1耶和華tī埃及地對摩西、亞倫講：Iâ-hô-hoa tī Ai-ki̍p tōe tùi Mô͘-se, A-lûn kóng,

2Chit月tio̍h做lín ê正月，做年年ê頭一月。Chit ge̍h tio̍h chòe lín ê chiaⁿ-ge̍h, chòe nî-nî ê thâu-chi̍t-ge̍h.

3Lín tio̍h對以色列ê全會講：本月初十日，ta̍k人tio̍h照老父ê家，取羊á，一家一隻。Lín tio̍h tùi Í-sek-lia̍t ê choân-hōe kóng, Pún-ge̍h chhoe-cha̍p ji̍t, ta̍k-lâng tio̍h chiàu lāu-pē ê ke, chhú iûⁿ-á, chi̍t-ke chi̍t-chiah.

4若是一家 ê人siuⁿ少，一隻羊á食bōe了，伊tio̍h kap隔壁ê厝邊，照人額，相kap取一隻；lín備辦羊á，tio̍h按算ta̍k人所能食ê量。Nā sī chi̍t-ke ê lâng siuⁿ-chió, chi̍t-chiah iûⁿ-á chia̍h-bōe-liáu, i tio̍h kap keh-piah ê chhù-piⁿ, chiàu lâng-gia̍h, saⁿ-kap chhú chi̍t-chiah; lín pī-pān iûⁿ-á, tio̍h àn-sǹg ta̍k-lâng só͘ ōe chia̍h ê liōng.

5Lín ê羊á tio̍h無瑕疵ê，未滿年ê羊káng-á；lín tio̍h tùi綿羊中，á是山羊中，取伊，lóng thang；Lín ê iûⁿ-á tio̍h bô hâ-chhû ê, bē-móa-nî ê iûⁿ-káng-á; lín tio̍h tùi mî-iûⁿ-tiong, á-sī soaⁿ-iûⁿ-tiong, chhú i, lóng thang;

6lín tio̍h留到本月十四日，黃昏ê時，以色列全會ê眾人tio̍h thâi羊á。lín tio̍h lâu kàu pún-ge̍h cha̍p-sì ji̍t, hông-hun ê sî, Í-sek-lia̍t choân-hōe ê chèng-lâng tio̍h thâi iûⁿ-á.

7In tio̍h 取淡薄血，抹tī食羊á hit間厝，雙pêng ê門khiā kap門楣。In tio̍h chhú tām-po̍h huih, boah tī chia̍h iûⁿ-á hit keng chhù, siang-pêng ê mn̂g-khiā kap mn̂g-bâi.

8Hit暝tio̍h食羊á ê肉，用火pek伊，kap無酵餅、苦菜chham-teh食。Hit-mî tio̍h chia̍h iûⁿ-á ê bah, ēng hé pek i, kap bô-kàⁿ-piáⁿ khó͘-chhài chham-teh chia̍h.

9M̄-thang生(chhiⁿ) 生食，決斷m̄-thang用水煮，tio̍h用火 pek；頭、腳，kap五臟lóng tio̍h食。M̄-thang chhiⁿ-chhiⁿ chia̍h, koat-toàn m̄-thang ēng chúi chú, tio̍h ēng hé pek; thâu, kha, kap ngó͘-chōng lóng tio̍h chia̍h.

10Lóng m̄-thang 留隔早起，若留到隔早起tio̍h用火燒。Lóng m̄-thang lâu keh chá-khí, nā lâu kàu keh chá-khí tio̍h ēng hé sio.

11Lín tio̍h án-ni食i；腰hâ帶，腳穿鞋，手kia̍h柺á，也tio̍h趕緊食；這是耶和華ê pôaⁿ過節。Lín tio̍h án-ni chia̍h i; io hâ-tòa, kha chhēng-ôe, chhiú kia̍h koáiⁿ-á, iā tio̍h kóaⁿ-kín chia̍h; che sī Iâ-hô-hoa ê pôaⁿ-kè-choeh.

12因為hit暝我beh遍行埃及地，phah死埃及地一切頭上生ê，無論人kap cheng-siⁿ；koh beh審判埃及一切ê上帝；我就是耶和華。In-ūi hit-mî Góa beh piàn-kiâⁿ Ai-ki̍p tōe, phah-sí Ai-ki̍p tōe it-chhè thâu-chiūⁿ-siⁿ-ê, bô-lūn lâng kap cheng-siⁿ; koh beh sím-phòaⁿ Ai-ki̍p it-chhè ê siōng-tè; Góa chiū-sī Iâ-hô-hoa.

13Chit-ê血tī lín所khiā起ê厝，beh做lín ê記號；我一下看見chit-ê血，就tùi lín pôaⁿ過去；我phah埃及地ê時，災禍無到tī lín，來滅lín。Chit-ê huih tī lín só͘ khiā-khí ê chhù, beh chòe lín ê kì-hō; Góa chi̍t-ē khòaⁿ-kìⁿ chit-ê huih, chiū tùi lín pôaⁿ-kè-khì; Góa phah Ai-ki̍p tōe ê sî, chai-ē bô kàu tī lín, lâi bia̍t lín.

14Lín tio̍h用chit日做記念，守伊做耶和華ê節；lín tio̍h代代守chit-ê節，做永遠ê例。Lín tio̍h ēng chit-ji̍t chòe kì-liām, siú i chòe Iâ-hô-hoa ê choeh; lín tio̍h tāi-tāi siú chit-ê choeh, chòe éng-oán ê lē.

15Lín tio̍h食無酵餅七日久；頭一日tio̍h tùi lín ta̍k間厝除去酵；因為tùi頭一日到第七日，凡若食有酵ê，beh tùi以色列中除去。Lín tio̍h chia̍h bô-kàⁿ-piáⁿ chhit-ji̍t kú; thâu-chi̍t-ji̍t tio̍h tùi lín ta̍k keng chhù tû-khì kàⁿ; in-ūi tùi thâu-chi̍t ji̍t kàu tē-chhit ji̍t, hoān-nā chia̍h ū kàⁿ ê, beh tùi Í-sek-lia̍t-tiong tû-khì.

16頭一日lín tio̍h有聖會，七日也tio̍h有聖會；chit兩日，除去備辦ta̍k人所tio̍h食ê以外，無論甚麼工 lóng m̄-thang做。Thâu-chi̍t ji̍t lín tio̍h ū sèng-hōe, chhit-ji̍t iā tio̍h ū sèng-hōe; chit nn̄g-ji̍t, tû-khì pī-pān ta̍k-lâng só͘ tio̍h chia̍h ê í-gōa, bô-lūn sím-mi̍h kang lóng m̄-thang chòe.

17Lín tio̍h守無酵節；因為我tú-tú tī hit日chhōa lín ê軍隊tùi埃及地出來；所以lín tio̍h守chit日，ta̍k世代做永遠ê例。Lín tio̍h siú bô-kàⁿ-choeh; in-ūi Góa tú-tú tī hit-ji̍t chhōa lín ê kun-tūi tùi Ai-ki̍p tōe chhut-lâi; só͘-í lín tio̍h siú chit-ji̍t, ta̍k sè-tāi chòe éng-oán ê lē.

18Tùi正月十四ê-hng 到二一ê-hng，lín tio̍h食無酵餅。Tùi chiaⁿ-ge̍h cha̍p-sì ê-hng kàu jī-it ê-hng, lín tio̍h chia̍h bô-kàⁿ-piáⁿ.

19Tī lín ta̍k間厝，七日內m̄-thang有酵；因為見若食有酵ê物，無論是寄腳ê，á是本地ê，hit人tio̍h tùi以色列會中除去。Tī lín ta̍k keng chhù, chhit-ji̍t-lāi m̄-thang ū kàⁿ; in-ūi kìⁿ-nā chia̍h ū kàⁿ ê mi̍h, bô-lūn sī kià-kha-ê, á-sī pún-tōe-ê, hit-lâng tio̍h tùi Í-sek-lia̍t hōe-tiong tû-khì.

20有酵ê物，lín lóng m̄-thang食；tī lín一切khiā起ê所在，tio̍h食無酵餅。Ū-kàⁿ ê mi̍h, lín lóng m̄-thang chia̍h; tī lín it-chhè khiā-khí ê só͘-chāi, tio̍h chia̍h bô-kàⁿ-piáⁿ.

21摩西就叫以色列眾長老來，kā in講：Lín ta̍k人tio̍h照家口取羊á，thâi伊做pôaⁿ過節。Mô͘-se chiū kiò Í-sek-lia̍t chèng tiúⁿ-ló lâi, kā in kóng, Lín ta̍k-lâng tio̍h chiàu ke-kháu chhú iûⁿ-á, thâi i chòe pôaⁿ-kè-choeh.

22Lín tio̍h the̍h一把ê牛膝草，ùn盆內ê血，用盆內ê血抹門楣，kap雙pêng ê門khiā；lín無論甚麼人m̄-thang tùi伊ê厝出門，直到明á早起。Lín tio̍h the̍h chi̍t-pé ê gû-chhek-chháu, ùn phûn-lāi ê huih, ēng phûn-lāi ê huih boah mn̂g-bâi, kap siang-pêng ê mn̂g-khiā; lín bô-lūn sím-mi̍h lâng m̄-thang tùi i ê chhù chhut-mn̂g, ti̍t-kàu bîn-á-chá-khí.

23因為耶和華beh遍行，phah死埃及人；伊看見血tī門楣，kap雙pêng ê門khiā，耶和華就beh pôaⁿ過hit-ê門，m̄准滅性命ê入lín ê厝，來phah死lín。In-ūi Iâ-hô-hoa beh piàn-kiâⁿ, phah-sí Ai-ki̍p lâng; I khòaⁿ-kìⁿ huih tī mn̂g-bâi, kap siang-pêng ê mn̂g-khiā, Iâ-hô-hoa chiū beh pôaⁿ-kè hit-ê mn̂g, m̄-chún bia̍t sìⁿ-miā-ê ji̍p lín ê chhù, lâi phah-sí lín.

24Chit-ê事，lín tio̍h守伊，做lín kap lín ê kiaⁿ孫永遠ê例。Chit-ê sū, lín tio̍h siú i, chòe lín kap lín ê kiáⁿ-sun éng-oán ê lē.

25後來lín到耶和華照伊所應允賞賜lín hit-ê地，就tio̍h守chit-ê禮。Āu-lâi lín kàu Iâ-hô-hoa chiàu I só͘ èng-ún siúⁿ-sù lín hit-ê tōe, chiū tio̍h siú chit-ê lé.

26Lín ê kiáⁿ兒若問lín，為啥事行chit-ê禮？Lín ê kiáⁿ-jî nā mn̄g lín, Ūi siáⁿ-sū kiâⁿ chit-ê lé?

27lín就tio̍h講：這是耶和華pôaⁿ過節ê祭；當以色列人tī埃及ê時，伊phah死埃及人，pôaⁿ過以色列人ê厝，救咱ta̍k家。 Tùi án-ni，百姓àⁿ頭敬拜。lín chiū tio̍h kóng, Che sī Iâ-hô-hoa pôaⁿ-kè-choeh ê chè; tng Í-sek-lia̍t lâng tī Ai-ki̍p ê sî, I phah-sí Ai-ki̍p lâng, pôaⁿ-kè Í-sek-lia̍t lâng ê chhù, kiù lán ta̍k-ke. Tùi án-ni peh-sìⁿ àⁿ-thâu kèng-pài.

28以色列人就去án-ni行；耶和華所吩咐摩西、亞倫ê，in照án-ni行。Í-sek-lia̍t lâng chiū khì án-ni kiâⁿ; Iâ-hô-hoa só͘ hoan-hù Mô͘-se, A-lûn-ê, in chiàu án-ni kiâⁿ.

29到半暝耶和華將埃及地所有ê大kiáⁿ，就是tùi坐位ê法老ê大kiáⁿ 到監犯ê大kiáⁿ，以及頭水生ê cheng-siⁿ，一盡thâi死。Kàu pòaⁿ-mî Iâ-hô-hoa chiong Ai-ki̍p tōe só͘ ū ê tōa-kiáⁿ, chiū-sī tùi chē-ūi ê Hoat-ló ê tōa-kiáⁿ kàu kaⁿ-hoān ê tōa-kiáⁿ, í-ki̍p thâu-chúi-siⁿ ê cheng-siⁿ, it-chīn thâi-sí.

30法老kap一切ê人臣，kap埃及ê眾人，暝時lóng起來；tī埃及有大啼哭ê聲，因為無一家無死人。Hoat-ló kap it-chhè ê jîn-sîn, kap Ai-ki̍p ê chèng-lâng, mî-sî lóng khí-lâi; tī Ai-ki̍p ū tōa thî-khàu ê siaⁿ, in-ūi bô chi̍t-ke bô sí-lâng.

31法老透暝召摩西、亞倫講：起來，kap以色列人tio̍h tùi我ê百姓中間出去，照lín所講ê，去服事耶和華；Hoat-ló thàu-mî tiàu Mô͘-se, A-lûn kóng, Khí-lâi, kap Í-sek-lia̍t lâng tio̍h tùi góa ê peh-sìⁿ tiong-kan chhut-khì, chiàu lín só͘ kóng ê, khì ho̍k-sāi Iâ-hô-hoa;

32也照lín所講ê，連羊群牛群帶帶去；也tio̍h kā我祝福。iā chiàu lín só͘ kóng ê, liân iûⁿ-kûn gû-kûn tòa-tòa khì; iā tio̍h kā góa chiok-hok.

33埃及人逼百姓；kah in緊緊出in ê地，講：阮lóng死lah。Ai-ki̍p lâng pek peh-sìⁿ; kah in kín-kín chhut in ê tōe, kóng, Goán lóng sí-lah.

34百姓就the̍h無酵ê生麵，將chhiau麵ê器具包tī衫內，背tī肩頭頂。Peh-sìⁿ chiū the̍h bô-kàⁿ ê chhiⁿ-mī, chiong chhiau-mī ê khì-kū pau tī saⁿ-lāi, pē tī keng-thâu-téng.

35以色列人照摩西ê話行，tùi埃及討銀器、金器kap衣裳。Í-sek-lia̍t lâng chiàu Mô͘-se ê ōe kiâⁿ, tùi Ai-ki̍p thó gûn-khì kim-khì kap i-chiûⁿ.

36耶和華hō͘百姓得tio̍h恩典tī埃及人ê面前，照in所討ê hō͘ in；Tùi án-ni， in搶埃及人。Iâ-hô-hoa hō͘ peh-sìⁿ tit-tio̍h un-tián tī Ai-ki̍p lâng ê bīn-chêng, chiàu in só͘-thó-ê hō͘ in; tùi án-ni in chhiúⁿ Ai-ki̍p lâng.

37以色列人tùi Lân-sek去So͘-kat，除gín-á以外，步行ê大人約有六十萬。Í-sek-lia̍t lâng tùi Lân-sek khì So͘-kat, tû gín-á í-gōa, pō͘-kiâⁿ ê tōa-lâng iok ū la̍k-cha̍p-bān.

38Koh有chōe-chōe雜族ê人，也有羊群、牛群chōe-chōe cheng-siⁿ kap in上去。Koh ū chōe-chōe cha̍p-cho̍k ê lâng, iā ū iûⁿ-kûn gû-kûn chōe-chōe cheng-siⁿ kap in chiūⁿ-khì.

39In用埃及帶出來ê生麵pek做無酵餅；無發酵，是因為受逼出埃及，bōe會延chhiân得，也無為家己備辦甚麼食物。In ēng Ai-ki̍p tòa-chhut-lâi ê chhiⁿ-mī pek-chòe bô-kàⁿ-piáⁿ; bô hoat-kàⁿ, sī in-ūi siū-pek chhut Ai-ki̍p, bōe-ōe iân-chhiân-tit, iā bô ūi ka-kī pī-pān sím-mi̍h chia̍h-mi̍h.

40以色列人出外tī埃及四百三十年。Í-sek-lia̍t lâng chhut-gōa tī Ai-ki̍p sì-pah saⁿ-cha̍p nî.

41到四百三十年滿，tú-tú hit日，耶和華ê軍隊lóng tùi埃及地出來。Kàu sì-pah saⁿ-cha̍p nî móa, tú-tú hit-ji̍t, Iâ-hô-hoa ê kun-tūi lóng tùi Ai-ki̍p tōe chhut-lâi.

42Chit暝tio̍h為耶和華守伊，因為伊chhōa in出埃及地；這是耶和華ê暝，是以色列眾人代代所tio̍h守ê。Chit-mî tio̍h ūi Iâ-hô-hoa siú i, in-ūi I chhōa in chhut Ai-ki̍p tōe; che sī Iâ-hô-hoa ê mî, sī Í-sek-lia̍t chèng lâng tāi-tāi só͘ tio̍h siú-ê.

43耶和華對摩西、亞倫講：pôaⁿ過節ê例是án-ni；Iâ-hô-hoa tùi Mô͘-se, A-lûn kóng, Pôaⁿ-kè-choeh ê lē sī án-ni;

44外邦人lóng m̄-thang食伊；獨獨ta̍k人用銀買ê奴僕，已經kā伊行割禮，就thang食。gōa-pang lâng lóng m̄-thang chia̍h i; to̍k-to̍k ta̍k-lâng ēng gûn bóe ê lô͘-po̍k, í-keng kā i kiâⁿ kat-lé, chiū thang chia̍h.

45寄腳ê kap倩工人lóng m̄-thang食。Kià-kha-ê kap chhiàⁿ-kang lâng lóng m̄-thang chia̍h.

46Tio̍h tī一間厝食伊，一塊肉也m̄-thang帶出厝外；伊ê骨一支也m̄-thang phah折。Tio̍h tī chi̍t keng chhù chia̍h i, chi̍t tè bah iā m̄-thang tòa-chhut chhù-gōa; i ê kut chi̍t-ki iā m̄-thang phah-chi̍h.

47以色列全會lóng tio̍h守伊。Í-sek-lia̍t choân-hōe lóng tio̍h siú i.

48若有外族人出外tī lín中間，ài守pôaⁿ過節來服事耶和華，伊所有ê ta-po͘人tio̍h受割禮，然後伊thang來守，就kap本族ê人無各樣；總是無受割禮ê人，lóng m̄-thang食伊。Nā ū gōa-cho̍k lâng chhut-gōa tī lín tiong-kan, ài siú pôaⁿ-kè-choeh lâi ho̍k-sāi Iâ-hô-hoa, i só͘-ū ê ta-po͘-lâng tio̍h siū kat-lé, jiân-āu i thang lâi siú, chiū kap pún-cho̍k ê lâng bô koh-iūⁿ; chóng-sī bô siū kat-lé ê lâng, lóng m̄-thang chia̍h i.

49本族ê人kap外族ê人出外tī lín中間，lóng同一樣ê例。Pún-cho̍k ê lâng kap gōa-cho̍k ê lâng chhut-gōa tī lín tiong-kan, lóng tâng-chi̍t-iūⁿ ê lē.

50以色列眾人就án-ni行，照耶和華所吩咐摩西、亞倫ê去做。Í-sek-lia̍t chèng-lâng chiū án-ni kiâⁿ, chiàu Iâ-hô-hoa só͘ hoan-hù Mô͘-se, A-lûn ê khì chòe.

51當hit日耶和華chhōa以色列人，照in ê軍隊，出埃及地。Tng hit-ji̍t Iâ-hô-hoa chhōa Í-sek-lia̍t lâng, chiàu in ê kun-tūi, chhut Ai-ki̍p tōe.

1耶和華吩咐摩西講：Iâ-hô-hoa hoan-hù Mô͘-se kóng,

2以色列中，無論人kap cheng-siⁿ，見若頭上 ê大kiáⁿ，lóng tio̍h分別做聖，歸tī我；因為本是我ê。Í-sek-lia̍t-tiong, bô-lūn lâng kap cheng-siⁿ, kìⁿ-nā thâu-chiūⁿ ê tōa-kiáⁿ, lóng tio̍h hun-piat chòe-sèng, kui tī Góa; in-ūi pún sī Góa ê.

3摩西kā百姓講：Lín tio̍h記念chit日，就是lín tùi埃及地，tùi做奴才ê家，出來；因為耶和華用大權能ê手chhōa lín tùi chia出；有酵ê餅lóng m̄-thang食。Mô͘-se kā peh-sìⁿ kóng, Lín tio̍h kì-liām chit-ji̍t, chiū-sī lín tùi Ai-ki̍p tōe, tùi chòe lô͘-châi ê ke, chhut-lâi; in-ūi Iâ-hô-hoa ēng tōa koân-lêng ê chhiú chhōa lín tùi chia chhut; ū kàⁿ ê piáⁿ lóng m̄-thang chia̍h.

4Tī A-pit月間，chit日是lín出來ê日。Tī A-pit ge̍h-kan, chit-ji̍t sī lín chhut-lâi ê ji̍t.

5將來耶和華chhōa lín入迦南、Hek、A-mô͘-lī、Hi-bī、Iâ-pò͘-su，hiah-ê族ê地，就是對你ê祖公chiù-chōa應允hō͘你，hit-ê流奶kap蜜ê地，hit時你tio̍h tī chit月間守chit-ê禮。Chiong-lâi Iâ-hô-hoa chhōa lín ji̍p Ka-lâm, Hek, A-mô͘-lī, Hi-bī, Iâ-pò͘-su, hiah-ê cho̍k ê tōe, chiū-sī tùi lí ê chó͘-kong chiù-chōa èng-ún hō͘ lí, hit-ê lâu lin kap bi̍t ê tōe, hit-sî lí tio̍h tī chit-ge̍h-kan siú chit-ê lé.

6你tio̍h食無酵餅七日；到第七日就是耶和華ê節。Lí tio̍h chia̍h bô-kàⁿ-piáⁿ chhit-ji̍t; kàu tē-chhit ji̍t chiū-sī Iâ-hô-hoa ê choeh.

7Chit七日久tio̍h食無酵餅；tī你ê四境內，m̄-thang看見你有下(hē)酵ê餅，也m̄-thang看見你有酵母。Chit chhit-ji̍t kú tio̍h chia̍h bô-kàⁿ-piáⁿ; tī lí ê sì-kéng lāi, m̄-thang khòaⁿ-kìⁿ lí ū hē-kàⁿ ê piáⁿ, iā m̄-thang khòaⁿ-kìⁿ lí ū kàⁿ-bú.

8當hit日，你tio̍h kā你ê kiáⁿ講：這是因為耶和華，tī我出埃及ê時，所kā我行ê事。Tng hit-ji̍t, lí tio̍h kā lí ê kiáⁿ kóng, Che sī in-ūi Iâ-hô-hoa, tī góa chhut Ai-ki̍p ê sî, só͘ kā góa kiâⁿ ê sū.

9這beh kā你做記號tī你ê手，做記念tī你ê頭額；hō͘耶和華ê律法常常tī你ê嘴；因為耶和華bat用大權能ê手chhōa你出埃及；Che beh kā lí chòe kì-hō tī lí ê chhiú, chòe kì-liām tī lí ê thâu-hia̍h; hō͘ Iâ-hô-hoa ê lu̍t-hoat siông-siông tī lí ê chhùi; in-ūi Iâ-hô-hoa bat ēng tōa koân-lêng ê chhiú chhōa lí chhut Ai-ki̍p;

10所以ta̍k年到期你tio̍h守chit-ê例。só͘-í ta̍k-nî kàu-kî lí tio̍h siú chit-ê lē.

11將來耶和華beh照伊對你kap你ê祖公所chiù-chōa ê，chhōa你入迦南人ê地，將chit-ê地賞賜你；Chiong-lâi Iâ-hô-hoa beh chiàu I tùi lí kap lí ê chó͘-kong só͘ chiù-chōa ê, chhōa lí ji̍p Ka-lâm lâng ê tōe, chiong chit-ê tōe siúⁿ-sù lí;

12hit時你tio̍h將一切頭胎ê ta-po͘-kiáⁿ kap所有頭水公ê cheng-siⁿ，歸hō͘耶和華；chiah-ê lóng屬耶和華。hit-sî lí tio̍h chiong it-chhè thâu-thai ê ta-po͘-kiáⁿ kap só͘ ū thâu-chúi kang ê cheng-siⁿ, kui hō͘ Iâ-hô-hoa; chiah-ê lóng sio̍k Iâ-hô-hoa.

13見若頭水生ê驢，tio̍h用羊á替贖；若無beh替贖，就tio̍h kŏng折伊ê頷頸；見若你頭上 ê ta-po͘-kiáⁿ lóng tio̍h替贖。Kìⁿ-nā thâu-chúi-siⁿ ê lû, tio̍h ēng iûⁿ-á thòe-sio̍k; nā bô beh thòe-sio̍k, chiū tio̍h kòng-chi̍h i ê ām-kún; kìⁿ-nā lí thâu-chiūⁿ ê ta-po͘-kiáⁿ lóng tio̍h thòe-sio̍k.

14日後你ê kiáⁿ問你講，這是甚麼緣故？你tio̍h對伊講，耶和華用大權能ê手，chhōa阮tùi埃及，tùi做奴才ê家，出來。Ji̍t-āu lí ê kiáⁿ mn̄g lí kóng, Che sī sím-mi̍h iân-kò͘? lí tio̍h tùi i kóng, Iâ-hô-hoa ēng tōa koân-lêng ê chhiú, chhōa goán tùi Ai-ki̍p, tùi chòe lô͘-châi ê ke, chhut-lâi.

15Hit時法老固執m̄准阮去，耶和華就將埃及地所有頭胎ê，無論是人ê大kiáⁿ，á是cheng-siⁿ ê頭水ê，lóng害死；因為án-ni，我將頭水ê公ê獻hō͘耶和華做祭；獨獨我ê大kiáⁿ lóng用替贖。Hit-sî Hoat-ló kò͘-chip m̄-chún goán khì, Iâ-hô-hoa chiū chiong Ai-ki̍p tōe só͘-ū thâu-thai-ê, bô-lūn sī lâng ê tōa-kiáⁿ, á-sī cheng-siⁿ ê thâu-chúi-ê, lóng hāi-sí; in-ūi án-ni, góa chiong thâu-chúi ê kang-ê hiàn hō͘ Iâ-hô-hoa chòe-chè; to̍k-to̍k góa ê tōa-kiáⁿ lóng ēng thòe-sio̍k.

16這beh做記號tī你ê手，做記念hâ tī你ê頭額；因為耶和華用大權能ê手，chhōa阮tùi埃及出來。Che beh chòe kì-hō tī lí ê chhiú, chòe kì-liām hâ tī lí ê thâu-hia̍h; in-ūi Iâ-hô-hoa ēng tōa koân-lêng ê chhiú, chhōa goán tùi Ai-ki̍p chhut-lâi.

17法老准百姓去ê時，腓利士地ê路雖然khah近，總是上帝無chhōa in tùi hia去；因為上帝講：驚了百姓tú-tio̍h交戰，就退悔，倒tńg去埃及。Hoat-ló chún peh-sìⁿ khì ê sî, Hui-lī-sū tōe ê lō͘ sui-jiân khah-kūn, chóng-sī Siōng-tè bô chhōa in tùi hia khì; in-ūi Siōng-tè kóng, Kiaⁿ-liáu peh-sìⁿ tú-tio̍h kau-chiàn, chiū thè-hóe, tò-tńg-khì Ai-ki̍p.

18所以上帝chhōa百姓彎tùi紅海曠野hit條路去；以色列人lóng排隊伍，tùi埃及地出去。Só͘-í Siōng-tè chhōa peh-sìⁿ oan tùi Âng-hái khòng-iá hit-tiâu lō͘ khì; Í-sek-lia̍t lâng lóng pâi tūi-ngó͘, tùi Ai-ki̍p tōe chhut-khì.

19摩西帶約瑟ê骨頭kap伊去；因為約瑟bat切切kah以色列人chiù-chōa，對in講：上帝的確眷顧lín，lín tio̍h帶我ê骨頭tùi chia相kap去。Mô͘-se tòa Iok-sek ê kut-thâu kap i khì; in-ūi Iok-sek bat chhiat-chhiat kah Í-sek-lia̍t lâng chiù-chōa, tùi in kóng, Siōng-tè tek-khak koàn-kò͘ lín, lín tio̍h tòa góa ê kut-thâu tùi chia saⁿ-kap khì.

20In tùi So͘-kat起身，紮營tī近曠野ê Í-thóng。In tùi So͘-kat khí-sin, chat-iâⁿ tī kūn khòng-iá ê Í-thóng.

21耶和華行tī in ê頭前，日時tī雲柱中chhōa in ê路，暝時tī火柱中光照in；hō͘ in日暝lóng thang行。Iâ-hô-hoa kiâⁿ tī in ê thâu-chêng, ji̍t-sî tī hûn-thiāu-tiong chhōa in ê lō͘, mî-sî tī hé-thiāu-tiong kng-chiò in; hō͘ in ji̍t-mî lóng thang kiâⁿ.

22日時ê雲柱，暝時ê火柱，lóng無離開百姓ê頭前。Ji̍t-sî ê hûn-thiāu, mî-sî ê hé-thiāu, lóng bô lī-khui peh-sìⁿ ê thâu-chêng.

1耶和華kā摩西講：Iâ-hô-hoa kā Mô͘-se kóng,

2你吩咐以色列人oa̍t倒tńg，紮營tī Pí-hap-hi-lio̍k ê頭前，tī Bi̍t-toa̍t kap海ê中間，tī Pa-le̍k-sé-hun ê頭前，tī hit對面紮營tī海邊。Lí hoan-hù Í-sek-lia̍t lâng oa̍t-tò-tńg, chat-iâⁿ tī Pí-hap-hi-lio̍k ê thâu-chêng, tī Bi̍t-toa̍t kap hái ê tiong-kan, tī Pa-le̍k-sé-hun ê thâu-chêng, tī hit tùi-bīn chat-iâⁿ tī hái-piⁿ.

3法老beh議論以色列人講：In tī地中se̍h無路，曠野kā in圍困teh。Hoat-ló beh gī-lūn Í-sek-lia̍t lâng kóng, In tī tōe-tiong se̍h bô lō͘, khòng-iá kā in ûi-khùn teh.

4我beh hō͘法老ê心硬，伊beh追jip in；我就tī法老kap伊ê全軍來得tio̍h榮光；埃及人就知我是耶和華。In就án-ni行。Góa beh hō͘ Hoat-ló ê sim ngī, i beh tui-jip in; Góa chiū tī Hoat-ló kap i ê choân-kun lâi tit-tio̍h êng-kng; Ai-ki̍p lâng chiū chai Góa sī Iâ-hô-hoa. In chiū án-ni kiâⁿ.

5有人報埃及王講：Hit-ê百姓走去；法老kap伊ê人臣對待hit-ê百姓ê心就變換，講：咱准以色列人去，無koh服事咱，這是甚麼緣故ah？Ū lâng pò Ai-ki̍p ông kóng, Hit-ê peh-sìⁿ cháu-khì; Hoat-ló kap i ê jîn-sîn tùi-thāi hit-ê peh-sìⁿ ê sim chiū piàn-ōaⁿ, kóng, Lán chún Í-sek-lia̍t lâng khì, bô koh ho̍k-sāi lán, che sī sím-mi̍h iân-kò͘ ah?

6法老就備辦伊ê車，帶伊ê百姓相kap去。Hoat-ló chiū pī-pān i ê chhia, tòa i ê peh-sìⁿ saⁿ-kap khì.

7也帶六百張特別車，kap埃及所有ê車，ta̍k張車lóng有兵頭teh管。Iā tòa la̍k-pah tiuⁿ te̍k-pia̍t chhia, kap Ai-ki̍p só͘ ū ê chhia, ta̍k tiuⁿ chhia lóng ū peng-thâu teh koán.

8耶和華hō͘埃及王法老ê心硬；伊就追jip以色列人；但是以色列人靠大權能ê手出去。Iâ-hô-hoa hō͘ Ai-ki̍p ông Hoat-ló ê sim ngī; i chiū tui-jip Í-sek-lia̍t lâng; nā-sī Í-sek-lia̍t lâng khò tōa koân-lêng ê chhiú chhut-khì.

9埃及人追jip in，法老一切ê馬、車，kap伊ê馬兵，kap伊ê軍隊，就tī海邊óa近Pí-hap-hi-lio̍k，tī Pa-le̍k-sé-hun ê對面，tī in安營ê所在，jip-tio̍h in。Ai-ki̍p lâng tui-jip in, Hoat-ló it-chhè ê bé, chhia, kap i ê bé-peng, kap i ê kun-tūi, chiū tī hái-piⁿ óa-kūn Pí-hap-hi-lio̍k, tī Pa-le̍k-sé-hun ê tùi-bīn, tī in an-iâⁿ ê só͘-chāi, jip-tio̍h in.

10法老近óa ê時，以色列人kia̍h目看見埃及人jip-óa來，就真驚，喉叫耶和華。Hoat-ló kūn-óa ê sî, Í-sek-lia̍t lâng kia̍h-ba̍k khòaⁿ-kìⁿ Ai-ki̍p lâng jip-óa-lâi, chiū chin kiaⁿ, âu-kiò Iâ-hô-hoa.

11In對摩西講：kiám是埃及無塚地，你chiah chhōa阮出來死tī曠野mah？你啥事án-ni款待阮，chhōa阮出埃及ah？In tùi Mô͘-se kóng, Kiám sī Ai-ki̍p bô thióng-tōe, lí chiah chhōa goán chhut-lâi sí tī khòng-iá mah? lí siáⁿ-sū án-ni khoán-thāi goán, chhōa goán chhut Ai-ki̍p ah?

12阮tī埃及kiám無對你án-ni講：莫得chhap阮，chhut-chāi阮服事埃及人mah？因為服事埃及人，khah得死tī曠野。Goán tī Ai-ki̍p kiám bô tùi lí án-ni kóng, Bo̍h-tit chhap goán, chhut-chāi goán ho̍k-sāi Ai-ki̍p lâng mah? In-ūi ho̍k-sāi Ai-ki̍p lâng, khah-tit sí tī khòng-iá.

13摩西對百姓講：m̄免驚，做lín khiā-teh，看耶和華今á日為tio̍h lín所beh行ê拯救；因為lín今á日所看見ê埃及人，的確永遠無koh看見。Mô͘-se tùi peh-sìⁿ kóng, M̄-bián kiaⁿ, chòe lín khiā-teh, khòaⁿ Iâ-hô-hoa kin-á-ji̍t ūi-tio̍h lín só͘ beh kiâⁿ ê chín-kiù; in-ūi lín kin-á-ji̍t só͘ khòaⁿ-kìⁿ ê Ai-ki̍p lâng, tek-khak éng-oán bô koh khòaⁿ-kìⁿ.

14耶和華beh為lín交戰，做lín恬恬，莫做聲。Iâ-hô-hoa beh ūi lín kau-chiàn, chòe lín tiām-tiām, bo̍h chòe-siaⁿ.

15耶和華對摩西講：你啥事喉叫我ah？你tio̍h kah以色列人進前去。Iâ-hô-hoa tùi Mô͘-se kóng, Lí siáⁿ-sū âu-kiò Góa ah? lí tio̍h kah Í-sek-lia̍t lâng chìn-chêng khì.

16你kia̍h柺á伸手kí海，來分開伊；以色列人beh tī海中行乾地；Lí kia̍h koáiⁿ-á chhun-chhiú kí hái, lâi pun-khui i; Í-sek-lia̍t lâng beh tī hái-tiong kiâⁿ ta-tōe;

17獨獨我，我beh hō͘埃及人ê心硬，in beh tè落去；我beh tī法老kap伊ê全軍，伊ê車，伊ê馬兵，來得tio̍h榮光。to̍k-to̍k Góa, Góa beh hō͘ Ai-ki̍p lâng ê sim ngī, in beh tè-lo̍h-khì; Góa beh tī Hoat-ló kap i ê choân-kun, i ê chhia, i ê bé-peng, lâi tit-tio̍h êng-kng.

18我tī法老kap伊ê車，伊ê馬兵，得tio̍h榮光ê時，埃及人就知我是耶和華。Góa tī Hoat-ló kap i ê chhia, i ê bé-peng, tit-tio̍h êng-kng ê sî, Ai-ki̍p lâng chiū chai Góa sī Iâ-hô-hoa.

19上帝ê使者，本行tī以色列ê營前ê，徙來行tī in ê後面；雲柱也tùi in ê頭前，徙來khiā tī in ê後面，Siōng-tè ê sù-chiá, pún kiâⁿ tī Í-sek-lia̍t ê iâⁿ-chêng-ê, sóa lâi kiâⁿ tī in ê āu-bīn; hûn-thiāu iā tùi in ê thâu-chêng, sóa lâi khiā tī in ê āu-bīn,

20tī埃及營kap以色列營ê中間；hit-pêng有雲有烏暗，chit-pêng暝時發出光；thong暝兩pêng bōe相近。tī Ai-ki̍p iâⁿ kap Í-sek-lia̍t iâⁿ ê tiong-kan; hit-pêng ū hûn ū o͘-àm, chit-pêng mî-sî hoat-chhut kng; thong-mî nn̄g pêng bōe saⁿ-kūn.

21摩西就伸手kí海，耶和華thong暝hō͘東風大起，hō͘海退去，水就分開，海就成做乾地。Mô͘-se chiū chhun-chhiú kí hái, Iâ-hô-hoa thong-mî hō͘ tang-hong tōa khí, hō͘ hái thè-khì, chúi chiū pun-khui, hái chiū chiâⁿ-chòe ta-tōe.

22以色列人落海中行乾地，水tī in ê雙pêng成做牆壁。Í-sek-lia̍t lâng lo̍h hái-tiong kiâⁿ ta-tōe, chúi tī in ê siang-pêng chiâⁿ-chòe chhiûⁿ-piah.

23埃及人追jip in；法老一切ê馬、車，kap馬兵，lóng tè in到海中。Ai-ki̍p lâng tui-jip-in; Hoat-ló it-chhè ê bé, chhia, kap bé-peng, lóng tè in kàu hái-tiong.

24到天beh光ê時，耶和華tùi雲kap火ê柱中àⁿ落，看埃及ê軍隊，phah亂in ê隊伍；Kàu thiⁿ beh kng ê sî, Iâ-hô-hoa tùi hûn kap hé ê thiāu-tiong àⁿ-lo̍h, khòaⁿ Ai-ki̍p ê kun-tūi, phah-loān in ê tūi-ngó͘;

25koh hō͘ in ê車輪lak落，oh得行；致到埃及人講：咱tio̍h tùi以色列人ê面前逃走，因為耶和華為tio̍h in kap埃及人交戰。koh hō͘ in ê chhia-lûn lak-lo̍h, oh-tit kiâⁿ; tì-kàu Ai-ki̍p lâng kóng, Lán tio̍h tùi Í-sek-lia̍t lâng ê bīn-chêng tô-cháu, in-ūi Iâ-hô-hoa ūi-tio̍h in kap Ai-ki̍p lâng kau-chiàn.

26耶和華kā摩西講：你伸手kí海，hō͘水倒tńg來淹埃及人，kap in ê車，in ê馬兵。Iâ-hô-hoa kā Mô͘-se kóng, Lí chhun-chhiú kí hái, hō͘ chúi tò-tńg-lâi im Ai-ki̍p lâng, kap in ê chhia, in ê bé-peng.

27摩西就伸手kí海；到天一下光，海水koh照舊；埃及人逃走，水遮(cha̍h)tī in ê頭前；耶和華就將埃及人車倒tī海中。Mô͘-se chiū chhun-chhiú kí hái; kàu thiⁿ chi̍t-ē kng, hái-chúi koh chiàu-kū; Ai-ki̍p lâng tô-cháu, chúi cha̍h tī in ê thâu-chêng; Iâ-hô-hoa chiū chiong Ai-ki̍p lâng chhia-tó tī hái-tiong.

28水就反流，淹密hiah-ê車kap馬兵；法老ê全軍tè以色列人落海ê，連一個也無留teh。Chúi chiū hoan-lâu, im-ba̍t hiah-ê chhia kap bé-peng; Hoat-ló ê choân-kun tè Í-sek-lia̍t lâng lo̍h hái-ê, liân chi̍t-ê iā bô lâu-teh.

29總是以色列人tī海中行乾地，水tī in ê雙pêng成做in ê牆壁。Chóng-sī Í-sek-lia̍t lâng tī hái-tiong kiâⁿ ta-tōe, chúi tī in ê siang-pêng chiâⁿ-chòe in ê chhiûⁿ-piah.

30Hit日耶和華án-ni救以色列人脫離埃及人ê手；以色列人看見埃及人ê身屍tī海邊。Hit-ji̍t Iâ-hô-hoa án-ni kiù Í-sek-lia̍t lâng thoat-lī Ai-ki̍p lâng ê chhiú; Í-sek-lia̍t lâng khòaⁿ-kìⁿ Ai-ki̍p lâng ê sin-si tī hái-piⁿ.

31以色列人看見耶和華對埃及人所行ê大事，就敬畏耶和華；koh信服耶和華kap伊ê奴僕摩西。Í-sek-lia̍t lâng khòaⁿ-kìⁿ Iâ-hô-hoa tùi Ai-ki̍p lâng só͘ kiâⁿ ê tōa-sū, chiū kèng-ùi Iâ-hô-hoa; koh sìn-ho̍k Iâ-hô-hoa kap I ê lô͘-po̍k Mô͘-se.