1所以我tiàm-tī主做囚犯ê，勸lín行tāi-chì tio̍h合tī所受ê召，Só͘-í góa tiàm-tī Chú chòe siû-hoān ê, khǹg lín kiâⁿ tāi-chì tio̍h ha̍p tī só͘ siū ê tiàu,

2凡事謙遜、溫柔，用吞忍，tī仁愛相寬容；hoān sū khiam-sùn, un-jiû, ēng thun-lún, tī jîn-ài saⁿ khoan-iông;

3用和平相結聯，致意守聖神所賞賜ê合一。ēng hô-pêng saⁿ kiat-liân, tì-ì siú Sèng Sîn só͘ siúⁿ-sù ê ha̍p-it.

4因為體一個，神一個，親像lín受召ê ǹg望也是一個，In-ūi thé chi̍t-ê, Sîn chi̍t-ê, chhin-chhiūⁿ lín siū tiàu ê ǹg-bāng iā sī chi̍t-ê,

5主一個，信一個，洗禮一個，Chú chi̍t-ê, sìn chi̍t-ê, sóe-lé chi̍t-ê,

6上帝一個，做眾人ê父，tī萬有ê頂面，貫串tī萬有，tiàm-tī萬有ê。Siōng-tè chi̍t-ê, chòe chèng-lâng ê Pē, tī bān-ū ê téng-bīn, koàn-chhoàn tī bān-ū, tiàm-tī bān-ū ê.

7總是用恩典hō͘咱ta̍k人，是照基督恩賜ê份量。Chóng-sī ēng un-tián hō͘ lán ta̍k lâng, sī chiàu Ki-tok un-sù ê hūn-liōng.

8所以講， 伊升高ê時就掠hiah-ê受掠ê， 也將chiah-ê恩賜分hō͘人。Só͘-í kóng, I seng koâiⁿ ê sî chiū lia̍h hiah ê siū lia̍h ê, Iā chiong chiah ê un-sù pun hō͘ lâng.

9(Taⁿ既然講，伊升高，kiám m̄是伊bat降落tī地下mah？(Taⁿ kì-jiân kóng, I seng koâiⁿ, kiám m̄ sī I bat kàng-lo̍h tī tōe ē mah?

10hit-ê降落ê就是hit-ê升高tī chiah-ê天ê頂面ê，beh充滿萬物。)Hit ê kàng-lo̍h ê chiū-sī hit ê seng-koâiⁿ tī chiah ê thiⁿ ê téng-bīn ê, beh chhiong-móa bān mi̍h.)

11伊所賞賜ê，有使徒；有先知，有傳福音ê，有牧師kap先生，I só͘ siúⁿ-sù ê, ū sù-tô͘; ū sian-ti, ū thoân hok-im ê, ū bo̍k-su kap sian-siⁿ,

12為tio̍h beh hō͘聖徒齊備，來做差用ê工，起造基督ê身體；ūi-tio̍h beh hō͘ sèng-tô͘ chiâu-pī, lâi chòe chhe-ēng ê kang, khí-chō Ki-tok ê sin-thé;

13直到咱眾人tī信，以及bat上帝ê Kiáⁿ，來合一，到成一個完全ê人，到得tio̍h基督ê充滿來長成hit般；ti̍t-kàu lán chèng lâng tī sìn, í-ki̍p bat Siōng-tè ê Kiáⁿ, lâi ha̍p-it, kàu chiâⁿ chi̍t ê oân-choân ê lâng, kàu tit-tio̍h Ki-tok ê chhiong-móa lâi tióng-sêng, hit pan;

14beh hō͘咱無koh做gín-ná，hō͘ ta̍k樣教示ê風搖choah漂流，中tio̍h人ê詭計，kap瞞騙，致到hō͘人差謬ê法術；beh hō͘ lán bô koh chòe gín-ná, hō͘ ta̍k iūⁿ kà-sī ê hong iô-choah phiau-liû, tiòng-tio̍h lâng ê khúi-kè, kap môa-phiàn, tì-kàu hō͘ lâng chha-biū ê hoat-su̍t;

15是tiàm-tī仁愛講話真實，hō͘咱tī萬項漸漸大，到tī hit-ê做頭ê，就是基督；sī tiàm-tī jîn-ài kóng ōe chin-si̍t, hō͘ lán tī bān hāng chiām-chiām tōa, kàu tī hit ê chòe Thâu ê, chiū-sī Ki-tok;

16tùi tī伊，全身結合連絡，就是tùi百節ê相接應，照ta̍k體該然ê運動，致到身軀ná長大，tī仁愛家己起造。tùi tī I, choân sin kiat-ha̍p liân-lo̍k, chiū-sī tùi pah-chat ê saⁿ chiap-èng, chiàu ta̍k thé kai-jiân ê ūn-tōng, tì-kàu seng-khu ná tióng tōa, tī jîn-ài ka-kī khí-chō.

17所以我講伊，koh tī主證明伊，lín ê所行m̄-thang koh親像外邦人ê所行，in ê心志空空，Só͘-í góa kóng i, koh tī Chú chèng-bêng i, lín ê só͘ kiâⁿ m̄ thang koh chhin-chhiūⁿ gōa-pang lâng ê só͘ kiâⁿ, in ê sim-chì khang-khang,

18in ê心思烏暗，隔斷tī上帝ê活命，是tùi in m̄知影，in ê心剛硬；in ê sim-su o͘-àm, keh-tn̄g tī Siōng-tè ê oa̍h-miā, sī tùi in m̄ chai-iáⁿ, in ê sim kong-ngī;

19既然喪失良心，就放縱家己tī邪癖，tùi貪來行ta̍k樣ê污穢。kì-jiân sòng-sit liông-sim, chiū hòng-chhiòng ka-kī tī siâ-phiah, tùi tham lâi kiâⁿ ta̍k iūⁿ ê ù-òe.

20但是lín學習基督m̄是án-ni；Nā-sī lín ha̍k-si̍p Ki-tok m̄ sī án-ni;

21lín若果然聽見伊，koh tī伊受教示，照tī耶穌所有ê真實；lín nā kó-jiân thiaⁿ-kìⁿ I, koh tī I siū kà-sī, chiàu tī Iâ-so͘ só͘ ū ê chin-si̍t;

22就是論到從前ê行做，lín thǹg去舊ê人，就是照引誘人ê私慾teh敗壞ê；chiū-sī lūn-kàu chiông-chiân ê kiâⁿ-chòe, lín thǹg-khì kū ê lâng, chiū-sī chiàu ín-iú lâng ê su-io̍k teh pāi-hoāi ê;

23koh lín心神換新，koh lín sim-sîn ōaⁿ sin,

24穿hit-ê新ê人，就是照上帝用真理ê義kap聖來創造ê。chhēng hit ê sin ê lâng, chiū-sī chiàu Siōng-tè ēng chin-lí ê gī kap sèng lâi chhòng-chō ê.

25所以tio̍h除去白賊，ta̍k人kap伊ê厝邊講真實，因為咱相仝做體。Só͘-í tio̍h tû-khì pe̍h-chha̍t, ta̍k lâng kap i ê chhù-piⁿ kóng chin-si̍t, in-ūi lán saⁿ-kāng chòe thé.

26Lín受氣，tio̍h m̄-thang犯罪；有激受氣，m̄-thang到日落，Lín siū-khì, tio̍h m̄ thang hoān-chōe; ū kek siū-khì, m̄ thang kàu ji̍t-lo̍h,

27也m̄-thang hō͘魔鬼有縫thang入。iā m̄ thang hō͘ Mô͘-kúi ū phāng thang ji̍p.

28偷the̍h ê莫得koh偷the̍h，寧可tio̍h磨，親手做好ê 工，chiah有thang分hō͘欠缺ê人。Thau-the̍h ê bo̍h-tit koh thau-the̍h, lêng-khó͘ tio̍h-bôa, chhin-chhiú chòe hó ê kang, chiah ū thang pun hō͘ khiàm-kheh ê lâng.

29Lín ê嘴lóng m̄-thang講出lâ-sâm ê話，獨獨tio̍h講好話，照及時ê欠缺來造就伊，hō͘聽ê人得tio̍h恩典。Lín ê chhùi lóng m̄ thang kóng-chhut lâ-sâm ê ōe, to̍k-to̍k tio̍h kóng hó ōe, chiàu ki̍p-sî ê khiàm-kheh lâi chō-chiū i, hō͘ thiaⁿ ê lâng tit-tio̍h un-tián.

30也莫得hō͘上帝ê聖神憂悶，就是所bat用來蓋印lín，到tī贖回ê日ê。Iā bo̍h-tit hō͘ Siōng-tè ê Sèng Sîn iu-būn, chiū-sī só͘ bat ēng lâi khàm-ìn lín, kàu tī sio̍k-hôe ê ji̍t ê.

31一切ê苦毒、怨恨、受氣、喧嚷、譭謗，以及一切ê惡毒，lóng tio̍h tùi lín中間除去。It-chhè ê khó͘-to̍k, oàn-hūn, siū-khì, soan-jióng, húi-pòng, í-ki̍p it-chhè ê ok-to̍k, lóng tio̍h tùi lín tiong-kan tû-khì.

32Koh tio̍h用仁慈相款待，存憐憫ê心；大家相赦免，親像上帝tī基督bat赦免lín一樣。Koh tio̍h ēng jîn-chû saⁿ khoán-thāi, chûn lîn-bín ê sim; tāi-ke saⁿ sià-bián, chhin-chhiūⁿ Siōng-tè tī Ki-tok bat sià-bián lín chi̍t iūⁿ.

1Lín既然做上帝所疼ê kiáⁿ，tio̍h學上帝。Lín kì-jiân chòe Siōng-tè só͘ thiàⁿ ê kiáⁿ, tio̍h o̍h Siōng-tè.

2也tio̍h行tī仁愛，親像基督bat疼lín，替咱獻家己做禮物做祭祀，芳芳tī上帝ê面前。Iā tio̍h kiâⁿ tī jîn-ài, chhin-chhiūⁿ Ki-tok bat thiàⁿ lín, thòe lán hiàn ka-kī chòe lé-mi̍h chòe chè-sū, phang-phang tī Siōng-tè ê bīn-chêng.

3但是姦淫kap一切ê污穢，á是貪心，tī lín中間連講起也m̄-thang，chiah是照聖徒所合宜ê；Nā-sī kan-îm kap it-chhè ê ù-òe, á-sī tham-sim, tī lín tiong-kan liân kóng-khí iā m̄ thang, chiah sī chiàu sèng-tô͘ só͘ ha̍p-gî ê;

4見笑事，kap浮漂ê話，á是戲謔ê話，也是不該；khah好tio̍h講感謝ê話。kiàn-siàu sū, kap phû-phiò ê ōe, á-sī hì-hiauh ê ōe, iā sī put-kai; khah hó tio̍h kóng kám-siā ê ōe.

5因為lín確實知見若淫亂ê，á是污穢ê，á是貪心就是拜偶像ê，lóng bōe得thang承接家業tī基督kap上帝ê國。In-ūi lín khak-si̍t chai kìⁿ-nā îm-loān ê, á-sī ù-òe ê, á-sī tham-sim chiū-sī pài ngó͘-siōng ê, lóng bōe tit thang sêng-chiap ke-gia̍p tī Ki-tok kap Siōng-tè ê kok.

6Lín莫得hō͘人用無影話所欺騙；因為上帝ê受氣為tio̍h chiah-ê事到tī悖逆ê人。Lín bo̍h-tit hō͘ lâng ēng bô-iáⁿ ōe só͘ khi-phiàn; in-ūi Siōng-tè ê siū-khì ūi-tio̍h chiah ê sū kàu tī pōe-ge̍k ê lâng.

7所以lín莫得kap in有份。Só͘-í lín bo̍h-tit kap in ū hūn.

8因為lín前是暗，但是taⁿ tiàm-tī主是光，tio̍h照光明ê人來行，In-ūi lín chêng sī àm, nā-sī taⁿ tiàm-tī Chú sī kng, tio̍h chiàu kng-bêng ê lâng lâi kiâⁿ,

9(因為光ê結子在tī一切ê好kap義kap真)，(in-ūi kng ê kiat-chí chāi-tī it-chhè ê hó kap gī kap chin),

10驗明甚麼是主所歡喜ê。giām-bêng sím-mi̍h sī Chú só͘ hoaⁿ-hí ê.

11莫得chham-chhap tī烏暗無效果ê行做，khah好tio̍h責備in；Bo̍h-tit chham-chhap tī o͘-àm bô hāu-kó ê kiâⁿ-chòe, khah hó tio̍h chek-pī in;

12因為in tī暗靜所行ê，連講都見笑。in-ūi in tī àm-chīⁿ só͘ kiâⁿ ê, liân kóng to͘ kiàn-siàu.

13獨獨凡事受責備ê就是hō͘光所顯明；因為見若受顯明ê lóng是光。To̍k-to̍k hoān sū siū chek-pī ê chiū-sī hō͘ kng só͘ hián-bêng; in-ūi kìⁿ-nā siū hián-bêng ê lóng sī kng.

14所以講，睏ê人tio̍h醒，tùi死人中起來，就基督ê光beh照你。Só͘-í kóng, Khùn ê lâng tio̍h chhíⁿ, tùi sí-lâng tiong khí-lâi, chiū Ki-tok ê kng beh chiò lí.

15所以tio̍h chim-chiok看lín ê所行是怎樣，m̄-thang親像無知識ê，Só͘-í tio̍h chim-chiok khòaⁿ lín ê só͘ kiâⁿ sī cháiⁿ-iūⁿ, m̄ thang chhin-chhiūⁿ bô tì-sek ê,

16tio̍h親像有知識ê，tio̍h保惜機會，因為當今ê時勢邪惡。tio̍h chhin-chhiūⁿ ū tì-sek ê, tio̍h pó-sioh ki-hōe, in-ūi tong-kim ê sî-sè siâ-ok.

17所以m̄-thang戇戇，tio̍h明白甚麼是主ê旨意。Só͘-í m̄ thang gōng-gōng, tio̍h bêng-pe̍k sím-mi̍h sī Chú ê chí-ì.

18也莫得酒醉，會致到放肆，是tio̍h hō͘聖神充滿；Iā bo̍h-tit chiú-chùi, ōe tì-kàu hòng-sù, sī tio̍h hō͘ Sèng Sîn chhiong-móa;

19用詩，用歌，用神ê賦，大家相應答，用心吟詩作樂來o-ló主；ēng si, ēng koa, ēng sîn ê hù, tāi-ke saⁿ ìn-tap, ēng sim gîm si chok-ga̍k lâi o-ló Chú;

20萬事常常tī咱ê主耶穌基督ê名，來感謝父上帝；bān sū siông-siông tī lán ê Chú Iâ-so͘ Ki-tok ê miâ lâi kám-siā Pē Siōng-tè;

21tio̍h敬畏基督來相順服。tio̍h kèng-ùi Ki-tok lâi saⁿ sūn-ho̍k.

22做婦人人ê，tio̍h順服家己ê丈夫，親像順服主一樣。Chòe hū-jîn-lâng ê, tio̍h sūn-ho̍k ka-kī ê tiōng-hu, chhin-chhiūⁿ sūn-ho̍k Chú chi̍t iūⁿ.

23因為丈夫做婦人人ê頭，親像基督做教會ê頭，也家己做全體ê救主。In-ūi tiōng-hu chòe hū-jîn-lâng ê thâu, chhin-chhiūⁿ Ki-tok chòe kàu-hōe ê thâu, iā ka-kī chòe choân-thé ê Kiù-chú.

24總是教會順服基督，婦人人凡事也tio̍h án-ni順服丈夫。Chóng-sī kàu-hōe sūn-ho̍k Ki-tok, hū-jîn-lâng hoān sū iā tio̍h án-ni sūn-ho̍k tiōng-hu.

25做丈夫ê，lín tio̍h疼婦人人，親像基督疼教會，也替伊獻家己，Chòe tiōng-hu ê, lín tio̍h thiàⁿ hū-jîn-lâng, chhin-chhiūⁿ Ki-tok thiàⁿ kàu-hōe, iā thòe i hiàn ka-kī,

26beh hō͘伊成聖，是用水ê洗kap道理來清氣伊，beh hō͘ i chiâⁿ-sèng, sī ēng chúi ê sóe kap tō-lí lâi chheng-khì i,

27beh將伊獻hō͘家己做榮光ê教會，無點，無皺面，hit款lóng無，就是聖無瑕疵。beh chiong i hiàn hō͘ ka-kī chòe êng-kng ê kàu-hōe, bô tiám, bô jiàu-bīn, hit khoán lóng bô, chiū-sī sèng bô hâ-chhû.

28Án-ni丈夫tio̍h疼伊ê婦人人親像家己ê身體。疼家己ê婦人人就是疼家己。Án-ni tiōng-hu tio̍h thiàⁿ i ê hū-jîn-lâng chhin-chhiūⁿ ka-kī ê sin-thé. Thiàⁿ ka-kī ê hū-jîn-lâng chiū-sī thiàⁿ ka-kī.

29因為未bat有人怨恨家己ê身軀，就是養飼伊，保惜伊，親像基督ê款待教會；In-ūi bē bat ū lâng oàn-hūn ka-kī ê seng-khu, chiū-sī iúⁿ-chhī i, pó-sioh i, chhin-chhiūⁿ Ki-tok ê khoán-thāi kàu-hōe;

30因為咱就是伊身軀ê百體。in-ūi lán chiū-sī I seng-khu ê pah-thé.

31因為án-ni人beh離開父母，結聯伊ê bó͘，in兩個beh成做一體。In-ūi án-ni lâng beh lī-khui pē-bú, kiat-liân i ê bó͘, in nn̄g-ê beh chiâⁿ-chòe chi̍t thé.

32Chit-ê奧妙大ah；我講伊，來指基督kap教會。Chit ê ò-biāu tōa ah; góa kóng i, lâi chí Ki-tok kap kàu-hōe.

33總是lín人人sûi-ê tio̍h疼伊ê婦人人親像家己；也婦人人tio̍h敬畏伊ê丈夫。Chóng-sī lín lâng-lâng sûi ê tio̍h thiàⁿ i ê hū-jîn-lâng chhin-chhiūⁿ ka-kī; iā hū-jîn-lâng tio̍h kèng-ùi i ê tiōng-hu.

1做kiáⁿ兒ê，lín tiàm-tī主tio̍h順thàn lín ê父母，因為這是應該ê。Chòe kiáⁿ-jî ê, lín tiàm-tī Chú tio̍h sūn-thàn lín ê pē-bú, in-ūi che sī eng-kai ê.

2Tio̍h尊敬你ê父母，(這是頭一條有kâⁿ應允ê誡) ，Tio̍h chun-kèng lí ê pē-bú, (che sī thâu chi̍t tiâu ū kâⁿ èng-ún ê kài),

3beh hō͘你興通，長歲壽tī世間。beh hō͘ lí heng-thong, tn̂g hè-siū tī sè-kan.

4做老父ê，lín m̄-thang激kiáⁿ兒ê受氣；獨獨tio̍h用主ê警戒kap教訓來培養in。Chòe lāu-pē ê, lín m̄ thang kek kiáⁿ-jî ê siū-khì; to̍k-to̍k tio̍h ēng Chú ê kéng-kài kap kàu-hùn lâi pôe-iúⁿ in.

5做奴僕ê，lín tio̍h驚惶ngia̍uh-ngia̍uh-chhoah，用誠實心順thàn照肉體做lín ê主人ê，親像teh順thàn基督；Chòe lô͘-po̍k ê, lín tio̍h kiaⁿ-hiâⁿ ngia̍uh-ngia̍uh-chhoah, ēng sêng-si̍t sim sūn-thàn chiàu jio̍k-thé chòe lín ê chú-lâng ê, chhin-chhiūⁿ teh sūn-thàn Ki-tok;

6莫得kan-ta tī目睭前慇勤，親像取hō͘人歡喜ê；就是tio̍h親像做基督ê奴僕，用實心來行上帝ê旨意；bo̍h-tit kan-ta tī ba̍k-chiu chêng un-khûn, chhin-chhiūⁿ chhú hō͘ lâng hoaⁿ-hí ê; chiū-sī tio̍h chhin-chhiūⁿ chòe Ki-tok ê lô͘-po̍k, ēng si̍t-sim lâi kiâⁿ Siōng-tè ê chí-ì;

7甘心做工，親像kā主做，m̄是kā人做；kam-sim chòe kang, chhin-chhiūⁿ kā Chú chòe, m̄ sī kā lâng chòe;

8因為知無論做奴僕á是自由ê，ta̍k人所行甚麼好，beh tùi主來受倒tńg。in-ūi chai bô lūn chòe lô͘-po̍k á-sī chū-iû ê, ta̍k lâng só͘ kiâⁿ sím-mi̍h hó, beh tùi Chú lâi siū tò-tńg.

9做主人ê，lín也tio̍h án-ni款待奴僕，莫得háng-hoah in；因為知in kap lín同一個主tī天裡，就是無用外貌取人ê。Chòe chú-lâng ê, lín iā tio̍h án-ni khoán-thāi lô͘-po̍k, bo̍h-tit háng-hoah in; in-ūi chai in kap lín tâng chi̍t ê Chú tī thiⁿ-ni̍h, chiū-sī bô ēng gōa-māu chhú lâng ê.

10結尾來講，lín tio̍h tiàm-tī主kap伊氣力ê權能來勇壯。Kiat-bé lâi kóng, lín tio̍h tiàm-tī Chú kap I khùi-la̍t ê koân-lêng lâi ióng-chòng.

11Tio̍h穿上帝全副ê戰甲，hō͘ lín能khiā在，來抵敵魔鬼chiah-ê詭計。Tio̍h chhēng Siōng-tè choân-hù ê chiàn-kah, hō͘ lín ōe khiā-chāi, lâi tí-te̍k Mô͘-kúi chiah ê khúi-kè.

12因為咱ê交戰m̄是抵敵血氣ê，就是抵敵chiah-ê辦政事ê，chiah-ê掌權ê，kap chit-ê暗世chiah-ê君王，以及天中pháiⁿ ê神類。In-ūi lán ê kau-chiàn m̄ sī tí-te̍k hiat-khì ê, chiū-sī tí-te̍k chiah ê pān chèng-sū ê, chiah ê chiáng-koân ê, kap chit ê àm sè chiah ê kun-ông, í-ki̍p thiⁿ-tiong pháiⁿ ê sîn-lūi.

13所以lín tio̍h用上帝全副ê戰甲，hō͘ lín tī風險ê日抵擋能tiâu，到lín已經做成lóng總ê事，也猶原khiā在。Só͘-í lín tio̍h ēng Siōng-tè choân-hù ê chiàn-kah, hō͘ lín tī hong-hiám ê ji̍t tí-tng ōe tiâu, kàu lín í-keng chòe-chiâⁿ lóng-chóng ê sū iā iû-goân khiā-chāi.

14所以tio̍h khiā khi在，用真實hâ腰，用義做護心鏡，Só͘-í tio̍h khiā khi chāi, ēng chin-si̍t hâ io, ēng gī chòe hō͘-sim-kiàⁿ,

15用和平福音ê備辦，穿tī腳裡；ēng hô-pêng hok-im ê pī-pān, chhēng tī kha-ni̍h;

16koh tio̍h giâ信ê藤牌，用chit-ê chiah會phah滅pháiⁿ-ê一切ê火箭。koh tio̍h giâ sìn ê tîn-pâi, ēng chit-ê chiah ōe phah-bia̍t pháiⁿ-ê it-chhè ê hé-chìⁿ.

17Koh領受拯救ê頭盔，以及神ê劍，就是上帝ê話；Koh niá-siū chín-kiù ê thâu-khoe, í-ki̍p Sîn ê kiàm, chiū-sī Siōng-tè ê ōe;

18用ta̍k樣ê祈禱kap懇求，時時tī聖神來祈禱，警醒tī chit-ê，為tio̍h lóng總ê聖徒懇求無厭倦；ēng ta̍k iūⁿ ê kî-tó kap khún-kiû, sî-sî tī Sèng Sîn lâi kî-tó, kéng-séng tī chit-ê, ūi-tio̍h lóng-chóng ê sèng-tô͘ khún-kiû bô ià-siān;

19也替我求，hō͘我會得開嘴好膽來講，hō͘人知福音ê奧妙，為tio̍h chit-ê我做掛鐵鏈ê欽差；iā thòe góa kiû, hō͘ góa ōe tit khui chhùi hó-táⁿ lâi kóng, hō͘ lâng chai hok-im ê ò-biāu, ūi-tio̍h chit-ê góa chòe kòa thih-liān ê khim-chhe;

20也tio̍h求hō͘我tī chit-ê奧妙會好膽，照我所應該講ê。iā tio̍h kiû hō͘ góa tī chit ê ò-biāu ōe hó-táⁿ, chiàu góa só͘ eng-kai kóng ê.

21獨獨beh hō͘ lín也知我ê事情kap我ê景況怎樣，有所疼ê兄弟Chhui-ki-kó͘，就是tiàm-tī主盡忠ê差用，伊beh hō͘ lín知lóng總ê事。To̍k-to̍k beh hō͘ lín iā chai góa ê sū-chêng kap góa ê kéng-hóng cháiⁿ-iūⁿ, ū só͘ thiàⁿ ê hiaⁿ-tī Chhui-ki-kó͘, chiū-sī tiàm-tī Chú chīn-tiong ê chhe-ēng, i beh hō͘ lín chai lóng-chóng ê sū.

22為tio̍h án-ni，我tiâu-tî差伊去就近lín，hō͘ lín知阮ê事，koh安慰lín ê心。Ūi-tio̍h án-ni góa tiâu-tî chhe i khì chiū-kūn lín, hō͘ lín chai goán ê sū, koh an-ùi lín ê sim.

23願平安kap仁愛含信，tùi父上帝kap主耶穌基督到tī眾兄弟。Goān pêng-an kap jîn-ài hâm sìn, tùi Pē Siōng-tè kap Chú Iâ-so͘ Ki-tok kàu tī chèng hiaⁿ-tī.

24Koh見若用bōe敗壞ê疼來疼咱ê主耶穌基督ê，願恩典kap in眾人saⁿ-kap tī-teh。Koh kìⁿ-nā ēng bōe pāi-hoāi ê thiàⁿ lâi thiàⁿ lán ê Chú Iâ-so͘ Ki-tok ê, goān un-tián kap in chèng lâng saⁿ-kap tī-teh.