1Hit暝王bōe睏得，kah人the̍h歷史ê冊來；in就tī王ê面前讀伊。Hit-mî ông bōe-khùn-tit, kah lâng the̍h le̍k-sú ê chheh lâi; in chiū tī ông ê bīn-chêng tha̍k i.

2Tú-tio̍h冊裡有寫講，王顧門ê太監中有兩人，Phek-thàm kap Thê-lia̍t，計謀beh害A-hap-sûi-ló͘王；Bo̍k-tí-kái報告chit-ê事。Tú-tio̍h chheh--nih ū siá kóng, Ông kò͘-mn̂g ê thài-kàm tiong ū nn̄g lâng, Phek-thàm kap Thê-lia̍t, kè-bô͘ beh hāi A-hap-sûi-ló͘ ông; Bo̍k-tí-kái pò-kò chit ê sū.

3王講，為tio̍h chit-ê事，用甚麼榮光尊貴賞賜Bo̍k-tí-kái ah？伺候王ê人臣應講，無賞賜伊甚麼。Ông kóng, Ūi-tio̍h chit ê sū, ēng sím-mi̍h êng-kng chun-kùi siúⁿ-sù Bo̍k-tí-kái ah? Su-hāu ông ê jîn-sîn ìn kóng, Bô siúⁿ-sù i sím-mi̍h.

4王講，Chī-chūi tī院內；hit時Hap-bān入王宮ê外院，beh求王召Bo̍k-tí-kái tī伊所kā伊khiā ê柴架。Ông kóng, Chī-chūi tī īⁿ-lāi; hit-sî Hap-bān ji̍p ông-kiong ê gōa-īⁿ, beh kiû ông tiàu Bo̍k-tí-kái tī i só͘ kā i khiā ê chhâ-kè.

5王ê人臣kā伊講，Hap-bān khiā tī院內。王講，kah伊入來。Ông ê jîn-sîn kā i kóng, Hap-bān khiā tī īⁿ-lāi. Ông kóng, Kah i ji̍p-lâi.

6Hap-bān就入去；王問伊講，王所ài榮光伊ê人，tio̍h怎樣款待伊？Hap-bān心內想講，王所ài榮光伊ê人，是誰能贏過我？Hap-bān chiū ji̍p-khì; ông mn̄g i kóng, Ông só͘ ài êng-kng i ê lâng, tio̍h cháiⁿ-iūⁿ khoán-thāi i? Hap-bān sim-lāi siūⁿ kóng, Ông só͘ ài êng-kng i ê lâng, chī-chūi ōe iâⁿ-kè góa?

7Hap-bān就應王講，王所ài榮光伊ê人，Hap-bān chiū ìn ông kóng, Ông só͘ ài êng-kng i ê lâng,

8tio̍h將王所穿ê王服，王所騎ê馬，頭殼頂戴冕旒ê；tio̍h chiong ông só͘ chhēng ê ông-ho̍k, ông só͘ khiâ ê bé, thâu-khak-téng tì bián-liû ê;

9tio̍h將chit-ê衣服kap馬交tī王一個極尊貴ê人臣ê手，hō͘ in用hit領衫hō͘王所ài榮光伊ê人穿，koh hō͘伊騎馬遍遊城內ê街路，tī伊ê頭前宣布講，王所ài榮光ê人，beh án-ni款待伊。tio̍h chiong chit ê i-ho̍k kap bé kau tī ông chi̍t-ê ke̍k chun-kùi ê jîn-sîn ê chhiú, hō͘ in ēng hit niá saⁿ hō͘ ông só͘ ài êng-kng i ê lâng chhēng, koh hō͘ i khiâ-bé piàn-iû siâⁿ-lāi ê ke-lō͘, tī i ê thâu-chêng soan-pò͘ kóng, Ông só͘ ài êng-kng ê lâng, beh án-ni khoán-thāi i.

10王kā Hap-bān講，你緊緊去，將chit-ê衣服kap馬，照你所講ê，款待hit-ê坐tī王ê門ê猶大人Bo̍k-tí-kái；見若你所講ê m̄-thang少一項。Ông kā Hap-bān kóng, Lí kín-kín khì, chiong chit ê i-ho̍k kap bé, chiàu lí só͘ kóng ê, khoán-thāi hit ê chē tī ông ê mn̂g ê Iû-tāi lâng Bo̍k-tí-kái; kìⁿ-nā lí só͘ kóng-ê m̄-thang chió chi̍t-hāng.

11Hap-bān就帶衣服kap馬來，koh hō͘ Bo̍k-tí-kái穿伊；也hō͘伊騎馬，遍遊tī城內ê街路，tī伊ê頭前宣布講，王所ài榮光伊ê人，beh án-ni款待伊。Hap-bān chiū tòa i-ho̍k kap bé lâi, koh hō͘ Bo̍k-tí-kái chhēng i; iā hō͘ i khiâ-bé, piàn-iû tī siâⁿ-lāi ê ke-lō͘, tī i ê thâu-chêng soan-pò͘ kóng, Ông só͘ ài êng-kng i ê lâng, beh án-ni khoán-thāi i.

12Bo̍k-tí-kái tò來王ê門。Hap-bān憂悶，罩伊ê頭殼，緊緊tò去in厝。Bo̍k-tí-kái tò-lâi ông ê mn̂g. Hap-bān iu-būn, tà i ê thâu-khak, kín-kín tò--khì in chhù.

13Hap-bān將伊一切所tú-tio̍h-ê lóng kā伊ê bó͘ Sè-lī-su kap伊hiah-ê朋友講；伊hiah-ê知識ê人，kap伊ê bó͘ Sè-lī-su，kā伊講，你所起頭失敗tī伊面前ê Bo̍k-tí-kái，伊若果然是猶大ê種族，你的確bōe贏伊，beh tī伊ê面前失敗到底。Hap-bān chiong i it-chhè só͘ tú-tio̍h-ê lóng kā i ê bó͘ Sè-lī-su kap i hiah ê pêng-iú kóng; i hiah ê tì-sek ê lâng, kap i ê bó͘ Sè-lī-su, kā i kóng, Lí só͘ khí-thâu sit-pāi tī i bīn-chêng ê Bo̍k-tí-kái, i nā kó-jiân sī Iû-tāi ê chióng-cho̍k, lí tek-khak bōe iâⁿ i, beh tī i ê bīn-chêng sit-pāi kàu tóe.

14In iáu teh kap伊講話ê時，王ê太監來，kah Hap-bān緊緊去赴以斯帖所設ê筵席。In iáu teh kap i kóng-ōe ê sî, ông ê thài-kàm lâi, kah Hap-bān kín-kín khì hù Í-su-thiap só͘ siat ê iân-sia̍h.

1王kap Hap-bān來赴王后以斯帖ê筵席。Ông kap Hap-bān lâi hù ông-hō͘ Í-su-thiap ê iân-sia̍h.

2Chit-ê 第二日王tī酒筵席ê中間koh問以斯帖講，王后以斯帖ah，你所請是甚麼？beh hō͘你；你所求是甚麼？就國ê一半也beh做成伊。Chit ê tē-jī ji̍t ông tī chiú iân-sia̍h ê tiong-kan koh mn̄g Í-su-thiap kóng, Ông-hō͘ Í-su-thiap ah, lí só͘ chhéng sī sím-mi̍h? beh hō͘ lí; lí só͘ kiû sī sím-mi̍h? chiū kok ê chi̍t-pòaⁿ iā beh chòe-chiâⁿ i.

3王后以斯帖應講，王ah，我若得tio̍h恩典tī你ê目睭前，王若掠做好，就願你允我所請，用我ê性命hō͘我，允我ê所求，用我ê宗族hō͘我；Ông-hō͘ Í-su-thiap ìn kóng, Ông ah, góa nā tit-tio̍h un-tián tī lí ê ba̍k-chiu-chêng, ông nā lia̍h-chòe hó, chiū goān lí ún góa só͘ chhéng, ēng góa ê sìⁿ-miā hō͘ góa, ún góa ê só͘ kiû, ēng góa ê chong-cho̍k hō͘ góa;

4因為我kap我ê宗族受賣，beh剿滅，thâi死阮，hō͘阮死無；設使賣阮做奴僕做女婢，雖然對敵bōe會補王ê損失，我也靜靜。in-ūi góa kap góa ê chong-cho̍k siū bōe, beh châu-bia̍t, thâi-sí goán, hō͘ goán sí-bô; siat-sú bōe goán chòe lô͘-po̍k chòe lú-pī, sui-jiân tùi-te̍k bōe-ōe pó͘ ông ê sún-sit, góa iā chēng-chēng.

5A-hap-sûi-ló͘王應王后以斯帖講，敢存心做chit-ê事ê是是誰？hit人tī toh落？A-hap-sûi-ló͘ ông ìn ông-hō͘ Í-su-thiap kóng, Káⁿ chûn-sim chòe chit-ê sū--ê sī chī-chūi? hit-lâng tī toh-lo̍h?

6以斯帖講，仇讎對敵就是chit-ê pháiⁿ人Hap-bān。Hap-bān tī王kap王后ê面前就真驚。Í-su-thiap kóng, Kiû-siû tùi-te̍k chiū-sī chit ê pháiⁿ-lâng Hap-bān. Hap-bān tī ông kap ông-hō͘ ê bīn-chêng chiū chin kiaⁿ.

7王大受氣，tùi酒筵起來，入去王宮ê花園。Hap-bān也起來tùi王后以斯帖求性命，因為看見王決意beh刑罰伊。Ông tōa siū-khì, tùi chiú-iân khí-lâi, ji̍p-khì ông-kiong ê hoe-hn̂g. Hap-bān iā khí-lâi tùi ông-hō͘ Í-su-thiap kiû sìⁿ-miā, in-ūi khòaⁿ-kìⁿ ông koat-ì beh hêng-hoa̍t i.

8王tùi王宮ê花園倒tńg來酒筵ê所在；hit時Hap-bān已經phah落tī以斯帖所tī-teh ê床；王講，伊koh tī宮內，tī我ê面前，beh凌辱王后mah？話tùi王ê嘴講出，人就蓋Hap-bān ê面。Ông tùi ông-kiong ê hoe-hn̂g tò-tńg--lâi chiú-iân ê só͘-chāi; hit-sî Hap-bān í-keng phah-lo̍h tī Í-su-thiap só͘ tī-teh ê chhn̂g; ông kóng, I koh tī kiong-lāi, tī góa ê bīn-chêng, beh lêng-jio̍k ông-hō͘ mah? Ōe tùi ông ê chhùi kóng-chhut, lâng chiū khàm Hap-bān ê bīn.

9伺候王ê太監有一個，名叫Hap-pho-ná，講，看ah，Hap-bān為tio̍h Bo̍k-tí-kái khiā一個五十肘高ê柴架；Bo̍k-tí-kái就是前日用盡忠ê話報王ê；taⁿ hit-ê架khiā tī Hap-bān ê家。王講，吊伊tī hit頂面。Su-hāu ông ê thài-kàm ū chi̍t-ê, miâ kiò Hap-pho-ná, kóng, Khòaⁿ ah, Hap-bān ūi-tio̍h Bo̍k-tí-kái khiā chi̍t ê gō͘-cha̍p tiú koâiⁿ ê chhâ-kè; Bo̍k-tí-kái chiū-sī chêng-ji̍t ēng chīn-tiong ê ōe pò ông ê; taⁿ hit ê kè khiā tī Hap-bān ê ke. Ông kóng, Tiàu i tī hit téng-bīn.

10人就吊Hap-bān tī伊kā Bo̍k-tí-kái所備辦ê柴架頂。王ê受氣chiah soah。Lâng chiū tiàu Hap-bān tī i kā Bo̍k-tí-kái só͘ pī-pān ê chhâ-kè-téng. Ông ê siū-khì chiah soah.

1當hit日A-hap-sûi-ló͘王將猶大人ê對敵Hap-bān ê家產賞賜王后以斯帖。Bo̍k-tí-kái也來王ê面前，因為以斯帖已經kā王講，Bo̍k-tí-kái是伊ê甚麼親。Tng hit-ji̍t A-hap-sûi-ló͘ ông chiong Iû-tāi lâng ê tùi-te̍k Hap-bān ê ke-sán siúⁿ-sù ông-hō͘ Í-su-thiap. Bo̍k-tí-kái iā lâi ông ê bīn-chêng, in-ūi Í-su-thiap í-keng kā ông kóng, Bo̍k-tí-kái sī i ê sím-mi̍h chhin.

2王剝家己ê手指來hō͘ Bo̍k-tí-kái，就是tùi Hap-bān the̍h 倒tńg-ê；以斯帖koh設立Bo̍k-tí-kái來管理Hap-bān ê家產。Ông pak ka-kī ê chhiú-chí lâi hō͘ Bo̍k-tí-kái, chiū-sī tùi Hap-bān the̍h tò-tńg-ê; Í-su-thiap koh siat-li̍p Bo̍k-tí-kái lâi koán-lí Hap-bān ê ke-sán.

3以斯帖koh講tī王ê面前，仆tī伊ê腳下，流目屎，求伊除A-kah族Hap-bān ê陷害，以及伊謀害猶大人ê計謀。Í-su-thiap koh kóng tī ông ê bīn-chêng, phak tī i ê kha-ē, lâu ba̍k-sái, kiû i tû A-kah cho̍k Hap-bān ê hām-hāi, í-ki̍p i bô͘-hāi Iû-tāi lâng ê kè-bô͘.

4王ǹg以斯帖kia̍h起伊金ê柺á，以斯帖就起來khiā tī王ê面前，講，Ông ǹg Í-su-thiap kia̍h-khí i kim ê koáiⁿ-á, Í-su-thiap chiū khí-lâi khiā tī ông ê bīn-chêng, kóng,

5王若掠做好，我若得tio̍h恩典tī王ê目睭前，王掠chit-ê事做tio̍h，我若得tio̍h歡喜tī王ê目睭前，就懇求出詔，取消A-kah族Hap-bí-tāi-tha ê kiáⁿ Hap-bān所計謀ê詔，就是伊所寫beh滅王ta̍k省ê猶大人ê；Ông nā lia̍h-chòe hó, góa nā tit-tio̍h un-tián tī ông ê ba̍k-chiu-chêng, ông lia̍h chit ê sū chòe tio̍h, góa nā tit-tio̍h hoaⁿ-hí tī ông ê ba̍k-chiu chêng, chiū khún-kiû chhut-chiàu, chhú-siau A-kah cho̍k Hap-bí-tāi-tha ê kiáⁿ Hap-bān só͘ kè-bô͘ ê chiàu, chiū-sī i só͘ siá beh bia̍t ông ta̍k-séng ê Iû-tāi lâng ê;

6因為我thái能忍得看見家己ê百姓受陷害？thái能忍得看家己ê宗族受滅ah？in-ūi góa thái ōe jím-tit khòaⁿ-kìⁿ ka-kī ê peh-sìⁿ siū hām-hāi? thái-ōe jím--tit khòaⁿ ka-kī ê chong-cho̍k siū bia̍t ah?

7A-hap-sûi-ló͘王就kā王后以斯帖kap猶大人Bo̍k-tí-kái講，因為Hap-bān謀害猶大人，我已經將伊ê家產hō͘以斯帖，人也將Hap-bān吊tī柴架頂。A-hap-sûi-ló͘ ông chiū kā ông-hō͘ Í-su-thiap kap Iû-tāi lâng Bo̍k-tí-kái kóng, In-ūi Hap-bān bô͘-hāi Iû-tāi lâng, góa í-keng chiong i ê ke-sán hō͘ Í-su-thiap, lâng iā chiong Hap-bān tiàu tī chhâ-kè-téng.

8Lín也thang用王ê名照lín ê意思，寫諭旨hō͘猶大人，用王ê手指蓋印。因為見若用王ê名來寫ê，用王ê手指蓋印ê詔，無人會取消伊。Lín iā thang ēng ông ê miâ chiàu lín ê ì-sù, siá jū-chí hō͘ Iû-tāi lâng, ēng ông ê chhiú-chí khàm-ìn. In-ūi kìⁿ-nā ēng ông ê miâ lâi siá ê, ēng ông ê chhiú-chí khàm-ìn ê chiàu, bô lâng ōe chhú-siau i.

9第三月，就是Se-oan月，二十三日，hit時召王ê書記來，照Bo̍k-tí-kái一切所命令ê，出詔hō͘猶大人，也到tī人臣，kap ta̍k省ê總督、首領，就是tùi印度到Kó͘-si̍t，共一百二十七省，到tī ta̍k省照in ê文字，到ta̍k族ê百姓照in ê腔口，到猶大人照in ê文字，照in ê腔口。Tē-saⁿ ge̍h, chiū-sī Se-oan ge̍h, jī-cha̍p-saⁿ ji̍t, hit-sî tiàu ông ê su-kì lâi, chiàu Bo̍k-tí-kái it-chhè só͘ bēng-lēng ê, chhut-chiàu hō͘ Iû-tāi lâng, iā kàu tī jîn-sîn, kap ta̍k-séng ê chóng-tok, siú-léng, chiū-sī tùi Ìn-tō͘ kàu Kó͘-si̍t, kiōng chi̍t-pah jī-cha̍p-chhit séng, kàu tī ta̍k-séng chiàu in ê bûn-jī, kàu ta̍k-cho̍k ê peh-sìⁿ chiàu in ê khiuⁿ-kháu, kàu Iû-tāi lâng chiàu in ê bûn-jī, chiàu in ê khiuⁿ-kháu.

10Bo̍k-tí-kái用A-hap-sûi-ló͘王ê名寫諭旨，用王ê手指蓋印，將hit-ê詔交tī騎馬ê走文書ê，in騎王ê馬寮所生ê，國內公事用ê好馬，來傳伊；Bo̍k-tí-kái ēng A-hap-sûi-ló͘ ông ê miâ siá jū-chí, ēng ông ê chhiú-chí khàm-ìn, chiong hit ê chiàu kau tī khiâ-bé ê cháu-bûn-su-ê, in khiâ ông ê bé-tiâu só͘ siⁿ ê, kok-lāi kong-sū ēng ê hó-bé, lâi thoân i;

11tī諭旨ê內面王准tī ta̍k ê城ê猶大人聚集，起來保護家己ê性命，見若ta̍k省ê兵kap百姓beh攻擊in ê，in thang剿滅in，thâi死in，hō͘ in死無，kap in ê gín-ná、婦人人，搶in ê貨財做贓物；tī jū-chí ê lāi-bīn ông chún tī ta̍k ê siâⁿ ê Iû-tāi lâng chū-chi̍p, khí-lâi pó-hō͘ ka-kī ê sìⁿ-miā, kìⁿ-nā ta̍k-séng ê peng kap peh-sìⁿ beh kong-kek in ê, in thang châu-bia̍t in, thâi-sí in, hō͘ in sí-bô, kap in ê gín-ná, hū-jîn-lâng, chhiúⁿ in ê hè-châi chòe chong-bu̍t;

12tī A-hap-sûi-ló͘王ê ta̍k省，tī十二月，就是A-ta̍t月十三日，hit一日ê內面thang án-ni做。tī A-hap-sûi-ló͘ ông ê ta̍k-séng, tī cha̍p-jī ge̍h, chiū-sī A-ta̍t ge̍h cha̍p-saⁿ ji̍t, hit chi̍t ji̍t ê lāi-bīn thang án-ni chòe.

13抄寫hit-ê諭旨頒行ta̍k省，報告ta̍k族，hō͘猶大人備辦thèng候hit日，對伊ê對敵來報仇。Chhau-siá hit ê jū-chí pan-hêng ta̍k-séng, pò-kò ta̍k-cho̍k, hō͘ Iû-tāi lâng pī-pān thèng-hāu hit-ji̍t, tùi i ê tùi-te̍k lâi pò-siû.

14Hiah-ê走文書ê奉王ê命令真迫切，騎國內公事所用ê快馬，緊緊起身；chit-ê詔也頒行Su-san宮。Hiah ê cháu-bûn-su-ê hōng ông ê bēng-lēng chin pek-chhiat, khiâ kok-lāi kong-sū só͘ ēng ê khoài-bé, kín-kín khí-sin; chit ê chiàu iā pan-hêng Su-san kiong.

15Bo̍k-tí-kái穿藍色白色ê朝服，戴大頂ê金冕旒，koh穿紫色幼苧布ê外服，tùi王ê面前出來。Bo̍k-tí-kái chhēng lâm-sek pe̍h-sek ê tiâu-ho̍k, tì tōa-téng ê kim bián-liû, koh chhēng chí-sek iù-tōe-pò͘ ê gōa-ho̍k, tùi ông ê bīn-chêng chhut-lâi.

16Su-san城ê百姓lóng出歡喜快樂ê聲。猶大人有榮光、歡喜、快樂、尊貴。Su-san siâⁿ ê peh-sìⁿ lóng chhut hoaⁿ-hí khoài-lo̍k ê siaⁿ. Iû-tāi lâng ū êng-kng, hoaⁿ-hí, khoài-lo̍k, chun-kùi.

17王ê諭旨所到ê ta̍k省ta̍k城，猶大人lóng歡喜快樂設筵席，掠hit日做好日。Hit所在ê百姓因為驚猶大人，chōe-chōe入猶大籍。Ông ê jū-chí só͘ kàu ê ta̍k-séng ta̍k-siâⁿ, Iû-tāi lâng lóng hoaⁿ-hí khoài-lo̍k siat iân-sia̍h, lia̍h hit-ji̍t chòe hó-ji̍t. Hit só͘-chāi ê peh-sìⁿ in-ūi kiaⁿ Iû-tāi lâng, chōe-chōe ji̍p Iû-tāi che̍k.