿ, chiū tio̍h siông-sè thàm-thiaⁿ; khòaⁿ ah, kó-jiân ū-iáⁿ, si̍t-chāi ū chit-ê khó-ò͘ⁿ ê sū, kiâⁿ tī Í-sek-lia̍t tiong;

5你tio̍h將行chit-ê pháiⁿ-tāi ê ta-po͘人，á是婦人人，拖到城門外，用石頭tìm hit-ê ta-po͘人，á是婦人人，hō͘伊死。lí tio̍h chiong kiâⁿ chit ê pháiⁿ-tāi ê ta-po͘-lâng, á-sī hū-jîn-lâng, thoa kàu siâⁿ-mn̂g-gōa, ēng chio̍h-thâu tìm hit ê ta-po͘-lâng, á-sī hū-jîn-lâng, hō͘ i sí.

6Tio̍h憑兩個干證，á是三個干證ê嘴，應該死ê tio̍h hō͘伊死；若憑一人ê嘴做干證，就m̄-thang hō͘伊死；Tio̍h pîn nn̄g ê kan-chèng, á-sī saⁿ ê kan-chèng ê chhùi, eng-kai sí-ê tio̍h hō͘ i sí; nā pîn chi̍t-lâng ê chhùi chòe kan-chèng, chiū m̄-thang hō͘ i sí;

7干證ê tio̍h做頭下手tìm伊，然後眾百姓也下手hō͘伊死；án-ni就tùi lín中間除去hit-ê pháiⁿ。kan-chèng-ê tio̍h chòe-thâu hē chhiú tìm i, jiân-āu chèng peh-sìⁿ iā hē chhiú hō͘ i sí; án-ni chiū tùi lín tiong-kan tû-khì hit ê pháiⁿ.

8你城門內若有冤家ê事，或是因為流血，或是因為相告，或是因為相phah，是你所bōe曉得斷ê，你就tio̍h起來，去耶和華你上帝所beh揀ê所在；Lí siâⁿ-mn̂g-lāi nā ū oan-ke ê sū, he̍k-sī in-ūi lâu-huih, he̍k-sī in-ūi saⁿ-kò, he̍k-sī in-ūi saⁿ-phah, sī lí só͘ bōe hiáu-tit toàn ê, lí chiū tio̍h khí-lâi, khì Iâ-hô-hoa lí Siōng-tè só͘ beh kéng ê só͘-chāi;

9見祭司利未人，kap當時ê審判官，來問in；in beh將判詞指示你；kìⁿ chè-si Lī-bī lâng, kap tng-sî ê sím-phòaⁿ-koaⁿ, lâi mn̄g in; in beh chiong phòaⁿ-sû chí-sī lí;

10in tī耶和華所beh揀ê所在指示你ê判詞，你tio̍h照án-ni行；見in所教示你ê，tio̍h執守來行伊；in tī Iâ-hô-hoa só͘ beh kéng ê só͘-chāi chí-sī lí ê phòaⁿ-sû, lí tio̍h chiàu án-ni kiâⁿ; kìⁿ in só͘ kà-sī lí ê, tio̍h chip-siú lâi kiâⁿ i;

11tio̍h照in所beh教示你法度ê宗旨，也tio̍h照in所kā你講ê判斷來行；in所指示你ê判詞，你m̄-thang偏左偏右。tio̍h chiàu in só͘ beh kà-sī lí hoat-tō͘ ê chong-chí, iā tio̍h chiàu in só͘ kā lí kóng ê phòaⁿ-toàn lâi kiâⁿ; in só͘ chí-sī lí ê phòaⁿ-sû, lí m̄-thang phian-chó phian-iū.

12若有人自專行，m̄聽祭司，就是tī-hia khiā-teh來服事耶和華你ê上帝ê，á是m̄聽審判官，就tio̍h hō͘ hit人死；án-ni你就tùi以色列中除去hit-ê pháiⁿ；Nā ū lâng chū-choan kiâⁿ, m̄-thiaⁿ chè-si, chiū-sī tī-hia khiā-teh lâi ho̍k-sāi Iâ-hô-hoa lí ê Siōng-tè ê, á-sī m̄-thiaⁿ sím-phòaⁿ-koaⁿ, chiū tio̍h hō͘ hit-lâng sí; án-ni lí chiū tùi Í-sek-lia̍t tiong tû-khì hit ê pháiⁿ;

13百姓beh lóng聽見來驚，無koh自專行。peh-sìⁿ beh lóng thiaⁿ-kìⁿ lâi kiaⁿ, bô koh chū-choan kiâⁿ.

14你到耶和華你上帝所賞賜你ê地，得tio̍h hit所在來khiā起ê時，若講，我beh設立王做我ê頭，親像我四圍ê列國一樣，Lí kàu Iâ-hô-hoa lí Siōng-tè só͘ siúⁿ-sù lí ê tōe, tit-tio̍h hit só͘-chāi lâi khiā-khí ê sî, nā kóng, Góa beh siat-li̍p ông chòe góa ê thâu, chhin-chhiūⁿ góa sì-ûi ê lia̍t-kok chi̍t-iūⁿ,

15你的確tio̍h設立耶和華你上帝所揀ê人做王，做你ê頭；對你ê兄弟中設立一人做王，做你ê頭；外國人，m̄是你ê兄弟ê，你m̄-thang設立做你ê頭。lí tek-khak tio̍h siat-li̍p Iâ-hô-hoa lí Siōng-tè só͘ kéng ê lâng chòe-ông, chòe lí ê thâu; tùi lí ê hiaⁿ-tī tiong siat-li̍p chi̍t-lâng chòe-ông, chòe lí ê thâu; gōa-kok lâng, m̄-sī lí ê hiaⁿ-tī ê, lí m̄-thang siat-li̍p chòe lí ê thâu.

16總是王m̄-thang為tio̍h家己加添chōe-chōe隻馬，也m̄-thang為tio̍h beh加添khah-chōe隻馬，hō͘百姓tò去埃及，因為耶和華bat命令lín講：Lín莫koh tùi hit條路tò去。Chóng-sī ông m̄-thang ūi-tio̍h ka-kī ke-thiⁿ chōe-chōe chiah bé, iā m̄-thang ūi-tio̍h beh ke-thiⁿ khah-chōe chiah bé, hō͘ peh-sìⁿ tò-khì Ai-ki̍p, in-ūi Iâ-hô-hoa bat bēng-lēng lín kóng, Lín bo̍h koh tùi hit tiâu lō͘ tò-khì.

17伊也m̄-thang為家己娶chōe-chōe后妃，驚了伊ê心悖謬；伊也m̄-thang為本身積聚chōe-chōe金銀。I iā m̄-thang ūi ka-kī chhōa chōe-chōe hō͘-hui, kiaⁿ-liáu i ê sim pōe-biū; i iā m̄-thang ūi pún-sin chek-chū chōe-chōe kim-gûn.

18伊坐伊ê國位ê時，tio̍h用一本冊抄寫chit-ê律法，tio̍h tùi hit本存tī祭司利未人ê面前ê來抄伊；I chē i ê kok-ūi ê sî, tio̍h ēng chi̍t pún chheh chhau-siá chit ê lu̍t-hoat, tio̍h tùi hit-pún chûn tī chè-si Lī-bī lâng ê bīn-chêng ê lâi chhau i;

19Hit本tio̍h hē tī伊hia，一世人tio̍h讀伊；thang學習敬畏耶和華伊ê上帝；tio̍h執守chit-ê律法一切ê話，kap chiah-ê律例來行伊；hit-pún tio̍h hē tī i hia, chi̍t-sì-lâng tio̍h tha̍k i; thang ha̍k-si̍p kèng-ùi Iâ-hô-hoa i ê Siōng-tè; tio̍h chip-siú chit ê lu̍t-hoat it-chhè ê ōe, kap chiah ê lu̍t-lē lâi kiâⁿ i;

20免得伊自高來看輕兄弟；koh免得伊偏左偏右，來離開chit-ê誡命；thang hō͘伊kap伊ê kiáⁿ孫tī以色列中國位久長。bián-tit i chū-ko lâi khòaⁿ-khin hiaⁿ-tī; koh bián-tit i phian-chó phian-iū, lâi lī-khui chit ê kài-bēng; thang hō͘ i kap i ê kiáⁿ-sun tī Í-sek-lia̍t tiong kok-ūi kú-tn̂g.