1Hit日人讀摩西ê冊hō͘百姓聽，tú-tio̍h冊內有記講，A-bûn人kap Mô͘-ap人永遠bōe得thang入上帝ê會；Hit-ji̍t lâng tha̍k Mô͘-se ê chheh hō͘ peh-sìⁿ thiaⁿ, tú-tio̍h chheh-lāi ū kì kóng, A-bûn lâng kap Mô͘-ap lâng éng-oán bōe-tit-thang ji̍p Siōng-tè ê hōe;

2因為in無用食物kap水，來迎接以色列人，反tńg chhiàⁿ Pa-lân來咒詛in；總是阮ê上帝hō͘ hit-ê咒詛變做祝福。in-ūi in bô ēng chia̍h-mi̍h kap chúi, lâi ngiâ-chih Í-sek-lia̍t lâng, hoán-tńg chhiàⁿ Pa-lân lâi chiù-chó͘ in; chóng-sī goán ê Siōng-tè hō͘ hit ê chiù-chó͘ piàn-chòe chiok-hok.

3In聽見律法了後，就tùi以色列中分開hiah-ê十族ê人。In thiaⁿ-kìⁿ lu̍t-hoat liáu-āu, chiū tùi Í-sek-lia̍t tiong pun-khui hiah ê cha̍p-cho̍k ê lâng.

4Chit-ê tāi-chì以前，管理阮上帝殿內ê房間ê祭司Í-lī-a-si̍t kap To-pí-ngá結盟；Chit ê tāi-chì í-chêng, koán-lí goán Siōng-tè tiān-lāi ê pâng-keng ê chè-si Í-lī-a-si̍t kap To-pí-ngá kiat-bêng;

5就為tio̍h伊備辦一間大間房。前tī hit間收khǹg素祭、乳香、器具，kap照例供給利未人，唱歌ê，顧門ê，五穀、新酒，kap油ê十份一，kap歸hō͘祭司舉祭ê物。chiū ūi-tio̍h i pī-pān chi̍t-keng tōa keng pâng. Chêng tī hit keng siu-khǹg sò͘-chè, jú-hiuⁿ, khì-kū, kap chiàu-lē kiong-kip Lī-bī lâng, chhiùⁿ-koa--ê, kò͘-mn̂g--ê, ngó͘-kok, sin-chiú, kap iû ê cha̍p-hūn-chi̍t, kap kui hō͘ chè-si kú-chè ê mi̍h.

6當hit時，我無tī耶路撒冷；因為巴比倫王A-ta̍t-siat-se三十二年，我oat去王hia；過kúi-nā日我對王告假。Tng hit-sî góa bô tī Iâ-lō͘-sat-léng; in-ūi Pa-pí-lûn ông A-ta̍t-siat-se saⁿ-cha̍p-jī nî, góa oat-khì ông hia; kè kúi-nā ji̍t góa tùi ông kò-kè.

7我到耶路撒冷就知Í-lī-a-si̍t 為 To-pí-ngá所行ê pháiⁿ-tāi，tī上帝殿ê院內，為伊備辦一間房。Góa kàu Iâ-lō͘-sat-léng chiū chai Í-lī-a-si̍t ūi To-pí-ngá só͘ kiâⁿ ê pháiⁿ-tāi, tī Siōng-tè tiān ê īⁿ-lāi, ūi i pī-pān chi̍t-keng pâng.

8我就真擘腹(peh-pak)，將To-pí-ngá一切ê 家器，lóng tùi房內hiat出去；Góa chiū chin peh-pak, chiong To-pí-ngá it-chhè ê ka-khì, lóng tùi pâng-lāi hiat chhut-khì;

9我出命令，人就清氣hiah-ê房間；然後我將上帝殿內ê器具，kap素祭，乳香，koh搬入來。góa chhut bēng-lēng, lâng chiū chheng-khì hiah ê pâng-keng; jiân-āu góa chiong Siōng-tè tiān-lāi ê khì-kū, kap sò͘-chè, jú-hiuⁿ, koh poaⁿ--ji̍p-lâi.

10我也知利未人所應該得tio̍h ê份額無hō͘ in，致到擔當職ê利未人，kap唱歌ê，ta̍k-ê tò去in ê田園。Góa iā chai Lī-bī lâng só͘ eng-kai tit-tio̍h ê hūn-gia̍h bô hō͘ in, tì-kàu tam-tng chit ê Lī-bī lâng, kap chhiùⁿ-koa--ê, ta̍k-ê tò-khì in ê chhân-hn̂g.

11我就出力責備hiah-ê官長，kā in講，上帝ê殿啥事放荒廢ah？我就聚集利未人，復到in ê原任。Góa chiū chhut-la̍t chek-pī hiah ê koaⁿ-tiúⁿ, kā in kóng, Siōng-tè ê tiān siáⁿ-sū pàng hong-hòe ah? góa chiū chū-chi̍p Lī-bī lâng, ho̍k-tò in ê goân-jīm.

12Tùi án-ni，猶大ê眾人將五穀、新酒，kap油ê十份一，帶入庫房。Tùi án-ni Iû-tāi ê chèng-lâng chiong ngó͘-kok, sin-chiú, kap iû ê cha̍p-hūn-chi̍t, tòa ji̍p khò͘-pâng.

13我設立祭司Sī-lī-bí-ngá，經學士Sat-tok，kap利未人Pí-tāi-ngá做庫房ê官，管理庫房；副官是哈蘭，哈蘭是Sat-khek ê kiáⁿ，Sat-khek是Má-tha-nî ê kiáⁿ；因為看chit kúi人是盡忠；in ê職份是分發物hō͘ in ê兄弟。Góa siat-li̍p chè-si Sī-lī-bí-ngá, keng-ha̍k-sū Sat-tok, kap Lī-bī lâng Pí-tāi-ngá chòe khò͘-pâng ê koaⁿ, koán-lí khò͘-pâng; hù-koaⁿ sī Hap-lân, Hap-lân sī Sat-khek ê kiáⁿ, Sat-khek sī Má-tha-nî ê kiáⁿ; in-ūi khòaⁿ chí(**chit) kúi lâng sī chīn-tiong; in ê chit-hūn sī hun-hoat mi̍h hō͘ in ê hiaⁿ-tī.

14我ê上帝ah，求你因為chit-ê事tio̍h記念我，莫得擦消我為tio̍h上帝ê殿，kap其中hiah-ê典禮，所行ê好事。Góa ê Siōng-tè ah, kiû Lí in-ūi chit ê sū tio̍h kì-liām góa, bo̍h-tit chhat-siau góa ūi-tio̍h Siōng-tè ê tiān, kap kî-tiong hiah ê tián-lé, só͘-kiâⁿ ê hó-sū.

15當hiah-ê日我tī猶大看見人tī安歇日踏酒窟，搬稻綑，koh hō͘驢載；koh用酒、葡萄、無花果，kap ta̍k樣ê擔，tī安歇日擔入耶路撒冷；我就tī in賣食物hit日，責備in。Tng hiah ê ji̍t góa tī Iû-tāi khòaⁿ-kìⁿ lâng tī an-hioh-ji̍t ta̍h chiú-khut, poaⁿ tiū-khún, koh hō͘ lû chài; koh ēng chiú, phû-tô, bû-hoa-kó, kap ta̍k-iūⁿ ê tàⁿ, tī an-hioh-ji̍t taⁿ ji̍p Iâ-lō͘-sat-léng; góa chiū tī in bōe chia̍h-mi̍h hit-ji̍t, chek-pī in.

16Koh有Chhui-lô人tiàm tī hit中間，帶魚kap ta̍k樣ê貨物，tī安歇日賣hō͘猶大人，tī耶路撒冷。Koh ū Chhui-lô lâng tiàm tī hí(**hit) tiong-kan, tòa hî kap ta̍k-iūⁿ ê hè-mi̍h, tī an-hioh-ji̍t bōe hō͘ Iû-tāi lâng, tī Iâ-lō͘-sat-léng.

17我就出力責備猶大hiah-ê貴族，kā in講，Lín行chit號pháiⁿ干犯安歇日是啥事ah？Góa chiū chhut-la̍t chek-pī Iû-tāi hiah ê kùi-cho̍k, kā in kóng, Lín kiâⁿ chit-hō pháiⁿ kan-hoān an-hioh-ji̍t sī siáⁿ-sū ah?

18前lín ê列祖kiám無án-ni行，咱ê上帝kiám無將chit-ê一切ê災厄臨到咱kap chit-ê城mah？Taⁿ lín iáu-kú犯tio̍h安歇日，hō͘受氣臨到以色列益發傷重。Chêng lín ê lia̍t-chó͘ kiám bô án-ni kiâⁿ, lán ê Siōng-tè kiám bô chiong chit-ê it-chhè ê chai-ē lîm-kàu lán kap chit ê siâⁿ mah? Taⁿ lín iáu-kú hoān-tio̍h an-hioh-ji̍t, hō͘ siū-khì lîm-kàu Í-sek-lia̍t it-hoat siong-tiōng.

19Tī安歇日前耶路撒冷城門黃昏ê時，我就命令人關門，koh命令安歇日未過身m̄-thang開；我派我kúi-nā ê奴僕管理城門，免得有人tī安歇日擔甚麼擔入來。Tī an-hioh-ji̍t chêng Iâ-lō͘-sat-léng siâⁿ-mn̂g hông-hun ê sî, góa chiū bēng-lēng lâng koaiⁿ-mn̂g, koh bēng-lēng an-hioh-ji̍t bē kè-sin m̄-thang khui; góa phài góa kúi-nā ê lô͘-po̍k koán-lí siâⁿ-mn̂g, bián-tit ū lâng tī an-hioh-ji̍t taⁿ sím-mi̍h tàⁿ ji̍p-lâi.

20Tùi án-ni，seng-lí人，kap販賣ta̍k項貨物ê，一兩pái歇暝tī耶路撒冷ê城外。Tùi án-ni seng-lí lâng, kap hoàn-bōe ta̍k-hāng hè-mi̍h ê, chi̍t nn̄g pái hioh-mî tī Iâ-lō͘-sat-léng ê siâⁿ-gōa.

21我就責備in講，Lín啥事歇暝tī城門口ah？若koh án-ni，我beh下手掠lín。Tùi chit-tia̍p以後，in tī安歇日無koh來。Góa chiū chek-pī in kóng, Lín siáⁿ-sū hioh-mî tī siâⁿ-mn̂g-kháu ah? nā koh án-ni, góa beh hē chhiú lia̍h lín. Tùi chit-tia̍p í-āu, in tī an-hioh-ji̍t bô koh lâi.

22我命令利未人清氣家己，來顧守城門，hō͘安歇日做聖。我ê上帝ah，求你因為chit-ê事來記念我，照你ê大慈悲來疼惜我。Góa bēng-lēng Lī-bī lâng chheng-khì ka-kī, lâi kò͘-siú siâⁿ-mn̂g, hō͘ an-hioh-ji̍t chòe-sèng. Góa ê Siōng-tè ah, kiû Lí in-ūi chit ê sū lâi kì-liām góa, chiàu Lí ê tōa chû-pi lâi thiàⁿ-sioh góa.

23當hiah-ê日我也看見猶大人娶A-si̍t-tu̍t、A-bûn、Mô͘-ap ê cha-bó͘-kiáⁿ做bó͘。Tng hiah ê ji̍t góa iā khòaⁿ-kìⁿ Iû-tāi lâng chhōa A-si̍t-tu̍t, A-bûn, Mô͘-ap ê cha-bó͘-kiáⁿ chòe bó͘.

24In ê kiáⁿ兒講話，一半講A-si̍t-tu̍t ê話，bōe曉講猶大ê話，所講ê就是照ta̍k族ê腔。In ê kiáⁿ-jî kóng-ōe, chi̍t-pòaⁿ kóng A-si̍t-tu̍t ê ōe, bōe hiáu kóng Iû-tāi ê ōe, só͘ kóng-ê chiū-sī chiàu ta̍k-cho̍k ê khiuⁿ.

25我就大大責備in，罵in，phah in kúi-nā人，chhoah in ê頭毛，kah in kí上帝來chiù-chōa，講，Lín m̄-thang用家己ê cha-bó͘-kiáⁿ嫁hō͘ in ê kiáⁿ，也m̄-thang為lín ê kiáⁿ，lín本身，娶in ê cha-bó͘-kiáⁿ。Góa chiū tōa-tōa chek-pī in, mē in, phah in kúi-nā lâng, chhoah in ê thâu-mn̂g, kah in kí Siōng-tè lâi chiù-chōa, kóng, Lín m̄-thang ēng ka-kī ê cha-bó͘-kiáⁿ kè hō͘ in ê kiáⁿ, iā m̄-thang ūi lín ê kiáⁿ, lín pún-sin, chhōa in ê cha-bó͘-kiáⁿ.

26以色列王所羅門kiám m̄是tī chit號事犯罪mah？tī chōe-chōe國ê中間無一個王親像伊，koh得tio̍h伊ê上帝疼伊，上帝設立伊做以色列全國ê王；總是外邦ê cha-bó͘-kiáⁿ尚且hō͘伊犯罪。Í-sek-lia̍t ông Só͘-lô-bûn kiám-m̄-sī tī chit hō sū hoān-chōe mah? tī chōe-chōe kok ê tiong-kan bô chi̍t ê ông chhin-chhiūⁿ i, koh tit-tio̍h i ê Siōng-tè thiàⁿ i, Siōng-tè siat-li̍p i chòe Í-sek-lia̍t choân-kok ê ông; chóng-sī gōa-pang ê cha-bó͘-kiáⁿ siōng-chhiáⁿ hō͘ i hoān-chōe.

27Án-ni阮kiám聽(thèng)lín行chit號大pháiⁿ，娶外邦ê女子，干犯咱ê上帝mah？Án-ni goán kiám thèng lín kiâⁿ chit-hō tōa-pháiⁿ, chhōa gōa-pang ê lú-chú, kan-hoān lán ê Siōng-tè mah?

28祭司頭Í-lī-a-si̍t ê孫，Iâ-hô-iâ-tāi ê kiáⁿ，有一個是Hô-lûn人Chham-pa-la̍h ê kiáⁿ婿；我就趕伊離開我。Chè-si-thâu Í-lī-a-si̍t ê sun, Iâ-hô-iâ-tāi ê kiáⁿ, ū chi̍t-ê sī Hô-lûn lâng Chham-pa-la̍h ê kiáⁿ-sài; góa chiū kóaⁿ i lī-khui góa.

29我ê上帝ah，求你記得in；因為in phah lâ-sâm祭司ê職，背祭司利未人ê約。Góa ê Siōng-tè ah, kiû Lí kì-tit in; in-ūi in phah lâ-sâm chè-si ê chit, pōe chè-si Lī-bī lâng ê iok.

30Án-ni我kā in除去一切外邦人ê款，koh設立祭司kap利未人ê班，各盡in ê職；Án-ni góa kā in tû-khì it-chhè gōa-pang lâng ê khoán, koh siat-li̍p chè-si kap Lī-bī lâng ê pan, kok chīn in ê chit;

31料理定tio̍h期燒祭ê柴，以及起頭熟ê土產。我ê上帝ah，求你記念我，賞賜我福氣。liāu-lí tiāⁿ-tio̍h kî sio-chè ê chhâ, í-ki̍p khí-thâu se̍k ê thó͘-sán. Góa ê Siōng-tè ah, kiû Lí kì-liām góa, siúⁿ-sù góa hok-khì.

1當A-hap-sûi-ló͘ ê時，(chit-ê A-hap-sûi-ló͘管轄一百二十七省，tùi印度到Kó͘-si̍t；)Tng A-hap-sûi-ló͘ ê sî, (chit ê A-hap-sûi-ló͘ koán-hat chi̍t-pah jī-cha̍p-chhit séng, tùi Ìn-tō͘ kàu Kó͘-si̍t;)

2當hiah-ê日，A-hap-sûi-ló͘王tī Su-san王宮坐伊ê國位。tng hiah ê ji̍t, A-hap-sûi-ló͘ ông tī Su-san ông-kiong chē i ê kok-ūi.

3坐位第三年，為tio̍h伊一切ê首領人臣辦桌；波斯馬大有權勢ê，各省ê貴族kap首領，tī伊ê面前。Chē-ūi tē-saⁿ nî, ūi-tio̍h i it-chhè ê siú-léng jîn-sîn pān-toh; Pho-su Má-tāi ū koân-sè ê, kok-séng ê kùi-cho̍k kap siú-léng, tī i ê bīn-chêng.

4Hit時顯出伊榮光ê國ê富有，kap家己好ê威嚴ê尊貴，歷過chōe-chōe日，就是一百八十日。Hit-sî hián-chhut i êng-kng ê kok ê pù-ū, kap ka-kī hó ê ui-giâm ê chun-kùi, le̍k-kè chōe-chōe ji̍t, chiū-sī chi̍t-pah poeh-cha̍p ji̍t.

5Chiah-ê日已經滿，王koh為tio̍h tiàm tī Su-san宮大細ê百姓辦桌七日久，tī王宮園ê院；Chiah ê ji̍t í-keng móa, ông koh ūi-tio̍h tiàm tī Su-san kiong tōa-sòe ê peh-sìⁿ pān-toh chhit-ji̍t kú, tī ông-kiong hn̂g ê īⁿ;

6有白，有青，有藍ê布薕，用幼苧kap紫色ê索縛銀環tī大理石ê柱；有金銀ê床，排tī紅、白、黃、烏，大理石所鋪ê地。ū pe̍h, ū chhiⁿ, ū lâm ê pò͘-lî, ēng iù-tōe kap chí-sek ê soh pa̍k gûn-khoân tī tāi-lí-chio̍h ê thiāu; ū kim gûn ê chhn̂g, pâi tī âng, pe̍h, n̂g, o͘, tāi-lí-chio̍h só͘ pho͘ ê tōe.

7用金ê器具hō͘人lim，器具一個一-款；王ê酒真chōe，照王ê富足；Ēng kim ê khì-kū hō͘ lâng lim, khì-kū chi̍t-ê chi̍t-khoán; ông ê chiú chin-chōe, chiàu ông ê hù-chiok;

8lim酒有定tio̍h ê例，m̄准勉強人，因為王命令宮內一切ê臣僕，hō͘人各照伊ê意思。lim-chiú ū tiāⁿ-tio̍h ê lē, m̄-chún bián-kióng lâng, in-ūi ông bēng-lēng kiong-lāi it-chhè ê sîn-po̍k, hō͘ lâng kok chiàu i ê ì-sù.

9王后Óa-si̍t-thê tī A-hap-sûi-ló͘王ê宮內，也為tio̍h婦女辦桌。Ông-hō͘ Óa-si̍t-thê tī A-hap-sûi-ló͘ ông ê kiong-lāi, iā ūi-tio̍h hū-lú pān-toh.

10到第七日王為tio̍h酒心tek-kái，就命令Bí-hō͘-bān、Pí-su-tha、Hap-pho-ná、Pí-kek-tha、A-poa̍t-tha、Se-ta̍t、Kah-ka，就是常常跟隨tī A-hap-sûi-ló͘王面前hit七個太監，Kàu tē-chhit ji̍t ông ūi-tio̍h chiú sim tek-kái, chiū bēng-lēng Bí-hō͘-bān, Pí-su-tha, Hap-pho-ná, Pí-kek-tha, A-poa̍t-tha, Se-ta̍t, Kah-ka, chiū-sī siông-siông kun-sûi tī A-hap-sûi-ló͘ ông bīn-chêng hí(**hit) chhit ê thài-kàm,

11帶王后Óa-si̍t-thê 戴王后ê冕旒到王ê面前，hō͘ hiah-ê百姓人臣看伊ê súi，因為伊ê面貌真好看；tòa ông-hō͘ Óa-si̍t-thê tì ông-hō͘ ê bián-liû kàu ông ê bīn-chêng, hō͘ hiah ê peh-sìⁿ jîn-sîn khòaⁿ i ê súi, in-ūi i ê bīn-māu chin hó-khòaⁿ;

12總是王后Óa-si̍t-thê m̄肯來，m̄-thàn太監所傳王ê命令；所以王真受氣，心內親像火to̍h。chóng-sī ông-hō͘ Óa-si̍t-thê m̄-khéng lâi, m̄-thàn thài-kàm só͘ thoân ông ê bēng-lēng; só͘-í ông chin siū-khì, sim-lāi chhin-chhiūⁿ hé-to̍h.

13王就問hiah-ê bat時事有智慧ê人，(因為王有定tio̍h ê例，beh辦tāi-chì tio̍h事先問知律例，明白法度ê人。Ông chiū mn̄g hiah ê bat sî-sū ū tì-hūi ê lâng, (in-ūi ông ū tiāⁿ-tio̍h ê lē, beh pān tāi-chì tio̍h tāi-seng mn̄g chai lu̍t-lē, bêng-pe̍k hoat-tō͘ ê lâng.

14Hit時tī王ê左右常常見王ê面，tī國內坐高位ê，有波斯kap馬大七個大臣，就是Kah-sī-ná、Sī-ta̍t、Ap-má-tha、Tha-si、Bí-le̍k、Má-se-ná、Bí-bó͘-kan；)Hit-sî tī ông ê chó-iū siông-siông kìⁿ ông ê bīn, tī kok-lāi chē koâiⁿ-ūi--ê, ū Pho-su kap Má-tāi chhit ê tāi-sîn, chiū-sī Kah-sī-ná, Sī-ta̍t, Ap-má-tha, Tha-si, Bí-le̍k, Má-se-ná, Bí-bó͘-kan;)

15王問in講，王后Óa-si̍t-thê無遵thàn太監所傳A-hap-sûi-ló͘王ê命令，taⁿ照例咱tio̍h怎樣辦伊ah？ông mn̄g in kóng, Ông-hō͘ Óa-si̍t-thê bô chun-thàn thài-kàm só͘ thoân A-hap-sûi-ló͘ ông ê bēng-lēng, taⁿ chiàu-lē lán tio̍h cháiⁿ-iūⁿ pān i ah?

16Bí-bó͘-kan tī王kap hiah-ê大臣ê面前應講，王后Óa-si̍t-thê所做ê m̄-nā koan-gāi王，也是koan-gāi A-hap-sûi-ló͘王tī ta̍k省所有ê大臣kap眾百姓；Bí-bó͘-kan tī ông kap hiah ê tāi-sîn ê bīn-chêng ìn kóng, Ông-hō͘ Óa-si̍t-thê só͘-chòe-ê m̄-nā koan-gāi ông, iā sī koan-gāi A-hap-sûi-ló͘ ông tī ta̍k-séng só͘-ū ê tāi-sîn kap chèng peh-sìⁿ;

17因為王后所做ê事，beh傳到眾婦女，beh講，A-hap-sûi-ló͘王召王后Óa-si̍t-thê到王ê面前，總是伊m̄來，án-ni in會藐視in ê丈夫；in-ūi ông-hō͘ só͘ chòe ê sū, beh thoân kàu chèng hū-lú, beh kóng, A-hap-sûi-ló͘ ông tiàu ông-hō͘ Óa-si̍t-thê kàu ông ê bīn-chêng, chóng-sī i m̄ lâi, án-ni in ōe biáu-sī in ê tiōng-hu;

18今á日波斯kap馬大ê眾夫人聽見王后所做ê事，beh對王ê大臣án-ni講；tùi án-ni， beh生起chōe-chōe藐視kap受氣。kin-á-ji̍t Pho-su kap Má-tāi ê chèng hu-jîn thiaⁿ-kìⁿ ông-hō͘ só͘ chòe ê sū, beh tùi ông ê tāi-sîn án-ni kóng; tùi án-ni beh siⁿ-khí chōe-chōe biáu-sī kap siū-khì.

19王若掠做好，就出諭旨寫tī波斯kap馬大ê律例中，hō͘伊bōe改換得，m̄准Óa-si̍t-thê koh到A-hap-sûi-ló͘王ê面前；王也tio̍h將王后ê位賞賜比伊khah好ê人；Ông nā lia̍h-chòe hó, chiū chhut jū-chí siá tī Pho-su kap Má-tāi ê lu̍t-lē-tiong, hō͘ i bōe kóe-ōaⁿ--tit, m̄-chún Óa-si̍t-thê koh kàu A-hap-sûi-ló͘ ông ê bīn-chêng; ông iā tio̍h chiong ông-hō͘ ê ūi siúⁿ-sù pí i khah hó ê lâng;

20王所降ê諭旨遍傳tī伊ê國，(伊ê國闊大) ，就婦女lóng beh尊敬伊ê丈夫，無論尊貴卑賤。ông só͘ kàng ê jū-chí piàn-thoân tī i ê kok, (i ê kok khoah-tōa), chiū hū-lú lóng beh chun-kèng i ê tiōng-hu, bô-lūn chun-kùi pi-chiān.

21王kap hiah-ê大臣lóng掠伊ê話做好；王就照Bí-bó͘-kan ê話來行；Ông kap hiah ê tāi-sîn lóng lia̍h i ê ōe chòe hó; ông chiū chiàu Bí-bó͘-kan ê ōe lâi kiâⁿ;

22出詔tī王hiah-ê省，到ta̍k省照in ê文字，到ta̍k位ê百姓照in ê腔口，hō͘做丈夫ê ta̍k-ê tī家內做主；ta̍k-ê照伊ê百姓ê腔口。chhut-chiàu tī ông hiah ê séng, kàu ta̍k-séng chiàu in ê bûn-jī, kàu ta̍k-ūi ê peh-sìⁿ chiàu in ê khiuⁿ-kháu, hō͘ chòe tiōng-hu--ê ta̍k-ê tī ke-lāi chòe chú; ta̍k-ê chiàu i ê peh-sìⁿ ê khiuⁿ-kháu.

1Chiah-ê tāi-chì以後，A-hap-sûi-ló͘王ê受氣soah，就siàu念Óa-si̍t-thê kap伊ê所行，kap伊怎樣降旨來辦伊。Chiah ê tāi-chì í-āu, A-hap-sûi-ló͘ ông ê siū-khì soah, chiū siàu-liām Óa-si̍t-thê kap i ê só͘-kiâⁿ, kap i cháiⁿ-iūⁿ kàng-chí lâi pān i.

2Tùi án-ni，跟隨王ê人臣kā伊講，Tio̍h kā王chhē súi ê在室女kúi-nā人；Tùi án-ni kun-sûi ông ê jîn-sîn kā i kóng, Tio̍h kā ông chhē súi ê chāi-sek-lú kúi-nā lâng;

3王tio̍h派官員tī伊國內ê ta̍k省，hō͘ in招集一切súi ê在室女到Su-san ê王宮，到女院，交hō͘王ê太監Hi-kai，就是掌管女子ê，也tio̍h供給in清氣身軀ê品料；ông tio̍h phài koaⁿ-oân tī i kok-lāi ê ta̍k-séng, hō͘ in chio-chi̍p it-chhè súi ê chāi-sek-lú kàu Su-san ê ông-kiong, kàu lú-īⁿ, kau hō͘ ông ê thài-kàm Hi-kai, chiū-sī chiáng-koán lú-chú ê, iā tio̍h kiong-kip in chheng-khì seng-khu ê phín-liāu;

4王所合意ê女子，thang設立伊做王后，來替Óa-si̍t-thê。王掠chit-ê事做好，就án-ni行。ông só͘ kah-ì ê lú-chú, thang siat-li̍p i chòe ông-hō͘, lâi thòe Óa-si̍t-thê. Ông lia̍h chit ê sū chòe hó, chiū án-ni kiâⁿ.

5Su-san宮有一個猶大人，名叫Bo̍k-tí-kái，是便雅憫人Ki-sū ê曾孫，Sī-múi ê孫，Gâi-jíⁿ ê kiáⁿ；Su-san kiong ū chi̍t ê Iû-tāi lâng, miâ kiò Bo̍k-tí-kái, sī Piān-ngá-bín lâng Ki-sū ê cheng-sun, Sī-múi ê sun, Gâi-jíⁿ ê kiáⁿ;

6前巴比倫王Nî-pò͘-kah-nî-sat遷徙猶大王Iâ-ko-nî-ngá，Bo̍k-tí-kái也tùi耶路撒冷受遷徙，tī hit-pang受掠ê人ê中間。chêng Pa-pí-lûn ông Nî-pò͘-kah-nî-sat chhian-sóa Iû-tāi ông Iâ-ko-nî-ngá, Bo̍k-tí-kái iā tùi Iâ-lō͘-sat-léng siū chhian-sóa, tī hit-pang siū-lia̍h ê lâng ê tiong-kan.

7伊培養伊ê叔ê cha-bó͘-kiáⁿ Hap-tāi-sa，也名以斯帖，因為chit-ê cha-bó͘-gín-ná無父母；伊ê面貌súi koh好看；伊ê父母已經死，Bo̍k-tí-kái就接納伊做家己ê cha-bó͘-kiáⁿ。I pôe-ióng i ê chek ê cha-bó͘-kiáⁿ Hap-tāi-sa, iā miâ Í-su-thiap, in-ūi chit ê cha-bó͘-gín-ná bô pē-bú; i ê bīn-māu súi koh hó-khòaⁿ; i ê pē-bú í-keng sí, Bo̍k-tí-kái chiū chiap-la̍p i chòe ka-kī ê cha-bó͘-kiáⁿ.

8王ê命令kap詔書已經宣布，就聚集chōe-chōe女子tī Su-san ê王宮；交tī Hi-kai ê手；hit時以斯帖也送入王宮，交hō͘管女子ê Hi-kai ê手。Ông ê bēng-lēng kap chiàu-su í-keng soan-pò͘, chiū chū-chi̍p chōe-chōe lú-chú tī Su-san ê ông-kiong; kau tī Hi-kai ê chhiú; hit-sî Í-su-thiap iā sàng ji̍p ông-kiong, kau hō͘ koán lú-chú--ê Hi-kai ê chhiú.

9Chit-ê女子得tio̍h Hi-kai歡喜伊，好款待伊，趕緊用清氣身軀ê品料hō͘伊，kap伊應該得tio̍h ê份額；也tùi王宮將應該hō͘伊ê七個宮女hō͘伊；搬徙伊kap伊hiah-ê宮女到女院siōng好ê所在。Chit ê lú-chú tit-tio̍h Hi-kai hoaⁿ-hí i, hó khoán-thāi i, kóaⁿ-kín ēng chheng-khì seng-khu ê phín-liāu hō͘ i, kap i eng-kai tit-tio̍h ê hūn-gia̍h; iā tùi ông-kiong chiong eng-kai hō͘ i ê chhit ê kiong-lú hō͘ i; poaⁿ-sóa i kap i hiah ê kiong-lú kàu lú-īⁿ siōng-hó ê só͘-chāi.

10以斯帖m̄-bat kā人講伊是甚麼籍，甚麼族，因為Bo̍k-tí-kái kah伊m̄-thang kā人講。Í-su-thiap m̄-bat kā lâng kóng i sī sím-mi̍h che̍k, sím-mi̍h cho̍k, in-ūi Bo̍k-tí-kái kah i m̄-thang kā lâng kóng.

11Bo̍k-tí-kái ta̍k日tī女院 ê頭前行來行去，ài知以斯帖平安á無，kap伊將來境遇怎樣。Bo̍k-tí-kái ta̍k-ji̍t tī lú-īⁿ ê thâu-chêng kiâⁿ-lâi kiâⁿ-khì, ài chai Í-su-thiap pêng-an á-bô, kap i chiong-lâi kéng-gū cháiⁿ-iūⁿ.

12照婦女ê例預備十二月日，就是六月日用沒藥ê油，六月日用香料kap女子清氣身軀ê別號物；清氣ê日已經滿，眾女子就照次序入去見A-hap-sûi-ló͘王。Chiàu hū-lú ê lē ū-pī cha̍p-jī ge̍h-ji̍t, chiū-sī la̍k ge̍h-ji̍t ēng bu̍t-io̍h ê iû, la̍k ge̍h-ji̍t ēng hiuⁿ-liāu kap lú-chú chheng-khì seng-khu ê pa̍t-hō mi̍h; chheng-khì ê ji̍t í-keng móa, chèng lú-chú chiū chiàu chhù-sū ji̍p-khì kìⁿ A-hap-sûi-ló͘ ông.

13女子入去見王是chit款；tùi女院到王宮ê時，見若伊所ài-ê lóng hō͘伊，伊續帶去；Lú-chú ji̍p-khì kìⁿ ông sī chit-khoán; tùi lú-īⁿ kàu ông-kiong ê sî, kìⁿ-nā i só͘-ài-ê lóng hō͘ i, i sòa tòa-khì;

14ê-hng時入去，隔早起tò來第二ê女院，交hō͘王ê太監，就是管理嬪妃ê，Sa-kah ê手；若m̄是王歡喜伊，koh提起伊ê名來召伊，就無koh入去見王。ê-hng sî ji̍p-khì, keh chá-khí tò-lâi tē-jī ê lú-īⁿ, kau hō͘ ông ê thài-kàm, chiū-sī koán-lí pīn(**pin)-hui--ê, Sa-kah ê chhiú; nā m̄-sī ông hoaⁿ-hí i, koh thê-khí i ê miâ lâi tiàu i, chiū bô koh ji̍p-khì kìⁿ ông.

15Bo̍k-tí-kái接納做伊ê cha-bó͘-kiáⁿ ê以斯帖，就是伊ê叔A-pí-hâi ê cha-bó͘-kiáⁿ，照次序tio̍h入去見王ê時，除去王ê太監掌管女子ê Hi-kai所派hō͘伊ê，另外無討別物；見若看tio̍h以斯帖ê lóng歡喜伊。Bo̍k-tí-kái chiap-la̍p chòe i ê cha-bó͘-kiáⁿ ê Í-su-thiap, chiū-sī i ê chek A-pí-hâi ê cha-bó͘-kiáⁿ, chiàu chhù-sū tio̍h ji̍p-khì kìⁿ ông ê sî, tû-khì ông ê thài-kàm chiáng-koán lú-chú ê Hi-kai só͘ phài hō͘ i ê, lēng-gōa bô thó pa̍t-mi̍h; kìⁿ-nā khòaⁿ-tio̍h Í-su-thiap ê lóng hoaⁿ-hí i.

16A-hap-sûi-ló͘王坐位第七年十月，就是Thê-pia̍t月，以斯帖得tio̍h選入王宮見王。A-hap-sûi-ló͘ ông chē-ūi tē-chhit nî cha̍p-ge̍h, chiū-sī Thê-pia̍t ge̍h, Í-su-thiap tit-tio̍h soán ji̍p ông-kiong kìⁿ ông.

17王疼以斯帖贏過眾女子，伊tī王ê目睭前得tio̍h恩典寵愛，贏過眾在室女；王就用王后ê冕旒戴tī伊ê頭殼，設立伊做王后，來替Óa-si̍t-thê；Ông thiàⁿ Í-su-thiap iâⁿ-kè chèng lú-chú, i tī ông ê ba̍k-chiu chêng tit-tio̍h un-tián thióng-ài, iâⁿ-kè chèng chāi-sek-lú; ông chiū ēng ông-hō͘ ê bián-liû tì tī i ê thâu-khak, siat-li̍p i chòe ông-hō͘, lâi thòe Óa-si̍t-thê;

18Hit時王為hiah-ê大臣百官設大筵席，就是以斯帖ê筵席；koh 安撫ta̍k省，照王ê富足，賞賜物件。hit-sî ông ūi hiah ê tāi-sîn pah-koaⁿ siat tōa iân-sia̍h, chiū-sī Í-su-thiap ê iân-sia̍h; koh an-bú ta̍k-séng, chiàu ông ê hù-chiok, siúⁿ-sù mi̍h-kiāⁿ.

19Hiah-ê在室女第二pái聚集ê時，Bo̍k-tí-kái坐tī王ê門。Hiah ê chāi-sek-lú tē-jī pái chū-chi̍p ê sî, Bo̍k-tí-kái chē tī ông ê mn̂g.

20以斯帖照Bo̍k-tí-kái所命令ê，bē-bat kā人講伊是甚麼族，甚麼籍；因為以斯帖遵thàn Bo̍k-tí-kái ê命令，親像前得tio̍h伊撫養ê時一樣。Í-su-thiap chiàu Bo̍k-tí-kái só͘ bēng-lēng ê, bē-bat kā lâng kóng i sī sím-mi̍h cho̍k, sím-mi̍h che̍k; in-ūi Í-su-thiap chun-thàn Bo̍k-tí-kái ê bēng-lēng, chhin-chhiūⁿ chêng tit-tio̍h i bú-ióng ê sî chi̍t-iūⁿ.

21當hiah-ê日，就是Bo̍k-tí-kái坐tī王ê門ê時，王ê太監中有顧門ê兩人，Phek-thàm kap Thê-lia̍t，受氣計謀beh害A-hap-sûi-ló͘王；Tng hiah ê ji̍t, chiū-sī Bo̍k-tí-kái chē tī ông ê mn̂g ê sî, ông ê thài-kàm-tiong ū kò͘-mn̂g--ê nn̄g lâng, Phek-thàm kap Thê-lia̍t, siū-khì kè-bô͘ beh hāi A-hap-sûi-ló͘ ông;

22Bo̍k-tí-kái知hit-ê tāi-chì，就kā王后以斯帖講；以斯帖就用Bo̍k-tí-kái ê名將hit-ê事講hō͘王知，Bo̍k-tí-kái chai hit ê tāi-chì, chiū kā ông-hō͘ Í-su-thiap kóng; Í-su-thiap chiū ēng Bo̍k-tí-kái ê miâ chiong hit ê sū kóng hō͘ ông chai,

23究勘chit-ê事，果然是實，就將兩人吊tī柴裡，用chit-ê事tī王ê面前記載tī歷史ê冊。kiù-khàm chit ê sū, kó-jiân sī si̍t, chiū chiong nn̄g-lâng tiàu tī chhâ--nih, ēng chit ê sū tī ông ê bīn-chêng kì-chài tī le̍k-sú ê chheh.