1你到上帝ê厝，tio̍h謹慎你ê腳步；因為近前來聽，贏過戇人獻祭；因為in m̄知所行ê是pháiⁿ。Lí kàu Siōng-tè ê chhù, tio̍h kín-sīn lí ê kha-pō͘; in-ūi kūn-chêng lâi thiaⁿ, iâⁿ-kè gōng-lâng hiàn-chè; in-ūi in m̄-chai só͘-kiâⁿ-ê sī pháiⁿ.

2你tī上帝ê面前m̄-thang隨便講話，也m̄-thang心著急來講；因為上帝tī天裡，你tī地裡，所以你ê言語tio̍h少。Lí tī Siōng-tè ê bīn-chêng m̄-thang sûi-piān kóng-ōe, iā m̄-thang sim tio̍h-kip lâi kóng; in-ūi Siōng-tè tī thiⁿ--nih, lí tī tōe--ni̍h, só͘-í lí ê giân-gú tio̍h chió.

3因為tāi-chì chōe chiah有眠夢；言語chōe chiah有戇人ê聲。In-ūi tāi-chì chōe chiah ū bîn-bāng; giân-gú chōe chiah ū gōng-lâng ê siaⁿ.

4你對上帝下願，謝伊m̄-thang 延chhiân；因為伊無歡喜愚戇ê人；你所下ê願應該tio̍h謝。Lí tùi Siōng-tè hē-goān, siā i m̄-thang iân-chhiân; in-ūi I bô hoaⁿ-hí gû-gōng ê lâng; lí só͘ hē ê goān eng-kai tio̍h siā.

5你下願無謝，寧可無下。Lí hē-goān bô siā, lêng-khó͘ bô hē.

6M̄-thang hō͘你ê嘴致到肉體犯罪，也m̄-thang tī使者ê面前講是錯誤下願；啥事hō͘上帝因為你ê聲受氣，來敗壞你ê手所做ê ah？M̄-thang hō͘ lí ê chhùi tì-kàu jio̍k-thé hoān-chōe, iā m̄-thang tī sù-chiá ê bīn-chêng kóng sī chhò-gō͘ hē-goān; siáⁿ-sū hō͘ Siōng-tè in-ūi lí ê siaⁿ siū-khì, lâi pāi-hoāi lí ê chhiú só͘ chòe--ê ah?

7因為眠夢chōe-chōe，言語chōe-chōe，內中有空虛；獨獨tio̍h敬畏上帝。In-ūi bîn-bāng chōe-chōe, giân-gú chōe-chōe, lāi-tiong ū khang-hu; to̍k-to̍k tio̍h kèng-ùi Siōng-tè.

8你若tī省內看見sòng-hiong人受壓迫，á是用強權搶公義公平ê事，莫得因為án-ni來gông-ngia̍h；因為有一位khah高tī hit-ê坐高位ê teh鑑察；tī in ê頂面iáu有比in khah高ê。Lí nā tī séng-lāi khòaⁿ-kìⁿ sòng-hiong lâng siū ap-pek, á-sī ēng kiông-koân chhiúⁿ kong-gī kong-pêng ê sū, bo̍h-tit in-ūi án-ni lâi gông-ngia̍h; in-ūi ū chi̍t-ūi khah-koâiⁿ tī hit ê chē koâiⁿ-ūi-ê teh kàm-chhat; tī in ê téng-bīn iáu ū pí in khah koâiⁿ ê.

9Koh地裡ê利益歸tī眾人；就君王也受tio̍h田地ê供奉。Koh tōe--nih ê lī-ek kui tī chèng-lâng; chiū kun-ông iā siū-tio̍h chhân-tōe ê kiong-hōng.

10Ài ti̍h銀ê，無因為銀來知足；ài富有ê，無因為得利來知足；這也是空虛。Ài ti̍h gûn--ê, bô in-ūi gûn lâi ti-chiok; ài pù-ū--ê, bô in-ūi tek-lī lâi ti-chiok; che iā sī khang-hu.

11貨財加添，食伊ê人也加添，業主有得tio̍h甚麼利益ah？不過目睭看見nā-tiāⁿ。Hè-châi ke-thiⁿ, chia̍h i ê lâng iā ke-thiⁿ, gia̍p-chú ū tit-tio̍h sím-mi̍h lī-ek ah? put-kò ba̍k-chiu khòaⁿ-kìⁿ nā-tiāⁿ.

12勞碌ê人不管食chōe食少，真好睏；好額人ê豐盛hō͘伊bōe睏得。Lô-lo̍k ê lâng put-koán chia̍h-chōe chia̍h-chió, chin-hó khùn; hó-gia̍h lâng ê hong-sēng hō͘ i bōe khùn-tit.

13我看見日光ê下面，有一件大災厄，就是財主定定守伊ê錢，來害家己。Góa khòaⁿ-kìⁿ ji̍t-kng ê ē-bīn, ū chi̍t kiāⁿ tōa chai-ē, chiū-sī châi-chú tiāⁿ-tiāⁿ siú i ê chîⁿ, lâi hāi ka-kī.

14因為tú-tio̍h不測ê事，chiah-ê錢財就無去；hit-ê人若生kiáⁿ，手內也無一項。In-ūi tú-tio̍h put-chhek ê sū, chiah ê chîⁿ-châi chiū bô--khì; hit ê lâng nā siⁿ kiáⁿ, chhiú-lāi iā bô chi̍t-hāng.

15伊怎樣tùi老母ê胎出來，也beh親像án-ni thǹg-theh去；伊所勞碌得tio̍h-ê，手內bōe能帶一毫去。I cháiⁿ-iūⁿ tùi lāu-bú ê thai chhut-lâi, iā beh chhin-chhiūⁿ án-ni thǹg-theh khì; i só͘ lô-lo̍k tit-tio̍h--ê, chhiú-lāi bōe-ōe tòa chi̍t-hô khì.

16伊來ê情形怎樣，伊去也是án-ni；這也是一項大災厄；不測為tio̍h風來勞碌有甚麼利益ah？I lâi ê chêng-hêng cháiⁿ-iūⁿ, i khì iā sī án-ni; che iā sī chi̍t-hāng tōa chai-ē; i ūi-tio̍h hong lâi lô-lo̍k ū sím-mi̍h lī-ek ah?

17Koh不測一世人tī烏暗中teh食，有chōe-chōe煩惱，koh有病痛kap受氣。Koh i chi̍t-sì-lâng tī o͘-àm-tiong teh chia̍h, ū chōe-chōe hoân-ló, koh ū pīⁿ-thiàⁿ kap siū-khì.

18看ah，我所看做好，做美妙ê，就是人tī上帝賞賜伊一生ê日子來lim食，享受日光ê下面勞碌所得tio̍h ê好，因為這是伊ê份額。Khòaⁿ ah, góa só͘ khòaⁿ-chòe hó, chòe bí-biāu--ê, chiū-sī lâng tī Siōng-tè siúⁿ-sù i it-seng ê ji̍t-chí lâi lim-chia̍h, hióng-siū ji̍t-kng ê ē-bīn lô-lo̍k só͘ tit-tio̍h ê hó, in-ūi che sī i ê hūn-gia̍h.

19見若得tio̍h上帝hō͘伊有錢財好額，hō͘伊能享受，來取伊ê份額，tī伊ê tio̍h磨來快樂；這是上帝ê賞賜。Kìⁿ-nā tit-tio̍h Siōng-tè hō͘ i ū chîⁿ-châi hó-gia̍h, hō͘ i ōe hióng-siū, lâi chhú i ê hūn-gia̍h, tī i ê tio̍h-bôa lâi khoài-lo̍k; che sī Siōng-tè ê siúⁿ-sù.

20伊無大大想tio̍h一生ê年日；因為上帝照伊ê心所歡喜ê應答伊。I bô tōa-tōa siūⁿ-tio̍h it-seng ê nî-ji̍t; in-ūi Siōng-tè chiàu i ê sim só͘ hoaⁿ-hí--ê ìn-tap i.

1我看見日光ê下面有一項災厄，重重teh人ê。Góa khòaⁿ-kìⁿ ji̍t-kng ê ē-bīn ū chi̍t-hāng chai-ē, tāng-tāng teh lâng ê.

2就是有人得tio̍h上帝賞賜伊錢財、好額、尊貴，致到伊ê心所ài ê無欠一項；總是上帝無hō͘伊能食伊，反tńg hō͘外人來食伊；這也是空虛，也是大弊病。Chiū-sī ū lâng tit-tio̍h Siōng-tè siúⁿ-sù i chîⁿ-châi, hó-gia̍h, chun-kùi, tì-kàu i ê sim só͘ ài ê bô khiàm chi̍t-hāng; chóng-sī Siōng-tè bô hō͘ i ōe chia̍h--i, hoán-tńg hō͘ gōa-lâng lâi chia̍h--i; che iā sī khang-hu, iā sī tōa pē-pēng.

3人設使生一百ê kiáⁿ，koh食長歲壽，歷過chōe-chōe年，伊ê心無得tio̍h享福來滿足，koh無得tio̍h埋葬；照我講，hit-ê無夠期來墮落ê胎比伊khah好。Lâng siat-sú siⁿ chi̍t-pah ê kiáⁿ, koh chia̍h tn̂g hè-siū, le̍k-kè chōe-chōe nî, i ê sim bô tit-tio̍h hióng-hok lâi móa-chiok, koh bô tit-tio̍h bâi-chòng; chiàu góa kóng, hit ê bô kàu-kî lâi tūi-lo̍h ê thai pí i khah-hó.

4因為伊tī空虛來，tī烏暗去，伊ê名受烏暗蓋密。In-ūi i tī khang-hu lâi, tī o͘-àm khì, i ê miâ siū o͘-àm khàm-ba̍t.

5Koh伊無看見日頭，也lóng無知覺，chit-ê比hit-ê khah平安。Koh i bô khòaⁿ-kìⁿ ji̍t-thâu, iā lóng bô ti-kak, chit-ê pí hit-ê khah pêng-an.

6Hit人雖然活到一千年，koh一千年，總是無享福；眾人kiám m̄是lóng歸一所在去mah？Hit-lâng sui-jiân oa̍h kàu chi̍t-chheng nî, koh chi̍t-chheng nî, chóng-sī bô hióng-hok; chèng-lâng kiám m̄-sī lóng kui chi̍t só͘-chāi khì mah?

7人ê勞碌lóng是為tio̍h口腹，心也無知足。Lâng ê lô-lo̍k lóng sī ūi-tio̍h khó͘-hok, sim iā bô ti-chiok.

8智慧ê人比愚戇ê人有甚麼khah贏ah？sòng-hiong ê人tī眾人ê面前知所thang行ê，有甚麼khah贏ah？Tì-hūi ê lâng pí gû-gōng ê lâng ū sím-mi̍h khah-iâⁿ ah? sòng-hiong ê lâng tī chèng-lâng ê bīn-chêng chai só͘ thang kiâⁿ ê, ū sím-mi̍h khah-iâⁿ ah?

9目睭所看ê贏過心內ê泛泛想；這也是空虛，也是掠風。Ba̍k-chiu só͘ khòaⁿ-ê iâⁿ-kè sim-lāi ê hoàn-hoàn siūⁿ; che iā sī khang-hu, iā sī lia̍h-hong.

10前所有ê，已經久久號伊ê名，知伊是人，伊也bōe能kap hit-ê比伊khah有力ê來相爭。Chêng só͘ ū ê, í-keng kú-kú hō i ê miâ, chai i sī lâng, i iā bōe-ōe kap hit-ê pí i khah ū la̍t--ê lâi saⁿ-chiⁿ.

11已經有chōe-chōe事加添空虛，對tī人有甚麼利益ah？Í-keng ū chōe-chōe sū ke-thiⁿ khang-hu, tùi tī lâng ū sím-mi̍h lī-ek ah?

12人一生虛度光陰，親像影過去，是誰會知甚麼事做人生前ê利益ah？因為是誰會kā人講伊過世了後，tī日光ê下面beh有甚麼事ah？Lâng it-seng hu-tō͘ kong-im, chhin-chhiūⁿ iáⁿ kè--khì, chī-chūi ōe chai sím-mi̍h sū chòe lâng siⁿ-chêng ê lī-ek ah? in-ūi chī-chūi ōe kā lâng kóng i kè-sì liáu-āu, tī ji̍t-kng ê ē-bīn beh ū sím-mi̍h sū ah?

1名聲比好ê膏油khah好；人死ê日比出世ê日khah好。Miâ-siaⁿ pí hó ê ko-iû khah-hó; lâng sí ê ji̍t pí chhut-sì ê ji̍t khah-hó.

2去喪事ê家比去宴樂ê家khah好；因為這是眾人ê結局，活ê人也beh將這事hē tī心裡。Khì song-sū ê ke pí khì iàn-lo̍k ê ke khah-hó; in-ūi che sī chèng-lâng ê kiat-kio̍k, oa̍h ê lâng iā beh chiong che sū hē tī sim--nih.

3憂悶比笑khah好；因為面帶憂容，是hō͘心快樂。Iu-būn pí chhiò khah-hó; in-ūi bīn tài-iu-iông, sī hō͘ sim khoài-lo̍k.

4智慧ê人ê心tī 喪事ê家；愚戇ê人ê心tī快樂ê家。Tì-hūi ê lâng ê sim tī song-sū ê ke; gû-gōng ê lâng ê sim tī khoài-lo̍k ê ke.

5聽智慧ê人ê責備，比聽愚戇人ê唱曲 khah好。Thiaⁿ tì-hūi ê lâng ê chek-pī, pí thiaⁿ gû-gōng lâng ê chhiùⁿ-khek khah-hó.

6戇人ê笑親像鼎下燒刺á ê聲；這也是空虛。Gōng-lâng ê chhiò chhin-chhiūⁿ tiáⁿ-ē sio chhì-á ê siaⁿ; che iā sī khang-hu.

7勒索會hō͘智慧ê人變做戇；pò͘賂會敗壞人ê心術。le̍k-sek ōe hō͘ tì-hūi ê lâng piàn-chòe gōng; pò͘-lō͘ ōe pāi-hoāi lâng ê sim-su̍t.

8Tāi-chì ê結局贏過tāi-chì ê起頭；心吞忍贏過心驕傲。Tāi-chì ê kiat-kio̍k iâⁿ-kè tāi-chì ê khí-thâu; sim thun-lún iâⁿ-kè sim kiau-ngō͘.

9你ê心莫得躁急來受氣；因為受氣存tī戇人ê心懷。Lí ê sim bo̍h-tit sò-kip lâi siū-khì; in-ūi siū-khì chûn tī gōng-lâng ê sim-hoâi.

10你m̄-thang講，Àn怎樣前ê日贏過現今ê日？因為你án-ni問m̄是出tī智慧。Lí m̄-thang kóng, Àn-cháiⁿ-iūⁿ chêng ê ji̍t iâⁿ-kè hiān-kim ê ji̍t? in-ūi lí án-ni mn̄g m̄-sī chhut tī tì-hūi.

11智慧kap產業平平好；對tī看見日光ê人，koh khah有利益。Tì-hūi kap sán-gia̍p pîⁿ-pîⁿ hó; tùi-tī khòaⁿ-kìⁿ ji̍t-kng ê lâng, koh khah ū lī-ek.

12因為智慧會致蔭人，錢銀也會致蔭人；獨獨智慧能保全伊本人ê活命；這就是知識特色ê利益。In-ūi tì-hūi ōe tì-ìm lâng, chîⁿ-gûn iā ōe tì-ìm lâng; to̍k-to̍k tì-hūi ōe pó-choân i pún-lâng ê oa̍h-miā; che chiū-sī chai-bat te̍k-sek ê lī-ek.

13你tio̍h想上帝所做，因為伊hō͘伊彎ê，是誰能hō͘伊直？Lí tio̍h siūⁿ Siōng-tè só͘ chòe, in-ūi I hō͘ i oan--ê, chī-chūi ōe hō͘ i ti̍t?

14興通ê日，你tio̍h歡喜，tú-tio̍h患難ê日，你tio̍h想；因為上帝hō͘兩項平平排teh，為tio̍h beh hō͘人查bōe出身後有甚麼事。Heng-thong ê ji̍t, lí tio̍h hoaⁿ-hí, tú-tio̍h hoān-lān ê ji̍t, lí tio̍h siūⁿ; in-ūi Siōng-tè hō͘ nn̄g-hāng pîⁿ-pîⁿ pâi-teh, ūi-tio̍h beh hō͘ lâng chhâ-bōe-chhut sin-āu ū sím-mi̍h sū.

15有義人行義，反tńg滅無，有pháiⁿ人行pháiⁿ，反tńg食長歲壽；我tī空虛ê日lóng有看見。Ū gī-lâng kiâⁿ-gī, hoán-tńg bia̍t-bô, ū pháiⁿ-lâng kiâⁿ pháiⁿ, hoán-tńg chia̍h tn̂g hè-siū; góa tī khang-hu ê ji̍t lóng ū khòaⁿ-kìⁿ.

16莫得行義siuⁿ-chōe，莫得智慧過頭；啥事敗壞家己ah？Bo̍h-tit kiâⁿ-gī siuⁿ-chōe, bo̍h-tit tì-hūi kè-thâu; siáⁿ-sū pāi-hoāi ka-kī ah?

17莫得行pháiⁿ siuⁿ-chōe，也莫得做戇人；啥事bē到期來死ah？Bo̍h-tit kiâⁿ-pháiⁿ siuⁿ-chōe, iā bo̍h-tit chòe gōng-lâng; siáⁿ-sū bē kàu-kî lâi sí ah?

18你持守chit-ê是好，hit-ê也m̄-thang放手；因為敬畏上帝ê人beh脫離這一切ê事。Lí chhî-siú chit-ê sī hó, hit-ê iā m̄-thang pàng chhiú; in-ūi kèng-ùi Siōng-tè ê lâng beh thoat-lī che it-chhè ê sū.

19智慧hō͘智慧ê人有能力，贏過城內十個掌權ê。Tì-hūi hō͘ tì-hūi ê lâng ū lêng-le̍k, iâⁿ-kè siâⁿ-lāi cha̍p ê chiáng-koân-ê.

20行好無犯罪ê義人，世上實在無。Kiâⁿ-hó bô hoān-chōe ê gī-lâng, sè-chiūⁿ si̍t-chāi bô.

21人所講ê話，m̄-thang lóng總hē tī心裡，驚了聽見你ê奴僕咒詛你。Lâng só͘ kóng ê ōe, m̄-thang lóng-chóng hē tī sim--nih, kiaⁿ-liáu thiaⁿ-kìⁿ lí ê lô͘-po̍k chiù-chó͘ lí.

22因為你ê心家己知，你也bat chōe-chōe pái咒詛別人。In-ūi lí ê sim ka-kī chai, lí iā bat chōe-chōe pái chiù-chó͘ pa̍t-lâng.

23我bat用智慧試驗這一切ê事；我講，我beh做智慧ê；總是這離開我遠遠。Góa bat ēng tì-hūi chhì-giām che it-chhè ê sū; góa kóng, Góa beh chòe tì-hūi-ê; chóng-sī che lī-khui góa hn̄g-hn̄g.

24所有ê是遠koh深深；是誰能測度ah？Só͘-ū-ê sī hn̄g koh chhim-chhim; chī-chūi ōe chhek-to̍k ah?

25我oa̍t-tńg想我專心ài知，ài查考，也chhē智慧kap萬事ê理由；koh ài知邪惡是愚戇，愚蠢是顛狂。Góa oa̍t-tńg siūⁿ góa choan-sim ài chai, ài chhâ-khó, iā chhē tì-hūi kap bān-sū ê lí-iû; koh ài chai siâ-ok sī gû-gōng, gû-chhún sī tian-kông.

26我koh查出一項比死khah苦；就是一等號ê婦人人，伊ê心是活tauh kap羅網，伊ê手是鎖鏈；凡若得tio̍h上帝歡喜ê人得tio̍h閃避；總是有罪ê人hō͘伊掠tio̍h。Góa koh chhâ-chhut chi̍t-hāng pí sí khah-khó͘; chiū-sī chi̍t téng-hō ê hū-jîn-lâng, i ê sim sī oa̍h-tauh kap lô-bāng, i ê chhiú sī só-liān; hoān-nā tit-tio̍h Siōng-tè hoaⁿ-hí ê lâng tit-tio̍h siám-pī; chóng-sī ū-chōe ê lâng hō͘ i lia̍h--tio̍h.

27傳道ê講，看ah，我ài知伊ê數額，一項一項比較伊，就chhē-tio̍h chit-ê；Thoân-tō--ê kóng, Khòaⁿ ah, góa ài chai i ê siàu-gia̍h, chi̍t-hāng chi̍t-hāng pí-kàu i, chiū chhē-tio̍h chit-ê;

28我ê心ài chhē伊也bōe得tio̍h；tī一千人ê中間我會chhē-tio̍h一個ta-po͘人，tī hiah-ê人ê中間，我無chhē-tio̍h一個婦人人。góa ê sim ài chhē--i iā bōe tit-tio̍h; tī chi̍t-chheng lâng ê tiong-kan góa ōe chhē-tio̍h chi̍t ê ta-po͘-lâng, tī hiah ê lâng ê tiong-kan, góa bô chhē-tio̍h chi̍t ê hū-jîn-lâng.

29看ah，我只有chhē-tio̍h chit-ê，就是上帝創造人本是正直，總是in chhē出chōe-chōe奇巧ê計謀。Khòaⁿ ah, góa chí-ū chhē-tio̍h chit-ê, chiū-sī Siōng-tè chhòng-chō lâng pún sī chèng-ti̍t, chóng-sī in chhē-chhut chōe-chōe kî-khiáu ê kè-bô͘.