1當hit日A-hap-sûi-ló͘王將猶大人ê對敵Hap-bān ê家產賞賜王后以斯帖。Bo̍k-tí-kái也來王ê面前，因為以斯帖已經kā王講，Bo̍k-tí-kái是伊ê甚麼親。Tng hit-ji̍t A-hap-sûi-ló͘ ông chiong Iû-tāi lâng ê tùi-te̍k Hap-bān ê ke-sán siúⁿ-sù ông-hō͘ Í-su-thiap. Bo̍k-tí-kái iā lâi ông ê bīn-chêng, in-ūi Í-su-thiap í-keng kā ông kóng, Bo̍k-tí-kái sī i ê sím-mi̍h chhin.

2王剝家己ê手指來hō͘ Bo̍k-tí-kái，就是tùi Hap-bān the̍h 倒tńg-ê；以斯帖koh設立Bo̍k-tí-kái來管理Hap-bān ê家產。Ông pak ka-kī ê chhiú-chí lâi hō͘ Bo̍k-tí-kái, chiū-sī tùi Hap-bān the̍h tò-tńg-ê; Í-su-thiap koh siat-li̍p Bo̍k-tí-kái lâi koán-lí Hap-bān ê ke-sán.

3以斯帖koh講tī王ê面前，仆tī伊ê腳下，流目屎，求伊除A-kah族Hap-bān ê陷害，以及伊謀害猶大人ê計謀。Í-su-thiap koh kóng tī ông ê bīn-chêng, phak tī i ê kha-ē, lâu ba̍k-sái, kiû i tû A-kah cho̍k Hap-bān ê hām-hāi, í-ki̍p i bô͘-hāi Iû-tāi lâng ê kè-bô͘.

4王ǹg以斯帖kia̍h起伊金ê柺á，以斯帖就起來khiā tī王ê面前，講，Ông ǹg Í-su-thiap kia̍h-khí i kim ê koáiⁿ-á, Í-su-thiap chiū khí-lâi khiā tī ông ê bīn-chêng, kóng,

5王若掠做好，我若得tio̍h恩典tī王ê目睭前，王掠chit-ê事做tio̍h，我若得tio̍h歡喜tī王ê目睭前，就懇求出詔，取消A-kah族Hap-bí-tāi-tha ê kiáⁿ Hap-bān所計謀ê詔，就是伊所寫beh滅王ta̍k省ê猶大人ê；Ông nā lia̍h-chòe hó, góa nā tit-tio̍h un-tián tī ông ê ba̍k-chiu-chêng, ông lia̍h chit ê sū chòe tio̍h, góa nā tit-tio̍h hoaⁿ-hí tī ông ê ba̍k-chiu chêng, chiū khún-kiû chhut-chiàu, chhú-siau A-kah cho̍k Hap-bí-tāi-tha ê kiáⁿ Hap-bān só͘ kè-bô͘ ê chiàu, chiū-sī i só͘ siá beh bia̍t ông ta̍k-séng ê Iû-tāi lâng ê;

6因為我thái能忍得看見家己ê百姓受陷害？thái能忍得看家己ê宗族受滅ah？in-ūi góa thái ōe jím-tit khòaⁿ-kìⁿ ka-kī ê peh-sìⁿ siū hām-hāi? thái-ōe jím--tit khòaⁿ ka-kī ê chong-cho̍k siū bia̍t ah?

7A-hap-sûi-ló͘王就kā王后以斯帖kap猶大人Bo̍k-tí-kái講，因為Hap-bān謀害猶大人，我已經將伊ê家產hō͘以斯帖，人也將Hap-bān吊tī柴架頂。A-hap-sûi-ló͘ ông chiū kā ông-hō͘ Í-su-thiap kap Iû-tāi lâng Bo̍k-tí-kái kóng, In-ūi Hap-bān bô͘-hāi Iû-tāi lâng, góa í-keng chiong i ê ke-sán hō͘ Í-su-thiap, lâng iā chiong Hap-bān tiàu tī chhâ-kè-téng.

8Lín也thang用王ê名照lín ê意思，寫諭旨hō͘猶大人，用王ê手指蓋印。因為見若用王ê名來寫ê，用王ê手指蓋印ê詔，無人會取消伊。Lín iā thang ēng ông ê miâ chiàu lín ê ì-sù, siá jū-chí hō͘ Iû-tāi lâng, ēng ông ê chhiú-chí khàm-ìn. In-ūi kìⁿ-nā ēng ông ê miâ lâi siá ê, ēng ông ê chhiú-chí khàm-ìn ê chiàu, bô lâng ōe chhú-siau i.

9第三月，就是Se-oan月，二十三日，hit時召王ê書記來，照Bo̍k-tí-kái一切所命令ê，出詔hō͘猶大人，也到tī人臣，kap ta̍k省ê總督、首領，就是tùi印度到Kó͘-si̍t，共一百二十七省，到tī ta̍k省照in ê文字，到ta̍k族ê百姓照in ê腔口，到猶大人照in ê文字，照in ê腔口。Tē-saⁿ ge̍h, chiū-sī Se-oan ge̍h, jī-cha̍p-saⁿ ji̍t, hit-sî tiàu ông ê su-kì lâi, chiàu Bo̍k-tí-kái it-chhè só͘ bēng-lēng ê, chhut-chiàu hō͘ Iû-tāi lâng, iā kàu tī jîn-sîn, kap ta̍k-séng ê chóng-tok, siú-léng, chiū-sī tùi Ìn-tō͘ kàu Kó͘-si̍t, kiōng chi̍t-pah jī-cha̍p-chhit séng, kàu tī ta̍k-séng chiàu in ê bûn-jī, kàu ta̍k-cho̍k ê peh-sìⁿ chiàu in ê khiuⁿ-kháu, kàu Iû-tāi lâng chiàu in ê bûn-jī, chiàu in ê khiuⁿ-kháu.

10Bo̍k-tí-kái用A-hap-sûi-ló͘王ê名寫諭旨，用王ê手指蓋印，將hit-ê詔交tī騎馬ê走文書ê，in騎王ê馬寮所生ê，國內公事用ê好馬，來傳伊；Bo̍k-tí-kái ēng A-hap-sûi-ló͘ ông ê miâ siá jū-chí, ēng ông ê chhiú-chí khàm-ìn, chiong hit ê chiàu kau tī khiâ-bé ê cháu-bûn-su-ê, in khiâ ông ê bé-tiâu só͘ siⁿ ê, kok-lāi kong-sū ēng ê hó-bé, lâi thoân i;

11tī諭旨ê內面王准tī ta̍k ê城ê猶大人聚集，起來保護家己ê性命，見若ta̍k省ê兵kap百姓beh攻擊in ê，in thang剿滅in，thâi死in，hō͘ in死無，kap in ê gín-ná、婦人人，搶in ê貨財做贓物；tī jū-chí ê lāi-bīn ông chún tī ta̍k ê siâⁿ ê Iû-tāi lâng chū-chi̍p, khí-lâi pó-hō͘ ka-kī ê sìⁿ-miā, kìⁿ-nā ta̍k-séng ê peng kap peh-sìⁿ beh kong-kek in ê, in thang châu-bia̍t in, thâi-sí in, hō͘ in sí-bô, kap in ê gín-ná, hū-jîn-lâng, chhiúⁿ in ê hè-châi chòe chong-bu̍t;

12tī A-hap-sûi-ló͘王ê ta̍k省，tī十二月，就是A-ta̍t月十三日，hit一日ê內面thang án-ni做。tī A-hap-sûi-ló͘ ông ê ta̍k-séng, tī cha̍p-jī ge̍h, chiū-sī A-ta̍t ge̍h cha̍p-saⁿ ji̍t, hit chi̍t ji̍t ê lāi-bīn thang án-ni chòe.

13抄寫hit-ê諭旨頒行ta̍k省，報告ta̍k族，hō͘猶大人備辦thèng候hit日，對伊ê對敵來報仇。Chhau-siá hit ê jū-chí pan-hêng ta̍k-séng, pò-kò ta̍k-cho̍k, hō͘ Iû-tāi lâng pī-pān thèng-hāu hit-ji̍t, tùi i ê tùi-te̍k lâi pò-siû.

14Hiah-ê走文書ê奉王ê命令真迫切，騎國內公事所用ê快馬，緊緊起身；chit-ê詔也頒行Su-san宮。Hiah ê cháu-bûn-su-ê hōng ông ê bēng-lēng chin pek-chhiat, khiâ kok-lāi kong-sū só͘ ēng ê khoài-bé, kín-kín khí-sin; chit ê chiàu iā pan-hêng Su-san kiong.

15Bo̍k-tí-kái穿藍色白色ê朝服，戴大頂ê金冕旒，koh穿紫色幼苧布ê外服，tùi王ê面前出來。Bo̍k-tí-kái chhēng lâm-sek pe̍h-sek ê tiâu-ho̍k, tì tōa-téng ê kim bián-liû, koh chhēng chí-sek iù-tōe-pò͘ ê gōa-ho̍k, tùi ông ê bīn-chêng chhut-lâi.

16Su-san城ê百姓lóng出歡喜快樂ê聲。猶大人有榮光、歡喜、快樂、尊貴。Su-san siâⁿ ê peh-sìⁿ lóng chhut hoaⁿ-hí khoài-lo̍k ê siaⁿ. Iû-tāi lâng ū êng-kng, hoaⁿ-hí, khoài-lo̍k, chun-kùi.

17王ê諭旨所到ê ta̍k省ta̍k城，猶大人lóng歡喜快樂設筵席，掠hit日做好日。Hit所在ê百姓因為驚猶大人，chōe-chōe入猶大籍。Ông ê jū-chí só͘ kàu ê ta̍k-séng ta̍k-siâⁿ, Iû-tāi lâng lóng hoaⁿ-hí khoài-lo̍k siat iân-sia̍h, lia̍h hit-ji̍t chòe hó-ji̍t. Hit só͘-chāi ê peh-sìⁿ in-ūi kiaⁿ Iû-tāi lâng, chōe-chōe ji̍p Iû-tāi che̍k.

1十二月，就是A-ta̍t月，十三日王ê命令kap諭旨得beh舉行，就是猶大人ê對敵ǹg望得tio̍h管轄in ê日，總是tāi-chì對反，反tńg hō͘猶大人管轄見若怨恨in ê人。Cha̍p-jī ge̍h, chiū-sī A-ta̍t ge̍h, cha̍p-saⁿ ji̍t ông ê bēng-lēng kap jū-chí tit-beh kú-hêng, chiū-sī Iû-tāi lâng ê tùi-te̍k ǹg-bāng tit-tio̍h koán-hat in ê ji̍t, chóng-sī tāi-chì tùi-hoán, hoán-tńg hō͘ Iû-tāi lâng koán-hat kìⁿ-nā oàn-hūn in ê lâng.

2Hit日tī A-hap-sûi-ló͘王ê ta̍k省，猶大人lóng聚集tī in ê城，下手攻擊hiah-ê beh害in ê人，無人會抵擋in，因為眾百姓lóng驚in。hit-ji̍t tī A-hap-sûi-ló͘ ông ê ta̍k-séng, Iû-tāi lâng lóng chū-chi̍p tī in ê siâⁿ, hē chhiú kong-kek hiah ê beh hāi in ê lâng, bô lâng ōe tí-tng in, in-ūi chèng peh-sìⁿ lóng kiaⁿ in.

3ta̍k省ê首領、大臣、總督，kap辨理王ê事ê人，lóng來幫贊猶大人，因為驚Bo̍k-tí-kái。Ta̍k-séng ê siú-léng, tāi-sîn, chóng-tok, kap pān-lí ông ê sū ê lâng, lóng lâi pang-chān Iû-tāi lâng, in-ūi kiaⁿ Bo̍k-tí-kái.

4因為Bo̍k-tí-kái tī朝廷尊大，名聲遍傳ta̍k省；chit-ê Bo̍k-tí-kái ná升ná大。In-ūi Bo̍k-tí-kái tī tiâu-têng chun-tōa, miâ-siaⁿ piàn-thoân ta̍k-séng; chit ê Bo̍k-tí-kái ná-seng ná-tōa.

5猶大人用刀phah in一切ê對敵，thâi死in，剿滅in，chhut-chāi意思行tī怨恨in ê人；Iû-tāi lâng ēng to phah in it-chhè ê tùi-te̍k, thâi-sí in, châu-bia̍t in, chhut-chāi ì-sù kiâⁿ tī oàn-hūn in ê lâng;

6tī Su-san城，猶大人thâi滅五百人；tī Su-san siâⁿ, Iû-tāi lâng thâi-bia̍t gō͘-pah lâng;

7koh thâi死Pa-san-tāi-tha、Ta̍t-hun、A-su-phàⁿ-tha，koh thâi-sí Pa-san-tāi-tha, Ta̍t-hun, A-su-phàⁿ-tha,

8Phò-la̍h-tha、A-tāi-lī-ngá、A-lī-tāi-tha，Phò-la̍h-tha, A-tāi-lī-ngá, A-lī-tāi-tha,

9Phàⁿ-má-su-tha、A-lī-sài、A-lī-tāi、Óa-iâ-sat-tha；Phàⁿ-má-su-tha, A-lī-sài, A-lī-tāi, Óa-iâ-sat-tha;

10Chit十人lóng是Hap-bí-tāi-tha ê孫，猶大人ê對敵Hap-bān ê kiáⁿ；總是無搶in ê財物。chí(**chit) cha̍p-lâng lóng sī Hap-bí-tāi-tha ê sun, Iû-tāi lâng ê tùi-te̍k Hap-bān ê kiáⁿ; chóng-sī bô chhiúⁿ in ê châi-bu̍t.

11當hit日將Su-san城受thâi ê人額呈報tī王ê面前。Tng hit-ji̍t chiong Su-san siâⁿ siū-thâi ê lâng-gia̍h thêng-pò tī ông ê bīn-chêng.

12王kā王后以斯帖講，猶大人tī Su-san城thâi死對敵五百人，koh thâi死Hap-bān十個kiáⁿ；tī王其餘ê ta̍k省m̄知做怎樣；taⁿ你所請是甚麼？beh hō͘你；你所求是甚麼？也beh做成伊。Ông kā ông-hō͘ Í-su-thiap kóng, Iû-tāi lâng tī Su-san siâⁿ thâi-sí tùi-te̍k gō͘-pah lâng, koh thâi-sí Hap-bān cha̍p ê kiáⁿ; tī ông kî-û ê ta̍k-séng m̄-chai chòe cháiⁿ-iūⁿ; taⁿ lí só͘ chhéng sī sím-mi̍h? beh hō͘ lí; lí só͘ kiû sī sím-mi̍h? iā beh chòe-chiâⁿ i.

13以斯帖就講，王若掠做好，求你准Su-san ê猶大人，明á日也照今á日ê諭旨來行，也將Hap-bān十個kiáⁿ吊tī柴架裡。Í-su-thiap chiū kóng, Ông nā lia̍h-chòe hó, kiû lí chún Su-san ê Iû-tāi lâng, bîn-á-ji̍t iā chiàu kin-á-ji̍t ê jū-chí lâi kiâⁿ, iā chiong Hap-bān cha̍p ê kiáⁿ tiàu tī chhâ-kè--nih.

14王就命令照án-ni行；hit-ê諭旨傳tī Su-san，人就將Hap-bān十個kiáⁿ吊起來。Ông chiū bēng-lēng chiàu án-ni kiâⁿ; hit ê jū-chí thoân tī Su-san, lâng chiū chiong Hap-bān cha̍p ê kiáⁿ tiàu--khí-lâi.

15A-ta̍t月十四日，Su-san ê猶大人koh聚集tī Su-san。Thâi死三百人；總是無搶in ê財物。A-ta̍t ge̍h cha̍p-sì ji̍t, Su-san ê Iû-tāi lâng koh chū-chi̍p tī Su-san. thâi-sí saⁿ-pah lâng; chóng-sī bô chhiúⁿ in ê châi-bu̍t.

16Tī王ta̍k省其餘ê猶大人也lóng聚集，起來保護家己ê性命，脫離對敵，享受平安，thâi死怨恨in ê人七萬五千，總是無搶in ê財物。Tī ông ta̍k-séng kî-ū ê Iû-tāi lâng iā lóng chū-chi̍p, khí-lâi pó-hō͘ ka-kī ê sìⁿ-miā, thoat-lī tùi-te̍k, hióng-siū pêng-an, thâi-sí oàn-hūn in ê lâng chhit-bān gō͘-chheng, chóng-sī bô chhiúⁿ in ê châi-bu̍t.

17A-ta̍t月十三日行chit-ê事，十四日安歇，用chit日設筵席做歡喜ê日。A-ta̍t ge̍h cha̍p-saⁿ ji̍t kiâⁿ chit ê sū, cha̍p-sì ji̍t an-hioh, ēng chit-ji̍t siat iân-sia̍h chòe hoaⁿ-hí ê ji̍t.

18總是Su-san ê猶大人只十三十四日聚集；十五日安歇，用chit日做設筵席歡喜ê日；Chóng-sī Su-san ê Iû-tāi lâng chí cha̍p-saⁿ cha̍p-sì ji̍t chū-chi̍p; cha̍p-gō͘ ji̍t an-hioh, ēng chit-ji̍t chòe siat iân-sia̍h hoaⁿ-hí ê ji̍t;

19所以tiàm tī鄉社ê猶大人，khiā起tī無城牆ê埠頭，taⁿ lóng用A-ta̍t月十四日做設筵席歡喜ê日，做好ê日，用禮物相送。só͘-í tiàm tī hiuⁿ-siā ê Iû-tāi lâng, khiā-khí tī bô siâⁿ-chhiûⁿ ê po͘-thâu, taⁿ lóng ēng A-ta̍t ge̍h cha̍p-sì ji̍t chòe siat iân-sia̍h hoaⁿ-hí ê ji̍t, chòe hó ê ji̍t, ēng lé-mi̍h saⁿ-sàng.

20Bo̍k-tí-kái記載hiah-ê事，koh寫phoe hō͘ A-hap-sûi-ló͘王ta̍k省遠近所有ê猶大人，Bo̍k-tí-kái kì-chài hiah ê sū, koh siá-phoe hō͘ A-hap-sûi-ló͘ ông ta̍k-séng hn̄g-kūn só͘ ū ê Iû-tāi lâng,

21定tio̍h in ta̍k年tio̍h守A-ta̍t月十四十五兩日；tiāⁿ-tio̍h in ta̍k-nî tio̍h siú A-ta̍t ge̍h cha̍p-sì cha̍p-gō͘ nn̄g ji̍t;

22Chit兩日是猶大人脫離對敵得tio̍h平安ê日；hit月是憂悶變做歡喜，悲哀變做好ê日；也tio̍h守chit兩日做設筵席歡喜，大家用禮物相送，賑濟sòng-hiong人ê日。chí(**chit)nn̄g ji̍t sī Iû-tāi lâng thoat-lī tùi-te̍k tit-tio̍h pêng-an ê ji̍t; hit-ge̍h sī iu-būn piàn-chòe hoaⁿ-hí, pi-ai piàn-chòe hó ê ji̍t; iā tio̍h siú chí(**chit)nn̄g-ji̍t chòe siat iân-sia̍h hoaⁿ-hí, tāi-ke ēng lé-mi̍h saⁿ-sàng, chín-chè sòng-hiong lâng ê ji̍t.

23Tùi án-ni，猶大人，照Bo̍k-tí-kái所寫hō͘ in ê phoe，承認beh照in起頭行ê來守伊；Tùi án-ni Iû-tāi lâng, chiàu Bo̍k-tí-kái só͘ siá hō͘ in ê phoe, sêng-jīn beh chiàu in khí-thâu kiâⁿ-ê lâi siú i;

24因為猶大人ê對敵，A-kah族Hap-bí-tāi-tha ê kiáⁿ Hap-bān，設計謀攻擊猶大人beh滅in，poa̍h phó͘-jíⁿ，就是抽籤，為tio̍h beh敗壞in，剿滅in；in-ūi Iû-tāi lâng ê tùi-te̍k, A-kah cho̍k Hap-bí-tāi-tha ê kiáⁿ Hap-bān, siat kè-bô͘ kong-kek Iû-tāi lâng beh bia̍t in, poa̍h phó͘-jíⁿ, chiū-sī thiu-chhiam, ūi-tio̍h beh pāi-hoāi in, châu-bia̍t in;

25總是chit-ê tāi-chì到王ê面前，王就降諭旨hō͘ Hap-bān計謀害猶大人ê pháiⁿ計謀歸tī伊家己ê頭殼，koh吊伊kap伊hiah-ê kiáⁿ tī柴架頂。chóng-sī chit ê tāi-chì kàu ông ê bīn-chêng, ông chiū kàng jū-chí hō͘ Hap-bān kè-bô͘ hāi Iû-tāi lâng ê pháiⁿ kè-bô͘ kui tī i ka-kī ê thâu-khak, koh tiàu i kap i hiah ê kiáⁿ tī chhâ-kè-téng.

26Tùi án-ni，in照phó͘-jíⁿ ê名就叫hiah-ê日做phó͘-jíⁿ日。In因為chit張phoe lóng總ê話，以及in tī chit-ê事所親目看見親身tú-tio̍h ê事，Tùi án-ni in chiàu phó͘-jíⁿ ê miâ chiū kiò hiah ê ji̍t chòe phó͘-jíⁿ-ji̍t. In in-ūi chit tiuⁿ phoe lóng-chóng ê ōe, í-ki̍p in tī chit ê sū só͘ chhin-ba̍k khòaⁿ-kìⁿ chhin-sin tú-tio̍h ê sū,

27猶大人就決意承認in kap in ê後裔，以及見若歸óa in ê人，年年beh照所記載，所定tio̍h ê期，守chit兩日，hō͘伊無廢無；Iû-tāi lâng chiū koat-ì sêng-jīn in kap in ê hō͘-è, í-ki̍p kìⁿ-nā kui-óa in ê lâng, nî-nî beh chiàu só͘ kì-chài, só͘ tiāⁿ-tio̍h ê kî, siú chí(**chit)nn̄g ji̍t, hō͘ i bô hòe-bô;

28koh beh記念來守hiah-ê日，tī ta̍k代，ta̍k家，ta̍k省，ta̍k城，hō͘ phó͘-jíⁿ ê日tī猶大人ê中間無廢無；tī in ê後裔記念無soah。koh beh kì-liām lâi siú hiah ê ji̍t, tī ta̍k-tāi, ta̍k-ke, ta̍k-séng, ta̍k-siâⁿ, hō͘ phó͘-jíⁿ ê ji̍t tī Iû-tāi lâng ê tiong-kan bô hòe-bô; tī in ê hō͘-è kì-liām bô soah.

29Hit時A-pí-hâi ê cha-bó͘-kiáⁿ王后以斯帖kap猶大人Bo̍k-tí-kái，用全權寫來堅固phó͘-jíⁿ ê第二張phoe；Hit-sî A-pí-hâi ê cha-bó͘-kiáⁿ ông-hō͘ Í-su-thiap kap Iû-tāi lâng Bo̍k-tí-kái, ēng choan(**choân)-koân siá lâi kian-kò͘ phó͘-jíⁿ ê tē-jī tiuⁿ phoe;

30koh用和平誠實ê話，寫phoe hō͘ A-hap-sûi-ló͘王國內一百二十七省所有ê猶大人，koh ēng hô-pêng sêng-si̍t ê ōe, siá phoe hō͘ A-hap-sûi-ló͘ ông kok-lāi chi̍t-pah jī-cha̍p-chhit séng só͘ ū ê Iû-tāi lâng,

31beh堅固chit-ê phó͘-jíⁿ ê日tī in所定tio̍h ê期，照猶大人Bo̍k-tí-kái kap王后以斯帖所命令in ê，也照猶大人為家己kap in ê後裔所定tio̍h ê，禁食啼哭。beh kian-kò͘ chit ê phó͘-jíⁿ ê ji̍t tī in só͘ tiāⁿ-tio̍h ê kî, chiàu Iû-tāi lâng Bo̍k-tí-kái kap ông-hō͘ Í-su-thiap só͘ bēng-lēng in ê, iā chiàu Iû-tāi lâng ūi ka-kī kap in ê hō͘-è só͘ tiāⁿ-tio̍h ê, kìm-chia̍h thî-khàu.

32以斯帖ê詔命堅固phó͘-jíⁿ ê事，也有記tī冊裡。Í-su-thiap ê chiàu-bēng kian-kò͘ phó͘-jíⁿ ê sū, iā ū kì tī chheh--nih.

1A-hap-sûi-ló͘王hō͘乾地kap海嶼ê百姓lóng進貢。A-hap-sûi-ló͘ ông hō͘ ta-tōe kap hái-sū ê peh-sìⁿ lóng chìn-kòng.

2伊用權柄能力所行ê事，以及王舉起Bo̍k-tí-kái hō͘伊高升詳細ê記載，kiám無lóng記tī馬大kap波斯王ê歷史mah？I ēng koân-pèng lêng-le̍k só͘ kiâⁿ ê sū, í-ki̍p ông kú-khí Bo̍k-tí-kái hō͘ i ko-seng siông-sè ê kì-chài, kiám bô lóng kì tī Má-tāi kap Pho-su ông ê le̍k-sú mah?

3因為猶大人Bo̍k-tí-kái做A-hap-sûi-ló͘王ê宰相，tī猶大人ê中間做大，得tio̍h伊ê眾兄弟歡喜，為tio̍h伊ê百姓圖謀利益，koh安慰伊ê宗族。In-ūi Iû-tāi lâng Bo̍k-tí-kái chòe A-hap-sûi-ló͘ ông ê cháiⁿ-siòng, tī Iû-tāi lâng ê tiong-kan chòe tōa, tit-tio̍h i ê chèng hiaⁿ-tī hoaⁿ-hí, ūi-tio̍h i ê peh-sìⁿ tô͘-bô͘ lī-ek , koh an-ùi i ê chong-cho̍k.