1你tī百姓ê面前所tio̍h立ê法度是án-ni。Lí tī peh-sìⁿ ê bīn-chêng só͘ tio̍h li̍p ê hoat-tō͘ sī án-ni.

2你若買希伯來人做奴僕，伊 beh服事你，六年久，第七年伊thang自由白白出去；Lí nā bóe Hi-pek-lâi lâng chòe lô͘-po̍k, i beh ho̍k-sāi lí, la̍k-nî kú, tē-chhit nî i thang chū-iû pe̍h-pe̍h chhut-khì;

3伊若單身來，就單身出去；伊若有bó͘，伊ê bó͘就kap伊出去；i nā toaⁿ-sin lâi, chiū toaⁿ-sin chhut-khì; i nā ū bó͘, i ê bó͘ chiū kap i chhut-khì;

4伊ê主人若kā伊娶bó͘，bó͘ kā伊生kiáⁿ á是cha-bó͘-kiáⁿ，bó͘ kap kiáⁿ兒tio̍h歸主人；伊tio̍h單身出去。i ê chú-lâng nā kā i chhōa-bó͘, bó͘ kā i siⁿ-kiáⁿ á sī cha-bó͘-kiáⁿ, bó͘ kap kiáⁿ-jî tio̍h kui chú-lâng; i tio̍h toaⁿ-sin chhut-khì.

5設使奴僕明明講：我疼我ê主人，kap我ê bó͘，我ê kiáⁿ兒，m̄-ài出去自由；Siat-sú lô͘-po̍k bêng-bêng kóng, Góa thiàⁿ góa ê chú-lâng, kap góa ê bó͘, góa ê kiáⁿ-jî, m̄-ài chhut-khì chū-iû;

6伊ê主人就tio̍h帶伊到官府hia，koh tio̍h chhōa伊óa近門，á是門khiā，主人tio̍h用鑽á鑽伊ê耳á；伊就永遠服事伊。i ê chú-lâng chiū tio̍h tòa i kàu koaⁿ-hú hia, koh tio̍h chhōa i óa-kūn mn̂g, á-sī mn̂g-khiā, chú-lâng tio̍h ēng chǹg-á chǹg i ê hī-á; i chiū éng-oán ho̍k-sāi-i.

7人若賣cha-bó͘-kiáⁿ做女婢，伊無thang親像奴僕án-ni出去。Lâng nā bōe cha-bó͘-kiáⁿ chòe lú-pī, i bô thang chhin-chhiūⁿ lô͘-po̍k án-ni chhut-khì.

8主人若定tio̍h收伊，後來看無中意，就tio̍h 准伊贖身；主人已經騙伊，就無權thang 賣伊hō͘外邦人。Chú-lâng nā tiāⁿ-tio̍h siu-i, āu-lâi khòaⁿ bô tiòng-ì, chiū tio̍h chún i sio̍k-sin; chú-lâng í-keng phiàn i, chiū bô koân thang bōe i hō͘ gōa-pang lâng.

9主人若定tio̍h伊hō͘家己ê kiáⁿ，就tio̍h款待伊親像cha-bó͘-kiáⁿ。Chú-lâng nā tiāⁿ-tio̍h i hō͘ ka-kī ê kiáⁿ, chiū tio̍h khoán-thāi i chhin-chhiūⁿ cha-bó͘-kiáⁿ.

10若有koh娶一個，就伊ê食、穿，kap配合ê事，猶原m̄-thang減少。Nā ū koh chhōa chi̍t-ê, chiū i ê chia̍h, chhēng, kap phòe-ha̍p ê sū, iû-goân m̄-thang kiám-chió.

11若無對伊行chit三項，伊就thang白白出去，免用銀贖。Nā bô tùi i kiâⁿ chit saⁿ-hāng, i chiū thang pe̍h-pe̍h chhut-khì, bián ēng gûn sio̍k.

12Phah死人ê的確tio̍h hō͘伊死。Phah-sí lâng-ê tek-khak tio̍h hō͘ i sí.

13人若m̄是埋伏teh thâi人，就是上帝交tī伊ê手，我就kā你設一個所在，伊thang走去hia。Lâng nā m̄-sī bâi-ho̍k-teh thâi-lâng, chiū-sī Siōng-tè kau tī i ê chhiú, Góa chiū kā lí siat chi̍t ê só͘-chāi, i thang cháu-khì hia.

14人若自專攻擊伊ê厝邊，用詭譎ê計謀，就若tī我ê壇，亦tio̍h掠去hō͘伊死。Lâng nā chū-choan kong-kek i ê chhù-piⁿ, ēng khúi-khiat ê kè-bô͘, chiū nā tī Góa ê tôaⁿ, ia̍h tio̍h lia̍h-khì hō͘ i sí.

15Phah老父á是老母ê，的確tio̍h hō͘伊死。Phah lāu-pē á-sī lāu-bú-ê, tek-khak tio̍h hō͘ i sí.

16柺人去賣ê，á是iáu tī伊ê手，的確tio̍h hō͘伊死。Koái lâng khì bōe-ê, á-sī iáu tī i ê chhiú, tek-khak tio̍h hō͘ i sí.

17咒詛老父á是老母ê，的確tio̍h hō͘伊死。Chiù-chó͘ lāu-pē á-sī lāu-bú-ê, tek-khak tio̍h hō͘ i sí.

18人若冤家，chit-ê用石頭á是拳頭母phah hit-ê，iáu無致到死，不過倒tī眠床；Lâng nā oan-ke, chit-ê ēng chio̍h-thâu á-sī kûn-thâu-bú phah hit-ê, iáu bô tì-kàu sí, put-kò tó tī bîn-chhn̂g;

19若會koh起來，óa柺á出去，hit-ê phah伊ê，thang算無罪；獨獨tio̍h賠伊bōe做工ê錢，也tio̍h kā伊醫到lóng好。nā ōe koh khí-lâi, óa koáiⁿ-á chhut-khì, hit-ê phah i-ê, thang sǹg bô-chōe; to̍k-to̍k tio̍h pê i bōe chòe kang ê chîⁿ, iā tio̍h kā-i i kàu lóng hó.

20人若用槌á phah伊ê奴僕，á是伊ê女婢，致到liâm-piⁿ死，伊的確tio̍h受刑罰；Lâng nā ēng thûi-á phah i ê lô͘-po̍k, á-sī i ê lú-pī, tì-kàu liâm-piⁿ sí, i tek-khak tio̍h siū hêng-hoa̍t;

21若隔一兩日chiah死，就thang免受刑罰，因為是伊ê銀買ê。nā kè chi̍t-nn̄g ji̍t chiah sí, chiū thang bián siū hêng-hoa̍t, in-ūi sī i ê gûn bóe-ê.

22人若相phah，相害有身孕ê婦人人，致到ka-la̍uh身，後來無別項ê害，hit人tio̍h罰銀，照婦人人ê丈夫所定ê；tī官府ê面前hō͘伊。Lâng nā saⁿ-phah, siong-hāi ū sin-īn ê hū-jîn-lâng, tì-kàu ka-la̍uh-sin, āu-lâi bô pa̍t-hāng ê hāi, hit-lâng tio̍h hoa̍t-gûn, chiàu hū-jîn-lâng ê tiōng-hu só͘ tēng-ê; tī koaⁿ-hú ê bīn-chêng hō͘ i.

23若有別項ê傷害，就tio̍h用命賠命。Nā ū pa̍t-hāng ê siong-hāi, chiū tio̍h ēng miā pê miā.

24目睭賠目睭，嘴齒賠嘴齒，手賠手，Ba̍k-chiu pê ba̍k-chiu, chhùi-khí pê chhùi-khí, chhiú pê chhiú,

25腳賠腳，燒賠燒，傷賠傷，phah賠phah。kha pê kha, sio pê sio, siong pê siong, phah pê phah.

26人若phah-pháiⁿ伊ê奴僕，á是伊ê女婢，一蕊目睭，就tio̍h因為伊ê目睭放伊去自由。Lâng nā phah-pháiⁿ i ê lô͘-po̍k, á-sī i ê lú-pī, chi̍t-lúi ba̍k-chiu, chiū tio̍h in-ūi i ê ba̍k-chiu pàng i khì chū-iû.

27若phah-lak伊ê奴僕，á是伊ê女婢，一支嘴齒，就tio̍h因為伊ê嘴齒放伊去自由。Nā phah-lak i ê lô͘-po̍k, á-sī i ê lú-pī, chi̍t ki chhùi-khí, chiū tio̍h in-ūi i ê chhùi-khí pàng i khì chū-iû.

28牛若tak死一個ta-po͘人，á是一個婦人人，tio̍h用石頭tìm死hit隻牛，總是m̄-thang食伊ê肉；牛ê主人算無罪。Gû nā tak-sí chi̍t ê ta-po͘-lâng, á-sī chi̍t ê hū-jîn-lâng, tio̍h ēng chio̍h-thâu tìm-sí hit chiah gû, chóng-sī m̄-thang chia̍h i ê bah; gû ê chú-lâng sǹg bô chōe.

29設使hit隻牛平素會tak人，有人報伊ê主人知，伊竟然無將牛關teh，致到tak死ta-po͘人á是婦人人；就tio̍h用石頭tìm死hit隻牛，牛ê主人也tio̍h死。Siat-sú hit chiah gû pêng-sò͘ ōe tak-lâng, ū lâng pò i ê chú-lâng chai, i kèng-jiân bô chiong gû koaiⁿ-teh, tì-kàu tak-sí ta-po͘-lâng á-sī hū-jîn-lâng; chiū tio̍h ēng chio̍h-thâu tìm-sí hit chiah gû, gû ê chú-lâng iā tio̍h sí.

30若是擬定用銀贖性命，就tio̍h照所擬定ê，來贖伊ê性命。Nā sī gí-tiāⁿ ēng gûn sio̍k sìⁿ-miā, chiū tio̍h chiàu só͘ gí-tiāⁿ-ê, lâi sio̍k i ê sìⁿ-miā.

31牛無論tak-tio̍h人ê kiáⁿ á是cha-bó͘-kiáⁿ，tio̍h照chit-ê例辦伊。Gû bô-lūn tak-tio̍h lâng ê kiáⁿ á-sī cha-bó͘-kiáⁿ, tio̍h chiàu chit-ê lē pān-i.

32牛若tak-tio̍h奴僕á是女婢，tio̍h用銀三十sià-khek-le̍k hō͘ in ê主人；也tio̍h用石頭tìm死牛。Gû nā tak-tio̍h lô͘-po̍k á-sī lú-pī, tio̍h ēng gûn saⁿ-cha̍p sià-khek-le̍k hō͘ in ê chú-lâng; iā tio̍h ēng chio̍h-thâu tìm-sí gû.

33人若掀開井，á是掘井，無蓋蓋(kòa)，有牛á是驢跋(poa̍h)tī hit內面，Lâng nā hian-khui chíⁿ, á-sī ku̍t chíⁿ, bô khàm-kòa, ū gû á-sī lû poa̍h tī hit lāi-bīn,

34井ê主人tio̍h賠，也tio̍h the̍h銀hō͘伊ê主；死ê cheng-siⁿ歸家己。chíⁿ ê chú-lâng tio̍h pê, iā tio̍h the̍h gûn hō͘ i ê chú; sí ê cheng-siⁿ kui ka-kī.

35Chit人ê牛若tak-tio̍h hit人ê牛，致到死，in tio̍h賣活ê牛，價錢平分，死ê牛也tio̍h平分。Chit-lâng ê gû nā tak-tio̍h hit lâng ê gû, tì-kàu sí, in tio̍h bōe oa̍h ê gû, kè-chîⁿ pîⁿ-pun, sí ê gû iā tio̍h pîⁿ-pun.

36人若知chit隻牛平素會tak人，主人竟然無將牛關teh，伊就tio̍h用牛賠牛，死ê牛歸家己。Lâng nā chai chit chiah gû pêng-sò͘ ōe tak-lâng, chú-lâng kèng-jiân bô chiong gû koaiⁿ-teh, i chiū tio̍h ēng gû pê gû, sí ê gû kui ka-kī.

1人若偷牽牛，á是羊，無論thâi á是賣，一隻牛tio̍h賠伊五隻，一隻羊 tio̍h 賠四隻。Lâng nā thau-khan gû, á-sī iûⁿ, bô-lūn thâi á-sī bōe, chi̍t chiah gû tio̍h pê i gō͘ chiah, chi̍t chiah iûⁿ tio̍h pê sì-chiah.

2賊若iah孔，hō͘人tú-tio̍h，kā伊phah死，就無算伊有phah死人ê罪。Chha̍t nā iah-khang, hō͘ lâng tú-tio̍h, kā i phah-sí, chiū bô sǹg i ū phah-sí lâng ê chōe.

3若日頭已經出，就算伊有phah死人ê罪。賊的確tio̍h賠；若無thang 賠，賊tio̍h賣身，來抵伊所偷ê。Nā ji̍t-thâu í-keng chhut, chiū sǹg i ū phah-sí lâng ê chōe. Chha̍t tek-khak tio̍h pê; nā bô thang pê, chha̍t tio̍h bōe sin, lâi tí i só͘ thau-ê.

4若伊所偷ê，kiám-chhái牛，á是驢、羊，iáu活tī伊ê手，就tio̍h賠重(têng)倍。Nā i só͘ thau-ê, kiám-chhái gû, á-sī lû, iûⁿ, iáu oa̍h tī i ê chhiú, chiū tio̍h pê têng-pē.

5人若tī田裡，á是葡萄園，放cheng-siⁿ，chhut-chāi伊食別人ê田，就tio̍h用家己ê田裡siōng好ê，kap葡萄園siōng好ê來賠伊。Lâng nā tī chhân-ni̍h, á-sī phû-tô-hn̂g, pàng cheng-siⁿ, chhut-chāi i chia̍h pa̍t-lâng ê chhân, chiū tio̍h ēng ka-kī ê chhân-ni̍h siōng hó-ê, kap phû-tô-hn̂g siōng hó-ê lâi pê-i.

6若火燒刺phè，續燒tio̍h稻堆，á是猶未割ê稻，á是田園，就起火ê人的確tio̍h賠。Nā hé sio chhì-phè, sòa sio-tio̍h tiū-tui, á-sī iáu-bē koah ê tiū, á-sī chhân-hn̂g, chiū khí-hé ê lâng tek-khak tio̍h pê.

7人若將銀á是物件，交代厝邊顧守，chiah-ê物，若tùi hit人ê家tio̍h賊偷，賊若掠tio̍h，賊tio̍h賠重倍；Lâng nā chiong gûn á-sī mi̍h-kiāⁿ, kau-tài chhù-piⁿ kò͘-siú, chiah-ê mi̍h, nā tùi hit-lâng ê ke tio̍h chha̍t thau, chha̍t nā lia̍h-tio̍h, chha̍t tio̍h pê têng-pē;

8賊若掠無tio̍h，hit-ê家主tio̍h 到官府面前，看伊有the̍h厝邊ê物件á無。chha̍t nā lia̍h-bô-tio̍h, hit-ê ke-chú tio̍h kàu koaⁿ-hú bīn-chêng, khòaⁿ i ū the̍h chhù-piⁿ ê mi̍h-kiāⁿ á-bô.

9見若有過失，kiám-chhái是為tio̍h牛、驢、羊，á是為tio̍h衣裳á是甚麼失落ê物，有人認得是伊ê，雙pêng ê案件tio̍h 到官府ê面前；官府若斷定甚麼人有罪，hit人tio̍h賠伊ê厝邊重倍。Kìⁿ-nā ū kè-sit, kiám-chhái sī ūi-tio̍h gû, lû, iûⁿ, á-sī ūi-tio̍h i-chiûⁿ á-sī sím-mi̍h sit-lo̍h ê mi̍h, ū lâng jīn-tit sī i-ê, siang-pêng ê àn-kiāⁿ tio̍h kàu koaⁿ-hú ê bīn-chêng; koaⁿ-hú nā toàn-tēng sím-mi̍h lâng ū chōe, hit-lâng tio̍h pê i ê chhù-piⁿ têng-pē.

10人若將驢，á是牛，á是羊，á是別號cheng-siⁿ，交代厝邊顧守，cheng-siⁿ kiám-chhái死，á是受傷，á是hō͘人牽去，無人看見；Lâng nā chiong lû, á-sī gû, á-sī iûⁿ, á-sī pa̍t-hō cheng-siⁿ, kau-tài chhù-piⁿ kò͘-siú, cheng-siⁿ kiám-chhái sí, á-sī siū-siong, á-sī hō͘ lâng khan-khì, bô lâng khòaⁿ-kìⁿ;

11兩人ê中間，tio̍h kí耶和華chiù-chōa，m̄-bat the̍h厝邊ê物，原主就tio̍h soah，顧守ê人m̄免賠。nn̄g-lâng ê tiong-kan, tio̍h kí Iâ-hô-hoa chiù-chōa, m̄-bat the̍h chhù-piⁿ ê mi̍h, goân-chú chiū tio̍h soah, kò͘-siú ê lâng m̄-bián pê.

12Cheng-siⁿ若tùi顧守ê人hia hō͘人偷去，伊就tio̍h賠原主。Cheng-siⁿ nā tùi kò͘-siú ê lâng hia hō͘ lâng thau-khì, i chiū tio̍h pê goân-chú.

13若受野獸拆碎，顧守ê人tio̍h帶伊來做證據；所拆碎ê就m̄免賠。Nā siū iá-siù thiah-chhùi, kò͘-siú ê lâng tio̍h tòa i lâi chòe chèng-kù; só͘ thiah-chhùi-ê chiū m̄-bián pê.

14人若tùi厝邊借甚麼物，所借ê kiám-chhái受傷á是死，原主無相kap tī-teh，伊的確tio̍h賠。Lâng nā tùi chhù-piⁿ chioh sím-mi̍h mi̍h, só͘ chioh-ê kiám-chhái siū-siong á-sī sí, goân-chú bô saⁿ-kap tī-teh, i tek-khak tio̍h pê.

15若原主相kap tī-teh，伊就m̄免賠；若是租ê，也m̄免賠，因為本有租錢。Nā goân-chú saⁿ-kap tī-teh, i chiū m̄-bián pê; nā sī cho͘-ê, iā m̄-bián pê, in-ūi pún ū cho͘-chîⁿ.

16人若引誘未受聘ê cha-bó͘-gín-ná kap伊同房，伊tio̍h聘伊做bó͘。Lâng nā ín-iú bē siū phèng ê cha-bó͘-gín-ná kap i tâng-pâng, i tio̍h phèng i chòe-bó͘.

17若伊ê老父決斷m̄肯將cha-bó͘-kiáⁿ配伊，伊就tio̍h照在室女ê聘禮，hō͘伊銀。Nā i ê lāu-pē koat-toàn m̄-khéng chiong cha-bó͘-kiáⁿ phòe-i, i chiū tio̍h chiàu chāi-sek-lú ê phèng-lé, hō͘ i gûn.

18做紅姨ê，tio̍h hō͘伊死。Chòe ang-î-ê, tio̍h hō͘ i sí.

19見若kap獸淫ê，的確tio̍h hō͘伊死。Kìⁿ-nā kap siù îm-ê, tek-khak tio̍h hō͘ i sí.

20無專專祭祀耶和華，來祭祀別個上帝ê，tio̍h滅伊。Bô choan-choan chè-sū Iâ-hô-hoa, lâi chè-sū pa̍t ê siōng-tè-ê, tio̍h bia̍t-i.

21M̄-thang欺負出外人，也m̄-thang壓制伊；因為lín tī埃及地也bat做出外人。M̄-thang khi-hū chhut-gōa lâng, iā m̄-thang ap-chè i; in-ūi lín tī Ai-ki̍p tōe iā bat chòe chhut-gōa lâng.

22M̄-thang pháiⁿ款待寡婦kap孤兒。M̄-thang pháiⁿ khoán-thāi kóaⁿ-hū kap ko͘-jî.

23若小khóa pháiⁿ款待in，in求叫我，我的確beh聽in ê求叫。Nā sió-khóa pháiⁿ khoán-thāi-in, in kiû-kiò Góa, Góa tek-khak beh thiaⁿ in ê kiû-kiò.

24也beh大受氣，用刀thâi lín；hō͘ lín ê bó͘做寡婦，lín ê kiáⁿ做孤兒。Iā beh tōa siū-khì, ēng to thâi-lín; hō͘ lín ê bó͘ chòe kóaⁿ-hū, lín ê kiáⁿ chòe ko͘-jî.

25我ê百姓中有sòng-hiong人kap lín khiā起，你若借伊銀，你m̄-thang親像債主款待伊，也m̄-thang the̍h伊ê利息。Góa ê peh-sìⁿ-tiong ū sòng-hiong lâng kap lín khiā-khí, lí nā chioh i gûn, lí m̄-thang chhin-chhiūⁿ chè-chú khoán-thāi i, iā m̄-thang the̍h i ê lī-sek.

26你若the̍h厝邊ê衣裳做準當，日落就tio̍h還伊；Lí nā the̍h chhù-piⁿ ê i-chiûⁿ chòe chún-tǹg, ji̍t-lo̍h chiū tio̍h hêng-i;

27伊只有chit件thang kah，是伊遮身軀ê衫；若無，伊beh怎樣睏？伊求我，我beh聽，因為我是慈悲ê。i chí-ū chit-kiāⁿ thang kah, sī i jia seng-khu ê saⁿ; nā bô, i beh cháiⁿ-iūⁿ khùn? i kiû-Góa, Góa beh thiaⁿ, in-ūi Góa sī chû-pi-ê.

28M̄-thang譭謗官府；也m̄-thang罵你ê百姓ê序大。M̄-thang húi-pòng koaⁿ-hú; iā m̄-thang mē lí ê peh-sìⁿ ê sī-tōa.

29你tio̍h tùi所收成ê五穀，kap酒窟內所流出ê酒，the̍h來獻，m̄-thang延chhiân。Lí tio̍h tùi só͘ siu-sêng ê gō͘-kak, kap chiú-khut-lāi só͘ lâu-chhut ê chiú, the̍h-lâi hiàn, m̄-thang iân-chhiân.

30你tio̍h將頭上 ê kiáⁿ歸tī我；你ê牛，你ê羊，也tio̍h án-ni；七日thang塊伊ê母，tī八日tio̍h歸tī我。Lí tio̍h chiong thâu-chiūⁿ ê kiáⁿ kui tī Góa; lí ê gû, lí ê iûⁿ, iā tio̍h án-ni; chhit-ji̍t thang tè i ê bú, tī poeh-ji̍t tio̍h kui tī Góa.

31Lín tio̍h為tio̍h我做聖ê百姓；所以田裡野獸所拆裂ê肉，lín m̄-thang食，tio̍h hiat hō͘狗。Lín tio̍h ūi-tio̍h Góa chòe sèng ê peh-sìⁿ; só͘-í chhân-ni̍h iá-siù só͘ thiah-li̍h ê bah, lín m̄-thang chia̍h, tio̍h hiat hō͘ káu.

1M̄-thang報揚謠言；m̄-thang kap pháiⁿ人聯合做lām-sám ê干證。M̄-thang pò-iông iâu-giân; m̄-thang kap pháiⁿ-lâng liân-ha̍p chòe lām-sám ê kan-chèng.

2M̄-thang tè眾人行pháiⁿ；tī相告ê事，m̄-thang偏óa大pêng，講伊ê話，來冤枉正直。M̄-thang tè chèng-lâng kiâⁿ-pháiⁿ; tī saⁿ-kò ê sū, m̄-thang phian-óa tōa-pêng, kóng i ê ōe, lâi oan-óng chèng-ti̍t.

3M̄-thang tī相告ê事，袒護sòng-hiong人。M̄-thang tī saⁿ-kò ê sū, thán-hō͘ sòng-hiong lâng.

4若tú-tio̍h你ê對敵ê牛，á是驢，失迷路，的確tio̍h牽tò來交伊。Nā tú-tio̍h lí ê tùi-te̍k ê gû, á-sī lû, sit-bê lō͘, tek-khak tio̍h khan tò-lâi kau-i.

5若看見怨恨你ê人ê驢背載teh倒，m̄-thang行開，tio̍h kap伊相kap放驢所載ê。Nā khòaⁿ-kìⁿ oàn-hūn lí ê lâng ê lû pē-chài teh-tó, m̄-thang kiâⁿ-khui, tio̍h kap i saⁿ-kap pàng lû só͘ chài-ê.

6Sòng-hiong人有相告，你m̄-thang偏斷。Sòng-hiong lâng ū saⁿ-kò, lí m̄-thang phian-toàn.

7Tio̍h離開虛假ê事遠遠；m̄-thang thâi無罪kap義ê人；因為pháiⁿ人我的確無算伊做義。Tio̍h lī-khui hu-ké ê sū hn̄g-hn̄g; m̄-thang thâi bô-chōe kap gī ê lâng; in-ūi pháiⁿ-lâng Góa tek-khak bô sǹg i chòe gī.

8M̄-thang受pò͘賂，因為pò͘賂會hō͘目睭金 ê人變chhiⁿ-mî，koh會將義人ê話péng-倒tńg。M̄-thang siū pò͘-lō͘, in-ūi pò͘-lō͘ ōe hō͘ ba̍k-chiu kim ê lâng piàn chhiⁿ-mî, koh ōe chiong gī-lâng ê ōe péng-tò-tńg.

9M̄-thang壓制出外人；因為lín bat出外tī埃及地，知出外人ê心。M̄-thang ap-chè chhut-gōa lâng; in-ūi lín bat chhut-gōa tī Ai-ki̍p tōe, chai chhut-gōa lâng ê sim.

10六年內你tio̍h種作你ê田園，收成土產。La̍k-nî-lāi lí tio̍h chèng-choh lí ê chhân-hn̂g, siu-sêng thó͘-sán.

11獨獨第七年，tio̍h hō͘土地歇睏無種作，hō͘你ê百姓中ê sòng-hiong人有thang食；所chhun-ê thang hō͘野獸食；你ê葡萄園kap橄欖園，也tio̍h án-ni。To̍k-to̍k tē-chhit nî, tio̍h hō͘ thó͘-tōe hioh-khùn bô chèng-choh, hō͘ lí ê peh-sìⁿ-tiong ê sòng-hiong lâng ū thang chia̍h; só͘ chhun-ê thang hō͘ iá-siù chia̍h; lí ê phû-tô-hn̂g kap kaⁿ-ná-hn̂g, iā tio̍h án-ni.

12六日內你tio̍h做你ê工，第七日tio̍h安歇，hō͘牛驢thang歇睏，也hō͘女婢ê kiáⁿ kap出外人lóng thang 養精力。La̍k-ji̍t-lāi lí tio̍h chòe lí ê kang, tē-chhit ji̍t tio̍h an-hioh, hō͘ gû lû thang hioh-khùn, iā hō͘ lú-pī ê kiáⁿ kap chhut-gōa lâng lóng thang ióng cheng-le̍k.

13見若我對lín講ê話，lín tio̍h謹慎守；別個上帝 ê名，你m̄-thang提起，也m̄-thang講hō͘人聽。Kìⁿ-nā Góa tùi lín kóng ê ōe, lín tio̍h kín-sīn siú; pa̍t ê siōng-tè ê miâ, lí m̄-thang thê-khí, iā m̄-thang kóng hō͘ lâng thiaⁿ.

14一年三pái你tio̍h守節服事我。Chi̍t-nî saⁿ-pái lí tio̍h siú-choeh ho̍k-sāi Góa.

15A-pit月，你出埃及，到定tio̍h ê期，tio̍h守除酵節；七日久食無酵餅，照我所吩咐ê；朝見我ê人m̄-thang空手。A-pit ge̍h, lí chhut Ai-ki̍p, kàu tiāⁿ-tio̍h ê kî, tio̍h siú tû-kàⁿ-choeh; chhit-ji̍t kú chia̍h bô-kàⁿ-piáⁿ, chiàu Góa só͘ hoan-hù-ê; tiâu-kìⁿ Góa ê lâng m̄-thang khang-chhiú.

16Koh有收割ê節，就是你tī田裡栽種，tùi tio̍h磨得tio̍h起頭熟ê土產。Koh有收khǹg ê節，就是年尾，lín收khǹg tùi田裡tio̍h磨所得tio̍h-ê。Koh ū siu-koah ê choeh, chiū-sī lí tī chhân-ni̍h chai-chèng, tùi tio̍h-bôa tit-tio̍h khí-thâu se̍k ê thó͘-sán. Koh ū siu-khǹg ê choeh, chiū-sī nî-bé, lín siu-khǹg tùi chhân-ni̍h tio̍h-bôa só͘ tit-tio̍h-ê.

17一年三pái，你一切ê ta-po͘丁tio̍h 到主耶和華ê面前。Chi̍t-nî saⁿ-pái, lí it-chhè ê ta-po͘-teng tio̍h kàu Chú Iâ-hô-hoa ê bīn-chêng.

18祭祀我ê牲禮，伊ê血m̄-thang chham有酵ê物來獻；也m̄-thang將我節期牲禮ê油留到隔早起。Chè-sū Góa ê seng-lé, i ê huih m̄-thang chham ū kàⁿ ê mi̍h lâi hiàn; iā m̄-thang chiong Góa choeh-kî seng-lé ê iû lâu kàu keh chá-khí.

19地裡第一起頭熟ê物，tio̍h送到耶和華你上帝ê厝。煮山羊á m̄-thang用伊ê母ê奶。Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí Siōng-tè ê chhù. Chú soaⁿ-iûⁿ-á m̄-thang ēng i ê bú ê lin.

20看ah，我差我ê使者tī你ê頭前，tī路裡保護你，chhōa你到我所備辦ê地。Khòaⁿ ah, Góa chhe Góa ê sù-chiá tī lí ê thâu-chêng, tī lō͘-ni̍h pó-hō͘ lí, chhōa lí kàu Góa só͘ pī-pān ê tōe.

21Lín tī伊ê面前tio̍h謹慎，聽thàn伊ê話，m̄-thang違逆伊；伊無beh赦免lín ê過失；因為伊奉我ê名。Lín tī i ê bīn-chêng tio̍h kín-sīn, thiaⁿ-thàn i ê ōe, m̄-thang ûi-ke̍h i; i bô beh sià-bián lín ê kè-sit; in-ūi i hōng Góa ê miâ.

22你若實在聽thàn伊ê話，照我一切所講ê去行，我就做你ê仇讎ê仇讎，你ê對敵ê對敵。Lí nā si̍t-chāi thiaⁿ-thàn i ê ōe, chiàu Góa it-chhè só͘ kóng-ê khì kiâⁿ, Góa chiū chòe lí ê kiû-siû ê kiû-siû, lí ê tùi-te̍k ê tùi-te̍k.

23我ê使者beh行tī你ê頭前，chhōa你到A-mô͘-lī、Hek、Pí-lī-sé、迦南、Hi-bī、Iâ-pò͘-su hiah-ê族ê地；我beh剪除in。Góa ê sù-chiá beh kiâⁿ tī lí ê thâu-chêng, chhōa lí kàu A-mô͘-lī, Hek, Pí-lī-sé, Ka-lâm, Hi-bī, Iâ-pò͘-su hiah-ê cho̍k ê tōe; Góa beh chián-tû in.

24In ê上帝你m̄-thang跪拜，也m̄-thang服事；m̄-thang學in ê所做，tio̍h一盡毀滅in，phah碎in雕刻ê柱。In ê siōng-tè lí m̄-thang kūi-pài, iā m̄-thang ho̍k-sāi; m̄-thang o̍h in ê só͘-chòe, tio̍h it-chīn húi-bia̍t in, phah-chhùi in tiau-khek ê thiāu.

25Lín tio̍h服事耶和華lín ê上帝；伊的確賜福tī你ê米糧kap你ê水；koh我beh除去lín中間ê破病。Lín tio̍h ho̍k-sāi Iâ-hô-hoa lín ê Siōng-tè; I tek-khak sù-hok tī lí ê bí-niû kap lí ê chúi; koh Góa beh tû-khì lín tiong-kan ê phòa-pīⁿ.

26也beh hō͘你ê境內，無有ka-la̍uh胎ê，無有bōe生ê；我beh hō͘你ê歲壽滿足。Iā beh hō͘ lí ê kéng-lāi, bô ū ka-la̍uh-thai-ê, bô ū bōe siⁿ-ê; Góa beh hō͘ lí ê hè-siū móa-chiok.

27我beh做你ê頭前，來示威；你所到ê所在，hiah-ê百姓，我beh hō͘ in死無；koh beh hō͘你一切ê對敵oa̍t-tńg身逃走。Góa beh chòe lí ê thâu-chêng, lâi sī-ui; lí só͘ kàu ê só͘-chāi, hiah-ê peh-sìⁿ, Góa beh hō͘ in sí-bô; koh beh hō͘ lí it-chhè ê tùi-te̍k oa̍t-tńg-sin tô-cháu.

28我beh差大隻蜂tī你ê頭前，趕出Hi-bī人、迦南人、Hek人，離開你。Góa beh chhe tōa-chiah-phang tī lí ê thâu-chêng, kóaⁿ-chhut Hi-bī lâng, Ka-lâm lâng, Hek lâng, lī-khui lí.

29Tī一年內我無beh tùi你ê頭前一盡趕in出，驚了土地拋荒，野獸加添chōe-chōe來害lín。Tī chi̍t-nî-lāi Góa bô beh tùi lí ê thâu-chêng it-chīn kóaⁿ in chhut, kiaⁿ-liáu thó͘-tōe pha-hng, iá-siù ke-thiⁿ chōe-chōe lâi hāi lín.

30我beh漸漸tùi lín ê頭前趕in出，thèng候lín人額加添chōe-chōe，來承受hit-ê地做業。Góa beh chiām-chiām tùi lín ê thâu-chêng kóaⁿ in chhut, thèng-hāu lín lâng-gia̍h ke-thiⁿ chōe-chōe, lâi sêng-siū hit-ê tōe chòe-gia̍p.

31我beh定tio̍h你ê境界，tùi紅海到腓利士ê海，koh tùi曠野到大河。因為我beh將hit所在khiā起ê百姓交tī lín ê手，hō͘你將in對你ê面前趕出。Góa beh tiāⁿ-tio̍h lí ê kéng-kài, tùi Âng-hái kàu Hui-lī-sū ê hái, koh tùi khòng-iá kàu Tōa-hô. In-ūi Góa beh chiong hit só͘-chāi khiā-khí ê peh-sìⁿ kau tī lín ê chhiú, hō͘ lí chiong in tùi lí ê bīn-chêng kóaⁿ-chhut.

32M̄-thang kap in，以及in ê上帝，立約。M̄-thang kap in, í-ki̍p in ê siōng-tè, li̍p-iok.

33M̄-thang hō͘ in khiā起你ê土地，驚了in hō͘你得罪我；你若服事in ê上帝，這beh做你ê羅網。M̄-thang hō͘ in khiā-khí lí ê thó͘-tōe, kiaⁿ-liáu in hō͘ lí tek-chōe Góa; lí nā ho̍k-sāi in ê siōng-tè, che beh chòe lí ê lô-bāng.