1Tùi上帝ê旨意做基督耶穌ê使徒，保羅，phoe寄hō͘ tiàm以弗所chiah-ê聖徒，忠信tī基督耶穌ê；Tùi Siōng-tè ê chí-ì chòe Ki-tok Iâ-so͘ ê sù-tô͘, Pó-lô, phoe kià hō͘ tiàm Í-hut-só͘ chiah ê sèng-tô͘, tiong-sìn tī Ki-tok Iâ-so͘ ê;

2願lín對咱ê父上帝kap主耶穌基督得tio̍h恩典平安。goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

3願咱ê主耶穌基督ê上帝，也是伊ê父，得tio̍h o-ló；伊tī基督bat賞賜咱tī天裡ta̍k項屬tī神ê福氣；Goān lán ê Chú Iâ-so͘ Ki-tok ê Siōng-tè, iā sī I ê Pē, tit-tio̍h o-ló; I tī Ki-tok bat siúⁿ-sù lán tī thiⁿ-ni̍h ta̍k hāng sio̍k tī sîn ê hok-khì;

4就是照伊創造世間ê事先tī基督揀咱，hō͘咱tī伊ê面前成做聖，無thang嫌；chiū-sī chiàu I chhòng-chō sè-kan ê tāi-seng tī Ki-tok kéng lán, hō͘ lán tī I ê bīn-chêng chiâⁿ-chòe sèng, bô thang hiâm;

5伊照伊ê旨意所歡喜ê，用仁愛事先定tio̍h咱tùi耶穌基督得tio̍h做kiáⁿ，來歸tī伊，I chiàu I ê chí-ì só͘ hoaⁿ-hí ê, ēng jîn-ài tāi-seng tiāⁿ-tio̍h lán tùi Iâ-so͘ Ki-tok tit-tio̍h chòe kiáⁿ, lâi kui tī I,

6hō͘伊恩典ê榮光得tio̍h o-ló；chit-ê恩典就是伊tī所疼ê Kiáⁿ賞賜咱ê；hō͘ I un-tián ê êng-kng tit-tio̍h o-ló; chit ê un-tián chiū-sī I tī só͘ thiàⁿ ê Kiáⁿ siúⁿ-sù lán ê;

7tiàm-tī伊咱tùi伊ê血得tio̍h贖回，赦免罪過，照伊恩典ê富有；tiàm-tī I lán tùi I ê huih tit-tio̍h sio̍k-hôe, sià-bián chōe-kòa, chiàu I un-tián ê pù-ū;

8伊將chit-ê恩典，用ta̍k樣ê智慧kap見識，賞賜咱到滿滿；I chiong chit ê un-tián, ēng ta̍k iūⁿ ê tì-hūi kap kiàn-sek, siúⁿ-sù lán kàu móa-móa;

9已經hō͘咱知伊旨意ê奧妙，照伊ê好意，就是伊tī本身所事先定tio̍h ê，í-keng hō͘ lán chai I chí-ì ê ò-biāu, chiàu I ê hó-ì, chiū-sī I tī pún-sin só͘ tāi-seng tiāⁿ-tio̍h ê,

10beh tī chiah-ê日期完滿ê時，設法hō͘萬物，不論tī天裡ê tī地裡ê，lóng tī基督來合一；beh tī chiah ê ji̍t-kî oân-móa ê sî, siat-hoat hō͘ bān mi̍h, put-lūn tī thiⁿ-ni̍h ê tī tōe-ni̍h ê, lóng tī Ki-tok lâi ha̍p-it;

11tiàm-tī伊咱也成做家業，就是事先受定tio̍h ê，照hit-ê thàn家己ê旨意行萬項有ê ê意思，tiàm-tī I lán iā chiâⁿ-chòe ke-gia̍p, chiū-sī tāi-seng siū tiāⁿ-tio̍h ê, chiàu hit ê thàn ka-kī ê chí-ì kiâⁿ bān-hāng-ū ê ê ì-sù,

12beh hō͘伊ê榮光tùi阮事先ǹg望tī基督ê人得tio̍h o-ló；beh hō͘ I ê êng-kng tùi goán tāi-seng ǹg-bāng tī Ki-tok ê lâng tit-tio̍h o-ló;

13tiàm-tī伊，lín也已經聽見真理ê道，救lín ê福音，既然信就tiàm-tī伊有受所應允ê聖神蓋印，tiàm-tī I lín iā í-keng thiaⁿ-kìⁿ chin-lí ê tō, kiù lín ê hok-im, kì-jiân sìn chiū tiàm-tī I ū siū só͘ èng-ún ê Sèng Sîn khàm-ìn,

14伊就是做咱承接業ê chún-tǹg，到上帝所得tio̍h ê業贖回，hō͘伊ê榮光得tio̍h o-ló。I chiū-sī chòe lán sêng-chiap gia̍p ê chún-tǹg, kàu Siōng-tè só͘ tit-tio̍h ê gia̍p sio̍k-hôe, hō͘ I ê êng-kng tit-tio̍h o-ló.

15因為án-ni，我既然聽見lín中間tī主耶穌ê信，kap顯出tī眾聖徒ê仁愛，In-ūi án-ni góa kì-jiân thiaⁿ-kìⁿ lín tiong-kan tī Chú Iâ-so͘ ê sìn, kap hián-chhut tī chèng sèng-tô͘ ê jîn-ài,

16就為tio̍h lín感謝無soah，祈禱ê時siàu念lín；chiū ūi-tio̍h lín kám-siā bô soah, kî-tó ê sî siàu-liām lín;

17求咱ê主耶穌基督ê上帝，榮光ê父，賞賜lín智慧啟示ê神，來深bat上帝；kiû lán ê Chú Iâ-so͘ Ki-tok ê Siōng-tè, êng-kng ê Pē, siúⁿ-sù lín tì-hūi khé-sī ê Sîn, lâi chhim bat Siōng-tè;

18lín ê心目得tio̍h光明，hō͘ lín知伊召人所ǹg望ê是怎樣，伊ê業tī聖徒中榮光ê富有到怎樣，lín ê sim-ba̍k tit-tio̍h kng-bêng, hō͘ lín chai I tiàu lâng só͘ ǹg-bāng ê sī cháiⁿ-iūⁿ, I ê gia̍p tī sèng-tô͘ tiong êng-kng ê pù-ū kàu cháiⁿ-iūⁿ,

19koh知伊ê權能ǹg tī咱chiah-ê信ê人大到怎樣，koh chai I ê koân-lêng ǹg tī lán chiah ê sìn ê lâng tōa kàu cháiⁿ-iūⁿ,

20照伊前所bat行tī基督大權能大氣力ê功用，hō͘伊tùi死人中koh活，tī天裡坐伊ê大pêng，chiàu I chêng só͘ bat kiâⁿ tī Ki-tok tōa koân-lêng tōa khùi-la̍t ê kong-iōng, hō͘ I tùi sí-lâng tiong koh-oa̍h, tī thiⁿ-ni̍h chē I ê tōa pêng,

21pôaⁿ過lóng總辦政事ê，掌權ê，才能ê，治理ê，kap一切所號ê名，m̄-nā tī今世也tī來世，lóng pôaⁿ過遠遠；pôaⁿ-kè lóng-chóng pān chèng-sū ê, chiáng-koân ê, châi-lêng ê, tī-lí ê, kap it-chhè só͘ hō ê miâ, m̄ nā tī kim-sè iā tī lâi-sè, lóng pôaⁿ-kè hn̄g-hn̄g;

22koh hō͘萬項有降服tī伊ê腳下，koh將伊做管萬有ê頭，來賞賜教會；koh hō͘ bān-hāng-ū hâng-ho̍k tī I ê kha-ē, koh chiong I chòe koán bān-ū ê thâu, lâi siúⁿ-sù kàu-hōe;

23教會是伊ê身軀，伊所充滿ê；伊也是用萬有充滿萬有ê。kàu-hōe sī I ê seng-khu, I só͘ chhiong-móa ê; I iā sī ēng bān ū chhiong-móa bān ū ê.

1Koh lín平素tùi lín ê過失lín ê罪過來死ê，伊也bat hō͘ lín koh活；Koh lín pêng-sò͘ tùi lín ê kè-sit lín ê chōe-kòa lâi sí ê, I iā bat hō͘ lín koh-oa̍h;

2是lín前行tī hit中間，thàn chit世間ê風俗，kap空中掌權ê君王，就是現今運行tī悖逆ê人hit-ê神；sī lín chêng kiâⁿ tī hit tiong-kan, thàn chit sè-kan ê hong-sio̍k, kap khong-tiong chiáng-koân ê kun-ông, chiū-sī hiān-kim ūn-hêng tī pōe-ge̍k ê lâng hit ê sîn;

3其中阮前也lóng tī阮肉體ê私慾teh行做，thàn肉體kap心內ê意思，生成是做thang受氣ê，親像別人一樣；kî-tiong goán chêng iā lóng tī goán jio̍k-thé ê su-io̍k teh kiâⁿ-chòe, thàn jio̍k-thé kap sim-lāi ê ì-sù, seng-sêng sī chòe thang siū-khì ê, chhin-chhiūⁿ pa̍t lâng chi̍t iūⁿ;

4總是上帝ê憐憫真豐盛，為tio̍h伊疼咱ê大仁愛，chóng-sī Siōng-tè ê lîn-bín chin hong-sēng, ūi-tio̍h I thiàⁿ lán ê tōa jîn-ài,

5當咱tùi過失已經死ê時，就hō͘咱kap基督同活，(lín tùi恩典得tio̍h救) ，tng lán tùi kè-sit í-keng sí ê sî, chiū hō͘ lán kap Ki-tok tâng-oa̍h, (lín tùi un-tián tit-tio̍h kiù),

6也hō͘咱tī基督耶穌kap伊同起來，同坐tī天裡；iā hō͘ lán tī Ki-tok Iâ-so͘ kap I tâng khí-lâi, tâng chē tī thiⁿ-ni̍h;

7koh tùi伊tī基督耶穌所賞賜咱ê仁慈，beh tī後世代顯明伊恩典ê極富有；koh tùi I tī Ki-tok Iâ-so͘ só͘ siúⁿ-sù lán ê jîn-chû, beh tī āu sè-tāi hián-bêng I un-tián ê ke̍k pù-ū;

8因為lín tùi恩典得tio̍h救，是tùi信；這也m̄是出tī lín本身，是上帝所賞賜；in-ūi lín tùi un-tián tit-tio̍h kiù, sī tùi sìn; che iā m̄ sī chhut tī lín pún-sin, sī Siōng-tè só͘ siúⁿ-sù;

9m̄是出tī所行，免得人誇口。m̄ sī chhut tī só͘ kiâⁿ, bián-tit lâng khoa-kháu.

10因為lín是伊所做成ê，受創造tī基督耶穌；來行好事，就是上帝事先備辦ê，beh hō͘咱行伊。In-ūi lín sī I só͘ chòe-chiâⁿ ê, siū chhòng-chō tī Ki-tok Iâ-so͘; lâi kiâⁿ hó sū, chiū-sī Siōng-tè tāi-seng pī-pān ê, beh hō͘ lán kiâⁿ i.

11所以lín tio̍h記得，lín前照肉體做外邦人，hō͘ hiah-ê稱做割禮ê人稱lín做無受割禮，in ê割禮就是tùi人ê手所行tī肉體ê；Só͘-í lín tio̍h kì-tit lín chêng chiàu jio̍k-thé chòe gōa-pang lâng, hō͘ hiah ê chheng chòe kat-lé ê lâng chheng lín chòe bô siū kat-lé, in ê kat-lé chiū-sī tùi lâng ê chhiú só͘ kiâⁿ tī jio̍k-thé ê;

12hit時lín無基督，以色列ê國無份，tī chiah-ê應允ê約無干涉，無所ǹg望，tiàm-tī世間m̄-bat上帝。hit sî lín bô Ki-tok, Í-sek-lia̍t ê kok bô hūn, tī chiah ê èng-ún ê iok bô kan-sia̍p, bô só͘ ǹg-bāng, tiàm-tī sè-kan m̄ bat Siōng-tè.

13Lín平素離開遠遠ê，taⁿ tiàm-tī基督耶穌，tùi伊ê血有得tio̍h近óa。Lín pêng-sò͘ lī-khui hn̄g-hn̄g ê, taⁿ tiàm-tī Ki-tok Iâ-so͘, tùi I ê huih ū tit-tio̍h kūn-óa.

14因為伊是做咱ê和平，hō͘兩pêng做一個，拆去hit中間相隔ê牆，In-ūi I sī chòe lán ê hô-pêng, hō͘ nn̄g pêng chòe chi̍t-ê, thiah-khì hit tiong-kan saⁿ-keh ê chhiûⁿ,

15koh tī伊ê肉體廢無結冤仇ê因端，就是chiah-ê誡命ê律法，記載tī規例ê；beh tī伊本身，將兩pêng造成一個新ê人，來成就和平；koh tī I ê jio̍k-thé hòe-bô kiat oan-siû ê in-toaⁿ, chiū-sī chiah ê kài-bēng ê lu̍t-hoat, kì-chài tī kui-lē ê; beh tī I pún-sin, chiong nn̄g pêng chō-chiâⁿ chi̍t ê sin ê lâng, lâi sêng-chiū hô-pêng;

16koh已經tī十字架除去hit-ê冤仇，beh hō͘兩pêng，tī一體，tùi十字架，kap上帝和；koh í-keng tī si̍p-jī-kè tû-khì hit ê oan-siû, beh hō͘ nn̄g pêng, tī chi̍t thé, tùi si̍p-jī-kè, kap Siōng-tè hô;

17koh來傳和平hō͘ lín遠ê人，也傳和平hō͘近ê；koh lâi thoân hô-pêng hō͘ lín hn̄g ê lâng, iā thoân hô-pêng hō͘ kūn ê;

18因為tùi伊，咱兩pêng tī一個神得tio̍h親近父。in-ūi tùi I, lán nn̄g pêng tī chi̍t ê Sîn tit-tio̍h chhin-kūn Pē.

19Án-ni lín無koh做外面人，寄腳ê；就是kap chiah-ê聖徒siāng國，做上帝家內ê人，Án-ni lín bô koh chòe gōa-bīn lâng, kià-kha ê; chiū-sī kap chiah ê sèng-tô͘ siāng kok, chòe Siōng-tè ke-lāi ê lâng,

20受起造tī chiah-ê使徒kap先知ê地基頂，基督耶穌家己做厝角要緊ê石；siū khí-chō tī chiah ê sù-tô͘ kap sian-ti ê tōe-ki téng, Ki-tok Iâ-so͘ ka-kī chòe chhù-kak iàu-kín ê chio̍h;

21在tī伊見若所起ê，lóng相連絡，tiàm-tī主來漸漸成做聖殿；chāi-tī I kìⁿ-nā só͘ khí ê, lóng saⁿ liân-lo̍k, tiàm-tī Chú lâi chiām-chiām chiâⁿ-chòe sèng-tiān;

22lín也tiàm-tī伊saⁿ-kap受起造，成做上帝用神所khiā起ê厝。lín iā tiàm-tī I saⁿ-kap siū khí-chō, chiâⁿ-chòe Siōng-tè ēng Sîn só͘ khiā-khí ê chhù.

1因為án-ni，我保羅，為tio̍h lín外邦人做基督耶穌ê囚犯，In-ūi án-ni, góa Pó-lô, ūi-tio̍h lín gōa-pang lâng chòe Ki-tok Iâ-so͘ ê siû-hoān,

2lín若bat聽見上帝為tio̍h lín所賞賜我恩典ê職份，lín nā bat thiaⁿ-kìⁿ Siōng-tè ūi-tio̍h lín só͘ siúⁿ-sù góa un-tián ê chit-hūn,

3就是用啟示hō͘我知hit-ê奧妙，親像我已經有大略寫ê，chiū-sī ēng khé-sī hō͘ góa chai hit ê ò-biāu, chhin-chhiūⁿ góa í-keng ū tāi-lio̍k siá ê,

4lín讀伊，就會曉得我知影基督ê奧妙，lín tha̍k i, chiū ōe hiáu-tit góa chai-iáⁿ Ki-tok ê ò-biāu,

5是前代未bat hō͘人知ê，無親像現今tī聖神啟示伊chiah-ê聖ê使徒先知一樣，sī chêng tāi bē bat hō͘ lâng chai ê, bô chhin-chhiūⁿ hiān-kim tī Sèng Sîn khé-sī I chiah ê sèng ê sù-tô͘ sian-ti chi̍t iūⁿ,

6就是外邦人tī基督耶穌，tùi福音，同做後嗣，同做一個身體，saⁿ-kap有份tī所應允ê；chiū-sī gōa-pang lâng tī Ki-tok Iâ-so͘, tùi hok-im, tâng chòe hō͘-sû, tâng chòe chi̍t ê sin-thé, saⁿ-kap ū hūn tī só͘ èng-ún ê;

7我做chit-ê福音ê差用，照上帝恩典ê賞賜，就是照伊ê權能所運行來賞賜我ê。góa chòe chit ê hok-im ê chhe-ēng, chiàu Siōng-tè un-tián ê siúⁿ-sù, chiū-sī chiàu I ê koân-lêng só͘ ūn-hêng lâi siúⁿ-sù góa ê.

8我是眾聖徒中siōng第一細ê得tio̍h chit-ê恩典賞賜我，thang將基督bōe測度得ê富有傳hō͘外邦，Góa sī chèng sèng-tô͘ tiong siōng tē it sòe ê tit-tio̍h chit ê un-tián siúⁿ-sù góa, thang chiong Ki-tok bōe chhek-to̍k-tit ê pù-ū thoân hō͘ gōa-pang,

9也hō͘眾人lóng明白chit-ê奧妙是怎樣安排，就是歷代以來khǹg密tī造萬物ê上帝ê；iā hō͘ chèng lâng lóng bêng-pe̍k chit ê ò-biāu sī cháiⁿ-iūⁿ an-pâi, chiū-sī le̍k-tāi í-lâi khǹg-ba̍t tī chō bān mi̍h ê Siōng-tè ê;

10taⁿ beh tùi教會hō͘ tī天裡chiah-ê辦政事ê，有權能ê，知上帝百般ê智慧，taⁿ beh tùi kàu-hōe hō͘ tī thiⁿ-ni̍h chiah ê pān chèng-sū ê, ū koân-lêng ê, chai Siōng-tè pah-poaⁿ ê tì-hūi,

11照伊tī咱ê主基督耶穌所定tio̍h萬代ê旨意；chiàu I tī lán ê Chú Ki-tok Iâ-so͘ só͘ tiāⁿ-tio̍h bān tāi ê chí-ì;

12tiàm-tī伊咱chiah-ê tùi信伊，有好膽koh hāi-chāi，來親近上帝。tiàm-tī I lán chiah-ê tùi sìn I, ū hó-táⁿ koh hāi-chāi, lâi chhin-kūn Siōng-tè.

13所以求lín莫得為tio̍h我替lín所受ê患難來餒志；這是lín ê榮光。Só͘-í kiû lín bo̍h-tit ūi-tio̍h góa thòe lín só͘ siū ê hoān-lān lâi lóe-chì; che sī lín ê êng-kng.

14因為án-ni，我跪落tī父ê面前，In-ūi án-ni góa kūi-lo̍h tī Pē ê bīn-chêng,

15就是tī天頂地上lóng總ê家tùi伊來號名ê，chiū-sī tī thiⁿ-téng tōe-chiūⁿ lóng-chóng ê ke tùi I lâi hō miâ ê,

16求伊照伊榮光ê富有，tùi伊ê神，用權能hō͘ lín心內勇健；kiû I chiàu I êng-kng ê pù-ū, tùi I ê Sîn, ēng koân-lêng hō͘ lín sim-lāi ióng-kiāⁿ;

17hō͘基督tùi lín ê信來khiā起tī lín ê心，hō͘ lín有釘根hē地基tī仁愛，hō͘ Ki-tok tùi lín ê sìn lâi khiā-khí tī lín ê sim, hō͘ lín ū tèng kun hē tōe-ki tī jîn-ài,

18chiah能kap lóng總ê聖徒曉悟hit-ê長、闊、高、深，chiah ōe kap lóng-chóng ê sèng-tô͘ hiáu-ngō͘ hit ê tn̂g, khoah, koâiⁿ, chhim,

19也知基督ê疼，就是pôaⁿ過tī人所會知ê疼，hō͘ lín照上帝齊備ê充滿來得tio̍h充滿。iā chai Ki-tok ê thiàⁿ, chiū-sī pôaⁿ-kè tī lâng só͘ ōe chai ê thiàⁿ, hō͘ lín chiàu Siōng-tè chiâu-pī ê chhiong-móa lâi tit-tio̍h chhiong-móa.

20上帝會行做pôaⁿ過tī咱一切所求所想ê，就是照伊所運行tī咱ê權能，Siōng-tè ōe kiâⁿ-chòe pôaⁿ-kè tī lán it-chhè só͘ kiû só͘ siūⁿ ê, chiū-sī chiàu I só͘ ūn-hêng tī lán ê koân-lêng,

21願tī教會kap tī基督耶穌榮光歸伊到萬世，代代無soah。À-bēng。goān tī kàu-hōe kap tī Ki-tok Iâ-so͘ êng-kng kui I kàu bān sè, tāi-tāi bô soah. À-bēng.