1耶和華kā摩西講：Iâ-hô-hoa kā Mô͘-se kóng,

2你吩咐以色列人oa̍t倒tńg，紮營tī Pí-hap-hi-lio̍k ê頭前，tī Bi̍t-toa̍t kap海ê中間，tī Pa-le̍k-sé-hun ê頭前，tī hit對面紮營tī海邊。Lí hoan-hù Í-sek-lia̍t lâng oa̍t-tò-tńg, chat-iâⁿ tī Pí-hap-hi-lio̍k ê thâu-chêng, tī Bi̍t-toa̍t kap hái ê tiong-kan, tī Pa-le̍k-sé-hun ê thâu-chêng, tī hit tùi-bīn chat-iâⁿ tī hái-piⁿ.

3法老beh議論以色列人講：In tī地中se̍h無路，曠野kā in圍困teh。Hoat-ló beh gī-lūn Í-sek-lia̍t lâng kóng, In tī tōe-tiong se̍h bô lō͘, khòng-iá kā in ûi-khùn teh.

4我beh hō͘法老ê心硬，伊beh追jip in；我就tī法老kap伊ê全軍來得tio̍h榮光；埃及人就知我是耶和華。In就án-ni行。Góa beh hō͘ Hoat-ló ê sim ngī, i beh tui-jip in; Góa chiū tī Hoat-ló kap i ê choân-kun lâi tit-tio̍h êng-kng; Ai-ki̍p lâng chiū chai Góa sī Iâ-hô-hoa. In chiū án-ni kiâⁿ.

5有人報埃及王講：Hit-ê百姓走去；法老kap伊ê人臣對待hit-ê百姓ê心就變換，講：咱准以色列人去，無koh服事咱，這是甚麼緣故ah？Ū lâng pò Ai-ki̍p ông kóng, Hit-ê peh-sìⁿ cháu-khì; Hoat-ló kap i ê jîn-sîn tùi-thāi hit-ê peh-sìⁿ ê sim chiū piàn-ōaⁿ, kóng, Lán chún Í-sek-lia̍t lâng khì, bô koh ho̍k-sāi lán, che sī sím-mi̍h iân-kò͘ ah?

6法老就備辦伊ê車，帶伊ê百姓相kap去。Hoat-ló chiū pī-pān i ê chhia, tòa i ê peh-sìⁿ saⁿ-kap khì.

7也帶六百張特別車，kap埃及所有ê車，ta̍k張車lóng有兵頭teh管。Iā tòa la̍k-pah tiuⁿ te̍k-pia̍t chhia, kap Ai-ki̍p só͘ ū ê chhia, ta̍k tiuⁿ chhia lóng ū peng-thâu teh koán.

8耶和華hō͘埃及王法老ê心硬；伊就追jip以色列人；但是以色列人靠大權能ê手出去。Iâ-hô-hoa hō͘ Ai-ki̍p ông Hoat-ló ê sim ngī; i chiū tui-jip Í-sek-lia̍t lâng; nā-sī Í-sek-lia̍t lâng khò tōa koân-lêng ê chhiú chhut-khì.

9埃及人追jip in，法老一切ê馬、車，kap伊ê馬兵，kap伊ê軍隊，就tī海邊óa近Pí-hap-hi-lio̍k，tī Pa-le̍k-sé-hun ê對面，tī in安營ê所在，jip-tio̍h in。Ai-ki̍p lâng tui-jip in, Hoat-ló it-chhè ê bé, chhia, kap i ê bé-peng, kap i ê kun-tūi, chiū tī hái-piⁿ óa-kūn Pí-hap-hi-lio̍k, tī Pa-le̍k-sé-hun ê tùi-bīn, tī in an-iâⁿ ê só͘-chāi, jip-tio̍h in.

10法老近óa ê時，以色列人kia̍h目看見埃及人jip-óa來，就真驚，喉叫耶和華。Hoat-ló kūn-óa ê sî, Í-sek-lia̍t lâng kia̍h-ba̍k khòaⁿ-kìⁿ Ai-ki̍p lâng jip-óa-lâi, chiū chin kiaⁿ, âu-kiò Iâ-hô-hoa.

11In對摩西講：kiám是埃及無塚地，你chiah chhōa阮出來死tī曠野mah？你啥事án-ni款待阮，chhōa阮出埃及ah？In tùi Mô͘-se kóng, Kiám sī Ai-ki̍p bô thióng-tōe, lí chiah chhōa goán chhut-lâi sí tī khòng-iá mah? lí siáⁿ-sū án-ni khoán-thāi goán, chhōa goán chhut Ai-ki̍p ah?

12阮tī埃及kiám無對你án-ni講：莫得chhap阮，chhut-chāi阮服事埃及人mah？因為服事埃及人，khah得死tī曠野。Goán tī Ai-ki̍p kiám bô tùi lí án-ni kóng, Bo̍h-tit chhap goán, chhut-chāi goán ho̍k-sāi Ai-ki̍p lâng mah? In-ūi ho̍k-sāi Ai-ki̍p lâng, khah-tit sí tī khòng-iá.

13摩西對百姓講：m̄免驚，做lín khiā-teh，看耶和華今á日為tio̍h lín所beh行ê拯救；因為lín今á日所看見ê埃及人，的確永遠無koh看見。Mô͘-se tùi peh-sìⁿ kóng, M̄-bián kiaⁿ, chòe lín khiā-teh, khòaⁿ Iâ-hô-hoa kin-á-ji̍t ūi-tio̍h lín só͘ beh kiâⁿ ê chín-kiù; in-ūi lín kin-á-ji̍t só͘ khòaⁿ-kìⁿ ê Ai-ki̍p lâng, tek-khak éng-oán bô koh khòaⁿ-kìⁿ.

14耶和華beh為lín交戰，做lín恬恬，莫做聲。Iâ-hô-hoa beh ūi lín kau-chiàn, chòe lín tiām-tiām, bo̍h chòe-siaⁿ.

15耶和華對摩西講：你啥事喉叫我ah？你tio̍h kah以色列人進前去。Iâ-hô-hoa tùi Mô͘-se kóng, Lí siáⁿ-sū âu-kiò Góa ah? lí tio̍h kah Í-sek-lia̍t lâng chìn-chêng khì.

16你kia̍h柺á伸手kí海，來分開伊；以色列人beh tī海中行乾地；Lí kia̍h koáiⁿ-á chhun-chhiú kí hái, lâi pun-khui i; Í-sek-lia̍t lâng beh tī hái-tiong kiâⁿ ta-tōe;

17獨獨我，我beh hō͘埃及人ê心硬，in beh tè落去；我beh tī法老kap伊ê全軍，伊ê車，伊ê馬兵，來得tio̍h榮光。to̍k-to̍k Góa, Góa beh hō͘ Ai-ki̍p lâng ê sim ngī, in beh tè-lo̍h-khì; Góa beh tī Hoat-ló kap i ê choân-kun, i ê chhia, i ê bé-peng, lâi tit-tio̍h êng-kng.

18我tī法老kap伊ê車，伊ê馬兵，得tio̍h榮光ê時，埃及人就知我是耶和華。Góa tī Hoat-ló kap i ê chhia, i ê bé-peng, tit-tio̍h êng-kng ê sî, Ai-ki̍p lâng chiū chai Góa sī Iâ-hô-hoa.

19上帝ê使者，本行tī以色列ê營前ê，徙來行tī in ê後面；雲柱也tùi in ê頭前，徙來khiā tī in ê後面，Siōng-tè ê sù-chiá, pún kiâⁿ tī Í-sek-lia̍t ê iâⁿ-chêng-ê, sóa lâi kiâⁿ tī in ê āu-bīn; hûn-thiāu iā tùi in ê thâu-chêng, sóa lâi khiā tī in ê āu-bīn,

20tī埃及營kap以色列營ê中間；hit-pêng有雲有烏暗，chit-pêng暝時發出光；thong暝兩pêng bōe相近。tī Ai-ki̍p iâⁿ kap Í-sek-lia̍t iâⁿ ê tiong-kan; hit-pêng ū hûn ū o͘-àm, chit-pêng mî-sî hoat-chhut kng; thong-mî nn̄g pêng bōe saⁿ-kūn.

21摩西就伸手kí海，耶和華thong暝hō͘東風大起，hō͘海退去，水就分開，海就成做乾地。Mô͘-se chiū chhun-chhiú kí hái, Iâ-hô-hoa thong-mî hō͘ tang-hong tōa khí, hō͘ hái thè-khì, chúi chiū pun-khui, hái chiū chiâⁿ-chòe ta-tōe.

22以色列人落海中行乾地，水tī in ê雙pêng成做牆壁。Í-sek-lia̍t lâng lo̍h hái-tiong kiâⁿ ta-tōe, chúi tī in ê siang-pêng chiâⁿ-chòe chhiûⁿ-piah.

23埃及人追jip in；法老一切ê馬、車，kap馬兵，lóng tè in到海中。Ai-ki̍p lâng tui-jip-in; Hoat-ló it-chhè ê bé, chhia, kap bé-peng, lóng tè in kàu hái-tiong.

24到天beh光ê時，耶和華tùi雲kap火ê柱中àⁿ落，看埃及ê軍隊，phah亂in ê隊伍；Kàu thiⁿ beh kng ê sî, Iâ-hô-hoa tùi hûn kap hé ê thiāu-tiong àⁿ-lo̍h, khòaⁿ Ai-ki̍p ê kun-tūi, phah-loān in ê tūi-ngó͘;

25koh hō͘ in ê車輪lak落，oh得行；致到埃及人講：咱tio̍h tùi以色列人ê面前逃走，因為耶和華為tio̍h in kap埃及人交戰。koh hō͘ in ê chhia-lûn lak-lo̍h, oh-tit kiâⁿ; tì-kàu Ai-ki̍p lâng kóng, Lán tio̍h tùi Í-sek-lia̍t lâng ê bīn-chêng tô-cháu, in-ūi Iâ-hô-hoa ūi-tio̍h in kap Ai-ki̍p lâng kau-chiàn.

26耶和華kā摩西講：你伸手kí海，hō͘水倒tńg來淹埃及人，kap in ê車，in ê馬兵。Iâ-hô-hoa kā Mô͘-se kóng, Lí chhun-chhiú kí hái, hō͘ chúi tò-tńg-lâi im Ai-ki̍p lâng, kap in ê chhia, in ê bé-peng.

27摩西就伸手kí海；到天一下光，海水koh照舊；埃及人逃走，水遮(cha̍h)tī in ê頭前；耶和華就將埃及人車倒tī海中。Mô͘-se chiū chhun-chhiú kí hái; kàu thiⁿ chi̍t-ē kng, hái-chúi koh chiàu-kū; Ai-ki̍p lâng tô-cháu, chúi cha̍h tī in ê thâu-chêng; Iâ-hô-hoa chiū chiong Ai-ki̍p lâng chhia-tó tī hái-tiong.

28水就反流，淹密hiah-ê車kap馬兵；法老ê全軍tè以色列人落海ê，連一個也無留teh。Chúi chiū hoan-lâu, im-ba̍t hiah-ê chhia kap bé-peng; Hoat-ló ê choân-kun tè Í-sek-lia̍t lâng lo̍h hái-ê, liân chi̍t-ê iā bô lâu-teh.

29總是以色列人tī海中行乾地，水tī in ê雙pêng成做in ê牆壁。Chóng-sī Í-sek-lia̍t lâng tī hái-tiong kiâⁿ ta-tōe, chúi tī in ê siang-pêng chiâⁿ-chòe in ê chhiûⁿ-piah.

30Hit日耶和華án-ni救以色列人脫離埃及人ê手；以色列人看見埃及人ê身屍tī海邊。Hit-ji̍t Iâ-hô-hoa án-ni kiù Í-sek-lia̍t lâng thoat-lī Ai-ki̍p lâng ê chhiú; Í-sek-lia̍t lâng khòaⁿ-kìⁿ Ai-ki̍p lâng ê sin-si tī hái-piⁿ.

31以色列人看見耶和華對埃及人所行ê大事，就敬畏耶和華；koh信服耶和華kap伊ê奴僕摩西。Í-sek-lia̍t lâng khòaⁿ-kìⁿ Iâ-hô-hoa tùi Ai-ki̍p lâng só͘ kiâⁿ ê tōa-sū, chiū kèng-ùi Iâ-hô-hoa; koh sìn-ho̍k Iâ-hô-hoa kap I ê lô͘-po̍k Mô͘-se.

1hit時摩西kap以色列人唱chit-ê歌o-ló耶和華，講； 我beh唱歌o-ló耶和華，因為伊至koân至大； 將馬kap騎馬ê hiat tī海中。Hit-sî Mô͘-se kap Í-sek-lia̍t lâng chhiùⁿ chit-ê koa o-ló Iâ-hô-hoa, kóng; Góa beh chhiùⁿ-koa o-ló Iâ-hô-hoa, in-ūi I chì-koâiⁿ chì-tōa; Chiong bé kap khiâ-bé-ê hiat tī hái-tiong.

2耶和華是我ê氣力，是我ê詩歌， 也是做我拯救ê主； 伊是我ê上帝，我beh o-ló伊， 是我ê父ê上帝，我beh尊伊最大。Iâ-hô-hoa sī góa ê khùi-la̍t, sī góa ê si-ko, Iā sī chòe góa chín-kiù ê Chú; I sī góa ê Siōng-tè, góa beh o-ló-I, Sī góa ê pē ê Siōng-tè, góa beh chun I chòe-tōa.

3耶和華是戰士； 伊ê名是耶和華。Iâ-hô-hoa sī chiàn-sū; I ê miâ sī Iâ-hô-hoa.

4法老ê車，kap伊ê軍兵，耶和華hiat伊tī海中； 伊特別揀ê軍長，lóng沉tī紅海。Hoat-ló ê chhia, kap i ê kun-peng, Iâ-hô-hoa hiat i tī hái-tiong; I te̍k-pia̍t kéng ê kun-tiúⁿ, lóng tîm tī Âng-hái.

5深淵蓋in；In親像石頭，墜到深ê所在。Chhim-ian khàm-in; In chhin-chhiūⁿ chio̍h-thâu, tūi kàu chhim ê só͘-chāi.

6耶和華ah，你ê chiàⁿ手展出能力，得tio̍h榮光； 耶和華ah，你ê chiàⁿ手phah碎對敵。Iâ-hô-hoa ah, Lí ê chiàⁿ-chhiú tián-chhut lêng-le̍k, tit-tio̍h êng-kng; Iâ-hô-hoa ah, Lí ê chiàⁿ-chhiú phah-chhùi tùi-te̍k.

7你發出大威嚴，車倒hiah-ê起來攻擊你ê； 你發出大受氣，燒毀in親像燒草。Lí hoat-chhut tōa ui-giâm, chhia-tó hiah-ê khí-lâi kong-kek Lí-ê; Lí hoat-chhut tōa siū-khì, sio-húi in chhin-chhiūⁿ sio-chháu.

8你發出鼻中ê氣，水就ná-chhèng ná高， 大水khiā起來親像kui堆； 海中ê深水堅定。Lí hoat-chhut phīⁿ-tiong ê khì, chúi chiū ná-chhèng ná-koâiⁿ, Tōa-chúi khiā-khí-lâi chhin-chhiūⁿ kui-tui; Hái-tiong ê chhim-chúi kian-tēng.

9對敵講： 我beh追in，我beh jip-tio̍h in，我beh分所搶ê物； 我beh tī in來足我ê心願； 我beh拔刀，我ê手beh滅in。Tùi-te̍k kóng, Góa beh tui in, góa beh jip-tio̍h in, góa beh pun só͘ chhiúⁿ ê mi̍h; Góa beh tī in lâi chiok góa ê sim-goān; Góa beh pu̍ih-to, góa ê chhiú beh bia̍t in.

10你一下pûn風，海就蓋密in； In親像鉛(iân)，沉tī大水中。Lí chi̍t-ē pûn-hong, hái chiū khàm-ba̍t-in; In chhin-chhiūⁿ iân, tîm tī tōa-chúi-tiong.

11耶和華ah，chiah-ê上帝 ê中間，是誰 能親像你？ Chī-chūi親像你，至聖thang榮光， 威嚴thang o-ló，行出奇事？Iâ-hô-hoa ah, chiah-ê siōng-tè ê tiong-kan, chī-chūi ōe chhin-chhiūⁿ Lí? Chī-chūi chhin-chhiūⁿ Lí, chì-sèng thang êng-kng, Ui-giâm thang o-ló, kiâⁿ-chhut kî-sū?

12你伸出chiàⁿ手， 地就吞滅in。Lí chhun-chhut chiàⁿ-chhiú, Tōe chiū thun-bia̍t-in.

13你用你ê慈愛，chhōa你所救贖ê百姓； 你用你ê權能，chhōa in入你聖ê所在。Lí ēng Lí ê chû-ài, chhōa Lí só͘ kiù-sio̍k ê peh-sìⁿ; Lí ēng Lí ê koân-lêng, chhōa in ji̍p Lí sèng ê só͘-chāi.

14列邦聽見就ngia̍uh-ngia̍uh-chhoah； Khiā起tī腓利士地ê，tú-tio̍h痛苦。Lia̍t-pang thiaⁿ-kìⁿ chiū ngia̍uh-ngia̍uh-chhoah; Khiā-khí tī Hui-lī-sū tōe ê, tú-tio̍h thòng-khó͘.

15Hit時Í-tong ê族長gông-ngia̍h； Mô͘-ap英雄ê人致到ngia̍uh-ngia̍uh-chhoah， 迦南地khiā起ê百姓，心lóng消溶。Hit-sî Í-tong ê cho̍k-tiúⁿ gông-ngia̍h; Mô͘-ap eng-hiông ê lâng tì-kàu ngia̍uh-ngia̍uh-chhoah, Ka-lâm tōe khiā-khí ê peh-sìⁿ, sim lóng siau-iûⁿ.

16Gông-ngia̍h驚惶到tī in； 耶和華ah，因為你ê手ê大權能，in定定親像石頭， Thèng候你ê百姓經過， Thèng候你所得tio̍h ê百姓過去。Gông-ngia̍h kiaⁿ-hiâⁿ kàu tī in; Iâ-hô-hoa ah, in-ūi Lí ê chhiú ê tōa koân-lêng, in tiāⁿ-tiāⁿ chhin-chhiūⁿ chio̍h-thâu, Thèng-hāu Lí ê peh-sìⁿ keng-kè, Thèng-hāu Lí só͘ tit-tio̍h ê peh-sìⁿ kè-khì.

17你beh chhōa in入去，栽培in tī你ê產業ê山， 耶和華ah，就是你為家己所備辦khiā起ê所在， 主ah，就是你ê手所建立ê聖所。Lí beh chhōa in ji̍p-khì, chai-pôe in tī Lí ê sán-gia̍p ê soaⁿ, Iâ-hô-hoa ah, chiū-sī Lí ūi ka-kī só͘ pī-pān khiā-khí ê só͘-chāi, Chú ah, chiū-sī Lí ê chhiú só͘ kiàn-li̍p ê sèng-só͘.

18耶和華beh做王，直到永遠。Iâ-hô-hoa beh chòe-ông, ti̍t-kàu éng-oán.

19因為法老ê馬，kap伊ê車，伊ê馬兵，到tī海中，耶和華hō͘海水反流淹密in；獨獨以色列人tī海中行乾地。In-ūi Hoat-ló ê bé, kap i ê chhia, i ê bé-peng, kàu tī hái-tiong, Iâ-hô-hoa hō͘ hái-chúi hoan-lâu im-ba̍t-in; to̍k-to̍k Í-sek-lia̍t lâng tī hái-tiong kiâⁿ ta-tōe.

20亞倫ê大姊女先知Bí-lī-àm，手裡kia̍h lin-long鼓，眾婦女也tè伊出去，kia̍h lin-long鼓跳舞。A-lûn ê tōa-chí lú sian-ti Bí-lī-àm, chhiú-ni̍h kia̍h lin-long-kó͘, chèng hū-lú iā tè i chhut-khì, kia̍h lin-long-kó͘ thiàu-bú.

21Bí-lī-àm和所唱ê講： Lín tio̍h唱歌o-ló耶和華，因為伊至koân至大； 將馬kap騎馬ê，hiat tī海中。Bí-lī-àm hô só͘-chhiùⁿ-ê kóng, Lín tio̍h chhiùⁿ-koa o-ló Iâ-hô-hoa, in-ūi I chì-koâiⁿ chì-tōa; Chiong bé kap khiâ-bé-ê, hiat tī hái-tiong.

22摩西chhōa以色列人tùi紅海進前行；in出去，到Su-jíⁿ ê曠野；tī曠野行三日，chhē無水。Mô͘-se chhōa Í-sek-lia̍t lâng tùi Âng-hái chìn-chêng kiâⁿ; in chhut-khì, kàu Su-jíⁿ ê khòng-iá; tī khòng-iá kiâⁿ saⁿ-ji̍t, chhē bô chúi.

23到Má-la̍h ê時，Má-la̍h ê水bōe lim得，因為水苦；所以名hit-ê地叫Má-la̍h。Kàu Má-la̍h ê sî, Má-la̍h ê chúi bōe lim-tit, in-ūi chúi khó͘; só͘-í miâ hit-ê tōe kiò Má-la̍h.

24百姓就對摩西哀怨講：阮beh lim甚麼ah？Peh-sìⁿ chiū tùi Mô͘-se ai-oàn kóng, Goán beh lim sím-mi̍h ah?

25摩西求叫耶和華；耶和華指示伊一叢樹，伊就hiat伊tī水裡，水就變甘。 伊tī-hia，為in定律例法度，tī-hia試驗in。Mô͘-se kiû-kiò Iâ-hô-hoa; Iâ-hô-hoa chí-sī i chi̍t châng chhiū, i chiū hiat i tī chúi-ni̍h, chúi chiū piàn-kam. I tī-hia, ūi in tēng lu̍t-lē hoat-tō͘, tī-hia chhì-giām in.

26Koh講：你若致意聽耶和華你ê上帝ê聲，koh行伊所看做合宜ê事，留心聽伊ê誡命，守伊一切ê律例，就我hō͘埃及人所tú-tio̍h ê破病，的確無hō͘你tú-tio̍h；因為我耶和華是醫治你ê。Koh kóng, Lí nā tì-ì thiaⁿ Iâ-hô-hoa lí ê Siōng-tè ê siaⁿ, koh kiâⁿ I só͘ khòaⁿ chòe ha̍p-gî ê sū, liû-sim thiaⁿ I ê kài-bēng, siú I it-chhè ê lu̍t-lē, chiū Góa hō͘ Ai-ki̍p lâng só͘ tú-tio̍h ê phòa-pīⁿ, tek-khak bô hō͘ lí tú-tio̍h; in-ūi Góa Iâ-hô-hoa sī i-tī lí-ê.

27In 到Í-lîm，tī-hia有十二個水泉，七十叢ê棗樹；in就tī-hia ê水邊紮營。In kàu Í-lîm, tī-hia ū cha̍p-jī ê chúi-chôaⁿ, chhit-cha̍p châng ê chó-chhiū; in chiū tī-hia ê chúi-piⁿ chat-iâⁿ.

1In tùi Í-lîm起身，tī出埃及地以後，第二月十五日，以色列人全會到Í-lîm kap Se-nái ê中間，Sìn ê曠野。In tùi Í-lîm khí-sin, tī chhut Ai-ki̍p tōe í-āu, tē-jī ge̍h cha̍p-gō͘ ji̍t, Í-sek-lia̍t lâng choân-hōe kàu Í-lîm kap Se-nái ê tiong-kan, Sìn ê khòng-iá.

2以色列人全會tī曠野哀怨摩西、亞倫。Í-sek-lia̍t lâng choân-hōe tī khòng-iá ai-oàn Mô͘-se, A-lûn.

3以色列人對in講：M̄值tio̍h阮tī埃及地死tī耶和華ê手。Hit時阮有肉滿鼎，有餅thang食到飽；lín chhōa阮出來到chit-ê曠野，是beh hō͘ chit-ê全會lóng餓死。Í-sek-lia̍t lâng tùi in kóng, M̄-ta̍t-tio̍h goán tī Ai-ki̍p tōe sí tī Iâ-hô-hoa ê chhiú. Hit-sî goán ū bah móa-tiáⁿ, ū piáⁿ thang chia̍h kàu-pá; lín chhōa goán chhut-lâi kàu chit-ê khòng-iá, sī beh hō͘ chit-ê choân-hōe lóng gō-sí.

4耶和華對摩西講：看ah，我beh tùi天落米糧hō͘ lín；百姓tio̍h出去，ta̍k日拾ta̍k日ê額；我thang試驗in，看in beh thàn我ê法度á m̄。Iâ-hô-hoa tùi Mô͘-se kóng, Khòaⁿ ah, Góa beh tùi thiⁿ lo̍h bí-niû hō͘ lín; peh-sìⁿ tio̍h chhut-khì, ta̍k-ji̍t khioh ta̍k-ji̍t ê gia̍h; Góa thang chhì-giām in, khòaⁿ in beh thàn Góa ê hoat-tō͘ á m̄.

5到第六日，in tio̍h將所拾入來ê，備辦好勢，比ta̍k日所拾ê重倍chōe。Kàu tē-la̍k ji̍t, in tio̍h chiong só͘ khioh ji̍p-lâi-ê, pī-pān hó-sè, pí ta̍k-ji̍t só͘-khioh-ê têng-pē chōe.

6摩西、亞倫對以色列眾人講：到ê-hng lín beh知，chhōa lín出埃及地ê是耶和華。Mô͘-se, A-lûn tùi Í-sek-lia̍t chèng-lâng kóng, Kàu ê-hng lín beh chai, chhōa lín chhut Ai-ki̍p tōe ê sī Iâ-hô-hoa.

7明á早起lín beh看見耶和華ê榮光；因為耶和華聽見lín哀怨伊；阮算甚麼，lín竟然哀怨阮？Bîn-á-chá-khí lín beh khòaⁿ-kìⁿ Iâ-hô-hoa ê êng-kng; in-ūi Iâ-hô-hoa thiaⁿ-kìⁿ lín ai-oàn I; goán sǹg sím-mi̍h, lín kèng-jiân ai-oàn goán?

8摩西koh講：耶和華ê-hng時beh hō͘ lín食肉，早起時beh hō͘ lín食餅到飽；因為lín哀怨耶和華，伊lóng聽見；阮算甚麼？lín m̄是哀怨阮，是哀怨耶和華。Mô͘-se koh kóng, Iâ-hô-hoa ê-hng-sî beh hō͘ lín chia̍h-bah, chá-khí-sî beh hō͘ lín chia̍h-piáⁿ kàu pá; in-ūi lín ai-oàn Iâ-hô-hoa, I lóng thiaⁿ-kìⁿ; goán sǹg sím-mi̍h? lín m̄-sī ai-oàn goán, sī ai-oàn Iâ-hô-hoa.

9摩西對亞倫講：你tio̍h kā以色列人全會講：Lín tio̍h就近耶和華ê面前；因為伊已經聽見lín ê哀怨lah。Mô͘-se tùi A-lûn kóng, Lí tio̍h kā Í-sek-lia̍t lâng choân-hōe kóng, Lín tio̍h chiū-kūn Iâ-hô-hoa ê bīn-chêng; in-ūi I í-keng thiaⁿ-kìⁿ lín ê ai-oàn lah.

10亞倫tú-tú對以色列人全會講話ê時，in ǹg曠野teh看，看ah，耶和華ê榮光tī雲中顯現。A-lûn tú-tú tùi Í-sek-lia̍t lâng choân-hōe kóng-ōe ê sî, in ǹg khòng-iá teh khòaⁿ, khòaⁿ ah, Iâ-hô-hoa ê êng-kng tī hûn-tiong hián-hiān.

11耶和華對摩西講：Iâ-hô-hoa tùi Mô͘-se kóng,

12我已經聽見以色列人ê哀怨；你tio̍h kā in講：到黃昏ê時，lín beh食肉，早起beh有餅thang食飽；lín就知我是耶和華lín ê上帝。Góa í-keng thiaⁿ-kìⁿ Í-sek-lia̍t lâng ê ai-oàn; lí tio̍h kā in kóng, Kàu hông-hun ê sî, lín beh chia̍h-bah, chá-khí beh ū piáⁿ thang chia̍h-pá; lín chiū chai Góa sī Iâ-hô-hoa lín ê Siōng-tè.

13到ê-hng有鵪鶉飛來，遮蓋營盤；天光早tī營盤四圍ê地面，有一重(têng)ê露水。Kàu ê-hng ū ian-chhun pe-lâi, jia-khàm iâⁿ-pôaⁿ; thiⁿ-kng-chá tī iâⁿ-pôaⁿ sì-ûi ê tōe-bīn, ū chi̍t-têng ê lō͘-chúi.

14露水乾ê時，看ah，曠野ê地面有細細圓圓ê物；細 到親像霜。Lō͘-chúi ta ê sî, khòaⁿ ah, khòng-iá ê tōe-bīn ū sòe-sòe îⁿ-îⁿ ê mi̍h; sòe kàu chhin-chhiūⁿ sng.

15以色列人看見，m̄知是甚麼，大家相kap講：這是甚麼ah？摩西kā in講：這就是耶和華hō͘ lín食ê餅。Í-sek-lia̍t lâng khòaⁿ-kìⁿ, m̄-chai sī sím-mi̍h, tāi-ke saⁿ-kap kóng, Che sī sím-mi̍h ah? Mô͘-se kā in kóng, Che chiū-sī Iâ-hô-hoa hō͘ lín chia̍h ê piáⁿ.

16耶和華所吩咐ê是án-ni；lín tio̍h照ta̍k人所能食ê量來拾，ta̍k人為伊布棚內ê人，照伊ê人額來拾，一人一gô-mûi-jíⁿ。Iâ-hô-hoa só͘ hoan-hù-ê sī án-ni; lín tio̍h chiàu ta̍k-lâng só͘ ōe chia̍h ê liōng lâi khioh, ta̍k-lâng ūi i pò͘-pîⁿ-lāi ê lâng, chiàu i ê lâng-gia̍h lâi khioh, chi̍t-lâng chi̍t gô-mûi-jíⁿ.

17以色列人照án-ni行，有ê拾chōe，有ê拾少。Í-sek-lia̍t lâng chiàu án-ni kiâⁿ, ū-ê khioh chōe, ū-ê khioh chió.

18到用gô-mûi-jíⁿ量(niû)伊，拾chōe-ê無chhun，拾少ê也無欠；ta̍k人照in能食ê量來拾伊。Kàu ēng gô-mûi-jíⁿ niû i, khioh chōe-ê bô chhun, khioh chió-ê iā bô khiàm; ta̍k-lâng chiàu in ōe chia̍h ê liōng lâi khioh i.

19摩西kā in講：人m̄-thang將所chhun-ê留到隔早起。Mô͘-se kā in kóng, Lâng m̄-thang chiong só͘ chhun-ê lâu kàu keh chá-khí.

20總是in無聽摩西ê話，有人留到隔早起，就生蟲臭味；摩西受氣in。Chóng-sī in bô thiaⁿ Mô͘-se ê ōe, ū lâng lâu kàu keh chá-khí, chiū siⁿ-thâng chhàu-bī; Mô͘-se siū-khì in.

21In ta̍k早起，照ta̍k人ōe食ê量拾伊；日頭一下曝，就熔去。In ta̍k chá-khí, chiàu ta̍k-lâng ōe chia̍h ê liōng khioh i; ji̍t-thâu chi̍t-ē pha̍k, chiū iûⁿ-khì.

22到第六日，in拾重倍ê額，ta̍k人兩gô-mûi-jíⁿ；全會hiah-ê頭人來kā摩西講。Kàu tē-la̍k ji̍t, in khioh têng-pē ê gia̍h, ta̍k-lâng nn̄g gô-mûi-jíⁿ; choân-hōe hiah-ê thâu-lâng lâi kā Mô͘-se kóng.

23摩西kā in講：耶和華án-ni講：明á日是重要ê安歇，就是服事耶和華聖ê安歇日；lín ài pek-ê就pek伊，ài煮ê就煮伊；所chhun-ê，tio̍h家己收teh，留到隔早起。Mô͘-se kā in kóng, Iâ-hô-hoa án-ni kóng, bîn-á-ji̍t sī tiōng-iàu ê an-hioh, chiū-sī ho̍k-sāi Iâ-hô-hoa sèng ê an-hioh-ji̍t; lín ài pek-ê chiū pek i, ài chú-ê chiū chú i; só͘-chhun-ê, tio̍h ka-kī siu-teh, lâu kàu keh chá-khí.

24In就照摩西所吩咐收teh留到隔早起，也無臭味，內面也無蟲。In chiū chiàu Mô͘-se só͘ hoan-hù siu-teh lâu kàu keh chá-khí, iā bô chhàu-bī, lāi-bīn iā bô thâng.

25摩西講：Lín今á日食chit-ê，因為今á日是服事耶和華ê安歇日；lín tī田野，今á日的確chhē無。Mô͘-se kóng, Lín kin-á-ji̍t chia̍h chit-ê, in-ūi kin-á-ji̍t sī ho̍k-sāi Iâ-hô-hoa ê an-hioh-ji̍t; lín tī chhân-iá, kin-á-ji̍t tek-khak chhē-bô.

26六日間thang拾，第七日是安歇日，hit日就無。La̍k-ji̍t-kan thang khioh, tē-chhit ji̍t sī an-hioh-ji̍t, hit-ji̍t chiū bô.

27第七日百姓中有人出去拾，也chhē無。Tē-chhit-ji̍t peh-sìⁿ-tiong ū lâng chhut-khì khioh, iā chhē-bô.

28耶和華對摩西講：Lín m̄肯守我ê命令，我ê律法，beh到tī時ah？Iâ-hô-hoa tùi Mô͘-se kóng, Lín m̄-khéng siú Góa ê bēng-lēng, Góa ê lu̍t-hoat, beh kàu tī-sî ah?

29Lín tio̍h看，耶和華已經將安歇日賞賜lín，所以第六日伊hō͘ lín兩日ê米糧，第七日ta̍k人tio̍h tiàm家己ê所在，lóng m̄-thang出去。Lín tio̍h khòaⁿ, Iâ-hô-hoa í-keng chiong an-hioh-ji̍t siúⁿ-sù lín, só͘-í tē-la̍k ji̍t I hō͘ lín nn̄g-ji̍t ê bí-niû, tē-chhit ji̍t ta̍k-lâng tio̍h tiàm ka-kī ê só͘-chāi, lóng m̄-thang chhut-khì.

30Tùi án-ni，百姓就tī第七日安歇。Tùi án-ni peh-sìⁿ chiū tī tē-chhit ji̍t an-hioh.

31Chit-ê物，以色列家叫伊做má-ná；款式親像oân-sui仁，色緻是白ê，滋味親像chham蜜ê餅。Chit-ê mi̍h, Í-sek-lia̍t-ke kiò i chòe má-ná; khoán-sit chhin-chhiūⁿ oân-sui-jîn, sek-tì sī pe̍h-ê, chu-bī chhin-chhiūⁿ chham-bi̍t ê piáⁿ.

32摩西講：耶和華án-ni吩咐，tio̍h將一gô-mûi-jíⁿ tīⁿ-tīⁿ ê má-ná，留到lín ê後代，hō͘ in看我當日chhōa lín出埃及地，tī曠野所hō͘ lín食ê餅。Mô͘-se kóng, Iâ-hô-hoa án-ni hoan-hù, tio̍h chiong chi̍t gô-mûi-jíⁿ tīⁿ-tīⁿ ê má-ná , lâu kàu lín ê āu-tāi, hō͘ in khòaⁿ Góa tng-ji̍t chhōa lín chhut Ai-ki̍p-tōe, tī khòng-iá só͘ hō͘ lín chia̍h ê piáⁿ.

33摩西kā亞倫講：你the̍h一個器具，tóe一gô-mûi-jíⁿ tīⁿ-tīⁿ ê má-ná，khǹg tī耶和華ê面前，留到lín ê後代。Mô͘-se kā A-lûn kóng, Lí the̍h chi̍t ê khì-kū, tóe chi̍t gô-mûi-jíⁿ tīⁿ-tīⁿ ê má-ná, khǹg tī Iâ-hô-hoa ê bīn-chêng, lâu kàu lín ê āu-tāi.

34亞倫照耶和華所吩咐摩西ê，將má-ná hē tī干證ê約櫃前留teh。A-lûn chiàu Iâ-hô-hoa só͘ hoan-hù Mô͘-se-ê, chiong má-ná hē tī kan-chèng ê iok-kūi chêng lâu-teh.

35以色列人食má-ná共四十年久，直到in到tī有人khiā起ê地。 In食má-ná，直到in到迦南ê境界。Í-sek-lia̍t lâng chia̍h má-ná kiōng sì-cha̍p nî kú, ti̍t-kàu in kàu tī ū lâng khiā-khí ê tōe. In chia̍h má-ná, ti̍t-kàu in kàu Ka-lâm ê kéng-kài.

36一gô-mûi-jíⁿ就是i-hoat ê十份一。Chi̍t gô-mûi-jíⁿ chiū-sī i-hoat ê cha̍p-hūn-chi̍t.