1耶和華kā摩西講：你入去見法老，kā伊講：耶和華án-ni講：准我ê百姓去，thang服事我。Iâ-hô-hoa kā Mô͘-se kóng, Lí ji̍p-khì kìⁿ Hoat-ló, kā i kóng, Iâ-hô-hoa án-ni kóng, Chún Góa ê peh-sìⁿ khì, thang ho̍k-sāi Góa.

2你若m̄准in去，看ah，我beh hō͘田蛙á phah-pháiⁿ你ê境內。Lí nā m̄-chún in khì, khòaⁿ ah, Góa beh hō͘ chhân-kap-á phah-pháiⁿ lí ê kéng-lāi.

3河beh生湠田蛙á，in beh上來入你ê宮殿，你ê睏房，上你ê眠床，入你ê人臣ê厝，上你ê百姓ê身軀，入你ê灶孔，kap你chhiau麵ê器具。Hô beh siⁿ-thòaⁿ chhân-kap-á, in beh chiūⁿ-lâi ji̍p lí ê kiong-tiān, lí ê khùn-pâng, chiūⁿ lí ê bîn-chhn̂g, ji̍p lí ê jîn-sîn ê chhù, chiūⁿ lí ê peh-sìⁿ ê seng-khu, ji̍p lí ê chàu-khang, kap lí chhiau-mī ê khì-kū.

4Koh beh上你，kap你ê百姓，以及你眾人臣ê身軀。Koh beh chiūⁿ lí, kap lí ê peh-sìⁿ, í-ki̍p lí chèng jîn-sîn ê seng-khu.

5耶和華對摩西講：你kā亞倫講：你ê手kia̍h柺á，伸tī江、河、池ê頂面，hō͘田蛙á上來埃及地。Iâ-hô-hoa tùi Mô͘-se kóng, Lí kā A-lûn kóng, Lí ê chhiú kia̍h koáiⁿ-á, chhun tī kang, hô, tî ê téng-bīn, hō͘ chhân-kap-á chiūⁿ-lâi Ai-ki̍p tōe.

6亞倫就伸伊ê手tī埃及chiah-ê水ê頂面；田蛙á就上來遮蓋thong埃及地。A-lûn chiū chhun i ê chhiú tī Ai-ki̍p chiah-ê chúi ê téng-bīn; chhân-kap-á chiū chiūⁿ-lâi jia-khàm thong Ai-ki̍p tōe.

7博士用in ê邪術也án-ni行，hō͘田蛙á上來埃及地。Phok-sū ēng in ê siâ-su̍t iā án-ni kiâⁿ, hō͘ chhân-kap-á chiūⁿ-lâi Ai-ki̍p tōe.

8法老叫摩西、亞倫講：請lín求耶和華hō͘ chiah-ê田蛙á離開我kap我ê百姓；我就准chit-ê百姓去thang祭祀耶和華。Hoat-ló kiò Mô͘-se, A-lûn kóng, Chhiáⁿ lín kiû Iâ-hô-hoa hō͘ chiah-ê chhân-kap-á lī-khui góa kap góa ê peh-sìⁿ; góa chiū chún chit-ê peh-sìⁿ khì thang chè-sū Iâ-hô-hoa.

9摩西對法老講：我遵chhûn你ê意思；我tio̍h為你，kap你ê人臣，以及你ê百姓，祈求tī甚麼時thang 除滅田蛙á離開你，kap你hiah-ê厝，只有留tī河裡ah？Mô͘-se tùi Hoat-ló kóng, Góa chun-chhûn lí ê ì-sù; góa tio̍h ūi lí, kap lí ê jîn-sîn, í-ki̍p lí ê peh-sìⁿ, kî-kiû tī sím-mi̍h sî thang tû-bia̍t chhân-kap-á lī-khui lí, kap lí hiah-ê chhù, chí-ū lâu tī hô-ni̍h ah?

10伊講：明á日。講：Thang照你ê話；hō͘你知阮ê上帝耶和華無一個能比並得。I kóng, Bîn-á-ji̍t. Kóng, Thang chiàu lí ê ōe; hō͘ lí chai goán ê Siōng-tè Iâ-hô-hoa bô chi̍t-ê ōe pí-phēng-tit.

11田蛙á beh離開你kap你hiah-ê厝，kap你ê人臣，以及你ê百姓，只有留tī河裡。Chhân-kap-á beh lī-khui lí kap lí hiah-ê chhù, kap lí ê jîn-sîn, í-ki̍p lí ê peh-sìⁿ, chí-ū lâu tī hô-ni̍h.

12摩西、亞倫離開法老出去；摩西為tio̍h伊所差來害法老ê田蛙á求叫耶和華。Mô͘-se, A-lûn lī-khui Hoat-ló chhut-khì; Mô͘-se ūi-tio̍h I só͘ chhe lâi hāi Hoat-ló ê chhân-kap-á kiû-kiò Iâ-hô-hoa.

13耶和華就照摩西ê話來行；見若tī厝內、院中、田裡ê田蛙á lóng死。Iâ-hô-hoa chiū chiàu Mô͘-se ê ōe lâi kiâⁿ; kìⁿ-nā tī chhù-lāi, īⁿ-tiong, chhân-ni̍h ê chhân-kap-á lóng sí.

14人拾in kui堆，遍地lóng臭味。Lâng khioh in kui-tui, piàn-tōe lóng chhàu-bī.

15法老看見tāi-chì有khah寬，就硬伊ê心，m̄聽in；tú-tú照耶和華所講ê。Hoat-ló khòaⁿ-kìⁿ tāi-chì ū khah-khoan, chiū ngī i ê sim, m̄-thiaⁿ in; tú-tú chiàu Iâ-hô-hoa só͘ kóng ê.

16耶和華對摩西講：你kā亞倫講：伸出你ê柺á，phah地裡ê土粉，hō͘伊tī埃及遍地變做蝨母。Iâ-hô-hoa tùi Mô͘-se kóng, Lí kā A-lûn kóng, Chhun-chhut lí ê koáiⁿ-á, phah tōe-ni̍h ê thô͘-hún, hō͘ i tī Ai-ki̍p piàn-tōe pìⁿ-chòe sat-bú.

17In就án-ni行；亞倫kia̍h柺á，伸手phah地裡ê土粉，就tī人kap cheng-siⁿ ê身軀lóng有蝨母；地裡ê土粉tī埃及遍地lóng變做蝨母。In chiū án-ni kiâⁿ; A-lûn kia̍h koáiⁿ-á, chhun-chhiú phah tōe-ni̍h ê thô͘-hún, chiū tī lâng kap cheng-siⁿ ê seng-khu lóng ū sat-bú; tōe-ni̍h ê thô͘-hún tī Ai-ki̍p piàn-tōe lóng piàn-chòe sat-bú.

18博士也用in ê邪術照án-ni做，ài生出蝨母，總是bōe能；án-ni tī人kap cheng-siⁿ ê身軀lóng有蝨母。Phok-sū iā ēng in ê siâ-su̍t chiàu án-ni chòe, ài siⁿ-chhut sat-bú, chóng-sī bōe-ōe; án-ni tī lâng kap cheng-siⁿ ê seng-khu lóng ū sat-bú.

19博士對法老講：這是上帝ê手段；法老ê心硬，m̄聽in；tú-tú照耶和華所講ê。Phok-sū tùi Hoat-ló kóng, Che sī Siōng-tè ê chhiú-tōaⁿ; Hoat-ló ê sim ngī, m̄-thiaⁿ in; tú-tú chiàu Iâ-hô-hoa só͘ kóng ê.

20耶和華kā摩西講：你清早起來；看ah，法老beh到水邊；你khiā tī伊ê面頭前，kā伊講：耶和華án-ni講：准我ê百姓去，thang服事我。Iâ-hô-hoa kā Mô͘-se kóng, Lí chheng-chá khí-lâi; khòaⁿ ah, Hoat-ló beh kàu chúi-piⁿ; lí khiā tī i ê bīn-thâu-chêng, kā i kóng, Iâ-hô-hoa án-ni kóng, Chún Góa ê peh-sìⁿ khì, thang ho̍k-sāi Góa.

21你若m̄准我ê百姓去，我beh差kui陣ê胡蠅到tī你，kap你ê人臣，以及你ê百姓，也beh入你hiah-ê厝；koh埃及人ê厝，kap in所khiā起ê所在，lóng beh有kui陣ê胡蠅滿滿。Lí nā m̄-chún Góa ê peh-sìⁿ khì, Góa beh chhe kui-tīn ê hô͘-sîn kàu tī lí, kap lí ê jîn-sîn, í-ki̍p lí ê peh-sìⁿ, iā beh ji̍p lí hiah-ê chhù; koh Ai-ki̍p lâng ê chhù, kap in só͘ khiā-khí ê só͘-chāi, lóng beh ū kui-tīn ê hô͘-sîn móa-móa.

22當hit日，我beh分別我ê百姓所khiā起ê Ko-san地，tī-hia無beh有kui陣ê胡蠅；thang hō͘你知，我tī天下中做耶和華。Tng hit-ji̍t, Góa beh hun-piat Góa ê peh-sìⁿ só͘ khiā-khí ê Ko-san tōe, tī-hia bô beh ū kui-tīn ê hô͘-sîn; thang hō͘ lí chai Góa tī thiⁿ-ē-tiong chòe Iâ-hô-hoa.

23我beh分別我ê百姓kap你ê百姓；明á載beh有chit-ê神蹟。Góa beh hun-piat Góa ê peh-sìⁿ kap lí ê peh-sìⁿ; bîn-á-chài beh ū chit-ê sîn-jiah.

24耶和華án-ni行；就有胡蠅kui大陣來入法老ê宮殿kap伊ê人臣ê厝，kap埃及全地；地因為chit-ê kui陣ê胡蠅受敗壞。Iâ-hô-hoa án-ni kiâⁿ; chiū ū hô͘-sîn kui tōa-tīn lâi ji̍p Hoat-ló ê kiong-tiān kap i ê jîn-sîn ê chhù, kap Ai-ki̍p choân-tōe; tōe in-ūi chit-ê kui-tīn ê hô͘-sîn siū pāi-hoāi.

25法老叫摩西、亞倫來，講：lín去，tī chit-ê地祭祀lín ê上帝。Hoat-ló kiò Mô͘-se, A-lûn lâi, kóng, Lín khì, tī chit-ê tōe chè-sū lín ê Siōng-tè.

26摩西講：Án-ni行無合宜；因為阮beh用埃及人所厭惡ê物祭祀耶和華，阮ê上帝；阮若tī埃及人ê目睭前，用in所厭惡ê物來獻祭，in kiám無beh用石頭tìm阮mah？Mô͘-se kóng, Án-ni kiâⁿ bô ha̍p-gî; in-ūi goán beh ēng Ai-ki̍p lâng só͘ iàm-ò͘ⁿ ê mi̍h chè-sū Iâ-hô-hoa, goán ê Siōng-tè; goán nā tī Ai-ki̍p lâng ê ba̍k-chiu-chêng, ēng in só͘ iàm-ò͘ⁿ ê mi̍h lâi hiàn-chè, in kiám bô beh ēng chio̍h-thâu tìm goán mah?

27阮beh去曠野，行三日ê路站，祭祀阮ê上帝耶和華，照伊所beh吩咐阮。Goán beh khì khòng-iá, kiâⁿ saⁿ-ji̍t ê lō͘-chām, chè-sū goán ê Siōng-tè Iâ-hô-hoa, chiàu I só͘ beh hoan-hù goán.

28法老講：我beh准lín去，tī曠野祭祀耶和華lín ê上帝；獨獨m̄-thang去遠；lín tio̍h替我祈禱。Hoat-ló kóng, Góa beh chún lín khì, tī khòng-iá chè-sū Iâ-hô-hoa lín ê Siōng-tè; to̍k-to̍k m̄-thang khì hn̄g; lín tio̍h thòe góa kî-tó.

29摩西講：我beh對你chia出去，也beh求耶和華hō͘ kui陣ê胡蠅明á日離開法老，kap伊ê人臣，以及伊ê百姓；總是法老m̄-thang koh詭詐，m̄准百姓去祭祀耶和華。Mô͘-se kóng, Góa beh tùi lí chia chhut-khì iā beh kiû Iâ-hô-hoa hō͘ kui-tīn ê hô͘-sîn bîn-á-ji̍t lī-khui Hoat-ló, kap i ê jîn-sîn, í-ki̍p i ê peh-sìⁿ; chóng-sī Hoat-ló m̄-thang koh khúi-chà, m̄-chún peh-sìⁿ khì chè-sū Iâ-hô-hoa.

30摩西就tùi法老hia出去，祈禱耶和華。Mô͘-se chiū tùi Hoat-ló hia chhut-khì, kî-tó Iâ-hô-hoa.

31耶和華就照摩西ê話行，hō͘ kui陣ê胡蠅離開法老，kap伊ê人臣，以及伊ê百姓；無留一隻。Iâ-hô-hoa chiū chiàu Mô͘-se ê ōe kiâⁿ, hō͘ kui-tīn ê hô͘-sîn lī-khui Hoat-ló, kap i ê jîn-sîn, í-ki̍p i ê peh-sìⁿ; bô lâu chi̍t-chiah.

32Chit-pái法老koh硬伊ê心，m̄准百姓去。Chit-pái Hoat-ló koh ngī i ê sim, m̄-chún peh-sìⁿ khì.

1耶和華對摩西講：你入去見法老，kā伊講：耶和華，希伯來人ê上帝，án-ni講：Tio̍h准我ê百姓去，thang服事我。Iâ-hô-hoa tùi Mô͘-se kóng, Lí ji̍p-khì kìⁿ Hoat-ló, kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Tio̍h chún Góa ê peh-sìⁿ khì, thang ho̍k-sāi Góa.

2你若m̄肯hō͘ in去，猶原勉強留in，Lí nā m̄-khéng hō͘ in khì, iû-goân bián-kióng lâu in,

3看ah，耶和華ê手beh伸tī你田裡ê cheng-siⁿ、馬、驢、駱駝、牛群、羊群；beh有重ê瘟疫。khòaⁿ ah, Iâ-hô-hoa ê chhiú beh chhun tī lí chhân-ni̍h ê cheng-siⁿ, bé, lû, lo̍k-tô, gû-kûn, iûⁿ-kûn; beh ū tāng ê un-e̍k.

4耶和華beh分別以色列ê cheng-siⁿ kap埃及ê cheng-siⁿ；凡若屬以色列人ê，無死一隻。Iâ-hô-hoa beh hun-piat Í-sek-lia̍t ê cheng-siⁿ kap Ai-ki̍p ê cheng-siⁿ; hoān-nā sio̍k Í-sek-lia̍t lâng ê, bô sí chi̍t-chiah.

5耶和華就定tio̍h時期，講：明á日耶和華beh tī chit-ê地行chit-ê事。Iâ-hô-hoa chiū tiāⁿ-tio̍h sî-kî, kóng, Bîn-á-ji̍t Iâ-hô-hoa beh tī chit-ê tōe kiâⁿ chit-ê sū.

6隔日耶和華就行chit-ê事；埃及ê cheng-siⁿ lóng總死；總是以色列人ê cheng-siⁿ lóng無死一隻。Keh-ji̍t Iâ-hô-hoa chiū kiâⁿ chit-ê sū; Ai-ki̍p ê cheng-siⁿ lóng-chóng sí; chóng-sī Í-sek-lia̍t lâng ê cheng-siⁿ lóng bô sí chi̍t-chiah.

7法老差人去，看ah，以色列人ê cheng-siⁿ，連一隻也無死。總是法老ê心固執，m̄准百姓去。Hoat-ló chhe lâng khì, khòaⁿ ah, Í-sek-lia̍t lâng ê cheng-siⁿ, liân chi̍t-chiah iā bô sí. Chóng-sī Hoat-ló ê sim kò͘-chip, m̄-chún peh-sìⁿ khì.

8耶和華對摩西、亞倫講：Lín tio̍h put 幾nā phóng爐裡ê火灰，摩西tio̍h tī法老ê面前ǹg天掖(iā)去；Iâ-hô-hoa tùi Mô͘-se, A-lûn kóng, Lín tio̍h put kúi-nā phóng lô͘-ni̍h ê hé-hu, Mô͘-se tio̍h tī Hoat-ló ê bīn-chêng ǹg-thiⁿ iā-khì;

9beh tī埃及全地變做塵埃；tī埃及全地，tī人kap cheng-siⁿ ê身軀，lóng生粒á，成做瘡。beh tī Ai-ki̍p choân-tōe pìⁿ-chòe tîn-ai; tī Ai-ki̍p choân-tōe, tī lâng kap cheng-siⁿ ê seng-khu, lóng siⁿ lia̍p-á, chiâⁿ-chòe chhng.

10In就put爐裡ê火灰，khiā tī法老ê面前；摩西ǹg天掖去，就tī人kap cheng-siⁿ ê身軀生粒á，成做瘡。In chiū put lô͘-ni̍h ê hé-hu, khiā tī Hoat-ló ê bīn-chêng; Mô͘-se ǹg-thiⁿ iā-khì, chiū tī lâng kap cheng-siⁿ ê seng-khu siⁿ lia̍p-á, chiâⁿ-chòe chhng.

11博士因為粒á tī摩西ê面前khiā-bōe-tiâu；因為博士kap一切埃及人ê身軀lóng有hit號粒á。Phok-sū in-ūi lia̍p-á tī Mô͘-se ê bīn-chêng khiā-bōe-tiâu; in-ūi phok-sū kap it-chhè Ai-ki̍p lâng ê seng-khu lóng ū hit-hō lia̍p-á.

12耶和華hō͘法老ê心硬，致到m̄聽in；tú-tú照耶和華對摩西所講ê。Iâ-hô-hoa hō͘ Hoat-ló ê sim ngī, tì-kàu m̄-thiaⁿ in; tú-tú chiàu Iâ-hô-hoa tùi Mô͘-se só͘ kóng ê.

13耶和華對摩西講：你清早起來，khiā tī法老ê面前kā伊講：耶和華，希伯來人ê上帝，án-ni講：Tio̍h准我ê百姓去，hō͘ in thang服事我。Iâ-hô-hoa tùi Mô͘-se kóng, Lí chheng-chá khí-lâi, khiā tī Hoat-ló ê bīn-chêng kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Tio̍h chún Góa ê peh-sìⁿ khì, hō͘ in thang ho̍k-sāi Góa.

14因為chit一pái我beh hō͘我一切ê災禍到tī你ê心，kap你ê人臣，以及你ê百姓，hō͘你知tī普天下無一個ōe比並我。In-ūi chit-chi̍t-pái Góa beh hō͘ Góa it-chhè ê chai-ē kàu tī lí ê sim, kap lí ê jîn-sîn, í-ki̍p lí ê peh-sìⁿ, hō͘ lí chai tī phó͘-thiⁿ-ē bô chi̍t-ê ōe pí-phēng Góa.

15我若伸手，用瘟疫攻擊你kap你ê百姓，你就已經滅tī地上；Góa nā chhun-chhiú, ēng un-e̍k kong-kek lí kap lí ê peh-sìⁿ, lí chiū í-keng bia̍t tī tōe-chiūⁿ;

16總是我hō͘你khiā在，是tiâu故意beh用你顯明我ê大權能，hō͘我ê名報揚tī遍地上。chóng-sī Góa hō͘ lí khiā-chāi, sī tiâu-kò͘-ì beh ēng lí hián-bêng Góa ê tōa koân-lêng, hō͘ Góa ê miâ pò-iông tī piàn-tōe-chiūⁿ.

17你iáu-kú對我ê百姓自高，m̄准in去mah？Lí iáu-kú tùi Góa ê peh-sìⁿ chū-ko, m̄-chún in khì mah?

18看ah，明á日將近chit時，我beh落大雹，tùi埃及開國以來bē-bat有án-ni。Khòaⁿ ah, bîn-á-ji̍t chiong-kūn chit-sî, Góa beh lo̍h tōa-pha̍uh, tùi Ai-ki̍p khai-kok í-lâi bē-bat ū án-ni.

19Taⁿ你tio̍h差人，將你ê cheng-siⁿ kap你田裡一切所有ê，逼in入來；凡若tī田裡，無收tò來家裡ê，無論人kap cheng-siⁿ，雹beh落tī in ê身上，in就beh死。Taⁿ lí tio̍h chhe lâng, chiong lí ê cheng-siⁿ kap lí chhân-ni̍h it-chhè só͘-ū-ê, pek in ji̍p-lâi; hoān-nā tī chhân-ni̍h, bô siu tò-lâi ke-ni̍h-ê, bô-lūn lâng kap cheng-siⁿ, pha̍uh beh lo̍h tī in ê sin-chiūⁿ, in chiū beh sí.

20法老人臣ê中間，驚畏耶和華ê話ê，就hō͘伊ê奴僕kap cheng-siⁿ走入厝內；Hoat-ló jîn-sîn ê tiong-kan, kiaⁿ-ùi Iâ-hô-hoa ê ōe ê, chiū hō͘ i ê lô͘-po̍k kap cheng-siⁿ cháu ji̍p chhù-lāi;

21總是hit-ê無掠耶和華ê會做要緊ê，就將伊ê奴僕kap cheng-siⁿ留tī田裡。chóng-sī hit-ê bô lia̍h Iâ-hô-hoa ê ōe chòe iàu-kín ê, chiū chiong i ê lô͘-po̍k kap cheng-siⁿ lâu tī chhân-ni̍h.

22耶和華對摩西講：你ǹg天伸手，hō͘雹落tī埃及ê遍地，phah人kap cheng-siⁿ，以及田裡ê菜蔬，thong埃及地lóng án-ni。Iâ-hô-hoa tùi Mô͘-se kóng, Lí ǹg-thiⁿ chhun-chhiú, hō͘ pha̍uh lo̍h tī Ai-ki̍p ê piàn-tōe, phah lâng kap cheng-siⁿ, í-ki̍p chhân-ni̍h ê chhài-soe, thong Ai-ki̍p tōe lóng án-ni.

23摩西ǹg天伸出伊ê柺á，耶和華就起雷落雹，有火行tī地面上；耶和華落雹tī埃及地。Mô͘-se ǹg-thiⁿ chhun-chhut i ê koáiⁿ-á, Iâ-hô-hoa chiū khí-lûi lo̍h-pha̍uh, ū hé kiâⁿ tī tōe-bīn-chiūⁿ; Iâ-hô-hoa lo̍h-pha̍uh tī Ai-ki̍p tōe.

24Tùi án-ni，有雹，也有火chham tī雹ê內面，真厲害；tùi埃及開國以來遍地未bat有án-ni。Tùi án-ni ū pha̍uh , iā ū hé chham tī pha̍uh ê lāi-bīn, chin lī-hāi; tùi Ai-ki̍p khai-kok í-lâi piàn-tōe bē bat ū án-ni.

25Tī埃及遍地，見若tī田裡ê，無論人á是cheng-siⁿ，lóng hō͘雹phah；雹也phah田裡一切ê菜蔬，koh phah折田裡一切ê樹木。Tī Ai-ki̍p piàn-tōe, kìⁿ-nā tī chhân-ni̍h-ê, bô-lūn lâng á-sī cheng-siⁿ, lóng hō͘ pha̍uh phah; pha̍uh iā phah chhân-ni̍h it-chhè ê chhài-soe, koh phah-chi̍h chhân-ni̍h it-chhè ê chhiū-ba̍k.

26獨獨tī以色列人所tiàm ê Ko-san地無落雹。To̍k-to̍k tī Í-sek-lia̍t lâng só͘ tiàm ê Ko-san tōe bô lo̍h-pha̍uh.

27法老差人叫摩西、亞倫來，kā in講：Chit一pái我有犯罪；耶和華是公義，我kap我ê百姓是pháiⁿ。Hoat-ló chhe lâng kiò Mô͘-se, A-lûn lâi, kā in kóng, Chit-chi̍t-pái góa ū hoān-chōe; Iâ-hô-hoa sī kong-gī, góa kap góa ê peh-sìⁿ sī pháiⁿ.

28Taⁿ chiah-ê 脆雷kap雹已經夠額lah；求lín祈禱耶和華；我就准lín去，m̄免koh tiàm chia。Taⁿ chiah-ê chhè-lûi kap pha̍uh í-keng kàu-gia̍h lah; kiû lín kî-tó Iâ-hô-hoa; góa chiū chún lín khì, m̄-bián koh tiàm chia.

29摩西kā伊講：我一下出城就beh ǹg耶和華kia̍h起我雙支手；雷beh soah，雹也無koh落；hō͘你知全地lóng屬tī耶和華。Mô͘-se kā i kóng, Góa chi̍t-ē chhut-siâⁿ chiū beh ǹg Iâ-hô-hoa kia̍h-khí góa siang ki chhiú; lûi beh soah, pha̍uh iā bô koh lo̍h; hō͘ lí chai choân-tōe lóng sio̍k tī Iâ-hô-hoa.

30總是論到你kap你ê人臣，我知lín iáu是無驚畏耶和華上帝。Chóng-sī lūn-kàu lí kap lí ê jîn-sîn, góa chai lín iáu sī bô kiaⁿ-ùi Iâ-hô-hoa Siōng-tè.

31Hit時麻kap大麥受phah-pháiⁿ；因為大麥已經出穗，麻也開花。Hit-sî môa kap tōa-be̍h siū phah-pháiⁿ; in-ūi tōa-be̍h í-keng chhut-sūi, môa iā khui-hoe.

32獨獨小麥kap粗麥無受phah-pháiⁿ；因為猶未大叢。To̍k-to̍k sió-be̍h kap chho͘-be̍h bô siū phah-pháiⁿ; in-ūi iáu-bē tōa-châng.

33摩西離開法老出城，kia̍h起雙手ǹg耶和華，雷kap雹就soah，雨也無koh piàⁿ落地。Mô͘-se lī-khui Hoat-ló chhut-siâⁿ, kia̍h-khí siang-chhiú ǹg Iâ-hô-hoa, lûi kap pha̍uh chiū soah, hō͘ iā bô koh piàⁿ-lo̍h tōe.

34法老看見雨、雹，kap雷lóng soah，就益發犯罪；伊kap伊ê人臣lóng硬心。Hoat-ló khòaⁿ-kìⁿ hō͘, pha̍uh, kap lûi lóng soah, chiū it-hoat hoān-chōe; i kap i ê jîn-sîn lóng ngī-sim.

35法老心硬，m̄准以色列人去，tú-tú照耶和華託摩西所講ê。Hoat-ló sim ngī, m̄-chún Í-sek-lia̍t lâng khì, tú-tú chiàu Iâ-hô-hoa thok Mô͘-se só͘ kóng ê.

1耶和華對摩西講：你入去見法老；因為我已經hō͘伊ê心，kap伊ê人臣ê心，剛硬，thang hō͘我顯明我chiah-ê神蹟tī in中間；Iâ-hô-hoa tùi Mô͘-se kóng, Lí ji̍p-khì kìⁿ Hoat-ló; in-ūi Góa í-keng hō͘ i ê sim, kap i ê jîn-sîn ê sim, kong-ngī, thang hō͘ Góa hián-bêng Góa chiah-ê sîn-jiah tī in tiong-kan;

2也beh hō͘你將我所做tī埃及ê事，kap我tī in中間所行chiah-ê神蹟，傳hō͘你ê kiáⁿ kap你ê孫聽，thang hō͘ lín知我是耶和華。iā beh hō͘ lí chiong Góa só͘ chòe tī Ai-ki̍p ê sū, kap Góa tī in tiong-kan só͘ kiâⁿ chiah-ê sîn-jiah, thoân hō͘ lí ê kiáⁿ kap lí ê sun thiaⁿ, thang hō͘ lín chai Góa sī Iâ-hô-hoa.

3摩西、亞倫就去見法老，kā伊講：耶和華，希伯來人ê上帝，án-ni講：你tī我ê面前m̄肯家己謙卑，beh到甚麼時ah？tio̍h准我ê百姓去，hō͘ in服事我。Mô͘-se, A-lûn chiū khì kìⁿ Hoat-ló, kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Lí tī Góa ê bīn-chêng m̄-khéng ka-kī khiam-pi, beh kàu sím-mi̍h sî ah? tio̍h chún Góa ê peh-sìⁿ khì, hō͘ in ho̍k-sāi Góa.

4你若m̄肯hō͘我ê百姓去，看ah，明á日我beh hō͘草蜢入你ê境內；Lí nā m̄-khéng hō͘ Góa ê peh-sìⁿ khì, khòaⁿ ah, bîn-á-ji̍t Góa beh hō͘ chháu-meh ji̍p lí ê kéng-lāi;

5in beh遮蓋地面，致到bōe看見土；koh beh食hit-ê tùi災禍所chhun ê，就是雹所phah無了ê；也beh食田裡為lín所發一切ê樹木；in beh jia-khàm tōe-bīn, tì-kàu bōe khòaⁿ-kìⁿ thô͘; koh beh chia̍h hit-ê tùi chai-ē só͘-chhun-ê, chiū-sī pha̍uh só͘ phah bô liáu ê; iā beh chia̍h chhân-ni̍h ūi lín só͘ hoat it-chhè ê chhiū-ba̍k;

6草蜢beh充滿你ê厝，kap你ê眾人臣ê厝，以及一切埃及人ê厝，對你ê老父kap你ê祖公出世到taⁿ，bē-bat看見án-ni。摩西就oa̍t-tńg身，離開法老出去。chháu-meh beh chhiong-móa lí ê chhù, kap lí ê chèng jîn-sîn ê chhù, í-ki̍p it-chhè Ai-ki̍p lâng ê chhù, tùi lí ê lāu-pē kap lí ê chó͘-kong chhut-sì kàu taⁿ, bē-bat khòaⁿ-kìⁿ án-ni. Mô͘-se chiū oa̍t-tńg-sin, lī-khui Hoat-ló chhut-khì.

7法老ê人臣對伊講，Chit人做咱ê羅網，beh到甚麼時ah？Tio̍h 准chiah-ê人去服事耶和華in ê上帝；埃及已經敗壞，你kiám m̄知mah？Hoat-ló ê jîn-sîn tùi i kóng, Chit lâng chòe lán ê lô-bāng, beh kàu sím-mi̍h sî ah? tio̍h chún chiah-ê lâng khì ho̍k-sāi Iâ-hô-hoa in ê Siōng-tè; Ai-ki̍p í-keng pāi-hoāi, lí kiám m̄-chai mah?

8Tùi án-ni，摩西、亞倫受召倒tńg來見法老；法老kā in講：lín去服事耶和華lín ê上帝；獨獨hiah-ê beh去ê，是甚麼號人ah？Tùi án-ni, Mô͘-se, A-lûn siū tiàu tò-tńg-lâi kìⁿ Hoat-ló; Hoat-ló kā in kóng, Lín khì ho̍k-sāi Iâ-hô-hoa lín ê Siōng-tè; to̍k-to̍k hiah-ê beh-khì-ê, sī sím-mi̍h hō lâng ah?

9摩西講：阮beh kap阮ê少年人老人去，也beh tòa阮ê kiáⁿ cha-bó͘-kiáⁿ，kap阮ê羊群牛群做一下去；因為阮tio̍h守耶和華ê節。Mô͘-se kóng, Goán beh kap goán ê siàu-liân lâng lāu-lâng khì, iā beh tòa goán ê kiáⁿ cha-bó͘-kiáⁿ, kap goán ê iûⁿ-kûn gû-kûn chòe chi̍t-ē khì; in-ūi goán tio̍h siú Iâ-hô-hoa ê choeh.

10法老對in講：好lah，我准lín kap lín ê gín-á去lah，願耶和華kap lín tī-teh；lín tio̍h謹慎，災禍tī lín目睭前lah；Hoat-ló tùi in kóng, Hó-lah, góa chún lín kap lín ê gín-á khì lah, goān Iâ-hô-hoa kap lín tī-teh; lín tio̍h kín-sīn, chai-ē tī lín ba̍k-chiu-chêng lah;

11án-ni bōe做得；lín chiah-ê大人thang去服事耶和華，因為這是lín所求ê。就tùi法老ê面前趕in出去。án-ni bōe-chòe-tit; lín chiah-ê tōa-lâng thang khì ho̍k-sāi Iâ-hô-hoa, in-ūi che sī lín só͘ kiû ê. Chiū tùi Hoat-ló ê bīn-chêng kóaⁿ in chhut-khì.

12耶和華kā摩西講：你伸手kí埃及地，hō͘草蜢上來埃及地，食地裡一切ê菜蔬，就是雹phah無了ê。Iâ-hô-hoa kā Mô͘-se kóng, Lí chhun-chhiú kí Ai-ki̍p tōe, hō͘ chháu-meh chiūⁿ-lâi Ai-ki̍p tōe, chia̍h tōe-ni̍h it-chhè ê chhài-soe, chiū-sī pha̍uh phah bô liáu ê.

13摩西就伸伊ê柺á，kí埃及地；耶和華就hō͘東風thong日thong暝吹tī地裡；到明á早起，東風就將草蜢吹來。Mô͘-se chiū chhun i ê koáiⁿ-á, kí Ai-ki̍p tōe; Iâ-hô-hoa chiū hō͘ tang-hong thong-ji̍t thong-mî chhe tī tōe-ni̍h; kàu bîn-á-chá-khí, tang-hong chiū chiong chháu-meh chhe-lâi.

14草蜢上來埃及遍地，歇tī埃及ê四境，厲害到極；從前無有án-ni ê草蜢，以後也無beh án-ni；Chháu-meh chiūⁿ-lâi Ai-ki̍p piàn-tōe, hioh tī Ai-ki̍p ê sì-kéng, lī-hāi kàu-ke̍k; chiông-chêng bô ū án-ni ê chháu-meh, í-āu iā bô beh án-ni;

15因為in遮蓋全地，致到地lóng烏暗；koh食地上一切ê菜蔬，kap樹裡ê果子，雹所phah無了ê。埃及遍地，無論樹木，á是田裡ê菜蔬，無留一項青翠ê物。in-ūi in jia-khàm choân-tōe, tì-kàu tōe lóng o͘-àm; koh chia̍h tōe-chiūⁿ it-chhè ê chhài-soe, kap chhiū-ni̍h ê ké-chí, pha̍uh só͘ phah bô liáu ê. Ai-ki̍p piàn-tōe, bô-lūn chhiū-ba̍k, á-sī chhân-ni̍h ê chhài-soe, bô lâu chi̍t-hāng chhiⁿ-chhùi ê mi̍h.

16Tùi án-ni，法老趕緊叫摩西、亞倫來，講：我得罪lín ê上帝耶和華，也得罪lín。Tùi án-ni Hoat-ló kóaⁿ-kín kiò Mô͘-se, A-lûn lâi, kóng, Góa tek-chōe lín ê Siōng-tè Iâ-hô-hoa, iā tek-chōe lín.

17Taⁿ求你，kan-ta chiT一pái赦免我ê罪，求lín ê上帝耶和華，hō͘我脫離chiT一pái ê死無。Taⁿ kiû lí, kan-ta chit-chi̍t-pái sià-bián góa ê chōe, kiû lín ê Siōng-tè Iâ-hô-hoa, hō͘ góa thoat-lī chit-chi̍t-pái ê sí-bô.

18摩西就離開法老，去求耶和華。Mô͘-se chiū lī-khui Hoat-ló, khì kiû Iâ-hô-hoa.

19耶和華就tńg真透ê西風將草蜢吹起來，趕入紅海；tī埃及ê四境無留一隻草蜢。Iâ-hô-hoa chiū tńg chin-thàu ê sai-hong chiong chháu-meh chhe-khí-lâi, kóaⁿ-ji̍p Âng-hái; tī Ai-ki̍p ê sì-kéng bô lâu chi̍t-chiah chháu-meh.

20總是耶和華hō͘法老ê心硬，m̄准以色列人去。Chóng-sī Iâ-hô-hoa hō͘ Hoat-ló ê sim ngī, m̄-chún Í-sek-lia̍t lâng khì.

21耶和華kā摩西講：你伸手ǹg天，hō͘埃及地烏暗，chit-ê烏暗到能摸得。Iâ-hô-hoa kā Mô͘-se kóng, Lí chhun-chhiú ǹg-thiⁿ, hō͘ Ai-ki̍p tōe o͘-àm, chit-ê o͘-àm kàu ōe-bong-tit.

22摩西就伸手ǹg天，埃及遍地就三日久烏烏暗暗；Mô͘-se chiū chhun-chhiú ǹg thiⁿ, Ai-ki̍p piàn-tōe chiū saⁿ-ji̍t kú o͘-o͘ àm-àm;

23三日久人bōe看見人，也無起來離開伊ê所在；獨獨以色列人ê厝lóng有光。saⁿ-ji̍t kú lâng bōe khòaⁿ-kìⁿ lâng, iā bô khí-lâi lī-khui i ê só͘-chāi; to̍k-to̍k Í-sek-lia̍t lâng ê chhù lóng ū kng.

24法老就叫摩西來講：lín去服事耶和華，獨獨是lín ê羊群牛群tio̍h留teh，lín ê gín-á就thang kap lín相kap去。Hoat-ló chiū kiò Mô͘-se lâi kóng, Lín khì ho̍k-sāi Iâ-hô-hoa, to̍k-to̍k sī lín ê iûⁿ-kûn gû-kûn tio̍h lâu-teh, lín ê gín-á chiū thang kap lín saⁿ-kap khì.

25摩西講：你也tio̍h將牲禮kap燒祭ê物交阮ê手，hō͘阮thang祭祀耶和華阮ê上帝。Mô͘-se kóng, Lí iā tio̍h chiong seng-lé kap sio-chè ê mi̍h kau goán ê chhiú, hō͘ goán thang chè-sū Iâ-hô-hoa goán ê Siōng-tè.

26阮ê cheng-siⁿ也tio̍h kap阮去，連一隻也m̄留teh；因為阮tio̍h tùi hit中間取伊，來服事耶和華阮ê上帝；koh阮猶未到hia m̄知tio̍h用甚麼服事耶和華。Goán ê cheng-siⁿ iā tio̍h kap goán khì, liân chi̍t-chiah iā m̄ lâu-teh; in-ūi goán tio̍h tùi hit tiong-kan chhú i, lâi ho̍k-sāi Iâ-hô-hoa goán ê Siōng-tè; koh goán iáu-bē kàu hia m̄-chai tio̍h ēng sím-mi̍h ho̍k-sāi Iâ-hô-hoa.

27總是耶和華hō͘法老ê心硬，m̄肯hō͘ in去。Chóng-sī Iâ-hô-hoa hō͘ Hoat-ló ê sim ngī, m̄-khéng hō͘ in khì.

28法老kā摩西講：你tio̍h離開我去；你tio̍h謹慎家己，m̄-thang koh見我ê面；因為你見我ê面，hit日你會死。Hoat-ló kā Mô͘-se kóng, Lí tio̍h lī-khui góa khì; lí tio̍h kín-sīn ka-kī, m̄-thang koh kìⁿ góa ê bīn; in-ūi lí kìⁿ góa ê bīn, hit-ji̍t lí ōe sí.

29摩西講：你án-ni講：好；我無beh koh見你ê面lah。Mô͘-se kóng, Lí án-ni kóng, hó; góa bô beh koh kìⁿ lí ê bīn lah.