1我心內講，來ah，我用歡喜試你，你thang享受安樂；看ah，這也是空虛。Góa sim-lāi kóng, Lâi ah, góa ēng hoaⁿ-hí chhì lí, lí thang hióng-siū an-lo̍k; khòaⁿ ah, che iā sī khang-hu.

2論好笑我就講，這是顛狂；論歡喜就講，這beh啥事？Lūn hó-chhiò góa chiū kóng, Che sī tian-kông; lūn hoaⁿ-hí chiū kóng, Che beh siáⁿ-sū?

3我ê心講究tio̍h怎樣用酒hō͘我ê肉體khòaⁿ活；總是我ê心猶原tio̍h hō͘智慧引chhōa，也tio̍h怎樣擒tiâu愚戇，thèng候我看明，世間人tī天下一生tio̍h行甚麼事是好。Góa ê sim káng-kiù tio̍h cháiⁿ-iūⁿ ēng chiú hō͘ góa ê jio̍k-thé khòaⁿ-oa̍h; chóng-sī góa ê sim iû-goân tio̍h hō͘ tì-hūi ín-chhōa, iā tio̍h cháiⁿ-iūⁿ khîⁿ-tiâu gû-gōng, thèng-hāu góa khòaⁿ-bêng, sè-kan lâng tī thiⁿ-ē it-seng tio̍h kiâⁿ sím-mi̍h sū sī hó.

4我為tio̍h家己興起大ê工程，為家己起厝，為家己栽葡萄園，Góa ūi-tio̍h ka-kī heng-khí tōa ê kang-tiâⁿ, ūi ka-kī khí chhù, ūi ka-kī chai phû-tô-hn̂g,

5為家己修造花園，果子園，tī hit內面栽種ta̍k號ê果子樹；ūi ka-kī siu-chō hoe-hn̂g, ké-chí-hn̂g, tī hí(hit） lāi-bīn chai-chèng ta̍k-hō ê ké-chí chhiū;

6為家己開水池，來灌ak培養發生樹ê樹林。ūi ka-kī khui chúi-tî, lâi koàn-ak pôe-iúⁿ hoat-siⁿ chhiū ê chhiū-nâ.

7我也買奴僕女婢，亦有出世tī我家內ê，亦有chōe-chōe牛群，羊群，贏過我以前tī耶路撒冷hiah-ê人所有ê。Góa iā bóe lô͘-po̍k lú-pī, ia̍h ū chhut-sì tī góa ke-lāi ê, ia̍h ū chōe-chōe gû-kûn, iûⁿ-kûn, iâⁿ-kè góa í-chêng tī Iâ-lō͘-sat-léng hiah ê lâng só͘ ū ê.

8我koh為家己積聚金銀，kap列王以及ta̍k省ê財寶；koh得tio̍h唱歌ê男女，kap世間人所歡喜ê物，chōe-chōe 宮妃。Góa koh ūi ka-kī chek-chū kim gûn, kap lia̍t-ông í-ki̍p ta̍k-séng ê châi-pó; koh tit-tio̍h chhiùⁿ-koa ê lâm-lú, kap sè-kan lâng só͘ hoaⁿ-hí ê mi̍h, chōe-chōe kiong-hui.

9Án-ni我就做大，贏過我以前lóng總tī耶路撒冷ê人，我ê智慧猶原kap我tī-teh。Án-ni góa chiū chòe tōa, iâⁿ-kè góa í-chêng lóng-chóng tī Iâ-lō͘-sat-léng ê lâng, góa ê tì-hūi iû-goân kap góa tī-teh.

10我ê目睭所ài-ê，我無阻擋伊；我ê心所歡喜ê，我無禁止伊；因為我ê心為tio̍h我所tio̍h磨ê來快樂；這就是我tùi一切所tio̍h磨來得tio̍h ê份額。Góa ê ba̍k-chiu só͘ ài--ê, góa bô chó͘-tòng i; góa ê sim só͘ hoaⁿ-hí--ê, góa bô kìm-chí i; in-ūi góa ê sim ūi-tio̍h góa só͘ tio̍h-bôa--ê lâi khoài-lo̍k; che chiū-sī góa tùi it-chhè só͘ tio̍h-bôa lâi tit-tio̍h ê hūn-gia̍h.

11我看我ê手所做一切ê工，以及我所tio̍h磨ê勞碌；看ah，這lóng是空虛，lóng是掠風，tī日光ê下面lóng無利益。Góa khòaⁿ góa ê chhiú só͘ chòe it-chhè ê kang, í-ki̍p góa só͘ tio̍h-bôa ê lô-lo̍k; khòaⁿ ah, che lóng sī khang-hu, lóng sī lia̍h-hong, tī ji̍t-kng ê ē-bīn lóng bô lī-ek.

12我家己oa̍t-tńg來看智慧、顛狂，kap愚戇；tī君王後輩ê人，iáu會做甚麼ah？就是前所做ê nā-tiāⁿ。Góa ka-kī oa̍t-tńg lâi khòaⁿ tì-hūi, tian-kông, kap gû-gōng; tī kun-ông hō͘-pòe ê lâng, iáu ōe chòe sím-mi̍h ah? chiū-sī chêng só͘ chòe ê nā-tiāⁿ.

13我就看出智慧贏過愚戇，親像光明贏過烏暗。Góa chiū khòaⁿ-chhut tì-hūi iâⁿ-kè gû-gōng, chhin-chhiūⁿ kng-bêng iâⁿ-kè o͘-àm.

14智慧ê人ê目睭光明，愚戇ê人行tī烏暗；總是我知in ê結局lóng相同。Tì-hūi ê lâng ê ba̍k-chiu kng-bêng, gû-gōng ê lâng kiâⁿ tī o͘-àm; chóng-sī góa chai in ê kiat-kio̍k lóng saⁿ-tâng.

15我就心內講，戇人所tú-tio̍h，我也beh án-ni tú-tio̍h；我mih-sái比in khah智慧ah？我心內講，這也是空虛。Góa chiū sim-lāi kóng, Gōng-lâng só͘ tú-tio̍h, góa iā beh án-ni tú-tio̍h; góa mih-sái pí in khah tì-hūi ah? Góa sim-lāi kóng, Che iā sī khang-hu.

16智慧ê人kap戇ê人平平無得tio̍h人永遠ê記念，因為到將來ê日lóng hō͘人bōe記得。Hāi ah！智慧ê人死，kap愚戇ê人無各樣。Tì-hūi ê lâng kap gōng ê lâng pîⁿ-pîⁿ bô tit-tio̍h lâng éng-oán ê kì-liām, in-ūi kàu chiong-lâi ê ji̍t lóng hō͘ lâng bōe-kì-tit. Hāi ah! Tì-hūi ê lâng sí, kap gû-gōng ê lâng bô koh-iūⁿ.

17所以我怨身慼命，因為tī日光ê下面所做ê工lóng是hō͘我勞苦；因為這lóng是空虛，lóng是掠風。Só͘-í góa oàn-sin chhoeh-miā, in-ūi tī ji̍t-kng ê ē-bīn só͘ chòe ê kang lóng sī hō͘ góa lô-khó͘; in-ūi che lóng sī khang-hu, lóng sī lia̍h-hong.

18我怨恨我一切ê勞碌，就是我tī日光ê下面所勞碌ê；因為beh留hō͘我以後ê人。Góa oàn-hūn góa it-chhè ê lô-lo̍k, chiū-sī góa tī ji̍t-kng ê ē-bīn só͘ lô-lo̍k--ê; in-ūi beh lâu hō͘ góa í-āu ê lâng.

19Hit-ê人是智慧，á是愚戇，是誰會知；iáu-kú我tī日光ê下面，用智慧勞碌所做成ê，伊beh管轄伊；這也是空虛。Hit ê lâng sī tì-hūi, á-sī gû-gōng, chī-chūi ōe chai; iáu-kú góa tī ji̍t-kng ê ē-bīn, ēng tì-hūi lô-lo̍k só͘ chòe-chiâⁿ ê, i beh koán-hat i; che iā sī khang-hu.

20因為án-ni我倒tńg想為tio̍h我tī日光ê下面所tio̍h磨ê勞碌，hō͘我ê心失望。In-ūi án-ni góa tò-tńg siūⁿ ūi-tio̍h góa tī ji̍t-kng ê ē-bīn só͘ tio̍h-bôa ê lô-lo̍k, hō͘ góa ê sim sit-bāng.

21因為有人用智慧，用知bat，用本事來勞碌ê；總是beh留hō͘ bē-bat勞碌tī hit-ê工ê人做業；這也是空虛，也是大陷害。In-ūi ū lâng ēng tì-hūi, ēng chai-bat, ēng pún-sū lâi lô-lo̍k--ê; chóng-sī beh lâu hō͘ bē-bat lô-lo̍k tī hit ê kang ê lâng chòe-gia̍p; che iā-sī khang-hu, iā sī tōa hām-hāi.

22因為人tī日光ê下面所勞碌勞心ê，有得tio̍h甚麼ah？In-ūi lâng tī ji̍t-kng ê ē-bīn só͘ lô-le̍k lô-sim-ê, ū tit-tio̍h sím-mi̍h ah?

23因為伊一生憂慮，伊ê勞碌成做苦痛，連暝時心也無安歇。這也是空虛。In-ūi i it-seng iu-lū, i ê lô-lo̍k chiâⁿ-chòe khó͘-thàng, liân mî--sî sim iā bô an-hioh. Che iā-sī khang-hu.

24人m̄值tio̍h來食來lim，koh hō͘心享福tī伊所tio̍h磨ê；我看chit-ê也是出tī上帝ê手。Lâng m̄-ta̍t-tio̍h lâi chia̍h lâi lim, koh hō͘ sim hióng-hok tī i só͘ tio̍h-bôa ê; góa khòaⁿ chit-ê iā sī chhut tī Siōng-tè ê chhiú.

25論到食á是享福，是誰能贏過我ah？Lūn-kàu chia̍h á-sī hióng-hok, chī-chūi ōe iâⁿ-kè góa ah?

26因為上帝所歡喜ê人，伊就hō͘伊有智慧，知bat快樂；獨獨有罪ê人伊hō͘伊勞苦，來收拾來積聚，thang歸tī上帝所歡喜ê人。這也是空虛，也是掠風。In-ūi Siōng-tè só͘ hoaⁿ-hí ê lâng, I chiū hō͘ i ū tì-hūi, chai-bat khoài-lo̍k; to̍k-to̍k ū chōe ê lâng I hō͘ i lô-khó͘, lâi siu-khioh lâi chek-chū, thang kui tī Siōng-tè só͘ hoaⁿ-hí ê lâng. Che iā sī khang-hu, iā sī lia̍h-hong.

1天下萬般lóng有伊ê期，萬項事lóng有伊ê時。Thiⁿ-ē bān-poaⁿ lóng ū i ê kî, bān-hāng-sū lóng ū i ê sî.

2有出世ê時，有死ê時；有栽種ê時，有拔出所栽種ê ê時；Ū chhut-sì ê sî, ū sí ê sî; ū chai-chèng ê sî, ū pu̍ih-chhut só͘ chai-chèng--ê ê sî;

3有thâi死ê時，有醫好ê時；有拆毀ê時，有起造ê時；ū thâi-sí ê sî, ū i-hó ê sî;ū thiah-húi ê sî, ū khí-chō ê sî;

4有啼哭ê時，有好笑ê時；有哀慘ê時，有跳舞ê時；ū thî-khàu ê sî, ū hó-chhiò ê sî; ū ai-chhám ê sî, ū thiàu-bú ê sî;

5有hiat石頭ê時，有拾石頭ê時；有thang抱ê時，有m̄-thang抱ê時；ū hiat chio̍h-thâu ê sî, ū khioh chio̍h-thâu ê sî; ū thang phō ê sî, ū m̄-thang phō ê sî;

6有chhē-tio̍h ê時，有失落ê時；有保守ê時，有放sak ê時；有拆裂ê時，有補縫(thīⁿ)ê時；ū chhē-tio̍h ê sî, ū sit-lo̍h ê sî; ū pó-siú ê sî, ū pàng-sak ê sî; ū thiah-li̍h ê sî, ū pó͘-thīⁿ ê sî;

7有靜靜ê時，有講話ê時；ū chēng-chēng ê sî, ū kóng-ōe ê sî;

8有疼惜ê時，有怨恨ê時；有交戰ê時，有和好ê時。ū thiàⁿ-sioh ê sî, ū oàn-hūn ê sî; ū kau-chiàn ê sî, ū hô-hó ê sî.

9做工ê人tī伊所勞碌ê有甚麼利益ah？Chòe-kang ê lâng tī i só͘ lô-lo̍k--ê ū sím-mi̍h lī-ek ah?

10我有看見上帝所hō͘世間人ê勞碌，hō͘ in tī hit中間來練習。Góa ū khòaⁿ-kìⁿ Siōng-tè só͘ hō͘ sè-kan lâng ê lô-lo̍k, hō͘ in tī hit tiong-kan lâi liān-si̍p.

11上帝造萬物，各照伊ê時成做美妙，koh將永遠ê觀念hē tī人ê心；總是上帝對頭到尾所做成ê，人bōe能測度伊。Siōng-tè chō bān-mi̍h, kok chiàu i ê sî chiâⁿ-chòe bí-biāu, koh chiong éng-oán ê koan-liām hē tī lâng ê sim; chóng-sī Siōng-tè tùi-thâu kàu-bé só͘ chòe-chiâⁿ ê, lâng bōe-ōe chhek-to̍k i.

12我知從中無一項khah好tī一生快樂，koh行好。Góa chai chiông-tiong bô chi̍t-hāng khah-hó tī it-seng khoài-lo̍k, koh kiâⁿ hó.

13Koh人人也食也lim tī伊一切所勞碌ê來享福，這也是上帝ê恩賜。Koh lâng-lâng iā chia̍h iā lim tī i it-chhè só͘ lô-lo̍k-ê lâi hióng-hok, che iā sī Siōng-tè ê un-sù.

14我知上帝一切所做ê，beh永遠tī-teh，bōe加添，bōe減少；上帝án-ni行，是hō͘人tī伊ê面前驚畏。Góa chai Siōng-tè it-chhè só͘ chòe--ê, beh éng-oán tī-teh, bōe ke-thiⁿ, bōe kiám-chió; Siōng-tè án-ni kiâⁿ, sī hō͘ lâng tī I ê bīn-chêng kiaⁿ-ùi.

15現今所有ê前已經有；將來beh有ê早已經有；過身ê事上帝koh chhē伊。Hiān-kim só͘ ū-ê chêng í-keng ū; chiong-lâi beh ū-ê chá í-keng ū; kè-sin ê sū Siōng-tè koh chhē i.

16我koh看見日光ê下面tī審判ê所在有奸惡，tī公義ê所在也有奸惡。Góa koh khòaⁿ-kìⁿ ji̍t-kng ê ē-bīn tī sím-phòaⁿ ê só͘-chāi ū kan-ok, tī kong-gī ê só͘-chāi iā ū kan-ok.

17我心內講，上帝beh審判義人kap pháiⁿ人，因為tī-hia ta̍k項ê事，ta̍k項ê工，lóng有定tio̍h ê時。Góa sim-lāi kóng, Siōng-tè beh sím-phòaⁿ gī-lâng kap pháiⁿ-lâng, in-ūi tī-hia ta̍k-hāng ê sū, ta̍k-hāng ê kang, lóng ū tiāⁿ-tio̍h ê sî.

18我心內講，這是為tio̍h世間人ê緣故，上帝beh試驗in，hō͘ in知家己是禽獸。Góa sim-lāi kóng, Che sī ūi-tio̍h sè-kan lâng ê iân-kò͘, Siōng-tè beh chhì-giām in, hō͘ in chai ka-kī sī khîm-siù.

19因為世間人所tú-tio̍h-ê，禽獸也tú-tio̍h，所tú-tio̍h lóng是一樣；chit-ê án-ni死，hit-ê也是án-ni死，lóng同一樣喘氣；人bōe khah贏禽獸，因為lóng是空虛。In-ūi sè-kan lâng só͘ tú-tio̍h--ê, khîm-siù iā tú-tio̍h, só͘ tú-tio̍h lóng sī chi̍t-iūⁿ; chit-ê án-ni sí, hit-ê iā sī án-ni sí, lóng tâng chi̍t-iūⁿ chhoán-khùi; lâng bōe khah-iâⁿ khîm-siù, in-ūi lóng sī khang-hu.

20Lóng到一所在，lóng出tī土粉，也lóng歸tī土粉。Lóng kàu chi̍t só͘-chāi, lóng chhut tī thô͘-hún, iā lóng kui tī thô͘-hún.

21人ê魂上頂面，獸ê魂墮落地，是誰知是án-ni á m̄是？Lâng ê hûn chiūⁿ téng-bīn, siù ê hûn tūi-lo̍h tōe, chī-chūi chai sī án-ni á m̄-sī?

22所以我看見人無一項khah好tī伊所經營ê來歡喜；因為這是伊ê份額；伊身後ê事，是誰能hō͘伊koh來看見ah？Só͘-í góa khòaⁿ-kìⁿ lâng bô chi̍t-hāng khah-hó tī i só͘ keng-êng--ê lâi hoaⁿ-hí; in-ūi che sī i ê hūn-gia̍h; i sin-āu ê sū, chī-chūi ōe hō͘ i koh lâi khòaⁿ-kìⁿ ah?

1我koh oa̍t-tńg看，tī日光ê下面所行一切ê壓迫，看ah，受壓迫ê流目屎，koh無人安慰；壓迫in ê勢力，也無人安慰in。Góa koh oa̍t-tńg khòaⁿ, tī ji̍t-kng ê ē-bīn só͘ kiâⁿ it-chhè ê ap-pek, khòaⁿ ah, siū ap-pek-ê lâu ba̍k-sái, koh bô lâng an-ùi; ap-pek in ê sè-le̍k, iā bô lâng an-ùi in.

2因為án-ni我o-ló hiah-ê已經死ê死人，贏過hiah-ê iáu活teh ê活人。In-ūi án-ni góa o-ló hiah-ê í-keng sí ê sí-lâng, iâⁿ-kè hiah-ê iáu oa̍h--teh ê oa̍h-lâng.

3Koh hit-ê iáu未出世ê，就是bē看見日光ê下面所做ê pháiⁿ-tāi-ê，我看伊，比chit兩等號iáu khah好。Koh hit ê iáu-bē chhut-sì ê, chiū-sī bē khòaⁿ-kìⁿ ji̍t-kng ê ē-bīn só͘ chòe ê pháiⁿ-tāi--ê, góa khòaⁿ i, pí chit nn̄g téng-hō iáu khah-hó.

4我koh看見人為tio̍h一切ê tio̍h磨，kap ta̍k樣奇巧ê工，就hō͘厝邊怨妒；這也是空虛，也是掠風。Góa koh khòaⁿ-kìⁿ lâng ūi-tio̍h it-chhè ê tio̍h-bôa, kap ta̍k-iūⁿ kî-khiáu ê kang, chiū hō͘ chhù-piⁿ oàn-tò͘; che iā sī khang-hu, iā sī lia̍h-hong.

5愚戇ê人手phah叉，食家己ê肉。Gû-gōng ê lâng chhiú phah-chha, chia̍h ka-kī ê bah.

6一手滿滿也有平安，贏過兩手滿滿來勞碌掠風。Chi̍t chhiú móa-móa iā ū pêng-an, iâⁿ-kè nn̄g-chhiú móa-móa lâi lô-lo̍k lia̍h-hong.

7我koh oa̍t-tńg看tī日光ê下面有空虛ê事。Góa koh oa̍t-tńg khòaⁿ tī ji̍t-kng ê ē-bīn ū khang-hu ê sū.

8有人孤單無兩個，無kiáⁿ也無兄弟，竟然勞碌無soah，伊ê目睭無看錢財做到-額。伊講，我勞碌刻苦家己，無享福，到底為是誰 ah？這也是空虛，也是極重ê勞苦。Ū lâng ko͘-toaⁿ bô nn̄g-ê, bô kiáⁿ iā bô hiaⁿ-tī, kéng-jiân lô-lo̍k bô-soah, i ê ba̍k-chiu bô khòaⁿ chîⁿ-châi chòe kàu-gia̍h. I kóng, Góa lô-lo̍k khek-khó͘ ka-kī, bô hióng-hok, tàu-tí ūi chī-chūi ah? Che iā sī khang-hu, iā sī ke̍k-tāng ê lô-khó͘.

9兩人總比一人khah好，因為in相kap tio̍h磨得tio̍h好ê效果。Nn̄g lâng chóng pí chi̍t-lâng khah-hó, in-ūi in saⁿ-kap tio̍h-bôa tit-tio̍h hó ê hāu-kó.

10若是跋倒，chit人thang扶伊ê同伴起來；若是單身來跋倒，無別人扶伊起來，chit人就有災厄。Nā-sī poa̍h-tó, chit-lâng thang hû i ê tâng-phōaⁿ khí-lâi; nā-sī toaⁿ-sin lâi poa̍h-tó, bô pa̍t-lâng hû i khí-lâi, chit-lâng chiū ū chai-ē.

11Koh，兩人相kap睏，就會燒lō；若家己一人，thái-thó會燒ah？Koh, nn̄g lâng saⁿ-kap khùn, chiū ōe sio-lō; nā ka-kī chi̍t-lâng, thái-thó ōe sio ah?

12單單一人就人會phah贏伊，若有兩人就會抵擋伊；三股ê索無快快斷。Toaⁿ-toaⁿ chi̍t-lâng chiū lâng ōe phah-iâⁿ i, nā ū nn̄g lâng chiū ōe tí-tng i; saⁿ-kó͘ ê soh bô khoài-khoài tn̄g.

13Sòng-hiong koh有智慧ê少年人，贏過年老m̄肯受諫諍戇ê王。Sòng-hiong koh ū tì-hūi ê siàu-liân lâng, iâⁿ-kè nî-lāu m̄-khéng siū kàn-chèng gōng ê ông.

14Chit-ê人是tùi監內出來做王；tī伊ê國內，出世是sòng-hiong人，Chit ê lâng sī tùi kaⁿ-lāi chhut-lâi chòe ông; tī i ê kok-lāi, chhut-sì sī sòng-hiong lâng,

15我看tī日光ê下面teh行ê活人，lóng thàn hit-ê少年人，就是第二個，續接伊ê位ê。Góa khòaⁿ tī ji̍t-kng ê ē-bīn teh-kiâⁿ ê oa̍h-lâng, lóng thàn hit ê siàu-liân lâng, chiū-sī tē-jī-ê, sòa-chiap i ê ūi--ê.

16伊所管ê百姓chōe-chōe，bōe算得；後來ê人無為tio̍h伊來歡喜。這也是空虛，也是掠風。I só͘ koán ê peh-sìⁿ chōe-chōe, bōe-sǹg--tit; āu-lâi ê lâng bô ūi-tio̍h i lâi hoaⁿ-hí. Che iā sī khang-hu, iā sī lia̍h-hong.