1有一個利未族ê人，去chhōa一個利未族ê cha-bó͘-gín-á。Ū chi̍t ê Lī-bī cho̍k ê lâng, khì chhōa chi̍t ê Lī-bī cho̍k ê cha-bó͘-gín-á.

2Hit-ê婦人人懷孕，生一個kiáⁿ；看見伊是清秀ê gín-á，就khǹg伊三月日久。Hit-ê hū-jîn-lâng hoâi-īn, siⁿ chi̍t ê kiáⁿ; khòaⁿ-kìⁿ i sī chheng-siù ê gín-á, chiū khǹg i saⁿ-ge̍h-ji̍t kú.

3後來看bōe koh khǹg得，就為tio̍h伊取蘆竹á ê箱，用石油kap瀝青糊伊；將gín-á hē tī hit內面，lok tī河邊，蘆葦ê中間。Āu-lâi khòaⁿ bōe koh khǹg-tit, chiū ūi-tio̍h i chhú lô͘-tek-á ê siuⁿ, ēng chio̍h-iû kap le̍k-chhiⁿ kô͘ i; chiong gín-á hē tī hit lāi-bīn, lok tī hô-piⁿ, lô͘-úi ê tiong-kan.

4伊ê大姊遠遠khiā-teh，ài知伊會tú-tio̍h怎樣。I ê tōa-chí hn̄g-hn̄g khiā-teh, ài chai i ōe tú-tio̍h cháiⁿ-iūⁿ.

5法老ê cha-bó͘-kiáⁿ落來河裡，beh洗浴；伊hiah-ê女婢行遊tī河邊；伊看見蘆葦ê中間有箱，就差一個女婢giâ來。Hoat-ló ê cha-bó͘-kiáⁿ lo̍h-lâi hô-ni̍h, beh sóe-e̍k; i hiah-ê lú-pī kiâⁿ-iû tī hô-piⁿ; i khòaⁿ-kìⁿ lô͘-úi ê tiong-kan ū siuⁿ, chiū chhe chi̍t ê lú-pī giâ-lâi.

6掀開看見gín-á；看ah，gín-á teh哮。伊就憐憫伊，講：這就是希伯來人ê gín-á。Hian-khui khòaⁿ-kìⁿ gín-á; khòaⁿ ah, gín-á teh háu. I chiū lîn-bín i, kóng, Che chiū-sī Hi-pek-lâi lâng ê gín-á.

7伊ê大姊kā法老ê cha-bó͘-kiáⁿ講：我去tī希伯來婦人人ê中間叫一個奶母，kā你io chit-ê gín-á，好mah？I ê tōa-chí kā Hoat-ló ê cha-bó͘-kiáⁿ kóng, Góa khì tī Hi-pek-lâi hū-jîn-lâng ê tiong-kan kiò chi̍t ê lin-bú, kā lí io chit-ê gín-á, hó mah?

8法老ê cha-bó͘-kiáⁿ kā伊講：你thang去ah。 Cha-bó͘-kiáⁿ就去，叫gín-á ê老母。Hoat-ló ê cha-bó͘-kiáⁿ kā i kóng, Lí thang khì ah. Cha-bó͘-kiáⁿ chiū khì, kiò gín-á ê lāu-bú.

9法老ê cha-bó͘-kiáⁿ kā伊講：抱chit-ê gín-á去，kā我io伊，我beh hō͘你工錢。婦人人就抱gín-á去io伊。Hoat-ló ê cha-bó͘-kiáⁿ kā i kóng, Phō chit-ê gín-á khì, kā góa io i, góa beh hō͘ lí kang-chîⁿ. Hū-jîn-lâng chiū phō gín-á khì io i.

10Gín-á漸漸大，婦人人就帶伊到法老ê cha-bó͘-kiáⁿ hia，做伊ê kiáⁿ。 伊kā伊號名叫摩西，講：因為我tùi水裡救伊出來。Gín-á chiām-chiām tōa, hū-jîn-lâng chiū tòa i kàu Hoat-ló ê cha-bó͘-kiáⁿ hia, chòe i ê kiáⁿ. I kā i hō-miâ kiò Mô͘-se, kóng, In-ūi góa tùi chúi-ni̍h kiù i chhut-lâi.

11後來摩西已經長成，伊出去到伊ê兄弟hia，看見in teh擔teh；看見一個埃及人phah一個希伯來人，就是伊ê兄弟。Āu-lâi Mô͘-se í-keng tióng-sêng, i chhut-khì kàu i ê hiaⁿ-tī hia, khòaⁿ-kìⁿ in teh taⁿ-teh; khòaⁿ-kìⁿ chi̍t ê Ai-ki̍p lâng phah chi̍t ê Hi-pek-lâi lâng, chiū-sī i ê hiaⁿ-tī.

12伊看左右，看無人tī-hia，就phah死埃及人，iám tī沙裡。I khòaⁿ chó-iū, khòaⁿ bô lâng tī-hia, chiū phah-sí Ai-ki̍p lâng, iám tī soa-ni̍h.

13隔日koh出去，看見有兩個希伯來ê人相phah，就對hit-ê m̄-tio̍h-ê講：你啥事phah你ê同伴？Keh-ji̍t koh chhut-khì, khòaⁿ-kìⁿ ū nn̄g ê Hi-pek-lâi ê lâng saⁿ-phah, chiū tùi hit-ê m̄-tio̍h-ê kóng, Lí siáⁿ-sū phah lí ê tâng-phōaⁿ?

14Hit-ê人講：Chī-chūi設立你做首領kap審判官來管阮？你想beh phah死我，親像phah死hit-ê埃及人mah？摩西驚講：chit-ê tāi-chì真正露出。Hit-ê lâng kóng, Chī-chūi siat-li̍p lí chòe siú-léng kap sím-phòaⁿ-koaⁿ lâi koán goán? Lí siūⁿ beh phah-sí góa, chhin-chhiūⁿ phah-sí hit-ê Ai-ki̍p lâng mah? Mô͘-se kiaⁿ kóng, Chit-ê tāi-chì chin-chiàⁿ lō͘-chhut.

15法老聽見chit-ê tāi-chì，就想beh thâi摩西。總是摩西閃避法老，走去米甸地khiā起；坐tī井邊。Hoat-ló thiaⁿ-kìⁿ chit-ê tāi-chì, chiū siūⁿ beh thâi Mô͘-se. Chóng-sī Mô͘-se siám-pī Hoat-ló, cháu-khì Bí-tiân tōe khiā-khí; chē tī chíⁿ-piⁿ.

16米甸ê祭司有七個cha-bó͘-kiáⁿ；in來chhiūⁿ水到滿槽，hō͘老父ê羊群lim。Bí-tiân ê chè-si ū chhit-ê cha-bó͘-kiáⁿ; in lâi chhiūⁿ-chúi kàu móa chô, hō͘ lāu-pē ê iûⁿ-kûn lim.

17Hiah-ê顧羊ê到，趕in；摩西就起來幫贊in，hō͘ in ê羊群lim。Hiah-ê kò͘-iûⁿ-ê kàu, kóaⁿ in; Mô͘-se chiū khí-lâi pang-chān in, hō͘ in ê iûⁿ-kûn lim.

18In來到老父，Liû-jíⁿ，hia；伊講：今á日lín怎樣hiah緊tò來？In lâi kàu lāu-pē, Liû-jíⁿ, hia; i kóng, Kin-á-ji̍t lín cháiⁿ-iūⁿ hiah-kín tò-lâi?

19In講：有一個埃及人救阮脫離顧羊ê人ê手，koh替阮出力chhiūⁿ水，hō͘羊群lim。In kóng, Ū chi̍t ê Ai-ki̍p lâng kiù goán thoat-lī kò͘-iûⁿ ê lâng ê chhiú, koh thòe goán chhut-la̍t chhiūⁿ chúi, hō͘ iûⁿ-kûn lim.

20伊對伊hiah-ê cha-bó͘-kiáⁿ講：Hit-ê人tī tah-lo̍h？Lín啥事放伊tī-hia？tio̍h請伊來食。I tùi i hiah-ê cha-bó͘-kiáⁿ kóng, Hit-ê lâng tī tah-lo̍h? Lín siáⁿ-sū pàng i tī-hia? tio̍h chhiáⁿ i lâi chia̍h.

21摩西願kap hit人tiàm；伊就將伊ê cha-bó͘-kiáⁿ Se-pho-la̍h，嫁hō͘摩西。Mô͘-se goān kap hit-lâng tiàm; i chiū chiong i ê cha-bó͘-kiáⁿ Se-pho-la̍h, kè hō͘ Mô͘-se.

22生一個kiáⁿ；摩西kā伊號名叫Kek-sūn；因為講：我寄腳tī外邦。Siⁿ chi̍t ê kiáⁿ; Mô͘-se kā i hō miâ kiò Kek-sūn; in-ūi kóng, Góa kià-kha tī gōa-pang.

23歷過chōe-chōe年，埃及王死；以色列人，因為做苦工，就吐氣喉叫；in做苦工喉叫ê聲到hō͘上帝聽見。Le̍k-kè chōe-chōe nî Ai-ki̍p ông sí; Í-sek-lia̍t lâng, in-ūi chòe khó͘-kang, chiū thó͘-khùi âu-kiò; in chòe khó͘-kang âu-kiò ê siaⁿ kàu hō͘ Siōng-tè thiaⁿ-kìⁿ.

24上帝聽見in ê hiⁿ-hiⁿ-chhan；上帝就記得伊kap亞伯拉罕、以撒、雅各所立ê約。Siōng-tè thiaⁿ-kìⁿ in ê hiⁿ-hiⁿ-chhan; Siōng-tè chiū kì-tit I kap A-pek-la̍h-hán, Í-sat, Ngá-kok só͘ li̍p ê iok.

25上帝看顧以色列人，上帝也知in ê tāi-chì。Siōng-tè khòaⁿ-kò͘ Í-sek-lia̍t lâng, Siōng-tè iā chai in ê tāi-chì.

1摩西顧伊ê丈人，米甸ê祭司，Ia̍p-thek-lô，ê羊群，趕羊去曠野ê後面，到上帝ê山，就是何烈山。Mô͘-se kò͘ i ê tiūⁿ-lâng, Bí-tiân ê chè-si, Ia̍p-thek-lô, ê iûⁿ-kûn, kóaⁿ iûⁿ khì khòng-iá ê āu-bīn, kàu Siōng-tè ê soaⁿ, chiū-sī Hô-lia̍t soaⁿ.

2耶和華ê使者tī刺phè內火燄中對伊出現，伊看見，看ah，刺phè hō͘火燒，刺phè也無to̍h去。Iâ-hô-hoa ê sù-chiá tī chhì-phè-lāi hé-iām-tiong tùi i chhut-hiān, i khòaⁿ-kìⁿ, khòaⁿ ah, chhì-phè hō͘ hé sio, chhì-phè iā bô to̍h-khì.

3摩西講：我taⁿ beh oat過去，看chit-ê地ê景象，chit-ê刺phè怎樣無to̍h去ah。Mô͘-se kóng, Góa taⁿ beh oat-kè-khì, khòaⁿ chit-ê tōe ê kéng-siōng, chit-ê chhì-phè cháiⁿ-iūⁿ bô to̍h-khì ah.

4耶和華看見伊oat去beh看，上帝就對刺phè內叫伊講：摩西，摩西。伊就講：我tī-chia。Iâ-hô-hoa khòaⁿ-kìⁿ i oat-khì beh khòaⁿ, Siōng-tè chiū tùi chhì-phè-lāi kiò i kóng, Mô͘-se, Mô͘-se. I chiū kóng, Góa tī-chia.

5伊就講：你莫得近óa來；tio̍h thǹg你腳裡ê鞋，因為你khiā ê所在是聖地。I chiū kóng, Lí bo̍h-tit kūn-óa lâi; tio̍h thǹg lí kha-ni̍h ê ôe, in-ūi lí khiā ê só͘-chāi sī sèng-tōe.

6Koh講：我是你ê祖公ê上帝，亞伯拉罕ê上帝，以撒ê上帝，雅各ê上帝。摩西遮伊ê面；m̄敢看上帝。Koh kóng, Góa sī lí ê chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè. Mô͘-se jia i ê bīn; m̄-káⁿ khòaⁿ Siōng-tè.

7耶和華講：我ê百姓khiā起tī埃及ê，in ê困苦我實在已經看見lah；in為tio̍h督工ê來喉叫，我已經聽見lah；我本知in ê痛苦。Iâ-hô-hoa kóng, Góa ê peh-sìⁿ khiā-khí tī Ai-ki̍p ê, in ê khùn-khó͘ Góa si̍t-chāi í-keng khòaⁿ-kìⁿ lah; in ūi-tio̍h tok-kang-ê lâi âu-kiò, Góa í-keng thiaⁿ-kìⁿ lah; Góa pún chai in ê thòng-khó͘.

8Taⁿ我落來beh救in脫離埃及人ê手，chhōa in出hit-ê地，到肥súi開闊ê地，到流奶kap蜜ê地，就是迦南、Hek、A-mô͘-lī、Pí-lī-sé、Hi-bī、Iâ-pò͘-su、hiah-ê族ê所在。Taⁿ Góa lo̍h-lâi beh kiù in thoat-lī Ai-ki̍p lâng ê chhiú, chhōa in chhut hit-ê tōe, kàu pûi-súi khui-khoah ê tōe, kàu lâu lin kap bi̍t ê tōe, chiū-sī Ka-lâm, Hek, A-mô͘-lī, Pí-lī-sé, Hi-bī, Iâ-pò͘-su, hiah-ê cho̍k ê só͘-chāi.

9Taⁿ以色列人喉叫ê聲到hō͘我聽見；我也看見埃及人苦楚in ê艱苦。Taⁿ Í-sek-lia̍t lâng âu-kiò ê siaⁿ kàu hō͘ Góa thiaⁿ-kìⁿ; Góa iā khòaⁿ-kìⁿ Ai-ki̍p lâng khó͘-chhó͘ in ê kan-khó͘.

10Taⁿ你來，我beh差你去見法老，chhōa我ê百姓以色列人出埃及。Taⁿ lí lâi, Góa beh chhe lí khì kìⁿ Hoat-ló, chhōa Góa ê peh-sìⁿ Í-sek-lia̍t lâng chhut Ai-ki̍p.

11摩西對上帝講：我是甚麼人thang去見法老，chhōa以色列人出埃及ah？Mô͘-se tùi Siōng-tè kóng, Góa sī sím-mi̍h lâng thang khì kìⁿ Hoat-ló, chhōa Í-sek-lia̍t lâng chhut Ai-ki̍p ah?

12伊講：我實在beh kap你tī-teh；你chhōa百姓出埃及了後，lín beh tī chit-ê山服事上帝；這beh做我差你ê證據。I kóng, Góa si̍t-chāi beh kap lí tī-teh; lí chhōa peh-sìⁿ chhut Ai-ki̍p liáu-āu, lín beh tī chit-ê soaⁿ ho̍k-sāi Siōng-tè; che beh chòe Góa chhe lí ê chèng-kù.

13摩西對上帝講：看ah，我到以色列人hia，對in講：Lín祖公ê上帝差我來lín chia；in若問我講：伊叫甚麼名？我beh kā in講甚麼ah？Mô͘-se tùi Siōng-tè kóng, Khòaⁿ ah, góa kàu Í-sek-lia̍t lâng hia, tùi in kóng, Lín chó͘-kong ê Siōng-tè chhe góa lâi lín chia; in nā mn̄g góa kóng, I kiò sím-mi̍h miâ? góa beh kā in kóng sím-mi̍h ah?

14上帝對摩西講：我是自然而然ê；koh講：你tio̍h kā以色列人án-ni講：自然ê差我到lín chia。Siōng-tè tùi Mô͘-se kóng, Góa sī Chū-jiân Jî-jiân-ê; koh kóng, Lí tio̍h kā Í-sek-lia̍t lâng án-ni kóng, Chū-jiân-ê chhe góa kàu lín chia.

15上帝koh對摩西講：你tio̍h對以色列人án-ni講：差我到lín chia ê，就是耶和華，lín祖公ê上帝，亞伯拉罕ê上帝，以撒ê上帝，雅各ê上帝；這是我永遠ê名，這是我ê記念到萬代。Siōng-tè koh tùi Mô͘-se kóng, Lí tio̍h tùi Í-sek-lia̍t lâng án-ni kóng, Chhe góa kàu lín chia ê, chiū-sī Iâ-hô-hoa, lín chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè; che sī Góa éng-oán ê miâ, che sī Góa ê kì-liām kàu bān-tāi.

16你去招集以色列ê長老，kā in講：耶和華，lín祖公ê上帝，就是亞伯拉罕、以撒、雅各ê上帝，對我出現，講：我實在眷顧lín，人tī埃及所款待lín ê，我也有看見。Lí khì chio-chi̍p Í-sek-lia̍t ê tiúⁿ-ló, kā in kóng, Iâ-hô-hoa, lín chó͘-kong ê Siōng-tè, chiū-sī A-pek-la̍h-hán, Í-sat, Ngá-kok ê Siōng-tè, tùi góa chhut-hiān, kóng, Góa si̍t-chāi koàn-kò͘ lín, lâng tī Ai-ki̍p só͘ khoán-thāi lín ê, Góa iā ū khòaⁿ-kìⁿ.

17我也bat講：我beh chhōa lín出埃及ê艱苦，到迦南，Hek，A-mô͘-lī，Pí-lī-sé，Hi-bī，Iâ-pò͘-su，hiah-ê族ê地，到流奶kap蜜ê地。Góa iā bat kóng, Góa beh chhōa lín chhut Ai-ki̍p ê kan-khó͘, kàu Ka-lâm, Hek, A-mô͘-lī, Pí-lī-sé, Hi-bī, Iâ-pò͘-su, hiah-ê cho̍k ê tōe, kàu lâu lin kap bi̍t ê tōe.

18In beh聽你ê話；你kap以色列ê長老tio̍h去見埃及王，kā伊講：希伯來人ê上帝耶和華已經tú-tio̍h阮；taⁿ求你容允阮去曠野，行三日ê路站，beh祭祀耶和華，阮ê上帝。In beh thiaⁿ lí ê ōe; lí kap Í-sek-lia̍t ê tiúⁿ-ló tio̍h khì kìⁿ Ai-ki̍p ông, kā i kóng, Hi-pek-lâi lâng ê Siōng-tè Iâ-hô-hoa í-keng tú-tio̍h goán; taⁿ kiû lí iông-ún goán khì khòng-iá, kiâⁿ saⁿ-ji̍t ê lō͘-chām, beh chè-sū Iâ-hô-hoa, goán ê Siōng-tè.

19我知雖然用大權能ê手，埃及王也m̄ hō͘ lín去。Góa chai sui-jiân ēng tōa koân-lêng ê chhiú, Ai-ki̍p ông iā m̄ hō͘ lín khì.

20我beh伸我ê手，用我tī埃及中所beh行一切ê奇事來phah伊；然後伊chiah准lín去。Góa beh chhun Góa ê chhiú, ēng Góa tī Ai-ki̍p-tiong só͘ beh kiâⁿ it-chhè ê kî-sū lâi phah i; jiân-āu i chiah chún lín khì.

21我beh hō͘ chit-ê百姓得tio̍h恩典tī埃及人ê面前，hō͘ lín出去ê時，無空手去；Góa beh hō͘ chit-ê peh-sìⁿ tit-tio̍h un-tián tī Ai-ki̍p lâng ê bīn-chêng, hō͘ lín chhut-khì ê sî, bô khang-chhiú khì;

22chiah-ê婦人人ta̍k-ê beh對伊ê厝邊kap tòa tī伊ê家內ê婦人人討銀器、金器，kap衣服，thang hō͘你ê kiáⁿ cha-bó͘-kiáⁿ用；án-ni lín beh搶埃及人。chiah-ê hū-jîn-lâng ta̍k-ê beh tùi i ê chhù-piⁿ kap tòa tī i ê ke-lāi ê hū-jîn-lâng thó gûn-khì, kim-khì, kap i-ho̍k, thang hō͘ lí ê kiáⁿ cha-bó͘-kiáⁿ ēng; án-ni lín beh chhiúⁿ Ai-ki̍p lâng.

1摩西應講，看ah，in beh m̄信我，也m̄聽我ê話；因為in beh講：耶和華bē-bat對你出現。Mô͘-se ìn kóng, Khòaⁿ ah, in beh m̄-sìn góa, iā m̄-thiaⁿ góa ê ōe; in-ūi in beh kóng, Iâ-hô-hoa bē-bat tùi lí chhut-hiān.

2耶和華對伊講，Tī你手裡是甚麼？伊講：是柺á。Iâ-hô-hoa tùi i kóng, Tī lí chhiú-ni̍h sī sím-mi̍h? I kóng, Sī koáiⁿ-á.

3講：Hiat tī地裡。伊一下hiat tī地裡，就變做蛇；摩西就走閃伊。Kóng, Hiat tī tōe-ni̍h. I chi̍t-ē hiat tī tōe-ni̍h, chiū pìⁿ-chòe chôa; Mô͘-se chiū cháu-siám i.

4耶和華對摩西講：伸你ê手掠伊ê尾；(就伸手掠伊，tī手中猶原變做柺á；)Iâ-hô-hoa tùi Mô͘-se kóng, Chhun lí ê chhiú lia̍h i ê bé; (chiū chhun-chhiú lia̍h i, tī chhiú-tiong iû-goân pìⁿ-chòe koáiⁿ-á;)

5án-ni thang hō͘ in信耶和華，in ê祖公ê上帝，亞伯拉罕ê上帝，以撒ê上帝，雅各ê上帝，有對你出現。án-ni thang hō͘ in sìn Iâ-hô-hoa, in ê chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè, ū tùi lí chhut-hiān.

6耶和華koh對伊講，Hē你ê手tī你ê胸前。就下手tī胸前；抽出來ê時，看ah，手已經thái-ko，白親像雪。Iâ-hô-hoa koh tùi i kóng, Hē lí ê chhiú tī lí ê heng-chêng. Chiū hē chhiú tī heng-chêng; thiu-chhut-lâi ê sî, khòaⁿ ah, chhiú í-keng thái-ko, pe̍h chhin-chhiūⁿ seh.

7Koh講：Koh hē你ê手tī你ê胸前。(伊就hē tī伊ê胸前；抽出來ê時，看ah，已經照原，kap thong身軀ê肉無各樣。)Koh kóng, Koh hē lí ê chhiú tī lí ê heng-chêng. (I chiū hē tī i ê heng-chêng; thiu-chhut-lâi ê sî, khòaⁿ ah, í-keng chiàu-goân, kap thong seng-khu ê bah bô koh-iūⁿ.)

8Koh講：設使in無beh信你，也無beh聽頭一個神蹟，就beh信第二個神蹟。Koh kóng, Siat-sú in bô beh sìn lí, iā bô beh thiaⁿ thâu-chi̍t ê sîn-jiah, chiū beh sìn tē-jī ê sîn-jiah.

9Hit兩個神蹟in若lóng m̄信，也m̄聽你ê話，你tio̍h tùi河裡iúⁿ水，倒tī乾地；你tùi河裡所iúⁿ ê水beh tī乾地變做血。Hit nn̄g ê sîn-jiah in nā lóng m̄-sìn, iā m̄-thiaⁿ lí ê ōe, lí tio̍h tùi hô-ni̍h iúⁿ chúi, tò tī ta-tōe; lí tùi hô-ni̍h só͘ iúⁿ ê chúi beh tī ta-tōe pìⁿ-chòe huih.

10摩西對耶和華講：主ah，我平素m̄是能講話ê人，對祢kā祢ê奴僕講話ê了後也是án-ni；我是嘴舌鈍ê人。Mô͘-se tùi Iâ-hô-hoa kóng, Chú ah, góa pêng-sò͘ m̄-sī ōe kóng-ōe ê lâng, tùi Lí kā Lí ê lô͘-po̍k kóng-ōe ê liáu-āu iā sī án-ni; góa sī chhùi-chi̍h tun ê lâng.

11耶和華對伊講，創造人ê嘴是是誰 ah？hō͘人啞口、臭耳人、目睭金、chhiⁿ-mî ê，是是誰 ah？kiám-m̄是我耶和華mah？Iâ-hô-hoa tùi i kóng, Chhòng-chō lâng ê chhùi sī chī-chūi ah? hō͘ lâng é-káu, chhàu-hī-lâng, ba̍k-chiu kim, chhiⁿ-mî ê, sī chī-chūi ah? kiám-m̄-sī Góa Iâ-hô-hoa mah?

12Taⁿ你去ah，我beh賞賜你口才，教示你所應該講ê。Taⁿ lí khì ah, Góa beh siúⁿ-sù lí kháu-châi, kà-sī lí só͘ eng-kai kóng-ê.

13伊講：主ah，你合意差是誰，就差伊去。I kóng, Chú ah, Lí ha̍p-ì chhe chī-chūi, chiū chhe i khì.

14耶和華對摩西發出受氣，講：Kiám-m̄是有你ê兄，利未人，亞倫mah？我知伊是能講話ê人。Koh伊taⁿ出來迎接你；伊一下看見你心內就歡喜。Iâ-hô-hoa tùi Mô͘-se hoat-chhut siū-khì, kóng, Kiám-m̄-sī ū lí ê hiaⁿ, Lī-bī-lâng, A-lûn mah? Góa chai i sī ōe kóng-ōe ê lâng. Koh i taⁿ chhut-lâi ngiâ-chih lí; i chi̍t-ē khòaⁿ-kìⁿ lí sim-lāi chiū hoaⁿ-hí.

15你tio̍h對伊講，用所應該講ê話傳hō͘伊；我也beh賞賜你kap伊有口才，koh beh教示lín所應該行ê事。Lí tio̍h tùi i kóng, ēng só͘ eng-kai kóng ê ōe thoân hō͘ i; Góa iā beh siúⁿ-sù lí kap i ū kháu-châi, koh beh kà-sī lín só͘ eng-kai kiâⁿ ê sū.

16伊beh替你對百姓講話；伊beh對你準做嘴，你beh對伊準做上帝。I beh thòe lí tùi peh-sìⁿ kóng-ōe; i beh tùi lí chún-chòe chhùi, lí beh tùi i chún-chòe Siōng-tè.

17你ê手tio̍h kia̍h一支柺á，用伊來行神蹟。Lí ê chhiú tio̍h kia̍h chi̍t ki koáiⁿ-á, ēng i lâi kiâⁿ sîn-jiah.

18Tùi án-ni，摩西就去，tò去伊ê丈人Ia̍p-thek-lô hia，kā伊講：求你容允我tò去，看我ê兄弟tī埃及ê，看in iáu tī-teh á無。Ia̍p-thek-lô kā摩西講：你thang安然去lah。Tùi án-ni Mô͘-se chiū khì, tò-khì i ê tiūⁿ-lâng Ia̍p-thek-lô hia, kā i kóng, Kiû lí iông-ún góa tò-khì, khòaⁿ góa ê hiaⁿ-tī tī Ai-ki̍p ê, khòaⁿ in iáu tī-teh á-bô. Ia̍p-thek-lô kā Mô͘-se kóng, Lí thang an-jiân khì lah.

19耶和華tī米甸對摩西講：你去tò去埃及，因為ài 害你ê性命ê人lóng死lah。Iâ-hô-hoa tī Bí-tiân tùi Mô͘-se kóng, Lí khì tò-khì Ai-ki̍p, in-ūi ài hāi lí ê sìⁿ-miā ê lâng lóng sí lah.

20摩西帶伊ê bó͘ kap兩個kiáⁿ，hō͘ in騎驢，tò去埃及地；摩西手裡kia̍h上帝ê柺á。Mô͘-se tòa i ê bó͘ kap nn̄g ê kiáⁿ, hō͘ in khiâ-lû, tò-khì Ai-ki̍p tōe; Mô͘-se chhiú-ni̍h kia̍h Siōng-tè ê koáiⁿ-á.

21耶和華對摩西講：你tò去埃及ê時，tio̍h注意將我所交tī你ê手一切ê奇事行tī法老ê面前；總是我beh hō͘伊ê心硬，伊也無beh放chit-ê百姓去。Iâ-hô-hoa tùi Mô͘-se kóng, Lí tò-khì Ai-ki̍p ê sî, tio̍h chù-ì chiong Góa só͘ kau tī lí ê chhiú it-chhè ê kî-sū kiâⁿ tī Hoat-ló ê bīn-chêng; chóng-sī Góa beh hō͘ i ê sim ngī, i iā bô beh pàng chit-ê peh-sìⁿ khì.

22你tio̍h kā法老講：耶和華án-ni講：以色列是我ê kiáⁿ，就是我ê大kiáⁿ；Lí tio̍h kā Hoat-ló kóng, Iâ-hô-hoa án-ni kóng, Í-sek-lia̍t sī Góa ê kiáⁿ, chiū-sī Góa ê tōa-kiáⁿ;

23我bat對你講，Tio̍h tháu放我ê kiáⁿ去，thang服事我；你也m̄准伊去；看ah，我beh thâi死你ê kiáⁿ，就是你ê大kiáⁿ。Góa bat tùi lí kóng, Tio̍h tháu-pàng Góa ê kiáⁿ khì, thang ho̍k-sāi Góa; lí iā m̄-chún i khì; khòaⁿ ah, Góa beh thâi-sí lí ê kiáⁿ, chiū-sī lí ê tōa-kiáⁿ.

24摩西tī路裡，tī客店，耶和華tú-tio̍h伊，beh hō͘伊死。Mô͘-se tī lō͘-ni̍h, tī kheh-tiàm, Iâ-hô-hoa tú-tio̍h i, beh hō͘ i sí.

25Se-pho-la̍h就the̍h一塊利石，割伊ê kiáⁿ陽物ê皮，hiat tī伊ê腳前，講：你是我血ê丈夫。Se-pho-la̍h chiū the̍h chi̍t tè lāi-chio̍h, koah i ê kiáⁿ iông-bu̍t ê phê, hiat tī i ê kha-chêng, kóng, Lí sī góa huih ê tiōng-hu.

26耶和華就放伊soah。婦人人講：你是血ê丈夫，因為割禮ê緣故。Iâ-hô-hoa chiū pàng i soah. Hū-jîn-lâng kóng, Lí sī huih ê tiōng-hu, in-ūi kat-lé ê iân-kò͘.

27耶和華kā亞倫講：你去曠野迎接摩西。伊就去，tī上帝ê山tú-tio̍h伊，就kā伊chim。Iâ-hô-hoa kā A-lûn kóng, Lí khì khòng-iá ngiâ-chih Mô͘-se. I chiū khì, tī Siōng-tè ê soaⁿ tú-tio̍h i, chiū kā i chim.

28摩西將耶和華差伊講ê話，kap吩咐伊行ê神蹟，lóng kā亞倫講。Mô͘-se chiong Iâ-hô-hoa chhe i kóng ê ōe, kap hoan-hù i kiâⁿ ê sîn-jiah, lóng kā A-lûn kóng.

29摩西、亞倫就去招集以色列人眾長老；Mô͘-se, A-lûn chiū khì chio-chi̍p Í-sek-lia̍t lâng chèng tiúⁿ-ló;

30亞倫將耶和華對摩西所講ê話lóng講伊，koh tī百姓ê面前行hiah-ê神蹟。A-lûn chiong Iâ-hô-hoa tùi Mô͘-se só͘ kóng ê ōe lóng kóng i, koh tī peh-sìⁿ ê bīn-chêng kiâⁿ hiah-ê sîn-jiah.

31百姓就信；in聽見耶和華眷顧以色列人，koh看in ê艱苦，就àⁿ頭敬拜。Peh-sìⁿ chiū sìn; in thiaⁿ-kìⁿ Iâ-hô-hoa koàn-kò͘ Í-sek-lia̍t lâng, koh khòaⁿ in ê kan-khó͘, chiū àⁿ-thâu kèng-pài.