1耶和華你ê上帝將來剪除hiah-ê國，就是耶和華你ê上帝用in ê地賞賜你ê，你承接in，來khiā起in ê城，kap in ê厝；Iâ-hô-hoa lí ê Siōng-tè chiong-lâi chián-tû hiah ê kok, chiū-sī Iâ-hô-hoa lí ê Siōng-tè ēng in ê tōe siúⁿ-sù lí ê, lí sêng-chiap in, lâi khiā-khí in ê siâⁿ, kap in ê chhù;

2Hit時你就tio̍h tī耶和華你上帝賞賜你做業ê地，kā伊分別三個城。hit-sî lí chiū tio̍h tī Iâ-hô-hoa lí Siōng-tè siúⁿ-sù lí chòe-gia̍p ê tōe, kā i hun-piat saⁿ ê siâⁿ.

3Tio̍h將耶和華你上帝所賞賜你承接界內ê地，分做三坵(khu)，koh kā伊開路，hō͘ hiah-ê thâi人ê lóng thang走去hia。Tio̍h chiong Iâ-hô-hoa lí Siōng-tè só͘ siúⁿ-sù lí sêng-chiap kài-lāi ê tōe, hun-chòe saⁿ-khu, koh kā i khui lō͘, hō͘ hiah ê thâi-lâng-ê lóng thang cháu-khì hia.

4Thâi死人ê走去hia，就thang得tio̍h活，hit-ê例就是án-ni；見若平素無結怨錯誤來thâi死伊ê厝邊；Thâi-sí-lâng-ê cháu-khì hia, chiū thang tit-tio̍h oa̍h, hit ê lē chiū-sī án-ni; kìⁿ-nā pêng-sò͘ bô kiat-oàn chhò-gō͘ lâi thâi-sí i ê chhù-piⁿ;

5就是親像人kap伊ê厝邊去樹林，beh剉樹木，手kia̍h斧頭一下剉，beh剉hit-ê樹，斧頭肉lut去，傷tio̍h伊ê厝邊致到死，chit-ê人tio̍h走到hiah-ê城ê一個，就thang活teh；chiū-sī chhin-chhiūⁿ lâng kap i ê chhù-piⁿ khì chhiū-nâ, beh chhò chhiū-ba̍k, chhiú kia̍h pó͘-thâu chi̍t-ē chhò, beh chhò hit ê chhiū, pó͘-thâu-bah lut-khì, siong-tio̍h i ê chhù-piⁿ tì-kàu sí, chit ê lâng tio̍h cháu kàu hiah ê siâⁿ ê chi̍t-ê, chiū thang oa̍h-teh;

6免得報人命ê，當伊心火to̍h ê時，追jip thâi人ê人，因為路真遠jip-tio̍h就thâi死伊；其實伊m̄應該死，因為平時伊無怨恨伊。bián-tit pò-jîn-bēng-ê, tng i sim-hé to̍h ê sî, tui-jip thâi-lâng ê lâng, in-ūi lō͘ chin-hn̄g jip-tio̍h chiū thâi-sí i; kî-si̍t i m̄ eng-kai sí, in-ūi pêng-sî i bô oàn-hūn i.

7所以我命令你講，Tio̍h kā伊分別三個城。Só͘-í góa bēng-lēng lí kóng, Tio̍h kā i hun-piat saⁿ ê siâⁿ.

8耶和華你ê上帝，若照伊對你ê列祖所chiù-chōa-ê，開闊你ê境界，將所應允賞賜你ê列祖ê全地hō͘你；Iâ-hô-hoa lí ê Siōng-tè, nā chiàu I tùi lí ê lia̍t-chó͘ só͘ chiù-chōa-ê, khui-khoah lí ê kéng-kài, chiong só͘ èng-ún siúⁿ-sù lí ê lia̍t-chó͘ ê choân-tōe hō͘ lí;

9我今á日所命令你一切ê誡命，你若執守來行伊，疼耶和華你ê上帝，常常行伊hiah-ê道路，就tī chit三個城以外，tio̍h koh為家己加設三個城；góa kin-á-ji̍t só͘ bēng-lēng lí it-chhè ê kài-bēng, lí nā chip-siú lâi kiâⁿ i, thiàⁿ Iâ-hô-hoa lí ê Siōng-tè, siông-siông kiâⁿ I hiah ê tō-lō͘, chiū tī chit saⁿ ê siâⁿ í-gōa, tio̍h koh ūi ka-kī ke-siat saⁿ ê siâⁿ;

10免得無罪ê血流tī耶和華你上帝所賞賜你做業ê地，致到流血ê罪歸tī你。bián-tit bô-chōe ê huih lâu tī Iâ-hô-hoa lí Siōng-tè só͘ siúⁿ-sù lí chòe-gia̍p ê tōe, tì-kàu lâu-huih ê chōe kui tī lí.

11總是人若怨恨伊ê厝邊，bih teh起來phah伊，傷害伊到死，就走到hiah-ê城ê一個；Chóng-sī lâng nā oàn-hūn i ê chhù-piⁿ, bih-teh khí-lâi phah i, siong-hāi i kàu sí, chiū cháu kàu hiah ê siâⁿ ê chi̍t-ê;

12伊ê城ê長老就tio̍h差人，tùi hia帶伊出來，交tī報人命ê人ê手，hō͘伊死；i ê siâⁿ ê tiúⁿ-ló chiū tio̍h chhe lâng, tùi hia tòa i chhut-lâi, kau tī pò-jîn-bēng ê lâng ê chhiú, hō͘ i sí;

13你ê目睭m̄-thang可憐伊；tī以色列中tio̍h除去無罪ê血，hō͘你thang得tio̍h福氣。lí ê ba̍k-chiu m̄-thang khó-lîn i; tī Í-sek-lia̍t tiong tio̍h tû-khì bô-chōe ê huih, hō͘ lí thang tit-tio̍h hok-khì.

14Tī耶和華你上帝所賞賜你承接ê地，m̄-thang移徙厝邊ê界址；hit-ê是前ê人所chhāi tī你續接ê業ê內面ê。Tī Iâ-hô-hoa lí Siōng-tè só͘ siúⁿ-sù lí sêng-chiap ê tōe, m̄-thang î-sóa chhù-piⁿ ê kài-chí; hit-ê sī chêng ê lâng só͘ chhāi tī lí sòa-chiap ê gia̍p ê lāi-bīn ê.

15Kan-ta一人bōe-thang起來干證人甚麼pháiⁿ，甚麼罪，就是伊見所犯ê罪；的確tio̍h憑兩個干證ê人ê嘴，á是三個干證ê人ê嘴，chiah thang定伊ê案。Kan-ta chi̍t-lâng bōe thang khí-lâi kan-chèng lâng sím-mi̍h pháiⁿ, sím-mi̍h chōe, chiū-sī i kìⁿ só͘ hoān ê chōe; tek-khak tio̍h pîn nn̄g ê kan-chèng ê lâng ê chhùi, á-sī saⁿ ê kan-chèng ê lâng ê chhùi, chiah thang tēng i ê àn.

16若有lām-sám干證ê起來攻擊某人，干證伊行pháiⁿ，Nā ū lām-sám kan-chèng ê khí-lâi kong-kek bó͘ lâng, kan-chèng i kiâⁿ-pháiⁿ,

17就chit兩個相chìⁿ ê人tio̍h khiā tī耶和華ê面前，kap當時ê祭司，kap審判官ê面前。chiū chit nn̄g-ê saⁿ-chìⁿ ê lâng tio̍h khiā tī Iâ-hô-hoa ê bīn-chêng, kap tng-sî ê chè-si, kap sím-phòaⁿ-koaⁿ ê bīn-chêng.

18審判官tio̍h詳細查問；看ah，若做干證ê人，果然是假干證，用假干證beh害伊ê兄弟，Sím-phòaⁿ-koaⁿ tio̍h siông-sè chhâ-mn̄g; khòaⁿ ah, nā chòe kan-chèng ê lâng, kó-jiân sī ké kan-chèng, ēng ké kan-chèng beh hāi i ê hiaⁿ-tī,

19lín就tio̍h款待伊，親像伊想beh款待伊ê兄弟ê；án-ni tùi lín中間除去hit-ê pháiⁿ。lín chiū tio̍h khoán-thāi i, chhin-chhiūⁿ i siūⁿ beh khoán-thāi i ê hiaⁿ-tī ê; án-ni tùi lín tiong-kan tû-khì hit ê pháiⁿ.

20其餘ê人聽見lóng beh驚，就tī lín中間無koh行chit號pháiⁿ。Kî-û ê lâng thiaⁿ-kìⁿ lóng beh kiaⁿ, chiū tī lín tiong-kan bô koh kiâⁿ chit hō pháiⁿ.

21你ê目睭m̄-thang可憐伊，tio̍h用命賠命，目睭賠目睭，嘴齒賠嘴齒，手賠手，腳賠腳。Lí ê ba̍k-chiu m̄-thang khó-lîn i, tio̍h ēng miā pê miā, ba̍k-chiu pê ba̍k-chiu, chhùi-khí pê chhùi-khí, chhiú pê chhiú, kha pê kha.

1你出去kap對敵交戰ê時，看見馬、車，以及百姓比你khah-chōe-ê，m̄免驚in；因為chhōa你出埃及地ê耶和華你ê上帝kap你tī-teh。Lí chhut-khì kap tùi-te̍k kau-chiàn ê sî, khòaⁿ-kìⁿ bé, chhia, í-ki̍p peh-sìⁿ pí lí khah-chōe-ê, m̄-bián kiaⁿ in; in-ūi chhōa lí chhut Ai-ki̍p tōe ê Iâ-hô-hoa lí ê Siōng-tè kap lí tī-teh.

2Lín teh-beh臨陣交戰ê時，祭司tio̍h到百姓ê面前宣布；Lín teh-beh lîm-tīn kau-chiàn ê sî, chè-si tio̍h kàu peh-sìⁿ ê bīn-chêng soan-pò͘;

3對in講，以色列人ah，lín tio̍h聽；lín今á日beh kap百姓對敵交戰，m̄-thang失膽，m̄-thang驚，來ngia̍uh-ngia̍uh-chhoah，也m̄-thang因為in來忍neh；tùi in kóng, Í-sek-lia̍t lâng ah, lín tio̍h thiaⁿ; lín kin-á-ji̍t beh kap peh-sìⁿ tùi-te̍k kau-chiàn, m̄-thang sit-táⁿ, m̄-thang kiaⁿ, lâi ngia̍uh-ngia̍uh-chhoah, iā m̄-thang in-ūi in lâi lún-neh;

4因為耶和華lín ê上帝就是kap lín相kap去ê，beh替lín kap對敵交戰來拯救lín。in-ūi Iâ-hô-hoa lín ê Siōng-tè chiū-sī kap lín saⁿ-kap khì ê, beh thòe lín kap tùi-te̍k kau-chiàn lâi chín-kiù lín.

5Hiah-ê官長也tio̍h對百姓宣布，講：Chī-chūi起新厝iáu未行落成ê禮 ah？伊tio̍h tò去in tau，驚了伊陣亡，別人行落成 ê禮。Hiah ê koaⁿ-tiúⁿ iā tio̍h tùi peh-sìⁿ soan-pò͘, kóng, Chī-chūi khí sin-chhù iáu-bē kiâⁿ lo̍k-sêng ê lé ah? i tio̍h tò-khì in tau, kiaⁿ-liáu i tīn-bông, pa̍t-lâng kiâⁿ lo̍k-sêng ê lé.

6Chī-chūi種葡萄園，iáu未有用tio̍h伊ê果子ah？伊也thang tò去in tau，驚了伊陣亡，別人去用伊。Chī-chūi chèng phû-tô-hn̂g, iáu-bē ū ēng-tio̍h i ê ké-chí ah? i iā thang tò-khì in tau, kiaⁿ-liáu i tīn-bông, pa̍t-lâng khì ēng i.

7Chī-chūi聘定bó͘，iáu未娶伊ah？伊也thang tò去in tau，驚了伊陣亡，別人娶伊。Chī-chūi phèng-tiāⁿ bó͘, iáu-bē chhōa i ah? i iā thang tò-khì in tau, kiaⁿ-liáu i tīn-bông, pa̍t-lâng chhōa i.

8Hiah-ê官長koh tio̍h對百姓宣布，講：Chī-chūi驚惶失膽ah？伊thang tò去in tau，驚了伊ê兄弟ê心消溶，親像伊ê心一樣。Hiah ê koaⁿ-tiúⁿ koh tio̍h tùi peh-sìⁿ soan-pò͘, kóng, Chī-chūi kiaⁿ-hiâⁿ sit-táⁿ ah? i thang tò-khì in tau, kiaⁿ-liáu i ê hiaⁿ-tī ê sim siau-iûⁿ, chhin-chhiūⁿ i ê sim chi̍t-iūⁿ.

9Hiah-ê官長對百姓宣布明白，tio̍h設立hiah-ê軍長做頭來chhōa百姓。Hiah ê koaⁿ-tiúⁿ tùi peh-sìⁿ soan-pò͘ bêng-pe̍k, tio̍h siat-li̍p hiah ê kun-tiúⁿ chòe-thâu lâi chhōa peh-sìⁿ.

10你óa近一個城beh phah ê時，tio̍h事先對伊宣布和平ê話。Lí óa-kūn chi̍t ê siâⁿ beh phah ê sî, tio̍h tāi-seng tùi i soan-pò͘ hô-pêng ê ōe.

11伊若用和平ê話答覆你，kā你開城門，hit中間所有ê百姓lóng beh做你ê差用，來服事你。I nā ēng hô-pêng ê ōe tap-hok lí, kā lí khui siâⁿ-mn̂g, hit tiong-kan só͘ ū ê peh-sìⁿ lóng beh chòe lí ê chhe-ēng, lâi ho̍k-sāi lí.

12伊若m̄肯kap你和好，反tńg beh kap lín交戰，lín就tio̍h圍困伊。I nā m̄-khéng kap lí hô-hó, hoán-tńg beh kap lín kau-chiàn, lín chiū tio̍h ûi-khùn i.

13耶和華你ê上帝用伊交付你，你就tio̍h用刀一盡thâi死伊hiah-ê ta-po͘丁；Iâ-hô-hoa lí ê Siōng-tè ēng i kau-hù lí, lí chiū tio̍h ēng to it-chīn thâi-sí i hiah ê ta-po͘-teng;

14獨獨婦女、gín-ná、cheng-siⁿ，kap城內一切所搶ê物，你thang搶伊來做家己ê路用；你所搶你ê對敵ê物，就是耶和華你上帝所賞賜你ê，你thang食用。to̍k-to̍k hū-lú, gín-ná, cheng-siⁿ, kap siâⁿ-lāi it-chhè só͘ chhiúⁿ ê mi̍h, lí thang chhiúⁿ i lâi chòe ka-kī ê lō͘-ēng; lí só͘ chhiúⁿ lí ê tùi-te̍k ê mi̍h, chiū-sī Iâ-hô-hoa lí Siōng-tè só͘ siúⁿ-sù lí ê, lí thang chia̍h-ēng.

15離開你遠遠hiah-ê城，m̄是chiah-ê列國ê城，你tio̍h án-ni款待伊。Lī-khui lí hn̄g-hn̄g hiah ê siâⁿ, m̄-sī chiah ê lia̍t-kok ê siâⁿ, lí tio̍h án-ni khoán-thāi i.

16獨獨屬chiah-ê百姓ê城，耶和華你上帝已經賞賜你做業，其中見有喘氣ê，你m̄-thang hō͘伊活teh；To̍k-to̍k sio̍k chiah ê peh-sìⁿ ê siâⁿ, Iâ-hô-hoa lí Siōng-tè í-keng siúⁿ-sù lí chòe-gia̍p, kî-tiong kìⁿ-ū chhoán-khùi ê, lí m̄-thang hō͘ i oa̍h-teh;

17tio̍h照耶和華你上帝所命令你ê，將Hek人、A-mô͘-lī人、迦南人、Pí-lī-sé人、Hi-bī人、Iâ-pò͘-su人，一盡滅伊；tio̍h chiàu Iâ-hô-hoa lí Siōng-tè só͘ bēng-lēng lí ê, chiong Hek lâng, A-mô͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, it-chīn bia̍t i;

18免得in教示lín學一切可惡ê事，就是in對tī in ê上帝所行ê，致到lín得罪耶和華lín ê上帝。bián-tit in kà-sī lín o̍h it-chhè khó-ò͘ⁿ ê sū, chiū-sī in tùi tī in ê siōng-tè só͘ kiâⁿ ê, tì-kàu lín tek-chōe Iâ-hô-hoa lín ê Siōng-tè.

19你若久久圍困一個城，攻擊beh取伊，就m̄-thang用斧頭phah-pháiⁿ樹木；因為你thang食伊ê果子，所以m̄-thang剉伊；田野ê樹木kiám是人，hō͘你圍困mah？Lí nā kú-kú ûi-khùn chi̍t ê siâⁿ, kong-kek beh chhú i, chiū m̄-thang ēng pó͘-thâu phah-pháiⁿ chhiū-ba̍k; in-ūi lí thang chia̍h i ê ké-chí, só͘-í m̄-thang chhò i; chhân-iá ê chhiū-ba̍k kiám-sī lâng, hō͘ lí ûi-khùn mah?

20獨獨你所bat m̄是thang做食物ê樹，thang剉來毀壞伊，用伊來做攻城ê器具，攻擊hit-ê kap你交戰ê城，到攻破伊。To̍k-to̍k lí só͘ bat m̄-sī thang chòe chia̍h-mi̍h ê chhiū, thang chhò lâi húi-hoāi i, ēng i lâi chòe kong-siâⁿ ê khì-kū, kong-kek hit-ê kap lí kau-chiàn ê siâⁿ, kàu kong-phòa i.

1Tī耶和華你上帝所賞賜你做業ê地，若tú-tio̍h受thâi ê人倒tī田野，m̄知是是誰 thâi死ê；Tī Iâ-hô-hoa lí Siōng-tè só͘ siúⁿ-sù lí chòe-gia̍p ê tōe, nā tú-tio̍h siū-thâi ê lâng tó tī chhân-iá, m̄-chai sī chī-chūi thâi-sí ê;

2你ê長老kap審判官tio̍h出來量伊，tùi受thâi ê人hit-tah，直到四圍hiah-ê城，lí ê tiúⁿ-ló kap sím-phòaⁿ-koaⁿ tio̍h chhut-lâi niû i, tùi siū-thâi ê lâng hit-tah, ti̍t-kàu sì-ûi hiah ê siâⁿ,

3看toh落一個城離開受thâi ê人第一近；就hit-ê城ê長老tio̍h tùi牛群中取一隻bē-bat用伊來做工，bē-bat掛擔ê牛種á；khòaⁿ toh-lo̍h chi̍t ê siâⁿ lī-khui siū-thâi ê lâng tē-it kūn; chiū hit ê siâⁿ ê tiúⁿ-ló tio̍h tùi gû-kûn tiong chhú chi̍t-chiah bē-bat ēng i lâi chòe-kang, bē-bat kòa-taⁿ ê gû-chéng-á;

4Hit-ê城ê長老tio̍h牽牛種á到有長流水ê山谷，無種無作ê，tī hit-ê山谷kòng折牛種á ê頷頸。hit ê siâⁿ ê tiúⁿ-ló tio̍h khan gû-chéng-á kàu ū tn̂g-lâu-chúi ê soaⁿ-kok, bô chèng bô choh-ê, tī hit ê soaⁿ-kok kòng-chi̍h gû-chéng-á ê ām-kún.

5祭司利未人ê kiáⁿ孫tio̍h近óa，因為耶和華你ê上帝揀in來服事伊，託耶和華ê名祝福；所有相告、相phah ê事，lóng tio̍h照in ê話來擬斷。Chè-si Lī-bī lâng ê kiáⁿ-sun tio̍h kūn-óa, in-ūi Iâ-hô-hoa lí ê Siōng-tè kéng in lâi ho̍k-sāi I, thok Iâ-hô-hoa ê miâ chiok-hok; só͘ ū saⁿ-kò, saⁿ-phah ê sū, lóng tio̍h chiàu in ê ōe lâi gí-toàn.

6Hit-ê城ê眾長老，就是離開受thâi ê人第一近ê，tio̍h tī hit-ê山谷中，所kòng折頷頸ê牛種á ê頂面來洗手；Hit ê siâⁿ ê chèng tiúⁿ-ló, chiū-sī lī-khui siū-thâi ê lâng tē-it kūn-ê, tio̍h tī hit ê soaⁿ-kok tiong, só͘ kòng-chi̍h ām-kún ê gû-chéng-á ê téng-bīn lâi sóe chhiú;

7也beh應來講：阮ê手bē-bat流chit-ê血，阮ê目睭也bē-bat看見。iā beh ìn lâi kóng, Goán ê chhiú bē-bat lâu chit ê huih, goán ê ba̍k-chiu iā bē-bat khòaⁿ-kìⁿ.

8耶和華ah，求你赦免你ê百姓以色列，你所贖回ê，莫得hō͘無罪ê血歸tī你ê百姓以色列。Iâ-hô-hoa ah, kiû Lí sià-bián Lí ê peh-sìⁿ Í-sek-lia̍t, Lí só͘ sio̍k-hôe ê, bo̍h-tit hō͘ bô-chōe ê huih kui tī Lí ê peh-sìⁿ Í-sek-lia̍t.

9Án-ni流hit-ê血ê罪kap伊無干涉；án-ni就tùi lín中間除去流無罪ê血ê罪；是你有行耶和華看做好ê。Án-ni lâu hit ê huih ê chōe kap i bô kan-sia̍p; án-ni chiū tùi lín tiong-kan tû-khì lâu bô-chōe ê huih ê chōe; sī lí ū kiâⁿ Iâ-hô-hoa khòaⁿ-chòe hó-ê.

10你出去kap你ê對敵交戰ê時，耶和華你ê上帝將in交tī你ê手，你也掠in去；Lí chhut-khì kap lí ê tùi-te̍k kau-chiàn ê sî, Iâ-hô-hoa lí ê Siōng-tè chiong in kau tī lí ê chhiú, lí iā lia̍h in khì;

11Hit時tī受掠ê人ê中間，若看見有美女，你也戀慕伊，beh娶伊做bó͘；hit-sî tī siū-lia̍h ê lâng ê tiong-kan, nā khòaⁿ-kìⁿ ū bí-lú, lí iā loân-bō͘ i, beh chhōa i chòe-bó͘;

12就thang娶到你ê家，伊就tio̍h剃頭毛，修指甲；chiū thang chhōa kàu lí ê ke, i chiū tio̍h thì thâu-mn̂g, siu chńg-kah;

13thǹg去伊受掠ê時所穿ê衫，tiàm tī你ê家哀哭父母一月日；然後你thang kap伊同房，你做伊ê丈夫，伊做你ê bó͘。thǹg-khì i siū-lia̍h ê sî só͘ chhēng ê saⁿ, tiàm tī lí ê ke ai-khàu pē-bú chi̍t-ge̍h-ji̍t; jiân-āu lí thang kap i tâng-pâng, lí chòe i ê tiōng-hu, i chòe lí ê bó͘.

14後來你若無歡喜伊，就tio̍h hō͘伊chhut-chāi伊ê意思出去，決斷m̄-thang賣錢，也m̄-thang當做女婢款待伊；因為你已經kap伊成親。Āu-lâi lí nā bô hoaⁿ-hí i, chiū tio̍h hō͘ i chhut-chāi i ê ì-sù chhut-khì, koat-toàn m̄-thang bōe-chîⁿ, iā m̄-thang tàng-chòe lú-pī khoán-thāi i; in-ūi lí í-keng kap i sêng-chhin.

15人若有兩個bó͘，一個是伊所疼ê，一個是伊所怨ê，lóng有kā伊生kiáⁿ，總是大kiáⁿ是所怨ê bó͘生ê；Lâng nā ū nn̄g ê bó͘, chi̍t-ê sī i só͘ thiàⁿ-ê, chi̍t-ê sī i só͘ oàn-ê, lóng ū kā i siⁿ-kiáⁿ, chóng-sī tōa-kiáⁿ sī só͘ oàn ê bó͘ siⁿ-ê;

16到hō͘ kiáⁿ承接業ê日，m̄-thang立受疼ê bó͘生ê kiáⁿ做大kiáⁿ，pôaⁿ過真ê大kiáⁿ，就是受怨ê bó͘ ê kiáⁿ；kàu hō͘ kiáⁿ sêng-chiap gia̍p ê ji̍t, m̄-thang li̍p siū-thiàⁿ ê bó͘ siⁿ ê kiáⁿ chòe tōa-kiáⁿ, pôaⁿ-kè chin ê tōa-kiáⁿ, chiū-sī siū-oàn ê bó͘ ê kiáⁿ;

17總是tio̍h認所怨ê bó͘ ê kiáⁿ做大kiáⁿ，將所有ê業hō͘伊雙份；因為伊是伊氣力ê起頭，大kiáⁿ ê名份是伊ê。chóng-sī tio̍h jīn só͘ oàn ê bó͘ ê kiáⁿ chòe tōa-kiáⁿ, chiong só͘ ū ê gia̍p hō͘ i siang-hūn; in-ūi i sī i khùi-la̍t ê khí-thâu, tōa-kiáⁿ ê bêng-hūn sī i-ê.

18人若有頑皮忤逆ê kiáⁿ，m̄聽in老父ê話，á是老母ê話，in雖然警戒伊，伊猶原m̄聽in；Lâng nā ū bân-phê ngó͘-ge̍k ê kiáⁿ, m̄-thiaⁿ in lāu-pē ê ōe, á-sī lāu-bú ê ōe, in sui-jiân kéng-kài i, i iû-goân m̄-thiaⁿ in;

19伊ê父kap伊ê母tio̍h掠伊，拖伊出，帶到本城ê長老hia，就是伊本所在ê城門；i ê pē kap i ê bú tio̍h lia̍h i, thoa i chhut, tòa-kàu pún-siâⁿ ê tiúⁿ-ló hia, chiū-sī i pún só͘-chāi ê siâⁿ-mn̂g;

20kā hit-ê城ê長老講：阮chit-ê kiáⁿ頑皮忤逆，m̄聽阮ê話，lām-sám 開錢、貪食、好酒；kā hit ê siâⁿ ê tiúⁿ-ló kóng, Goán chit ê kiáⁿ bân-phê ngó͘-ge̍k, m̄-thiaⁿ goán ê ōe, lām-sám khai-chîⁿ, tham-chia̍h, hò͘ⁿ-chiú;

21Hit-ê城ê眾人就tio̍h用石頭tìm hō͘伊死；án-ni，就tùi lín中間除去hit-ê pháiⁿ。以色列眾人lóng beh聽見來驚。hit ê siâⁿ ê chèng-lâng chiū tio̍h ēng chio̍h-thâu tìm hō͘ i sí; án-ni, chiū tùi lín tiong-kan tû-khì hit ê pháiⁿ. Í-sek-lia̍t chèng-lâng lóng beh thiaⁿ-kìⁿ lâi kiaⁿ.

22人若犯應該死ê罪，受辦罪死，你若吊伊tī柴裡，Lâng nā hoān eng-kai sí ê chōe, siū pān-chōe sí, lí nā tiàu i tī chhâ-ni̍h,

23伊ê身屍m̄-thang吊tī柴裡過暝，的確tio̍h tī hit日埋葬伊，免得phah lâ-sâm耶和華你上帝賞賜你做業ê地；因為受吊死ê人是受上帝所咒詛ê。i ê sin-si m̄-thang tiàu tī chhâ-ni̍h kè-mî, tek-khak tio̍h tī hit-ji̍t bâi-chòng i, bián-tit phah lâ-sâm Iâ-hô-hoa lí Siōng-tè siúⁿ-sù lí chòe-gia̍p ê tōe; in-ūi siū tiàu-sí ê lâng sī siū Siōng-tè só͘ chiù-chó͘ ê.