1伊用chō-kiap柴做燒祭ê壇；長五肘，闊五肘，chit-ê壇是四方ê；高三肘。I ēng chō-kiap-chhâ chòe sio-chè ê tôaⁿ; tn̂g gō͘-tiú, khoah gō͘-tiú, chit-ê tôaⁿ sī sù-hong-ê; koâiⁿ saⁿ-tiú.

2Tī壇ê四角頭做四支角，kap壇相連做一個，用銅包伊。Tī tôaⁿ ê sì kak-thâu chòe sì ki kak, kap tôaⁿ saⁿ-liân chòe chi̍t-ê, ēng tâng pau i.

3Koh做壇一切ê器具，伊ê盆、thuh-á、盤、叉、火鼎；一切ê器具lóng用銅做。Koh chòe tôaⁿ it-chhè ê khì-kū, i ê phûn, thuh-á, pôaⁿ, chhe, hé-tiáⁿ; it-chhè ê khì-kū lóng ēng tâng chòe.

4Koh為tio̍h壇用銅網做一個層(chân)，安tī壇四面圍腰板ê下面，hō͘伊透到壇ê半腰。Koh ūi-tio̍h tôaⁿ ēng tâng-bāng chòe chi̍t ê chân, an tī tôaⁿ sì-bīn ûi-io-pán ê ē-bīn, hō͘ i thàu-kàu tôaⁿ ê pòaⁿ-io.

5為tio̍h銅ê層ê四角鑄四個環，做穿kǹg ê路用。Ūi-tio̍h tâng ê chân ê sì-kak chù sì ê khoân, chòe chhng-kǹg ê lō͘-ēng.

6用chō-kiap柴做kǹg，用銅包in。Ēng chō-kiap-chhâ chòe kǹg, ēng tâng pau in.

7將kǹg穿tī壇雙pêng ê環內，用伊來扛壇；也用板做壇，壇是空殼。Chiong kǹg chhng tī tôaⁿ siang-pêng ê khoân-lāi, ēng i lâi kng tôaⁿ; iā ēng pán chòe tôaⁿ, tôaⁿ sī khang-khak.

8伊用銅做洗盪 ê盆，kap銅座；是用會幕門前做工ê婦人人ê銅鏡做ê。I ēng tâng chòe sóe-tn̄g ê phûn, kap tâng-chō; sī ēng hōe-bō͘ mn̂g-chêng chòe-kang ê hū-jîn-lâng ê tâng-kiàⁿ chòe-ê.

9伊做會幕ê帳；hit-ê帳ê南勢，用過紡ê幼苧做帷，一百肘。I chòe hōe-bō͘ ê tiûⁿ; hit-ê tiûⁿ ê lâm-sì, ēng kè-pháng ê iù-tōe chòe ûi, chi̍t-pah tiú.

10帷ê柱二十支，銅做ê臼二十個；柱ê鉤kap橫桿是用銀做ê。Ûi ê thiāu jī-cha̍p ki, tâng-chòe ê khū jī-cha̍p-ê; thiāu ê kau kap hoâiⁿ-koaiⁿ sī ēng gûn chòe-ê.

11北面也一百肘，帷ê柱二十支，銅做ê 臼二十個；柱ê鉤kap橫桿是用銀做ê。Pak-bīn iā chi̍t-pah tiú, ûi ê thiāu jī-cha̍p ki, tâng-chòe ê khū jī-cha̍p ê; thiāu ê kau kap hoâiⁿ-koaiⁿ sī ēng gûn chòe-ê.

12西面有帷五十肘，帷ê柱十支，臼十個；柱ê鉤kap橫桿是用銀做ê。Sai-bīn ū ûi gō͘-cha̍p tiú, ûi ê thiāu cha̍p-ki, khū cha̍p-ê; thiāu ê kau kap hoâiⁿ-koaiⁿ sī ēng gûn chòe-ê.

13東面ê東勢五十肘。Tang-bīn ê tang-sì gō͘-cha̍p tiú.

14門chit-pêng ê帷十五肘，帷ê柱三支，有臼三個。Mn̂g chit-pêng ê ûi cha̍p-gō͘ tiú, ûi ê thiāu saⁿ-ki, ū khū saⁿ-ê.

15Hit-pêng也是án-ni；帳門ê左右，kok有帷十五肘；帷ê柱三支，臼三個。Hit-pêng iā sī án-ni; tiûⁿ-mn̂g ê chó-iū, kok ū ûi cha̍p-gō͘ tiú; ûi ê thiāu saⁿ-ki, khū saⁿ-ê.

16帳四面ê帳帷lóng是用過紡ê幼苧做。Tiûⁿ sì-bīn ê tiùⁿ-ûi lóng sī ēng kè-pháng ê iù-tōe chòe.

17柱ê 臼是銅ê，柱ê鉤kap橫桿是銀ê；柱斗是用銀包ê；帳lóng總ê柱是用銀ê橫桿穿相連ê。Thiāu ê khū sī tâng-ê, thiāu ê kau kap hoâiⁿ-koaiⁿ sī gûn-ê; thiāu-táu sī ēng gûn pau-ê; tiûⁿ lóng chóng ê thiāu sī ēng gûn ê hoâiⁿ-koaiⁿ chhēng saⁿ-liân-ê.

18帳門ê門籬是用繡花ê工，用藍色、紫色、朱紅色ê料 kap過紡ê幼苧做ê；長二十肘，高五肘，kap帳ê帷相配。Tiûⁿ-mn̂g ê mn̂g-lî sī ēng siù-hoe ê kang, ēng lâm-sek, chí-sek, chu-âng-sek ê liāu kap kè-pháng ê iù-tōe chòe-ê; tn̂g jī-cha̍p tiú, koâiⁿ gō͘ tiú, kap tiûⁿ ê ûi saⁿ-phòe.

19In ê柱四支，銅ê臼四個，柱ê鉤是銀ê，柱斗是銀包ê，橫桿是銀ê。In ê thiāu sì-ki, tâng ê khū sì-ê, thiāu ê kau sī gûn-ê, thiāu-táu sī gûn pau-ê, hoâiⁿ-koaiⁿ sī gûn-ê.

20會幕以及帳內四圍所釘ê釘，lóng是銅ê。Hōe-bō͘ í-ki̍p tiûⁿ-lāi sì-ûi só͘ tèng ê teng, lóng sī tâng-ê.

21Chit-ê會幕是證據ê會幕；hit中間利未人所beh用物件ê總額，是照摩西所吩咐，經過祭司亞倫ê kiáⁿ，Í-tha-má ê手所算ê。Chit-ê hōe-bō͘ sī chèng-kù ê hōe-bō͘; hit tiong-kan Lī-bī lâng só͘ beh ēng mi̍h-kiāⁿ ê chóng-gia̍h, sī chiàu Mô͘-se só͘ hoan-hù, keng-kè chè-si A-lûn ê kiáⁿ, Í-tha-má ê chhiú só͘ sǹg-ê.

22見若耶和華所吩咐摩西ê，猶大ê支派，Hō͘-jíⁿ ê孫、O͘-lī ê kiáⁿ、Pí-sat-lia̍t lóng做伊。Kìⁿ-nā Iâ-hô-hoa só͘ hoan-hù Mô͘-se-ê, Iû-tāi ê chi-phài, Hō͘-jíⁿ ê sun, O͘-lī ê kiáⁿ, Pí-sat-lia̍t lóng chòe-i.

23Kap伊相kap做ê，有Tàn ê支派，A-hi-sat-boat ê kiáⁿ，A-hô-lī-a-pek，伊是gâu雕刻，koh奇巧ê師傅，koh能用藍色、紫色、朱紅色ê料kap幼苧來繡花。Kap i saⁿ-kap chòe-ê, ū Tàn ê chi-phài, A-hi-sat-boat ê kiáⁿ, A-hô-lī-a-pek, i sī gâu tiau-khek, koh kî-khiáu ê sai-hū, koh ōe ēng lâm-sek, chí-sek, chu-âng-sek ê liāu kap iù-tōe lâi siù-hoe.

24做聖所一切ê工所用ê金，就是人所獻ê金，照聖所ê秤(phêng)，有二十九tha-liân-tek，koh七百三十sià-khek-le̍k。Chòe sèng-só͘ it-chhè ê kang só͘ ēng ê kim, chiū-sī lâng só͘ hiàn ê kim, chiàu sèng-só͘ ê phêng, ū jī-cha̍p-káu tha-liân-tek, koh chhit-pah saⁿ-cha̍p sià-khek-le̍k.

25會中受算ê人所出ê銀，照聖所ê秤，有一百tha-liân-tek，koh一千七百七十五 sià-khek-le̍k。Hōe-tiong siū sǹg ê lâng só͘ chhut ê gûn, chiàu sèng-só͘ ê phêng, ū chi̍t-pah tha-liân-tek, koh chi̍t-chheng chhit-pah chhit-cha̍p gō͘ sià-khek-le̍k.

26見若過去歸tī hiah-ê計算ê，tùi二十歲以上，有六十萬連三千五百五十人，照聖所ê秤，ta̍k人出銀半sià-khek-le̍k，就是一pí-ka。Kìⁿ-nā kè-khì kui tī hiah-ê kè-sǹg-ê, tùi jī-cha̍p hè í-chiūⁿ, ū la̍k-cha̍p-bān liân saⁿ-chheng gō͘-pah gō͘-cha̍p lâng, chiàu sèng-só͘ ê phêng, ta̍k-lâng chhut-gûn pòaⁿ sià-khek-le̍k, chiū-sī chi̍t pí-ka.

27用hit-ê一百tha-liân-tek ê銀，鑄聖所ê臼，kap帳籬柱ê臼；一百tha-liân-tek做一百個臼，一個臼用一tha-liân-tek。Ēng hit-ê chi̍t-pah tha-liân-tek ê gûn, chù sèng-só͘ ê khū, kap tiùⁿ-lî-thiāu ê khū; chi̍t pah tha-liân-tek chòe chi̍t-pah ê khū, chi̍t ê khū ēng chi̍t tha-liân-tek.

28用hit-ê一千七百七十五 sià-khek-le̍k ê銀，做柱ê鉤，也包柱斗，也做伊ê橫桿。Ēng hit-ê chi̍t-chheng chhit-pah chhit-cha̍p-gō͘ sià-khek-le̍k ê gûn, chòe thiāu ê kau, iā pau thiāu-táu, iā chòe i ê hoâiⁿ-koaiⁿ.

29所獻ê銅，有七十tha-lâin-tek，koh兩清四百sià-khek-le̍k。Só͘ hiàn ê tâng, ū chhit-cha̍p tha-liân-tek, koh nn̄g-chheng sì-pah sià-khek-le̍k.

30用chit-ê銅做會幕門ê臼，kap銅壇，kap伊ê銅網ê層，kap壇lóng總ê器具，Ēng chit-ê tâng chòe hōe-bō͘ mn̂g ê khū, kap tâng-tôaⁿ, kap i ê tâng-bāng ê chân, kap tôaⁿ lóng-chóng ê khì-kū,

31以及帳四圍ê臼，kap帳門ê臼，kap會幕lóng總所釘ê釘，kap帳四圍所釘ê釘。í-ki̍p tiûⁿ sì-ûi ê khū, kap tiûⁿ-mn̂g ê khū, kap hōe-bō͘ lóng-chóng só͘ tèng ê teng, kap tiûⁿ sì-ûi só͘ tèng ê teng.

1In用藍色、紫色、朱紅色ê料做精工ê衣服，tī聖所穿來服事，koh kā亞倫做聖衫，是照耶和華所吩咐摩西ê。In ēng lâm-sek, chí-sek, chu-âng-sek ê liāu chòe cheng-kong ê i-ho̍k, tī sèng-só͘ chhēng lâi ho̍k-sāi, koh kā A-lûn chòe sèng-saⁿ, sī chiàu Iâ-hô-hoa só͘ hoan-hù Mô͘-se-ê.

2伊用金kap藍色、紫色、朱紅色ê料，kap過紡ê幼苧，做í-hut-tek。I ēng kim kap lâm-sek, chí-sek, chu-âng-sek ê liāu, kap kè-pháng ê iù-tōe, chòe í-hut-tek.

3In將金tûi做薄片，剪做線，chham tī藍色、紫色、朱紅色ê料，kap幼苧用奇巧ê工做ê。In chiong kim tûi chòe po̍h-phìⁿ, chián chòe sòaⁿ, chham tī lâm-sek, chí-sek, chu-âng-sek ê liāu, kap iù-tōe ēng kî-khiáu ê kang chòe-ê.

4Koh kā伊做披肩來連伊，hō͘伊雙pêng相連。Koh kā i chòe phi-kian lâi liân-i, hō͘ i siang-pêng saⁿ-liân.

5Hit頂面奇巧ê工織ê帶，所用來hâ-ê，kap í-hut-tek同一樣ê做法，kap伊連做一塊，用金kap藍色、紫色、朱紅色ê料，kap過紡ê幼苧做伊；照耶和華所吩咐摩西ê。Hit téng-bīn kî-khiáu ê kang chit-ê tòa, só͘ ēng lâi hâ-ê, kap í-hut-tek tâng-chi̍t-iūⁿ ê chòe-hoat, kap i liân-chòe chi̍t-tè, ēng kim kap lâm-sek, chí-sek, chu-âng-sek ê liāu, kap kè-pháng ê iù-tōe chòe-i; chiàu Iâ-hô-hoa só͘ hoan-hù Mô͘-se-ê.

6Koh tok紅瑪瑙入tī金槽裡，照刻印ê法，刻以色列hiah-ê kiáⁿ ê名tī hit頂面；Koh tok âng-bé-ló ji̍p tī kim-chô-ni̍h, chiàu khek-ìn ê hoat, khek Í-sek-lia̍t hiah-ê kiáⁿ ê miâ tī hit téng-bīn;

7安tī í-hut-tek ê披肩，為以色列人做記念ê石；照耶和華所吩咐摩西ê。an tī í-hut-tek ê phi-kian, ūi Í-sek-lia̍t lâng chòe kì-liām ê chio̍h; chiàu Iâ-hô-hoa só͘ hoan-hù Mô͘-se-ê.

8伊用奇巧ê師傅ê手工做補褂，kap í-hut-tek同一樣ê做法；用金kap藍色、紫色、朱紅色ê料，kap過紡ê幼苧做ê。I ēng kî-khiáu ê sai-hū ê chhiú-kang chòe pó͘-kòa, kap í-hut-tek tâng chi̍t-iūⁿ ê chòe-hoat; ēng kim, kap lâm-sek, chí-sek, chu-âng-sek ê liāu, kap kè-pháng ê iù-tōe chòe-ê.

9補褂是四方ê；拗(áu)做雙重；長一掠，闊一掠，是雙重ê。Pó͘-kòa sī sù-hong-ê; áu chòe siang-têng; tn̂g chi̍t-lia̍h, khoah chi̍t-lia̍h, sī siang-têng-ê.

10頂面入寶石四chōa，一chōa是紅寶石、黃玉、紅玉；這是第一chōa。Téng-bīn ji̍p pó-chio̍h sì-chōa, chi̍t-chōa sī âng-pó-chio̍h, n̂g-ge̍k, âng-ge̍k; che sī tē-it chōa.

11第二chōa是綠寶石、藍寶石、金剛石。Tē-jī chōa sī le̍k-pó-chio̍h, lâm-pó-chio̍h, kim-kong-chio̍h.

12第三chōa是紫色ê瑪瑙，白色ê瑪瑙，紫色ê水晶。Tē-saⁿ chōa sī chí-sek ê bé-ló, pe̍h-sek ê bé-ló, chí-sek ê chúi-chiⁿ.

13第四chōa是綠玉、紅瑪瑙、碧玉；chiah-ê lóng入tī 金槽內。Tē-sì chōa sī le̍k-ge̍k, âng-bé-ló, phek-ge̍k; chiah-ê lóng ji̍p tī kim-chô-lāi.

14Chiah-ê寶石照以色列ê kiáⁿ ê名，共十二塊，親像刻印，每塊刻一個名，為tio̍h十二支派來做伊。Chiah-ê pó-chio̍h chiàu Í-sek-lia̍t ê kiáⁿ ê miâ, kiōng cha̍p-jī tè, chhin-chhiūⁿ khek ìn, múi-tè khek chi̍t ê miâ, ūi-tio̍h cha̍p-jī chi-phài lâi chòe-i.

15In用好金phah鍊á，親像索á，安tī補褂。In ēng hó-kim phah liān-á, chhin-chhiūⁿ soh-á, an tī pó͘-kòa.

16In koh做兩個金槽kap兩個金環，將chit兩個環安tī補褂 ê雙頭。In koh chòe nn̄g ê kim-chô kap nn̄g ê kim-khoân, chiong chit nn̄g ê khoân an tī pó͘-kòa ê siang-thâu.

17將所phah hit兩條金鍊á，連tī 雙頭兩個環。Chiong só͘ phah hit nn̄g tiâu kim-liān-á, liân tī siang-thâu nn̄g ê khoân.

18用所phah兩條鍊á ê雙頭，連tī兩個槽，安tī í-hut-tek披肩ê頭前。Ēng só͘ phah nn̄g-tiâu liān-á ê siang-thâu, liân tī nn̄g ê chô, an tī í-hut-tek phi-kian ê thâu-chêng.

19做兩個金環，hē tī補褂雙頭ê墘(kîⁿ)，近í-hut-tek ǹg內hit-pêng。Chòe nn̄g ê kim-khoân, hē tī pó͘-kòa siang-thâu ê kîⁿ, kūn í-hut-tek ǹg-lāi hit-pêng.

20Koh做兩個金環，安tī í-hut-tek披肩下面ê頭前，óa近相連ê所在，tī í-hut-tek奇巧ê工所織ê帶ê頂面。Koh chòe nn̄g ê kim-khoân, an tī í-hut-tek phi-kian ē-bīn ê thâu-chêng, óa-kūn saⁿ-liân ê só͘-chāi, tī í-hut-tek kî-khiáu ê kang só͘ chit-ê tòa ê téng-bīn.

21In用藍色ê幼帶，將pó͘褂 ê環kap í-hut-tek ê環縛相連，hō͘伊連(liâm)tī í-hut-tek奇巧ê工所織ê帶；hō͘補褂 kap í-hut-tek無離縫；是照耶和華所吩咐摩西ê。In ēng lâm-sek ê iù-tòa, chiong pó͘-kòa ê khoân kap í-hut-tek ê khoân pa̍k saⁿ-liân, hō͘ i liâm tī í-hut-tek kî-khiáu ê kang só͘ chit-ê tòa; hō͘ pó͘-kòa kap í-hut-tek bô lī-phāng; sī chiàu Iâ-hô-hoa só͘ hoan-hù Mô͘-se-ê.

22伊用織布ê工做í-hut-tek內面ê外袍，kui領是藍色。I ēng chit-pò͘ ê kang chòe í-hut-tek lāi-bīn ê gōa-phàu, kui-niá sī lâm-sek.

23袍ê對中做一個領孔；孔ê周圍織領緣，親像戰甲ê領孔，免得破裂。Phàu ê tùi-tiong chòe chi̍t ê niá-khang; khang ê chiu-ûi chit niá-iân, chhin-chhiūⁿ chiàn-kah ê niá-khang, bián-tit phòa-li̍h.

24袍ê下腳pô͘，用藍色、紫色、朱紅色ê料，kap過紡ê幼苧，做石榴。Phàu ê ē-kha-pô͘, ēng lâm-sek, chí-sek, chu-âng-sek ê liāu, kap kè-pháng ê iù-tōe, chòe sia̍h-liû.

25Koh用好金做hâm-lêng，用hâm-lêng，kâⁿ石榴，hē tī袍四圍ê下腳pô͘，石榴ê中間；Koh ēng hó-kim chòe hâm-lêng, ēng hâm-lêng, kâⁿ sia̍h-liû, hē tī phàu sì-ûi ê ē-kha-pô͘, sia̍h-liû ê tiong-kan;

26一粒hâm-lêng，一粒石榴，一粒hâm-lêng，一粒石榴，tī袍四圍ê ē-kha-pô͘，thang穿來服事；是照耶和華所吩咐摩西ê。chi̍t-lia̍p hâm-lêng, chi̍t-lia̍p sia̍h-liû, chi̍t-lia̍p hâm-lêng, chi̍t-lia̍p sia̍h-liû, tī phàu sì-ûi ê ē-kha-pô͘, thang chhēng lâi ho̍k-sāi; sī chiàu Iâ-hô-hoa só͘ hoan-hù Mô͘-se-ê.

27In用織成ê幼苧布，kā亞倫kap伊hiah-ê kiáⁿ做內衫。In ēng chit-chiâⁿ ê iù-tōe-pò͘, kā A-lûn kap i hiah-ê kiáⁿ chòe lāi-saⁿ.

28也做幼苧布ê帽，kap幼苧布súi-súi包頭殼ê巾，用過紡ê幼苧布做褲。Iā chòe iù-tōe-pò͘ ê bō, kap iù-tōe-pò͘ súi-súi pau thâu-khak ê kun, ēng kè-pháng ê iù-tōe-pò͘ chòe-khò͘.

29Koh用過紡ê幼苧，kap藍色、紫色、朱紅色ê料，用繡花ê手工，做腰帶；是照耶和華所吩咐摩西ê。Koh ēng kè-pháng ê iù-tōe, kap lâm-sek, chí-sek, chu-âng-sek ê liāu, ēng siù-hoe ê chhiú-kang, chòe io-tòa; sī chiàu Iâ-hô-hoa só͘ hoan-hù Mô͘-se ê.

30In用好金做聖ê冕旒ê牌，照刻印ê法；刻字tī hit頂面，講：做聖歸耶和華。In ēng hó-kim chòe sèng ê bián-liû ê pâi, chiàu khek-ìn ê hoat; khek-jī tī hit téng-bīn, kóng, CHÒE SÈNG KUI IÂ-HÔ-HOA.

31Koh用藍色ê帶，將牌縛tī帽頂；是照耶和華所吩咐摩西ê。Koh ēng lâm-sek ê tòa, chiong pâi pa̍k tī bō-téng; sī chiàu Iâ-hô-hoa só͘ hoan-hù Mô͘-se-ê.

32Tùi án-ni，聚集ê會幕一切ê工lóng做明白，凡若耶和華所吩咐摩西ê，以色列人照án-ni做。Tùi án-ni chū-chi̍p ê hōe-bō͘ it-chhè ê kang lóng chòe bêng-pe̍k, hoān-nā Iâ-hô-hoa só͘ hoan-hù Mô͘-se ê, Í-sek-lia̍t lâng chiàu án-ni chòe.

33In送到摩西hia，就是會幕、布棚，kap lóng總ê器具，伊ê 鉤、板、kông、柱、臼；In sàng kàu Mô͘-se hia, chiū-sī hōe-bō͘, pò͘-pîⁿ, kap lóng-chóng ê khì-kū, i ê kau, pán, kông, thiāu, khū;

34染紅羊káng皮ê蓋，海狗皮ê蓋，kap遮遮ê帳籬，ní-âng iûⁿ-káng-phê ê kòa, hái-káu-phê ê kòa, kap jia-cha̍h ê tiùⁿ-lî,

35法櫃kap伊e5kng3，kap施恩所；hoat-kūi kap i ê kǹg, kap si-un-só͘;

36桌kap伊lóng總ê器具，kap排列ê餅；toh kap i lóng-chóng ê khì-kū, kap pâi-lia̍t ê piáⁿ;

37好金ê燈台，kap伊ê燈盞，就是排列ê燈盞，kap伊lóng總ê器具，kap點光 ê油；hó-kim ê teng-tâi, kap i ê teng-chóaⁿ, chiū-sī pâi-lia̍t ê teng-chóaⁿ, kap i lóng-chóng ê khì-kū, kap tiám kng ê iû;

38金壇，抹ê油，芳ê香料，布棚門ê門籬；kim-tôaⁿ, boah ê iû, phang ê hiuⁿ-liāu, pò͘-pîⁿ-mn̂g ê mn̂g-lî;

39銅壇，kap伊ê銅ê層，伊ê kǹg，kap伊lóng總ê器具，洗盪 ê盆kap伊ê座，tâng-tôaⁿ, kap i ê tâng ê chân, i ê kǹg, kap i lóng-chóng ê khì-kū, sóe-tn̄g ê phûn kap i ê chō,

40帳ê帳帷 kap伊ê柱，伊ê臼，帳門ê門籬，用ê索，釘ê釘，kap布棚kap會幕內一概做路用ê器具；tiûⁿ ê tiùⁿ-ûi kap i ê thiāu, i ê khū, tiûⁿ-mn̂g ê mn̂g-lî, ēng ê soh, tèng ê teng, kap pò͘-pîⁿ kap hōe-bō͘-lāi it-khài chòe lō͘-ēng ê khì-kū;

41精工ê衣服，tī聖所穿來服事，kap祭司亞倫ê聖衫，以及伊ê kiáⁿ e衫，做祭司來服事。cheng-kong ê i-ho̍k, tī sèng-só͘ chhēng lâi ho̍k-sāi, kap chè-si A-lûn ê sèng-saⁿ, í-ki̍p i ê kiáⁿ ê saⁿ, chòe chè-si lâi ho̍k-sāi.

42以色列人照耶和華所吩咐摩西一切ê話，做一切ê工。Í-sek-lia̍t lâng chiàu Iâ-hô-hoa só͘ hoan-hù Mô͘-se it-chhè ê ōe, chòe it-chhè ê kang.

43摩西看見一切ê工，看ah，in已經做成，照耶和華所吩咐ê，in照án-ni做；摩西就kā in祝福。Mô͘-se khòaⁿ-kìⁿ it-chhè ê kang, khòaⁿ ah, in í-keng chòe-chiâⁿ, chiàu Iâ-hô-hoa só͘ hoan-hù-ê, in chiàu án-ni chòe; Mô͘-se chiū kā in chiok-hok.

1耶和華吩咐摩西講：Iâ-hô-hoa hoan-hù Mô͘-se kóng,

2正月初一，你tio̍h起聚集ê會幕。Chiaⁿ-ge̍h chhoe-it, lí tio̍h khí chū-chi̍p ê hōe-bō͘.

3你tio̍h hē法櫃tī hit內面，用帳籬遮遮伊。Lí tio̍h hē hoat-kūi tī hit lāi-bīn, ēng tiùⁿ-lî jia-cha̍h-i.

4扛桌入去，排設頂面ê物；扛燈台入去，點伊ê燈。Kng toh ji̍p-khì, pâi-siat téng-bīn ê mi̍h; kng teng-tâi ji̍p-khì, tiám i ê teng.

5扛燒香ê金壇，hē tī法櫃前，掛會幕門ê門籬。Kng sio-hiuⁿ ê kim-tôaⁿ, hē tī hoat-kūi-chêng, kòa hōe-bō͘ mn̂g ê mn̂g-lî.

6將燒祭ê壇，hē tī聚集ê會幕門前。Chiong sio-chè ê tôaⁿ, hē tī chū-chi̍p ê hōe-bō͘ mn̂g-chêng.

7將洗盪 ê盆，hē tī會幕kap壇ê中間，貯水tī盆內。Chiong sóe-tn̄g ê phûn, hē tī hōe-bō͘ kap tôaⁿ ê tiong-kan, tóe chúi tī phûn-lāi.

8Koh tī四圍khiā帳帷，掛帳門ê門籬。Koh tī sì-ûi khiā tiûⁿ-ûi, kòa tiûⁿ-mn̂g ê mn̂g-lî.

9用抹ê油抹會幕，kap其中凡所有ê，分別伊kap lóng總ê器具做聖；伊就做聖。Ēng boah ê iû boah hōe-bō͘, kap kî-tiong hoān só͘-ū-ê, hun-piat i kap lóng-chóng ê khì-kū chòe-sèng; i chiū chòe-sèng.

10Koh抹燒祭ê壇，kap伊lóng總ê器具，分別壇做聖；壇就做至聖。Koh boah sio-chè ê tôaⁿ, kap i lóng-chóng ê khì-kū, hun-piat tôaⁿ chòe-sèng; tôaⁿ chiū chòe chì-sèng.

11也tio̍h抹洗盪 ê盆，分別伊做聖。Iā tio̍h boah sóe-tn̄g ê phûn, hun-piat i chòe-sèng.

12Koh tio̍h chhōa亞倫kap伊hiah-ê kiáⁿ，到會幕門前，用水kā in洗。Koh tio̍h chhōa A-lûn kap i hiah-ê kiáⁿ, kàu hōe-bō͘ mn̂g-chêng, ēng chúi kā in sóe.

13也kā亞倫穿聖衫，koh用油抹伊，分別伊做聖，hō͘伊做祭司來服事我。Iā kā A-lûn chhēng sèng-saⁿ, koh ēng iû boah i, hun-piat i chòe-sèng, hō͘ i chòe chè-si lâi ho̍k-sāi Góa.

14Koh chhōa伊hiah-ê kiáⁿ來，kā in穿內袍。Koh chhōa i hiah-ê kiáⁿ lâi, kā in chhēng lāi-phàu.

15Tio̍h kā in抹油，親像抹in老父一樣，hō͘ in做祭司來服事我；in受抹油beh永遠做祭司，到ta̍k世代。Tio̍h kā in boah-iû, chhin-chhiūⁿ boah in lāu-pē chi̍t-iūⁿ, hō͘ in chòe chè-si lâi ho̍k-sāi Góa; in siū boah-iû beh éng-oán chòe chè-si, kàu ta̍k sè-tāi.

16摩西án-ni行；lóng是照耶和華所吩咐伊ê來行。Mô͘-se án-ni kiâⁿ; lóng sī chiàu Iâ-hô-hoa só͘ hoan-hù i ê lâi kiâⁿ.

17第二年正月初一，會幕就khiā起來。Tē-jī nî chiaⁿ-ge̍h chhoe-it, hōe-bō͘ chiū khiā-khí-lâi.

18摩西khiā會幕hē hiah-ê臼，khiā hiah-ê板，穿hiah-ê橫kông，khiā hiah-ê柱。Mô͘-se khiā hōe-bō͘ hē hiah-ê khū, khiā hiah-ê pán, chhng hiah-ê hoâiⁿ-kông, khiā hiah-ê thiāu.

19Tī會幕頂搭布棚，將布棚ê蓋，蓋(khàm)tī伊ê頂面，是照耶和華所吩咐摩西ê。Tī hōe-bō͘ téng tah pò͘-pîⁿ, chiong pò͘-pîⁿ ê kòa, khàm tī i ê téng-bīn, sī chiàu Iâ-hô-hoa só͘ hoan-hù Mô͘-se-ê.

20Koh用律法hē tī櫃內，用kǹg穿tī櫃裡，hē施恩所tī櫃頂。Koh ēng lu̍t-hoat hē tī kūi-lāi, ēng kǹg chhng tī kūi-ni̍h, hē si-un-só͘ tī kūi-téng.

21扛櫃入會幕，掛jia遮ê帳籬，jia遮法櫃，是照耶和華所吩咐摩西ê。Kng kūi ji̍p hōe-bō͘, kòa jia-cha̍h ê tiùⁿ-lî, jia-cha̍h hoat-kūi, sī chiàu Iâ-hô-hoa só͘ hoan-hù Mô͘-se-ê.

22Koh將桌hē tī會幕內，tī會幕ê北勢，tī帳籬外；Koh chiong toh hē tī hōe-bō͘-lāi, tī hōe-bō͘ ê pak-sì, tī tiùⁿ-lî gōa;

23hit頂面用餅排tī耶和華ê面前；是照耶和華所吩咐摩西ê。hit téng-bīn ēng piáⁿ pâi tī Iâ-hô-hoa ê bīn-chêng; sī chiàu Iâ-hô-hoa só͘ hoan-hù Mô͘-se-ê.

24Koh hē燈台tī會幕內，kap桌相對，tī會幕ê南pêng。Koh hē teng-tâi tī hōe-bō͘-lāi, kap toh saⁿ-tùi, tī hōe-bō͘ ê lâm-pêng.

25Tī耶和華ê面前點燈；是照耶和華所吩咐摩西ê。Tī Iâ-hô-hoa ê bīn-chêng tiám-teng; sī chiàu Iâ-hô-hoa só͘ hoan-hù Mô͘-se-ê.

26Koh hē金壇tī會幕內ê帳籬前；Koh hē kim-tôaⁿ tī hōe-bō͘-lāi ê tiùⁿ-lî chêng;

27tī hit頂面燒芳料ê香；是照耶和華所吩咐摩西ê。tī hit téng-bīn sio phang-liāu ê hiuⁿ; sī chiàu Iâ-hô-hoa só͘ hoan-hù Mô͘-se-ê.

28Koh掛會幕門ê門籬。Koh kòa hōe-bō͘ mn̂g ê mn̂g-lî.

29Tī聚集ê會幕門前，hē燒祭ê壇，將燒祭kap素祭獻tī hit頂面；是照耶和華所吩咐摩西ê。Tī chū-chi̍p ê hōe-bō͘ mn̂g-chêng, hē sio-chè ê tôaⁿ, chiong sio-chè kap sò͘-chè hiàn tī hit téng-bīn; sī chiàu Iâ-hô-hoa só͘ hoan-hù Mô͘-se-ê.

30Hē洗盪 ê盆tī會幕kap壇ê中間，盆內貯水，thang洗盪。Hē sóe-tn̄g ê phûn tī hōe-bō͘ kap tôaⁿ ê tiong-kan, phûn-lāi tóe chúi, thang sóe-tn̄g.

31摩西kap亞倫kap伊hiah-ê kiáⁿ，tī-hia洗手洗腳。Mô͘-se kap A-lûn kap i hiah-ê kiáⁿ, tī-hia sóe-chhiú sóe-kha.

32In入會幕ê時，á是就近壇 ê時，就洗；是照耶和華所吩咐摩西ê。In ji̍p hōe-bō͘ ê sî, á-sī chiū-kūn tôaⁿ ê sî, chiū sóe; sī chiàu Iâ-hô-hoa só͘ hoan-hù Mô͘-se-ê.

33Tī會幕kap壇ê四圍，khiā帳帷，也掛帳帷門ê門籬；án-ni摩西就完工。Tī hōe-bō͘ kap tôaⁿ ê sì-ûi, khiā tiùⁿ-ûi, iā kòa tiùⁿ-ûi mn̂g ê mn̂g-lî; án-ni Mô͘-se chiū oân-kang.

34Hit時雲遮蓋會幕，耶和華ê榮光充滿會幕。Hit-sî hûn jia-khàm hōe-bō͘, Iâ-hô-hoa ê êng-kng chhiong-móa hōe-bō͘.

35摩西bōe能入會幕，因為雲停tī hit頂面；koh耶和華ê榮光充滿tī會幕。Mô͘-se bōe-ōe ji̍p hōe-bō͘, in-ūi hûn thêng tī hit téng-bīn; koh Iâ-hô-hoa ê êng-kng chhiong-móa tī hōe-bō͘.

36雲tùi會幕收上去ê時，以色列人就起身行in ê路站。Hûn tùi hōe-bō͘ siu chiūⁿ-khì ê sî, Í-sek-lia̍t lâng chiū khí-sin kiâⁿ in ê lō͘-chām.

37雲若無收上去，in就無起身行，直直到雲收上去。Hûn nā bô siu chiūⁿ-khì, in chiū bô khí-sin kiâⁿ, ti̍t-ti̍t kàu hûn siu chiūⁿ-khì.

38日時耶和華ê雲tī會幕頂，暝時hit中間有火，tī以色列全家ê目睭前；tī in所行ê路站lóng是án-ni。Ji̍t-sî Iâ-hô-hoa ê hûn tī hōe-bō͘ téng, mî-sî hit tiong-kan ū hé, tī Í-sek-lia̍t choân-ke ê ba̍k-chiu-chêng; tī in só͘ kiâⁿ ê lō͘-chām lóng sī án-ni.