1百姓看見摩西延chhiân無落山，百姓就聚集到亞倫hia，對伊講，起來，kā阮妝上帝，thang行tī阮ê頭前；因為hit-ê摩西，就是chhōa阮tùi埃及地出來，hit-ê人，阮m̄知伊tú-tio̍h甚麼。Peh-sìⁿ khòaⁿ-kìⁿ Mô͘-se iân-chhiân bô lo̍h soaⁿ, peh-sìⁿ chiū chū-chi̍p kàu A-lûn hia, tùi i kóng, Khí-lâi, kā goán chng siōng-tè, thang kiâⁿ tī goán ê thâu-chêng; in-ūi hit-ê Mô͘-se, chiū-sī chhōa goán tùi Ai-ki̍p tōe chhut-lâi, hit-ê lâng, goán m̄-chai i tú-tio̍h sím-mi̍h.

2亞倫對in講：Lín ê bó͘，lín ê kiáⁿ，cha-bó͘-kiáⁿ，耳á所掛ê金環，pak伊，the̍h來hō͘我。A-lûn tùi in kóng, Lín ê bó͘, lín ê kiáⁿ, cha-bó͘-kiáⁿ, hī-á só͘ kòa ê kim khoân, pak i, the̍h-lâi hō͘ góa.

3百姓就lóng pak in耳á裡ê金環，the̍h來hō͘亞倫。Peh-sìⁿ chiū lóng pak in hī-á-ni̍h ê kim-khoân, the̍h lâi hō͘ A-lûn.

4亞倫tùi in ê手接來，鑄一隻牛á，用chhiàm刀á雕刻伊；in就講：以色列ah，這是你ê上帝，chhōa你出埃及地ê。A-lûn tùi in ê chhiú chih-lâi, chù chi̍t chiah gû-á, ēng chhiàm-to-á tiau-khek-i; in chiū kóng, Í-sek-lia̍t ah, che sī lí ê siōng-tè, chhōa lí chhut Ai-ki̍p tōe ê.

5亞倫看了，就tī牛á ê面前起壇；亞倫koh宣布講：明á日tio̍h守節服事耶和華。A-lûn khòaⁿ-liáu, chiū tī gû-á ê bīn-chêng khí-tôaⁿ; A-lûn koh soan-pò͘ kóng, Bîn-á-ji̍t tio̍h siú-choeh ho̍k-sāi Iâ-hô-hoa.

6隔日清早，in起來，獻燒祭kap平安祭；百姓就坐teh lim食，起來kún笑。Keh ji̍t chheng-chá, in khí-lâi, hiàn sio-chè kap pêng-an-chè; peh-sìⁿ chiū chē-teh lim-chia̍h, khí-lâi kún-chhiò.

7耶和華對摩西講：去ah，你落去；因為你ê百姓，就是tùi埃及地chhōa出來ê，已經敗壞家己。Iâ-hô-hoa tùi Mô͘-se kóng, Khì ah, lí lo̍h-khì; in-ūi lí ê peh-sìⁿ, chiū-sī tùi Ai-ki̍p tōe chhōa chhut-lâi ê, í-keng pāi-hoāi ka-kī.

8In緊緊離開我所吩咐in ê路，為家己鑄成一隻牛á，跪拜伊，獻祭伊，講：以色列ah，這就是chhōa你出埃及地ê上帝。In kín-kín lī-khui Góa só͘ hoan-hù in ê lō͘, ūi ka-kī chù-chiâⁿ chi̍t chiah gû-á, kūi-pài-i, hiàn-chè-i, kóng, Í-sek-lia̍t ah, che chiū-sī chhōa lí chhut Ai-ki̍p tōe ê siōng-tè.

9耶和華對摩西講：我看chit-ê百姓，看ah，是頷頸硬ê百姓。Iâ-hô-hoa tùi Mô͘-se kóng, Góa khòaⁿ chit-ê peh-sìⁿ, khòaⁿ ah, sī ām-kún ngī ê peh-sìⁿ.

10你taⁿ chhut-chāi我，我beh大受氣in，滅無in；用你成做大國。Lí taⁿ chhut-chāi Góa, Góa beh tōa siū-khì in, bia̍t-bô in; ēng lí chiâⁿ-chòe tōa-kok.

11摩西就對伊ê上帝耶和華求情講：耶和華ah，你啥事大受氣你ê百姓ah，是你用大氣力大權能ê手，tùi埃及地chhōa出來ê？Mô͘-se chiū tùi i ê Siōng-tè Iâ-hô-hoa kiû-chêng kóng, Iâ-hô-hoa ah, Lí siáⁿ-sū tōa siū-khì Lí ê peh-sìⁿ ah, sī Lí ēng tōa khùi-la̍t tōa koân-lêng ê chhiú, tùi Ai-ki̍p tōe chhōa chhut-lâi-ê?

12啥事hō͘埃及人有話講：伊chhōa in出去，是beh害in，害死in tī山中，tùi地上除滅in？求你回心轉(tńg)意，soah你ê大受氣，無降災禍hō͘你ê百姓。Siáⁿ-sū hō͘ Ai-ki̍p lâng ū ōe kóng, I chhōa in chhut-khì, sī beh hāi-in, hāi-sí in tī soaⁿ-tiong, tùi tōe-chiūⁿ tû-bia̍t in? kiû Lí hê-sim tńg-ì, soah Lí ê tōa siū-khì, bô kàng chai-ē hō͘ Lí ê peh-sìⁿ.

13記念你ê奴僕亞伯拉罕、以撒、以色列，你bat kí家己對in chiù-chōa講：我beh hō͘ lín ê後裔親像天頂ê星hiah-chōe；koh我所講chit-ê全地，我beh賞賜lín ê後裔，beh做in永遠ê業。Kì-liām Lí ê lô͘-po̍k A-pek-la̍h-hán, Í-sat, Í-sek-lia̍t, Lí bat kí ka-kī tùi in chiù-chōa kóng, Góa beh hō͘ lín ê hō͘-è chhin-chhiūⁿ thiⁿ-téng ê chhiⁿ hiah-chōe; koh Góa só͘ kóng chit-ê choân-tōe, Góa beh siúⁿ-sù lín ê hō͘-è, beh chòe in éng-oán ê gia̍p.

14Tùi án-ni，耶和華退悔，無降落伊前所講ê災禍，hō͘伊ê百姓。Tùi án-ni Iâ-hô-hoa thè-hóe, bô kàng-lo̍h I chêng só͘ kóng ê chai-ē, hō͘ I ê peh-sìⁿ.

15摩西oa̍t-tńg身落山，手the̍h兩塊約碑，chiah-ê碑兩面lóng有寫；chit面hit面lóng有寫字。Mô͘-se oa̍t-tńg-sin lo̍h soaⁿ, chhiú the̍h nn̄g tè iok-pi, chiah-ê pi nn̄g-bīn lóng ū siá; chit-bīn hit-bīn lóng ū siá-jī.

16碑是上帝做ê，字是上帝寫ê，刻tī碑裡。Pi sī Siōng-tè chòe-ê, jī sī Siōng-tè siá-ê, khek tī pi-ni̍h.

17約書亞一下聽見百姓喊譁(hán-hōa)ê聲，就對摩西講：Tī營中有交戰ê聲。Iok-su-a chi̍t-ē thiaⁿ-kìⁿ peh-sìⁿ hán-hōa ê siaⁿ, chiū tùi Mô͘-se kóng, Tī iâⁿ-tiong ū kau-chiàn ê siaⁿ.

18伊講：我所聽見m̄是thâi贏得勝ê聲，也m̄是thâi輸喉叫ê聲，就是唱歌ê聲。I kóng, Góa só͘ thiaⁿ-kìⁿ m̄-sī thâi-iâⁿ tek-sèng ê siaⁿ, iā m̄-sī thâi-su âu-kiò ê siaⁿ, chiū-sī chhiùⁿ-koa ê siaⁿ.

19行近營盤，看見牛á，koh看見人teh跳舞，摩西就大受氣，tùi伊ê手hiat兩塊石碑，折tī山腳。Kiâⁿ kūn iâⁿ-pôaⁿ, khòaⁿ-kìⁿ gû-á, koh khòaⁿ-kìⁿ lâng teh thiàu-bú, Mô͘-se chiū tōa siū-khì, tùi i ê chhiú hiat nn̄g tè chio̍h-pi, chi̍h tī soaⁿ-kha.

20Koh將in所鑄ê牛á，用火燒，研做粉，掖tī水面，hō͘以色列人lim伊。Koh chiong in só͘ chù ê gû-á, ēng hé sio, géng chòe hún, iā tī chúi-bīn, hō͘ Í-sek-lia̍t lâng lim-i.

21摩西對亞倫講：chit-ê百姓對你做甚麼，你chiah hō͘ in陷落重罪？Mô͘-se tùi A-lûn kóng, Chit-ê peh-sìⁿ tùi lí chòe sím-mi̍h, lí chiah hō͘ in hām-lo̍h tāng-chōe?

22亞倫講：我ê主莫得大受氣；chiah-ê百姓決意做pháiⁿ，是你所知ê。A-lûn kóng, Góa ê chú bo̍h-tit tōa siū-khì; chiah-ê peh-sìⁿ koat-ì chòe pháiⁿ, sī lí só͘ chai-ê.

23In對我講，你kā阮妝上帝，thang行tī阮ê頭前，因為hit-ê摩西，就是chhōa阮tùi埃及地出來，hit-ê人，阮m̄知伊tú-tio̍h甚麼。In tùi góa kóng, Lí kā goán chng siōng-tè, thang kiâⁿ tī goán ê thâu-chêng, in-ūi hit-ê Mô͘-se, chiū-sī chhōa goán tùi Ai-ki̍p tōe chhut-lâi, hit-ê lâng, goán m̄ chai i tú-tio̍h sím-mi̍h.

24我對in講：見若有金ê，pak起來；in將金hō͘我，我hiat伊tī火裡，chit隻牛á就出來。Góa tùi in kóng, Kìⁿ-nā ū kim-ê, pak-khí-lâi; in chiong kim hō͘ góa, góa hiat i tī hé-ni̍h, chit chiah gû-á chiū chhut-lâi.

25摩西看見百姓放縱，因為亞倫放chhut-chāi in，hō͘ in tī對敵ê中間受譏刺，Mô͘-se khòaⁿ-kìⁿ peh-sìⁿ hòng-chhiòng, in-ūi A-lûn pàng chhut-chāi in, hō͘ in tī tùi-te̍k ê tiong-kan siū ki-chhì,

26摩西khiā tī營盤ê門，講：Chī-chūi óa耶和華ê，thang來我chia；利未人就lóng聚集tī伊hia。Mô͘-se khiā tī iâⁿ-pôaⁿ ê mn̂g, kóng, Chī-chūi óa Iâ-hô-hoa-ê, thang lâi góa chia; Lī-bī lâng chiū lóng chū-chi̍p tī i hia.

27伊對in講：耶和華以色列ê上帝án-ni講：Lín ta̍k人tio̍h插刀tī大腿裡，往來tī營中，tùi chit-ê門到hit-ê門，ta̍k人thâi死伊ê兄弟，kap伊ê同伴，以及伊ê厝邊。I tùi in kóng, Iâ-hô-hoa Í-sek-lia̍t ê Siōng-tè án-ni kóng, Lín ta̍k-lâng tio̍h chhah to tī tōa-thúi-ni̍h, óng-lâi tī iâⁿ-tiong, tùi chit-ê mn̂g kàu hit-ê mn̂g, ta̍k-lâng thâi-sí i ê hiaⁿ-tī, kap i ê tâng-phōaⁿ, í-ki̍p i ê chhù-piⁿ.

28利未人照摩西ê話行；hit日百姓中死ê約略三千人。Lī-bī lâng chiàu Mô͘-se ê ōe kiâⁿ; hit-ji̍t peh-sìⁿ-tiong sí-ê iok-lio̍k saⁿ-chheng lâng.

29摩西講：Lín獻家己hō͘耶和華，ta̍k人攻擊伊ê kiáⁿ，伊ê兄弟，今á日得tio̍h伊賜福lín。Mô͘-se kóng, Lín hiàn ka-kī hō͘ Iâ-hô-hoa, ta̍k-lâng kong-kek i ê kiáⁿ, i ê hiaⁿ-tī , kin-á-ji̍t tit-tio̍h I sù-hok lín.

30隔日摩西對百姓講：Lín有犯重罪，我taⁿ beh上去耶和華hia，kiám-chhái thang kā lín贖罪。Keh-ji̍t Mô͘-se tùi peh-sìⁿ kóng, Lín ū hoān tāng-chōe, góa taⁿ beh chiūⁿ-khì Iâ-hô-hoa hia, kiám-chhái thang kā lín sio̍k-chōe.

31摩西倒tńg 到耶和華hia講：Ai-ah，chit-ê百姓犯重罪，為家己做金ê上帝。Mô͘-se tò-tńg kàu Iâ-hô-hoa hia kóng, Ai-ah, chit-ê peh-sìⁿ hoān tāng-chōe, ūi ka-kī chòe kim ê siōng-tè.

32Taⁿ你若beh赦免in ê罪；若m̄，求你tùi你所寫ê冊，擦去我ê名。Taⁿ Lí nā beh sià-bián in ê chōe; nā m̄, kiû Lí tùi Lí só͘ siá ê chheh, chhat-khì góa ê miâ.

33耶和華對摩西講：甚麼人得罪我就tùi我ê冊擦伊ê名。Iâ-hô-hoa tùi Mô͘-se kóng, Sím-mi̍h lâng tek-chōe Góa chiū tùi Góa ê chheh chhat i ê miâ.

34Taⁿ你去chhōa chit-ê百姓去我所kā你講ê所在；看ah，我ê使者beh行tī你ê頭前；獨獨到我辦罪ê日，我beh辦in ê罪。Taⁿ lí khì chhōa chit-ê peh-sìⁿ khì Góa só͘ kā lí kóng ê só͘-chāi; khòaⁿ ah, Góa ê sù-chiá beh kiâⁿ tī lí ê thâu-chêng; to̍k-to̍k kàu Góa pān-chōe ê ji̍t, Góa beh pān in ê chōe.

35耶和華降災禍hō͘百姓，因為in造牛á，就是亞倫所造ê。Iâ-hô-hoa kàng chai-ē hō͘ peh-sìⁿ, in-ūi in chō gû-á, chiū-sī A-lûn só͘ chō-ê.

1耶和華對摩西講：我bat chiù-chōa應允亞伯拉罕、以撒、雅各，講：beh將土地賞賜你ê後裔；taⁿ你去ah，你kap你tùi埃及地所chhōa出來ê百姓，tio̍h tùi chia上去hit-ê地。Iâ-hô-hoa tùi Mô͘-se kóng, Góa bat chiù-chōa èng-ún A-pek-la̍h-hán, Í-sat, Ngá-kok, kóng, Beh chiong thó͘-tōe siúⁿ-sù lí ê hō͘-è; taⁿ lí khì ah, lí kap lí tùi Ai-ki̍p tōe só͘ chhōa chhut-lâi ê peh-sìⁿ, tio̍h tùi chia chiūⁿ-khì hit-ê tōe.

2我beh差使者tī你ê頭前；我beh趕出迦南、A-mô͘-lī、Hek、Pí-lī-sé、Hi-bī、Iâ-pò͘-su hiah-ê族，Góa beh chhe sù-chiá tī lí ê thâu-chêng; Góa beh kóaⁿ-chhut Ka-lâm, A-mô͘-lī, Hek, Pí-lī-sé, Hi-bī, Iâ-pò͘-su hiah-ê cho̍k,

3chhōa你到流奶kap蜜ê地；因為我m̄ kap你上去，為tio̍h你是頷頸硬ê百姓；驚了我tī路裡滅無你。chhōa lí kàu lâu lin kap bi̍t ê tōe; in-ūi Góa m̄ kap lí chiūⁿ-khì, ūi-tio̍h lí sī ām-kún ngī ê peh-sìⁿ; kiaⁿ-liáu Góa tī lō͘-ni̍h bia̍t-bô lí.

4百姓聽見chit-ê pháiⁿ消息就憂悶；無人裝飾。Peh-sìⁿ thiaⁿ-kìⁿ chit-ê pháiⁿ siau-sit chiū iu-būn; bô lâng chng-thāⁿ.

5耶和華對摩西講：你tio̍h kā以色列人講：Lín是頷頸硬ê百姓，我若一目nih久到lín中間，我的確剿滅lín；taⁿ tio̍h將lín身軀ê裝飾pak起來，我就知我beh怎樣款待lín。Iâ-hô-hoa tùi Mô͘-se kóng, Lí tio̍h kā Í-sek-lia̍t lâng kóng, Lín sī ām-kún ngī ê peh-sìⁿ, Góa nā chi̍t-ba̍k-nih-kú kàu lín tiong-kan, Góa tek-khak châu-bia̍t lín; taⁿ tio̍h chiong lín seng-khu ê chng-thāⁿ pak-khí-lâi, Góa chiū chai Góa beh cháiⁿ-iūⁿ khoán-thāi lín.

6以色列人tùi tī何烈山以後，就將身軀ê裝飾thǹg起來。Í-sek-lia̍t lâng tùi tī Hô-lia̍t soaⁿ í-āu, chiū chiong seng-khu ê chng-thāⁿ thǹg-khí-lâi.

7摩西將布棚搭tī營外，離開營有hiah遠；伊清chit-ê布棚做會幕，凡若chhē求耶和華ê人，就到營外ê會幕hia。Mô͘-se chiong pò͘-pîⁿ tah tī iâⁿ-gōa, lī-khui iâⁿ ū hiah-hn̄g; i chheng chit-ê pò͘-pîⁿ chòe hōe-bō͘, hoān-nā chhē-kiû Iâ-hô-hoa ê lâng, chiū kàu iâⁿ-gōa ê hōe-bō͘ hia.

8當摩西出去到布棚ê時，眾百姓就lóng起來，ta̍k人khiā tī in ê布棚口，teh看摩西，到伊入布棚。Tng Mô͘-se chhut-khì kàu Pò͘-pîⁿ ê sî, chèng peh-sìⁿ chiū lóng khí-lâi, ta̍k-lâng khiā tī in ê pò͘-pîⁿ-kháu, teh khòaⁿ Mô͘-se, kàu i ji̍p Pò͘-pîⁿ.

9摩西入布棚ê時，雲柱就落來，khiā tī布棚ê門前；耶和華就kap摩西講話。Mô͘-se ji̍p Pò͘-pîⁿ ê sî, hûn-thiāu chiū lo̍h-lâi, khiā tī Pò͘-pîⁿ ê mn̂g-chêng; Iâ-hô-hoa chiū kap Mô͘-se kóng-ōe.

10眾百姓看見雲柱khiā tī布棚ê門前，百姓就lóng起來，ta̍k人tī in ê布棚門口跪拜。Chèng peh-sìⁿ khòaⁿ-kìⁿ hûn-thiāu khiā tī Pò͘-pîⁿ ê mn̂g-chêng, peh-sìⁿ chiū lóng khí-lâi, ta̍k-lâng tī in ê pò͘-pîⁿ mn̂g-kháu kūi-pài.

11耶和華kap摩西面對面講話，親像人kap朋友講話一般樣。摩西倒tńg來營內；獨獨跟隨伊ê少年人Lùn ê kiáⁿ約書亞無離開布棚。Iâ-hô-hoa kap Mô͘-se bīn tùi bīn kóng-ōe, chhin-chhiūⁿ lâng kap pêng-iú kóng-ōe chi̍t-poaⁿ-iūⁿ. Mô͘-se tò-tńg-lâi iâⁿ-lāi; to̍k-to̍k kun-sûi i ê siàu-liân lâng Lùn ê kiáⁿ Iok-su-a bô lī-khui Pò͘-pîⁿ.

12摩西對耶和華講：看ah，你對我講，將chit-ê百姓chhōa上去，總是無hō͘我知你beh差 是誰 kap我相kap去。只有講：我用名揀召你，你tī我ê面前也得tio̍h恩典。Mô͘-se tùi Iâ-hô-hoa kóng, Khòaⁿ ah, Lí tùi góa kóng, Chiong chit-ê peh-sìⁿ chhōa chiūⁿ-khì, chóng-sī bô hō͘ góa chai Lí beh chhe chī-chūi kap góa saⁿ-kap khì. Chí-ū kóng, Góa ēng miâ kéng-tiàu lí, lí tī Góa ê bīn-chêng iā tit-tio̍h un-tián.

13我taⁿ若tī你ê面前得tio̍h恩典，求你將你ê路指示我，hō͘我bat你，thang tī你ê面前得tio̍h恩典；你tio̍h siàu念chit族是你ê百姓。Góa taⁿ nā tī Lí ê bīn-chêng tit-tio̍h un-tián, kiû Lí chiong Lí ê lō͘ chí-sī góa, hō͘ góa bat Lí, thang tī Lí ê bīn-chêng tit-tio̍h un-tián; Lí tio̍h siàu-liām chit-cho̍k sī Lí ê peh-sìⁿ.

14耶和華講：我beh親身kap你去，hō͘你平安。Iâ-hô-hoa kóng, Góa beh chhin-sin kap lí khì, hō͘ lí pêng-an.

15摩西對伊講，你若無親身kap我去，就m̄-thang chhōa阮tùi-chia上去。Mô͘-se tùi I kóng, Lí nā bô chhin-sin kap góa khì, chiū m̄-thang chhōa goán tùi-chia chiūⁿ-khì.

16Tùi怎樣會知，我kap你ê百姓tī你ê面前得tio̍h恩典？kiám m̄是tùi你kap阮相kap去，hō͘我kap你ê百姓tī地上萬百姓有分別mah？Tùi cháiⁿ-iūⁿ ōe chai, góa kap Lí ê peh-sìⁿ tī Lí ê bīn-chêng tit-tio̍h un-tián? kiám m̄-sī tùi Lí kap goán saⁿ-kap khì, hō͘ góa kap Lí ê peh-sìⁿ tī tōe-chiūⁿ bān peh-sìⁿ ū hun-piat mah?

17耶和華對摩西講：你所講chit-ê事，我也beh做伊；因為你tī我ê面前得tio̍h恩典，koh我用名揀召你。Iâ-hô-hoa tùi Mô͘-se kóng, Lí só͘ kóng chit-ê sū, Góa iā beh chòe-i; in-ūi lí tī Góa ê bīn-chêng tit-tio̍h un-tián, koh Góa ēng miâ kéng-tiàu lí.

18伊講：求你hō͘我看見你ê榮光。I kóng, Kiû Lí hō͘ góa khòaⁿ-kìⁿ Lí ê êng-kng.

19伊講：我beh hō͘我一切ê恩惠經過你ê面前，也宣布耶和華ê名tī你ê面前。我beh施恩tī我所施恩ê，我beh憐憫tī我所憐憫ê。I kóng, Góa beh hō͘ Góa it-chhè ê un-hūi keng-kè lí ê bīn-chêng, iā soan-pò͘ Iâ-hô-hoa ê miâ tī lí ê bīn-chêng. Góa beh si-un tī Góa só͘ si-un-ê, Góa beh lîn-bín tī Góa só͘ lîn-bín-ê.

20Koh講：你bōe能看我ê面，因為無人會看見我也能活。Koh kóng, Lí bōe-ōe khòaⁿ Góa ê bīn, in-ūi bô lâng ōe khòaⁿ-kìⁿ Góa iā ōe oa̍h.

21耶和華講：看ah，近我chia有所在，你tio̍h khiā tī石磐頂；Iâ-hô-hoa kóng, Khòaⁿ-ah, kūn Góa chia ū só͘-chāi, lí tio̍h khiā tī chio̍h-pôaⁿ-téng;

22當我ê榮光經過ê時，我beh kā你hē tī石磐縫內，用我ê手遮你；thèng候我過去；tng Góa ê êng-kng keng-kè ê sî, Góa beh kā lí hē tī chio̍h-pôaⁿ phāng-lāi, ēng Góa ê chhiú jia-lí; thèng-hāu Góa kè-khì;

23然後我beh kiu我ê手倒tńg，你就會看見我ê ka-chiah後；總是bōe得thang看見我ê面。jiân-āu Góa beh kiu Góa ê chhiú tò-tńg, lí chiū ōe khòaⁿ-kìⁿ Góa ê ka-chiah-āu; chóng-sī bōe-tit-thang khòaⁿ-kìⁿ Góa ê bīn.

1耶和華對摩西講：你phah兩塊石碑，kap以前ê相同，你前所phah破hiah-ê 碑；hit頂面ê字，我beh寫tī chiah-ê碑。Iâ-hô-hoa tùi Mô͘-se kóng, Lí phah nn̄g-tè chio̍h-pi, kap í-chêng-ê saⁿ-tâng, lí chêng só͘ phah-phòa hiah-ê pi; hit téng-bīn ê jī, Góa beh siá tī chiah-ê pi.

2明á早起你tio̍h備辦便；透早你tio̍h 上西奈山；tī-hia，tī山尾溜，khiā tī我面前，Bîn-á-chá-khí lí tio̍h pī-pān piān; thàu-chá lí tio̍h chiūⁿ Se-nái soaⁿ; tī-hia, tī soaⁿ-bé-liu, khiā tī Góa bīn-chêng,

3M̄-thang有人kap你上來；遍山lóng m̄-thang看見有人，tī山腳也m̄-thang hō͘牛群羊群食草。M̄-thang ū lâng kap lí chiūⁿ-lâi; piàn-soaⁿ lóng m̄-thang khòaⁿ-kìⁿ ū lâng, tī soaⁿ-kha iā m̄-thang hō͘ gû-kûn iûⁿ-kûn chia̍h-chháu.

4伊就phah兩塊石碑，kap以前ê相同；摩西透早起來，照耶和華所吩咐伊ê，上去西奈山，手裡the̍h兩塊石碑。I chiū phah nn̄g tè chio̍h-pi, kap í-chêng-ê saⁿ-tâng; Mô͘-se thàu-chá khí-lâi, chiàu Iâ-hô-hoa só͘ hoan-hù i ê, chiūⁿ-khì Se-nái soaⁿ, chhiú-ni̍h the̍h nn̄g tè chio̍h-pi.

5耶和華坐雲臨到，kap伊khiā tī-hia，宣布耶和華ê名。Iâ-hô-hoa chē-hûn lîm-kàu, kap i khiā tī-hia, soan-pò͘ Iâ-hô-hoa ê miâ.

6耶和華tùi伊ê面前經過，宣布講：耶和華，耶和華是有憐憫，有恩典ê上帝，無快受氣，koh有豐盛ê慈愛kap誠實；Iâ-hô-hoa tùi i ê bīn-chêng keng-kè, soan-pò͘ kóng, Iâ-hô-hoa, Iâ-hô-hoa sī ū lîn-bín, ū un-tián ê Siōng-tè, bô khoài siū-khì, koh ū hong-sēng ê chû-ài kap sêng-si̍t;

7為千萬人存慈愛，赦免罪過、過失kap罪惡；決斷無掠有罪ê做無罪；beh歸咎(kiū)伊ê罪，tùi父到kiáⁿ，到孫，到三四代。ūi chheng-bān lâng chûn chû-ài, sià-bián chōe-kòa, kè-sit kap chōe-ok; koat-toàn bô lia̍h ū-chōe-ê chòe bô chōe; beh kui-kiū i ê chōe, tùi pē kàu kiáⁿ, kàu sun, kàu saⁿ-sì-tāi.

8摩西緊緊àⁿ落地敬拜，講：Mô͘-se kín-kín àⁿ-lo̍h tōe kèng-pài, kóng,

9主ah，我若得tio̍h恩典tī你ê面前，求主tī阮中間相kap行；因為這是頷頸硬ê百姓；koh求你赦免阮ê罪過，kap阮ê罪惡，掠阮做你ê產業。Chú ah, góa nā tit-tio̍h un-tián tī Lí ê bīn-chêng, kiû Chú tī goán tiong-kan saⁿ-kap kiâⁿ; in-ūi che sī ām-kún ngī ê peh-sìⁿ; koh kiû Lí sià-bián goán ê chōe-kòa, kap goán ê chōe-ok, lia̍h goán chòe Lí ê sán-gia̍p.

10耶和華講：看ah，我beh立約，beh tī你眾百姓ê面前行奇妙ê事，是天下萬國中所bē-bat行ê；tī你四圍ê眾百姓，就beh看見耶和華ê所做；因為我tùi你所行ê，是thang驚ê事。Iâ-hô-hoa kóng, Khòaⁿ ah, Góa beh li̍p-iok, beh tī lí chèng peh-sìⁿ ê bīn-chêng kiâⁿ kî-biāu ê sū, sī thiⁿ-ē bān-kok-tiong só͘ bē-bat kiâⁿ-ê; tī lí sì-ûi ê chèng peh-sìⁿ, chiū beh khòaⁿ-kìⁿ Iâ-hô-hoa ê só͘-chòe; in-ūi Góa tùi lí só͘ kiâⁿ-ê, sī thang kiaⁿ ê sū.

11我今á日所吩咐你ê，你tio̍h執守；看ah，我beh對你ê面前趕出A-mô͘-lī、迦南、Hek、Pí-lī-sé、Hi-bī、Iâ-pò͘-su hiah-ê族。Góa kin-á-ji̍t só͘ hoan-hù lí-ê, lí tio̍h chip-siú; khòaⁿ ah, Góa beh tùi lí ê bīn-chêng kóaⁿ-chhut A-mô͘-lī, Ka-lâm, Hek, Pí-lī-sé, Hi-bī, Iâ-pò͘-su hiah-ê cho̍k.

12你家己謹慎，m̄-thang kap你所去hit所在khiā起ê百姓立約，驚了成做lín中間ê羅網。Lí ka-kī kín-sīn, m̄-thang kap lí só͘ khì hit só͘-chāi khiā-khí ê peh-sìⁿ li̍p-iok, kiaⁿ-liáu chiâⁿ-chòe lín tiong-kan ê lô-bāng.

13就是tio̍h拆in ê祭壇，phah碎in雕刻ê柱，剉(chhò) in ê A-sià-la̍h。Chiū-sī tio̍h thiah in ê chè-tôaⁿ, phah-chhùi in tiau-khek ê thiāu, chhò in ê A-sià-la̍h.

14M̄-thang敬拜別個上帝；因為耶和華ê名稱做獨尊，伊是獨尊ê上帝；M̄-thang kèng-pài pa̍t ê Siōng-tè; in-ūi Iâ-hô-hoa ê miâ chheng-chòe To̍k-chun, i sī to̍k-chun ê Siōng-tè;

15驚了你kap hit所在khiā起ê百姓立約，in塊 in ê上帝行邪淫，祭祀in ê上帝，有人叫你，你就食伊ê祭物；kiaⁿ-liáu lí kap hit só͘-chāi khiā-khí ê peh-sìⁿ li̍p-iok, in tè in ê siōng-tè kiâⁿ siâ-îm, chè-sū in ê siōng-tè, ū lâng kiò lí, lí chiū chia̍h i ê chè-mi̍h;

16koh驚了你kā你ê kiáⁿ chhōa in ê cha-bó͘-kiáⁿ做bó͘，in ê cha-bó͘-kiáⁿ塊 in ê上帝行邪淫，hō͘你ê kiáⁿ也tè in ê上帝行邪淫。koh kiaⁿ-liáu lí kā lí ê kiáⁿ chhōa in ê cha-bó͘-kiáⁿ chòe-bó͘, in ê cha-bó͘-kiáⁿ tè in ê siōng-tè kiâⁿ siâ-îm, hō͘ lí ê kiáⁿ iā tè in ê siōng-tè kiâⁿ siâ-îm.

17你m̄-thang為家己鑄造chiah-ê上帝。Lí m̄-thang ūi ka-kī chù-chō chiah-ê siōng-tè.

18你tio̍h守除酵節。照我所吩咐你ê，tī A-pit月內所定tio̍h ê日期，食無酵餅七日，因為你tī A-pit月內出埃及。Lí tio̍h siú tû-kàⁿ-choeh. Chiàu Góa só͘ hoan-hù lí-ê, tī A-pit ge̍h-lāi só͘ tiāⁿ-tio̍h ê ji̍t-kî, chia̍h bô-kàⁿ-piáⁿ chhit-ji̍t, in-ūi lí tī A-pit ge̍h-lāi chhut Ai-ki̍p.

19見若頭胎ê，lóng是我ê，一切ê cheng-siⁿ頭水ê，無論是牛，是羊，公ê lóng是我ê。Kìⁿ-nā thâu-thai-ê, lóng sī Góa-ê, it-chhè ê cheng-siⁿ thâu-chúi-ê, bô-lūn sī gû, sī iûⁿ, kang-ê lóng sī Góa-ê.

20頭水ê驢tio̍h用羊á替贖；若無替贖，就tio̍h kòng折伊ê頷頸。見若你頭上ê kiáⁿ，lóng tio̍h贖回。人來見我m̄-thang空手。Thâu-chúi ê lû tio̍h ēng iûⁿ-á thòe-sio̍k; nā bô thòe-sio̍k, chiū tio̍h kòng-chi̍h i ê ām-kún. Kìⁿ-nā lí thâu-chiūⁿ ê kiáⁿ, lóng tio̍h sio̍k-hôe. Lâng lâi kìⁿ Góa m̄-thang khang-chhiú.

21你六日tio̍h做工，第七日tio̍h安歇；tī栽種收割ê時也tio̍h安歇。Lí la̍k-ji̍t tio̍h chòe kang, tē-chhit ji̍t tio̍h an-hioh; tī chai-chèng siu-koah ê sî iā tio̍h an-hioh.

22麥起頭熟，收割ê時，tio̍h守七七日節。 Koh tī年尾，tio̍h守收khǹg ê節。Be̍h khí-thâu se̍k, siu-koah ê sî, tio̍h siú chhit-chhit-ji̍t choeh. Koh tī nî-bé, tio̍h siú siu-khǹg ê choeh.

23Lín一切ê ta-po͘丁，tio̍h一年三pái來見主耶和華，以色列ê上帝。Lín it-chhè ê ta-po͘-teng, tio̍h chi̍t-nî saⁿ-pái lâi kìⁿ Chú Iâ-hô-hoa, Í-sek-lia̍t ê Siōng-tè.

24我beh對你ê面前趕出外邦人，開闊你ê境界；你一年三pái上去見耶和華，你ê上帝ê時，的確無人貪你ê土地。Góa beh tùi lí ê bīn-chêng kóaⁿ-chhut gōa-pang lâng, khui-khoah lí ê kéng-kài; lí chi̍t-nî saⁿ-pái chiūⁿ-khì kìⁿ Iâ-hô-hoa, lí ê Siōng-tè ê sî, tek-khak bô lâng tham lí ê thó͘-tōe.

25你m̄-thang將我ê牲禮ê血，chham有酵ê物來獻；pôaⁿ過節ê祭物也m̄-thang留到隔早起。Lí m̄-thang chiong Góa ê seng-lé ê huih, chham ū kàⁿ ê mi̍h lâi hiàn; pôaⁿ-kè-choeh ê chè-mi̍h iā m̄-thang lâu kàu keh chá-khí.

26地裡第一起頭熟 ê物，tio̍h送到耶和華你ê上帝ê厝。煮山羊á m̄-thang用伊ê母ê奶。Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí ê Siōng-tè ê chhù. Chú soaⁿ-iûⁿ-á m̄-thang ēng i ê bú ê lin.

27耶和華對摩西講：你tio̍h寫chiah-ê話，因為我是照chiah-ê話kap你以及以色列立約。Iâ-hô-hoa tùi Mô͘-se kóng, Lí tio̍h siá chiah-ê ōe, in-ūi Góa sī chiàu chiah-ê ōe kap lí í-ki̍p Í-sek-lia̍t li̍p-iok.

28摩西kap耶和華tī-hia四十日四十暝，無食餅無lim水。伊將chit-ê約ê話，就是十條誡，寫tī兩塊碑。Mô͘-se kap Iâ-hô-hoa tī-hia sì-cha̍p ji̍t sì-cha̍p mî, bô chia̍h piáⁿ bô lim chúi. I chiong chit-ê iok ê ōe, chiū-sī cha̍p-tiâu-kài, siá tī nn̄g tè pi.

29摩西落西奈山ê時，伊ê手the̍h兩塊約碑，伊落山ê時，伊ê面，因為耶和華kap伊講話，就射出光，摩西家己m̄知。Mô͘-se lo̍h Se-nái soaⁿ ê sî, i ê chhiú the̍h nn̄g tè iok-pi, i lo̍h-soaⁿ ê sî, i ê bīn, in-ūi Iâ-hô-hoa kap i kóng-ōe, chiū siā-chhut kng, Mô͘-se ka-kī m̄-chai.

30亞倫kap以色列眾人看見摩西ê時，看ah，伊ê面射出光；in就驚，m̄敢óa近伊。A-lûn kap Í-sek-lia̍t chèng-lâng khòaⁿ-kìⁿ Mô͘-se ê sî, khòaⁿ ah, i ê bīn siā-chhut kng; in chiū kiaⁿ, m̄-káⁿ óa-kūn i.

31摩西叫in來，亞倫kap會中chiah-ê頭人就lóng 倒tńg到伊hia；摩西就kap in講話。Mô͘-se kiò in lâi, A-lûn kap hōe-tiong chiah-ê thâu-lâng chiū lóng tò-tńg kàu i hia; Mô͘-se chiū kap in kóng-ōe.

32然後以色列眾人lóng進前來；伊就將耶和華tī西奈山kap伊所講一切ê話，lóng吩咐in。Jiân-āu Í-sek-lia̍t chèng-lâng lóng chìn-chêng lâi; i chiū chiong Iâ-hô-hoa tī Se-nái soaⁿ kap i só͘ kóng it-chhè ê ōe, lóng hoan-hù in.

33摩西kap in講話明白，就用帕罩面。Mô͘-se kap in kóng ōe bêng-pe̍k, chiū ēng phè tà-bīn.

34總是摩西入去耶和華面前kap伊講話，帕就掀起來，到伊出來。伊出來ê時，就將耶和華所吩咐ê，kā以色列人講。Chóng-sī Mô͘-se ji̍p-khì Iâ-hô-hoa bīn-chêng kap I kóng-ōe, phè chiū hian-khí-lâi, kàu i chhut-lâi. I chhut-lâi ê sî, chiū chiong Iâ-hô-hoa só͘ hoan-hù-ê, kā Í-sek-lia̍t lâng kóng.

35以色列人看見摩西ê面，摩西ê面射出光，摩西koh用帕罩面，thèng候到伊入去kap耶和華講話帕就掀起來。Í-sek-lia̍t lâng khòaⁿ-kìⁿ Mô͘-se ê bīn, Mô͘-se ê bīn siā-chhut kng, Mô͘-se koh ēng phè tà-bīn, thèng-hāu kàu i ji̍p-khì kap Iâ-hô-hoa kóng-ōe phè chiū hian-khí-lâi.