1摩西kap以色列chiah-ê長老命令百姓講：Lín tio̍h守我今á日所命令lín一切ê誡命。Mô͘-se kap Í-sek-lia̍t chiah ê tiúⁿ-ló bēng-lēng peh-sìⁿ kóng, Lín tio̍h siú góa kin-á-ji̍t só͘ bēng-lēng lín it-chhè ê kài-bēng.

2Lín過約旦，到耶和華你上帝所賞賜你ê地，hit日tio̍h khiā幾塊大石，用灰抹伊；Lín kè Iok-tàn, kàu Iâ-hô-hoa lí Siōng-tè só͘ siúⁿ-sù lí ê tōe, hit-ji̍t tio̍h khiā kúi-tè tōa-chio̍h, ēng he boah i;

3你已經過去，tio̍h寫chit-ê律法一切ê話tī hit頂面，thang hō͘你入去耶和華你ê上帝所賞賜你ê地，就是流奶kap蜜ê地，照耶和華你列祖ê上帝所應允你ê。lí í-keng kè-khì, tio̍h siá chit ê lu̍t-hoat it-chhè ê ōe tī hit téng-bīn, thang hō͘ lí ji̍p-khì Iâ-hô-hoa lí ê Siōng-tè só͘ siúⁿ-sù lí ê tōe, chiū-sī lâu lin kap bi̍t ê tōe, chiàu Iâ-hô-hoa lí lia̍t-chó͘ ê Siōng-tè só͘ èng-ún lí ê.

4Lín已經過約旦，就tio̍h tī Í-pa-lō͘山khiā我今á日所命令lín hiah-ê石，用灰抹伊。Lín í-keng kè Iok-tàn, chiū tio̍h tī Í-pa-lō͘ soaⁿ khiā góa kin-á-ji̍t só͘ bēng-lēng lín hiah ê chio̍h, ēng he boah i.

5Tī-hia tio̍h為耶和華你ê上帝起一座壇，就是石ê壇，tī hit頂面m̄-thang動tio̍h鐵器；Tī-hia tio̍h ūi Iâ-hô-hoa lí ê Siōng-tè khí chi̍t chō tôaⁿ, chiū-sī chio̍h ê tôaⁿ, tī hit téng-bīn m̄-thang tāng-tio̍h thih-khì;

6tio̍h用無過phah ê石起耶和華你上帝ê壇；tio̍h ēng bô kè-phah ê chio̍h khí Iâ-hô-hoa lí Siōng-tè ê tôaⁿ;

7tī hit頂面tio̍h獻燒祭hō͘耶和華你ê上帝；koh tio̍h獻謝恩祭；也tī-hia食，tī耶和華你上帝ê面前歡喜。tī hit téng-bīn tio̍h hiàn sio-chè hō͘ Iâ-hô-hoa lí ê Siōng-tè; koh tio̍h hiàn siā-un-chè; iā tī-hia chia̍h, tī Iâ-hô-hoa lí Siōng-tè ê bīn-chêng hoaⁿ-hí.

8你tio̍h將chit-ê律法一切ê話，寫明tī hiah-ê石裡。Lí tio̍h chiong chit ê lu̍t-hoat it-chhè ê ōe, siá-bêng tī hiah ê chio̍h-ni̍h.

9摩西kap祭司利未人，吩咐以色列眾人講：以色列ah，tio̍h靜靜來聽；今á日你成做耶和華你上帝ê百姓；Mô͘-se kap chè-si Lī-bī lâng, hoan-hù Í-sek-lia̍t chèng-lâng kóng, Í-sek-lia̍t ah, tio̍h chēng-chēng lâi thiaⁿ; kin-á-ji̍t lí chiâⁿ-chòe Iâ-hô-hoa lí Siōng-tè ê peh-sìⁿ;

10所以tio̍h聽thàn耶和華你上帝ê話，行伊ê誡命律例，就是我今á日所命令你ê。só͘-í tio̍h thiaⁿ-thàn Iâ-hô-hoa lí Siōng-tè ê ōe, kiâⁿ I ê kài-bēng lu̍t-lē, chiū-sī góa kin-á-ji̍t só͘ bēng-lēng lí ê.

11當hit日，摩西命令百姓講：Tng hit-ji̍t Mô͘-se bēng-lēng peh-sìⁿ kóng,

12Lín過約旦了後，西門、利未、猶大、以撒迦、約瑟、便雅憫，chiah-ê支派，tio̍h khiā tī Ki-lī-sim山來祝福百姓；Lín kè Iok-tàn liáu-āu, Se-biān, Lī-bī, Iû-tāi, Í-sat-ka, Iok-sek, Piān-ngá-bín, chiah ê chi-phài, tio̍h khiā tī Ki-lī-sim soaⁿ lâi chiok-hok peh-sìⁿ;

13Liû-piān、Ka-tek、A-siat、Se-pò͘-lûn、Tàn、Ná-hut-tha-lī，chiah-ê支派，tio̍h khiā tī Í-pa-lō͘山來宣布咒詛。Liû-piān, Ka-tek, A-siat, Se-pò͘-lûn, Tàn, Ná-hut-tha-lī, chiah ê chi-phài, tio̍h khiā tī Í-pa-lō͘ soaⁿ lâi soan-pò͘ chiù-chó͘.

14利未人tio̍h大聲對以色列眾人講；Lī-bī lâng tio̍h tōa-siaⁿ tùi Í-sek-lia̍t chèng-lâng kóng;

15見若人製造偶像，刻ê，á是鑄ê，耶和華所厭惡ê，就是師傅ê手所做ê，chhāi tī暗靜ê所在，hit人tio̍h受咒詛。百姓lóng tio̍h應講，A-bēng。Kìⁿ-nā lâng chè-chō ngó͘-siōng, khek-ê, á-sī chù-ê, Iâ-hô-hoa só͘ iàm-ò͘ⁿ-ê, chiū-sī sai-hū ê chhiú só͘ chòe ê, chhāi tī àm-chīⁿ ê só͘-chāi, hit-lâng tio̍h siū chiù-chó͘. Peh-sìⁿ lóng tio̍h ìn kóng, A-bēng.

16看輕老父á是老母ê，tio̍h受咒詛。百姓lóng tio̍h講：A-bēng。Khòaⁿ-khin lāu-pē á-sī lāu-bú ê, tio̍h siū chiù-chó͘. Peh-sìⁿ lóng tio̍h kóng, A-bēng.

17移徙厝邊ê界址ê，tio̍h受咒詛。百姓lóng tio̍h講：A-bēng。Î-sóa chhù-piⁿ ê kài-chí ê, tio̍h siū chiù-chó͘. Peh-sìⁿ lóng tio̍h kóng, A-bēng.

18Hō͘ chhiⁿ-mî人行m̄-tio̍h路ê，tio̍h受咒詛。百姓lóng tio̍h講：A-bēng。Hō͘ chhiⁿ-mî lâng kiâⁿ m̄-tio̍h lō͘ ê, tio̍h siū chiù-chó͘. Peh-sìⁿ lóng tio̍h kóng, A-bēng.

19審判來冤枉出外人kap孤兒、寡婦ê，tio̍h受咒詛。百姓lóng tio̍h講：A-bēng。Sím-phòaⁿ lâi oan-óng chhut-gōa lâng kap ko͘-jî kóaⁿ-hū ê, tio̍h siū chiù-chó͘. Peh-sìⁿ lóng tio̍h kóng, A-bēng.

20Kap老父ê後bó͘同房ê tio̍h受咒詛，因為伊有掀開伊ê老父ê衫á裾。百姓lóng tio̍h講：A-bēng。Kap lāu-pē ê āu-bó͘ tâng-pâng ê tio̍h siū chiù-chó͘, in-ūi i ū hian-khui i ê lāu-pē ê saⁿ-á-ku. Peh-sìⁿ lóng tio̍h kóng, A-bēng.

21無論kap甚麼獸交合-ê tio̍h受咒詛。百姓lóng tio̍h講：A-bēng。Bô-lūn kap sím-mi̍h siù kau-ha̍p-ê tio̍h siū chiù-chó͘. Peh-sìⁿ lóng tio̍h kóng, A-bēng.

22人kap siâng父ê姊妹，á是siâng母 ê姊妹，同房，hit人tio̍h受咒詛。百姓lóng tio̍h講：A-bēng。Lâng kap siâng-pē ê chí-bē, á-sī siâng-bú ê chí-bē, tâng-pâng, hit-lâng tio̍h siū chiù-chó͘. Peh-sìⁿ lóng tio̍h kóng, A-bēng.

23Kap丈母同房ê tio̍h受咒詛。百姓lóng tio̍h講：A-bēng。Kap tiūⁿ-ḿ tâng-pâng-ê tio̍h siū chiù-chó͘. Peh-sìⁿ lóng tio̍h kóng, A-bēng.

24暗靜phah死厝邊ê tio̍h受咒詛。百姓lóng tio̍h講：A-bēng。Àm-chīⁿ phah-sí chhù-piⁿ ê tio̍h siū chiù-chó͘. Peh-sìⁿ lóng tio̍h kóng, A-bēng.

25受pò͘賂來害死無罪ê人ê tio̍h受咒詛。百姓lóng tio̍h講：A-bēng。Siū pò͘-lō͘ lâi hāi-sí bô-chōe ê lâng ê tio̍h siū chiù-chó͘. Peh-sìⁿ lóng tio̍h kóng, A-bēng.

26無堅守chiah-ê律法ê話來行ê tio̍h受咒詛。百姓lóng tio̍h講：A-bēng。Bô kian-siú chiah ê lu̍t-hoat ê ōe lâi kiâⁿ-ê tio̍h siū chiù-chó͘. Peh-sìⁿ lóng tio̍h kóng, A-bēng.

1你若致意聽耶和華你ê上帝ê話，守伊一切ê誡命來行伊，就是我今á日所命令你ê，耶和華你ê上帝beh hō͘你pôaⁿ過天下萬國；Lí nā tì-ì thiaⁿ Iâ-hô-hoa lí ê Siōng-tè ê ōe, siú I it-chhè ê kài-bēng lâi kiâⁿ i, chiū-sī góa kin-á-ji̍t só͘ bēng-lēng lí ê, Iâ-hô-hoa lí ê Siōng-tè beh hō͘ lí pôaⁿ-kè thiⁿ-ē bān-kok;

2你若聽耶和華你上帝ê話，就chiah-ê所祝福ê beh jip你，beh到tī你；lí nā thiaⁿ Iâ-hô-hoa lí Siōng-tè ê ōe, chiū chiah-ê só͘ chiok-hok-ê beh jip lí, beh kàu tī lí;

3你tī城內beh得tio̍h福氣，tī田裡beh得tio̍h福氣；lí tī siâⁿ-lāi beh tit-tio̍h hok-khì, tī chhân-ni̍h beh tit-tio̍h hok-khì;

4你ê身軀所生ê，你ê土地所出ê，你ê cheng-siⁿ所出ê，以及牛ê牛á-kiáⁿ，羊 ê羊á-kiáⁿ，lóng beh得tio̍h福氣。lí ê sin-khu só͘-siⁿ-ê, lí ê thó͘-tōe só͘-chhut-ê, lí ê cheng-siⁿ só͘-chhut-ê, í-ki̍p gû ê gû-á-kiáⁿ, iûⁿ ê iûⁿ-á-kiáⁿ, lóng beh tit-tio̍h hok-khì.

5你ê筐á kap你chhiau麵ê器具，lóng beh得tio̍h福氣。Lí ê kheng-á kap lí chhiau-mī ê khì-kū, lóng beh tit-tio̍h hok-khì.

6你入來beh得tio̍h福氣；出去也beh得tio̍h福氣。Lí ji̍p-lâi beh tit-tio̍h hok-khì; chhut-khì iā beh tit-tio̍h hok-khì.

7你ê對敵起來攻擊你ê，耶和華beh hō͘ in thâi輸tī你ê面前；in tùi一條路出來攻擊你，beh tī你ê面前tùi七條路來走。Lí ê tùi-te̍k khí-lâi kong-kek lí ê, Iâ-hô-hoa beh hō͘ in thâi-su tī lí ê bīn-chêng; in tùi chi̍t tiâu lō͘ chhut-lâi kong-kek lí, beh tī lí ê bīn-chêng tùi chhit tiâu lō͘ lâi cháu.

8耶和華beh命令福氣hō͘你，tī你ê粟倉，kap你ê手所做一切ê事；也beh賜福你tī耶和華你上帝所賞賜你ê地。Iâ-hô-hoa beh bēng-lēng hok-khì hō͘ lí, tī lí ê chhek-chhng, kap lí ê chhiú só͘ chòe it-chhè ê sū; iā beh sù-hok lí tī Iâ-hô-hoa lí Siōng-tè só͘ siúⁿ-sù lí ê tōe.

9你若守耶和華你上帝ê誡命，行伊ê道路，耶和華beh設立你做伊家己聖ê百姓，照伊所對你chiù-chōa ê；Lí nā siú Iâ-hô-hoa lí Siōng-tè ê kài-bēng, kiâⁿ I ê tō-lō͘, Iâ-hô-hoa beh siat-li̍p lí chòe I ka-kī sèng ê peh-sìⁿ, chiàu I só͘ tùi lí chiù-chōa ê;

10天下萬百姓看見你屬tī耶和華ê名下，就beh驚畏你。thiⁿ-ē bān peh-sìⁿ khòaⁿ-kìⁿ lí sio̍k tī Iâ-hô-hoa ê miâ-ē, chiū beh kiaⁿ-ùi lí.

11你tī耶和華對你ê列祖chiù-chōa賞賜你ê地，耶和華beh hō͘你ê身軀所生ê，cheng-siⁿ所出ê，土地所出ê，充足有chhun。Lí tī Iâ-hô-hoa tùi lí ê lia̍t-chó͘ chiù-chōa siúⁿ-sù lí ê tōe, Iâ-hô-hoa beh hō͘ lí ê seng-khu só͘-siⁿ-ê, cheng-siⁿ só͘-chhut ê, thó͘-tōe só͘-chhut-ê, chhiong-chiok ū chhun.

12耶和華beh kā你開伊天裡寶貝ê庫房，落及時ê雨 tī你ê地，tī你ê手所做一切ê事賜福你；你beh借hō͘ chōe-chōe國，也你m̄免借。Iâ-hô-hoa beh kā lí khui I thiⁿ-ni̍h pó-pòe ê khò͘-pâng, lo̍h ki̍p-sî ê hō͘ tī lí ê tōe, tī lí ê chhiú só͘ chòe it-chhè ê sū sù-hok lí; lí beh chioh hō͘ chōe-chōe kok, iā lí m̄-bián chioh.

13你若聽thàn耶和華你ê上帝ê誡命，就是我今á日所命令你ê，執守來行伊，無偏左，無偏右，來歪chhoa̍h我今á日所命令你chiah-ê話，去thàn別ê上帝來服事伊，耶和華就beh hō͘你做頭，無最尾；你beh tiàm tī頂面，無tiàm tī下面。Lí nā thiaⁿ-thàn Iâ-hô-hoa lí ê Siōng-tè ê kài-bēng, chiū-sī góa kin-á-ji̍t só͘ bēng-lēng lí ê, chip-siú lâi kiâⁿ i, bô phian-chó, bô phian-iū, lâi oai-chhoa̍h góa kin-á-ji̍t só͘ bēng-lēng lí chiah ê ōe, khì thàn pa̍t ê siōng-tè lâi ho̍k-sāi i, Iâ-hô-hoa chiū beh hō͘ lí chòe-thâu, bô chòe-bé; lí beh tiàm tī téng-bīn, bô tiàm tī ē-bīn.

14(合併tī頂一節)(Ha̍p-pēng tī téng chi̍t chat)

15你若無聽thàn耶和華你上帝ê話，無執守來行伊一切ê誡命、律例，就是我今á日所命令你ê，chiah-ê咒詛就beh jip-tio̍h你，beh到tī你。Lí nā bô thiaⁿ-thàn Iâ-hô-hoa lí Siōng-tè ê ōe, bô chip-siú lâi kiâⁿ I it-chhè ê kài-bēng, lu̍t-lē, chiū-sī góa kin-á-ji̍t só͘ bēng-lēng lí ê, chiah ê chiù-chó͘ chiū beh jip-tio̍h lí, beh kàu tī lí.

16Tī城內你beh受咒詛；tī田裡你也beh受咒詛。Tī siâⁿ-lāi lí beh siū chiù-chó͘; tī chhân-ni̍h lí iā beh siū chiù-chó͘.

17你ê筐á kap你chhiau麵ê器具，lóng beh受咒詛。Lí ê kheng-á kap lí chhiau-mī ê khì-kū, lóng beh siū chiù-chó͘.

18你ê身軀所生ê，你ê地所出ê，以及牛ê牛á-kiáⁿ，羊 ê羊á-kiáⁿ，lóng beh受咒詛。Lí ê seng-khu só͘ siⁿ-ê, lí ê tōe só͘-chhut-ê, í-ki̍p gû ê gû-á-kiáⁿ, iûⁿ ê iûⁿ-á-kiáⁿ, lóng beh siū chiù-chó͘.

19你入來beh受咒詛；出去也beh受咒詛。Lí ji̍p-lâi beh siū chiù-chó͘; chhut-khì iā beh siū chiù-chó͘.

20因為你所行ê pháiⁿ來棄sak我，耶和華beh tī你ê手所做一切ê事，hō͘咒詛、擾亂、責罰，到tī你，直到你受毀滅，緊緊滅無。In-ūi lí só͘ kiâⁿ ê pháiⁿ lâi khì-sak góa, Iâ-hô-hoa beh tī lí ê chhiú só͘ chòe it-chhè ê sū, hō͘ chiù-chó͘, jiáu-loān, chek-hoa̍t, kàu tī lí, ti̍t-kàu lí siū húi-bia̍t, kín-kín bia̍t-bô.

21耶和華beh hō͘瘟疫纏你，到伊滅無你tī你所入去承接ê地。Iâ-hô-hoa beh hō͘ un-e̍k tîⁿ lí, kàu I bia̍t-bô lí tī lí só͘ ji̍p-khì sêng-chiap ê tōe.

22耶和華beh用消瘦、熱病、發炎、毒熱、刀劍、枯焦、朽爛，攻擊你；chiah-ê lóng beh追jip你，到你滅無。Iâ-hô-hoa beh ēng siau-sán, jia̍t-pīⁿ, hoat-iām, to̍k-jia̍t, to-kiàm, ko͘-tâ, hiú-nōa, kong-kek lí; chiah-ê lóng beh tui-jip lí, kàu lí bia̍t-bô.

23你頭殼頂ê天beh變做銅，腳下ê地beh變做鐵。Lí thâu-khak-téng ê thiⁿ beh pìⁿ-chòe tâng, kha-ē ê tōe beh pìⁿ-chòe thih.

24耶和華beh hō͘你地上ê雨變土粉，變沙；伊beh tùi天落tī你，到你滅無。Iâ-hô-hoa beh hō͘ lí tōe-chiūⁿ ê hō͘ pìⁿ thô͘-hún, pìⁿ soa; I beh tùi thiⁿ lo̍h tī lí, kàu lí bia̍t-bô.

25耶和華beh hō͘你thâi輸tī你對敵ê面前；你tùi一條路出去抵敵in，beh tī in ê面前tùi七條路來逃走；你beh tī天下萬國中流落。Iâ-hô-hoa beh hō͘ lí thâi-su tī lí tùi-te̍k ê bīn-chêng; lí tùi chi̍t tiâu lō͘ chhut-khì tí-te̍k in, beh tī in ê bīn-chêng tùi chhit tiâu lō͘ lâi tô-cháu; lí beh tī thiⁿ-ē bān-kok-tiong liû-lo̍k.

26你ê身屍beh hō͘空中ê飛鳥kap地上ê走獸做食物，也無人趕伊。Lí ê sin-si beh hō͘ khong-tiong ê pe-chiáu kap tōe-chiūⁿ ê cháu-siù chòe chia̍h-mi̍h, iā bô lâng kóaⁿ i.

27耶和華beh用埃及ê癰(iong)、痔瘡、癬、疥，bōe醫ê，來phah你。Iâ-hô-hoa beh ēng Ai-ki̍p ê iong, tī-chhng, sián, kòe, bōe i-tit-ê, lâi phah lí.

28耶和華beh用顛狂、chhiⁿ-mî、心ê驚惶phah你；Iâ-hô-hoa beh ēng tian-kông, chhiⁿ-mî, sim ê kiaⁿ-hiâⁿ phah lí;

29你beh tī日中晝四界摸，親像chhiⁿ-mî ê暗摸sa；你ê路bōe興通，常常tú-tio̍h制壓、搶奪，無人拯救你。lí beh tī ji̍t-tiong-tàu sì-kòe bong, chhin-chhiūⁿ chhiⁿ-mî ê àm-bong-sa; lí ê lō͘ bōe heng-thong, siông-siông tú-tio̍h chè-ap, chhiúⁿ-toa̍t, bô lâng chín-kiù lí.

30你beh聘定bó͘，別人kap伊同房；你beh起厝，無thang khiā tī hit內面；你beh栽種葡萄園，也bōe得tio̍h食伊ê果子。Lí beh phèng-tiāⁿ bó͘, pa̍t-lâng kap i tâng-pâng; lí beh khí-chhù, bô thang khiā tī hit lāi-bīn; lí beh chai-chèng phû-tô-hn̂g, iā bōe tit-tio̍h chia̍h i ê ké-chí.

31你ê牛thâi tī你ê目睭前，你無thang食tio̍h；你ê驢tī你ê目前受搶奪，m̄還你；你ê 羊 beh歸你ê對敵，無人替你救伊。Lí ê gû thâi tī lí ê ba̍k-chiu chêng, lí bô thang chia̍h-tio̍h; lí ê lû tī lí ê ba̍k-chêng siū chhiúⁿ-toa̍t, m̄-hêng lí; lí ê iûⁿ beh kui lí ê tùi-te̍k, bô lâng thòe lí kiù i.

32你ê kiáⁿ cha-bó͘-kiáⁿ beh交tī別國ê百姓，你ê目睭beh看，thong日瞭望伊，到失明；你ê手也無力thang做甚麼。Lí ê kiáⁿ cha-bó͘-kiáⁿ beh kau tī pa̍t-kok ê peh-sìⁿ, lí ê ba̍k-chiu beh khòaⁿ, thong-ji̍t liâu-bāng i, kàu sit-bêng; lí ê chhiú iā bô la̍t thang chòe sím-mi̍h.

33你ê土產，kap你tio̍h磨所得tio̍h ê，beh hō͘你所m̄-bat ê國民食了了；你kan-ta受欺負，受壓制；Lí ê thó͘-sán, kap lí tio̍h-bôa só͘ tit-tio̍h-ê, beh hō͘ lí só͘ m̄-bat ê kok-bîn chia̍h liáu-liáu; lí kan-ta siū khi-hū, siū ap-chè;

34你為tio̍h你ê目睭所看見ê事，beh致到顛狂。lí ūi-tio̍h lí ê ba̍k-chiu só͘ khòaⁿ-kìⁿ ê sū, beh tì-kàu tian-kông.

35耶和華beh用bōe醫得ê毒癰phah你，tī你ê腳頭u、腳腿，對你ê腳掌到頭殼頂。Iâ-hô-hoa beh ēng bōe i-tit ê to̍k-iong phah lí, tī lí ê kha-thâu-u, kha-thúi, tùi lí ê kha-chiúⁿ kàu thâu-khak-téng.

36耶和華beh遷徙你kap你所設立管轄你ê王，到你kap你ê列祖所m̄-bat ê國，tī-hia你beh服事別ê上帝，是柴ê，石ê；Iâ-hô-hoa beh chhian-sóa lí kap lí só͘ siat-li̍p koán-hat lí ê ông, kàu lí kap lí ê lia̍t-chó͘ só͘ m̄-bat ê kok, tī-hia lí beh ho̍k-sāi pa̍t ê siōng-tè, sī chhâ-ê, chio̍h-ê;

37你tī耶和華所beh chhōa你到ê列國中，beh hō͘人gông-ngia̍h，hō͘人做話柄，受譏刺；lí tī Iâ-hô-hoa só͘ beh chhōa lí kàu ê lia̍t-kok-tiong, beh hō͘ lâng gông-ngia̍h, hō͘ lâng chòe ōe-pìⁿ, siū ki-chhì;

38你beh帶chōe-chōe種子到田裡，但是所收ê是真少；因為草蜢beh食伊。lí beh tòa chōe-chōe chéng-chí kàu chhân-ni̍h, nā-sī só͘ siu-ê sī chin-chió; in-ūi chháu-meh beh chia̍h i.

39你beh栽種葡萄園來修整伊，總是無thang lim酒，無thang挽果子；因為蟲beh食伊。Lí beh chai-chèng phû-tô-hn̂g lâi siu-chéng i, chóng-sī bô thang lim-chiú, bô thang bán ké-chí; in-ūi thâng beh chia̍h i.

40Thong境內你beh有橄欖樹，總是無伊ê油 thang抹你ê身軀；因為你ê橄欖樹bōe tiâu粒。Thong kéng-lāi lí beh ū kaⁿ-ná-chhiū, chóng-sī bô i ê iû thang boah lí ê seng-khu; in-ūi lí ê kaⁿ-ná-chhiū bōe tiâu-lia̍p.

41你beh生kiáⁿ cha-bó͘-kiáⁿ，無thang做你ê；因為in beh hō͘人掠去。Lí beh siⁿ-kiáⁿ cha-bó͘-kiáⁿ, bô thang chòe lí ê; in-ūi in beh hō͘ lâng lia̍h-khì.

42你ê樹木，kap你ê土產，草蜢beh一盡食伊。Lí ê chhiū-ba̍k, kap lí ê thó͘-sán, chháu-meh beh it-chīn chia̍h i.

43你中間ê出外人beh ná升ná高，你beh ná降ná低；Lí tiong-kan ê chhut-gōa lâng beh ná-seng ná-koâiⁿ, lí beh ná-kàng ná-kē;

44伊beh借你，也你無thang借伊；伊beh做頭，你beh做尾。i beh chioh lí, iā lí bô thang chioh i; i beh chòe-thâu, lí beh chòe-bé.

45Chiah-ê咒詛beh lóng到tī你，beh追你，beh jip-tio̍h你，到你滅無；因為你無聽thàn耶和華你上帝ê話，無守伊所命令你hiah-ê誡命律例；Chiah ê chiù-chó͘ beh lóng kàu tī lí, beh tui lí, beh jip-tio̍h lí, kàu lí bia̍t-bô; in-ūi lí bô thiaⁿ-thàn Iâ-hô-hoa lí Siōng-tè ê ōe, bô siú I só͘ bēng-lēng lí hiah ê kài-bēng lu̍t-lē;

46Chiah-ê咒詛beh到tī你kap你ê後裔，做神蹟奇事，到永遠。chiah ê chiù-chó͘ beh kàu tī lí kap lí ê hō͘-è, chòe sîn-jiah kî-sū, kàu éng-oán.

47因為你無為tio̍h你ê好額，用歡喜ê心快樂ê意思，來服事耶和華你ê上帝；In-ūi lí bô ūi-tio̍h lí ê hó-gia̍h, ēng hoaⁿ-hí ê sim khoài-lo̍k ê ì-sù, lâi ho̍k-sāi Iâ-hô-hoa lí ê Siōng-tè;

48所以你beh tú-tio̍h iau餓、嘴乾、thǹg-theh，無半項物，服事耶和華所差來攻擊你ê對敵；伊beh用鐵擔掛tī你ê頷頸，到滅無你。só͘-í lí beh tú-tio̍h iau-gō, chhùi-ta, thǹg-theh, bô pòaⁿ-hāng mi̍h, ho̍k-sāi Iâ-hô-hoa só͘ chhe lâi kong-kek lí ê tùi-te̍k; i beh ēng thih-taⁿ kòa tī lí ê ām-kún, kàu bia̍t-bô lí.

49耶和華beh tùi遠遠，tùi地極，chhōa一國親像鷹飛來攻擊你；hit-ê國ê話，你bōe曉聽；Iâ-hô-hoa beh tùi hn̄g-hn̄g, tùi tōe-ke̍k, chhōa chi̍t-kok chhin-chhiūⁿ eng pe-lâi kong-kek lí; hit ê kok ê ōe, lí bōe hiáu thiaⁿ;

50Hit-ê國ê人面hiông-kài-kài，無體貼老人，也無憐憫gín-ná；hit ê kok ê lâng bīn hiông-kài-kài, bô thé-thiap lāu-lâng, iā bô lîn-bín gín-ná;

51in beh食你ê cheng-siⁿ所生ê，kap你ê土產，到你滅無；你ê五穀、酒、油，以及牛ê牛á-kiáⁿ，羊ê羊á-kiáⁿ，lóng無kā你留teh，到in滅無你。in beh chia̍h lí ê cheng-siⁿ só͘-siⁿ-ê, kap lí ê thó͘-sán, kàu lí bia̍t-bô; lí ê ngó͘-kok, chiú, iû, í-ki̍p gû ê gû-á-kiáⁿ, iûⁿ ê iûⁿ-á-kiáⁿ, lóng bô kā lí lâu-teh, kàu in bia̍t-bô lí.

52伊beh圍困你tī你ta̍k-ê城門內，到你所óa靠高koh堅固ê城牆lóng倒壞tī你ê全地；伊beh圍困你tī你ta̍k-ê城門內，tī耶和華你上帝所賞賜你ê全地。I beh ûi-khùn lí tī lí ta̍k ê siâⁿ-mn̂g-lāi, kàu lí só͘ óa-khò koâiⁿ koh kian-kò͘ ê siâⁿ-chhiûⁿ lóng tó-hoāi tī lí ê choân-tōe; i beh ûi-khùn lí tī lí ta̍k ê siâⁿ-mn̂g-lāi, tī Iâ-hô-hoa lí Siōng-tè só͘ siúⁿ-sù lí ê choân-tōe.

53你ê對敵圍困你，你tī窘迫困苦ê中間，beh食你ê身軀所生ê，就是耶和華你上帝所賞賜你ê kiáⁿ cha-bó͘-kiáⁿ ê肉。Lí ê tùi-te̍k ûi-khùn lí, lí tī khún-pek khùn-khó͘ ê tiong-kan, beh chia̍h lí ê seng-khu só͘-siⁿ-ê, chiū-sī Iâ-hô-hoa lí Siōng-tè só͘ siúⁿ-sù lí ê kiáⁿ cha-bó͘-kiáⁿ ê bah.

54Lín中間幼秀不止細膩ê人，目睭beh gîn伊ê兄弟，kap伊心懷中ê bó͘，以及其餘所chhun ê kiáⁿ兒；Lín tiong-kan iù-siù put-chí sòe-jī ê lâng, ba̍k-chiu beh gîn i ê hiaⁿ-tī, kap i sim-hoâi-tiong ê bó͘, í-ki̍p kî-û só͘ chhun ê kiáⁿ-jî;

55致到伊無beh用伊所食kiáⁿ兒ê肉，分一點á hō͘ in中間ê一人；因為你tī ta̍k-ê城門內，受對敵圍困大大窘迫你ê時，伊無chhun半項。tì-kàu i bô beh ēng i só͘ chia̍h kiáⁿ-jî ê bah, pun chi̍t tiám-á hō͘ in tiong-kan ê chi̍t-lâng; in-ūi lí tī ta̍k ê siâⁿ-mn̂g-lāi, siū tùi-te̍k ûi-khùn tōa-tōa khún-pek lí ê sî, i bô chhun pòaⁿ-hāng.

56Lín中間幼秀細膩ê婦人人，因為伊ê幼秀細膩平素m̄敢用腳掌踏地ê，beh gîn伊心懷中ê丈夫，kap伊ê kiáⁿ，伊ê cha-bó͘-kiáⁿ，Lín tiong-kan iù-siù sòe-jī ê hū-jîn-lâng, in-ūi i ê iù-siù sòe-jī pêng-sò͘ m̄-káⁿ ēng kha-chiúⁿ ta̍h-tōe-ê, beh gîn i sim-hoâi-tiong ê tiōng-hu, kap i ê kiáⁿ, i ê cha-bó͘-kiáⁿ,

57以及伊身軀所出ê衣(ui)，kap伊所生hiah-ê kiáⁿ；因為tī你受圍，hō͘對敵tī你chiah-ê城門內窘迫你困苦ê時，伊因為百項物欠缺，所以beh偷食伊。í-ki̍p i seng-khu só͘ chhut ê ui, kap i só͘ siⁿ hiah ê kiáⁿ; in-ūi tī lí siū ûi, hō͘ tùi-te̍k tī lí chiah ê siâⁿ-mn̂g-lāi khún-pek lí khùn-khó͘ ê sî, i in-ūi pah-hāng mi̍h khiàm-kheh, só͘-í beh thau-chia̍h-i.

58若你無執守來行chit本冊所記律法一切ê話，無敬畏有榮光thang驚畏ê名，就是耶和華你ê上帝，Nā lí bô chip-siú lâi kiâⁿ chit pún chheh só͘ kì lu̍t-hoat it-chhè ê ōe, bô kèng-ùi ū êng-kng thang kiaⁿ-ùi ê miâ, chiū-sī Iâ-hô-hoa lí ê Siōng-tè,

59耶和華就beh用奇怪ê災厄，就是極大極久ê災厄，kap極重極久ê病，到tī你以及你ê後裔；Iâ-hô-hoa chiū beh ēng kî-koài ê chai-ē, chiū-sī ke̍k-tōa ke̍k-kú ê chai-ē, kap ke̍k-tāng ke̍k-kú ê pīⁿ, kàu tī lí í-ki̍p lí ê hō͘-è;

60也beh hō͘你所驚埃及hiah-ê病症lóng臨到tī你，也beh纏tī你ê身軀；iā beh hō͘ lí só͘ kiaⁿ Ai-ki̍p hiah ê pīⁿ-chèng lóng lîm-kàu tī lí, iā beh tîⁿ tī lí ê seng-khu;

61連hiah-ê無記tī chit本律法ê冊ê災厄病症，耶和華beh hō͘伊lóng到tī你，到你滅無。liân hiah-ê bô kì tī chit-pún lu̍t-hoat ê chheh ê chai-ē pīⁿ-chèng, Iâ-hô-hoa beh hō͘ i lóng kàu tī lí, kàu lí bia̍t-bô.

62Lín前雖然親像天頂ê星hiah-chōe，總是因為你無聽thàn耶和華你上帝ê話，所以你所chhun ê數額就beh少少。Lín chêng sui-jiân chhin-chhiūⁿ thiⁿ-téng ê chhiⁿ hiah-chōe, chóng-sī in-ūi lí bô thiaⁿ-thàn Iâ-hô-hoa lí Siōng-tè ê ōe, só͘-í lí só͘ chhun ê siàu-gia̍h chiū beh chió-chió.

63前耶和華掠賜福lín hō͘ lín興旺做歡喜，後來耶和華也beh掠毀滅lín，滅無lín，做歡喜；lín也beh tùi lín所入去承接ê地受拔起來。Chêng Iâ-hô-hoa lia̍h sù-hok lín hō͘ lín heng-ōng chòe hoaⁿ-hí, āu-lâi Iâ-hô-hoa iā beh lia̍h húi-bia̍t lín, bia̍t-bô lín, chòe hoaⁿ-hí; lín iā beh tùi lín só͘ ji̍p-khì sêng-chiap ê tōe siū pu̍ih-khí-lâi.

64耶和華beh hō͘ lín四散tī萬百姓中，tùi地chit-ê極頭到地hit-ê極頭；你beh tī-hia服事別ê上帝，是你kap你ê列祖所m̄-bat，柴ê，石ê。Iâ-hô-hoa beh hō͘ lín sì-sòaⁿ tī bān peh-sìⁿ-tiong, tùi tōe chit ê ke̍k-thâu kàu tōe hit ê ke̍k-thâu; lí beh tī-hia ho̍k-sāi pa̍t ê siōng-tè, sī lí kap lí ê lia̍t-chó͘ só͘ m̄-bat, chhâ-ê, chio̍h-ê.

65Tī hiah-ê國內，你bōe得tio̍h安然，你ê腳也bōe得tio̍h歇睏；耶和華也beh hō͘你tī-hia心pho̍k-pho̍k-chhéng，目睭失明，精神衰敗；Tī hiah ê kok-lāi, lí bōe tit-tio̍h an-jiân, lí ê kha iā bōe tit-tio̍h hioh-khùn; Iâ-hô-hoa iā beh hō͘ lí tī-hia sim pho̍k-pho̍k-chhéng, ba̍k-chiu sit-bêng, cheng-sîn soe-pāi;

66你ê性命tī你ê面前無tiāⁿ無tio̍h，你日暝驚惶，你ê性命無穩當。lí ê sìⁿ-miā tī lí ê bīn-chêng bô-tiāⁿ bô-tio̍h, lí ji̍t-mî kiaⁿ-hiâⁿ, lí ê sìⁿ-miā bô ún-tàng.

67你因為心內所驚惶ê，目睭所看見ê，早起beh講：苦bōe得chit時暗！暗時beh講：苦bōe得chit時天光！Lí in-ūi sim-lāi só͘ kiaⁿ-hiâⁿ ê, ba̍k-chiu só͘ khòaⁿ-kìⁿ ê, chá-khí beh kóng, khó͘ bōe-tit chit-sî àm! àm-sî beh kóng, khó͘ bōe-tit chit-sî thiⁿ-kng!

68耶和華beh hō͘你坐船tò去埃及，tùi hit條路，就是我bat對你講你bōe koh看見ê；tī-hia你beh 賣本身hō͘對敵做奴僕女婢，總是無人買。Iâ-hô-hoa beh hō͘ lí chē-chûn tò-khì Ai-ki̍p, tùi hit tiâu lō͘, chiū-sī góa bat tùi lí kóng lí bōe koh khòaⁿ-kìⁿ ê; tī-hia lí beh bōe pún-sin hō͘ tùi-te̍k chòe lô͘-po̍k lú-pī, chóng-sī bô lâng bóe.

1Chiah-ê是耶和華，tī Mô͘-ap地，命令摩西kap以色列人立約ê話，是伊tī Hô-lia̍t kap in所立ê約以外ê。Chiah-ê sī Iâ-hô-hoa, tī Mô͘-ap tōe, bēng-lēng Mô͘-se kap Í-sek-lia̍t lâng li̍p-iok ê ōe, sī I tī Hô-lia̍t kap in só͘ li̍p ê iok í-gōa-ê.

2摩西召以色列眾人來，kā in講：耶和華tī埃及地，tī lín ê目睭前tùi法老，kap伊ê眾人臣，以及伊全地，所行一切ê事lín lóng有看見，Mô͘-se tiàu Í-sek-lia̍t chèng-lâng lâi, kā in kóng, Iâ-hô-hoa tī Ai-ki̍p tōe, tī lín ê ba̍k-chiu-chêng tùi Hoat-ló, kap i ê chèng jîn-sîn, í-ki̍p i choân-tōe, só͘ kiâⁿ it-chhè ê sū lín lóng ū khòaⁿ-kìⁿ,

3就是你親目看見ê大試驗，kap神蹟，kap hiah-ê大奇事。chiū-sī lí chhin-ba̍k khòaⁿ-kìⁿ ê tōa chhì-giām, kap sîn-jiah, kap hiah ê tōa kî-sū.

4總是到今á日耶和華iáu無hō͘你能曉悟ê心，能看見ê目睭，能聽見ê耳孔。Chóng-sī kàu kin-á-ji̍t Iâ-hô-hoa iáu bô hō͘ lí ōe hiáu-ngō͘ ê sim, ōe khòaⁿ-kìⁿ ê ba̍k-chiu, ōe thiaⁿ-kìⁿ ê hī-khang.

5我chhōa lín tī曠野四十年，lín身軀ê衫無破，腳裡ê鞋也無破；Góa chhōa lín tī khòng-iá sì-cha̍p nî, lín seng-khu ê saⁿ bô phòa, kha-ni̍h ê ôe iā bô phòa;

6lín無食餅，也無lim清酒、厚酒；這是beh hō͘ lín知[我就是]耶和華[就是]lín ê上帝。lín bô chia̍h piáⁿ, iā bô lim chheng-chiú, kāu-chiú; che sī beh hō͘ lín chai Góa chiū-sī Iâ-hô-hoa [chiū-sī] lín ê Siōng-tè.

7Lín到chit所在，Hi-si̍t-pún王Se-hông，Pa-san王Go̍k，出來kap咱交戰；Lín kàu chit só͘-chāi, Hi-si̍t-pún ông Se-hông, Pa-san ông Go̍k, chhut-lâi kap lán kau-chiàn;

8咱就攻擊in，取in ê地，hō͘ Liû-piān ê支派，Ka-tek ê支派，kap Má-ná-se半支派做業；lán chiū kong-kek in, chhú in ê tōe, hō͘ Liû-piān ê chi-phài, Ka-tek ê chi-phài, kap Má-ná-se pòaⁿ chi-phài chòe-gia̍p;

9所以lín tio̍h執守來行chit-ê約ê話，thang hō͘ lín tī一切所行ê事興通。só͘-í lín tio̍h chip-siú lâi kiâⁿ chit ê iok ê ōe, thang hō͘ lín tī it-chhè só͘ kiâⁿ ê sū heng-thong.

10今á日lín眾人，lín ê首領，lín ê支派，lín ê長老，lín ê官長，以色列ê ta-po͘丁，Kin-á-ji̍t lín chèng-lâng, lín ê siú-léng , lín ê chi-phài, lín ê tiúⁿ-ló, lín ê koaⁿ-tiúⁿ, Í-sek-lia̍t ê ta-po͘-teng,

11lín ê kiáⁿ兒，lín ê bó͘，kap你營內ê出外人，tùi lín ê破柴ê到lín ê chhiūⁿ水ê，lóng khiā tī耶和華lín ê上帝ê面前；lín ê kiáⁿ-jî, lín ê bó͘, kap lí iâⁿ-lāi ê chhut-gōa lâng, tùi lín ê phòa-chhâ-ê kàu lín ê chhiūⁿ-chúi-ê, lóng khiā tī Iâ-hô-hoa lín ê Siōng-tè ê bīn-chêng;

12Hō͘你入tī耶和華你上帝ê約，也入tī耶和華你上帝今á日kap你所chiù-chōa ê；hō͘ lí ji̍p tī Iâ-hô-hoa lí Siōng-tè ê iok, iā ji̍p tī Iâ-hô-hoa lí Siōng-tè kin-á-ji̍t kap lí só͘ chiù-chōa ê;

13Hō͘伊照伊所bat對你講ê，koh照伊對你ê列祖亞伯拉罕、以撒、雅各所chiù-chōa-ê，今á日設立你做伊ê百姓，伊做你ê上帝。hō͘ I chiàu I só͘ bat tùi lí kóng-ê, koh chiàu I tùi lí ê lia̍t-chó͘ A-pek-la̍h-hán, Í-sat, Ngá-kok só͘ chiù-chōa-ê, kin-á-ji̍t siat-li̍p lí chòe I ê peh-sìⁿ, I chòe lí ê Siōng-tè.

14我m̄-nā kap lín立chit-ê約，kap chit-ê chiù-chōa，Góa m̄-nā kap lín li̍p chit ê iok, kap chit ê chiù-chōa,

15也是kap hiah-ê今á日kap咱同khiā tī耶和華咱上帝ê面前ê，以及今á日無kap咱同tī-teh ê人立ê；iā sī kap hiah-ê kin-á-ji̍t kap lán tâng-khiā tī Iâ-hô-hoa lán Siōng-tè ê bīn-chêng-ê, í-ki̍p kin-á-ji̍t bô kap lán tâng tī-teh ê lâng li̍p ê;

16(因為咱有怎樣tiàm tī埃及地，也咱有怎樣經過lín所tùi-hia過ê列國，這是lín所知ê；(in-ūi lán ū cháiⁿ-iūⁿ tiàm tī Ai-ki̍p tōe, iā lán ū cháiⁿ-iūⁿ keng-kè lín só͘ tùi-hia kè ê lia̍t-kok, che sī lín só͘ chai ê;

17lín也看見in中間thang厭惡ê物，kap in hiah-ê柴、石、金、銀ê偶像；)lín iā khòaⁿ-kìⁿ in tiong-kan thang iàm-ò͘ⁿ ê mi̍h, kap in hiah ê chhâ, chio̍h, kim, gûn ê ngó͘-siōng;)

18驚了lín中間，ta-po͘人，á是cha-bó͘人，或是家族，或是支派，in ê心今á日悖謬耶和華咱ê上帝，去服事hiah-ê國ê上帝；koh驚了lín中間有pháiⁿ根生出毒草kap茵藤(in-tîn)；kiaⁿ-liáu lín tiong-kan, ta-po͘ lâng, á-sī cha-bó͘ lâng, he̍k-sī ka-cho̍k, he̍k-sī chi-phài, in ê sim kin-á-ji̍t pōe-biū Iâ-hô-hoa lán ê Siōng-tè, khì ho̍k-sāi hiah ê kok ê siōng-tè; koh kiaⁿ-liáu lín tiong-kan ū pháiⁿ-kun siⁿ-chhut to̍k-chháu kap in-tîn;

19伊聽見chit-ê咒詛ê話，心內猶原家己安慰，講：我雖然行tāi-chì，心硬，將乾ê，tâm-ê lóng毀滅，我iáu-kú會平安；i thiaⁿ-kìⁿ chit-ê chiù-chó͘ ê ōe, sim-lāi iû-goân ka-kī an-ùi, kóng, Góa sui-jiân kiâⁿ tāi-chì, sim ngī, chiong ta-ê, tâm-ê lóng húi-bia̍t, góa iáu-kú ōe pêng-an;

20耶和華無beh赦免伊，耶和華ê受氣kap妒忌，beh燒hit人，將chit本冊所記一切ê咒詛，lóng beh到tī伊ê身軀；耶和華koh beh tùi天下擦滅伊ê名；Iâ-hô-hoa bô beh sià-bián i, Iâ-hô-hoa ê siū-khì kap tò͘-khī, beh sio hit-lâng, chiong chit pún chheh só͘ kì it-chhè ê chiù-chó͘, lóng beh kàu tī i ê seng-khu; Iâ-hô-hoa koh beh tùi thiⁿ-ē chhat-bia̍t i ê miâ;

21耶和華也beh照chit-ê律法ê冊所記載ê約一切ê咒詛，tùi以色列眾支派ê中間分別伊，hō͘伊tú-tio̍h災厄。Iâ-hô-hoa iā beh chiàu chit ê lu̍t-hoat ê chheh só͘ kì-chài ê iok it-chhè ê chiù-chó͘, tùi Í-sek-lia̍t chèng chi-phài ê tiong-kan hun-piat i, hō͘ i tú-tio̍h chai-ē.

22就後代，lín後輩ê kiáⁿ孫，kap遠遠來ê外國人，看見hit所在ê災厄，以及耶和華所hō͘ in tú-tio̍h ê病症，Chiū āu-tāi, lín hō͘-pòe ê kiáⁿ-sun, kap hn̄g-hn̄g lâi ê gōa-kok lâng, khòaⁿ-kìⁿ hit só͘-chāi ê chai-ē, í-ki̍p Iâ-hô-hoa só͘ hō͘ in tú-tio̍h ê pīⁿ-chèng,

23koh看見遍地有琉磺，有鹽，有火燒，無種作，無出產，連草也無發生tī-hia，親像所多瑪、蛾摩拉、Ap-má、Sé-phian ê毀壞，就是耶和華大受氣ê時所毀壞ê一樣，koh khòaⁿ-kìⁿ piàn-tōe ū jiû-n̂g, ū iâm, ū hé-sio, bô chèng-choh, bô chhut-sán, liân chháu iā bô hoat-siⁿ tī-hia, chhin-chhiūⁿ Só͘-to-má, Gô-mô͘-la̍h, Ap-má, Sé-phian ê húi-hoāi, chiū-sī Iâ-hô-hoa tōa siū-khì ê sî só͘ húi-hoāi-ê chi̍t-iūⁿ,

24Hiah-ê列國in lóng beh講：耶和華啥事對chit-ê地án-ni行ah？chit-ê受氣hiah猛烈是甚麼意思ah？hiah ê lia̍t-kok in lóng beh kóng, Iâ-hô-hoa siáⁿ-sū tùi chit ê tōe án-ni kiâⁿ ah? chit ê siū-khì hiah béng-lia̍t sī sím-mi̍h ì-sù ah?

25人beh講：是因為in棄sak耶和華in列祖ê上帝ê約，是伊chhōa in出埃及地ê時所立ê；Lâng beh kóng, Sī in-ūi in khì-sak Iâ-hô-hoa in lia̍t-chó͘ ê Siōng-tè ê iok, sī I chhōa in chhut Ai-ki̍p tōe ê sî só͘ li̍p ê;

26in去thàn別ê上帝服事伊，是in平素所m̄-bat ê上帝，耶和華bē-bat分派hō͘ in ê；in khì thàn pa̍t-ê siōng-tè ho̍k-sāi i, sī in pêng-sò͘ só͘ m̄-bat ê siōng-tè, Iâ-hô-hoa bē-bat hun-phài hō͘ in ê;

27所以耶和華發大受氣tī chit-ê地，將chit-ê冊所記一切ê咒詛，lóng降落tī伊；só͘-í Iâ-hô-hoa hoat tōa siū-khì tī chit ê tōe, chiong chit ê chheh só͘ kì it-chhè ê chiù-chó͘, lóng kàng-lo̍h tī i;

28耶和華tī受氣中大受氣，痛恨拔in出伊ê地，hiat in tī外邦，親像今á日一樣。Iâ-hô-hoa tī siū-khì-tiong tōa siū-khì, thòng-hūn pu̍ih in chhut i ê tōe, hiat in tī gōa-pang, chhin-chhiūⁿ kin-á-ji̍t chi̍t-iūⁿ.

29秘密ê事屬tī耶和華咱上帝ê；顯明ê事，是永遠屬tī咱kap咱ê kiáⁿ孫，beh hō͘咱行chit-ê律法一切ê話。Pì-ba̍t ê sū sio̍k tī Iâ-hô-hoa lán Siōng-tè ê; hián-bêng ê sū, sī éng-oán sio̍k tī lán kap lán ê kiáⁿ-sun, beh hō͘ lán kiâⁿ chit ê lu̍t-hoat it-chhè ê ōe.