1Tī耶和華你上帝所賞賜你做業ê地，若tú-tio̍h受thâi ê人倒tī田野，m̄知是是誰 thâi死ê；Tī Iâ-hô-hoa lí Siōng-tè só͘ siúⁿ-sù lí chòe-gia̍p ê tōe, nā tú-tio̍h siū-thâi ê lâng tó tī chhân-iá, m̄-chai sī chī-chūi thâi-sí ê;

2你ê長老kap審判官tio̍h出來量伊，tùi受thâi ê人hit-tah，直到四圍hiah-ê城，lí ê tiúⁿ-ló kap sím-phòaⁿ-koaⁿ tio̍h chhut-lâi niû i, tùi siū-thâi ê lâng hit-tah, ti̍t-kàu sì-ûi hiah ê siâⁿ,

3看toh落一個城離開受thâi ê人第一近；就hit-ê城ê長老tio̍h tùi牛群中取一隻bē-bat用伊來做工，bē-bat掛擔ê牛種á；khòaⁿ toh-lo̍h chi̍t ê siâⁿ lī-khui siū-thâi ê lâng tē-it kūn; chiū hit ê siâⁿ ê tiúⁿ-ló tio̍h tùi gû-kûn tiong chhú chi̍t-chiah bē-bat ēng i lâi chòe-kang, bē-bat kòa-taⁿ ê gû-chéng-á;

4Hit-ê城ê長老tio̍h牽牛種á到有長流水ê山谷，無種無作ê，tī hit-ê山谷kòng折牛種á ê頷頸。hit ê siâⁿ ê tiúⁿ-ló tio̍h khan gû-chéng-á kàu ū tn̂g-lâu-chúi ê soaⁿ-kok, bô chèng bô choh-ê, tī hit ê soaⁿ-kok kòng-chi̍h gû-chéng-á ê ām-kún.

5祭司利未人ê kiáⁿ孫tio̍h近óa，因為耶和華你ê上帝揀in來服事伊，託耶和華ê名祝福；所有相告、相phah ê事，lóng tio̍h照in ê話來擬斷。Chè-si Lī-bī lâng ê kiáⁿ-sun tio̍h kūn-óa, in-ūi Iâ-hô-hoa lí ê Siōng-tè kéng in lâi ho̍k-sāi I, thok Iâ-hô-hoa ê miâ chiok-hok; só͘ ū saⁿ-kò, saⁿ-phah ê sū, lóng tio̍h chiàu in ê ōe lâi gí-toàn.

6Hit-ê城ê眾長老，就是離開受thâi ê人第一近ê，tio̍h tī hit-ê山谷中，所kòng折頷頸ê牛種á ê頂面來洗手；Hit ê siâⁿ ê chèng tiúⁿ-ló, chiū-sī lī-khui siū-thâi ê lâng tē-it kūn-ê, tio̍h tī hit ê soaⁿ-kok tiong, só͘ kòng-chi̍h ām-kún ê gû-chéng-á ê téng-bīn lâi sóe chhiú;

7也beh應來講：阮ê手bē-bat流chit-ê血，阮ê目睭也bē-bat看見。iā beh ìn lâi kóng, Goán ê chhiú bē-bat lâu chit ê huih, goán ê ba̍k-chiu iā bē-bat khòaⁿ-kìⁿ.

8耶和華ah，求你赦免你ê百姓以色列，你所贖回ê，莫得hō͘無罪ê血歸tī你ê百姓以色列。Iâ-hô-hoa ah, kiû Lí sià-bián Lí ê peh-sìⁿ Í-sek-lia̍t, Lí só͘ sio̍k-hôe ê, bo̍h-tit hō͘ bô-chōe ê huih kui tī Lí ê peh-sìⁿ Í-sek-lia̍t.

9Án-ni流hit-ê血ê罪kap伊無干涉；án-ni就tùi lín中間除去流無罪ê血ê罪；是你有行耶和華看做好ê。Án-ni lâu hit ê huih ê chōe kap i bô kan-sia̍p; án-ni chiū tùi lín tiong-kan tû-khì lâu bô-chōe ê huih ê chōe; sī lí ū kiâⁿ Iâ-hô-hoa khòaⁿ-chòe hó-ê.

10你出去kap你ê對敵交戰ê時，耶和華你ê上帝將in交tī你ê手，你也掠in去；Lí chhut-khì kap lí ê tùi-te̍k kau-chiàn ê sî, Iâ-hô-hoa lí ê Siōng-tè chiong in kau tī lí ê chhiú, lí iā lia̍h in khì;

11Hit時tī受掠ê人ê中間，若看見有美女，你也戀慕伊，beh娶伊做bó͘；hit-sî tī siū-lia̍h ê lâng ê tiong-kan, nā khòaⁿ-kìⁿ ū bí-lú, lí iā loân-bō͘ i, beh chhōa i chòe-bó͘;

12就thang娶到你ê家，伊就tio̍h剃頭毛，修指甲；chiū thang chhōa kàu lí ê ke, i chiū tio̍h thì thâu-mn̂g, siu chńg-kah;

13thǹg去伊受掠ê時所穿ê衫，tiàm tī你ê家哀哭父母一月日；然後你thang kap伊同房，你做伊ê丈夫，伊做你ê bó͘。thǹg-khì i siū-lia̍h ê sî só͘ chhēng ê saⁿ, tiàm tī lí ê ke ai-khàu pē-bú chi̍t-ge̍h-ji̍t; jiân-āu lí thang kap i tâng-pâng, lí chòe i ê tiōng-hu, i chòe lí ê bó͘.

14後來你若無歡喜伊，就tio̍h hō͘伊chhut-chāi伊ê意思出去，決斷m̄-thang賣錢，也m̄-thang當做女婢款待伊；因為你已經kap伊成親。Āu-lâi lí nā bô hoaⁿ-hí i, chiū tio̍h hō͘ i chhut-chāi i ê ì-sù chhut-khì, koat-toàn m̄-thang bōe-chîⁿ, iā m̄-thang tàng-chòe lú-pī khoán-thāi i; in-ūi lí í-keng kap i sêng-chhin.

15人若有兩個bó͘，一個是伊所疼ê，一個是伊所怨ê，lóng有kā伊生kiáⁿ，總是大kiáⁿ是所怨ê bó͘生ê；Lâng nā ū nn̄g ê bó͘, chi̍t-ê sī i só͘ thiàⁿ-ê, chi̍t-ê sī i só͘ oàn-ê, lóng ū kā i siⁿ-kiáⁿ, chóng-sī tōa-kiáⁿ sī só͘ oàn ê bó͘ siⁿ-ê;

16到hō͘ kiáⁿ承接業ê日，m̄-thang立受疼ê bó͘生ê kiáⁿ做大kiáⁿ，pôaⁿ過真ê大kiáⁿ，就是受怨ê bó͘ ê kiáⁿ；kàu hō͘ kiáⁿ sêng-chiap gia̍p ê ji̍t, m̄-thang li̍p siū-thiàⁿ ê bó͘ siⁿ ê kiáⁿ chòe tōa-kiáⁿ, pôaⁿ-kè chin ê tōa-kiáⁿ, chiū-sī siū-oàn ê bó͘ ê kiáⁿ;

17總是tio̍h認所怨ê bó͘ ê kiáⁿ做大kiáⁿ，將所有ê業hō͘伊雙份；因為伊是伊氣力ê起頭，大kiáⁿ ê名份是伊ê。chóng-sī tio̍h jīn só͘ oàn ê bó͘ ê kiáⁿ chòe tōa-kiáⁿ, chiong só͘ ū ê gia̍p hō͘ i siang-hūn; in-ūi i sī i khùi-la̍t ê khí-thâu, tōa-kiáⁿ ê bêng-hūn sī i-ê.

18人若有頑皮忤逆ê kiáⁿ，m̄聽in老父ê話，á是老母ê話，in雖然警戒伊，伊猶原m̄聽in；Lâng nā ū bân-phê ngó͘-ge̍k ê kiáⁿ, m̄-thiaⁿ in lāu-pē ê ōe, á-sī lāu-bú ê ōe, in sui-jiân kéng-kài i, i iû-goân m̄-thiaⁿ in;

19伊ê父kap伊ê母tio̍h掠伊，拖伊出，帶到本城ê長老hia，就是伊本所在ê城門；i ê pē kap i ê bú tio̍h lia̍h i, thoa i chhut, tòa-kàu pún-siâⁿ ê tiúⁿ-ló hia, chiū-sī i pún só͘-chāi ê siâⁿ-mn̂g;

20kā hit-ê城ê長老講：阮chit-ê kiáⁿ頑皮忤逆，m̄聽阮ê話，lām-sám 開錢、貪食、好酒；kā hit ê siâⁿ ê tiúⁿ-ló kóng, Goán chit ê kiáⁿ bân-phê ngó͘-ge̍k, m̄-thiaⁿ goán ê ōe, lām-sám khai-chîⁿ, tham-chia̍h, hò͘ⁿ-chiú;

21Hit-ê城ê眾人就tio̍h用石頭tìm hō͘伊死；án-ni，就tùi lín中間除去hit-ê pháiⁿ。以色列眾人lóng beh聽見來驚。hit ê siâⁿ ê chèng-lâng chiū tio̍h ēng chio̍h-thâu tìm hō͘ i sí; án-ni, chiū tùi lín tiong-kan tû-khì hit ê pháiⁿ. Í-sek-lia̍t chèng-lâng lóng beh thiaⁿ-kìⁿ lâi kiaⁿ.

22人若犯應該死ê罪，受辦罪死，你若吊伊tī柴裡，Lâng nā hoān eng-kai sí ê chōe, siū pān-chōe sí, lí nā tiàu i tī chhâ-ni̍h,

23伊ê身屍m̄-thang吊tī柴裡過暝，的確tio̍h tī hit日埋葬伊，免得phah lâ-sâm耶和華你上帝賞賜你做業ê地；因為受吊死ê人是受上帝所咒詛ê。i ê sin-si m̄-thang tiàu tī chhâ-ni̍h kè-mî, tek-khak tio̍h tī hit-ji̍t bâi-chòng i, bián-tit phah lâ-sâm Iâ-hô-hoa lí Siōng-tè siúⁿ-sù lí chòe-gia̍p ê tōe; in-ūi siū tiàu-sí ê lâng sī siū Siōng-tè só͘ chiù-chó͘ ê.

1你若看見你ê兄弟ê牛，á是羊，行迷路，你m̄-thang tìⁿ無看見，你的確tio̍h hō͘伊倒tńg來你ê兄弟hia。Lí nā khòaⁿ-kìⁿ lí ê hiaⁿ-tī ê gû, á-sī iûⁿ, kiâⁿ bê-lō͘, lí m̄-thang tìⁿ bô khòaⁿ-kìⁿ, lí tek-khak tio̍h hō͘ i tò-tńg-lâi lí ê hiaⁿ-tī hia.

2你ê兄弟若離開你遠，á是你m̄-bat伊，就tio̍h牽到你ê厝，留tī你hia，thèng候你ê兄弟來chhē，你chiah還伊。Lí ê hiaⁿ-tī nā lī-khui lí hn̄g, á-sī lí m̄-bat i, chiū tio̍h khan kàu lí ê chhù, lâu tī lí hia, thèng-hāu lí ê hiaⁿ-tī lâi chhē, lí chiah hêng i.

3你ê兄弟ê驢，á是伊ê衫，無論伊失落甚麼，伊失落，你所拾tio̍h ê，lóng tio̍h án-ni行，m̄-thang tìⁿ做無看見。Lí ê hiaⁿ-tī ê lû, á-sī i ê saⁿ, bô-lūn i sit-lo̍h sím-mi̍h, i sit-lo̍h, lí só͘ khioh-tio̍h ê, lóng tio̍h án-ni kiâⁿ, m̄-thang tìⁿ-chòe bô khòaⁿ-kìⁿ.

4你若看見你ê兄弟ê驢，á是牛，跋倒tī路裡，m̄-thang tìⁿ做無看見，的確tio̍h幫贊伊，扶伊起來。Lí nā khòaⁿ-kìⁿ lí ê hiaⁿ-tī ê lû, á-sī gû, poa̍h-tó tī lō͘-ni̍h, m̄-thang tìⁿ-chòe bô khòaⁿ-kìⁿ, tek-khak tio̍h pang-chān i, hû i khí-lâi.

5婦人人m̄-thang穿ta-po͘人所穿ê，ta-po͘人也m̄-thang穿婦人人ê衫；因為見若án-ni行ê，是耶和華你上帝所厭惡ê。Hū-jîn-lâng m̄-thang chhēng ta-po͘-lâng só͘ chhēng ê, ta-po͘-lâng iā m̄-thang chhēng hū-jîn-lâng ê saⁿ; in-ūi kìⁿ-nā án-ni kiâⁿ ê, sī Iâ-hô-hoa lí Siōng-tè só͘ iàm-ò͘ⁿ ê.

6你若tī路裡tú-tio̍h鳥siū，或是tī樹裡，或是tī地裡，內面有鳥á-kiáⁿ，á是鳥卵，鳥母àⁿ鳥kiáⁿ，á是孵卵，你m̄-thang掠鳥kiáⁿ續掠鳥母；Lí nā tī lō͘-ni̍h tú-tio̍h chiáu-siū, he̍k-sī tī chhiū-ni̍h, he̍k-sī tī tōe-ni̍h, lāi-bīn ū chiáu-á-kiáⁿ, á-sī chiáu-nn̄g, chiáu-bú àⁿ chiáu-kiáⁿ, á-sī pū-nn̄g, lí m̄-thang lia̍h chiáu-kiáⁿ sòa lia̍h chiáu-bú;

7的確tio̍h放鳥母去，總是鳥á-kiáⁿ你thang掠去；án-ni你就thang享受福氣koh食長歲壽。tek-khak tio̍h pàng chiáu-bú khì, chóng-sī chiáu-á-kiáⁿ lí thang lia̍h-khì; án-ni lí chiū thang hióng-siū hok-khì koh chia̍h tn̂g hè-siū.

8你若起新厝，tio̍h做欗杆tī厝頂，免得人tùi hia跋落來；流血ê罪就歸tī你ê厝。Lí nā khí sin chhù, tio̍h chòe lân-kan tī chhù-téng, bián-tit lâng tùi hia poa̍h-lo̍h-lâi; lâu-huih ê chōe chiū kui tī lí ê chhù.

9M̄-thang用兩樣ê種子掖tī你ê葡萄園；驚了做一下無去，就是你所掖ê種子結實ê，kap你ê葡萄園結實ê，lóng無thang su-khia用。M̄-thang ēng nn̄g-iūⁿ ê chéng-chí iā tī lí ê phû-tô-hn̂g; kiaⁿ-liáu chòe chi̍t-ē bô-khì, chiū-sī lí só͘ iā ê chéng-chí kiat-si̍t-ê, kap lí ê phû-tô-hn̂g kiat-si̍t-ê, lóng bô thang su-khia ēng.

10M̄-thang用牛kap驢相kap犁田。M̄-thang ēng gû kap lû saⁿ-kap lôe-chhân.

11M̄-thang穿chham-chhap ê布料、羊毛kap幼苧合織ê。M̄-thang chhēng chham-chhap ê pò͘-liāu, iûⁿ-mn̂g kap iù-tōe ha̍p-chit-ê.

12你所moa ê衫tio̍h tī伊ê四圍做鬚。Lí só͘ moa ê saⁿ tio̍h tī i ê sì-ûi chòe chhiu.

13人若娶bó͘，kap伊同房，Lâng nā chhōa-bó͘, kap i tâng-pâng,

14後來怨恨伊，譭謗伊pháiⁿ-tāi，phah-pháiⁿ伊ê名，講：我娶chit-ê cha-bó͘-kiáⁿ，kap伊同房，看伊無在室女ê憑據；āu-lâi oàn-hūn i, húi-pòng i pháiⁿ-tāi, phah-pháiⁿ i ê miâ, kóng, Góa chhōa chit ê cha-bó͘-kiáⁿ, kap i tâng-pâng, khòaⁿ i bô chāi-sek-lú ê pîn-kù;

15Cha-bó͘-kiáⁿ ê父母tio̍h the̍h cha-bó͘-kiáⁿ在室女ê憑據出來，帶到伊本城門ê長老hia；cha-bó͘-kiáⁿ ê pē-bú tio̍h the̍h cha-bó͘-kiáⁿ chāi-sek-lú ê pîn-kù chhut-lâi, tòa kàu i pún siâⁿ-mn̂g ê tiúⁿ-ló hia;

16Cha-bó͘-kiáⁿ ê老父tio̍h對長老講：我用我ê cha-bó͘-kiáⁿ hō͘ chit-ê人做bó͘，伊怨恨伊；cha-bó͘-kiáⁿ ê lāu-pē tio̍h tùi tiúⁿ-ló kóng, Góa ēng góa ê cha-bó͘-kiáⁿ hō͘ chit ê lâng chòe-bó͘, i oàn-hūn i;

17看ah，伊譭謗伊pháiⁿ-tāi，講：我看你ê cha-bó͘-kiáⁿ無在室女ê憑據；其實chit-ê是我ê cha-bó͘-kiáⁿ在室女ê憑據。父母就將hit-ê布排tī本城長老ê面前。khòaⁿ ah, i húi-pòng i pháiⁿ-tāi, kóng, Góa khòaⁿ lí ê cha-bó͘-kiáⁿ bô chāi-sek-lú ê pîn-kù; kî-si̍t chit-ê sī góa ê cha-bó͘-kiáⁿ chāi-sek-lú ê pîn-kù. Pē-bú chiū chiong hit-ê pò͘ pâi tī pún-siâⁿ tiúⁿ-ló ê bīn-chêng.

18Hit-ê城ê長老tio̍h掠hit-ê人來責罰伊；Hit ê siâⁿ ê tiúⁿ-ló tio̍h lia̍h hit ê lâng lâi chek-hoa̍t i;

19也tio̍h罰伊一百銀，hō͘ cha-bó͘-kiáⁿ ê老父；因為伊有加誣以色列在室女ê pháiⁿ名；cha-bó͘-kiáⁿ猶原做伊ê bó͘，一世人m̄-thang離出伊。iā tio̍h hoa̍t i chi̍t-pah gûn, hō͘ cha-bó͘-kiáⁿ ê lāu-pē; in-ūi i ū ka-bû Í-sek-lia̍t chāi-sek-lú ê pháiⁿ-miâ; cha-bó͘-kiáⁿ iû-goân chòe i ê bó͘, chi̍t-sì-lâng m̄-thang lî-chhut i.

20總是chit-ê事若是真ê，cha-bó͘-kiáⁿ無在室女ê憑據；Chóng-sī chit ê sū nā sī chin-ê, cha-bó͘-kiáⁿ bô chāi-sek-lú ê pîn-kù;

21in tio̍h掠hit-ê cha-bó͘-kiáⁿ到伊ê老父ê厝ê門口，伊本城ê人tio̍h用石頭kā伊tìm死；因為伊tī以色列中行見笑ê事，tī伊ê老父ê家行淫亂；án-ni就tùi lín中間除去hit-ê pháiⁿ。in tio̍h lia̍h hit ê cha-bó͘-kiáⁿ kàu i ê lāu-pē ê chhù ê mn̂g-kháu, i pún-siâⁿ ê lâng tio̍h ēng chio̍h-thâu kā i tìm-sí; in-ūi i tī Í-sek-lia̍t tiong kiâⁿ kiàn-siàu ê sū, tī i ê lāu-pē ê ke kiâⁿ îm-loān; án-ni chiū tùi lín tiong-kan tû-khì hit ê pháiⁿ.

22若tú-tio̍h有人kap嫁丈夫ê婦人人同房，姦夫kap hit-ê婦人人lóng tio̍h hō͘ in死；án-ni就tùi以色列ê中間除去hit-ê pháiⁿ。Nā tú-tio̍h ū lâng kap kè tiōng-hu ê hū-jîn-lâng tâng-pâng, kan-hu kap hit ê hū-jîn-lâng lóng tio̍h hō͘ in sí; án-ni chiū tùi Í-sek-lia̍t ê tiong-kan tû-khì hit ê pháiⁿ.

23若有cha-bó͘-kiáⁿ，是在室女ê，已經做人定tio̍h，有人tī城內tú-tio̍h伊，kap伊同房；Nā ū cha-bó͘-kiáⁿ, sī chāi-sek-lú ê, í-keng chòe lâng tiāⁿ-tio̍h, ū lâng tī siâⁿ-lāi tú-tio̍h i, kap i tâng-pâng;

24就lín tio̍h掠chit兩人出去到hit-ê城門，用石頭tìm死in；cha-bó͘-kiáⁿ，因為伊tī城內iáu-kú無哮救；ta-po͘人，因為伊凌辱伊ê厝邊ê bó͘；án-ni就tùi lín中間除去hit-ê pháiⁿ。chiū lín tio̍h lia̍h chit nn̄g-lâng chhut-khì kàu hit ê siâⁿ-mn̂g, ēng chio̍h-thâu tìm-sí in; cha-bó͘-kiáⁿ, in-ūi i tī siâⁿ-lāi iáu-kú bô háu-kiù; ta-po͘-lâng, in-ūi i lêng-jio̍k i ê chhù-piⁿ ê bó͘; án-ni chiū tùi lín tiong-kan tû-khì hit ê pháiⁿ.

25總是若有人tī田野tú-tio̍h已經聘定tio̍h ê cha-bó͘-kiáⁿ，hit人kā伊強姦；kan-ta hit-ê kā伊強姦ê人tio̍h死；Chóng-sī nā ū lâng tī chhân-iá tú-tio̍h í-keng phèng tiāⁿ-tio̍h ê cha-bó͘-kiáⁿ, hit-lâng kā i kiông-kan; kan-ta hit-ê kā i kiông-kan ê lâng tio̍h sí;

26總是hit-ê cha-bó͘-kiáⁿ你m̄-thang怎樣辦伊；因為hit-ê cha-bó͘-kiáⁿ無應該死ê事；chit-ê tāi-chì是親像人起來攻擊伊ê厝邊，thâi死伊一樣；chóng-sī hit ê cha-bó͘-kiáⁿ lí m̄-thang cháiⁿ-iūⁿ pān i; in-ūi hit ê cha-bó͘-kiáⁿ bô eng-kai sí ê sū; chit ê tāi-chì sī chhin-chhiūⁿ lâng khí-lâi kong-kek i ê chhù-piⁿ, thâi-sí i chi̍t-iūⁿ;

27因為伊tī田野tú-tio̍h伊，hit-ê做人定tio̍h ê cha-bó͘-gín-ná哮救，也無人救伊。in-ūi i tī chhân-iá tú-tio̍h i, hit-ê chòe-lâng tiāⁿ-tio̍h ê cha-bó͘-gín-ná háu-kiù, iā bô lâng kiù i.

28若ta-po͘人tú-tio̍h 未配人ê在室女，擒伊kap伊私通，hō͘人看見，Nā ta-po͘-lâng tú-tio̍h bē phòe lâng ê chāi-sek-lú, khîⁿ i kap i su-thong, hō͘ lâng khòaⁿ-kìⁿ,

29就hit-ê kap伊私通ê人，tio̍h the̍h五十ê銀，hō͘ cha-bó͘-gín-ná ê老父，因為伊已經凌辱伊；就tio̍h娶伊做bó͘，一世人m̄-thang離伊。chiū hit-ê kap i su-thong ê lâng, tio̍h the̍h gō͘-cha̍p ê gûn, hō͘ cha-bó͘-gín-ná ê lāu-pē, in-ūi i í-keng lêng-jio̍k i; chiū tio̍h chhōa i chòe bó͘, chi̍t-sì-lâng m̄-thang lî i.

30人m̄-thang娶老父ê後bó͘做bó͘，m̄-thang掀開伊ê老父ê衫á裾。Lâng m̄-thang chhōa lāu-pē ê āu-bó͘ chòe-bó͘, m̄-thang hian-khui i ê lāu-pē ê saⁿ-á-ku.

1見若外腎受傷ê，á是受閹割ê，m̄-thang入耶和華ê會。Kìⁿ-nā gōa-sīn siū-siong-ê, á-sī siū iam-koah-ê, m̄-thang ji̍p Iâ-hô-hoa ê hōe.

2私通來生ê kiáⁿ m̄-thang入耶和華ê會；雖然到伊ê十代，也m̄-thang入耶和華ê會。Su-thong lâi siⁿ ê kiáⁿ m̄-thang ji̍p Iâ-hô-hoa ê hōe; sui-jiân kàu i ê cha̍p-tāi, iā m̄-thang ji̍p Iâ-hô-hoa ê hōe.

3A-bûn人á是Mô͘-ap人，m̄-thang入耶和華ê會；雖然到in ê十代，永遠bōe-thang入耶和華ê會；A-bûn lâng á-sī Mô͘-ap lâng, m̄-thang ji̍p Iâ-hô-hoa ê hōe; sui-jiân kàu in ê cha̍p-tāi, éng-oán bōe thang ji̍p Iâ-hô-hoa ê hōe;

4因為lín出埃及ê時，in無用食物kap水，tī路裡迎接lín；koh因為in對敵lín，倩Bí-só͘ pho-tāi-bí ê Pì-toa̍t人，Pí-jíⁿ ê kiáⁿ，Pa-lân來咒詛lín。in-ūi lín chhut Ai-ki̍p ê sî, in bô ēng chia̍h-mi̍h kap chúi, tī lō͘-ni̍h ngiâ-chih lín; koh in-ūi in tùi-te̍k lín, chhiàⁿ Bí-só͘-pho-tāi-bí ê Pì-toa̍t lâng, Pí-jíⁿ ê kiáⁿ, Pa-lân lâi chiù-chó͘ lín.

5總是耶和華你ê上帝m̄聽Pa-lân；耶和華你ê上帝hō͘ hit-ê咒詛變做祝福你；因為耶和華你ê上帝疼你。Chóng-sī Iâ-hô-hoa lí ê Siōng-tè m̄-thiaⁿ Pa-lân; Iâ-hô-hoa lí ê Siōng-tè hō͘ hit ê chiù-chó͘ piàn-chòe chiok-hok lí; in-ūi Iâ-hô-hoa lí ê Siōng-tè thiàⁿ lí.

6你一世人到永遠m̄-thang kā in圖謀平安kap福氣。Lí chi̍t-sì-lâng kàu éng-oán m̄-thang kā in tô͘-bô͘ pêng-an kap hok-khì.

7M̄-thang怨恨Í-tong人，因為伊是你ê兄弟；m̄-thang怨恨埃及人，因為lín bat出外tī-hia；M̄-thang oàn-hūn Í-tong lâng, in-ūi i sī lí ê hiaⁿ-tī; m̄-thang oàn-hūn Ai-ki̍p lâng, in-ūi lín bat chhut-gōa tī-hia;

8in所生ê kiáⁿ孫到第三代thang入耶和華ê會。in só͘ siⁿ ê kiáⁿ-sun kàu tē-saⁿ tāi thang ji̍p Iâ-hô-hoa ê hōe.

9你ê軍隊出去攻擊你ê對敵，tī營盤tio̍h家己禁戒一切ê pháiⁿ事。Lí ê kun-tūi chhut-khì kong-kek lí ê tùi-te̍k, tī iâⁿ-pôaⁿ tio̍h ka-kī kìm-kài it-chhè ê pháiⁿ-sū.

10Lín中間若有人，tī暝時所tú-tio̍h-ê，來bak無清氣，伊就tio̍h出去到營外，m̄-thang入營內；Lín tiong-kan nā ū lâng, tī mî-sî só͘ tú-tio̍h-ê, lâi bak bô chheng-khì, i chiū tio̍h chhut-khì kàu iâⁿ-gōa, m̄-thang ji̍p iâⁿ-lāi;

11到beh暗ê時，伊tio̍h用水洗，到日落chiah thang入營。kàu beh àm ê sî, i tio̍h ēng chúi sóe, kàu ji̍t-lo̍h chiah thang ji̍p iâⁿ.

12你tī營外揀一位thang出去到外面ê所在；Lí tī iâⁿ-gōa kéng chi̍t-ūi thang chhut-khì kàu gōa-bīn ê só͘-chāi;

13tī你ê器具內tio̍h有托á；你tī外面出恭(*放屎)ê時，tio̍h用伊掘土，chiah oa̍t-tńg身，蓋你所放ê；tī lí ê khì-kū-lāi tio̍h ū thuh-á; lí tī gōa-bīn chhut-kiong ê sî, tio̍h ēng i ku̍t thô͘, chiah oa̍t-tńg-sin, khàm lí só͘ pàng ê;

14因為耶和華你ê上帝四界行tī你ê營內，beh拯救你，將你ê對敵交hō͘你；所以你ê營盤應該tio̍h有聖潔；免得伊看見你中間有污穢，就離開你。in-ūi Iâ-hô-hoa lí ê Siōng-tè sì-kòe kiâⁿ tī lí ê iâⁿ-lāi, beh chín-kiù lí, chiong lí ê tùi-te̍k kau hō͘ lí; só͘-í lí ê iâⁿ-pôaⁿ eng-kai tio̍h ū sèng-kiat; bián-tit I khòaⁿ-kìⁿ lí tiong-kan ū ù-òe, chiū lī-khui lí.

15若有奴僕脫離伊ê主人，走到你hia，你m̄-thang將伊交hō͘伊ê主人；Nā ū lô͘-po̍k thoat-lī i ê chú-lâng, cháu kàu lí hia, lí m̄-thang chiong i kau hō͘ i ê chú-lâng;

16伊beh kap你tiàm，khiā你中間，tī伊所揀你一個城門內ê所在，就是伊所歡喜ê；你m̄-thang欺負伊。i beh kap lí tiàm, khiā lí tiong-kan, tī i só͘ kéng lí chi̍t ê siâⁿ-mn̂g-lāi ê só͘-chāi, chiū-sī i só͘ hoaⁿ-hí ê; lí m̄-thang khi-hū i.

17以色列ê女子中m̄-thang有妓女。 以色列ê男子中m̄-thang有攣童。Í-sek-lia̍t ê lú-chú-tiong m̄-thang ū kī-lú. Í-sek-lia̍t ê lâm-chú-tiong m̄-thang ū loân-tông.

18娼妓所得tio̍h ê錢，á是狗類ê工錢，你m̄-thang 帶入耶和華你上帝ê殿來謝願；因為chit兩項lóng是耶和華你上帝所厭惡ê。Chhiong-ki só͘ tit-tio̍h ê chîⁿ, á-sī káu-lūi ê kang-chîⁿ, lí m̄-thang tòa ji̍p Iâ-hô-hoa lí Siōng-tè ê tiān lâi siā-goān; in-ūi chit nn̄g-hāng lóng sī Iâ-hô-hoa lí Siōng-tè só͘ iàm-ò͘ⁿ ê.

19你ê兄弟或是對你借錢銀，á是借食物，借見若能生利息ê物，你lóng m̄-thang the̍h伊ê利息；Lí ê hiaⁿ-tī he̍k-sī tùi lí chioh chîⁿ-gûn, á-sī chioh chia̍h-mi̍h, chioh kìⁿ-nā ōe siⁿ lī-sek ê mi̍h, lí lóng m̄-thang the̍h i ê lī-sek;

20你借外族ê人，thang the̍h伊ê利息，總是借你ê兄弟就m̄-thang the̍h伊ê利息；thang hō͘耶和華你上帝tī你所去beh得tio̍h做業ê地，tī你ê手所做一切ê事，賜福你。lí chioh gōa-cho̍k ê lâng, thang the̍h i ê lī-sek, chóng-sī chioh lí ê hiaⁿ-tī chiū m̄-thang the̍h i ê lī-sek; thang hō͘ Iâ-hô-hoa lí Siōng-tè tī lí só͘ khì beh tit-tio̍h chòe-gia̍p ê tōe, tī lí ê chhiú só͘ chòe it-chhè ê sū, sù-hok lí.

21你對耶和華你ê上帝下願，謝伊m̄-thang 延chhiân；因為耶和華你ê上帝的確beh對你討；你若無謝，就有罪；Lí tùi Iâ-hô-hoa lí ê Siōng-tè hē-goān, siā i m̄-thang iân-chhiân; in-ūi Iâ-hô-hoa lí ê Siōng-tè tek-khak beh tùi lí thó; lí nā bô siā, chiū ū chōe;

22你若無下願，就無罪。lí nā bô hē-goān, chiū bô chōe.

23見若對你ê嘴所出ê，照你已經下願tī耶和華你上帝來甘心獻ê，就是你ê嘴所允，你tio̍h執守來行伊。Kìⁿ-nā tùi lí ê chhùi só͘ chhut ê, chiàu lí í-keng hē-goān tī Iâ-hô-hoa lí Siōng-tè lâi kam-sim hiàn ê, chiū-sī lí ê chhùi só͘ ín, lí tio̍h chip-siú lâi kiâⁿ i.

24你入你ê厝邊ê葡萄園，thang chhut-chāi意思食葡萄到飽；總是m̄-thang貯tī你ê器具內。Lí ji̍p lí ê chhù-piⁿ ê phû-tô-hn̂g, thang chhut-chāi ì-sù chia̍h phû-tô kàu pá; chóng-sī m̄-thang tóe tī lí ê khì-kū-lāi.

25你入你ê厝邊iáu未割ê五穀中，thang用手摘伊ê穗；總是m̄-thang用鐮á割你ê厝邊ê五穀。Lí ji̍p lí ê chhù-piⁿ iáu-bē koah ê ngó͘-kok tiong, thang ēng chhiú tiah i ê sūi; chóng-sī m̄-thang ēng liâm-á koah lí ê chhù-piⁿ ê gō͘-kak.