1M̄-thang報揚謠言；m̄-thang kap pháiⁿ人聯合做lām-sám ê干證。M̄-thang pò-iông iâu-giân; m̄-thang kap pháiⁿ-lâng liân-ha̍p chòe lām-sám ê kan-chèng.

2M̄-thang tè眾人行pháiⁿ；tī相告ê事，m̄-thang偏óa大pêng，講伊ê話，來冤枉正直。M̄-thang tè chèng-lâng kiâⁿ-pháiⁿ; tī saⁿ-kò ê sū, m̄-thang phian-óa tōa-pêng, kóng i ê ōe, lâi oan-óng chèng-ti̍t.

3M̄-thang tī相告ê事，袒護sòng-hiong人。M̄-thang tī saⁿ-kò ê sū, thán-hō͘ sòng-hiong lâng.

4若tú-tio̍h你ê對敵ê牛，á是驢，失迷路，的確tio̍h牽tò來交伊。Nā tú-tio̍h lí ê tùi-te̍k ê gû, á-sī lû, sit-bê lō͘, tek-khak tio̍h khan tò-lâi kau-i.

5若看見怨恨你ê人ê驢背載teh倒，m̄-thang行開，tio̍h kap伊相kap放驢所載ê。Nā khòaⁿ-kìⁿ oàn-hūn lí ê lâng ê lû pē-chài teh-tó, m̄-thang kiâⁿ-khui, tio̍h kap i saⁿ-kap pàng lû só͘ chài-ê.

6Sòng-hiong人有相告，你m̄-thang偏斷。Sòng-hiong lâng ū saⁿ-kò, lí m̄-thang phian-toàn.

7Tio̍h離開虛假ê事遠遠；m̄-thang thâi無罪kap義ê人；因為pháiⁿ人我的確無算伊做義。Tio̍h lī-khui hu-ké ê sū hn̄g-hn̄g; m̄-thang thâi bô-chōe kap gī ê lâng; in-ūi pháiⁿ-lâng Góa tek-khak bô sǹg i chòe gī.

8M̄-thang受pò͘賂，因為pò͘賂會hō͘目睭金 ê人變chhiⁿ-mî，koh會將義人ê話péng-倒tńg。M̄-thang siū pò͘-lō͘, in-ūi pò͘-lō͘ ōe hō͘ ba̍k-chiu kim ê lâng piàn chhiⁿ-mî, koh ōe chiong gī-lâng ê ōe péng-tò-tńg.

9M̄-thang壓制出外人；因為lín bat出外tī埃及地，知出外人ê心。M̄-thang ap-chè chhut-gōa lâng; in-ūi lín bat chhut-gōa tī Ai-ki̍p tōe, chai chhut-gōa lâng ê sim.

10六年內你tio̍h種作你ê田園，收成土產。La̍k-nî-lāi lí tio̍h chèng-choh lí ê chhân-hn̂g, siu-sêng thó͘-sán.

11獨獨第七年，tio̍h hō͘土地歇睏無種作，hō͘你ê百姓中ê sòng-hiong人有thang食；所chhun-ê thang hō͘野獸食；你ê葡萄園kap橄欖園，也tio̍h án-ni。To̍k-to̍k tē-chhit nî, tio̍h hō͘ thó͘-tōe hioh-khùn bô chèng-choh, hō͘ lí ê peh-sìⁿ-tiong ê sòng-hiong lâng ū thang chia̍h; só͘ chhun-ê thang hō͘ iá-siù chia̍h; lí ê phû-tô-hn̂g kap kaⁿ-ná-hn̂g, iā tio̍h án-ni.

12六日內你tio̍h做你ê工，第七日tio̍h安歇，hō͘牛驢thang歇睏，也hō͘女婢ê kiáⁿ kap出外人lóng thang 養精力。La̍k-ji̍t-lāi lí tio̍h chòe lí ê kang, tē-chhit ji̍t tio̍h an-hioh, hō͘ gû lû thang hioh-khùn, iā hō͘ lú-pī ê kiáⁿ kap chhut-gōa lâng lóng thang ióng cheng-le̍k.

13見若我對lín講ê話，lín tio̍h謹慎守；別個上帝 ê名，你m̄-thang提起，也m̄-thang講hō͘人聽。Kìⁿ-nā Góa tùi lín kóng ê ōe, lín tio̍h kín-sīn siú; pa̍t ê siōng-tè ê miâ, lí m̄-thang thê-khí, iā m̄-thang kóng hō͘ lâng thiaⁿ.

14一年三pái你tio̍h守節服事我。Chi̍t-nî saⁿ-pái lí tio̍h siú-choeh ho̍k-sāi Góa.

15A-pit月，你出埃及，到定tio̍h ê期，tio̍h守除酵節；七日久食無酵餅，照我所吩咐ê；朝見我ê人m̄-thang空手。A-pit ge̍h, lí chhut Ai-ki̍p, kàu tiāⁿ-tio̍h ê kî, tio̍h siú tû-kàⁿ-choeh; chhit-ji̍t kú chia̍h bô-kàⁿ-piáⁿ, chiàu Góa só͘ hoan-hù-ê; tiâu-kìⁿ Góa ê lâng m̄-thang khang-chhiú.

16Koh有收割ê節，就是你tī田裡栽種，tùi tio̍h磨得tio̍h起頭熟ê土產。Koh有收khǹg ê節，就是年尾，lín收khǹg tùi田裡tio̍h磨所得tio̍h-ê。Koh ū siu-koah ê choeh, chiū-sī lí tī chhân-ni̍h chai-chèng, tùi tio̍h-bôa tit-tio̍h khí-thâu se̍k ê thó͘-sán. Koh ū siu-khǹg ê choeh, chiū-sī nî-bé, lín siu-khǹg tùi chhân-ni̍h tio̍h-bôa só͘ tit-tio̍h-ê.

17一年三pái，你一切ê ta-po͘丁tio̍h 到主耶和華ê面前。Chi̍t-nî saⁿ-pái, lí it-chhè ê ta-po͘-teng tio̍h kàu Chú Iâ-hô-hoa ê bīn-chêng.

18祭祀我ê牲禮，伊ê血m̄-thang chham有酵ê物來獻；也m̄-thang將我節期牲禮ê油留到隔早起。Chè-sū Góa ê seng-lé, i ê huih m̄-thang chham ū kàⁿ ê mi̍h lâi hiàn; iā m̄-thang chiong Góa choeh-kî seng-lé ê iû lâu kàu keh chá-khí.

19地裡第一起頭熟ê物，tio̍h送到耶和華你上帝ê厝。煮山羊á m̄-thang用伊ê母ê奶。Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí Siōng-tè ê chhù. Chú soaⁿ-iûⁿ-á m̄-thang ēng i ê bú ê lin.

20看ah，我差我ê使者tī你ê頭前，tī路裡保護你，chhōa你到我所備辦ê地。Khòaⁿ ah, Góa chhe Góa ê sù-chiá tī lí ê thâu-chêng, tī lō͘-ni̍h pó-hō͘ lí, chhōa lí kàu Góa só͘ pī-pān ê tōe.

21Lín tī伊ê面前tio̍h謹慎，聽thàn伊ê話，m̄-thang違逆伊；伊無beh赦免lín ê過失；因為伊奉我ê名。Lín tī i ê bīn-chêng tio̍h kín-sīn, thiaⁿ-thàn i ê ōe, m̄-thang ûi-ke̍h i; i bô beh sià-bián lín ê kè-sit; in-ūi i hōng Góa ê miâ.

22你若實在聽thàn伊ê話，照我一切所講ê去行，我就做你ê仇讎ê仇讎，你ê對敵ê對敵。Lí nā si̍t-chāi thiaⁿ-thàn i ê ōe, chiàu Góa it-chhè só͘ kóng-ê khì kiâⁿ, Góa chiū chòe lí ê kiû-siû ê kiû-siû, lí ê tùi-te̍k ê tùi-te̍k.

23我ê使者beh行tī你ê頭前，chhōa你到A-mô͘-lī、Hek、Pí-lī-sé、迦南、Hi-bī、Iâ-pò͘-su hiah-ê族ê地；我beh剪除in。Góa ê sù-chiá beh kiâⁿ tī lí ê thâu-chêng, chhōa lí kàu A-mô͘-lī, Hek, Pí-lī-sé, Ka-lâm, Hi-bī, Iâ-pò͘-su hiah-ê cho̍k ê tōe; Góa beh chián-tû in.

24In ê上帝你m̄-thang跪拜，也m̄-thang服事；m̄-thang學in ê所做，tio̍h一盡毀滅in，phah碎in雕刻ê柱。In ê siōng-tè lí m̄-thang kūi-pài, iā m̄-thang ho̍k-sāi; m̄-thang o̍h in ê só͘-chòe, tio̍h it-chīn húi-bia̍t in, phah-chhùi in tiau-khek ê thiāu.

25Lín tio̍h服事耶和華lín ê上帝；伊的確賜福tī你ê米糧kap你ê水；koh我beh除去lín中間ê破病。Lín tio̍h ho̍k-sāi Iâ-hô-hoa lín ê Siōng-tè; I tek-khak sù-hok tī lí ê bí-niû kap lí ê chúi; koh Góa beh tû-khì lín tiong-kan ê phòa-pīⁿ.

26也beh hō͘你ê境內，無有ka-la̍uh胎ê，無有bōe生ê；我beh hō͘你ê歲壽滿足。Iā beh hō͘ lí ê kéng-lāi, bô ū ka-la̍uh-thai-ê, bô ū bōe siⁿ-ê; Góa beh hō͘ lí ê hè-siū móa-chiok.

27我beh做你ê頭前，來示威；你所到ê所在，hiah-ê百姓，我beh hō͘ in死無；koh beh hō͘你一切ê對敵oa̍t-tńg身逃走。Góa beh chòe lí ê thâu-chêng, lâi sī-ui; lí só͘ kàu ê só͘-chāi, hiah-ê peh-sìⁿ, Góa beh hō͘ in sí-bô; koh beh hō͘ lí it-chhè ê tùi-te̍k oa̍t-tńg-sin tô-cháu.

28我beh差大隻蜂tī你ê頭前，趕出Hi-bī人、迦南人、Hek人，離開你。Góa beh chhe tōa-chiah-phang tī lí ê thâu-chêng, kóaⁿ-chhut Hi-bī lâng, Ka-lâm lâng, Hek lâng, lī-khui lí.

29Tī一年內我無beh tùi你ê頭前一盡趕in出，驚了土地拋荒，野獸加添chōe-chōe來害lín。Tī chi̍t-nî-lāi Góa bô beh tùi lí ê thâu-chêng it-chīn kóaⁿ in chhut, kiaⁿ-liáu thó͘-tōe pha-hng, iá-siù ke-thiⁿ chōe-chōe lâi hāi lín.

30我beh漸漸tùi lín ê頭前趕in出，thèng候lín人額加添chōe-chōe，來承受hit-ê地做業。Góa beh chiām-chiām tùi lín ê thâu-chêng kóaⁿ in chhut, thèng-hāu lín lâng-gia̍h ke-thiⁿ chōe-chōe, lâi sêng-siū hit-ê tōe chòe-gia̍p.

31我beh定tio̍h你ê境界，tùi紅海到腓利士ê海，koh tùi曠野到大河。因為我beh將hit所在khiā起ê百姓交tī lín ê手，hō͘你將in對你ê面前趕出。Góa beh tiāⁿ-tio̍h lí ê kéng-kài, tùi Âng-hái kàu Hui-lī-sū ê hái, koh tùi khòng-iá kàu Tōa-hô. In-ūi Góa beh chiong hit só͘-chāi khiā-khí ê peh-sìⁿ kau tī lín ê chhiú, hō͘ lí chiong in tùi lí ê bīn-chêng kóaⁿ-chhut.

32M̄-thang kap in，以及in ê上帝，立約。M̄-thang kap in, í-ki̍p in ê siōng-tè, li̍p-iok.

33M̄-thang hō͘ in khiā起你ê土地，驚了in hō͘你得罪我；你若服事in ê上帝，這beh做你ê羅網。M̄-thang hō͘ in khiā-khí lí ê thó͘-tōe, kiaⁿ-liáu in hō͘ lí tek-chōe Góa; lí nā ho̍k-sāi in ê siōng-tè, che beh chòe lí ê lô-bāng.

1耶和華kā摩西講：你kap亞倫、Ná-tap、A-pí-hō͘，kap以色列長老中七十人，lóng tio̍h上到耶和華chia，遠遠仆落去拜。Iâ-hô-hoa kā Mô͘-se kóng, Lí kap A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p lâng, lóng tio̍h chiūⁿ kàu Iâ-hô-hoa chia, hn̄g-hn̄g phak-lo̍h-khì pài.

2獨獨摩西thang親近耶和華，其餘m̄-thang親近；百姓也m̄-thang kap伊上來。To̍k-to̍k Mô͘-se thang chhin-kūn Iâ-hô-hoa, kî-û m̄-thang chhin-kūn; peh-sìⁿ iā m̄-thang kap i chiūⁿ-lâi.

3摩西到，將耶和華一切ê話，一切ê法度，講hō͘百姓聽；眾百姓同聲應講，耶和華所講ê話，阮beh lóng遵thàn。Mô͘-se kàu, chiong Iâ-hô-hoa it-chhè ê ōe, it-chhè ê hoat-tō͘, kóng hō͘ peh-sìⁿ thiaⁿ; chèng peh-sìⁿ tâng-siaⁿ ìn kóng, Iâ-hô-hoa só͘ kóng ê ōe, goán beh lóng chun-thàn.

4摩西將耶和華ê話，lóng寫起來；透早起來，tī山下起一座壇，照以色列十二支派，khiā十二支柱。Mô͘-se chiong Iâ-hô-hoa ê ōe, lóng siá-khí-lâi; thàu-chá khí-lâi, tī soaⁿ-ē khí chi̍t chō tôaⁿ, chiàu Í-sek-lia̍t cha̍p-jī chi-phài, khiā cha̍p-jī ki thiāu.

5Koh差以色列中ê少年人，去獻燒祭。也用牛做平安祭，獻hō͘耶和華。Koh chhe Í-sek-lia̍t-tiong ê siàu-liân lâng, khì hiàn sio-chè. Iā ēng gû chòe pêng-an-chè, hiàn hō͘ Iâ-hô-hoa.

6摩西將血ê一半貯tī盆裡，一半hiù tī壇裡。Mô͘-se chiong huih ê chi̍t-pòaⁿ tóe tī phûn-ni̍h, chi̍t-pòaⁿ hiù tī tôaⁿ-ni̍h.

7Koh the̍h約ê冊，讀hō͘百姓聽；in講：耶和華所講ê，阮beh lóng遵thàn來行。Koh the̍h iok ê chheh, tha̍k hō͘ peh-sìⁿ thiaⁿ; in kóng, Iâ-hô-hoa só͘ kóng-ê, goán beh lóng chun-thàn lâi kiâⁿ.

8摩西將血hiù百姓，講：看ah，這是立約ê血，是耶和華照這一切ê話kap lín所立ê。Mô͘-se chiong huih hiù peh-sìⁿ, kóng, Khòaⁿ ah, che sī li̍p-iok ê huih, sī Iâ-hô-hoa chiàu che it-chhè ê ōe kap lín só͘ li̍p-ê.

9摩西、亞倫、Ná-tap、A-pí-hō͘，kap以色列長老中七十人，lóng上去。Mô͘-se, A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p-lâng, lóng chiūⁿ-khì.

10In看見以色列ê上帝，伊ê腳下有親像平鋪ê藍寶石，親像天原質ê光亮。In khòaⁿ-kìⁿ Í-sek-lia̍t ê Siōng-tè, I ê kha-ē ū chhin-chhiūⁿ pîⁿ-pho͘ ê lâm-pó-chio̍h, chhin-chhiūⁿ thiⁿ goân-chit-ê kng-liāng.

11伊無出手害以色列尊貴ê人；in看見上帝，in也食也lim。I bô chhut-chhiú hāi Í-sek-lia̍t chun-kùi ê lâng; in khòaⁿ-kìⁿ Siōng-tè, in iā chia̍h iā lim.

12耶和華kā摩西講：你上山就近我，tiàm tī-chia，我beh將石碑kap律法，以及誡命，我所寫ê，賞賜你，thang教示in。Iâ-hô-hoa kā Mô͘-se kóng, Lí chiūⁿ-soaⁿ chiū-kūn Góa, tiàm tī-chia, Góa beh chiong chio̍h-pi kap lu̍t-hoat, í-ki̍p kài-bēng, Góa só͘ siá-ê, siúⁿ-sù lí, thang kà-sī in.

13摩西kap跟隨伊ê約書亞起來；摩西上上帝ê山；Mô͘-se kap kun-sûi i ê Iok-su-a khí-lâi; Mô͘-se chiūⁿ Siōng-tè ê soaⁿ;

14kā長老講：Lín tiàm chia等阮，thèng候阮倒tńg來lín chia；看ah，亞倫、Hō͘-jíⁿ kap lín tī-teh；人若有tāi-chì，thang來chhē in。kā tiúⁿ-ló kóng, Lín tiàm chia tán goán, thèng-hāu goán tò-tńg-lâi lín chia; khòaⁿ ah, A-lûn Hō͘-jíⁿ kap lín tī-teh; lâng nā ū tāi-chì, thang lâi chhē in.

15摩西上山，山有雲遮蓋。Mô͘-se chiūⁿ soaⁿ, soaⁿ ū hûn jia-khàm.

16耶和華ê榮光停tī西奈山，雲遮伊六日久；第七日伊tùi雲中叫摩西。Iâ-hô-hoa ê êng-kng thêng tī Se-nái soaⁿ, hûn jia i la̍k-ji̍t kú; tē-chhit ji̍t I tùi hûn-tiong kiò Mô͘-se.

17耶和華榮光ê款式，親像火燒tī山頂；以色列人親目看見。Iâ-hô-hoa êng-kng ê khoán-sit, chhin-chhiūⁿ hé sio tī soaⁿ-téng; Í-sek-lia̍t lâng chhin-ba̍k khòaⁿ-kìⁿ.

18摩西入雲中上山；摩西tī山頂四十日四十暝。Mô͘-se ji̍p hûn-tiong chiūⁿ-soaⁿ; Mô͘-se tī soaⁿ-téng sì-cha̍p ji̍t sì-cha̍p-mî.

1耶和華kā摩西講：Iâ-hô-hoa kā Mô͘-se kóng,

2你kā以色列人講：Tio̍h獻禮物hō͘我；見若心所甘願ê，lín thang kā伊收來，做禮物hō͘我。Lí kā Í-sek-lia̍t lâng kóng, Tio̍h hiàn lé-mi̍h hō͘ Góa; kìⁿ-nā sim só͘ kam-goān-ê, lín thang kā i siu-lâi, chòe lé-mi̍h hō͘ Góa.

3所tio̍h收ê禮物，就是金、銀、銅，Só͘ tio̍h siu ê lé-mi̍h, chiū-sī kim, gûn, tâng,

4藍色、紫色、朱紅色ê 料，幼苧、山羊毛，lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g,

5染紅ê公羊皮、海狗皮，ní âng ê kang-iûⁿ-phê, hái-káu phê,

6chō-kiap柴、點燈ê油、芳芳ê品料，thang做膏油來抹，也做芳香，chō-kiap-chhâ, tiám teng ê iû, phang-phang ê phín-liāu, thang chòe ko-iû lâi boah, iā chòe phang-hiuⁿ,

7紅瑪瑙，kap別樣ê寶石，thang鑲í-hut-tek kap pó͘褂。âng-bé-ló, kap pa̍t-iūⁿ ê pó-chio̍h, thang siuⁿ í-hut-tek kap pó͘-kòa.

8In tio̍h kā我起聖ê所在，hō͘我thang tiàm tī in中間。In tio̍h kā Góa khí sèng ê só͘-chāi, hō͘ Góa thang tiàm tī in tiong-kan.

9照我一切所指示你ê，就是會幕ê款式，kap內中器具款式，lín tio̍h照án-ni來造。Chiàu Góa it-chhè só͘ chí-sī lí ê, chiū-sī hōe-bō͘ ê khoán-sit, kap lāi-tiong khì-kū khoán-sit, lín tio̍h chiàu án-ni lâi chō.

10In tio̍h用chō-kiap柴做一個櫃，長兩肘半，闊肘半，高肘半。In tio̍h ēng chō-kiap-chhâ chòe chi̍t ê kūi, tn̂g nn̄g-tiú-pòaⁿ, khoah tiú-pòaⁿ, koâiⁿ tiú-pòaⁿ.

11你tio̍h用好金包，內外lóng tio̍h包；四圍tio̍h齒金線。Lí tio̍h ēng hó-kim pau, lāi-gōa lóng tio̍h pau; sì-ûi tio̍h khí kim-sòaⁿ.

12你tio̍h kā伊鑄四個金環，安tī伊ê四腳，chit-pêng兩環，hit-pêng兩環。Lí tio̍h kā i chù sì ê kim-khoân, an tī i ê sì-kha, chit-pêng nn̄g-khoân, hit-pêng nn̄g-khoân.

13tio̍h用chō-kiap柴做兩支kǹg，用金包伊。Tio̍h ēng chō-kiap-chhâ chòe nn̄g ki kǹg, ēng kim pau i.

14Tio̍h將kǹg穿tī櫃邊ê環內，thang用來扛櫃；Tio̍h chiong kǹg chhng tī kūi-piⁿ ê khoân-lāi, thang ēng lâi kng kūi;

15chiah-ê kǹg tio̍h常常tī櫃ê環內，m̄-thang抽出來。chiah-ê kǹg tio̍h siông-siông tī kūi ê khoân-lāi, m̄-thang thiu-chhut-lâi.

16tio̍h用我所beh賞賜你ê律法hē tī櫃內。Tio̍h ēng Góa só͘ beh siúⁿ-sù lí ê lu̍t-hoat hē tī kūi-lāi.

17tio̍h用好金做施恩所，長兩肘半，闊肘半。Tio̍h ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ.

18tio̍h用金做兩個ki-lō͘兵，用phah ê法做伊，tī施恩所ê雙頭。Tio̍h ēng kim chòe nn̄g ê ki-lō͘-peng, ēng phah ê hoat chòe-i, tī si-un-só͘ ê siang-thâu.

19Chit頭做一個ki-lō͘兵，hit頭做一個ki-lō͘兵；雙頭ê ki-lō͘兵，kap施恩所，tio̍h kui塊，做相連。Chit-thâu chòe chi̍t ê ki-lō͘-peng, hit-thâu chòe chi̍t ê ki-lō͘-peng; siang-thâu ê ki-lō͘-peng, kap si-un-só͘, tio̍h kui-tè, chòe saⁿ-liân.

20兩個 ki-lō͘兵tio̍h高高thí開翼，用in ê翼遮施恩所；in ê面tio̍h相對；ki-lō͘兵ê面tio̍h àⁿ施恩所。Nn̄g ê ki-lō͘-peng tio̍h koâiⁿ-koâiⁿ thí-khui si̍t, ēng in ê si̍t jia si-un-só͘; in ê bīn tio̍h saⁿ-tùi; ki-lō͘-peng ê bīn tio̍h àⁿ si-un-só͘.

21Tio̍h將施恩所安tī櫃頂，koh將我所beh賞賜你ê律法hē tī 櫃內。Tio̍h chiong si-un-só͘ an tī kūi-téng, koh chiong Góa só͘ beh siúⁿ-sù lí ê lu̍t-hoat hē tī kūi-lāi.

22我beh tī-hia kap你聚會，koh beh tùi施恩所頂，就是tùi法櫃頂，兩個ki-lō͘兵ê中間，kap你講我所beh吩咐你傳hō͘以色列人一切ê事。Góa beh tī-hia kap lí chū-hōe, koh beh tùi si-un-só͘ téng, chiū-sī tùi hoat-kūi téng, nn̄g ê ki-lō͘-peng ê tiong-kan, kap lí kóng Góa só͘ beh hoan-hù lí thoân hō͘ Í-sek-lia̍t lâng it-chhè ê sū.

23你tio̍h用chō-kiap柴做一塊桌，長兩肘，闊一肘，高肘半。Lí tio̍h ēng chō-kiap-chhâ chòe chi̍t tè toh, tn̂g nn̄g-tiú, khoah chi̍t-tiú, koâiⁿ tiú-pòaⁿ.

24tio̍h用好金包，四圍齒金線。Tio̍h ēng hó-kim pau, sì-ûi khí kim-sòaⁿ.

25桌ê四圍，各做一巴掌闊ê橫樑，橫樑頂四圍齒金線。Toh ê sì-ûi, kok chòe chi̍t pa-chiúⁿ khoah ê hoâiⁿ-niû, hoâiⁿ-niû-téng sì-ûi khí kim-sòaⁿ.

26你tio̍h做四個金環，安tī伊ê四腳ê四角。Lí tio̍h chòe sì ê kim-khoân, an tī i ê sì-kha ê sì-kak.

27安環ê所在tio̍h óa近橫樑，thang 穿kǹg來扛桌。An khoân ê só͘-chāi tio̍h óa-kūn hoâiⁿ-niû, thang chhng-kǹg lâi kng toh.

28tio̍h用chō-kiap柴做兩支kǹg用金包伊，thang用來扛桌。Tio̍h ēng chō-kiap-chhâ chòe nn̄g ki kǹg ēng kim pau-i, thang ēng lâi kng toh.

29tio̍h做盤、碗、杯、瓶，thang來灌奠，lóng tio̍h用好金做。Tio̍h chòe pôaⁿ, óaⁿ, poe, pân, thang lâi koàn-tiān, lóng tio̍h ēng hó-kim chòe.

30桌頂常常hē排列ê餅tī我ê面前。Toh-téng siông-siông hē pâi-lia̍t ê piáⁿ tī Góa ê bīn-chêng.

31你tio̍h用好金做一個燈台；燈台ê座，kap中柱，伊ê杯，伊ê目，伊ê花，lóng用phah ê法，做kui座。Lí tio̍h ēng hó-kim chòe chi̍t ê teng-tâi; teng-tâi ê chō, kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō.

32Tī伊ê邊á tio̍h分出六支；燈台ê chit-pêng tio̍h有三支，燈台ê hit-pêng tio̍h有三支。Tī i ê piⁿ-á tio̍h pun-chhut la̍k-ki; teng-tâi ê chit-pêng tio̍h ū saⁿ-ki, teng-tâi ê hit-pêng tio̍h ū saⁿ-ki.

33Chit-pêng每支有三個杯，款式親像杏花，有目有花；hit-pêng每支也有三個杯，款式親像杏花，有目有花；tùi燈台分出ê六支lóng是án-ni。Chit-pêng múi-ki ū saⁿ ê poe, khoán-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khoán-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni.

34燈台柱有四個杯，款式親像杏花，有伊ê目kap伊ê花。Teng-tâi-thiāu ū sì ê poe, khoán-sit chhin-chhiūⁿ hēng-hoe, ū i ê ba̍k kap i ê hoe.

35兩支ê下面有一目kap伊相連，koh兩支ê下面有一目kap伊相連，koh兩支ê下面有一目kap伊相連；燈台所出ê六支lóng是án-ni。Nn̄g-ki ê ē-bīn ū chi̍t ba̍k kap i saⁿ-liân, koh nn̄g-ki ê ē-bīn ū chi̍t ba̍k kap i saⁿ-liân, koh nn̄g-ki ê ē-bīn ū chi̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni.

36Hiah-ê目kap hiah-ê支，lóng kap伊連做一個，lóng用好金，照phah ê法做。Hiah-ê ba̍k kap hiah-ê ki, lóng kap i liân chòe chi̍t-ê, lóng ēng hó-kim, chiàu phah ê hoat chòe.

37Tio̍h kā伊做七個燈盞，tio̍h點hiah-ê燈，hō͘伊照光tī對面。Tio̍h kā i chòe chhit-ê teng-chóaⁿ, tio̍h tiám hiah-ê teng, hō͘ i chiò-kng tī tùi-bīn.

38燈台ê剪kap伊ê盤，lóng tio̍h用好金做伊。Teng-tâi ê chián kap i ê pôaⁿ, lóng tio̍h ēng hó-kim chòe-i.

39做燈台kap這一切ê器具，用好金一tha-liân-tek。Chòe teng-tâi kap che it-chhè ê khì-kū, ēng hó-kim chi̍t tha-liân-tek.

40你tio̍h謹慎做chiah-ê物件，lóng tio̍h照tī山頂指示你ê款式。Lí tio̍h kín-sīn chòe chiah-ê mi̍h-kiāⁿ, lóng tio̍h chiàu tī soaⁿ-téng chí-sī lí ê khoán-sit.