1Koh lín平素tùi lín ê過失lín ê罪過來死ê，伊也bat hō͘ lín koh活；Koh lín pêng-sò͘ tùi lín ê kè-sit lín ê chōe-kòa lâi sí ê, I iā bat hō͘ lín koh-oa̍h;

2是lín前行tī hit中間，thàn chit世間ê風俗，kap空中掌權ê君王，就是現今運行tī悖逆ê人hit-ê神；sī lín chêng kiâⁿ tī hit tiong-kan, thàn chit sè-kan ê hong-sio̍k, kap khong-tiong chiáng-koân ê kun-ông, chiū-sī hiān-kim ūn-hêng tī pōe-ge̍k ê lâng hit ê sîn;

3其中阮前也lóng tī阮肉體ê私慾teh行做，thàn肉體kap心內ê意思，生成是做thang受氣ê，親像別人一樣；kî-tiong goán chêng iā lóng tī goán jio̍k-thé ê su-io̍k teh kiâⁿ-chòe, thàn jio̍k-thé kap sim-lāi ê ì-sù, seng-sêng sī chòe thang siū-khì ê, chhin-chhiūⁿ pa̍t lâng chi̍t iūⁿ;

4總是上帝ê憐憫真豐盛，為tio̍h伊疼咱ê大仁愛，chóng-sī Siōng-tè ê lîn-bín chin hong-sēng, ūi-tio̍h I thiàⁿ lán ê tōa jîn-ài,

5當咱tùi過失已經死ê時，就hō͘咱kap基督同活，(lín tùi恩典得tio̍h救) ，tng lán tùi kè-sit í-keng sí ê sî, chiū hō͘ lán kap Ki-tok tâng-oa̍h, (lín tùi un-tián tit-tio̍h kiù),

6也hō͘咱tī基督耶穌kap伊同起來，同坐tī天裡；iā hō͘ lán tī Ki-tok Iâ-so͘ kap I tâng khí-lâi, tâng chē tī thiⁿ-ni̍h;

7koh tùi伊tī基督耶穌所賞賜咱ê仁慈，beh tī後世代顯明伊恩典ê極富有；koh tùi I tī Ki-tok Iâ-so͘ só͘ siúⁿ-sù lán ê jîn-chû, beh tī āu sè-tāi hián-bêng I un-tián ê ke̍k pù-ū;

8因為lín tùi恩典得tio̍h救，是tùi信；這也m̄是出tī lín本身，是上帝所賞賜；in-ūi lín tùi un-tián tit-tio̍h kiù, sī tùi sìn; che iā m̄ sī chhut tī lín pún-sin, sī Siōng-tè só͘ siúⁿ-sù;

9m̄是出tī所行，免得人誇口。m̄ sī chhut tī só͘ kiâⁿ, bián-tit lâng khoa-kháu.

10因為lín是伊所做成ê，受創造tī基督耶穌；來行好事，就是上帝事先備辦ê，beh hō͘咱行伊。In-ūi lín sī I só͘ chòe-chiâⁿ ê, siū chhòng-chō tī Ki-tok Iâ-so͘; lâi kiâⁿ hó sū, chiū-sī Siōng-tè tāi-seng pī-pān ê, beh hō͘ lán kiâⁿ i.

11所以lín tio̍h記得，lín前照肉體做外邦人，hō͘ hiah-ê稱做割禮ê人稱lín做無受割禮，in ê割禮就是tùi人ê手所行tī肉體ê；Só͘-í lín tio̍h kì-tit lín chêng chiàu jio̍k-thé chòe gōa-pang lâng, hō͘ hiah ê chheng chòe kat-lé ê lâng chheng lín chòe bô siū kat-lé, in ê kat-lé chiū-sī tùi lâng ê chhiú só͘ kiâⁿ tī jio̍k-thé ê;

12hit時lín無基督，以色列ê國無份，tī chiah-ê應允ê約無干涉，無所ǹg望，tiàm-tī世間m̄-bat上帝。hit sî lín bô Ki-tok, Í-sek-lia̍t ê kok bô hūn, tī chiah ê èng-ún ê iok bô kan-sia̍p, bô só͘ ǹg-bāng, tiàm-tī sè-kan m̄ bat Siōng-tè.

13Lín平素離開遠遠ê，taⁿ tiàm-tī基督耶穌，tùi伊ê血有得tio̍h近óa。Lín pêng-sò͘ lī-khui hn̄g-hn̄g ê, taⁿ tiàm-tī Ki-tok Iâ-so͘, tùi I ê huih ū tit-tio̍h kūn-óa.

14因為伊是做咱ê和平，hō͘兩pêng做一個，拆去hit中間相隔ê牆，In-ūi I sī chòe lán ê hô-pêng, hō͘ nn̄g pêng chòe chi̍t-ê, thiah-khì hit tiong-kan saⁿ-keh ê chhiûⁿ,

15koh tī伊ê肉體廢無結冤仇ê因端，就是chiah-ê誡命ê律法，記載tī規例ê；beh tī伊本身，將兩pêng造成一個新ê人，來成就和平；koh tī I ê jio̍k-thé hòe-bô kiat oan-siû ê in-toaⁿ, chiū-sī chiah ê kài-bēng ê lu̍t-hoat, kì-chài tī kui-lē ê; beh tī I pún-sin, chiong nn̄g pêng chō-chiâⁿ chi̍t ê sin ê lâng, lâi sêng-chiū hô-pêng;

16koh已經tī十字架除去hit-ê冤仇，beh hō͘兩pêng，tī一體，tùi十字架，kap上帝和；koh í-keng tī si̍p-jī-kè tû-khì hit ê oan-siû, beh hō͘ nn̄g pêng, tī chi̍t thé, tùi si̍p-jī-kè, kap Siōng-tè hô;

17koh來傳和平hō͘ lín遠ê人，也傳和平hō͘近ê；koh lâi thoân hô-pêng hō͘ lín hn̄g ê lâng, iā thoân hô-pêng hō͘ kūn ê;

18因為tùi伊，咱兩pêng tī一個神得tio̍h親近父。in-ūi tùi I, lán nn̄g pêng tī chi̍t ê Sîn tit-tio̍h chhin-kūn Pē.

19Án-ni lín無koh做外面人，寄腳ê；就是kap chiah-ê聖徒siāng國，做上帝家內ê人，Án-ni lín bô koh chòe gōa-bīn lâng, kià-kha ê; chiū-sī kap chiah ê sèng-tô͘ siāng kok, chòe Siōng-tè ke-lāi ê lâng,

20受起造tī chiah-ê使徒kap先知ê地基頂，基督耶穌家己做厝角要緊ê石；siū khí-chō tī chiah ê sù-tô͘ kap sian-ti ê tōe-ki téng, Ki-tok Iâ-so͘ ka-kī chòe chhù-kak iàu-kín ê chio̍h;

21在tī伊見若所起ê，lóng相連絡，tiàm-tī主來漸漸成做聖殿；chāi-tī I kìⁿ-nā só͘ khí ê, lóng saⁿ liân-lo̍k, tiàm-tī Chú lâi chiām-chiām chiâⁿ-chòe sèng-tiān;

22lín也tiàm-tī伊saⁿ-kap受起造，成做上帝用神所khiā起ê厝。lín iā tiàm-tī I saⁿ-kap siū khí-chō, chiâⁿ-chòe Siōng-tè ēng Sîn só͘ khiā-khí ê chhù.

1因為án-ni，我保羅，為tio̍h lín外邦人做基督耶穌ê囚犯，In-ūi án-ni, góa Pó-lô, ūi-tio̍h lín gōa-pang lâng chòe Ki-tok Iâ-so͘ ê siû-hoān,

2lín若bat聽見上帝為tio̍h lín所賞賜我恩典ê職份，lín nā bat thiaⁿ-kìⁿ Siōng-tè ūi-tio̍h lín só͘ siúⁿ-sù góa un-tián ê chit-hūn,

3就是用啟示hō͘我知hit-ê奧妙，親像我已經有大略寫ê，chiū-sī ēng khé-sī hō͘ góa chai hit ê ò-biāu, chhin-chhiūⁿ góa í-keng ū tāi-lio̍k siá ê,

4lín讀伊，就會曉得我知影基督ê奧妙，lín tha̍k i, chiū ōe hiáu-tit góa chai-iáⁿ Ki-tok ê ò-biāu,

5是前代未bat hō͘人知ê，無親像現今tī聖神啟示伊chiah-ê聖ê使徒先知一樣，sī chêng tāi bē bat hō͘ lâng chai ê, bô chhin-chhiūⁿ hiān-kim tī Sèng Sîn khé-sī I chiah ê sèng ê sù-tô͘ sian-ti chi̍t iūⁿ,

6就是外邦人tī基督耶穌，tùi福音，同做後嗣，同做一個身體，saⁿ-kap有份tī所應允ê；chiū-sī gōa-pang lâng tī Ki-tok Iâ-so͘, tùi hok-im, tâng chòe hō͘-sû, tâng chòe chi̍t ê sin-thé, saⁿ-kap ū hūn tī só͘ èng-ún ê;

7我做chit-ê福音ê差用，照上帝恩典ê賞賜，就是照伊ê權能所運行來賞賜我ê。góa chòe chit ê hok-im ê chhe-ēng, chiàu Siōng-tè un-tián ê siúⁿ-sù, chiū-sī chiàu I ê koân-lêng só͘ ūn-hêng lâi siúⁿ-sù góa ê.

8我是眾聖徒中siōng第一細ê得tio̍h chit-ê恩典賞賜我，thang將基督bōe測度得ê富有傳hō͘外邦，Góa sī chèng sèng-tô͘ tiong siōng tē it sòe ê tit-tio̍h chit ê un-tián siúⁿ-sù góa, thang chiong Ki-tok bōe chhek-to̍k-tit ê pù-ū thoân hō͘ gōa-pang,

9也hō͘眾人lóng明白chit-ê奧妙是怎樣安排，就是歷代以來khǹg密tī造萬物ê上帝ê；iā hō͘ chèng lâng lóng bêng-pe̍k chit ê ò-biāu sī cháiⁿ-iūⁿ an-pâi, chiū-sī le̍k-tāi í-lâi khǹg-ba̍t tī chō bān mi̍h ê Siōng-tè ê;

10taⁿ beh tùi教會hō͘ tī天裡chiah-ê辦政事ê，有權能ê，知上帝百般ê智慧，taⁿ beh tùi kàu-hōe hō͘ tī thiⁿ-ni̍h chiah ê pān chèng-sū ê, ū koân-lêng ê, chai Siōng-tè pah-poaⁿ ê tì-hūi,

11照伊tī咱ê主基督耶穌所定tio̍h萬代ê旨意；chiàu I tī lán ê Chú Ki-tok Iâ-so͘ só͘ tiāⁿ-tio̍h bān tāi ê chí-ì;

12tiàm-tī伊咱chiah-ê tùi信伊，有好膽koh hāi-chāi，來親近上帝。tiàm-tī I lán chiah-ê tùi sìn I, ū hó-táⁿ koh hāi-chāi, lâi chhin-kūn Siōng-tè.

13所以求lín莫得為tio̍h我替lín所受ê患難來餒志；這是lín ê榮光。Só͘-í kiû lín bo̍h-tit ūi-tio̍h góa thòe lín só͘ siū ê hoān-lān lâi lóe-chì; che sī lín ê êng-kng.

14因為án-ni，我跪落tī父ê面前，In-ūi án-ni góa kūi-lo̍h tī Pē ê bīn-chêng,

15就是tī天頂地上lóng總ê家tùi伊來號名ê，chiū-sī tī thiⁿ-téng tōe-chiūⁿ lóng-chóng ê ke tùi I lâi hō miâ ê,

16求伊照伊榮光ê富有，tùi伊ê神，用權能hō͘ lín心內勇健；kiû I chiàu I êng-kng ê pù-ū, tùi I ê Sîn, ēng koân-lêng hō͘ lín sim-lāi ióng-kiāⁿ;

17hō͘基督tùi lín ê信來khiā起tī lín ê心，hō͘ lín有釘根hē地基tī仁愛，hō͘ Ki-tok tùi lín ê sìn lâi khiā-khí tī lín ê sim, hō͘ lín ū tèng kun hē tōe-ki tī jîn-ài,

18chiah能kap lóng總ê聖徒曉悟hit-ê長、闊、高、深，chiah ōe kap lóng-chóng ê sèng-tô͘ hiáu-ngō͘ hit ê tn̂g, khoah, koâiⁿ, chhim,

19也知基督ê疼，就是pôaⁿ過tī人所會知ê疼，hō͘ lín照上帝齊備ê充滿來得tio̍h充滿。iā chai Ki-tok ê thiàⁿ, chiū-sī pôaⁿ-kè tī lâng só͘ ōe chai ê thiàⁿ, hō͘ lín chiàu Siōng-tè chiâu-pī ê chhiong-móa lâi tit-tio̍h chhiong-móa.

20上帝會行做pôaⁿ過tī咱一切所求所想ê，就是照伊所運行tī咱ê權能，Siōng-tè ōe kiâⁿ-chòe pôaⁿ-kè tī lán it-chhè só͘ kiû só͘ siūⁿ ê, chiū-sī chiàu I só͘ ūn-hêng tī lán ê koân-lêng,

21願tī教會kap tī基督耶穌榮光歸伊到萬世，代代無soah。À-bēng。goān tī kàu-hōe kap tī Ki-tok Iâ-so͘ êng-kng kui I kàu bān sè, tāi-tāi bô soah. À-bēng.

1所以我tiàm-tī主做囚犯ê，勸lín行tāi-chì tio̍h合tī所受ê召，Só͘-í góa tiàm-tī Chú chòe siû-hoān ê, khǹg lín kiâⁿ tāi-chì tio̍h ha̍p tī só͘ siū ê tiàu,

2凡事謙遜、溫柔，用吞忍，tī仁愛相寬容；hoān sū khiam-sùn, un-jiû, ēng thun-lún, tī jîn-ài saⁿ khoan-iông;

3用和平相結聯，致意守聖神所賞賜ê合一。ēng hô-pêng saⁿ kiat-liân, tì-ì siú Sèng Sîn só͘ siúⁿ-sù ê ha̍p-it.

4因為體一個，神一個，親像lín受召ê ǹg望也是一個，In-ūi thé chi̍t-ê, Sîn chi̍t-ê, chhin-chhiūⁿ lín siū tiàu ê ǹg-bāng iā sī chi̍t-ê,

5主一個，信一個，洗禮一個，Chú chi̍t-ê, sìn chi̍t-ê, sóe-lé chi̍t-ê,

6上帝一個，做眾人ê父，tī萬有ê頂面，貫串tī萬有，tiàm-tī萬有ê。Siōng-tè chi̍t-ê, chòe chèng-lâng ê Pē, tī bān-ū ê téng-bīn, koàn-chhoàn tī bān-ū, tiàm-tī bān-ū ê.

7總是用恩典hō͘咱ta̍k人，是照基督恩賜ê份量。Chóng-sī ēng un-tián hō͘ lán ta̍k lâng, sī chiàu Ki-tok un-sù ê hūn-liōng.

8所以講， 伊升高ê時就掠hiah-ê受掠ê， 也將chiah-ê恩賜分hō͘人。Só͘-í kóng, I seng koâiⁿ ê sî chiū lia̍h hiah ê siū lia̍h ê, Iā chiong chiah ê un-sù pun hō͘ lâng.

9(Taⁿ既然講，伊升高，kiám m̄是伊bat降落tī地下mah？(Taⁿ kì-jiân kóng, I seng koâiⁿ, kiám m̄ sī I bat kàng-lo̍h tī tōe ē mah?

10hit-ê降落ê就是hit-ê升高tī chiah-ê天ê頂面ê，beh充滿萬物。)Hit ê kàng-lo̍h ê chiū-sī hit ê seng-koâiⁿ tī chiah ê thiⁿ ê téng-bīn ê, beh chhiong-móa bān mi̍h.)

11伊所賞賜ê，有使徒；有先知，有傳福音ê，有牧師kap先生，I só͘ siúⁿ-sù ê, ū sù-tô͘; ū sian-ti, ū thoân hok-im ê, ū bo̍k-su kap sian-siⁿ,

12為tio̍h beh hō͘聖徒齊備，來做差用ê工，起造基督ê身體；ūi-tio̍h beh hō͘ sèng-tô͘ chiâu-pī, lâi chòe chhe-ēng ê kang, khí-chō Ki-tok ê sin-thé;

13直到咱眾人tī信，以及bat上帝ê Kiáⁿ，來合一，到成一個完全ê人，到得tio̍h基督ê充滿來長成hit般；ti̍t-kàu lán chèng lâng tī sìn, í-ki̍p bat Siōng-tè ê Kiáⁿ, lâi ha̍p-it, kàu chiâⁿ chi̍t ê oân-choân ê lâng, kàu tit-tio̍h Ki-tok ê chhiong-móa lâi tióng-sêng, hit pan;

14beh hō͘咱無koh做gín-ná，hō͘ ta̍k樣教示ê風搖choah漂流，中tio̍h人ê詭計，kap瞞騙，致到hō͘人差謬ê法術；beh hō͘ lán bô koh chòe gín-ná, hō͘ ta̍k iūⁿ kà-sī ê hong iô-choah phiau-liû, tiòng-tio̍h lâng ê khúi-kè, kap môa-phiàn, tì-kàu hō͘ lâng chha-biū ê hoat-su̍t;

15是tiàm-tī仁愛講話真實，hō͘咱tī萬項漸漸大，到tī hit-ê做頭ê，就是基督；sī tiàm-tī jîn-ài kóng ōe chin-si̍t, hō͘ lán tī bān hāng chiām-chiām tōa, kàu tī hit ê chòe Thâu ê, chiū-sī Ki-tok;

16tùi tī伊，全身結合連絡，就是tùi百節ê相接應，照ta̍k體該然ê運動，致到身軀ná長大，tī仁愛家己起造。tùi tī I, choân sin kiat-ha̍p liân-lo̍k, chiū-sī tùi pah-chat ê saⁿ chiap-èng, chiàu ta̍k thé kai-jiân ê ūn-tōng, tì-kàu seng-khu ná tióng tōa, tī jîn-ài ka-kī khí-chō.

17所以我講伊，koh tī主證明伊，lín ê所行m̄-thang koh親像外邦人ê所行，in ê心志空空，Só͘-í góa kóng i, koh tī Chú chèng-bêng i, lín ê só͘ kiâⁿ m̄ thang koh chhin-chhiūⁿ gōa-pang lâng ê só͘ kiâⁿ, in ê sim-chì khang-khang,

18in ê心思烏暗，隔斷tī上帝ê活命，是tùi in m̄知影，in ê心剛硬；in ê sim-su o͘-àm, keh-tn̄g tī Siōng-tè ê oa̍h-miā, sī tùi in m̄ chai-iáⁿ, in ê sim kong-ngī;

19既然喪失良心，就放縱家己tī邪癖，tùi貪來行ta̍k樣ê污穢。kì-jiân sòng-sit liông-sim, chiū hòng-chhiòng ka-kī tī siâ-phiah, tùi tham lâi kiâⁿ ta̍k iūⁿ ê ù-òe.

20但是lín學習基督m̄是án-ni；Nā-sī lín ha̍k-si̍p Ki-tok m̄ sī án-ni;

21lín若果然聽見伊，koh tī伊受教示，照tī耶穌所有ê真實；lín nā kó-jiân thiaⁿ-kìⁿ I, koh tī I siū kà-sī, chiàu tī Iâ-so͘ só͘ ū ê chin-si̍t;

22就是論到從前ê行做，lín thǹg去舊ê人，就是照引誘人ê私慾teh敗壞ê；chiū-sī lūn-kàu chiông-chiân ê kiâⁿ-chòe, lín thǹg-khì kū ê lâng, chiū-sī chiàu ín-iú lâng ê su-io̍k teh pāi-hoāi ê;

23koh lín心神換新，koh lín sim-sîn ōaⁿ sin,

24穿hit-ê新ê人，就是照上帝用真理ê義kap聖來創造ê。chhēng hit ê sin ê lâng, chiū-sī chiàu Siōng-tè ēng chin-lí ê gī kap sèng lâi chhòng-chō ê.

25所以tio̍h除去白賊，ta̍k人kap伊ê厝邊講真實，因為咱相仝做體。Só͘-í tio̍h tû-khì pe̍h-chha̍t, ta̍k lâng kap i ê chhù-piⁿ kóng chin-si̍t, in-ūi lán saⁿ-kāng chòe thé.

26Lín受氣，tio̍h m̄-thang犯罪；有激受氣，m̄-thang到日落，Lín siū-khì, tio̍h m̄ thang hoān-chōe; ū kek siū-khì, m̄ thang kàu ji̍t-lo̍h,

27也m̄-thang hō͘魔鬼有縫thang入。iā m̄ thang hō͘ Mô͘-kúi ū phāng thang ji̍p.

28偷the̍h ê莫得koh偷the̍h，寧可tio̍h磨，親手做好ê 工，chiah有thang分hō͘欠缺ê人。Thau-the̍h ê bo̍h-tit koh thau-the̍h, lêng-khó͘ tio̍h-bôa, chhin-chhiú chòe hó ê kang, chiah ū thang pun hō͘ khiàm-kheh ê lâng.

29Lín ê嘴lóng m̄-thang講出lâ-sâm ê話，獨獨tio̍h講好話，照及時ê欠缺來造就伊，hō͘聽ê人得tio̍h恩典。Lín ê chhùi lóng m̄ thang kóng-chhut lâ-sâm ê ōe, to̍k-to̍k tio̍h kóng hó ōe, chiàu ki̍p-sî ê khiàm-kheh lâi chō-chiū i, hō͘ thiaⁿ ê lâng tit-tio̍h un-tián.

30也莫得hō͘上帝ê聖神憂悶，就是所bat用來蓋印lín，到tī贖回ê日ê。Iā bo̍h-tit hō͘ Siōng-tè ê Sèng Sîn iu-būn, chiū-sī só͘ bat ēng lâi khàm-ìn lín, kàu tī sio̍k-hôe ê ji̍t ê.

31一切ê苦毒、怨恨、受氣、喧嚷、譭謗，以及一切ê惡毒，lóng tio̍h tùi lín中間除去。It-chhè ê khó͘-to̍k, oàn-hūn, siū-khì, soan-jióng, húi-pòng, í-ki̍p it-chhè ê ok-to̍k, lóng tio̍h tùi lín tiong-kan tû-khì.

32Koh tio̍h用仁慈相款待，存憐憫ê心；大家相赦免，親像上帝tī基督bat赦免lín一樣。Koh tio̍h ēng jîn-chû saⁿ khoán-thāi, chûn lîn-bín ê sim; tāi-ke saⁿ sià-bián, chhin-chhiūⁿ Siōng-tè tī Ki-tok bat sià-bián lín chi̍t iūⁿ.