1以色列人全會thàn耶和華ê命令，照路站，tùi Sìn ê曠野，進前行，tī Lī-hui-teng紮營，百姓無水thang lim。Í-sek-lia̍t lâng choân-hōe thàn Iâ-hô-hoa ê bēng-lēng, chiàu lō͘-chām, tùi Sìn ê khòng-iá, chìn-chêng kiâⁿ, tī Lī-hui-tèng chat-iâⁿ, peh-sìⁿ bô chúi thang lim.

2百姓就kap摩西計較講：Hō͘阮有水thang lim。摩西kā in講：Lín啥事kap我計較，啥事試耶和華ah？Peh-sìⁿ chiū kap Mô͘-se kè-kàu kóng, Hō͘ goán ū chúi thang lim. Mô͘-se kā in kóng, Lín siáⁿ-sū kap góa kè-kàu, siáⁿ-sū chhì Iâ-hô-hoa ah?

3百姓tī-hia真嘴乾，ài lim水；就哀怨摩西講：你啥事chhōa阮tùi埃及上來，hō͘阮kap阮ê kiáⁿ兒，阮ê cheng-siⁿ，lóng嘴乾死ah？Peh-sìⁿ tī-hia chin chhùi-ta, ài lim chúi; chiū ai-oàn Mô͘-se kóng, Lí siáⁿ-sū chhōa goán tùi Ai-ki̍p chiūⁿ-lâi, hō͘ goán kap goán ê kiáⁿ-jî, goán ê cheng-siⁿ, lóng chhùi-ta sí ah?

4摩西就求叫耶和華講：我對 chit-ê百姓beh怎樣做ah？in差不多beh用石頭tìm我。Mô͘-se chiū kiû-kiò Iâ-hô-hoa kóng, Góa tùi chit-ê peh-sìⁿ beh cháiⁿ-iūⁿ chòe ah? in chha-put-to beh ēng chio̍h-thâu tìm góa.

5耶和華kā摩西講：你做百姓ê頭前行，chhōa以色列ê長老kúi-nā人kap你去，你ê手tio̍h kia̍h前日phah河水ê柺á。Iâ-hô-hoa kā Mô͘-se kóng, Lí chòe peh-sìⁿ ê thâu-chêng kiâⁿ, chhōa Í-sek-lia̍t ê tiúⁿ-ló kúi-nā lâng kap lí khì, lí ê chhiú tio̍h kia̍h chêng-ji̍t phah hô-chúi ê koáiⁿ-á.

6看ah，我beh khiā tī你ê面前，tī Hô-lia̍t ê石磐頂；你phah hit-ê石磐，beh有水tùi hia流出hō͘百姓lim。摩西就tī以色列長老ê面前án-ni行。Khòaⁿ ah, Góa beh khiā tī lí ê bīn-chêng, tī Hô-lia̍t ê chio̍h-pôaⁿ-téng; lí phah hit-ê chio̍h-pôaⁿ, beh ū chúi tùi hia lâu-chhut hō͘ peh-sìⁿ lim. Mô͘-se chiū tī Í-sek-lia̍t tiúⁿ-ló ê bīn-chêng án-ni kiâⁿ.

7伊名hit-ê所在叫Má-sat，koh叫做Bí-lī-pa；因為以色列人計較，koh因為in試耶和華，講：耶和華tī阮中間á無？I miâ hit-ê só͘-chāi kiò Má-sat, koh kiò-chòe Bí-lī-pa; in-ūi Í-sek-lia̍t lâng kè-kàu, koh in-ūi in chhì Iâ-hô-hoa, kóng, Iâ-hô-hoa tī goán tiong-kan á-bô?

8Hit時A-má-le̍k人來到Lī-hui-teng，kap以色列人交戰。Hit-sî A-má-le̍k lâng lâi kàu Lī-hui-tèng, kap Í-sek-lia̍t lâng kau-chiàn.

9摩西kā約書亞講：你替咱揀人出去kap A-má-le̍k人交戰；明á日我手裡beh kia̍h上帝ê柺á，khiā tī山頂。Mô͘-se kā Iok-su-a kóng, Lí thòe lán kéng lâng chhut-khì kap A-má-le̍k lâng kau-chiàn; bîn-á-ji̍t góa chhiú-ni̍h beh kia̍h Siōng-tè ê koáiⁿ-á, khiā tī soaⁿ-téng.

10Tùi hit-tia̍p約書亞照摩西所kā伊講ê行；kap A-má-le̍k人交戰；摩西、亞倫kap Hō͘-jíⁿ lóng上山頂。Tùi hit-tia̍p Iok-su-a chiàu Mô͘-se só͘ kā i kóng-ê kiâⁿ; kap A-má-le̍k lâng kau-chiàn; Mô͘-se, A-lûn kap Hō͘-jíⁿ lóng chiūⁿ soaⁿ-téng.

11摩西手kia̍h起ê時，以色列人就khah贏；手垂落去ê時，A-má-le̍k人就khah贏。Mô͘-se chhiú kia̍h-khí ê sî, Í-sek-lia̍t lâng chiū khah-iâⁿ; chhiú sûi-lo̍h-khì ê sî, A-má-le̍k lâng chiū khah-iâⁿ.

12總是摩西手酸；in就徙石，來hē tī伊ê下面；伊坐tī石頂，亞倫kap Hō͘-jíⁿ扶伊ê手，一個tī chit-pêng，一個tī hit-pêng；伊ê手就自在，直直到日落。Chóng-sī Mô͘-se chhiú sng; in chiū sóa chio̍h, lâi hē tī i ê ē-bīn; i chē tī chio̍h-téng, A-lûn kap Hō͘-jíⁿ hû i ê chhiú, chi̍t-ê tī chit-pêng, chi̍t-ê tī hit-pêng; i ê chhiú chiū chū-chāi, ti̍t-ti̍t kàu ji̍t-lo̍h.

13約書亞用刀thâi A-má-le̍k王kap伊ê百姓。Iok-su-a ēng to thâi A-má-le̍k ông kap i ê peh-sìⁿ.

14耶和華kā摩西講：我beh將A-má-le̍k ê名字tùi天下完全擦滅伊；你tio̍h用chit-ê寫tī冊裡做記念，koh講hō͘約書亞聽。Iâ-hô-hoa kā Mô͘-se kóng, Góa beh chiong A-má-le̍k ê miâ-jī tùi thiⁿ-ē oân-choân chhat-bia̍t i; lí tio̍h ēng chit-ê siá tī chheh-ni̍h chòe kì-liām, koh kóng hō͘ Iok-su-a thiaⁿ.

15摩西起一座壇，號伊ê名叫耶和華尼西；Mô͘-se khí chi̍t chō tôaⁿ, hō i ê miâ kiò Iâ-hô-hoa-nî-se;

16koh講：耶和華已經chiù-chōa，耶和華beh代代kap A-má-le̍k人交戰。koh kóng, Iâ-hô-hoa í-keng chiù-chōa, Iâ-hô-hoa beh tāi-tāi kap A-má-le̍k lâng kau-chiàn.

1摩西ê丈人，米甸ê祭司Ia̍p-thek-lô，聽見上帝ūi摩西kap伊ê百姓以色列所行一切ê事，就是耶和華chhōa以色列出埃及ê事。Mô͘-se ê tiūⁿ-lâng, Bí-tiân ê chè-si Ia̍p-thek-lô, thiaⁿ-kìⁿ Siōng-tè ūi Mô͘-se kap I ê peh-sìⁿ Í-sek-lia̍t só͘-kiâⁿ it-chhè ê sū, chiū-sī Iâ-hô-hoa chhōa Í-sek-lia̍t chhut Ai-ki̍p ê sū.

2摩西ê丈人Ia̍p-thek-lô帶摩西ê婦人人Se-pho-la̍h來，就是摩西前差伊tò去ê；Mô͘-se ê tiūⁿ-lâng Ia̍p-thek-lô tòa Mô͘-se ê hū-jîn-lâng Se-pho-la̍h lâi, chiū-sī Mô͘-se chêng chhe i tò-khì ê;

3koh帶伊兩個kiáⁿ，一個名叫Kek-sūn；因為摩西講：我寄腳tī外邦；koh tòa i nn̄g ê kiáⁿ, chi̍t-ê miâ-kiò Kek-sūn; in-ūi Mô͘-se kóng, Góa kià-kha tī gōa-pang;

4一個名叫Í-lī-í-siā；因為伊講：我ê父ê上帝幫贊我，救我脫離法老ê刀。chi̍t-ê miâ kiò Í-lī-í-siā; in-ūi i kóng, Góa ê pē ê Siōng-tè pang-chān góa, kiù góa thoat-lī Hoat-ló ê to.

5摩西ê丈人，Ia̍p-thek-lô，帶摩西兩個kiáⁿ kap伊ê婦人人，來到上帝ê山，就是摩西tī曠野紮營ê所在；Mô͘-se ê tiūⁿ-lâng, Ia̍p-thek-lô, tòa Mô͘-se nn̄g ê kiáⁿ kap i ê hū-jîn-lâng, lâi kàu Siōng-tè ê soaⁿ, chiū-sī Mô͘-se tī khòng-iá chat-iâⁿ ê só͘-chāi;

6kā摩西講：我是你ê丈人Ia̍p-thek-lô，帶你ê婦人人kap伊兩個kiáⁿ，來你chia。kā Mô͘-se kóng, Góa sī lí ê tiūⁿ-lâng Ia̍p-thek-lô, tòa lí ê hū-jîn-lâng kap i nn̄g ê kiáⁿ, lâi lí chia.

7摩西出去迎接伊ê丈人，對伊鞠躬，kap伊chim嘴，相kap問平安；就入布棚。Mô͘-se chhut-khì ngiâ-chih i ê tiūⁿ-lâng, tùi i kiok-kiong, kap i chim-chhùi, saⁿ-kap mn̄g pêng-an; chiū ji̍p pò͘-pîⁿ.

8摩西將耶和華為以色列ê緣故對法老kap埃及人所行一切ê事，以及路裡所tú-tio̍h一切ê為難，kap耶和華怎樣拯救in，lóng排列hō͘伊ê丈人聽。Mô͘-se chiong Iâ-hô-hoa ūi Í-sek-lia̍t ê iân-kò͘ tùi Hoat-ló kap Ai-ki̍p lâng só͘ kiâⁿ it-chhè ê sū, í-ki̍p lō͘-ni̍h só͘ tú-tio̍h it-chhè ê ûi-lân, kap Iâ-hô-hoa cháiⁿ-iūⁿ chín-kiù in, lóng pâi-lia̍t hō͘ i ê tiūⁿ-lâng thiaⁿ.

9Ia̍p-thek-lô因為耶和華款待以色列人一切ê好事，救in脫離埃及人ê手，就真歡喜。Ia̍p-thek-lô in-ūi Iâ-hô-hoa khoán-thāi Í-sek-lia̍t lâng it-chhè ê hó-sū, kiù in thoat-lī Ai-ki̍p lâng ê chhiú, chiū chin hoaⁿ-hí.

10Ia̍p-thek-lô講：耶和華是應該o-ló ê，伊救lín脫離埃及人ê手，也脫離法老ê手，救chit-ê百姓出埃及人ê手下。Ia̍p-thek-lô kóng, Iâ-hô-hoa sī eng-kai o-ló-ê, I kiù lín thoat-lī Ai-ki̍p lâng ê chhiú, iā thoat-lī Hoat-ló ê chhiú, kiù chit-ê peh-sìⁿ chhut Ai-ki̍p lâng ê chhiú-ē.

11Taⁿ我知耶和華比chiah-ê上帝 khah大，就是對in hiah-ê埃及人驕傲款待chit-ê百姓ê事。Taⁿ góa chai Iâ-hô-hoa pí chiah-ê siōng-tè khah-tōa, chiū-sī tùi in hiah-ê Ai-ki̍p lâng kiau-ngō͘ khoán-thāi chit-ê peh-sìⁿ ê sū.

12摩西ê丈人，Ia̍p-thek-lô，將燒祭kap別號ê祭，獻hō͘上帝；亞倫kap以色列ê長老lóng來，kap摩西ê丈人相kap食tī上帝ê面前。Mô͘-se ê tiūⁿ-lâng, Ia̍p-thek-lô, chiong sio-chè kap pa̍t-hō ê chè, hiàn hō͘ Siōng-tè; A-lûn kap Í-sek-lia̍t ê tiúⁿ-ló lóng lâi, kap Mô͘-se ê tiūⁿ-lâng saⁿ-kap chia̍h tī Siōng-tè ê bīn-chêng.

13隔日摩西坐teh審判百姓；百姓tùi早起到ê-hng，lóng khiā-óa tī摩西ê身邊。Keh-ji̍t Mô͘-se chē-teh sím-phòaⁿ peh-sìⁿ; peh-sìⁿ tùi chá-khí kàu ê-hng, lóng khiā-óa tī Mô͘-se ê sin-piⁿ.

14摩西ê丈人看見伊對百姓所做一切ê事，就講：你對百姓做ê是甚麼事ah？你啥事家己坐teh，眾百姓tùi早起到ê-hng lóng khiā tī你ê身邊ah？Mô͘-se ê tiūⁿ-lâng khòaⁿ-kìⁿ i tùi peh-sìⁿ só͘ chòe it-chhè ê sū, chiū kóng, Lí tùi peh-sìⁿ chòe-ê sī sím-mi̍h sū ah? lí siáⁿ-sū ka-kī chē-teh, chèng peh-sìⁿ tùi chá-khí kàu ê-hng lóng khiā tī lí ê sin-piⁿ ah?

15摩西應伊ê丈人講：這是因為百姓到我chia，來問上帝。Mô͘-se ìn i ê tiūⁿ-lâng kóng, Che sī in-ūi peh-sìⁿ kàu góa chia, lâi mn̄g Siōng-tè.

16In有tāi-chì ê時，就來我chia，我就tī in雙pêng ê中間kā in判斷，hō͘ in知上帝ê律例kap法度。In ū tāi-chì ê sî, chiū lâi góa chia, góa chiū tī in siang-pêng ê tiong-kan kā in phòaⁿ-toàn, hō͘ in chai Siōng-tè ê lu̍t-lē kap hoat-tō͘.

17摩西ê丈人對伊講，你án-ni做m̄好。Mô͘-se ê tiūⁿ-lâng tùi i kóng, Lí án-ni chòe m̄-hó.

18你kap你chiah-ê百姓會真損身；因為chit-ê事hō͘你siuⁿ重，你家己一人做bōe來。Lí kap lí chiah-ê peh-sìⁿ ōe chin sńg-sin; in-ūi chit-ê sū hō͘ lí siuⁿ tāng, lí ka-kī chi̍t-lâng chòe-bōe-lâi.

19Taⁿ你tio̍h聽我ê話，我替你phah算，願上帝kap你tī-teh；你tio̍h替百姓到上帝面前，將案件請問上帝；Taⁿ lí tio̍h thiaⁿ góa ê ōe, góa thòe lí phah-sǹg, goān Siōng-tè kap lí tī-teh; lí tio̍h thòe peh-sìⁿ kàu Siōng-tè bīn-chêng, chiong àn-kiāⁿ chhéng-mn̄g Siōng-tè;

20koh tio̍h將律例kap法度教示in，指示in所tio̍h行ê路，所tio̍h做ê事。koh tio̍h chiong lu̍t-lē kap hoat-tō͘ kà-sī in, chí-sī in só͘ tio̍h kiâⁿ ê lō͘, só͘ tio̍h chòe ê sū.

21也tio̍h tùi百姓ê中間，揀有才能ê人，就是敬畏上帝，誠實無lām-sám，怨恨不義ê錢，hit號人，設立in做百姓ê序大，有ê管一千人，有ê管一百人，有ê管五十人，有ê管十人；Iā tio̍h tùi peh-sìⁿ ê tiong-kan, kéng ū châi-lêng ê lâng, chiū-sī kèng-ùi Siōng-tè, sêng-si̍t bô lām-sám, oàn-hūn put-gī ê chîⁿ, hit-hō lâng, siat-li̍p in chòe peh-sìⁿ ê sī-tōa, ū-ê koán chi̍t chheng lâng, ū-ê koán chi̍t-pah lâng, ū-ê koán gō͘-cha̍p lâng, ū-ê koán cha̍p-lâng;

22hō͘ in照時審判百姓；大事tio̍h hō͘ in 到你chia，小事in thang家己審判；án-ni你就khah減輕，in也thang kap你相kap擔當。hō͘ in chiàu-sî sím-phòaⁿ peh-sìⁿ; tōa-sū tio̍h hō͘ in kàu lí chia, sió-sū in thang ka-kī sím-phòaⁿ; án-ni lí chiū khah kiám-khin, in iā thang kap lí saⁿ-kap tam-tng.

23你若án-ni行，上帝也án-ni吩咐你，你就chih-chài ōe-tiâu，chiah-ê百姓也thang安然到伊ê所在。Lí nā án-ni kiâⁿ, Siōng-tè iā án-ni hoan-hù lí, lí chiū chih-chài ōe-tiâu, chiah-ê peh-sìⁿ iā thang an-jiân kàu i ê só͘-chāi.

24Tùi án-ni，摩西聽thàn伊ê丈人ê話，lóng照伊所講ê去行。Tùi án-ni Mô͘-se thiaⁿ-thàn i ê tiūⁿ-lâng ê ōe, lóng chiàu i só͘ kóng-ê khì kiâⁿ.

25摩西tùi以色列人中間揀有才能ê人，設立in做百姓ê序大，有ê管一千人，有ê管一百人，有ê管五十人，有ê管十人；Mô͘-se tùi Í-sek-lia̍t lâng tiong-kan kéng ū châi-lêng ê lâng, siat-li̍p in chòe peh-sìⁿ ê sī-tōa, ū-ê koán chi̍t-chheng lâng, ū-ê koán chi̍t-pah lâng, ū-ê koán gō͘-cha̍p lâng, ū-ê koán cha̍p-lâng;

26in照時審判百姓，有oh得ê案件就到摩西hia；若是ta̍k項小事，in就家己審判。in chiàu-sî sím-phòaⁿ peh-sìⁿ, ū oh-tit ê àn-kiāⁿ chiū kàu Mô͘-se hia; nā-sī ta̍k-hāng sió-sū, in chiū ka-kī sím-phòaⁿ.

27後來摩西送伊ê丈人起身，伊就tò去本所在。Āu-lâi Mô͘-se sàng i ê tiūⁿ-lâng khí-sin, i chiū tò-khì pún só͘-chāi.

1以色列人出埃及地ê了後第三月，tú-tú hit日，in就到西奈ê曠野。Í-sek-lia̍t lâng chhut Ai-ki̍p tōe ê liáu-āu tē-saⁿ ge̍h, tú-tú hit-ji̍t, in chiū kàu Se-nái ê khòng-iá.

2In離開Lī-hui-teng，來到西奈ê曠野，就tī曠野紮營；以色列人就tī hit-ê山ê頭前紮營。In lī-khui Lī-hui-tèng, lâi kàu Se-nái ê khòng-iá, chiū tī khòng-iá chat-iâⁿ; Í-sek-lia̍t lâng chiū tī hit-ê soaⁿ ê thâu-chêng chat-iâⁿ.

3摩西上到上帝hia；耶和華tùi山裡叫伊講：你tio̍h án-ni kā雅各家講：通知以色列人知；Mô͘-se chiūⁿ kàu Siōng-tè hia; Iâ-hô-hoa tùi soaⁿ-ni̍h kiò i kóng, Lí tio̍h án-ni kā Ngá-kok-ke kóng, thong-ti Í-sek-lia̍t lâng chai;

4我對埃及人所行ê事，lín lóng看見；koh看見我怎樣親像鷹鳥ê翼背lín，帶lín來歸tī我。Góa tùi Ai-ki̍p lâng só͘ kiâⁿ ê sū, lín lóng khòaⁿ-kìⁿ; koh khòaⁿ-kìⁿ Góa cháiⁿ-iūⁿ chhin-chhiūⁿ eng-chiáu ê si̍t pē lín, tòa lín lâi kui tī Góa.

5Taⁿ lín若實在聽thàn我ê話，遵守我ê約，就tī列國中lín beh做我家己ê寶貝；因為全地lóng是我ê；Taⁿ lín nā si̍t-chāi thiaⁿ-thàn Góa ê ōe, chun-siú Góa ê iok, chiū tī lia̍t-kok-tiong lín beh chòe Góa ka-kī ê pó-pòe; in-ūi choân-tōe lóng sī Góa-ê;

6lín beh歸tī我，做祭司ê國，做聖潔ê百姓。chiah-ê話是你所tio̍h kā以色列人講ê。lín beh kui tī Góa, chòe chè-si ê kok, chòe sèng-kiat ê peh-sìⁿ. Chiah-ê ōe sī lí só͘ tio̍h kā Í-sek-lia̍t lâng kóng-ê.

7摩西來招集百姓中間ê長老，將耶和華所吩咐伊ê話，lóng排列tī in ê面前；Mô͘-se lâi chio-chi̍p peh-sìⁿ tiong-kan ê tiúⁿ-ló, chiong Iâ-hô-hoa só͘ hoan-hù i ê ōe, lóng pâi-lia̍t tī in ê bīn-chêng;

8百姓lóng同聲應講，見若耶和華所講ê阮lóng beh遵thàn。摩西就將百姓ê話回覆耶和華。peh-sìⁿ lóng tâng-siaⁿ ìn kóng, Kìⁿ-nā Iâ-hô-hoa só͘ kóng-ê goán lóng beh chun-thàn. Mô͘-se chiū chiong peh-sìⁿ ê ōe hê-hok Iâ-hô-hoa.

9耶和華kā摩西講：看ah，我beh tī密雲ê中間臨到你，hō͘百姓聽見我kap你teh講：thang永遠信你。摩西就將百姓ê話kā耶和華講。Iâ-hô-hoa kā Mô͘-se kóng, Khòaⁿ ah, Góa beh tī ba̍t-hûn ê tiong-kan lîm-kàu lí, hō͘ peh-sìⁿ thiaⁿ-kìⁿ Góa kap lí teh kóng, thang éng-oán sìn lí. Mô͘-se chiū chiong peh-sìⁿ ê ōe kā Iâ-hô-hoa kóng.

10耶和華koh kā摩西講：你去百姓hia，今á日、明á日kā in分別做聖，in也tio̍h洗衫。Iâ-hô-hoa koh kā Mô͘-se kóng, Lí khì peh-sìⁿ hia, kin-á-ji̍t bîn-á-ji̍t kā in hun-piat chòe-sèng, in iā tio̍h sóe-saⁿ.

11Tio̍h備辦便赴第三日；因為第三日，耶和華beh tī眾百姓ê面前，降臨tī西奈山。Tio̍h pī-pān piān hù tē-saⁿ ji̍t; in-ūi tē-saⁿ ji̍t, Iâ-hô-hoa beh tī chèng peh-sìⁿ ê bīn-chêng, kàng-lîm tī Se-nái soaⁿ.

12你tio̍h tī山ê四圍kā百姓設界限，講：Lín tio̍h謹慎，m̄-thang上山，也m̄-thang摸伊ê交界；見若摸chit-ê山ê，的確tio̍h hō͘伊死；Lí tio̍h tī soaⁿ ê sì-ûi kā peh-sìⁿ siat kài-hān, kóng, Lín tio̍h kín-sīn, m̄-thang chiūⁿ-soaⁿ, iā m̄-thang bong i ê kau-kài; kìⁿ-nā bong chit-ê soaⁿ ê, tek-khak tio̍h hō͘ i sí;

13m̄-thang用手摸伊，tio̍h用石頭tìm伊，á是用箭射伊；無論是人á cheng-siⁿ，lóng bōe活。到哨角ê聲拖長ê時，in tio̍h上來山腳。m̄-thang ēng chhiú bong-i, tio̍h ēng chio̍h-thâu tìm i, á-sī ēng chìⁿ siā-i; bô-lūn sī lâng á cheng-siⁿ, lóng bōe oa̍h. Kàu sàu-kak ê siaⁿ thoa-tn̂g ê sî, in tio̍h chiūⁿ-lâi soaⁿ-kha.

14摩西落山到百姓hia，kā in分別做聖；in就家己洗衫。Mô͘-se lo̍h-soaⁿ kàu peh-sìⁿ hia, kā in hun-piat chòe-sèng; in chiū ka-kī sóe saⁿ.

15伊對百姓講：Tio̍h備辦便赴第三日，m̄-thang親近婦人人。I tùi peh-sìⁿ kóng, Tio̍h pī-pān piān hù tē-saⁿ ji̍t, m̄-thang chhin-kūn hū-jîn-lâng.

16到第三日天光早，tī山頂有雷tân，sih-nà kap密雲，koh哨角ê聲真大；營內ê百姓lóng ngia̍uh-ngia̍uh-chhoah。Kàu tē-saⁿ ji̍t thiⁿ-kng-chá, tī soaⁿ-téng ū lûi tân, sih-nà kap ba̍t-hûn, koh sàu-kak ê siaⁿ chin-tōa; iâⁿ-lāi ê peh-sìⁿ lóng ngia̍uh-ngia̍uh-chhoah.

17摩西chhōa百姓出營盤，迎接上帝；in lóng khiā tī山腳。Mô͘-se chhōa peh-sìⁿ chhut iâⁿ-pôaⁿ, ngiâ-chih Siōng-tè; in lóng khiā tī soaⁿ-kha.

18Thong西奈山lóng是火煙；因為耶和華tī火中降臨tī山頂；山ê火煙chhèng高，親像磁窯ê煙，遍山大振動。Thong Se-nái soaⁿ lóng sī hé-ian; in-ūi Iâ-hô-hoa tī hé-tiong kàng-lîm tī soaⁿ-téng; soaⁿ ê hé-ian chhèng-koâiⁿ, chhin-chhiūⁿ hûi-iô ê ian, piàn-soaⁿ tōa tín-tāng.

19哨角ê聲ná-tân ná大，摩西講話，上帝出聲應伊。Sàu-kak ê siaⁿ ná-tân ná-tōa, Mô͘-se kóng-ōe, Siōng-tè chhut-siaⁿ ìn i.

20耶和華降臨tī西奈山，tī山尾溜；耶和華召摩西上山尾溜；摩西就上去。Iâ-hô-hoa kàng-lîm tī Se-nái soaⁿ, tī soaⁿ-bé-liu; Iâ-hô-hoa tiàu Mô͘-se chiūⁿ soaⁿ-bé-liu; Mô͘-se chiū chiūⁿ-khì.

21耶和華對摩西講：你落去禁戒百姓，驚了in竄過界，到耶和華chia來看，致到in chōe-chōe人死；Iâ-hô-hoa tùi Mô͘-se kóng, Lí lo̍h-khì kìm-kài peh-sìⁿ, kiaⁿ-liáu in chhoàn-kè-kài, kàu Iâ-hô-hoa chia lâi khòaⁿ, tì-kàu in chōe-chōe lâng sí;

22連親近耶和華ê祭司，也tio̍h家己分別做聖，驚了耶和華忽然出來phah in。liân chhin-kūn Iâ-hô-hoa ê chè-si, iā tio̍h ka-kī hun-piat chòe-sèng, kiaⁿ-liáu Iâ-hô-hoa hut-jiân chhut-lâi phah in.

23摩西對耶和華講：百姓bōe會上西奈山，因為你已經禁戒阮講：Tio̍h tī山ê四圍設界限，分別伊做聖。Mô͘-se tùi Iâ-hô-hoa kóng, Peh-sìⁿ bōe-ōe chiūⁿ Se-nái soaⁿ, in-ūi Lí í-keng kìm-kài goán kóng, Tio̍h tī soaⁿ ê sì-ûi siat kài-hān, hun-piat i chòe-sèng.

24耶和華kā伊講：去ah，落去；你tio̍h kap亞倫上來；獨獨祭司kap百姓m̄-thang竄過界上到耶和華面前，驚了伊忽然出來phah in。Iâ-hô-hoa kā i kóng, Khì ah, lo̍h-khì; lí tio̍h kap A-lûn chiūⁿ-lâi; to̍k-to̍k chè-si kap peh-sìⁿ m̄-thang chhoàn-kè-kài chiūⁿ kàu Iâ-hô-hoa bīn-chêng, kiaⁿ-liáu I hut-jiân chhut-lâi phah in.

25摩西就落去，到百姓hia，kā in講。Mô͘-se chiū lo̍h-khì, kàu peh-sìⁿ hia, kā in kóng.