1耶和華對摩西講：你phah兩塊石碑，kap以前ê相同，你前所phah破hiah-ê 碑；hit頂面ê字，我beh寫tī chiah-ê碑。Iâ-hô-hoa tùi Mô͘-se kóng, Lí phah nn̄g-tè chio̍h-pi, kap í-chêng-ê saⁿ-tâng, lí chêng só͘ phah-phòa hiah-ê pi; hit téng-bīn ê jī, Góa beh siá tī chiah-ê pi.

2明á早起你tio̍h備辦便；透早你tio̍h 上西奈山；tī-hia，tī山尾溜，khiā tī我面前，Bîn-á-chá-khí lí tio̍h pī-pān piān; thàu-chá lí tio̍h chiūⁿ Se-nái soaⁿ; tī-hia, tī soaⁿ-bé-liu, khiā tī Góa bīn-chêng,

3M̄-thang有人kap你上來；遍山lóng m̄-thang看見有人，tī山腳也m̄-thang hō͘牛群羊群食草。M̄-thang ū lâng kap lí chiūⁿ-lâi; piàn-soaⁿ lóng m̄-thang khòaⁿ-kìⁿ ū lâng, tī soaⁿ-kha iā m̄-thang hō͘ gû-kûn iûⁿ-kûn chia̍h-chháu.

4伊就phah兩塊石碑，kap以前ê相同；摩西透早起來，照耶和華所吩咐伊ê，上去西奈山，手裡the̍h兩塊石碑。I chiū phah nn̄g tè chio̍h-pi, kap í-chêng-ê saⁿ-tâng; Mô͘-se thàu-chá khí-lâi, chiàu Iâ-hô-hoa só͘ hoan-hù i ê, chiūⁿ-khì Se-nái soaⁿ, chhiú-ni̍h the̍h nn̄g tè chio̍h-pi.

5耶和華坐雲臨到，kap伊khiā tī-hia，宣布耶和華ê名。Iâ-hô-hoa chē-hûn lîm-kàu, kap i khiā tī-hia, soan-pò͘ Iâ-hô-hoa ê miâ.

6耶和華tùi伊ê面前經過，宣布講：耶和華，耶和華是有憐憫，有恩典ê上帝，無快受氣，koh有豐盛ê慈愛kap誠實；Iâ-hô-hoa tùi i ê bīn-chêng keng-kè, soan-pò͘ kóng, Iâ-hô-hoa, Iâ-hô-hoa sī ū lîn-bín, ū un-tián ê Siōng-tè, bô khoài siū-khì, koh ū hong-sēng ê chû-ài kap sêng-si̍t;

7為千萬人存慈愛，赦免罪過、過失kap罪惡；決斷無掠有罪ê做無罪；beh歸咎(kiū)伊ê罪，tùi父到kiáⁿ，到孫，到三四代。ūi chheng-bān lâng chûn chû-ài, sià-bián chōe-kòa, kè-sit kap chōe-ok; koat-toàn bô lia̍h ū-chōe-ê chòe bô chōe; beh kui-kiū i ê chōe, tùi pē kàu kiáⁿ, kàu sun, kàu saⁿ-sì-tāi.

8摩西緊緊àⁿ落地敬拜，講：Mô͘-se kín-kín àⁿ-lo̍h tōe kèng-pài, kóng,

9主ah，我若得tio̍h恩典tī你ê面前，求主tī阮中間相kap行；因為這是頷頸硬ê百姓；koh求你赦免阮ê罪過，kap阮ê罪惡，掠阮做你ê產業。Chú ah, góa nā tit-tio̍h un-tián tī Lí ê bīn-chêng, kiû Chú tī goán tiong-kan saⁿ-kap kiâⁿ; in-ūi che sī ām-kún ngī ê peh-sìⁿ; koh kiû Lí sià-bián goán ê chōe-kòa, kap goán ê chōe-ok, lia̍h goán chòe Lí ê sán-gia̍p.

10耶和華講：看ah，我beh立約，beh tī你眾百姓ê面前行奇妙ê事，是天下萬國中所bē-bat行ê；tī你四圍ê眾百姓，就beh看見耶和華ê所做；因為我tùi你所行ê，是thang驚ê事。Iâ-hô-hoa kóng, Khòaⁿ ah, Góa beh li̍p-iok, beh tī lí chèng peh-sìⁿ ê bīn-chêng kiâⁿ kî-biāu ê sū, sī thiⁿ-ē bān-kok-tiong só͘ bē-bat kiâⁿ-ê; tī lí sì-ûi ê chèng peh-sìⁿ, chiū beh khòaⁿ-kìⁿ Iâ-hô-hoa ê só͘-chòe; in-ūi Góa tùi lí só͘ kiâⁿ-ê, sī thang kiaⁿ ê sū.

11我今á日所吩咐你ê，你tio̍h執守；看ah，我beh對你ê面前趕出A-mô͘-lī、迦南、Hek、Pí-lī-sé、Hi-bī、Iâ-pò͘-su hiah-ê族。Góa kin-á-ji̍t só͘ hoan-hù lí-ê, lí tio̍h chip-siú; khòaⁿ ah, Góa beh tùi lí ê bīn-chêng kóaⁿ-chhut A-mô͘-lī, Ka-lâm, Hek, Pí-lī-sé, Hi-bī, Iâ-pò͘-su hiah-ê cho̍k.

12你家己謹慎，m̄-thang kap你所去hit所在khiā起ê百姓立約，驚了成做lín中間ê羅網。Lí ka-kī kín-sīn, m̄-thang kap lí só͘ khì hit só͘-chāi khiā-khí ê peh-sìⁿ li̍p-iok, kiaⁿ-liáu chiâⁿ-chòe lín tiong-kan ê lô-bāng.

13就是tio̍h拆in ê祭壇，phah碎in雕刻ê柱，剉(chhò) in ê A-sià-la̍h。Chiū-sī tio̍h thiah in ê chè-tôaⁿ, phah-chhùi in tiau-khek ê thiāu, chhò in ê A-sià-la̍h.

14M̄-thang敬拜別個上帝；因為耶和華ê名稱做獨尊，伊是獨尊ê上帝；M̄-thang kèng-pài pa̍t ê Siōng-tè; in-ūi Iâ-hô-hoa ê miâ chheng-chòe To̍k-chun, i sī to̍k-chun ê Siōng-tè;

15驚了你kap hit所在khiā起ê百姓立約，in塊 in ê上帝行邪淫，祭祀in ê上帝，有人叫你，你就食伊ê祭物；kiaⁿ-liáu lí kap hit só͘-chāi khiā-khí ê peh-sìⁿ li̍p-iok, in tè in ê siōng-tè kiâⁿ siâ-îm, chè-sū in ê siōng-tè, ū lâng kiò lí, lí chiū chia̍h i ê chè-mi̍h;

16koh驚了你kā你ê kiáⁿ chhōa in ê cha-bó͘-kiáⁿ做bó͘，in ê cha-bó͘-kiáⁿ塊 in ê上帝行邪淫，hō͘你ê kiáⁿ也tè in ê上帝行邪淫。koh kiaⁿ-liáu lí kā lí ê kiáⁿ chhōa in ê cha-bó͘-kiáⁿ chòe-bó͘, in ê cha-bó͘-kiáⁿ tè in ê siōng-tè kiâⁿ siâ-îm, hō͘ lí ê kiáⁿ iā tè in ê siōng-tè kiâⁿ siâ-îm.

17你m̄-thang為家己鑄造chiah-ê上帝。Lí m̄-thang ūi ka-kī chù-chō chiah-ê siōng-tè.

18你tio̍h守除酵節。照我所吩咐你ê，tī A-pit月內所定tio̍h ê日期，食無酵餅七日，因為你tī A-pit月內出埃及。Lí tio̍h siú tû-kàⁿ-choeh. Chiàu Góa só͘ hoan-hù lí-ê, tī A-pit ge̍h-lāi só͘ tiāⁿ-tio̍h ê ji̍t-kî, chia̍h bô-kàⁿ-piáⁿ chhit-ji̍t, in-ūi lí tī A-pit ge̍h-lāi chhut Ai-ki̍p.

19見若頭胎ê，lóng是我ê，一切ê cheng-siⁿ頭水ê，無論是牛，是羊，公ê lóng是我ê。Kìⁿ-nā thâu-thai-ê, lóng sī Góa-ê, it-chhè ê cheng-siⁿ thâu-chúi-ê, bô-lūn sī gû, sī iûⁿ, kang-ê lóng sī Góa-ê.

20頭水ê驢tio̍h用羊á替贖；若無替贖，就tio̍h kòng折伊ê頷頸。見若你頭上ê kiáⁿ，lóng tio̍h贖回。人來見我m̄-thang空手。Thâu-chúi ê lû tio̍h ēng iûⁿ-á thòe-sio̍k; nā bô thòe-sio̍k, chiū tio̍h kòng-chi̍h i ê ām-kún. Kìⁿ-nā lí thâu-chiūⁿ ê kiáⁿ, lóng tio̍h sio̍k-hôe. Lâng lâi kìⁿ Góa m̄-thang khang-chhiú.

21你六日tio̍h做工，第七日tio̍h安歇；tī栽種收割ê時也tio̍h安歇。Lí la̍k-ji̍t tio̍h chòe kang, tē-chhit ji̍t tio̍h an-hioh; tī chai-chèng siu-koah ê sî iā tio̍h an-hioh.

22麥起頭熟，收割ê時，tio̍h守七七日節。 Koh tī年尾，tio̍h守收khǹg ê節。Be̍h khí-thâu se̍k, siu-koah ê sî, tio̍h siú chhit-chhit-ji̍t choeh. Koh tī nî-bé, tio̍h siú siu-khǹg ê choeh.

23Lín一切ê ta-po͘丁，tio̍h一年三pái來見主耶和華，以色列ê上帝。Lín it-chhè ê ta-po͘-teng, tio̍h chi̍t-nî saⁿ-pái lâi kìⁿ Chú Iâ-hô-hoa, Í-sek-lia̍t ê Siōng-tè.

24我beh對你ê面前趕出外邦人，開闊你ê境界；你一年三pái上去見耶和華，你ê上帝ê時，的確無人貪你ê土地。Góa beh tùi lí ê bīn-chêng kóaⁿ-chhut gōa-pang lâng, khui-khoah lí ê kéng-kài; lí chi̍t-nî saⁿ-pái chiūⁿ-khì kìⁿ Iâ-hô-hoa, lí ê Siōng-tè ê sî, tek-khak bô lâng tham lí ê thó͘-tōe.

25你m̄-thang將我ê牲禮ê血，chham有酵ê物來獻；pôaⁿ過節ê祭物也m̄-thang留到隔早起。Lí m̄-thang chiong Góa ê seng-lé ê huih, chham ū kàⁿ ê mi̍h lâi hiàn; pôaⁿ-kè-choeh ê chè-mi̍h iā m̄-thang lâu kàu keh chá-khí.

26地裡第一起頭熟 ê物，tio̍h送到耶和華你ê上帝ê厝。煮山羊á m̄-thang用伊ê母ê奶。Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí ê Siōng-tè ê chhù. Chú soaⁿ-iûⁿ-á m̄-thang ēng i ê bú ê lin.

27耶和華對摩西講：你tio̍h寫chiah-ê話，因為我是照chiah-ê話kap你以及以色列立約。Iâ-hô-hoa tùi Mô͘-se kóng, Lí tio̍h siá chiah-ê ōe, in-ūi Góa sī chiàu chiah-ê ōe kap lí í-ki̍p Í-sek-lia̍t li̍p-iok.

28摩西kap耶和華tī-hia四十日四十暝，無食餅無lim水。伊將chit-ê約ê話，就是十條誡，寫tī兩塊碑。Mô͘-se kap Iâ-hô-hoa tī-hia sì-cha̍p ji̍t sì-cha̍p mî, bô chia̍h piáⁿ bô lim chúi. I chiong chit-ê iok ê ōe, chiū-sī cha̍p-tiâu-kài, siá tī nn̄g tè pi.

29摩西落西奈山ê時，伊ê手the̍h兩塊約碑，伊落山ê時，伊ê面，因為耶和華kap伊講話，就射出光，摩西家己m̄知。Mô͘-se lo̍h Se-nái soaⁿ ê sî, i ê chhiú the̍h nn̄g tè iok-pi, i lo̍h-soaⁿ ê sî, i ê bīn, in-ūi Iâ-hô-hoa kap i kóng-ōe, chiū siā-chhut kng, Mô͘-se ka-kī m̄-chai.

30亞倫kap以色列眾人看見摩西ê時，看ah，伊ê面射出光；in就驚，m̄敢óa近伊。A-lûn kap Í-sek-lia̍t chèng-lâng khòaⁿ-kìⁿ Mô͘-se ê sî, khòaⁿ ah, i ê bīn siā-chhut kng; in chiū kiaⁿ, m̄-káⁿ óa-kūn i.

31摩西叫in來，亞倫kap會中chiah-ê頭人就lóng 倒tńg到伊hia；摩西就kap in講話。Mô͘-se kiò in lâi, A-lûn kap hōe-tiong chiah-ê thâu-lâng chiū lóng tò-tńg kàu i hia; Mô͘-se chiū kap in kóng-ōe.

32然後以色列眾人lóng進前來；伊就將耶和華tī西奈山kap伊所講一切ê話，lóng吩咐in。Jiân-āu Í-sek-lia̍t chèng-lâng lóng chìn-chêng lâi; i chiū chiong Iâ-hô-hoa tī Se-nái soaⁿ kap i só͘ kóng it-chhè ê ōe, lóng hoan-hù in.

33摩西kap in講話明白，就用帕罩面。Mô͘-se kap in kóng ōe bêng-pe̍k, chiū ēng phè tà-bīn.

34總是摩西入去耶和華面前kap伊講話，帕就掀起來，到伊出來。伊出來ê時，就將耶和華所吩咐ê，kā以色列人講。Chóng-sī Mô͘-se ji̍p-khì Iâ-hô-hoa bīn-chêng kap I kóng-ōe, phè chiū hian-khí-lâi, kàu i chhut-lâi. I chhut-lâi ê sî, chiū chiong Iâ-hô-hoa só͘ hoan-hù-ê, kā Í-sek-lia̍t lâng kóng.

35以色列人看見摩西ê面，摩西ê面射出光，摩西koh用帕罩面，thèng候到伊入去kap耶和華講話帕就掀起來。Í-sek-lia̍t lâng khòaⁿ-kìⁿ Mô͘-se ê bīn, Mô͘-se ê bīn siā-chhut kng, Mô͘-se koh ēng phè tà-bīn, thèng-hāu kàu i ji̍p-khì kap Iâ-hô-hoa kóng-ōe phè chiū hian-khí-lâi.

1摩西招集以色列人全會，對in講：耶和華所吩咐ê話，kah lín tio̍h行ê，就是chiah-ê。Mô͘-se chio-chi̍p Í-sek-lia̍t lâng choân-hōe, tùi in kóng, Iâ-hô-hoa só͘ hoan-hù ê ōe, kah lín tio̍h kiâⁿ-ê, chiū-sī chiah-ê.

2六日tio̍h做工，第七日是lín ê聖日，是大ê安歇日，來服事耶和華；凡若tī chit日做工ê，tio̍h hō͘伊死。La̍k-ji̍t tio̍h chòe-kang, tē-chhit ji̍t sī lín ê sèng-ji̍t, sī tōa ê an-hioh-ji̍t, lâi ho̍k-sāi Iâ-hô-hoa; hoān-nā tī chit-ji̍t chòe-kang-ê, tio̍h hō͘ i sí.

3當安歇日，tī lín ta̍k間厝內m̄-thang起火。Tng an-hioh-ji̍t, tī lín ta̍k keng chhù-lāi m̄-thang khí-hé.

4摩西對以色列人全會講：耶和華所吩咐ê話，是án-ni講：Mô͘-se tùi Í-sek-lia̍t lâng choân-hōe kóng, Iâ-hô-hoa só͘ hoan-hù ê ōe, sī án-ni kóng,

5Lín中間tio̍h the̍h禮物獻hō͘耶和華；見若心願ê，thang the̍h伊來，做獻hō͘耶和華ê禮物；Lín tiong-kan tio̍h the̍h lé-mi̍h hiàn hō͘ Iâ-hô-hoa; kìⁿ-nā sim goān-ê, thang the̍h i lâi, chòe hiàn hō͘ Iâ-hô-hoa ê lé-mi̍h;

6就是金、銀、銅，藍色、紫色、朱紅色ê料，幼苧，chiū-sī kim, gûn, tâng, lâm-sek, chí-sek, chu-âng-sek ê liāu, iù-tōe,

7山羊毛，染紅ê羊káng皮、海狗皮，soaⁿ-iûⁿ-mn̂g, ní-âng ê iûⁿ-káng-phê, hái-káu-phê,

8chō-kiap柴、點燈ê油、芳ê料，thang做抹ê油 kap芳香，chō-kiap-chhâ, tiám-teng ê iû, phang ê liāu, thang chòe boah ê iû kap phang-hiuⁿ,

9紅瑪瑙kap別樣ê寶石，thang鑲tī í-hut-tek kap pó͘褂。âng-bé-ló kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa.

10Lín中間見若心有智慧ê，lóng tio̍h來做耶和華一切所吩咐ê；Lín tiong-kan kìⁿ-nā sim ū tì-hūi-ê, lóng tio̍h lâi chòe Iâ-hô-hoa it-chhè só͘ hoan-hù-ê;

11就是會幕，伊ê布棚，kap伊ê蓋(kòa)，伊ê鉤，伊ê板，伊ê橫kông，伊ê柱，伊ê臼；chiū-sī hōe-bō͘, i ê pò͘-pîⁿ, kap i ê kòa, i ê kau, i ê pán, i ê hoâiⁿ-kông, i ê thiāu, i ê khū;

12櫃，kap伊ê kǹg，施恩所，kap 遮遮(jia-cha̍h)ê帳籬；kūi, kap i ê kǹg, si-un-só͘, kap jia-cha̍h ê tiùⁿ-lî;

13桌kap伊ê kǹg，kap伊ê器具，kap排列ê餅；toh kap i ê kǹg, kap i ê khì-kū, kap pâi-lia̍t ê piáⁿ;

14點光ê燈台kap伊ê器具，燈盞kap點光 ê油；tiám-kng ê teng-tâi kap i ê khì-kū, teng-chóaⁿ kap tiám-kng ê iû;

15香壇kap伊ê kǹg、抹ê油，kap芳香，以及會幕門ê門籬；hiuⁿ-tôaⁿ kap i ê kǹg, boah ê iû, kap phang-hiuⁿ, í-ki̍p hōe-bō͘ mn̂g ê mn̂g-lî;

16燒祭ê壇kap伊銅ê網，kap伊ê kǹg，以及伊一切ê器具，洗盪 ê盆kap伊ê座；sio-chè ê tôaⁿ kap i tâng ê bāng, kap i ê kǹg, í-ki̍p i it-chhè ê khì-kū, sóe-tn̄g ê phûn kap i ê chō;

17帳ê帳帷，kap伊ê柱，in ê臼，kap帳門ê門籬；tiûⁿ ê tiùⁿ-ûi, kap i ê thiāu, in ê khū, kap tiûⁿ-mn̂g ê mn̂g-lî;

18會幕所釘ê釘，kap帳所釘ê釘，kap in ê索；hōe-bō͘ só͘ tèng ê teng, kap tiûⁿ só͘ tèng ê teng, kap in ê soh;

19精工ê衣服，tī聖所穿來服事ê，就是祭司亞倫ê聖衫kap伊ê kiáⁿ ê衫，穿來擔當祭司ê職。cheng-kong ê i-ho̍k, tī sèng-só͘ chhēng lâi ho̍k-sāi-ê, chiū-sī chè-si A-lûn ê sèng-saⁿ kap i ê kiáⁿ ê saⁿ, chhēng lâi tam-tng chè-si ê chit.

20以色列人全會tùi摩西ê面前出去。Í-sek-lia̍t lâng choân-hōe tùi Mô͘-se ê bīn-chêng chhut-khì.

21見若受感動，tùi心歡喜ê，lóng總來，the̍h禮物獻hō͘耶和華，用來做會幕ê工，kap一切ê路用，也用來做聖衫。Kìⁿ-nā siū kám-tōng, tùi sim hoaⁿ-hí-ê, lóng-chóng lâi, the̍h lé-mi̍h hiàn hō͘ Iâ-hô-hoa, ēng lâi chòe hōe-bō͘ ê kang, kap it-chhè ê lō͘-ēng, iā ēng lâi chòe sèng-saⁿ.

22見若出tī心歡喜ê，ta-po͘婦人lóng來，ta̍k-ê將金器，就是胸前ê pín針、耳鉤，phah印ê手指，kap手環；這是ta̍k人將伊ê禮物獻hō͘耶和華。Kìⁿ-nā chhut tī sim hoaⁿ-hí-ê, ta-po͘ hū-jîn lóng lâi, ta̍k-ê chiong kim-khì, chiū-sī heng-chêng ê pín-chiam, hī-kau, phah-ìn ê chhiú-chí, kap chhiú-khoân; che sī ta̍k-lâng chiong i ê lé-mi̍h hiàn hō͘ Iâ-hô-hoa.

23見若人有藍色、紫色、朱紅色ê料，幼苧、山羊毛、染紅ê羊káng皮、海狗皮，lóng the̍h來。Kìⁿ-nā lâng ū lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g, ní-âng ê iûⁿ-káng-phê, hái-káu-phê, lóng the̍h-lâi.

24見若獻銀kap銅，做禮物ê，lóng the̍h來獻hō͘耶和華；見若有chō-kiap柴thang做甚麼路用ê，也the̍h來。Kìⁿ-nā hiàn gûn kap tâng, chòe lé-mi̍h-ê, lóng the̍h-lâi hiàn hō͘ Iâ-hô-hoa; kìⁿ-nā ū chō-kiap-chhâ thang chòe sím-mi̍h lō͘-ēng-ê, iā the̍h-lâi.

25見若心內有智慧ê婦女，親手紡線，將所紡ê藍色、紫色、朱紅色ê料，kap幼苧lóng the̍h來。Kìⁿ-nā sim-lāi ū tì-hūi ê hū-lú, chhin-chhiú pháng sòaⁿ, chiong só͘ pháng ê lâm-sek, chí-sek, chu-âng-sek ê liāu, kap iù-tōe lóng the̍h-lâi.

26見有智慧ê心受感動ê婦女，就紡山羊毛。Kìⁿ-ū tì-hūi ê sim siū kám-tōng ê hū-lú, chiū pháng soaⁿ-iûⁿ-mn̂g.

27Chiah-ê頭人將紅瑪瑙，kap別樣ê寶石，thang鑲tī í-hut-tek kap pó͘褂ê，lóng the̍h來。Chiah-ê thâu-lâng chiong âng-bé-ló, kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa-ê, lóng the̍h-lâi.

28Koh the̍h香料kap油，thang用伊來點燈，做抹ê油，做芳ê香。Koh the̍h hiuⁿ-liāu kap iû, thang ēng i lâi tiám teng, chòe boah ê iû, chòe phang ê hiuⁿ.

29以色列人，無論男女，見若心歡喜獻禮物hō͘耶和華ê，lóng歡喜the̍h禮物來，做耶和華託重摩西所吩咐in做一切ê工。Í-sek-lia̍t lâng, bô-lūn lâm-lú, kìⁿ-nā sim hoaⁿ-hí hiàn lé-mi̍h hō͘ Iâ-hô-hoa-ê, lóng hoaⁿ-hí the̍h lé-mi̍h lâi, chòe Iâ-hô-hoa thok-tiōng Mô͘-se só͘ hoan-hù in chòe it-chhè ê kang.

30摩西對以色列人講：Lín看，猶大ê支派Hō͘-jíⁿ ê孫，O͘-lī ê kiáⁿ Pí-sat-lia̍t，耶和華已經指名召伊。Mô͘-se tùi Í-sek-lia̍t lâng kóng, Lín khòaⁿ, Iû-tāi ê chi-phài Hō͘-jíⁿ ê sun, O͘-lī ê kiáⁿ Pí-sat-lia̍t, Iâ-hô-hoa í-keng chí miâ tiàu i.

31Koh用上帝ê神充滿伊，hō͘伊有智慧，有聰明，有知識，能做ta̍k樣ê工；Koh ēng Siōng-tè ê sîn chhiong-móa i, hō͘ i ū tì-hūi, ū chhang-miâ, ū chai-bat, ōe chòe ta̍k-iūⁿ ê kang;

32能想出奇巧ê工，來做金、銀、銅hiah-ê物，ōe siūⁿ-chhut kî-khiáu ê kang, lâi chòe kim, gûn, tâng hiah-ê mi̍h,

33也能刻寶石來入伊；也能刻柴，能做ta̍k樣奇巧ê工。iā ōe khek pó-chio̍h lâi ji̍p-i; iā ōe khek chhâ, ōe chòe ta̍k-iūⁿ kî-khiáu ê kang.

34Koh hō͘伊kap Tàn ê支派，A-hi-sat-boat ê kiáⁿ A-hô-lī-a-pek，心有靈竅，能教示人。Koh hō͘ i kap Tàn ê chi-phài, A-hi-sat-boat ê kiáⁿ A-hô-lī-a-pek, sim ū lêng-khiàu, ōe kà-sī lâng.

35chiah-ê人伊用智慧充滿in ê心；hō͘ in會做ta̍k樣ê工，無論雕刻ê工，奇巧ê工，用藍色、紫色、朱紅色ê料，kap幼苧，繡花ê，織布ê，ta̍k樣ê工 lóng能做，也能想出奇巧ê工。Chiah-ê lâng I ēng tì-hūi chhiong-móa in ê sim; hō͘ in ōe chòe ta̍k-iūⁿ ê kang, bô-lūn tiau-khek ê kang, kî-khiáu ê kang, ēng lâm-sek, chí-sek, chu-âng-sek ê liāu, kap iù-tōe, siù hoe-ê, chit-pò͘-ê, ta̍k-iūⁿ ê kang lóng ōe chòe, iā ōe siūⁿ-chhut kî-khiáu ê kang.

1Pí-sat-lia̍t kap A-hô-lī-a-pek，kap lóng總心有智慧ê人，就是得tio̍h耶和華賞賜智慧聰明hō͘ in知做聖所ta̍k樣路用ê工ê，lóng tio̍h照耶和華所吩咐ê做工。Pí-sat-lia̍t kap A-hô-lī-a-pek, kap lóng-chóng sim ū tì-hūi ê lâng, chiū-sī tit-tio̍h Iâ-hô-hoa siúⁿ-sù tì-hūi chhang-miâ hō͘ in chai chòe sèng-só͘ ta̍k-iūⁿ lō͘-ēng ê kang-ê, lóng tio̍h chiàu Iâ-hô-hoa só͘ hoan-hù-ê chòe kang.

2摩西召Pí-sat-lia̍t，A-hô-lī-a-pek，kap見若心有智慧ê人來，就是耶和華用智慧賞賜in ê心，心受感動來做工ê。Mô͘-se tiàu Pí-sat-lia̍t, A-hô-lī-a-pek, kap kìⁿ-nā sim ū tì-hūi ê lâng lâi, chiū-sī Iâ-hô-hoa ēng tì-hūi siúⁿ-sù in ê sim, sim siū kám-tōng lâi chòe-kang-ê.

3In tùi摩西the̍h一切ê禮物，就是以色列人為tio̍h做聖所kap內面所用ê物the̍h來ê。百姓ta̍k早起猶原用甘心獻ê禮物the̍h來hō͘伊。In tùi Mô͘-se the̍h it-chhè ê lé-mi̍h, chiū-sī Í-sek-lia̍t lâng ūi-tio̍h chòe sèng-só͘ kap lāi-bīn só͘ ēng ê mi̍h the̍h-lâi-ê. Peh-sìⁿ ta̍k chá-khí iû-goân ēng kam-sim hiàn ê lé-mi̍h the̍h-lâi hō͘-i.

4見若做聖所ê工chiah-ê有智慧ê人，lóng 暫停in所做ê工；Kìⁿ-nā chòe sèng-só͘ ê kang chiah-ê ū tì-hūi ê lâng, lóng chiām-thêng in só͘ chòe ê kang;

5來對摩西講：百姓所the̍h來ê，比耶和華命令做ê工所tio̍h用ê料，過額有chhun。lâi tùi Mô͘-se kóng, Peh-sìⁿ só͘ the̍h-lâi-ê, pí Iâ-hô-hoa bēng-lēng chòe ê kang só͘ tio̍h ēng ê liāu, kè-gia̍h ū chhun.

6摩西出命，in就宣布tī全營，講：無論男女莫得koh做甚麼來，獻hō͘聖所；Tùi án-ni，阻止百姓無koh the̍h來。Mô͘-se chhut-bēng, in chiū soan-pò͘ tī choân-iâⁿ, kóng, Bô-lūn lâm-lú bo̍h-tit koh chòe sím-mi̍h lâi, hiàn hō͘ sèng-só͘; tùi án-ni chó͘-chí peh-sìⁿ bô koh the̍h-lâi.

7因為in所有ê材料，夠額thang做一切所tio̍h做chiah-ê工，soah有chhun。In-ūi in só͘ ū ê chhâi-liāu, kàu-gia̍h thang chòe it-chhè só͘ tio̍h chòe chiah-ê kang, soah ū chhun.

8In中間見若心有智慧做工ê，用十幅ê帳做會幕；chiah-ê帳是用過紡ê幼苧，kap藍色、紫色、朱紅色ê料；也用奇巧ê工織成ki-lō͘兵做伊。In tiong-kan kìⁿ-nā sim ū tì-hūi chòe-kang-ê, ēng cha̍p-pak ê tiùⁿ chòe hōe-bō͘; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu; iā ēng kî-khiáu ê kang chit-chiâⁿ ki-lō͘-peng chòe-i.

9每幅帳長二十八肘，闊四肘；帳lóng是一樣ê寸尺。Múi pak tiùⁿ tn̂g jī-cha̍p-poeh tiú, khoah sì-tiú; tiùⁿ lóng sī chi̍t-iūⁿ ê chhùn-chhioh.

10Chit五幅帳，伊chhòng hō͘ in ta̍k幅相連；hit五幅帳也ta̍k幅相連。Chit gō͘ pak tiùⁿ, i chhòng hō͘ in ta̍k pak saⁿ-liân; hit gō͘ pak tiùⁿ iā ta̍k-pak saⁿ-liân.

11Tī chit-ê相連ê帳，路尾幅ê邊á做藍色ê鈕phàn；tī hit-ê相連ê帳，路尾幅ê邊á也án-ni做。Tī chit-ê saⁿ-liân ê tiùⁿ, lō͘-bé pak ê piⁿ-á chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á iā án-ni chòe.

12伊tī chit領帳做五十個鈕phàn，koh tī第二領帳相連ê邊á，也做五十個鈕phàn；鈕phàn lóng兩個兩個相對。I tī chit niá tiùⁿ chòe gō͘-cha̍p ê liú-phàn, koh tī tē-jī niá tiùⁿ saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng nn̄g-ê nn̄g-ê saⁿ-tùi.

13Koh做五十個金鉤，用伊來鉤hō͘帳相連；就成做一個會幕。Koh chòe gō͘-cha̍p ê kim-kau, ēng i lâi kau hō͘ tiùⁿ saⁿ-liân; chiū chiâⁿ-chòe chi̍t ê hōe-bō͘.

14伊koh用山羊毛織十一幅ê帳，做會幕頂ê布棚；I koh ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ;

15每幅帳長三十肘，闊四肘；十一幅帳lóng一樣ê寸尺。múi-pak tiùⁿ tn̂g saⁿ-cha̍p tiú, khoah sì-tiú; cha̍p-it pak tiùⁿ lóng chi̍t-iūⁿ ê chhùn-chhioh.

16將五幅帳連做一幅，koh將六幅帳連做一幅。Chiong gō͘ pak tiùⁿ liân-chòe chi̍t-pak, koh chiong la̍k pak tiùⁿ liân-chòe chi̍t-pak.

17Tī chit-ê相連ê帳路尾幅ê邊á，伊做五十個鈕phàn，tī hit-ê相連路尾幅ê邊á也做五十個鈕phàn。Tī chit-ê saⁿ-liân ê tiùⁿ lō͘-bé pak ê piⁿ-á, i chòe gō͘-cha̍p ê liú-phàn, tī hit-ê saⁿ-liân lō͘-bé pak ê piⁿ-á iā chòe gō͘-cha̍p ê liú-phàn.

18伊koh做五十個銅鉤，hō͘布棚連做一個。I koh chòe gō͘-cha̍p ê tâng-kau, hō͘ pò͘-pîⁿ liân-chòe chi̍t-ê.

19Koh用染紅ê羊皮做布棚ê 蓋；koh用海狗皮掛tī頂面。Koh ēng ní-âng ê iûⁿ-phê chòe pò͘-pîⁿ ê kòa; koh ēng hái-káu-phê kòa tī téng-bīn.

20伊用chō-kiap柴做會幕khiā ê板。I ēng chō-kiap-chhâ chòe hōe-bō͘ khiā ê pán.

21Khiā ê板長十肘，闊一肘半。Khiā ê pán tn̂g cha̍p-tiú, khoah chi̍t-tiú-pòaⁿ.

22Ta̍k塊板有兩個榫相排；會幕一切ê板lóng照án-ni做。Ta̍k tè pán ū nn̄g ê sún saⁿ-pâi; hōe-bō͘ it-chhè ê pán lóng chiàu án-ni chòe.

23伊做會幕ê板，南pêng ê南勢二十塊板；I chòe hōe-bō͘ ê pán, lâm-pêng ê lâm-sì jī-cha̍p tè pán;

24tī chiah-ê二十塊板ê下面做四十個銀臼；一塊板ê下面有兩個臼來穿伊兩支榫；koh一塊板ê下面也有兩個臼來穿伊兩支榫。tī chiah-ê jī-cha̍p tè pán ê ē-bīn chòe sì-cha̍p ê gûn-khū; chi̍t tè pán ê ē-bīn ū nn̄g ê khū lâi chhēng i nn̄g ki sún; koh chi̍t tè pán ê ē-bīn iā ū nn̄g ê khū lâi chhēng i nn̄g ki sún.

25會幕第二面，就是北面，也做板二十塊，Hōe-bō͘ tē-jī bīn, chiū-sī pak-bīn, iā chòe pán jī-cha̍p-tè,

26kap in ê銀臼四十個；chit-ê板ê下面有兩個臼，hit-ê板ê下面也有兩個臼。kap in ê gûn-khū sì-cha̍p-ê; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū.

27會幕ê後面，就是西面，也做六塊板。Hōe-bō͘ ê āu-bīn, chiū-sī sai-bīn, iā chòe la̍k tè pán.

28會幕後面ê兩個角頭，做兩塊板。Hōe-bō͘ āu-bīn ê nn̄g ê kak-thâu, chòe nn̄g tè pán.

29板ê下長，兩個相同，直到頂面第一個環lóng是ka-nn̂g-ê；兩個角頭ê板lóng是án-ni做。Pán ê ē-tn̂g, nn̄g-ê saⁿ-tâng, ti̍t-kàu téng-bīn tē-it ê khoân lóng sī ka-nn̂g-ê; nn̄g ê kak-thâu ê pán lóng sī án-ni chòe.

30有八個板，kap十六個銀臼；ta̍k塊板ê下面有兩個臼。Ū poeh ê pán, kap cha̍p-la̍k ê gûn-khū; ta̍k tè pán ê ē-bīn ū nn̄g ê khū.

31伊用chō-kiap柴做橫kông；為tio̍h會幕chit-pêng ê板做五支，I ēng chō-kiap-chhâ chòe hoâiⁿ-kông; ūi-tio̍h hōe-bō͘ chit-pêng ê pán chòe gō͘-ki,

32為tio̍h會幕hit-pêng ê板做五支；koh為tio̍h會幕後西面ê板做五支。ūi-tio̍h hōe-bō͘ hit-pêng ê pán chòe gō͘-ki; koh ūi-tio̍h hōe-bō͘-āu sai-bīn ê pán chòe gō͘-ki.

33板ê對中hit支橫kông：hō͘伊tùi chit頭到hit頭。Pán ê tùi-tiong hit ki hoâiⁿ-kông, hō͘ i tùi chit-thâu kàu hit-thâu.

34板用金包；koh做板ê金環來套kông；kông也用金包。Pán ēng kim pau; koh chòe pán ê kim-khoân lâi thò kông; kông iā ēng kim pau.

35Koh用藍色、紫色、朱紅色ê料，kap過紡ê幼苧織帳籬；chit-ê帳籬用奇巧ê工織成ki-lō͘-peng來做ê。Koh ēng lâm-sek, chí-sek, chu-âng-sek ê liāu, kap kè-pháng ê iù-tōe chit tiùⁿ-lî; chit-ê tiùⁿ-lî ēng kî-khiáu ê kang chit-chiâⁿ ki-lō͘-peng lâi chòe-ê.

36Koh用chō-kiap柴為tio̍h伊做四支柱，用金包伊；in ê鉤是金ê；koh為tio̍h in鑄四個銀臼。Koh ēng chō-kiap-chhâ ūi-tio̍h i chòe sì ki thiāu, ēng kim pau i; in ê kau sī kim-ê; koh ūi-tio̍h in chù sì ê gûn-khū.

37用藍色、紫色、朱紅色ê料，kap過紡ê幼苧，用繡花ê工做布棚門ê門籬，Ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe pò͘-pîⁿ mn̂g ê mn̂g-lî,

38kap伊五支柱，kap in ê鉤；in ê柱斗kap橫桿用金包伊；hit五個臼是銅ê。kap i gō͘ ki thiāu, kap in ê kau; in ê thiāu-táu kap hoâiⁿ-koaiⁿ ēng kim pau i; hit gō͘ ê khū sī tâng-ê.