1你做會幕tio̍h用十幅ê帳；chiah-ê帳是用過紡ê幼苧，kap藍色、紫色、朱紅色ê料，也用奇巧ê工織成ki-lō͘兵，來做ê。Lí chòe hōe-bō͘ tio̍h ēng cha̍p-pak ê tiùⁿ; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu, iā ēng kî-khiáu ê kang chit-chiâⁿ ki-lō͘-peng, lâi chòe-ê.

2每幅帳tio̍h長二十八肘，闊四肘；帳lóng tio̍h一樣ê寸尺。Múi pak tiùⁿ tio̍h tn̂g jī-cha̍p poeh tiú, khoah sì-tiú; tiùⁿ lóng tio̍h chi̍t-iūⁿ ê chhùn-chhioh.

3Chit五幅帳tio̍h ta̍k幅相連；hit 五幅帳也tio̍h ta̍k幅相連。Chit gō͘ pak tiùⁿ tio̍h ta̍k-pak saⁿ-liân; hit gō͘ pak tiùⁿ iā tio̍h ta̍k-pak saⁿ-liân.

4Tī chit-ê相連ê帳，路尾幅ê邊á，tio̍h做藍色ê 鈕phàn；tī hit-ê相連ê帳，路尾幅ê邊á，亦tio̍h án-ni做。Tī chit-ê saⁿ-liân ê tiùⁿ, lō͘-bé pak ê piⁿ-á, tio̍h chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á, ia̍h tio̍h án-ni chòe.

5你tī chit領帳做五十個鈕phàn；koh tī第二領帳，相連ê邊á，也做五十ê鈕phàn；鈕phàn lóng tio̍h兩個兩個相對。Lí tī chit-niá tiùⁿ chòe gō͘-cha̍p ê liú-phàn; koh tī tē-jī niá tiùⁿ, saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng tio̍h nn̄g-ê nn̄g-ê saⁿ-tùi.

6Koh tio̍h做五十個金鉤來鉤，hō͘帳相連；就成做一個會幕。Koh tio̍h chòe gō͘-cha̍p ê kim-kau lâi kau, hō͘ tiùⁿ saⁿ-liân; chiū chiâⁿ-chòe chi̍t ê hōe-bō͘.

7你tio̍h用山羊毛織十一幅ê帳，做會幕頂ê布棚；Lí tio̍h ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ;

8每幅帳tio̍h長三十肘，闊四肘；十一幅帳lóng tio̍h一樣ê寸尺。múi pak tiùⁿ tio̍h tn̂g saⁿ-cha̍p tiú, khoah sì tiú; cha̍p-it pak tiùⁿ lóng tio̍h chi̍t-iūⁿ ê chhùn-chhioh.

9Tio̍h將五幅帳連做一-幅，koh將六幅帳連做一幅，hit-ê第六幅ê一半，hō͘伊垂落tī布棚ê頭前。Tio̍h chiong gō͘ pak tiùⁿ liân-chòe chi̍t-pak, koh chiong la̍k pak tiùⁿ liân-chòe chi̍t-pak, hit-ê tē-la̍k pak ê chi̍t-pòaⁿ, hō͘ i sûi-lo̍h tī pò͘-pîⁿ ê thâu-chêng.

10Tī chit-ê相連ê帳，路尾幅ê邊á，tio̍h做五十個鈕phàn，tī hit-ê相連，路尾幅ê邊á，也做五十個鈕phàn。Tī chit-ê saⁿ-liân ê tiùⁿ, lō͘-bé pak ê piⁿ-á, tio̍h chòe gō͘-cha̍p ê liú-phàn, tī hit-ê saⁿ-liân, lō͘-bé pak ê piⁿ-á, iā chòe gō͘-cha̍p ê liú-phàn.

11Koh tio̍h做五十個銅鉤，鉤tī鈕phàn，hō͘布棚連做一個。Koh tio̍h chòe gō͘-cha̍p ê tâng-kau, kau tī liú-phàn, hō͘ pò͘-pîⁿ liân chòe chi̍t-ê.

12布棚ê帳所伸垂落來，就是所伸hit-ê半幅帳，tio̍h垂tī會幕後。Pò͘-pîⁿ ê tiùⁿ só͘ chhun sûi-lo̍h-lâi, chiū-sī só͘ chhun hit-ê pòaⁿ pak tiùⁿ, tio̍h sûi tī hōe-bō͘-āu.

13布棚ê帳所伸ê長，chit-pêng一肘，hit-pêng一肘，tio̍h垂tī會幕ê雙pêng來遮伊。Pò͘-pîⁿ ê tiùⁿ só͘ chhun ê tn̂g, chit-pêng chi̍t tiú, hit-pêng chi̍t tiú, tio̍h sûi tī hōe-bō͘ ê siang-pêng lâi jia-i.

14Koh tio̍h用染紅公ê羊皮，做布棚ê褂；koh用海狗皮做褂tī頂面。Koh tio̍h ēng ní-âng kang ê iûⁿ-phê, chòe pò͘-pîⁿ ê kòa; koh ēng hái-káu-phê chòe kòa tī téng-bīn.

15你tio̍h用chō-kiap柴做會幕khiā ê板。Lí tio̍h ēng chō-kiap-chhâ chòe hōe-bō͘ khiā ê pán.

16Khiā ê板長十肘，闊一肘半。Khiā ê pán tn̂g cha̍p-tiú, khoah chi̍t tiú pòaⁿ.

17Ta̍k塊板tio̍h有兩個榫(sún)相排；會幕一切ê板lóng tio̍h照án-ni做。Ta̍k tè pán tio̍h ū nn̄g ê sún saⁿ-pâi; hōe-bō͘ it-chhè ê pán lóng tio̍h chiàu án-ni chòe.

18Tio̍h做會幕ê板，南pêng ê南勢二十塊板。Tio̍h chòe hōe-bō͘ ê pán, lâm-pêng ê lâm-sì jī-cha̍p tè pán.

19Tī chiah-ê二十塊板ê下面，tio̍h做四十個銀臼；一塊板ê下面有兩個臼來穿伊兩支榫；koh一塊板ê下面也有兩個臼來穿伊兩支榫。Tī chiah-ê jī-cha̍p tè pán ê ē-bīn, tio̍h chòe sì-cha̍p ê gûn-khū; chi̍t tè pán ê ē-bīn ū nn̄g ê khū lâi chhēng i nn̄g ki sún; koh chi̍t tè pán ê ē-bīn iā ū nn̄g ê khū lâi chhēng i nn̄g ki sún.

20會幕第二面，就是幅面，也tio̍h做板二十塊，kap in ê銀臼四十個；Hōe-bō͘ tē-jī-bīn, chiū-sī pak-bīn, iā tio̍h chòe pán jī-cha̍p tè, kap in ê gûn-khū sì-cha̍p-ê;

21chit-ê板ê下面有兩個臼，hit-ê板ê下面也有兩個臼。chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

22會幕ê後面，就是西面，tio̍h做六塊板。Hōe-bō͘ ê āu-bīn, chiū-sī sai-bīn, tio̍h chòe la̍k tè pán.

23會幕後面ê兩個角頭，tio̍h做兩塊板。Hōe-bō͘ āu-bīn ê nn̄g ê kak-thâu, tio̍h chòe nn̄g tè pán.

24板ê下長，兩個相同，直到頂面第一個環，lóng是ka-nn̂g ê；兩塊lóng是án-ni，beh做角頭ê路用。Pán ê ē-tn̂g, nn̄g-ê saⁿ-tâng, ti̍t-kàu téng-bīn tē-it ê khoân, lóng-sī ka-nn̂g ê; nn̄g-tè lóng sī án-ni, beh chòe kak-thâu ê lō͘-ēng.

25Tio̍h有八個板，kap十六個銀臼；chit-ê板ê下面有兩個臼，hit-ê板ê下面也有兩個臼。Tio̍h ū poeh ê pán, kap cha̍p-la̍k ê gûn-khū; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

26你tio̍h用chō-kiap柴做橫栱(kông)；為tio̍h會幕chit-pêng ê板做五支；Lí tio̍h ēng chō-kiap-chhâ chòe hoâiⁿ-kông; ūi-tio̍h hōe-bō͘ chit-pêng ê pán chòe gō͘-ki;

27為tio̍h會幕hit-pêng ê板做五支，koh為會幕後ê西面做五支。ūi-tio̍h hōe-bō͘ hit-pêng ê pán chòe gō͘-ki, koh ūi hōe-bō͘-āu ê sai-bīn chòe gō͘-ki.

28板ê對中hit支橫栱，tio̍h tùi chit頭透到hit頭。Pán ê tùi-tiong hit ki hoâiⁿ-kông, tio̍h tùi chit-thâu thàu kàu hit-thâu.

29板tio̍h用金包；koh tio̍h做板ê金環來套栱；栱也tio̍h用金包。Pán tio̍h ēng kim pau; koh tio̍h chòe pán ê kim-khoân lâi thò-kông; kông iā tio̍h ēng kim pau.

30Tio̍h照tī山頂指示你ê款式起會幕。Tio̍h chiàu tī soaⁿ-téng chí-sī lí ê khoán-sit khí hōe-bō͘.

31你tio̍h用藍色、紫色、朱紅色ê料，kap過紡ê幼苧，織帳籬；chit-ê帳籬用奇巧ê工，織成ki-lō͘兵，來做ê。Lí tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, chit tiùⁿ-lî; chit-ê tiùⁿ-lî ēng kî-khiáu ê kang, chit-chiâⁿ ki-lō͘-peng, lâi chòe-ê.

32你tio̍h用chō-kiap柴做四支柱，用金包伊，來吊帳籬；柱ê鉤tio̍h金ê；柱tī四個銀臼頂。Lí tio̍h ēng chō-kiap-chhâ chòe sì ki thiāu, ēng kim pau i, lâi tiàu tiùⁿ-lî; thiāu ê kau tio̍h kim-ê; thiāu tī sì ê gûn-khū téng.

33你吊帳籬tio̍h tī鉤ê下底ê所在，將法櫃扛入帳籬內，chit-ê帳籬是kā lin隔開聖所kap至聖所。Lí tiàu tiùⁿ-lî tio̍h tī kau ê ē-tóe ê só͘-chāi, chiong hoat-kūi kng-ji̍p tiùⁿ-lî-lāi, chit-ê tiùⁿ-lî sī kā lín keh-khui sèng-só͘ kap chì-sèng-só͘.

34Koh tio̍h將施恩所安tī至聖所內ê法櫃頂。Koh tio̍h chiong si-un-só͘ an tī chì-sèng-só͘ lāi ê hoat-kūi-téng.

35你tio̍h用桌hē tī帳籬外；也用燈台hē tī會幕ê南勢，kap桌相對；hit-ê桌tio̍h hē tī北勢。Lí tio̍h ēng toh hē tī tiùⁿ-lî-gōa; iā ēng teng-tâi hē tī hōe-bō͘ ê lâm-sì, kap toh saⁿ-tùi; hit-ê toh tio̍h hē tī pak-sì.

36你tio̍h用藍色、紫色、朱紅色ê料，kap過紡ê幼苧，用繡花ê工，做布棚門ê門籬。Lí tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang, chòe pò͘-pîⁿ mn̂g ê mn̂g-lî.

37tio̍h用chō-kiap柴kā門籬做五支柱，用金包伊，柱ê鉤tio̍h金ê。 Koh tio̍h kā柱鑄五個銅臼。Tio̍h ēng chō-kiap-chhâ kā mn̂g-lî chòe gō͘ ki thiāu, ēng kim pau-i, thiāu ê kau tio̍h kim-ê. Koh tio̍h kā thiāu chù gō͘ ê tâng-khū.

1你tio̍h用chō-kiap柴做壇，長五肘闊五肘；chit-ê壇是四方ê，高三肘。Lí tio̍h ēng chō-kiap-chhâ chòe tôaⁿ, tn̂g gō͘ tiú khoah gō͘ tiú; chit-ê tôaⁿ sī sù-hong-ê, koâiⁿ saⁿ tiú.

2Tio̍h tī壇ê四角頭做四支角，kap壇相連做一個，用銅包伊。Tio̍h tī tôaⁿ ê sì-kak-thâu chòe sì ki kak, kap tôaⁿ saⁿ-liân chòe chi̍t-ê, ēng tâng pau i.

3tio̍h做盆，來收伊ê灰，koh做伊ê托(thuh)á，伊ê盤，伊ê叉，伊ê火鼎，伊一切ê器具，lóng用銅做。Tio̍h chòe phûn, lâi siu i ê hu, koh chòe i ê thuh-á, i ê pôaⁿ, i ê chhe, i ê hé-tiáⁿ, i it-chhè ê khì-kū, lóng ēng tâng chòe.

4Tio̍h用銅kā伊做一個網，tī網ê四角做四個銅環。Tio̍h ēng tâng kā i chòe chi̍t ê bāng, tī bāng ê sì-kak chòe sì ê tâng khoân.

5用網hē tī壇四面違腰板ê面，hō͘網透到壇ê半腰。Ēng bāng hē tī tôaⁿ sì-bīn ûi-io-pán ê ē-bīn, hō͘ bāng thàu kàu tôaⁿ ê pòaⁿ-io.

6Tio̍h用chō-kiap柴kā壇做kǹg，用銅包伊。tio̍h ēng chō-kiap-chhâ kā tôaⁿ chòe kǹg, ēng tâng pau i.

7Hiah-ê kǹg tio̍h穿tī環內，kǹg tio̍h tī壇ê雙pêng，來扛伊。Hiah-ê kǹg tio̍h chhng tī khoân-lāi, kǹg tio̍h tī tôaⁿ ê siang-pêng, lâi kng-i.

8Tio̍h用板做壇，中央空殼；lóng tio̍h照山頂指示你ê款式來做。Tio̍h ēng pán chòe tôaⁿ, tiong-ng khang-khak; lóng tio̍h chiàu soaⁿ-téng chí-sī lí ê khoán-sit lâi chòe.

9你tio̍h做會幕ê帳；帳ê南面ê南勢，tio̍h用過紡ê幼苧做帷tī一pêng，長一百肘。Lí tio̍h chòe hōe-bō͘ ê tiûⁿ; tiûⁿ ê lâm-bīn ê lâm-sì, tio̍h ēng kè-pháng ê iù-tōe chòe ûi tī chi̍t-pêng, tn̂g chi̍t-pah tiú.

10伊ê柱二十支，銅臼二十個；柱ê鉤kap橫桿，lóng tio̍h用銀做伊。I ê thiāu jī-cha̍p ki, tâng-khū jī-cha̍p ê; thiāu ê kau kap hoâiⁿ-koaiⁿ, lóng tio̍h ēng gûn chòe i.

11北面也tio̍h有帷，長一百肘；伊ê柱二十支，銅臼二十個；柱ê鉤kap橫桿，lóng tio̍h用銀做。Pak-bīn iā tio̍h ū ûi, tn̂g chi̍t-pah tiú; i ê thiāu jī-cha̍p ki, tâng-khū jī-cha̍p-ê; thiāu ê kau kap hoâiⁿ-koaiⁿ, lóng tio̍h ēng gûn chòe.

12帳ê西面tio̍h有帷，闊五十肘；帷ê柱十支，臼十個。Tiûⁿ ê sai-bīn tio̍h ū ûi, khoah gō͘-cha̍p tiú; ûi ê thiāu cha̍p-ki, khū cha̍p-ê.

13帳ê東面ê東勢闊五十肘。Tiûⁿ ê tang-bīn ê tang-sì khoah gō͘-cha̍p tiú.

14門chit-pêng ê帷tio̍h十五肘，帷ê柱三支，臼三個。Mn̂g chit-pêng ê ûi tio̍h cha̍p-gō͘ tiú, ûi ê thiāu saⁿ-ki, khū saⁿ-ê.

15門hit-pêng ê帷也tio̍h十五肘；帷ê柱三支, 臼三個。Mn̂g hit-pêng ê ûi iā tio̍h cha̍p-gō͘ tiú; ûi ê thiāu saⁿ-ki, khū saⁿ-ê.

16帳ê門tio̍h有門籬，闊二十肘，tio̍h用藍色、紫色、朱紅色ê料，kap過紡ê幼苧，用繡花ê工做；柱四支，臼四個。Tiûⁿ ê mn̂g tio̍h ū mn̂g-lî, khoah jī-cha̍p tiú, tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe; thiāu sì-ki, khū sì-ê.

17帳四圍一切ê柱，lóng tio̍h有銀ê橫桿，銀ê鉤，銅ê臼。Tiûⁿ sì-ûi it-chhè ê thiāu, lóng tio̍h ū gûn ê hoâiⁿ-koaiⁿ, gûn ê kau, tâng ê khū.

18帳ê長一百肘，闊ta̍k面五十肘，高五肘；帷tio̍h用過紡ê幼苧做；伊ê臼lóng用銅做。Tiûⁿ ê tn̂g chi̍t-pah tiú, khoah ta̍k-bīn gō͘-cha̍p tiú, koâiⁿ gō͘ tiú; ûi tio̍h ēng kè-pháng ê iù-tōe chòe; i ê khū lóng ēng tâng chòe.

19會幕所用ta̍k項ê器具，kap所釘ê釘，以及帳內所釘ê釘，lóng tio̍h用銅做。Hōe-bō͘ só͘ ēng ta̍k-hāng ê khì-kū, kap só͘ tèng ê teng, í-ki̍p tiûⁿ-lāi só͘ tèng ê teng, lóng tio̍h ēng tâng chòe.

20你tio̍h吩咐以色列人，將hit-ê為tio̍h beh照光所khoeh清ê橄欖油，the̍h來hō͘你，hō͘燈常常點teh。Lí tio̍h hoan-hù Í-sek-lia̍t lâng, chiong hit-ê ūi-tio̍h beh chiò-kng só͘ khoeh-chheng ê kaⁿ-ná-iû, the̍h-lâi hō͘ lí, hō͘ teng siông-siông tiám-teh.

21Tī會幕中法櫃前ê帳籬外，亞倫kap伊ê kiáⁿ，tùi ê-hng 到天光tio̍h tī耶和華面前料理伊；是做以色列人代代永遠ê例。Tī hōe-bō͘-tiong hoat-kūi-chêng ê tiùⁿ-lî gōa, A-lûn kap i ê kiáⁿ, tùi ê-hng kàu thiⁿ-kng tio̍h tī Iâ-hô-hoa bīn-chêng liāu-lí-i; sī chòe Í-sek-lia̍t lâng tāi-tāi éng-oán ê lē.

1你tio̍h tùi以色列人ê中間，hō͘你ê兄亞倫kap伊hiah-ê kiáⁿ，來你chia，thang做祭司，服事我，就是亞倫，kap亞倫ê kiáⁿ Ná-tap、A-pí-hō͘、Í-lī-a-sat、Í-tha-má。Lí tio̍h tùi Í-sek-lia̍t lâng ê tiong-kan, hō͘ lí ê hiaⁿ A-lûn kap i hiah-ê kiáⁿ, lâi lí chia, thang chòe chè-si, ho̍k-sāi Góa, chiū-sī A-lûn, kap A-lûn ê kiáⁿ Ná-tap, A-pí-hō͘, Í-lī-a-sat, Í-tha-má.

2你tio̍h kā你ê兄亞倫做聖ê衫，hō͘伊榮光koh súi。Lí tio̍h kā lí ê hiaⁿ A-lûn chòe sèng ê saⁿ, hō͘ i êng-kng koh súi.

3Koh tio̍h吩咐一切心有智慧ê，就是我用智慧ê神所充滿ê人，kā亞倫做衫，分別伊做聖，thang做祭司服事我。Koh tio̍h hoan-hù it-chhè sim ū tì-hūi-ê, chiū-sī Góa ēng tì-hūi ê sîn só͘ chhiong-móa ê lâng, kā A-lûn chòe saⁿ, hun-piat i chòe-sèng, thang chòe chè-si ho̍k-sāi Góa.

4In所tio̍h做ê衫，就是pó͘褂、í-hut-tek、外袍、有花ê內衫、帽、腰帶，in tio̍h kā你ê兄亞倫kap伊ê kiáⁿ做聖ê衫，hō͘伊做祭司來服事我。In só͘ tio̍h chòe ê saⁿ, chiū-sī pó͘-kòa, í-hut-tek, gōa-phàu, ū-hoe ê lāi-saⁿ, bō, io-tòa. In tio̍h kā lí ê hiaⁿ A-lûn kap i ê kiáⁿ chòe sèng ê saⁿ, hō͘ i chòe chè-si lâi ho̍k-sāi Góa.

5In tio̍h用金，kap藍色、紫色、朱紅色ê料，kap幼苧做伊。In tio̍h ēng kim, kap lâm-sek, chí-sek, chu-âng-sek ê liāu, kap iù-tōe chòe-i.

6In tio̍h用金，kap藍色、紫色、朱紅色ê料，kap過紡ê幼苧，用奇巧ê工做í-hut-tek。In tio̍h ēng kim, kap lâm-sek, chí-sek, chu-âng-sek ê liāu, kap kè-pháng ê iù-tōe, ēng kî-khiáu ê kang chòe í-hut-tek.

7Tio̍h有披肩兩塊，連tī雙pêng，hō͘伊相連。Tio̍h ū phi-kian nn̄g tè, liân tī siang-pêng, hō͘ i saⁿ-liân.

8Í-hut-tek頂面奇巧ê工所chit-ê tòa，tio̍h kap伊同一樣ê做法；hō͘伊相連做一個；用金kap藍色、紫色、朱紅色ê料，以及過紡ê幼苧做ê。Í-hut-tek téng-bīn kî-khiáu ê kang só͘ chit-ê tòa, tio̍h kap i tâng chi̍t-iūⁿ ê chòe-hoat; hō͘ i saⁿ-liân chòe chi̍t-ê; ēng kim, kap lâm-sek, chí-sek, chu-âng-sek ê liāu, í-ki̍p kè-pháng ê iù-tōe chòe-ê.

9Tio̍h the̍h兩塊紅瑪瑙，tī頂面刻以色列chiah-ê kiáⁿ ê名；Tio̍h the̍h nn̄g tè âng-bé-ló, tī téng-bīn khek Í-sek-lia̍t chiah-ê kiáⁿ ê miâ;

10六個名tī chit塊寶石，其餘六個名tī hit塊寶石，lóng照in出世ê次序。La̍k ê miâ tī chit-tè pó-chio̍h, kî-û la̍k ê miâ tī hit-tè pó-chio̍h, lóng chiàu in chhut-sì ê chhù-sū.

11Tio̍h用刻寶石ê手工，親像刻印，照以色列chiah-ê kiáⁿ ê名，刻chit兩塊寶石，入tī金槽裡。Tio̍h ēng khek pó-chio̍h ê chhiú-kang, chhin-chhiūⁿ khek-ìn, chiàu Í-sek-lia̍t chiah-ê kiáⁿ ê miâ, khek chit nn̄g-tè pó-chio̍h, ji̍p tī kim-chô-ni̍h.

12Tio̍h將chit兩塊寶石，安tī í-hut-tek ê披肩頂，為以色列人做記念石。亞倫tio̍h tī兩個肩頭背in ê名，tī耶和華ê面前，做記念。Tio̍h chiong chit nn̄g-tè pó-chio̍h, an tī í-hut-tek ê phi-kian-téng, ūi Í-sek-lia̍t lâng chòe kì-liām-chio̍h. A-lûn tio̍h tī nn̄g ê keng-thâu pē in ê miâ, tī Iâ-hô-hoa ê bīn-chêng, chòe kì-liām.

13Tio̍h用金做兩塊槽。Tio̍h ēng kim chòe nn̄g tè chô.

14Koh用好金，親像phah索á，來做兩條鍊á，將chiah-ê phah成ê鍊á，安tī hiah-ê槽裡。Koh ēng hó-kim, chhin-chhiūⁿ phah soh-á, lâi chòe nn̄g tiâu liān-á, chiong chiah-ê phah-chiâⁿ ê liān-á, an tī hiah-ê chô-ni̍h.

15你tio̍h用奇巧ê工，做一個判斷ê pó͘褂；tio̍h kap í-hut-tek同一樣ê做法；用金kap藍色、紫色、朱紅色ê料以及過紡ê幼苧做伊。Lí tio̍h ēng kî-khiáu ê kang, chòe chi̍t-ê phòaⁿ-toàn ê pó͘-kòa; tio̍h kap í-hut-tek tâng chi̍t-iūⁿ ê chòe-hoat; ēng kim, kap lâm-sek, chí-sek, chu-âng-sek ê liāu í-ki̍p kè-pháng ê iù-tōe chòe-i.

16Pó͘褂tio̍h四方，拗(áu)雙重；長一掠，闊一掠。Pó͘-kòa tio̍h sù-hong, áu siang-têng; tn̂g chi̍t-lia̍h, khoah chi̍t-lia̍h.

17你tio̍h入chiah-ê寶石tī伊ê頂面，有寶石四chōa；一chōa是紅寶石、黃玉、赤玉，這是第一chōa。Lí tio̍h ji̍p chiah-ê pó-chio̍h tī i ê téng-bīn, ū pó-chio̍h sì-chōa; chi̍t-chōa sī âng-pó-chio̍h, n̂g-ge̍k, chhiah-ge̍k, che sī tē-it-chōa.

18第二chōa是綠寶石、藍玉、金剛石。Tē-jī-chōa sī le̍k-pó-chio̍h, lâm-ge̍k, kim-kong-chio̍h.

19第三chōa是紫色ê瑪瑙、白瑪瑙、紫色水晶。Tē-saⁿ-chōa sī chí-sek ê bé-ló, pe̍h-bé-ló, chí-sek chúi-chiⁿ.

20第四chōa是青玉、紅瑪瑙、碧玉；這lóng tio̍h入tī 金槽內。Tē-sì-chōa sī chhiⁿ-ge̍k, âng-bé-ló, phek-ge̍k; che lóng tio̍h ji̍p tī kim-chô-lāi.

21Chiah-ê寶石照以色列ê kiáⁿ ê名，共十二塊，親像刻印，每塊刻一個名，為tio̍h十二支派來做伊。Chiah-ê pó-chio̍h chiàu Í-sek-lia̍t ê kiáⁿ ê miâ, kiōng cha̍p-jī tè, chhin-chhiūⁿ khek-ìn, múi-tè khek chi̍t ê miâ, ūi-tio̍h cha̍p-jī chi-phài lâi chòe-i.

22Tio̍h用好金phah鍊á，親像索á，安tī pó͘褂。Tio̍h ēng hó-kim phah liān-á, chhin-chhiūⁿ soh-á, an tī pó͘-kòa.

23Tī pó͘褂tio̍h做兩個金環，將chit兩個環安tī pó͘褂ê雙頭。Tī pó͘-kòa tio̍h chòe nn̄g ê kim-khoân, chiong chit nn̄g ê khoân an tī pó͘-kòa ê siang-thâu.

24Tio̍h將所phah hit兩條金鍊á，連tī pó͘褂雙頭兩個環。Tio̍h chiong só͘ phah hit nn̄g tiâu kim liān-á, liân tī pó͘-kòa siang-thâu nn̄g ê khoân.

25用所phah兩條鍊á ê雙頭，連tī兩個槽，安tī í-hut-tek披肩ê頭前。Ēng só͘ phah nn̄g tiâu liān-á ê siang-thâu, liân tī nn̄g ê chô, an tī í-hut-tek phi-kian ê thâu-chêng.

26你tio̍h做兩個金環，hē tī pó͘褂雙頭ê墘(kîⁿ)，近í-hut-tek ǹg內hit-pêng。Lí tio̍h chòe nn̄g ê kim-khoân, hē tī pó͘-kòa siang-thâu ê kîⁿ, kūn í-hut-tek ǹg-lāi hit-pêng.

27Koh tio̍h做兩個金環，安tī í-hut-tek披肩下面ê頭前，óa近相連ê所在，tī í-hut-tek奇巧ê工所織ê帶ê頂面。Koh tio̍h chòe nn̄g ê kim-khoân, an tī í-hut-tek phi-kian ē-bīn ê thâu-chêng, óa-kūn saⁿ-liân ê só͘-chāi, tī í-hut-tek kî-khiáu ê kang só͘ chit-ê tòa ê téng-bīn.

28In tio̍h用藍色ê幼帶，將pó͘褂ê環kap í-hut-tek ê環縛相連，hō͘伊liâm tī í-hut-tek奇巧ê工所chit-ê帶，hō͘ pó͘褂 kap í-hut-tek無離縫。In tio̍h ēng lâm-sek ê iù-tòa, chiong pó͘-kòa ê khoân kap í-hut-tek ê khoân pa̍k saⁿ-liân, hō͘ i liâm tī í-hut-tek kî-khiáu ê kang só͘ chit-ê tòa, hō͘ pó͘-kòa kap í-hut-tek bô lī-phāng.

29亞倫入聖所ê時，tio̍h將判斷ê pó͘褂所刻以色列ê kiáⁿ ê名，帶tī伊ê胸前，tī耶和華ê面前，常常做記念。A-lûn ji̍p sèng-só͘ ê sî, tio̍h chiong phòaⁿ-toàn ê pó͘-kòa só͘ khek Í-sek-lia̍t ê kiáⁿ ê miâ, tòa tī i ê heng-chêng, tī Iâ-hô-hoa ê bīn-chêng, siông-siông chòe kì-liām.

30你tio̍h將O͘-lêng kap Thó͘-bêng，hē tī判斷ê pó͘褂內；亞倫到耶和華面前ê時，hiah-ê tio̍h tī伊ê胸前。亞倫tio̍h tī耶和華ê面前常常將以色列ê判斷掛tī胸前。Lí tio̍h chiong O͘-lêng kap Thó͘-bêng, hē tī phòaⁿ-toàn ê pó͘-kòa-lāi; A-lûn kàu Iâ-hô-hoa bīn-chêng ê sî, hiah-ê tio̍h tī i ê heng-chêng. A-lûn tio̍h tī Iâ-hô-hoa ê bīn-chêng siông-siông chiong Í-sek-lia̍t ê phòaⁿ-toàn kòa tī heng-chêng.

31你tio̍h做í-hut-tek內面ê外袍，kui領是藍色ê。Lí tio̍h chòe í-hut-tek lāi-bīn ê gōa-phàu, kui-niá sī lâm-sek-ê.

32袍頂面ê對中，tio̍h為tio̍h頭殼留一個領孔；孔ê周圍織領緣，親像戰甲ê領孔，免得破裂。Phàu téng-bīn ê tùi-tiong, tio̍h ūi-tio̍h thâu-khak lâu chi̍t ê niá-khang; khang ê chiu-ûi chit niá-iān, chhin-chhiūⁿ chiàn-kah ê niá-khang, bián-tit phòa li̍h.

33袍周圍ê ē-kha-pô͘，tio̍h用藍色、紫色、朱紅色ê料，做石榴(sia̍h-liû)；tī袍周圍，石榴ê中間，tio̍h有金hâm-lêng。Phàu chiu-ûi ê ē-kha-pô͘, tio̍h ēng lâm-sek, chí-sek, chu-âng-sek ê liāu, chòe sia̍h-liû; tī phàu chiu-ûi, sia̍h-liû ê tiong-kan, tio̍h ū kim hâm-lêng.

34一粒金hâm-lêng，一粒石榴，tī袍周圍ê ē-kha-pô͘。Chi̍t-lia̍p kim hâm-lêng, chi̍t-lia̍p sia̍h-liû, tī phàu chiu-ûi ê ē-kha-pô͘.

35亞倫服事ê時，tio̍h穿伊；伊入聖所到耶和華面前，以及出來ê時，有聲thang聽見，hō͘伊免死。A-lûn ho̍k-sāi ê sî, tio̍h chhēng-i; i ji̍p sèng-só͘ kàu Iâ-hô-hoa bīn-chêng, í-ki̍p chhut-lâi ê sî, ū siaⁿ thang thiaⁿ-kìⁿ, hō͘ i bián sí.

36Tio̍h用好金做一個牌，照刻印ê法度，刻tī伊ê頂面講：做聖歸耶和華。Tio̍h ēng hó-kim chòe chi̍t ê pâi, chiàu khek-ìn ê hoat-tō͘, khek tī i ê téng-bīn kóng, CHÒE-SÈNG KUI IÂ-HÔ-HOA.

37Tio̍h用一條藍色ê幼帶，將伊縛tī帽頂，就是tī帽ê頭前。Tio̍h ēng chi̍t-tiâu lâm-sek ê iù-tòa, chiong i pa̍k tī bō-téng, chiū-sī tī bō ê thâu-chêng.

38Chit-ê 牌tio̍h tī亞倫ê頭額，hō͘亞倫擔當聖物ê罪，就是以色列人，tī一切聖ê禮物，所分別做聖ê；chit-ê牌tio̍h常常tī伊ê頭額，hō͘ in tī耶和華面前得tio̍h接納。Chit-ê pâi tio̍h tī A-lûn ê thâu-hia̍h, hō͘ A-lûn tam-tng sèng-mi̍h ê chōe, chiū-sī Í-sek-lia̍t lâng, tī it-chhè sèng ê lé-mi̍h, só͘ hun-piat chòe-sèng-ê; chit-ê pâi tio̍h siông-siông tī i ê thâu-hia̍h, hō͘ in tī Iâ-hô-hoa bīn-chêng tit-tio̍h chiap-la̍p.

39Tio̍h用幼苧織有chōa ê內衫；tio̍h用幼苧布做帽；koh用繡花ê工，做腰帶。Tio̍h ēng iù-tōe chit ū-chōa ê lāi-saⁿ; tio̍h ēng iù-tōe-pò͘ chòe-bō; koh ēng siù-hoe ê kang, chòe io-tòa.

40你tio̍h kā亞倫chiah-ê kiáⁿ做內衫，做腰帶，做包頭殼ê巾，hō͘ in榮光koh súi。Lí tio̍h kā A-lûn chiah-ê kiáⁿ chòe lāi-saⁿ, chòe io-tòa, chòe pau thâu-khak ê kun, hō͘ in êng-kng koh súi.

41Tio̍h將chiah-ê kā你ê兄亞倫kap伊ê kiáⁿ穿，koh用油抹in，行設立ê禮，分別in做聖，hō͘ in做祭司來服事我。Tio̍h chiong chiah-ê kā lí ê hiaⁿ A-lûn kap i ê kiáⁿ chhēng, koh ēng iû boah-in, kiâⁿ siat-li̍p ê lé, hun-piat in chòe-sèng, hō͘ in chòe chè-si lâi ho̍k-sāi Góa.

42Tio̍h kā in做幼苧布ê褲，遮in ê下體；褲tio̍h tùi腰到大腿；Tio̍h kā in chòe iù-tōe-pò͘ ê khò͘, jia in ê ē-thé; khò͘ tio̍h tùi io kàu tōa-thúi;

43亞倫kap伊ê kiáⁿ入會幕，á是就近壇，beh tī聖所服事ê時，tio̍h穿伊；免得in擔當罪來死；這是beh kā亞倫kap伊ê後裔做永遠ê例。A-lûn kap i ê kiáⁿ ji̍p hōe-bō͘, á-sī chiū-kūn tôaⁿ, beh tī sèng-só͘ ho̍k-sāi ê sî, tio̍h chhēng-i; bián-tit in tam-tng chōe lâi sí; che sī beh kā A-lûn kap i ê hō͘-è chòe éng-oán ê lē.