1耶和華對摩西講：我bat chiù-chōa應允亞伯拉罕、以撒、雅各，講：beh將土地賞賜你ê後裔；taⁿ你去ah，你kap你tùi埃及地所chhōa出來ê百姓，tio̍h tùi chia上去hit-ê地。Iâ-hô-hoa tùi Mô͘-se kóng, Góa bat chiù-chōa èng-ún A-pek-la̍h-hán, Í-sat, Ngá-kok, kóng, Beh chiong thó͘-tōe siúⁿ-sù lí ê hō͘-è; taⁿ lí khì ah, lí kap lí tùi Ai-ki̍p tōe só͘ chhōa chhut-lâi ê peh-sìⁿ, tio̍h tùi chia chiūⁿ-khì hit-ê tōe.

2我beh差使者tī你ê頭前；我beh趕出迦南、A-mô͘-lī、Hek、Pí-lī-sé、Hi-bī、Iâ-pò͘-su hiah-ê族，Góa beh chhe sù-chiá tī lí ê thâu-chêng; Góa beh kóaⁿ-chhut Ka-lâm, A-mô͘-lī, Hek, Pí-lī-sé, Hi-bī, Iâ-pò͘-su hiah-ê cho̍k,

3chhōa你到流奶kap蜜ê地；因為我m̄ kap你上去，為tio̍h你是頷頸硬ê百姓；驚了我tī路裡滅無你。chhōa lí kàu lâu lin kap bi̍t ê tōe; in-ūi Góa m̄ kap lí chiūⁿ-khì, ūi-tio̍h lí sī ām-kún ngī ê peh-sìⁿ; kiaⁿ-liáu Góa tī lō͘-ni̍h bia̍t-bô lí.

4百姓聽見chit-ê pháiⁿ消息就憂悶；無人裝飾。Peh-sìⁿ thiaⁿ-kìⁿ chit-ê pháiⁿ siau-sit chiū iu-būn; bô lâng chng-thāⁿ.

5耶和華對摩西講：你tio̍h kā以色列人講：Lín是頷頸硬ê百姓，我若一目nih久到lín中間，我的確剿滅lín；taⁿ tio̍h將lín身軀ê裝飾pak起來，我就知我beh怎樣款待lín。Iâ-hô-hoa tùi Mô͘-se kóng, Lí tio̍h kā Í-sek-lia̍t lâng kóng, Lín sī ām-kún ngī ê peh-sìⁿ, Góa nā chi̍t-ba̍k-nih-kú kàu lín tiong-kan, Góa tek-khak châu-bia̍t lín; taⁿ tio̍h chiong lín seng-khu ê chng-thāⁿ pak-khí-lâi, Góa chiū chai Góa beh cháiⁿ-iūⁿ khoán-thāi lín.

6以色列人tùi tī何烈山以後，就將身軀ê裝飾thǹg起來。Í-sek-lia̍t lâng tùi tī Hô-lia̍t soaⁿ í-āu, chiū chiong seng-khu ê chng-thāⁿ thǹg-khí-lâi.

7摩西將布棚搭tī營外，離開營有hiah遠；伊清chit-ê布棚做會幕，凡若chhē求耶和華ê人，就到營外ê會幕hia。Mô͘-se chiong pò͘-pîⁿ tah tī iâⁿ-gōa, lī-khui iâⁿ ū hiah-hn̄g; i chheng chit-ê pò͘-pîⁿ chòe hōe-bō͘, hoān-nā chhē-kiû Iâ-hô-hoa ê lâng, chiū kàu iâⁿ-gōa ê hōe-bō͘ hia.

8當摩西出去到布棚ê時，眾百姓就lóng起來，ta̍k人khiā tī in ê布棚口，teh看摩西，到伊入布棚。Tng Mô͘-se chhut-khì kàu Pò͘-pîⁿ ê sî, chèng peh-sìⁿ chiū lóng khí-lâi, ta̍k-lâng khiā tī in ê pò͘-pîⁿ-kháu, teh khòaⁿ Mô͘-se, kàu i ji̍p Pò͘-pîⁿ.

9摩西入布棚ê時，雲柱就落來，khiā tī布棚ê門前；耶和華就kap摩西講話。Mô͘-se ji̍p Pò͘-pîⁿ ê sî, hûn-thiāu chiū lo̍h-lâi, khiā tī Pò͘-pîⁿ ê mn̂g-chêng; Iâ-hô-hoa chiū kap Mô͘-se kóng-ōe.

10眾百姓看見雲柱khiā tī布棚ê門前，百姓就lóng起來，ta̍k人tī in ê布棚門口跪拜。Chèng peh-sìⁿ khòaⁿ-kìⁿ hûn-thiāu khiā tī Pò͘-pîⁿ ê mn̂g-chêng, peh-sìⁿ chiū lóng khí-lâi, ta̍k-lâng tī in ê pò͘-pîⁿ mn̂g-kháu kūi-pài.

11耶和華kap摩西面對面講話，親像人kap朋友講話一般樣。摩西倒tńg來營內；獨獨跟隨伊ê少年人Lùn ê kiáⁿ約書亞無離開布棚。Iâ-hô-hoa kap Mô͘-se bīn tùi bīn kóng-ōe, chhin-chhiūⁿ lâng kap pêng-iú kóng-ōe chi̍t-poaⁿ-iūⁿ. Mô͘-se tò-tńg-lâi iâⁿ-lāi; to̍k-to̍k kun-sûi i ê siàu-liân lâng Lùn ê kiáⁿ Iok-su-a bô lī-khui Pò͘-pîⁿ.

12摩西對耶和華講：看ah，你對我講，將chit-ê百姓chhōa上去，總是無hō͘我知你beh差 是誰 kap我相kap去。只有講：我用名揀召你，你tī我ê面前也得tio̍h恩典。Mô͘-se tùi Iâ-hô-hoa kóng, Khòaⁿ ah, Lí tùi góa kóng, Chiong chit-ê peh-sìⁿ chhōa chiūⁿ-khì, chóng-sī bô hō͘ góa chai Lí beh chhe chī-chūi kap góa saⁿ-kap khì. Chí-ū kóng, Góa ēng miâ kéng-tiàu lí, lí tī Góa ê bīn-chêng iā tit-tio̍h un-tián.

13我taⁿ若tī你ê面前得tio̍h恩典，求你將你ê路指示我，hō͘我bat你，thang tī你ê面前得tio̍h恩典；你tio̍h siàu念chit族是你ê百姓。Góa taⁿ nā tī Lí ê bīn-chêng tit-tio̍h un-tián, kiû Lí chiong Lí ê lō͘ chí-sī góa, hō͘ góa bat Lí, thang tī Lí ê bīn-chêng tit-tio̍h un-tián; Lí tio̍h siàu-liām chit-cho̍k sī Lí ê peh-sìⁿ.

14耶和華講：我beh親身kap你去，hō͘你平安。Iâ-hô-hoa kóng, Góa beh chhin-sin kap lí khì, hō͘ lí pêng-an.

15摩西對伊講，你若無親身kap我去，就m̄-thang chhōa阮tùi-chia上去。Mô͘-se tùi I kóng, Lí nā bô chhin-sin kap góa khì, chiū m̄-thang chhōa goán tùi-chia chiūⁿ-khì.

16Tùi怎樣會知，我kap你ê百姓tī你ê面前得tio̍h恩典？kiám m̄是tùi你kap阮相kap去，hō͘我kap你ê百姓tī地上萬百姓有分別mah？Tùi cháiⁿ-iūⁿ ōe chai, góa kap Lí ê peh-sìⁿ tī Lí ê bīn-chêng tit-tio̍h un-tián? kiám m̄-sī tùi Lí kap goán saⁿ-kap khì, hō͘ góa kap Lí ê peh-sìⁿ tī tōe-chiūⁿ bān peh-sìⁿ ū hun-piat mah?

17耶和華對摩西講：你所講chit-ê事，我也beh做伊；因為你tī我ê面前得tio̍h恩典，koh我用名揀召你。Iâ-hô-hoa tùi Mô͘-se kóng, Lí só͘ kóng chit-ê sū, Góa iā beh chòe-i; in-ūi lí tī Góa ê bīn-chêng tit-tio̍h un-tián, koh Góa ēng miâ kéng-tiàu lí.

18伊講：求你hō͘我看見你ê榮光。I kóng, Kiû Lí hō͘ góa khòaⁿ-kìⁿ Lí ê êng-kng.

19伊講：我beh hō͘我一切ê恩惠經過你ê面前，也宣布耶和華ê名tī你ê面前。我beh施恩tī我所施恩ê，我beh憐憫tī我所憐憫ê。I kóng, Góa beh hō͘ Góa it-chhè ê un-hūi keng-kè lí ê bīn-chêng, iā soan-pò͘ Iâ-hô-hoa ê miâ tī lí ê bīn-chêng. Góa beh si-un tī Góa só͘ si-un-ê, Góa beh lîn-bín tī Góa só͘ lîn-bín-ê.

20Koh講：你bōe能看我ê面，因為無人會看見我也能活。Koh kóng, Lí bōe-ōe khòaⁿ Góa ê bīn, in-ūi bô lâng ōe khòaⁿ-kìⁿ Góa iā ōe oa̍h.

21耶和華講：看ah，近我chia有所在，你tio̍h khiā tī石磐頂；Iâ-hô-hoa kóng, Khòaⁿ-ah, kūn Góa chia ū só͘-chāi, lí tio̍h khiā tī chio̍h-pôaⁿ-téng;

22當我ê榮光經過ê時，我beh kā你hē tī石磐縫內，用我ê手遮你；thèng候我過去；tng Góa ê êng-kng keng-kè ê sî, Góa beh kā lí hē tī chio̍h-pôaⁿ phāng-lāi, ēng Góa ê chhiú jia-lí; thèng-hāu Góa kè-khì;

23然後我beh kiu我ê手倒tńg，你就會看見我ê ka-chiah後；總是bōe得thang看見我ê面。jiân-āu Góa beh kiu Góa ê chhiú tò-tńg, lí chiū ōe khòaⁿ-kìⁿ Góa ê ka-chiah-āu; chóng-sī bōe-tit-thang khòaⁿ-kìⁿ Góa ê bīn.

1耶和華對摩西講：你phah兩塊石碑，kap以前ê相同，你前所phah破hiah-ê 碑；hit頂面ê字，我beh寫tī chiah-ê碑。Iâ-hô-hoa tùi Mô͘-se kóng, Lí phah nn̄g-tè chio̍h-pi, kap í-chêng-ê saⁿ-tâng, lí chêng só͘ phah-phòa hiah-ê pi; hit téng-bīn ê jī, Góa beh siá tī chiah-ê pi.

2明á早起你tio̍h備辦便；透早你tio̍h 上西奈山；tī-hia，tī山尾溜，khiā tī我面前，Bîn-á-chá-khí lí tio̍h pī-pān piān; thàu-chá lí tio̍h chiūⁿ Se-nái soaⁿ; tī-hia, tī soaⁿ-bé-liu, khiā tī Góa bīn-chêng,

3M̄-thang有人kap你上來；遍山lóng m̄-thang看見有人，tī山腳也m̄-thang hō͘牛群羊群食草。M̄-thang ū lâng kap lí chiūⁿ-lâi; piàn-soaⁿ lóng m̄-thang khòaⁿ-kìⁿ ū lâng, tī soaⁿ-kha iā m̄-thang hō͘ gû-kûn iûⁿ-kûn chia̍h-chháu.

4伊就phah兩塊石碑，kap以前ê相同；摩西透早起來，照耶和華所吩咐伊ê，上去西奈山，手裡the̍h兩塊石碑。I chiū phah nn̄g tè chio̍h-pi, kap í-chêng-ê saⁿ-tâng; Mô͘-se thàu-chá khí-lâi, chiàu Iâ-hô-hoa só͘ hoan-hù i ê, chiūⁿ-khì Se-nái soaⁿ, chhiú-ni̍h the̍h nn̄g tè chio̍h-pi.

5耶和華坐雲臨到，kap伊khiā tī-hia，宣布耶和華ê名。Iâ-hô-hoa chē-hûn lîm-kàu, kap i khiā tī-hia, soan-pò͘ Iâ-hô-hoa ê miâ.

6耶和華tùi伊ê面前經過，宣布講：耶和華，耶和華是有憐憫，有恩典ê上帝，無快受氣，koh有豐盛ê慈愛kap誠實；Iâ-hô-hoa tùi i ê bīn-chêng keng-kè, soan-pò͘ kóng, Iâ-hô-hoa, Iâ-hô-hoa sī ū lîn-bín, ū un-tián ê Siōng-tè, bô khoài siū-khì, koh ū hong-sēng ê chû-ài kap sêng-si̍t;

7為千萬人存慈愛，赦免罪過、過失kap罪惡；決斷無掠有罪ê做無罪；beh歸咎(kiū)伊ê罪，tùi父到kiáⁿ，到孫，到三四代。ūi chheng-bān lâng chûn chû-ài, sià-bián chōe-kòa, kè-sit kap chōe-ok; koat-toàn bô lia̍h ū-chōe-ê chòe bô chōe; beh kui-kiū i ê chōe, tùi pē kàu kiáⁿ, kàu sun, kàu saⁿ-sì-tāi.

8摩西緊緊àⁿ落地敬拜，講：Mô͘-se kín-kín àⁿ-lo̍h tōe kèng-pài, kóng,

9主ah，我若得tio̍h恩典tī你ê面前，求主tī阮中間相kap行；因為這是頷頸硬ê百姓；koh求你赦免阮ê罪過，kap阮ê罪惡，掠阮做你ê產業。Chú ah, góa nā tit-tio̍h un-tián tī Lí ê bīn-chêng, kiû Chú tī goán tiong-kan saⁿ-kap kiâⁿ; in-ūi che sī ām-kún ngī ê peh-sìⁿ; koh kiû Lí sià-bián goán ê chōe-kòa, kap goán ê chōe-ok, lia̍h goán chòe Lí ê sán-gia̍p.

10耶和華講：看ah，我beh立約，beh tī你眾百姓ê面前行奇妙ê事，是天下萬國中所bē-bat行ê；tī你四圍ê眾百姓，就beh看見耶和華ê所做；因為我tùi你所行ê，是thang驚ê事。Iâ-hô-hoa kóng, Khòaⁿ ah, Góa beh li̍p-iok, beh tī lí chèng peh-sìⁿ ê bīn-chêng kiâⁿ kî-biāu ê sū, sī thiⁿ-ē bān-kok-tiong só͘ bē-bat kiâⁿ-ê; tī lí sì-ûi ê chèng peh-sìⁿ, chiū beh khòaⁿ-kìⁿ Iâ-hô-hoa ê só͘-chòe; in-ūi Góa tùi lí só͘ kiâⁿ-ê, sī thang kiaⁿ ê sū.

11我今á日所吩咐你ê，你tio̍h執守；看ah，我beh對你ê面前趕出A-mô͘-lī、迦南、Hek、Pí-lī-sé、Hi-bī、Iâ-pò͘-su hiah-ê族。Góa kin-á-ji̍t só͘ hoan-hù lí-ê, lí tio̍h chip-siú; khòaⁿ ah, Góa beh tùi lí ê bīn-chêng kóaⁿ-chhut A-mô͘-lī, Ka-lâm, Hek, Pí-lī-sé, Hi-bī, Iâ-pò͘-su hiah-ê cho̍k.

12你家己謹慎，m̄-thang kap你所去hit所在khiā起ê百姓立約，驚了成做lín中間ê羅網。Lí ka-kī kín-sīn, m̄-thang kap lí só͘ khì hit só͘-chāi khiā-khí ê peh-sìⁿ li̍p-iok, kiaⁿ-liáu chiâⁿ-chòe lín tiong-kan ê lô-bāng.

13就是tio̍h拆in ê祭壇，phah碎in雕刻ê柱，剉(chhò) in ê A-sià-la̍h。Chiū-sī tio̍h thiah in ê chè-tôaⁿ, phah-chhùi in tiau-khek ê thiāu, chhò in ê A-sià-la̍h.

14M̄-thang敬拜別個上帝；因為耶和華ê名稱做獨尊，伊是獨尊ê上帝；M̄-thang kèng-pài pa̍t ê Siōng-tè; in-ūi Iâ-hô-hoa ê miâ chheng-chòe To̍k-chun, i sī to̍k-chun ê Siōng-tè;

15驚了你kap hit所在khiā起ê百姓立約，in塊 in ê上帝行邪淫，祭祀in ê上帝，有人叫你，你就食伊ê祭物；kiaⁿ-liáu lí kap hit só͘-chāi khiā-khí ê peh-sìⁿ li̍p-iok, in tè in ê siōng-tè kiâⁿ siâ-îm, chè-sū in ê siōng-tè, ū lâng kiò lí, lí chiū chia̍h i ê chè-mi̍h;

16koh驚了你kā你ê kiáⁿ chhōa in ê cha-bó͘-kiáⁿ做bó͘，in ê cha-bó͘-kiáⁿ塊 in ê上帝行邪淫，hō͘你ê kiáⁿ也tè in ê上帝行邪淫。koh kiaⁿ-liáu lí kā lí ê kiáⁿ chhōa in ê cha-bó͘-kiáⁿ chòe-bó͘, in ê cha-bó͘-kiáⁿ tè in ê siōng-tè kiâⁿ siâ-îm, hō͘ lí ê kiáⁿ iā tè in ê siōng-tè kiâⁿ siâ-îm.

17你m̄-thang為家己鑄造chiah-ê上帝。Lí m̄-thang ūi ka-kī chù-chō chiah-ê siōng-tè.

18你tio̍h守除酵節。照我所吩咐你ê，tī A-pit月內所定tio̍h ê日期，食無酵餅七日，因為你tī A-pit月內出埃及。Lí tio̍h siú tû-kàⁿ-choeh. Chiàu Góa só͘ hoan-hù lí-ê, tī A-pit ge̍h-lāi só͘ tiāⁿ-tio̍h ê ji̍t-kî, chia̍h bô-kàⁿ-piáⁿ chhit-ji̍t, in-ūi lí tī A-pit ge̍h-lāi chhut Ai-ki̍p.

19見若頭胎ê，lóng是我ê，一切ê cheng-siⁿ頭水ê，無論是牛，是羊，公ê lóng是我ê。Kìⁿ-nā thâu-thai-ê, lóng sī Góa-ê, it-chhè ê cheng-siⁿ thâu-chúi-ê, bô-lūn sī gû, sī iûⁿ, kang-ê lóng sī Góa-ê.

20頭水ê驢tio̍h用羊á替贖；若無替贖，就tio̍h kòng折伊ê頷頸。見若你頭上ê kiáⁿ，lóng tio̍h贖回。人來見我m̄-thang空手。Thâu-chúi ê lû tio̍h ēng iûⁿ-á thòe-sio̍k; nā bô thòe-sio̍k, chiū tio̍h kòng-chi̍h i ê ām-kún. Kìⁿ-nā lí thâu-chiūⁿ ê kiáⁿ, lóng tio̍h sio̍k-hôe. Lâng lâi kìⁿ Góa m̄-thang khang-chhiú.

21你六日tio̍h做工，第七日tio̍h安歇；tī栽種收割ê時也tio̍h安歇。Lí la̍k-ji̍t tio̍h chòe kang, tē-chhit ji̍t tio̍h an-hioh; tī chai-chèng siu-koah ê sî iā tio̍h an-hioh.

22麥起頭熟，收割ê時，tio̍h守七七日節。 Koh tī年尾，tio̍h守收khǹg ê節。Be̍h khí-thâu se̍k, siu-koah ê sî, tio̍h siú chhit-chhit-ji̍t choeh. Koh tī nî-bé, tio̍h siú siu-khǹg ê choeh.

23Lín一切ê ta-po͘丁，tio̍h一年三pái來見主耶和華，以色列ê上帝。Lín it-chhè ê ta-po͘-teng, tio̍h chi̍t-nî saⁿ-pái lâi kìⁿ Chú Iâ-hô-hoa, Í-sek-lia̍t ê Siōng-tè.

24我beh對你ê面前趕出外邦人，開闊你ê境界；你一年三pái上去見耶和華，你ê上帝ê時，的確無人貪你ê土地。Góa beh tùi lí ê bīn-chêng kóaⁿ-chhut gōa-pang lâng, khui-khoah lí ê kéng-kài; lí chi̍t-nî saⁿ-pái chiūⁿ-khì kìⁿ Iâ-hô-hoa, lí ê Siōng-tè ê sî, tek-khak bô lâng tham lí ê thó͘-tōe.

25你m̄-thang將我ê牲禮ê血，chham有酵ê物來獻；pôaⁿ過節ê祭物也m̄-thang留到隔早起。Lí m̄-thang chiong Góa ê seng-lé ê huih, chham ū kàⁿ ê mi̍h lâi hiàn; pôaⁿ-kè-choeh ê chè-mi̍h iā m̄-thang lâu kàu keh chá-khí.

26地裡第一起頭熟 ê物，tio̍h送到耶和華你ê上帝ê厝。煮山羊á m̄-thang用伊ê母ê奶。Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí ê Siōng-tè ê chhù. Chú soaⁿ-iûⁿ-á m̄-thang ēng i ê bú ê lin.

27耶和華對摩西講：你tio̍h寫chiah-ê話，因為我是照chiah-ê話kap你以及以色列立約。Iâ-hô-hoa tùi Mô͘-se kóng, Lí tio̍h siá chiah-ê ōe, in-ūi Góa sī chiàu chiah-ê ōe kap lí í-ki̍p Í-sek-lia̍t li̍p-iok.

28摩西kap耶和華tī-hia四十日四十暝，無食餅無lim水。伊將chit-ê約ê話，就是十條誡，寫tī兩塊碑。Mô͘-se kap Iâ-hô-hoa tī-hia sì-cha̍p ji̍t sì-cha̍p mî, bô chia̍h piáⁿ bô lim chúi. I chiong chit-ê iok ê ōe, chiū-sī cha̍p-tiâu-kài, siá tī nn̄g tè pi.

29摩西落西奈山ê時，伊ê手the̍h兩塊約碑，伊落山ê時，伊ê面，因為耶和華kap伊講話，就射出光，摩西家己m̄知。Mô͘-se lo̍h Se-nái soaⁿ ê sî, i ê chhiú the̍h nn̄g tè iok-pi, i lo̍h-soaⁿ ê sî, i ê bīn, in-ūi Iâ-hô-hoa kap i kóng-ōe, chiū siā-chhut kng, Mô͘-se ka-kī m̄-chai.

30亞倫kap以色列眾人看見摩西ê時，看ah，伊ê面射出光；in就驚，m̄敢óa近伊。A-lûn kap Í-sek-lia̍t chèng-lâng khòaⁿ-kìⁿ Mô͘-se ê sî, khòaⁿ ah, i ê bīn siā-chhut kng; in chiū kiaⁿ, m̄-káⁿ óa-kūn i.

31摩西叫in來，亞倫kap會中chiah-ê頭人就lóng 倒tńg到伊hia；摩西就kap in講話。Mô͘-se kiò in lâi, A-lûn kap hōe-tiong chiah-ê thâu-lâng chiū lóng tò-tńg kàu i hia; Mô͘-se chiū kap in kóng-ōe.

32然後以色列眾人lóng進前來；伊就將耶和華tī西奈山kap伊所講一切ê話，lóng吩咐in。Jiân-āu Í-sek-lia̍t chèng-lâng lóng chìn-chêng lâi; i chiū chiong Iâ-hô-hoa tī Se-nái soaⁿ kap i só͘ kóng it-chhè ê ōe, lóng hoan-hù in.

33摩西kap in講話明白，就用帕罩面。Mô͘-se kap in kóng ōe bêng-pe̍k, chiū ēng phè tà-bīn.

34總是摩西入去耶和華面前kap伊講話，帕就掀起來，到伊出來。伊出來ê時，就將耶和華所吩咐ê，kā以色列人講。Chóng-sī Mô͘-se ji̍p-khì Iâ-hô-hoa bīn-chêng kap I kóng-ōe, phè chiū hian-khí-lâi, kàu i chhut-lâi. I chhut-lâi ê sî, chiū chiong Iâ-hô-hoa só͘ hoan-hù-ê, kā Í-sek-lia̍t lâng kóng.

35以色列人看見摩西ê面，摩西ê面射出光，摩西koh用帕罩面，thèng候到伊入去kap耶和華講話帕就掀起來。Í-sek-lia̍t lâng khòaⁿ-kìⁿ Mô͘-se ê bīn, Mô͘-se ê bīn siā-chhut kng, Mô͘-se koh ēng phè tà-bīn, thèng-hāu kàu i ji̍p-khì kap Iâ-hô-hoa kóng-ōe phè chiū hian-khí-lâi.

1摩西招集以色列人全會，對in講：耶和華所吩咐ê話，kah lín tio̍h行ê，就是chiah-ê。Mô͘-se chio-chi̍p Í-sek-lia̍t lâng choân-hōe, tùi in kóng, Iâ-hô-hoa só͘ hoan-hù ê ōe, kah lín tio̍h kiâⁿ-ê, chiū-sī chiah-ê.

2六日tio̍h做工，第七日是lín ê聖日，是大ê安歇日，來服事耶和華；凡若tī chit日做工ê，tio̍h hō͘伊死。La̍k-ji̍t tio̍h chòe-kang, tē-chhit ji̍t sī lín ê sèng-ji̍t, sī tōa ê an-hioh-ji̍t, lâi ho̍k-sāi Iâ-hô-hoa; hoān-nā tī chit-ji̍t chòe-kang-ê, tio̍h hō͘ i sí.

3當安歇日，tī lín ta̍k間厝內m̄-thang起火。Tng an-hioh-ji̍t, tī lín ta̍k keng chhù-lāi m̄-thang khí-hé.

4摩西對以色列人全會講：耶和華所吩咐ê話，是án-ni講：Mô͘-se tùi Í-sek-lia̍t lâng choân-hōe kóng, Iâ-hô-hoa só͘ hoan-hù ê ōe, sī án-ni kóng,

5Lín中間tio̍h the̍h禮物獻hō͘耶和華；見若心願ê，thang the̍h伊來，做獻hō͘耶和華ê禮物；Lín tiong-kan tio̍h the̍h lé-mi̍h hiàn hō͘ Iâ-hô-hoa; kìⁿ-nā sim goān-ê, thang the̍h i lâi, chòe hiàn hō͘ Iâ-hô-hoa ê lé-mi̍h;

6就是金、銀、銅，藍色、紫色、朱紅色ê料，幼苧，chiū-sī kim, gûn, tâng, lâm-sek, chí-sek, chu-âng-sek ê liāu, iù-tōe,

7山羊毛，染紅ê羊káng皮、海狗皮，soaⁿ-iûⁿ-mn̂g, ní-âng ê iûⁿ-káng-phê, hái-káu-phê,

8chō-kiap柴、點燈ê油、芳ê料，thang做抹ê油 kap芳香，chō-kiap-chhâ, tiám-teng ê iû, phang ê liāu, thang chòe boah ê iû kap phang-hiuⁿ,

9紅瑪瑙kap別樣ê寶石，thang鑲tī í-hut-tek kap pó͘褂。âng-bé-ló kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa.

10Lín中間見若心有智慧ê，lóng tio̍h來做耶和華一切所吩咐ê；Lín tiong-kan kìⁿ-nā sim ū tì-hūi-ê, lóng tio̍h lâi chòe Iâ-hô-hoa it-chhè só͘ hoan-hù-ê;

11就是會幕，伊ê布棚，kap伊ê蓋(kòa)，伊ê鉤，伊ê板，伊ê橫kông，伊ê柱，伊ê臼；chiū-sī hōe-bō͘, i ê pò͘-pîⁿ, kap i ê kòa, i ê kau, i ê pán, i ê hoâiⁿ-kông, i ê thiāu, i ê khū;

12櫃，kap伊ê kǹg，施恩所，kap 遮遮(jia-cha̍h)ê帳籬；kūi, kap i ê kǹg, si-un-só͘, kap jia-cha̍h ê tiùⁿ-lî;

13桌kap伊ê kǹg，kap伊ê器具，kap排列ê餅；toh kap i ê kǹg, kap i ê khì-kū, kap pâi-lia̍t ê piáⁿ;

14點光ê燈台kap伊ê器具，燈盞kap點光 ê油；tiám-kng ê teng-tâi kap i ê khì-kū, teng-chóaⁿ kap tiám-kng ê iû;

15香壇kap伊ê kǹg、抹ê油，kap芳香，以及會幕門ê門籬；hiuⁿ-tôaⁿ kap i ê kǹg, boah ê iû, kap phang-hiuⁿ, í-ki̍p hōe-bō͘ mn̂g ê mn̂g-lî;

16燒祭ê壇kap伊銅ê網，kap伊ê kǹg，以及伊一切ê器具，洗盪 ê盆kap伊ê座；sio-chè ê tôaⁿ kap i tâng ê bāng, kap i ê kǹg, í-ki̍p i it-chhè ê khì-kū, sóe-tn̄g ê phûn kap i ê chō;

17帳ê帳帷，kap伊ê柱，in ê臼，kap帳門ê門籬；tiûⁿ ê tiùⁿ-ûi, kap i ê thiāu, in ê khū, kap tiûⁿ-mn̂g ê mn̂g-lî;

18會幕所釘ê釘，kap帳所釘ê釘，kap in ê索；hōe-bō͘ só͘ tèng ê teng, kap tiûⁿ só͘ tèng ê teng, kap in ê soh;

19精工ê衣服，tī聖所穿來服事ê，就是祭司亞倫ê聖衫kap伊ê kiáⁿ ê衫，穿來擔當祭司ê職。cheng-kong ê i-ho̍k, tī sèng-só͘ chhēng lâi ho̍k-sāi-ê, chiū-sī chè-si A-lûn ê sèng-saⁿ kap i ê kiáⁿ ê saⁿ, chhēng lâi tam-tng chè-si ê chit.

20以色列人全會tùi摩西ê面前出去。Í-sek-lia̍t lâng choân-hōe tùi Mô͘-se ê bīn-chêng chhut-khì.

21見若受感動，tùi心歡喜ê，lóng總來，the̍h禮物獻hō͘耶和華，用來做會幕ê工，kap一切ê路用，也用來做聖衫。Kìⁿ-nā siū kám-tōng, tùi sim hoaⁿ-hí-ê, lóng-chóng lâi, the̍h lé-mi̍h hiàn hō͘ Iâ-hô-hoa, ēng lâi chòe hōe-bō͘ ê kang, kap it-chhè ê lō͘-ēng, iā ēng lâi chòe sèng-saⁿ.

22見若出tī心歡喜ê，ta-po͘婦人lóng來，ta̍k-ê將金器，就是胸前ê pín針、耳鉤，phah印ê手指，kap手環；這是ta̍k人將伊ê禮物獻hō͘耶和華。Kìⁿ-nā chhut tī sim hoaⁿ-hí-ê, ta-po͘ hū-jîn lóng lâi, ta̍k-ê chiong kim-khì, chiū-sī heng-chêng ê pín-chiam, hī-kau, phah-ìn ê chhiú-chí, kap chhiú-khoân; che sī ta̍k-lâng chiong i ê lé-mi̍h hiàn hō͘ Iâ-hô-hoa.

23見若人有藍色、紫色、朱紅色ê料，幼苧、山羊毛、染紅ê羊káng皮、海狗皮，lóng the̍h來。Kìⁿ-nā lâng ū lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g, ní-âng ê iûⁿ-káng-phê, hái-káu-phê, lóng the̍h-lâi.

24見若獻銀kap銅，做禮物ê，lóng the̍h來獻hō͘耶和華；見若有chō-kiap柴thang做甚麼路用ê，也the̍h來。Kìⁿ-nā hiàn gûn kap tâng, chòe lé-mi̍h-ê, lóng the̍h-lâi hiàn hō͘ Iâ-hô-hoa; kìⁿ-nā ū chō-kiap-chhâ thang chòe sím-mi̍h lō͘-ēng-ê, iā the̍h-lâi.

25見若心內有智慧ê婦女，親手紡線，將所紡ê藍色、紫色、朱紅色ê料，kap幼苧lóng the̍h來。Kìⁿ-nā sim-lāi ū tì-hūi ê hū-lú, chhin-chhiú pháng sòaⁿ, chiong só͘ pháng ê lâm-sek, chí-sek, chu-âng-sek ê liāu, kap iù-tōe lóng the̍h-lâi.

26見有智慧ê心受感動ê婦女，就紡山羊毛。Kìⁿ-ū tì-hūi ê sim siū kám-tōng ê hū-lú, chiū pháng soaⁿ-iûⁿ-mn̂g.

27Chiah-ê頭人將紅瑪瑙，kap別樣ê寶石，thang鑲tī í-hut-tek kap pó͘褂ê，lóng the̍h來。Chiah-ê thâu-lâng chiong âng-bé-ló, kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa-ê, lóng the̍h-lâi.

28Koh the̍h香料kap油，thang用伊來點燈，做抹ê油，做芳ê香。Koh the̍h hiuⁿ-liāu kap iû, thang ēng i lâi tiám teng, chòe boah ê iû, chòe phang ê hiuⁿ.

29以色列人，無論男女，見若心歡喜獻禮物hō͘耶和華ê，lóng歡喜the̍h禮物來，做耶和華託重摩西所吩咐in做一切ê工。Í-sek-lia̍t lâng, bô-lūn lâm-lú, kìⁿ-nā sim hoaⁿ-hí hiàn lé-mi̍h hō͘ Iâ-hô-hoa-ê, lóng hoaⁿ-hí the̍h lé-mi̍h lâi, chòe Iâ-hô-hoa thok-tiōng Mô͘-se só͘ hoan-hù in chòe it-chhè ê kang.

30摩西對以色列人講：Lín看，猶大ê支派Hō͘-jíⁿ ê孫，O͘-lī ê kiáⁿ Pí-sat-lia̍t，耶和華已經指名召伊。Mô͘-se tùi Í-sek-lia̍t lâng kóng, Lín khòaⁿ, Iû-tāi ê chi-phài Hō͘-jíⁿ ê sun, O͘-lī ê kiáⁿ Pí-sat-lia̍t, Iâ-hô-hoa í-keng chí miâ tiàu i.

31Koh用上帝ê神充滿伊，hō͘伊有智慧，有聰明，有知識，能做ta̍k樣ê工；Koh ēng Siōng-tè ê sîn chhiong-móa i, hō͘ i ū tì-hūi, ū chhang-miâ, ū chai-bat, ōe chòe ta̍k-iūⁿ ê kang;

32能想出奇巧ê工，來做金、銀、銅hiah-ê物，ōe siūⁿ-chhut kî-khiáu ê kang, lâi chòe kim, gûn, tâng hiah-ê mi̍h,

33也能刻寶石來入伊；也能刻柴，能做ta̍k樣奇巧ê工。iā ōe khek pó-chio̍h lâi ji̍p-i; iā ōe khek chhâ, ōe chòe ta̍k-iūⁿ kî-khiáu ê kang.

34Koh hō͘伊kap Tàn ê支派，A-hi-sat-boat ê kiáⁿ A-hô-lī-a-pek，心有靈竅，能教示人。Koh hō͘ i kap Tàn ê chi-phài, A-hi-sat-boat ê kiáⁿ A-hô-lī-a-pek, sim ū lêng-khiàu, ōe kà-sī lâng.

35chiah-ê人伊用智慧充滿in ê心；hō͘ in會做ta̍k樣ê工，無論雕刻ê工，奇巧ê工，用藍色、紫色、朱紅色ê料，kap幼苧，繡花ê，織布ê，ta̍k樣ê工 lóng能做，也能想出奇巧ê工。Chiah-ê lâng I ēng tì-hūi chhiong-móa in ê sim; hō͘ in ōe chòe ta̍k-iūⁿ ê kang, bô-lūn tiau-khek ê kang, kî-khiáu ê kang, ēng lâm-sek, chí-sek, chu-âng-sek ê liāu, kap iù-tōe, siù hoe-ê, chit-pò͘-ê, ta̍k-iūⁿ ê kang lóng ōe chòe, iā ōe siūⁿ-chhut kî-khiáu ê kang.