1摩西應講，看ah，in beh m̄信我，也m̄聽我ê話；因為in beh講：耶和華bē-bat對你出現。Mô͘-se ìn kóng, Khòaⁿ ah, in beh m̄-sìn góa, iā m̄-thiaⁿ góa ê ōe; in-ūi in beh kóng, Iâ-hô-hoa bē-bat tùi lí chhut-hiān.

2耶和華對伊講，Tī你手裡是甚麼？伊講：是柺á。Iâ-hô-hoa tùi i kóng, Tī lí chhiú-ni̍h sī sím-mi̍h? I kóng, Sī koáiⁿ-á.

3講：Hiat tī地裡。伊一下hiat tī地裡，就變做蛇；摩西就走閃伊。Kóng, Hiat tī tōe-ni̍h. I chi̍t-ē hiat tī tōe-ni̍h, chiū pìⁿ-chòe chôa; Mô͘-se chiū cháu-siám i.

4耶和華對摩西講：伸你ê手掠伊ê尾；(就伸手掠伊，tī手中猶原變做柺á；)Iâ-hô-hoa tùi Mô͘-se kóng, Chhun lí ê chhiú lia̍h i ê bé; (chiū chhun-chhiú lia̍h i, tī chhiú-tiong iû-goân pìⁿ-chòe koáiⁿ-á;)

5án-ni thang hō͘ in信耶和華，in ê祖公ê上帝，亞伯拉罕ê上帝，以撒ê上帝，雅各ê上帝，有對你出現。án-ni thang hō͘ in sìn Iâ-hô-hoa, in ê chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè, ū tùi lí chhut-hiān.

6耶和華koh對伊講，Hē你ê手tī你ê胸前。就下手tī胸前；抽出來ê時，看ah，手已經thái-ko，白親像雪。Iâ-hô-hoa koh tùi i kóng, Hē lí ê chhiú tī lí ê heng-chêng. Chiū hē chhiú tī heng-chêng; thiu-chhut-lâi ê sî, khòaⁿ ah, chhiú í-keng thái-ko, pe̍h chhin-chhiūⁿ seh.

7Koh講：Koh hē你ê手tī你ê胸前。(伊就hē tī伊ê胸前；抽出來ê時，看ah，已經照原，kap thong身軀ê肉無各樣。)Koh kóng, Koh hē lí ê chhiú tī lí ê heng-chêng. (I chiū hē tī i ê heng-chêng; thiu-chhut-lâi ê sî, khòaⁿ ah, í-keng chiàu-goân, kap thong seng-khu ê bah bô koh-iūⁿ.)

8Koh講：設使in無beh信你，也無beh聽頭一個神蹟，就beh信第二個神蹟。Koh kóng, Siat-sú in bô beh sìn lí, iā bô beh thiaⁿ thâu-chi̍t ê sîn-jiah, chiū beh sìn tē-jī ê sîn-jiah.

9Hit兩個神蹟in若lóng m̄信，也m̄聽你ê話，你tio̍h tùi河裡iúⁿ水，倒tī乾地；你tùi河裡所iúⁿ ê水beh tī乾地變做血。Hit nn̄g ê sîn-jiah in nā lóng m̄-sìn, iā m̄-thiaⁿ lí ê ōe, lí tio̍h tùi hô-ni̍h iúⁿ chúi, tò tī ta-tōe; lí tùi hô-ni̍h só͘ iúⁿ ê chúi beh tī ta-tōe pìⁿ-chòe huih.

10摩西對耶和華講：主ah，我平素m̄是能講話ê人，對祢kā祢ê奴僕講話ê了後也是án-ni；我是嘴舌鈍ê人。Mô͘-se tùi Iâ-hô-hoa kóng, Chú ah, góa pêng-sò͘ m̄-sī ōe kóng-ōe ê lâng, tùi Lí kā Lí ê lô͘-po̍k kóng-ōe ê liáu-āu iā sī án-ni; góa sī chhùi-chi̍h tun ê lâng.

11耶和華對伊講，創造人ê嘴是是誰 ah？hō͘人啞口、臭耳人、目睭金、chhiⁿ-mî ê，是是誰 ah？kiám-m̄是我耶和華mah？Iâ-hô-hoa tùi i kóng, Chhòng-chō lâng ê chhùi sī chī-chūi ah? hō͘ lâng é-káu, chhàu-hī-lâng, ba̍k-chiu kim, chhiⁿ-mî ê, sī chī-chūi ah? kiám-m̄-sī Góa Iâ-hô-hoa mah?

12Taⁿ你去ah，我beh賞賜你口才，教示你所應該講ê。Taⁿ lí khì ah, Góa beh siúⁿ-sù lí kháu-châi, kà-sī lí só͘ eng-kai kóng-ê.

13伊講：主ah，你合意差是誰，就差伊去。I kóng, Chú ah, Lí ha̍p-ì chhe chī-chūi, chiū chhe i khì.

14耶和華對摩西發出受氣，講：Kiám-m̄是有你ê兄，利未人，亞倫mah？我知伊是能講話ê人。Koh伊taⁿ出來迎接你；伊一下看見你心內就歡喜。Iâ-hô-hoa tùi Mô͘-se hoat-chhut siū-khì, kóng, Kiám-m̄-sī ū lí ê hiaⁿ, Lī-bī-lâng, A-lûn mah? Góa chai i sī ōe kóng-ōe ê lâng. Koh i taⁿ chhut-lâi ngiâ-chih lí; i chi̍t-ē khòaⁿ-kìⁿ lí sim-lāi chiū hoaⁿ-hí.

15你tio̍h對伊講，用所應該講ê話傳hō͘伊；我也beh賞賜你kap伊有口才，koh beh教示lín所應該行ê事。Lí tio̍h tùi i kóng, ēng só͘ eng-kai kóng ê ōe thoân hō͘ i; Góa iā beh siúⁿ-sù lí kap i ū kháu-châi, koh beh kà-sī lín só͘ eng-kai kiâⁿ ê sū.

16伊beh替你對百姓講話；伊beh對你準做嘴，你beh對伊準做上帝。I beh thòe lí tùi peh-sìⁿ kóng-ōe; i beh tùi lí chún-chòe chhùi, lí beh tùi i chún-chòe Siōng-tè.

17你ê手tio̍h kia̍h一支柺á，用伊來行神蹟。Lí ê chhiú tio̍h kia̍h chi̍t ki koáiⁿ-á, ēng i lâi kiâⁿ sîn-jiah.

18Tùi án-ni，摩西就去，tò去伊ê丈人Ia̍p-thek-lô hia，kā伊講：求你容允我tò去，看我ê兄弟tī埃及ê，看in iáu tī-teh á無。Ia̍p-thek-lô kā摩西講：你thang安然去lah。Tùi án-ni Mô͘-se chiū khì, tò-khì i ê tiūⁿ-lâng Ia̍p-thek-lô hia, kā i kóng, Kiû lí iông-ún góa tò-khì, khòaⁿ góa ê hiaⁿ-tī tī Ai-ki̍p ê, khòaⁿ in iáu tī-teh á-bô. Ia̍p-thek-lô kā Mô͘-se kóng, Lí thang an-jiân khì lah.

19耶和華tī米甸對摩西講：你去tò去埃及，因為ài 害你ê性命ê人lóng死lah。Iâ-hô-hoa tī Bí-tiân tùi Mô͘-se kóng, Lí khì tò-khì Ai-ki̍p, in-ūi ài hāi lí ê sìⁿ-miā ê lâng lóng sí lah.

20摩西帶伊ê bó͘ kap兩個kiáⁿ，hō͘ in騎驢，tò去埃及地；摩西手裡kia̍h上帝ê柺á。Mô͘-se tòa i ê bó͘ kap nn̄g ê kiáⁿ, hō͘ in khiâ-lû, tò-khì Ai-ki̍p tōe; Mô͘-se chhiú-ni̍h kia̍h Siōng-tè ê koáiⁿ-á.

21耶和華對摩西講：你tò去埃及ê時，tio̍h注意將我所交tī你ê手一切ê奇事行tī法老ê面前；總是我beh hō͘伊ê心硬，伊也無beh放chit-ê百姓去。Iâ-hô-hoa tùi Mô͘-se kóng, Lí tò-khì Ai-ki̍p ê sî, tio̍h chù-ì chiong Góa só͘ kau tī lí ê chhiú it-chhè ê kî-sū kiâⁿ tī Hoat-ló ê bīn-chêng; chóng-sī Góa beh hō͘ i ê sim ngī, i iā bô beh pàng chit-ê peh-sìⁿ khì.

22你tio̍h kā法老講：耶和華án-ni講：以色列是我ê kiáⁿ，就是我ê大kiáⁿ；Lí tio̍h kā Hoat-ló kóng, Iâ-hô-hoa án-ni kóng, Í-sek-lia̍t sī Góa ê kiáⁿ, chiū-sī Góa ê tōa-kiáⁿ;

23我bat對你講，Tio̍h tháu放我ê kiáⁿ去，thang服事我；你也m̄准伊去；看ah，我beh thâi死你ê kiáⁿ，就是你ê大kiáⁿ。Góa bat tùi lí kóng, Tio̍h tháu-pàng Góa ê kiáⁿ khì, thang ho̍k-sāi Góa; lí iā m̄-chún i khì; khòaⁿ ah, Góa beh thâi-sí lí ê kiáⁿ, chiū-sī lí ê tōa-kiáⁿ.

24摩西tī路裡，tī客店，耶和華tú-tio̍h伊，beh hō͘伊死。Mô͘-se tī lō͘-ni̍h, tī kheh-tiàm, Iâ-hô-hoa tú-tio̍h i, beh hō͘ i sí.

25Se-pho-la̍h就the̍h一塊利石，割伊ê kiáⁿ陽物ê皮，hiat tī伊ê腳前，講：你是我血ê丈夫。Se-pho-la̍h chiū the̍h chi̍t tè lāi-chio̍h, koah i ê kiáⁿ iông-bu̍t ê phê, hiat tī i ê kha-chêng, kóng, Lí sī góa huih ê tiōng-hu.

26耶和華就放伊soah。婦人人講：你是血ê丈夫，因為割禮ê緣故。Iâ-hô-hoa chiū pàng i soah. Hū-jîn-lâng kóng, Lí sī huih ê tiōng-hu, in-ūi kat-lé ê iân-kò͘.

27耶和華kā亞倫講：你去曠野迎接摩西。伊就去，tī上帝ê山tú-tio̍h伊，就kā伊chim。Iâ-hô-hoa kā A-lûn kóng, Lí khì khòng-iá ngiâ-chih Mô͘-se. I chiū khì, tī Siōng-tè ê soaⁿ tú-tio̍h i, chiū kā i chim.

28摩西將耶和華差伊講ê話，kap吩咐伊行ê神蹟，lóng kā亞倫講。Mô͘-se chiong Iâ-hô-hoa chhe i kóng ê ōe, kap hoan-hù i kiâⁿ ê sîn-jiah, lóng kā A-lûn kóng.

29摩西、亞倫就去招集以色列人眾長老；Mô͘-se, A-lûn chiū khì chio-chi̍p Í-sek-lia̍t lâng chèng tiúⁿ-ló;

30亞倫將耶和華對摩西所講ê話lóng講伊，koh tī百姓ê面前行hiah-ê神蹟。A-lûn chiong Iâ-hô-hoa tùi Mô͘-se só͘ kóng ê ōe lóng kóng i, koh tī peh-sìⁿ ê bīn-chêng kiâⁿ hiah-ê sîn-jiah.

31百姓就信；in聽見耶和華眷顧以色列人，koh看in ê艱苦，就àⁿ頭敬拜。Peh-sìⁿ chiū sìn; in thiaⁿ-kìⁿ Iâ-hô-hoa koàn-kò͘ Í-sek-lia̍t lâng, koh khòaⁿ in ê kan-khó͘, chiū àⁿ-thâu kèng-pài.

1後來摩西、亞倫入去，kā法老講：以色列ê上帝耶和華án-ni講：准我ê百姓去，in thang tī曠野為我守節。Āu-lâi Mô͘-se ,A-lûn ji̍p-khì, kā Hoat-ló kóng, Í-sek-lia̍t ê Siōng-tè Iâ-hô-hoa án-ni kóng, Chún Góa ê peh-sìⁿ khì, in thang tī khòng-iá ūi Góa siú-choeh.

2法老講：耶和華是是誰 hō͘我tio̍h聽伊ê話，准以色列人去ah？我m̄-bat耶和華，也m̄准以色列人去。Hoat-ló kóng, Iâ-hô-hoa sī chī-chūi hō͘ góa tio̍h thiaⁿ I ê ōe, chún Í-sek-lia̍t lâng khì ah? Góa m̄-bat Iâ-hô-hoa, iā m̄-chún Í-sek-lia̍t lâng khì.

3In講：希伯來人ê上帝tú-tio̍h阮；求你准阮去曠野行三日ê路，祭祀耶和華阮ê上帝，驚了伊用瘟疫、刀劍臨到阮。In kóng, Hi-pek-lâi lâng ê Siōng-tè tú-tio̍h goán; kiû lí chún goán khì khòng-iá kiâⁿ saⁿ ji̍t ê lō͘, chè-sū Iâ-hô-hoa goán ê Siōng-tè, kiaⁿ-liáu I ēng un-e̍k to-kiàm lîm-kàu goán.

4埃及王對in講：摩西、亞倫，lín啥事hō͘百姓荒廢in ê工 ah？lín去擔lín ê擔lah。Ai-ki̍p ông tùi in kóng, Mô͘-se, A-lûn, lín siáⁿ-sū hō͘ peh-sìⁿ hong-hòe in ê kang ah? lín khì taⁿ lín ê tàⁿ lah.

5法老講：看ah，chit所在ê百姓現在真chōe，lín竟然hō͘ in soah in ê擔擔。Hoat-ló kóng, Khòaⁿ ah, chit só͘-chāi ê peh-sìⁿ hiān-chāi chin-chōe, lín kéng-jiân hō͘ in soah in ê taⁿ-tàⁿ.

6當hit日法老吩咐百姓ê督工ê kap in ê頭目，講：Tng hit-ji̍t Hoat-ló hoan-hù peh-sìⁿ ê tok-kang-ê kap in ê thâu-ba̍k, kóng,

7Lín m̄-thang照舊用草hō͘ chit-ê百姓做磚；hō͘ in去家己拾草。Lín m̄-thang chiàu-kū ēng chháu hō͘ chit-ê peh-sìⁿ chòe chng; hō͘ in khì ka-kī khioh chháu.

8In前做磚ê數額，lín猶原hō͘ in án-ni做，m̄-thang小khóa減少；因為in pîn-tōaⁿ，所以喉叫講：准阮去祭祀阮ê上帝。In chêng chòe chng ê siàu-gia̍h, lín iû-goân hō͘ in án-ni chòe, m̄-thang sió-khóa kiám-chió; in-ūi in pîn-tōaⁿ, só͘-í âu-kiò kóng, Chún goán khì chè-sū goán ê Siōng-tè.

9Lín tio̍h用khah重ê工 hō͘ in做，hō͘ in tio̍h磨；無去聽無影話。Lín tio̍h ēng khah-tāng ê kang hō͘ in chòe, hō͘ in tio̍h-bôa; bô khì thiaⁿ bô-iáⁿ ōe.

10百姓ê督工ê kap in ê頭目出去kā百姓講：法老án-ni講：我m̄用草hō͘ lín。Peh-sìⁿ ê tok-kang-ê kap in ê thâu-ba̍k chhut-khì kā peh-sìⁿ kóng, Hoat-ló án-ni kóng, Góa m̄ ēng chháu hō͘ lín.

11Lín看tah-lo̍h有草，就家己去hia拾；總是lín ê工 lóng bōe少得。Lín khòaⁿ tah-lo̍h ū chháu, chiū ka-kī khì hia khioh; chóng-sī lín ê kang lóng bōe chió-tit.

12Tùi án-ni，百姓四散遍埃及地，拾草á幼來做草。Tùi án-ni peh-sìⁿ sì-sòaⁿ piàn Ai-ki̍p tōe, khioh chháu-á-iù lâi chòe chháu.

13督工ê逼in講：Lín日日tio̍h做完lín ê工 kap以前有草無各樣。Tok-kang-ê pek in kóng, Lín ji̍t-ji̍t tio̍h chòe-oân lín ê kang kap í-chêng ū chháu bô koh-iūⁿ.

14法老督工ê phah伊所派管理以色列人ê頭目，講：Lín昨日今á日怎樣無做完lín ê工，照從前ê數額做磚ah？Hoat-ló tok-kang-ê phah i só͘ phài koán-lí Í-sek-lia̍t lâng ê thâu-ba̍k, kóng, Lín chā-ji̍t kin-á-ji̍t cháiⁿ-iūⁿ bô chòe-oân lín ê kang, chiàu chiông-chêng ê siàu-gia̍h chòe chng ah?

15以色列人ê頭目來對法老求叫，講：啥事án-ni款待你ê奴僕？Í-sek-lia̍t lâng ê thâu-ba̍k lâi tùi Hoat-ló kiû-kiò, kóng, Siáⁿ-sū án-ni khoán-thāi lí ê lô͘-po̍k?

16無用草hō͘你ê奴僕，koh kā阮講：tio̍h做磚；看ah，你ê奴僕受phah；實在是你ê百姓ê過失。Bô ēng chháu hō͘ lí ê lô͘-po̍k, koh kā goán kóng, Tio̍h chòe-chng; khòaⁿ ah, lí ê lô͘-po̍k siū-phah; si̍t-chāi sī lí ê peh-sìⁿ ê kè-sit.

17伊講：Lín pîn-tōaⁿ，lín pîn-tōaⁿ；所以lín講：准阮去祭祀耶和華。I kóng, Lín pîn-tōaⁿ, lín pîn-tōaⁿ; só͘-í lín kóng, Chún goán khì chè-sū Iâ-hô-hoa.

18Taⁿ lín去做工，草m̄ hō͘ lín，總是磚 tio̍h照額來交。Taⁿ lín khì chòe-kang, chháu m̄ hō͘ lín, chóng-sī chng tio̍h chiàu-gia̍h lâi kau.

19以色列人ê頭目聽見講：日日做磚 ê額bōe-thang減少，就知害 lah。Í-sek-lia̍t lâng ê thâu-ba̍k thiaⁿ-kìⁿ kóng, Ji̍t-ji̍t chòe chng ê gia̍h bōe thang kiám-chió, chiū chai hāi lah.

20In離開法老出來，tú-tio̍h摩西、亞倫khiā tī in ê頭前，就對in講：In lī-khui Hoat-ló chhut-lâi, tú-tio̍h Mô͘-se, A-lûn khiā tī in ê thâu-chêng, chiū tùi in kóng,

21願耶和華鑑察lín，審判lín；因為lín hō͘阮tī法老ê面前kap伊ê人臣ê面前有臭名，用刀hē tī in ê手來thâi阮。Goān Iâ-hô-hoa kàm-chhat lín, sím-phòaⁿ lín; in-ūi lín hō͘ goán tī Hoat-ló ê bīn-chêng kap i ê jîn-sîn ê bīn-chêng ū chhàu-miâ, ēng to hē tī in ê chhiú lâi thâi goán.

22摩西倒tńg去耶和華hia，講：主ah，你啥事pháiⁿ款待chit-ê百姓？啥事差我？Mô͘-se tò-tńg-khì Iâ-hô-hoa hia, kóng, Chú ah, Lí siáⁿ-sū pháiⁿ khoán-thāi chit-ê peh-sìⁿ? siáⁿ-sū chhe góa?

23因為tùi我見法老，託你ê名來講ê時，伊就pháiⁿ款待chit-ê百姓；你也lóng無救你ê百姓。In-ūi tùi góa kìⁿ Hoat-ló, thok Lí ê miâ lâi kóng ê sî, i chiū pháiⁿ khoán-thāi chit-ê peh-sìⁿ; Lí iā lóng bô kiù Lí ê peh-sìⁿ.

1耶和華對摩西講：我所beh行tī法老ê，taⁿ你beh看見；因為用權能ê手，伊beh准in去，koh用權能ê手，伊beh趕in出伊ê地。Iâ-hô-hoa tùi Mô͘-se kóng, Góa só͘ beh kiâⁿ tī Hoat-ló-ê, taⁿ lí beh khòaⁿ-kìⁿ; in-ūi ēng koân-lêng ê chhiú, i beh chún in khì, koh ēng koân-lêng ê chhiú, i beh kóaⁿ in chhut i ê tōe.

2上帝koh對摩西講：我就是耶和華；Siōng-tè koh tùi Mô͘-se kóng, Góa chiū-sī Iâ-hô-hoa;

3我名做全能ê上帝出現tī亞伯拉罕、以撒、雅各，總是我ê名做耶和華，我未有hō͘ in bat我。Góa miâ chòe choân-lêng ê Siōng-tè chhut-hiān tī A-pek-la̍h-hán, Í-sat, Ngá-kok, chóng-sī Góa ê miâ chòe Iâ-hô-hoa Góa bē ū hō͘ in bat Góa.

4我koh kap in立我堅固ê約，beh將in所出外ê迦南地賞賜in，就是in寄腳ê地。Góa koh kap in li̍p Góa kian-kò͘ ê iok, beh chiong in só͘ chhut-gōa ê Ka-lâm tōe siúⁿ-sù in, chiū-sī in kià-kha ê tōe.

5我也聽見以色列人hiⁿ-hiⁿ-chhan，就是埃及人督in做苦工；我也記念我ê約。Góa iā thiaⁿ-kìⁿ Í-sek-lia̍t lâng hiⁿ-hiⁿ-chhan, chiū-sī Ai-ki̍p lâng tok in chòe khó͘-kang; Góa iā kì-liām Góa ê iok.

6所以你tio̍h kā以色列人講：我是耶和華；我beh tùi埃及人所hō͘ lín taⁿ ê重擔chhōa lín出來，koh beh救lín脫離in所hō͘ lín做ê苦工。我也beh用伸出ê手kap大ê審判救贖lín。Só͘-í lí tio̍h kā Í-sek-lia̍t lâng kóng, Góa sī Iâ-hô-hoa; Góa beh tùi Ai-ki̍p lâng só͘ hō͘ lín taⁿ ê tāng-tàⁿ chhōa lín chhut-lâi, koh beh kiù lín thoat-lī in só͘ hō͘ lín chòe ê khó͘-kang. Góa iā beh ēng chhun-chhut ê chhiú kap tōa ê sím-phòaⁿ kiù-sio̍k lín.

7我也beh掠lín做我ê百姓，我也beh做lín ê上帝；lín beh知我是耶和華，lín ê上帝，是tùi埃及人所hō͘ lín擔ê重擔chhōa lín出來。Góa iā beh lia̍h lín chòe Góa ê peh-sìⁿ, Góa iā beh chòe lín ê Siōng-tè; lín beh chai Góa sī Iâ-hô-hoa, lín ê Siōng-tè, sī tùi Ai-ki̍p lâng só͘ hō͘ lín taⁿ ê tāng-tàⁿ chhōa lín chhut-lâi.

8我chiù-chōa應允beh hō͘亞伯拉罕、以撒、雅各hit-ê地，我beh chhōa lín入去hia，將hit-ê地賞賜lín做業；我是耶和華。Góa chiù-chōa èng-ún beh hō͘ A-pek-la̍h-hán, Í-sat, Ngá-kok hit-ê tōe, Góa beh chhōa lín ji̍p khì hia, chiong hit-ê tōe siúⁿ-sù lín chòe gia̍p; Góa sī Iâ-hô-hoa.

9摩西將chit-ê kā以色列人講；總是in為tio̍h心內憂悶，也做苦工，m̄肯聽摩西。Mô͘-se chiong chit-ê kā Í-sek-lia̍t lâng kóng; chóng-sī in ūi-tio̍h sim-lāi iu-būn, iā chòe khó͘-kang, m̄-khéng thiaⁿ Mô͘-se.

10耶和華吩咐摩西講：Iâ-hô-hoa hoan-hù Mô͘-se kóng,

11你入去kā埃及王法老講：tio̍h 准以色列人出伊ê地。Lí ji̍p-khì kā Ai-ki̍p ông Hoat-ló kóng, tio̍h chún Í-sek-lia̍t lâng chhut i ê tōe.

12摩西tī耶和華ê面前講：看ah，以色列人尚且m̄聽我，法老thái-thó beh聽我chit-ê嘴舌鈍ê人ah？Mô͘-se tī Iâ-hô-hoa ê bīn-chêng kóng, Khòaⁿ ah, Í-sek-lia̍t lâng siōng-chhiáⁿ m̄-thiaⁿ góa, Hoat-ló thái-thó beh thiaⁿ góa chit-ê chhùi-chi̍h tun ê lâng ah?

13耶和華吩咐摩西、亞倫tio̍h傳命hō͘以色列人kap埃及王法老，thang chhōa以色列人出埃及地。Iâ-hô-hoa hoan-hù Mô͘-se, A-lûn tio̍h thoân-bēng hō͘ Í-sek-lia̍t lâng kap Ai-ki̍p ông Hoat-ló, thang chhōa Í-sek-lia̍t lâng chhut Ai-ki̍p tōe.

14以色列chiah-ê房長ê名記tī下底；以色列大kiáⁿ Liû-piān ê kiáⁿ；Hap-lo̍k、Hoat-lō͘、Hi-su-lûn、Ka-bí；chiah-ê是Liû-piān hiah-ê家。Í-sek-lia̍t chiah-ê pâng-tiúⁿ ê miâ kì tī ē-tóe; Í-sek-lia̍t tōa-kiáⁿ Liû-piān ê kiáⁿ; Hap-lo̍k, Hoat-lō͘, Hi-su-lûn, Ka-bí; chiah-ê sī Liû-piān hiah-ê ke.

15西門ê kiáⁿ；Iâ-bó͘-lī、Ngá-bín、O-hat、Ngá-kun、Só-hat，以及迦南地ê cha-bó͘-kiáⁿ所生ê掃羅；chiah-ê是西門hiah-ê家。Se-biān ê kiáⁿ; Iâ-bó͘-lī, Ngá-bín, O-hat, Ngá-kun, Só-hat, í-ki̍p Ka-lâm tōe ê cha-bó͘-kiáⁿ só͘ siⁿ ê Sò-lô; chiah-ê sī Se-biān hiah-ê ke.

16利未chiah-ê kiáⁿ ê名照in ê世系記tī下底；Kek-sūn、Ko-hat、Bí-la̍h-lī；利未享壽一百三十七歲。Lī-bī chiah-ê kiáⁿ ê miâ chiàu in ê sè-hē kì tī ē-tóe; Kek-sūn, Ko-hat, Bí-la̍h-lī; Lī-bī hióng-siū chi̍t-pah saⁿ-cha̍p-chhit hè.

17Kek-sūn ê kiáⁿ，照in ê家族；Li̍p-nî，Sī-múi。Kek-sūn ê kiáⁿ, chiàu in ê ka-cho̍k; Li̍p-nî, Sī-múi.

18Ko-hat ê kiáⁿ；Àm-lân、Í-su-hap、Hi-pek-lûn、O͘-siat；Ko-hat享壽一百三十三歲。Ko-hat ê kiáⁿ; Àm-lân, Í-su-hap, Hi-pek-lûn, O͘-siat; Ko-hat hióng-siū chi̍t-pah saⁿ-cha̍p-saⁿ hè.

19Bí-la̍h-lī ê kiáⁿ；Boa̍t-lī、Bó͘-sī。Chiah-ê是利未hiah-ê家，照in ê世系。Bí-la̍h-lī ê kiáⁿ; Boa̍t-lī, Bó͘-sī. Chiah-ê sī Lī-bī hiah-ê ke, chiàu in ê sè-hē.

20Àm-lân娶伊ê 姑，Iok-ki-piat，做bó͘；伊kā伊生亞倫kap摩西；Àm-lân享壽一百三十七歲。Àm-lân chhōa i ê ko͘, Iok-ki-pia̍t, chòe-bó͘; i kā i siⁿ A-lûn kap Mô͘-se; Àm-lân hióng-siū chi̍t-pah saⁿ-cha̍p-chhit hè.

21Í-su-hap ê kiáⁿ；Khó-la̍h、Nî-húi、Sè-ki-lī。Í-su-hap ê kiáⁿ; Khó-la̍h, Nî-húi, Sè-ki-lī.

22O͘-siat ê kiáⁿ；Bí-sa-lī、Í-lī-sat-hoán、Se-thê-lī。O͘-siat ê kiáⁿ; Bí-sa-lī, Í-lī-sat-hoán, Se-thê-lī.

23亞倫娶A-bí-ná-ta̍t ê cha-bó͘-kiáⁿ，Ná-sūn ê小妹，以利沙巴做bó͘；伊kā伊生Ná-tap、A-pí-hō͘、Í-lī-a-sat、Í-tha-má。A-lûn chhōa A-bí-ná-ta̍t ê cha-bó͘-kiáⁿ, Ná-sūn ê sió-bē, Í-lī-sa-pa chòe bó͘; i kā i siⁿ Ná-tap, A-pí-hō͘, Í-lī-a-sat, Í-tha-má.

24Khó-la̍h ê kiáⁿ；A-sek、Í-lī-ka-ná、A-pí-a-sat；chiah-ê是Khó-la̍h hiah-ê家。Khó-la̍h ê kiáⁿ; A-sek, Í-lī-ka-ná, A-pí-a-sat; chiah-ê sī Khó-la̍h hiah-ê ke.

25亞倫ê kiáⁿ Í-lī-a-sat娶Phó͘-thiat一個cha-bó͘-kiáⁿ做bó͘；伊kā伊生Hui-nî-hap。 Chiah-ê是利未人ê房長，照in ê 家族。A-lûn ê kiáⁿ Í-lī-a-sat chhōa Phó͘-thiat chi̍t ê cha-bó͘-kiáⁿ chòe-bó͘; i kā i siⁿ Hui-nî-hap. Chiah-ê sī Lī-bī lâng ê pâng-tiúⁿ, chiàu in ê ka-cho̍k.

26Chit-ê亞倫、摩西就是耶和華對in講：Tio̍h chhōa以色列人照in ê軍隊出埃及地ê。Chit-ê A-lûn Mô͘-se chiū-sī Iâ-hô-hoa tùi in kóng, Tio̍h chhōa Í-sek-lia̍t lâng chiàu in ê kun-tūi chhut Ai-ki̍p tōe ê.

27對埃及王，法老，講beh chhōa以色列人出埃及ê，就是chit-ê摩西、亞倫。Tùi Ai-ki̍p ông, Hoat-ló, kóng beh chhōa Í-sek-lia̍t lâng chhut Ai-ki̍p ê, chiū-sī chit-ê Mô͘-se, A-lûn.

28當耶和華tī埃及地對摩西講話ê日，Tng Iâ-hô-hoa tī Ai-ki̍p tōe tùi Mô͘-se kóng-ōe ê ji̍t,

29耶和華對摩西講：我就是耶和華；我對你所講一切ê話，你lóng tio̍h kā埃及王法老講。Iâ-hô-hoa tùi Mô͘-se kóng, Góa chiū-sī Iâ-hô-hoa; Góa tùi lí só͘ kóng it-chhè ê ōe, lí lóng tio̍h kā Ai-ki̍p ông Hoat-ló kóng.

30摩西tī耶和華ê面前講：看ah，我是嘴舌鈍ê人，法老thái-thó beh聽我ah？Mô͘-se tī Iâ-hô-hoa ê bīn-chêng kóng, Khòaⁿ ah, góa sī chhùi-chi̍h tun ê lâng, Hoat-ló thái-thó beh thiaⁿ góa ah?