1見若外腎受傷ê，á是受閹割ê，m̄-thang入耶和華ê會。Kìⁿ-nā gōa-sīn siū-siong-ê, á-sī siū iam-koah-ê, m̄-thang ji̍p Iâ-hô-hoa ê hōe.

2私通來生ê kiáⁿ m̄-thang入耶和華ê會；雖然到伊ê十代，也m̄-thang入耶和華ê會。Su-thong lâi siⁿ ê kiáⁿ m̄-thang ji̍p Iâ-hô-hoa ê hōe; sui-jiân kàu i ê cha̍p-tāi, iā m̄-thang ji̍p Iâ-hô-hoa ê hōe.

3A-bûn人á是Mô͘-ap人，m̄-thang入耶和華ê會；雖然到in ê十代，永遠bōe-thang入耶和華ê會；A-bûn lâng á-sī Mô͘-ap lâng, m̄-thang ji̍p Iâ-hô-hoa ê hōe; sui-jiân kàu in ê cha̍p-tāi, éng-oán bōe thang ji̍p Iâ-hô-hoa ê hōe;

4因為lín出埃及ê時，in無用食物kap水，tī路裡迎接lín；koh因為in對敵lín，倩Bí-só͘ pho-tāi-bí ê Pì-toa̍t人，Pí-jíⁿ ê kiáⁿ，Pa-lân來咒詛lín。in-ūi lín chhut Ai-ki̍p ê sî, in bô ēng chia̍h-mi̍h kap chúi, tī lō͘-ni̍h ngiâ-chih lín; koh in-ūi in tùi-te̍k lín, chhiàⁿ Bí-só͘-pho-tāi-bí ê Pì-toa̍t lâng, Pí-jíⁿ ê kiáⁿ, Pa-lân lâi chiù-chó͘ lín.

5總是耶和華你ê上帝m̄聽Pa-lân；耶和華你ê上帝hō͘ hit-ê咒詛變做祝福你；因為耶和華你ê上帝疼你。Chóng-sī Iâ-hô-hoa lí ê Siōng-tè m̄-thiaⁿ Pa-lân; Iâ-hô-hoa lí ê Siōng-tè hō͘ hit ê chiù-chó͘ piàn-chòe chiok-hok lí; in-ūi Iâ-hô-hoa lí ê Siōng-tè thiàⁿ lí.

6你一世人到永遠m̄-thang kā in圖謀平安kap福氣。Lí chi̍t-sì-lâng kàu éng-oán m̄-thang kā in tô͘-bô͘ pêng-an kap hok-khì.

7M̄-thang怨恨Í-tong人，因為伊是你ê兄弟；m̄-thang怨恨埃及人，因為lín bat出外tī-hia；M̄-thang oàn-hūn Í-tong lâng, in-ūi i sī lí ê hiaⁿ-tī; m̄-thang oàn-hūn Ai-ki̍p lâng, in-ūi lín bat chhut-gōa tī-hia;

8in所生ê kiáⁿ孫到第三代thang入耶和華ê會。in só͘ siⁿ ê kiáⁿ-sun kàu tē-saⁿ tāi thang ji̍p Iâ-hô-hoa ê hōe.

9你ê軍隊出去攻擊你ê對敵，tī營盤tio̍h家己禁戒一切ê pháiⁿ事。Lí ê kun-tūi chhut-khì kong-kek lí ê tùi-te̍k, tī iâⁿ-pôaⁿ tio̍h ka-kī kìm-kài it-chhè ê pháiⁿ-sū.

10Lín中間若有人，tī暝時所tú-tio̍h-ê，來bak無清氣，伊就tio̍h出去到營外，m̄-thang入營內；Lín tiong-kan nā ū lâng, tī mî-sî só͘ tú-tio̍h-ê, lâi bak bô chheng-khì, i chiū tio̍h chhut-khì kàu iâⁿ-gōa, m̄-thang ji̍p iâⁿ-lāi;

11到beh暗ê時，伊tio̍h用水洗，到日落chiah thang入營。kàu beh àm ê sî, i tio̍h ēng chúi sóe, kàu ji̍t-lo̍h chiah thang ji̍p iâⁿ.

12你tī營外揀一位thang出去到外面ê所在；Lí tī iâⁿ-gōa kéng chi̍t-ūi thang chhut-khì kàu gōa-bīn ê só͘-chāi;

13tī你ê器具內tio̍h有托á；你tī外面出恭(*放屎)ê時，tio̍h用伊掘土，chiah oa̍t-tńg身，蓋你所放ê；tī lí ê khì-kū-lāi tio̍h ū thuh-á; lí tī gōa-bīn chhut-kiong ê sî, tio̍h ēng i ku̍t thô͘, chiah oa̍t-tńg-sin, khàm lí só͘ pàng ê;

14因為耶和華你ê上帝四界行tī你ê營內，beh拯救你，將你ê對敵交hō͘你；所以你ê營盤應該tio̍h有聖潔；免得伊看見你中間有污穢，就離開你。in-ūi Iâ-hô-hoa lí ê Siōng-tè sì-kòe kiâⁿ tī lí ê iâⁿ-lāi, beh chín-kiù lí, chiong lí ê tùi-te̍k kau hō͘ lí; só͘-í lí ê iâⁿ-pôaⁿ eng-kai tio̍h ū sèng-kiat; bián-tit I khòaⁿ-kìⁿ lí tiong-kan ū ù-òe, chiū lī-khui lí.

15若有奴僕脫離伊ê主人，走到你hia，你m̄-thang將伊交hō͘伊ê主人；Nā ū lô͘-po̍k thoat-lī i ê chú-lâng, cháu kàu lí hia, lí m̄-thang chiong i kau hō͘ i ê chú-lâng;

16伊beh kap你tiàm，khiā你中間，tī伊所揀你一個城門內ê所在，就是伊所歡喜ê；你m̄-thang欺負伊。i beh kap lí tiàm, khiā lí tiong-kan, tī i só͘ kéng lí chi̍t ê siâⁿ-mn̂g-lāi ê só͘-chāi, chiū-sī i só͘ hoaⁿ-hí ê; lí m̄-thang khi-hū i.

17以色列ê女子中m̄-thang有妓女。 以色列ê男子中m̄-thang有攣童。Í-sek-lia̍t ê lú-chú-tiong m̄-thang ū kī-lú. Í-sek-lia̍t ê lâm-chú-tiong m̄-thang ū loân-tông.

18娼妓所得tio̍h ê錢，á是狗類ê工錢，你m̄-thang 帶入耶和華你上帝ê殿來謝願；因為chit兩項lóng是耶和華你上帝所厭惡ê。Chhiong-ki só͘ tit-tio̍h ê chîⁿ, á-sī káu-lūi ê kang-chîⁿ, lí m̄-thang tòa ji̍p Iâ-hô-hoa lí Siōng-tè ê tiān lâi siā-goān; in-ūi chit nn̄g-hāng lóng sī Iâ-hô-hoa lí Siōng-tè só͘ iàm-ò͘ⁿ ê.

19你ê兄弟或是對你借錢銀，á是借食物，借見若能生利息ê物，你lóng m̄-thang the̍h伊ê利息；Lí ê hiaⁿ-tī he̍k-sī tùi lí chioh chîⁿ-gûn, á-sī chioh chia̍h-mi̍h, chioh kìⁿ-nā ōe siⁿ lī-sek ê mi̍h, lí lóng m̄-thang the̍h i ê lī-sek;

20你借外族ê人，thang the̍h伊ê利息，總是借你ê兄弟就m̄-thang the̍h伊ê利息；thang hō͘耶和華你上帝tī你所去beh得tio̍h做業ê地，tī你ê手所做一切ê事，賜福你。lí chioh gōa-cho̍k ê lâng, thang the̍h i ê lī-sek, chóng-sī chioh lí ê hiaⁿ-tī chiū m̄-thang the̍h i ê lī-sek; thang hō͘ Iâ-hô-hoa lí Siōng-tè tī lí só͘ khì beh tit-tio̍h chòe-gia̍p ê tōe, tī lí ê chhiú só͘ chòe it-chhè ê sū, sù-hok lí.

21你對耶和華你ê上帝下願，謝伊m̄-thang 延chhiân；因為耶和華你ê上帝的確beh對你討；你若無謝，就有罪；Lí tùi Iâ-hô-hoa lí ê Siōng-tè hē-goān, siā i m̄-thang iân-chhiân; in-ūi Iâ-hô-hoa lí ê Siōng-tè tek-khak beh tùi lí thó; lí nā bô siā, chiū ū chōe;

22你若無下願，就無罪。lí nā bô hē-goān, chiū bô chōe.

23見若對你ê嘴所出ê，照你已經下願tī耶和華你上帝來甘心獻ê，就是你ê嘴所允，你tio̍h執守來行伊。Kìⁿ-nā tùi lí ê chhùi só͘ chhut ê, chiàu lí í-keng hē-goān tī Iâ-hô-hoa lí Siōng-tè lâi kam-sim hiàn ê, chiū-sī lí ê chhùi só͘ ín, lí tio̍h chip-siú lâi kiâⁿ i.

24你入你ê厝邊ê葡萄園，thang chhut-chāi意思食葡萄到飽；總是m̄-thang貯tī你ê器具內。Lí ji̍p lí ê chhù-piⁿ ê phû-tô-hn̂g, thang chhut-chāi ì-sù chia̍h phû-tô kàu pá; chóng-sī m̄-thang tóe tī lí ê khì-kū-lāi.

25你入你ê厝邊iáu未割ê五穀中，thang用手摘伊ê穗；總是m̄-thang用鐮á割你ê厝邊ê五穀。Lí ji̍p lí ê chhù-piⁿ iáu-bē koah ê ngó͘-kok tiong, thang ēng chhiú tiah i ê sūi; chóng-sī m̄-thang ēng liâm-á koah lí ê chhù-piⁿ ê gō͘-kak.

1人若娶bó͘，然後看伊ê bó͘ m̄中意(tèng-ì)，因為伊知伊有無合宜ê事，就thang寫離書hō͘伊，交伊ê手，差伊離開伊ê家。Lâng nā chhōa-bó͘, jiân-āu khòaⁿ i ê bó͘ m̄ tèng-ì, in-ūi i chai i ū bô ha̍p-gî ê sū, chiū thang siá lî-su hō͘ i, kau i ê chhiú, chhe i lī-khui i ê ke.

2婦人人離開伊ê家了後，thang去嫁別人。Hū-jîn-lâng lī-khui i ê ke liáu-āu, thang khì kè pa̍t-lâng.

3若是後ê丈夫怨恨伊，也寫離書交伊ê手，kah伊離開伊ê家，á是伊後ê丈夫娶伊做bó͘就死；Nā sī āu ê tiōng-hu oàn-hūn i, iā siá lî-su kau i ê chhiú, kah i lī-khui i ê ke, á-sī i āu ê tiōng-hu chhōa i chòe-bó͘ chiū sí;

4就hit-ê前ê丈夫已經kah伊去ê，bōe得thang tī伊phah lâ-sâm以後，koh娶伊做bó͘；因為這是耶和華所厭惡ê；m̄-thang hō͘耶和華你ê上帝所賞賜你做業ê地來犯罪。chiū hit-ê chêng ê tiōng-hu í-keng kah i khì-ê, bōe-tit-thang tī i phah lâ-sâm í-āu, koh chhōa i chòe-bó͘; in-ūi che sī Iâ-hô-hoa só͘ iàm-ò͘ⁿ-ê; m̄-thang hō͘ Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe lâi hoān-chōe.

5新娶bó͘ ê人m̄-thang去交戰，也m̄-thang交代伊辨理甚麼事；thang hō͘伊tī家內清閒一年，thang hō͘伊所娶ê bó͘歡喜。Sin chhōa-bó͘ ê lâng m̄-thang khì kau-chiàn, iā m̄-thang kau-tài i pān-lí sím-mi̍h sū; thang hō͘ i tī ke-lāi chheng-hân chi̍t-nî, thang hō͘ i só͘ chhōa ê bó͘ hoaⁿ-hí.

6M̄-thang用人ê石磨，á是石磨ê頂楯(téng-tún)，做準當；因為這是用人ê性命做準當。M̄-thang ēng lâng ê chio̍h-bō, á-sī chio̍h-bō ê téng-tún, chòe chún-tǹg; in-ūi che sī ēng lâng ê sìⁿ-miā chòe chún-tǹg.

7若tú-tio̍h人拐以色列中一個兄弟，款待伊做奴才，á是賣伊，hit-ê拐棍就tio̍h hō͘伊死；án-ni，就tùi lín中間除去hit-ê pháiⁿ。Nā tú-tio̍h lâng koái Í-sek-lia̍t-tiong chi̍t-ê hiaⁿ-tī, khoán-thāi i chòe lô͘-châi, á-sī bōe i, hit ê koái-kùn chiū tio̍h hō͘ i sí; án-ni, chiū tùi lín tiong-kan tû-khì hit ê pháiⁿ.

8Thái-ko ê pháiⁿ症頭，你tio̍h真細膩；祭司利未人一切所教示lín-ê，tio̍h照án-ni來行；我所命令in-ê，lín tio̍h執守來行；Thái-ko ê pháiⁿ chèng-thâu, lí tio̍h chin sòe-jī; chè-si Lī-bī lâng it-chhè só͘ kà-sī lín-ê, tio̍h chiàu án-ni lâi kiâⁿ; góa só͘ bēng-lēng in ê, lín tio̍h chip-siú lâi kiâⁿ;

9早出埃及ê時，耶和華你上帝tī路裡對Bí-lī-àm所行ê，你tio̍h記得。chá chhut Ai-ki̍p ê sî, Iâ-hô-hoa lí Siōng-tè tī lō͘-ni̍h tùi Bí-lī-àm só͘-kiâⁿ-ê, lí tio̍h kì-tit.

10你無論用甚麼借厝邊，m̄-thang入伊ê家the̍h準當，Lí bô-lūn ēng sím-mi̍h chioh chhù-piⁿ, m̄-thang ji̍p i ê ke the̍h chún-tǹg,

11你tio̍h khiā tī外面，thèng候kā你借ê人the̍h準當出來hō͘你；lí tio̍h khiā tī gōa-bīn, thèng-hāu kā lí chioh ê lâng the̍h chún-tǹg chhut-lâi hō͘ lí;

12Hit人若是sòng-hiong，你m̄-thang留伊ê準當過暝；hit lâng nā sī sòng-hiong, lí m̄-thang lâu i ê chún-tǹg kè-mî;

13日落ê時，的確tio̍h用hit-ê準當還伊，hō͘伊用伊ê衫kah teh睏；伊就kā你祝福；這tī耶和華你上帝ê面前，beh算做你ê義。ji̍t-lo̍h ê sî, tek-khak tio̍h ēng hit ê chún-tǹg hêng i, hō͘ i ēng i ê saⁿ kah teh khùn; i chiū kā lí chiok-hok; che tī Iâ-hô-hoa lí Siōng-tè ê bīn-chêng, beh sǹg-chòe lí ê gī.

14困苦sòng-hiong ê倩工人，無論是你ê兄弟，á是出外人tiàm tī你ê地，tī你ê城門內ê，你m̄-thang欺負伊；Khùn-khó͘ sòng-hiong ê chhiàⁿ-kang lâng, bô-lūn sī lí ê hiaⁿ-tī, á-sī chhut-gōa lâng tiàm tī lí ê tōe, tī lí ê siâⁿ-mn̂g-lāi ê, lí m̄-thang khi-hū i;

15伊ê工錢你hit日tio̍h hō͘伊，m̄-thang thèng候到日落了；因為伊sòng-hiong，掛心tī hit-ê；驚了伊因為你來對耶和華喉叫，你就有罪。i ê kang-chîⁿ lí hit-ji̍t tio̍h hō͘ i, m̄-thang thèng-hāu kàu ji̍t-lo̍h-liáu; in-ūi i sòng-hiong, kòa-sim tī hit-ê; kiaⁿ-liáu i in-ūi lí lâi tùi Iâ-hô-hoa âu-kiò, lí chiū ū chōe.

16M̄-thang因為kiáⁿ來hō͘老父死，也m̄-thang因為老父來hō͘ kiáⁿ死；ta̍k人tio̍h為tio̍h家己ê罪來死。M̄-thang in-ūi kiáⁿ lâi hō͘ lāu-pē sí, iā m̄-thang in-ūi lāu-pē lâi hō͘ kiáⁿ sí; ta̍k-lâng tio̍h ūi-tio̍h ka-kī ê chōe lâi sí.

17你審判，m̄-thang冤枉出外人kap無父 ê kiáⁿ，也m̄-thang the̍h寡婦ê衣裳做準當；Lí sím-phòaⁿ, m̄-thang oan-óng chhut-gōa lâng kap bô-pē ê kiáⁿ, iā m̄-thang the̍h kóaⁿ-hū ê i-chiûⁿ chòe chún-tǹg;

18你tio̍h記得你tī埃及bat做奴才，耶和華你ê上帝救贖你tùi hia出；所以我命令你tio̍h án-ni行。lí tio̍h kì-tit lí tī Ai-ki̍p bat chòe lô͘-châi, Iâ-hô-hoa lí ê Siōng-tè kiù-sio̍k lí tùi hia chhut; só͘-í góa bēng-lēng lí tio̍h án-ni kiâⁿ.

19你tī田裡收割五穀，若bōe記得一束tī田裡，m̄-thang koh oat去the̍h，tio̍h留 hō͘出外人kap孤兒、寡婦，致到耶和華你ê上帝beh tī你ê手所做一切ê事，賜福你。Lí tī chhân-ni̍h siu-koah gō͘-kak, nā bōe-kì-tit chi̍t-sok tī chhân-ni̍h, m̄-thang koh oat-khì the̍h, tio̍h lâu hō͘ chhut-gōa lâng kap ko͘-jî kóaⁿ-hū, tì-kàu Iâ-hô-hoa lí ê Siōng-tè beh tī lí ê chhiú só͘ chòe it-chhè ê sū, sù-hok lí.

20你phah你ê橄欖樹以後m̄-thang koh巡hiah-ê樹枝；tio̍h留hō͘出外人kap孤兒、寡婦。Lí phah lí ê kaⁿ-ná-chhiū í-āu m̄-thang koh sûn hiah ê chhiū-ki; tio̍h lâu hō͘ chhut-gōa lâng kap ko͘-jî kóaⁿ-hū.

21你挽你ê葡萄，所chhun-ê m̄-thang koh挽，tio̍h留hō͘出外人，kap孤兒、寡婦；Lí bán lí ê phû-tô, só͘-chhun-ê m̄-thang koh bán, tio̍h lâu hō͘ chhut-gōa lâng, kap ko͘-jî, kóaⁿ-hū;

22你也tio̍h記得你tī埃及地bat做奴才；所以我命令你tio̍h án-ni行。lí iā tio̍h kì-tit lí tī Ai-ki̍p tōe bat chòe lô͘-châi; só͘-í góa bēng-lēng lí tio̍h án-ni kiâⁿ.

1人若有冤家來對訊，官府判斷伊，就tio̍h定義人做義，定pháiⁿ人做pháiⁿ。Lâng nā ū oan-ke lâi tùi-sìn, koaⁿ-hú phòaⁿ-toàn i, chiū tio̍h tēng gī-lâng chòe-gī, tēng pháiⁿ-lâng chòe-pháiⁿ.

2Pháiⁿ人若應該受phah，審判官tio̍h hō͘伊仆tī地裡，tī伊ê面前，照伊ê罪，照數額phah伊；Pháiⁿ-lâng nā eng-kai siū-phah, sím-phòaⁿ-koaⁿ tio̍h hō͘ i phak tī tōe-ni̍h, tī i ê bīn-chêng, chiàu i ê chōe, chiàu siàu-gia̍h phah i;

3獨獨thang phah伊四十下，m̄-thang過數額；若過數額，phah伊khah-chōe下，就你ê兄弟hō͘你看輕。to̍k-to̍k thang phah i sì-cha̍p-ē, m̄-thang kè siàu-gia̍h; nā kè siàu-gia̍h, phah i khah-chōe-ē, chiū lí ê hiaⁿ-tī hō͘ lí khòaⁿ-khin.

4牛teh-lún五穀，m̄-thang láng伊ê嘴。Gû teh lún gō͘-kak, m̄-thang láng i ê chhùi.

5兄弟相kap khiā起，其中若一個死無kiáⁿ，死人ê bó͘ m̄-thang嫁外人，伊丈夫ê小弟tio̍h入去伊hia，娶伊做bó͘，來盡小叔ê本份；Hiaⁿ-tī saⁿ-kap khiā-khí, kî-tiong nā chi̍t-ê sí bô kiáⁿ, sí-lâng ê bó͘ m̄-thang kè gōa-lâng, i tiōng-hu ê sió-tī tio̍h ji̍p-khì i hia, chhōa i chòe-bó͘, lâi chīn sió-chek ê pún-hūn;

6伊所生ê大kiáⁿ，tio̍h續接死ê兄ê名份，免得伊ê名tī以色列中消滅。i só͘ siⁿ ê tōa-kiáⁿ, tio̍h sòa-chiap sí ê hiaⁿ ê bêng-hūn, bián-tit i ê miâ tī Í-sek-lia̍t-tiong siau-bia̍t.

7Hit人若m̄願意娶伊ê兄嫂，伊ê兄嫂就tio̍h到城門ê長老hia講：我ê丈夫ê小弟m̄肯tī以色列中kā伊ê兄傳一個名字，無beh kā我盡小叔ê本份。Hit-lâng nā m̄ goān-ì chhōa i ê hiaⁿ-só, i ê hiaⁿ-só chiū tio̍h kàu siâⁿ-mn̂g ê tiúⁿ-ló hia kóng, Góa ê tiōng-hu ê sió-tī m̄-khéng tī Í-sek-lia̍t-tiong kā i ê hiaⁿ thoân chi̍t ê miâ-jī, bô beh kā góa chīn sió-chek ê pún-hūn.

8伊城內ê長老就tio̍h叫伊來，kā伊講；伊若執意講：我無beh娶伊；I siâⁿ-lāi ê tiúⁿ-ló chiū tio̍h kiò i lâi, kā i kóng; i nā chip-ì kóng, Góa bô beh chhōa i;

9伊ê兄嫂就tio̍h tī長老ê面前就近伊，thǹg hit人腳裡ê鞋，phùi-nōa tī伊ê面，講：見若無beh為tio̍h兄建立伊ê家ê，tio̍h án-ni款待伊；i ê hiaⁿ-só chiū tio̍h tī tiúⁿ-ló ê bīn-chêng chiū-kūn i, thǹg hit-lâng kha-ni̍h ê ôe, phùi-nōa tī i ê bīn, kóng, Kìⁿ-nā bô beh ūi-tio̍h hiaⁿ kiàn-li̍p i ê ke ê, tio̍h án-ni khoán-thāi i;

10tī以色列中，伊ê名beh稱做thǹg鞋ê ê家。tī Í-sek-lia̍t-tiong, i ê miâ beh chheng chòe thǹg-ôe-ê ê ke.

11若有兩人相phah，其中一人ê bó͘近óa來，beh救伊ê丈夫脫離phah伊ê人ê手，伸手擒tiâu hit人ê下體；Nā ū nn̄g-lâng saⁿ-phah, kî-tiong chi̍t-lâng ê bó͘ kūn-óa lâi, beh kiù i ê tiōng-hu thoat-lī phah i ê lâng ê chhiú, chhun-chhiú khîⁿ-tiâu hit-lâng ê ē-thé;

12就tio̍h斬斷婦人人ê手，目睭m̄-thang可憐伊。chiū tio̍h chām-tn̄g hū-jîn-lâng ê chhiú, ba̍k-chiu m̄-thang khó-lîn i.

13你ê袋á內m̄-thang有兩樣ê秤子(phêng-chí)，有粒大，有粒細；Lí ê tē-á-lāi m̄-thang ū nn̄g-iūⁿ ê phêng-chí, ū-lia̍p tōa, ū-lia̍p sòe;

14厝內m̄-thang有兩樣ê升(chin)、斗，有ê大，有ê 細；chhù-lāi m̄-thang ū nn̄g-iūⁿ ê chin, táu, ū-ê tōa, ū-ê sòe;

15tio̍h用準準公平ê秤子，準準公平ê升、斗；thang hō͘你tī耶和華你上帝所賞賜ê地食長歲壽；tio̍h ēng chún-chún kong-pêng ê phêng-chí, chún-chún kong-pêng ê chin, táu; thang hō͘ lí tī Iâ-hô-hoa lí Siōng-tè só͘ siúⁿ-sù ê tōe chia̍h tn̂g hè-siū;

16因為見若行chiah-ê tāi-chì，kap行不義ê，lóng是耶和華你上帝所厭惡ê。in-ūi kìⁿ-nā kiâⁿ chiah ê tāi-chì, kap kiâⁿ put-gī ê, lóng sī Iâ-hô-hoa lí Siōng-tè só͘ iàm-ò͘ⁿ-ê.

17你tio̍h記得lín出埃及ê時，A-má-le̍k人tī路裡所款待你ê；Lí tio̍h kì-tit lín chhut Ai-ki̍p ê sî, A-má-le̍k lâng tī lō͘-ni̍h só͘ khoán-thāi lí ê;

18伊tī路裡tú-tio̍h你，當你困苦厭倦ê時，有怎樣phah你後隊，就是tī你後面ê軟弱ê；伊也無驚畏上帝。i tī lō͘-ni̍h tú-tio̍h lí, tng lí khùn-khó͘ ià-siān ê sî, ū cháiⁿ-iūⁿ phah lí āu-tūi, chiū-sī tī lí āu-bīn ê loán-jio̍k ê; i iā bô kiaⁿ-ùi Siōng-tè.

19所以到耶和華你上帝救你脫離四圍lóng總ê對敵，tī耶和華你上帝賞賜你做業ê地，得tio̍h平安，hit時你tio̍h將A-má-le̍k ê名字，tùi天下擦消，m̄-thang bōe記得。Só͘-í kàu Iâ-hô-hoa lí Siōng-tè kiù lí thoat-lī sì-ûi lóng-chóng ê tùi-te̍k, tī Iâ-hô-hoa lí Siōng-tè siúⁿ-sù lí chòe-gia̍p ê tōe, tit-tio̍h pêng-an, hit-sî lí tio̍h chiong A-má-le̍k ê miâ-jī, tùi thiⁿ-ē chhat-siau, m̄-thang bōe-kì-tit.