1Chit-tia̍p了後，咱oa̍t倒tńg起身，tùi紅海ê路去曠野；是照耶和華所對我講ê；咱se̍h Se-jíⁿ山chōe-chōe日。Chit-tia̍p liáu-āu, lán oa̍t-tò-tńg khí-sin, tùi Âng-hái ê lō͘ khì khòng-iá; sī chiàu Iâ-hô-hoa só͘ tùi góa kóng-ê; lán se̍h Se-jíⁿ soaⁿ chōe-chōe ji̍t.

2耶和華吩咐我講：Iâ-hô-hoa hoan-hù góa kóng,

3Lín se̍h chit-ê山久lah；tio̍h oa̍t-tńg ǹg北勢去。Lín se̍h chit ê soaⁿ kú lah; tio̍h oa̍t-tńg ǹg pak-sì khì.

4你tio̍h吩咐百姓講：以掃ê kiáⁿ孫lín ê兄弟tiàm tī Se-jíⁿ；lín beh經過in ê境界，in beh驚lín；所以lín tio̍h不止謹慎；Lí tio̍h hoan-hù peh-sìⁿ kóng, Í-sò ê kiáⁿ-sun lín ê hiaⁿ-tī tiàm tī Se-jíⁿ; lín beh keng-kè in ê kéng-kài, in beh kiaⁿ lín; só͘-í lín tio̍h put-chí kín-sīn;

5m̄-thang kap in爭戰in ê地，就若一腳跡位，我lóng無hō͘ lín，因為我已經將Se-jíⁿ山hō͘以掃做業。m̄-thang kap in cheng-chiàn in ê tōe, chiū nā chi̍t kha-jiah-ūi, Góa lóng bô hō͘ lín, in-ūi Góa í-keng chiong Se-jíⁿ soaⁿ hō͘ Í-sò chòe-gia̍p.

6Lín tio̍h用銀tùi in買米糧來食，也tio̍h用銀tùi in買水來lim；Lín tio̍h ēng gûn tùi in bóe bí-niû lâi chia̍h, iā tio̍h ēng gûn tùi in bóe chúi lâi lim;

7因為耶和華你ê上帝，tī你ê手所做一切ê工，賜福你；你行chit-ê大ê曠野，伊lóng知；chit四十年，耶和華你ê上帝kap你tī-teh，你lóng無欠缺一項。in-ūi Iâ-hô-hoa lí ê Siōng-tè, tī lí ê chhiú só͘ chòe it-chhè ê kang, sù-hok lí; lí kiâⁿ chit ê tōa ê khòng-iá, I lóng chai; chit sì-cha̍p nî, Iâ-hô-hoa lí ê Siōng-tè kap lí tī-teh, lí lóng bô khiàm-kheh chi̍t-hāng.

8Tùi án-ni，咱離開咱ê兄弟以掃ê kiáⁿ孫，khiā起tī Se-jíⁿ ê；tùi A-la̍h-pa ê路經過Í-la̍h-tha、Í-sûn-ka-pia̍t。咱就oa̍t-tńg經過Mô͘-ap曠野ê路去。Tùi án-ni, lán lī-khui lán ê hiaⁿ-tī Í-sò ê kiáⁿ-sun, khiā-khí tī Se-jíⁿ ê; tùi A-la̍h-pa ê lō͘ keng-kè Í-la̍h-tha, Í-sûn-ka-pia̍t.Lán chiū oa̍t-tńg keng-kè Mô͘-ap khòng-iá ê lō͘ khì.

9耶和華對我講，M̄-thang攪擾Mô͘-ap人，也m̄-thang kap in交戰；in ê地我lóng無beh hō͘你做業；因為我已經將A-jíⁿ hō͘羅得ê kiáⁿ孫做業。Iâ-hô-hoa tùi góa kóng, M̄-thang kiáu-jiáu Mô͘-ap lâng, iā m̄-thang kap in kau-chiàn; in ê tōe Góa lóng bô beh hō͘ lí chòe-gia̍p; in-ūi Góa í-keng chiong A-jíⁿ hō͘ Lô-tek ê kiáⁿ-sun chòe-gia̍p.

10(早前有Í-bí人khiā起tī-hia，百姓chōe，大koh lò，親像A-la̍p人一樣。(Chá-chêng ū Í-bí lâng khiā-khí tī-hia, peh-sìⁿ chōe, tōa koh lò, chhin-chhiūⁿ A-la̍p lâng chi̍t-iūⁿ.

11In也hō͘人算in做Lī-hoa̍t-im人，親像A-la̍p人一樣；總是Mô͘-ap人稱伊做Í-bí人。In iā hō͘ lâng sǹg in chòe Lī-hoa̍t-im lâng, chhin-chhiūⁿ A-la̍p lâng chi̍t-iūⁿ; chóng-sī Mô͘-ap lâng chheng i chòe Í-bí lâng.

12早前Hô-lī人也khiā起tī Se-jíⁿ；總是以掃ê kiáⁿ孫續接伊；in tī in ê面前剿滅in，來tòa tī in ê所在，親像以色列tī耶和華賞賜in做業ê地所行ê。)Chá-chêng Hô-lī lâng iā khiā-khí tī Se-jíⁿ; chóng-sī Í-sò ê kiáⁿ-sun sòa-chiap i; in tī in ê bīn-chêng châu-bia̍t in, lâi tòa tī in ê só͘-chāi, chhin-chhiūⁿ Í-sek-lia̍t tī Iâ-hô-hoa siúⁿ-sù in chòe-gia̍p ê tōe só͘ kiâⁿ ê.)

13Taⁿ lín tio̍h起來過Sat-lia̍t溪；Tùi án-ni，咱過Sat-lia̍t溪。Taⁿ lín tio̍h khí-lâi kè Sat-lia̍t khoe; tùi án-ni lán kè Sat-lia̍t khoe.

14對咱離開Ka-te-su Pa-nî-a，到過Sat-lia̍t溪ê日，共三十八年；到hit代ê武士lóng死無tī軍營中，照耶和華對in所chiù-chōa-ê。Tùi lán lī-khui Ka-te-su Pa-nî-a, kàu kè Sat-lia̍t khoe ê ji̍t, kiōng saⁿ-cha̍p-poeh nî; kàu hit-tāi ê bú-sū lóng sí-bô tī kun-iâⁿ-tiong, chiàu Iâ-hô-hoa tùi in só͘ chiù-chōa-ê.

15Koh耶和華ê手攻擊in，tùi軍營中剿滅in，到in lóng死無。Koh Iâ-hô-hoa ê chhiú kong-kek in, tùi kun-iâⁿ-tiong châu-bia̍t in, kàu in lóng sí-bô.

16武士tùi百姓中lóng剿滅死無以後，Bú-sū tùi peh-sìⁿ-tiong lóng châu-bia̍t sí-bô í-āu,

17耶和華吩咐我講：Iâ-hô-hoa hoan-hù góa kóng,

18你今á日tio̍h tùi Mô͘-ap ê境界A-jíⁿ經過；Lí kin-á-ji̍t tio̍h tùi Mô͘-ap ê kéng-kài A-jíⁿ keng-kè;

19行近A-bûn人ê對面，m̄-thang攪擾in，也m̄-thang kap in爭戰；因為A-bûn人ê地我無hō͘ lín做業，因為我已經賞賜羅得ê kiáⁿ孫做業。kiâⁿ kūn A-bûn lâng ê tùi-bīn, m̄-thang kiáu-jiáu in, iā m̄-thang kap in cheng-chiàn; in-ūi A-bûn lâng ê tōe Góa bô hō͘ lín chòe-gia̍p, in-ūi Góa í-keng siúⁿ-sù Lô-tek ê kiáⁿ-sun chòe-gia̍p.

20(hit-ê地也算做Lī-hoa̍t-im人ê地；早前Lī-hoa̍t-im人tiàm tī-hia，A-bûn人稱in做Sàn-sòng-bêng；(Hit ê tōe iā sǹg-chòe Lī-hoa̍t-im lâng ê tōe; chá-chêng Lī-hoa̍t-im lâng tiàm tī-hia, A-bûn lâng chheng in chòe Sàn-sòng-bêng;

21Hiah-ê百姓chōe，大koh lò，親像A-la̍p人一樣；總是耶和華tī A-bûn人ê面前剿滅in，in就得tio̍h in ê地，續接khiā起；hiah ê peh-sìⁿ chōe, tōa koh lò, chhin-chhiūⁿ A-la̍p lâng chi̍t-iūⁿ; chóng-sī Iâ-hô-hoa tī A-bûn lâng ê bīn-chêng châu-bia̍t in, in chiū tit-tio̍h in ê tōe, sòa-chiap khiā-khí;

22親像伊為以掃ê kiáⁿ孫，khiā起tī Se-jíⁿ ê，滅Hô-lī人tī in ê面前，in就續接khiā起in ê地到今á日；chhin-chhiūⁿ I ūi Í-sò ê kiáⁿ-sun, khiā-khí tī Se-jíⁿ ê, bia̍t Hô-lī lâng tī in ê bīn-chêng, in chiū sòa-chiap khiā-khí in ê tōe kàu kin-á-ji̍t;

23koh有A-ōe人khiā起tī鄉社，續到Ka-sat ê；tùi Ka-húi-thok出來ê Ka-húi-thok人滅in，來khiā起tī in ê位。)koh ū A-ōe lâng khiā-khí tī hiuⁿ-siā, sòa kàu Ka-sat ê; tùi Ka-húi-thok chhut-lâi ê Ka-húi-thok lâng bia̍t in, lâi khiā-khí tī in ê ūi.)

24Taⁿ lín tio̍h起來，起身過A-lùn ê山谷；看ah，我已經將A-mô͘-lī人Hi-si̍t-pún王Se-hông，kap伊ê地，交tī你ê手頭；你tio̍h起手得tio̍h伊ê地，去kap伊交戰。Taⁿ lín tio̍h khí-lâi, khí-sin kè A-lùn ê soaⁿ-kok; khòaⁿ ah, Góa í-keng chiong A-mô͘-lī lâng Hi-si̍t-pún ông Se-hông, kap i ê tōe, kau tī lí ê chhiú-thâu; lí tio̍h khí-chhiú tit-tio̍h i ê tōe, khì kap i kau-chiàn.

25Tùi今á日起，我beh hō͘天下萬百姓，聽見你ê名聲ê，驚lín，忍lín；koh因為你ngia̍uh-ngia̍uh-chhoah，痛苦。Tùi kin-á-ji̍t khí, Góa beh hō͘ thiⁿ-ē bān peh-sìⁿ, thiaⁿ-kìⁿ lí ê miâ-siaⁿ ê, kiaⁿ lín, lún lín; koh in-ūi lí ngia̍uh-ngia̍uh-chhoah, thòng-khó͘.

26我就tùi Ki-tí-bo̍k ê曠野，差使者去見Hi-si̍t-pún王Se-hông，用和平ê話講：Góa chiū tùi Ki-tí-bo̍k ê khòng-iá, chhe sù-chiá khì kìⁿ Hi-si̍t-pún ông Se-hông, ēng hô-pêng ê ōe kóng,

27求你容允我對你ê地經過；我beh行大路，無偏左，無偏右；Kiû lí iông-ún góa tùi lí ê tōe keng-kè; góa beh kiâⁿ tōa-lō͘, bô phian-chó, bô phian-iū;

28你the̍h我ê銀，賣米糧hō͘我食，the̍h我ê銀，用水賣我lim；獨獨准我步行過去；lí the̍h góa ê gûn, bōe bí-niû hō͘ góa chia̍h, the̍h góa ê gûn, ēng chúi bōe góa lim; to̍k-to̍k chún góa pō͘-kiâⁿ kè-khì;

29親像tiàm tī Se-jíⁿ ê以掃ê kiáⁿ孫，kap tiàm tī A-jíⁿ ê Mô͘-ap人款待我一樣；thèng候我過約旦河，入耶和華阮ê上帝所賞賜阮ê地。chhin-chhiūⁿ tiàm tī Se-jíⁿ ê Í-sò ê kiáⁿ-sun, kap tiàm tī A-jíⁿ ê Mô͘-ap lâng khoán-thāi góa chi̍t-iūⁿ; thèng-hāu góa kè Iok-tàn hô, ji̍p Iâ-hô-hoa goán ê Siōng-tè só͘ siúⁿ-sù goán ê tōe.

30總是Hi-si̍t-pún王Se-hông m̄肯hō͘咱對伊hia經過，因為耶和華你ê上帝hō͘伊ê性情固執、心硬，為tio̍h beh將伊交付tī你ê手；親像今á日一樣。Chóng-sī Hi-si̍t-pún ông Se-hông m̄-khéng hō͘ lán tùi i hia keng-kè, in-ūi Iâ-hô-hoa lí ê Siōng-tè hō͘ i ê sèng-chêng kò͘-chip, sim ngī, ūi-tio̍h beh chiong i kau-hù tī lí ê chhiú; chhin-chhiūⁿ kin-á-ji̍t chi̍t-iūⁿ.

31耶和華kā我講：看ah，tùi chit-tia̍p起，我beh將Se-hông kap伊ê地，交付tī你ê面前，你taⁿ tio̍h得tio̍h伊ê地做業。Iâ-hô-hoa kā góa kóng, Khòaⁿ ah, tùi chit-tia̍p khí, Góa beh chiong Se-hông kap i ê tōe, kau-hù tī lí ê bīn-chêng, lí taⁿ tio̍h tit-tio̍h i ê tōe chòe-gia̍p.

32Hit時Se-hông kap伊ê眾百姓出來抵敵咱，交戰tī Ngá-cha̍p。Hit-sî Se-hông kap i ê chèng peh-sìⁿ chhut-lâi tí-te̍k lán, kau-chiàn tī Ngá-cha̍p.

33耶和華咱ê上帝將伊交付咱，咱就phah死伊，kap伊ê kiáⁿ，以及伊ê眾百姓。Iâ-hô-hoa lán ê Siōng-tè chiong i kau-hù lán, lán chiū phah-sí i, kap i ê kiáⁿ, í-ki̍p i ê chèng peh-sìⁿ.

34當hit時咱取伊lóng總ê城，剿滅有人khiā起ê城，連婦人人kap gín-ná，無留一個；Tng hit-sî lán chhú i lóng-chóng ê siâⁿ, châu-bia̍t ū lâng khiā-khí ê siâⁿ, liân hū-jîn-lâng kap gín-ná, bô lâu chi̍t-ê;

35獨獨cheng-siⁿ kap所搶ta̍k-ê城ê贓物，lóng取來做家己ê路用。to̍k-to̍k cheng-siⁿ kap só͘ chhiúⁿ ta̍k ê siâⁿ ê chong-bu̍t, lóng chhú lâi chòe ka-kī ê lō͘-ēng.

36Tùi A-lùn山谷邊ê A-lô-jíⁿ，以及山谷中ê城，到tī Ki-lia̍t，無一個城堅固，hō͘咱取伊無tio̍h；因為耶和華咱ê上帝lóng交付咱；Tùi A-lùn soaⁿ-kok-piⁿ ê A-lô-jíⁿ, í-ki̍p soaⁿ-kok tiong ê siâⁿ, kàu tī Ki-lia̍t, bô chi̍t ê siâⁿ kian-kò͘, hō͘ lán chhú i bô tio̍h; in-ūi Iâ-hô-hoa lán ê Siōng-tè lóng kau-hù lán;

37只有A-bûn人ê地，Ngá-phok河邊ê地，kap山地chiah-ê城，kap耶和華咱ê上帝所禁咱去ê地，你lóng無óa近伊。chí-ū A-bûn lâng ê tōe, Ngá-phok hô-piⁿ ê tōe, kap soaⁿ-tōe chiah ê siâⁿ, kap Iâ-hô-hoa lán ê Siōng-tè só͘ kìm lán khì ê tōe, lí lóng bô óa-kūn i.

1咱就oa̍t-tńg身上Pa-san ê路去；Pa-san王kap伊ê眾百姓lóng出來抵敵咱，就tī伊2-tek-lâi交戰。Lán chiū oa̍t-tńg-sin chiūⁿ Pa-san ê lō͘ khì; Pa-san ông kap i ê chèng peh-sìⁿ lóng chhut-lâi tí-te̍k lán, chiū tī Í-tek-lâi kau-chiàn.

2耶和華kā我講：莫得驚伊，因為我已經將伊kap伊ê眾百姓，kap伊ê地，lóng交tī你ê手；你tio̍h款待伊親像款待tiàm tī Hi-si̍t-pún ê A-mô͘-lī王Se-hông一樣。Iâ-hô-hoa kā góa kóng, Bo̍h-tit kiaⁿ i, in-ūi Góa í-keng chiong i kap i ê chèng peh-sìⁿ, kap i ê tōe, lóng kau tī lí ê chhiú; lí tio̍h khoán-thāi i chhin-chhiūⁿ khoán-thāi tiàm tī Hi-si̍t-pún ê A-mô͘-lī ông Se-hông chi̍t-iūⁿ.

3Tùi hit-tia̍p，耶和華咱ê上帝也將Pa-san王Go̍k，kap伊ê眾百姓，lóng交tī咱ê手；咱就phah死in，無留一個。Tùi hit-tia̍p Iâ-hô-hoa lán ê Siōng-tè iā chiong Pa-san ông Go̍k, kap i ê chèng peh-sìⁿ, lóng kau tī lán ê chhiú; lán chiū phah-sí in, bô lâu chi̍t-ê.

4Hit時咱取伊所有ê城，無一個城無hō͘咱取伊，共六十個城；這是A-jíⁿ-ko-pek ê全景，就是Go̍k ê國tī Pa-san ê。Hit-sî lán chhú i só͘ ū ê siâⁿ, bô chi̍t ê siâⁿ bô hō͘ lán chhú i, kiōng la̍k-cha̍p ê siâⁿ; che sī A-jíⁿ-ko-pek ê choân-kéng, chiū-sī Go̍k ê kok tī Pa-san ê.

5Chiah-ê lóng是堅固ê城，有高ê牆，有門，有栱；chiah-ê以外iáu有chōe-chōe無城牆ê埠頭。Chiah-ê lóng sī kian-kò͘ ê siâⁿ, ū koâiⁿ ê chhiûⁿ, ū mn̂g, ū kông; chiah-ê í-gōa iáu-ū chōe-chōe bô siâⁿ-chhiûⁿ ê po͘-thâu.

6咱一盡滅in，親像前款待Hi-si̍t-pún王Se-hông一樣，滅有人khiā起ê城，連婦人人，kap gín-ná；Lán it-chīn bia̍t in, chhin-chhiūⁿ chêng khoán-thāi Hi-si̍t-pún ông Se-hông chi̍t-iūⁿ, bia̍t ū lâng khiā-khí ê siâⁿ, liân hū-jîn-lâng, kap gín-ná;

7獨獨一切ê cheng-siⁿ，kap城中ê贓物，咱lóng取來做家己ê路用。to̍k-to̍k it-chhè ê cheng-siⁿ, kap siâⁿ-tiong ê chong-bu̍t, lán lóng chhú lâi chòe ka-kī ê lō͘-ēng.

8Hit時咱tùi約旦hit-pêng，兩個A-mô͘-lī王ê手，搶伊ê地，tùi A-lùn ê山谷到Hek-bûn山。Hit-sî lán tùi Iok-tàn hit-pêng, nn̄g ê A-mô͘-lī ông ê chhiú, chhiúⁿ i ê tōe, tùi A-lùn ê soaⁿ-kok kàu Hek-bûn soaⁿ.

9(chit-ê Hek-bûn，Se-tùn人稱伊做Se-liân；A-mô͘-lī人稱伊做Sī-nî-jíⁿ。)(Chit ê Hek-bûn, Se-tùn lâng chheng i chòe Se-liân; A-mô͘-lī lâng chheng i chòe Sī-nî-jíⁿ.)

10咱搶平洋ta̍k-ê城，Ki-lia̍t全地，Pa-san全地，直到Sat-ka kap Í-tek-lâi，lóng是Pa-san王Go̍k國內ê城。Lán chhiúⁿ pîⁿ-iûⁿ ta̍k ê siâⁿ, Ki-lia̍t choân-tōe, Pa-san choân-tōe, ti̍t-kàu Sat-ka kap Í-tek-lâi, lóng sī Pa-san ông Go̍k kok-lāi ê siâⁿ.

11(Lī-hoa̍t-im人所留ê，只有chhun Pa-san王Go̍k；看ah，伊ê眠床是鐵ê眠床，長九肘，闊四肘，lóng是用人ê肘做pān；現今kiám-m̄是tī A-bûn人ê La̍h-pa mah？)(Lī-hoa̍t-im lâng só͘ lâu ê, chí-ū chhun Pa-san ông Go̍k; khòaⁿ ah, i ê bîn-chhn̂g sī thih ê bîn-chhn̂g, tn̂g káu-tiú, khoah sì-tiú, lóng sī ēng lâng ê tiú chòe-pān; hiān-kim kiám-m̄-sī tī A-bûn lâng ê la̍h-pa mah?)

12Hit時咱得tio̍h chit-ê地；tùi A-lùn山谷邊ê A-lô-jíⁿ起，以及Ki-lia̍t山地ê一半，kap其中ê城，我lóng hō͘ Liû-piān人kap Ka-tek人；Hit-sî lán tit-tio̍h chit ê tōe; tùi A-lùn soaⁿ-kok piⁿ ê A-lô-jíⁿ khí, í-ki̍p Ki-lia̍t soaⁿ-tōe ê chi̍t-pòaⁿ, kap kî-tiong ê siâⁿ, góa lóng hō͘ Liû-piān lâng kap Ka-tek lâng;

13Ki-lia̍t其餘ê地，kap Pa-san全地，Go̍k ê國，我hō͘ Má-ná-se ê半支派；A-jíⁿ-ko-pek全地，Pa-san全地，這叫做Lī-hoa̍t-im人ê地。Ki-lia̍t kî-û ê tōe, kap Pa-san choân-tōe, Go̍k ê kok, góa hō͘ Má-ná-se ê pòaⁿ-chi-phài; A-jíⁿ-ko-pek choân-tōe, Pa-san choân-tōe, che kiò-chòe Lī-hoa̍t-im lâng ê tōe.

14Má-ná-se ê kiáⁿ Gâi-jíⁿ chiàm A-jíⁿ-ko-pek全景，直到Ki-su̍t人kap Má-ka人ê交界；就照家己ê名稱Pa-san地做Hap-úi-te̍k-gâi-jíⁿ，到今á日。Má-ná-se ê kiáⁿ Gâi-jíⁿ chiàm A-jíⁿ-ko-pek choân-kéng, ti̍t-kàu Ki-su̍t lâng kap Má-ka lâng ê kau-kài; chiū chiàu ka-kī ê miâ chheng Pa-san tōe chòe Hap-úi-te̍k-gâi-jíⁿ, kàu kin-á-ji̍t.

15我koh將Ki-lia̍t hō͘ Má-kiat。Góa koh chiong Ki-lia̍t hō͘ Má-kiat.

16Tùi Ki-lia̍t到A-lùn ê山谷，用山谷做界，直到A-bûn人交界ê Ngá-phok河，我將這hō͘ Liû-piān人，kap Ka-tek人；Tùi Ki-lia̍t kàu A-lùn ê soaⁿ-kok, ēng soaⁿ-kok chòe kài, ti̍t-kàu A-bûn lâng kau-kài ê Ngá-phok hô, góa chiong che hō͘ Liû-piān lâng, kap Ka-tek lâng;

17koh將A-la̍h-pa，kap óa近約旦河ê地，tùi Ki-nî-lia̍t直到A-la̍h-pa ê海，就是鹽海，以及Pí-su-ka山腳東邊ê地，lóng hō͘ in。koh chiong A-la̍h-pa, kap óa-kūn Iok-tàn hô ê tōe, tùi Ki-nî-lia̍t ti̍t-kàu A-la̍h-pa ê hái, chiū-sī Iâm-hái, í-ki̍p Pí-su-ka soaⁿ-kha tang-piⁿ ê tōe, lóng hō͘ in.

18Hit時我吩咐lín講：耶和華lín ê上帝已經將chit-ê地hō͘ lín做業，lín中間能交戰ê，lóng tio̍h帶軍器，tī lín ê兄弟以色列人ê面前過去。Hit-sî góa hoan-hù lín kóng, Iâ-hô-hoa lín ê Siōng-tè í-keng chiong chit ê tōe hō͘ lín chòe-gia̍p, lín tiong-kan ōe kau-chiàn-ê, lóng tio̍h tòa kun-khì, tī lín ê hiaⁿ-tī Í-sek-lia̍t lâng ê bīn-chêng kè-khì.

19總是lín ê bó͘，lín ê gín-ná，lín ê cheng-siⁿ，(我知lín ê cheng-siⁿ真chōe，) thang tiàm tī我所hō͘ lín ta̍k-ê城，Chóng-sī lín ê bó͘, lín ê gín-ná, lín ê cheng-siⁿ, (góa chai lín ê cheng-siⁿ chin chōe,) thang tiàm tī góa só͘ hō͘ lín ta̍k ê siâⁿ,

20到耶和華賞賜平安hō͘ lín ê兄弟，親像已經賞賜lín一樣，koh in也得tio̍h耶和華lín ê上帝，用約旦hit pêng ê地賞賜in，然後lín ta̍k人thang tò來我賞賜lín做業ê地。kàu Iâ-hô-hoa siúⁿ-sù pêng-an hō͘ lín ê hiaⁿ-tī, chhin-chhiūⁿ í-keng siúⁿ-sù lín chi̍t-iūⁿ, koh in iā tit-tio̍h Iâ-hô-hoa lín ê Siōng-tè, ēng Iok-tàn hit pêng ê tōe siúⁿ-sù in, jiân-āu lín ta̍k-lâng thang tò-lâi góa siúⁿ-sù lín chòe-gia̍p ê tōe.

21Hit時我吩咐約書亞講：你親目看見耶和華你ê上帝tùi chit兩個王所行一切ê事，耶和華也beh tùi lín所beh過去ê ta̍k國án-ni行。Hit-sî góa hoan-hù Iok-su-a kóng, Lí chhin-ba̍k khòaⁿ-kìⁿ Iâ-hô-hoa lí ê Siōng-tè tùi chit nn̄g ê ông só͘ kiâⁿ it-chhè ê sū, Iâ-hô-hoa iā beh tùi lín só͘ beh kè-khì ê ta̍k-kok án-ni kiâⁿ.

22Lín莫得驚in；因為替lín交戰ê，是耶和華lín ê上帝。Lín bo̍h-tit kiaⁿ in; in-ūi thòe lín kau-chiàn ê, sī Iâ-hô-hoa lín ê Siōng-tè.

23Hit時我懇求耶和華講：Hit-sî góa khún-kiû Iâ-hô-hoa kóng,

24主耶和華ah，你已經起頭顯出你ê大威嚴，kap你ê大氣力tī你ê奴僕，因為tī天裡，tī地裡，iáu有甚麼上帝能行親像你所行ê，koh親像你ê大權能ah？Chú Iâ-hô-hoa ah, Lí í-keng khí-thâu hián-chhut Lí ê tōa ui-giâm, kap Lí ê tōa khùi-la̍t tī Lí ê lô͘-po̍k, in-ūi tī thiⁿ-ni̍h, tī tōe-ni̍h, iáu-ū sím-mi̍h siōng-tè ōe kiâⁿ chhin-chhiūⁿ Lí só͘ kiâⁿ-ê, koh chhin-chhiūⁿ Lí ê tōa koân-lêng ah?

25求你容允我過去，看約旦河hit-pêng súi ê地，hit-ê súi ê山地，kap Lī-pa-lùn。Kiû Lí iông-ún góa kè-khì, khòaⁿ Iok-tàn hô hit-pêng súi ê tōe, hit-ê súi ê soaⁿ-tōe, kap Lī-pa-lùn.

26總是耶和華，因為lín ê緣故，受氣我，m̄聽我；耶和華對我講，Án-ni你夠額lah，你莫得koh對我提起chit-ê事。Chóng-sī Iâ-hô-hoa, in-ūi lín ê iân-kò͘, siū-khì góa, m̄ thiaⁿ góa; Iâ-hô-hoa tùi góa kóng, Án-ni lí kàu-gia̍h lah, lí bo̍h-tit koh tùi Góa thê-khí chit ê sū.

27你tio̍h上Pí-su-ka ê山頂，kia̍h目ǹg西，ǹg北，ǹg南，ǹg東，親目看；因為你決斷bōe能過chit-ê約旦河。Lí tio̍h chiūⁿ Pí-su-ka ê soaⁿ-téng, kia̍h-ba̍k ǹg-sai, ǹg-pak, ǹg-lâm, ǹg-tang, chhin-ba̍k khòaⁿ; in-ūi lí koat-toàn bōe-ōe kè chit ê Iok-tàn hô.

28總是你tio̍h吩咐約書亞，hō͘伊壯膽堅固；因為伊beh tī chit-ê百姓ê面前過去，hō͘ in承接你所beh看見ê地。Chóng-sī lí tio̍h hoan-hù Iok-su-a, hō͘ i chòng-táⁿ kian-kò͘; in-ūi i beh tī chit ê peh-sìⁿ ê bīn-chêng kè-khì, hō͘ in sêng-chiap lí só͘ beh khòaⁿ-kìⁿ ê tōe.

29Tùi án-ni，咱tiàm tī Pek-pí-jíⁿ對面ê山谷中。Tùi án-ni lán tiàm tī Pek-pí-jíⁿ tùi-bīn ê soaⁿ-kok-tiong.

1以色列ah，taⁿ我所教示lín ê律例法度，lín tio̍h聽來遵thàn，thang hō͘ lín活teh，入去來得tio̍h耶和華lín ê列祖ê上帝所賞賜lín ê地。Í-sek-lia̍t ah, taⁿ góa só͘ kà-sī lín ê lu̍t-lē hoat-tō͘, lín tio̍h thiaⁿ lâi chun-thàn, thang hō͘ lín oa̍h-teh, ji̍p-khì lâi tit-tio̍h Iâ-hô-hoa lín ê lia̍t-chó͘ ê Siōng-tè só͘ siúⁿ-sù lín ê tōe.

2我所命令lín ê話，lín m̄-thang加添，也m̄-thang減少伊；thang hō͘ lín執守耶和華lín上帝ê命令，就是我所命令lín ê。Góa só͘ bēng-lēng lín ê ōe, lín m̄-thang ke-thiⁿ, iā m̄-thang kiám-chió i; thang hō͘ lín chip-siú Iâ-hô-hoa lín Siōng-tè ê bēng-lēng, chiū-sī góa só͘ bēng-lēng lín ê.

3耶和華因為Pa-le̍k-pí-jíⁿ ê事所行ê，lín親目看見；因為見若thàn Pa-le̍k-pí-jíⁿ ê人，耶和華你ê上帝lóng tùi lín中間除滅in。Iâ-hô-hoa in-ūi Pa-le̍k-pí-jíⁿ ê sū só͘ kiâⁿ ê, lín chhin-ba̍k khòaⁿ-kìⁿ; in-ūi kìⁿ-nā thàn Pa-le̍k-pí-jíⁿ ê lâng, Iâ-hô-hoa lí ê Siōng-tè lóng tùi lín tiong-kan tû-bia̍t in.

4獨獨lín kap耶和華lín ê上帝結聯ê，今á日lóng活teh。To̍k-to̍k lín kap Iâ-hô-hoa lín ê Siōng-tè kiat-liân ê, kin-á-ji̍t lóng oa̍h-teh.

5看ah，我也bat用律例kap法度教示lín，照耶和華我ê上帝所命令我ê，hō͘ lín遵thàn tī lín所beh入去承接ê地。Khòaⁿ ah, góa iā bat ēng lu̍t-lē kap hoat-tō͘ kà-sī lín, chiàu Iâ-hô-hoa góa ê Siōng-tè só͘ bēng-lēng góa ê, hō͘ lín chun-thàn tī lín só͘ beh ji̍p-khì sêng-chiap ê tōe.

6所以lín tio̍h執守來行伊；這就是lín ê智慧聰明tī列國ê面前；in一下聽見這一切ê律例，beh講：Chit-ê大國真正是有智慧聰明ê百姓。Só͘-í lín tio̍h chip-siú lâi kiâⁿ-i; che chiū-sī lín ê tì-hūi chhang-miâ tī lia̍t-kok ê bīn-chêng; in chi̍t-ē thiaⁿ-kìⁿ che it-chhè ê lu̍t-lē, beh kóng, Chit ê tōa-kok chin-chiàⁿ sī ū tì-hūi chhang-miâ ê peh-sìⁿ.

7Toh落一個大國有上帝kap伊親近，親像耶和華咱ê上帝，tī咱見若求叫祂ê時，kap咱親近ah？Toh-lo̍h chi̍t ê tōa-kok ū siōng-tè kap i chhin-kūn, chhin-chhiūⁿ Iâ-hô-hoa lán ê Siōng-tè, tī lán kìⁿ-nā kiû-kiò I ê sî, kap lán chhin-kūn ah?

8Koh有甚麼大國有律例kap法度親像我今á日tī lín ê面前所傳一切ê律法hiah-nih公義ah？Koh ū sím-mi̍h tōa-kok ū lu̍t-lē kap hoat-tō͘ chhin-chhiūⁿ góa kin-á-ji̍t tī lín ê bīn-chêng só͘ thoân it-chhè ê lu̍t-hoat hiah-nih kong-gī ah?

9所以tio̍h家己謹慎，也tio̍h謹慎守你ê心，免得你bōe記得親目所看見ê事；koh免得chiah-ê事tī你活teh ê時離開你ê心；也tio̍h用chit-ê教示lín hiah-ê kiáⁿ，hiah-ê 孫。Só͘-í tio̍h ka-kī kín-sīn, iā tio̍h kín-sīn siú lí ê sim, bián-tit lí bōe-kì-tit chhin-ba̍k só͘ khòaⁿ-kìⁿ ê sū; koh bián-tit chiah ê sū tī lí oa̍h-teh ê sî lī-khui lí ê sim; iā tio̍h ēng chit-ê kà-sī lín hiah ê kiáⁿ, hiah ê sun.

10你tī何烈山khiā tī耶和華你ê上帝ê面前，hit日耶和華對我講，你kā我招集百姓，我beh hō͘ in聽見我ê話，hō͘ in活tī世間ê日，thang學習敬畏我；koh thang教示in ê kiáⁿ兒。Lí tī Hô-lia̍t soaⁿ khiā tī Iâ-hô-hoa lí ê Siōng-tè ê bīn-chêng, hit-ji̍t Iâ-hô-hoa tùi góa kóng, Lí kā Góa chio-chi̍p peh-sìⁿ, Góa beh hō͘ in thiaⁿ-kìⁿ Góa ê ōe, hō͘ in oa̍h tī sè-kan ê ji̍t, thang ha̍k-si̍p kèng-ùi Góa; koh thang kà-sī in ê kiáⁿ-jî.

11Hit時lín近óa，khiā tī山腳，山裡有火燄chhèng到天頂，也有密雲烏烏暗暗。Hit-sî lín kūn-óa, khiā tī soaⁿ-kha, soaⁿ-ni̍h ū hé-iām chhèng-kàu thiⁿ-téng, iā ū ba̍t-hûn o͘-o͘ àm-àm.

12耶和華tùi火燄中kā lín講話；lín聽見講話ê聲，無看見甚麼像；只有聲nā-tiāⁿ。Iâ-hô-hoa tùi hé-iām-tiong kā lín kóng-ōe; lín thiaⁿ-kìⁿ kóng-ōe ê siaⁿ, bô khòaⁿ-kìⁿ sím-mi̍h siōng; chí-ū siaⁿ nā-tiāⁿ.

13伊將所命令lín tio̍h守ê約指示lín，就是十條誡；也寫伊tī兩塊石碑。I chiong só͘ bēng-lēng lín tio̍h siú ê iok chí-sī lín, chiū-sī cha̍p-tiâu-kài; iā siá i tī nn̄g tè chio̍h-pi.

14Hit時耶和華koh命令我，將律例法度教示lín，hō͘ lín tī所beh過去來得tio̍h做業ê地遵thàn行伊。Hit-sî Iâ-hô-hoa koh bēng-lēng góa, chiong lu̍t-lē hoat-tō͘ kà-sī lín, hō͘ lín tī só͘ beh kè-khì lâi tit-tio̍h chòe-gia̍p ê tōe chun-thàn kiâⁿ i.

15所以lín tio̍h特別家己謹慎，因為耶和華tī何烈山tùi火中kā lín講話hit日，lín無看見甚麼形象；Só͘-í lín tio̍h te̍k-pia̍t ka-kī kín-sīn, in-ūi Iâ-hô-hoa tī Hô-lia̍t soaⁿ tùi hé-tiong kā lín kóng-ōe hit-ji̍t, lín bô khòaⁿ-kìⁿ sím-mi̍h hêng-siōng;

16驚了lín敗壞家己，為家己雕刻偶像，仿甚麼形狀，無論是男á是女ê形象；kiaⁿ-liáu lín pāi-hoāi ka-kī, ūi ka-kī tiau-khek ngó͘-siōng, hóng sím-mi̍h hêng-chōng, bô-lūn sī lâm á-sī lú ê hêng-siōng;

17á是地上走獸ê像；á-sī tōe-chiūⁿ cháu-siù ê siōng;

18á是空中飛鳥ê像；á是地上teh sô ê物ê像；á是地下水中魚類 ê像。á-sī khong-tiong pe-chiáu ê siōng; á-sī tōe-chiūⁿ teh sô ê mi̍h ê siōng; á-sī tōe-ē chúi-tiong hî-lūi ê siōng.

19Koh驚了你kia̍h目ǹg天看耶和華你ê上帝所分派hō͘天下萬國ê日、月、星，就是天頂ê萬象，你就受引誘，敬拜服事in。Koh kiaⁿ-liáu lí kia̍h-ba̍k ǹg-thiⁿ khòaⁿ Iâ-hô-hoa lí ê Siōng-tè só͘ hun-phài hō͘ thiⁿ-ē bān-kok ê ji̍t, ge̍h, chhiⁿ, chiū-sī thiⁿ-téng ê bān-siōng, lí chiū siū ín-iú, kèng-pài ho̍k-sāi in.

20總是耶和華帶lín出埃及，脫離鑄鐵ê爐，beh做伊家己產業ê百姓，親像今á日ê款。Chóng-sī Iâ-hô-hoa tòa lín chhut Ai-ki̍p, thoat-lī chù-thih ê lô͘, beh chòe I ka-kī sán-gia̍p ê peh-sìⁿ, chhin-chhiūⁿ kin-á-ji̍t ê khoán.

21耶和華koh因為lín ê緣故受氣我，chiù-chōa m̄ hō͘我過約旦河，也m̄ hō͘我入耶和華你上帝所賞賜你做業ê súi地；Iâ-hô-hoa koh in-ūi lín ê iân-kò͘ siū-khì góa, chiù-chōa m̄ hō͘ góa kè Iok-tàn hô, iā m̄ hō͘ góa ji̍p Iâ-hô-hoa lí Siōng-tè só͘ siúⁿ-sù lí chòe-gia̍p ê súi tōe;

22我tio̍h死tī chit-ê地；我bōe能過約旦河；總是lín beh過去來得tio̍h hit-ê好ê地。góa tio̍h sí tī chit ê tōe; góa bōe-ōe kè Iok-tàn hô; chóng-sī lín beh kè-khì lâi tit-tio̍h hit ê hó ê tōe.

23Lín tio̍h家己謹慎，驚了lín bōe記得耶和華lín ê上帝kap lín所立ê約，為家己雕刻偶像彷彿甚麼物，就是耶和華你ê上帝所禁你ê。Lín tio̍h ka-kī kín-sīn, kiaⁿ-liáu lín bōe-kì-tit Iâ-hô-hoa lín ê Siōng-tè kap lín só͘ li̍p ê iok, ūi ka-kī tiau-khek ngó͘-siōng hóng-hut sím-mi̍h mi̍h, chiū-sī Iâ-hô-hoa lí ê Siōng-tè só͘ kìm lí ê.

24因為耶和華你ê上帝就是烈烈ê火，決斷m̄容允有別ê上帝。In-ūi Iâ-hô-hoa lí ê Siōng-tè chiū-sī lia̍t-lia̍t ê hé, koat-toàn m̄ iông-ún ū pa̍t ê siōng-tè.

25後來lín久久khiā起tī hit-ê地生kiáⁿ傳孫，就雕刻偶像，仿甚麼物ê像，phah-pháiⁿ你ê心術，行耶和華你ê上帝目睭中看做pháiⁿ ê事，惹祂受氣；Āu-lâi lín kú-kú khiā-khí tī hit ê tōe siⁿ-kiáⁿ thoân-sun, chiū tiau-khek ngó͘-siōng, hóng sím-mi̍h mi̍h ê siōng, phah-pháiⁿ lí ê sim-su̍t, kiâⁿ Iâ-hô-hoa lí ê Siōng-tè ba̍k-chiu-tiong khòaⁿ-chòe pháiⁿ ê sū, jiá I siū-khì;

26我就kin-a日叫天叫地來干證，lín beh tī過約旦河得tio̍h做業ê地緊緊滅到盡；lín ê日子bōe能tī hit所在得tio̍h久長，beh一盡除滅。góa chiū kin-a-ji̍t kiò thiⁿ kiò tōe lâi kan-chèng, lín beh tī kè Iok-tàn hô tit-tio̍h chòe-gia̍p ê tōe kín-kín bia̍t kàu chīn; lín ê ji̍t-chí bōe-ōe tī hit só͘-chāi tit-tio̍h kú-tn̂g, beh it-chīn tû-bia̍t.

27耶和華beh hō͘ lín四散tī列邦；tī耶和華所chhōa lín到hiah-ê國，lín chhun ê人額少少。Iâ-hô-hoa beh hō͘ lín sì-sòaⁿ tī lia̍t-pang; tī Iâ-hô-hoa só͘ chhōa lín kàu hiah ê kok, lín chhun ê lâng-gia̍h chió-chió.

28Tī-hia lín beh服事人ê手所造ê上帝，就是柴ê、石ê，bōe能看見，bōe能聽，bōe能食，bōe能phīⁿ ê。Tī-hia lín beh ho̍k-sāi lâng ê chhiú só͘ chō ê siōng-tè, chiū-sī chhâ-ê, chio̍h-ê, bōe-ōe khòaⁿ-kìⁿ, bōe-ōe thiaⁿ, bōe-ōe chia̍h, bōe-ōe phīⁿ ê.

29總是lín tī-hia若beh chhē耶和華你ê上帝，若用盡心盡性chhē祂，就beh tú-tio̍h。Chóng-sī lín tī-hia nā beh chhē Iâ-hô-hoa lí ê Siōng-tè, nā ēng chīn-sim chīn-sèng chhē I, chiū beh tú-tio̍h.

30日後lín tú-tio̍h苦難，所講chiah-ê事臨到你，你beh歸向耶和華，你ê上帝，來聽祂ê聲；Ji̍t-āu lín tú-tio̍h khó͘-lān, só͘ kóng chiah ê sū lîm-kàu lí, lí beh kui-ǹg Iâ-hô-hoa, lí ê Siōng-tè, lâi thiaⁿ I ê siaⁿ;

31因為耶和華你ê上帝是憐憫ê上帝，伊無beh放sak你，無beh剿滅你，也無bōe記得伊kap你ê列祖所chiù-chōa ê約。in-ūi Iâ-hô-hoa lí ê Siōng-tè sī lîn-bín ê Siōng-tè, I bô beh pàng-sak lí, bô beh châu-bia̍t lí, iā bô bōe-kì-tit I kap lí ê lia̍t-chó͘ só͘ chiù-chōa ê iok.

32試問過身ê時，就是你以前ê時，tùi上帝創造人tī世間hit日以來，tùi天ê chit邊到天ê hit邊，有親像hit號ê大事mah？Bat聽見有án-ni mah？Chhì-mn̄g kè-sin ê sî, chiū-sī lí í-chêng ê sî, tùi Siōng-tè chhòng-chō lâng tī sè-kan hit-ji̍t í-lâi, tùi thiⁿ ê chit-piⁿ kàu thiⁿ ê hit-piⁿ, ū chhin-chhiūⁿ hit-hō ê tōa-sū mah? Bat thiaⁿ-kìⁿ ū án-ni mah?

33Bat有甚麼百姓聽見上帝tùi火中講話ê聲，親像你聽見，也iáu能活teh mah？Bat ū sím-mi̍h peh-sìⁿ thiaⁿ-kìⁿ Siōng-tè tùi hé-tiong kóng-ōe ê siaⁿ, chhin-chhiūⁿ lí thiaⁿ-kìⁿ, iā iáu ōe oa̍h-teh mah?

34á是bat有甚麼上帝試án-ni做，用試煉、神蹟、奇事、交戰、大權能ê手，伸出ê手骨，kap大thang驚ê事，為家己tùi別國中取一國，親像耶和華lín ê上帝tī埃及tī lín ê目睭前，為lín所行一切ê事ah？Á-sī bat ū sím-mi̍h siōng-tè chhì án-ni chòe, ēng chhì-liān, sîn-jiah, kî-sū, kau-chiàn, tōa koân-lêng ê chhiú, chhun-chhut ê chhiú-kut, kap tōa thang kiaⁿ ê sū, ūi ka-kī tùi pa̍t-kok tiong chhú chi̍t-kok, chhin-chhiūⁿ Iâ-hô-hoa lín ê Siōng-tè tī Ai-ki̍p tī lín ê ba̍k-chiu chêng, ūi lín só͘ kiâⁿ it-chhè ê sū ah?

35用這顯現tī你，hō͘你知耶和華伊是上帝，祂以外無有別ê。Ēng che hián-hiān tī lí, hō͘ lí chai Iâ-hô-hoa I sī Siōng-tè, I í-gōa bô ū pa̍t-ê.

36祂tùi天hō͘你聽見祂ê聲，為tio̍h beh教示你，koh tī地面上hō͘你看見祂ê大火，koh你聽見祂ê話tùi火中出。I tùi thiⁿ hō͘ lí thiaⁿ-kìⁿ I ê siaⁿ, ūi-tio̍h beh kà-sī lí, koh tī tōe-bīn-chiūⁿ hō͘ lí khòaⁿ-kìⁿ I ê tōa-hé, koh lí thiaⁿ-kìⁿ I ê ōe tùi hé-tiong chhut.

37因為祂疼你ê列祖，所以揀選in ê後裔，用大權能親身帶你出埃及；In-ūi I thiàⁿ lí ê lia̍t-chó͘, só͘-í kéng-soán in ê hō͘-è, ēng tōa koân-lêng chhin-sin tòa lí chhut Ai-ki̍p;

38beh對你ê面前趕出比你khah大khah猛ê國民，beh chhōa你入去，用in ê地賞賜lín做業，親像今á日一樣。beh tùi lí ê bīn-chêng kóaⁿ-chhut pí lí khah-tōa khah-béng ê kok-bîn, beh chhōa lí ji̍p-khì, ēng in ê tōe siúⁿ-sù lín chòe-gia̍p, chhin-chhiūⁿ kin-á-ji̍t chi̍t-iūⁿ.

39所以今á日你tio̍h知，心也tio̍h想，天頂地下只有耶和華，祂是上帝，以外無別ê。Só͘-í kin-á-ji̍t lí tio̍h chai, sim iā tio̍h siūⁿ, thiⁿ-téng tōe-ē chí-ū Iâ-hô-hoa, I sī Siōng-tè, í-gōa bô pa̍t-ê.

40所以你tio̍h守祂ê律例誡命，就是我今á日所命令你，hō͘你kap你ê後裔thang得tio̍h福氣，koh加添你ê日子久長tī耶和華你ê上帝所賞賜你ê地到永遠。Só͘-í lí tio̍h siú I ê lu̍t-lē kài-bēng, chiū-sī góa kin-á-ji̍t só͘ bēng-lēng lí, hō͘ lí kap lí ê hō͘-è thang tit-tio̍h hok-khì, koh ke-thiⁿ lí ê ji̍t-chí kú-tn̂g tī Iâ-hô-hoa lí ê Siōng-tè só͘ siúⁿ-sù lí ê tōe kàu éng-oán.

41Hit時摩西tī約旦外，ǹg日出ê所在分別三個城；Hit-sî Mô͘-se tī Iok-tàn gōa, ǹg ji̍t-chhut ê só͘-chāi hun-piat saⁿ ê siâⁿ;

42Hō͘ thâi死人ê人，就是平素無結怨，錯誤thâi死伊ê厝邊ê，thang逃走tī-hia；已經走入chiah-ê城ê一個，就得tio̍h活；hō͘ thâi-sí lâng ê lâng, chiū-sī pêng-sò͘ bô kiat-oàn, chhò-gō͘ thâi-sí i ê chhù-piⁿ ê, thang tô-cháu tī-hia; í-keng cháu-ji̍p chiah ê siâⁿ ê chi̍t-ê, chiū tit-tio̍h oa̍h;

43就是曠野平洋ê Pí-sek，為tio̍h Liû-piān人設ê；Ki-lia̍t ê Lah-boa̍t，為tio̍h Ka-tek人設ê；Pa-san ê Ko-lân，為tio̍h Má-ná-se人設ê。chiū-sī khòng-iá pîⁿ-iûⁿ ê Pí-sek, ūi-tio̍h Liû-piān lâng siat-ê; Ki-lia̍t ê Lah-boa̍t, ūi-tio̍h Ka-tek lâng siat-ê; Pa-san ê Ko-lân, ūi-tio̍h Má-ná-se lâng siat-ê.

44Chit-ê是摩西tī以色列人ê面前所排列ê律法；Chit-ê sī Mô͘-se tī Í-sek-lia̍t lâng ê bīn-chêng só͘ pâi-lia̍t ê lu̍t-hoat;

45Chiah-ê是摩西tī以色列人出埃及了後，所傳hō͘ in ê證據、律例、法度。chiah-ê sī Mô͘-se tī Í-sek-lia̍t lâng chhut Ai-ki̍p liáu-āu, só͘ thoân hō͘ in ê chèng-kù, lu̍t-lē, hoat-tō͘.

46Tī約旦河外，Pek-pí-jíⁿ對面ê山谷中，tī Hi-si̍t-pún khiā起A-mô͘-lī王Se-hông ê地，就是摩西kap以色列人出埃及了後所phah ê。Tī Iok-tàn hô-gōa, Pek-pí-jíⁿ tùi-bīn ê soaⁿ-kok-tiong, tī Hi-si̍t-pún khiā-khí A-mô͘-lī ông Se-hông ê tōe, chiū-sī Mô͘-se kap Í-sek-lia̍t lâng chhut Ai-ki̍p liáu-āu só͘ phah-ê.

47In得tio̍h伊ê地，kap Pa-san王Go̍k ê地，就是兩個A-mô͘-lī王，tī約旦外，ǹg日出ê所在；In tit-tio̍h i ê tōe, kap Pa-san ông Go̍k ê tōe, chiū-sī nn̄g ê A-mô͘-lī ông, tī Iok-tàn gōa, ǹg ji̍t-chhut ê só͘-chāi;

48tùi A-lùn山谷邊ê A-lô-jíⁿ，直到Se-hûn山，就是Hek-bûn山；tùi A-lùn soaⁿ-kok piⁿ ê A-lô-jíⁿ, ti̍t-kàu Se-hûn soaⁿ, chiū-sī Hek-bûn soaⁿ;

49以及約旦外，東勢A-la̍h-pa ê全地，直到A-la̍h-pa ê海，óa近Pí-su-ka ê山腳。í-ki̍p Iok-tàn gōa, tang-sì A-la̍h-pa ê choân-tōe, ti̍t-kàu A-la̍h-pa ê hái, óa-kūn Pí-su-ka ê soaⁿ-kha.