1摩西用chiah-ê話去kā以色列眾人講。Mô͘-se ēng chiah ê ōe khì kā Í-sek-lia̍t chèng-lâng kóng.

2對in講，我今á日一百二十歲，bōe koh照常出入；耶和華也bat對我講，你bōe會過chit-ê約旦。Tùi in kóng, Góa kin-á-ji̍t chi̍t-pah jī-cha̍p hè, bōe koh chiàu-siông chhut-ji̍p; Iâ-hô-hoa iā bat tùi góa kóng, Lí bōe-ōe kè chit ê Iok-tàn.

3耶和華你ê上帝beh chhōa你過去，beh滅無chiah-ê國tī你ê面前，你beh承接in。約書亞beh chhōa你過去，親像耶和華所bat講ê。Iâ-hô-hoa lí ê Siōng-tè beh chhōa lí kè-khì, beh bia̍t-bô chiah ê kok tī lí ê bīn-chêng, lí beh sêng-chiap in. Iok-su-a beh chhōa lí kè-khì, chhin-chhiūⁿ Iâ-hô-hoa só͘ bat kóng-ê.

4耶和華beh款待in，親像前日款待伊所滅A-mô͘-lī人兩個王，Se-hông kap Go̍k，以及in ê地一樣。Iâ-hô-hoa beh khoán-thāi in, chhin-chhiūⁿ chêng-ji̍t khoán-thāi I só͘ bia̍t A-mô͘-lī lâng nn̄g ê ông, Se-hông kap Go̍k, í-ki̍p in ê tōe chi̍t-iūⁿ.

5耶和華beh用in交tī lín ê面前；lín tio̍h照我所吩咐lín一切ê命令款待in。Iâ-hô-hoa beh ēng in kau tī lín ê bīn-chêng; lín tio̍h chiàu góa só͘ hoan-hù lín it-chhè ê bēng-lēng khoán-thāi in.

6Lín tio̍h勇敢壯膽，莫得驚in，也莫得忍in；因為耶和華你ê上帝kap你去，伊無離開你，也無放sak你。Lín tio̍h ióng-kám chòng-táⁿ, bo̍h-tit kiaⁿ in, iā bo̍h-tit lún in; in-ūi Iâ-hô-hoa lí ê Siōng-tè kap lí khì, I bô lī-khui lí, iā bô pàng-sak lí.

7摩西叫約書亞來，tī以色列眾人ê面前對伊講，你tio̍h勇敢壯膽，因為你beh kap chit-ê百姓去，入耶和華對in列祖chiù-chōa beh hō͘ in ê地，你也beh hō͘ in得tio̍h伊做業。Mô͘-se kiò Iok-su-a lâi, tī Í-sek-lia̍t chèng-lâng ê bīn-chêng tùi i kóng, Lí tio̍h ióng-kám chòng-táⁿ, in-ūi lí beh kap chit ê peh-sìⁿ khì, ji̍p Iâ-hô-hoa tùi in lia̍t-chó͘ chiù-chōa beh hō͘ in ê tōe, lí iā beh hō͘ in tit-tio̍h i chòe-gia̍p.

8耶和華beh行tī你ê面前；伊beh kap你tī-teh，伊無離開你，也無放sak你；莫得驚，也莫得忍。Iâ-hô-hoa beh kiâⁿ tī lí ê bīn-chêng; I beh kap lí tī-teh, I bô lī-khui lí, iā bô pàng-sak lí; bo̍h-tit kiaⁿ, iā bo̍h-tit lún.

9摩西寫chit-ê律法，交hō͘扛耶和華約櫃ê祭司，利未ê kiáⁿ孫，kap以色列ê眾長老。Mô͘-se siá chit ê lu̍t-hoat, kau-hō͘ kng Iâ-hô-hoa iok-kūi ê chè-si, Lī-bī ê kiáⁿ-sun, kap Í-sek-lia̍t ê chèng tiúⁿ-ló.

10摩西命令in講：每七年ê路尾，就是tī tháu放ê年定tio̍h ê期，搭寮節ê時，Mô͘-se bēng-lēng in kóng, Múi chhit-nî ê lō͘-bé, chiū-sī tī tháu-pàng ê nî tiāⁿ-tio̍h ê kî, tah-liâu-choeh ê sî,

11以色列眾人來到耶和華你上帝ê面前，tī伊所揀ê所在，hit時你tio̍h tī以色列眾人ê面前讀chit-ê律法hō͘ in聽。Í-sek-lia̍t chèng-lâng lâi-kàu Iâ-hô-hoa lí Siōng-tè ê bīn-chêng, tī I só͘ kéng ê só͘-chāi, hit-sî lí tio̍h tī Í-sek-lia̍t chèng-lâng ê bīn-chêng tha̍k chit ê lu̍t-hoat hō͘ in thiaⁿ.

12你tio̍h聚集百姓，ta-po͘，cha-bó͘，gín-ná，以及你城門內ê出外人，hō͘ in聽，hō͘ in學習，thang敬畏耶和華lín ê上帝，執守來行chit-ê律法一切ê話；Lí tio̍h chū-chi̍p peh-sìⁿ, ta-po͘, cha-bó͘, gín-ná, í-ki̍p lí siâⁿ-mn̂g-lāi ê chhut-gōa lâng, hō͘ in thiaⁿ, hō͘ in ha̍k-si̍p, thang kèng-ùi Iâ-hô-hoa lín ê Siōng-tè, chip-siú lâi kiâⁿ chit ê lu̍t-hoat it-chhè ê ōe;

13也hō͘ in m̄-知影ê kiáⁿ兒得tio̍h聽見；就tī lín過約旦所承接ê地，照lín tiàm tī-hia一切ê日thang學習敬畏耶和華lín ê上帝。iā hō͘ in m̄-chai-iáⁿ ê kiáⁿ-jî tit-tio̍h thiaⁿ-kìⁿ; chiū tī lín kè Iok-tàn só͘ sêng-chiap ê tōe, chiàu lín tiàm tī-hia it-chhè ê ji̍t thang ha̍k-si̍p kèng-ùi Iâ-hô-hoa lín ê Siōng-tè.

14耶和華對摩西講：看ah，你死ê期近lah；你召約書亞來，相kap khiā tī會幕中；我beh用職任命令伊，摩西就kap約書亞去相kap khiā tī會幕中。Iâ-hô-hoa tùi Mô͘-se kóng, Khòaⁿ ah, lí sí ê kî kūn lah; lí tiàu Iok-su-a lâi, saⁿ-kap khiā tī hōe-bō͘-tiong; Góa beh ēng chit-jīm bēng-lēng i, Mô͘-se chiū kap Iok-su-a khì saⁿ-kap khiā tī hōe-bō͘-tiong.

15耶和華tī會幕內，雲柱中，顯現；雲柱停tī會幕門ê頂面。Iâ-hô-hoa tī hōe-bō͘-lāi, hûn-thiāu tiong, hián-hiān; hûn-thiāu thêng tī hōe-bō͘-mn̂g ê téng-bīn.

16耶和華koh對摩西講：看ah，你beh kap你列祖相kap睏；chit-ê百姓beh起來，行邪淫來thàn伊所beh去tiàm hit所在外面ê上帝，離開我，背我kap伊所立ê約。Iâ-hô-hoa koh tùi Mô͘-se kóng, Khòaⁿ ah, lí beh kap lí lia̍t-chó͘ saⁿ-kap khùn; chit ê peh-sìⁿ beh khí-lâi, kiâⁿ siâ-îm lâi thàn i só͘ beh khì tiàm hit só͘-chāi gōa-bīn ê siōng-tè, lī-khui Góa, pōe Góa kap i só͘ li̍p ê iok.

17Hit時我beh對in發出受氣；我也beh離開in，掩面m̄看in；in beh受吞滅，tú-tio̍h chōe-chōe災厄患難；hit日in beh講：咱tú-tio̍h災厄患難，kiám-m̄是因為咱ê上帝無tī咱ê中間mah？Hit-sî Góa beh tùi in hoat-chhut siū-khì; Góa iā beh lī-khui in, ng-bīn m̄-khòaⁿ in; in beh siū thun-bia̍t, tú-tio̍h chōe-chōe chai-ē hoān-lān; hit-ji̍t in beh kóng, Lán tú-tio̍h chai-ē hoān-lān, kiám-m̄-sī in-ūi lán ê Siōng-tè bô tī lán ê tiong-kan mah?

18Hit日因為in偏ǹg別ê上帝所行一切ê pháiⁿ，所以我決斷掩我ê面。Hit-ji̍t in-ūi in phian-ǹg pa̍t ê siōng-tè só͘ kiâⁿ it-chhè ê pháiⁿ, só͘-í Góa koat-toàn ng Góa ê bīn.

19Taⁿ lín家己tio̍h寫chit-ê歌，用hit-ê教示以色列ê kiáⁿ孫，hō͘ in ê嘴念，hō͘ chit-ê歌kā我做干證tī以色列ê kiáⁿ孫。Taⁿ lín ka-kī tio̍h siá chit ê koa, ēng hit-ê kà-sī Í-sek-lia̍t ê kiáⁿ-sun, hō͘ in ê chhùi liām, hō͘ chit ê koa kā Góa chòe kan-chèng tī Í-sek-lia̍t ê kiáⁿ-sun.

20因為我chhōa in入我對in ê列祖所chiù-chōa hit-ê流奶kap蜜ê地；in得tio̍h食koh飽足，身體肥，就beh偏ǹg別ê上帝服事in，看輕我，背我ê約。In-ūi Góa chhōa in ji̍p Góa tùi in ê lia̍t-chó͘ só͘ chiù-chōa hit ê lâu lin kap bi̍t ê tōe; in tit-tio̍h chia̍h koh pá-chiok, sin-thé pûi, chiū beh phian-ǹg pa̍t ê siōng-tè ho̍k-sāi in, khòaⁿ-khin Góa, pōe Góa ê iok.

21到in tú-tio̍h chōe-chōe災厄患難ê時，chit-ê歌beh tī in ê面前做見證來干證in；因為in ê kiáⁿ孫ê嘴beh念，無bōe記得；因為現今我iáu未chhōa in到我所chiù-chōa ê地，in所存ê念頭，我已經知。Kàu in tú-tio̍h chōe-chōe chai-ē hoān-lān ê sî, chit ê koa beh tī in ê bīn-chêng chòe kiàn-chèng lâi kan-chèng in; in-ūi in ê kiáⁿ-sun ê chhùi beh liām, bô bōe-kì-tit; in-ūi hiān-kim Góa iáu-bē chhōa in kàu Góa só͘ chiù-chōa ê tōe, in só͘ chûn ê liām-thâu, Góa í-keng chai.

22當hit日摩西就寫chit-ê歌，將伊來教示以色列ê kiáⁿ孫。Tng hit-ji̍t Mô͘-se chiū siá chit ê koa, chiong i lâi kà-sī Í-sek-lia̍t ê kiáⁿ-sun.

23耶和華吩咐Lùn ê kiáⁿ約書亞講：你tio̍h勇敢壯膽，因為你beh chhōa以色列人入我所chiù-chōa hō͘ in ê地；我beh kap你相kap tī-teh。Iâ-hô-hoa hoan-hù Lùn ê kiáⁿ Iok-su-a kóng, Lí tio̍h ióng-kám chòng-táⁿ, in-ūi lí beh chhōa Í-sek-lia̍t lâng ji̍p Góa só͘ chiù-chōa hō͘ in ê tōe; Góa beh kap lí saⁿ-kap tī-teh.

24摩西用chit-ê律法ê話寫tī冊裡，一盡寫明白；Mô͘-se ēng chit ê lu̍t-hoat ê ōe siá tī chheh-ni̍h, it-chīn siá bêng-pe̍k;

25摩西就吩咐扛耶和華約櫃ê利未人，講：Mô͘-se chiū hoan-hù kng Iâ-hô-hoa iok-kūi ê Lī-bī lâng, kóng,

26將chit-ê律法ê冊hē tī耶和華lín上帝ê約櫃邊，thang tī-hia做你ê干證。Chiong chit ê lu̍t-hoat ê chheh hē tī Iâ-hô-hoa lín Siōng-tè ê iok-kūi piⁿ, thang tī-hia chòe lí ê kan-chèng.

27因為我知你是悖逆ê，是頷頸硬ê；看ah，我今á日iáu活kap lín tī-teh，lín尚且悖逆耶和華，何況我死了後ah？In-ūi góa chai lí sī pōe-ge̍k-ê, sī ām-kún ngī-ê; khòaⁿ ah, Góa kin-á-ji̍t iáu oa̍h kap lín tī-teh, lín siōng-chhiáⁿ pōe-ge̍k Iâ-hô-hoa, hô-hòng góa sí liáu-āu ah?

28Tio̍h聚集lín chiah-ê支派ê長老kap官長lóng來，我beh講chiah-ê話hō͘ in聽，也beh叫天叫地hō͘ in做干證。Tio̍h chū-chi̍p lín chiah ê chi-phài ê tiúⁿ-ló kap koaⁿ-tiúⁿ lóng lâi, góa beh kóng chiah ê ōe hō͘ in thiaⁿ, iā beh kiò-thiⁿ kiò-tōe hō͘ in chòe kan-chèng.

29因為我知我死了後，lín beh全然敗壞，歪chhoa̍h我所命令lín行ê道路；日後lín beh tú-tio̍h災厄，因為lín beh行耶和華所看做pháiⁿ ê事，用lín ê手所做惹伊ê受氣。In-ūi góa chai góa sí liáu-āu, lín beh choân-jiân pāi-hoāi, oai-chhoa̍h góa só͘ bēng-lēng lín kiâⁿ ê tō-lō͘; ji̍t-āu lín beh tú-tio̍h chai-ē, in-ūi lín beh kiâⁿ Iâ-hô-hoa só͘ khòaⁿ-chòe pháiⁿ ê sū, ēng lín ê chhiú só͘ chòe jiá I ê siū-khì.

30摩西將chit-ê歌ê話，頭到尾講hō͘以色列全會聽。Mô͘-se chiong chit ê koa ê ōe, thâu kàu bé kóng hō͘ Í-sek-lia̍t choân-hōe thiaⁿ.

1Chiah-ê天ah，tio̍h àⁿ耳孔，我beh講話；願地也tio̍h聽我ê嘴所講ê。Chiah ê thiⁿ ah, tio̍h àⁿ hī-khang, góa beh kóng-ōe; Goān tōe iā tio̍h thiaⁿ góa ê chhùi só͘ kóng ê.

2我ê教示beh親像雨降落，我ê話親像露水teh滴；親像mng-mng ê雨落tī幼幼 ê草，親像大雨落tī菜蔬。Góa ê kà-sī beh chhin-chhiūⁿ hō͘ kàng-lo̍h, Góa ê ōe chhin-chhiūⁿ lō͘-chúi teh tih; Chhin-chhiūⁿ mng-mng ê hō͘ lo̍h tī iù-iù ê chháu, Chhin-chhiūⁿ tōa-hō͘ lo̍h tī chhài-soe.

3因為我beh宣傳耶和華ê名；Lín tio̍h尊咱ê上帝做大。In-ūi góa beh soan-thoân Iâ-hô-hoa ê miâ; Lín tio̍h chun lán ê Siōng-tè chòe tōa.

4做石磐ê，伊所做ê是完全，伊ê路lóng是公平；是真實ê上帝，lóng無不義；伊是公義，koh正直。Chòe Chio̍h-pôaⁿ-ê, I só͘-chòe-ê sī oân-choân, I ê lō͘ lóng sī kong-pêng; Sī chin-si̍t ê Siōng-tè, lóng bô put-gī; I sī kong-gī, koh chèng-ti̍t.

5Chit-ê乖癖彎曲ê世代家己敗壞；m̄是伊ê kiáⁿ，是in ê弊病。Chit ê koai-phiah oan-khiau ê sè-tāi ka-kī pāi-hoāi; M̄-sī I ê kiáⁿ, sī in ê pē-pēng.

6愚戇無知ê百姓ah，Lín án-ni報答耶和華mah？伊kiám-m̄是你ê老父，買你ê mah？伊有創造你，建立你。Gû-gōng bû-ti ê peh-sìⁿ ah, Lín án-ni pò-tap Iâ-hô-hoa mah? I kiám-m̄-sī lí ê lāu-pē, bóe-lí-ê mah? I ū chhòng-chō lí, kiàn-li̍p lí.

7Tio̍h記得古早ê日，siàu念歷代ê年；問你ê老父，伊beh指示你，問你ê老大，in beh kā你講。Tio̍h kì-tit kó͘-chá ê ji̍t, Siàu-liām le̍k-tāi ê nî; Mn̄g lí ê lāu-pē, i beh chí-sī lí, Mn̄g lí ê lāu-tōa, in beh kā lí kóng.

8至koânê分業hō͘列邦。分開世間人ê時，就定tio̍h百姓ê界限，照以色列人ê數額。Chì-koâiⁿ-ê pun-gia̍p hō͘ lia̍t-pang. Pun-khui sè-kan lâng ê sî, Chiū tiāⁿ-tio̍h peh-sìⁿ ê kài-hān, Chiàu Í-sek-lia̍t lâng ê siàu-gia̍h.

9耶和華ê份額是伊ê百姓；伊所得tio̍h ê產業是雅各。Iâ-hô-hoa ê hūn-gia̍h sī I ê peh-sìⁿ; I só͘ tit-tio̍h ê sán-gia̍p sī Ngá-kok.

10伊tú-tio̍h伊tī拋荒ê地，tī荒廢野獸哮ê曠野，伊圍se̍h伊，看顧伊，保護伊親像目睭仁。I tú-tio̍h i tī pha-hng ê tōe, Tī hong-hòe iá-siù háu ê khòng-iá, I ûi-se̍h i, khòaⁿ-kò͘ i, Pó-hō͘ i chhin-chhiūⁿ ba̍k-chiu-jîn.

11Koh親像鷹鳥lā伊ê siū，tī鷹á ê頂面ia̍t伊ê翼，thí開翼股來承(sîn)伊，載伊tī伊ê翼股。Koh chhin-chhiūⁿ eng-chiáu lā i ê siū, Tī eng-á ê téng-bīn ia̍t i ê si̍t, Thí-khui si̍t-kó͘ lâi sîn i, Chài i tī i ê si̍t-kó͘.

12只有耶和華chhōa伊，無別ê上帝kap伊tī-teh。Chí-ū Iâ-hô-hoa chhōa i, Bô pa̍t ê siōng-tè kap i tī-teh.

13就hō͘伊khiā tī地上高ê所在，得tio̍h食田裡ê土產；Koh hō͘伊tùi石磐suh蜜，Tùi 火石suh油；Chiū hō͘ i khia tī tōe-chiūⁿ koâiⁿ ê só͘-chāi, Tit-tio̍h chia̍h chhân-ni̍h ê thó͘-sán; Koh hō͘ i tùi chio̍h-pôaⁿ suh-bi̍t, Tùi hé-chio̍h suh-iû;

14也食牛奶油，kap羊奶，肥ê羊á-kiáⁿ，Pa-san所出ê綿羊káng kap山羊，Kap siōng好ê小麥；也lim葡萄汁ê酒。Iā chia̍h gû-lin-iû, kap iûⁿ-lin, Pûi ê iûⁿ-á-kiáⁿ, Pa-san só͘ chhut ê mî-iûⁿ-káng kap soaⁿ-iûⁿ, Kap siōng-hó ê sió-be̍h; Iā lim phû-tô-chiap ê chiú.

15Iâ-su-lûn肥就鴨霸，你已經肥，koh大粒，肉真phauh；伊就離開創造伊ê上帝，看輕救伊ê石磐。Iâ-su-lûn pûi chiū à-pà, Lí í-keng pûi, koh tōa-lia̍p, bah chin-phauh; I chiū lī-khui chhòng-chō i ê Siōng-tè, Khòaⁿ-khin kiù i ê Chio̍h-pôaⁿ.

16In用別ê上帝激伊妒忌，用可惡ê，惹伊ê受氣。In ēng pa̍t ê siōng-tè kek I tò͘-khī, Ēng khó-ò͘ⁿ-ê, jiá I ê siū-khì.

17In祭獻邪鬼，m̄是真ê上帝，就是in平素所m̄-bat ê上帝，是新ê，近來chiah有ê，是你ê列祖所無驚畏ê。In chè-hiàn siâ-kúi, m̄-sī chin ê Siōng-tè, Chiū-sī in pêng-sò͘ só͘ m̄-bat ê siōng-tè, Sī sin-ê, kūn-lâi chiah ū-ê, Sī lí ê lia̍t-chó͘ só͘ bô kiaⁿ-ùi ê.

18生你ê石磐，你無siàu念伊，生你ê上帝，你bōe記得伊。Siⁿ lí ê Chio̍h-pôaⁿ, lí bô siàu-liām I, Siⁿ lí ê Siōng-tè, lí bōe-kì-tit I.

19耶和華看見，就怨恨，因為伊ê kiáⁿ cha-bó͘-kiáⁿ激伊ê緣故。Iâ-hô-hoa khòaⁿ-kìⁿ, chiū oàn-hūn, In-ūi I ê kiáⁿ cha-bó͘-kiáⁿ kek I ê iân-kò͘.

20就講：我beh對in掩我ê面，看in結局怎樣；in是乖癖ê族類，無信實ê kiáⁿ兒。Chiū kóng, Góa beh tùi in ng Góa ê bīn, Khòaⁿ in kiat-kio̍k cháiⁿ-iūⁿ; In sī koai-phiah ê cho̍k-lūi, Bô sìn-si̍t ê kiáⁿ-jî.

21In用hit-ê m̄是上帝ê，激我ê妒忌，用in ê虛假ê物，惹我ê受氣；我就用m̄是做百姓ê，激in ê妒忌；用愚戇ê國民，惹in ê受氣。In ēng hit-ê m̄-sī Siōng-tè ê, kek Góa ê tò͘-khī, Ēng in ê hu-ké ê mi̍h, jiá Góa ê siū-khì; Góa chiū ēng m̄-sī chòe peh-sìⁿ ê, kek in ê tò͘-khī; Ēng gû-gōng ê kok-bîn, jiá in ê siū-khì.

22因為tī我ê受氣中有火to̍h起來，燒到陰間極深ê所在，也燒地kap地ê出產，也起火燒chiah-ê山ê地基。In-ūi tī Góa ê siū-khì-tiong ū hé to̍h-khí-lâi, Sio kàu im-kan ke̍k-chhim ê só͘-chāi, Iā sio tōe kap tōe ê chhut-sán, Iā khí-hé sio chiah ê soaⁿ ê tōe-ki.

23我beh積聚災厄tī in ê頂面，用我lóng總ê 箭來射in。Góa beh chek-chū chai-ē tī in ê téng-bīn, Ēng Góa lóng-chóng ê chìⁿ lâi siā in.

24In beh因為iau餓來消瘦，受炎熱kap毒症吞滅；我beh hō͘ in tú-tio̍h野獸ê嘴齒，kap蛇ê毒。In beh in-ūi iau-gō lâi siau-sán, Siū iām-jia̍t kap to̍k-chèng thun-bia̍t; Góa beh hō͘ in tú-tio̍h iá-siù ê chhùi-khí, Kap chôa ê to̍k.

25外面有刀劍，內面有驚惶，hō͘人死無，hō͘少年ê ta-po͘人，kap在室女，食奶ê，kap白頭毛ê人，lóng滅無，Gōa-bīn ū to-kiàm, Lāi-bīn ū kiaⁿ-hiâⁿ, hō͘ lâng sí-bô, Hō͘ siàu-liân ê ta-po͘-lâng, kap chāi-sek-lú, Chia̍h-lin-ê, kap pe̍h thâu-mn̂g ê lâng, lóng bia̍t-bô,

26我講：我beh hō͘ in四散tī遠遠，tī人ê中間除in ê名字；Góa kóng, Góa beh hō͘ in sì-sòaⁿ tī hn̄g-hn̄g, Tī lâng ê tiong-kan tû in ê miâ-jī;

27總是我驚對敵激我，驚了in ê對敵誤會，驚了in beh講：是阮ê手kia̍h高，m̄是耶和華行chiah-ê事。Chóng-sī Góa kiaⁿ tùi-te̍k kek Góa, Kiaⁿ-liáu in ê tùi-te̍k gō͘-hōe, Kiaⁿ-liáu in beh kóng, Sī goán ê chhiú kia̍h-koâiⁿ, M̄-sī Iâ-hô-hoa kiâⁿ chiah ê sū.

28因為in是bōe曉得想ê百姓，tī心內無聰明。In-ūi in sī bōe hiáu-tit siūⁿ ê peh-sìⁿ, Tī sim-lāi bô chhang-miâ.

29願in有智慧，能明白chit-ê，能想in ê結局。Goān in ū tì-hūi, ōe bêng-pe̍k chit-ê, Ōe siūⁿ in ê kiat-kio̍k.

30若m̄是in ê石磐賣in，若m̄是耶和華將in交hō͘人，怎樣對敵一個能趕in一千？兩個能hō͘ in一萬逃走ah？Nā m̄-sī in ê Chio̍h-pôaⁿ bōe in, Nā m̄-sī Iâ-hô-hoa chiong in kau hō͘ lâng, Cháiⁿ-iūⁿ tùi-te̍k chi̍t-ê ōe kóaⁿ in chi̍t-chheng? Nn̄g-ê ōe hō͘ in chi̍t-bān tô-cháu ah?

31In ê石磐無親像咱ê石磐，連咱ê對敵也án-ni評判。In ê chio̍h-pôaⁿ bô chhin-chhiūⁿ lán ê Chio̍h-pôaⁿ, Liân lán ê tùi-te̍k iā án-ni phêng-phòaⁿ.

32In ê葡萄樹是tùi所多瑪ê葡萄樹傳ê，也tùi蛾摩拉ê園出ê，in ê葡萄是毒ê葡萄，kui葩lóng是苦ê；In ê phû-tô-chhiū sī tùi Só͘-to-má ê phû-tô-chhiū thoân-ê, Iā tùi Gô-mô͘-la̍h ê hn̂g chhut-ê, In ê phû-tô sī to̍k ê phû-tô, Kui-pha lóng sī khó͘-ê;

33In ê酒是龍ê毒，是惡蛇殘害ê毒。In ê chiú sī lêng ê to̍k, Sī ok-chôa chân-hāi ê to̍k.

34這kiám-m̄是積聚tī我chia，封密tī我寶貝ê庫房mah？Che kiám-m̄-sī chek-chū tī Góa chia, Hong-ba̍t tī Góa pó-pòe ê khò͘-pâng mah?

35伸冤報應在tī我，tī in ê 腳踏顛ê時；因為in tú-tio̍h災厄ê日近lah，所beh tú-tio̍h ê事會緊緊到。Sin-oan pò-èng chāi-tī Góa, Tī in ê kha ta̍h-tian ê sî; In-ūi in tú-tio̍h chai-ē ê ji̍t kūn lah, Só͘ beh tú-tio̍h ê sū ōe kín-kín kàu.

36耶和華看見伊ê百姓氣力已經無去，hiah-ê拘束ê，自由ê，lóng無留一個，就beh替in伸冤，因為伊ê奴僕來退悔。Iâ-hô-hoa khòaⁿ-kìⁿ I ê peh-sìⁿ khùi-la̍t í-keng bô-khì, Hiah-ê khu-sok-ê, chū-iû-ê, lóng bô lâu chi̍t-ê, Chiū beh thòe in sin-oan, In-ūi I ê lô͘-po̍k lâi thè-hóe.

37伊beh講：In ê上帝，in所óa靠ê石磐；I beh kóng, In ê siōng-tè, In só͘ óa-khò ê chio̍h-pôaⁿ;

38就是食in祭祀ê油，lim in灌奠ê酒ê，taⁿ tī toh落？Thang hō͘ in起來幫贊lín，保護lín。Chiū-sī chia̍h in chè-sū ê iû, Lim in koàn-tiān ê chiú ê, taⁿ tī toh-lo̍h? Thang hō͘ in khí-lâi pang-chān lín, Pó-hō͘ lín.

39Lín taⁿ tio̍h看，我，我就是伊，我以外無有上帝；我hō͘人死，我hō͘人活，我損傷伊，我醫治伊；無一個能tùi我ê手救出。Lín taⁿ tio̍h khòaⁿ, Góa , Góa chiū-sī I, Góa í-gōa bô ū Siōng-tè; Góa hō͘ lâng sí, Góa hō͘ lâng oa̍h, Góa sún-siong-i, Góa i-tī-i; Bô chi̍t-ê ōe tùi Góa ê chhiú kiù-chhut.

40我kia̍h起手ǹg天講：我kí我ê永活來講；Góa kia̍h-khí chhiú ǹg thiⁿ kóng, Góa kí Góa ê éng-oa̍h lâi kóng;

41我若磨我光nà-nà ê刀，我若執行審判，就beh刑罰我ê對敵，報應怨恨我ê人。Góa nā bôa Góa kng-nà-nà ê to, Góa nā chip-hêng sím-phòaⁿ, Chiū beh hêng-hoa̍t Góa ê tùi-te̍k, Pò-èng oàn-hūn Góa ê lâng.

42我beh hō͘我ê 箭lim血到醉，我ê刀beh食肉，就是受thâi受掠ê人ê血，對敵首領ê頭ê肉。Góa beh hō͘ Góa ê chìⁿ lim huih kàu chùi, Góa ê to beh chia̍h bah, Chiū-sī siū-thâi siū-lia̍h ê lâng ê huih, Tùi-te̍k siú-léng ê thâu ê bah.

43列國ah，lóng tio̍h kap伊ê百姓相kap歡喜；因為伊beh為伊ê奴僕ê血伸冤，報應伊ê對敵，beh贖伊ê地kap伊ê百姓ê罪。Lia̍t-kok ah, lóng tio̍h kap I ê peh-sìⁿ saⁿ-kap hoaⁿ-hí; In-ūi I beh ūi I ê lô͘-po̍k ê huih sin-oan, Pò-èng I ê tùi-te̍k, Beh sio̍k I ê tōe kap I ê peh-sìⁿ ê chōe.

44摩西來，用chit-ê歌一切ê話念hō͘百姓聽；Lùn ê kiáⁿ約書亞也kap伊tī-teh。Mô͘-se lâi, ēng chit ê koa it-chhè ê ōe liām hō͘ peh-sìⁿ thiaⁿ; Lùn ê kiáⁿ Iok-su-a iā kap i tī-teh.

45摩西對以色列ê眾人講chiah-ê一切ê話明白，就kā in講：Mô͘-se tùi Í-sek-lia̍t ê chèng-lâng kóng chiah ê it-chhè ê ōe bêng-pe̍k, chiū kā in kóng,

46我今á日所對lín干證一切ê話，lín tio̍h khǹg tī心裡；也tio̍h吩咐lín ê kiáⁿ孫執守來行chit-ê律法一切ê話；Góa kin-á-ji̍t só͘ tùi lín kan-chèng it-chhè ê ōe, lín tio̍h khǹg tī sim-ni̍h; iā tio̍h hoan-hù lín ê kiáⁿ-sun chip-siú lâi kiâⁿ chit ê lu̍t-hoat it-chhè ê ōe;

47因為這對tī lín m̄是空空ê事；是lín ê活命，也beh因為chit-ê事lín ê日子得tio̍h久長，tī lín過約旦beh入去承接ê地。in-ūi che tùi-tī lín m̄-sī khang-khang ê sū; sī lín ê oa̍h-miā, iā beh in-ūi chit ê sū lín ê ji̍t-chí tit-tio̍h kú-tn̂g, tī lín kè Iok-tàn beh ji̍p-khì sêng-chiap ê tōe.

48當日，耶和華吩咐摩西講：Tng ji̍t Iâ-hô-hoa hoan-hù Mô͘-se kóng,

49你上去A-pa-lîm山，Nî-pho ê山頭，kap耶利哥對面ê Mô͘-ap地，看我賞賜以色列人做業ê迦南地；Lí chiūⁿ-khì A-pa-lîm soaⁿ, Nî-pho ê soaⁿ-thâu, kap Iâ-lī-ko tùi-bīn ê Mô͘-ap tōe, khòaⁿ Góa siúⁿ-sù Í-sek-lia̍t lâng chòe-gia̍p ê Ka-lâm tōe;

50你beh死tī你所上去ê山，來tò祖，親像你ê hiaⁿ亞倫死tī Hô-jíⁿ山，來tò祖一樣；lí beh sí tī lí só͘ chiūⁿ-khì ê soaⁿ, lâi tò-chó͘, chhin-chhiūⁿ lí ê hiaⁿ A-lûn sí tī Hô-jíⁿ soaⁿ, lâi tò-chó͘ chi̍t-iūⁿ;

51因為lín tī Sîm ê曠野，Ka-te-su ê Bí-lī-pa ê水，tī以色列人中得罪我，因為tī以色列人中無尊我做聖。in-ūi lín tī Sîm ê khòng-iá, Ka-te-su ê Bí-lī-pa ê chúi, tī Í-sek-lia̍t lâng tiong tek-chōe Góa, in-ūi tī Í-sek-lia̍t lâng tiong bô chun Góa chòe sèng.

52你thang對面看hit-ê地，總是bōe得thang入去到我所賞賜以色列人ê地。Lí thang tùi-bīn khòaⁿ hit ê tōe, chóng-sī bōe-tit-thang ji̍p-khì kàu Góa só͘ siúⁿ-sù Í-sek-lia̍t lâng ê tōe.

1上帝ê奴僕摩西，tī伊iáu未死ê事先，kā以色列人祝福；所祝福ê話記tī下底。Siōng-tè ê lô͘-po̍k Mô͘-se, tī i iáu-bē sí ê tāi-seng, kā Í-sek-lia̍t lâng chiok-hok; só͘ chiok-hok ê ōe kì tī ē-tóe.

2伊講： 耶和華tùi西奈來，為tio̍h in tùi Se-jíⁿ起來；tùi Pa-lân ê山照出光，tùi萬萬聖ê hia來；tùi伊ê chiàⁿ手為tio̍h in發出烈火ê律法。I kóng, Iâ-hô-hoa tùi Se-nái lâi, Ūi-tio̍h in tùi Se-jíⁿ khí-lâi; Tùi Pa-lân ê soaⁿ chiò-chhut kng, Tùi bān-bān sèng-ê hia lâi; Tùi I ê chiàⁿ-chhiú ūi-tio̍h in hoat-chhut lia̍t-hé ê lu̍t-hoat.

3伊不止疼痛hiah-ê百姓，伊hiah-ê聖ê lóng tī你ê手；in坐tī你ê腳下，聽受你hiah-ê話。I put-chí thiàⁿ-thàng hiah ê peh-sìⁿ, I hiah ê sèng-ê lóng tī Lí ê chhiú; In chē tī Lí ê kha-ē, Thiaⁿ-siū Lí hiah ê ōe.

4摩西用律法傳hō͘咱，做雅各會眾ê產業。Mô͘-se ēng lu̍t-hoat thoân hō͘ lán, Chòe Ngá-kok hōe-chiòng ê sán-gia̍p.

5百姓ê首領，以色列ê眾支派相kap聚會ê時，伊tī Iâ-su-lûn做王。Peh-sìⁿ ê siú-léng, Í-sek-lia̍t ê chèng chi-phài saⁿ-kap chū-hōe ê sî, I tī Iâ-su-lûn chòe-ông.

6願Liû-piān活teh無死，願伊ê人額無少。Goān Liû-piān oa̍h-teh bô sí, Goān i ê lâng-gia̍h bô chió.

7伊kā猶大祝福，án-ni講：求耶和華聽猶大ê聲，chhōa伊到伊ê百姓hia；伊bat用伊ê手為家己交戰；你beh幫贊伊抵擋伊ê對敵。I kā Iû-tāi chiok-hok, án-ni kóng, Kiû Iâ-hô-hoa thiaⁿ Iû-tāi ê siaⁿ, Chhōa i kàu i ê peh-sìⁿ hia; I bat ēng i ê chhiú ūi ka-kī kau-chiàn; Lí beh pang-chān i tí-tng i ê tùi-te̍k.

8論利未講：你ê Thó͘-bêng kap你ê O͘-lêng，kap你聖潔ê人相kap tī-teh；你tī Má-sat bat試伊，tī Bí-lī-pa ê水bat kap伊相爭。Lūn Lī-bī kóng, Lí ê Thó͘-bêng kap Lí ê O͘-lêng, kap Lí sèng-kiat ê lâng saⁿ-kap tī-teh; Lí tī Má-sat bat chhì i, Tī Bí-lī-pa ê chúi bat kap i saⁿ-chiⁿ.

9伊論到伊ê老父，伊ê老母，就講：我m̄-bat看見伊；也無承認伊ê兄弟；也無承認伊ê kiáⁿ兒；因為in行你ê話，守你ê約。I lūn-kàu i ê lāu-pē, i ê lāu-bú, chiū kóng, Góa m̄-bat khòaⁿ-kìⁿ i; Iā bô sêng-jīn i ê hiaⁿ-tī; Iā bô sêng-jīn i ê kiáⁿ-jî; In-ūi in kiâⁿ Lí ê ōe, Siú Lí ê iok.

10In beh用你ê法度教示雅各，用你ê律法教示以色列；in beh用香hē tī你ê面前，kap ka-nn̂g隻ê燒祭tī你ê壇頂。In beh ēng Lí ê hoat-tō͘ kà-sī Ngá-kok, Ēng Lí ê lu̍t-hoat kà-sī Í-sek-lia̍t; In beh ēng hiuⁿ hē tī Lí ê bīn-chêng, Kap ka-nn̂g-chiah ê sio-chè tī Lí ê tôaⁿ-téng.

11願耶和華賜福伊ê產業，接納伊ê手所做ê工；hiah-ê起來攻擊伊kap怨恨伊ê人，願你phah折in ê腰，hō͘ in bōe koh起來，Goān Iâ-hô-hoa sù-hok i ê sán-gia̍p, Chiap-la̍p i ê chhiú só͘ chòe ê kang; Hiah ê khí-lâi kong-kek i kap oàn-hūn i ê lâng, Goān Lí phah-chi̍h in ê io, hō͘ in bōe koh khí-lâi,

12論便雅憫就講：耶和華所疼ê beh kap伊安然khiā起；耶和華thong日保護伊，伊也beh tiàm tī伊ê肩頭中。Lūn Piān-ngá-bín chiū kóng, Iâ-hô-hoa só͘ thiàⁿ ê beh kap I an-jiân khiā-khí; Iâ-hô-hoa thong-ji̍t pó-hō͘ i, I iā beh tiàm tī i ê keng-thâu-tiong.

13論約瑟就講：願伊ê地得tio̍h耶和華賜福，得tio̍h天頂ê寶物，kap露水，以及地下所khǹg ê水源；Lūn Iok-sek chiū kóng, Goān i ê tōe tit-tio̍h Iâ-hô-hoa sù-hok, Tit-tio̍h thiⁿ-téng ê pó-mi̍h, kap lō͘-chúi, Í-ki̍p tōe-ē só͘ khǹg ê chúi-goân;

14得tio̍h日頭所生ê寶物，月所出ê寶物；Tit-tio̍h ji̍t-thâu só͘ siⁿ ê pó-mi̍h, Ge̍h só͘ chhut ê pó-mi̍h;

15得tio̍h古早ê山ê至寶，kap永世代ê山嶺ê寶物；Tit-tio̍h kó͘-chá ê soaⁿ ê chì-pó, Kap éng sè-tāi ê soaⁿ-niá ê pó-mi̍h;

16得tio̍h地ê寶物kap其中所充滿ê，以及tiàm tī刺phè內ê ê恩惠；願hiah-ê lóng歸tī約瑟ê頭殼，歸tī hit-ê kap伊ê兄弟分開ê ê頭殼頂。Tit-tio̍h tōe ê pó-mi̍h kap kî-tiong só͘ chhiong-móa-ê, Í-ki̍p tiàm tī chhì-phè-lāi-ê ê un-hūi; Goān hiah ê lóng kui tī Iok-sek ê thâu-khak, Kui tī hit-ê kap i ê hiaⁿ-tī pun-khui-ê ê thâu-khak-téng.

17親像牛ê頭chiūⁿ生ê，榮光屬tī伊，伊ê角是野牛ê角；用in來tak萬百姓到tī地極；這是Í-hoat-liân ê萬萬，Má-ná-se ê千千。Chhin-chhiūⁿ gû ê thâu-chiūⁿ-siⁿ-ê, êng-kng sio̍k tī i, I ê kak sī iá-gû ê kak; Ēng in lâi tak bān peh-sìⁿ kàu tī tōe-ke̍k; Che sī Í-hoat-liân ê bān-bān, Má-ná-se ê chheng-chheng.

18論Se-pò͘-lûn就講：Se-pò͘-lûn ah，你出外thang歡喜；以撒迦ah，tī你ê布棚內thang快樂。Lūn Se-pò͘-lûn chiū kóng, Se-pò͘-lûn ah, lí chhut-gōa thang hoaⁿ-hí; Í-sat-ka ah, tī lí ê pò͘-pîⁿ-lāi thang khoài-lo̍k.

19In beh召chiah-ê百姓到山裡，tī-hia beh獻公義ê祭；因為in beh吸收海裡ê豐盛，kap 沙裡所khǹg ê寶貝。In beh tiàu chiah ê peh-sìⁿ kàu soaⁿ-ni̍h, Tī-hia beh hiàn kong-gī ê chè; In-ūi in beh khip-siu hái-ni̍h ê hong-sēng, Kap soa-ni̍h só͘-khǹg ê pó-pòe.

20論Ka-tek就講：開闊Ka-tek-ê得tio̍h o-ló；i bih-teh親像母ê獅，伊拆裂手骨kap頭殼。Lūn Ka-tek chiū kóng, Khui-khoah Ka-tek-ê tit-tio̍h o-ló; I bih-teh chhin-chhiūⁿ bú ê sai, I thiah-li̍h chhiú-kut kap thâu-khak.

21伊為家己備辦事先得tio̍h ê業，因為tī-hia有設律法ê ê份額留teh；伊kap百姓ê首領相kap來，行耶和華ê公義，kap以色列相kap行伊ê判斷。I ūi ka-kī pī-pān tāi-seng tit-tio̍h ê gia̍p, In-ūi tī-hia ū siat lu̍t-hoat-ê ê hūn-gia̍h lâu-teh; I kap peh-sìⁿ ê siú-léng saⁿ-kap lâi, Kiâⁿ Iâ-hô-hoa ê kong-gī, Kap Í-sek-lia̍t saⁿ-kap kiâⁿ I ê phòaⁿ-toàn.

22論Tàn就講：Tàn是細隻獅，tùi Pa-san跳出。Lūn Tàn chiū kóng, Tàn sī sòe chiah sai, Tùi Pa-san thiàu-chhut.

23論Ná-hut-tha-lī就講：Ná-hut-tha-lī ah，得tio̍h恩惠充足；也得tio̍h耶和華ê賜福滿滿ê，Beh得tio̍h西勢kap南勢做業。Lūn Ná-hut-tha-lī chiū kóng, Ná-hut-tha-lī ah, tit-tio̍h un-hūi chhiong-chiok; Iā tit-tio̍h Iâ-hô-hoa ê sù-hok móa-móa ê, Beh tit-tio̍h sai-sì kap lâm-sì chòe gia̍p.

24論A-siat就講：願A-siat因為kiáⁿ chōe來得tio̍h福氣，得tio̍h in ê兄弟ê歡喜；thang用伊ê腳ùn tī油裡。Lūn A-siat chiū kóng, Goān A-siat in-ūi kiáⁿ chōe lâi tit-tio̍h hok-khì, Tit-tio̍h in ê hiaⁿ-tī ê hoaⁿ-hí; Thang ēng i ê kha ùn tī iû-ni̍h.

25你ê門栱是鐵ê，銅ê；你ê日子怎樣，你ê氣力也beh án-ni。Lí ê mn̂g-kông sī thih-ê, tâng-ê; Lí ê ji̍t-chí cháiⁿ-iūⁿ, lí ê khùi-la̍t iā beh án-ni.

26Iâ-su-lûn ah，無有親像上帝ê，伊坐天來幫贊你，也坐穹蒼，顯明伊ê榮光。Iâ-su-lûn ah, bô ū chhin-chhiūⁿ Siōng-tè ê, I chē-thiⁿ lâi pang-chān lí, Iā chē kiong-chhong, hián-bêng I ê êng-kng.

27永活ê上帝做你khiā起ê所在，永遠ê手tī你ê下面；伊tī你ê面前趕對敵，koh講：毀滅伊。Éng-oa̍h ê Siōng-tè chòe lí khiā-khí ê só͘-chāi, Éng-oán ê chhiú tī lí ê ē-bīn; I tī lí ê bīn-chêng kóaⁿ tùi-te̍k, Koh kóng, Húi-bia̍t i.

28以色列安然khiā起，雅各ê後裔家己tòa tī五穀kap酒ê地；伊ê天也滴落露水。Í-sek-lia̍t an-jiân khiā-khí, Ngá-kok ê hō͘-è ka-kī tòa tī ngó͘-kok kap chiú ê tōe; I ê thiⁿ iā tih-lo̍h lō͘-chúi.

29以色列ah，你有福氣；是誰親像你chit-ê hō͘耶和華所拯救ê百姓ah？伊是你ê藤牌保護你，是你榮耀ê刀劍；你ê對敵beh投降你；你beh踏tī in高ê所在。Í-sek-lia̍t ah, lí ū hok-khì; Chī-chūi chhin-chhiūⁿ lí chit-ê hō͘ Iâ-hô-hoa só͘ chín-kiù ê peh-sìⁿ ah? I sī lí ê tîn-pâi pó-hō͘ lí, Sī lí êng-iāu ê to-kiàm; Lí ê tùi-te̍k beh tâu-hâng lí; Lí beh ta̍h tī in koâiⁿ ê só͘-chāi.