1你tio̍h tùi以色列人ê中間，hō͘你ê兄亞倫kap伊hiah-ê kiáⁿ，來你chia，thang做祭司，服事我，就是亞倫，kap亞倫ê kiáⁿ Ná-tap、A-pí-hō͘、Í-lī-a-sat、Í-tha-má。Lí tio̍h tùi Í-sek-lia̍t lâng ê tiong-kan, hō͘ lí ê hiaⁿ A-lûn kap i hiah-ê kiáⁿ, lâi lí chia, thang chòe chè-si, ho̍k-sāi Góa, chiū-sī A-lûn, kap A-lûn ê kiáⁿ Ná-tap, A-pí-hō͘, Í-lī-a-sat, Í-tha-má.

2你tio̍h kā你ê兄亞倫做聖ê衫，hō͘伊榮光koh súi。Lí tio̍h kā lí ê hiaⁿ A-lûn chòe sèng ê saⁿ, hō͘ i êng-kng koh súi.

3Koh tio̍h吩咐一切心有智慧ê，就是我用智慧ê神所充滿ê人，kā亞倫做衫，分別伊做聖，thang做祭司服事我。Koh tio̍h hoan-hù it-chhè sim ū tì-hūi-ê, chiū-sī Góa ēng tì-hūi ê sîn só͘ chhiong-móa ê lâng, kā A-lûn chòe saⁿ, hun-piat i chòe-sèng, thang chòe chè-si ho̍k-sāi Góa.

4In所tio̍h做ê衫，就是pó͘褂、í-hut-tek、外袍、有花ê內衫、帽、腰帶，in tio̍h kā你ê兄亞倫kap伊ê kiáⁿ做聖ê衫，hō͘伊做祭司來服事我。In só͘ tio̍h chòe ê saⁿ, chiū-sī pó͘-kòa, í-hut-tek, gōa-phàu, ū-hoe ê lāi-saⁿ, bō, io-tòa. In tio̍h kā lí ê hiaⁿ A-lûn kap i ê kiáⁿ chòe sèng ê saⁿ, hō͘ i chòe chè-si lâi ho̍k-sāi Góa.

5In tio̍h用金，kap藍色、紫色、朱紅色ê料，kap幼苧做伊。In tio̍h ēng kim, kap lâm-sek, chí-sek, chu-âng-sek ê liāu, kap iù-tōe chòe-i.

6In tio̍h用金，kap藍色、紫色、朱紅色ê料，kap過紡ê幼苧，用奇巧ê工做í-hut-tek。In tio̍h ēng kim, kap lâm-sek, chí-sek, chu-âng-sek ê liāu, kap kè-pháng ê iù-tōe, ēng kî-khiáu ê kang chòe í-hut-tek.

7Tio̍h有披肩兩塊，連tī雙pêng，hō͘伊相連。Tio̍h ū phi-kian nn̄g tè, liân tī siang-pêng, hō͘ i saⁿ-liân.

8Í-hut-tek頂面奇巧ê工所chit-ê tòa，tio̍h kap伊同一樣ê做法；hō͘伊相連做一個；用金kap藍色、紫色、朱紅色ê料，以及過紡ê幼苧做ê。Í-hut-tek téng-bīn kî-khiáu ê kang só͘ chit-ê tòa, tio̍h kap i tâng chi̍t-iūⁿ ê chòe-hoat; hō͘ i saⁿ-liân chòe chi̍t-ê; ēng kim, kap lâm-sek, chí-sek, chu-âng-sek ê liāu, í-ki̍p kè-pháng ê iù-tōe chòe-ê.

9Tio̍h the̍h兩塊紅瑪瑙，tī頂面刻以色列chiah-ê kiáⁿ ê名；Tio̍h the̍h nn̄g tè âng-bé-ló, tī téng-bīn khek Í-sek-lia̍t chiah-ê kiáⁿ ê miâ;

10六個名tī chit塊寶石，其餘六個名tī hit塊寶石，lóng照in出世ê次序。La̍k ê miâ tī chit-tè pó-chio̍h, kî-û la̍k ê miâ tī hit-tè pó-chio̍h, lóng chiàu in chhut-sì ê chhù-sū.

11Tio̍h用刻寶石ê手工，親像刻印，照以色列chiah-ê kiáⁿ ê名，刻chit兩塊寶石，入tī金槽裡。Tio̍h ēng khek pó-chio̍h ê chhiú-kang, chhin-chhiūⁿ khek-ìn, chiàu Í-sek-lia̍t chiah-ê kiáⁿ ê miâ, khek chit nn̄g-tè pó-chio̍h, ji̍p tī kim-chô-ni̍h.

12Tio̍h將chit兩塊寶石，安tī í-hut-tek ê披肩頂，為以色列人做記念石。亞倫tio̍h tī兩個肩頭背in ê名，tī耶和華ê面前，做記念。Tio̍h chiong chit nn̄g-tè pó-chio̍h, an tī í-hut-tek ê phi-kian-téng, ūi Í-sek-lia̍t lâng chòe kì-liām-chio̍h. A-lûn tio̍h tī nn̄g ê keng-thâu pē in ê miâ, tī Iâ-hô-hoa ê bīn-chêng, chòe kì-liām.

13Tio̍h用金做兩塊槽。Tio̍h ēng kim chòe nn̄g tè chô.

14Koh用好金，親像phah索á，來做兩條鍊á，將chiah-ê phah成ê鍊á，安tī hiah-ê槽裡。Koh ēng hó-kim, chhin-chhiūⁿ phah soh-á, lâi chòe nn̄g tiâu liān-á, chiong chiah-ê phah-chiâⁿ ê liān-á, an tī hiah-ê chô-ni̍h.

15你tio̍h用奇巧ê工，做一個判斷ê pó͘褂；tio̍h kap í-hut-tek同一樣ê做法；用金kap藍色、紫色、朱紅色ê料以及過紡ê幼苧做伊。Lí tio̍h ēng kî-khiáu ê kang, chòe chi̍t-ê phòaⁿ-toàn ê pó͘-kòa; tio̍h kap í-hut-tek tâng chi̍t-iūⁿ ê chòe-hoat; ēng kim, kap lâm-sek, chí-sek, chu-âng-sek ê liāu í-ki̍p kè-pháng ê iù-tōe chòe-i.

16Pó͘褂tio̍h四方，拗(áu)雙重；長一掠，闊一掠。Pó͘-kòa tio̍h sù-hong, áu siang-têng; tn̂g chi̍t-lia̍h, khoah chi̍t-lia̍h.

17你tio̍h入chiah-ê寶石tī伊ê頂面，有寶石四chōa；一chōa是紅寶石、黃玉、赤玉，這是第一chōa。Lí tio̍h ji̍p chiah-ê pó-chio̍h tī i ê téng-bīn, ū pó-chio̍h sì-chōa; chi̍t-chōa sī âng-pó-chio̍h, n̂g-ge̍k, chhiah-ge̍k, che sī tē-it-chōa.

18第二chōa是綠寶石、藍玉、金剛石。Tē-jī-chōa sī le̍k-pó-chio̍h, lâm-ge̍k, kim-kong-chio̍h.

19第三chōa是紫色ê瑪瑙、白瑪瑙、紫色水晶。Tē-saⁿ-chōa sī chí-sek ê bé-ló, pe̍h-bé-ló, chí-sek chúi-chiⁿ.

20第四chōa是青玉、紅瑪瑙、碧玉；這lóng tio̍h入tī 金槽內。Tē-sì-chōa sī chhiⁿ-ge̍k, âng-bé-ló, phek-ge̍k; che lóng tio̍h ji̍p tī kim-chô-lāi.

21Chiah-ê寶石照以色列ê kiáⁿ ê名，共十二塊，親像刻印，每塊刻一個名，為tio̍h十二支派來做伊。Chiah-ê pó-chio̍h chiàu Í-sek-lia̍t ê kiáⁿ ê miâ, kiōng cha̍p-jī tè, chhin-chhiūⁿ khek-ìn, múi-tè khek chi̍t ê miâ, ūi-tio̍h cha̍p-jī chi-phài lâi chòe-i.

22Tio̍h用好金phah鍊á，親像索á，安tī pó͘褂。Tio̍h ēng hó-kim phah liān-á, chhin-chhiūⁿ soh-á, an tī pó͘-kòa.

23Tī pó͘褂tio̍h做兩個金環，將chit兩個環安tī pó͘褂ê雙頭。Tī pó͘-kòa tio̍h chòe nn̄g ê kim-khoân, chiong chit nn̄g ê khoân an tī pó͘-kòa ê siang-thâu.

24Tio̍h將所phah hit兩條金鍊á，連tī pó͘褂雙頭兩個環。Tio̍h chiong só͘ phah hit nn̄g tiâu kim liān-á, liân tī pó͘-kòa siang-thâu nn̄g ê khoân.

25用所phah兩條鍊á ê雙頭，連tī兩個槽，安tī í-hut-tek披肩ê頭前。Ēng só͘ phah nn̄g tiâu liān-á ê siang-thâu, liân tī nn̄g ê chô, an tī í-hut-tek phi-kian ê thâu-chêng.

26你tio̍h做兩個金環，hē tī pó͘褂雙頭ê墘(kîⁿ)，近í-hut-tek ǹg內hit-pêng。Lí tio̍h chòe nn̄g ê kim-khoân, hē tī pó͘-kòa siang-thâu ê kîⁿ, kūn í-hut-tek ǹg-lāi hit-pêng.

27Koh tio̍h做兩個金環，安tī í-hut-tek披肩下面ê頭前，óa近相連ê所在，tī í-hut-tek奇巧ê工所織ê帶ê頂面。Koh tio̍h chòe nn̄g ê kim-khoân, an tī í-hut-tek phi-kian ē-bīn ê thâu-chêng, óa-kūn saⁿ-liân ê só͘-chāi, tī í-hut-tek kî-khiáu ê kang só͘ chit-ê tòa ê téng-bīn.

28In tio̍h用藍色ê幼帶，將pó͘褂ê環kap í-hut-tek ê環縛相連，hō͘伊liâm tī í-hut-tek奇巧ê工所chit-ê帶，hō͘ pó͘褂 kap í-hut-tek無離縫。In tio̍h ēng lâm-sek ê iù-tòa, chiong pó͘-kòa ê khoân kap í-hut-tek ê khoân pa̍k saⁿ-liân, hō͘ i liâm tī í-hut-tek kî-khiáu ê kang só͘ chit-ê tòa, hō͘ pó͘-kòa kap í-hut-tek bô lī-phāng.

29亞倫入聖所ê時，tio̍h將判斷ê pó͘褂所刻以色列ê kiáⁿ ê名，帶tī伊ê胸前，tī耶和華ê面前，常常做記念。A-lûn ji̍p sèng-só͘ ê sî, tio̍h chiong phòaⁿ-toàn ê pó͘-kòa só͘ khek Í-sek-lia̍t ê kiáⁿ ê miâ, tòa tī i ê heng-chêng, tī Iâ-hô-hoa ê bīn-chêng, siông-siông chòe kì-liām.

30你tio̍h將O͘-lêng kap Thó͘-bêng，hē tī判斷ê pó͘褂內；亞倫到耶和華面前ê時，hiah-ê tio̍h tī伊ê胸前。亞倫tio̍h tī耶和華ê面前常常將以色列ê判斷掛tī胸前。Lí tio̍h chiong O͘-lêng kap Thó͘-bêng, hē tī phòaⁿ-toàn ê pó͘-kòa-lāi; A-lûn kàu Iâ-hô-hoa bīn-chêng ê sî, hiah-ê tio̍h tī i ê heng-chêng. A-lûn tio̍h tī Iâ-hô-hoa ê bīn-chêng siông-siông chiong Í-sek-lia̍t ê phòaⁿ-toàn kòa tī heng-chêng.

31你tio̍h做í-hut-tek內面ê外袍，kui領是藍色ê。Lí tio̍h chòe í-hut-tek lāi-bīn ê gōa-phàu, kui-niá sī lâm-sek-ê.

32袍頂面ê對中，tio̍h為tio̍h頭殼留一個領孔；孔ê周圍織領緣，親像戰甲ê領孔，免得破裂。Phàu téng-bīn ê tùi-tiong, tio̍h ūi-tio̍h thâu-khak lâu chi̍t ê niá-khang; khang ê chiu-ûi chit niá-iān, chhin-chhiūⁿ chiàn-kah ê niá-khang, bián-tit phòa li̍h.

33袍周圍ê ē-kha-pô͘，tio̍h用藍色、紫色、朱紅色ê料，做石榴(sia̍h-liû)；tī袍周圍，石榴ê中間，tio̍h有金hâm-lêng。Phàu chiu-ûi ê ē-kha-pô͘, tio̍h ēng lâm-sek, chí-sek, chu-âng-sek ê liāu, chòe sia̍h-liû; tī phàu chiu-ûi, sia̍h-liû ê tiong-kan, tio̍h ū kim hâm-lêng.

34一粒金hâm-lêng，一粒石榴，tī袍周圍ê ē-kha-pô͘。Chi̍t-lia̍p kim hâm-lêng, chi̍t-lia̍p sia̍h-liû, tī phàu chiu-ûi ê ē-kha-pô͘.

35亞倫服事ê時，tio̍h穿伊；伊入聖所到耶和華面前，以及出來ê時，有聲thang聽見，hō͘伊免死。A-lûn ho̍k-sāi ê sî, tio̍h chhēng-i; i ji̍p sèng-só͘ kàu Iâ-hô-hoa bīn-chêng, í-ki̍p chhut-lâi ê sî, ū siaⁿ thang thiaⁿ-kìⁿ, hō͘ i bián sí.

36Tio̍h用好金做一個牌，照刻印ê法度，刻tī伊ê頂面講：做聖歸耶和華。Tio̍h ēng hó-kim chòe chi̍t ê pâi, chiàu khek-ìn ê hoat-tō͘, khek tī i ê téng-bīn kóng, CHÒE-SÈNG KUI IÂ-HÔ-HOA.

37Tio̍h用一條藍色ê幼帶，將伊縛tī帽頂，就是tī帽ê頭前。Tio̍h ēng chi̍t-tiâu lâm-sek ê iù-tòa, chiong i pa̍k tī bō-téng, chiū-sī tī bō ê thâu-chêng.

38Chit-ê 牌tio̍h tī亞倫ê頭額，hō͘亞倫擔當聖物ê罪，就是以色列人，tī一切聖ê禮物，所分別做聖ê；chit-ê牌tio̍h常常tī伊ê頭額，hō͘ in tī耶和華面前得tio̍h接納。Chit-ê pâi tio̍h tī A-lûn ê thâu-hia̍h, hō͘ A-lûn tam-tng sèng-mi̍h ê chōe, chiū-sī Í-sek-lia̍t lâng, tī it-chhè sèng ê lé-mi̍h, só͘ hun-piat chòe-sèng-ê; chit-ê pâi tio̍h siông-siông tī i ê thâu-hia̍h, hō͘ in tī Iâ-hô-hoa bīn-chêng tit-tio̍h chiap-la̍p.

39Tio̍h用幼苧織有chōa ê內衫；tio̍h用幼苧布做帽；koh用繡花ê工，做腰帶。Tio̍h ēng iù-tōe chit ū-chōa ê lāi-saⁿ; tio̍h ēng iù-tōe-pò͘ chòe-bō; koh ēng siù-hoe ê kang, chòe io-tòa.

40你tio̍h kā亞倫chiah-ê kiáⁿ做內衫，做腰帶，做包頭殼ê巾，hō͘ in榮光koh súi。Lí tio̍h kā A-lûn chiah-ê kiáⁿ chòe lāi-saⁿ, chòe io-tòa, chòe pau thâu-khak ê kun, hō͘ in êng-kng koh súi.

41Tio̍h將chiah-ê kā你ê兄亞倫kap伊ê kiáⁿ穿，koh用油抹in，行設立ê禮，分別in做聖，hō͘ in做祭司來服事我。Tio̍h chiong chiah-ê kā lí ê hiaⁿ A-lûn kap i ê kiáⁿ chhēng, koh ēng iû boah-in, kiâⁿ siat-li̍p ê lé, hun-piat in chòe-sèng, hō͘ in chòe chè-si lâi ho̍k-sāi Góa.

42Tio̍h kā in做幼苧布ê褲，遮in ê下體；褲tio̍h tùi腰到大腿；Tio̍h kā in chòe iù-tōe-pò͘ ê khò͘, jia in ê ē-thé; khò͘ tio̍h tùi io kàu tōa-thúi;

43亞倫kap伊ê kiáⁿ入會幕，á是就近壇，beh tī聖所服事ê時，tio̍h穿伊；免得in擔當罪來死；這是beh kā亞倫kap伊ê後裔做永遠ê例。A-lûn kap i ê kiáⁿ ji̍p hōe-bō͘, á-sī chiū-kūn tôaⁿ, beh tī sèng-só͘ ho̍k-sāi ê sî, tio̍h chhēng-i; bián-tit in tam-tng chōe lâi sí; che sī beh kā A-lûn kap i ê hō͘-è chòe éng-oán ê lē.

1你分別in做聖，做祭司服事我，tio̍h án-ni行；取一隻公ê牛á，兩隻無瑕疵公ê綿羊，Lí hun-piat in chòe-sèng, chòe chè-si ho̍k-sāi Góa, tio̍h án-ni kiâⁿ; chhú chi̍t-chiah kang ê gû-á, nn̄g-chiah bô hâ-chhû kang ê mî-iûⁿ,

2koh無酵餅，kap攪(kiáu)油ê無酵餅，kap抹油無酵ê薄餅，lóng tio̍h用好ê麵粉做ê。koh bô-kàⁿ-piáⁿ, kap kiáu-iû ê bô-kàⁿ-piáⁿ, kap boah-iû bô-kàⁿ ê po̍h-piáⁿ, lóng tio̍h ēng hó ê mī-hún chòe-ê.

3chiah-ê餅tio̍h hē tī一腳筐，貯tī筐裡帶來，koh牽hit隻公ê牛kap兩隻公ê綿羊來。Chiah-ê piáⁿ tio̍h hē tī chi̍t kha kheng, tóe tī kheng-ni̍h tòa-lâi, koh khan hit chiah kang ê gû kap nn̄g chiah kang ê mî-iûⁿ lâi.

4Tio̍h hō͘亞倫kap伊hiah-ê kiáⁿ 到會幕ê門口用水洗in。Tio̍h hō͘ A-lûn kap i hiah-ê kiáⁿ kàu hōe-bō͘ ê mn̂g-kháu ēng chúi sóe in.

5Tio̍h the̍h hiah-ê衣服來，將內衫kap í-hut-tek內面ê外袍，kap í-hut-tek，連pó͘褂，kā亞倫穿；也用奇巧ê工所織í-hut-tek ê帶kā伊hâ；Tio̍h the̍h hiah-ê i-ho̍k lâi, chiong lāi-saⁿ kap í-hut-tek lāi-bīn ê gōa-phàu, kap í-hut-tek, liân pó͘-kòa, kā A-lûn chhēng; iā ēng kî-khá ê kang só͘ chit í-hut-tek ê tòa kā i hâ;

6用帽戴tī伊ê頭殼，將聖ê冕旒tha̍h tī帽ê頂面。ēng bō tì tī i ê thâu-khak, chiong sèng ê bián-liû tha̍h tī bō ê téng-bīn.

7Tio̍h用抹ê油tò tī伊ê頭殼來抹伊。Tio̍h ēng boah ê iû tò tī i ê thâu-khak lâi boah i.

8Tio̍h hō͘伊ê kiáⁿ來，kā in穿內衫。Tio̍h hō͘ i ê kiáⁿ lâi, kā in chhēng lāi-saⁿ.

9Koh用帶hâ亞倫kap伊hiah-ê kiáⁿ，kā in包頭殼ê巾；in照永遠ê例得tio̍h祭司ê職；koh tio̍h kā亞倫kap伊hiah-ê kiáⁿ行設立ê禮。Koh ēng tòa hâ A-lûn kap i hiah-ê kiáⁿ, kā in pau thâu-khak ê kun; in chiàu éng-oán ê lē tit-tio̍h chè-si ê chit; koh tio̍h kā A-lûn kap i hiah-ê kiáⁿ kiâⁿ siat-li̍p ê lé.

10你tio̍h牽hit隻公ê牛到會幕前；亞倫kap伊hiah-ê kiáⁿ tio̍h按(hōaⁿ)手tī牛ê頭殼頂。Lí tio̍h khan hit chiah kang ê gû kàu hōe-bō͘-chêng; A-lûn kap i hiah-ê kiáⁿ tio̍h hōaⁿ-chhiú tī gû ê thâu-khak-téng.

11你tio̍h tī耶和華ê面前，tī會幕ê門口，thâi hit隻牛；Lí tio̍h tī Iâ-hô-hoa ê bīn-chêng, tī hōe-bō͘ ê mn̂g-kháu, thâi hit chiah gû;

12取伊ê血淡薄，用指頭á抹tī壇ê四角；將血lóng piàⁿ tī壇腳裡。chhú i ê huih tām-po̍h, ēng chńg-thâu-á boah tī tôaⁿ ê sì-kak; chiong huih lóng piàⁿ tī tôaⁿ-kha-ni̍h.

13Tio̍h將一切五臟ê油，kap肝頂ê網紗，kap兩粒腰子，以及腰子ê油，lóng 燒 tī壇頂。Tio̍h chiong it-chhè ngó͘-chōng ê iû, kap koaⁿ-téng ê bāng-se, kap nn̄g lia̍p io-chí, í-ki̍p io-chí ê iû, lóng sio tī tôaⁿ-téng.

14獨獨牛ê肉，kap伊ê皮，伊ê糞，lóng tio̍h用火燒tī營外；是做贖罪祭。To̍k-to̍k gû ê bah, kap i ê phê, i ê pùn, lóng tio̍h ēng hé sio tī iâⁿ-gōa; sī chòe sio̍k-chōe-chè.

15你tio̍h牽一隻公ê綿羊來；亞倫kap伊hiah-ê kiáⁿ tio̍h按手tī hit隻羊ê頭殼頂。Lí tio̍h khan chi̍t chiah kang ê mî-iûⁿ lâi; A-lûn kap i hiah-ê kiáⁿ tio̍h hōaⁿ-chhiú tī hit chiah iûⁿ ê thâu-khak-téng.

16Tio̍h thâi hit隻羊，將伊ê血hiù tī壇ê四圍。Tio̍h thâi hit chiah iûⁿ, chiong i ê huih hiù tī tôaⁿ ê sì-ûi.

17Tio̍h將羊切一塊一塊，洗五臟kap腿，lok tī切kui塊ê肉kap頭ê頂面。Tio̍h chiong iûⁿ chhiat chi̍t-tè chi̍t-tè, sóe ngó͘-chōng kap thúi, lok tī chhiat kui tè ê bah kap thâu ê téng-bīn.

18Tio̍h將kui隻羊燒tī壇頂，是獻hō͘耶和華ê燒祭；是芳芳ê，用火燒hō͘耶和華ê祭。Tio̍h chiong kui chiah iûⁿ sio tī tôaⁿ-téng, sī hiàn hō͘ Iâ-hô-hoa ê sio-chè; sī phang-phang-ê, ēng hé sio hō͘ Iâ-hô-hoa ê chè.

19你tio̍h將第二隻公ê綿羊牽來；亞倫kap伊hiah-ê kiáⁿ tio̍h按手tī 羊 ê頭殼頂。Lí tio̍h chiong tē-jī chiah kang ê mî-iûⁿ khan-lâi; A-lûn kap i hiah-ê kiáⁿ tio̍h hōaⁿ-chhiú tī iûⁿ ê thâu-khak-téng.

20你tio̍h thâi hit隻羊，取伊ê血淡薄，抹tī亞倫chiàⁿ-pêng ê耳á錘，kap伊chiah-ê kiáⁿ，chiàⁿ-pêng ê耳á錘，koh抹tī in chiàⁿ手ê大pō͘母，kap chiàⁿ腳ê大pō͘母；koh將血hiù tī壇ê四圍。Lí tio̍h thâi hit chiah iûⁿ, chhú i ê huih tām-po̍h, boah tī A-lûn chiàⁿ-pêng ê hī-á-sûi, kap i chiah-ê kiáⁿ, chiàⁿ-pêng ê hī-á-sûi, koh boah tī in chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú; koh chiong huih hiù tī tôaⁿ ê sì-ûi.

21你tio̍h 取壇頂ê血淡薄kap抹ê油，hiù tī亞倫kap伊ê衫，koh hiù tī伊ê kiáⁿ kap伊ê kiáⁿ ê衫；伊kap伊ê衫，伊ê kiáⁿ kap伊ê kiáⁿ ê衫，lóng分別做聖。Lí tio̍h chhú tôaⁿ-téng ê huih tām-po̍h kap boah ê iû, hiù tī A-lûn kap i ê saⁿ, koh hiù tī i ê kiáⁿ kap i ê kiáⁿ ê saⁿ; i kap i ê saⁿ, i ê kiáⁿ kap i ê kiáⁿ ê saⁿ, lóng hun-piat chòe sèng.

22Koh tio̍h 取hit隻羊ê油，kap伊ê肥ê尾，kap蓋五臟ê油，kap肝頂 ê網紗，兩粒腰子，以及腰子ê油，kap chiàⁿ-pêng ê腿(這是成設立ê禮 ê羊) ；Koh tio̍h chhú hit chiah iûⁿ ê iû, kap i ê pûi ê bé, kap khàm ngó͘-chōng ê iû, kap koaⁿ-téng ê bāng-se, nn̄g lia̍p io-chí, í-ki̍p io-chí ê iû, kap chiàⁿ-pêng ê thúi (che sī chiâⁿ siat-li̍p ê lé ê iûⁿ);

23koh tùi hit-khia hē tī耶和華ê面前貯無酵餅ê筐á內，the̍h一塊餅，一塊攪油ê餅，一塊薄餅；koh tùi hit-khia hē tī Iâ-hô-hoa ê bīn-chêng tóe bô-kàⁿ-piáⁿ ê kheng-á-lāi, the̍h chi̍t tè piáⁿ, chi̍t tè kiáu-iû ê piáⁿ, chi̍t-tè po̍h-piáⁿ;

24lóng hē tī亞倫ê手kap伊ê kiáⁿ ê手，搖tī耶和華ê面前，做搖祭。lóng hē tī A-lûn ê chhiú kap i ê kiáⁿ ê chhiú, iô tī Iâ-hô-hoa ê bīn-chêng, chòe iô-chè.

25你tio̍h tùi in ê手接來，燒tī壇頂燒祭ê頂面，做芳芳tī耶和華ê面前；是用火燒hō͘耶和華ê祭。Lí tio̍h tùi in ê chhiú chih-lâi, sio tī tôaⁿ-téng sio-chè ê téng-bīn, chòe phang-phang tī Iâ-hô-hoa ê bīn-chêng; sī ēng hé sio hō͘ Iâ-hô-hoa ê chè.

26亞倫受設立ê禮所獻公ê羊，你tio̍h取伊ê胸，搖tī耶和華ê面前，做搖祭；這是你ê份額。A-lûn siū siat-li̍p ê lé só͘ hiàn kang ê iûⁿ, lí tio̍h chhú i ê heng, iô tī Iâ-hô-hoa ê bīn-chêng, chòe iô-chè; che sī lí ê hūn-gia̍h.

27行設立ê禮所獻公ê羊，hit-ê搖祭ê胸kap舉祭ê腿，就是所搖ê，所舉起ê，你tio̍h分別伊做聖，就是屬tī亞倫kap伊hiah-ê kiáⁿ-ê。Kiâⁿ siat-li̍p ê lé só͘ hiàn kang ê iûⁿ, hit-ê iô-chè ê heng kap kú-chè ê thúi, chiū-sī só͘ iô-ê, só͘ kú-khí-ê, lí tio̍h hun-piat i chòe-sèng, chiū-sī sio̍k tī A-lûn kap i hiah-ê kiáⁿ-ê.

28這tio̍h做亞倫kap伊ê kiaⁿ孫tùi以色列人所得tio̍h永遠ê份額；因為是舉祭；tio̍h tùi 以色列人平安祭 ê中間做舉祭；就是in獻hō͘耶和華ê舉祭。Che tio̍h chòe A-lûn kap i ê kiáⁿ-sun tùi Í-sek-lia̍t lâng só͘ tit-tio̍h éng-oán ê hūn-gia̍h; in-ūi sī kú-chè; tio̍h tùi Í-sek-lia̍t lâng pêng-an-chè ê tiong-kan chòe kú-chè; chiū-sī in hiàn hō͘ Iâ-hô-hoa ê kú-chè.

29亞倫ê聖衫tio̍h留hō͘伊後代ê kiaⁿ孫，thang穿伊來受抹油，也穿伊來受設立。A-lûn ê sèng-saⁿ tio̍h lâu hō͘ i āu-tāi ê kiáⁿ-sun, thang chhēng i lâi siū boah-iû, iā chhēng i lâi siū siat-li̍p.

30伊ê kiáⁿ，hit-ê續接伊當祭司ê，ta̍k-pái入會幕，tī聖所服事ê時，tio̍h穿七日久。I ê kiáⁿ, hit-ê sòa-chiap i tng chè-si ê, ta̍k-pái ji̍p hōe-bō͘, tī sèng-só͘ ho̍k-sāi ê sî, tio̍h chhēng chhit-ji̍t kú.

31行設立ê禮所獻公ê羊ê肉，你tio̍h tī聖ê所在煮伊。Kiâⁿ siat-li̍p ê lé só͘ hiàn kang ê iûⁿ ê bah, lí tio̍h tī sèng ê só͘-chāi chú i.

32亞倫kap伊ê kiáⁿ tio̍h tī會幕ê門口食chit隻羊ê肉kap筐á內ê餅。A-lûn kap i ê kiáⁿ tio̍h tī hōe-bō͘ ê mn̂g-kháu chia̍h chit chiah iûⁿ ê bah kap kheng-á-lāi ê piáⁿ.

33In tio̍h食所用來贖罪ê物，hō͘ in擔當職，也分別in做聖；獨獨外人m̄-thang食，因為這是聖物。In tio̍h chia̍h só͘ ēng lâi sio̍k-chōe ê mi̍h, hō͘ in tam-tng chit, iā hun-piat in chòe-sèng; to̍k-to̍k gōa-lâng m̄-thang chia̍h, in-ūi che sī sèng-mi̍h.

34Hit-ê行設立ê禮所獻ê肉á是餅，若有留到隔早起ê，你tio̍h將所留ê用火燒伊；m̄-thang食伊，因為是聖ê物。Hit-ê kiâⁿ siat-li̍p ê lé só͘ hiàn ê bah á-sī piáⁿ, nā ū lâu kàu keh chá-khí-ê, lí tio̍h chiong só͘ lâu-ê ēng hé sio i; m̄-thang chia̍h i, in-ūi sī sèng ê mi̍h.

35你tio̍h照我一切所吩咐ê行tī亞倫kap伊ê kiáⁿ；行設立ê禮tio̍h七日久。Lí tio̍h chiàu Góa it-chhè só͘ hoan-hù-ê kiâⁿ tī A-lûn kap i ê kiáⁿ; kiâⁿ siat-li̍p ê lé tio̍h chhit-ji̍t kú.

36Ta̍k日tio̍h獻公ê牛一隻做贖罪祭；你為壇贖罪ê時就hō͘伊清氣；也tio̍h kā伊抹油，分別伊做聖。Ta̍k-ji̍t tio̍h hiàn kang ê gû chi̍t-chiah chòe sio̍k-chōe-chè; lí ūi tôaⁿ sio̍k-chōe ê sî chiū hō͘ i chheng-khì; iā tio̍h kā i boah-iû, hun-piat i chòe-sèng.

37你tio̍h為壇贖罪七日久，hō͘伊成聖；壇就成做至聖；見若摸tio̍h伊ê lóng分別做聖。Lí tio̍h ūi tôaⁿ sio̍k-chōe chhit-ji̍t kú, hō͘ i chiâⁿ-sèng; tôaⁿ chiū chiâⁿ chòe chì-sèng; kìⁿ-nā bong-tio̍h i-ê lóng hun-piat chòe-sèng.

38你所tio̍h獻tī壇裡ê是chiah-ê；就是未滿年ê羊á兩隻，ta̍k日tio̍h獻；Lí só͘ tio̍h hiàn tī tôaⁿ-ni̍h-ê sī chiah-ê; chiū-sī bē móa-nî ê iûⁿ-á nn̄g-chiah, ta̍k-ji̍t tio̍h hiàn;

39早起時tio̍h獻一隻；黃昏ê時tio̍h獻hit隻。chá-khí-sî tio̍h hiàn chi̍t-chiah; hông-hun ê sî tio̍h hiàn hit-chiah.

40你tio̍h用幼ê麵粉一i-hoat十份ê一，用khoeh好ê油一him四份ê一調和ê，kap一隻羊á相同獻；koh用酒一him四份ê一做灌奠。Lí tio̍h ēng iù ê mī-hún chi̍t i-hoat cha̍p-hūn ê chi̍t, ēng khoeh-hó ê iû chi̍t-him sì-hūn ê chi̍t tiau-hô-ê, kap chi̍t chiah iûⁿ-á saⁿ-tâng hiàn; koh ēng chiú chi̍t-him sì-hūn ê chi̍t chòe koàn-tiān.

41Iáu hit隻ê羊á tio̍h tī黃昏ê時來獻，tio̍h照早起時ê素祭kap灌奠ê禮料理伊，做芳芳，用火燒來獻hō͘耶和華ê祭。Iáu hit chiah-ê iûⁿ-á tio̍h tī hông-hun ê sî lâi hiàn, tio̍h chiàu chá-khí-sî ê sò͘-chè kap koàn-tiān ê lé liāu-lí i, chòe phang-phang, ēng hé sio lâi hiàn hō͘ Iâ-hô-hoa ê chè.

42這beh tī耶和華ê面前，tī會幕ê門口，做lín ta̍k世代常常獻ê燒祭；我beh tī-hia kap lín相會，kap你講話。Che beh tī Iâ-hô-hoa ê bīn-chêng, tī hōe-bō͘ ê mn̂g-kháu, chòe lín ta̍k sè-tāi siông-siông hiàn ê sio-chè; Góa beh tī-hia kap lín siong-hōe, kap lí kóng-ōe.

43我beh tī-hia kap以色列人相會，會幕就beh因為我ê榮光成做聖。Góa beh tī-hia kap Í-sek-lia̍t lâng siong-hōe, hōe-bō͘ chiū beh in-ūi Góa ê êng-kng chiâⁿ-chòe sèng.

44我beh hō͘會幕kap壇做聖；也beh hō͘亞倫kap伊hiah-ê kiáⁿ做聖，做祭司來服事我。Góa beh hō͘ hōe-bō͘ kap tôaⁿ chòe-sèng; iā beh hō͘ A-lûn kap i hiah-ê kiáⁿ chòe-sèng, chòe chè-si lâi ho̍k-sāi Góa.

45我beh tiàm tī以色列人ê中間，做in ê上帝。Góa beh tiàm tī Í-sek-lia̍t lâng ê tiong-kan, chòe in ê Siōng-tè.

46In beh知我是耶和華in ê上帝，是chhōa in出埃及地；thang hō͘我tiàm tī in中間；我是耶和華in ê上帝。In beh chai Góa sī Iâ-hô-hoa in ê Siōng-tè, sī chhōa in chhut Ai-ki̍p tōe; thang hō͘ Góa tiàm tī in tiong-kan; Góa sī Iâ-hô-hoa in ê Siōng-tè.

1你tio̍h做一座壇，thang燒香；用chō-kiap柴做伊；Lí tio̍h chòe chi̍t chō tôaⁿ, thang sio hiuⁿ; ēng chō-kiap-chhâ chòe i;

2長一肘，闊一肘，款式四方ê；高兩肘；伊hiah-ê角tio̍h kap壇連做一塊。tn̂g chi̍t tiú, khoah chi̍t tiú, khoán-sit sù-hong-ê; koâiⁿ nn̄g tiú; i hiah-ê kak tio̍h kap tôaⁿ liân chòe chi̍t-tè.

3壇kap伊ê頂面，kap伊ê四圍，kap伊hiah-ê角，lóng用好金包伊；也tio̍h tī伊ê四圍齒金線。Tôaⁿ kap i ê téng-bīn, kap i ê sì-ûi, kap i hiah-ê kak, lóng ēng hó-kim pau-i; iā tio̍h tī i ê sì-ûi khí kim-sòaⁿ.

4你tio̍h做兩個金環安tī齒線ê下面，tio̍h做tī壇ê雙pêng，兩支橫桿ê頂面，chiah-ê環tio̍h做穿kǹg ê路用，thang扛壇。Lí tio̍h chòe nn̄g ê kim-khoân an tī khí-sòaⁿ ê ē-bīn, tio̍h chòe tī tôaⁿ ê siang-pêng, nn̄g ki hoâiⁿ-koaiⁿ ê téng-bīn, chiah-ê khoân tio̍h chòe chhng-kǹg ê lō͘-ēng, thang kng tôaⁿ.

5Tio̍h用chō-kiap柴做kǹg，用金包in。Tio̍h ēng chō-kiap-chhâ chòe kǹg, ēng kim pau in.

6你tio̍h用壇hē tī óa近法櫃ê帳籬前，tī法櫃頂施恩所ê頭前，就是我beh kap你相會ê所在。Lí tio̍h ēng tôaⁿ hē tī óa-kūn hoat-kūi ê tiùⁿ-lî-chêng, tī hoat-kūi téng si-un-só͘ ê thâu-chêng, chiū-sī Góa beh kap lí siong-hōe ê só͘-chāi.

7亞倫tī壇頂tio̍h燒芳料所做ê香；ta̍k早起伊整頓燈ê時tio̍h燒伊。A-lûn tī tôaⁿ-téng tio̍h sio phang-liāu só͘ chòe ê hiuⁿ; ta̍k chá-khí i chéng-tùn teng ê sî tio̍h sio i.

8到黃昏亞倫點燈ê時，也tio̍h燒伊；是做lín ta̍k世代常常燒ê香tī耶和華ê面前。Kàu hông-hun A-lûn tiám-teng ê sî, iā tio̍h sio i; sī chòe lín ta̍k sè-tāi siông-siông sio ê hiuⁿ tī Iâ-hô-hoa ê bīn-chêng.

9Tī chit-ê壇頂m̄-thang獻別號ê香；也m̄-thang獻燒祭kap素祭；也m̄-thang灌奠tī伊ê頂面。Tī chit-ê tôaⁿ-téng m̄-thang hiàn pa̍t-hō ê hiuⁿ; iā m̄-thang hiàn sio-chè kap sò͘-chè; iā m̄-thang koàn-tiān tī i ê téng-bīn.

10亞倫tio̍h一年一pái tī壇頂ê角贖罪；伊一年一pái tio̍h用贖罪祭ê血tī壇頂贖罪；ta̍k世代tio̍h án-ni；chit-ê壇tī耶和華ê面前做至聖。A-lûn tio̍h chi̍t-nî chi̍t-pái tī tôaⁿ-téng ê kak sio̍k-chōe; i chi̍t-nî chi̍t-pái tio̍h ēng sio̍k-chōe-chè ê huih tī tôaⁿ-téng sio̍k-chōe; ta̍k sè-tāi tio̍h án-ni; chit-ê tôaⁿ tī Iâ-hô-hoa ê bīn-chêng chòe chì-sèng.

11耶和華吩咐摩西講：Iâ-hô-hoa hoan-hù Mô͘-se kóng,

12你算以色列人ê人額，照in中間所上算ê，你算in ê時，in ta̍k人tio̍h為tio̍h家己ê性命用贖回ê價錢獻hō͘耶和華；免得你算in ê時，tī in中間有災禍。Lí sǹg Í-sek-lia̍t lâng ê lâng-gia̍h, chiàu in tiong-kan só͘ chiūⁿ-sǹg-ê, lí sǹg in ê sî, in ta̍k-lâng tio̍h ūi-tio̍h ka-kī ê sìⁿ-miā ēng sio̍k-hôe ê kè-chîⁿ hiàn hō͘ Iâ-hô-hoa; bián-tit lí sǹg in ê sî, tī in tiong-kan ū chai-ē.

13見若過去，歸tī hiah-ê上算ê，ta̍k人tio̍h照聖所ê phêng the̍h出半sià-khek-le̍k ê銀；chit半sià-khek-le̍k是獻hō͘耶和華ê；一sià-khek-le̍k是二十個kùi-la̍h。Kìⁿ-nā kè-khì, kui tī hiah-ê chiūⁿ-sǹg-ê, ta̍k-lâng tio̍h chiàu sèng-só͘ ê phêng the̍h-chhut pòaⁿ sià-khek-le̍k ê gûn; chit pòaⁿ sià-khek-le̍k sī hiàn hō͘ Iâ-hô-hoa ê; chi̍t sià-khek-le̍k sī jī-cha̍p ê kùi-la̍h.

14見若過去歸tī hiah-ê上算ê，tùi二十歲以上ê，tio̍h將chit-ê獻hō͘耶和華。Kìⁿ-nā kè-khì kui tī hiah-ê chiūⁿ-sǹg-ê, tùi jī-cha̍p hè í-chiūⁿ ê, tio̍h chiong chit-ê hiàn hō͘ Iâ-hô-hoa.

15為tio̍h贖回lín ê性命將chit-ê獻hō͘耶和華ê時，好額人m̄-thang出khah-chōe，sòng-hiong人也m̄-thang出khah少；ta̍k人準準出半sià-khek-le̍k。Ūi-tio̍h sio̍k-hôe lín ê sìⁿ-miā chiong chit-ê hiàn hō͘ Iâ-hô-hoa ê sî, hó-gia̍h lâng m̄-thang chhut khah-chōe, sòng-hiong lâng iā m̄-thang chhut khah-chió; ta̍k-lâng chún-chún chhut pòaⁿ sià-khek-le̍k.

16你tio̍h tùi以色列人收chit-ê贖回ê銀，做會幕ê路用；thang tī耶和華ê面前，為以色列人做記念，來贖回lín ê性命。Lí tio̍h tùi Í-sek-lia̍t lâng siu chit-ê sio̍k-hôe ê gûn, chòe hōe-bō͘ ê lō͘-ēng; thang tī Iâ-hô-hoa ê bīn-chêng, ūi Í-sek-lia̍t lâng chòe kì-liām, lâi sio̍k-hôe lín ê sìⁿ-miā.

17耶和華吩咐摩西講：Iâ-hô-hoa hoan-hù Mô͘-se kóng,

18你tio̍h用銅做洗盪ê盆，伊ê座也tio̍h用銅做，thang用伊洗盪；tio̍h hē伊tī會幕kap壇ê中間；內面tio̍h貯水。Lí tio̍h ēng tâng chòe sóe-tn̄g ê phûn, i ê chō iā tio̍h ēng tâng chòe, thang ēng i sóe-tn̄g; tio̍h hē i tī hōe-bō͘ kap tôaⁿ ê tiong-kan; lāi-bīn tio̍h tóe chúi.

19亞倫kap伊ê kiáⁿ beh tī-hia洗in ê手，in ê腳。A-lûn kap i ê kiáⁿ beh tī-hia sóe in ê chhiú, in ê kha.

20In入會幕，á是就近壇前服事，用火燒祭服事耶和華ê時，tio̍h用水洗，免得死無。In ji̍p hōe-bō͘, á-sī chiū-kūn tôaⁿ-chêng ho̍k-sāi, ēng hé sio-chè ho̍k-sāi Iâ-hô-hoa ê sî, tio̍h ēng chúi sóe, bián-tit sí-bô.

21In tio̍h án-ni洗手洗腳，免得死無；這是做in定tio̍h ê例，就是做伊kap伊ê後裔ta̍k世代永遠ê例。In tio̍h án-ni sóe-chhiú sóe-kha, bián-tit sí-bô; che sī chòe in tiāⁿ-tio̍h ê lē, chiū-sī chòe i kap i ê hō͘-è ta̍k sè-tāi éng-oán ê lē.

22耶和華koh吩咐摩西講：Iâ-hô-hoa koh hoan-hù Mô͘-se kóng,

23你tio̍h取上品ê香料，就是專ê沒藥，五百sià-khek-le̍k，芳ê肉桂一半，就是兩百五十，芳ê菖蒲(chhiong-pô͘)兩百五十，Lí tio̍h chhú siōng-phín ê hiuⁿ-liāu, chiū-sī choan ê bu̍t-io̍h, gō͘-pah sià-khek-le̍k, phang ê jio̍k-kùi chi̍t-pòaⁿ, chiū-sī nn̄g-pah gō͘-cha̍p, phang ê chhiong-pô͘ nn̄g-pah gō͘-cha̍p,

24沉香五百，lóng照聖所ê秤(phêng)，kap橄欖油一him。tîm-hiuⁿ gō͘-pah, lóng chiàu sèng-só͘ ê phêng, kap kaⁿ-ná-iû chi̍t-him.

25你tio̍h用伊做thang抹ê聖油，就是照做芳味ê法調和伊；是beh做thang抹ê聖油。Lí tio̍h ēng i chòe thang boah ê sèng-iû, chiū-sī chiàu chòe phang-bī ê hoat tiau-hô i; sī beh chòe thang boah ê sèng-iû.

26Tio̍h用chit-ê油抹會幕kap法櫃，Tio̍h ēng chit-ê iû boah hōe-bō͘ kap hoat-kūi,

27桌kap桌頂一切ê器具，燈台kap燈台ê器具，以及香壇，toh kap toh-téng it-chhè ê khì-kū, teng-tâi kap teng-tâi ê khì-kū, í-ki̍p hiuⁿ-tôaⁿ,

28燒祭ê壇kap伊一切ê器具，洗盪 ê盆kap伊ê 座。sio-chè ê tôaⁿ kap i it-chhè ê khì-kū, sóe-tn̄g ê phûn kap i ê chō.

29你tio̍h hō͘ in做聖，hō͘ in成做至聖；見若摸tio̍h伊ê lóng分別做聖。Lí tio̍h hō͘ in chòe-sèng, hō͘ in chiâⁿ-chòe chì-sèng; kìⁿ-nā bong-tio̍h i-ê lóng hun-piat chòe-sèng.

30你tio̍h用油抹亞倫kap伊hiah-ê kiáⁿ，hō͘ in做聖，thang做祭司來服事我。Lí tio̍h ēng iû boah A-lûn kap i hiah-ê kiáⁿ, hō͘ in chòe-sèng, thang chòe chè-si lâi ho̍k-sāi Góa.

31你tio̍h kā以色列人講：chit-ê油 beh做我ê聖油，做抹ê路用，到lín ta̍k世代。Lí tio̍h kā Í-sek-lia̍t lâng kóng, Chit-ê iû beh chòe Góa ê sèng-iû, chòe boah ê lō͘-ēng, kàu lín ta̍k sè-tāi.

32M̄-thang tò tī人ê身軀，也m̄-thang照chit-ê調和ê法做kap一個相親像ê；chit-ê油是聖，lín也tio̍h掠伊做聖。M̄-thang tò tī lâng ê seng-khu, iā m̄-thang chiàu chit-ê tiau-hô ê hoat chòe kap chi̍t-ê saⁿ chhin-chhiūⁿ ê; chit-ê iû sī sèng, lín iā tio̍h lia̍h i chòe-sèng.

33見若調和kap chit-ê相親像，á是用伊抹tī外人ê身軀ê，beh tùi伊ê百姓ê中間受剪除。Kìⁿ-nā tiau-hô kap chit-ê saⁿ chhin-chhiūⁿ, á-sī ēng i boah tī gōa-lâng ê seng-khu ê, beh tùi i ê peh-sìⁿ ê tiong-kan siū chián-tû.

34耶和華對摩西講：你tio̍h取芳ê香料，就是ná-ta̍t、tí-hê-le̍k、hek-pī-ná；chiah-ê芳芳ê香料，kap清ê乳香，ta̍k樣秤(chhìn)平重；Iâ-hô-hoa tùi Mô͘-se kóng, Lí tio̍h chhú phang ê hiuⁿ-liāu, chiū-sī ná-ta̍t, tí-hê-le̍k, hek-pī-ná; chiah-ê phang-phang ê hiuⁿ-liāu, kap chheng ê jú-hiuⁿ, ta̍k-iūⁿ chhìn pîⁿ-tāng;

35你tio̍h用chiah-ê做香，照做芳味ê法來做芳料，用鹽調和，hō͘伊清氣koh聖；lí tio̍h ēng chiah-ê chòe hiuⁿ, chiàu chòe phang-bī ê hoat lâi chòe phang-liāu, ēng iâm tiau-hô, hō͘ i chheng-khì koh sèng;

36chit-ê香你tio̍h the̍h淡薄，舂hō͘伊真幼，hē tī會幕內法櫃前；我beh tī-hia kap你相會；lín tio̍h掠伊做至聖。chit-ê hiuⁿ lí tio̍h the̍h tām-po̍h, cheng hō͘ i chin iù, hē tī hōe-bō͘-lāi hoat-kūi chêng; Góa beh tī-hia kap lí siong-hōe; lín tio̍h lia̍h i chòe chì-sèng.

37Lín所做ê香m̄-thang照chit-ê調和ê法，為tio̍h家己來做；lín tio̍h掠伊做聖，歸tī耶和華。Lín só͘ chòe ê hiuⁿ m̄-thang chiàu chit-ê tiau-hô ê hoat, ūi-tio̍h ka-kī lâi chòe; lín tio̍h lia̍h i chòe-sèng, kui tī Iâ-hô-hoa.

38見若做親像chit款ê香，ài beh phīⁿ芳ê，beh tùi伊ê百姓中受剪除。Kìⁿ-nā chòe chhin-chhiūⁿ chit-khoán ê hiuⁿ, ài beh phīⁿ-phang ê, beh tùi i ê peh-sìⁿ-tiong siū chián-tû.