1摩西tī約旦外，tī曠野Só͘-hut對面ê A-la̍h-pa，就是tī Pa-lân、Tô-hut、拉班、Hap-sé-lio̍k、Tí-sat-hap ê中間，對以色列ê眾人所講ê話，記tī下底。Mô͘-se tī Iok-tàn gōa, tī khòng-iá Só͘-hut tùi-bīn ê A-la̍h-pa, chiū-sī tī Pa-lân, Tô-hut, La̍h-pan, Hap-sé-lio̍k, Tí-sat-hap ê tiong-kan, tùi Í-sek-lia̍t ê chèng-lâng só͘ kóng ê ōe, kì tī ē-tóe.

2Tùi Hô-lia̍t經過Se-jíⁿ山ê路到Ka-te-su Pa-nî-a，有十一日ê路站。Tùi Hô-lia̍t keng-kè Se-jíⁿ soaⁿ ê lō͘ kàu Ka-te-su Pa-nî-a, ū cha̍p-it ji̍t ê lō͘-chām.

3Tī第四十年，十一月初一日，摩西照耶和華一切所命令伊ê，lóng kā以色列人講。Tī tē sì-cha̍p nî, cha̍p-it ge̍h chhoe-it ji̍t, Mô͘-se chiàu Iâ-hô-hoa it-chhè só͘ bēng-lēng i ê, lóng kā Í-sek-lia̍t lâng kóng.

4Hit時伊已經phah贏khiā起tī Hi-si̍t-pún ê A-mô͘-lī王Se-hông，kap khiā起tī Í-tek-lâi，A-su-tha-lio̍k ê Pa-san王Go̍k；Hit-sî i í-keng phah-iâⁿ khiā-khí tī Hi-si̍t-pún ê A-mô͘-lī ông Se-hông, kap khiā-khí tī Í-tek-lâi, A-su-tha-lio̍k ê Pa-san ông Go̍k;

5摩西tī約旦外ê Mô͘-ap地，起頭傳chit-ê律法講：Mô͘-se tī Iok-tàn gōa ê Mô͘-ap tōe, khí-thâu thoân chit ê lu̍t-hoat kóng,

6耶和華咱ê上帝tī Hô-lia̍t吩咐咱講：Lín khiā起chit-ê山已經久lah；Iâ-hô-hoa lán ê Siōng-tè tī Hô-lia̍t hoan-hù lán kóng, Lín khiā-khí chit ê soaⁿ í-keng kú lah;

7tio̍h起身oa̍t-tńg到A-mô͘-lī人ê山地，kap近óa hia ê ta̍k所在，tī A-la̍h-pa，tī山地，tī平洋，tī南方，沿海一帶，迦南人ê地，kap黎巴嫩，koh到大河，就是Pek-la̍h河。tio̍h khí-sin oa̍t-tńg kàu A-mô͘-lī lâng ê soaⁿ-tōe, kap kūn-óa hia ê ta̍k só͘-chāi, tī A-la̍h-pa, tī soaⁿ-tōe, tī pîⁿ-iûⁿ, tī lâm-hng, iân-hái it-tài, Ka-lâm lâng ê tōe, kap Lī-pa-lùn, koh kàu tōa-hô, chiū-sī Pek-la̍h hô.

8Taⁿ我用chit-ê地排列tī lín ê面前，lín tio̍h入去得tio̍h伊來做業，就是耶和華對lín ê祖，亞伯拉罕、以撒、雅各，chiù-chōa beh賞賜in kap in ê後裔ê地。Taⁿ Góa ēng chit ê tōe pâi-lia̍t tī lín ê bīn-chêng, lín tio̍h ji̍p-khì tit-tio̍h i lâi chòe gia̍p, chiū-sī Iâ-hô-hoa tùi lín ê chó͘, A-pek-la̍h-hán, Í-sat, Ngá-kok, chiù-chōa beh siúⁿ-sù in kap in ê hō͘-è ê tōe.

9Hit時我kā lín講：Lín ê責成，我家己一個擔當bōe起。Hit-sî góa kā lín kóng, Lín ê chek-sêng, góa ka-kī chi̍t-ê tam-tng bōe khí.

10耶和華lín ê上帝hō͘ lín加添chōe-chōe，看ah，lín今á日親像天頂ê星hiah-chōe。Iâ-hô-hoa lín ê Siōng-tè hō͘ lín ke-thiⁿ chōe-chōe, khòaⁿ ah, lín kin-á-ji̍t chhin-chhiūⁿ thiⁿ-téng ê chhiⁿ hiah-chōe.

11願耶和華lín列祖ê上帝，hō͘ lín比現今加千倍chōe，也照伊所應允lín ê賜福lín。Goān Iâ-hô-hoa lín lia̍t-chó͘ ê Siōng-tè, hō͘ lín pí hiān-kim ke chheng-pē chōe, iā chiàu I só͘ èng-ún lín-ê sù-hok lín.

12Lín ê重擔，lín ê責成，kap lín ê冤家，我家己一個thái-thó擔當能起ah？Lín ê tāng-tàⁿ, lín ê chek-sêng, kap lín ê oan-ke, góa ka-kī chi̍t-ê thái-thó tam-tng ōe khí ah?

13Lín tio̍h照ta̍k支派揀有智慧，有見識，有名望ê人，我設立in做lín ê首領。Lín tio̍h chiàu ta̍k chi-phài kéng ū tì-hūi, ū kiàn-sek, ū bêng-bōng ê lâng, góa siat-li̍p in chòe lín ê siú-léng.

14Lín應我講：你所講ê是好，thang行伊。Lín ìn góa kóng, Lí só͘-kóng-ê sī hó, thang kiâⁿ-i.

15我就將lín ta̍k支派ê首領，就是有智慧，有名望ê人，設立in做首領，就是千總、百總、五十夫長、十夫長，kap 有司，照lín ê支派，來管理lín。Góa chiū chiong lín ta̍k chi-phài ê siú-léng, chiū-sī ū tì-hūi, ū bêng-bōng ê lâng, siat-li̍p in chòe siú-léng, chiū-sī chhian-chóng, peh-chóng, ngó͘-si̍p-hu-tióng, si̍p-hu-tióng, kap iú-si, chiàu lín ê chi-phài, lâi koán-lí lín.

16當時我命令lín ê審判官講：Lín tī lín兄弟中審判，或是人kap伊ê兄弟，á是kap in中間ê出外人，有相告，tio̍h照公道判斷；Tng-sî góa bēng-lēng lín ê sím-phòaⁿ-koaⁿ kóng, Lín tī lín hiaⁿ-tī tiong sím-phòaⁿ, he̍k-sī lâng kap i ê hiaⁿ-tī, á-sī kap in tiong-kan ê chhut-gōa lâng, ū saⁿ-kò, tio̍h chiàu kong-tō phòaⁿ-toàn;

17審判ê時，m̄-thang看人ê外貌，弱kap強平平tio̍h聽伊；m̄-thang驚畏人；因為審判屬tī上帝；lín oh解決ê事，hō͘伊到我chia，我就判斷伊。sím-phòaⁿ ê sî, m̄-thang khòaⁿ lâng ê gōa-māu, jio̍k kap kiông pîⁿ-pîⁿ tio̍h thiaⁿ i; m̄-thang kiaⁿ-ùi lâng; in-ūi sím-phòaⁿ sio̍k tī Siōng-tè; lín oh kái-koat ê sū, hō͘ i kàu góa chia, góa chiū phòaⁿ-toàn i.

18Hit時我將lín所應該行ê事lóng命令lín。Hit-sî góa chiong lín só͘ eng-kai kiâⁿ ê sū lóng bēng-lēng lín.

19咱照耶和華咱ê上帝所命令咱ê，tùi Hô-lia̍t起身，經過lín所看見hit-ê大koh thang驚ê曠野，路tùi A-mô͘-lī人ê山地；咱就到Ka-te-su Pa-nî-a。Lán chiàu Iâ-hô-hoa lán ê Siōng-tè só͘ bēng-lēng lán ê, tùi Hô-lia̍t khí-sin, keng-kè lín só͘ khòaⁿ-kìⁿ hit ê tōa koh thang kiaⁿ ê khòng-iá, lō͘ tùi A-mô͘-lī lâng ê soaⁿ-tōe; lán chiū kàu Ka-te-su Pa-nî-a.

20我對lín講，Lín已經到耶和華咱ê上帝賞賜咱A-mô͘-lī人ê山地。Góa tùi lín kóng, Lín í-keng kàu Iâ-hô-hoa lán ê Siōng-tè siúⁿ-sù lán A-mô͘-lī lâng ê soaⁿ-tōe.

21看ah，耶和華lín ê上帝，已經將hit-ê地排列tī你ê面前；你tio̍h照耶和華你ê列祖ê上帝所對你講ê，上去來得tio̍h伊做業；莫得驚，莫得忍。Khòaⁿ ah, Iâ-hô-hoa lín ê Siōng-tè, í-keng chiong hit ê tōe pâi-lia̍t tī lí ê bīn-chêng; lí tio̍h chiàu Iâ-hô-hoa lí ê lia̍t-chó͘ ê Siōng-tè só͘ tùi lí kóng ê, chiūⁿ-khì lâi tit-tio̍h i chòe-gia̍p; bo̍h-tit kiaⁿ, bo̍h-tit lún.

22Hit時lín lóng就近我來講：咱tio̍h差人事先去，kā咱偷看hit-ê地，回覆咱，看咱tio̍h tùi甚麼路上去，甚麼城入去。Hit-sî lín lóng chiū-kūn góa lâi kóng, Lán tio̍h chhe lâng tāi-seng khì, kā lán thau-khòaⁿ hit ê tōe, hê-hok lán, khòaⁿ lán tio̍h tùi sím-mi̍h lō͘ chiūⁿ-khì, sím-mi̍h siâⁿ ji̍p-khì.

23這話我看做好；我就tùi lín中間揀十二人，每支派一人；Che ōe góa khòaⁿ chòe-hó; góa chiū tùi lín tiong-kan kéng cha̍p-jī lâng, múi chi-phài chi̍t lâng;

24in就oa̍t-tńg身上山地去，到Í-si̍t-kok ê山谷，偷看伊。in chiū oa̍t-tńg-sin chiūⁿ soaⁿ-tōe khì, kàu Í-si̍t-kok ê soaⁿ-kok, thau-khòaⁿ i.

25In手裡the̍h hit所在ê果子，帶來到咱hia，回覆咱講：耶和華咱ê上帝所賞賜咱ê，是好ê土地。In chhiú-ni̍h the̍h hit só͘-chāi ê ké-chí, tòa lâi kàu lán hia, hê-hok lán kóng, Iâ-hô-hoa lán ê Siōng-tè só͘ siúⁿ-sù lán-ê, sī hó ê thó͘-tōe.

26總是lín m̄肯上去，背耶和華lín ê上帝ê命令；Chóng-sī lín m̄-khéng chiūⁿ-khì, pōe Iâ-hô-hoa lín ê Siōng-tè ê bēng-lēng;

27koh tī lín ê布棚內哀怨講：因為耶和華怨恨咱，所以chhōa咱出埃及地，beh將咱交tī A-mô͘-lī人ê手，剿滅咱。koh tī lín ê pò͘-pîⁿ-lāi ai-oàn kóng, In-ūi Iâ-hô-hoa oàn-hūn lán, só͘-í chhōa lán chhut Ai-ki̍p tōe, beh chiong lán kau tī A-mô͘-lī lâng ê chhiú, châu-bia̍t lán.

28咱beh上去toh落ah？咱ê兄弟hō͘咱失志，講：Hia ê百姓比咱khah大khah lò，城闊大koh堅固，高到抵天；koh阮tī-hia看見A-la̍p族ê人。Lán beh chiūⁿ-khì toh-lo̍h ah? Lán ê hiaⁿ-tī hō͘ lán sit-chì, kóng, Hia ê peh-sìⁿ pí lán khah tōa khah lò, siâⁿ khoah-tōa koh kian-kò͘, koâiⁿ kàu tú-thiⁿ; koh goán tī-hia khòaⁿ-kìⁿ A-la̍p cho̍k ê lâng.

29我就對lín講，莫得忍，莫得驚in。Góa chiū tùi lín kóng, Bo̍h-tit lún, bo̍h-tit kiaⁿ in.

30行tī lín ê面前ê耶和華lín ê上帝，beh替lín交戰，親像伊tī埃及為tio̍h lín來行tī lín目睭前一切ê事；Kiâⁿ tī lín ê bīn-chêng ê Iâ-hô-hoa lín ê Siōng-tè, beh thòe lín kau-chiàn, chhin-chhiūⁿ I tī Ai-ki̍p ūi-tio̍h lín lâi kiâⁿ tī lín ba̍k-chiu-chêng it-chhè ê sū;

31koh親像伊行tī曠野，tī-hia你看見耶和華你ê上帝tī你一切所行ê路有怎樣iāng你，親像人iāng伊ê kiáⁿ一樣，到lín到tī chit-ê所在。koh chhin-chhiūⁿ I kiâⁿ tī khòng-iá, tī-hia lí khòaⁿ-kìⁿ Iâ-hô-hoa lí ê Siōng-tè tī lí it-chhè só͘ kiâⁿ ê lō͘ ū cháiⁿ-iūⁿ iāng lí, chhin-chhiūⁿ lâng iāng i ê kiáⁿ chi̍t-iūⁿ, kàu lín kàu tī chit ê só͘-chāi.

32總是lín tī chit-ê事m̄信耶和華lín ê上帝；Chóng-sī lín tī chit ê sū m̄-sìn Iâ-hô-hoa lín ê Siōng-tè;

33伊tī路裡，tī lín ê頭前teh行，kā lín chhē安營ê所在；暝時用火，日時用雲，指示lín所tio̍h行ê路。I tī lō͘-ni̍h, tī lín ê thâu-chêng teh kiâⁿ, kā lín chhē an-iâⁿ ê só͘-chāi; mî-sî ēng hé, ji̍t-sî ēng hûn, chí-sī lín só͘ tio̍h kiâⁿ ê lō͘.

34耶和華聽見chiah-ê話ê聲，就受氣，chiù-chōa講：Iâ-hô-hoa thiaⁿ-kìⁿ chiah ê ōe ê siaⁿ, chiū siū-khì, chiù-chōa kóng,

35Chit-ê pháiⁿ世代ê人決斷無一個能看見我chiù-chōa賞賜lín列祖ê好地；Chit ê pháiⁿ sè-tāi ê lâng koat-toàn bô chi̍t-ê ōe khòaⁿ-kìⁿ Góa chiù-chōa siúⁿ-sù lín lia̍t-chó͘ ê hó-tōe;

36只有Iâ-hu-年 ê kiáⁿ迦勒beh得tio̍h看見；koh我beh用伊所踏tio̍h ê地賞賜伊，kap伊ê kiáⁿ孫；因為伊專心tè耶和華。chí-ū Iâ-hu-nî ê kiáⁿ Ka-le̍k beh tit-tio̍h khòaⁿ-kìⁿ; koh Góa beh ēng i só͘ ta̍h-tio̍h ê tōe siúⁿ-sù i, kap i ê kiáⁿ-sun; in-ūi i choan-sim tè Iâ-hô-hoa.

37耶和華為tio̍h lín ê緣故也受氣我，講：你也bōe得tio̍h入hit-ê所在；Iâ-hô-hoa ūi-tio̍h lín ê iân-kò͘ iā siū-khì góa, kóng, Lí iā bōe tit-tio̍h ji̍p hit ê só͘-chāi;

38跟隨你ê，Lùn ê kiáⁿ約書亞，伊beh入去hia；你tio̍h勇壯伊ê心志，因為伊beh hō͘以色列人承接hit-ê所在；kun-sûi lí ê, Lùn ê kiáⁿ Iok-su-a, i beh ji̍p-khì hia; lí tio̍h ióng-chòng i ê sim-chì, in-ūi i beh hō͘ Í-sek-lia̍t lâng sêng-chiap hit ê só͘-chāi;

39koh lín ê gín-ná，就是lín所講beh受掠ê，kap今á日lín hiah-ê bōe曉好pháiⁿ ê kiáⁿ兒，beh入去hia；我beh將hit所在hō͘ in，in beh得tio̍h做業；koh lín ê gín-ná, chiū-sī lín só͘ kóng beh siū-lia̍h-ê, kap kin-á-ji̍t lín hiah-ê bōe hiáu hó-pháiⁿ ê kiáⁿ-jî, beh ji̍p-khì hia; Góa beh chiong hit só͘-chāi hō͘ in, in beh tit-tio̍h chòe-gia̍p;

40論到lín，lín tio̍h oa̍t倒tńg起身，tùi紅海ê路去曠野。lūn-kàu lín, lín tio̍h oa̍t-tò-tńg khí-sin, tùi Âng-hái ê lō͘ khì khòng-iá.

41Hit時lín應我講：阮得罪耶和華；taⁿ阮beh照耶和華阮ê上帝一切所命令ê，上去交戰。Tùi hit-tia̍p，lín ta̍k人帶軍器，隨便上去山地。Hit-sî lín ìn góa kóng, Goán tek-chōe Iâ-hô-hoa; taⁿ goán beh chiàu Iâ-hô-hoa goán ê Siōng-tè it-chhè só͘ bēng-lēng ê, chiūⁿ-khì kau-chiàn. Tùi hit-tia̍p lín ta̍k-lâng tòa kun-khì, sûi-piān chiūⁿ-khì soaⁿ-tōe.

42耶和華kā我講：你tio̍h kā in講：M̄-thang上去，也m̄-thang交戰；因為我無tī lín中間，驚了lín thâi輸對敵。Iâ-hô-hoa kā góa kóng, Lí tio̍h kā in kóng, M̄-thang chiūⁿ-khì, iā m̄-thang kau-chiàn; in-ūi Góa bô tī lín tiong-kan, kiaⁿ-liáu lín thâi-su tùi-te̍k.

43我就kā lín講；總是lín m̄聽thàn，悖逆耶和華ê命令，自專上去山地。Góa chiū kā lín kóng; chóng-sī lín m̄ thiaⁿ-thàn, pōe-ge̍k Iâ-hô-hoa ê bēng-lēng, chū-choan chiūⁿ-khì soaⁿ-tōe.

44Tiàm tī山裡ê A-mô͘-lī人就出來攻擊lín，親像蜂追趕lín一般，tī Se-jíⁿ thâi贏lín，直到Hô-jíⁿ-má。Tiàm tī soaⁿ-ni̍h ê A-mô͘-lī lâng chiū chhut-lâi kong-kek lín, chhin-chhiūⁿ phang tui-kóaⁿ lín chi̍t-poaⁿ, tī Se-jíⁿ thâi-iâⁿ lín, ti̍t-kàu Hô-jíⁿ-má.

45Lín就倒tńg來，tī耶和華ê面前啼哭；總是耶和華m̄聽lín ê聲，也m̄ àⁿ耳孔ǹg lín。Lín chiū tò-tńg lâi, tī Iâ-hô-hoa ê bīn-chêng thî-khàu; chóng-sī Iâ-hô-hoa m̄-thiaⁿ lín ê siaⁿ, iā m̄ àⁿ hī-khang ǹg lín.

46Lín就tiàm tī Ka-te-su chōe-chōe日，照lín tiàm tī-hia ê日。Lín chiū tiàm tī Ka-te-su chōe-chōe ji̍t, chiàu lín tiàm tī-hia ê ji̍t.

1Chit-tia̍p了後，咱oa̍t倒tńg起身，tùi紅海ê路去曠野；是照耶和華所對我講ê；咱se̍h Se-jíⁿ山chōe-chōe日。Chit-tia̍p liáu-āu, lán oa̍t-tò-tńg khí-sin, tùi Âng-hái ê lō͘ khì khòng-iá; sī chiàu Iâ-hô-hoa só͘ tùi góa kóng-ê; lán se̍h Se-jíⁿ soaⁿ chōe-chōe ji̍t.

2耶和華吩咐我講：Iâ-hô-hoa hoan-hù góa kóng,

3Lín se̍h chit-ê山久lah；tio̍h oa̍t-tńg ǹg北勢去。Lín se̍h chit ê soaⁿ kú lah; tio̍h oa̍t-tńg ǹg pak-sì khì.

4你tio̍h吩咐百姓講：以掃ê kiáⁿ孫lín ê兄弟tiàm tī Se-jíⁿ；lín beh經過in ê境界，in beh驚lín；所以lín tio̍h不止謹慎；Lí tio̍h hoan-hù peh-sìⁿ kóng, Í-sò ê kiáⁿ-sun lín ê hiaⁿ-tī tiàm tī Se-jíⁿ; lín beh keng-kè in ê kéng-kài, in beh kiaⁿ lín; só͘-í lín tio̍h put-chí kín-sīn;

5m̄-thang kap in爭戰in ê地，就若一腳跡位，我lóng無hō͘ lín，因為我已經將Se-jíⁿ山hō͘以掃做業。m̄-thang kap in cheng-chiàn in ê tōe, chiū nā chi̍t kha-jiah-ūi, Góa lóng bô hō͘ lín, in-ūi Góa í-keng chiong Se-jíⁿ soaⁿ hō͘ Í-sò chòe-gia̍p.

6Lín tio̍h用銀tùi in買米糧來食，也tio̍h用銀tùi in買水來lim；Lín tio̍h ēng gûn tùi in bóe bí-niû lâi chia̍h, iā tio̍h ēng gûn tùi in bóe chúi lâi lim;

7因為耶和華你ê上帝，tī你ê手所做一切ê工，賜福你；你行chit-ê大ê曠野，伊lóng知；chit四十年，耶和華你ê上帝kap你tī-teh，你lóng無欠缺一項。in-ūi Iâ-hô-hoa lí ê Siōng-tè, tī lí ê chhiú só͘ chòe it-chhè ê kang, sù-hok lí; lí kiâⁿ chit ê tōa ê khòng-iá, I lóng chai; chit sì-cha̍p nî, Iâ-hô-hoa lí ê Siōng-tè kap lí tī-teh, lí lóng bô khiàm-kheh chi̍t-hāng.

8Tùi án-ni，咱離開咱ê兄弟以掃ê kiáⁿ孫，khiā起tī Se-jíⁿ ê；tùi A-la̍h-pa ê路經過Í-la̍h-tha、Í-sûn-ka-pia̍t。咱就oa̍t-tńg經過Mô͘-ap曠野ê路去。Tùi án-ni, lán lī-khui lán ê hiaⁿ-tī Í-sò ê kiáⁿ-sun, khiā-khí tī Se-jíⁿ ê; tùi A-la̍h-pa ê lō͘ keng-kè Í-la̍h-tha, Í-sûn-ka-pia̍t.Lán chiū oa̍t-tńg keng-kè Mô͘-ap khòng-iá ê lō͘ khì.

9耶和華對我講，M̄-thang攪擾Mô͘-ap人，也m̄-thang kap in交戰；in ê地我lóng無beh hō͘你做業；因為我已經將A-jíⁿ hō͘羅得ê kiáⁿ孫做業。Iâ-hô-hoa tùi góa kóng, M̄-thang kiáu-jiáu Mô͘-ap lâng, iā m̄-thang kap in kau-chiàn; in ê tōe Góa lóng bô beh hō͘ lí chòe-gia̍p; in-ūi Góa í-keng chiong A-jíⁿ hō͘ Lô-tek ê kiáⁿ-sun chòe-gia̍p.

10(早前有Í-bí人khiā起tī-hia，百姓chōe，大koh lò，親像A-la̍p人一樣。(Chá-chêng ū Í-bí lâng khiā-khí tī-hia, peh-sìⁿ chōe, tōa koh lò, chhin-chhiūⁿ A-la̍p lâng chi̍t-iūⁿ.

11In也hō͘人算in做Lī-hoa̍t-im人，親像A-la̍p人一樣；總是Mô͘-ap人稱伊做Í-bí人。In iā hō͘ lâng sǹg in chòe Lī-hoa̍t-im lâng, chhin-chhiūⁿ A-la̍p lâng chi̍t-iūⁿ; chóng-sī Mô͘-ap lâng chheng i chòe Í-bí lâng.

12早前Hô-lī人也khiā起tī Se-jíⁿ；總是以掃ê kiáⁿ孫續接伊；in tī in ê面前剿滅in，來tòa tī in ê所在，親像以色列tī耶和華賞賜in做業ê地所行ê。)Chá-chêng Hô-lī lâng iā khiā-khí tī Se-jíⁿ; chóng-sī Í-sò ê kiáⁿ-sun sòa-chiap i; in tī in ê bīn-chêng châu-bia̍t in, lâi tòa tī in ê só͘-chāi, chhin-chhiūⁿ Í-sek-lia̍t tī Iâ-hô-hoa siúⁿ-sù in chòe-gia̍p ê tōe só͘ kiâⁿ ê.)

13Taⁿ lín tio̍h起來過Sat-lia̍t溪；Tùi án-ni，咱過Sat-lia̍t溪。Taⁿ lín tio̍h khí-lâi kè Sat-lia̍t khoe; tùi án-ni lán kè Sat-lia̍t khoe.

14對咱離開Ka-te-su Pa-nî-a，到過Sat-lia̍t溪ê日，共三十八年；到hit代ê武士lóng死無tī軍營中，照耶和華對in所chiù-chōa-ê。Tùi lán lī-khui Ka-te-su Pa-nî-a, kàu kè Sat-lia̍t khoe ê ji̍t, kiōng saⁿ-cha̍p-poeh nî; kàu hit-tāi ê bú-sū lóng sí-bô tī kun-iâⁿ-tiong, chiàu Iâ-hô-hoa tùi in só͘ chiù-chōa-ê.

15Koh耶和華ê手攻擊in，tùi軍營中剿滅in，到in lóng死無。Koh Iâ-hô-hoa ê chhiú kong-kek in, tùi kun-iâⁿ-tiong châu-bia̍t in, kàu in lóng sí-bô.

16武士tùi百姓中lóng剿滅死無以後，Bú-sū tùi peh-sìⁿ-tiong lóng châu-bia̍t sí-bô í-āu,

17耶和華吩咐我講：Iâ-hô-hoa hoan-hù góa kóng,

18你今á日tio̍h tùi Mô͘-ap ê境界A-jíⁿ經過；Lí kin-á-ji̍t tio̍h tùi Mô͘-ap ê kéng-kài A-jíⁿ keng-kè;

19行近A-bûn人ê對面，m̄-thang攪擾in，也m̄-thang kap in爭戰；因為A-bûn人ê地我無hō͘ lín做業，因為我已經賞賜羅得ê kiáⁿ孫做業。kiâⁿ kūn A-bûn lâng ê tùi-bīn, m̄-thang kiáu-jiáu in, iā m̄-thang kap in cheng-chiàn; in-ūi A-bûn lâng ê tōe Góa bô hō͘ lín chòe-gia̍p, in-ūi Góa í-keng siúⁿ-sù Lô-tek ê kiáⁿ-sun chòe-gia̍p.

20(hit-ê地也算做Lī-hoa̍t-im人ê地；早前Lī-hoa̍t-im人tiàm tī-hia，A-bûn人稱in做Sàn-sòng-bêng；(Hit ê tōe iā sǹg-chòe Lī-hoa̍t-im lâng ê tōe; chá-chêng Lī-hoa̍t-im lâng tiàm tī-hia, A-bûn lâng chheng in chòe Sàn-sòng-bêng;

21Hiah-ê百姓chōe，大koh lò，親像A-la̍p人一樣；總是耶和華tī A-bûn人ê面前剿滅in，in就得tio̍h in ê地，續接khiā起；hiah ê peh-sìⁿ chōe, tōa koh lò, chhin-chhiūⁿ A-la̍p lâng chi̍t-iūⁿ; chóng-sī Iâ-hô-hoa tī A-bûn lâng ê bīn-chêng châu-bia̍t in, in chiū tit-tio̍h in ê tōe, sòa-chiap khiā-khí;

22親像伊為以掃ê kiáⁿ孫，khiā起tī Se-jíⁿ ê，滅Hô-lī人tī in ê面前，in就續接khiā起in ê地到今á日；chhin-chhiūⁿ I ūi Í-sò ê kiáⁿ-sun, khiā-khí tī Se-jíⁿ ê, bia̍t Hô-lī lâng tī in ê bīn-chêng, in chiū sòa-chiap khiā-khí in ê tōe kàu kin-á-ji̍t;

23koh有A-ōe人khiā起tī鄉社，續到Ka-sat ê；tùi Ka-húi-thok出來ê Ka-húi-thok人滅in，來khiā起tī in ê位。)koh ū A-ōe lâng khiā-khí tī hiuⁿ-siā, sòa kàu Ka-sat ê; tùi Ka-húi-thok chhut-lâi ê Ka-húi-thok lâng bia̍t in, lâi khiā-khí tī in ê ūi.)

24Taⁿ lín tio̍h起來，起身過A-lùn ê山谷；看ah，我已經將A-mô͘-lī人Hi-si̍t-pún王Se-hông，kap伊ê地，交tī你ê手頭；你tio̍h起手得tio̍h伊ê地，去kap伊交戰。Taⁿ lín tio̍h khí-lâi, khí-sin kè A-lùn ê soaⁿ-kok; khòaⁿ ah, Góa í-keng chiong A-mô͘-lī lâng Hi-si̍t-pún ông Se-hông, kap i ê tōe, kau tī lí ê chhiú-thâu; lí tio̍h khí-chhiú tit-tio̍h i ê tōe, khì kap i kau-chiàn.

25Tùi今á日起，我beh hō͘天下萬百姓，聽見你ê名聲ê，驚lín，忍lín；koh因為你ngia̍uh-ngia̍uh-chhoah，痛苦。Tùi kin-á-ji̍t khí, Góa beh hō͘ thiⁿ-ē bān peh-sìⁿ, thiaⁿ-kìⁿ lí ê miâ-siaⁿ ê, kiaⁿ lín, lún lín; koh in-ūi lí ngia̍uh-ngia̍uh-chhoah, thòng-khó͘.

26我就tùi Ki-tí-bo̍k ê曠野，差使者去見Hi-si̍t-pún王Se-hông，用和平ê話講：Góa chiū tùi Ki-tí-bo̍k ê khòng-iá, chhe sù-chiá khì kìⁿ Hi-si̍t-pún ông Se-hông, ēng hô-pêng ê ōe kóng,

27求你容允我對你ê地經過；我beh行大路，無偏左，無偏右；Kiû lí iông-ún góa tùi lí ê tōe keng-kè; góa beh kiâⁿ tōa-lō͘, bô phian-chó, bô phian-iū;

28你the̍h我ê銀，賣米糧hō͘我食，the̍h我ê銀，用水賣我lim；獨獨准我步行過去；lí the̍h góa ê gûn, bōe bí-niû hō͘ góa chia̍h, the̍h góa ê gûn, ēng chúi bōe góa lim; to̍k-to̍k chún góa pō͘-kiâⁿ kè-khì;

29親像tiàm tī Se-jíⁿ ê以掃ê kiáⁿ孫，kap tiàm tī A-jíⁿ ê Mô͘-ap人款待我一樣；thèng候我過約旦河，入耶和華阮ê上帝所賞賜阮ê地。chhin-chhiūⁿ tiàm tī Se-jíⁿ ê Í-sò ê kiáⁿ-sun, kap tiàm tī A-jíⁿ ê Mô͘-ap lâng khoán-thāi góa chi̍t-iūⁿ; thèng-hāu góa kè Iok-tàn hô, ji̍p Iâ-hô-hoa goán ê Siōng-tè só͘ siúⁿ-sù goán ê tōe.

30總是Hi-si̍t-pún王Se-hông m̄肯hō͘咱對伊hia經過，因為耶和華你ê上帝hō͘伊ê性情固執、心硬，為tio̍h beh將伊交付tī你ê手；親像今á日一樣。Chóng-sī Hi-si̍t-pún ông Se-hông m̄-khéng hō͘ lán tùi i hia keng-kè, in-ūi Iâ-hô-hoa lí ê Siōng-tè hō͘ i ê sèng-chêng kò͘-chip, sim ngī, ūi-tio̍h beh chiong i kau-hù tī lí ê chhiú; chhin-chhiūⁿ kin-á-ji̍t chi̍t-iūⁿ.

31耶和華kā我講：看ah，tùi chit-tia̍p起，我beh將Se-hông kap伊ê地，交付tī你ê面前，你taⁿ tio̍h得tio̍h伊ê地做業。Iâ-hô-hoa kā góa kóng, Khòaⁿ ah, tùi chit-tia̍p khí, Góa beh chiong Se-hông kap i ê tōe, kau-hù tī lí ê bīn-chêng, lí taⁿ tio̍h tit-tio̍h i ê tōe chòe-gia̍p.

32Hit時Se-hông kap伊ê眾百姓出來抵敵咱，交戰tī Ngá-cha̍p。Hit-sî Se-hông kap i ê chèng peh-sìⁿ chhut-lâi tí-te̍k lán, kau-chiàn tī Ngá-cha̍p.

33耶和華咱ê上帝將伊交付咱，咱就phah死伊，kap伊ê kiáⁿ，以及伊ê眾百姓。Iâ-hô-hoa lán ê Siōng-tè chiong i kau-hù lán, lán chiū phah-sí i, kap i ê kiáⁿ, í-ki̍p i ê chèng peh-sìⁿ.

34當hit時咱取伊lóng總ê城，剿滅有人khiā起ê城，連婦人人kap gín-ná，無留一個；Tng hit-sî lán chhú i lóng-chóng ê siâⁿ, châu-bia̍t ū lâng khiā-khí ê siâⁿ, liân hū-jîn-lâng kap gín-ná, bô lâu chi̍t-ê;

35獨獨cheng-siⁿ kap所搶ta̍k-ê城ê贓物，lóng取來做家己ê路用。to̍k-to̍k cheng-siⁿ kap só͘ chhiúⁿ ta̍k ê siâⁿ ê chong-bu̍t, lóng chhú lâi chòe ka-kī ê lō͘-ēng.

36Tùi A-lùn山谷邊ê A-lô-jíⁿ，以及山谷中ê城，到tī Ki-lia̍t，無一個城堅固，hō͘咱取伊無tio̍h；因為耶和華咱ê上帝lóng交付咱；Tùi A-lùn soaⁿ-kok-piⁿ ê A-lô-jíⁿ, í-ki̍p soaⁿ-kok tiong ê siâⁿ, kàu tī Ki-lia̍t, bô chi̍t ê siâⁿ kian-kò͘, hō͘ lán chhú i bô tio̍h; in-ūi Iâ-hô-hoa lán ê Siōng-tè lóng kau-hù lán;

37只有A-bûn人ê地，Ngá-phok河邊ê地，kap山地chiah-ê城，kap耶和華咱ê上帝所禁咱去ê地，你lóng無óa近伊。chí-ū A-bûn lâng ê tōe, Ngá-phok hô-piⁿ ê tōe, kap soaⁿ-tōe chiah ê siâⁿ, kap Iâ-hô-hoa lán ê Siōng-tè só͘ kìm lán khì ê tōe, lí lóng bô óa-kūn i.

1咱就oa̍t-tńg身上Pa-san ê路去；Pa-san王kap伊ê眾百姓lóng出來抵敵咱，就tī伊2-tek-lâi交戰。Lán chiū oa̍t-tńg-sin chiūⁿ Pa-san ê lō͘ khì; Pa-san ông kap i ê chèng peh-sìⁿ lóng chhut-lâi tí-te̍k lán, chiū tī Í-tek-lâi kau-chiàn.

2耶和華kā我講：莫得驚伊，因為我已經將伊kap伊ê眾百姓，kap伊ê地，lóng交tī你ê手；你tio̍h款待伊親像款待tiàm tī Hi-si̍t-pún ê A-mô͘-lī王Se-hông一樣。Iâ-hô-hoa kā góa kóng, Bo̍h-tit kiaⁿ i, in-ūi Góa í-keng chiong i kap i ê chèng peh-sìⁿ, kap i ê tōe, lóng kau tī lí ê chhiú; lí tio̍h khoán-thāi i chhin-chhiūⁿ khoán-thāi tiàm tī Hi-si̍t-pún ê A-mô͘-lī ông Se-hông chi̍t-iūⁿ.

3Tùi hit-tia̍p，耶和華咱ê上帝也將Pa-san王Go̍k，kap伊ê眾百姓，lóng交tī咱ê手；咱就phah死in，無留一個。Tùi hit-tia̍p Iâ-hô-hoa lán ê Siōng-tè iā chiong Pa-san ông Go̍k, kap i ê chèng peh-sìⁿ, lóng kau tī lán ê chhiú; lán chiū phah-sí in, bô lâu chi̍t-ê.

4Hit時咱取伊所有ê城，無一個城無hō͘咱取伊，共六十個城；這是A-jíⁿ-ko-pek ê全景，就是Go̍k ê國tī Pa-san ê。Hit-sî lán chhú i só͘ ū ê siâⁿ, bô chi̍t ê siâⁿ bô hō͘ lán chhú i, kiōng la̍k-cha̍p ê siâⁿ; che sī A-jíⁿ-ko-pek ê choân-kéng, chiū-sī Go̍k ê kok tī Pa-san ê.

5Chiah-ê lóng是堅固ê城，有高ê牆，有門，有栱；chiah-ê以外iáu有chōe-chōe無城牆ê埠頭。Chiah-ê lóng sī kian-kò͘ ê siâⁿ, ū koâiⁿ ê chhiûⁿ, ū mn̂g, ū kông; chiah-ê í-gōa iáu-ū chōe-chōe bô siâⁿ-chhiûⁿ ê po͘-thâu.

6咱一盡滅in，親像前款待Hi-si̍t-pún王Se-hông一樣，滅有人khiā起ê城，連婦人人，kap gín-ná；Lán it-chīn bia̍t in, chhin-chhiūⁿ chêng khoán-thāi Hi-si̍t-pún ông Se-hông chi̍t-iūⁿ, bia̍t ū lâng khiā-khí ê siâⁿ, liân hū-jîn-lâng, kap gín-ná;

7獨獨一切ê cheng-siⁿ，kap城中ê贓物，咱lóng取來做家己ê路用。to̍k-to̍k it-chhè ê cheng-siⁿ, kap siâⁿ-tiong ê chong-bu̍t, lán lóng chhú lâi chòe ka-kī ê lō͘-ēng.

8Hit時咱tùi約旦hit-pêng，兩個A-mô͘-lī王ê手，搶伊ê地，tùi A-lùn ê山谷到Hek-bûn山。Hit-sî lán tùi Iok-tàn hit-pêng, nn̄g ê A-mô͘-lī ông ê chhiú, chhiúⁿ i ê tōe, tùi A-lùn ê soaⁿ-kok kàu Hek-bûn soaⁿ.

9(chit-ê Hek-bûn，Se-tùn人稱伊做Se-liân；A-mô͘-lī人稱伊做Sī-nî-jíⁿ。)(Chit ê Hek-bûn, Se-tùn lâng chheng i chòe Se-liân; A-mô͘-lī lâng chheng i chòe Sī-nî-jíⁿ.)

10咱搶平洋ta̍k-ê城，Ki-lia̍t全地，Pa-san全地，直到Sat-ka kap Í-tek-lâi，lóng是Pa-san王Go̍k國內ê城。Lán chhiúⁿ pîⁿ-iûⁿ ta̍k ê siâⁿ, Ki-lia̍t choân-tōe, Pa-san choân-tōe, ti̍t-kàu Sat-ka kap Í-tek-lâi, lóng sī Pa-san ông Go̍k kok-lāi ê siâⁿ.

11(Lī-hoa̍t-im人所留ê，只有chhun Pa-san王Go̍k；看ah，伊ê眠床是鐵ê眠床，長九肘，闊四肘，lóng是用人ê肘做pān；現今kiám-m̄是tī A-bûn人ê La̍h-pa mah？)(Lī-hoa̍t-im lâng só͘ lâu ê, chí-ū chhun Pa-san ông Go̍k; khòaⁿ ah, i ê bîn-chhn̂g sī thih ê bîn-chhn̂g, tn̂g káu-tiú, khoah sì-tiú, lóng sī ēng lâng ê tiú chòe-pān; hiān-kim kiám-m̄-sī tī A-bûn lâng ê la̍h-pa mah?)

12Hit時咱得tio̍h chit-ê地；tùi A-lùn山谷邊ê A-lô-jíⁿ起，以及Ki-lia̍t山地ê一半，kap其中ê城，我lóng hō͘ Liû-piān人kap Ka-tek人；Hit-sî lán tit-tio̍h chit ê tōe; tùi A-lùn soaⁿ-kok piⁿ ê A-lô-jíⁿ khí, í-ki̍p Ki-lia̍t soaⁿ-tōe ê chi̍t-pòaⁿ, kap kî-tiong ê siâⁿ, góa lóng hō͘ Liû-piān lâng kap Ka-tek lâng;

13Ki-lia̍t其餘ê地，kap Pa-san全地，Go̍k ê國，我hō͘ Má-ná-se ê半支派；A-jíⁿ-ko-pek全地，Pa-san全地，這叫做Lī-hoa̍t-im人ê地。Ki-lia̍t kî-û ê tōe, kap Pa-san choân-tōe, Go̍k ê kok, góa hō͘ Má-ná-se ê pòaⁿ-chi-phài; A-jíⁿ-ko-pek choân-tōe, Pa-san choân-tōe, che kiò-chòe Lī-hoa̍t-im lâng ê tōe.

14Má-ná-se ê kiáⁿ Gâi-jíⁿ chiàm A-jíⁿ-ko-pek全景，直到Ki-su̍t人kap Má-ka人ê交界；就照家己ê名稱Pa-san地做Hap-úi-te̍k-gâi-jíⁿ，到今á日。Má-ná-se ê kiáⁿ Gâi-jíⁿ chiàm A-jíⁿ-ko-pek choân-kéng, ti̍t-kàu Ki-su̍t lâng kap Má-ka lâng ê kau-kài; chiū chiàu ka-kī ê miâ chheng Pa-san tōe chòe Hap-úi-te̍k-gâi-jíⁿ, kàu kin-á-ji̍t.

15我koh將Ki-lia̍t hō͘ Má-kiat。Góa koh chiong Ki-lia̍t hō͘ Má-kiat.

16Tùi Ki-lia̍t到A-lùn ê山谷，用山谷做界，直到A-bûn人交界ê Ngá-phok河，我將這hō͘ Liû-piān人，kap Ka-tek人；Tùi Ki-lia̍t kàu A-lùn ê soaⁿ-kok, ēng soaⁿ-kok chòe kài, ti̍t-kàu A-bûn lâng kau-kài ê Ngá-phok hô, góa chiong che hō͘ Liû-piān lâng, kap Ka-tek lâng;

17koh將A-la̍h-pa，kap óa近約旦河ê地，tùi Ki-nî-lia̍t直到A-la̍h-pa ê海，就是鹽海，以及Pí-su-ka山腳東邊ê地，lóng hō͘ in。koh chiong A-la̍h-pa, kap óa-kūn Iok-tàn hô ê tōe, tùi Ki-nî-lia̍t ti̍t-kàu A-la̍h-pa ê hái, chiū-sī Iâm-hái, í-ki̍p Pí-su-ka soaⁿ-kha tang-piⁿ ê tōe, lóng hō͘ in.

18Hit時我吩咐lín講：耶和華lín ê上帝已經將chit-ê地hō͘ lín做業，lín中間能交戰ê，lóng tio̍h帶軍器，tī lín ê兄弟以色列人ê面前過去。Hit-sî góa hoan-hù lín kóng, Iâ-hô-hoa lín ê Siōng-tè í-keng chiong chit ê tōe hō͘ lín chòe-gia̍p, lín tiong-kan ōe kau-chiàn-ê, lóng tio̍h tòa kun-khì, tī lín ê hiaⁿ-tī Í-sek-lia̍t lâng ê bīn-chêng kè-khì.

19總是lín ê bó͘，lín ê gín-ná，lín ê cheng-siⁿ，(我知lín ê cheng-siⁿ真chōe，) thang tiàm tī我所hō͘ lín ta̍k-ê城，Chóng-sī lín ê bó͘, lín ê gín-ná, lín ê cheng-siⁿ, (góa chai lín ê cheng-siⁿ chin chōe,) thang tiàm tī góa só͘ hō͘ lín ta̍k ê siâⁿ,

20到耶和華賞賜平安hō͘ lín ê兄弟，親像已經賞賜lín一樣，koh in也得tio̍h耶和華lín ê上帝，用約旦hit pêng ê地賞賜in，然後lín ta̍k人thang tò來我賞賜lín做業ê地。kàu Iâ-hô-hoa siúⁿ-sù pêng-an hō͘ lín ê hiaⁿ-tī, chhin-chhiūⁿ í-keng siúⁿ-sù lín chi̍t-iūⁿ, koh in iā tit-tio̍h Iâ-hô-hoa lín ê Siōng-tè, ēng Iok-tàn hit pêng ê tōe siúⁿ-sù in, jiân-āu lín ta̍k-lâng thang tò-lâi góa siúⁿ-sù lín chòe-gia̍p ê tōe.

21Hit時我吩咐約書亞講：你親目看見耶和華你ê上帝tùi chit兩個王所行一切ê事，耶和華也beh tùi lín所beh過去ê ta̍k國án-ni行。Hit-sî góa hoan-hù Iok-su-a kóng, Lí chhin-ba̍k khòaⁿ-kìⁿ Iâ-hô-hoa lí ê Siōng-tè tùi chit nn̄g ê ông só͘ kiâⁿ it-chhè ê sū, Iâ-hô-hoa iā beh tùi lín só͘ beh kè-khì ê ta̍k-kok án-ni kiâⁿ.

22Lín莫得驚in；因為替lín交戰ê，是耶和華lín ê上帝。Lín bo̍h-tit kiaⁿ in; in-ūi thòe lín kau-chiàn ê, sī Iâ-hô-hoa lín ê Siōng-tè.

23Hit時我懇求耶和華講：Hit-sî góa khún-kiû Iâ-hô-hoa kóng,

24主耶和華ah，你已經起頭顯出你ê大威嚴，kap你ê大氣力tī你ê奴僕，因為tī天裡，tī地裡，iáu有甚麼上帝能行親像你所行ê，koh親像你ê大權能ah？Chú Iâ-hô-hoa ah, Lí í-keng khí-thâu hián-chhut Lí ê tōa ui-giâm, kap Lí ê tōa khùi-la̍t tī Lí ê lô͘-po̍k, in-ūi tī thiⁿ-ni̍h, tī tōe-ni̍h, iáu-ū sím-mi̍h siōng-tè ōe kiâⁿ chhin-chhiūⁿ Lí só͘ kiâⁿ-ê, koh chhin-chhiūⁿ Lí ê tōa koân-lêng ah?

25求你容允我過去，看約旦河hit-pêng súi ê地，hit-ê súi ê山地，kap Lī-pa-lùn。Kiû Lí iông-ún góa kè-khì, khòaⁿ Iok-tàn hô hit-pêng súi ê tōe, hit-ê súi ê soaⁿ-tōe, kap Lī-pa-lùn.

26總是耶和華，因為lín ê緣故，受氣我，m̄聽我；耶和華對我講，Án-ni你夠額lah，你莫得koh對我提起chit-ê事。Chóng-sī Iâ-hô-hoa, in-ūi lín ê iân-kò͘, siū-khì góa, m̄ thiaⁿ góa; Iâ-hô-hoa tùi góa kóng, Án-ni lí kàu-gia̍h lah, lí bo̍h-tit koh tùi Góa thê-khí chit ê sū.

27你tio̍h上Pí-su-ka ê山頂，kia̍h目ǹg西，ǹg北，ǹg南，ǹg東，親目看；因為你決斷bōe能過chit-ê約旦河。Lí tio̍h chiūⁿ Pí-su-ka ê soaⁿ-téng, kia̍h-ba̍k ǹg-sai, ǹg-pak, ǹg-lâm, ǹg-tang, chhin-ba̍k khòaⁿ; in-ūi lí koat-toàn bōe-ōe kè chit ê Iok-tàn hô.

28總是你tio̍h吩咐約書亞，hō͘伊壯膽堅固；因為伊beh tī chit-ê百姓ê面前過去，hō͘ in承接你所beh看見ê地。Chóng-sī lí tio̍h hoan-hù Iok-su-a, hō͘ i chòng-táⁿ kian-kò͘; in-ūi i beh tī chit ê peh-sìⁿ ê bīn-chêng kè-khì, hō͘ in sêng-chiap lí só͘ beh khòaⁿ-kìⁿ ê tōe.

29Tùi án-ni，咱tiàm tī Pek-pí-jíⁿ對面ê山谷中。Tùi án-ni lán tiàm tī Pek-pí-jíⁿ tùi-bīn ê soaⁿ-kok-tiong.